كاتب الموضوع :
ΑĽžαεяαђ
المنتدى :
القصص المكتمله
مرحبا يا احلا اعضاء ..........عجبتني والله اميره خس ههههه وخميره
مسكيييييينه قطعتوها
فديييييت انا الجميع ومشكوووره واااااايد
محبتي للجميع وديمه العطا
"نـــــــــــــــــــــــور"
الجزء الثاني عشر
في اليوم الثاني طلب خليفه نوره وقالها انه ايريد ايوديها زياره وخبرها عن نور استانست نوره ورحبت بالفكره
واستعدت للزياره ومعاها فطامي....اتصل خليفه على هنيه وقالها انه اهو وزوجته ياين عشان ايزورون نور
وخبرت هنيه نور بامر الزياره واستانست وااايد...كان زايد في هذا الوقت في شركته
خليفه ونوره وهم داخلين الفله:نوره ترا محد في البيت زايد راح لشركته محد الاهنيه ونور
نوره:منيه هنيه؟
خليفه:مدبرة المنزل الاخت من مصر
هزت راسها ومشت وراه
خليفه:هنــــــــــــــيه يا هنــــــــــيه
يت هنيه تركض:يامرحب يامرحب ياميت الف هلا وسهلا
ابتسم خليفه:يا هلابج يا هنيه
هنيه وعيونها على نوره:هيه مراتك ياباشه؟
خليفه وعيونه على نوره:هيه نعم
هنيه:يامرحب يامرحب ادبح القعووود
ضحك خليفه بصوت عالي:يا هنيه سيري سيري المره اليايه اذبحيه مشكوره وماتقصرين سيري ازقري نور
هنيه وما زالت عيونها على نوره تنتظر ترفع النقاب:اهيه جايه دلواتي...يا ستي ارفعي البتاعه دي
عايزه اشوف عروس الاستاز خليفه
خليفه:هنــــــــــــيه روحي استعيلي بنور انا بروح مش قاعد ورايه دوااام
هنيه وهيه رايحه:طيب طيب يا بااااشه
اول ما راحت ضحكت نوره
التفت الها خليفه مبتسم وما قدرت تستحمل وضحكت زيااده...عاد تعالو طالعو علوم القلب الي بدا ايذوب على الضحكه
نوره وهيه تحط يدها على ثمها من فوق النقاب:ياربيييي شو بيسكتنيه بس جنااان ههههه
بابتسامته التفت لنور الي كانت تمشي يايه صوبهم وطبعا بدون الغطا والشال العود
من الرهبه وقف خليفه وهو ايشوفها طبق الاصل من زاايدبس احلى وانعم...وقفت نور جدامه على بعد كم خطوه اطالعه وتشوف نظراته المنصدمه
ابتسمت ونزلت راسها تحت ساعتها حس خليفه بغيض اتملكه على زايد ...يعني ما يشوووف العمي انها بنت عمه وطبق الاصل امنه بعيونها الي مغتر دووووم ابهن...ما يحس ولا يحن
نور:السلام عليكم ورحمة الله وبركاته
وقفت نوره:وعليكم السلام ورحمة الله
رفعت نور نظرها لخليفه وكانت اتحس باحراج امنه
نور:هل هذه زوجتك ....عماااه اتسمح لي بان اناديك بعمااه
خليفه لين الحين ايحس بويع وحزن عليها:تعالي يانور تعالي انا عمج غصبا عن زيااااد عمج
اقتربت امنه نور بخطوات متردده ومدت يدها له وصافحها وسحبها صوبه وهو يلامس بخشمه خشمها
خليفه:هذا سلامنا يانور الانف بالانف...انسميه موايه بالخشوووم
ابتسمت نور وابتعدت خطوه وهيه منحرجه ووجهت نظرها لنوره
خليفه:هذه زوجتي واسمها نوره شبيه باسمك
اقتربت نور من نوره الي التفتت ابها للجهه الثانيه وكشفت الها عن ويهها وهيه مبتسمه وسلمت عليها تمت نور اطالع نوره باعجاب ويهها مبتسم
نوره:كيف حالك
نور وبعده مبتسمه ومنشرح قلبها لنوره:بخير والحمدلله
