المصافحه السابعة عشره
ديوانية فهاد بن سعد
الساعه 8 مساء
ام فيصل : والله يا إن ابو منصور ينشرى بالذهب ,,
الشايب عم محمد بن منصور : دامه كذا يابوفيصل الشيخ ماجود والعرب مجتمعين ,, تملك لولدك محمد ,, "باستعجال" هاا وش رايك ؟؟,,
ام فيصل بتردد : وينا بنلقى املك بذا الليل ؟؟,,
الشايب يطق الصدر : ابدا اتركها ذي على ,, "ينادي ولده" يااولد قم قم رح وجم الملك الـ..... وتعالي ,,
الولد : ابشر يبه ,,
فيصل يهمس لحمد جنبه : ذولا وش فيهم مطافيق ,, فضحونا بالشيوخ والاجناب ,,
حمد بهمس مماثل : انت تقول ,,
مشاري بصوره مفاجأه للجميع : ياعم ,,
ابو محمد : عونك يابوك ؟؟!!,,
مشاري يتكلم بوسط استعجاب اخوانه : طلبتك بوجيه الماجودين جميع ,,
ابو محمد بنخوه : عطيتك يابوك ,,
فيصل بحزم : خلاص يامشاري عمي عطاك ,, كمل حكيك بعدين ,,
مشاري وماكانه يسمع بتأكيد : ياعم طلبتك بوجيه الشيخ والرياجيل جميع ,,
ابو محمد بنخوه اكبر : عطيتك وقدر الجميع عندي عالي ,, وش طلبك وانا معطيك ؟؟,,
مشاري بخبث : طلبتك نسبك ,,
ابو محمد بفرحه : وهو لك يابوك ,,
الشيخ يضحك : يالله يابوفيصل مادام إنا موجود والمملك موجود ,, تراني الشاهد الاول على عقد ضابطنا ,,
ابو فيصل بفرحه : والله إن ذي الساعه المباركه ,,
محمد بهدوء : بس مشاري ماحدد اي وحده من خواتي يبي ,, وبعد بطاقة البنت مهي بماجوده ,,
مشاري بهدوء : بنات عمي كلهن ماينعافن بس إنا خاطري بالصغيره ,,"لف على عمه" اذا ماعند عمي مانع طبعا ؟؟,,
ابو محمد بفرح : ابدا ذا افرح ماجاني ,,"لف لولده" قم يابوك رح البيت وجب بطاقة اختك ,,
ابو محمد هني نسى قول اشرف الخلق عليه افضل الصلاه والسلام (لا يلدغ المؤمن من الجحر مرتين )
***
استغفر الله العظيم واتوب اليه
***
بيت سالم بن سعد
كان البيت منقلب لبركان على وشك الانفجار ,, ساره قاعده بوسط الصاله وتبكي وتندب حظها ,, وام محمد ماسكها مسباحها وتسبح بهدوء ,, شيخه ضاعت بينهم ,, امها اللي ساكته بصوره تكاد تكون مريبه ,, وساره اللي هسترة من قال لهم محمد اللي جاهم خذا البطاقه وطلع ,,
ساره وهي تبكي : ليه كذا ,, حرام عليهم مالقوا الا ذا العله يحطونه بكبدي ,,
شيخه بتبسيط للامر : خلاص ياساره تعوذي من ابليس ,, ومشاري سنافي ومابه مثله ,,
ساره : اش اسكتي ,,"بصراخ اكبر" اسكتي اللي مثلس يسكر حلقه ومايتحاكا ,,
شيخه بمراعاه لحالة اختها : ماعليه ,, ماعليه ,, انتي بس تعوذي من الشيطان ,,
ساره بهجوم : الشيطان بكبره ماجود في بيت الفهاد ,,
شيخه تهزه راسها بضيق : لا اله الا الله ,, اعوذ بالله من الشيطان الرجيم ,, إنا لله وانا اليه راجعون اللهم اجرنا في مصيبتنا واخلفنا خيرنا منها ,, لاحول ولا قوة الا بالله ,,
ساره ببكي اكبر : إنا مالي شغل ابوي مايتوب ,, وما يتعض ,, ماتاب منس ياشيخه واللي سواه بس حمد ,, يحذفني لنفس المكان المخنز ,,
شيخه بهدوء : وليه تقولين كذا ,, إنا عشت بذا البيت ,, ومشاري من احسن من فيه ,, وانتي بنفسس تشوفين محد يجي وياخذ عزوز كثره هو ,, "بألم" وحمد هذا نصيب بيني وبينه ماقصر بحقي وحشمني وعزني ,,
