المصافحه الرابعة عشره
نيويورك
حدث هناك بوقت سابق
الساعه 4 عصراً
حمد وطارق قاعدين ويشوفون ريماس وهي تلعب بالالعاب قدامهم ,, ومندمجه وكل شوي تأشر لهم يشوفونها ,, وحمد كان يتابع ريماس بنظراته وكل ماتضحك او تبتسم كانت الابتسامه ترتسم على شفايفه اراديئا ,,
حمد ونظره مازال على ريماس : طارق
طارق يلف على حمد ويركز نظره على ملامحه : هلا
حمد يركز نظراته على طارق : تدري ثقتي فيك كبيره ,, واعرف إن الحكي اللي قلته بيكون بيني وبينك ,, بس ,,
طارق بأصرار : بس شنو ياحمد ,, لمتى يعني ,, انا قلت لك رأئ بسالفتك ,, علاجك هني احس ماله فايده "يرفع ايده لحمد مايبه يتكلم" دقيقه اسمعني ,,
حمد وهو يرسم شبح ابتسامه : اسمعك قول ,,
طارق يرد له الابتسامه بابتسامه اكبر منها : شوف يااخوك انا وانت ناس فاهمين ودارسين صح ولا لا ؟؟
حمد : صحيح ,,
طارق : خلاص برأيك كأنسان فاهم العلاج النفسي عمره ماكان عيب بالشخص ولا نقص بقدره ,, يعني ياطويل العمر هربك ولجوئك لابعد مكان للعلاج ابدا مو حل سليم ,, يعني لله الحمد عندنا دكاتره نفسيين ممتازين واذا ماتبي بالكويت روح لجده في دكتور هناك يمدحونه ,, على الاقل بتكون قريب لاهلك ولمجتمعك ووقتها انت حتى بتحس نفسك تتحسن اسرع ,,
حمد بتردد : ماأدري بس دكتوري ممتاز وانا مختاره لان الكل يمدحه و ..
طارق يقاطعه : ابو عزوز لا تقعد تجبر نفسك على شيء يمكن يضرك انت لو صارحت اهلك كان اول شي بيقولونه لك اقعد عندنا واحنا بنساعدك ,, بس للاسف يعني اسمح لي اقولها لك ,, انت جــبــان اخترت الهروب ,,
حمد يضحك : ههههههههههههههه شكرا مقبوله منك ,,
طارق يبتسم : غصباً عنك بتقبلها ,, المهم انت فكر وراجع نفسك ,, والله يااخوك إنا ودي انك تبقى عندي بس فكر بنفسك قبل غيرك والدكتور ترى طماع كل فتره بيقول ممدد تحتاج فتره اطول وانت الحمدالله منت محتاج لدكتور بالممارسه والقوه هاذي حالتك مو متطوره وامرها بأذن الله هين ,,
حمد يتنهد : إن شاء الله يصير خير ,,
حمد صمت واحترم طارق صمته وشال نفسه وراح صوب بنته ,, حب يعطي حمد فتره ولو بسيطه يفكره فيها دام السالفه بحموتها ,,
حمد " ماأدري وش اللي سحب لساني وحكيت الموضوع لطارق رغم علاقتي العاديه جدا فيه بالكويت ,, ولكن سبحان الله خلال الفتره البسيطه ذي حسيته محل ثقه ,, وهو فعلاا يستاهلها ,, طارق معاه حق إنا مفروض ارجع ,, اصلاا حتى امي قلبي شاغلني عليها ,, وفيصل غضبان علي يعني مااقدر اقوله شوف امي جهازها مايستقبل مكالمات ,, ولولوه العلاقه بيني وبينها جدا سيئه ,, اصلاا اظن خواتي نسوا اني اخوهم ,, وخالد مهوب بعاجبني الايام ذي ,, من قالي إن سلمى بتنفصل وانا احسه معادهوا بطبيعي ,, ماادري شفيني حتى الحين بدال لا افكر بنفسي حطيت الناس كلهم قدامي ,, صبر بس ذولي مهوب بناس ذولي اهلي ,, ههه الظاهر اني تغيرت واجد وصرت افكر باهلي بزياده ,, مهي بطبيعتي ذي ,, خلاا ص فعلا إنا لازم ارد ,, الصراحه ارتاحوا من تواجد حمد فتره ,, خلى ارد واعدل المقلوب كله "
