اللهم اني استغفرك واتوب اليك


المصافحه السابعه


الكويت
شقة سلمان بن هادي

نوره قاعده تشيك على بناتها قبل لا تنام
نوره شخصيه قنوعه جدا ومسالمه جدا
قد تعتبر من الشخصيات الي يمكن يقال عنها بليده ظاهريا
بس داخليا لا
نوره ومازال عمرها سبعه وعشرين ولكن تعاني من الضغط
وبعد نسبة بالسكر
وكل هذا من الكبت
والكبت يمكن يسوي بالانسان اكثر من كذا بس متى بتنبه نوره؟؟
لنفسها الله العالم ؟؟!!

سلمان : السلام عليكم

نوره سمعت صوته وطلعت له من غرفة بناتها

نوره : وعليكم السلام والرحمه

سلمان يحذف شماغه على الكرسي معاهم عقاله وطاقيته : ناموا البنات

نوره وهي تشيل الشماغ وترتبة بيدها : اي نامو من زمان

سلمان : زين تراني تعبان ,,
اليوم الربع كلهم مجتمعين بالديوانيه وراسي صاكني من لجتهم ,,

نوره ببرود : تبي بندول

سلمان يأشر بيده : لا مابي ,,
جيبي لي ماي

نوره : إن شاء الله

سلمان يناديها قبل لا تروح : نوره "لفت عليه بأستفسار"
"سئلها بقوة عين" مانزل معاشس

نوره "تهز راسها بلا"

سلمان يحرك يده بمعنى خلاص روحي ,,

معاناه اخرى عندما يكون فيها الرجل يشوف ماعند زوجته
وبدال لا يزيدها
للأســــــــفــ
ياخذ منها
على فكره نوره بنت سالم والعمه وضحه




***
اللهم ارزقني حبك وحب من يحبك وحب عمل يقربني الى حبك
***



الحرم المكي
بعد صلاة الفجر

منيره وشيخه قاعدين بالصحن وكانو ينطرون وقت صلاة الشروق

شيخه تشوف منظر الكعبه قدامها وناس يطفون حولها : سبحان الله
فعلاا الواحد يحس براحه قويه واهو بهذا المكان

منيره تتنهد براحه : اي والله

شيخه : منور وين راح عبدالله

منيره : يقول بقعد قريب منا معه مشاري بن فهاد

شيخه : ياحليله مشاري
الولد ذا اسم الله عليه سابق عمره

منيره : ماشاء الله لاحظت

سكتت منيره وتمت تتامل قدامها وتستغفر وتسبحن بهدوء

شيخه سئلت فجأه : وش تفكرين فيه

منيره لفت بأبتسامه ذابله : تدرين وش ذكرت

شيخه اطالعها بتساؤل

منيره بنبره جليديه : ذكرت الحادث
"باصرار" تذكرت كل شي فيه

شيخه اختارت الصمت رد عليها
ماعرفت بشنو ترد
مالقت سؤال بمعنى اصح

منيره بهدوء ردت تتأمل الناس : سعد اخوي كان الي يسوق
"تبتسم" كان في بداية التزامه

صمتت واختارت منيره ايضا
الصمت
بس الصمت الظاهري
كانت بخيالها تراجع كل لحظه

منيره " بهذيك الايام كنت توني مخلصه رابعه ثانوي
وبدت اجازة الصيف
وكان فيها عرس عبدالله ولولوه
وبعد فيها ملكتي على سعد ولد عمي
طبعا وقتها سعد كان معذب قلوب العذارى
المهم
بعد العرس سافر عبدالله ولولوه شهر عسل
و عبدالله كان معودنا سنويا يسفرنا
فحب سعد اخوي يسفرنا
وكان اختياره إن نروح آبها
ونرجع للعمره وللمدينه
وفعلا الله يرحمه ماقصر
بعد ماخرجنا من السالمي
صار الحادث
ماادري شلون صار
كان سعد مشغل سديس والجو هدوء
الكل نايم ماعدا انا وسعد
وسبحان الله
قسم وكتب إن سياره كامله مايطلع منها الا انا
ماتعذبوا ابدا
الكل مات بالمكان
حتى قبل مايصلون للمستسفى
وانا طلعت من الحادث بغيبوبه
قعدت فيها اسبوعين
ولمى صحيت لقيت باقي منيره
منيره وحييده
قدر بصعوبه عبدالله وشيخه ينتشلوني
ويطلعوني منها
قعدت اسبوع بعد الغيبوبه بالكويت
وبعدها رحت للندن
وبديت رحت العلاج
العلاج لظهري الي اثر على المشي عندي لفتره
والعلاج التجميلي لعيني لازالت التشوه
والعلاج النفسي لشخص منيره"

شيخه تنادي: منور منور
منيره شفيس ماتسمعيني

منيره تنتبه : إلا اسمعس

شيخه : انزين قومي صلي

منيره بهدوء : إن شاء
قايمه
هذاني قايمه

شيخه " شفت منور تصلي
قبل شوي كانت سرحانه
اكيد سرحانه بالحادث
منيره اول مره تذكر إن سعد الله يرحمه هو الي كان يسوق
هذا تحسن
تحسن حيييل
بالنسبه لمنيره
اه ياربي
تعبنا حيل السنين الي طافت
حيييل تعبنا
من سالفة منيره
الي سالفتي مع
مع حمد
فعلاا كنت اتوقع كل شي منه
الا شغله
عذره بانفصالنا
عذره كان جارح حيييل
حيييل جارح
الله يصلحه
ويشفيه
ويسخره لولده
هذا اهم شيء"



***
اللهم اني استغفرك واتوب اليك
***


الكويت
القهوه

قاعد بن ربعه ويسمع سوالفه ومنقشاتهم وشيشته بيده
يمخمخ عليها يعدل
قطع انسجامه وااحد من الشباب يناديها

سعد بتأفف : نعم وش تبي

الرجال : تلفونك ماتسمعه ترا ازعجنا

سعد : انزين خلاص

رفع تلفونه وشاف عشر مكالمات وكلهم من امه

سعد "وش تبي امي داقه ذا الحين "
دق عليها

ام سعد بصوت غضب : وينك ماتسمع تلفونك

سعد : ماسمعته
وش فيس داقه من صباح الله خير

ام سعد : بشوفك صليت ولا لا

سعد : ليه شايفتني يهودي
اكييد صلت
"بنغزه" وش عندس

ام سعد بحزن : ماعندي شي
"بتردد"
بس بشوفك اذا ماانت راقد تجي اتريق معي

سعد : لا تريقي انا تعبان
وبروح بيتي برقد

ام سعد : على راحتك
مرني اليوم تراني من زمان عنك

سعد باستعجال : إن شاء بمرس
مع السلامه

ام سعد: الله يسلمك ويحفظك

سعد سكر التلفون وهو زهقان
سعد " اخلص من صيته
تطلع لي امي
انا طااق منكن
ياليتني بقيت على منيره ابرك لي
على الاقل الوجه حسن
والاخلاق مثلها
مهوب بذا الي عندي اللهم ياكافي
يالله ملحوقه "


***
اللهم اني استغفرك واتوب اليك
اللهم اني استغفرك عني وعن والدين وعن المسلمين والمسلمات الاحياء منهم والاموات
***

استغفر الله العظيم واتوب اليه