المصافحه الثالثة عشره
وزارة الاشغال
قسم .....
في احد اقسام وزارة الاشغال ,, وبوسط هذي المعمعه ,, هني مكان سلمى ,, سلمى الـ....ي
سلمي وهي بوسط انشغالها بالمخطاطات قدامها ,, يدخل عليها مكتبها احد المهندسين المشرفين على المشروع ,,
المهندس : صباح الخير سلمى ,, شلونج
سلمى برسميه :صباح النور ,, انا زينه الحمدالله ,, شخبارك المشروع معاك ,,
المهندس ومازال واقف عند باب المكتب : كل شي تمام ,, جهزي نفسج بعد نص ساعه في اجتماع بغرفة الاجتماعات ,, ولازم تتواجدين ,,
سلمى : إن شاء الله ,,
طلع المهندس من مكتب سلمى ,, وهي زفرت براحه ,, إن المهندس هل المره كان مستعجل ,, ولا كان بلط عندها بالمكتب ,, رفعت راسها على صوت المهندسه حنان ,,
حنان : شفيج سلمى احاجيج ,,
سلمى : ماكو شي ,,"ابتسمت" امري ياقلبي ,,
حنان وهي تقعد على الكرسي وتريح جسمها : مايامر عليج عدوو ,, "بلقافه" شصار على معاملات طلاقج ؟؟ ,, ماخلصت ؟؟,,
سلمى تبتسم وهي عارفه لقافه رفيجتها : لا خلاص ,, شخباري صج قديمه انتي صار لي يومين مخلصه ,,
حنان وعينها تتسع بتعجب : شنو شنو شنو !! ,, وليش ماقلتيلي ؟؟ ,, وليش ماعلمتيني ؟؟ ,, هااا !! ,, ليش ؟؟
سلمي تضحك : شنو اهي بشاره يعني ,, كاني لمى داومت علمتج ,,
حنان وهي تشوف ابتسامة رفيجتها ونبرة الفرحه بصوتها ,, فرحت لفرحتها ,, ومافكرة تعاتبها اكثر ,, لانها اكثر وحده تعرف الزواج هذا شلون تم !! ,, وليش تم ؟؟ ,, كان غلطه ,, والحمدالله تصلحت ,, يمكن متأخر ,, بس تتصلح متأخر ,, احسن من انها تبقى فيها طول عمرها ,, طليق سلمى ابدا ما غلط بحقها ,, بس اهي اغلطت بحق نفسها ,, وهم غلطت بحقه ,, شلون تبقى على هذا الزواج ,, وهو اصلاا ردت فعل على امر ,, يعني صج اهو كان متمسك فيها ,, بس اهي كانت متمسكه بنفسها اكثر ,, متمسكه بسلمى اللي ماتعرف الكذب والخداع اكثر ,, اكثر من كل شي بالدنيا ,, حتى من قلبها!! ,,
***
الهم اني استغفرك عني وعن والدي وعن المسلمين والمسلمات الاحياء منهم والاموات
***
بيت سالم بن سعد
صالة البيت الرئيسيه
الساعه الحادية عشره ظهرا ً
الكل كان موجود ,, اليوم سفر عبدالله ومنور ,, فالكل تقريبا متواجد عشانهم ,, من العم سالم والعمه وضحه ,, وخالد ومحمد ,, ولطيفه اللي مقعدينها من نومها غصب ,, لشيخه اللي تغيبت اليوم عن دوامها ,, وطبعا عبدالله ومنيره ,, طيارتهم اليوم الساعه ثلاث ونص العصر ,, يعني كلهم الحين قاعدين بجلسة وادع ,, او بمعنى اصح جلسه صبر الى لقاء قريب ,, اللي إن شاء الله بيكون بعطلة الصيف ,,
ابو محمد ينادي : منيره ياأبوس ,,
منيره : لبيه يبه ,,
ابو محمد : لبيتي حاجه يابوس ,, ماودس يابنتي تعجلين بدراستس وتعودون ؟؟,,
منيره تبتسم : اكثر من كذا ياعمي ,, مااظن ,, بس إن شاء الله قريب ,,
ابو محمد بخيبة امل : الله ايسر لس ,, الله ايسر لكم ,,
خالد يضحك : عااد لازم تجون بالصيف ,, ترى حددت عرسي فيه ,,
التفت الكل عليهم ,, هذا متى حدد ؟؟ ,, ومتى فكر وسوى كل شي بروحه ؟؟ وخالد يتكلم بكل ثقه ,, ماكنى عليه من احد ,, وعااد خالد بالسته السوده بالنسبه لشيبان ,,
ابو محمد يقرص عيونه بعصبيه : وانت يالسفيه من قال عرسك بالصيف ؟؟,,
خالد بثقه : ماحد قال ,,
ابو محمد : اجل وش الحكي اللي قلته قبيله (قبل شوي) ؟؟,,
خالد بمحاوله قردنه ابوه : انا اقول يابومحمد الحكي اللي بتقوله انت لعمي سلطان ,, يعني ياطويل العمر اذا جا عمي سلطان قوله نبي نملك ,, والعرس نبيه بالصيف ,,
محمد بتهكم : انت تخرج اول ,,
خالد تنرفز : محمد خلك محضر خير ,, وانا اصلاا خريج ذا الكورس "لف على عبدالله اللي جنبه وهمس له" افزع لي يابوفالح ,,
عبدالله يضحك : ياعمي شفيك عليه ,, هو مصيره ماخذها اليوم ولا بكره ,, دامه يبي العرس بعطله الصيف خلاص توكلوا على الله ,,
ابومحمد بعصبيه : وانا لمى احاكي سلطان ويسألني هو توظف شقول له هاا ؟؟,,
خالد : يبه الديوان اذا انا معرس يوظفوني بسرعه ,,
ابومحمد بعدم تصديق : صحيح ,,
خالد وهو ماصدق ابوه لان شوي : والله العظيم يبه وتعالي بكره نروح انا وياك الديوان ونسألهم ,, ولا تنسى بيعطوني اعانة زواج وبدل بطاله لحد ماتوظف ,, وانا ماني مطول بتوظف بسرعه معدلي زين وتخصصي مطلوب ,,
ابو محمد لانهاء النقاش : اي يصير خير ,, الا ياعبدالله من بيوديك المطار ,,