***
اللهم صلي وسلم و بارك على سيدنا محمد و على آله و صحبه أجمعين ومن تبعه بإحسان إلى يوم الدين
***
بيت سالم بن سعد
غرفة ساره
ساره سادحه نوف على السرير وتمكيجها وتسولف عليها ,, وشيخه عندهم تحضر بدفترها وتسمع سوالف ساره ,,
ساره : عاد شعلى بالس سكت لها ,, لا والله وانا بنت سالم ماسكت انهديت عليها ماردني الا السالمي (منفذ حدود للكويت على منطقة حفر الباطن) يووووووه نوفي لا ترمشين ,, عاد اسمعي يااختس انتي خابرتني دمي حامي وحلقي عند الحق ما يطبق ابدا ,, "وتوطي صوتها عشان ماتسمعها شيخه" وانتي خابرتني ابيها من زمان "وردت صوتها لنبرته الطبيعيه" المهم عاد بخاطري عليها حكي ادعي معي ادق على مره ثانيه وانظف فيها سراميك بيتهم ,, نوفي اي لون حمره تبين ,,
نوف وهي بدت تمل : كيفس بس اخلصي على ظهري تخشب ,,
ساره : خلاص بحط لس كرزي ,,
نوف باستنكار : وليه قالوا لس رايحه عرس ,, اقول حطي لي مشمشي احلى يطلع ,,
ساره بطنازه : وانتي دايم كذا حمرس كنس فاحطه ,, حطي الوان فرحه يااختس ,,
نوف وبزهقه : يووووووووه تراني زهقت بتخلصين ولا غسلت وجهي ,,
ساره تضحك : خلاص يمه منس ماتنعطين وجهه ,, انتي ماتعيشين الا مقموعه الله يعين خلوود عليس ,,
نوف بفشله : اقول على هواء بس ,,
ساره : ههههههههه إن شاء الله ,, اي لا اتحركين ,, اوكي خلصنااااا ,,
شيخه : نوف لفي بخايلس ,, "استعدلت شيخه بقعدتها وقابلت البنات" ماشاء يهبل ,, لس مستقبل السوري ,,
ساره شاقه الحلق : شكرا شكرا ,,
شيخه تجمع اغراضها بتطلع بأبتسامه : العفو العفو ,, يلاا اخليكم تاخذون راحتكم ,,
نوف : وين رايحه ؟؟,,
شيخه : خلااص إنا كنت ابي اشوف المكياج وشفته الحين وقت سوالفكم السريه ,,"وبنغزه" ولا على بالكم مااسمع مشاوركم قبيله ,, يلاا اخليكم
بطلعت شيخه من الغرفه نوف ضربت على راسها ساره : حرااام عليس احرجتيها تخبرين شيوخ حساسه ,,
ساره تفرك مكان الضربه : وجع يوجعس يمال المرض ,, "وبهجوم" وانتي وش دخلس خوات وانتلاحق من دونس ,, الا ماقلتي لي شرايس بأبداعي ؟؟,,
نوف تشوف نفسها بالمنظره وساره وقفت جنبها وصار انعكاس صورهم امامهم : عاادي ,, "بهدوء" ساره ؟؟
ساره وتشوف انعكاس صورة نوف قدامها : لبيه ياروح ساره ,,
نوف : إنا قلبي قارصني احس انه بيصير شي ,,
ساره تلف على نوف : اهبي وجهس ,, وش فيس قلبي على القناه الحزينه ,,
نوف : والله اني صادقه ,, ساره انتي مسويه شي من وراي ؟؟,,
ساره بأرتباك : هااا من يقول ؟؟,, انتي تخبريني كل حاجه اسويها احكي لس عنها ,,
نوف : اتمنى يااختس ,, بكل صراحه اتمنى ,,
ساره تعفس وجها : يووووووووووووه عااد امسي علي ,, ترى اذا تكلمتي كذا كني ماشوف الا مشاري ولد عمي فهاد ,,
نوف تضحك : لا والله وشفيه مشاري ؟؟,,
