السلام عليكم ورحمة الله وبركاته
مشكوره اختي الزائره على النقل الجميل
بدر مغرور ونهايتة على يد نور ان شاء الله
نور حليلها مع اللغه العربيه تجنن
خليفه حكايته حكايه اتوقع يحب نوره ويكتشف اميره
مروان طاح ولا حد سمى عليه
..............
تقبلي مروري ولا تتأخري علينا بالبارت الجديد

الجزء العاشر

مي طول فترة الظهر والعصر وهيه منكته في فراشها مش قادره تنسى السالفه الي صارت الها
كل ماحاولت اتفكر في شي ثاني رجعت نفس الاحداث تنعاد الها
مي:يوووووه
اعتدلت في فراشها وهيه اتضمه الها
مي:وبعدين متى بنسى السالفه
وفجئه احمرت اخدودها:وقسما بالله انه وقح
رجعت وطاحت على جنبها وهيه تعض طرف لفراش تتخيل المشهد مره ثانيه لين ما غمضت بقو منحرجه
وماكان حال مروان احسن منها لانه طول الوقت وصورتها ما فارقت خياله حاول كذا مره يصرفها لاكنها ترجع
وتثبت في خياله
قام مروان من عند ربعه:شباب انا بروح اشوفكم باجر
احمد:انته اليوم هب صاحي
التفت له مروان:لا والله مش صاحي
ضحكو الباقين على مروان الي طلع ولبس نظارته وتم ايحوط في السياره لين ما وقف جدام البيت نفسه
مروان:وبعدييييين انا شو الي قاعد ايصير اليه...يعني اهيه مش اول وحده اشوفها واعجب فيها
مجرد اعجاب انا الي صار اليه مجرد اعجاب شو الي يايبنيه اهنيه

................................
كلم خليفه نوره في التيلفون وقال الها انه رايح دبي يومين وانها تنتبه على اليهال
وكان معاه بدر وزايد....زايد كان ايحس انه ايريد يغير جو بعيد عن البيت وتوتر امور الانتخابات ومنيه فرصه ايدور حق ميمي دراجه حق العزبه مثل ماوعدها ايبلها
اتصل واحد من ربع فهد على فهد وقاله انهم مواعدين بنات
فهد:تدريبيه انيه هب راعي السوالف هذي
ربيعه:ياريال بنطمش اشويه سوالف بس سوالف بنسولف معاهن
فهد حس بفضول انه يعرف مكان وين عايشات البنات
ربيعه:بمر عليك المغرب وبنروح اهناك
ساير فهد ربيعه على اساس يشبع فضوله لاكن فضوله هذا قاده لمكان ما كان متخيلنه وهو بيت خالة اليازي
فهد:منيه بتشلهن؟
ربيعه:هييه ترانيه قلتلك من زمان اننا قد شلينا بنات منيه
السالفه هذي كانت غصه بالنسبه لفهد لاكن انه يحضر حقيقه امر السالفه ما كان في الحسبان
فهد وهو يحس بكل جسمه يرتجف:انزل اشويه من السياره اريد اتكلم اشويه في التيلفون
ربيعه:اخافك تبا اتخرب السالفه عليه ولا تتصل حق مجتوم ربيعك
فهد:لا لا انزل انته اشوي
اول ما نزل ربيعه اتصل فهد على البيت وسال عن اليازي وكانت ضربه قويه على راسه يوم قالوله انها في بيت خالتها
سكر التيلفون وتلبسه ارضي وهو يشير لربيعه يركب
ربيعه:شوووه
فهد:حرك حرك متى بيطلعن؟
ربيعه:لحضه بسويلهم تيلفون.....هلا حياتي ياله احنا عند الباب
حرارة فهد ارتفعت فووووووول وهو يحس ابها تطلع من جسمه مافي مجال انه بيذبحها الليله
اول ما ركبت البنات كان يحاول يكبت ويكبت نفسه عن لا يلتفت ويصرخ عليها وبعد ما مشو مسافه بعيده طلب فهد من ربيعه ايلف لمكان منعزل مايقدر يصبر اكثر
ايحس انه بينفجر وبعد ما وقفت السياره نزل فهد والشيطان معمنه وفتح السياره من ورا وسحب البنتين وانهال عليهن بالضرب وهو يسب ويشتم"وكاد انه ماخلا فيهن عضيمات صاحيه"ّ
ربيعه اتصل على ربعه الي فزعو بسرعه ومسكو فهد وضربوه ضرب مايريد غيره لين ما فقد وعيه
وصل بعد مجتوم الهم وسحب عنهم فهد وهو هاد مع ربيعه عليهم