طبعا كانت صدمه لخليفه الي واقف ورا نوره وهو يدري انها كشفت بويهها لنور...الموقف خلاه ساكت بينما نور ونوره تمن يتحدثن بصوت واطي
نور سالتها ليش تتغطين عن زوجج وقالتلها بعدين بخبرج...عدلت نوره نقابها والتفتت لخليفه الي بعده ساكت
نور:كيف حالك يا عماااه؟
خليفه:هااه ب بخير الحمدلله انتي كيف حالج؟
نور:انني سعيده حقا لا تتخيل يا عماه كم انا سعيده اكاد ارقص من السعااده لله الحمد والشكر
خليفه:ا ا نور انا والله خاطريه اقعد معاج واايد بس انا بظطر ارووح عشان شغليه بعد ساعتين برد اخذ نوره خليها عندج
نور:جوزيت خيرا يا عمااه
خليفه وعيونه على نوره:يالله فمان الله
التفت عنهن وراح شووو سالفة النقاب وكيف ما شفت ردة فعل حق نور يوم شافت الحرق
قعدت نور مع نوره واستانست على فطامي واكثر يوم درت انها بنت عمها
هنيه كانت يايبه القهوه والشاي وطاااارت عيونها في نوره والزين الي شافته
هنيه:بسم الله ماشالله بسم الله مشالله ...خمسه وخميسه في عيين الي ما يصلي على النبي
ضحكت نوره ونور اطالع هنيه باستغراب
نور:هنيه ماذا تعني خمسه وخميسه؟
انفجرت نوره تضحك وضحكن كلهن
كانت كلمات نوره الي تتخللها كلمات بالفصحى واضحه حق نور واستمتعت بالحديث معاها سالته نور عن الاهل الباقيين وخبرت نوره نور بقصتها
وكيف تم الاتفاق على الزواج حق مصلحة اليهال
نور بتاثر:هو لم يرا وجهك؟
نوره:لا ...هو لديه خطيبه ...افضل ان تكون علاقتي به سطحيه كي لا ......
وسكتت نوره
نور:من المؤكد ان رااك سوف يعجب بك....انتي لا تريدين ان تفسدي عليه امر خطبته من ابنة خالته...انتي امراءه عظيمه يا نوره تؤثرين الاخرين
على نفسك
نوره:لا اريد ان اظلم خطيبته فهي لا ذنب لها
نور:يا الاااااهي كم احبك يا اخيه....واتمنى لك كل الخير عماااه رجلا صالح وانتي امراءه صالحه جمعكما الله على ما يحب ويرضى
نوره بابتسامه حزينه لاحضتها نور:مشكوووره يا نور
وقفت نوره:نووور انا يبت لج عبااه
وقفت نور بنظرات مستفسره:ماذا؟
نوره وهيه اطلع العباه من الكيس الي كان في يدها
نوره:عبااه مثل التي البسها
نور بفرحه:حـــــــــــــــــــــــقا لقد اعجبت بهذه العبااءه التي ترتدينها وتمنيت واحده...كم انته عظيم يا الاهي
ودمعت عيون نور
نوره:نور ليش اتصيحين؟
نور:اشعر بسعاده عندما اجد ربي يحضر لي كل ما اتمنى بمجرد ان افكر به....ان الله عظيم يا نوره
وقريب جدا
نوره بتاثر:انتي يانور تستاهلين كل الخير...ياله قوومي البسي روينيه
نور بابتسامه:ماذا تعني روينيه؟
نوره:ههههه اسمحي لي اقصد بها اريني
نور:روينيه روينيه
نوره:هههههه
وقفت نور ولبست العباه وقعدت اتدور ابها:يا الااااهي كم هي جميله وساتره افضلها على تلك التي كنت البسها
نوره:وهذي شيلتها وهذي الغشوه وهذا بعد نقاااب
نور:اشكرك كثيرا يا نوره لا تتخيلين مدى سعادتي
نوره:باقي اسويلج ثيااب ما كنت ادري انج تلبسين هالبس
نور:اجل اريد ان البس ما تلبسووون كي اشعر بانني هنا وانني عدت الى دياري حقا ...يال سعاااادتي
اريد ان اذهب لاسجد لله شكرا
نوره:الله يعطيج كل الخير يا نور ويوفقج
