المصافحه الثامنة عشره
بعد فتره مما سبق
يعني اقترب زواج سعود
واقترب سفر فيصل
حال الاغلبيه بما كان عليهم لم يتغير
التغير قد يكون طفيف او شبه معدوم
واليكم بالتفصيل ماتغير
ومابقى على ماهو عليه
والاهم مايسير باتجاهه التغير
فالاهم دائما التغير سواء كان للافضل وهذا مانتمنى
او سواء كان للاسوء وهذا مالا نتمنى
بيت سلطان بن سعود
العمه شيخه كانت بالصاله الرئيسه ,, تنتظر سعود اللي كان بيروح معاها عشان يرجع نفله ,, والعجوز كانت على اعصابها ,, كانت خايفه من تأجيل اخرى من سعود او من نفله ,, فهم طوال الاسبوع اللي فات بتأجيلات مستمره ,, وهذا ابدا ماهو مطلب ام سعود ,,
سعود : يمه ,,
ام سعود تفز : بسم الله ,, وش فيك روعتني ؟؟,,
سعود يدنق عليها ويحب خشمها : اسمح لي جعلني الاول ,, الظاهر اني باغتس ,,
ام سعود بحزم : يلاا ماخلصت ,,
سعود : الا فديتس خلصت ,,
ام سعود بحزم : اسمع اللي تبيه بنت سالم مجاب ,, ولو ماعندك تراها من عندي ,,
سعود : اسمح لي ياامي ام سلطان قدرها عالي واذا طلبت المستطاع تبشر به ,, بس شي مالي به قدره ,, اسمحي لي
ام سعود : انتهينا ,, جاك الحكي ,,
سعود يبتسم : تبشرين ,, يلاا مشينا نفداس ,,
ام سعود : توكلنا على الله ,,
***
اللهم ارزقني حبك وحب من يحبك وحب عمل يقربني الى حبك
***
بيت فهاد بن سعد
مجلس النساء الخارجي
ام سعد ولولوه كانوا باستقبال الضيوف ,, والضيوف كانوا اهل محمد بن منصور ,, فمن عاداة البدو اذا كان الزواج بين ماليس لهم علاقه ببعض ,, انت تكون خطبة الرجال هي الواجبه ,, والنساء تكون زيارته بعد اعطاء الموافقه وقبل الملكه لسماع فن او شروط ام العروس ,, بس الاستعجال باللملكه اخر الزياره لبعد المللكه ,,
الضيوف كانوا عمة محمد وثنتين من خالاته واربع من اخواته الكبار تتقدمهم حصه ام راكان ,,
لولوه : والله إن ذي الساعه المباركه اللي شرفتونا به ,,
حصه : ساعتس ابرك فديتس ,,
خالة محمد الكبيره اللي كانت قاعده جنب لولوه : الا انتي معرسه ياامس ,,
لولوه بهدوء : اي معرسه ,,
الخاله : ماشاء الله ماانتي ماخذه ,,
لولوه : ماخذتن ولد عمي جعلني افداس ,,
الخاله : اي اي ,, الا المها مابغوها عيال عمها ,,
لولوه : الا فديتس بغاها ولد عمي سالم بس مابه نصيب ,,
الخاله : وانتن بس ثنتين ,,
لولوه بهدوء وابتسامه : لا افداس به وحده اصغر مني ومن المها ,,
الخاله : ايي ,, ومن امها ذي بعد ؟؟,,
لولوه وابتسامتها مافارقتها : امها امي جعلني قبلس ,,
الخاله : وانتي من امس ؟؟,,
لولوه : امي منيره بنت حمد ,,
الخاله : بنت حمد ال علي ؟؟!!,,
لولوه : اي فديتس ,,
الخاله بابتسامه : والنعم نسوتن طيبه ,,
لولوه : طاب حالس وفالس فديتس ,,
