السموحه على التاخير غصبا عني والله

"نـــــــــــــــــــور"
الجزء الثامن

دخل زايد ملحق الخدامات والخدامه الفلبينيه تمشي جدامه ادله الطريق صوب هنيه وقف عند الباب
بعد ما قالت الخدامه لهنيه ان السير ياي وهيه كانت في لفراش تعبانه تلخبطت هنيه اول مره زايد ايي عندهن في الغرفه
زايد:هنيه....
اعتدلت هنيه وهيه تعبانه على الاخر
هنيه:ايوا يا باشه
تقدم زايد في الغرفه كم خطوه رايح صوبها
زايد:تعبانه وايد؟
هنيه:شوية رشح ياباشه
زايد:عطينيه رقم ابو فريد بتصله ايي وبخلي الدريول عقب ايوديكم المستشفي
هنيه:مفيش داعي ياباشه البنت نور ادتني زنجبيل وانا بحس حالي كويسه
زايد بحزم:كم الرقم؟
اعطت هنيه زايد رقم زوجها والتفت اهو للجهه الثانيه عشان يتكلم وانصدم من المنظر الي شافه
كانت لابسه حجاب ابيض ساترنها بالكامل وقاعده في الزاويه على سيادتها وشكلها مخلصه كان ويهها احمر ايدل على انها كانت في نوبة
صياح تلاقت نظراتها مع نظراته لثواني والتفتت عنه بنظرها لجدام بعدها قامت وطوت السياده وراحت
للسرير الثاني وقعدت على طرفه في الجهه الثانيه حس زايد انه مش مركز بكلامه مع زوج هنيه وبالعافيه قدر ايقوله يحضر عشان ايروح مع
زوجته المستشفي سكر عنه وجالت نظراته بالغرفه ووقفت عندها وهيه معطيتنه طرف ويهها ومنزله راسها تحت لين الحين اثار الصياح باينه عليها ياترى شو الي كان ايصيحها
كره زايد هذا الشعور الي حس فيه وتم يذكر نفسه انها بنت باكستانيه لا راحت ولا يت خلها تنقلع
مع انه انسان مايحس بحنيته وهيه تطلع غصب عنه والدليل اهتمامه بمرض هنيه لاكن هذي لازم مايوليها اي اهتمام
شكرت هنيه زايد وطلع عنهن وهو يحس بضيقه
..................................................
صرخ بدر الي كان في سيارته راجع البيت:وين انته
مروان:انا بخير مافيه الا العافيه
بدر:وييييين
مروان:راجع البيت
بدر:ياله انا راجع بعد
اتلاقى بدر ومروان في الحوش ودخلو ميلس الريايل
بدر:اشوووف
ضحك مروان:ياريال طلعوها مافيه شي
بدر:الكلب من وين ياب سلاح وضربك؟
مروان:ااااه يا اخي لو تقول الدنيا امان هذي عصابات محد يدريبها مرتبين عمارهم واشغالهم اخس من عصابات المافيه
بدر:ما اتخيل ياخي عندنا احوال جذيه
مروان:اوووه
بدر:اسمعنيه اقبض مكتبك وخلص الاشغال الي لك وحركات التنكر والدس بين لبيوت اقلعها
وين عايشين احنا
مروان:يا اخي ليش انته ماتريد اتصدق اقولك عندنا احواااال بنغال شغالين مخدرات ولعب قمار وبلاوي
بدر:خل غيرك ايشوفهم حرام عليك اميه لو يستويلك شي نقزت وماتت
مروان:يابدر انا من البدايه مفهمنها عن طبيعة شغليه والاخطار الي بتواجهنيه
بدر:اااه يعني من زمان قايللها توقعي خبر موتيه في اي يوم...زادنها اتبات على سيادتها تدعا ان الله يحفضنا
وماتشوف فينا مكروه
مروان:فديتها انا لوما دعاويها اليه جان منزمان رايح فيها
بدر:الله يهديك يا خويه وترحمنا شوي من همك....زين انك هب معرس جان المسكينه بنت الناس فارشه سيادتها عدال اميه
ضحك مروان:لا عاده الليل لازم انا باخذ اجازه
بدر:والله ما عرفنالك سعات اتقول انا مرتاح عزابي والحين بتاخذ اجازه على الليل
مروان:اخبار الخطبه
بدر:اتسكر الموضوع لا هم فتحوه ولا انا ناوي افتحه
مروان:واميه؟
بدر:لا اميه قلتلها لاتفتحين الموضوع لين انخلص من زايد
مروان:يالله الله كريم يمكن تعقل في الفتره هذي واتوافق
ابتسم بدر باستنكار وما رد على مروان
.................................................. ...
