كاتب الموضوع :
الراكدة
المنتدى :
الارشيف
الفصل الرابع عشر
****************
في المزرعه
اليوم الثاني
****************
هند نايمه الى وقت العصر ،،،ما نامت طول الليل حرارتها مرتفعه ،،،
صحت على صوت أبوها ( هند ،،،هند ،،،)
فتحت عيونها اللي كانت مورمه ( هلا يبه ،،،)
متعب خايف عليها ( كيفك ألحين ،،،)
هند اتطمن أبوها ( ألحين أحسن ،،،الحمدلله )
متعب بحنان ( قومي يا بعد أبوك ،،،أوديك الطبيب )
هند تقوم وتعدل شعرها وصوتها متغير ( يبه ،،،والله طيبه ما فيني إلا العافيه،،يبه طلبتك اطلع لاعديك )
تدخل الجده عليها و الشغاله معها شوربه (طيبه طيبه ان شاء الله )
ودخل وراها جدها وعمها سلطان ،،، هند انحرجت وفزت من مكانها،،،داخت وتمسكت في أبوها ،،،(اسم الله عليك ،،،اجلسي) وجلسها على السرير،،،
أبو سلطان يلمس راسها ( يا بنتي حرارتك حرقت يدي ،،،روحي للطبيب)
هند تطمن جدها وهي مسكره على فمها بقماش( يبه حرارتي انزلت توني قايستها ،،،وبشرب الشوربه وآخذ الدوا وان شاء الله اصير احسن،،،بس انتوا روحوا أخاف اعديكم)
أبو طلال يحذرها ( هند ان ارتفعت مره ثانية ،،،لازم تروحين للطبيب )
هند تهز راسها بالموافقة ،،،
متعب يجلس في جنبها وياخذ صحن الشوربه ويحطه في حظنه ،،،ويشربها
انحرجت هند ( يبه فديت قلبك ابعد ترى والله خايفه عليك ،،،عطني أنا اشرب )
عصب أبوها ويمد الملعقة لفمها ( اشربي ،،،)
دمعت عين أبو سلطان وأم سلطان ،،،
سلطان بحب لاخوه ( الله يخليك لها ،،،)
وجلسوا يسولفون عندها الى حزة المغرب ،،،
دخلت عليهم مضاوي متغير وجها ( كيفك هند ألحين )
هند مرتاحه ( الحمدلله بخير ،،،)
مضاوي تلتفت على أبوها وجدها ( يبه خالي راكان جا في المجلس)
أبو طلال يقوم ( الله يحييه)
مضاوي مرتبكه تبي تكلم ومو قادره ،،،
أم سلطان كأنها حست ( معه أحد ،،،)
مضاوي تنزل راسها ( إيه معه أم فيصل وبناتها ،،،)
أم سلطان مستغربه ( وش بناتها ،،،)
مضاوي باستسلام وتنهد ( عبير ونجلا ،،،)
متعب رفع راسه يناظر مضاوي ،،،هند ما عاد ارفعت عينها
أم سلطان ومضاوي طلعوا من غير تعليق،،،بعد ما شافوا نظرة متعب
متعب يناظر هند بضيق ( هند لا تنزلين ،،،إنتي مريضة )
ارفعت راسها له ( ما راح يصدقون اني مريضه ،،،إلا بيقولون اتهرب )
متعب يلمس جبهتا وبعصبيه( باللعنه اللي تلعنهم ،،،لا يصدقون )
هند تبتسم لابوها وهي مغطيه فمها ( يبه تصدق،،، لو أدري ان طلال بيعاملني نفس معاملتك ،،،والله ما يهمني شي حتى لو عنده ثلاث غيري)
متعب ياخذ نفس ويبتسم لها ( يا بنتي ،،،طلال رجال سنافي ،،،لكن هذا في علم الغيب ،،،ان شاء الله يكون أحسن مني )
متعب يقوم بعد ما شربت هند الشوربه وشربت دواها ( نامي وما أبي أجي ألقاك تحت )
هند تلحف ( ان شاء الله )وتكمل ( يبه طلبتك ،،، لا تجي ،،،اتصل عشان خاطري،،،والله خايفه عليك من المرض )
أبوها ( إن شاء الله )
****************
في المطبخ
هنوف منقهرة وتنافخ طول ما هي تجهز معهم الفطور ،،،،
سار معصبه (هنوف اقلقتيني حسبي الله على عدوك ،،،)
هنوف وميته من الحرة ( عمه هاذي وش اللي جايبها ،،،ما تستحي )
هيا تهديها ( هنوف إهدي ،،، وخلي الليلة هاذي تعدي على خير ،،،الله يستر ،،،جدتي من جلست معهم ما تكلمت ولا تحفتهم )
نوره تصب الجريش اللي جايبته معها من بيتها ( لا تخافون الجازي موجوده ،،،مهوب صاير الا الخير ،،،)
هيا بقلق ( يا رب ،،،)
هنوف تنبهم ( ترى ما ني مفطره معكم بروح عند هنوده اقعد معها )
الجازي وهي داخله عليهم ( إلا بتفطرين معهم تبينهم يقولون بنات متعب ضعيفات ،،،)
ساره ( خلاص انا بحط لي فطور وبروح لهند افطر معها ،،،)
دخلوا الشباب المطبخ ياخذون الفطور ،،،وكان معهم طلال ،،،
طلال مهوب العاده ،،،الوجه شاحب ومكتئب،،،تلفت يدورها
هنوف لما شافته يتلفت تضايقت ،،، هيا ومضاوي وعماته اكتئبوا لانهم حاسين فيه،،،
هيا تبتسم له ( سرك حال المدام ،،،طيبه وبخير)
طلال باهتمام ( هنوف ،،،هند انزلت حرارتها ،،،)
هنوف اتطمنه ( ابشرك انزلت ،،،)
طلال ينبها ( اذا ارتفعت اتصلي علي بدون لا تستشيرينها ،،،فاهمه )
هنوف من غير عادتها ( ان شاء الله )
خذوا الشباب الفطور للمجلس ،،وجهزوا البنات فطور الحريم،،،
*******************
في بيت الشعر
الرياجيل يفطرون ،،،وطلال ياكل اللقمه ويالله تنزل ،،،
أبوه وأعمامه ملاحظينة ،،،وكل شوي أبوه يغمز له ،،،لين قام لانه ما عاد يستحمل
خذا جواله واتصل
وفي نفسه يا رب ترد،،،ما ردت عليه ،،،آآآآآآآآآآآآآآآآه ليه ما تردين ما تدرين اني خايف عليك ،،،
هند كانت نايمه،،،