صب مجتوم دبة الماي على ويه فهد
مجتوم:فهووود فهووود
فتح فهد عيونه:بذبحها بذبحها
مجتوم:منيه هذي الي بتذبحها؟
فهد:الكلبه ملعونة الصير اتواعد والله لا اذبحه
مجتوم:فهود فديتك البنتين الي تتكلم عنهن اظن انهن بيباتن اليوم في العنايه
فهد:لااااا اريد ادفنها وييييينهاااااا؟
مجتوم:راحن خلاص شلوهن مادري كيف بيتصرفون معاهن المشكله الحين لوتدخل الشرطه شو بنسوي
كيف بنطلعك من هالسالفه؟
فهد:انته ليش ماتحس فيه اقولك اريد اذبحها ودنيه صوبها وعقب خلهم ايسون فيه الي يسونه
مجتوم وهو يفكر:فهوود لبنيه تقرب لك؟
فهد:ااااااه بذبحهااااااا الكلبه
مجتوم:متاكد ولا بس لابسنك شيطان وماتعرف شو السالفه؟
التفت فهد للطرف الثاني وهو مقهووور
فهد:ودنيه البيت
مجتوم:خلنيه اوديك عنديه
فهد:لاااا اريد ابويه لازم اهو يتصرف
مجتوم على طول خذ فهد ووداه لبيته ونزله في الميلس وطلب من عبدالله الي نفجع من شكل فهد المضروب انه ايروح يزقر ابوه
دخل ابو فهد وانفجع بعد اهوه وانفجر فهد يخبر ابوه بكل السالفه
فهد بعد ما انهى كلامه:اليوم تدفنها والا والله اموووت من القهر
هز ابو فهد راسه وقام رايح داخل وطلب من مجتوم انه مايتحرك
دخل عقب ابو فهد ومعاه بنت متغطيه
التفت فهد لابوه متعجب ومن تكون هالبنت
ابو فهد:اليازي
اليازي وهيه مش عارفه شو السالفه:ن نعم
ابو فهد:انتي وين كنتي من الصبح
اليازي:معاك عميه في العزبه
فهد تمت عيونه مبحلقه مش مصدق وفهم مجتوم ان ابو فهد ايريد يثبت له براءة بنت اخوه جدامه
مجتوم:ارخصوليه انا بروح
قام وطلع
ورفعت اليازي غطاتها وتمت اطالع فهد الي كان الضرب معلم فيه وثيابه متقطعه والدم مخيسنها
اليازي انصدمت من الي تشوفه وتقدمت كم خطوه ناحية فهد الي كان مازال مبحلق فيها عشان يتاكد انها ماكانت من البنتين الي دبغهن
همست اليازي اول ما قربت امنه:ينصر دينه الي سوا فيك جذيه...احسن تستااااهل
رغم الالم الي كان ايحس فيه فهد الا انه ابتسم اخيرا:مشكووووره ايي منج اكثر
اليازي:ان شالله يايبنيه عميه لك عشان اطببك بتبطي والله
ضحك فهد وقرب ابوه منهم
ابو فهد:اشوفك تضحك يافهيداان...اليازي روحي فديتج
اليازي:ان شالله عميه
وبعد ما طلعت اليازي فتح معاه ابوه محاضره طويله وعريضه وانبه على التسرع والحكم على الناس بدون ما يتاكد
فهد:غصبا عنيه يابويه هذا عرضيه
ابو فهد:شعرفكم انتو بالعرض بس نافخين روسكم عرضيه عرضيه...الواحد لازم ايعالج الامور بحكمه وتروي
ولا ايسوي الي سويته يعني المره الي فاتت دبغة لبنيه وقلنا ماعليه سوء تفاهم لاكن انك اتعيد السالفه اليوم ونفس الشي سوء تفاهم هذي هب عدله ياولديه
عيل خواتك بتذبحهن لو حد يفتن عليهن بالغلط...شف اي شي ايخص العرض تعال اليه اول شي وشاورنيه
فرضا كانت بنت عمك معاهن انته تشوف حل الي سويته..جان اهيه في المستشفي وانته في السجن وانا ميت من الفضيحه
فهد تم ساكت وكلام ابوه اصبح واضح له
تم ابو فهد مع فهد فتره يتكلم معاه وعقب طلب امنه ايروح داخل ايبدل اثيابه
كانت اليازي في الصاله قاعده اتشوف التلفزون واول ما مر فهد طولت على الاغنيه غياظ تجاهلها مبتسم وكمل طريقه
اليازي:المره اليايه ان شالله حريقه
التفت الها فهد وتم ايفكر معقوله انا اذيتها لهذي الدرجه تمت اليازي اطالع التلفزون وتزيد صوت الاغنيه
......................................