الخاله : الا اخوكن الكبير ,, ذا اللي مابعد اعرس ,, من امه ؟؟,,
لولوه بخاطرها لا اله الا الله : امه رفعه بنت سعود ,,
الخاله : رفعه بنت الشايب سعود ال علي ,,
لولوه والاحتمال مازال مستمر : اي فديتس ,,
الخاله : يامال الجنه ,, الا صحيح إن ولد سلطان اللي ماخذن بنت سالم اعرس عليها ؟؟,,
حصه : خاله ماشاء الله عليس استرسلتي بالحكي ,,
الخاله بتهويل : وشني قايله ,, العرب كلهم يحكون ,,
حصه : ماعلينا جعلني قبلس ,, الا ياام سعد وش تامرون عليه ,,
ام سعد وهي قاعده بوسط المجلس وتخايل العرب من طرف عينها : شروط واجد يا ال منصور ,,
العمه : وحنا قابلين ياام سعد ,,
ام سعد : شغلها وسواقتها اول شروطنا ,,
العمه : وحنا قابلين ,,
ام سعد : وبنتي ياال منصور ماتفرق عن بنات عمها واختها ,,
العمه : وش مطلبس ,,
ام سعد بنفس خايسه : حنا بينا يال علي سبعه الاف وشبكه وساعه الماس ,,
حصه : مابه خلاف ياام سعد ,, واللي تبونه حنا حاظرين ,,
ام سعد : وعندي شرطن ضروري ضروري ,,
حصه : امري ,,
ام سعد : بنتي لها شقتن متحده ,, لا تحول على احد ,, ولااحدن يصعد عليها ,,
انصدموا اهل محمد بن منصور بشرط العجوز كامله ,, فشلون الاخ الوحيد لخواته يفصل شقته ع بيتهم ,, ولا حتى يطلع عنهم ,, كان مايعرفون هل هو شرط ,, او محاولة تطفيش ,,
***
اللهم صلي وسلم و بارك على سيدنا محمد و على آله و صحبه أجمعين ومن تبعه بإحسان إلى يوم الدين
***
بيت سالم بن سعد
غرفة ساره
ساره " تستغربون الهدوء اكيد ,, ولكن اعترف للاسف استسلمت ,, قولي جبانه راضيه ,, بس لو تشوفون ابوي يوم دخل على غرفتي ,, وانا مغطيه نفسيه بالحاف ,, ابوي دنق على وشال الغطى عن وجهي وضحك بفرح ,, مالاحظ انتفاخ وجهي من البكي ,, ابدا مالاحظ ,, تعرفون ليش ؟؟,, لان عيونه كانت غرقه من الدموع ,, ابوي نظر عيني كان فرحان لدرجة انه كان يبكي من الفرح ,, ياناس ابوي فرحان ,, يكفيني ذا ,, مولازم إنا افرح ,, مولازم إنا استانس ,, ابو محمد مستانس ,, ساره مالكه الدنيا ومافيها ,, ابوي فرح وبارك لي وكان يقول تمنته لس يابوس ,, والله اني تمنيته لس ,, وقتها حتى شهقتي وقفت بحلقي ,, وفرحت مو لاني خذيت مشاري ,, لا فرحت لان ابوي فرحان ,, تكفيني فرحتك يانظر عيني ,, ووعد لك مني ,, وعد من دلوعتك ,, اني بعيش مع مشاري لو وش ماصار ,, بس تبقى فرحتك بعيونك ,, يبه احبك "
***
سبحان الله ,, الحمد الله ,, الله اكبر ,, لا اله الا الله
***
نفس البيت
ولكن بمكان اخر
غرفة نفله