نزل فهد من فوق وانصدم من اليازي الي قاعده جدام امه الي كانت اتجدل الها شعرها تمت اطالعه بنظرات و
ولفت بنظرها عنه للجهه الثانيه كان ماسك كتبه والاب توب تقدم منهن خطوتين وبعده مستقرب
فهد بصوت معصب:امــــــــــــــــيه
رفعت ام فهد راسه له:هلا فديتك
فهد:وبعدين يعني شو سالفتها هذي
ام فهد:بلاك يا ولديه؟
فهد:هــــذي شبلاها ماتتحجب ماتشوف ريال جدامها
بنظرات تقهر سحبت اليازي جديلتها من يد ام فهد ووقفت وهيه رايحه لفوق تتبعتها نظرات فهد لين ما اختفت
رجع وطالع امه بنظرات استفسار
ام فهد اتوهقت ماعرفت شو تقوله:ا ا ا بعدها ياهل يا ولديه
فهد:هـذي ياهل!!!! مب بالغ؟
ام فهد:عاده يا ولديه انا شدرانيه ابها ما اعرف اقولها ااتحجبي استحي منها لبنيه شويه ما اعرف شو في خاطرها
فهد:ماتعرفين شو فيها اا هذي صايعه فالته وبذكرج في يوم عنها
وطلع فهد وهو معصب اكثر
ام فهد:الله يهديك يا ولديه لاتقول عن بنت عمك جذيه
صفق الباب وهو طالع
.................................................. ..............
اول ما دخل خليفه فراشه في المسا اتذكر فطامي ودعا النوم قام مبتسم لبس فانيلته وطلع صوب غرفة نوره
سمعت نوره دق خفيف على الباب
نوره قربت من الباب :منووو
خليفه:احم ا اانا فطامي ارقدت؟
تذكرت نوره
نوره:لحضه شوي
راحت نوره لغرفة الملابس ولبست شيله كبيره ولبست النقاب وفتحت الباب لخليفه
نوره:لا بعدها واعيه
خليفه:ممكن اريد اشوفها؟
نوره وهيه تفتح الباب اكثر:تفضل
خليفه عجبه جو الغرفه باااارده وريحتها حلوه وما حس بنفسه وهو يقول:اللــــــــــــــــــــــه ريحة الحجرة جنان
قرب من البنت الي على السرير تستعد للرقاد
خليفه:مساء الخير يا حلووه
فتحت فطامي ايديها عشان ايقرب وتحضنه وذااب خليفه لحضتها بهالحضن المرحب به
خليفه:يووووه فديتج
قرب منها وطاح عدالها على السرير وحضنته فطامي وتمت اتحبه في ويهه وخليفه مستانس
خليفه:فديت روحج ثرج هب هينه الحين انا ياي حق لاذكار اتسويبيه جذيه
كانت نوره واقفه عند نهاية السرير اطالعهم وهيه مبتسمه
خليفه شافها:وانتي كل يوم معيده معاها على هالحب
نوره:هههه ههههه فطامي بس حبيبي
خليفه في خاطره"عاده انا بروحيه جو الغرفه مدوخنيه ادوخينيه بعد بضحكتج"