بعد ما صحت كانت حرارتها منخفضه شوي ،،،قامت وجسمها مكسر ،،،تبي توضى وتصلي
كانت وقفتها تهزهز من قوة الحرارة اللي جاتها،،،ويالله توضت وصلت
كلمها أبوها يتطمن عليها ،،،ولما عرف انها قامت وصلت ،،،ارتاح لأنها أكيد انها طيبه
انزلت هند عليهم بعد صلاة التراويح ،،،كانوا فارشين بره البيت
هنوف كانت جالسه بجنب جدتها وعماتها ،،، مضاوي تصب القهوه ،،،هيا جالسة جنب عبير تسولف معها،،،نجلا بين عمتها أم طلال وأمها،،،
( السلام عليكم )
الحميع التفت عليها ،،،كانت مغطية فمها
وقفوا يسلمون ،،،حلفت عليهم يجلسون ،،،لانها ما تبي تعديهم
أم حمد عمتهم موضي( مرحبا بالزين،،،والله اني صادقه ،،،تعالي وزاني ،،،)
هند جلست على كرسي جايبته لها الشغاله ( لا يمه اعذريني،،،والله ما أبي أعديج ،،، بقعد هنيه أحسن )
أم سلطان بحنيه ( وشلونك ،،،جعل يومي قبل يومك ) هزت هند راسها وهي تكح
أم طلال تطمن عليها ( يمه هند ،،،كيف حالك)
هند بتعب وصوتها يالله يطلع ( ابشرك ،،،طيبه )
أم سلطان تقوم ساره ( قومي جيبي لها شي تذوقه ،،،على لحم بطنها من البارح )
هند مو مشتهيه العيشه (لااااا،،،ما أبي شي ،،،نفسي منسده )
أم طلال بحنيه ( لازم تاكلين عشان تعافين بسرعه)
أم حمد ( يا ويلي عليك ،،،مهوب زين تاخذين علاج وبطنك خاوي)
أم طلال تقوم ( أنا اللي بجيب لك عيشه )
فزت هنوف ( لا والله ما تجيبينه ،،،أنا بجيب لها ،،،شتبين هند )
هند بتعب وقلة حيله ( بعد شوي ،،،لا تجيبونه ألحين ،،،والله نفسي منسده)
أم طلال تنصحها وتحلف عليها ( احلفك بالله يا بنتي ما تاخذين الدوا وبطنك فاضي ،،،)
نجلا ما عجبها أسلوب عمتها الحنون مع هند ،،وصارت تلوي فمها وتأفف ،،،
تفشلت أمها من أسلوبها وقامت تنغزها عشان تنتبه لعمرها،،، عبير في نفسها ،،،الله يهديك يا نجلا متى بتحترمين الناس،،،
قامت نجلا وهي تأفف ودخلت داخل ،،،
كملوا جلستهم والجو كان براد ،،،هند كانت تحمل عشانهم ،،،
يمشي شوي شوي ،،،ويأشر لهم اسكتوا
جاهم بعد ما درى ان هند طيبه وجالسه معهم ،،،
هند معطيته ظهرها ،،، مسك راسها من وراها وحبه وقال (جعل أبرك عافيه )
هند شهقت وفزت واقفه من الروعه ،،،داخت أول ما وقفت وبغت تطيح لو ما مسكها وبصون واهن (ليش يبه تدنق علي وتحب راسي ) ،،،خنقتها العبره،،،ما تحملت
جلست على الكرسي وصاحت ،،،كانت بحاجتها تحس بشي خانقها من اليوم وما بينت لهم
هز راسه ( لا حول ولا قوة الا بالله ،،،)
قامت أم طلال تقرا عليها
أم سلطان بضيقه وتمسح دمعتها( روعتها ،،،يا بو سلطان)
أبو سلطان ضايق ( والله اني فرحت يوم دريت انها جالستن معكن )
الجازي تهديها ( هند اشربي مويه ،،،) وترش وجها
هنوف ساكته ،،،عارفه ان اختها حساسه وما تبي تبين،،، لكن،،، الموقف حدها انها تبين شعورها،،،حست بالضعف لما جدها انحنى وحب راسها
اشربت هند مويه واستغفرت ربها ،،،جلست شوي معهم عقبه استأذنت عشان تدخل تبي تنام
دخلت هند داخل لأنها كانت تعبانه،،،وهي تصعد الدرج،،،
(هند )
التفتت هند على الصوت وتفاجأت لما شافت نجلا ،،،وبتعب (نعم ،،،)
نجلا تبي تخلص كلامها قبل لا أحد يجي،،،(بتكلم معك شوي ممكن)
هند تعبانه بس تستحي ترد أحد( ممكن ،،،وين تبين ،،،)
نجلا بجديه( تعالي الصاله الداخليه ما فيه أحد،،،،)
راحت معها هند وجلست بتعب ( خير )
نجلا تاخذ نفس( أنا ما أبي ألف وأدور ،،،أنا جايه اليوم عشان أكلمك بموضوعنا)
هند بهدوء ( ما بيني وبينك أي موضوع،،،)
نجلا ترفع حاجب ( لا بينا طلال ،،،)
هند راسها صار يعورها ويالله تفتح عيونها ( والمطلوب ،،،)
نجلا وبفخر(إنتي عارفه اني طالبه الطلاق من زمان ،،،لكنه رافض يطلق ،،،)
هند تأفف تعبانه ( وبعدين )
نجلا تلوي فمها من طريقة كلام هند واللامبالاه اللي فيها ،،،ما درت ان هند من التعب ما هي قادره تكلم ،،،وتكمل
( هو مهوب راضي يطلقني عشان ما يفتضح أمره )
هند مستغربه ،،، ناظرتها عشان تكمل
نجلا كملت بعد ما شافت نظرة هند تغيرت( هند ،،،أنا رحت منه مثل ما جيته ،،،عشان كذا خايف يطلق ،،،إنت فاهمه ،،،وإلا أوضح أكثر )
هند نزلت راسها اللي وجعه زاد وتأشر لها بيدها تسكتها ( بس ،،،بس ،،،بس )
هند صدع راسها بزياده وارتفعت حرارتها من وقاحة نجلا وقلة حياها،،،وقامت بدون ما تعلق
وذا قهر نجلا بزياده ،،،
رقت هند لجناحهم ،،،وانسدحت على السرير بتعب بعد ما ارتفعت حرارتها زيادة
******************
في المجلس
طلال جالس لحاله يحاول يتصل بهند،،،ويدعي انها ترد
( ألو ) ردت هند بصوت تعبان و من غير ما تشوف المتصل
ارتاح طلال وبهدوء ( كيفك هند )
هند جلست بتعب لما اسمعت صوته ( الحمدلله بخير،،،)
