.
الجزء السادس و العشرون :
( لقااااااء بعد فراق )
هم أخوتي ,, دمي هو دمهم ,, و سأظل أحبهم حتى لو ابتعدت عنهم مئة سنه لأني أعلم أنا مافي قلبي من حب ما هو الا نسخة لما هو في قلوبهم .. ..
إذن هم حتى لو كابروا فأنا أعلم بحبهم لي ..
كانوا يسولفون و أنا أدور بنظري بينهم ودي أشبع منهم بس عجزت ,, كل ما التفت لحداهم اشتاق للثاني و ترجع عيوني تدوره , مر الوقت سريع لحد ما سمعنا صوت الحق ينااادي ...
" الله أكبر "
" الله أكبر "
قام محمد واقف و رد : أذن يله يا شباب على المسجد .
رد مطلق و هو يوقف : أنا أبجي معك ..
مشى محمد باتجاه الباب : يله أجل مشينا و اسرعوا يا عيال لا تفوتكم صلاة الظهر .
طلع محمد و وراه مطلق و تبعتهم بعيوني ..
: ياااااهوه تراهم راحوا خلاااص .
التفت بسرعه للصوت و شفت عيون فيصل تطالعن بخبث ثم كمل كلامه : طلع مطلق خلاااااص ..
ضحكت و حطيت ايدي على افمي و رديت : حرام عليك !!
ابتسم عبدالرحمن و رد : هاه وش أخبارتس مع مطلق ؟؟ قولي كل اللي بقلبتس دام انه طلع ؟
ضحكت و رديت بحياء : بخير الحمد لله ..
قام عبدالرحمن و هو يردد : يا ربي لك الحمد على هالنعمه ..
اتجه للباب و رد : تأخرنا يا فيصل بيقيم تراه ..
ضحك فيصل و وقف : الحين جاي وراك ..
تحرك فيصل لكني سبقت خطوته و مسكت ايده ,, التفت علي و سبقته بكلامي : أجل خطبه و سنع !!
ضحك و التفت علي بكامل جسمه و رد : قسم بالله ما صار فرصه اقولتس ..
قبصته مع ذراعه و رديت : لااااه أجل ما صار فرصه ؟!!
ضحك و هو يمسح على ذراعه ثم رد : وش أسوي بتس صادة بالحفر ..
ضحكت و رديت : اقول بس لا تضيع السالفه و قل لي من هي ؟؟
عقد حواجبه و رد : من هي اللي من هي ؟
رديت باستفسااار : الشينه اللي بتاخذك ..
ضحك و رد : لا تسبين امرتي ..
رديت بضحكه : من زينك عاد أنت وياه .
ضحك و رد : سبين انا عادي بس ندى لاااا .
.
.
.
شخصت عيوني يوم سمعت الاسم و بمجرد استيعابي شهقت ,, تعلقت عيوني بفيصل و كأنه فهم علي لأنه جاوب على السؤال اللي تردد بداخل نفسي : ندى بنت عمتي هدى ..
ابتسمت و تحولت ابتسامتي لضحكه ..
شفته دخل طرف اصبعه بإفمه ثم رد باستهبال و هو طالع : ترى أستحي !!
عضيت على شفتي لما فضت الغرفه من زوله و ابتسمت براحه و أنا أتمتم : يا ربي وفقهم يا رب !!!
ــــــــــــــــــــــــــــــــــــــــــــــــــ ـــــــ
أسماء
بعد ما صليت الظهر قال لي سلطان عن رونق و أنا على سجادتي ,, قمت بسرعه و أخذت عباتي حتى بدون ما أستأذنه ...
لبست عباتي بسرعه و أنا متلخبطه ,, فرحه و خوف و كل شعور تجمع بهالوقت ..
كنت حايسه أنا و عباتي لأني اذا ارتعت أتلخبط ...
حسيت بإيد سلطان تقبض على ذراعي ,, و داهمتن ريحة دهن العود اللي تملأ لحيته الكثه ,, رفعت راسي له و سألته بسرعه : وشو سلطان ..
رد سلطان : أنتي تعبانه كلميه بالجوال يكفي ..
أشرت براسي بمعنى لا و رديت : لي سنه و نص عنه و الله ما أقعد ...
