المصافحه السادسة عشره
بيت سالم بن سعد
غرفة الجلوس الداخليه
اجتماع مغلق يضم ابو محمد وام محمد ومحمد وخالد وكان النقاش محتد ويخص بنات سالم الثلاث ,, نفله ,, نوره و شيخه ,,
ام محمد بحزن : الحمدالله على كل حال ,, حظ بناتي إن شاء الله بالاخره دامهم افلسوا من ذا الدنيا الفانيه ,,
محمد بهدوء : وليه تقولين يمه انهم افلسوا ,, ربي باذنه بيرزقهم برياجيل يصونونهم ويعوضونهم ,, وام سلطان ربي بيصلح بينها وبين رجلها و ...
خالد يقاطع اخوه بعصبيه : وش وش وش ,, "وبتهديد" اسمع يامحمد نفول مالك حكي عليها سمعت ولا لا ,,
محمد يتحكم باعصابه ويرد : وليه مالي حكي ,, "وبقرف" ماهو بكافي سواتك اللي سويتها بالرجال ,,
خالد بعصبيه اكبر : يستاهل وعااده ماجاه مني شي ,,
ابو محمد بغضب : لا بعد تلاقطوا ,, "بصراخه" اللخلا معاد تحشموا ,,
محمد بهدوء : محشوم فديتك ,, بس سوات خالد غلط واكبر غلط ,,
خالد باندفاع : وانت من طلب حكمك على الامر ,,
ابو محمد بصرامه : خالد ,,
خالد لف على ابوه : لبيه فديتك ,,
ابو محمد بهدوء : وانا ابوك إنا ابيك توزن الامر بعقلك ,, لو إن محمد معرس على مرته ,, وهذا حقه بشرع ربي ,, وسوا اخو مرته نفس سواتك باخوك ,, بيرضيك ذا الامر ؟؟
خالد ركز نظره على ابوه وصمت
ابو محمد يعيد : وش ياخالد ,, ماارديت ؟؟,, يرضيك ؟؟,,
خالد بهدوء : لا يابوي مايرضيني ,,
ابو محمد بارتياح : يابوك واللي ماترضاه على نفسك وعلى اخوك وشلون ترضاه على ابن عمك ,,
خالد بتبرير : يبه واللي سواه بنفول وش تقول عنه ,,
ابو محمد بعقلانيه : وانت على بالك اللي حصل بنفله ماهو شابن بكبدي ,, اللي نار بجوفي ,, بس وانا ابوك اوزن الامور وفكر ,, إنا جاني سلطان وقالي إن سعود وهقوه الرياجيل ,,
خالد بعصبيه : وذا عذره ,, ليه هو مره ماله شور ويخلي الرياجيل يمشونه على كيفهم ,,
ابو محمد بحزم : البخ يابوك وخلي اكمل حكيي ,,
خالد يحاول ضبط اعصابه ويصمت عشان يكمل ابوه كلامه ,,
ابو محمد : إنا ماني مجمعكم اليوم عشان اتعذر لسعود ,, لا مهوب بكذا ,, بس ابيك ياخالد تمسك اعصابك ,, اذاك تبي تفلح مع الرياجيل تتعوذ من وساوس الشيطان ,, وتحشم الرياجيل اذا تبي حشمته ,, وافعال المبزه ذي بتنزل قدرك مهي برافعته ,, ولا شرايس يا وضحه ؟؟,,
ام محمد : حكيك مابه شيء ينقد عليه يابو محمد ,,
ابو محمد : خلاص كذا خلصنا من خالد ,, وامطلبي منك انك تروح لعمك سلطان واطيب خاطره ,,
خالد : تامر يابوي ,, بس سعود مالي حاجه به ,,
ابو محمد بحزم : انت تسمع الحكي وشلون ,, إنا قلت لك سلطان مهو بسعود ,,
خالد يبتسم : تبشر يابومحمد ,,
ابو محمد : وانا مجمعكم ذا الحين مهوب بعشان نفله ,, عشان نوره ,,
ام محمد بتركيز : ليه وش فيها نوره ,,
ابو محمد : جاني هادي امس ,,
محمد بهدوء غاضب : وش حاجته فينا ذا ,,
ابو محمد بنزره : احشم يامحيميد ,, بعد رح وسو بالرجال شي والحق اخوك ,, خل الرياجيل يقولون سالم ماجاب رياجيل جاب بزران ,,
