حسبي الله ولله اني كتبت رد وشطوله وانمسح يالله ماعليه بعيده بس عس يطلع مثل اللي متحمسه فيه


شوفي رنو انا وقفت وكررت قرائة المقطع اللي قاله مشاري وهو يدق على الشباب الثلاثه فيصل وخالد بن سلطان ونواف يوم ذكرو سالفة خالد بن سالم بعد مابغوا يزوجون نوف الغريب واعجابهم فيه وضح مشاري انه اطيب من غيره وهو يقصدهم الثلاثه بس منهو اللي تحسس من الموضوع والثاني اللي جبان وهرب والثالث اللي اذا ماتحرك صابه ماصاب الاثنين
انا اتوقع اللي تحسس من الموضوع خالد واللي جبان وهرب فيصل واللي اذا ماتحرك بيصير مصيره مصير الاثنين هو نواف اتوقع انه يحب ساره ويبيها واذا ماتقدم لها راحت منه


زين النوري انتس وليتي الرجال الموضوع ولاقلتي ابو بناتي لايصيبه شي وبتحمل لين الله يفرجها وبستر عليه مثل بعض الحريم اللي تنضرب ليل ونهار وهي تقول ماعليه اتحمل عشان عيالي مالت عليهم
النوري رفض راشد مهوب كسر النفستس انتي ماحبيتيه مجرد تعودتي على قولت انتس الراشد وبرمجتي نفستس عليه حتى انتس ماتخيلتي انتس مرة واحد غيره ويوم قبلتي بسلمان انذليتي له واعتبرتي ان اذلالتس له معناه محافضه على بيتس وتثبتين ان رفض راشد لتس ماثر فيتس
لا يانوره ارجعي زي قبل وان شاءالله ربي يعوضتس باطيب منه


تستاهل ماجاك ياسلمان شوفات آل علي ماتنذل ياللى رجع النوري تقول رنود انك تعشقه اللي يعشق يذل عشيقه مالت عليك بس
دواك فيصل اللي رجع كل اللي دفعته نوره بس ولله الفلوس ماتجبر كسر القلب



فيصل بصراحه اعجبت بقوة شخصيتك ووقفك مع الكل وخاصه بنات عمك وذكائك في حل المواضيع خاصه انك طلبت من سلمان طلاق نوره بدون ماترجع الاحد لانك عارف ان شوفاتك ماتنذل ومن ذلها شين الطبايع سلمان
بس متفأجئه من انك سمحت السعد ياخذ حقك اللي هو منور ولا استخدمت ذكائك في الموضوع


صدقني خالد بن سلطان زواج اللي تحب مهوب نهاية العالم هذي بنت خالك لطيفه عزم عليها وماراح تندم مال البنت يعزها الا ولد عمها
(ماعليه رنود انا من النوع اللي عندي ان البنت عزها في بيت ولد عمها هو مهما كان مايرضى عليها بشينه صحيح تصير بعض الخلافات ويمكن ينتج عنها طلاق بس ماتكون فيها فضيحه لكن الاجنبي يذل واذا بغت الطلاق قال رجعي المهر واذا رجعته له فضحها في الله وخلقه وانها ماتنفع بشي وهي السبب بالطلاق عشان اذا خطب مره ثانيه مايردونه)
وكلامي هذا المها محمد بن سالم ابركلتس من الغريب حتى لوهو زين
توكلي على الله وخذي ولد عمتس



لبي قلب اللي شال الرشاش يدافع عن حقه في النوفي سميتي العربيه
اهاعاد خالد ترى نوف حساسه وجميله ورومنسيه وبريئه مثل سميتها العنقليزيه فديتني ارفق بها تراها قاروره قابله للكسر باي كلمه او فعل لا اوصيك دلعها وغنجها ورزها فوق راسك
رنود بردتس علي السابق قلتي ان تككثر الاعذاربين نوف وجالد هل خالد بيخطي ويعتذر من نوف ولا بيطالب نوف انها تعتذر منه لو ماهي غلطانه
اذا كذا الله يعينك علي بس اربح العافيه واحشم النوفي


