سورة الكهف




المصافحه الحادية عشره


الجواخير

فيصل يسوق بعصبيه ,, ووده إن سلمان الحين قدامه ويقطعه ,, هو من اول مهوب عاجبه سلمان ,, وماتوقع عمه يوافق يزوجه نوره ,, لكن مادرى بالخطبه ولا بالملكه ,, كان وقتها عندهم معسكر ومنقطع عن اهله ,, وصدمة حياته يوم طلع وسمع بالخبر ,,
هو توقع إن الزواج هذا ردة فعل من عمه سالم على عمته شيخه ,, لان الكل توقع راشد ياخذ نوره ,, ولكن هذا نصيب محد يقدر يرده ,, ولا يوقف قدامه ,, وراشد كان صريح قال إن نوره مثل اخته ولا يبي يظلمها ,, واصلاا هو بخاطره هيا من زمان ,, فليش يظلم نوره ويسبب مشاكل بين الاهل وهو بخاطره هيا ,, يعني كأنه يتزوج بنية طلاق ,,
وام سعود وقتها كانت خايفه لاتعيي على راشد ويصير مثل خالد بن سلطان ,, يوم انه طلب بنت تدرس معاه بره ,, واهله عييو يخطبونها وراحت البنت بنصيبها ,, ومن بعدها وهو رافض العرس ,,
فيصل خذته افكاره وهو معصب كان مهو امييز بس يدوس على البنزين ويطمر على الرصيف مايهمه ,, بس وقتها مايفكر الا اذا مسك سلمان وش بيسوي به
سمع خالد بن سلطان جنبه يكلم ,, ومن كلامه مبين يكلم نواف

خالد بعصبيه : خلااص
اللفه الجايه
انت عند الجاخور
خلاص جايينك
لا تدخل
انطرنا سمعت
يلاا

فيصل بصوت اشبه بالصراخ : الف اللفه ذي

خالد : اي ذي "ولف فيصل بسرعه لدرجة حس خالد انهم بينقلبون"
فيصل شوي شوي ,, تراك بتعدمنا عشان واحدن مايستاهل

فيصل فضل الصمت هو مهوب بفاضي يرد على خالد فكره مركز على شخص واحد ,, الشخص هذا استباح حرمتهم ,, استضعفهم ,, واستقوا على اللي اضعف منه
وقف فيصل سيارته وشاف نواف ينطرهم عند بوابة الجاخور نزلوا فيصل وخالد من السياره وشافوا نواف مقبل عليهم ,, ووجيهم ثلاثتهم غاديه سود من الغضب

خالد يتحاكا مع نواف : انت متأكد انه إهنا

نواف : إي ,, إنت ماتخايل سيارته هذاهي واقفه

فيصل : معه احد ,, ولا لحاله

نواف : فيه كم سياره ,, بس مدري معه احد ولا لا

تقدم خالد وضرب بوابة الجاخور وفتح له الهندي ,, وبدون لا يسئلون الهندي عرفوا مكان الديوانيه لانها كانت المكان الوحيد المنور بذا الليل ,, وفعلاا كان صحيح دخلوا لقوا سلمان قاعد مع ربعه ,, وكانوا معارف لخالد وفيصل ونواف بعد ,, سمعوا واحد منهم يرحب فيهم ,, لكن اكثر مانبهم وجهه سلمان اللي انخطف لونه ,, لان شكله حس إن وجودهم هني وراه مصيبه له ,,

الرجال : يا مرحبااا ,, يامرحبااا مليووون ,, والله ذي الساعه المباركه

فيصل وهو يخاشم الرجال : مرحبا باقي ,, وش حالك ياوجه محلف

الرجال : طيبين طاب حالك ومالك ,, اقلطوووا اقلطوووا ,, القهوه ياولد

نواف : لا ياوجه محلف مشغولين بس لنا حاجه بناخذها وبنطلع

الرجال وبان بصوته الغضب : افااا ,, ترضاها على ياوجه محلف ,, توصلون لمكان ومايجيكم حقكم ,,

خالد يمسك ايد نواف قبل مايتكلم بمعنى اسكت

خالد : ابشر ياوجه محلف ,, لكن والله مايجينا غير القهوه

الرجال وبانت الضيقه عليه من حلف خالد عليه : والله انك عومستني يابو سلطان ,, المهم تقهووا

سلمان وفيصل كانوا مستمعين للحديث ونظرات سلمان كانت تحدي مبطن والحقيقه احساسه خوف ,, لان مستغرب وجودهم بذا المكان ومستغرب بعد نظرات فيصل ونواف الغاضبه ,, طرا على باله كل طاري الا طاري واحد ,, إن نوره تحاكة وعلمت احد عنه ,,
بعد ماتقهوا الرياجيل وخلصوا ترخصوا من الرجال بيروحون ولكن استغرب طلبهم

فيصل بدهاء ولانهم كانوا يدقون على سلمان مغلق جهازه : كثر خيرك يااخوك "لف على سلمان" يلاا يابو هادي تخاوينا

سلمان بتهكم : وين اخاويكم

فيصل ببراءه : ابوك تعبان ومن متى وحنا ندق عليك تلفونك وهو مغلق ,,

سلمان بخوف : ابوي شفيه "ويطلع جهازه من جيبه يبي يفتحه"

فيصل بسرعه : الحين انت امش معنا وافتح جهازك وشوف المكالمات بالسياره ,, يلاا ياأخوك هو طالبك يبيك " ويقوم بسرعه وايشر عليهم يقومون بسرعه"