رجع خليفه عقب وخذ نوره ورجعها للبيت بعد ما ودعت نور وعدتها بالزياره مره ثانيه
خليفه في السياره:اخبار نور؟
نوره:اتجنن اتجنن والله ...وكسرت خاطريه واااايد
خليفه:ايوالله مسكينه طول هالسنين وهيه محد يدري ابها ويوم دروبها مادرابها الا هتلر
نوره:هههههه حرام عليك اتقول عنه هتلر
خليفه:والله ان هتلر احسن عنه...............مييييييت قلبه...عاقنها عيل في ملحق الخدم ويوم ايرمسها رمسها
من راس خشمه جنها ماتسوا عنده فردة نعل...بس انا ارويه لخمام يتحسبنيه بخليها عنده
نوره:صدق خليفه بتيبها عندنا؟
خليفه :برمسها وبشوفها اذا بتوافق
نوره:والله انا حبيتها لو تشوف فرحتها بالعباه كييف
تنهد خليفه بالم على حال نور
اول ما وصلو وييت نوره بتنزل
خليفه:نوره
التفتت له
خليفه:خذي هالمستحضرات...الحين كنا في افتتاح محل عوود في ابوظبي موول وقدمو النا هدايا اتخص المحل عاده انا من حبيه للون العنابي خذت هالمستحضر بدال الازرق وطلع حريمي
نوره:خله حق اميره
خليفه:من سبق لبق وانتي تستاهلي اكثر من جذيه
مدت نوره يدها للمستحضرات وخذته
نوره:مشكوووور وما تقصر
ابتسم الها ونزلت نوره وهيه مستااانسه بالهديه
.......................................
نزلت مي تحت وحصلت الخدامه تنتفض من الحراره
مي:ميري شو فييج
ميري:هلج مال انا زيااااده عور
مي:اوف فيج حراره زياااده...ياله بوديج المستشفي صبري بتصل اشوف الدريول
خذت مي الخدامه للمستشفي عند الطواري لان بطاقتها منتهيه وعلى طول حطو عليها مغذي وعطوها ابره
في قسم الطواري الغرف كانت مقطعه ومدخلها بدون جدار وبدال الجدار ستايروكل غرفه فيها سريرين وبينهن ستاره
مي:هااه ميري احسن الحين
لاكن ميري ما ردت عليها من التعب لانها رقدت بعد الابره
سمعت مي ضجه وناس وممرضين يايبين مصاب و حطوه على السرير الي عدالهم وتفصل بينها وبينهم ستاره
كانت تسمع صراخ المصاب وحشرة الي معاه حد ايقول هات الهذا منيه وهذا مناك وحط اكسجين
وركب الجهاز المهم حشره وهاااتو الدكتور بسرعه...والمصاب كان اهو مروان نفسه انصاب بطلق ناري في ريله ووحده في جتفه
مي ظربها فضول وقربت من الستاره وطلت بس بعويناتها لاكنها ما شافت الا التجمع حوليه
اخيرا شافته وهو يضرب براسه قوي على المخده وهو ماسك شعره بيديه الثنتين من الالم الي يحسبه
سعد رفيقه:خلاااص يا مروااان اهدا خلهم ايطلعون الرصاصه
في وسط الالم ومقاومتهم عشان يتركونه في حاله طاحت عينه على الي قاعده اطالعه من شق الستاره وعرفها سكرت الستاره بسرعه وشي رقع في قلبه نسااه شويه الويع وهو عده مش مصدق يمكن يتخيل له
مي استغربت شو سالفة هالريال الي دوم اتشوفه لاكنه كسر خاطرها بمنظره الي يحزن رجعت اطل بعيونها بدون
ما يطلع ويهها
لحضتها كان مروان مغمي عليه من شدة الويع واحتشرو الي حواليه يوم اغمى عليه وسوو سالفه
تم قلب مي ايدق بقو من الروع اعتقدت انه مات واهيه اتشوف الاجهزه ايحطونها عليه وكل ما ييلهم ايزيد عددهم حوليه حتى الشرطه كذا واحد واقف عداله