مشاري خل عبدالله ولولوه يحلون الموضوع بنفسهم المشكله بينهم وهم ابخص عبدالله عارف وشسوء ولولوه عارفه وشقالت اطلع بس انت منها

اللي بتسوينه يانو عين العقل لاتراجعين المشكله يبيلها رجال يتصرف وخير ماخترتي نواف بيوقفهم عند حدهم خاصه ان الموضوع يتعلق بنوف وحبيبة القلب ساره <<<<<<ياللى خاليت نواف يحب ساره قلت الكلمه وصدقتها
مشكله اللي تخبي على اهلها لين تكبر المشكله اكثر



[SIZE="5"]رنود بارت ولا احلا وضح كثير من الامور اهمها عرفنا سبب خلاف شيخه وحمد مرض حمد النفسي وعزوف خالد بن سلمان عن الزواج وشقال سعد عن منور ورفضه لها
باقي نعر ليش فيصل رافض الزواج الى الان[/SIZE]


أسأل الله أن يباهي بنا وبك عند ملائكته قائلا اني احببتهم فاحبوهم


همسه ترى الرد مكتوب وملون مارجعت فيه حرف بسبب ظهري اللي انكسر من الكتابه يالله عاد رنو جازيني بهديه على تعبي ولله لو شفتيني رحمتي حالي حتى الشوشه طارت من القهر والتعب

المصافحه الثانية عشره




طيبه كلينك
الساعه 11.30 مساءً


نفله صار لها نص ساعه قاعده عند نوره ,, محمد ومشاري راحوا صار لهم شوي ,, ونفله قاعده ومازال الصمت يلف المكان ,, احترمت نفله صمت نوره ,, وعارفه انه بأختياره ,, ولكن هي تتمناها تتكلم ,, تشكي ,, تبكي ,, تنفجر ,, المهم عندها بس تسمع صوتها ,, بس نوره مازلت تنظر للفراغ دخلت عندها نفله ,, ونفله مازالت بانتظار نوره !!
بعد دقائق تكلمت نوره بروحها ,, من غير لا تستجديها اختها للكلام ,, تكلمت عشانها تحتاج للكلام ,, شكت لانها تحتاج للشكوى ,, ومن افضل انسان يستمعى للشكوى ,, اكثر من الاخت ؟؟

نوره وعبرتها واقفه بحلقها : ليه انا يصير فيني كذا ,, ليه ,, انا ماقصرت بحقه ,, ولا بحق بيته ,, ولا حتى بحق من يعز عليه ,, تدرين نفله كنت انا اصرف على البيت ,, قال ماانا مطلعس بشقه لحالس ,, خلاص انتي المسؤله عن البيت ,, وسكت وماقلت شي ,, قلت لنفسي ماعليه يانوره رجلس وماهو مقصر بحقس ,, يحبس ويعزس ,, ويوم بغيتي شقه بحالس ماقال لا وطلعس ,, "رفعت راسها وبدت دموعها تنزل" تعرفين ليه طلعت بشقه لحالي ؟؟ ونزلت راسي لسلمان وصرت كذا ؟؟,,

نفله ودموعها انزلت حزن على حال اختها ,, تفاجأة من سؤال اختها ,, تفاجأة حييل ,,

نفله بتساؤل : ليه ؟؟ ,, ليه من زمان خاطري اعرف ليه صرتي سلبيه ومستسلمه ؟؟!! ,,

نوره اتشر على نفله : صرت كذا عشانس !! ,,

نفله اتأشر على نفسها بتساؤل : عشاني انا !!