طلع فيصل وخالد نواف وشافوا سلمان يمشي بسرعه وراهم وهو يفتح تلفونه ,, ومن حسن حظهم انه من توتره كان يغلط بأدخال الرقم السري لحد ماوصل ثلاث محاولات ,, وسلمان من توتره مافكر الا إن خلاص البطاقه احترقت ,, كان الله ايسهل كل اللي في بال فيصل ,,
وفعلاا من طلعوا من الجاخور وسياراتهم سافطه بره ,, شاف فيصل إن سلمان رايح لسيارته بيروح فيها

فيصل يمسك سلمان : وينك رايح يابو مي

سلمان بأستعجال بيطلع تلفونه الثاني بالسياره : بروح بسيارتي

فيصل بصقاره : لا ياأخوك انت مشتت مهوب زين لك اتسوق ,, عط السويك (المفتاح) لخالد ويلحقنا بسيارتك ,, ووانت تعال معي

سلمان يطلع سويكه ويحذفه على خالد ويروح بسرعه يركب بسيارة فيصل ,, وخالد ونواف فهموا على فيصل ,, وعرفوا إن فيصل يبي يطلع سلمان من جاخور الرجال اولا عشان ما ينفضحون عنده وهم عيال عم وجماعه ,, وثانيه عشان مايطري على سلمان انه يستفزع بالرجال ووقتها محد يقدر يقرب منه ,, وثالثا وهو الاهم انه لو فكروا انهم يأدبون سلمان بمكان الرجال فهو عيبه بوجه الاجنبي ووقتها بصير غريم لهم ,, وبدال لا المشكله تكون بينهم وبين سلمان يمكن بسبب قل عقل وتدبير تصير مشكله بين قبيلتين ,, وطبعا هذا اخر شيء يبونه ال عِلي انه يكون من يشبون حرايق بين القبايل ,,

فيصل وهو يسوق ويسحل عينه بسلمان جنبه ويشوفه وهو يدخل العشر اصفار عشان ترد الشريحه ,, وكان من حسن حظهم انه سلمان تو يفطن فيها ,, سمع صوت التلفون ينفتح والمسجات بدت تهل على سلمان ,, وعرف إن سلمان بيكشفهم ,, فأول ماطلع من طرييق الجواخيير لف على الطريق الي بين الجواخير والمزارع وعرض سيارته ,, ونواف وخالد سووا نفسه ,, وماحس فيصل بنفسه الا هو زار سلمان من دشداشته ,, وخالد يفتح بااب سلمان بقوه وهو يبيه ,, ونواف وراه ,, كأنه كل واحد منهم يقول جعلني الاول ,, لان مهوب هم الي يستفردون بواحد ,, هد فيصل سلمان وعيونه جحضت من الخوف ودرى انهم دروا ,, دروا بسواد وجهه

سلمان يردد بخوف : وش فيكم ,, وش فيكم ,, والله ماسويت شي

خالد وهو يسحبه ويطلعه من السياره ويدزه على التراب ,, والسيارات محاوطه المكان ,, عشان محد يشوفهم ,, بس لازم يخلصون بسرعه لانه وقوفهم بسوي لهم شبهه ,, وقتها قرب منه فيصل وزره

فيصل : انت يالخسيس تستقوى على نسوانا ,, انت !! ,, غيرك مااستجرى "بغضب كبير وصراخ" الاجناب وهم الاجناب ماسوى بشوفاتنا كذا ,, انت يابن عمنا تسوي فينا كذا ,, "بتهديد" بس والله وانا ابن عِلي مااخليها لكن ,, "لف على نواف" نواف

نواف لف على فيصل بأستفهام

فيصل : حيلك فيه ,, " لف على سلمان " شفت ياالرخمه نسوانا ارجل منك فشلون رياجيلنا ,, انا وخالد بنتفرج ,, ونواف بيوريك شين من الي جاا للنوري

ابعد فيصل وخالد ووقفوا متفرجين على نواف وسلمان ,, هم ارجل منه عطوه فرصه يدافع عن نفسه ,, ومااجتمعوا عليه ,, خلوا هو و نواف ند ولند ,, حطوا اقرب واحد له سن ند له ,, ولا حط فيصل نفسه هو ولا خالد قدامه لانهم عسكريين وللعسكري قوه مهي بعند المدني ,, فكان نواف انسب له ,, وشافوا سلمان استسلم بسرعه وكان نواف يضربه بقهر بقلبه ,, لانه عندهم جميع اي وحده بنسوانهم راسها براس رجال ,, وسلمان عند نواف كنه مستقوي على محمد بن سالم خويه وولد خاله ,, فهذا شحنه وخلاه يضرب بدون لا يحس ,, ماحس الا بفيصل يوقفه ,, وهو يسمع ونين سلمان تحته

فيصل بحزم : بس خلاص "نزل نفسه لسلمان الي طايح على التراب" يابن هادي انت تعرف ليه حنا سوينا فيك كذا ؟؟

سلمان بضعف وجسمه كله انهد ويحس الدم ملا وجهه : لا ,, ليه سويتوا كذا ؟؟

فيصل : سوينا كذا يابن العم ,, لان حنا عطيناك شوفتنا ,, وانت ماحشمتها ,, واذا تذكر انا قد قلت لك النوري وغيرها من بنينا(بناتهم) راسها براس رجال ,, "ويدز راسه باصبعه بقرف" بس الظاهر انت وقتها مخك مقفل ,, وهذا حنا فتحناه لك عشان لااعرست مرتن ثانيه تحشم بنات العرب ,,