عبدالله : فيصل يبه بيوديني ,,
بجهه اخرى من الصاله ,, ووصلهم نقاش خالد مع الشايب ,, وفرحتهم مالها مثيل ,, اكيييد بنات وبصير عندهم عرس ,, ماتبونهم يستانسون ,, الا بتشققون ,,
ساره باندماج : ياربي من خلوود بيسوي عرسه بالصيف ,, الكويت فاضيه كلن مسافر ,,
شيخه : ماعليه نسويه اخر سته ,, بنلحق على الناس قبل السفر ,,
ساره بخوف : شيوخ اظنين هيثم بيستقبلني ,, مااعاد فيه وقت اذا بشهر سته يعني خمس شهور ,, يمدينا صح ,,
منيره تضحك : تدرون انكم حضرتوا الدوا قبل الفلعه ,, ترى عاده العرس ماتحدد ,, وانتوا على طول دخلتوا بالبدلات والصالات ,, بس باقي الطقاقات نسيتوهم ,,
ساره تشهق : اي صادقه ,, ماعادنا بلاقين طقاقه
منيره تمسك راسها : ياربي ,, سوير تراس بطيتي راسي ,, اللي يسمعس يقول العرس تحدد وانتي ذا الحين تشتغلين عليه ,,
ساره تضحك : تلوميني ياأختس قدنا شفقانين للعرس ,, علمنا بالعرس بعرس شيووخ ,,
شيخه وذكر الامر كهربها : خلاص عااد ساره سكري الموضوع ,, تراس لجه ,,
منيره : شيوخ وين عزوز ؟؟
شيخه : يلعب بالغرفه مع بنات نوره ,,
منيره : الا نوره وينها ماشفتها اليوم ؟؟,,
شيخه : تعرفين نوره اذا ابوي واخواني موجودين ماتنزل ,, "تتنهد" ماادري الى متى بتقعد على ذا الحال ,,
منيره احزنت على حال بنت عمها وذكرها بحالها قبل ,, بس نوره احسن منها ,, نوره الكل بصفها ,, مو مثل حال منيره انقسم الكل بينها وبين سعد ,, واللي انقسموا هم اهلها ,, بس بحال نوره الكل معاها والكل بصفها ,,
سمعت صوت احد يناديها ,, واعرفت صاحب الصوت ,, واتسعت ابتسامتها من سماعها لصوته ,,
خالد : منير ,, يامناري ,,
منيره تبتسم بقوه : نعم اخ خويلد ,,
خالد يضحك وهو يقترب منهم ويجلس عندهم بجلستهم الجانبه بالصاله : الا بسأل سؤال يا منير ؟؟
منيره تضحك : ياربي خلوود خربت اسمي ,, لا تقوول منير !!,,
خالد بجديه : عاادي شفيس اقولس بسألس سؤال ؟؟
منيره ومازالت الابتسامه على وجها : اسئل يااخي تراك ازعجتني !!,,
خالد وبجديه غريبه عليه : يااخوس انتي الغمازه ذي اللي بخدس عمليه ولا طبيعيه ؟؟,,
منيره تحط ايدها على خدها وتلمس الغمازه الوحيده على خدها اليسار : لا حرام عليك ,, ليه تقول كذا ؟؟!!,, من ولدت فيني الغمازه ,,
خالد بعياره يتحرش بمنيره : ادري انها فيس من سنين ,, بس قلت ماغير منخشه قد لس سنين بديارن بعيده ,, يمكن طرا عليس تسوين حاجه كذا ولا كذا ,, "ويحرك ايده بمعنى اسكتي" خلاص المهم صدقتس ,,"لف على ساره" الا ياسوير انتي متى بتشوفين لس حل بعيونس ؟؟!!,,
ساره باستغراب تحط ايدها على عيونها : ليه وش فيها عيوني ؟!,,
خالد بقرف : مافيها شي ,, الا حاجتن وحده ,, من شهابها كنس يااخوس توس معوده من البراحه ,,"ويأشر بيدها" تعرفينها ذيك البراحه اللي عند فرع الجمعيه ,, المهم كنس توس معوده وحاثين بوجهس عيال الـ.... التراب لين ماغدت عيونس شهب ,,
ساره اتاشر على نفسها : انا عيوني شهب ,,
خالد : اشفيس يعني اقص عليس انا ,, روحي وشوفي نفسس بالمنظره والله إن اطقين من الكوكب بكبره ,, "ويلتفت لشيخه" وانتي معاد ذي بجنوب عليس ,, خلصتي تموين البيت كله ,,
شيخه افتحت فمها بصدمه واشرت على نفسها : انااا !!؟؟,,
خالد بجديه : اي انتي ,, "وبعياره" عيونس اختفت من ذا الصدوغ ,, والكرسي يالله ضافس من كبرس خلاص ماعد به مجال يتنفس ,,
شيخه وتفاجأة بصوره اكبر : انــــــــاااا!!,,
خالد بتمصخر : اي انتي ,, ماغير معلقه على "ويحط ايده على صدره ويقلد صوت شيخه" انا انا انا ,, اي انتي ,, سوي لس رجيم قبل عرسي ,, اذا ذا حالس بياخذ عليس الخياط سعر اربع ثياب معادهو بوااحد ,,
وشيخه مازالت مفتحه عيونها على وسعها ,, وايدها على صدرها ,, وساره طبعا ركضت لغرفتها تشوف عيونها شفيها ,, ومنيره ذبحها الضحك على خالد وحركاته ,,
خالد وشاف امه مندمجه بالتسبيح : يمه ؟؟,,
شاف خالد امه ترفع عينها له ,, بمعنى وش تبي ,, وهو فهم ,,
خالد : يمه عاد احاكيس ,, ردي على ,,
ام محمد بنفس خايسه : وش تبي ,, وتراك باطن كبدي وسامعه علومك كلها مع خواتك ,, فابرك لك البخ ,,
خالد : ابشري يمه بألبخ إن شاء الله ,, بس بقولس موضوع مهم ,,
ام محمد : قول ,, ياكثر ماتقول ياامك ,,
خالد : تدرين يمه إن محيميد اخوي خطب مهوي بنت عمي ؟؟,,