سكرت مي الستاره والتفتت للخدامه الي خبر خير في سابع نومه وبعده المغذي توه يقل حست بتوتر ووجع في قلبها ماتدري شو سببه تمت تفرك ايديها رايحه يايه
وسمعتهم اينادونه
النقيب الي حضر توه:مرواان مرواان...طالع ياي اتحس بريلك
هز مروان راسه بلا وهو مش حاس بالي يصير حوليه وانصعقو الجميع يوم قال
مروان:صااااااااافيه....صاااااااااافيه
حطت مي يدها على ثمها تمنع شهقتها...هذا صدق مضيع ولا ينكت
نظرات تعجب تبادلها الضباط والنقيب وتسالو منيه صاافيه
الدكتور:هوهلا في حالة هذياان ....انا اعطيته ابره تهديه
هدا عقب الوضع وخلا المكان من حولين مروان بعد ما تطمنو عليه وطلعو الرصاصات
رجعت مي اطل عليه وشافته نايم بعد خمس دقايق تجرات ومشت ناحيته لان محد كان عنده
وقفت اطالعه وتتامل ملامح ويهه ما كانت تدري ان ويهها كان محمر من العبره الي خانقتنها عليه وليش هذي العبره ماتدري
وقف وراها احمد:احم...احم
نزلت غطاها بسرعه ودخلت بين الستاير بسرعه مختفيه
استقرب من وجودها وعقب قرب من مروان
احمد:مروان مروان
فتح مروان عيونه وهز راسه شو تبا؟
احمد:شو تحس عمرك الحين؟
غمض مروان عيونه وما رد عليه
احمد:انا بتم في الاستراحه برا اذا تبانيه خلهم اينادونيه
مروان:ب بدر
احمد:كلمته وطمنته عليك ايقول انه في دبي وياي في الطريق
غمض مروان عقب عيونه
ومر الوقت ومي كل شوي طلت عليه وفي اخر مره طلت عليه شافته فاتح عيونه وصادها تسمرت مكانها وما قدرت ترد الستاره
ابتسم مروان:تعالي
هزت راسها بلا
مروان:ارفعيليه السرير بس
وهزت راسها بلا
رجع وحط راسه على المخده وغمض عيونه...وبتردد خطت ناحيته عقب اشوي لين ما وصلت عداله ومدت يدها للزر الي يرفع مقدمة السرير لاكن يده كانت اسرع ومسكها
شهقت وحاولت تسحب يدها
مي بهمس عشان ما يسمعها الماره الي ورا الستاره :بطل يديه
مروان:اوعدينيه انج ماتروحين
مي:انته شوتريد؟ بطل يديه الحين بيون
مروان:والله ما اسويلج شي انتي تشوفين حاليه يسمح
مي:انته شرطي؟
استحى اهنيه مروان وارخى يده عن يدها
مروان:الي تبينه
مدت يدها للزر ورفعته
مروان :خلاص خلاص بتعقينيه
التفتت عنه واختفت بين الستاير
مروان:وييينج؟
فتحت الستاره اشوي:اسكت ابويه راقد
وسكرت الستاره
اهنيه مروان ما قدر ايسوي شي ولا يقول شي لاكنه كان ايحس بقلبه ايدق وايدق وايدق
غمض عيونه وهو يتخيلها ومرتاح انها قريب امنه
رجعت مي وطلت عليه وابتسمت
دخلت الممرضه عقب وصحت الخدامه وفتحت عنها المغذي سمع مروان الممرضه وهيه تكلم الخدامه وتسالها عن حالها الحين وعرف ان مي جذبت عليه وقبل لا تروح طلت عليه للمره الاخيره وهيه مبتسمه
وطرشلها قبله في الهوا سكرت الستاره عقب وهيه تفتح له عيونها بغيض والتفتت وراحت مع الخدامه
خبر عقب احمد مروان انه شاف بنت كانت واقفه عنده اختفت بين الستاير يوم سمعت صوته
مروان بتنهيده:ااااه فدييييتها صااافيه
احمد:منيه صافيه هذي صدق الضباط والنقيب سالونيه عنها
مروان منصدم:هااه سالوك عنها؟
.................................................. .............