سلمان بخوف : ومن قال بعرس مرتن ثانيه ؟؟!! ,, انا ابي مرتي ,,

خالد بغضب : خلاص الامر طلع من ايدك ,, بنتنا بتعود علينا ,, وبكره اذا ماطلقت والله ماتمسي ليلها "بغضب اكبر" سمعت ولا لا ؟؟

سلمان بخوف : خلاص سمعت

فيصل : شوف ذا الحين بناخذك وبوديك العدان ,, وانا بطلع ماني بقاعد عندك احرسك ,, "بتهديد كبير" واذا سمعت بس سمعت هااا ,, انك جايب طارينا ,, الله لايكون غريمك انا وان مايردني عندك الا صبحان (مقبرة صبحان)

تعاونوا عليه وحذفوه بالسيت الثاني بسيارته وساقها خالد ووراه نواف وفيصل ,, ووصلوا العدان ونزل خالد وطلب مساعده لانه معاه حاله ووقف ينطرهم ياخذون واول ماخذوه شاف الممرض يحرص عليه يجي معاه ,, لانه اكييد شاف اثار الضرب ويبي خالد يجي معاه عشان يعطي اقواله للمحقق ,, وفعلاا وقف خالد بثقه عشان مايشك فيه الممرض واول ماشافهم ادخلوا خذى السياره وصفطها وراح ركب مع فيصل اللي واقف قدام مستشفى سلمان الدبوس للقلب ينطره ,, واول ماركب سمع فيصل يتكلم بالتلفون ,, وفهم انه يكلم اخوو سلمان ,,

فيصل بحزم : شوف يابوهادي الوجه من الوجه ابيض ,,
هذا هو اخوك طايح بالعدان ,,
اي طايح بالعدان "بغضب" اصلاا احمدوا ربكم ما خليتكم بكره تصلون عليه ,,
اسمع والله ثم والله ثم والله ,,
وشوفني حلفت ثلاث مهو بمره اذا بكره ماشفت ورقة طلاق نوره عندنا ,,
والله إن يصير كل ال عِلي بوجهكم معادهوا بس انا ,,
وانت تعرف فعلت اخوك وشينها ,,
وهذا فعلي والشيبان عادهم ماعندهم علم ,,
المهم ,,
ماتهمني اعذارك ,,
شف سلمان ساحب من حساب نوره ست الاف دينار ,,
اي ست الاف ,,
وتصوير البنك وهو يسحب موجود ,,
شف عاد انا كذا ماني بصاحي ,,
مانبي حشمتكم ,,
اسمع تراك تقاطعني واجد ,,
اسمع انا ماابي ست الاف انا ابي السته وفوقها عشرين الف ,,
اي عليك نور سته وعشرين الف ,,
السته فلوس نوره ,,
والعشرين على سوايا اخواك ,,
اسمع ترا هذا اخر كلامي بكره مع ورقة الطلاق توصلني السته وعشرين الف ,,
يلاا انتهى اتصالي ,,
رح بس رح شوف اخوك لابارك الله فيكم ولا بالله اللي عطيناكم بنتنا ,,

خالد وهو يشوف فيصل يحرك السياره وابتسامة رضى على شفاه : زين سويت ,,

فيصل : هاا حذفته عساه ما يقوم ,,

خالد : اي ,, "بتساؤل" وينك رايح ؟؟

فيصل : بروح لنوره اشوف شخبارها ,, وبطلب تقرير بالحادث ,,

خالد : ليه ماخلصت منه ؟؟

فيصل يبتسم بقهر : خلصت !! لا والله ماخلصت ,, بس نعنبا القرب الي خلاه قريب ,, باخذ التقرير عندي احتياط عيا يطلق وقتها جرجرته بالمحاكم وخليته يبكي كنه بزر ,,

خالد صمت بتأيد فعلاا كلام فيصل صحيح ,, سلمان طول عمره ماله كلمه وحده ,, وينخاف يهون ووقتها التقرير موجود ,, وقتها ياسواد ليله على ايدهم !!!



***
اللهم صلي وسلم على سيدنا محمد وعلى آله وصحبه اجمعين
***


بيت سلطان بن سعود
وقت العشاء


صارلهم فاتحين البوفيه نص ساعه والاغلبيه تعشوا ومشوا ,,مابقى الا الاحباب والاقراب من القلب ,, واول الباقين اقصرا (جيران) نوره بنت عبدالله الله يرحمها ,, وغلاة منيره عندهم من غلاة ام عبدالله الله يرحمها

منيره : الله يسلمس يام فهد وجودكم يكفيني

ام فهد قصيرت ام عبدالله : ابوتس انتي ماتعرفين غلاتس ,, والله انه غلاتس من غلاة المرحومه يامال الجنه

منيره بخجل : الله يسلمس

ام فهد الي كانت حاظره هي وبناتها وحريم عيالها وبمثلها باقي اقصرى ام عبدالله الله يرحمها ,, كانوا كلهم جايين لعشا منيره ,, ويشفون فيها امها الله يرحمها
ماسمعت منيره الا ام فهد هي وبناتها بعد العشا يوم وقفوا صفين داخل الصاله وبدوا يقصدون فيها

ام فهد هي وبناتها بترديد واحد : هلولوا ياعباد الله
هلولوا ياعباد الله
والشياطين نخزيها
والشياطين نخزيها

وقفوا بنات ال عِلي مع احبابهم معاهم يرددون الصفوف : هلولوا ياعبادالله
هلولوا ياعباد الله
والشياطين نخزيها
والشياطين نخزيها