نوره وهي تمسح دموعها : اي عشانس ,, مابغيتس تكونين احسن مني ,, مابغيت حياتس تكون احسن من حياتي ,, طول عمري بمقارنه معس ,, فقلت اوري الناس إن حياتي احسن من حياتس ,, طلعت بشقه لحالي ,, ورجلي يمشي اللي ابيه ,, حتى لو ظاهريا ,, بعكسس انت ,, بغيته انتصار لي عليس ,, انتي يااختي ,, مادريت انه انتصار مزيف ,, قبل مااقص على الناس قصيت على نفسي ,, واوهمتها إن حياتي مميزه ومستقره ,,

نفله بتساؤل : بس ليه النوري تقارنين حياتي بحياتس ؟؟!!,, انا اختس واتمنى لس كل الخير ,, ولو حياتس زينه ومستقره بستانس لس وبتمنى لس الاحسن ,, ولو ماتوفقتي انا اول من بيوقف معاس ,, وبتلقيني سند لس ,, ليه فكرتي كذا ؟؟ ليه ؟؟

نوره ونبرة صوتها علت ودموعها انزلت اكثر : انت ليه ماتفهميني ,, اقولس طول عمري يقارنوني فيس ,, كنت مثل التابع لس ,, بس كل مره انتي اللي تسبقيني ,, ولا مره كنت قبلس ,, دايم إنا وراس ,, بس بشي واحد اتفوق عليس ,, بس الشي هذا ,, وهو حياتي الزوجيه ,, وللاسف كسرت نفسي بس عشان اصير احسن منس بشي ,,

نفله شافت اختها ,, بعمر نوره ماكانت انفعاليه ,, ولا بيوم بحياتها شافت اللي عند غيرها ,, طول عمرها قنوعه ,, بس الظاهر اختها تغيرت وهم مالاحظوا ,, والاكيد تغيرت بعد ماخذت سلمان وبعدت عنهم ,, واول تغيرها بدت تلقى اخطائها على الغير,,




***
اللهم إني أعوذ بك من العجز والكسل والجبن والهرم وأعوذ بك من فتنة المحيا والممات وأعوذ بك من عذاب القبر
***



بيت فهاد بن سعد


المها وامها ومعاهم لولوه ولطيفه توهم رادين من العشا ,, ودخل معاهم مشاري اللي كان جايبهم ,, لقوا بالصاله ابوفيصل وفيصل قاعدين وكانوا يتكلمون وسكتوا من شافوا احد يدخل عليهم ,,
سلمو الداخلين وقعدوا مع ابوفيصل وفيصل ,,

فيصل بابتسامه كبيره : يامرحبا ,, يامرحبا بخواتي ,,

لولوه وهي تقعد جنبه وتحب خشمه : مرحبا بك باقي فديتك ,, وينك من زمان عندك ,,

فيصل تتسع ابتسامته : ويني ؟؟ انتن اللي وينكن ,, ماتقرن بذا البيت ,, شكلي بتحسف يوم سوقتس ومسكتس السياره !!,,

لولوه تضحك : افاا ,, اتحسف يااخوي !! ليه اتحسف ؟؟

فيصل : والله يااختي العزيزه اتحسف لانس معادس محتاجه لي مثل قبل ,, يعني ذا اللحين كل ماطرت عليس دوجه ركبتي سيارتس ودقيتيها سلف ورحتي ,,

لولوه بنظره امتنان لفيصل : محتاجين لك دووم جعلنا مانذوق حزنك ,,

فيصل : ولا حزنس فديتس ,,

ابو فيصل بهدوء : المها تعالي معي ,,

المها قامت بهدوء وراء ابوها ,, وانظار امها واخوانها تتبعها ,, شافوها تدخل مع ابوها للصاله الداخليه ,, واسمعوا ابوها وهو يأمرها تسكر الباب ,,


بالصاله الداخليه عند ابو فيصل والمها ,,

ابوفيصل : شلونس يابوس ؟؟ ,,

المها : بأفضل حال ولله الحمدالله فديتك ,,

ابو فيصل : اسمعي ياأبوس في واحدن جاني يخطبس ,, وسألت عنه ,, والناس يذكرونه بخير ,, اسمه محمد بن منصور ,, وعمره تسعه وعشرين ,, ويشتغل بالاشغال ,, مهندس هو ,, فشرايس يابنتي ,,