حط خليفه عيونه في عيون فطامي
خليفه:اشوف عيووونج
فتحت عيونها اكثر في عيونه ورجع يضحك ونوره احاسيس غريبه انتابتها مره ثانيه من وجوده معاهن
حضنت فطامي ويه خليفه وهيه تقول
فطامي:بـــــــــــــــــــــابا
انتفض خليفه من سمع الكلمه وحس بدموعه غصبا عنه تتجمع في عيونه ودعس بويهه في حضنها
ايحاول ايسيطر على مشاعره الي تمت اتزيد وفطامي تحضنه اكثر وهيه تكرر نفس الكلمه بعدها لفت ويهها
لنوره وقالت:مــــــــــــاما
انفجر خليفه الي ما قدر يستحمل اكثر بشهقه ركضت نوره بسرعه وطاحت ورا فطامي وهيه تحط يدها على كتفه
نوره:خليفه تعوذ من ابليس
قعد خليفه وهو يحضن فطامي ولامنها لصدره
خليفه:ما اقدر ما اقدر انا استحملت واااايد وكبت واااايد انتي ماتدرين بغلاة خلف اخويه ااااااااه ابيع نصف عمريه
واشوفه لو مره وحده بس
نوره:لا حول ولا قوة الا بالله كل شي مقدر ومكتوب واجله وقف وكلنا راحلين من هالدنيا.....الوعد في الجنه ان شالله
يعني شو الي مصبرنا على فرقا احبابنا الا اننا بنلاقيهم في الجنه يالله بحسن الخاتمه
مسح خليفه ويهه وابتسم
خليفه:اسمحيليه والله مادري شوصار اليه....
وهز راسه ونظرته رايحه لبعيد
خليفه:ماكنت اتخيل انيه بفارقه في يوم هو كان كل شي في حياتيه الاب والاخ والصديق
ابتسم
خليفه:كان ايقولليه عرس يا خليفه واسمع كلمة بابا محلاتها....الله يرحمه
كانت نوره اتحس بسجاجين تنحرها واتحاول تمنع نفسها ماتنفجر اهيه بعد
نوره:الله يرحم جميع موتى المسلمين
خليفه:امييين اميييين...سمحيليه ...اكيد انج ذايقه نفس الكاس وانا جددت المواجع
نوره هزت راسها:كاس مر
نزلت نوره راسها تحت في محاوله اكثر انها تمنع نفسها ماتصيح خليفه حس ابها وحط فطامي على المخده
واول ما التفت الها نزلت نوره بسرعه من على السرير وهيه تدري انها كسرت خاطره ويمكن يحاول
ايواسيها
نوره:انا بروح اشوف اليهال
استغرب خليفه من سرعتها الي قامت فيها من على السرير ورجع ايطالع فطامي ويحبها على خدودها
ويمسح على راسها لين ما شاف انها استسلمت للرقاد
طلع خليفه ورا نوره وماحصلها في غرف اليهال لاكنه سمع عقب صوت الماي في واحد من الحمامات وعرف انها استسلمت لدموعها
.................................................. .............