ساره بهجوم : احشمس هاا !!,, مااحد خابرس كثري ياشيخه ,, وخابره بكييس ليلس كله عليه ,,
الجرح لمى يكون من الغريب يدمي ,, وش لمى الاخت تواسي اختها ,, وتقابلها اختها بالتجريح ,, وقتها مايكون تجريح بس ,, تكون سكين من حبيب وغالي يطعن بدون رحمة ولا شفقه ,,
***
لا حول ولا قوه الا بالله
***
بيت سلطان بن سعود
فرحت العجوز شيخه كانت كبيره ,, لانها اكثر من كان يعرف بالعلاقات المتوتره الغير ظاهر لناس بين بيت اخوانها الاثنين ,, من اتصال سالم الفرح برجوع القرب مع اخوه فهاد ,, ونقل الخبر المفرح جدا بالنسبه لها هي واخوانها ,, وهي ماسكه التلفون وتبشر الناس بالخطبه والملكه المفاجئه لمشاري وساره ,,
ام سعود تكلم بالتلفون : الله يبارك بعمرس ,, جعلنا مانذوق حزنس ,, اي نفداس توهم مالكين ,, بشرني سالم جعلني قبله ,, والله ماعندي علم ,, ماعليه نفداس ماعليه معوضين إن شاء الله ,, يلاا فديتس ماتشوفين شر ,, فمان الله ,,
دخلت نوف عند والدتها من ثواني وشافت هيا مرة راشد قاعده مستمعه لامها ,, تعجبت للمباركات وللفرحه بصوت امها ,,
نوف : هيا وش صاير ,,
هيا باسلوبها المعروف بعدم التدخل التام باي امر : ماادري اسئلي امس ,,
نوف بتهكم : ماادري هااا ,, والله انس كذوب وعندس العلم ,, بس نفسس مااطاوعس يطلع منس ,,
هيا تبتسم : خلاص دامس عارفه ريحي نفسس ولا تسئلين ,,
نوف وتباغت امها قبل لا ادق على احد ثاني : يمه يمه ,,
ام سعود منشغله بالنوته جنبها ادور الرقم وسفهت بنتها : هيا يامس تعالي دقي لي على ام سفر ,,
هيا تاخذ النوته وادق الرقم ,, ولكن اتباغتها نوف واتسكر السماعه ,,
ام سعود بعصبيه : انتي يالسفيه ,, وش قومس ,,
نوف بتمسكن : قومي انس سافهتني وانا احاكيس ,,
ام سعود : وش تبين ؟؟,,
نوف : اقولس وش عندس ادقين وتبشرين العرب ,, وش صاير ؟؟,,
ام سعود بتهكم : يعني ماقالت لس خويتس ؟؟,,
نوف بخوف : اي يخويه ؟؟,, وش صاير ؟؟,,
ام سعود : مشاري بن فهاد فديته خذى ساره بنت سالم ,,هيا دقي ياامس على المره ,,
نوف جحضت عيونها بصدمه ,, ووقف الكلام على طرف حلقها ,, مشاري وساره مافيا ي تناسب ابدا ,, كيف يحطون الحديد مع الحديد ,, صعبه جدا ,,
***
اللهم اغفر للمسلمين والمسلمات والمؤمنين والمؤمنات الأحياء منهم والأموات
***
بيت اخ زوجة سعود الجديده
سحر " وش ذبي بذا الدنيا ,, ليه إنا المظلومه دائما ,, إنا اللي اخترت امي ياعبدالعزيز إنا ,, امي عربية الجنسيه مسلمة الديانه صارت اكبر ذنب لي بالحياه ,, لوكانت امي كافره عاصيه هل بيكون هذا حالي ,, استغفر الله العظيم ,, صدمني اخوي ,, عضيدي ,, سندي بذا الدنيا ,, صدمني بزواجي من غير علمي ,, ومن الزوج المنقذ من هذا الضياع ,, كان صدمه لمى وصلني الخبر ,, إنا ماانكر فرحتي عند علمي بزواجي وهروبي من ذا المكان ,, ولكن علمي إنا زوجي متزوج وانا الزوجه الثانيه ,, صدمني !! ,, ولكن صدمتي الاكبر الزوجه !! ,, جارتي او ضرتي مهما كان المسمى ,, ومهما اختف ,, ولكن الشخص نفسه ,, صدمني الشخص ,, وكرهت نفسي لكوني سبب بتعاسة غيري ,, جارتي هي مدرستي اللي كنت متعلقه فيها واحبها لدرجة الجنون ,, ماانسى تقويتها لي ومساعدتها الدائمه لي ,, وانا للاسف ماقصرت كافئتها اني اخذ زوجها ,, فعلا كافئتها ,, حسبى الله على الظالم اللي حطني بذا الموقف ,, حسبى الله عليه ,, حسبى الله عليه خليتني ابني سعادتي الوهميه بدمار سعادة غيري ,,"