المها : يصير خير ,, بستخير وارد لك خبر ,,

ابو فيصل : كم تبين وقت ,, يكفيس اسبوع ,,

المها بخجل : يكفيني إن شاء "قامت بتطلع" تامرني على شي ثاني فديتك ,,

ابو فيصل : لا جلعني قبلس ,, بس ادعي لولوه لي ,,

المها : ابشر ,, تصبح على خير ,,

ابو فيصل : وانتي من اهله ,,

طلعت المها من ابوها ,, وشافت اخونها مازالوا بالصاله بس تنقصهم امها ,, والنقاش كما يبدو ,, وكالعاده محتد بين فيصل ومشاري ولولوه ولطيفه مستمعه بينهم ,, اول ماشافوها نقز مشاري يسألها ,,

مشاري بخبث : وش يبي فيس ابوي ,,

المها وجها صار احمر : مهوب بشغلك "لفت على لولوه" لولو ابوي يبيس !! ,,

لولوه تأشر على نفسها : يبيني انا ؟؟!! ,, ليه !!؟؟ ,, فيصل وش يبي مني ابوي ؟؟,,

فيصل يهز كتوفه : وانا شدراني ,, روحي بتعرفين ,, مهووي شخبار شغلس ؟؟

لولوه راحت لابوها تشوفه شيبي فيها ,, وقلبها اشغلها ,, لان ماهي من عادة ابوها يبرز فيهن وحده ورا الثانيه ,, وهذا خوفها ,,

لولوه : لبيه يبه ,, دعيتني ؟؟ ,,

ابو فيصل : اي دعيتس ,, اقعدي بتحاكا معس ,,

لولوه تبتسم وتقعد : وهاذي قعده يابوفيصل ,, ياامري ياالغالي ؟؟,,

ابو فيصل يبتسم : مايامر عليس عدو ,, ويابنتي عبدالله حاكني يبي يردس ,, وانا المره ذي حسيت إن حنا ماقصرنا في بسفهانه وبسفهان من كان يرسلهم ,, بشرايس يابوس ؟؟!!,, تراه ولد عمس وكان رجلس وانتي خابرته ,, وهو غلط واعترف بغلطه ,, وعقبناه طوال ذا السنين ,, ولو انه مهوب بشاريس كان اعرس من زمان ,, وانتي تدرين إن نسبه طمع للجميع ,, ومحد بيرده اذا جاه ,,

لولوه تتنهد بضيق : ادري يبه ادري ,, بس وش رايك انت واخواني ؟؟,,

ابو فيصل : رأينا من رايس ,, انتي فكري واستخيري ربس ,, بس هاا لا اطولين ,, لان عبدالله طيارته بعد ثلاث ايام ,, ووده يجيه الرد قبل لا يروح ,,

لولوه : افكر وارد عليكم ,, بس رايك يبه انت واخواني يهمني ,,

ابو فيصل : انتي فكري ,, وعقبه بنعطيس راينا ,,

ابو فيصل وهو يقوم من مكانه ,, بيطلع من الصاله الداخليه ,, ولولوه تتبعه وفكرها انشغل ,, لدرجة انها مرت وشافت اخوانها مازالوا مستمرين بسوالفهم ,, وينادونها بس ما ردت عليهم ,, وصعدت الدرج رايحه لغرفتها وهي تردد دعاء الاستخاره

" اللهم اني استخيرك بعلمك واستقدرك وأسألك من فضلك العظيم فأنك تقدر ولا أقدر
وتعلم ولا أعلم وأنت علام الغيـــوب ..اللهم ان كنت تعلم (( وهو رجوعي لعبدالله ))
خير لي في ديني ومعاشي وعاقبه امري فأقدره لي ويسره لي..وان كان هذا الامر شراً لي
في ديني ومعاشي وعاقبه امري فأصرفه عني وأصرفني عنه وأقدر ليي الخير حيث كان
ثم رضتي به"