اجتمع في اليوم الثاني حشد كبير من العماله الباكستانيه جدام فلة زايد محتجين على طردهم من العمل
دخل بدر على زايد في ميلسه وكان زايد مفول فوووول من الغيض على الي يصير جدام فلته
بدر:وقته هذا يازايد وقته اتفنش العمال الحين
زايد:يعنيه افاااارق اويوههم هم الي يابوه لعمارهم....ولكلاااب يتحسبونيه بردهم على وقفتهم هذي
بدر:هيه اكيد انك بتردهم انته نسيت انك الحين في موقف حرج وان اعدائك متربصين بك
ومش بعيده ايكونون هم الي مشيشينهم ايسون جذيه
زايد:ايخسووووون بيبطووون انا ما انمسك من يديه الي تعورنيه وباجر بتشوف ان ما كنسلت اقاماتهم كلهم وسفرتهم ما اكون انا زايد
بدر:لا حول ولا قوة الا بالله...يا زايد فكر فيها زيييين هذولا مابيروحون من جدام بيتك لين توعدهم بالي ايريدونه
زايد:اطلبلهم الشرطه الحين
بدر:ينيت انته تبا السالفه تكبر اكثر واكثر
زايد:يعني ما كبرت والصحافه من الصبح وهيه واقفه معاهم
بدر:شفت الي انا خايف امنه
زايد:مايهمنيه خلهم ايعرفون هم مع منوه بيتعاملون
بدر:هذا الشي مش في مصلحتك
زايد:يا اخي انا حر افنش الي افنشه من شركتيه محد ما يعرف باسلوبيه هذا والانتخابات انا ضامننها
بدر:لاااا انته هب فاهم شي اقولك ناس مستعديه لك واتقول ضامن على العموم انا بطلع الهم بحاول اصرفهم
زايد:تحمل يابدر توعدهم بشي ...والله مالهم عنديه الا التبن
في الوقت هذا كانت نور اتشوف ابناء جاليتها واقفين تحت اشعة الشمس ومش فاهمه ليش هم واقفين
نور:هنيه لما هم واقفين هاكذا؟
هنيه:بنت يانوور بلاش بقى تعدي اتبصي عليهم لحسن الباشه يشوفك ويعمل لينا سالفه
التفتت نور لهنيه:انتي ماذا تقولين لما لا تتكلمين باللغه العربيه
هنيه:امال انا بتكلم ايييه
نور:يا الاهي لا افهم مما تقولين حرف...لقد اعتقدت انني سوف افهم ما تقولون...هل تفهمين ما اقول يا هنيه
هنيه:اااه انا بفهم الي بتئوليه دانتي بتتكلمي نفس الافلام المعربه
نور:ماذا تعنين بكلمة بتئوليه
هنيه:يعني انته يقووول
نور:ماذا؟
هنيه:بنت يانووور بلاش بئ ماذا وكيف دنتي دوختي لي دماغي
نور:انتي تعودين للكلمات الغير مفهومه
دخل زايد وهو ينادي هنيه وتلاقت نظراته بنظراتها ابتسمت ونزلت راسها تحت قرر زايد انه يتجاهلها لان مافي فايده في حبسها في ملحق الخدم بعدما اشتكت له هنيه انها ما تقدر الها
هنيه:ايوا يا باشه
زايد:سيري ازقري اليه البواب
هنيه:طيب يا باشه
طلع زايد والتوتر الي يحسبه يوم ايشوفها رجع له
التفتت نور لهنيه:ما ذا قال ؟ ماذا يعني بكلمة ازقري
هنيه بتفكير:يعني اندهي
نور بنظرات مستفسره:لم افهم الكلمه الاولى كي افهم التاليه
هنيه:ياختي انا مش دارسه ومش عارفه حاجه اعتئيني يابنت
طلعت هنيه وتمت نور واقفه مش عارفه هنيه شو قالت
نور:يا الاهي لما لا يتكلمون العربيه...كيف لي ان افهم ما يقولون
العمال ظلو على هالحال ثلاثة ايام ونور مارتاحت لين عرفة قصتهم من الدريول الي خبر الخدامه الفلبينيه وبدورها خبرت نور
تمت نور كل يوم اطالعهم من الدريشه وتحس بحرقه على حالهم وتتسال ليش زايد سوا ابهم جذيه
واحد من العمال طاح من ظربة الشمس في راسه عرفت نور بامره وراحت على طول للملحق وخذت عباتها الطويله المخرمه عند العيون وطلعت الهم ومعاها الخدامه الفلبينيه مجرجرتنها وراها
زايد وبدر وخليفه كانو في المجلس الخارجي نقزت عيون زايد جدام اول ما شافها رايحه صوبهم طلع من الميلس وجمد جدامه وهو يسمع صوتها الي ارتفع وهيه تكلمهم باللغه الباكستانيه
كل العمال وقفو جدامها يستمعون الها لين ما استوعبو شو قالت الهم وهزو راسهم مايدين كلامها
زايد بصراخ وهو فاقد اعصابه:اللـــــــــــــــــــــــــــــه يغربل الساعه الي يبتها فيها....