نوره استانست بالمستحضرات وكانت ريحتهن اتجنن وتاخذ العقل بعد ما رقدت اليهال اتسبحت واستخدمت المستحضر
شامبو ولوشن وبودره وحتى العطر حطته مستاااانسه عليه
كانت في غرفة الملابس تلبس البجامه لبست قطعه وبقت القطعه الفوقيه وفجئه بندت الكهربه وصار المكان ظلام في ظلام
حتى قطعة البجامه ما حصلتها وماتذكرت وين اهيه تمت تتلمس الطريق وتتسال عن سبب انقطاع الكهربه
نوره:ياربيييي ما اشوووف مره
فتحت الباب وخطت كم خطوه برا ونفس الشي كل المكان كان اسود في اسود
نوره:الحين شو بسوي؟
تمت اتحاول تستدل بالطريق لمجمع الكهربه الي فوق وفتحته وحاولت تضرب الفصوص ومافي فايده
التفتت عشان اترد وانصدمت بشخص وصرخت وهو يمسكها من اكتافها
خليفه:نوووره انا خليفه
نوره بدت ترتجف:انا انا اسفه ييت اشوف ليش الكهربه مبنده كنت تونيه طالعه من الحمام وبندت
اكيد انه عرف انها طالعه من الحمام الملمس ايقول جذيه والريحه الي ضيعت به اتقووول
خليفه وبعده ماسكنها:المجمع من تحت مبند والبواب مش موجود عشان اقوله ايروح ايشغل الكهربه
نوره بتوتر:ط طيب ما عليه انااااا ب باروووح ارقد
خليفه :ادلين الطريق؟
نوره:هاااه ا اكييد بدله
مسكها خليفه من يدها
خليفه:تعاالي
تبعته لين ما حست انهم دخلو مكان بااارد دخل وغفل الباب حط خليفه ايديه حولين اكتافها
نوره وعيونها زايغه:خليييفه انا وييين؟
همس الها وهو خلاااص رايح في عينها
خليفه:نوووره انا اريييدج
التفتت بسرعه وكان صدره صادنها
خليفه:وييين؟
نوره: لا لا خليفه انته شو تقووول بطلليه الباب
خليفه بترجي:حرام عليج يا نوره انا خلاااص ما اقدر استحمل والله اريدج انتي ماتدرين شو مسويه فيه
نوره وهيه ترتجف:لا لا لا خليفه احنا ما اتفقنا على جذيه بطلنيه خلنيه اروووح
خليفه:اي اتفاااق واي خرابيط انتي ليش ماتريدين اتحسين فيه
نوره:حرام عليك خليفه انته نسيت اتفاقنا
خليفه:نوووره احنا مابنسوي شي غلط ولا هب حراام انا زوجج وحلال عليج
نوره:لا لا لا لا انته هب صاحي
خليفه بترجي اكثر وهو يضمها له
خليفه:نوووره والله انيه ما اقدر اباااج ..........صدقيينيه احنا مانسوي شي حراام والي بيصير بيكون بينيه وبينج محد بيدريبه
نوره:لا اليهال بروحهم
خليفه:ماعليهم شر تعالي انتي بس
نوره:ارجووووووك خليفه...خلنيه ارووح
خليفه:ما اقدر والله ما اقدر ابااااااج
تمت دموعها تنزل وما تعرف شو تسوي
حاولت نوره اتصده لاكن ترجياته واصراره خلا كل مقاومتها تروح هبا منثور وهيه تستسلمله اخيرا
ولوما مشاعرها الي تكنها له يمكن قدرت تقاومه
................................
هنيه وهيه تتجلب في فراشها:بنت يانور ...انتي حتنامي امتا؟
نور بابتسامه:هنيه اشعر بسعاااده تغمرني ...هنيه قريبا سوف ارا جدتي وعمي وابنا عمي
هنيه انا لديه عائله انا سعيده جدا......كم احب عمي خليفه انه شخص محبووب واحب زوجته اتمنى لهما السعاده...سوف ادعو ربي ان يجمعهما دائما
هنيه:نووور امتى حنااام؟
نور:لا اشعر بانني اريد ان انام هل استطيع هنيه ان اذهب الى الخارج؟
هنيه:حتعملي فيه خييير وتسيبيني اناااام روووحي وخدي باالك من العفااريييت
نور:العفارييت اين ساجدهم؟
رفعه هنيه راسها:حتلاقيهم برا مستنييينك
نور:حقا سوف اذهب لاراهم
طلعت نور وكانت لابسه جلابيه بيضا وشال كبير ابيض وشعرها مفتوح والشال محطوط على راسها بدون ماتلفه زيين
تمت نور ادور بعيونها على العفاريت تعتقد انهن يمكن عصافير ولااسماااك
كانت الاضاءه في اماكن معينه في الفله وبقية الفله في ظلام
نور وهيه تكلم نفسها:اين ساجدهم؟
زايد وما انتبهت له نور وهو قاعد على احد الكراسي في الصاله الكبيره يقرا بعض الرسائل الي في تلفونه
زايد:شو تدورين؟
شهقت نور والتفتت بسرعه للجهه الثانيه وعدلت حجابها والتفتت له
نور:عفو ايها السيد لم اكن اعلم بانك هنا
وقف زايد الي كان لابس لبس رياضه وعليه جاكيت وهو حاط ايديه في جيوب الجاكيت وقرب منها
زايد:شوتدورين؟
نور:ابحث عن ال.................