في اليوم الثاني على الليل الساعه وحده كانت نوره في المطبخ التحضيري تسخن حليب لفطامي وحطت الها صحن صغير فيه تفاحه وعنب اشتهت تاكلهن قبل لاترقد
كانت لابسه قميص قطني بدون ايدين وقصير شوي نازل تحت الركبه وفاتحه شعرها وكانت تدري ان خليفه بيبات اليوم بعد في دبي لاكنها اول مايت تطلع من المطبخ وهيه شاله الصينيه سمعت صوته والتفتت بسرعه للجهه الثانيه
قبل لا يدخل عليها وهو يسكر تيلفونه انصدم من وجودها
نوره:خليييفه انته ييت فكرتك بتبات اليوم بعد
ابتسم خليفه وهو يشوفها واقفه ومفتشله وصاده للجهه الثانيه
خليفه:طلع عنديه شغل ضروري باجر
تمت اعيونه اتجول عليها وعلى كل شي فيها شعرها ايديها جسمها الي كان القميص ماسك عليه
وتقدم ناحيتها كم خطوه
خليفه:اليهال ارقدو؟
هزت راسها بنعم
قرب اكثر وحست بانفاسه تلفح شعرها
خليفه:وانتي شو تسويين؟
نوره بتوتر امنه:ا انا اسخن حليييب لفطامي
تم خليفه واقف وراها وهو يطل على الصنيه من فوق راسها ويستنشق ريحة شعرها
خليفه:والتفاااح؟
نوره:ع عش عشاااني
مد يده من تحت يدها الي ماسكه الصنيه ولوما الرخامه تحت الصنيه ثبتتها جان فلتت الصنيه من يدها
خليفه:عادي اخذ شويه من التفاحه؟
نوره:خذهاا عا عادي
مديده الثانيه من تحت يدها الثانيه ومسك السكين وبدا ايقطع التفاحه وهيه ملمومه في حضنه وصدره ملامس ظهرها الي بدا ايحسبه يرتجف
ضغط بشفايفه على شعرها
خليفه:نووووره اهدي باخذ نصف التفاحه وبرووح
طبع قبله على راسها وتركلها نصف التفاحه وانسحب بسرعه
كانت فرصه انه ايشوف ويهها لاكنه اتذكر كلام اميره وماحب يحرج نوره يمكن الحرق مسولها عقده
تمت فتره اتحاول اتسيطر على رجيفها ليييييش ايسوي ابها جذيه ليش ما يحس انها انسانه الها مشاعر
ومن قال يانوره ان خليفه مش حاس ابج الاهو منحرق من المشاعر الي يحس ابهن بوجودها
والاحاسيس الي تتفجر فيه والمشكله ان هالاحاسيس حاول ايحس ابها بوجود اميره ومالقاها
كان قبل لايرجع البيت وهو راجع من دبي مر لبيت خالته وقعد مع اميره حاول ايحس معاها باي احساس ومالقاه حتى انه اظطر ولاول مره يتجرا ويمسك ايدها
على امل انه اذا حس برجفة ايدها ينتقل الاحساس له لاكنه انصدم ان اميره ما انتبهت لمسكته الاوهيه تقول له
اميره:خلييييفه شعندك احنا بعدنا ماملجنا وتمسك ايدي ...فجها الحين بيدخل ابويه وبيقول لازم تملجووون
خليفه:زيين عيل مابفجها
سحبت يدها:لا حبيبي انته تدري بطلباتيه للملجه
تنهد خليفه وهو ينسدح على السرير وياكل من التفاحه"وبعديييييين مع هالحاااال شو السر بين نوره واميره اكيد لان نوره صارت زوجتيه وحلال عليه انا احس بهالاحاسيس ناحيتها...الله ايسامحج يا اميره لازم اقنعها توافق على الملجه وبعوضها بالحفله يوم العرس

ارقد ارقد ماعندك سالفه
........................................