و كأني شفته عقد حواجبه من اللهجه اللي كلمته به فتابعت كلامي : و الله اني بخيييير و الله ..
حسيت بإيده الثانيه تمسكن مع ذراعي الثاني و قابلن بجسمه و رد : أسماء هي بتطلع بكرى و بتجي تزورتس .
رديت بسرعه و عناد : لاااااا أنا ابروح الحين أشوفـــ ...
قاطعن و ضغط على ايديني اكثر : قلت لاااااا بكرى يعني بكرى ..
عقدت حواجبي و بوزت و بثواني انفجرت أصيييح ,, سلطان ما يعرف باللي بقلبي لرونق ,, قسم ان قلبي آآكلن عليه و هو و لاااا عليه !!
رد سلطان باستغراب : أسمااااااء ؟!
مسحت دموعي بطرف ايدي و رديت : سلطان هذي اختي ..
تنهد سلطان و رد : البسي يالبزر أوديتس ..
عضيت على شفتي و مسحت بقايا دموعي ,, حطيت غطوتي على وجهي و رفعت عباتي على راسي ,, فتشت وجهي و حطيت ايدي بإيد سلطان الممدوده ..
مشينا متجهين للباب لكن يد بنتي ربا تشبثت بعباتي ,, التفت بسرعه و سحبت عباتي منه بدون اهتمام ,, و كملت طريقي بسرعه ..
وقف سلطان و سحب ربا و ضمه لصدره ,, شفته تجهش بصيااااحه و تردد : لا تروحون للدكتور بيخليكم تقعدون عنده كثيييييييييييير ..
شفت سلطان يبعده عن صدره و يقابله و يشرح له : لا يا بابا بنروح نشوف خاله رونق و نجي ..
ردت بشهاق : اوب جايين الا بعد كذا ,, و فتحت يدينه كلهن علامة عشره ..
رد سلطان بعتاب : يعني بابا كذااب ..
ردت بسرعه : لا لا بس ...
قاطعتهم بسرعه و رديت : ربا يا ماما بنشوف خاله شوي و نرجع ..
مسح سلطان دموع ربا بطرف شماغه و كمل : اذا جينا بوديكم للبقاله همآآآآه ..
ملت وجهه الضحكه و ما كأنه اللي كانت حزينه تو و ردت : أبأحتريكم ..
ضحك سلطان و لثم خدوده و رد : روحي لسيتي تلبستس . و علمي فطوم و رغد .
أشرت برأسه علامة الإيه و دخلت بسرعه لداخل بخطوات سريعه ..
ــــــــــــــــــــــــــــــــــــــــــــ
هدى
من وطت رجلي لأرض المستشفى حسيت الدنيا دارت بي ,, ضغطت على ايد بنتي ندى و كأنه حست باللي بي و شدت على ايدي اكثر ..
تبعنا فيصل بخطوات سريعه ,, لحد ما وصلنا للأصنصير وقف فيصل يحتسي على رجل طويل و أسمر و جثل و ملامحه حاده ..
أبعدت عنهم و وقفت ندى وراي ,, فركت اصابعي بارتباك و أنا واقفه أحتريه ,, شفته تلفت يدورن ,, رفعت ايدي أأشر له و مجرد ما شافن جاء باتجاهي هو و الرجل اللي معه ..
برغم ارتباكي و خوفي الا اني سحبت ايديني و سترتهن داخل عباتي و مثل اللي صار لإيديني صار لندى اللي انكمشت على نفسه و غبـّت جسمه وراي ..
: بالخير يا ام صالح ..
رديت بصوت هادي : يا هلا ..
رد سأل الرجل : بشرري عن أحوالكم ؟
رديت بسرعه : بخير الله يجزاك خير ..
كان باين علي اني ما عرفته لأني ما سألته عن نفسه ,, لكن فيصل اشر عليه و رد : عمه هذا ابو ساري رجل رونق ..
من قال رونق نشف حلقي ,, بلعت ريقي و رديت : هلا و الله حياك الله بشر عنك أنت و رونق ؟
رد ابو ساري بسرعه و عيونه متجهه للبعيد : بخير يا علتس للخير .
رديت بسرعه : بشّر عن والديك ؟
رد ابو ساري : كلهم بخير ..