نفله " كنت امشط شعر شيهانه بهدوء ,, سعود بيجي بعد شوي ,, وانا حييل متوتره ,, ماابي اعاند لان سعود اعرفه ما يتعاند ,, ولا ابي استسلم بسهوله ,, متردده وخايفه ,, مو خايفه من سعود ,, لا ابدا ,, خايفه اقرر قرار اندم عليه ,, وخايفه اخطو خطوه تكون غير مدروسه ,, شفت بنتي بين ايدي ,, وشفت اختها جنبها ,, فكرت فيهم ,, وفكرت بنفسي ,, وفكرت بسعود ,, إنا احبه ,, مو بس احبه اعشقه ,, فليه اتخلى عنه بسهوله ,, بصراحه اكوون فاشله ,, واكون تخلي عن املاكي بسهوله ,, بحارب عشان نفسي ,, وعشان حبي ,, وعشان شيهانه و ريانه و سلطان وسالم ,, عشان عيالي ,, والاكيد عشانك ياسعود "
شيهانه اطلع امها مما تفكر فيه : ماما صحيح بابا بيجي ؟؟,,
نفله وهي ترد على نفس السؤال للمره العاشره يمكن : اي حبيبتي بجي ,,
شيهانه بفرح : يعني بنرد بيتنا ؟؟,,
نفله تبتسم بخبث : إن شاء الله ياقلبي ,,
شيهانه تركض بفرح لسماعها صوت ابوها سعود يتردد بالصاله السفليه ,, وتلحقها الصغيره ريانه بخطوات ركض غير متزنه ,, وتسمع نفله صوت ولدها سلطان ينادي خواته بفرح ,, تردد امر واحد في بالها بذا الوقت
نفله " اي غبيه كنت بتسرعي ؟؟!!"
***
اللهم اني اسئلك من خير ماسئلك به نبيك محمد ,, واعوذ بك مما استعاذك به نبيك محمد
***
بيت محمد بن منصور
محمد دخل للبيت بعد اتصال اخته الكبيره تطلبه بسرعه ,, استعجب استعجالها له بالحضور ,, مع معرفته السابقه انه خواته دائما طلبهم انه يجيهم على راحته ,, كله خوفهم لا يسرع بالسواقه ,, دخل للصاله ولقى الكل مجتمع ,, نفس اللي اجتمعوا قبل لا يروح وكان مقصدهم لبيت زوجته عشان يشوفون وش فن العرب ,, استعجب انه الاجتماع مازال وماانفض لحد الان ,,
محمد : السلام عليكم ,,"شافت اخته الصغيره تخش ادموعها عنه فز بخوف صوبه" ريوم فديتس وش فيس ؟؟,, يعورس شي ؟؟,, احد ضايقس ؟؟,, ردي احاكيس إنا ؟؟,,
ريم اكتفت انها اسحبت نفسها من بين ايده ,, وركضت على الدرج هرب منه ,, وهو وقف بخوف بيلحقها ,, بس مسكت ايده عمته ومنعته ,, وهو فهم إن الرد على اللي في ريم عندهم اكيد ,,
محمد بخوف : وش صاير ياعمه ؟؟,,
العمه بهدوء : ماصار الا الخير فديتك ,, بس انت تعرف ريم فديتها دمعتها قريبه ,, وتبكي على كل حاجه ,,
الخاله الكبيره بهجوم : ماعليك من عمتك ,, ريم فيها وفيها ,,
محمد بخوف اكبر : وش فيها ؟؟,,
الخاله : فيها إن رحنا لاهل مرتك وفنت امها فنن ماعجبها ,, وهاذاهي تبكي ,,
محمد باهتمام : وش فنت ؟؟,,
الخاله بتشفي : فنت بيتناً لحالها ,,
محمد بعصبيه يتعزوى : والله ماتشوفه ,, ليه هم دروا يوم جيتهم خاطب إن مالي الا ذا الخوات ,, وهم مالهم غيري ,, هااا ,, على بالطلاق بالثلاث الحارم اذا ماقبلت بالسكنه مع خواتي ,, انه طالق ,,
حصه : تعوذ من الشيطان يااخوك ,, محلوله إن شاء الله ,,
الخاله بهجوم : وكيف محلوله ؟؟,,
حصه بغضب : لو سمحتي ياخاله خليس ساعيه خير ,,