***
اللهم اني استغفرك واتوب اليك عني وعن والديني وعند المسلمين والمسلمات الاحياء منهم والاموات
***



الكويت
بعد يومين

ابو محمد وام محمد ودروا باللي صار لنوره ,, وكان غضب سالم كبير ,, وغضب خالد اكبر منه ,, ولكن ماكانوا يقدرون يسوون شيء ,, لانه من ثاني يوم جاهم ابو سلمان ومعاه كبار جماعتهم ,, يعتذرون ومعاهم ورقة طلاق نوره ,, والفلوس اللي طلبها فيصل ,, وفوقها ضعفها من ابو سلمان ,, بس رفض ياخذ ابو محمد شي غير المتفق عليه بين فيصل وطلال اخوي سلمان ,, وشرط اخر من سالم انه مايشوف سلمان عنده بديوانيته ,, وان حضانة البنات لامهم ,, وابوسلمان قال إن الشيء هذا مافيه خلاف وانهم باللي يامر فيه ابو محمد ,, طبعا خالد ماسمحت نفسه من سلمان وراح يدوره ,, ولقاه مكسر ضرب نواف مبين عليه ,, فماقدر يسوي شي ,, يعني وجاهة الرياجيل من صوب ,, وانه مايقدر يضرب رجال مهوب بقادر يدافع عن نفسه من صوب ,, بس حلف وقال قدام الرياجيل جميع ,, انه اذا شاف سلمان ماراح يخليه ابدا ,, وهو انذرهم ,, واذا سلمان مايبي الشر هو يبعد ابرك ,, وطبعا وين يبعد سلمان ,, خالد مصادفه مصادفه ومشفي غليله ,,

ام محمد ,, بحكمتها الدائمه حضنت بنتها الي من امس طالعه من المستشفى ,, ووكلت امرها لربها ,, واذا كان لبنتها حق فلترفع ايدها لربها ,, وكل حقها بيجيها ,, هي عرفت هذا الشي من جاتها شيخه مطلقه ,, وما رفضت طلاق شيخه قبل عشان ترفض طلاق نوره ذالحين ,, ذا نصيب وربي كاتبه ,, بس حالة نوره ازعجتها لجزء من الثانيه ,, بس بعد هذا الجزء عرفت انه مافي احد يقوي بنتها الا هي ,, وهي محتاجه نوره ,, وفي ومي محتاجين نوره حيييل ,,

نوره ,, جبر المستشفى جرحها صح ,, لكن جرحها الداخلي اكبر واكبر ,, وخجلها من اهلها ومن عمامها كبير ,, لانها صارت بنظرها مفضوحه عند الكل ,,

منيره ,, مو فاضيه ابدا الايام ذي اجهز للسفر ,, وبعد هي وعبدالله يجهزون تصميم بيت ابوهم اللي اهجروه ,, ومن امس خلصوا كل التصاميم وسلموا المقدم للمهندس ,, واتفقوا معاه إن اذا ردوا بالصيف ,, يلقون العظم الاسود خالص ,, وهو وعدهم خير ,,

عبدالله ,, انشغل مع منور وطلباتها ,, بس باله وفكره مع عمه ,, هو يستحي يسئل مره ثانيه عن الرد ,, لانه واثق عمه بيزفه ,, وسئل فيصل وخلاه مسرحيه ساعه يطنز عليه ,, وبعدها حرم ,, اذا عندهم رد اكيد هم بيبلغونه

نواف رد اليوم للاردن ,, وتحرك لانه خاف يكون في مجال مقارنه مع غيره مثل محمد بن سالم ,, كلم امه انه يبي لطيفه بنت خاله ,, وكلم فيصل ووعده خير ,, بس رفض فيصل اي قبول اكيد منه الا اذا رد بالماستر ,, وقتها فيصل بنفسه بيخطبه لاخته ,, وارتاح باله ,, وبالنسبه لموضوع نوف وساره ,, طلعوا اللي ناشر الاسم من IP بشركة الانترنت ,, وقدموا شكوى ,, واللي يمشي فيها حاليا مشاري ,,