ثم كمل : أخليكم تروحون تشوفون ام ساري بخاطركم ..
مشى ابو ساري بخطوات بطيئه بسيب المستشفى ثم تحرك فيصل للأصنصير و تبعته أنا بخطوات سريعه و خايفه و ندى وراي لكن خطواته كانت مرتبكه بسبب وجود فيصل ..
ــــــــــــــــــــــــــــــــــــــــــــــ
رونق
شديت الغطاء علي أكثر مع برودة التكييف المركزي و صكيت سنوني ..
سمعت صوت عبدالرحمن : بردانه ؟؟
ابتسمت و رديت : شوي .
حسيت بيد محمد تلحفن أكثر بالغطاء و رد : موب برد و الله بس أنتي تعبانه .
رديت : لا الحمد لله أنا بخير .
.
.
شوي و سمعنا صوت هادي : السلام عليكم ..
اعتدلت جالسه و أنا أشوف أسماء تدخل ,, وقف محمد و سلم عليه و بعده عبدالرحمن ,, كل هذا و أنا ودي انط أسلم عليه ,, أحس انهم اقعدوا ساعه مع انهم ما أخذوا ثواني !!
من أقبلت علي اسماء استقمت بقعدتي و لو اني اقدر كان قمت له ,, وصلت أسماء و ضمتن بأكبر قوه تقدر عليه و أنا استسلمت له ,, مرت دقايق و حنا ساكتين و ما تنسمع الا أنفاسنا !!
لا صحنا و لا نحنا كل اللي سويناوه اننا التزمنا الصمت و كأننا موب مستوعبين شي !!
ما أدري وش اللي صار لي يوم شفته قلبي بدأ يضرب و الحر كسى جسمي و من حطيت راسي على صدره بديت أتنهد ,, تشبثت به أكثر و أنا موب متخيله إني بغيت أفقده ..
أسماء هي أمي الثانيه بعد امي موضي و لا به أحد يجي مثله يعني قدره الكبير هو اللي خلان أتشنج و ما يصدر من أي ردة فعل !!
مر الوقت و أنا متشبثه بعباته و هي واقفه ,, حسيت بارتخاء جسمه و ضميته لي أكثر لكن كانت أثقل من اني أشيله و أنا بحالتي ..
كأن عبدالرحمن حس به قبل لا تطيح لأنه شده معي و جلـّــسه على طرف السرير ,, تسندت على ظهري و ضميت راسه لي و هي مرتخيه و منسدحه على صدري ,, من شفت دوخته و ضعفه بدت عبرتي تتجمع بصدري ,, مررت ايدي على ظهره و أنا أشوفه معلقه عيونه علي ,, شفت دمعه حايره بين رموشه و من شفته طاحت دموعي و أنا أناظره ,, دفنت وجهي بشعره القصير و أجهشت بصيااااح موووووجع ..
ما كانت الا أمي و أختي و بنتي و حياتي كله تتألم بين يديني ..
و ما كان ألمه الا ألم جسدي اختلط معه آلآآآآآم نفسيه ..
كانت شهقاتي عاليه و نحيبه موجع ,, سمعنا استرجاع محمد و استغفار عبدالرحمن لكن كله ما زحزحنا مقدار شعره !!
ما مر وقت طويل الا وحسينا بإيدين حاوطتنا ,, ما كلفت نفسي أرفع راسي و أشوف من لأن صبره و الزمن ما نسنن ريحة أختي هدى و بنته ندى !!
حسيت به تضمنا و تشابكت ايدينه هي و ندى ,, و ترجمن الشوق اللي بصدورهن عن طريق دموعهن .
ما كنـّــا بذيك الساعه الا أشبه بعقدة الخيوط !!
ـــــــــــــــــــــــــــــــــــــــــــــــ
نهى
بعد صلاة المغرب ..
" أم دميعه " لقب أطلقته علي أمجاد بنت اخوي محمد و مع ان هاللقب لازمن كل الفتره اللي عرفتهم الا اني اليوم مثلته بصورته الصحيحه !!
من دخلت على رونق و انا كل دقيقتين ألوذ و أمسح دمعتي بطرف المنديل اللي بيدي ,, فاقدته كثييييييييير !!