ساره بكره : ابدا مافيه الا نفسه الخايسه وشايف نفسه ,, يعني ياارض انهدي ماعليكي ادي ,,
نوف بدفاع : حراام عليس ,, عشانه ماشاء الله عليه عاقل وماله بالحكي الزايد صار كذا ,,,,
ساره بزهقه : خلاص عاد سكري على السالفه ,, كبدي اوجعتني من ذا الطاري ,,
نوف : يمه منس مااهولس مهوله ,,
ساره بشهقه : إنا مهوله يالبليد ,, "بتهديد" اوريس إن ماطلعت اخنازس كله عند خووويلد ماني بنت سالم ,,
نوف باستهازاء : وانا خايفه منس يالله روووحي ,, "بدلع" ياامس إنا واثقه من نفسي اولا ومن خلودي ثانيا ,,
ساره تصفر : اقعد ياولد بدينا بالغزل ,, عااد ياالنوفي حرام عليس اخوي ضعيف مايستحمل ,, تقولين كذا يطب ساكت ,,
نوف تسبل بعيونها بدلع : اسم الله عليه في عدوينه إن شاء الله ,,
ساره توقف بسرعه وتطلع من الغرفه وهي تتكلم : لا مايصير كذا إنا لازم اروووح افرح اخيي ,,, خوووووووووووووووويلد خلوووووووووووووووود يالاخوووووو ,,
ونوف قاعده وراها ماتحركت ,, لانها تعرف إن ساره بئر عميق ومستحيييل ينقال عندها شي ويطلع
نوف " يابعد قلبي ياساره ,, ماادري لمتى كذا حالنا ,, ساره تكرهه عيال خالي فهاد كرهه العمى ,, اصلاا هي لو انه بكيفها حتى البنات ما تعطيهم وجهه ,, بس شخصيه ساره الفرفوشيه وشبه الدبلوماسيه تؤمن بالمجامله جدا ,, بس ماادري لمتى بتم كذا ,, وخصوصاا مشاري ,, مع انه رجال كافي خيره وشره ,, مهوب مثل عيالنا الباقي يجوون ويسلمون ونشوفهم ,, بالعكس مشاري دايم صامت ومايرفع عينه فينا ,, لكن الظاهر سوالف ام سعد مع امي وعمتي وضحه اكثر شخص تغذى منه وبرمجها بمخه هي ساره ,, للاسف ساره مانست اهانات كامله لانها ,, ومانست معاها تخاذل خالي فهاد وسكوته ,, ساره كذا ببتعب قلبها معادووا بمستحمل ,, من يظن ياربي إن ذا الشخصيه المرحه المنطلقه المحبوبه من الكل يمكن تحمل بقلبها حقد على احد ؟؟,,"
***
اللهم إني أعوذ بك من العجز والكسل والجبن والهرم وأعوذ بك من فتنة المحيا والممات وأعوذ بك من عذاب القبر
***
امام بيت سلطان بن سعود
سيارة سعود بن سلطان
سعود "صار لي طالع من الجماعه قريب الساعتين ,, ومع كذا احس كني ماني مجمع ,, احس السالفه ناقصه شي ,, او مهي بكامله ,, منو كان يتوقع اني ممكن اسويها بيوم ,, هههههههههه بتكون مفاجأه ,, جاتني من غير ميعاد ولا تخطيط ,, ويااااويح قلبي ويااح ,,عبدالعزيز من ملكنا عطاني بطاقة اخته عشان ياخذها المملك ويصدق العقد ,, بس مدري ليه خذيت البطاقه وواعدة المملك بكره بالمحكمه ,, الصراحه ماتوقعتها كذا ,, صغيره توها مكمله الواحد وعشرين ,, والصراحه مزيونه ,, الا مزيونتن جدا ,, بصراحه تستحق المغامره ,, وبعدين إنا ماني برجال ,, خلاص بقدر اعدل بين حريمي ,, وماعلى قاصر فلوس الجيب مليان ومعاشي قوي ,, وبمسك العصى من النص ,, يعني سهالات ,, وام سلطان تبشر برضاوتها وبمعزتها غيرها خبال حريم ماعندي !!"