ام فهد وبناتها : والكويت غدت خضرا
والكويت غدت خضرا

البنات بترديد : والكويت غدت خضرا
والكويت غدت خضرا

ام فهد وبناتها : يوم منيره مشت فيها
يوم منيره مشت فيها

ومنيره كانت ترقص وتتامل بين الصفين بفرح ,, وسرور ,, واحساس بالاكتفاء ,, نعم اكتفاء ,, اكتفاء من السرور ,, اكتفاء من السعاده ,, اكتفاء من الرضى ,, والاهم اكتفاء من الحزن

شافت منيره قدامه عجوز تراقصها كانت ماتشوفها لانها معطيتها ظهرها ,, بس لمى لفت شافتها ووقتها فرحت اكثر ,, كانت ام سعد تراقصها ودموعها تنزل من عيونها ,,لانها ظلمت منيره وااجد بس منيره سامحت وعرفت إن ام سعد كانت ام وتدافع عن اخطاء ولدها ,, قد تكون دافعت بطريقه غلط ,, ولكنها ام والام ببعض الحالات لا تلام ,,
رقصت منيره بفرحه مع ام سعد ومع غيرها لانها من كثر اللي كانوا يراقصونها كانت ام فهد وبناتها يدخلون من قصيده لثانيه ,, ومن قصيده لثانيه منيره تفرح اكثر ,, واكثر


***
اللهم صلي وسلم على سيدنا محمد وعلى آله وصحبه اجمعين
***



بنفس المكان
بيت سلطان بن سعود
بشقة سعود بن سلطان

كانت نفله ماسكه تلفونها بعصبيه ,, توه مسكر محمد منها ,, وقالها عن اللي صار لنوره ,, هي كانت تتوقع اشياء واجد من سلمان ,, الا الضرب ,, الا الضرب ,, طبعا مهو من حسن اخلاقه مايضرب ,, لا تعرف إن سلمان خواف ,, واكيد انه كان بيفكر قبل لا يمد ايده بعزوة نوره ,, ولكن للاسف هذا كان متوقع ,, استسلام نوره وسلبيتها هي اللي وصلتها لذي المواصيل ,, نوره تحطمت بعد رفض راشد لها ,, وللاسف سلمان ماجبرها لا كسرها زياده ,, وهي كسرت نفسها اكثر ,,

نفله "ياربي شسوي انا ,, شقول لامي تحت ,, امي كانت حاسه ,, طول اليوم ماغير تقولي دقي على نوره ,, دقي على نوره ,, وانا اكذب عليها واقول كلمتها وهي عند بنتها ,, لحد ماقالت دقي لي عليها ,, وياليتني مادقيت رد على محمد وقالي بقولس امر ابعدي عن النسوان ,, ورحت لامي وقلت لها نوره نايمه ,, وصعدت لشقتي وصدمني محمد ,, سلمان قد يكون طماع وجبان ,, ولكن للاسف نوره سوته كذا ,, اي نعم نوره ,, نوره بعد رفض راشد لها ,, وللاسف بغلطنا حنا علقناها براشد ,, ماكان لنا سيره قدامها الا براشد ,, وهي كانت غير عنا كلنا ,, شخصيه حالمه رومنسيه ,, وصدمنا راشد برفضه لنوره ,, انا اعترف اول شي زعلت ,, بس بعدين وزنتها بالعقل ,, معاه حق ياخذها وهو بخاطره غيره ,, وقتها كان بيظلمها ,, بس مادرى إن غيرك بيظلمها ,, وهي بتظلم نفسها ,, تدرون شلون ظلمت نفسها ,, ظلمت نفسها لان سلمان ماكان سيء لدرجه كبيره ,, بس هي خلته يوصل لهذي الدرجه ,, نوره في بالها إن الحياه المثاليه المستقره تكون باستسلام الزوجه للزوج ,, وتكون فيها الزوجه لعبه يحركها زوجها ,, وشيدت حياتها على هذا الامر ,, انا اعترف سلمان يحب نوره ,, ومو بس يحبها يعشقها ,, ولكن للاسف ذي سواة نوره بعمرها ,, ذا فعلها بعمرها "




***
اللهم صلي وسلم على سيدنا محمد وعلى آله وصحبه اجمعين
***



امريكا
نيويورك


حمد كان على رأس عمله بمكتب الكويتيه بنيويورك ,, طلب انتداب من شغله بالكويت الى نيويورك ,, وافقوا وصارله له ثلاث ايام يداوم
حمد كان قاعد بمكتبه الي جهزوه له بمكاتب الكويتيه هناك ,, وكان احد اصدقاءه موجوده بنيويورك حاليا ,, ومر يزوه

حسام : كابتن ,, في هيدي الاوراق بتحتاج توقعيك

وقع حمد الاوراق ولف لصديقه يكمل حديثه : وكم صار لطارق الـ ... موجوده عندنا

حسن : صارله اسبوعين ,, ليش انت ماعندك خبر ,, عاد اهو ياي عن طريق الكويتيه ,, وعلاج على حساب الدوله

حمد : لمن علاجه

حسن : والله لبنته الصغيره ,, الي كبر ولدك

حمد حسن ضرب عنده على وتر حساس ,, ولده ,, اللي مايعرف ذالحين باي حال هو ,, ومايدري اذا ولده شافه بالشارع بيعرفه ولا مهوب معارفه ,, وذا الشي كان يجرحه ,, يجرحه واجد