الخاله : وش قصدس إنا ساعيه بالشر ؟؟!,,
العمه بغضب وبصوت عالي : بس انتن شبيتن بالرجال ,, ام سعيد ياهدي الامور ولا توكلي لبيتس ,,
الخاله بصدمه : تطرديني ؟؟,, تطرديني من بيت اختي ياعفرا ؟؟,,
العمه : إنا ماطردتس ,, واذا قعدتي حياس ,, واذا بنتس مسرى الله يستر عليس ,,
الخاله توقف بغضب : كل ذا وانت تسمع يامحمد عاجبك بعد ,, بس يحرم علي دخلت ذا البيت وعفرا ماجوده ,, "تلف على اختها الصغيره" يلاا يااختس انطرنا وش عااده مقعدس ,,
الخاله سحبت اختها وطلعت ,, ومحمد يشوفها ومتعود على هذا المنظر ,, زعل خالته دائما معروف ,, وبعد معروفه بعدم حشمتها لاحد ,, يعني لو فكر محمد يلحقها ويترضاها بيكون مصيره سب وفضيحه بالشارع ,,
محمد بضيقه : وذا الحين ذي وش طرا عليها البيت ؟؟,,
العمه : شوف ياامك ام سعد الله يصلحها شكلها والله اعلم انها ماتبيك ,,
محمد باستغراب : ماتبيني ؟؟!!,, اجل وش هو له يقربوني دام مالهم خاطر ,,
العمه : فديتك إنا قلت ام سعد ,, ولا اخت المها الكبيره ماغير ترحب وتسهل ,, حتى يوم سمعت مطلب عمتها تضايقت وبين عليها ,,
محمد بضيق : وانتوا وش رديتوا عليهم ؟؟,,
نجلا اخت محمد الكبيره : ردينا يصير خير فديتك ,, ويااخوي حنا ندري إن خاطرك بالبنت فإذا اصروا على طلبهم ...
محمد يقاطعها : بس ياام منصور لا تكملين حكييس ,, اللي مايبي خواتي مالي حاجه به ,,
نجلا بهدوء : انت ماقصرت فديتك زوجتنا كلنا ومعاد عندك الا ريم ,, وسلطانه ومشاعل و نجود خلاص قريب يروح لبيوت رياجيلهم ,,
محمد بغضب خفيف ولكن باحترام : يعني المطلوب فديتس اخلي خواتي والحق المرا ,,
نجلا بتعقل : لا مو كذا ,,
محمد : اجل ؟؟,,
نجلا : تقسم البيت قسم اخوان ,, صوب لك ومرتك ,, وصوب لخواتك لين يعرسن ,,
محمد وقف بعصبيه : خلاص ,, انتهى الامر ,, وانا مايفرقني عن خواتي الا الموت ,, يلا بطلع تامرون على شي ,,
حصه ودموعها تملاا عينها : سلامتك فديتك ,, لا تسرع ,,
محمد : إن شاء الله ,, فمان الله ,,
ردود الجميع باصوات متفاوته : بحفظ الرحمن ,, استوعتك الله الذي لا تضيع ودائعه ,,
حصه " بحفظ الرحمن ,, استودعتك الله الذي لا تضيع ودائعه ,, دائما كنا نخاف من فقدان محمد ,, وندعو ربي يحفظه لنا ,, وندعو بزواجه عاجلا غير اجلا ,, بس عذره الدائم كان خواتي الصغار ,, وكان مقرر مايتزوج الا بعد زواجهم كلهم ,, بس انشراح خاطره لمدح المها عنده ,, خلاه يغير رايه ويوافق ,, احس قلبي يحترق ,, يحترق على عضيدي ,, مااحد شاف فرحته بموافقت المها عليه الا إنا ,, ومااحد شاف ابتسامته وفرحته لمى شاف صورتها ,, الا إنا ,, كلمته انها فعلا ماهو يتمنى تذبحني الحين ,, تذبحني ,, اغتيال فرحتك يالغالي تذبحني ,, يمكن خيره ,, الله وحده العالم ,, قد الله وماشاء فعل "