***
سبحان الله ,, والحمد الله ,, الله اكبر ,, لا اله الا الله
***
السعوديه
المنطقه الشرقيه
بيت راشد بن مطلق
ام حمد تشوف عيالها من زوجها الحالي نايمين ,, وهي بكل انكسار تعدل الدفا عليهم ,, وتشوفهم نايمين عدل ولا لا ,, جهزت شناطهم المدرسيه وتركتها بطرف الغرفه ,, وقعدت على فراشها تراجع يومها وماحصل فيه ,,
ام حمد " اللهم لك الحمد ,, فيصل عسى رربي يبارك له بحلاله زيارته كانت بوقتها ,, البيت كان ناقصه اشيا واجد ,, وكنت طوال ذا الوقت اتسلف عشان اوكل ذا البزران ,, ياربي هل ذا عقاب لي ,, والله اني اظنه عقاب ,, إنا اخطيت ياربي ,, والله اني اخطيت ,, غروري وشوفتي لنفسي وصلوني لذا المواصيل ,, كنت بنعمه وخير محدن يحلم فيه ,, بس حبيت نفسي حتى اكثر من عيالي ,, ولا من ينسى دلال فهاد لي ,, بس حكمت على نفسي وعلى عيالي بذا الحال ,, ياالله ياربي ياعيشتن سعيده ولا موتن شهيده ,, يالله ياربي انك تسامحني اذاني خليت حمد ولولوه ولطيفه بزران ورباهم الزمن ,, انك تستر على عيالي ذولي واني تقصيري بالكبار ومايجي بالصغار ,, يالله عفوك وغفرانك "
***
غفرانك ياارحم الراحمين
***
بيت فهاد بن سعد
صالة البيت الداخليه
كان البيت فيه بعض النساء اللي جايين للعشا ,, ولكن نقصهم العجايز وضحه وشيخه اللي كل وحده تغيبت لسبب ,, مشاري طلب لولوه والمها بالصاله الداخليه ببلغهم بخبر ملكته ,, ولكن اتبعه فيصل اللي بدى معاه ناقش قوي جدا ,,
لولوه تهدي الامر : لااله الا الله ,, هدوا هدوا ترى عندنا نسوان ,,
فيصل وكانه مايسمع اخته : ردينا يامشاري ,, ردينا لاسلوب سعد بامتلاك الامر ,, ليه ماخطبت عادي مثلك مثل غيرك ,, ولا انت خابر البنت ماتبيك مثل اخوك ,,
مشاري بعدم مبلاه : إنا بس كذا طرى علي الامر وقلت ليه اجيب لعمي جايه عشان ارفع قدره ,,
فيصل بنزره : ليه عمك ناقصه قدره عشان ترفعه ,,
مشاري : ماادري عنك ,,
فيصل : لا والله ماادري عنك انت ,, الظاهر وحنا مااندري عندنا سعد ثاني ,,
مشاري : والله لي الفخر تشبهني بسعد ,, وسعد اخوي وماهو بقاصن وجهي ,,
فيصل بخيبة امل : والله حسافه على اني كنت حاطك على يمناي ,, وحاسبك رجال وقداها ,,
مشاري : وانا يااخوك رجال وقدها ,, وبنت عمي إنا احق فيها من غيري ,, ولا انت اشرايك ,,
فيصل : ليه إنا قلت كلام غير ذا ,, بس ليه مااطق الباب وتسمع جواب الناس ,, ليه تحرج عمك وعياله ,, ليه ماتعلم من اخطاء غيرك ليه ,,
مشاري يقبل على فيصل ويحب راسه : الا زعلك يابوفهاد ,, وانا بالامر ,, تسرعت ومنك السماح ,, وعمي شفته فرح بخطبتي وتمتناني لبنته ,, وش تبي اكثر من كذا ,,