طلال مهوب مصدقها لأن صوتها تعبان ويترجاها ( حبيبتي انتي تعبانه ،،،امشي اوديك الطبيب )
انحرجت وزادت حرارتها لما قال حبيبتي ( والله ألحين أحسن ،،،حتى لما اتصلت كنت نايمه)
طلال مبتسم (الله يسامحك يعني أنا مزعج ،،،وأنا اللي ما تهنيت بالفطور احاتيك )
ولع وجها من الاحراج وبلحظه ارتفعت حرارتها وضحكت بدون شعور ويالله تطلع الكلمه ( والله مو قصدي جذيه ،،،قصدي اني بخير ونايمه )
طلال يبي يحرجها أكثر ( إذا صادقه مهوب قصدك ،،،بجي أشوفك )
هند تضحك بعد ما ارتفعت حرارتها مرة ثانية ( هههههههه،،،خلاص انزل لك جديلتي من الدريشه عشان تصعد وما أحد يشوفك )
طلال خاف من طريقة كلامها معه لأن هند تستحي ( هند قستي حرارتك ،،،)
هند تكمل ضحك ( لااااااااااااااااا،،،إيه ،،،مااااااااااااا أدري ،،،)
طلال تأكد انها مهيب طيبه( هند أنا جاي ألحين ،،،)
هند تغمض عيونها وتضحك ( ههههههههه حياك الله ،،،)
طلال راح بيت الشعر ينادي سلمان ( سلمان انا كلمت هند وحسيت انها قامت اتخربط ،،،بروح اشوفها ،،،امش معي )
سلمان بخوف ( امش ،،،امش بسرعه)
طق سلمان الباب الداخلي ،،،جت له الشغاله،،،سلمان مستعجل ( سوي درب أنا يبي يدخل يروح فوق)
راحت الشغاله للحريم وقالت لهم (سلمان يبي يروح فوق)
طلعت له الجازي وهيا لانه مهوب من عادته يرقى فوق
الجازي ( خير سلمان )
سلمان مستعجل ( سوي لي درب بروح لهند تعبانه )
خافت هيا وراحت تركض لهند
ودخل وراها طلال يركض،،،ووراه الجازي وسلمان
خافوا الحريم ،،،وحست هنوف ان اختها فيها شي وحطت يدها على قلبها ( يمه ،،،أكيد هند فيها شي )
وراحت تركض وراهم ،،،
دخلت هيا وطلال ،،،وهند كانت نايمه ووجها شاحب ،،،رفع راسها طلال وقام يصفق وجها
( هند ،،،،هند ،،،تسمعيني) هند كانت يالله تناظره وتغمض
خذت هيا جيك المويه وكبته عليها ،،،
سلمان بخوف عليها ( شيلها بسرعه ) ما انتظره طلال وشلها بروحه وراح يركض فيها
طلع طلال بوجه هنوف اللي صاحت لما شافت اختها،،،آآآآآآآآآآآآآآآآآآآآآآآآآآآآآآآآآآآآآآآآ
امسكتها هيا اتسمي عليها(اسم الله عليك،،اسم الله عليك،،هنوف حبيبتي،،هند ما فيها شي) عمتها الجازي يالله خذت عباتها وراحت معهم حافيه،،،
أم سلطان طاحت عليهم يوم شافتهم شايلينها،،،ويركضون
صاحت ساره ومسكت امها ،،،(يمممممممممممممه)
أم حمد تسمي عليها وأم طلال ترشها بمويه ،،،
دلال جابت تمر تعطيها عشان السكر ،،، ريم ومضاوي راحوا لهنوف اللي منهاره بين يدين هيا،،،وما عرفوا يتصرفون وصاروا يصيحون معها،،،
أم فيصل تهديهم ،،،عبير لامه روابي بنت هيا اللي صارت تصيح من صياح الحريم
نجلا كانت برا جالسه عند حمام السباحه،،،،ما درت باللي صار ،،،
***************
سلمان يسوق بسرعه جنونيه ،،، لأن هند فقدت الوعي ،،،،
الجازي طول ما هي ماسكتها وهي تهلل وتكبر(لا إله إلا الله،،،لا حول ولا قوة الا بالله)
وتقرا عليها وتنفخ بوجها،،،
طلال يضرب رجله ويهزها بدون شعور ،،، وكل شوي يلتفت عليها ،،،
وصلوا المستشفى ،،،نزل طلال والسيارة ما وقفت ،،، حمل هند ودخلها على الطبيب
عمته تركض وراه ،،، وسلمان وقف السيارة ودخل عليهم ،،،
الطبيب قاس حرارتها وكانت مرتفعه 40 درجه وضغطها مرتفع 190 على 100 ،،،الطبيب انجن (كيف تخلونها توصل لذا الدرجه وما جبتوها)،،،الطبيب خاف توصل الحرارة للمخ ،،،وحولها للعنايه المركزه،،،
طلال كان يدور ما يحس بنفسه ،،،الجازي جالسه وحاطه يدينها على راسها،،،سلمان داخل عندها في العنايه،،،
دق جوال طلال ،،،المتصل هيا ،،،
طلال يناظر الجوال ما يدري وش بيقول لهم ،،،بالاخير رد ( ألو)
هيا بخوف لما اسمعت صوته لكنها ما تبي تبين لهنوف ( هلا طلال ،،،كيف هند )
طلال ما يبي يكذب على هيا ( هيا بقولك لكن لا تقولين لهم ،،،هند في العنايه المركزة تعبانه )
هيا بتمثيل ( الحمدلله ،،،ألحين طيبه،،،وش قال لها الطبيب )
طلال يتنهد ( فاقده الوعي لأن حرارتها مرتفعه وضغطها مرتفع ،،،وإذا عدت مرحلة الخطر اتصلت فيكم )
هيا ( ان شاء الله)
هنوف تناظرها بدون ما تكلم وهذا طبعها إذا انصدمت،،،
هيا اتطمنهم ( ابشركم طيبه ،،،حرارتها كانت مرتفعه مره وألحين عطوها أبر وومغذيات تنزلها ،،،بس تنزل حرارتها بيجون )
أم سلطان ( الحمدلله ،،،لا حد يعلم متعب لين يجون )
هنوف ارتاحت ،،، لكنها تحاتي أبوها وتنهد ( الحمدلله انه نايم ،،،وقايل لهم لا تصحوني الا للسحور )
قامت هيا منهم ،،،(ذكرتوني بالسحور ،،،بقوم اسويه ،،،)
دلال تقوم معها ( وأنا بروح أساعدك )
هنوف كانت بتقوم معهم وحلفت عليها أم طلال ما تقوم ،،،
راحت هيا للمطبخ ،،،لقت الشغالات يسولفون عن هند ،،،