التفت لبدر وخليفه:هذي شو قاعده اتقول الهم..هاااه شو قاعده اتقول الهم
خليفه:زايد ..زايد اهدا يبوي
زايد وهو مصدوووم من الي يشوفه:شو قالت الهم اكيد قالت انها بنت عميه الحيوانه بذبحها اليوم
خليفه:استهدا بالله ياريال
كانت نور راجعه بعد ما شافت العمال بدو ينصرفون وانصدمت بالي وقف جدامها والصدمه الثانيه بالكف الي ياها وطيحها على الارض
مسكه خليفه وكان ناوي ايدوسها بريوله
زايد:يا حيوانه شو قلتي الهم هاااه شو قلتي الهم تتحسبين انيه مابعرف شو قلتي والله لا ايبهم اهنيه جدامج واخليهم ايقولون كل كلمه قلتيها
قلتيلهم انج بنت عميه وانج قريب بتستولين على كل شي ووعدتيهم اتعوضينهم انا بذبحج اليوم بذبحج
صرخ خليفه على بدر :تعال شله وده داخل
مسك بدر زايد الي كان ميت من الغيض وتم ايجره لداخل
بدر:زايد تعال وهد اعصابك
زايد:خل ابو درويش ايي الحين ...خله ايشوف شو قالت الهم الحيوانه
جر بدر زايد الي كان ينتفض من الغيض
نور بعدها كانت طايحه على الارض اتحاول تصلب نفسها بعد الظربه الي يتها وشهقت بصوت عالي اتصيح خليفه عوره قلبه عليها
وقرب منها وقعد قريب
خليفه:نور شي ايعورج؟
نور:هل هو غاضب مني لاني تحدثت عند الرجال ...اعلم ان صوت المراءه عوره ولاكنني لم استحمل ان ارا ابنا جاليتي بالحال الذي هم فيه
خليفه هز راسه هذي وييين تفكيرها والي يفكر فيه زايد وين:انتي شو قلتي الهم؟
كانت نور تشاهق وهيه اتصيح
خليفه:هل اخبرتيهم انج ابنة عم زايد
نور:لا لم اخبرهم ......اتعلم لم استطع ان احتمل رويتهم بهذا الذل...هناك في ديارنا نحن ننظر لكل شخص يقدم الى هنا بانه شخص محضوض
وبانه استطاع ان تطئ قدمه ارض الجزيره العربيه...الكثير هناك يحسدونهم لوصولهم الى هنا
شهقت بوجع
نور:لقد قلت لهم بانه عارا عليهم ما يفعلونه كيف يتذللون للمخلوق وينسون الخالق اليس الامر بيد الله الا يستطيعون ان يقفو
بين يدي الخالق ويناجونه بدلا ان يقفو بهذا الذل امام المخلوق......كيف استطاعو ان يقفو تحت اشعة الشمس يسترجون ان
يعفو عنهم السيد ولا يستطيعون ان يقفو بين يدين الله في الثلث الاخير من الليل وقد نزل الله اليهم للسما الدنيا ليقضي لهم حواجهم
لقد قلت لهم بان يتوجهو للخالق ويدعون المخلوق...اقسم لك لم اخبرهم بانني ابنة عم السيد
تاثر خليفه بكلامها
خليفه:لاتلومين زايد يا نور هو تعبان من الانتخابات وكل شي يفهمه غلط
حست نور انها فهمت لخليفه
خليفه:شي ايعورج؟...
