"نــــــــــــور"

الجزء الثاني والعشرون



في مخفر الشرطه وفي الغرفه الي كان فيها بدر وروضه كان بدر منزل راسه ومندمج في تملية استمارات واوراق كانت روضه تتامله
مش مصدقه انه هذا اهو بدر...كان حديثها مع نفسها"خيبه تخيبج يارويض الحين هذا اهو بدر الي كان خاطبنيه وانا احتشرت وسويتلهم حفله صدق ماعنديه سالفه
لا والمسكين متصل متاذي من لعلوم الي وصلته وانا اعلن رفضيه عند الكل وطلع بعد سامع صريخيه وانا اقول ما اباااه...يالفشييييله والله صدق
وانا اقول ماعليه شيبه لابس نظرات وعنده شنطه سودا بس تدرون انا متعقده من الفلم الي اتابعه المحامي الي في الفلم كان شكله جذيه لابس نظرات وعنده شنطه محنتره سودا صدق انيه خبلا
شو الي بييب الي في التلفزون عندنا في البيت...بس انا اعتقد كل المحامين شواااب...هذا شو يبا ايصير محامي...يخرب بيته والله انه مزيوون
وفوق الزين بعد لحووووه احس قلبيه ايدق وانا اشوفه
كان بدر يدري انها اتراقبه وهذا موترنه ومخلنه مش قادر يسيطر على الي يقراه ويكتبه...ولا هذي طلعت روضه
صدق الي قال يضع سره في اصغر خلقه ...عيل هذي النتفه مسويتليه كل العصبيه الي فاتت وانا كل يوم افكر كيف بادبها وبنتقم من اسلوبها وطريقة كلامها الزفته معايه تطلع في الاخير
اهيه هذي
رفع نظره الها وتلاقت نظراتهم وبسرعه كل واحد صد عن الثاني لشحنات انرسلت بينهم
تم بدر ايلم اوراقه ويحطهن في الشنطه وهو متضايق من الاحساس الغريب الي بدا يتملكه كل ما طاحت عينه عليها
يوم ايصد بنظره عنها ايقول لاا هذي لازم ما اسويلها سالفه لاكنه اول مايلمح نظراتها الطفوليه
يبدا الاحساس الغريب يسري فيه
حط كل اوراقه في الشنطه ووقف ووقفت اهيه على طول وهيه اطالعه مترقبه شو بيقول؟؟
بدر:انا بروح اشويه وبايي خليج اهنيه
روضه:لا ماريد اقعد بروحيه اريد اروح البيت
رجع والتفت الها:وين اتروحين؟؟؟انتي متى بتفهمين الوضع الي انتي فيه؟؟
روضه:انا ماليه خص اريد اروح البيت
بدر بطنازه:تبين اتروحين البيت اكوه الباب اقبضيه ياله روحي البيت
روضه:احسلك عن الطنازه هذي
بدر:مش انتي الي تقولين اريد اروح البيت؟
روضه:انته تتحسب بس انته المحامي في الدوله عشان تكلمنيه جذيه؟
بدر:واللــــــــــــــه ومن وين بتيبين المحامي حضرتج؟
روضه:ابويه بييب اليه احسن محامي
بدر:ايووووا ابوج وابوج وينه الحين قده على طريق السعوديه رايح يشتريله بوش وهو مايدري بسالفتج لين الحين شرايج عيل ترقبينه كم يوم واتوكل انا لين ايي ابوج؟؟
روضه عصبت:انته ليش تتكلم معايه جذيه شو تشوفنيه جدامك ياهل؟؟
التفت الها وهو ماسك قبضة الباب وبنظرات استخفاف وهو رافع حواجبه تم ايطالعها من فوق لتحت وابتسامه ساخره على طرف شفايفه يعني قصده وشو الفرق ...فهمتله وزادت عصبيتها عليه
وقبل لا تقول كلمه التفت عنها وطلع مسكر الباب وراه
التفتت معصبه وحاولت انها ماتستسلم لدموعها...شقصده هذا بنظراته هذي ...حقيييير يعني ايشوفنيه الحين قصيره اصلا انا طوليه عادي
اهو ليش مايشوف طوله هذا الي واصل حداد الباب وقاعد ايطالعنيه من فوق لتحت ااااه والله انه يقهر
قعدت على الكرسي وهيه تحس انها بدت تتعب البارحه رقدت متاخر ومن الصبح موعينها عشان الشرطه ييت اتحس بالنعاس بدا يسيطر عليها غير صوت
بطنها الي يعلن الجوع صحيح اهيه شكلها صغير لاكنها تاكل اكل اربعة اشخاص ومايطلع عليها واهم وجبه عندها الريوق
ماتريد ترقد لازم تطلع من اهنيه راحت ووقفت عدال الجدار سانده ظهرها عليه وغمضت عيونها
بدر تاخر وااايد وهو في مواجهات مع حسن السعدوني الي عقد له الامور كلها ومش راضي يتعاون معاه