***
سبحان الله ,, الحمدالله ,, الله اكبر
***
كلية علي صباح السالم العسكريه
مشاري ماسك تلفونه بايده وهو مو مصدق ,, يحس نفسه مصدوم ,, متفاجأه ,, لا يحس نفسه مطعون واللي اطعنه اقرب الناس له ,, صحى من سرحانه على خويه وهو ينبهه يرد التلفون لمكانه اللي يخشونه فيه ,, لان وسائل الاتصال ممنوعه بالكليه ,, واذا امسكوه متلبس فيها حجز هذا بعطلة نهاية الاسبوع ,,
قام بهدوء وكانه مافيه شي ,, رد التلفون بمكانه ,, واستئذن من ربعه بيريح شوي ,,
قعد مشاري على سريره والافكار اتخابط براسه " احححح ياحرقة قلبي ,, إنا وش لون ماجاء في بالي انهم بسوون كذا ,, وش لون ,, هذا وانا قايل لفيصل ترى الامر ذا ماهو بخاطري ,, بس شكلي حسبتها غلط ,, فيصل مشاني على كيفه ويوم شافني ماني بماجود سوااها ,, والله ياولد ابوي ماسويتها الا لانك مالك كبد ,, كبدك كبد ميت ,, بس والله ثم والله ثم والله اني لوريكم ياأل علي ,, كلكم ,, كـلـكـم يا ال علي كلكم ,, فهاد وبناته ماهوم بمداس للـ علي ,, إن ماخذيت حقي وحق امي وخواتي واخواني منكم ماني بمشاري بن فهاد ,, ماني بولد كامله اللي مخلينها عياره ,, بوريكم ولد كامله وش بسوي فيكم ,, بتشووفون ,, قريب ,, قريب بأذن الله ,, وخصوصا انت ياسالم ,, انت راس البلا ,, انت اللي مستنقصنى يا عيال فهاد ,, بتعين غثاك على ايدي ,, قريب "
***
لاحول ولاقوة الا بالله
***
السعوديه "او مثل مااتسمى برها عند بدو الكويت (الجنوب)"
البر
عزبة ابناء سعد بن علي
فيصل ينزل من سيارته توه واصل لعزبتهم ,, من بعد ماوصل عبدالله المطار ,, جهز عزبته وتوكل جنوب ,, ولقى جيب راشد موجود وشافه ظاهر عليه من بيت الشعر ,,
راشد بابتسامه : ارحب يابوفهاد ,,
فيصل يرد الابتسامه : مرحبا باقي يابوسلطان ,,
راشد يضحك : وش جابك لنا ياابن الخال ,, ولا راح الخوي وضاقت عليك البلاد ؟؟,,
فيصل يتنهد وهو يدخل لبيت الشعر : اي والله كنك معي ,, ضاقت على الوسيعه من بعد ابو فالح ,,
راشد يتعزوا : وانا ابن علي ,, تضيق عليك الوسيعه وانا موجود ,, افااا يافهاد اثارينا برخص التراب عندك ,,
فيصل يبتسم : والله انت خابر غلاك يااخوك ,, بس ,,
راشد يعقد حواجبه : وشبلاك تبسبس كنك خايف تحكي ,,"يضحك" افاا يافيصل صاير الايام ذي خواف ,, لا يكون ذا تأثير عبيد ,,
فيصل بعصبيه خفيفه : والله ماالخواف الا انت ,,
راشد يمثل الخوف : يااااو روعتني ياولد ,, عاااد يااخي افردها لا تصير كذا "بمزح" خلك فرفوشي ,,