نزل زايد في اليوم الثاني ونادى هنيه ...اول مايته ووقفت مجابلتنه انتبه لنور الي كانت واقفه على كرسي في احد الزوايا وتمسح اللوحه بقطعة قماش
همس زايد وعيونه على طرف اطالعها:هذي شو قاعده اتسوي؟؟؟
هنيه بتوتر:دي دي اصلها مش راضيه تسمع الكلام ومصره انها تساعد البنت سيييلي في التنظييف
زايد مايازله الي تسويه نور لاكنه فضل انه يتجاهلها
زايد:هاتيليه الريوق برا في الحديقه...وياويلج ان خليتيها اهيه تيب الريوق ولا اتشبر عنديه اهناك شبر
هنيه:ط ط ط طيب يا بااااشه
طلع زايد ونزلت نور وعيونها تتبعه وهو رايح
نور:ماذا كان يريد؟
هنيه:مالكيش دعوه انتي بااا بالي عايزه
نور:مالكيش...مالكيش
راحت نور عن هنيه وهيه تردد الكلمه في محاوله انها تفهم معناها
زايد تم مسترخي على الكراسي الي برا فطر وشرب قهوته وعقب قعد يقرا الجرايد لين ما حس انه بدا ينعس ربع ايديه على صدره وخذها غفوه
وهذي عاده فيه انه ياخذله غفوه بالطريقه هذي اذا كان الجو حلو
اذن الظهر ومازال زايد على وضعه
كانت نور طول الوقت تراقبه تشتغل اشوي وترجع اطل عليه
هنيه من وراها
هنيه:نوووور يابنت انتي مابتوبيش
نور:هنيه ههههه توبيش تعني التوبه يالها من كلمه بتوبيش عجبت لهذه الكلمات كيف تصوغينها
هنيه:كويس انك بتفهمي لي
نور:اجل افهم لك ولاكن لا افهم لما يقوله السيد استنتجت من ما قال كلمة ياويلج يعني بها الويل لكي
هنيه:برافو يابنت اهو بديتي تفهمي
نور:فليساااعدني الرب...هنيه السيد مازال نائم وقد نودي للصلاه هيا اذهبي وايقضيه كي يستطيع ان يلحق على الاقامه
هنيه:نعم نعم نعم عيزاني انا اصحيه ...هو انتي عايزه اجلي النهارده
نور:ماذا هناك هنيه ...كانك لا تريدين ان توقضيه
هنيه:لاااء ياماما انا يريد حياه مال انا
نور:الن تذهبي لتوقضيه؟؟!!!!ّ
هنيه:ياخراااابي منك رجعت مابتفهمش حاجه...الباشه سيبيييه في حاله هو مشكله زيااااده
نور:حسنا هنيه سوف اذهب لاوقضه انا
هنيه بصرخه افزعت نور:اووووعي اووعي قووومي يابنت اقووومي امشي معايه الاوده عايزه تنيلي عيشتنا النهارده
مشت نور مع هنيه باتجاه الملحق وهيه لاتفهم ماتقول هنيه وقبل ان تصل سحبت يدها بقوه من يد هنيه
نور:انا لا اخشاااه سوف اذهب لاوقضه ...يجب ان يسرع قبل ان تنقضي الصلاه عنه...هيا اتركيني
التفتت نور ورجعت للفله مره ثانيه مخليه هنيه وراها تولول كالعاده لفت الشال الكبير عليها زييين وتوجهت له وقفت قريب امنه
وتمت اطالعه وهو مسترخي في غفوته...حست ان لسانها انربط وبصعوبه تكلمت
نور:سيدي............سيدي ....احم سيييدي
فتح زايد عيونه وسمع صوتها تناديه بعده متخدر ومش حاس بنفسه التفت الها وتم ايطالعها بنظرات اول مره اتشوفها نور وحست بالاحراج منها كان ايحاول يستوعب منيه هذي الي واقفه جدامه
نور وهيه منزله راسها تحت وترفع له نظرها:سيدي قد نوديا للصلاه ...عليك ان تعجل كي
تلحق للصلاة في المسجد
تم زايد حاط عيونه في اعيونهاالي يشوفهن طبق الاصل من اعيونه ويحاول ايركز اكثر
نور:سيدي هل سمعت ماقلت؟
انتبه اخيرا زايد:شووه؟
نوروهيه تشير للمسجد القريب:قد نوديا للصلاه
