كاتب الموضوع :
cloud2009
المنتدى :
القصص المكتمله
البارت الرابع والعشرين ....
:
يمه وينك !؟
آنا بنتك .. " ضي عينك " !
شوفي وش قرب المسافة بين أهدابي وبينك !؟
بس ّ يمه أنتي وينك !؟
يمه قومي !
7
7
7
بنرجع لهالكلام ونشوف وش سالفته
في بيتهم مسويه حفله معتبره ..
: ولييييش ما علمتووووني ...؟؟؟؟!
مشعل: ترى توهم قايلين لنا اللحين !
مها: ولو لازم يعلموني قبل .. ووو
مشعل: أقول ورى ما تضفين وجهك ؟؟!
فوزيه: ترى صكيتوا رأسي ! اللحين إذا صرت منتب رايح من بيودينا أبوك لاهي في ذا المكتب الله لا يلهينا إلا في طاعته !!!
مشعل يحك راسه بتفكير : والله ودي بس ما أقدر عندي شغل ضروري والرجـال له اسبوع يتطلبني !
مها تقعد: يعني وشلوون بنروح يعني بنروح ماالي دخل ابي اطلع من الرياض شوووي !
مشعل : الله يسمعها يقول بتروح لكندا اللحين ..!؟؟!
مها: مااالك دخل كندا بآريس والله أن مزرعة أبوي ابراهيم انفه منهم ....
مشعل: ايه بااااين ..
فوزيه تنهي هالصجه بقرارها : مناب رايحين ..!
مها: ليييييييييييييه يمـــــــــــه حراااااااااااااااام عليكم ؟؟؟؟؟
فوزيه: حرمت عيشة العدو ابوك موب رايح واخوك مشغول والسواق مانيب ضاربه مشوار المزرعه
معه بلحالي مابله أنا وانتي واختك !!
مشعل: هم كم بيقعدون هنـاك ؟؟؟
فوزيه: على ما ضنتي يوم ما تسوى علينا ؟!
مها بعبره : ليييييييييش يــمــه أبي اروووح !!!!
فوزيه تقوم فاضه كل هالسالفه : قلت لك مافيه روحه وطلعت من الصاله ..
مها وقفت معصبه : ارتحت هذا أنت خربت الرووحه علينا وســع صدرك اللحين وابسط ياعم ..
وطلعت وهي مفوله منهم ما تتصور انها بتفوت روحه للمزرعه وفي هالبراد الجو هنـاك مع أنه جمده بس عذااااب ..
كان يطالع طيفها اللي طلع الدرج وانفجر ضحك : ههههههههههههههههههههههههههه أجل ابسط ياعم ..
رفع سماعة التليفون وهو يدق على بيت أخوه ..
مشعل: ألوو
عبودي: ألوووو مييين ؟؟؟
مشعل: سلم أول ؟؟
عبودي: أول شي أنت من بعدين أسلم ؟؟؟!
مشعل: والله ولد أخوي موب سهل ياخذ احتياطات بعد ، أقوول وين أبووووك ؟؟؟؟
عبودي: هنا ..
مشعل: طيب ناده ..
عبدوي: أول شي من أنت ؟؟؟؟؟؟؟
مشعل: عبيييد وجع أنا عمك مشعل !!!
عبودي ببرود : أنـــــت مــشـــعــل ..؟!
مشعل: عمك عمت عين العدو قل أمييين
عبودي سفهه ومد السماعه لأبوه اللي منسدح على الكنبه ..
محمد بصوت تعبان : هلا
مشعل: هلابك السلام عليكم ..
محمد: وعليكم السلام ورحمة الله وبركاته !
مشعل: وش فيك صوتك ؟؟؟..
محمد: مافيه شي كنت ماخذ لي غطه ..
مشعل: اسمع ما أطول عليك بتروح أنت اليوم المزرعه ..
محمد: ايه يقولون مجتمعين ليه هونوا ؟؟!
مشعل: لا بس أبيك تمر أهلي لأني عندي شغل أن امداني عليكم جيت في الليل ما أمدان خيرها بغيرها
محمد: خلاص أنا بمشي عقب العصر مباشره خلهم يجهزون ..
مشعل: الله يعافيك وأنا أخوك خلاص إن شاء الله ..
محمد: الله يعافي ذا المصالح اللي بتخليك مؤدب ؟؟!