رجع للغرفه متضايق وماشافها جدامه
بدر:روضه
قفزت من وقفتها:هاااه
التفت على طرف وشافها وتقدم للغرفه داخل رايح للطاوله:شو تسوين اهناك تعالي اباج
قربت وقعدت مواجهتنه انصدم من نظراتها المترقبه طفــــــــــــــــــــــــله والله ان الي جدامه طفله مع نظراتها هذي
ماعرف باي طريقه يتكلم معاها
روضه:متى بروووح البيت انا خلاااص تعبت؟
بدر:الموضوع مش سهل ياروضه الموضوع طلع متعقد زياااده
انفعلت وقامت واقفه تصرخ:انا ماذبحتها والله العظيم ماذبحتها انتو ليش ماتريدون تفهموون انا اريد ارجع البيت انا ماليه خص في السالفه هذي كلها
بدر:اهدي واقعدي خلينيه اعرف اتفاهم معاااج
روضه:انته ليش مسولهم سالفه ودنيه البيت؟
صرخ عليها:روووووضه
قفزت من صرخته ووقفت اطالعه
بدر:قعدي وحطي عقلج في راسج مره وحده انتي عن شووووه تتكلمين هذي جريمة قتل مش لعب عياااال تفهميييين
روضه بصوت متعبر:انزين انا ماذبحتها
بدر:ومنوه الي تبينه ايصدقج؟
روضه:شمعنا انا الي بذبحها
بدر:انتي الي هددتي واقسمتي انج تذبحينها
هزت راسها بلاا:والله العظيم ماذبحتها...انا ماكنت احس بالي اقوله
بدر بتوتر:انا كنت اقدر اطلعج وانكمل التحقيق معاج في البيت لاكن طلعت امور عقدت بالسالفه كلها
روضه وهيه تمسح دمعتها:شوووه؟
بدر:روضه انتي طلبتي بتزا من الكفتريا البارحه قبل المغرب
طالعته روضه وهيه تحاول تتذكر:هييه
غمض عيونه:ومنو الي كلها؟
روضه:انا
بدر:حد معااج؟
روضه:لااا بس انا
بدر:ووين بقايا البيتزا
روضه:ماشي بقا منها
بدر باستغراب:كلتيها كلها بروحج اهيه اي حجم كانت
كان عنده امل ان الي طلبتها بحجم صغير عكس الي كانت عند المدرسه ولقو فيها نسبه من السم...اكيد الكفتريا بياكد هذا الهم
روضه وهيه مفتشله:من الحجم الكبير
بدر:وكلتيها كلهااااا؟؟؟!!!!ّ
روضه بنظرات بدت توتر بدر:انزييين انا ماكنت متغديه وكنت ايعااانه
بدر:هذا مايعني انج بتاكلينها كلها ومابتخلين شي منها
روضه:انته شو تريد من البيتزا كلتها كلها ولا نصفها؟
بدر:لان المدرسه يا روضه ميته بالبيتزا الي محطوط فيها سم
شهقت ووقفت واقفه:قصدك انيه انا ذبحتها بالطريقه هذي!!!! ليش وين عقليه وانا ناويه اذبحها جذيه؟؟؟ انا فكرت انها ماتت مقطعه بالسجاجين يمكن هذاك اليوم وانا مغتاااضه عليها وعنديه سجين اذبحها وانا ما احس بعمريه وانتفها لك ميت قطعه
قام بدر بسرعه وقرب منها وهو ايحط يده على ثمها يمنعها من الكلااام
بدر:اصصصص ولااا كلمه مجرمه صدق
تمت فاتحه عيونها وهو مسكر على ثمها واطالعه
بدر همس الها:اصصصص ولا كلمه....انتي مصيبه...ولسانج هذا صدق اكبر مصيبه ...شو هذا الي قاعده اتهببينه وتقولينه
هزت راسها
بدر:خلاص...اريدج تنكتميييين ولا تطلع منج اي كلمه
هزت راسها باوكيه اصلا اهيه ضاعت كل علومها من لفها بيده وقربها كل هالقرب امنه وهو كاتم على ثمها تم قلبها ايدق
بدر وهو بعده على نفس الوضع معاها:روضه ترا كل كلمه اتقولينها بتنحسب عليج ارجووووج لاتصعبين الامور اليه وخلينا نطلع من هالمصيبه باي شكل من الاشكااال
هزت راسها انزيين
بدر وهو ايحس ان الوضع عاجبنه مع بداية خفقان قلبه:توعدييينيه؟
هزت راسها انزين
تم يتامل عيونها القريبه امنه وعيونها غايصه في عيونه لثواني نسو انفسهم وبدت يده ترتخي عن ثمها واحساس قوي غريب بدا يتملكه
واول ما ابتعدت يده عن شفايفها عضت عليهن ووضحت الغمازيه على طرف خدها مسك راسها وضغطبه على صدره في محاوله انه يسيطر على نفسه
بدر:اوعدج انيه اطلعج من السالفه بس انتي خليييج واثقه فيه