جانيت شغالة هيا فلبينيه ( هازا نزلا زوج طلال أول ،،، هيا ياخود هند صاله وسكي باب ،،،بعدين هند تعبان )
فاطمه ،،،حبشية أم سلطان ( أنا ما ارتاح لها ،،من زمان )
نتالي شغالة أم طلال ( طلال كويس ،،،وهند كويس،،،لكن نجلا مش كويس)
هيا انصدمت من اللي اسمعته ،،،التفتت لدلال اللي اسمعت الكلام ،،،( معقوله)
دلال بصدمه ( توقعي منها أي شي ،،)
هيا تجر النفس ( هقوتك وش قايله لها ،،،خلت ضغطها مرتفع )
دلال بخوف وصوت واطي ( ضغطها مرتفع )
هيا تهز راسها ( إيه ،،، وتعبانه ،،،لكني ما بغيت أخوف هنوف وأمي وضحه)
دلال عيونها تدمع ( حسبي الله عليها ،،،والله اني خايفه على خالي متعب )
هيا تمسح دمعتها ( الله يعدي اليوم على خير ،،،)وتلتفت على دلال ( دلال لا أحد يدري ،،،)
******************
في المستشفى
بعد ساعتين ،،،من المغذيات والابر خافض الحرارة والضغط ،،،عدت مرحلة الخطر وانخفضت حرارتها ونزل الضغط ،،،واستقرت ضربات القلب عندها ،،،وبدت تستجيب لهم لكن مهوب وعي كامل
سلمان والجازي عند راسها يكلمونها ( هند ،،،هند تسمعينا )
هند بدون وعي (إممممممـ )
طلال يناظرها بحزن ،،،(الحمدلله انها حست فينا )
الجازي دموعها ما وقفت من دخلوها ( الحمدلله)
الطبيب يطمنهم (لا تخافون ،،،ألحين عدت مرحلة الخطر ،،،لكنها من التعب والاجهاد نايمه ،،،تقدرون تروحون ألحين،،،والصبح تلقونها واعيه ان شاء الله)
الجازي تكلم سلمان ( اتصل فيهم قولهم ،،،لا يتروعون )
طلعوا من العنايه ،،،
اتصل سلمان على هيا ،،،
هيا تناظر جوالها ،،،(هذا سلمان)
ردت ( هلا سلمان)
سلمان يطمنهم ( هلا هيا ،،،ترى هند طيبه وعدت مرحلة الخطر ،،،وبدت توعى )
هيا نزلت دموعها غصب مع انها ما بكت من الاول ( الحمدلله ،،،متى بتجون )
سلمان بتعب ( بنجي ألحين ،،،لكن هند ما راح تجي الا الصبح لين تستعيد وعيها بالكامل،،،قولي لهم )
هيا (ان شاء الله )
سكرت هيا الجوال ،،،وطمنتهم ،،،( هند طيبه وانزلت حرارتها ،،،وتوعت فيهم)
وناظرت هنوف ( تروحين معي لهم ،،،)
هنوف بخوف ( ليش ما راح تجي،،،)
هيا اتطمنها ( ان شاء بتجي ،،،بس يقول الطبيب خلوها للصبح)
هنوف تناظر الساعه 3 الفجر ( هيا شأقول لابوي ،،،خايفه ،،،)
ساره ( خلاص دامها بخير ،،،لا تروحون تروعونه وهي ما فيها الا الخير،،،ومن أصبح أفلح)
هيا تلتفت لهنوف ( وش رايك ،،،)
هنوف صارت بين الغار والنار ( خلاص ،،،ننتظر للصبح ان ما جات نعلم ابوي ونروح لها )
هيا ( نحط السحور والا ننتظر عمتي الجازي )
هنوف تصعد لجناحهم( أنا ما بي مو مشتهيه ،،،بروح أريح ،،،حاسه اني بمرض)
******************
في بيت الشعر
صحى متعب على السحور ،،، والشباب جالسين حول الضو ،،،
( السلام عليكم ،،،)
الشباب منصدمين وخايفينه يدري ،،،أبو طلال منبهم محد يعلمه ،،،
فارس مبتسم له ،،،( صح النوم ،،،وش عندك على ذا النوم )
متعب يبتسم ( والله اني صاير أتعب من الصيام ،،،)
فارس ينصحه ( ما على المريض حرج ،،،إذا تتعب لا تصوم ،،،أدفع عنه )
متعب ( دامني أقدر أتحمل التعب بصوم ،،،والى زاد على افطرت )
فارس ومشاري ( الله يعطيك العافيه ،،،)
متعب يكلم عبدالعزيز ( عبدالعزيز جيب جوالي ،،تحت الوساده)
فز عبدالعزيز ( ان شاء الله)
جاب عبدالعزيز جوال عمه ،،،
اتصل متعب على جوال هند ،،،لأنها محلفته ما يجي دامها مريضه خايفه عليه ،،،
الجوال مع هنوف ،،،خافت لما عرفت ان المتصل ابوها ،،،
ردت تحاول تكون بطبيعتها( أهلا ،،،أهلا ،،،ازيك يا بابا ،،،)
متعب ابتسم لما عرف انها هنوف ( أنا كويس ،،،ازيك إنتي يا حبيبتي )
هنوف بدلع وتتكلم مصري ( أنا كويسه أوي يا ألبي،،،)
متعب يضحك ( إزاي هند ،،،)
هنوف تضحك على أبوها (اتطمن هند كويسه ،،،ودلوأتي نايمه،،،عاوزني اصحيها )
متعب ( لا لا ،،،ما تصحيهاش ،،،خاليها نايمه)
هنوف ضحكت بصوت عالي ( يبه ،،،شنو خليها نايمه ،،،قول سيبيها نايمه)
متعب يضحك ( طيب ،،،سيبيها نايمه ،،،كويس كدا ،،،)
هنوف ارتاحت ان أبوها طافت عليه السالفه بسهوله( تسحرت يا حياتي ،،،)
متعب ( لا ،،،ألحين حطوا السحور ،،،ارسلي علاجي ،،، بنام في جناح الشباب)
هنوف تطمنت ( ان شاء الله )
*******************
في المستشفى
رفض طلال يروح معهم ،،،متعذر (بروح ارتاح في الفله ،،،عشان اجيها بوقت واجيبها)
راح سلمان والجازي للمزرعه ،،،وطمنوهم عليها ،،،
راح طلال الفله لكنه ما ارتاح ،،،حاول يعمل له شي يتسحر عليه لكن ما له نفس وهون،،،بعد ما صلى الفجر رجع للمستشفى ،،، جلس عند باب العنايه المركزة
طلعت عليه الممرضه اللي اشفقت عليه ( تأرب لها إيه،،،)
طلال يتنهد ( زوجها ،،)