محمد : محشوم يبه ,, بس وش حاجته بعد سواة ولده ؟؟,,
ابو محمد : حاجته انه ابن عمي والمكان مكانه وماني بناسي قربه عشان ولده السفيه ,,
ام محمد : صادق ياسالم ,, ومرحبا بهادي ,, له حاجه ولا كذا مسير ؟؟,,
ابو محمد : لا له حاجه ,,
ام محمد : وشهي حاجته ,, عساه شيي نقدر عليه ؟؟,,
ابو محمد : نقدر ,, طالب إن بناتهم يجونهم !!,,
نوره كانت تنتظر عند الباب للدخول لمى سمت اسم هادي ,, وللاسف عاده ماكانت في نوره استجدت بعد ماحصل ,, من سمت هادي وقفت تتسمع ورا الباب ,, ولكن من سمعت طلبهم دخلت بهجوم قد يكون غريب على نوره ,,
نوره بعصبيه وبصراخ : وش وش وش ,, يبون بناتي ,, والله مايشوفونهم ,, والله مايشوفونهم ,,
ابو محمد باستغراب من دخول نوره بهذا الهجوم : وش فيس يابوس سمي بالرحمن واقعدي ,,
نوره بصراخ : وش تبوني اقعد ,, اسمع يبه وصل العلم ذا لعمي هادي ,, قوله ينسون إن لهم بنات ,, واذا ماعتقوني من شرهم والله مايردني الا المحكمه ,,
خالد بعصبيه : اش على تبن ,, اشوف السانس طال ,, معاد باقي الا كذا اجرجرين الرياجيل بالمحاكمه ,,
نوره توقف قدام خالد بتحدي : انت على تبن ,, سمعت ,, وانا بديرة بن صباح ولايتي لنفسي ,, مهي بلك ولا لغيرك ,, ولا اتحداني سمعت ,, ولا والله مايصبح الصبح الا إنا عند المحامي ,,
خالد يثور بعصبيه ,, وشلون مايثور ونوره تتحداه ,, ولكن تدخل محمد باللحظه الاخيره ,, ووقوفه بين نوره وخالد ,, انقذ نوره ,, موقتاً !!!
محمد : تعوذ من ابليس يااخوك ,,"يلف على نوره" وانت انقلعي لغرفتس ,,
نوره توقف بتحدي : نعم ,, عيد ماسمعت ,,
محمد يمسك باعصابه : اقولس طسي الله لا يردس ,,
نوره تمشي للباب وترد تشوف بتحدي : شوفوا إنا بطلع بكيفي ,, ووصلكم جوابي ,, وجربوا بس ,, جربوا هااا ,, بس تسوون شي ماهو بخاطري ,, ترا المحكمه هاذي قريبه ,, والله مايردني الا هي ,,
طلعت نوره وذهول وضحه وسالم مازال مسيطر عليهم ,, وغضب خالد مسيطر عليه بصوره كبيره لدرجه انه يحس مثل الغمامه تغطي على عيونه ,, وانكسار كبير بقلب محمد على حال اخته وما وصلت اليه ,,
***
اللهم باعد بيننا و بين الشبهات و الشهوات
***
اليوم الخميس
عند كلية علي صباح السالم العسكريه
الساعه 4 عصرا
وقت خروج مشاري الاسبوعي من الكليه ,, مشاري من اخر خبر سمعه من اهله وهو موقف الاتصال بهم ,, ركب سياره اللي موقفها بمصافط الكليه وساقها وفكره شغاله بقراراته اللي ضبطها الايام اللي فاتت ,,
مشاري " اليومين اللي فاتوا كانوا متعبين جدا بالنسبه ,, الليل ماكنت انامه عشان اضبط اموري ,, والحمدالله ضبطت بس يبي لها شوي تدخلات وبتمشي ,, إنا اسف اني وصلت لهذا المستوى ,, فعلاا اسف على نفسي وعلى مبادئ ,, ولكن زمن للاسف اذا ماكنت ذيب ماتعيش ,, واسف جدا لاداة تأديب ال علي ,, اسف لها جدا ,, ولكن الزمن حدنا على كذا "
***
لاحول ولا قوه الا بالله العلي العظيم
***
بيت فهاد بن سعد
غرفة لطيفه