في اثنينه كانو يرتجفون تركها بسرعه ودار لمكانه وهو يحاول ويحاول ايسيطر على نفسه وتم ايطلع الاوراق من الشنطه بدون ما يدري ليش ايطلعهن
رفع نظره الها ووقف:انا بروح اشوي وبرجع
طلع بسرعه مشاااعره قويه ماتخيل انه بيواجه مثل هالمشاعر مايدري وين ايروح ولا شو يسوي اول مره ينسى شنطته وراه مفتوحه
ركب سيارته وحط يده ماسك راسه
لمصيبه انه الحين لازم ايحصل حل للمشكله تطلع له مشكلة مشاعره الغريبه هذي مش وقته يابدر
فتح مروان الباب الي عداله وركب
مروان:بدر...شو صااار؟
التفت له ونظره مشتت:هااه
مروان همه اخوه اول مره يشوفه جذيه:بدر اعتقد انها قضيه تافهه تقدر تطلع منها
...ولا لان السالفه فيها ارتباط اسمك بالمتهمه
بدر:لا تقول متهمه....
رجع وغمض عيونه ومسك راسه
مروان حس بغيض يسري في جسمه:تبانيه اروح اسنعهم لك؟؟
بدر:لا يامروان...لا تعقد اليه الامور...انته تعتبر الحين اخو زوجها يعني لا تحاااول...انا بس الي اريده انيه اطلعها منيه واخلي بقية التحقيقات معاها في البيت وهذا حسن ابدا مش متعاون
مرواان:ااااخ بس اصبر عليه لين يخلص الموضوع برويك فيه
هز بدر راسه:لا تعق عمرك في مشاكل انته في غنى عنها
مروان:زين ان قدرت امسك نفسيه لين يخلص الموضوع....على العموووم انا بروح وبستفسر من راعي الكفتريا نفسه
تدري انا بقوله شو نوع البيتزا الي طلبتها روضه وبشوف نوع البيتزا الي كلتها المجني عليها
بدر بضيقه خاطر:لا تحاول نفس النوعيه وبعد نفس الحجم
مروان:لا تشل هم انا بسوي الي اقدر عليه بس من بعيد لبعيد ترا هذا حسن ثووور خلاص حطها اهيه في راسه ومابيتحرك ايدور اي ادله ثانيه...بخليك
نزل مروان وتم بدر لدقايق ايفكر...مايقدر ايحرك ويروح ويخليها بروحها لازم يرجع عندها
قبل لا يدخل الغرفه عندها ناداه احمد ربيع مروان
احمد:بدر كوب نسكافيه؟
بدر:ايوالله شدرااك انيه مصدع ومحتاج له
خذ بدر الكوب ودخل كانت قاعده واول ما شافته وقفت وقربت امنه وخذت الكوب من يده وهو كانه مادنه الها
روضه:ماشي بعد سندويج معاه؟
تم بدر متنح ايطالعها وهيه ترجع لمكانها ماسكه الكوب وتبادله بنظراتها الي باتت تذبحه
طالع الساعه وشاف انها وصلت اثنعشر الظهر
بدر:ايعااانه؟
روضه:بموووت من اليووع
بدر:انا ماكلت شي من الصبح واحس نفسيه منسده وانتي عادي عندج؟
سكتت روضه وهيه منزله راسها تحت وبدت الدموع تتجمع في عيونها
تنهد بدر بضيقه لشكلها وقام:بروح اييب سندويجات
روضه:لا خلاااص مارييد
بدر:مش اتقولين ايعااانه؟
روضه:خلااص انسدت النفس...رجعت ورفعت نظرها له
روضه:مافي امل نروح البيت؟؟
بدر:بحاول انيه ما اخليهم ايخلونج اتباتيين اهنيه
روضه بصدمه:اباات وييين ؟؟؟اهنيه ؟؟؟لا مستحييييل انته قلت بتكملون معايه في البيت
بدر:لو بيديه الحين وديتج البيت ...بس هم عدهم في تحقيقات ...وكل الادله تقول انج انتي المتهمه الوحيده محد له مصلحه يقتلها
روضه في محاوله تمنع دموعها:منووو قااال ؟؟؟هذي بلوه انته ماتدري شووو مسويه؟؟ وكم من الناس ماذيه؟؟
قرب راسه منها من ورا الطاوله:اصصص انا شو قلت؟
روضه وهيه تقرب راسها امنه بعد من ورا الطاوله وتهمس:صدقنيه وااايد معلماات متاذيات منها ومستغلتنهن وتاخذ الي وراهن ودونهن
بدر قرب ايين:لحووووه روضه وبعديييين؟؟
روضه:ليييش ماتبانيه اتكلم وتم ساكته؟
بدر:انتي وعدتينيه ...اكيد التحقيقات بتسال عن كل الي حوليها وعن اسلوبها وطريقة معاملتها للكل اكيد انهم بيدورون عن اكثر الناس متضررين منها
روضه:وانا اتم اهنيه لين ايحصلون حد؟؟
بدر:خلاااص عاااده لمي ثمج
حطت يدها على ثمها ودزت الكوب صوبه معصبه ماتباه بعد...يعني انا عزمت عليج من اصله