مشعل : أقوول ضف وجهك ههههههه
محمد: ههههه ماله داعي قناع الكذب
مشعل: ههههه قناع كذب في عينك هذا جزاي أحترمك بس مااااش ما ينفع معكم أنتوا يالله مع السلامه .
محمد يضحك بثقل صوته : ههههههههههه مع السلامه ....
راح لأمه في المطبخ وبلغها بالتخطيط الجديد وأن محمد بيمرهم فوزيه ما ودها عشان الهنوفي تعبانه بس
وش تسوي عاد ميب كاسره في خاطرها ..
مشعل: بس هااا أبي منك وعد ؟؟!
فوزيه: وشووو بعد بتذلني على ذا الواسطه ..
مشعل يحب راسها : ماااعاااش من يذلك بس وقرب عن أذنها وهمس لها بشويه كلمات فوزيه انفجرت في الضحك ..
فوزيه: والله ان تنهبل ..!!!
مشعل يحرك وجهه : اللله يعاااافيك يمــه طااالبك سويها .. ويحرك حوواجبه يعني الله يخليك ..
فوزيه: ههههههه طيب الله يصبرني عليكم بسويها ..
/
عند محمد دق على فهد عشان يبي يمشي هو وياه مع بعض الطريق طويل وهو يخاف لا يصير له شي لا سمح الله برغم أنه مداوم على علاجه بس الحرص واجب وهو معه أرواح موب بس روحه اللي عارف مصيرها
محمد: وينك عندك صجه ؟؟؟
فهد : عند الحلاق ..
محمد: وش عندك عند الحلاق ؟؟؟؟؟
فهد : والله جاي أشوف كان عندهم خبزٍ زين وووش عندي عند الحلاااق يعني جاي أحلق ..
محمد: ههههههه طيب كليتنا يالله من قدك معرس وتدلع ..!
فهد بقلق: إي معرس والله اني خايف أن خالي راشد يسوي شي في هالعزيمه !
محمد: وش بيسوي خيير أنت كنهم هم اللي بيخطفونك وبيزوجونك غصب !
فهد : موب قصدي وجع بس يخليني أشوفها وإلا شي !
محمد:هههههههههه اييه السالفه كذا وأنا أشوف الاخ في الحلاق ,,
فهد: محيميد لا تقعد تفسر على كيفك ..
محمد:ههههه يالله أجل ما أخرب عليك بس أبي اخاويك في الطريق تعرف ما ....؟؟؟؟؟؟
فهد: أقول انطم متى بتمشي أنت ..؟؟!
محمد:هههه مدري العصر ..
فهد: خلاص مرني في بيتنا ونمشي سوا
محمد: صااار تأمر على شي ؟؟؟
فهد: سلااامتك ..
محمد: الله يسلمك يالله ضبط السكسوكه أجل كود أنك تضمن مستقبلك !
فهد: مستقبلي في عينك مع السلامه .. وسكر السماعه لأن دوره جا عند الحلاق
ومحمد يضحك الحمد الله والشكر بس ...
//
\\
دخلت الغرفه وكش جلدها من البراد موب براد إلا قالب ثلج وظلااام دامس خلاها تنتفض خصوصا أن الجو
برد والخبله لين اللحين تشغل المكيف أول شي سوته سكرت المكيف وولعت الأنوار وشافت الغرفه
ماشاء الله لا إلا الله مرتبــــه بقوووووه لدرجة أن شنطة الجامعه كلها وما تحويه من بلاوي مرميه على الارض
تنهدت على فوضوى هالبنت وفتحت الستاره بقووه وهي تشيل البطانه منها وتصارخ وهي متمسكه فيها بقووووه
كنها قطعه منها صرخت ..
غاده: نديووو ووجع قوووومي صلي يالله والبسي ...
ندى بهمهمه : هممم طـ يـ بـــ
غاده تقعد على السرير : قومي يالله ماعاد إلا خير بنمشي ..؟!
ندى بنص فتحة عين : وين بنروح ؟؟
غاده: وين بنروح مابعد دريتي لين اللحين يالله بنمشي المزرعه قومي تسبحي وغيري ورتبي ذا المزبله
اللي في غرفتك كنتس بزر موب بنت في الجامعه ..
ندى بثقل: نعم وين بنروح ؟؟؟؟
غاده: المزرررررررررررررررعـــــــــــــــــــــهـــــ ماتسمعين !