رفعت نور راسها باتجاه زايد وسالته
نور:هل تعني هنيه بالعفاريت جمع عفريت؟
زايد تم ايطالعها مستغرب شو سالفتها وهو يضغط على شفايفه عن لا يبتسم
نور وهيه تتحلف لهنيه:حسنا هنيه سوف ترين...اعتذر منك ايها السيد .........فوتك بعافيه
وقبل لا تلتفت امنه مسكها وهو يطلق ضحكته
التفتت له نور مستغربه ضحكته وعينها على يدها الي مسكها
نور:اترك يدي ايها الرجل
زايد:ايها الرجل........ من قبل سيدي وعقب ايها السيد والحين ايها الرجل ارسيلج على بر
نور وهيه تحاول تسحب يدها:حسنا اترك يدي
زايد بعناد وهو يمسك يدها الثانيه:وان ما تركتج شو بتسوين؟
نور بنظرات غاضبه:قلت لك اتركني الاتخشى الله؟
زايد وهو يضغط اكثر في مسكته:تعالي انتي انتي وايد مصدقه عمرج مسويتليه فيها مطوعه يايه اول شي رايحه تخطبين برا عند البتان وعقب يايه تذينيه قم صل قم صل واخرتها ميننه اليه هنيه اتقوليلها صلاتج ماتنقبل
انتي حد عطاج رخصة افتاء
نور وهيه تقاومه:اتركني
زايد:ويوم انتي تبينيه اتركج وخايفه من مسكتيه شمطلعنج الحين نصايف الليل
نور:انك شيطااااان هيا اتركني
ابتسم زايد:والشيطان ايقولوله اتركني ههههههه
من حركتها وهيه تقاومه ارتخى حجابها وطاح
ثبتت عقب نور في وقفتها وحطت عيونها في عيونه
نور:هيا اتركني واتقي من لساني قبل ان يدعو عليك
تركها زايد وهو ايدزها:انقلعي
التفت عنها وراح وتمت نور تتبعه بنظراتها المعصبه لين اختفى
.................................................. ..............
على الساعه خمس الصبح والوقت بعده ظلام فتحت نوره عيونها وكانت يد خليفه مطوقتنها من اكتافها
ابتسمت بحرج وحرك خليفه صبوعه على اكتافها وشكله كان واعي من الصبح ويفكر الغرفه كانت بعدها في ظلام
خليفه وهو يضغط باصابعه على كتفها:اميره.....وعيتي؟
حست نوره انها ماتقدر تتنفس حاولت تسحب نفسها لاكنها ما قدرت قعدت بسرعه وارتهب خليفه وهو يحس ان فيها شي
خليفه:شبلااااااج؟
اخيرا خذت النفس
نوره ودموعها تنزل بسرعه:انا مش اميره يا خليفه مش اميره انا نوره نوره
شهقت بصوت عالي وسحبت نفسها وركضت بسرعه برا رايحه لغرفتها
ضرب خليفه بيده قوي على لفراش ومسك عقب بايديه راسه وهو يقول
خليفه:ادري انج نوره والله ادري.........بس ما اريد الي استوا يتكرر
من وعى وهو يلوم نفسه على الي صار وكيف انه خان اميره
تضاااايق عقب خليفه من نفسه وزعل على حال نوره
اما نوره فكانت قريبه من الانهيار ماتتخيل انها بعد ما كانت قريبه امنه كل هالقرب يبعدها بالطريقه هذي
على الساعه سبع ونصف وقت تسريح اليهال للمدارس نزل خليفه الي كان يحس بسعاده خفيه ما يدري شو سببها وعلى اساسها تكشخ وتعطر ونازل بابتسامه
اول ما قعد رفع نظره لنوره الي كانت صاده بنظرها عنه وتسوي السندويجات لليهال ووقف بسرعه ورجفه قويه تسري في جسمه اول ما شاف عيونها المحمره والمنتفخه
حتى ايديها كانت ترتجف وهيه تسوي السندويجات ما عرف شو يسوي او شو يقول حس بتانيب ضمير وعلى طول طلع بدون ما يفطر
لاكن المصيبه تغيرت عند خليفه الي طول الاجتماع وهو يتذكر الليله الرهيبه وصار ما يجمع لاي كلمه تنقال