قال الكلام بدخول ساره ونيتها تهجم عليه ,, بس لا جاهم امر اهم ,, وسر من اسرار رجال سعد بن عِلي مايطلع من مجلسهم ,, الا اذا تم الامر مثل مايبون ,, وخالد طبعا لانه عارفه ساره بتجيه ,, وبوجود ساره و ابوها بنفس المكان ,, يعتبر خالد نفسه على روحه السلام ,, لان ساره امر خاص جدا عند ابو محمد مايرضى عليها ,, وخالد مايقدر مايحارشها ,, تتعب نفسيته ,,
ساره : والله خلوود متى صار ذا كله ,,
خالد وهو يلف على الرياجيل لا يكونون يسمعونه ولقاهم مندمجين بسالفه يقولها عبدالله لعمه ,, وماهو بصوبه ,, فخذاها فرصه وجاب الامور كلها ,, وهو يعتبر هذا انتقام من محمد لانه ماوقف بصفه قبل شوي ,,
خالد وهو يحاول يقصر صوته : خطبها من عمي ولذا الحين ماردوا عليه ,, يمه شفيس ماتردين احاكيس انا ,,
ام محمد والغضب بان على عيونها الظاهر من البرقع : والله الظاهر ياعيال سالم غديتوا رياجيل حتى على وضحه ,, قد شوركم مهوب عندي ,,
خالد وضحكه انقلب عليه ,, وفعلاا خاف هو كان قصده يضحك ,, مااظن إن شي هذا ممكن يزعل امه ,, واصلاا مايدري ليه امه ازعلت ,, حتى خالد نفسه خطب بدون لا تدري ,, شمعنى على محمد عصبت ,, شمعنى ,,
***
اللهم اغفر لي ولوالدي وللمسلمين والمسلمات الاحياء منهم والاموات
***
الاردن
الجبيهه
شقة نواف بن سلطان
نواف وصل قبل امس بليل ,, المره ذي اختار انه يروح بطياره ,, لان ماكان يمديه بقصر المده ذي يرد بسيارته ,, نواف حاليا مشغول باطروحته ,, اليوم عنده دوام العصر ,, وكان يبي يصحح النقاط اللي ذكرها الدكتور ,, سمع تلفونه يدق ,, وعرف من داق من النغمه ,,
نواف يبتسم : الله حيه ,, يامرحبا مليووووووون ,, وشحالك يابوصالح ,, والله طيب طاب حالك ,, اي وصلت قبل امس بليل ,, لا والله ماقصدت ماابلغك بس وصلت تعبان وامس كله كان عندي شغل مافضيت ,, ههههههههه افا عليك نفضى لك يابوصالح ,, لا يااخوك ماله داعي ,, لا تتعب المعزبه ,, خلاص خلاص ههههههه جعلك قوي ,, اقولك خلاص غداي اليوم معك ,, لا سلامتك ,, إن شاء الله وحده ونص عندك ,, إن شاء الله ماني متأخر ,, الله وياك ,,
سكر نواف التلفونه وفكره راح ,, راح لمكان يبعد عنه فوق الف كيلوو ,,
نواف " اه وحلالاها من يشيل بعمره ومايوقع الا فيس يالكويت ,, ياشين الغربه ,, وياشين البعد ,, البعد عن البلد والوطن والملجأ ,, والبعد عن الغالين ,, البعد عنس يمه ,, يوجع يمه ,, يوجع حييل ,, والبعد عنس يانوف ,, يتعب الروح ,, يتعبها حييل ,, والبعد عندس ياغلا الروح ,, البعد عنس يالطوف ينحر الروح ,, ينحرهاا نحر ,, يارب صبري ,, يارب ,, من شفتها يوم الخميس وانا حالي ماهو بحال ,, اه منك ياذا القلب ,, ماعشقت الا شخصن بعيد ,, بعيد بالمكان ,, وبعيد بالفكر ,, بعييييد واجد ,, يالله ياربي يجعلس من نصيبي ,, يالله يارب لا تخيب ظني ,, واجعل لطوف من نصيبي ,,"
***
لا اله الا الله وحده لا شريك له
***
بنك بيت التمويل الكويت
فرع ......
المها اليوم بما انه بداية الاسبوع فالضغط عليهم يكون فوق المتوسط ,, فطلعت من مكتبها ووقفت مع بنات الاستقبال تعبي النقص بسبب غياب وحده من الموظفات ,,
المها وهي واقفه بالكاونتر اللي جنب ريم رفيقتها ,, وكل وحده فيهم مشغوله باللي قدامها من مراجعات ,,
ريم بهمس : مهووي ماقلتي لي شخبار الموضوع اللي خبري خبرج ؟؟,,
المها تمثل الغباء وترد بنفس نبرة الصوت: اي موضوع ,, مافهمتس ؟؟,,
ريم تبتسم : لا اتغابين على ,, يلاا قولي شصار ؟؟,,
المها تكلم العميله : تفضلي لو سمحتي وقعي هني ,, "تلف على ريم" على حاله ماتغير شي ,, على خبرس الامر ,,
ريم : يعني توج مارديتي على ابوج ؟؟,,
المها وهي تضغط على لائحة الارقام عشان يمشي الدوور عندها : لا توني ,, "تبتسم ترحيبا بالعميله" هلا والله تفضلي امريني ؟؟,,
العميله وكانت حرمه بنص عمرها : هلاا فيس ,, شلونس "وترفع راسها تقرى الاسم المكتوب" المها ؟؟,,
المها بابتسامه : طيبه طاب حالس ,, امريني طويلة العمر شقدر اخدمس فيه ؟؟,,
العميله : بحول فلوس من حسابي الى حساب ثاني ,,
المها وابتسامتها مازالت على شفايفها : إن شاء الله ,, البطاقه المدنيه لو سمحتي ,, وبطاقة البنك ,,
المها انشغلت بادخال البيانات ,, والعميله مازالت تشوفها ,, بنظرات اعجاب ,, وفخر ,, وشبه رضى ,, او نقول رضى شبه مكتمل ,, يعني باختصار دخلت مزاجها حيييل ,,
***
اللهم اني ظلمت نفسي فاغفر لي