فيصل يكتم ضحكته : انت وش فيك خببل ثمن حكيك ,,
راشد يضحك : يااخي وش اسوي فيك ,, انت جايني وانتم كتم ,, وانا ضايق خاطري ابي لي احدن احكي عليه ,, عااد افردها وقولي شخبار دورتك ,,
فيصل يبتسم : والله انك فاصل ,, بس ماعليه اليوم بصير حليو معك ,, ودورتي إن شاء الله سفرتي مهوب بالاحد الجاي اللي وراه ,,
راشد : الله يعينك الغربه شينه ,,
فيصل : لا ماعلي باس منطقة دورتي مهيب بعيده عن منطقة عبدالله ,, يعني اموري مضبطه إن شاء الله ,,
راشد : زين زين اضبطت معك يافهاد ,, لقيت لك خوي و لقيت لك طباخه بعد ,,
فيصل بتعجب : طبااخه ؟؟!! من تقصد ؟؟ ,, "يستدرك" لا يكون تقصد منور ,,
راشد : اي اقصدها ,, لو إنا محلك كل يوم غداي عندهم ,,
فيصل بستهزاء : ليه قالولك راشد بن سلطان كل يوم وانا متعزب لي عرب ,, لا ياابوك إنا فلوس بجيبي واجيب لي افخم المطاعم واكبرها ,, واذا عافت نفسي المطاعم ماني بعجزان اجيب لي طباخ يطبخ عيشتي ,, وبنت فالح ماني بظان وراها نفعه خلها تنفع اخوها اول عشان تنفعني ,,
راشد يبتسم : صحيح انك تنغزني بالحكي بس مقبوله منك ,, وحرام عليك بنت فالح ماعليها قصور ,,
فيصل بتهكم : اقول اقطع الموضوع بس ,, وش اخر العلوم عندك ؟؟,,
راشد : مابه جديد ,, الا حمد متى هو بياتي ؟؟,,
فيصل بضيق : قريبا ,,"يتذكر" ذكرتني جعل ربي يذكرك بالشهاده ,,
راشد : ويااك يارب ,, وش ذكرتك به ؟؟,,,
فيصل : ام حمد مبطين عنها عساني اسرح لها بكره من صبح ,,
راشد : زين ,, الا منت بخاويني تشوف الحوار الجديد ,,
فيصل : يلاا توكلنا على الله ,,
***
اللهم اتنا بالدنيا حسنه والاخرة حسنه وقنا عذاب الناس
***
بيت فهاد بن سعد
الصاله
ام سعد قاعده بالصاله ومقابلها سعد اللي صار لها من جا ساعه وهو ماغير يتحلط ويخانق ,, والسبب طبعا زواج لولوه ,, وبوسط وصلة السب اللي مسببها دخلت المها راده من شغلها ,,
المها : السلام عليكم ,,
ام سعد بضيق : وعليكم السلام ,, مابغيتي تلفين ,,
سعد لامه بغضب : تعرفين ليه قوم انها مالها والي ,, وماوراها رياجيل ,, والله لو انس عندي في بيتي انتي وخواتس بنات منيره كان شفتن العلم الوكاد ,,
المها تتقدم بهدوء لداخل الصاله ,, وكان الهجوم صدمها لبعض الوقت ,, بس استجمعت قوتها مثل العاده ,, واكتمت عبرتها ,, المهاد نقت على راس امها واسئلتها عن حالها ولكن امها طنشتها ,, ابلعت عبرتها اللي كبرة ,, وقربت صوب اخوها بادنق تحب راسه ,, بس صدمها يوم انه وقفها وبعدها عنه ,,