غمض عيونه في نصف الاجتماع وقلبه ايدق بقو ورعشه تسري فيه
حمدان:خليفه خليفه
خليفه:هلا
حمدان:تعباان
ابتسم خليفه:لا فديتك ...معاكم كملو
لاكنه ما قدر ويده كلته لين ما طلع تيلفونه وطرشلها رساله
وصل المسج لنوره"ااااااااااااااااااااسف والله اسف ساااامحييييينيه"ّ
طنشت نوره رسالته وهيه مازالت متالمه من كلمته
خليفه ورساله ثانيه ايطرشها"نووووره والله العظيم انيه كنت ادري انج نوره بس انا ما دري كيف
فكرت ان الي صار لازم ما يتكرر"ّ
بعد طنشت الرساله
وخليفه صار مش في حاله في الاجتماع الي حس انه طوييييل
خليفه"مش مصدقتنيه اكيد؟............طيب وكلمة (نوره انتي رهيبه )الي كنت اكررها ماتثبت لج
حطت نوره ايديها على ويهها من الاحراج هذا شو قاعد ايخبص
طرشتله رساله"خلاص خلاص يا خليفه صدقتك...وانا فهمت انته شو قصدك بالكلمه بعتبر ما شي صاروبنسى السالفه
خليفه بعد ما قرا رسالتها"ويييييييييل حالك يا خليفه اتقول بعتبر ماشي صار
بعد ما رجع خليفه من الدوام لقى عيال اخوه جدامه مخلصين من الغدا وما شاف نوره سلم عليهم
خليفه وعيونه ادورها:ويين خالتكم
ناصر:الخدامه اتقول انها راااقده
وقف خليفه الي كان نازل ايحب دانوه:راااقده؟ شي فيها؟
ناصر:انا رحت فوق ولقيتها راقده اهيه وفطامي جدامها
.................................................. .....
العصر نفس الشي طلع خليفه وما شاف نوره وطلع رايح بيت اخوه ابو فهد عشان ايقوللهم عن نور حسب ما وعدها
وكان زايد موجود عندهم
كانت الجده وابو فهد وفهد وام فهد قعود يوم فتح خليفه السالفه وقال الهم عن نور
الجده وهيه ترفع عصاتها:اتهاااااابي منوووو قاااال
ضحك زايد وقام وقعد عدال يدته وطوقها من اكتافها بيديه يازتله ردة فعلها
خليفه وهو معصب على زايد:عمتيه الاوراق الي عندها اتقول
الجده:جذب هذا كله خرطي ...والاوراق هذي سر اطعم ابها بوشك
نقع زايد من الضحك ومااات خليفه من القهر
خليفه:ياعمتيه انا ما اجذب عليج واسالي زايد ان كنت اجذب والدليل انها عنده في بيته
التفتت الجد على زايد وعيونها مفتوحه على اتساعهن
الجده:صدق الي يقوله؟
زايد:شدرانيه يا يدوووه ايقولون انها بنت عميه
الجده:جاااااذب هذا كله كلااام خرطي ولديه حمد يوم ايسافر كان توه فرخ صغير شعرفه بالعرس والخرابيط هذي وبعدين اهو رايح قنص ما راح بكستااان
خليفه:القنص كان في بكستان
حركة الجده العصى تتحلف لخليفه انها بتظربه:يووووور ونكر هذا يوووور ونكر اتهبي البكستانيه تاخذ ولديه طالعو هذي من وين مضوييينها
والتفتت لزايد ورقعته على راسه:وانته شله حاطنها في بيتك سفرها سفرها دارها
زايد وهو ياشر لعيونه حاااضر والطلب رخيص
خليفه:حرام عليكم على الاقل خلينيه اروح اييبها وشوفيها وعقب احكمي
الجده:اتهبي....سفروها سفروها قبل لا تحل عليكم السلطه
هز خليفه راسه :لا حول ولا قوة الابالله
الجده:احولت عيونك يايبليه نكر
وقف خليفه:على راحتكم هذا ولد بنتج وتفاهمي معاه ...اما انا مش مستعد اتخلى عنها الحين بروح وباخذها لبيتيه
الجده:تعااال اهنيه
التفت الها خليفه
الجده:اقعد اشوف....