لطيفه بغرفتها ومستودعها الخاص ,, مستودع اسرارها ,, مستودع شخصيتها الجديده ,, مستودع تمردها ,, مستودع لطيفه جديده تختلف ,, صوت الاستيريو مالي الغرفه لسبب واحد فقط موعشانها طربانه لا ليستر ضحكات وهمساتها ,,
لطيفه منسدحه على سريرها وصوتها الناعم وضحكاتها تصل للطرف الثاني الهايم بها : هههههه لا حبيبي لا تقول كذا ,,
طلال : افاا ياقلبي اقول واقول ,,
لطيفه :هههههه لا مااصدق ,, وش هديتي ,,
طلال : هديتس تشوفيني ,,
لطيفه : لا لا تنسى حبيبي اللي اوله شرط اخره نوره قلتلك طلعات مافي ,,
طلال : عشان خاطري لطوف ,,
لطيفه : هههه لا تحاول ,,
طلال بنبرة زعل : افاا اهون عليس تزعليني ؟؟,,
لطيفه : افاا عليك خاطرك غالي ياقلبي بس مااقدر ,,
طلال : وليه ماتقدرين ؟؟
لطيفه "بدلع": اخاف ,,
طلال : افاا تخافين وانتي معي ؟؟,,
لطيفه : حتى لو انت معااي إنا اخاف ,,
طلال : لطيفه لا تصيرين كذا ؟؟,,
لطيفه : انزين وبعدين ,,
طلال : تكفين لطوف تعالي بيتنا واطلعس انتي و البنات وين ماتبون بس ابي اشوفس على راحتي ,,
لطيفه : يااربي طلال ترى ازعل ,, طلول غلاتي ترضى تزعلني ,, نعرف زعل لطوف موهين ابدا ,,
طلال : خلاص خلاص الا زعلس ,, نغير الموضوع ,,
لطيفه : صح ,, تدري طلول حمد اخوي رد ؟؟,,
طلال : اي ادري امس ادق علي سابي اشوفس كنت عندكم ,,
لطيفه : ياقوو قلبك تشوفني وسط بيتنا ,,
طلال : عشانس يالغلا اقط نفسي بالنار ,,
اي نار وضعت لطيفه نفسها بها ,, واي قريب يرضى على بنت خالته التائهه انت تكون ضحيته الجديده ؟؟!!..,,
***
ياودود يا كريم يا جبار السماوات والأرض يا هادي القلوب اهدي قلبي ...
***
بيت سالم بن سعد
غرفة نفله
من رجعت من دوامها اليوم وهي ملازمه غرفتها ,, الخبر صدمها ,, توقعت اي شي الا هذا الامر ,, لان سعود طلع فعلاا بايع ,, توها مسكره التلفون من عشر دقايق من منال ,, ومازالت بانتظارها ,, هي تحتاج تفكر ولكن تحتاج احد يوجهها ,, تحس إن عقلها متوقف عن التفكير ,, ولازم تنشطه ,,
فاقت من افكارها بدخول ساره عليها ترافقها منال ,, وكان هذا بطلب من نفله ,,
منال : السلام عليج ياخيه ,,
نفله تبتسم : وعليس السلام والرحمه يااختس ,, تفضلي ,,
ساره وهي مازالت عند الباب : اوامر ثانيه اخت نفله ؟؟,,
نفله : شكرا حبيبتي نخدمس بعرسس إن شاء الله ,,
ساره تنرفزت وقالت وهي تطلع : الله لا يقبل منس ,,
نفله ضحكت ولفت على منال : تصدقين منول شكلنا عقدناها ,,
منال وهي تقعد جنب نفله : ماعليها شر ,, المهم إنا اليوم جايه عشانج انتي بس ,,
نفله تبتسم : اتفضلي يالغلا ,,
منال : ابيج تغدين مره وتفكرين زين ,, سمعتي ,,
نفله تضحك : ابشري ,,
منال بجديه : نفله لو سمحتي هذا مو وقت ضحك ولا تهريج ,, "بجديه وحزم" للاسف انتي استسلمتي بسهوله واحنا صرنا مثلج ,,
نفله باستسلام : ويعني وش بايدي اسوي يااختس ؟؟,,
منال بحزم : بايدج واجد اشياء ,, عندج دهاء النساء ,, عندج انج تعرفين منزلتج عند سعود وين ,,