..............................................


في لندن في المستشفي غرفة زايد كان قاعد ايطالع التلفزون ونور قاعده على الكرسي قبل لا اييهم خليفه ياخذ نور
لين الحين ايحس انه معصب عليها وبعده ايحس ما طلع الي في خاطره وهو طول اليوم مارحمها من الصريخ عليها وحذف اي شي تيبه له
وقفت وقربت امنه
نور:هل تريد شيا قبل ان اذهب؟؟
زايد:فرقااااج عيد هذي الحاااجه الي اباااها وبس
نزلت راسها تحت
نور:حسنا قريبا سياتي عمي واذهب
رجعت لكرسيها وتم ايطالع التلفزون ومندمج فيه ماعنده شغله غير هالتلفزون ايفرفر في قنواته
في انتظار يستعيد عافيته كلها ويتخلص من الجبس الي على ريله وبيعرف عقب كيف يادبها منقهرانها تزوجته غصبا عنه ومنقهر من سالفة البكستاني الي تمت ترطن معاه
نور لاحت في راسها حاجه وقامت مندفعه لزايد اتقولها له
نور:زيد...الا تستطيع ان تعيد فروضك التي لم تؤديها؟
التفت الها يعني انا ياله ياله بالع الي سويتيه يايه بعد تتفلسفين عليه بمحضرات دينيه
زايد:اقدر ولا ما اقدر انتي ماااااااالج خص
نور:باستطاعتي ان اساعدك ...وان اتذكر معك كل فرضا فات عليك...يجب علييك ان تعيد تلك الفروض قبل ان تتراكم عليك...انته الان في احسن حااال وباستطاعتك ان توديها حتى ولو كنت ممدادا على الفراش
غمض عيونه يحاول يمسك غيضه عن لا ينفجر
زايد:تعالي اهنيه
قربت امنه ومسكها من شعرها من ورا حجابها وهو يفج حجابها ويستحكم في مسكته ويده تتخلل شعرها
صرخت نور:لاااا زيد اسالك بالله لا تفعل بي ذلك مرة اخرى
زايد:انا شو اقوووول لج ما اقول مالج خص وبعدييين انا خلاااص ما اريد اشوف ويهج اهنيه انثبري في البيت لاتييين مش في حاجتج تفهميييين
نور بالم:حسنا حسنا لن اتي اترك شعري
يعني ماكفااه الي سواه فيها الصبح لازم يختم اليوم بنفس المسكه اهيه ياله ياله قدرت تنسى ويع شده لشعرها الصبح
تركها في اللحظه الي دخل فيها خليفه وكان شكلهم يبعث للريبه
خليفه:شووو صااار؟
كانت نور ملتفته للجهه الثانيه تحاول تمنع دموعها وهيه ترتب حجابها على راسها بينما كان الغضب واضح على ويه زايد
خليفه:زااايد شبلاها نووور؟
زايد بغيض:هذي ماريد اشوف ويهها اهنيه منو قااال انيه في حايتهااا هاااه؟؟
خليفه عصب:يعني شوووه مش في حايتها منو ان شالله ايقوم في خدمتك طول اليوم؟
زايد:انا ما اباهاااا مستغني عنها خلها تنثبر في البيت احسن عنديه الممرضات الي مابيقولن لااا
خليفه:هيييه تصدق حتى انا راحمنها واتمنى تاخذلها يوم ترتاح فيه....سمعتي يا نور الاستاذ مستغني عن خدماتج خلاص ياماما هذي رحمه نزلت عليج من الله ترتاحين فيها وانتي طول اليوم
صالبه طولج عنده
زايد وعينه عند التلفزون:محد طلب منها حاجه وجودها وعدم وجودها وااحد
لبست نور غشوتها وغفازاتها واستسلمت لدموعها من تحت الغطا وهيه متجهه ناحية الباب
نور:سوف انتظرك عماه في الخارج
زايد:منووو قااال؟؟ تمي على الكرسي لين ايروح عماااه...تبينها من الله انتي القعده برا
تمت نور واقفه عند الباب منصدمه من كلامه
قرب منها خليفه وحاوطها بيده وهو يفتح الباب
خليفه:مشينا ماعليه شر عنده الممرضات بيشوفنه اذا احتاج شي
وطلعو عنه وشبت ناااار في صدره مايدري بسببها خاااطره بس حد عداله يفج غيضه فيه لوتدخل عليه اي وحده من الممرضات بتعرف اهيه مع اي مريض تتعامل
وماجن خليفه ماخذ راحته وهو يلفها بيده
.................................................. ....................................
اليوم مر وروضه على حالها في مخفر الشرطه وبدر كل محاولاته انه مايخليها اليوم اتبات في المخفر
محاولات مع حسن النحس ومع بعض المسؤلين الي كان يتامل بدر يحصل منهم اي تعاون وهو يتعهد انها تكون على كفالته لاكن لا حياة لمن تنادي المجموعه الي حاول معاهم بدر مسكره مخوههم وبعضهم من النوع المتشدد
ما قصر معاها يابلها اكل وعصائر واهيه مع مرور الوقت بدت تستوعب المصيبه الي اهيه فيها وبدت نفسيتها تنسد عن الاكل وعن الكلام
قريب صلاةا العشا غفت عينها وهيه سانده ظهرها على الجدار وقاعده على الارض
ودخلت في احلام غريبه شافت انها في زنزانه فيها حريم مجرمات وشافت تصرفاتهن معاها غلط وهن كل وحده اتجرها ناحيتها اتريد تكتسبها لين ما حست انها في صراااع معاهن والمدرسه نفسها قاعده مجابلتنها وتضحك عليها بصوت عاااالي وجسمها كله دم غير الافعى الكبيره الي كانت منطويه في زاوية الغرفه وموجهه نظرها لروضه وفي اي لحظه احتمال تنقض عليها
روضه بصرخه بعد ما قفزت من نومها:لااااااااااا