***
اللَّهُمَّ إِنِي أَسْأَلُكَ الهُدَى ، وَالتُّقَى ، وَالعفَافَ ، والغنَى
***
بيت سالم بن سعد
الهدوء كان مسيطر على المكان ,, اختارات العمه شيخه الخروج لاعطاء الاثنين مجال للعتاب والزعل بدون وجودها ,,
ام سعود تقف للخروج: انا ترى حالكم ماهو بمرضيني ,, سعود شف وش بخاطر مرتك ,, نفله شوفي وش بخاطر رجلس ,, وتعوذوا من ابليس ,,
سعود راقب امه لحد مااطلعت تكلم بهدوء : عاجبس حالنا كذا ؟؟,,
نفله بهدوء اكبر : حالنا انت صنعته بيدك ,,
سعود يغير مكان ويجلس جنبها : وانت يالغاليه ماعطيتني مجال ادافع عن نفسي ,, واسمح خاطرس ,,
نفله تلف عليه وتشوف قرب وجهه منها : وشلون بتسمح خاطري يعني ؟؟,,
سعود يقرب منها ويحب راسها وخشمها : باللي يرضيس فديتس ,,
نفله تحاول تبعد عنه ولكن يلف ايده عليها بقوه ,, ويقربها اكثر منه ,,
سعود بهمس : وينس رايحه ؟؟,,
نفله بهمس : سعود بعد عني لا يدخل علينا احد وانت كذا ماسكني ,,
سعود يبتسم ويرد بهمس : والله كيفي مرتي ,, وذبحني الشوق لها ,,
نفله تبتسم : على كذا ليه تزعلها ؟؟,,
سعود يقرب وتلصق جبهته بجبهتها : حمار ,, غبي ,, كل شي ,, بس والله مهو بايدي ..
نفله بعتب : ليه سويت كذا ؟؟,,
سعود : والله احرجوني بمجلس الرياجيل ,, وعبدالعزيز انتي تعرفين جمايله علي ,,
نفله تبعد عنه وبزعل : وتكافئه تاخذ اخته ,,
سعود بنبرة رجوليه : والله إن البنت اكسرت ظهري ,, يتيمه وضعيفه قلت خل اخذها صدقه ,,
نفله بهجوم : وليه صدقه انت بيت الزكاه وانا ماادري ؟؟,,
سعود يبتسم : افاا لعيونس اصير بيت الزكاه بس تردين بيتس وتنورينه ,,
نفله بهدوء : شوف ياابوسلطان إنا اقدر اسوي مثل غيري وماارد الا بطلاق المره ,, بس بتعوذ من بليس واقول ماعليه مكتوب ,,
سعود : وش طلبس ؟؟,,
نفله : بيتي ,,
سعود بسرعه : لس ,, بس كذا ,,
نفله : لا عاادنا ,,
سعود يمسك ايدها ويقربها لخده : امري يالغلا ,,
نفله : مرتك وين بتسكنها ؟؟,,
سعود : بصراحه إنا احتريت منس ,, وكنت ناوي اسكنها في بيتنا بس من قهرني منس ,,
نفله تسحب ايدها منه : ادري تحسبني مادريت ,,
سعود يضحك ويتمسك فيها اكثر : داري فيكن ياالنسوان كل علمن يوصلكن ,, ياحبكن للحكي ونقله ,,
نفله بدلع : كل النسوان ,, حتى إنا ,,
سعود : لا انتي شيختهن كلهن ,, تدللي بعد يالغلاا
نفله : مرتك تسكنها معي في بيتي ,,
سعود بتعجب : وليه ؟؟!!,, ظنيتس تبين بعدها ,,
نفله بدهاء : صح ابي بعدها بس بعد ابي قربك ,, وماابيك تبعد عني وعن عيالك ,, يعني فض شقه من الشقق اللي فوق وسكنها فيها ,,
سعود يقبل خشمها بحب : إنا باللي تبين لو مايريحني ,,
نفله بدلع : لا تخاف حبيبي بيريح إن شاء الله !!,,