يمكن البعض أو حتى الكل يستغرب اني فقدته و انا ما عاشرته كثير بحكم اني ما تعرفت عليه الا بعد وفاة ابوي عبدالله لكن سبحان الله من قابلته ارتحت له ,,
فيه بقلبي اشياااء كثيره و هموم أكثر محتاجه أطلعهن لرونق بعد ما أخفيتهن عن الكل ..
: وين وصلتي .
رفعت راسي لرونق و ابتسمت ثم رديت : هناا .
ردت رونق : موب على كيفتس تخلينهم يروحون بزعم انتس انتي اللي تبي ترافقين عندي همـّـن تسهجينن !!
ضحكت و رديت : هذاي معتس قسم ما سهجتس .
حطت رونق ايده على ايدي و ضغطت عليه و ردت : تطلقتي يا نهى .
ابتسمت براحه و رديت : مرتاحه كثير يا رونق بعد الطلاق لكن ما تدرين وش كثر تعبت عشان اتطلق .
ردت رونق باهتمام : وشلون قدرتي تقنعينهم انتس تتطلقين ؟
رديت بابتسامة سخريه : جاااء الفرج من ربي ..
ابتسمت رونق و ردت : أويلاآآآه قولي وش سويتي ..
رديت بجديه : اسمعي تعرفين خالتي لطيفه اللي بالمدينه ؟
ردت رونق : قصدتس عمتي لطيفه أخت ابوي و اخت عمتي منيره ..
رديت أوضّــح : و عمتي منيره هي امي من الرضاع يعني أنا تصير عمتي لطيفه و خالتي لطيفه ..
ردت رونق بسرعه : أوميييير و الزبده ؟
كملت قصتي : أول أنتي تدرين اني كارهته ,, و تدرين انه كثر ما أكرهه كثر ما يحبن ..
و تابعت لما شفته مهتمه : عاد انا ساحرت امي منيره و حتسيت (حكيت) على اخوي محمد و كلهم يقولون انه ولد عمتس و انه شاريتس ,, المهم اني مئيسه قوه ..
ردت رونق : طيب و بعدين ؟
كملت سالفتي : خالتي لطيفه مرضعة عزام عقب ما ماتت امه و مرت ولده الكبير سليمان مرضعتن ..
حسيت ان رونق سطـّـلت فرديت أوضـّــح : يعني عزام يصير عمي من الرضاع .
اخترقت شهقة رونق اذاني و ردت : يا ربيييييييي !!
و كملت يوم شافتن سادة اذاني : و عمتي لطيفه وراه ما حتســت قبل تعرسين .
رديت بهدوء : تدرين انه من تالي خيط و خيط ..
سألت رونق : و مرت سليمان ؟؟
رديت على سؤاله : مرت سليمان ما دريت ان خالتي مرضعة عزام ..
تنهدت رونق و ردت : لا تقولين لي بعد ان عمتي منيره ما تدري !!
رديت بعد ما تنهدت : أمي تدري ان خالتي مرضعة عزام بس اللي ما تعرفه امي ان خالتي خلـّت مرت سليمان ترضعن بالسر لأنه على قولته ما تضمن الدنيا تبي لو يجي امي شي بسم الله عليه تصير تقدر تاخذن لأن عمتي لطيفه تدري ان ابوي مستحيل بياخذن !!
تنهدت رونق و سندت راسه على السرير : فقعتي راسي ,, كل شي توقعته الا تسذا ..
تنهدت و رديت : فقعت راستس بس انا ارتحت من الهم ..
تنهدت رونق و ردت : قولي الحمد لله على كل حال .
همست بعد ما انسدحت على سرير المرافق : الحمد لله على كل حال ..
التفتت رونق و سألت من جديد : طيب هو وش سوى ؟!!
ما أدري ليه تحاشت تنطق اسم عزام و نسبت له ( هو ) كإشاره له !!
تنهدت و تكلمت بحزن صادق : رحمته قسم ,, قوه تأثر حتى هند اخته تقول انه عيا يجي عنده و عيا يرجع لبيت ابوه ما غير صاك على روحه بالبيت ..