حسن : حمد ,, حمد

حمد : هلاا

حسن : هلاا فيك يااخي ,, احاجيك انا ماتسمعني

حمد : لا اسمحلي ماسمعتك ,, شقلت

حسن : اقولك ,, شرايك باجر نروح بلتمور نزور بنت طارق ,, لان انا رحلتي بعد باجر

حمد :ليه هي بمستشفى جون هوبكنس

حسن : اي موجوده فيه ,, شقلت تروح معاي باجر

حمد : اي بروح معك ,, يستاهل طارق ,, العاده مايقصر معانا

حمد كان فعلاا محتاج للخوي ,, وتواجد حسن معاه الايام ذي نشطته ,, وحتى على كلام الدكتور ساعدة على علاجه ,, وحسن يومين وماشي ,, فربي قرب طارق عنده مابينهم الا ساعتين ,, وساعتين مهي بعيده على السياره ,, لان كل ماتحسنت نفسيته ,, كل ماكان استجابته للجلسات اكبر ,, وكل مارد للكويت اسرع ,, وذا المطلوب بالنسبه له ,,





***
اللهم صلي وسلم على سيدنا محمد وعلى آله وصحبه اجمعين
***




طيبه كلينك

نوره خلصت كل فحوصاتها وطلب الدكتور انها تقعد عندهم بالملاحظه يومين ,, وفضل محمد هذا الشيء
فيصل وخالد ونواف ومشاري كانوا واقفين عند الغرفه برى ,, ينطرون الدكتور يطلع ,, ويطلع معاه محمد ,,

نواف يكلم مشاري : انتوا ماقلتوا لخالد بن سالم

مشاري : لا ماقلنا له ,, تعرفه مايمسك نفسه عند الغضب ,, ومحمد قال خلوه بعيد احسن

خالد : زين سويتوا ,, خالد ينخاف منه اذا عصب ,, ماعنده مشكله يدخل عند الهادي ويفتح عليهم الرشاش ,,

فيصل يضحك ,, والكل استغرب ضحكه ,, لا الوقت مناسب ,, ولا نفسية فيصل الزفت تسمح بهذا الشيء ,,

شافه خالد بأستغراب : انت وشفيك تضحك ؟؟!!

فيصل وهو مستمر بالضحك : والله اتخيل شكل خالد بن سالم معصب ,, تذكرون متى اخر مره عصب ؟؟ ,, ولا وش سوى يوم عصب ؟؟

ضحكوا كلهم ,, وهم يتذكرونه قبل سنتين يوم عصب ,, قد تكون اوقات غضب خالد بن سالم قليله ,, ولكنها تكفيه لعشر سنين قدام ,, واخر مره قام عليهم فيها يوم خطب نوف واحد وسلطان بن سعود بغى يقربه ,, وقتها ماشافوا وهم يعشون الرجال الاجنبي الي جايهم الا خالد داخل والرشاش بيده ,, وخالد كان وقتها بمصر يدرس ,, متى درى ,, متى جاا ,, لحد يومكم هذا ماجاوبهم ,, وقتها عيال سلطان بن سعود قعدوا متفرجين ,, لانهم بصراحه صحيح خالد خبل وشبه فاصل ,, ولكنه طماعه ويتمنونه لاختهم ,,

خالد وهو مستمر بالضحك : والله كل مااتذكر الشيبان وهم يترجونه انه يخلي الرشاش ,, وهو مصدق نفسه معيي ,, ويقول ماياخذ بنت عمي اجنبي وانا ماجود !!

نواف : والله انه خبل ,, ماصدق إن الرجال الي خاطب مهوب ماجوده ,, لحد ماتعهد له ابوي انه نوف له ,,

مشاري بهدوءه الصارم : بس تدرون ذا الخبل اللي تقولون عنه ,, يوم بغى بنت عمته ماخلى احد ياخذها غيره ,, وصمل على اللي يبي ,, ماهرب من اول مواجهه ,,

حل الصمت بعد ماكان الضحك مالي مكانهم ,, لانه مشاري ضرب وتر حساس عند البعض ,, وذكر البعض الاخر انه جبان ,, وذكر البعض الاخر انه يمكن يكون بموقف احد الاثنين الي قدامه ,, اذا ماتحرك باسرع وقت ,, وذكر البعض الاخر انه سكت وندم وندم ومازال الندم ينحر فيه ,,
طلع عليهم الدكتور يتبعه محمد ,, وقف قدامهم وكان الغضب باين من نظرات ,,

خالد : وش يادكتور

الدكتور : انا عارف انكم جايبنها لمستشفى خاص ,, لان مابدكم يتبلغ بالحادث

فيصل : ومن يقول يادكتور ,, انا ذا الحين اطالبك بتقرير ,, وبيمشي محامينا بالقضيه

الدكتور : اتمنى هدا الشي ,,

محمد : الهم دكتور ,, شفيها ذا الحين ,, شتشكي منه

الدكتور يعدل نظاراته : الحمدالله الاشعه المقطعيه على الراس سليمه ,, ولكن بتشكي من رضوض بكل الجسم ,, وانفجار بطبلة الاذن ,, ورضه قويه باليد اليسرى ,, ونحتاج تبقى عندنا يومين مجرد ملاحظه ,, واذا بدكم تطلعوها طالعوها ,, بس انا بفضل تبقى ,,

محمد : لا دكتور نومها افضل ,,

الدكتور : إن شاء الله

مشى من عندهم الدكتور ,, وقتها لف محمد على فيصل وخالد بتساؤال

محمد : لقيتوا الـ........ ؟؟

خالد : لقيناه ,, وهاذوا ذا الحين بالعدان كسره نواف تكسير ,, المهم انت لا تحاتيه جاه زهله

محمد بحره : لا والله الحره عادها بقلبي مابعد خلصت ,,

فيصل يسأله : وين بناتها خذيتهم ؟؟

محمد : اي حطيتهم مع خدامتهم في بيتنا ,, ووصية خدامة البيت عليهم ,, وقلت لها لا تعلمين احد ,,

فيصل : احسن ,, زين مافعلت ,, المهم قول لنوره بدخل ابيها بموضوع !!