ندى تقعد بقوه وهي متفاجأه : المزرعه ؟؟؟ ليه ومتى وليش ماعلمتوني ؟؟؟؟؟ >سبحان الله نفس ردة الفعل !!!
غاده كل جوابها :بنروح لأن اخوي راشد طاريه عليه وقال بدال البيت نروح كلنا المزرعه فله وتغيير جو
ندى الظاهر إنها للحين تحت سلطان النوم : مــشــعـــل بيجي ؟؟؟؟؟؟؟؟
غاده برغم أنها أنصدمت من سؤالها إلا أنها ضحكت بقوووه : هههههههههههههههههههه لا موب جاي !!!!
ندى انتبهت لنفسها وهي تستقعد : منهو اللي مهوب جاي ..؟؟؟؟
غاده: اللي سألتي عنه ... !
ندى: أنــا ؟؟؟ وتحك راسها .... من سألت عنه ؟؟؟؟؟؟؟
غاده : الظاهر أنك لين اللحين متنحه قامت عن السرير يالله تحركي ماقدامك وقت ترى بيجي فهد
ووسعي صدرك مشعل موب جاي .. وسكرت الباب وراها ..
ندى : مشعل وش دخل مشعل ؟؟ الحمد الله والشكر بس مييب صاااحيه !!!
>>>الله أعلم من اللي موب صاحي ؟؟!!!!!!
سبحت وجعدت شعرها لأن ماعندها وقت أصلاً لبست لبس سبور تنوره جينز ميدي وبلوزه قطنيه مرسم عليها رسمات من زارا وحطت كحل وقلوس خذت عبايتها ونزلت
وتوجهت كل العوائل المذكوره إلى المزرعه .....
لحظـه قبل لا يتوجهون إلى المرزعه ..
كانت قاعده في غرفتها تندب حظها وذا الاهل اللي مدري وش يبون على قولها فتحت عليها أمها الباب وهي
منسدحه تقرى لها روايه سخيفه من شهر وهي في نفس الصفحه ..
: مــهــا ..
مها: نعم ...؟
فوزيه تنفيذا لطلب مشعل ما علمتها إلا قبل لا يمرهم محمد بخمس دقايق عقاباً لها وردعاً لأمثالها
فوزيه: ألبسي محمد دقيقتين وهو عند الباب .. وتركتها وباب الغرفه مفتوح ونزلت تحت
مها بعد ما استوعبت الصدمه صرخت : لاااااااااااااااااا وطمرت ما تدري وشلون وصلت عند التسريحه > حشآ أبطال الديجيتال وأنا مدري طالعت شعرها : هئ هئ لااااااااااا ما يمديني ...
سمعت أمها تصارخ : مهااااا ترى ركبنا كلنا بسررررعه ...
خنقتها العبره أكيد مشيعل جعله ما نيب قايله أمي عمرها ما تسوي ذا الحركات
ماتدري وشلون لبست تنورتها وبلوزتها الظاهر مقلوبه ياربي وش بيفكني من لسان نويف طالعت شعرها هي خاربه خاربه كلهم خوالي واهلي ماحدن غريب لمته كله وحطته شباصه وهي تحاول تلمه كله مع بعض وخذت شنطتها وهي تعبي فيها الأشياء اللي بتحتاجها هناك وأهم شي الاونو الحمد الله والشكر كانت معصبه :
عمـــري مارحت المزرعه بهالسرعه لازم ارتب أغراضي قبل باسبوع واللحين في دقيقتين الله يالدنيـا يا مها ..
سمعت صوت الجرس يررررن بقووووه وارتبكت خذت عبايها ونزلت تركب مع محمد اللي عطاها تهزيئتين على تأخيرها يستهبل طبعاً وعبودي اللي نشب فيها نشبه وودها تذبه مع الدريشه .....!!!
//
\\
يمه وينك !؟
آنا بنتك .. " ضي عينك " !
شوفي وش قرب المسافة بين أهدابي وبينك !؟
بس ّ يمه أنتي وينك !؟
يمه قومي !
توني أصحى على الدنيا .. دخيلك لاتنومي !!
من يرتب لي الدفاتر !؟
من يبدّلي .. اهدومي !!
يمه بدري .. والله بدري ! . . " آتهجّاها اهمومي ! " . .
يمه مات !
كل شي ٍ كنت أحسه " حي " في هذي الحياة !
ماااات
" الأمل في رجعة الأحباب "
ماااااات
" صوت الأمنيات " !