***
بيت سلطان بن سعود
نوف ومحاولاته من الصبح مستمره ,, وامها تبي تنشف ريقها ,, وماتبي الشي يجيها بالساهل ,,
نوف ودموعها على خدها : يمه حرام عليس ابي ارووح ,,
ام سعود : حرمت عليس عيشتس ,,
نوف بصدمه : انا يمه حرمت على عيشتي ,, ليه يمه تقولين لي كذا ,, ليه وش مسويه ,,
طلعت نوف من الصاله زعلانه ,, وشافت بوجها سعود اخوها نازل ,, ناداها بشوف شفيها ,, بس هي صعدت الدرج تركض ,, وهي تشاهق من البكي ,,
دخل سعود على امه وشافه قاعده وعباتها عندها ,, شكلها مبرزه نفسها للمرواح ,,
سعود وهو يدنق على راس امه : شحالس جعلني افداس؟؟ ,,
ام سعود : مانشكي باس عساني ماخلا من ذا الزول ,,
سعود : كيف صباحس ياام سعود ؟؟,,
ام سعود تتنهد : صباحي يمك محاتاه !!,,
سعود بحنان : ومن تحاتين جعلني افداس ؟؟,,
ام سعود بحزن : احاتي عيال خالك ,,"تمسح دموعها بطرح شيلتها" ماهو بعاجبني حال عيال فالح ,, لا هم بديارهم ,, ولا هم بين عزوتهم ,, ولاحالهم كذا من غير عرس عاجبني ,,
سعود : يمه جعلني افداس خليهم ذي حياتهم ,, ومحد يعرف مصلحتهم كثرهم ,,
ام سعود بنرفزه : لا مايعرفون مصلحتهم ,, حال عبدالله كذا ماعنده مره جايز له ,, هاا ,, اذاهو جايزن له قوله تراه ماهو جايزن لي ,, ولا حال منور زين ,, من متى عندنا البنات مالهن شغل الا بدراستهن ,, البنت مالها الا بيتها ورجلها ,, ابدا حال عيال فالح مهو بعاجبني ,,
سعود بتفهم : ادري جعلني قبلس ,, بس ذي حياتهم ماحدن يقدر يغصبهم على شي مايبونه ,,
ام سعود تتنهد : حتى فيصل ماهو بعاجبني ,, كنه خويه يطقون من العرس ,, اسمع ياسعود اليوم اجيبه لي وابحاكيه بالامر ذا وبشوف وشهو اخر ذا الامر معه ,,
سعود وياشر على خشمه : ابشري جعلني قبلس على ذا الخشم ,,
ام سعود : عليه الشحم فديتك ,,
سعود وهو يوقف بيطلع : تامريني على شي يمه ,,
ام سعود بتساؤل : وينك ناوي ,,
سعود : بروح لبيت خالي سالم اسلم على عبدالله وعقبها معزوم على الغدى عند واحد من اخواياي ,, تخاويني يمه ؟؟,,
ام سعود : اي بخاويك ,, انا انطر خوي من الصبح ,, ماودي بالمرواح مع السايق بروحي ,,
تدخل نوف عليهم وهي لابسه عباتها وجاهزه : يمه ترا بروح معس ,,
ام سعود من شافت عيونها من النقاب حمر كسرت خاطرها ومشتها لها المره ذي
ام سعود تعدل عباتها على راسها : يلاا توكلنا على الله ,,
***
سبحان الله وبحمده عدد خلقه ورضى نفسه وزنة عرشه ومداد كلماته
***
مواقف السياره المخصصه
البنك بيت التمويل الكويتي
فرع .......
كان قاعد بسيارته ,, ينطر اخته تخلص وتجيه ,, ماسك تلفونه وفاتح على احد الكتب اللي محملها على تلفونه ومندمج بالقراءه ,, ومنسجم لانه يعتبر قارئ نهم ,, صار له تقريبا ينطرها قريب الساعه ,, وهو توقع انها بتتأخر لان اليوم بداية اسبوع والعاده بالبنوك الضغط يكون في بدية الاسبوع ونهايته ,, شافها مقبله عليه ,, ونطرها لحد ماشافها استقرت على كرسيها بعد ماسلمت بهدوء ,, وهو رد عليها السلام بصوت اهدى ,, وحرك السياره بطلع من المصافط ومازال الهدوء مالك السياره ,,
حصه :اشوفك ماسئلت ,,"انطرته يجاوب ولمى ماسمعت" المهم يااخوي ابشرك ,, خوووش بنت ماشاء الله ,, تستاهل محمد بن منصور ,,
محمد وابتسامته اتسعت لف عليها والنظاره مخفيه الفرحه الكبيره اللي بعيونه : لا والله ,, قولي وش رايس فيها ,,
حصه : لا ماشاء الله ,, الله يكملها بعقلها ,, راكده ورزين ,, وبالزين ماتشكي باس حلوو ,, بس يااختك عليها ذا النور اللي يشع من وجها ,, والابتسامه اللي تخطف القلب ,,
محمد يضحك وبعياره : يعني يااخوس بتخطف قلبي ذا الضعيف ,,
حصه تضحك : والله اظن ,, بس خويك اللي ذكرها لك فعلا صافط لك ,,
محمد : اي ابو عبدالاله الله يرزقه ,, يقول مرته مديرتها تمدحها وااجد ,, ومن درى اني نويت العرس قال في وحده عند ام عبدالاله بالبنك من قبيلتك تمدحها ,, والحمدالله استخرت وتوكلت على الله ,,
حصه : الله يسخرها لك يااخوي ,, بس بقولك شي !!!,,
محمد وهو مركز على الطريق قدامه : قولي ولا تكثرين !!,,
حصه : ترا امها مايمدحونها العرب ,,
محمد شافها من طرف عينها : وانا شعلى من امها ,, باخذها ولا باخذ امها ؟؟,,
حصه بتردد : لا بس ,, بقولك ترى البنت تاخذ من امها واجد ,,
محمد بجديه : بسأل حصه انتي ماشفتيها وقلتي ماعليها باس ؟؟,,
حصه بثقه : صح انا قلت كذا ,, بس .....