نفله تقاطعها : بس سعود باع باع ,, باعني ,, وباع عياله ,, "بغصه" حتى بيت عمري خذاه مني وعطاه للجديده ,,
منال بمواساه : وليه تقولين كذا ,, انتي عطيتيه فرصه يبرر ,,
نفله : ليه يبرر وش عذره ,, هااا ,, ماله عذر ,,
منال : انتي يانفله ماتبينه يبرر ماتبينه يكون ضحيه ,, تبينه يكون المتهم دائما ,,
نفله : هو متهم مايحتاج شهادتي بذا الامر ,,
منال بهدوء : نفله امنتج بالله وربي شاهد عليج ,, عمر سعود قصر بحقج ولا حق عيالج ؟؟,,
امنتج بالله ,,
نفله تصمت ولكن تاكيد السؤال من منال خلاها تجاوب بصوت ضعيف : لا !!,,
منال : ومادام لا ليش تستسلمين ,, ليش تتركين المكان لغيرج يمليه ,,
نفله بحزن : هو ابعدني ,, هو ماتمسك فيني ,, خلاني اروح بسهوله ,,
منال : ليش يانفله هو ماجاج لحد اهني ورفضتي تنزلين له ,, هو دق عليج وكنتي اتسكرين التلفون بوجهه ,, نفله بسألج شنوا كثر شي ينرفز سعود ويخليه مايقدر يفكر من العصبيه ؟؟,,
نفله بحزن : إن تسكرين التلفون بوجهه ,,
منال بتساؤل : وانتي شسويتي ؟؟,,
نفله بغصه : سكرت التلفون بوجهه ,,
منال : كم مره ؟؟,,
نفله بصراخ : وااجد وااجد يامنال ,, بس هو يستاهل يستاهل ,, إنا مااستاهل اللي سواه فيني إنا ماقصرت وهو كافئني بالجاره ,,
منال بهدوء : اول شيء ريحي نفسج لا تنسين انج حامل وتعبانه ,, ثاني شيء محد يقول انه ماغلط ,, سعود غلط ولكن الاستسلام مو من شيمج يانفله ,,
نفله ترفع نظرها لمنال : والمطلوب ؟؟,,
منال : الحرب !!,,
نفله بتساؤال : الحرب ؟؟!!,,
منال بمكر : ماتعرفيني الحرب مقابل البقاء ,, بنستخدمه ولكن باسلوب دهاء النساء !!,,
***
اللهم لا تزين لي عمل السوءاللهم ذكرني دائما بأن الدنيا زائلة فاصرف عني زينتها..
***
بريطانيا
شقة عبدالله بن فالح
دخل عبدالله للشقه ولقى منيره قاعده بالصاله تدرس ,, والتلفون على اذنها وتسجل ملاحظات ,,
عبدالله : السلام عليكم ,,
منيره بابتسامه : وعليكم السلام والرحمه ,,
عبدالله ينزل جاكيته ولابتوبه ويقعد : وشخبارس ؟؟,,
منيره : اخباري زينه ,, انت عندك مناوبه اليوم ؟؟,,
عبدالله : لا والله ماعندي ,, داومي بكره صباحي ,,
منيره : الله يعينك فديتك ,, شتبي عشا ؟؟,,
عبدالله : لا ماابي شي ,, منور ,,
منيره : لبيه فديتك ,,
عبدالله : كلمتي لولوه ؟؟,,
منيره بتساؤل : اليوم قصدك ؟؟,,
عبدالله بحرج : عن العرس قصدي ,,
منيره : اهاااا ,, عبدالله إنا قلت لك من قبل لا ادخلني بالامر ,,
عبدالله بهدوء : وليه ماادخلس ,, من لي غيرس يعني ,,
منيره بحرج : قلت لك مااقدر شوف غير لا ادخلني بالامر ,,
عبدالله يتنهد : كيفس ,, المهم ترا فيصل بيجينا الاسبوع الجاي ,,
منيره بلمت شوي بعدين ردت : وليه ؟؟,,
عبدالله باستغراب : وليه وشهو ؟؟,,
منيره : ليه يجي ؟؟,,
عبدالله باستغراب اكبر : وليه مايجي ؟؟,,
منيره تتماسك : هااا بس كذا اسئل ,,
عبدالله بتطنيش : جاي عنده دوره وبقعد ثلاث شهور ,, "قام من كرسيه " يلاا إنا بروح ارتاح تبي شي فديتس ؟؟,,