نوف و ساره ,, مشتركين بكل شي حتى المصايب ,, طبعا عوقبوا ,, لان ساره بخبالها هي متحرشه بالشله ,, كانت كل ماتشوفهم تستغفر بصوت عالي ,, والشي ذا نرفزهم ,, وانتقموا بطريقتهم ,, وكان عقاب ساره ونوف بالنسبه لهم مميت ,, والعقاب هو انهم ممنوعين من شوفة بعض اسبوع ومايكلمون بعض حتى بالتلفون ,, وماله شوفه الا بدوام الكليات والجامعات اللي بيكون بعد سبوع ,, وهذا طبعا ذبحهم ,, واستمرت نوف بالبكاء ,, واستمرت ساره بالصراخ والاعتراض ,, لكن عمك اصمخ !!,,

نفله ,, استغربت كلام نوره معاها ,, وعرفت انه من حالتها النفسيه ,, واوعدت نفسها انها بترد نفس قبل مع اختها ,, وبترد علاقتهم مثل قبل واحسن ,, وبتعتبر انها ماسمعت شي من اختها ,, ولا شلون تكون اخت اذا مامشت لاختها !!,,

مشاري ,, استلم سالفة نوف وساره من نواف ,, ومات ضحك يوم راح بيت عمه ولقى ساره قاعده بالحديقه ومحاربه اهل البيت كلهم ,, ضحكته حيييل ,, وعرف إن البنت كان خبله وبتبقى خبله ,, يعني ما في مجال اتغير ,, وبالنسبه لموضوع لولوه ,, مازال ينطر ردها ,, وردة فعله بتكون على ردها ,, هو ماراح يعترض على رايها ,, بس بيضمن مستقبلها بالصوره اللي ترضيه ,,

لولوه ,, مازالت مستمره باستخارتها ,, اجهز لدوامها ,, ويمكن هذا كان مريح بالها من التفكير شوي ,,

المها : مازالت مستمره بدوامها اللي ماخذ كل وقتها ,, ومازالت مستمره باستخارتها وبتشوف ربي شيقسم لها ؟؟,,

لطيفه ,, الكل لاحظ تغير لطيفه ,, وطبعا للاحسن ,, والفضل كله بعد الله ,, لساره ونوف ,, وحاليا هي صلة الاتصال بينهم ,, وفعلاا مستانسه على هذا الشي ,, لانه غير روتينها ,, وغير حتى في شخصيتها ,,

خالد بن سلطان ,, تحرك عبدالله حرك فيه اشياء واجد ,, واولها حبه القديم ,, واصله خبر انها تطلقت ,, اذا بيعتبر اناني ,, ماعنده مشكله يكون اناني ,, بس المره ذي بيحارب العالم عشانها ,, وبظنه انه امه المره ذي ماراح تعارض حتى لو انها كانت مطلقه ,, اهم شي سلمى تكون له !!,,

شيخه ,, فكرها مشغول بنوره اختها ,, وبلولوه وردتها لعبدالله ,, ومنيره وسفرها ,, والاهم بعزوز اللي اكثرت اسئلته الايام ذي عن ابوه ,,

محمد بن سالم ,, نوره اخته مقطع قلبه ,, بس في باله شي واحد انه بيعوضها ,, وبيجبر كل شرخ فيها ,, وبالنسبه لخطبته للمها هو عارف شي واحد انه اذا للامر خيره له ولها بيتسر ,, واذا منه شر الله يوفقه ويوفقها ,, وهو لله الحمدالله مستخير ربه بالخطبه ذي ,, وموكل امره لربه ,,

سعد ,, درى انه ماله امل بمنيره ,, فاشغل باله بأشياء ثانيه ,, بنظره هي الاهم ,,

حمد ,, سافر حسن صار له يومين ,, ورحلاته لميرلاند صارت تقريبا يوميه ,, شوفة ريماس بنت طارق محببه لقلبه ,, يحس كأنه يشوف عزوز فيها ,,

فيصل ,, في مشغول حيييل ,, باله مع خواته ,, وباله مع اخوانه ,, وباله مع بنت عمه ,, يعني باختصار يحاتي الجميع الا نفسه ,, الظاهر مهو بناوي يفكر فيها ,, وبالنسبه لدوره ,, بيكون سفره بعد اسبوعين ,, وبتكون بمنطقه قريبه من منطقة عبدالله !! ,,


***
اللهم اني ظلمت نفسي فأغفر لي
***