الممرضه ( ربنا يخليك لها ،،،عاوز تشوفها ،،،هيه دلوأتي واعيه)
طلال فرح وابتسم لها ( يا ليت ،،،)
دخل طلال عليها ،،،جلس يتأملها كانت مغمضه عيونها رموشها كثيفه راسمه عيونها رسم جزء من شعرها الناعم على وجها ،،،بشرتها صافيه وشفايفها ورديه وناعمه،،،سبحان من خلقها ،،، فتحت عيونها ،،،وانحرجت لما شافته يتأملها،،،ابتسم وحب جبهتها( الحمدلله على السلامه)
صار وجها أحمر ونزلت عيونها وبتعب ( الله يسلمك ،،،أنا اشفيني ،،،)
طلال يوخر الشعر النازل عن وجها وبحنيه ( وش فيك ،،،موتي وحييتي بفضل الله ،،،ليه تحملين المرض ،،،)
هند تحاول تقوم مستحيه منه ( وين أبوي )
طلال يمسكها ( نامي ،،،بارفع لك السرير ،،،)ويكمل ( ابوك ما يدري ،،،ارتاحي )
هند منحرجه منه ( وهنوف ،،،)
ضحك طلال ( ما حولك غيري ،،، ما تقدرين تهربين)
ابتسمت هند بحيا ( مو قصدي ،،،بس بعرف اشصار لي )
طلال ياخذ نفس ( والله يا زوجتي الحبيبه )وضحك لما شاف وجها صار أحمر
ههههههههههههه وقال لها اللي صار،،،
ضحكت باحراج لما سمعت الكلام اللي قالته بدون وعي
طلال تخدر لما سمع ضحكتها ( فديت الضحكه وراعيتها ،،،)
تفشلت هند واسكتت ،،،طلال يضحك ( تدرين وش مسميك في جوالي )
هزت هند راسها بلا ،،،
طلال مبتسم لها وبنظره حالمه ( مسميك ،،، ضحكه ترد الروح،،، ترى والله ما كذبت ،،،)
دخلت عليها الطبيبة المناوبه وطمنتهم ( دلوأتي تأدري تخرجي،،،الحرارة والضغط عال العال)
ابتسم طلال ( بس أنا ما أبيها تخرج ،،،مرتاح كذا )
انحرجت هند لأنها فهمت قصده واستغربت الطبيبه ،،،
طلال ( بروح اطلب سياره أجره واجيك ،،،)
الممرضه تكلم هند ( جوزك دا أمير ،،،ربنا يخليكو لبعض )
فرحت هند وارتاحت وفي نفسها ،،،وعسى ان تكرهوا شئ وهو خير لكم ،،،
*****************
ارجعوا من المزرعه ،،،والكل توجه لاعماله ،،،ولتجهيزات العيد ،،،
ومتعب وبناته راحوا العشر للكويت وبيعيدون هناك،،،
في الكويت
فلة خالهم عامر (أبو ضاري )
الفطور اليوم عند ابو عامر لمتعب وبناته ،،،
تهاني فرحانه بوصول هند وهنوف ،،،( والله مشتاقه لكم ،،،ياليت ترجع أيامنا فبل ،،،)
هند تجر النفس ( ياااااااااااااليت ،،،والله انا اللي مشتاقه أكثر ،،،)
أم ضاري ترحب فيهم ( يا هلا والله ،،،الكويت نورت ،،،)
هنوف تضحك ( منوره بأهلها ،،،يالله ما تصدقون اشكثر ولهانه لطلعاتنا مع بعض ولخوالي)
تهاني تحذر هنوف ( ترى ما عاد فيه روحه للرياض ،،،إلا بوقت العطل ،،،)
هند تضايقت بس ما بينت ،،،هنوف تضحك ( ان شاء الله عمتي )
صوت مسج
كل وحده طلعت جوالها تشوفه ،،،تهاني ( مو عندي ،،،)
هنوف تناظر هند ( ولا آنا ،،،)
هند ابتسمت يمكن عندي وفتحت جوالها،،،
المرسل ( ؟ )
كلمة احبك غاليه بين
الاحباب
لاقالها خلي احس
بغلاها
اعطش لها دايم وادور
لها اسباب
ابيه ينطقها يردد صداها
كن العسل من شفته
فوقها ذاب
زود على كلمة احبك
حلاها
ياليتني وياه في صفحة
كتاب
قصة غراام وكل عاشق
قراها
هند انحرجت وانصبغ وجها أحمر ،،،تهاني تناظرها ( لااااااااا،،،فيها شي هاذي )
هنوف تضحك على اختها ( خبله ،،،منحرجه من مسج ،،،عيل لو قايل لج وجه لوجه شراح تسوين)
هند تحط يدينها على وجها (أنتحر ،،،)
ضحكوا عليها ،،،وترجوها ترسل له رد ،،،
هند بحيره ( شنو أرسل ،،،)
تهاني مستغربه ( بعد شنو ،،،رسالة حب ،،،)
هند تستحي ( لاااااااا،،،مستحيل ،،،والله ما أدز له رسالة حب ،،، أستحي)
هنوف تكش عليها وتقلدها باستهزاء ( أستحي ،،،بياكلج هو ،،،لازم تعبرين عن شعورج له)
هند بتفكير ( شعوري ،،،أخاف ما يعجبه)
هنوف وتهاني ( ارسلي حتى لو ما يعجبه ،،،)
خضعت هند وارسلت شعورها،،،
************************
فلة أبو طلال
في المجلس ينتظرون الفطور
طلال مرتكي على المركى في جنب أبوه ،،،
أبوسلطان داخل عليهم في المجلس ينشف يدينه متوضي لصلاة المغرب ،،،
فز طلال عشان يجي جده مكانه عند المركى في وسط المجلس وحب خشمه ( مسيك بالخير )
أبو سلطان ،،،( يا مرحبا ،،،) وجلس مكانه ،،،
طلال راح للمطبخ يعجل الفطور ( عبدالعزيز صار لك ساعه عندهم ما جبت شي ،،،)
عبد العزيز ما له نفس ( ألعب أنا ،،،أنتظرهم يحطونه ،،،وش أسوي فيهم،،،)
مضاوي تعبانه وهي تجهز ( ما فيه غيري والشغاله ،،،حلفت على أمي وضحه ما تجي وأمي راسها موجعها )
طلال خايف عليها ( ليه موجعها ،،،ضغطها مرتفع،،،)
مضاوي بدون نفس ( أكيد بيرتفع ،،،دام خالي مكلمها اليوم ،،،)
طلال تضايق لما سمع طاري خاله ،،،لأنه حس إنه أكيد قايل لها شي ،،،
صوت جواله يعلن عن وصول مسج
المرسل ( ضحكة ترد الروح )
خايف إن الزمن يبعدك عني..