منيره بانشغال : لا فديتك ,,
منيره انشغل بالها " توقعت كل ال علي يجون عندي الا فيصل ,, وجود فيصل بحياتي اكبر مشكله ,, فعلا اكبر مشكله ,, فيصل اكبر مشكله بحياتي ,, ولازم اتخلص منها ,, لازم ,, لازم اهرب من هذا السراب ,, لانه مجرد سراب ماله وجود ,, وانا فقط من اوجده ,, ورسمه لنفسه ,, لازم القا لي طريقه ,, وبنجح باذن الله ,, وبعيش حياتي يافيصل ,, بعيشها ,, ونفس ماكنت طول السبب السنين اللي طافت مجرد سراب ,, حتى هذا السراب بشيله من حياتي ,, وبخليه ماضي بغيض اتمنى مااتذكره ,, هذا وعد يافيصل بن فهاد ,, لك وعد يافيصل ياولد عمي ,, لك وعد يافيصل ياحلم طفولتي ومراهقتي وشبابي ,, وعد ,, وعد إن انتزعك من قلبي ,, لو اطريت اني اعيش بعدها بدون قلب ,, بنزعك من قلبي وعقلي ,, وبعيش ,, وانت ستبقى مكانك سر ,, لانك ماراح تتنساني ابدا ,, بس خل الجبن والتخاذل ينفعك ,, وبنشوف "
***
الحمد لله حمداً كثيراً طيبا ًمباركاً كما ينبغي لجلال وجهه وعظيم سلطانه
***
بيت فهاد بن سعد
غرفة حمد
حمد كان يتجهز للعشا ,, ولكن الدخول المفاجأ لمشاري ,, صدم حمد وفرحهه بصوره كبيره ,,
مشاري وهو يلم اخوه ويحبه على راسه : يامرحبا يامرحبا بايو عزوز ,, والله ان البيت نور ,,
حمد وهو يضحك بفرح : مرحبابك باقي يابوفهاد ,, يامرحبا بضابطنا ,, يامرحبا بسندي ,,
مشاري بفرح : حمدالله على السلامه يااخوك توه مانورت البلاد بوجودك ,,
حمد : تسلم يااخوك ,, هاااتوك ظاهر من كليتك ؟؟,,
مشاري : أي توني جاي حتى شوفني بلبسي العسكري مابدلت ,, وشلونك يااخوك اربك بالف خير ؟؟,,
حمد : ابدا مانشكي باس ولله الحمد ,, عندك خبر انه اليوم فيه عشى ؟؟,,
مشاري : أي ادري قالي ابوي تحت ,, حمد ,,
حمد : لبيه جعلني قبلك ,,
مشاري بحذر : تراني بروح اجيب عزوز ولدك ,,"بدفاع" ترى انا كذا معوده اذا جاا عشا جبته معي ,,
حمد بابتسامة فرح : جيبه ياليت ,, كان ودي اروح لبيت عمي سالم بس استحيت وهو ومحمد جووا وسلموا علي ,, وانا اخوك انحرجت انشدهم عنه خفت ينغزوني كذا ولا كذا ,,
مشاري بنغزه : يعني داري انك مقصر ,,
حمد : لا والله حتى انت تنغز ,, ولدي وداري بتقصيري معه وان شاء الله بغير الامر ذا كله ,,
مشاري بحذر : اتمنى !!,,
قطع عليهم حديثهم صوت المها تطلب الاستئذان بالدخول ,,
حمد : ادخلي جعلني قبلس ,,
المها تدخل وتقعد جنب حمد : لا تقول كذا جعلني مااذوق حزنك ,,
مشاري يضحك : خلاص انتهي الامر جعل كل واحد منكم قبل الثاني ,,
حمد يحط ايده ورا المها ويقربها له : أي والله جعلني مااذوق حزن بنت فهاد ,, بارده كبد اخونها ,, وصاينتهم وش نبي اكثر من كذا ,,
مشاري يقاطع المها قبل ماترد : عرفنا مهووي جعلني وجعلني ,, اخلصي يااخوس بعيونس حكي ,,
المها تحط ايدها على عيونها : ليه مبين ؟؟,,
حمد : فديتس بس ماعليس منه ,, اقعدي على قلبه ,,
المها تنزل راسها بخجل : لا هو صادق ,, عندي موضوع باخذ رايكم فيه ,, وترى رايكم يااخوني يهمني وااجد ,,