والتفتت لزايد
الجده:وانته ياله قم رح هاتها
زايد:انا!!!؟
الجده:هيه انته هب يايبنها وحاطنها في بيتك ياله قم هاتها خلنيه اشوفها وانا ترانيه بصيره بعرف ان كان فيها عرج منا
ابتسم خليفه لان الكل بيبصم انها تقرب الهم وما يحتاج فيها لبصيرة حد
قام زايد وهو يعدل بربوشته على صدره وطالع خاله بنظره جانبيه وراح مايدري ليش ايحس بغيظ وعلى منو مايدري هذا اهو حاله
اتصل وهو في الطريق على هنيه وقالها اتخلي نور تجهز عشان بيوديها عند يدته
زايد:هنيه القاها عند الباب وان مالقيتها حلت عليج السلطه
هنيه:ط طيب ياباااشه
التفتت لنور:يلهوي يالهوي يلهوي ...مش عارفه يمكن الصله دعت عليه اليوم...نوووور بنت يانور اقووومي الباشه جي عشان يخدك
نور بنظراتها الجميله:الى اين؟
هنيه:بيقول عايز ياخدك عند جدته
اتسعت عيون نور من الفرحه:حـــــــــــــــــــقا هل سارى الجده الان؟
هنيه:ايييييوا قومي باا خلصيني دنتي مش عارفه السلطه الي بيقولي عليها
نور:حسنا حسنا هنيه سوف اصلي المغرب ثم اتجهز
هنيه:تصلي اييييه دالمغرب لسا ما اذنش
نور بابتسامه:سوف يونادا للصلاه الان
وبالفعل اذن المغرب ورن تيلفون هنيه الي رفعته وهيه تنتفض
زايد بصوت عالي:وييييينهاااااا
هنيه:اهي اهي ياباااشه خد كلمها
زايد:انا شو اريد اكلمها خليها تطلعليه بسرعه
هنيه:ط طيب طيب ياباااشه دلوقتي تكون عندك
التفتت لنور:ابوس ايييدك يابنت تمشي تروحي ليييه دا ولع اوي
نور وهيه تهز راسها:الم يسمع الندا الى الصلاه...دعيه هنيه وهيا بنا نذهب لنصلي
هنيه:حيسيبك يابنت ويمشي
نور:لن ادع صلاتي من اجله سوف ياتي العم خليفه وياخذني انا لا اريد ان اذهب معه
رن تيلفون هنيه
هنيه:اعمل ايييه اعمل ايييه ياربنا دنا غلبت معااااكم
فتحت الخط
زايد:هنيه ومرض وييييينها
هنيه:بتصلي ياباشه
سكر التيلفون في ويهها وريوس بالسياره وهو معصب وطلع من الفله
بعد عشرين دقيقه اتصل على هنيه
هنيه:ايواااا ياباااشه
زايد بصوت هادي:قوليلها انيه ارقبها برا
هنيه مستغربه:طيب
لبست نور العباه والشيله وحطت الغشاه عليهن
نور وهيه مستانسه:مارايك هنيه؟
هنيه وهيه قربت اتصيح:حرام عليكي يابنت يانوووور امشي بااا انتي مسمعتيش الهدوء الي قبل العاصفه
دنا خايفه والله منالهدوء الي هو فيه
نور:لا عليك هنيه ....سوف اذهب الان
كان زايد في سيارته المرسيدس جدام البوابه الداخليه يوم لمح بنت بالعباه السودا طالعه له ولا اراديا فتح الباب وطلع عشان يتلقى الها مش متخيل انها نور
وقفت جدامه وهو يطالعها ورفعت الغطا لفوق وهيه اطالعه بابتسامه
اهتزت كل خلايا جسمه برعشه خفيفه تسري بجسمه وهو مبحلق بعيونه فيها كان شكلها بالحجاب الاسود والعباه والغطا غييييير
نور:هل سنذهب؟
هز راسه ناحية الباب:لفي اركبي
والتفت عنها ورجع يركب السياره
##
##
##
ودمتم جميعا وديمه العطا
الغاليه الزائره يازيين صباحج اليوم بلغي السلام للجميع
|
24-12-09, 11:34 AM
جديد مواضيع قسم القصص المكتمله
العرض العادي