وقفت بسرعه وركضت للباب وفتحته وتلقت الها الشرطيه الي عند الباب ومسكتها مانعتنها من الركيض في الممر
بدر كان قاعد مع مروان في احد ممرات المخفر وسمع صرختها وركض بسرعه للمكان الي اهيه فيه
سحبها من يد الشرطيه ولفها بيديه لحضنه ودخل معاها للغرفه وسكر الباب مساند ظهره عليه وهيه في حضنه تنتفض
بدر:روووضه روووضه اهدي
تمت تشاهق في حضنه:ماااارييييييد ماريييييد اباااات اهنيه ارجووووووك بدر ارجوووووووك طلعنيه منيه والله العظييييم ما ذبحتها والله العظييييم ارجوووووك
قطعت قلبه مايعرف كيف يتصرف يدري انها بريئه ومتاكد ...لاكن مافي يده حيله
بدر:انا ارجووووج يا روضه ...انا وعدتج انيه اطلعج منها بس اصبري عليه
روضه:مارييييد ابااات اهنيه ماريييد السجن مارييييد ابات عند المجرمااااات
بدر:لا لا منو قااااال انتي ماثبتت التهمه عليج لين الحين وصدقينيه اوعدج الاقي حل حق امبيتج برا المخفر بس ارجوووج اصبري شويه
تمت اتصيييح في حضنه وتهدا شوي شوي وهو كل ما حس لمعناتها لمها لصدره اكثر وهو يمسح على راسها
هدت اخيرا بعد فتره طويله وتمت ساكته وبعدها في حضنه وحست ان عينها بدت تغفو لاكن في ريحه من بين ريحة عطوراته الي فيه بدت اتشمها بطريقه اقوء ريحة دهن العود
ماتدري ليش اتذكرت نور لان نور اتموووت في ريحة دهن العود اتقول لروضه انها حصلت غرشه صغيره من بقايا ابوها فيها نفس هالريحه ومن يومها ارتبطت عندها الريحه هذي بابوها وانها اول مايت فلة زايد كانت اتشم هالريحه وايد في البيت واكتشفت عقب ان زايد يستعمل هالعطر
تذكرت روضه نور وابتسمت اااااه وينج يانور لو كنتي عنديه اكيد بتساعدينيه وبتقولين عليك ان تتوجهي يا
فتاه بالدعا لله لانه هو مفرج كل الكربات وان الله قريب في عون العبد مادام العبد في حاجته فكرت روضه ان نور ماتكلمها الحين وانها عمرها ماقالت الها هذا الشي
لاكن منو الي قاعد ايكلمها الحين اكيد عقلها الباطن هو الي يكلمها على ان نور اهيه تكلمها
سحبت روضه نفسها بقو من حضن بدر
روضه:بــــــــــــدر انا ما صليت اليوووم
تنح وهو يشوفها مستغرب:هاااه
روضه وبدت ترتجف:ياوييييييليه امنه والله انه كان ايطالعنيه بعيونه
بدر مستغرب:منووو هذا؟
روضه وهيه تبتعد عنه: اهوه اهوه انا متاكده انه اهوه انا كل فروضيه اليوم ما صليتها ولا فرض وقاعده انتظر الفرج الله يخليك اريد اصلي اريد اتوضا واريد سياده
استغرب منها:انزين اوكيه ماعليه بييب لج سياده بس قوليليه منوو اهوه؟
روضه:الشجاع الاقرع
بدر:هاااه اي شجااع
تمت تنتفض:ارجووووووك اريد اصلي ارجوووووك انا خااااايفه
الشجاع الاقرع هذا اهو الحنيش الي بيكون في قبر الانسان وبيكون مسلط لتارك الصلاه او المتهاون فيها وهو حنش طويل يلف الانسان من راسه لين قدميه اعاذنا الله امنه احنا مانستحمل ملمسه حتى لو كان مش سام فكيف بحال الانسان بافعى مسلطه لعذابه
بدر:ماعليه يا روضه بس انتي اهدي
روضه:واريد اتوضى
بدر وهو يهز راسه:بخلي الشرطيه اتوديج
روضه:لا لا انته ودنيه انا اخاف منها
ابتسم:ماعليه بنستاذن منها وبوديج
بعد ما توضت روضه ورجعت للغرفه حصلت السياده جدامها التفتت لبدر
روضه:اريد اتم بروحيه وماريد حد يدخل عليه الله يخليك
بدر وهو مستغرب منها:ماعليه خذي راحتج
طلع عنها وفرشت سيادتها وبدت تادي كل فروضها الي فاتت عليها وهيه متلومه وندمانه كيف ضيعت صلاة اليوم
بعد ما خلصت تمت قاعده على السياده الحين لازم تتوجه بالدعا لله عشان يفرج كربتها
اول مارفعت ايديها وهيه تستفتح الدعا بالحمد والصلاه على النبي
روضه:يارب....ياااااارب.....ياااارب
بدت الدموع تتجمع في عيونها وهيه تتذكر كيف كانت نور في ليله بايته عندها وفارشه سيادتها وتدعو بحرقه وهيه اتصييح عشان الله يشفي زايد
فكرت روضه واصابعها بدت تنثني"ويييين انا والدعا الصادق الي كانت نور تدعو به انا ما اعرف شو اقول ولا باي ويه ادعو وانا اعرف نفسيه انيه مقصره مع الله هذيج نور
الي ربيه راضي عليها وعمرها ما اذنبت متعمده وكل حياتها في طاعة الله ومتجنبه كل الي مايرضي الله وين انا ووين اهيه على شوووه انا بدعو الله على
كثر ذنوبيه الي اسويها وانا مش مفتكره على سماعيه للاغاني وشوفتيه للافلام الي ماترضي الله ولا على الجذب الي ماخذتنه عاده
ولا على الصوت العالي الي ارفعه على الصغير والكبير...ولا على قلة ادبيه مع ناااس وايد
نزلت دموعها حسره على نفسها وكملت"ولا مشالله على صلاتيه الي دووووم فايتنيه وصلاة الصبح الي عمريه ماصليتها في وقتها غير تقصيريه في قراية القران وتضيييع اغلب وقتيه