و كملت لما ما سمعت منه صوت : رونق طول عمري اتمنى آخذ رجل يطير بي و يصير يحبن و يوم كتب الله أخذته بس صار أبغض علي من كل شي بالدنيا .
التفت على رونق و لمحت ابتسامه على وجهه ,, انتبهت لي و عقدت حواجبه ثم غطت وجهه بالشرشف و قالت : أبنام اذا قمتي تصلين العشاء لا تطلعين صوت همآآه ..
رديت بعد ما تنهدت : ان شاء الله ..
و فكري يدور بين ذكرياتي المزعجه و بين الابتسامه اللي كست ملامح رونق بغير وقته !!
ــــــــــــــــــــــــــــــــــــــــــــــــــ ـــــ
خالد
الساعه 8:30 العشاء
ما علمت أحد بموعد وصولي لأن حجزي كان انتظار غير اني كنت مخطط من بكرى أبمسك خط للحفر عشان أشوف رونق ..
من خطت رجلي بأرض المطار دقيت على فيصل و بلغته اني وصلت لكنه فاجئن بخبر تسقيط رونق و بدون لا اكسب خبر ركبت مع أول ليموزين و اتجهت للمستشفى بدون لا أنتظر فيصل !!
.
.
بما ان وقت الزياره انتهى دخلت من بوابة العيادات ثم تسحبت بين الأسياب لحد ما وصلت الغرفه المطلوبه ..
فتحت الباب بشويش و وصلت لمسامعي أصوات العبدات خواتي ..
: مها الكبيره و بعده ساره و أصغرهن وضحى .
دخلت و أنا أسحب رجليني و شفت رونق تسولف و هي منسدحه و عيونه معلقه بالسقف ,, أما نهى منسدحه على سرير المرافق و عيونه بعد فوق !!
شفت نهى ردت : يا خي هذولا وش عندهم طافين باسم وضحى .
و صلن صوت رونق ترد على نهى : أقول أها بس لا تتطنزين بحمولتي ..
.
.
رديت و أنا متكتف : الله و الحموله عااااد !!
التفتن بسرعه و الروعه باينه بوجيههن اللي اقتلبت ألوانهن ,, و ما ان استوعبن وجودي بينهن حتى صرخن جميع : خاااااالد ..
تقدمت و سلمت على رونق و ضميته لي قووووه ,, لثمت راسه ثم اتجهت لنهى و سلمت عليه مثل رونق ..
ردت نهى بعتاااب : و يوم انهم صاروا و الله و الحموله وشوله تناسبهم ..
ضحكت و رديت و أنا أقعد على طرف سرير رونق : و الله لو تدورين الدنيا كله ما تلقين رجاال مثل مطلق .
ردت نهى : صديقك دافع عنه ..
معطت شعر نهى بخبث ثم رجعت أكلم رونق وسط ضحك نهى ...
و قلت : أخبارتس يا أم ساري .
من نطقت اسم ساري اتسعت ابتسامة رونق حتى وصلت اذانه ,, و ردت : بخير عساك بخير بشـّـر عنك أنت ؟
رديت : بخير الحمد لله .
سألتن نهى : جبت الشهاده ؟؟
ضحكت و رديت : أكيد و الا وشوله رايح ..
ابتسمت رونق و ردت : يعني خلاص مافيه سفره ثانيه ؟
ابتسمت بخبث و رديت : الا أبدور الدنيا كله بأم عبدالله لا جت ..
ردت رونق : ياااا بثرك يا شيخ ..
ضحكت على كلامه ثم تلفــّــت و سألت : ما عندكم قهوه ؟
ضحكت رونق و ردت : وقت عشى ذا موب وقت قهوه ..
رديت أنا : طيب ما عندكم عشاء ..
ردت نهى بعد ما فسرت ايدينه ( رفعت كمومه ) : أغدين أطزز لك الحين .
رديت بلا مبالاة : على لحمة حاشي تراي ما احب الغنم .
انشدّت ملامح نهى لأقل من ثانيه ثم انفجرت ضحكته المكبوته و ملأ صداه الغرفه و شاركناه أنا و رونق ..
ــــــــــــــــــــــــــــــــــــــــــــــــــ ـ
رونق
الساعه 3:30 الظهر .
حطيت فنجال القهوه على الطاوله اللي قدامي و رديت : بس ..