ضوق عيونه وهو يشوفها وبصوت غاضب:والمطلوووب؟
ارتجفت نور:قد قد يقيم الصلاه ......عليك الاستعجال كي تستطيع ان تلحق على الصلاه
زايد بهدوء ايحاول يكبت فيه غيضه:حد......قالج.......تعالي........وعينيه
تمت نور اطالعه وهيه تعيد كلماته كلمه كلمه في راسها تحاول تفهم معناهن
نور:سيدي الن تذهب الى الصلاااه؟
هز زايد راسه وهو مغمض:لحووووووووه والله انها نشبه
حط يده على عيونه وهو يضغط على راسه وبعدها رفع يده وطالعها اصدر باصابعه الابهام والوسطى صوت وهو يحكهن ببعض واشار الها باصبعه السبابه ناحية البيت
زايد:يالله فارجي دااااخل
تمت نور اطالعه بنظراتها المستفسره وصرخ عليها
زايد:داااااخل
هزت راسها ومشت رايحه داخل وهيه كل شوي تلتفت له تنتظر امنه انه يتحرك عشان يلحق على الصلااه لاكنها انصدمت انه ماتحرك ورجع لوضعيته السابقه
اسرعت بخطواتها داخل والتقت بهنيه
نور:هنيه ...انظري اليه لم يتحرك ليذهب للصلاه ماذا به
هنيه باستنكار:مازا به؟يا اختي الحمدلله على السلامه انك رجعتي ما فيكيش حاجه
نور بتوتر:لا استطيع ان افهم لك وانا اشعر بحرقه تلتهم صدري لحال ذالك الرجل الذي لم يبالي بامر الصلاه
نور:هنيه هيا اذهبي اليه واطلبي منه الاستعجال لكي يذهب للصلاه
هنيه:يابنت انتي حارقه اعصابك ليه هيه صلاتك ولا صلاته سبيه براحته
نور بنظرات منصدمه:لماذا تقولين ذالك هنيه الا يهمك امر الصلاه
زجرت بعدها نور هنيه الي خافت:هيااااا اذهبي وايقضيه ربما تعاقبي انتي في يوم لعدم ايقاضك له للصلاه
خافت هنيه وراحت وريولها تنتفض متروعه من نور ومن الي رايحه له بريولها
اول ما وصلت عنده فتح زايد عيونه الي ماقدر يفتحهن زياده لان الشمس بدت تعاشيه وتم ايطالعها
زايد:هااه شعندج انتي بعد؟
هنيه:ا ا ا انا انا كو كو كونت عا عا عايزه اعرف انته نايم ولا صاحي خ خا خا خلااااص ا اسيبك يا ياباااشه ب براحتك
زايد:هيه الي طرشتج صح؟
هنيه:ه هي هيه ميييين؟
غمض زايد عيونه:مادريبج؟
هنيه:ف فو فوتك بعافيه ياباشه
وقبل لا ايقول زايد اي كلمه كانت هنيه واقفه عند نور تلتقط انفاسها
نور:ماذا قلتي له؟
هنيه:الباشه صاحي يابنت صاااحي سيبيه في حاااله
من الحرقه الي تحسبها نور زمت شفايفها وهيه توجه نظراتها المعصبه ناحية زايد الي ماتحرك من مكانه
نور:اهو شيطااان ارعن لا يصلي ولا يبالي لامر الصلاااه ...ما هذا الرجل؟
هنيه:يابنت سيبيه لحاله
نور:لا لان ادعه سوف ترين ماذا يجب ان يقال له
لفت نور الحجاب مره ثانيه عليها وتوجهت ناحية زايد الي كان يحس بخطواتها تقترب وخلا نفسه على حاله مغمض عيونه ومتربع
نور وهيه اطالعه:حسنا ايها السيد
فتح عين وخلا عين مغمضه وتم ايطالعها والشمس فوقها ضاربه فيه وابتسامه فارضه نفسها يحاول يخفيها
نور:لقد فهمت لك ايها السيد انته جعلت المساله مسالة عند كي لا اتدخل في امورك...حسنا قد وصلتني الرساله
ابتسم زايد وهو يغمض العين المفتوحه ويفتح المسكره
نور:انا لا اريد ان اكون سببا لتركك صلاتك
غمض زايد عينه المفتوحه على امل انها تفارج