محمد يقاطعها : اسمح لي قاطعتس ,, بس يام تركي انا باخذ البنت ماني بماخذ امها ,,"بثقه" ولا تنسين يااخوس إن الفرس بخيالها ,, واخوس مهو بهين ,, وانا مرتاح لذا الامر والمدح اللي جاني من صوب البنت ,, وذكر ابوها واخونها بالمجالس وعند القبايل تبرد الخاطر ,, فاذا رحبوا بي ترى ذا افرح ماجاني ,, "ويضحك" واذا قضبوني الباب يااخوس عاد شنسوي دوري لي وحده بنفس مواصفاتها لانها دشت خاطري وااجد ,,
حصه تبتسم وهي تشوف اخوها وحيدهم ,, الوحيد بعد ثمان بنات ,, وكان نعم السند لثمان بنات ,, ولغيرهم ,, دعت من قلبها إن ربي يوفق اخوها ويسخر له خلقه ,, وان اذا من الزواج ذا خير له ولهم إن ربي ايسر واذا منه شر له ولهم إن ربي يصد بقلبه عنده ويرزقه من حيث مايعلم ,,
***
اللهم اي اعوذ بك من عذاب القبر و من فتنة المحيا والممات ومن فتنة المسيح الدجال
***
بيت سالم بن سعد
صالة البيت الرئيسيه
الكل كان مجتمع ,, وصدر الصاله يزينه سالم بن سعد وجنبه اخته شيخه ومرته وضحه ,, والكل قاعد حواليهم والمكان يضج بالسوالف والضحك ,, ومنيره توها نازله مع شيخه من فوق بعد ماسلمت على نوره ,, وجهزة نفسها للطلعه للمطار ,, وخالد متسيد الجلسه ,, واكيد طبعا بتسيدها دام نوف موجوده ,, وده يتشيحط قدامها شوي ,,
سعود : خالد كم باقي لك وتخلص ؟؟,,
خالد وكأنه ماصدق إن الموضوع انفتح ,, بفخر ونفخة نفس : الكورس ذا إن شاء الله ,,
سعود يضحك : مابغيت يااخوك ,,
خالد تنرفز : وش مابغيت ,, تراكم صجيتوني انا متخرج على سني ,, ولا تبوني سكني كنى ال فالح اخلص قبل العرب ؟؟,,
ام سعود وهي تبسه بماي الفناجيل : اهبي وجهك اتنظل عيال عمك ,,
عبدالله يضحك : يااخي احترمي قاعد توني مابعد طلعت من بيتك ,, اتنظلني عيني عينك ,,
خالد بثقه : وش فيكم على عشاني ماني بمنافق اقول الشي بوجهك ماهو بقفاك ,, تراني على كذا وبسببكم بصير منافق ,,
ابو محمد بنفاذ صبر : اقول على تبن انت ,,
خالد ووجهه انقص قدام نوف قال يرقعها : تمون يابومحمد ,, تمون ,, "وبصوت اقرب للهمس" انمشيها لك المره ذي ,,
ابو محمد : قلت شي انت ؟؟,,
خالد فز : لا ابدن مافتحت حلقي ,,
ابو محمد : ابرك لك تخلي ذا الحلق مسكر ,,
عبدالله رن تلفونه بجيبه ورد عليه : هلاا يابوفهاد ,, اي جاهزين ,, اطلع بره ليه انت تعال مابه غريب ,, إن شاء الله ,, مع السلامه ,, "يلتفت لعمه" يبه فيصل بره ويتنانا بالديوانيه ,,
ابو محمد : يتنانا ,, يلاا عيالي اظهروا لولد عمكم ,,
طلعوا الرياجيل كلهم رايحين للديوانيه ,, وبقوا الحريم مع البنات بس بالصاله ,, وهذا عطى مجال لساره تشتغل على نوف ,,
ساره بهمس لنوف : اقولس خلاص عليس الامان قطي نقابس ,,
نوف تنزل نقابها : اووف مابغوا ,, واخوس ذا ابلشني ماغير يخز ,, اشوى إن سعود ماانتبه له ,,
ساره تضحك : ماعليه اخوي خليه يستانس ,, "سمعت امها تناديها" لبيه يمه ,,
ام محمد : روحي ادعي اختس تسلم على عمتس ,,
ساره بغباء : اي اخت ؟؟,,
ام محمد بنفاذ صبر : نوره يعني من شيخه اللي مقابلتس ولا نفله اللي في بيتها ؟؟,,
ساره بفشله : خلاص ياام محمد اعصابس اعصابس بدعيها ذا الحين ,,
وطلعت ساره تنادي نوره ,, وبطلعتها انفتح نقاش سري بين العجايز بصوت اقرب للهمس ,,
ام محمد : دريتي ياشيخه بمحمد خاطب من ,, وانا ماعندي علم ؟؟,,
ام سعود بتعجب : خاطب من غير لا يشاورس ؟؟!!,,
ام محمد بحسره : اي ,, ولا اللي خاطبها من دريت وانا كبدي شابه ,,
ام سعود : منهو خاطب ؟؟,,
ام محمد : خاطب مها بنت كامله ,,
ام سعود وبان الضيق عليها : مها بنت فهاد ياوضحه ,, ومن متى بنت فهاد تنعاف ؟؟,,
ام محمد : بنت فهاد ماتنعاف ولا انه باغي لطيفه ولا حتى لولوه مابه خلاف ,, لكن المها لا ثم لا ثم لا ,,
ام سعود : وليه ياوضحه وش ذنبها المها تاخذينها بفعايل امها ؟؟,,
ام محمد : ياشيخه انتي تعرفين كل الامور ,, ومن تحلف اليمين الشهبى وتظلم خلق ربي ,, مالي حاجه فيها ولا فعيالها ,, غالين وربي عالم بغلاة مها لكن بعيدتن عني يااختس ,, وبعيدتن عن عيالي ,,
ام سعود اسكتت والكلام جرحها ,, مهما يكون عيال اخوها غالين ولا كامله مخطيه عيالها مالهم ذنب ,, سعد والامر مفروغ منه ,, بس الكل يحكي بعقل مشاري والمها ,, ليه الظلم لهم كذا ,, ومن القريب ,, وش خلووا للبعيد على كذا !!,,
***
اللهم أعني على ذكرك .. وشكرك .. وحسن عبادتك
***
مدرسة ....... الثانويه للبنات
قسم الاجتماعيات