سعد بقرف : فارقيني ,, انا من بعيد ماني طايقس وبعد ماتكابرتن قدرس وجايه لحد عندي ,,
المها بغصه : وليه وانا وش مسويه "بغصه اكبر" يااخوي ,,
سعد بغضب : لا تقولين يااخوي إنا مالي خوان ,, امي ماجابت لي احد ,, كنس عيال ابوس كل شين عندكن بالسر ,, ولا كني اخوس ,, هااا ,, ولا ليه ماعلمتيني بخطبتس ولا مالي شور ؟؟,,
المها ودموعها نزلت على خدها : بس ماصار شي إنا ماعطيت ابوي قراري عشان يشاوركم ,,
سعد وصوته علا : وليه انت ماتشوريني ,, ولا فيصل تشاورينه وانا لا ,, لولا امي ماقالت لي اليوم ماكنت دريت ,,
ام سعد بهجوم : اي ليه ماقلتوا لاخوكم ,, حسبى الله عليكم ياعيال فهاد ,, عازلين وليدي عنكم كنه اجنبي ,, والقدر والغلا كله لولد رفعه ,, العلم كله عند فيصل ولا سعد ماكنه اخوك لكم ,, كنه غريب بينكم ,, حسبى الله عليكم ,, حسبى الله عليكم ,, جعل حوبة ولدي مااتعداس يامها يابنت بطني لا انتي ولا خواتس ولا فيصل ,, جعل بنت منيره ماتعين التوفيق ,, وجعل فالس فالها ,,
المها ودموعها مخليه طريقها ضبابي " ونفس العاده اخترت الهروب ,, الهروب بهذا البيت مثل المواجهه ,, لاني بكل الحلات مهزومه ,, مكسوره ,, متعذبه اكثر من قبل ,, الله يسامحس يمه ويغفر لس ,, الله يسامحس ,, ولا في امي تدعي كذا على بنتها ,, حتى لولوه وش ذنبها ,, بس مااقول الا الله يسامحس ,, اللهم اني استغفرك عني وعن والدي ,, اللهم اني استغفر ك عني وعن والدي ,, اللهم اني استغفرك عني وعن والدي ,, جعل دعوتس يمي توقع بالتراب ,, يارب رحمتك "
***
الهم اني استغفرك عني وعن والدي وعن المسلمين والمسلمات الاحياء منهم والاموات
***
بيت سلطان بن سعود
شقة سعود بن سلطان
الجو متوتر متوتر متوتر ,, وشلون مايصير كذا وسعود فجر قنبلته على نفله ,, ونفله كان انفجارها اكبر من انفجار القنبله ,,
نفله بغضب كبير : إنا إنا ياسعود تحط فوق راسي الجاره ,, إنا ,, وشني مقصره فيه ,, هااا ,, بيتي قايمه فيه ,, ,, وجايبه لك عيال ,, وعيالي متفوقين وكلن يسولف بتربيتي ,, وش تبي بنات وعندي وصبيان وعندي ,, لا وحقك عمري قصرت بحقك ,,
سعود بحزم : خلاص ياام سلطان هدي ,,
نفله بغضب وصراخ : وش اهدي ,, حرام عليك ,, إنا تعبانه الدوام من صوب والعيال من صوب ,, ولا زياده على كذا حامل وتعبانه وشوف "تلف وجهه عليها" شوف حتى التزين اتزين لك ماقلت خلاص كبرت ورجلي ملزوم يتحملني لا قلت لا له حق يشوفني باجمل صوره ,, بس تعرف إنا الغلطانه ,,"تمشي بتثاقل للحمام وتبدا ترش الماي على وجها بهستيريا"