محمد : ادخل ,, بس دقيقه اقولها اتغطى

دخل فيصل بعد ماسمع محمد يناديه يدخل ,, هو مالف ولا شافها عطاها ظهره وهو بطرف الغرفه يكلمها ,,

فيصل : اجر وعافيه ياام مي ,, ماتشوفين شر يااخوس

طلع له صوت نوره بنبرته الواطيه ,, كانت نبرته قبل خجوله ,, ولكن الان منكسره اكثر منها خجوله

نوره : الله يعافيك يااخوي ,, الشر مايجيك

فيصل بحزم هادئ : النوري وانا اخوس ,, ترى سلمان خذى حقه منا ,, وجاها مايكفيه ,, بس يااخوس انا ترى قلت شي واسمح لي المفروض اشاورس قبل مااقولها ,, بس كانت لحظة غضب

نوره : لا تشاورني يافيصل ,, مابغيتوه سوه ,, وانا موكلتكم بالي تبون

فيصل : لا ياأخوس ,, اسمعي ,, انا قلت لسلمان يطلقس ,, ولا تخافين ماخذاه منس برد ,, وفوقه حضانة بناتس ,, عندس اي اعتراض ياأخوس ؟؟

نوره والبكى ظهر على صوتها : جعلك قوي يابوفهاد ,, جعلك قوي ,, ماابي اكثر من كذا ,, بس عندي طلب واحد

فيصل بهدوء : امري ياأخوس

نوره : عساني مااخلا منكم جميع ,, ماابيكم تقدمون شكوى بالامر !!

فيصل بتساؤل : وش اسبابس يوم انس ماتبينا نقدم شكوى ؟؟

نوره : اسبابي واجد يااخوي ,, اولها شيبانن جابوا ,, واخرها بناتن منه ,,

فيصل : اسبابس كافيه ,, اسبابس كافيه ,, بس خلي عندس علم حنا طلبنا تقرير بالامر ,, واذا شفناه ماطل بالطلاق ولا غيره ,, ترى الوجه من الوجه ابيض ترى بنمسيه بالمخفر ,,

نوره : سووا اللي تبونه ,,

فيصل : على كذا اخليس ترتاحين ,, ماتشوفين شر مرتن ثانيه

نوره : الشر مايجيك

طلع فيصل من عند نوره ولقى قدامه خالد ومشاري ينطرونه ,, ونواف مهو بموجود

فيصل بتساؤل : وين نواف ؟؟

مشاري : نواف راح لام سلطان ,, دقت عليه تبيه يجيبها لنوره ,, الا سعود وينه ؟؟

فيصل : خليناهم ورانا ,, إنا دق على نواف وطلعت واعترضني خالد وراح معي ,, ولا الباقي ماعندهم خبر ,,

خالد : يلاا فيصل لازم نروح لشيبان نقولهم اللي صار ,, قبل مايجيهم ابو سلمان يتشكى عندهم ,,

فيصل : لا تخاف ماله عين يجي عندهم ,, وبكره الخميس اذا ماراحوا للمحكمه مبكر مابه الا الاحد ,,

خالد : لا تخاف بكره إنا عنده بإذن الله من الساعه سبع ,, وبسحبه سحب معي ,,

فيصل : شورك زين ,, "يلف على مشاري" تروح معنا ؟؟!!

مشاري : لا بقعد عند محمد ,, متى ماخلص رديت للبيت ,,

فيصل بحزم : لا اطول ,,

مشاري : إن شاء الله ,,

طلع فيصل وخالد من الممر على مرئى من مشاري ,, ومشاري فكره انشغل باشياء واجد ,, اولهم حاله نوره ,, واخرهم خوفه لاتكون وحده من خواته بيوم مكانها ,,

مشاري " ماوصل نوره لذا الحاله الا ابوي وعمي ,, اي نعم ابوي وعمي ,, فضلوا سلمان على غيره ,, بمبدأ البنت اولها بها ابن عمها ,, وهذا اللي جانا من ورا ذا المبدأ ,, شيخه وحمد طلع عقده النفسيه عليها ,, وسعد وسواد وجهه مع منيره ,, وعذره انا مزيون وشلون تزوجوني مشوهه ,, عبدالله و اللي سواه بلولوه ,, لولوه من حقها ادافع عن سعد وقتها ,, مهما صار ,, ومهما كان غلطه كبير هو اخوها ,, ولكن للاسف عبدالله اختار عقابه لها ولسعد بمعنى اصح ,, بطلاقه لها ,, يحسب اني بسكت له ,, وبخليه يردها ,, والله وانا ابن عِلي ,, انها مااجيه بالساهل ,, وانا بوقف قدام ابوي وعمي وقدامك انت ياعبدالله وحتى قدام فيصل ,, بس مايصير مصير اختي اردى من قبل ,, وحتى المها اذا بياخذها محمد بن منصور ولا محمد بن سالم ,, لازم يعرفون إن حنا زوجناهم رجال مهوب بمراءه ,, ولا يبسها بماي ,, اغرقه بدم ,, اغرقه ,,"



***
اللهم صلي وسلم على سيدنا محمد وعلى آله وصحبه اجمعين
***


بيت سلطان بن سعود
غرفة نوف


ساره بالغرفه تلف مثل الاعصار مهي بقادره تقعد ,, ونوف عندها ماسكه راسها بهم ,, وكل طاري مهوب بزين يطري عليها ,, لان اللي هم فيه كبير ,, كبير حييل ,, ولازم يقولون لاحد عنه ,,

نوف بخوف : ساره وش نسوي ؟؟

ساره تقعد على اقرب كرسي عندها ,, لان رجيلها معادهي قادره تشيلها ,, وتحس مثل الكهرباء تسري في جسمها ,, يمكن من الخوف

نوف : ساره وش فيس ,, اكلمس انا ؟؟!!