مدت مريم ايده : واحد .
رديت : لا بس رويت و الله .
ردت هند : يمكنتس ما تعودتي على قهوتنا طحتي بقهوة الحفر .
ردت أمجااد : الله يالدنيا كل عمره تكره المسمار بالقهوه و الحين تعودت عليه !!
رديت بسرعه : يالشينه تراي ما أكرهه بس احب علي القهوه لو تصير بدون مسمار ..
: يا ولد ..
قطع علينا صوت مطلق ,, رفعت راسي للباب و رديت : لبيه ..
رد فيصل : تغطوا بندخل ..
تغطوا كلهم و أضفوا عليهم العبايات بينما أنا بقيت بمكاني ..
شفت فيصل يطل مع الباب ثم رد : تغطي يا رونق ..
أخذت عباتي من الدرج اللي بجنبي و حطيته على راسي و أسدلت جزء منه على وجهي ..
شفت مطلق يدخل و هو مبتسم و بين ايدينه شي !!
ايد صغيره ثبتت على افمه ,, ركزت نظري على الجسم الصغير مع مطلق ,, و أوّل ما استوعبت ان هالجسم جسم وليدي صرخت : سااااااااااااري ..
مديت ايديني لمطلق اللي حط ساري بحجري و اوّل ما أخذته ضميته لي بقووووه ثم دخلته داخل غطاي و لثمته مع كل مكان بجسمه و أنا أردد : ولهت علي يا روح امك ؟
رجعت ضميته و شميت ريحته ,, حسيت بإيدينه الصغيره تحاول تتحرر من !
شكله تضايق من الظلام تحت الغطاء فطلعته للنور و حطيته على حجري و بديت أتأمله و أنا ناسيه كل اللي حولي ..
سمعت صوت : الله يجعلها سلامة دايمه يا ام ساري ..
رفعت راسي و شفت نايف يدخل و ماسك خالتي ام مطلق فرديت عليه : الله يسلمك ..
ثم كملت أكلم خالتي : حيا الله خالتي ..
سلمت علي خالتي و هي تلهث ,, حبيت راسه ثم جلست هي على الكرسي و ردت : الله يجعل ما طاح تكفير للخطايا ..
رديت : آمين يا رب الله يجزاتس خير ..
سمعت صوت نايف : بخاطركم نبي نطلع حنا ..
رد مطلق بسرعه : علامك وين تبا تروح ؟
رد نايف : ابروح أنا وياك و فيصل ..
رد مطلق : مشينا ..
من طلعوا شلنا غطياننا كلنا الا خالتي ما فكت برقعه مثل عادته ,, و قامن حريم اخوتي , مريم و هند , و بنات اخوي امجاد و نوف و سلمن على خالتي ..
جلسنا نسولف و وليدي ما طاح من ايدين أمجاد و نوف ...
و مع السواليف جت سالفة نوره مرت نايف ..
خالتي ام مطلق : يوم انتس رحتي صارت نوره حبلى و ما امست بذيك الليله الا و هي تنزف ,, عاد وداها نايف للدختر اللي بالحفر و قالوا لا تقومين من محلتس ..
رديت بحزن على نوره : يا عمري هي ما تصبر تقعد .
ردت خالتي : لا نايف محلفها ما تقوم غير ان الحمد لله اللي ربي ثبته ..
ردت مريم : ايه و الله الحمد لله ..
ردت هند : و كم له حامل .
ردت خالتي : بهالستين و شوي .
رديت أنا : ايه شهرين الحمد لله بقى سبعة أشهر ..
ردت خالتي : ايه و الله كل شي يهون يوم ان ربي ما ضيع فرحة نايف ..
و كملت خالتي بعد ثواني : يوم اننا درينا بتس قلنا للشايب حنا نبي نسري و العيـّـل ما نقوى نخليه عند نوره و هي عليها قل صح و عقبها طاعنا نأخذه معنا .
صاح ساري و أخذته من أمجاد ,, حطيته على حجري بعد ما لثمته و أنا مبتسمه و غطيته بعباتي و ألقمته صدري ,, حاول يتحرر من الغطاء لكن من وصل له طعم حليب أميمته سكن و انسجم برضاعته ..