سعود يدخل عليها بطلعها : تعوذي من الشيطان من نفله ,, تعوذي من الشيطان ,,
نفله تصرخ وتفك نفسها منه : فارقني فارقني ,, جعل مابه نفله ,, جعل مابه نفله ,, ليتني رفله ,, ليتني وصخه ,, اه ياربي ,, ليتني ياسعود من ذا النسوان اللي مقصرين ,, ياليتني
على صراخ نفله وقفوا عيالها على باب غرفتها مو متجرئين يدخلوان ,, وعلى صوت الصراخ صعدت العجوز شيخه ودخلت على عيال ولدها وشافتهم واقفين ورا الباب يسمعون الصراخ ويبكون ,,
ام سعود وهي تجر النفس بصعوبه : وش فيه ,, وش حاصل ,, امكم وش فيها ,,
شيهانه تلم اخوانها ترد بصوت باكي : ماادري يمه بس يمكن بابا يطق ماما ,,
ام سعود بغضب : وشهوو ,, بنت سالم تضرب ,, سعوود ياسعود ,,
سعود سمع صوت امه وخاف عليها لا تشوف نفله بذا الحاله : جايس يمه جايس ,,"يلف على نفله" نفول ياقلبي يلاا جعلني قبلس غسلي وجهس وتعوذي من ابلي سوانا لس باللي تبين ,, يلاا ,,
طلع من عند زوجته وراح يشوف امه ,, وهو بدى يتوتر ردة فعل نفله الثقيل الراكزه صدمته ,, والحين خايف من ردة فعل امه ,, لا هو مو خايف منها هو خايف عليها ,, هو كذا هو يواسي نفسه ,,
سعود يطلع لامه : لبيه يمه دعيتيني ؟؟..
ام سعود قاعده وحولينها عيال سعود ردت بهجوم : وش انت مسوي سود الله وجهك ؟؟.
سعود بارتباك : ماني مسوي شي ,, من قال ؟؟,,
ام سعود : صوت مرتك ووجهك يقول ,,"بتساؤل حازم" الا وينها نفله ,,
وصلها صوت نفله من ورا رجلها : هاذاني يمه ,,
ام سعود بخوف من وجه نفله المحتقن من الغضب : وش فيس يمس ؟؟,,
نفله بهدوء حازم : مافيني الا كل خير ,,
ام سعود بخوف : عجل وش فيه وجهس غادي كذا ,,
نفله : مابه شي جعلني قبلس ,, "تلف لبنتها" شيهانه ياامس اخذي اخوانس وادعي ليزا اجهز اغراضكم بروح لبيت ابوكم سالم ,,
ام سعود بتفاجاء : بيت ابوس ,,"بغضب" انتوا وش جاري عليكم ,,
نفله بغضب : يالله شهيانه بسرعه خالس جاي بالطريق ,,
سعود الغضب ظهر على صوته : وش وش وش ليه يابوس مالس والي ,, ماوراس رجال ؟؟,,
نفله تشوف بنتها تاخذ اخوانها وتبعد عن المكان لفت لسعود بتحدي : وش ياسعود بنت سالم مالك ولايه عليها ,, انت ارخصت وانا ماني باحس منك ,, اذا إنا ماني بشي عنك حتى انت ماتسوى عندي التاليه من العرب ,,
سعوود يقرب منها بهجوم : وش عيدي ماقلتي ,,
ام سعود بحزم : بس ,, انتوا ماعندكم حشيمه لي وانا قاعده ,,"لفت لبنت اخوها" وش فيس ياامس وش جاري عليس تخلين بيتس وتظهرين منه ,, ماعمرس سويتيها ,,!!