سعود كان يتسمع لطلبات نفله بانصات وحب ,, ونفله تتكلم كمن يطعن قلبها بخنجر ,, فالتمثيل ولباسها لقناع الرضى ,, اتعبها كثيرا !!,,
***
اللَّهُمَّ اغْفِرْ لي ، وَارْحَمْني ، وَعَافِني ، وَارْزُقني ، فَإِنَّ هَؤُلاءِ تَجْمَعُ لَكَ دُنْيَاكَ وَآخِرَتَكَ
***
سيارة محمد بن منصور
محمد " توني مسكر الخط من حمد بن فهاد ,, دقيت على فيصل مارد ,, وارتحت انه مارد ,, حمد افضل مرن اكثر من فيصل وبيساعدني باللي ابي ,, صدمتي من طلب المها لانفصالي عن خواتي خلتني اتصرف بطبع غير طبعي ,, دقيت على حمد واستئذنت اكلم المها بموضوع ضروري ,, وقالي بصراحه انه المها مستحيل تطلع لي ,, لان ذا ماهو من سلمهم ,, بس انا طلبت بس اكلمها بتلفون ,, وعدني حمد خير ,, وقالي شوي وادق عليك واخليك تكلمها ,, وفعلا الحين اشوف اسمه يتصل بي ,, الصراحه ترددت ,, بس توكلت على الله ورديت "
محمد : ارحب يابو فهاد ,,
محمد تعجب الصمت ,, بس صدمه الصوت الناعم اللي اسمعه ,, وانبهر به لثواني ,,
المها بهدوء وهمس : السلام عليكم ,,
محمد بابتسامه : وعليكم السلام والرحمه ,, ياهلا بمها ,,
المها كحت بخجل : احم طلبتني بموضوع ,, "بارتباك" حمد قالي كذا ,,
محمد بضيق ظهر على صوته : اول شي وشلونس ؟؟,,
المها بصوت لايكاد يظهر : طيبه طاب حالك ,,
محمد بابتسامه تظهر على صوته : دووم ياارب ,,
المها صمتت بانتظار حديث محمد ,, ومحمد صمت لعدم رغبته بجرحها ,, تحسف انه طلب يكلمها ,, مو عارف شلون يبدى الموضوع ,, خايف صاحبت هذا الصوت الهادئ الراكز ماتكون من نصيبه ,,
المها اقطعت الصمت : لو سمحت انا عارفه انت ليه طالبني ؟؟,,
محمد يتنهد : ليه ,, قولي انتي ,, ماادري ليه احس صعب احكيي ,,
المها بهدوء راكز : الله لا يبارك باللي تقطع الرجال عن اهله ,, اختي قالتلي اللي صار اليوم ,, وثق ان خواتك خواتي ,,
محمد يبتسم بفرح : يعني ماعندس مانع تسكنين مع خواتي ؟؟,,
المها : ان شاء الله ,, انتهى موضوعنا اسمح لي اسكر ,,
محمد بمراهقه غريبه عليه : لازم تسكرين ,, ودي اسولف معس شوي ,,
المها بخوف واضح : اسفه مضطره اسكر ,, مع السلامه ,,
محمد ابتسم بعد ماسمع سلامها ووراها صوت تسكيرة الخط ,, ارتاح لها ,, ولقراره ,, ولحيااته معاها مستقبلاً ,, وارتاح لكون المها صارت ,, مهاها ,,
***
اللهم يامصرف القلوب صرف قلوبنا على طاعتك
***
بريطانيا