نور وهيه تحط ايديها على الطاوله وتقرب اكثر عشان يسمعها بوضوح:ولاكن بربك ايها السيد...ماذا ستقول لله اذا سالك في يوم
عن سبب تركك للصلاة عمدا
فتح زايد لحضتها عيونه باتساعهن ايطالعها متجاهل اشعة الشمس الظاربه في عيونه
نور:هل ستقول له بان المساله كانت من اجل تاديب تلك الفتاه؟
تم زايد ايطالعها
نور:اتعتقد ان الله سيعفو عنك لانك رجل ترا نفسك مهما عند الجميع.....هل سيعفو عنك؟؟
اعتدلت نور في وقفتها
نور:اسمع ايها الرجل انا لااريد ان ياخذني ذنبا من اجلك لن اتدخل في شؤنك مرة اخرى...فاليعفو الله عنا جميعا
وقف زايد لحضتها وارتطم الكرسي كالعاده على الارض مثل ما طاح قلب هنيه وهيه تسمع صوت الكرسي وعشان اتكون قريبه من قلبها قعدت على الارض
تم زايد واقف ايطالع نور بعدها مد يده لنظارته المرمايه باهمال على الطاوله ومحرومه انها تتربع على خشمه الي مثل السيف
رفعها ولبسها وبكل هداوه التفت عنها ومشى بخطوات واثقه رايح للفله ابتسمت نور واول ما وصل زايد اخر سلمه فوق وقف والتفت للسلم وفكر هيه كيف قدرت اتمشيه على كلامها وكيف اهو مشى قبل لا يعطيها كلمه اترم اعضامها
زنفخ وخلع نظارته الي اصتدمت بالجدار بعد ما حذفها عشان اطيح على الارض مليون قطعه دخل لقسمه وصفق بالباب الي هز الجدار من حوله وخلا قلب هنيه بعد ما رجع الها ينتفض
هنيه:سكنهم في مساكنهم
نور بعد مادخلت:لما انتي جالسه هنيه
التفتت هنيه الها بعيون زايغه:هو انتي مامتيييييش؟
ضحكت نور:ما متييييش اتعنين ان امووت لا عليك لقد لقنته درسا لن ينسااااه
هنيه باستغراب:لقنتيهي اييه
نور وهيه متوجهه ناحية الملحق وهيه مبتسمه:هيا هنيه انا عيزاااكي الحقي بي لكي نصلي قبل ان تضيع علينا الصلاه كما اضاعها السيد...
هنيه:هو انتي فاكره السيد حيخلي النهارده يعدي على خييير....يبقى انتي معرفتيييش السيد كويس
نور:تبا له
.................................................. ..............
دخل مروان البيت وشاف بدر وشاف انه مش معاه كان واضح على ملامح بدر ان في شي مضيقنه
لقاه عند السياره برا وكان بدر يتعامل مع سيارته بعنف يفتح الباب ويصفقه واي حاجه يمسكها يرميها بعد ما يخلص منها بالقو تم مروان ايطالعه وما حب انه ايكلمه وهوبالمزاج هذا
دخل مروان داخل عند امه حبها على راسها
مروان:اميه بدر شبلااه؟
ام بدر:شي قالك؟
مروان:لا بس شكله متضايق
قعدت ام بدر:والله يا ولديه السالفه اتخص لبنيه الي خطبها
قعد مروان عدال امه:شبلاااها
ام بدر:انا ما دري انتو شو صار معاكم يوم الخطبه ومن يومين وانا تينيه اتصالات من حريم اعرفهن وما اعرفهن يسالن كيف بنت ابو فهد ترفض ولدكم
مروان:وهن شدراهن؟
ام بدر:اهيه يا ولديه ما خلت حد من صديقاتها ما قالت الها السالفه وقالت انه رفضت ويابت عذاريب في اخوك مادري من وين يايبتنهن اونه شيبه
وراعي قوانين
هز مروان راسه:يااااهل انتي كيف تقوليله عليها وانتي اتشوفينها ياهل
ام بدر:انا شدرانيه ياولديه يازت اليه وهلها ييراننا وما قد شفنا منهم قصور وامها ماشالله ذهب ما دري ان لبنيه ملسونه جذيه