تقفي وتزيد نزف الجروح ..
خايف إن الغير يسرقك مني ..
على صدى صوتك تتركني اروح..
بحق الغلا صارحني وعلمني ..
عطني من الأمل قصر وصروح ..
دخيل عيونك ريحني و طمني..
هو أنا أستاهل قربك ولا أروح .؟؟؟!
اعذرني
طلال انصدم من ردها ،،،وفي نفسه ،،،كأنها حاسه باحساسي ،،،
بعد ما صلوا التراويح راح طلال يسلم على جدته ،،،ويشوف أمه ،،،
أم سلطان ترحب فيه ( ياااااااااا مرحبااااااااااااا)
طلال مبتسم ابتسامه واسعه ويحب راس جدته ( والمرحب باقي ،،،)
ويحب راس أمه ( ما فيه مرحبا يا أم طلال ،،،)
ناظرته بحزن وسكتت ،،،وهنا تأكد إنها مهيب خاليه
مضاوي تغير الجو ،،،( يمه وضحة تبين تشوفين نواف ،،،)
أم سلطان بشوق ،،،( إيه فديته ،،، جعل ربي يجمع شملنا ،،،)
مضاوي قايمه تجيب اللاب توب ( طلال اتصل فيه خله يشبك معنا ،،،)
اتصل فيه طلال ،،،وقاله يشبك معه ،،،
أم سلطان تمسح عيونها يوم شافته ،،،( جعل ربي يقرب دارك يا ولدي ،،،)
نواف بحب لجدته ( هانت يمته ،،،وبجيكم في عطلة الربيع ،،،وبربع معكم ،،،ان شاء الله )
أم سلطان وهي لازالت عيونها تدمع ( وش بلا حالك مهوب زين ،،،يا ولدي)
نواف يطمنها ويضحك عشان ترتاح ( هههههههههههه،،،ما فيني الا العافيه ،،،أنت يتهيألك)
ويكمل ( يمه كيفك ،،،إن شاء الله مرتاحه )
أم سلطان من راحوا بنات متعب وهي ضايقه ( والله يا ولدي من يوم راحوا بناتي والبيت كنه يرميني،،،)
نواف مستغرب ،،،( يمه وش بناتك ،،، عماتي فيهم شي)
أم سلطان بعتب ( بنات متعب بناتي ،،، وإلا عماتك بنات رياجيلهم ما عادهم بناتي )
نواف يضحك ،،،( وبكره بنات متعب بيصيرون بنات رياجيلهم ،،،)
أم سلطان بزعل ،،،( رياجيلهم عيالي ،،،وحده عند طلال والثانيه جعل ربي يكتبها لك ،،،)
نواف ما يهمه أحد اللي يبي يقوله يقوله ( آمين ،،،يمه ادعي لي ،،،)
طلال ومضاوي يضحكون عليه ،،،طلال ( ما تستحي أنت ،،،)
نواف بجديه ( ليه مره عشان أستحي ،،،)
دخل عليهم سلمان وعبدالعزيز وهم يكلمون ،،،
سلمان يجلس في جنب أمه اللي حاطه اللاب توب في حضنها،،،( لا لا لا ،،،خربتوا أمي ،،،)
نواف يضحك ( هلاااااااااااااا ،،،ببو عبدالله ،،،وينك ما ترد على مكالماتي ،،،)
سلمان يرفع خشمه ( والله مهوب كلن نرد عليه ،،،)
أم سلطان تضربه ،،،( ما ترد على نواف ،،،)
سلمان محتج على أمه وبضحكه ( يمه ترا أنا ولدك مهوب هو ،،،)
ويحبها ،،، نواف بشوق ( يا حظك ،،، تحب أمي وضحة ،،،)
سلمان يضحك ويحب خدها بصوت عالي وخشمها وراسها ويدها ( حرررررررررررررررره)
نواف يمثل ( أوريك تحرني ،،،ترا واقف لك عند الباب ،،،أطلع أنت بس )
سلمان يمثل الطفوله ( بجيب لك اخواني الكبار ،،،تراهم قويين ،،،)
نواف وفيه الضحكه ( اخوانك ،،،واحد مسافر والثاني أبوي ،،،مهوب قايل لي شي ،،،)
طلال وسلمان وأم سلطان يضحكون ،،،
أم سلطان تنهد وتقصد بصوت عالي وهو يسمعها
عسى من صنع الهاتف إيديه ما تنشل .. عسى داره الوسمي تخرب بساتينه
تعلا الحراره وان تكلمت به تنزل .. مع اللي صوتهم قلبي تفتح شرايينه
أم طلال تصيح وبعده قامت تروح لبيتهم،،،مضاوي دمعت عيونها،،،
طلال ونواف يضحكون يبون يغيرون الجو ،،،نواف ( صايره شاعره من وراي ،،،)
أم سلطان بحب لنواف وشوق ( إمقوله يا ولدي ،،،)
***************************
في الكويت
فلة خالهم محمد
في شقة البنات
محمد ومتعب جالسين وقت السحور ،،،هند عامله سحور لابوها ،،،لأن أكله مخصص له ،،،ومحمد جايب سحوره عنده يبي يشاركه في الاكل ،،،
هند وهنوف عند خالتهم أم عامر ( مرت خالهم ) في شقتها،،،يتسحرون معها
أم عامر ( والله البيت من غيركم فاضي وموحش)
هنوف ( الحمدلله ،،،هذا أنا رجعت ،،،أما الاخت ما راح تجينا الا زواره وترجع مره ثانيه)
هند بضيقه بس ما تبي تبين ( هاذي سنة الحياه ) وتبي تغير الجو اللي بدا يصير كئيب
( بعدين مقابل طلال ولا مقابلكم )
هنوف تكش عليها ( مالت عليج ،،،وأنا اللي ضايق خلقي ،،،فرقاج عيد)
ضحكت عليهم أم عامر ( يا خوفي يا هنوف انج تروحين وراها )
هنوف تحط يدها على قلبها ( اسم الله علي ان شاء الله عدويني)
هند تضحك عليها ( والله ما يندرى ،،،وخصوصا فيه هناك تنافس عليها )
هنوف فتحت عيونها ( تنافس,,,,,,,,)
هند تضحك وابتلشت ( هههههههه لا تصدقين اضحك ،،،)
أم عامر تغمز لها ( والله ان وراج شي ،،،، مو خاليه ،،،)
هنوف بثقة ( والله يا ست هند ،،،المتنافسين بيتعبون ويملون ويهونون مني )
هند تمهد لها ( وإذا المتنافس زين وفيه الخير وعاجب أبوي)
هنوف بجديه ( حبيبتي ،،،أنا اللي بتزوج مو أبوي ،،،وإلا عبالج كل الناس نفسج )