ساره بهدوء : وانا اسمعس !! ,, بس وش تبيني ارد عليس ؟؟ ,, بذمتس وش تبيني اقول ؟؟

نوف بدت تبكي : قولي اي شي ,, بس حسسيني انس معي !! ,,

ساره وبكاء نوف ازعجها وعرفت انها فعلاا مابيدها شي ,, وان الامر طلع من ايدهم ,, ولازم يقولون لاحد ,, بس يقولون لمن ؟؟ ,,

ساره بصرامه : خلاص لا تقعدين تبكين كنس بزر ,, والله اللي يشوفس يقول مسويه شي ,, خليس قويه وواثقه من نفسس ,,

نوف ويزيد بكائها : اكييد ببكي ,, شتبني اقول لابوي واخواني ؟؟ ,, إن حنا ماندري من ينشر اسمائنا وارقامنا على الشات ؟؟

ساره بثقه : اي ماندري ,, وخليس واثقه من نفسس ,, بس من نقوله ,, ادق على محمد مايرد على ,,

نوف تمسح دموعها : خلاص انا بقول لنواف ,,

ساره بخوف : لا مافي غير نواف ,, نقول لسعود احسن ,,

نوف : لا نواف يعرف يتصرف ,, لكن سعود بيعصب وبفضحنا عند ابوي وخالي ,,

ساره باستسلام : خلاص دقي عليه ,, والله يستر علينا ,,

ساره " شفت نوف وهي تمسك تلفونها وايدها ترتجف ,, فعلاا توقعنا من الشله الوصخه كل شي ,, الا الشي ذا ,, من امس وتلفوني انا نوف يدق ارقام غريبه ,, وكالعاده اذا مانعرف الرقم مانرد ,, ذي اول وصايه يوصون فيها لمى عطونا التلفونات النقاله ,, ومن امس وشابكه معانا ارقام مختلفه ,, بس اليوم بعد العشى ,, انصدمنا من مسج وصلنا لتلفوني ومثله وصل لتلفون نوف ,, فعل صدمنا وكان المسج يقول ( يابنت الله يستر عليج ترا رقمج واسمج منتشر كله على شات ...... من امس وهو ينزله واحد تصرفي غيري رقمج ولا بلغي اهلج ) ,, إنا اعرف من اللي سوى فينا كذا ,, اكيييد شله منى الخايسه ,, عشانا شفنا اخياسهم قالوا بنتغدى فيهم قبل لا يتعشون فينا ,, بس والله حنا سترنا عليها والله ,, وماقلنا لاحد ,, ولا فضحناها عند اهلنا وهذا اللي كان يهمها ,, بس ياويلها من رب فوقها "

ساره لسانه بدى يردد الدعاء عند المصيبه واعرفت إن مامن منجي لها الا ربها
" إِنَّا للَّهِ وَإِنَّا إِليهِ رَاجِعُونَ , اللَّهمَّ أجرني في مُصِيبَتي ، وَاخْلُف لي خَيْراً مِنْهَا "
" إِنَّا للَّهِ وَإِنَّا إِليهِ رَاجِعُونَ , اللَّهمَّ أجرني في مُصِيبَتي ، وَاخْلُف لي خَيْراً مِنْهَا "
" إِنَّا للَّهِ وَإِنَّا إِليهِ رَاجِعُونَ , اللَّهمَّ أجرني في مُصِيبَتي ، وَاخْلُف لي خَيْراً مِنْهَا "
" إِنَّا للَّهِ وَإِنَّا إِليهِ رَاجِعُونَ , اللَّهمَّ أجرني في مُصِيبَتي ، وَاخْلُف لي خَيْراً مِنْهَا "
" إِنَّا للَّهِ وَإِنَّا إِليهِ رَاجِعُونَ , اللَّهمَّ أجرني في مُصِيبَتي ، وَاخْلُف لي خَيْراً مِنْهَا "



***
اللهم صل وسلم على سيدنا محمد وعلى آله وصحبه اجمعين
***

يسعدلي صباحك رند

مشكورة على البارت تسلم الايادي

=====================


جزاك الله خـــــــــــــــــــــــــــــير

على الروابط اللي تحطينها قبل البارت , واليوم بقرأ سورة الكهف من اللينك اللي حطيتيه ,


==========================


الرواية رائـــــــــــــــــــــعه ممكن بالبدايه نكون شادنا الغموض لها ويمكن نبي نعرف

السبب الي وصل العلاقه بينهم للقطيعه لكن وبرغم من معرفتنا زاد تعلقي بالروايه اكثر.

==============================

منيره

وش فيه احلى من العزوه وانك بدل ماتكونين لحالك حتى بوجود اخ لك سند لك


يكون في عزوه تحسين بينهم بالدفا والمحبه واحلى شي تشوفين الفرح بعيونهم لك.