مروان:وقلتي لبدر الي قالنه الحريم
ام بدر:لوكنت ادري ان خاطره بيتكدر جذيه ما قلتله والله انها رافسه النعمه
مروان:اميه احنا هب يهاال الحين عمارنا وصلت سبع وعشرين وثمان وعشرين يوم بتفكرين تخطبيلنا طالعيلنا بنات
فاهمات وعاقلات وعلى الاقل مخلصات الجامعه اتكون الوحده فيهن اتقدر المسؤليه وتقدر اشغالنا هب يهال يبالهن دلع وخراطه احنا هب حق السوالف هذي
ام بدر:بسم الله على بدر اسميه الابيدلعها حرمته ومابيقصر فيها مزيووون ومية غرشوبه تتمناه الاانته الشيبه الي تبالك عيوز
مروان:افاااا شفتي انج عنصريه وتحبين بدير اكثر عنيه
ام بدر:فديته انا ما اقهر فيه شي انته بتاخذ حقك ماعليك خوف لاكن اخوك حساس ومايقهر
قرب مروان راسه من راس امه:اممممميه بدير ما يقدر ياخذ حقه عيل ليش اهو محامي ما عليج من برائته تراااه هب هين وبتقولين قلته يامروان
.................................................. ................
قعد خليفه لاصق في نوره عقب مانزل وحصلهم قاعدين ايشوفون التلفزون وقعد فطامي جدامه
خليفه:اي اي اي خشمي فجييييه ذبحتينيه
فطامي:ههههه
تم خليفه يدغدغ فطامي وهيه تضحك وتكركر
خليفه:يووووه فديت روحج
التفت لنوره المتسمته في قعدتها
خليفه:اخبارج معاهم متعبينج
نوره:لا ...فديتهم
خليفه:تبونا نطلع العزبه اليوم؟
التفتت له نوره:عندك عزبه؟
خليفه:ياسلاااام على عزبتيه بتستانسوون فيها
ابتسمت نوره:والله في خاطريه من زمان السيره للعزب
خليفه بدا قلبه ايذوب على الصوت الي معذبنه
نوره:عندك بوووش
خليفه:عنديه بووش وغنم وخيووول وعنديه بعد البقره الضاحكه هههه
نوره:ههههه يعني الحليب الي ايي كل يوم من عزبتك
خليفه:هيه نعم عجبكم
نوره:هييه
خليفه:عيل ياله عندكم عشر دقايق تكونون فيها جاهزين
تحمست نوره وراحت بسرعه تبدل لليهال وتاخذلهم تبديل وطلبت من الخدامه اتجهز قهوه وشاي وتسوي سندويجات لليهال
تم خليفه ايطالعهم وهم رايحين متحمسين للسيره بعدها طلعو للعزبه الي في طريق سويحان وكانت عزبه مرتبه مبناي على طرفها بيت من العريش وكان روعه
اليهال استانسو وتمو يراكضون بعد شوي طلعلهم خليفه وهو راكب دراجه كبيره وتمو اليهال ايصارخون مستانين
ناصر:عميه خليفه اريد وحده
خليفه:فاااالك طيب
احمد:وانا عميه اريد وحده
خليفه:ولا ايهمكم كلكم بييب الكم
هند:حتى احنا؟
خليفه:وحتى فطامي
عقب رفع نظره لنوره:وبعد جان خالتكم تبا دراجه ماعنديه مانع
احمد بحماس:اللــــــــــــــــــــــــه بنسوي سباق
خليفه:بنسوي سباق والحين يالله صفو طابور بلاعبكم واحد واحد
تم خليفه كل شوي ياخذ واحد ايوديه يحوطه حولين العزبه ويرجعه نوره والبقيه قعدو في العريش الي كان مفتوح من جدام مطل على العزبه كامله
حطت القهوه والشاي والبسكوت والسندويجات وكان الجو روعه وهم مستانسين فوووول
اخر واحده كانت فطامي الي رجعت مستانسه
احمد:بعد دور عميه بعد دور
نوره:احمد بس حبيبي خل عمك يرتاح اشويه وياكله شي...تعال تعال اتقهوا
بدون ما يحس اريوله انقادت لكلمة تعال وهو يوقف الدراجه ويتجه ناحيتهم قعد قريب منها وتراكضو اليهال للدراجه راكبينها كلهم