هند تضايقت ونزلت راسها تلعب بالملعقه ،،، هنوف انسدت نفسها وقامت من السحور
أم عامر ،،،تضايقت من اسلوب هنوف مع اختها ،،،( هند لا تلومينها ،،،هنوف متضايقه من تزوجتي ،،،وحاسه انها ما راح تعيش معاج مثل أول ،،،)
هند بهدوء ( والله عارفه ،،،هنوف تحط نفسها قويه،،، ما تحب تبين ضعفها،،،)
دخلت هنوف الشقه معصبه ،،،وعلى طول لغرفتها،،،
ناظر خالها محمد ،،،في ابوها ،،،وسكت
متعب يحرك راسه ( لا حول ولا قوة الا بالله ،،،هنوف متغيره مره)
محمد يأيده ( هنوف من راحت هند للرياض وهي متغيره ،،،)
متعب بحيره ( والله يا محمد ،،،ودي أجمعهم عندي ،،،بس هي تبي تدرس في الكويت ،،،والله ما دري وش الدبرة ،،،)
محمد يحط يده على كتف متعب ( يدبرها ربك ،،،وأنا أخوك ،،،لا تشيل همها عندي ،،)
متعب يبتسم بألم ( ما شلت همها وهي عندك يومها صغيره أشله وهي مره،،،أنت أبوها جعل عمرك طويل ،،،)
محمد يرد له الابتسامه ( وعمرك أطول ،،،ويخليك لهم ،،،وهنوف مردها لك مثل اختها،،،)
متعب يتذكر (أبو عامر،،،ترى نواف مكلمني عليها ،،،)
سكت محمد شوي ،،،( متعب ،،،ترى هنوف مهيب مثل هند ،،،لا تستعجل عليها،،،)
متعب عارف هالشي ،،،( عارف ،،،والولد يدرس مهوب مستعجل ،،،لكني وعدته اني اكلمها)
محمد يبتسم له ( على راحتك ،،،شاورها ،،،بس نصيحتي إذا وافقت لا تستعجل عليها)
متعب بتأييد ( إن شاء الله )
راح محمد لشقته ،،،وارجعت هند لشقتهم ،،،لقت ابوها جالس ينتظرها ،،،
هند بابتسامه ( السلام عليكم ،،،ليلحين قاعد ،،،)
متعب مبتسم ( انتظرك ،،،)
هند تسأله ( وين هنوف ،،،)
متعب يناظرها بتفحص ( هنوف من جات منكم زعلانه ،،،وهي في غرفتها ما اطلعت ،،،وش فيها )
هند تنهدت وقالت له اللي صار ،،،،
متعب حس بتعب ،،،يحب هنوف ويرحمها لأنها صغيره ودلوعه شلون بتواجه الحياه من بعده
هند بخوف على ابوها ( يبه شفيك ،،،تحس بتعب ،،،)
متعب يطمنها ( لا الحمدلله ،،،جيبي علاجي ،،،)
خذا علاجه وقرر يروح يكلم هنوف وطلب من هند لا تجيهم ،،،
هنوف منسدحه ،،،ومتلحفه باللحاف ،،،ومسكره الليت ،،،إلا من النور اللي داخل عليها بعد ما فتح أبوها الباب،،،
متعب يدخل بشويش ،،،ويناديها بحنان ( هنوفتي ،،،هنوفتي ،،،)
هنوف من تحت اللحاف ،،،ما تبي تبين له انها تبكي ( هلا يبه ،،،)
أبوها حس انها تبكي ( أفاااااااا،،،تكلميني من تحت اللحاف ،،،ومعطيتني ظهرك ،،،)
استحت هنوف وارفعت اللحاف ،،،والتفتت عليه وجلست على السرير،،،
فتح الليت ،،،وابتسم ( تصيرين حلوه لما تبكين ،،،لوني منك كل يوم ابكي ،،،)
اضحكت ،،،وضحك معها ( بس ألحين أحلى ،،،)
جلس بجنبها على السرير وحط يده وراها ،،،وخذا نفس ( ممكن نتكلم شوي ،،،)
*****************
فلة أبو طلال
وقت السحور
أم طلال ومضاوي يتسحرون عند أم سلطان من راحت هند ،،،
أبو سلطان ما يتسحر غير تمر ولبن ،،،
سلمان بيتسحر عند اخوياه ،،،
أبو طلال وعياله تسحروا في المجلس وارجعوا لبيتهم ،،،
طلال جالس في الصاله ينتظر أمه ومضاوي ،،،
دخلت أم طلال ( السلام عليكم ،،،)
ابتسم طلال وقام يحب راسها ( وعليكم السلام ،،،كيف وجع راسك ألحين )
أم طلال ما ردت عليه ،،،
طلال عرف انها زعلانه ،،،( الحلو وش علامه ،،،)
أم طلال تجلس ،،،وتناظر فيه بزعل ( انشد عمرك ،،،)
طلال بتفكير مصطنع ( والله ما ني خابر اني مسوي شي يزعلك مني ،،،)
أم طلال بزعل وعبره مكبوته ( ومرتك ،،،)
طلال يستعبط ( هند وش فيها ،،،)
أم طلال بعصبيه ( هند،،،هند،،،هند ،،،ما عندك مره غيرها )
طلال بهدوء غير طبيعي ،،،لأنه متوقع هالشي ( إيه يمه ما عندي غيرها ،،)
أم طلال دموعها تنزل غصب عليها ،،،من اللي اسمعته من أخوها( يا أمك ،، برضاي عليك ،، رجعها وريحني ،،،خالك ما خلى علي كلمه )
طلال يتنهد ( يمه ،،،خالي يفكر في بنته ،،، ما يبيها تطلق ،،،خايف من كلام الناس
يمه فكري فيني لو مره وحده ،،،تمني لي السعاده )
أم طلال تصيح ،،،طلال لامها وهو ساكت ،،،لين هدت ،،،
تنهدت واستغفرت ربها ،،،أم طلال طيبه لكنها ضعيفه قدام اخوها ،،،ما تبيه يزعل عليها وتدور رضاه دايما ،،،
راح طلال لغرفته بعد ما راحت أمه تنام ،،،
طلال حاس بضيقه ،،،تذكر نواف ،،،لكن فرق التوقيت ما خلاه يتصل ،،،
غير ملابسه ،،،ودخل سريره يبي ينام ،،،لكن النوم مجافيه،،،
طرت عليه هند ،،،وخذا جواله وارسل ،،،
*****************
في الكويت
هند بعد ما دخل أبوها عند هنوف راحت لغرفتها تنام ،،،
سمعت صوت نغمة الرسايل
المرسل ( ؟ )
هند
ردي علي بدافي الصوت لاأموت..