في لهو الدنيا اااااه باي ويه انا برفع ايديه الحين وبدعو الله ...وهل بتكون اهناك اصلا استجابه اليه
انتحبت روضه بصوت عاااالي مستحيه من الله انها ترفع ايديها له
روضه بصوت تسمعه:يارب شوووو اسووووي ياااااارب انا ماااااليه غيرك....والله انيه مستحيه يارب منك شووو بقولك اصلا ماليه ويه اطلبك
وزاد نحيبها
رجعت ورفعت ايديها وهيه ترفع نظرها:يااااارب ما اعرف شو اقووول ولا شوووو اسوي ياااارب انا مقصره مقصره اعترفلك واستاااهل كل الي يصيرليه
وبدت شهقاتها اتزيد ودموعها غرقت ويهها
روضه:ياااارب انا ما اريد شي بس اريدك ترضى عنيه...سامحنيه ياالله سامحنيه واغفر اليه اعترف انيه مقصره ارجووووك يارب والله ما اعرف شو اقووول حتى الدعا انا مقصره فيه ومش عارفه شو اقولك بس انا يارب سمعت نور اتقول اثني ياروضه على الله في الدعا وانا ما اعرف شو تقصد هل اثني عليك بالمدح يارب
بشووو ياربي ببدا ولا بشوووه انته يارب عظيم عظيم واحنا بشر تافهين انته يارب كل شي عطيتنا اياه ولا قصرت علينا بشي خلقتنا من العدم
شهقاات متتاليه بين كل كلمه وكلمه
روضه:خلقتنا ياربي وانعمت علييييينا بكل شي ...واحناااا غافلين ياربي عن هالنعم هيييه والله اننا غافلين
ومش حاسييين بشي...نوبه ثانيه من البكا
روضه:يارب انته خلقت النا الارض وانعمت علينا بكل النعم الي فيها ...خلقت النا السما ...يارب شوووو اقوووول...انته عظيم يارب عظيم واكبر نعمه يارب انك خلقتنا مسلمين اااااه
ومن امة محمد ونشهد انه لا اله الا الله وان محمد رسوووووول اللــــــــــــــه...يارب انته ما قصرت فييينا
رويتنا الطريق الصح والطريق الغلط لاكننا اغبيا ماعرفنا طريقنا الصح....يارب يارب نعمك كثيره وانته تستحق المدح والثنا وانا المقصره يارب في مدحك
انا الي ما اعرف شي ...يارب يارب ارجووووووك ساااامحنيه واعفو عنيه...يارب اهدينيه للي تحبه وترضااااه
حطت ايديها على ويهها وتمت اتصيييح بحرقه
روضه:يارب شو تنتظر من انسانه تافهه ماتعرف مصلحتها ومضيعه عمرها في لهو الدنيا ...نفسي يارب غلبتنيه غلبتنيه وسيرتنيه وراااها وماجنيت من وراها شي...يارب انا اليووووم مش قادره على موقف مثل الي صار اليه اليوم...كيف باجر يوم بوقف بين ايديك كيف بيكون الحسااااب
كيف بيكون وضعيه في القبر كيف ياربي انا ادري بعذاب القبر وادري بمنكر ونكير ...وادري ان كل اعضائيه بتشهد يوم القيامه بكل شي اسويه في الدنيا....يعني سمعيه بيشهد عليه ونظريه بيشهد عليه ويديه بتشهد عليه وريليه بتشهد عليه...يارب متى بينصلح حاليه...والله ياربيه انه ماعنديه طاقه للي يصير اليه على وجه الارض فكيف بيكون حاليه تحت الارض ويوووووم العرض ...لييييش ياربي الغفله الي احنا فييييهاااا ليييييش
متى ياربي بننتبه ..متى بنحاااسب على افعالنا احنا ياربي الذنوب اهلكتنا عيل متى بنحصد النا حسناااات يارب احس بالنهااايه قربت واحنا بعدنا في الغفله...ارجووووك ياربيه ارجوووك اتسامحنيه وتاخذ بيديه لك ساعدنيه يارب ساعدنيه واهدينيه انا ما اريد شي الحين غير الهدايه وانك ترضى عنيه
روضه:والله انيه مستحيه ياربي انيه اقولك فرج كربتيه وانا استاهل الي يصيييير اليه بس يارب انا كاسر ظهريه ابويه ااااه ابووووويه
مايستاهل الي بيصير له ابويه مووووته ولا الي صااار ياااارب ابويه انساااان صاااالح عمره مافرط في صلاة الصبح وعمره ماقطع رحمه ودايما ايعلمنا الصح من الغلط ارجوووك يارب عشان خاطر ابويه...ارجوووك يارب عشان خاطر اميه وانته تعرف اميه يارب انساااانه طيبه عمرها ماردت على حد حتى لو غلط عليها ماقصرت في تربيتنا ارجووووك يارب انا ما اعرف شو اسوي ولا شووو اقووووول
سامحنيه يارب سامحنيه سامحنيه
اول ما سمعت الباب فتح حطت ايديها على ويهها وهيه تختم دعاها بالحمد والصلاة على النبي
وتمت على وضعها في شهقات خافته ماتعرف شو قالت ولا هل هذا كله الي قالته بيستجاب له تدري انها مش راضيه عن دعاها وانها ما دعت الدعا الي يستحق الاجابه
هدت اشويه وهيه تسمع بدر ايناديها
بدر:روووضه
التفتت له بويه وعيون محمره
بدر:خلاص ياروضه ...فرجت عطونا اذن تطلعين البيت بكفاله
فتحت عيونها اتريد تستوعب شو يقول وفجئه حست برجفه قويه تهزها وقشعرييره تسري في جسمها مش مصدقه الي تسمعه معقوله الاستجابه تيها بهذي السرعه
رجعت وحطت ايديها على ويهها وانتحبت مره ثانيه
بدر ما استحمل منظرها وطلع بسرعه برا
روضه من بين شهقاتها:اللهم لك الحمد والشكر اللهم لك الحمد والشكر يارب انته عظيم عظيم وانا والله ما استاهل
وعلى طوووول سجدة لله سجدة شكر