بالرغم من مرارة الماضي لكن حلاة الجمعة العائليه تخليها تنسى مامضى .

عجبتني جدآ سالفة ام فهد وانها عملت صف هي وبناتها وحريم عيالها وردو عليهم بنات آل علي


تعبير عن الحب بطريقه جدآ رائعه.

طبعآ اليوم بطريقه غير مباشره وضحتي سبب ترك سعد لمنيره ,,,, وهذا يدل على سطحية

تفكير سعد واهتمامه كان خارجي ,,,,معناه تمسكه بمنور حتى لو على حساب اخوه

كان عشان شكلها وبس , لكن روحها واخلاقها ماكان لها اي اثر,

ممممم منيره قالت وهي تتذكر الحادث ان سعد كان معذب قلوب العذارى ,,,,, يعني

صيته كانت تبيه لكن هو راح وخطب منور , ولانها ماتبي تخسره وصت صديقتها

انها تشيع الشائعه ,لكن لو صبرت صيته لان سعد بنذالته ترك منيره , لكن هي كانت

الدافع انها تشوه سمعة منور .

(( ليش منيره مره قالت اللحين رجعت منور؟؟ هل هي بعد الحادث رفضت ان احد يناديها منور))

===================================


نــــــــــــــــــــــوره ياكبر جرحها وياكبر همومها


رغم ان ابناء عمها ماقصرو وبيض الله وجههم اخذو حقها وعزو قدرها

لكن جرح قلبها شلون يتعالج ؟ وغير كذا فشلها بحياتها .

هي عطت سلمان وكانت تشوف انها قاعده تتبع كل الطرق عشان يكون زواجهم ناجح

حتى لو الثمن تخطيه لحدودها وتعديه عليها .


لكن رغم كــــــــــــــــــــل التنازلات اللي قدمتها , فشل زواجها وطلعت منه باضرار نفسيه وجسديه


نوره جرحها جرحين انها انرفضت من ولد عمتها وكون ان الرجل يزهد فيها رغم نيته الطيبه

لكن هذا جرح للأنثى وغير كذا اخذت واحد وحاولت وكافحت انها تنجح هالزواج .

وبعد فشلت انها تنجحه .

================================

مشاري

بيكون عثرة برجوع عبدالله ولولوه لان عنده اسبابه المنطقه

عشان يعلم عبدالله انه يحافظ على لولوه ويحفظ كرامتها .

لكن انا اختلف مع مشاري بهذي النقطه بالذات لان عبدالله سبق وحاول يرجع لولوه وهي رفضت .

يعني عرف قدر لولوه زيييين . وتعاقب برفضها له على تصرفه بطلاقها.


==========================


حمد

يمكن وجود طارق بيأثر ايجابيآ عليه خصوصآ بوجود طفله بعمر ولده

بيخليه يأنب نفسه كثيرررر ان ربي رزقه بطفل سليم معافى وهو راميه ومهمله

وطارق ربي عطاه بنيه مريضه وبرغم كذا قاعد معها ومراعيها .


===============================

فيصل وخالد ونواف


بيض الله وجههم وسلمت يمنى نواف

هذا صدق فعل الرجاجيل بناتهم مثل رجالهم , بس ياليت ينشرون الخبر

عشان يعرفون الرجال ان لو احد مد يده على احدى بنات آل علي بيجيه مثل ماجا سلمان.


===============================

مشكلة نوف وساره

يالله يارند هذي كارثه وموجوده ,,,, تدرين تذكرت قصه صات بعهد عمر بن الخطاب


باليلة عمر وهو ماشي بالطريق لقى بيت يقوم صاحبه بمعصية الله , وعشان كذا عمل اماراه على

الباب لان بالصباح بيتصرف معه ,لكن صاحب البيت سمع صوت وفتح باب البيت , شاف ظهر

عمر وهو يمشي وجات عينه على العلامه اللي عملها عمر, راح للبيوت اللي جنبه وعمل نفسه

العلامه ,,,,,,بالرغم انه لو مسح العلامه كان اسهل , كذا الانسان اذا عنده غلط بحياته

يقوم يشرك غيره فيه ,

وهذا تصرف شلة منى ,بدل ماتصلح حالهم راحت تشهر بنوف وساره عشان يصيرون

مثلهم ,

لكن تدخل نايف بيكون له دور ايجابي , بس يارب انهم اختارو الرجل المناسب ,

لان هالمواقف يحتاج لها شخص غير متسرع ويكون ذكي .


==============================
المها ومحمد بن سالم

طلع استنتــــــــــــــــــــــــــــــــــــاجي صحيح

الله يوفقهم يارب ,


==============================

رند انتظرك ثم انتظرك عشان اروي فضولي

ويارب تنتهي الامور اللي عندك ومشغلتك عن التنزيل اليومي .

السلام عليكم ورحمة الله وبركاته

بيض الله وجيهم الشباب والله ماقصرتو في ذا الرخمه..... اقديت يا فيصل اللي ما وصخت ايديك ف ذا الوصخ ..... لك مني احلا سلام وتحيه ..... وتراك في ليستات ال في اي بي ..... الله يستر منج يا زارا.... خخخ


الحين وضحت صورت منيره يعني بعد الحادث تشوهت وتركها سعد ... صدق ما يستاهلها سعد لا قده تاركها عشان هالشي.... بس عبدالله يعني كان ايدافع عن اخته بطريقه غلط طلاقه من لولوه....


متابعينج يالرند ..... لا طولين ودورين حجج عشان ما تنزلين اهم شي لا تسمعين كلام خلوووي ......



مساك عسل ...