منيره " قعدت من نومي وشفت دلال نايمه جنبي ,, ياحبي لها ,, الله يخلي لها مشعل ,, ياحرام كان محرج بطلبه من عبدالله انها تقعد عندنا بفترة الاسبوع اللي بيكون فيها بالكويت عشان اوراقه للبعثه ,, ودلال ماعطوها دكاترتها اذن ,, فاحتار وين يخليها ,, بس زين رضى يخليها عندنا ,, وعبدالله فديته صار ينام بشقة رفيقه القطري اللي قدامنا ,, بالمره ترتاح دلال عندي ,, ويكون قريب منا يحرسنا ,, اوووه ,, شلوون نسيت ,, قمت من النوم بسبب حلم حلووو ,, حلوووو وااجد ,, قمت بهدوء من جنب دلول ,, وفتحت لاب توبي ,, بديت ادون اللي شفته بمذكراتي ,, ادون كل شي حلوو عشان ماانساه ,, لان الحزن يبقى بالقلب والذاكره ماتنسى ,, اما المواقف الحلوه والمفرحه لا تنسي بسرعه ,, كتبت حلمي الحلو والاحلى اللي معاي فيها ,, وسكرت لابي وشفت نفسي بالمنظره ,, ياحلاتي اهبل ,, مزيونه امووووواه ,, ادري اني مزيونه ,, وزيني اسم الله علي داخلي وخارجي ,, بس وين اللي يشوف !!؟؟,,"
***
اللهم اهدني وسددني
***
وزارة الاشغال
خالد يدخل للوزاره مبتعث من دوامه لمتابعة احد المشاريع ,, توجهه للاداره المسئوله ,, ولكن شاف احد من زمان يتمنى شوفته ,, قلبه يحسه من الفرحه دقاته يسمعها الهندي باخر الممر ,, شافه واقفه قدام مكتبها ومعاها اوراق تتناقش فيها مع وحده ,, قرب بهدوء لحد ماوقف قدامها ,, وهي مازالت مستمره بشرح الورقه ,, اللي جنبها انتبهت له شلون واقف وابتسامته على وجهه ونظره مركز عليها ,, تعجبت اللي جنبها منه ,, فدزتها تنبها ,,
سلمي بضجر وعينها مازالت على اوراقها : يووو شفيج حنون ؟؟,,
حنان بهمس : سلموو شوفي هل واقف يخزج ,,
سلمي رفعت راسها بتعجب ,, ولكن التعجب الظاهر على وجها ابتعد حلت مكانه ابتسامه فرح ,, كان في بالها انها من كثر من تفكر فيه شافته قدامها ,, لكن صحت من حلمها ,, ولقته حقيقه على همسه لها وبنبرته ولهجته المحببه لقلبها ,,
خالد بهمس : شلونس ؟؟,,
سلمي كان ردها بنفس الهمس ونفس ردها دايم عليه : انا حالي من حال غلاي !!,,
خالد بنفس الهمس وبابتسامه تتسع لانها مانست رد عليها بردهم الدائم : غلاس بخير بس يبيس انتي بالف خير ,,
سلمي ميلت راسها بهدوء هامس : شلونك خالد ؟؟,,
خالد بنفس الهمس : انا حالي من حال غلاي !!,,
سلمى بضحكه ضهرت على صوتها : غلاك بخير بس تبيك انت بالف خير ,,
خالد : بنطول واقفين عند باب مكتبس ,, "ياشر على حنان" وخويتس ذي ماغير تخايل فينا ؟؟,,
سلمى تضحك بهدوء : تفضل خالد حياك ,,
دخل خالد وراها بهدوء ,, وعينه مافارقتها ,, مافارقت غلاه ,, اشتاق لها واجد ,, اشتاق لكلامها ,, اشتاق لعيونها ,, واكثر اشتاق لحبها ,, لكن تذكر غلاه مازالت على ذمة رجال ,, مادام ماخلصت عدتها يعني على ذمته ,, فاختار اختصار سلامه والخروج ,, بس هل المره الخروج بنية العوده ,, لقلب غلاه ,, اللي واثق انه مازال فيه ,, بس الاهم العوده لحياة غلاه ,,
***
اللهم اني اعوذ بك من شر ماعملت ومن شر مالم اعمل
***
15-01-10, 03:22 AM
جديد مواضيع قسم الارشيف
العرض العادي