حمد بهدوء وتفهم : تفضلي ,,
المها ووجها احمر من الخجل ونظرها لتحت : تعرفون ان في واحد خاطبني وابوي توه جايني يسالني عن رايي ويقول طولنا على الرجال ,, "وبصوت انخفض اكثر من المستحى" وابي رايكم ,, انا خذيت رايء فيصل فديته وباقي انتوا ,, "ترفع راسها بصعوبه" رايكم يهمني ,,
حمد بابتسامه : عندي خبر بالامر ,, ومحمد بن منصور رجال بعشر رياجيل وانا اعرف ,, "لف على مشاري" شرايك ؟؟,,
مشاري : انا مااعتمدت بس على سؤال ابوي سئلت عن الرجال بشغله وبديوانيته ,, ورحت الديوانيه اللي يقعد فيها وشفته وفعلا عجبني ,, اسلوبه ومنطقهه بالحكي ,, فعلاا انسان فاهم ومثقف ,, واهم شي مصلي وحافظ فرضه ,,
حمد بابتسامه : يعني يستاهل جوهرة ال علي ,,
مشاري بابتسامه اكبر : طبعا تستاهل جوهرة ال علي اكثر ,, بس الرجال ماعليه كلام ,,
حمد يشوف المها : عجل نقول على بركة الله ,, "المها ماردت" مهوووي اكلمس نقول مبرووك ؟؟,,
المها شالت نفسها وطلعت بسرعه من غرفة اخونها ,, وهي تسمع ضحكات اخوانها وراها ,, وفرحتها كبيره ودموعها تنزل بغزاره من الفرحه طبعا ,, مو الفرحه للعرس ,, لا فرحه باهتمام اخوانها وحبهم لها ,, من حبهم لها فيصل سئل ومشاري سئل وحتى حمد سمعته اليوم يكلم واحد ويسئل ,, فعلاا حست انها مالكه الدنيا ومافيها ,,
***
سبحان الله وبحمده ,, سبحان الله العظيم
***
مازلنا في بيت فهاد بن سعد
فيصل توه واصل من جنوب ,, صعد للدور الثاني وسمع صوت الضحك العالي الظاهر من غرفة حمد ,, وميز الاصوت ,, دخل عليهم
فيصل بهدوء : السلام عليكم
اقبلوا حمد ومشاري يسلمون على اخوهم الكبير ,, وفيصل مازال واقف على الباب بهدوء ,,
فيصل : حمدالله على السلامه ياابوعبدالعزيز
حمد : الله يسلمك يااخوك
فيصل بنغزه : هااا متى السفر الجاي إن شاء الله ؟؟,,
حمد بتحدي : قريب ,, قريب حيييل بعد ,,
فيصل بهجوم : وليه بعد وين نااوي تذلف ؟؟,,
حمد بهدوء : اول شي اختار الفاظك يافيصل ,, ماني ابزر قدامك ,, والسفر الظاهر انك نسيت إن ذا شغلي واكيد جدول الرحلات بتضبط من الاسبوع الجاي ,,
فيصل بهجوم مستمر : وولدك ؟؟!!,,
حمد : وش فيه ولدي ؟؟,,
فيصل : متى بتلقيه بال ,, تراه معادهوا ابزر مايفقه ,,
حمد : ادري ,, وبعدل الاوضاع خلال ذا اليومين ,,
فيصل بتهكم : بنشوف ,,"لف صوب مشاري" انت شخبارك ؟؟
مشاري ولاول مره : فيصل اظن اسمي مشاري مهوب انت ,, واخباري مابه جديد ,,
فيصل بتهكم اكبر : لالا تعال علمني بعد ,, "وبتاكيد" انت ماتعلمني وشلونا اتحاكا ,, واخبارك كنها وجهك والتلفون اللي خاشينه ربعك عندك ترى عندي خبر فيه ,, ولولا العشى ذا الليل تراك كنت محجوز ,, بس ملحوقه الاسبوع الجاي حجزك تجهز ,,
ومثل مادخل فيصل فجأه طلع فجأه ,, كانه كان مليان وفرغ حمولته وظهر ,,
حمد انفجر يضحك بعد ماطلع فيصل : وش فيه ذا ؟؟,,
مشاري يهز راسه باسف وهو يبتسم : الله الخيره انحجزنا الاسبوع الجاي ,,
حمد ومازال يضحك : ماعليه الحجز للرجال ,,