.................................................. .....................


في لندن كانت عندهم فترة العصر اليوم نور ماراحت عند زايد على حسب ما طلب وطبعا عصبية زايد انتقلت على كل الي حوليه من ممرضه لمدرب التمارين الطبيعيه وللخال خليفه الي قرب ايين من اسلوب زايد
خليفه:انا اريد اعرف حاجه وحده انته شبلااااك شعندك على الريال مش راضي تستجيب لتمارينه
زايد:خلااااص انا قلت ردونيه الغرفه
خليفه:انته ماتريد تفتك بسرعه ليش ماتساعد نفسك؟
زايد:لحوووووووه غصب يعني اهو قلت ردونيه الغرفه يعني ردونيه انا تمارين مع هالخايس ماريد
خليفه:شبلاه الريال والله ان تمارينه زينه
زايد:لاتفقع جبديه معاه خلاااص عاد
خليفه:خلاص خلاص براحتك اظاهر ان المستشفي عاجبنك وماتريد تطلع امنه
وهم رادين للغرفه وخليفه ايدز زايد على الكرسي لمح زايد الباكستاني واقف يتكلم في التيلفون بلهجته الباكستانيه ويضحك حس بقهر من ضحكته وبدون مايحس
زايد:هذا منووو قاعد ايكلم؟؟
خليفه:ههههههه حلوه هذي كثر منها قال منو يكلم هههه
لف زايد نظره لخليفه مستغرب هو كيف سمع شو قال؟
وفي الغرفه
زايد:البنات وييين
خليفه:البنات ماعليهن شر مسكتهن الشارع الي عدال الفندق ايروحن لين اخره ويرجعن لان الشارع كله محلات ملابس
زايد بنظره معصبه:لا والله وعلى كيفك تعطي الاذن ايروحن بدون شوريه
خليفه:افاااا ليش مش عمهن انا
زايد:لك حكم على اليازي اما نور محد له حكم عليها غيريه وانا ما اباها تطلع من الشقه ابدا
خليفه:تعاقبها يعني
زايد:انا حر مش حرمتيه وزوجتونيه اياها...بعدين كيف تسمح لنفسها تطلع بدون ماتشاورنيه هااه
خليفه استصاب من كلام زايد:زايد انته من صدقك قاعد تتكلم الحين
زايد:هيه نعم مالها تسوي اي شي بدون شوريه ...وبعدين تعال انته صدق ماخذلها تيلفون
خليفه:هيه نعم...عندك مانع
زايد:طبعا ...منو سمحلها تاخذه
وقف خليفه:لااا اظاهر ان تاثير العمليه بعده فييك والدليل انك قمت اتخور في الرمسه
زايد:عطنيه رقمها
خليفه:اقلع لبنيه في حالها وخلها ترتاح منك اليوم
زايد بعصبيه:قلت عطنيه رقمها قبل لا اسوي شي تندمون عليه كلكم
قرب خليفه من زايد وهو معصب وخذ تيلفونه وخزن رقم نور وطلع وهو يتحرطم
تم زايد ايطالع الرقم والاسم الي خزنه خليفه "نـــــــــــــور"ّ
كل شي فيها غير وغريب حتى اسمها
بتردد اتصل وحصل التلفون مشغول
وزادت عصبيته:زييين والله بعد مشغووول انا ارويج يابنت الباكستانيه
بعد كذا اتصلات
نور:السلام عليكم ورحمة الله وبركاته
زايد سكت شويه
نور:السلام عليكم
زايد:مع منووو قاعده تتكلمين من الصبح؟
تفاجئت نور بصوته
نور:زيـــــــــــد!!!؟
غمض عيونه لقشعريره سرت في جسمه
زايد:زيد ايقولج مرض وسلااااال
وبصرخه
زايد:انتــــــــــــــــــي ويييين؟؟
ارتبكت:ا ا انا هنا قريب من الفندق عائده اليه
زايد:منووو سمحلج تطلعين بدون شوريه هاااه وييين طاعت الزوووج ماتعرفين شي اسمه الاستاذااان
نور:زيد ارجو ان تسامحني انني حقا مخطئه ولاكن اعتقدت بان عمي قد اخبرك...ارجو ان تعذرني
سكر التيلفون في ويههها ...ماتوقع انها بتطلب العفو
اتصلت عليه بعد اشوي
زايد:الووو
نور:زيد هل استطيع ان اتي اليك؟
زايد:لاااااا
وسكر في ويهها
يدري انه اليوم مفتقدنها ومكابر ومايريد يوضح هذا الشي
تمت نور ماسكه التيلفون واهيه قاعده في الصاله وعيونها اطالع تحت اتحاول تمنع دموعها
(تدري احبك لكن المــوت ذلي
ادوس انا قلبي لو الشوق جامــح ..
الله عطاك الحظ وأصبحت خلي والله عطانياك طاغي ملامح ..
سالتني يـ ياسميني وفلي ياكيف يشفي الورد والشوك جارح ... مثل العيــون اللي لها كل كلي
زايد حلاها لكــن الدمع مالح ... وش تنتظر يكفي دلال وتغلي
الوقت ماهو للوصل دوم سانح
كل الشكر لمن اهدتنا هذه الكلمات