نور:ماذا تعني؟
خليفه بابتسامه:هاه ا ا اقصد هل تشتكين من شي؟
وقفت نور:لا
مشت خطوتين والتفتت لخليفه
نور:هل تعني بان السيد اعتقد بانني اخبرتهم عن قرابتي له...سوف اذهب اليه لاوضح له الامر
نور ما اعطت خليفه فرصه يمنعها وركضت للفله داخل
وقف خليفه:لاااا الله ايهديها وين رايحه صوبه وهو مولع.....ابتسم خليفه
بس جناااان كلامها الله يغربلك يازايد انته وبنت عمك
التقت نور ببدر الي كان طالع من الفله وراحت داخل بسرعه عند زايد الي كان المووووت عنده ان شافها
التفت الها منصدم من وجودها
رفعت نور غطاها وكان ويههها محمر من الصياح والضربه الي يتها
نور:ايها السيد انا لم اقل لهم بانك ابن عمي
صرخ عليها:تعمعمتي في خصف"هذي الجمله نوع من السب عندنا"انتي شويايبنج تبينيه اذبحج
نور بنظرات مستفسره:مالذي يغضبك هاكذا......لما انته غاضبا دائما؟
اتقدم زايد منها كم خطوه وتمت اهيه ثابته في وقفتها ومسكها من زنودها وهو يهزها
زايد:انتييييي انتيي سبب كل غيضيه وقهريه
ودزها بالقو على الارض كانت نور تتالم من دزته الي خلت جسمها يضرب بقو على الارض نفسهااا اتعرف ليش اهو غضبان هالكثر
نور وهيه تقعد ورافعه نظرها له اتكلمه وهيه متالمه
نور:اعلم انك تحتقرني لانني من العجم ...ان ما فعلته باؤلاك المساكين يثبت لي ذلك...انا لست بلها لقد ارسلت من يطلب مني
مقابل المال ان اظل صامته ولا اعلم احد بانني ابنة عمك ولاكن كل من يعرفني هناك اتى اليه يحمل صورك ويقول لي انظري انه احد اقرباءك لا مجال بان اخفي الامر
وقد تاكدت اكثر عندما رميتني في ملحق الخدم انا لا امانع فلا يوجد سواك في البيت ولا يجوز لي ان ابقى معك
التفت الها زايد:انزين وعرفتي شااطره اصفق لج وبعدييين....انا ماتهمينيه عرفتي ولا ما عرفتي وبربرتج هذي الي قاعده اتبربرينها خليها حقج ولا تحاولين اتلفين وادورين وتسوين عمرج
غلبانه...كلااامج الي قلتيه برا كله بعرفه الحين وساعتها محد بيقدر يمنعنيه اسويبج الي اريد اسويه
نـــور ودموعها تنزل بغزاره:اقسم بانني لم اقل لهم بانك ابن عمي
زايد بصراخ:لاتقولين ابن عمي......
نزلت نور راسها تحت وتمت اتصيح من الالم الي تحسبه وتفكر ان الانسان الي جدامها مجرد من كل معاني الرحمه والانسانيه رفعت راسها له
نور:كيف اعتقدت في يوما من الايام انك رجل عظيم استحق ما انته عليه
التفت الها زايد منصدم:غصبا عنج استحق
نور وهيه تهز راسها وكان خليفه توه داخل ووقف وراها
نور:انته لا تحمل اي معنى للانسانيه ولا يملك قلبك ادنى ذره من الرحمه....انته لاتستحق ذلك الكرسي وسوف ترا انك لن تطاه في يوم من الايام
زايد وهو يقرب صوبها وبدت العفاريت تركبه:ايواااا ارمسي ارمسي ظهري الي عندج لبركه فيج وفي الكلام الي قلتيه
نور بتحدي وهيه ترفع صوتها وبعدها قاعده لانها ماتقدر توقف ووجع جسمها بعده
نور:انا لا افقه مما تقول كلمه ولاكنك رجلا ظالم ....سوف ينتقم الله منك يوما
زايد:جـــــــــــــــــــــــــــب والله ان قلتي كلمه انيه ادوسج بريوليه....