مشاري : قومنك ماانت مجرب ,, واشهد إن فيصل معبي منك وحط الحره فيني ,,
حمد : الظاهر ,, معليه نرضيه ابوفهاد ,,
مشاري بجديه : المهم انت وش رايك بالحكي اللي قلته لك قبل شوي ,,
حمد بابتسامه : وانت وش حارك البنت وراضيه ,, كيفها تتحمل نتائج قرارتها ,,
مشاري بنرفزه : يعني ذا اخر كلام عندك ,,
حمد : اي اخر حكي ,, وبعدين مقالك إن عمي سالم مايحب الخير لنا ,, عمي سالم من عمر مايحب الا عياله ومن حقه هذا الشيء ,, يعني ماتقدر تلومه ,,
مشاري بعصبيه : الظاهر انك مانت فاهمهم ,, شوفهم عمي سالم وعمتي شيخه ماعمرهم اعترفوا فينا الا لمى كبرنا ,, ولا تنسا الاهانات وحنا صغار ,, ولا نسيت ياحمد ؟؟,,
حمد : لا مانسيت ,, بس خلاص خلهم مالنا شغل باحد حنا ,, المهم خلاص نرجع نسولف عقب العشا ,, تكفى جيب عزوز خاطري اشوفه مبطي منه ,,
مشاري : وهذا حالكم دائما ياحمد الهروب ,, وبيبقى عمي سالم يدوس علينا وحنا نشوف ,,
حمد : انت الظاهر يامشاري برمجة الامر بمخك على ماتبي ,, كيفك الامر هذا يخصك ,,
مشاري طلع ويتحسر على انه اخوه ماافهمه ,, فشلون بيفهمونه الناس ويايدونه بعد تنفيذ خطته ,, ولا اصلاا هو مايهمه احد حتى الناس مايهمونه ,, المهم نفسه وارجاع كرامته وبس ,,
***
حسبى الله لا اله الا هو الحي القيوم واتوب اليه
***
بيت سلطان بن سعود
العمه شيخه مازالت زعلانه على سعود ,, وسعود صارله لحد الان ساعه يحاول تطييب خاطرها عليه ,,
سعود : ياامي جعلني قبلس ,, وش تبين وانا تحت امرس ,,
ام سعود تكلمت بعد صمت : انت خابر وش طلبي ,,
سعود بفرح انه امه ردت عليه : امري فديتس ,,
ام سعود : إنا ماني بقاطعت ارزاق ,, ولا كنت قلت لك طلق الجديده ,, بس منك لبالك ,, إنا ابي منك ترضي بنت خالك ,,
سعود بحزم : اسمح لي يمه هي طلعت من بيتها واللي خذاها اخوها ,, يعني يرجعها من خذاها ,, واذا ردت لبيتها تبشر برضاوتها واللي تامر فيه ام سلطان ,,
ام سعود : وذا اخر حكيك ,,
سعود يتنهد : خلاص يمه إنا باللي تبين ,,
ام سعود : يعني بتروح لنفله ترضيها ؟؟,,
سعود : اي يمه ,,"بتحريص" بس اذا مااظهرت لي ذا المره معادني برايح لها ,, وتنطق في بيت اهلها لين يخيب ثناها ,,
ام سعود : لا إن بتعود إن شاء الله ,, واسمع ياسعود ترى ملكت خالد ونوف بكره ,,
سعود بعصبيه : وش وش وش ,, عادكم على ذا السفيه الخبل ,,
ام سعود بحزم : اي عادنا ,, واسمع تراه غضبي ورضاي ذا الامر ,, خل الامور اتم وانطيب خاطرل خالك ,, سمعت ,,
سعود اختار الصمت عشان يمسك اعصابه " الظاهر عيال سالم لهم محامي في بيتنا ,, بس ماعليه ,, ماعليه ياخالد بطلع العرس ذا من عينك ,, وياام سلطان تحسبين بجيس من خاطري ,, لا والله بجيس لخاطر ذا العجوز ,, وبردس عشان بس شي واحد ,, اادبسس من اول جديد ,, لاني الظاهر تساهلت معس واجد"
***
اللهم اني اعوذ بك من النميمه والكذب وشهادة الزور
***
10-01-10, 12:51 AM
جديد مواضيع قسم الارشيف
العرض العادي