.................................................. ..................

في السياره وهم راجعين للبيت على الساعه عشر المسا
التفت بدر لروضه الي كانت لافنها الصمت
بدر:تبينا انمر مطعم نتعشى
هزت راسها بلا
هز راسه والتفت جدام ايكمل سواقته
روضه:بدر
بدر:هممم
روضه:بعد ماتنتهي القضيه شو بتسوي؟
بدر:يعني شو بسوي مافهمت لج؟
روضه:بطلقنيه؟
تم ساكت بعدها رد عليها:مش هذا الي اتفقنا عليه
روضه:وعلشانيه دخلت مخافر شرطه
بدر:هذا الموضوع ماله خص احنا اتفاقنا كان من قبل..مش انتي الي كنتي تبين جذيه؟
التفتت له:لا بدر ارجووووك شو بيقولون الناس بيقولون طلقها عشان انيه كنت متهمه في جريمة قتل
بدر:يعني انتي ماتبينيه اطلق عشان كلام الناس؟
روضه:اكيد انهم بيتمون يتكلمون علينا اتخيل كيف بيكون حال ابويه عقب بيتمون دائما ايذلونيه بهالسالفه
بدر:ان طلعتي من الموضوع براءه محد بيقدر ايقول شي...بعدين لا تخافين انا مابطلق على طووول بناخذ فتره بعد شهر شهرين واذا تبين اكثر ماعنديه مانع متى ماتبين ايكون الطلاق انا مستعد....ولا انتي نسيتي سالفة حبيب القلب
روضه:اي حبيب قلب
بدر باستغراب:حبيب القلب الي اعلنتي رفضج اليه عشانه وقمتي ونشرتي سبب رفضج عند الكل والي عشانه رفضتي تطبقين شروطيه
روضه باندفاع:لا بدر انا كنت اكذب عليك انا ماعنديه حبيب قلب صدقنيه كنت اكذب
بدربعدم تصديق:واااااال كل هذا بس عشان الناس ماتتكلم عليج..صدقينيه بناخذ وقت طويل مع بعض ومحد بيشك عقب انا ليش طلقت لاتخافين بتطلع براءتج وهو جان ايحبج صدق مابياثر عليه هالموضوع
##
##
##
ودمتم وديمه العطا

يسلمو عالنئل يا ألبي



و الله اني حزنت على نوووووووووووور


بس الواضح انه زاااااااايد عماله بيغار الاخ


و بدر بعدو مو مستعب انه روضه ............اممممممممم


بدهااياه

السلااام عليكم ...

مرحبااا زوزو .. شكراً جزييلاً على نقل الجزء الممتع جداً...

غاليتي وديمة ... رووووعة الجزء وأكثر شي عجبني فيه كان مشاعر روضة وتغيـرها .. وفقتي في وصف مشهد توبتها ولجوئها لربها أخيراً .. فعلاً لما تضييق يكتشف الإنسان عجزه وإن ماله ملجأ غير ربه .. أبدعتي بقوووة في التعبير عن هذا المعنى .. ماشاء الله ..


أما بالنسبة لزايد .. مصخهااا الصراحة .. لو مكان نور كان وصلت حدي من الغضب !! من يعني حضرته عشان يتفرعن بهالشكل ؟؟؟ قهرني الصراحة يوم استحلى الموضوع وقام يشد بشعرها ..أتوقع إنه بيزودها أكثر وبيظلم نور ومن هنا بتكون أولى خطوات الندم .. وعموما حنا بانتظار ما ستفاجئينا به من احداث بخصوصهم ..

خليفة ونورة ... مالهم حس بهالجزء .. فقدناهم .. لكن بنستناا إلين ما يرجع خليفة من السفر ..

الله يعطيك العافية على الجزء الإبداعي .. أتمنى لك كل التوفيق غاليتي ..

زوزو ... عندي ملاحظة .. ليش ما تعطينا رأيك انتي بعد بالاجزاء ؟؟

يعطيك الف عافيه الزائره على النقل

البارت كان منحصر لروضه وبدر بس حلوو الي مانمت وسو افراج

اتوقع روضه تكلمت عن الناس ماتبي تبين لبدر بتعلقها ولا بدر

يبي يبين تعلقه فيهاا

بس بعد الجريمه راح يتعلق فيها ومراح ان شاء الله يتركها

ننتظر الجازي وفهد في الجزء الجاي وخليفه ونوره

زايد يستااااااهل يوم تعلق فيها وبيدور البارت الجاي

مشكله عشااااان يجيبها للمستشفى ويمكن يتعذر ويخليها

تنووم عنده يالين يرجعووون

ننتظرك ياقلبي بفارغ الصبر

جـــــــ,ــــــــ,ـــــــودي