نور:لن تحصل في يوم على محبة الخلق...ولن تحصل على ذلك الكرسي
زايد:اقولج انجبي.....ومحبة الخلق خليها حقج ...انا مايهمنيه حد انا ماوصلت للي وصلته الا بتعبيه وسلطتيه وماليه
وقف زايد قريب منها وكانت قاعده عند ريوله ونزل مجابلنها وعيونه في عيونها
زايد:السلطه والمال ....وانتي مااتيتي من باكستان الا من اجلهن
وقف زايد ومشى خطوتين
نور:تبا لك
التفت الها معصب وتمت عيونهم متشابكه ببعض
نور:انك شخص بغيض اكرهك ايها الرجل ...لم اتي من اجل مالك ولا من اجل سلطتك
زايد:عيل حق شوووه يايه؟
نور وبدت الدموع تنزل مره ثانيه وهيه تحط يدها على فمها تمنع شهقاتها
نور:ايها القااااااسي الاتعلم بانني طوال تلك السنين وانا اعيش وحيده ....لم ارى والدي ولا اتذكر والدتي حتى جدتي رحلت عني وانا ما زلت صغيره
لا اعرف في تلك الديار احدا يقرب لي اوله صلة غرابه بي...وقد ترعرعت والكل يشير اليه بانني
لست من تلك الديار
ضمت نور ايديها لصدرها
نور:لقد ربيت بين بناتهم كانني ابنه اخرى لهم يحيطوني بمحبه ومعزه تختلف عن الجميع
رفعت راسها له
نور:اتعلم لماذا ؟...لانني ابنة الجزيره العربيه.....كيف اكون ابنة الجزيره وانا حالي بهذا الذل على ارضها؟
زايد وكلامها كان له مفعوله فيه:لا تمين تتفلسفين عليه
نور:اتعلم لما انا اردت ان اتي الى هنا ...لقد شعرت بالحياه تدب في اوصالي عندما علمت بان لي اقرباء
وبانني استطيع ان اصل اليهم لاتعلم مدى سعادتي برويتي لصورك في تلك المجلات...لقد كنت اعيش في غربه رغم كل احبابي من حولي...وسعدت بمعرفتي انني سوف اعود الى موطني والى
اقربائي...لقد تمنيت ان اجد لي جده وعمه وعم وابنا اعمامي لقد حلمت طوال تلك السنين باسره لم اكن اعلم بانك وحيد مثلي
زايد:منووو قال انيه وحيد انا اليه اهل واقربا اليه جده وخواااال احسن عن خوالج ميت مره انتي بس الي مالج حد وانا ما اتشرف اكون
من هالحد
نور وهيه تحس انها فهمت له:قاتلك الله ان الله قادر على ان يجعل لي اسره
ضحك زايد بصوت عالي:ههههه ومن وين تبين هذي الاسره
صرخ خليفه عليه:زاااايد انته بتشك في قدرة الله
زايد:انا ما اشك في قدرة الله لاكن هذي وايد مصدقه عمرها
تقدم خليفه كم خطوه:سر سر اطلع برا ابو درويش يرقبك خله يفهمك شو كانت اتقول يمكن
الله يهديك وتقلع المسكينه عنك
تم زايد ايطالع خليفه بنظرات مش مفهومه وعقبها اتوجه للباب
خليفه ما عرف شو هالاحساس الي ياه وتقدم من نور ونزل ماسكنها من اكتافها عشان يساعدها توقف
وقفت نور وهيه منحرجه امنه
نور:دعني
لاكنها فقدت توازنه وقبل لا اطيح شلها خليفه وكان زايد داخل يتبعه ابو درويش وعيونه عليهم شابه نااار
التفت خليفه للجهه الثانيه ونادى هنيه الي طلعت وطلب منها خليفه ادله على غرفة نور
وصل خليفه نور الي حس انها منحرجه وميته من الي يصير الها
خليفه:ما عليج عند الضروره ترتفع الاحكام
حطها على السرير