كانت متوتره ومبين عليها التوتر ,, وكل قسمها لاحظ هذا الشي ,, من داومت وهي سرحانه ,, وفكرها ماهو معاها ,, كانت اجهز اغراضها جرس بداية الحصه الاخيره باقي له خمس دقايق ويدق ,, وهي ماتبي اتأخر ولا تبي تقعد مع رفيقاتها اكثر ,, لانهم من الصبح يبون يصيدونها ويحققون معاها ,, بس هي مااعطتهم فرصه ,, طول اليوم شاغله نفسها ,, من حصصها للاداره ,, واذا مالقت شي تسويه مسكت تلفونها ودقت على احد سولفت معاها ,, واليوم دقت على منيره ولطيفه وشيخه ونفله وهيا ,, يعني تهربت بصوره واضحه جدا ,, بس على منو لقافة الحريم مستحيل تخمد ,,
سعاد : لولوه شفيج اليوم فكرج ابدا مو معاج ,,
لولوه بارتباك : لا ابدا مافيني شي ,, من يقول ؟؟!!,,
شفيه بعياره : والله عيونا تقول يالويل ,, وش فيش اليوم فكرش مهوب بالمدرسه الظاهر نسيتيه بمكان منا ولا منا ؟؟,,
لولوه وارتباكها وضح اكثر : لا مافيني شي ,, من يقول ؟؟,,
سعاد تضحك : من شافج نفس الببغاء تعيدين نفس الحجي درا انج اليوم فاصله لا ومتنحه بعد ,,
لولوه باستغراب مصطنع : انا فاصله ومتنحه ,, انا الله يسامحكم يجي منكم اكثر "شالك اغراضها بزعل وطلعت حتى قبل مايطق الجرس"
شفيه تضحك : تعالي لويل لولوه نضحك معش حنا ,, شفيش روحش معادهي برياضيه ,,
***
سبحان الله .. الحمدالله .. الله اكبر
***
بيت سالم بن سعد
الديوانيه
الكل واقف يبارك لعبدالله ,, وفرحت عبدالله ماهي بسايعته ,, مستانس واجد ,, وفرح بمفاجأة فيصل له ,, فيصل جا هو وابوه وخالد ومعاهم المملك ,, فيصل جاب خالد معاه عشان يكون الشاهد الثاني وفيصل الاول ,, مثل عقد زواجه الاول ونفس الشهود ,, بس إن شاء الله يبتعدون عن اخطاء الماضي ,,
فيصل يسابي عبدالله بقوه ويضغط عليه كفه : مبروك يااخوك ,, وترى زوجناك شيختنا ,, ولا تفكر ازعلها بيوم ,,
عبدالله وابتسامته اتزين وجهه : لا تخاف لولوه بعيوني ,, وماني بمزعلها بيوم ,,
ابوفيصل : خلااص يافيصل خل خويك ووده يلحق على طيارته ,,
فيصل : إن شاء الله يبه ,, يلا يوفالح نمشي ,,
عبدالله : اطلع الجناط وانادي منور ونتوكل على الله ,,"ويتذكر" الاوين مشاري ماجا معكم ,,
فيصل : مشاري عنده كليه شفيك يدخل السبت ويطلع الخميس ,,
عبدالله : اي سجيت ,, دقايق وجايك ,,
فيصل وهو يقعد بين شيبانه : اخذ راحتك عندنا وقت ,,
دخل عبدالله لداخل البيت بعد مااستئذن ,, واستقبلوه الحريم باللولاش ,, والبكي من الفرحه ,, وبدال ماينادي منيره ويطلع ,, قعد بين العجايز وكل وحده ماغير تمس ذا الدموع ,, وذكروا الموتان كلهم ,, كذا عادته اذا فرحوا دوروا على اللي ينكد عليهم ,,
عبدالله وهو يضحك : عاد مايصير كذا ,, اذاكن مستانسين بكيتوا واذا حزنتوا بكيتوا ,, على كذا وش الفرق بين الفرحه والحزن عندكم ,,
ام سعود تأشر على قلبها : الفرق اهنا جعلني افرح بعيالك قريب وبعيال منور يارب ,,
ام محمد : اي والله يااختس الفرحه بالقلب واجده ,, ردت لولوه لك ياامك تفرح حتى الجماد ,,
عبدالله : الحمدالله ,, واسمعوا جعلني ماخلا منكن تراكن بمكان امي جعلها بالجنه ,, ابيكم تروحون وتشوفون شفي خاطر بنت فهاد وانا بالوجه باللي تبيه ,,
ام محمد : ابشر يمك ,, الا متى تبي عرسك ؟؟,,
عبدالله : ماله لزمه العرس شوفوا شالوقت اللي يناسبها وانا بشوف اموري هناك واعطيكم خبر ,,"لف على اخته" يلاا ياامي جناطنا قدها بالسياره ,,
منيره : يلاا اسلم والحقك ,,
طلع عبدالله ولقى فيصل مقرب السياره وواقف عندها يتناهم ,,
عبدالله يقرب من فيصل : نخدمك بالافراع يابوفهاد ,, قلت لك خلك اخلي السايق يودينا ,, كلفنا عليك وطلعناك من دوامك ,,
فيصل يعدل نظارته الشمسيه : مابه كلافه يااخوك ,, وانا ودي بذا الشي ,, من خاطري جايك ,,
عبدالله بابتسامه : تسلم "شاف منور مقبله عليهم" وهاذي منور جات ,,
منيره تقترب بهدوء : السلام عليكم ,,
فيصل يعدل نظارته وبنبرة جليديه : وعليكم السلام ورحمة الله وبركاته ,, شحالس مناير ؟؟
منيره وبان الخجل على وجها : طيبه ,, "رفعت راسها" انت شلونك فيصل ؟؟,,
فيصل تنهد تنهيده اطلعت من خاطره : انا حالي زين ,, يلاا مشينى ,,
***
اللهم اتنا بالدنيا حسنه وبالاخرة حسمه وقنا عذاب النار
***
سيارة خالد بن سلطان
خالد يسوق ومايدري وين موديه طريقه ,, ركب سيارته وداس بانزين وخلها توديه وين ماتبي ,, خاطره ظايق ,, ملكة عبدالله اليوم ,, حزنته واجد ,, وذكرته بجبنه وضعفه ,, وان هو للاسف خالد بن سلطان اللي الرياجيل يعملون له الف حساب ,, جــــبــــان مع مرتبة الشرف ,,