وكل شي ٍ كنت أحبه ..
مااااااااات ..
مر ..
ودعني ..
وفات !
طفلتك ماعاشت " إحساس" الطفولة !
............. فاقده في هالزمان ... إحساسها !
شافت إن الصبح ..... ماتقدر تطوله !
............. وازفرت .. ونّه ! .....ورى أنفاسها !
واحضنت هالليل والورد ..... وذبوله !
............ لين مانامت ...... على كراسها !
فيه شي ٍ لو قدرت إني ....... أقوله !
............ كان شفتي الناس ...حبّت ناسها !
يمه ضميني بـنام !
خايفة أبقى لحالي عايشه وسط الظلام !
عام مُرّ ..
ومر ّ عام ..
وآنا كل ليلة أتمتم : بكرى تجيني بحنــان !!
يمه وينك !؟
ماتت اللهفة بيدّي .. تنتظر لهفة يدينك !
يمه خوذيني معك ..
بس اشوفك .. واسمعك !
ودي لو أقتل بصدري هالسؤال :
.
.
يمه وينك !!؟
7
7
7
7
تنهد من أعمـــاق أعمـــــــاق أعمـــــــاق قلبه وهو يسكر الدفتـر على هالكلمه ..
(( يمه وينك !!!؟؟؟))
كانت تطعن في قلبه بخناااجر موووب حروف ليييش يانجد ليييش تسوين فيني كذا حراااام عليك والله حرااام
حرااااام بنت بعمرك تكتب هالكـلام .. رمى الدفتر .... ما أدري ليش تعذبني ؟! يعني تتوقع أني مافقدتهم
خانته دمعه رفض أنها تطيح لعن نفسه وهالدمعه والحااجه اللي بدت تنروي في قلبه من جديد موب توه
لهى عنها وخلاص ليييش ترجع من جديد .... !!!
تنهد وهو يطالع الدفتر مرمي على الأرض ما يشوف إلا غلافه اللي كان فروو وردي وفي الواجهه زي برواز الصوره
كانت فيه صورة أمه وأبوه ومدخله عليها صورة سلمان وهو صغير وصورتها وهي في الست سنوات
ماهان عليه يشوف هالغالين مرمين في الأرض بس من جد هو عصب من كلامها كلامها يذبــــح تعرفون
وشلون يذبــــح وخصوصاً لسلمــان ماكان متوقع أن هالسر اللي خبته عنه يحوي هالحزن والحكــي اللي يجيب
المرض لو أني داري ما طلبته منك ولا أصريت أني اقراه .. نزل وهو يرفع الدفتـر ويسكره قربه لفمه وباس الصوره ...
وهو يقول أسمحي لي (( نجد )) ما أقدر أكمله فتح الدرج حطه وسكر عليه وهو ينزل تحت بتوتر وعصبيه مبينه
على خطواتها على الدرج شافها ماسكه التليفوون في الصاله وتضحك بقوووه وقف
سلمان بجفاف : من تكلمين ؟؟؟؟؟
نجد تضغط بيدها على السماعه : دانــه .. ورجعت لصديقتها
نجد: هههههه ايه وش بعد والله أنك خبله ههههههههههههه...
تأملها لدقايق معقوووله ممكن أن هاللي تضحك كاتبه الكلام اللي قريته من شوي سلمان لييش تتأثر ليييش
ترى كلها شخابيط بنت تنهد إي شخابيط بنت تلعب على نفسك توه ماسك دفة الباب بيطلع إلا يسمعها تناديه
حصه: أبــــوي ...
التفتت بابتسامة حب هالانسانه العظيمه في نظره : عــيـــونـه ..؟
حصه : لا خل عيونك لك ما أبيها بس ناقصنا خضره جب معك وأنا أمك ..
سلمان: أحد يحصل عيووون سلمان وما يبيلها والله أنك خبله ..
حصه: ما الخبل إلا أنت أحترمني وجـع ...!!!! >وتراجعت <
بسم الله عليك من الوجع تضيق اللي ما يتضيق >>> قالك معصبه !
سلمان: ههههههههههه خبل مجنون مهبول الله لا يخليني منك قولي آمين وحب راسها ..
حصه: أمين ولا منك .. بتتأخر ؟؟؟
سلمان يتنهد : لا حدود الساعتين ..
حصه مسكت يده : وش فيك وأنا أمك ؟؟؟؟؟!!!