فيصل بهدوء : يااخوك كنت ابيك تاخذ خاطر عمك وعياله ,, ماابيك تعيد غلط سعد وتضغط عليهم ,, ابي العرب يشترونك مهوب انت تجبرهم ,,
مشاري بابتسامه وهدوء : وهم شاريني ,, ورح لعمي اذاهو مجبور له اني اطلق بنته ,, وكانه مجرى شي ,,
فيصل بعصبيه : عودنا ,, وذي حالة عيال فهاد ,, مانخلي بنت من بنات عمنا ماانطللقها ,, شف عاد السوري ذا المره إنا غريمها قدامكم ياعيال فهاد ,, زعلها من زعلي ,, ورضاها من رضاي ,, سمعت ,,
مشاري يضحك : على ذا الخشم ,, انت تامر جعلنا مانخلى منك ,,
فيصل بابتسامه : عليه الشحم ,, يلاا امش للرياجيل ,,
مشاري : انت رح وانا بقعد مع خواتي شوي ,,
فيصل بتحريص : لا اتاخر ,, "قرب من المها وحبها على راسها" جعله مبارك يااخوس ,, ياحظه من حط المها في بيته ,,
المها تنزل راسها : الله يبارك فيك ,,
مشاري ينادي خواته : انتن يااخوات الفلس ,, ماانت بمباركات لي ,,
لولوه تبتسم بالم : مبروك جعلني قبلك ,, مبروك ,,
مشاري : وش فيس تقولينها كنس مجبوره ,,
لولوه بحزن : لا مافيني شي ,, بس الله الله بساره تراها من احسن بناتنا ماتستاهل غير الخير ,,
مشاري وقف كل الكلام اللي كان بيقوله ,, لولوه مربيته وتعرف اللي ناوي عليه من نظرة عينه ,, والامر هذا خلاه ينسحب بهدوء ,, قبل ماتنكشف كل اوراقه ,,
***
ربي اغفر لي ولوالدي وارحمهما برحمتك ياارحم الراحمين
***
بريطانيا
شقة عبدالله بن فالح
عبدالله كان قاعد مع مشعل اللي كان مبين عليه الارتباك بقوه ,, وحتى عبدالله انصدم من طلب مشعل زيارته بشقته ,, وهم ماكانو متعودين على هذا الامر ,,
مشعل بارتباك : ادري يابوفالح انت مانت بتعود بزيارتي لك هني ,,
عبدالله بابتسامه : لا تقول كذا ,, حنا مالنا غير بعض بذا الغربه ,, وانت تعررف ,,
مشعل : تسلم يابن العم ,, وانا نفس الشي ماامن على اختي الا عندك ,, وانت تشوف مع انها طالبة ماجستير الا انها دايم مع اختك ,,
عبدالله : اي الله يوفقهن ويسترهن يارب ,,
مشعل : امين ,, اكيد ياعبدالله انت تقول وش سبب الزياره اليوم ,,
عبدالله بابتسامه : طبعا تعرف الفضول يااخوك ,, بس انت مرحب فيك دايم ومن اهل البيت ,,
مشعل : تسلم ,, بس إنا لي طلب وادري اني مستعجل فيه بس سواء هنا ولا بالكويت ماتفرق ,,
عبدالله : افااا اطلب وابشر بعزك يااخوك ,,
مشعل : عارفن مامنك قصور يابن علي ,, جعلك سالم ,,
عبدالله : عجل تفضل ,, واذا طلبك بايدي ابشر به ,,
***
استغفر الله ,, استغفر الله ,, استغفر الله
***
بيت سالم بن سعد
غرفة نوره
نوره " كانت ضامه بناتي لصدري وابكي ,, صياح ساره وبكاها وصل صوته لي ,, ودمرني وذكرني بقلت حيلتي واني مجرد عاله عليه ,, تعبت إن اختي تبكي وانا ماابكي عليها ,, لا صرت ابكي على نفسي مو على اختي ,, الله يسامحك يايبه ,, فيه ضحيه جديده ,, مااكتفيت فيني وفي شيخه ,, وفي نفله ,, زوجة صار عشان تصير بدال ماقوتها نتكلم فيها كلنا ,, تصير عباره عن حطام وعائق جديد يضاف لذا البيت ,, ساره وللاسف الضحيه الجديده بذا البيت "
***
اللهم اغفر لي ولوالدي وللمسلمين والمسلمات
***
11-01-10, 12:33 AM
جديد مواضيع قسم الارشيف
العرض العادي