خالد يتنهد ويكلم نفسه : ليه انا كذا ,, ليه ,, وش ناقصني ما وقفت بوجه الكل ,, كني بزر قعدت اتزعل لين راحت من ايدي ,, على بالي اني كذا بخليهم يرضخون ,, بس من متى الناس يستسلمون للجبان ,, بالعكس يدسون عليه اكثر ,, حتى راشد اخوي اللي يمشي تحت امري كان اقوى موقف مني ,, يوم انه مايبي الشي قال ماابيه ,, انا شسويت ,, عاقبت نفسي مهوب امي وابوي ,, بدخلتي لضباط الاختصاص انا اول من خسر ,, اول شي خسرة من اختارها القلب ,, عقبها خسرت طموحي واحلامي ودفنت روحي بالعسكريه ,, بس هانت ,, سلمى بدت عدتها من يومين ,, ولبعد شهرين وثمانيه وعشرين يوم بيشوفون خالد بن سلطان وش بسوي ,, بشوفون بيوافقون برضاهم وبباركون ,, واللي بعارض مهو بشوى له ,, ابدا مهو بشوى له ,,
***
حسبى الله لا اله الا هو عليه توكلت وهو رب العرش العظيم
***
طيارة الخطوط الجويه الكويتيه
المتجهه الى مطار هيثرو
الطياره كانت مستعده للاقلاع ,, وعبدالله ومنيره اللي بالطياره الحين غير عبدالله ومنيره اللي قبل اسبوع ,,
عبدالله يحظن كف اخته بحنان : مستانسه فديتس ,,
منيره وابتسامتها اتسعت : واجد يابوي فوق ماتتصور ,,
عبدالله : شفتي يوم اقولس ربي بسهل كل الامور بس وكلي امرس لربس ,,
منيره براحه : ونعم بالله ,, بدى المهندس بالبيت ,,
عبدالله : بيبدى اخر الاسبوع ,, وعلى نزلتنا بالصيف إن شاء الله بنشوف شسوى ,, وانا قلت لفيصل يتابعه ,,
منيره بابتسامه : إن شاء الله ,, عبدالله فرحان انت ؟؟,,
عبدالله يضحك : وليه السؤال كذا اكييد فرحان ,,
منيره بتردد : عبود انا اسفه ,,
عبدالله وهو يقرصها بخدها : على شنو انتي اسفه ؟؟,,
منيره : على كل شي ,, والاهم اني اسفه بكوني السبب بفرقاك عن لولوه ,,
عبدالله باستنكار : اسفس ماقبلناه ,, لانه مكانه غلط وماله معني ,, "بحنان" منور يااخوس عمرس لا تركبين عمرس خطأ مهو بخطاس ,, طلاقي للولوه السبب فيه هي وانا ,, واظنها تعلمت من الدرس مثل ماتعلمت ,, وان شاء الله اخر الفرقى بينى ذا المره ,,
منيره بحب لاخوها : الله يتم عليه فرحته يااخوي ,, ويرزقك من حيث لا تعلم ,,
عبدالله يحاوطها بايدها : وياس ياخوس ,, ويفرحني فيس قريب ,, بالرجال اللي يستاهل منيره بنت فالح ,, إن شاء الله يارب قريب يااخوس وقتها اكون ملكت الدنيا ومافيها ,,
طلعت قدامهم علامة حزام الامان واعلان الاقلاع انه حان ,, وفرقاهم لاغلى مكان على قلوبهم حان ,, بس اللي يواسيهم المره ذي انهم طلعوا منها فرحانين ,, وبردون لها قريب باذن الله ,,
وبدى ترديد دعاد السفر بالطياره ,, والكل بدى يردد الدعاء ,,
"الله أكبر، الله أكبر، الله أكبر، ( سُبْحانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ * وَإِنَّا إِلَى رَبِّنَا لَمُنقَلِبُونَ )
" اللهم إنا نسألُكَ في سفرنا هذا البرَّ والتقوى، ومن العمل ما ترضى، اللهم هون علينا سفرنا هذا واطو عنا بعده، اللهم أنت الصاحب في السفر، والخليفة في الأهل، اللهم إني أعوذ بك من وعْثاءِ السفر، وكآبة المنظر وسوء المنقلب في المال والأهل"
***
اللهم اعصم لساني من الكذب والنميمه وشهادة الزور
***
بيت سعد بن فهاد
صيته توها قايمه من نومها ,, ومزاجعها متعكر ,, ولدها الكبير بأولى ابدائي واليوم او يوم دوام له بعد عطلة الربيع ,, واليوم عصلق مع الخدامه الصبح مابغى يقوم ,, والخدامه طقت عليها الباب وهي نايمه وسعد نايمه ,, وسعد يوم شافها نايمه ومخليها ولدها صبحها صباحن عدل وطلع النومه من خشمها ,, حطت الخدامه صينيه القهوه عندها وهي صبت لها اول فنجان عشان يدل مزاجها وادق على امها واشوف شخبار العالم ,, والعجايز مكالمتهم الصبح يعني امها ذا الحين عندها حصيله مهي بهينه ,,
دخل سعد لصاله ومبينه العصبيه على وجهه ,, ولف على صيته بمزاجهه المعكر عليها مؤخرا بحط الحره فيها ,,
سعد : انتي يامدام توه يطري عليس تقومين يالجيفه ,,
صيته بعدم مبلاه : أي توني قايمه ,, وشفيك منتفخ ,,
سعد بحره : احح ياصيوت ,, لو تدرين شمسوين ابوي وفيصل ؟؟,,
صيته بلهفه : وش سووا ؟؟,, هااا وش سووا ؟؟,,
سعد بقهر : ردوا لولوه على عبدالله ,,
صيته تشهق : ردت اختك لولوه على عبدالله ,,"وبتشييش" وانت ماعلموك ,, ماكنك اخوهم وواحد منهم ,, تلقى ذالحين مشاري بزر امس مشاورينه وداري وانت اخر من يعلم ,,
سعد : انتي تقولين ,, قلبي ياكلني من القهر بس ماعليه والله مااخليها لهم ,,
صيته : أي ورهم لا تمشيها ,, خلهم يعملون لك حساب ,, اذا سكت بيقولون ذا طوفه هبيطه ماله رايء ولا وجوده ,, بس انت روح ذا الحين وطين عيشتهم ,,
سعد : انتي تقولين ,, ذالحين بقيل عليهم بذا القايله وبطلع ذا العرس من كبد بنت منيره ,,
صيته وهي تشوفه يطلع معصب : أي الله ينصرك عليهم ,, ويخفس فيهم ,,