ــــــــــــــــــــــــــــــــــــــــــــــــ
مطلق
كنت أناغيه و هو يضحك ,, رفعته و حبيت خدوده ,, حسيت بيد فيصل تاخذه من و استسلمت له ..
أخذه فيصل و حبه ,, رفعه و بدأ يناغيه لكن ولد ابو ساري ما أرضى فيصل ..
فيصل مد لي ساري و بدأ يمسح ايده ثم رد : قليل الأدب ولدك هذا يبي من يأدبه ..
ضحكت و رديت : أحد قالك خذه ؟؟
رد فيصل و هو عاقد حواجبه : أجل أنا فيصل العادل يسعبل علي هالصغنطوط ...
قطع فيصل كلامه و رد و هو موجه كلامه للشخص المار من عندنا : هلااا تركي ..
سلم تركي على فيصل و هو مبتسم و من طاحت عينه على ساري ,, سأل : من هو ذا ؟؟
رد فيصل : هذا ساري ولد مطلق ..
ثم كمـّـل فيصل يوضــّح يوم شاف فيصل عاقد حواجبه : ولد عمتي رونق ..
كنت عارف ان وقع الخبر عليه بيكون قوي لكنه حاول يبين انه ما فيه شي و سلّم علي ثم انصرف بسرعه بحجة انه عنده مرضى !!
ـــــــــــــــــــــــــــــــــــــــــــــــــ
رونق
اليوم نبي نطلع من المستشفى لبيت أخوي محمد و معنا خالتي و نايف بنقعد لنا ثلاثة ايام ثم نمشي لصبره ..
طلعت مع مطلق من الغرفه و هو ماسك ايدي ,, و بإيده الثانيه شنطتي ..
و ساري أخذته أمجاد معه و سبقتنا للبيت ..
كنت أمشي ببطء و السواليف آخذه مجراه بيني أنا و مطلق ,, مروا من عندنا ناس مرضى اللي يشوفهم يحمد ربه ألف مره على اللي صار ..
رديت و أنا أشوف ولد صغير يمشي قدامنا : وهـ بث يا دينهم !!
ضحك مطلق و رد : باتسر يصير ساري كبره الدنيا تركض ..
ابتسمت و رديت : يآآآ رب !!
لمحت من بعيد زول ميب غريب علي و همست لمطلق : مطلق شف ذا موب ابو مشعل ؟!!
ناظره مطلق و رد : الا بالله هو ..
و كمل : اقعدي هنيا على ذا الكرسي ابروح اشوفه و اجي .
رديت و أنا أجلس : ان شاء الله .
راقبته و هو يسلم على ابو مشعل اللي هو ابو رجل ساره بنت خالي فيحان ..
مر الوقت و سمعت صوت موب غريب علي ,, أرهفت سمعي و تلفتّ أدور صاحب الصوت ,, شفته مار من عندي !!
تركي ؟!! الا هو و الله هو ؟!! وزعت نظري على كل شي الا هو و انصبـّـت كل الذكريات على راسي بذيك الساعه ..
سمعته يقول بصوت مقهور : وش اسوي قسم بالله ما توقعته يطيح اللي ببطنه .
رد الدكتور الثاني : أنت الله يهديك وشوله الشك ..
رد تركي بعد ما تنهد : قسم بالله غصب علي ..
رد الدكتور الثاني : بس هذي بنت عمك و زوجتك ..
رد تركي : و الله موب بإيدي الشك غصب عليّ .
رد الدكتور الثاني : منتب تسذا من أول ّ!!
رد تركي و هو يسحب نفس طوييييل : حسبي الله على من كان السبب !!
راحوا و اختفى طيفهم و معه أختفت ذكرياتي الغبيه ..
و أقبل اللي يسوااااهم كلهم ,, أقبل مطلق عسى عيني ما تبكيه ..
قمت واقفه و مديت ايدي ,, و ايده الكبيره احتضنت ايدي الصغيره و سألته : عسى ما شر وش به ؟؟
رد مطلق : لا خير ان شاء الله جاي يزور له واحد ..
رديت براحه : الحمد لله ..
و مشينا رايحين لبيت محمد و ايدينا و قلوبنا متماسكه ....