نوره وهيه تمد له فنجان القهوه:تعبوووك
خليفه:لا والله مستانس معاهم
نوره:ما شالله العزبه اتجنن الله ايباركلك فيها
ابتسم خليفه الها وهو يطوق اصابعها الماسكه الفنجان الثاني الي مدته له تمت اصبوعه ماسكه صبوعها وثبت الفنجان بينهم انحرجت نوره والتفتت بنظرها لليهال عقب خذ خليفه الفنجال وشربه
نوره بتوتر:ا اصبلك شاي
خليفه :زيين
صبته ومدته حاطتنه جدامه
خليفه:شرايج في العريش
نوره:كل شي ايجنن في العزبه
خليفه:والدراجه ماتبين انتي بعد دور
نوره:انا!!!!هههه بس انا ما اعرف اسوقها
خليفه:ا ا ا ا بخلي ناصر يسوقبج
نوره وهيه تلتفت للدراجه:يقدر؟؟
وقف خليفه:اكيد يقدر
نوره:ماعليه اشرب شايك اول
خليفه:ماعليه برجعله...تعالي
ركضت نوره وراه لين الدراجه وقعد ناصر وقالها تركب وراه
انحرجت نوره واهيه تركب وبعد ما ثبتت في قعدتها ابتسم خليفه
خليفه:هاه نويصر اتعرف اتسوووق
ناصر:الاااااااقعه انا اسوق العوده هذي
ضحك خليفه وشله من على الدراجه وما اعطى نوره فرصه تنتبه لخدعته وركب على طول واهيه وراه كانت تبا تتكلم لاكنه ما اعطاها مجال مسك ايديها وطوقبهن خصره وهو يضمها اكثر له
نوره:لااا ما اريد
خليفه :تمسكي زييين عن لا طيحييين
نوره:خليفه ارجوووك لا
شغل خليفه وما سمع لترجياتها
خليفه:هنوده نويصر انتبهو لخوانكم وازقرو الخدامه اتيي تقعد عندكم
وانطلق خليفه ونوره ترتجف وراه وهيه مستحيه انها تاخذ راحتها في مسكته
خليفه بصوووت عاااالي:امسكي زيييين
عاده خليفه كان مستاااااااانس فووووول على قربها
في البدايه كانت نوره مستحيه لاكن الخوف طغى وخلاها تتشبث فيه اكثر واكثر وتحاول تمنع صريخها عن لا يعلى اول ما توجه ابها ناحية التلال
نوره:خليفه ارجوك لا اتودينيه مناااك
خليفه وهو يضحك:بتستاااانسين صبري شوي بس
نوره برعب:لا لا ارجوووك انا اخااااف
وزادت مسكة نوره لخليفه ودعست بويهها في ظهره بعد ما صرخت وهو ينزل ابها من التل
ضحك خليفه بصوت عاالي
وتعالى صريخ نوره الي كان مستانس عليه بعد
نوره:حراااااام عليك خليييفه والله ايخوف
خليفه:هههههه ليش خايفه عيشي المغامره واحلى مغامره
استمر خليفه باللعب في التلال ونوره ترتجف وراه وكل مازادت من احتضانه كل ما زاد اهو في اللعب
نوره:خلييييييييييفه فديييييييييتك بس
وقف خليفه فجئه والله ستر انه ماكان في وسط التل وسحب نفسه بصعوبه ماتدري بمفعول كلمة فدييتك كيف هزته هز
نوره وهيه ترخي ايديها شوي شوي:خ خلاااص
ابتسم خليفه:لا بعدنا ما خلصنا اتمسكي زين
وشغل الدراجه مره ثانيه
خليفه:فديييتج بنرجع العزبه خلااااص ثرج خوافه وانا ما ادري
كانت حاضنتنه وراسها متساند على ظهره ولان الدراجه كانت تمشي شوي شوي ابتسمت وهيه تحس برجيف قلبها من قربه ماتتخيل انها قريبه امنه هالكثر تمنت حينها ان العزبه اتكون بعيده وما يوصلولها بسرعه

ادري حرقت اعصابكم عشان ايشوفها بس احداث القصه غييير وان شالله تكونون راضيين على الاحداث الي بتي
والي بتكون غير متوقعه بالنسبه لخليفه ونوره
اشكر الجميع على المرور
##
##
##
ودمتم وديمه العطا