من شافت سعد طلع امسكت التلفون وبدأت بنشر الخبر ,, والخبر هذا يعتبر فرش بالنسبه لناس ,, يعني هي وامها بياخذون الحق الحصري له ,, وبكونون جابوا خبر ماكان احد يتوقع انه يصير ,, وطبعا ماخلى الامر من تنظل لولوه ,, ومن حش فيها وباهلها ,,
***
اللهم اني قد ظلمت نفسي فأغفر لي فانه لا يغفر الذنوب الا انت
***
امريكا
نيويورك
فجرا
حمد صار له مده متعود يقوم مبكر ,, عشان يمديه يروح موعده اليومي مع الدكتور ,, ويداوم صباحي بالكويتيه ,, وبنهاية اليوم يروح ميرلاند ويشوف ريماس ,,
حمد " يالبى قلب ريماس ,, شوفتها تشرح الخاطر ,, وتريح البال ,, الله يشفيها ,, اليوم انا وطارق ناوين انتغدى مع بعض ,, وبما ان اليوم مافيه مواعيد لرموسه ,, بجيبها بناءً على طلبي وبجي عندي انتغدى هني ,,طارق صديق رائع وتواجده الفتره ذي معي مريحتني حييل ,, ومخليتني حتى ضغط الشغل مااحس فيه ,, وريماس لبى عويناتها ,, فعلاا نورت لي حياتي ,, وطلعتني من الظلام للنور ,, والتزام طارق ساعدني ,, احس بديت اصلي بنفس ايماني قبل ,, قد يكون الدكتور عالج الجانب الدنيوي ,, لكن الجانب الديني ربي بعث لي طارق يعالجه فيني ,, من زمان ماصليت بالخشوع هذا كله ,, ولا صليت كذا مثل مااصلي معاه ,, من زمان حطيت راسي على المخده وقريت الاذكار ونمت براحه ,, فعلاا ماعرفت الراحه بقرب ربي ,, الي بمساعدتك ياطارق ,, الله يجزاه خير ,, ويشفى بنته ,, وينور عيني بشوفت ولدي واهلي وديرتي ,, يارب "
***
اللهم اني استغفر ك واتوب اليك
***
نوره قاعده بقوقعتها او غرفتها ,, دخلت عليها عليها بنتها الصغيره تبكي ,, وتشتتكي ان اختها طقتها ,,
نوره تهز بنتها بعنف : من طقس قولي من ؟؟,,
في بخوف : مي طقتني ماما ,,
نوره ويزداد هزها لبنتها : وانتي ليه تخلينها اطقس ,, ليه ماادافعين عن نفس ,,
في وبكاها زاد : ماما انتي تعوريني ,,
نوره لمت بنتها وبدت تبكي معاها : ياماما ماابيس تصير نفس امس ضعيفه ابيس قويه ,, قويه حييل ,,"هدت بنتها وسئلتها" وين اختس ناديها ,,
طلعت في بسرعه تنادي اختها ,, ثواني وكان مي تدخل الغرفه بخوف وتردد ,,
مي : ماما تبيني ؟؟,,
نوره تمد ايدها : أي ابيس تعالي ,, فيونه سكري الباب ,,"قربت مي من امها لانها تعرف امها مستحيل تأذيها بس نوره تغيرت اللي موجوده الحين نوره ثانيه مسكت مي وبدت اطقها " انا ماقلت لس لا اطقين اختس ,, ولا انتي كنس ابوس منتي بصاحيه ,, تشبهينه بالوجه وبالاطباع ,, هاا شفيس ماتردين ,,
ماكان للطفله أي رد الا بصوت بكائها وشهقاتها ,, لان امها اللي اطقها وابوها بعيد عنها ,, يعني منو بتنادي يفزع لها ,, ونوره اطق بنتها كانها اطق سلمان ,, اطق بنتها قطعه منها لسبب واحد بس ,, من شبها الكبير في ابوها ,, تشوف فيها سلمان وبداية انتقامها منه !!,,
***
اللهم اني اعوذ بك من رفقاء السوء
***
ديوانيه عبدالعزيز بن سعيد
سعود قاعد مع خويه بعد الغدى ,, والديوانيه تقريبا فضت ,, ومعاد باقي فيها الا اصدقاء المقربين والنقاش حامي بينهم ,,
سعود : وليه اسويها ,, خبل انا ,,
عبدالعزيز : الا قول انك تخاف من ام سلطان يابو سلطان ,,
سعود : وعشاني ضدكم بالامر يعني اخاف منها ,,
راكان : جرب ياسعود والله انت تستانس ,, كل وحده ادور رضاك ,, قبل وحده مالها خلقكم ,, اما ذا الحين ثنتين ويادهينه لا تنكتين ,, وابشرك ناوي على الثالثه ,,
سعود : عز الله انكم مانتوا بصاحين ,,
حمود : لا والله صاحين ,, انت جرب منت خسران ,,
سعود وبدى يلين : اعوذ بالله منكم توزون على خراب البيوت ,,
حمود شافه بدى يلين استفزه : اذاك راجال سوها ,,
سعود ثار : انا رجال من قبل لا اعرفك ,,
حمود : يعني شنقول خلاص نويت ,, مبروووك المره الثانيه يابوسلطان ,,
عبدالعزيز : وامرتك عندي ياسعود ,, نسبك ينشرى بملايين ,,
سعود التف لسانه ماعرف شرد ولا شقول خذوه بالموجه ,,
راكان : بالمبارك يابوسلطان ,, شرايكم اروح اجيب المملك ,,
حمود : أي رح في واحد بالشارع الي وراب تلقاه ذا الحين وقت مقيال اكييد مااجود ,,
سعود السانه انربط ,, ومافي باله الا شغله وحده هو خلاص توهق ,, وتدبس عدل ,, كان حاس ان ذا العزيمه وراها بلاا ,, بس ذالحين فكره بوحده نفله ,, نفله قوويه قوويه حييل ,, مايظن ابدا انها ترى بالجاره على راسها ,, مستحييل توافق ,,
***
اللهم اني اعوذ بك من عذاب القبر
***
14-11-09, 11:32 PM
بسم الله توكلنا على الله
لا تخليني جذي كل اشوي داشه على الكمبيوتر بروح الكمبيوتر طرارة
؟؟هههه
جديد مواضيع قسم الارشيف
العرض العادي