ــــــــــــــــــــــــــــــــــــــــــــــــــ ــ
ندى
بعد يومين
اليوم مجتمعين ببيت خالي محمد ,, كلنا الا خالتي أسماء لأنه تعبانه و رونق راحت لمه ببيته ..
مليييييت من رونق و نهى و أمجاد و تعليقهن علي و كأنه ما أعرس أحد قبلي ,, يعني من جددد دبلن تسبدي و خصوصا هالمصريه أمجاد !!
المهم ان ناديه أختي قالت لي طنشيهن و انا سويت بنصيحة أخيتي ..
يكلمنن و يتطنزن و أنا موب لمهن و بالأخير يوم صدز انفقعت مرارتي طلعت من المطبخ رايحه لمجلس الحريم ..
و قبل لا توطى رجلي مدخل المجلس سمعتهم يسولفون ....
أم مطلق : الله يوفقهم و يرزقهم الذرية الصالحه ..
ردت أمي : آمين الله يجزاتس خير ..
سمعت صوت هند مرت خالي عبدالرحمن : عاد لا تخلوننا يا أم مطلق ..
ردت أم مطلق : و الله ما ندري عن الشايب يطيعنا لو لا ..
ردت مريم مرت خالي محمد : بتجون ان شاء الله نبي نصير ولهين عليكم ..
سألت هند : حددتوه ؟!!
ردت مريم : بــ 6/7 ان شاء الله ..
بلعت ريقي يوم سمعت الموعد و مديت ايديني أحسب كم بقي لكن صوت أمي كان أسرع من : بعد شهر و نص ...
وقف قلبي و بلعت ريقي !!
و الله موب مصدقه اللي أسمعه ,, أنا قلت لهم ايه بس ما توقعتهم يحطونه الحين ,, يا ربي قهررررر قسم بالله ,, تلفت و أنا حايره وش اسوي ,, لكني تذكرت اني طرت و الا وقعت موب مغيرينه أمي و ابوي و أنا اعرفهم !!
شلت نفسي و رجعت للبنات و أنا أغلي من القهر عليهم كلهم !!
ــــــــــــــــــــــــــــــــــــــــــــــــ
خالد
سكرت الخط بعد المكالمه الطويييييله مع رونق ,, موب مصدق ان خويي مطلق صار له كل هذا !!
توفى ولد عمه و خوي عمره بين ايديه ,, و صبر !!
و اتهموه بذبحه ,, و صبر !!
و احقروه أهله و ربعه و جماعته ,, و صبر !!
و الأغرب من هذا كله إن براءته عند عقاب ولد عمه يعني بين ايدينه و لا هوب راضي ياخذه ,, يآآآآآآه يا مطلق قسم بالله ان نسبك مكسب !!
سمعت طرق على قزاز سيارتي ,, التفت و شفت مطلق ,, فتحت الدريشه و سمعته يقول : وش عندك قاعد هنيا عسى منتب تتغزل لك ببنية ؟؟
ضحكت و رديت : هههههه ما لقيت الا أنا !!
ضحك مطلق و رد : و الله انك تسويها عقب العجم اللي أنت جاي منهم ..
انفجرت أضحك عليه ثم رديت : خل عنك بس و اسمع العلم ..
تحولت نظرة مطلق للجديه وهو يقول : هات ما عندك ..
رديت بجديه و فيه موال يدور براسي : أنتم بتروحون باتسر لديرتكم و أنا الله يسلمن أبجيكم عقب باتسر ..
ابتسم مطلق و رد بفرحه : حياك الله بديرتنا و الله ان العين اوسع لك من المكان و الله ان ............
و كمل مطلق معلقة الترحيب من فرحته بي بينما أنا راح فكري مع دكتور الأعصاب " خالد العادل " و مريضه الجديد " عقاااب " .
ــــــ نهاية الجزء السادس و العشرين ..
ما قدرت أجمع كل االأحداث بهالجزء و أنهي الروايه لأني بكون اختصرت و ظلمت الروايه ,, كل اللي بقوله ان الجزء السابع و العشرين بيكون هو الأخير ,, لا تستعجلون علي طلبتكم !!
14-10-10, 10:54 AM
جديد مواضيع قسم القصص المكتمله من وحي قلم الاعضاء
العرض العادي