خليفه:نور اذا ماتريدين اتمين في بيت زايد اخذج الى بيتي عند زوجتي والابناء
هزت نور راسها بلا :سوف ابقى ....اشكر لك صنيعك
خليفه:خليج بعيده عنه...زايد مشكله كلنا انعاني منها واذا احتجتي اي شي خلي هنيه اتكلمنيه عندها رقم تيلفونيه
نور:اشكرك سيدي ...سوف لن انسى صنيعك
طلع خليفه عند زايد الي كان قاعد وابو درويش قاعد ايترجم له كلام احد العمال الي كان ايعيد كلام نور الهم
مشاعر غريبه هزت زايد الي انصدم من الي كان ينقال وتم موجه نظره لبقعه معينه جدامه وساكت بدون اي كلمه
سكت العامل وسكت ابو درويش وزايد تم في سكوته سرحان وبعيد كل البعد عن الي حوليه
هز خليفه راسه وهو موجه نظره لبدر وعقبها طلع عنهم طلب بعدها بدر من ابو درويش والعامل انهم ايروحون
وتم بدر ينتظر زايد ايقول اي كلمه لاكنه تم على حاله
.................................................. ..........................
في مخفر الشرطه وصلهم خبر عن احد سائقين باصات المدرسه انه دعم عمود الكهربه وان سيارات وايد للشباب اتحاوط الباص وصاير شغب عند مكان الحادث
بعد ما طلع احد الظباط لموقع الحادث وقف مروان ومسك الشرطي من رقبته
مروان:باص مدرسه ولا باص كليه
الشرطي:كليه سيدي
مروان:وليش ماتقول جذيه من الصبح؟
انفجر البقيه من الضحك على مروان وهو يحاكم الشرطي
مروان :فارج فارج انا شو محصل من وراك من يوم ما يابوك عنديه غير العثره
التفت لربعه بعد ما طلع الشرطي
مروان:زين جذيه راح عليه باص الكليه
قام واحد من ربعه وهو يلبس قبعته:قم قم عدها الفرصه ما ضاعت خلنا نلحق سعد احيده ما يعرف يتصرف
مروان:ظنك؟
احمد:يالله وانته ظارب بالبدله اليوم اول مره
ضحك مروان ولحق احمد....ضباط مراهقين عند الجنس الثاني
لحقو سعد وقالوله يرجع وانهم هم بيتولون المهمه
اتشابكو في البدايه مروان واحمد مع الشباب الي يحاوطون الباص واصرفوهم ركب مروان الباص وكله ثقه ان البنات
مابيرفعن نظرهن عنه
صفق الدريول على علباه العلبا هو موخرة الرقبه من الخلف
مروان:عمي انته ماتشوف العمود
الدريول:باباه هذا سياره شباب مشكله يجي على طول جدام ورا سياره انا
مروان:وانته ثور ماتعرف تتصرف.....يالله قم حول خلنيه احرك الباص
التفت مروان للبنات
مروان:في حد اتضرر من الضربه
صوت ناعم من بعيد:لاااا
مروان في خاطره يالبي قلب هالصوت احم احم انا ضابط ما اعرف هالخرابيط
حرك مروان الباص وخلاه على الطريق الصحيح ورجع راعي الباص للباص عشان ايكمل
طبعا البنات في الباص ذاااابن وهن يراقبن مروان وهو متوجه لسيارته ومعاه احمد وكانو يتغامزون بينهم
احمد:عجيييييبه البدله اليوم عليك
مروان:اكييييييد ما سمعت التنهيدات داخل
احمد:الله ايغربلك هههههه واثق الاخ
مروان:ههههه طمااااااشه
##
##
##
ودمتم وديمه العطا

السلام عليكم


أهلين حبيباتي البارت ونزل وانا منتظرة الردود


أبغا ردود سنننننننننننننننعة >>>>الاخت تتشرط



الزائـــــــــــــــــــــــــــرة