عطني حنان الصوت لوماتجيني!!
ياليت ماأسمع غير صوتك ولاصوت...!!
صوتك يحرك كل الاحساس فيني...
وش ينفعك لاجتك...
~روحي~
فتابوت وقالوا:
~توفي~
ومطالبه كآن...
"صوتك"...
هند بخوف وضيقه ،،، أكيد فيه شي ،،،يا ربي ما أقدر أتصل ،،،شسوي،،،
أتصل وإلا لا ،،،أحس إني بموت لو اكلمه ،،،
وبعد تفكير قررت ....!!!
***************
غرفة هنوف
هنوف بعصبيه ( لا يعني لا ،،،،)
متعب يحاول يفهم سبب الرفض ( هنوف انتي عطيتي الرد بدون تفكير ،،،)
هنوف مصره ( ما يحتاج أفكر ،،، ما أبي أتزوج ألحين لما اخلص دراسه أفكر،،،)
أبوها بهدوء ( يعني أنتي رافضه مبدأ الزواج ألحين ،،،مو رافضه نواف كشخصه )
هنوف توهقت ( نواف وغير نواف ،،،ما أبي ،،،)
متعب ياخذ نفس ( هنوف ،،،نواف مهوب متزوج ذلحين ،،،هو يدرس وأنتي تدرسين ،،،بس يبي كلمه ،،،عشان محد يتكلم عليك ،،،)
هنوف بعصبيه ( يعني شلون ،،،بضاعه يحجزني أربع سنين ،،،فيها حياه وموت،،،يبه رجاءا انسى الموضوع )
متعب يفهمها ويمدح نواف ( يا هنوف ،،، نواف ولد متعلم ،،،طموح،،،مستقل ،،،يحاول يبني نفسه بنفسه،،،و كلن يتمناه لبنته ،،،ممكن تفهميني ليه الرفض)
هنوف هدت لما شافت ابوها يكلمها بهدوء ،،،( يبه نواف انت تعرفه ،،،وتكلم عنه بناءا على حبك له ،،،ولأنه ولد سلطان أخوك ،،،لكني أنا ما أعرفه،،، ولا أعرف شخصيته ،،، وأنا مستحيل أرتبط بواحد مجرد انه ولد عمي ،،،)
متعب يحاول يبين لها ان تفكيرها غلط ( هاذي هند نفسك ،،، وما اعترضت ،،،)
هنوف تنهد ( يبه هند شافته ،،، كلمته ،،،عرفت فيه بعض الخصال قبل لا تاخذه ،،،خصوصا وقفته معك وإنت مريض ،،، لكن نواف ما شفنا منه شي ،،، )
وتكمل ( بعدين ،،،كل وحده فينا لها شخصيتها وطريقة تفكيرها )
متعب تعب من الكلام معها وقام رايح ( يالله تصبحين على خير )
هنوف بضيقه ( يبه ،،، لا تزعل هذا تفكيري ،،،)
متعب مبتسم لها ( فكري واستخيري ،،، ما بي الرد ألحين ،،،)
ضحكت بدلع ( رديناااااااااااااااااااااااااااا ،،،)
ضحك عليها وطلع ،،،
**************************
طلال عجز من الانتظار ،،،
ومد يده ياخذ الجوال يبي يسكره ،،،
وفجأه
اتصال
المتصل ""ضحكة ترد الروح ""
ابتسم ابتسامه واسعه وارتاح ،،وتوه بيرد كشر وفي نفسه ( أخاف هنوف عامله فيني مقلب )
لكني برد ( ألو ،،،)
منحرجه وساكته،،،تحاول تكلم ما طلع الصوت،،،
طلال في نفسه ،،،أكيد هنوف ( أدري إنك هنوف ،،،ردي وإلا عطيني أبوي متعب ،،،)
ابتسمت هند وضحكت بصوت واطي ( هلا طلال ،،، آنا هند مو هنوف )
طلال يجلس من الفرحه ،،،وبلهفه لكن فيها حزن،،،( يا مرحبا والله ،،،) كانت طالعه من قلبه
هند بخوف عليه وبهدوء ( طلال ،،،فيك شي ،،،)
طلال حس بخوفها من صوتها ،،،وبمشاعر صادقة ،،،( يا روح طلال ،،، ما فيني إلا العافيه،،،)
هند مو مصدقته ( طلال ،،، رسالتك خوفتي ،،،حاسه إن فيك شي )
طلال يتنهد لما تذكر رسالتها له ( هند خايفه علي ،،،)
سكتت ،،، وكمل بهدوء ( لا تخافين ،،،بس ودي أسمع صوتك )
انحرجت هند ،،،تنهد ( هند ،،،سكري أنا بتصل عليك ،،،كم رقم تلفونكم،،،)
عطته هند الرقم ،،،وانتظرت
**********************
اتمنى لكم قراءة ممتعه
انتظر آرائكم وتشجيعكم
مع خالص حبي
الراكده،
|
21-04-10, 11:19 PM
العرض العادي