نفله : قلتيها يمه ماعمري سويتها ,, بس كنت غلطانه ,, وغلطانه وااجد بعد ,, الحشمه يمه والتقدير قابلها ابوسلطان انه حاط فوق راسي مره ,,"تأشر على نفسها وعينها بعينه" إنا بنت سالم بن سعد تجي فوق راسي الجاره وليتني مقصره ,,
ام سعود بصدمه غاضبه : وش ,, سعود جعل عدوك الموت وش انت فاعل ,,
سعود بدفاع : ماسويت الا حقي ,, وهي تبشر برضاها ,, ولها اللي تبي ,,
ام سعود تقوم من قعدتها بهجوم : جعلك اللي ماني بقايله ,, سود الله وجهك ,, سود الله وجهك ,, مثل ماسودت وجهي عند اخوي ,, سود الله وجهك ,, جعل ربي مايبارك لك ,,
سعود وقف بصدمه توقع كل شي الا ردة فعل امه ذي ,, هو توه ماصحى من اللي جاه من ردت فعل نفله ,, توه ماصحى ,, جاته الرده الاكبر ,, امها عمرها مادعت عليها ,, بس الله سوتها ,, سوتها ,, وقف بصمت وهو يشوف امها تحرك ايدها بوجهه بس الكلام مايوصل ,, وشاف نفله تعطي الخدامه جناطها وجناط عيالها وتطلع من بيتها وبيته ,, وهو واقف بصدمه توقع ردات فعل بس مو لذي الدرج هابدا
***
اللهم صلى وسلم على سيدنا محمد واله وصحبه اجمعين
***
بريطانيا
شقة عبدالله بن فالح
منيره " صار لنا واصلين ساعه ,, من جيت ماهديت من التلفونات رفيقاتي يدقون على ماصدقوا ارجع ,, بصراحه ماعودتهم إنا على السفر ,, وهم بعد ماقصروا نظفوا الشقه ومالوا الثلاجه ,, فعلا ياحبي لهم ,, عبدالله طلع من نص ساعه يشوف ربعه هو بعد ماتعود على فرقاهم ,, كنه اختها حييل تعلقنا بربعنا هني ,, الغربه كذا نتعود على بعض فيها حييل ,, لان مالنا غير بعض ,, سمعت تلفوني يدق هااذي اكيد دلال "
منيره : هلاا وغلا بالغلا كله ,,
دلال : هلاا والله فيج انتي لا تسافرين خلاص مانستحمل بعدج ,,
منيره تضحك : خلوني اجرب غلاتي عندكم ,,
دلال : لاتخافين والله انج غاليه على الكل وربي ,,
منيره :ادري ماابي دليل ,, هااا بتجين انطرس إنا ؟؟,,
دلال : اكييد جايتج ,, بس انطر قيس ابن الملوح يتسبح وانجيج ,,
منيره تبتسم : ياهلاا فيكم والله ,,
دلال بنغزه : ياهلاا فيني إنا ولا ياهلاا في قيس ابن الملوح ,,
منيره بخجل : بس عاد لا تصيرين سخيفه ,,
دلال : خلاص استعدي جاينج إنا وبيجون ناديه والهنوف ,,
منيره : هلاا فيكم كلكم ,, توهم مسكرينه مني ,, العين اوسع لكم من المكان ,,
دلال باستعجال : يلاا هاذي مشعل طلع من غرفته احسبي لنا خمس دقايق عندج ,,
منيره بابتسامه : حياكم
منيره بسرعه راحت تشوف شكلها اوكي وتلبس حجابها ,, لان البنات شققهم قريب منها واكيد إن ناديه وهنوف بالطريق ,, وهي ابدا ابدا ماتبي تتاخر على ضيوفها ,,
***
اللهم اجعل القرآن ربيع قلبي وجلاء همي
***
بعد يومين
مطار الكويت الدولي
طائرة الخطوط الجويه الكويته القادمه من نييويورك تحط الرحال على ارض الكويت الحبيبه ,, وعليها حمد بن فهاد ,, اللي راجع بشوق ,, ولهفه ,, للكويت ومن فيها ,,
***
سبحان الله وبحمده عدد خلقه ورضى نفسه ومداد كلماته
***
05-01-10, 05:26 PM
بسم الله توكلنا على الله
جديد مواضيع قسم الارشيف
العرض العادي