سلمان وكأن كل شي رجع يطبق على قلبه ....
سلمان: مافيني إلا العافيه وش فيني تأمرين على شي يالغاليه ....
حصه: لابد سلامتك وأنا أمك ودخلت الصاله
وهي تصارخ على نجد ساااعه وأنتي تبربرين في ذا التليفووون !
ركب سيارته وهو ما يدري وين يروح بالضبط كل شي ملخبط في رأسه السؤال اللي يتكرر
وش تبوووني أسوووي لهآ أكثـر من كذااا ؟؟؟؟؟؟؟؟؟؟!
كل هالأشياء دفتر نجد اللي بدى يقراه هذا وهو توه في الصفحه الأولى وجاه كذا أجل لو يكمله كله كان
يتمنى أنه ما تلقف وقال أبي أقراه ولا قالت خلني أخلص وتقراه ولا دخل غرفته ذاك اليوم وشافه فوق المكتب
وفوقه هالورقه ..
(((( الغـــالــي ...
هذا هو الدفتـر اللي خبيته عنك
ربما أحتواني أو أحتوى ما تبقى لدي
من مشاعر ربما كانت حقيقه أو خيياال
لكن تأكد أنها مشاعر مهمله (( إهداء لأرواحهم ))
التي ترافقني صباح مســاء ولروحك الغالية أيضاً
وكلي أمل (انه ما يطيح في يد أمي حصه)
حتى لا اروح في خبر كان ههههه..
وصدقني هو أنـا وأنـا هو
أختك
نجــوده ))))
هو هي وهي هو يعني كل كلمه فيه صدق الله يعينك ياسلمان لين تخلصه ...
يمكن تستغربون تأثره لهالدرجه بس سلمان من جوا حسااس لأبعد درجه يمكن الكسر اللي انكسره في
صغره وفقده لأعز أثنين في حياته ومع بعض هزه هزه يظهر للكل العكس لكنه ما كان يتمنى أن أخته
تحس هالأحساس خصوصا أنه يحاول بكل ما يقدر أنه ما يقصر عليها بشي وينصدم اليوم بسؤال عمره ما توقعه منها
(((يمـــه ووووينك ؟؟؟))) وبهالحزن صدقوني هو ما يقدر يتحمل هالشي !!
//
\\
في المزرعه والهواء يهب على الشجر ويحركه صوت المويه تسقي الخضره والهواء البارد اللي يريح النفس
أصوات العصـافير في هالوقت اللي يعلن أنتهاء يوم ليبدأ يوم جديد ولكن بظلام كانت تكره لحظات الغروب
لأنها تشعرها بالأنهزام بس هالجو وهالمكان غيروا كل شي أخذت هوا بااارد وهي تلتفت لفاتن
قآلت بدلع : أحــس أنـــي مــحــــلـــوه صـــح !!!
فاتن طالعتها شوي وضحكت بقوووه : هههههههههههههههههههههههه حلووه محلوه والله حتى
أنا أحس أني ناحفه ؟!
ندى : لاعاد ذا حلم أبليس في الجنه !!!
فاتن تطالع جسمها : حراااام عليكم والله أني ناااحفه 6 كيلو من الهم وتقولين حلم ابليس في الجنه ؟؟؟
ندى باهتمام لأول مره تبديه لفاتن : لييه سلامتك من الهم ؟؟!
فاتن تطالع الأرض وتلعب في الرمل بشبشبها : الله يسلمك موب هم هم !
ندى باصرار: أنتي قلتي هم !
فاتن: آآه يمكن هم خلي الطابق مستور !
ندى تلف عنها : أستغرب منك فاتن ولا كأني بنت عمتك تعديني كني غريبه !!
فاتن والعبره تخنقها تحس دموعها امتلت في عينها لأن ندى ضربت على وتر حساس حسااس وبقوووه !
فاتن تحوس التراب بقوه : أنتوا اللي ماتبوني !!!!!
ندى أنصدمت من الكلمه ( مااانبيك ؟؟؟!) لفت عليها تواجهها لأنها كانت سابقتها في المشي وهي مبين عليها
أنها منصدمه : إنـــا مااانبيك ؟؟!؟؟؟!
فاتن تلف عنها بضيق وهي تفرك بجلالها عشان على الأقل ماتلمح ندى ولاتشوف دموعها بس تكلمت !
فاتن: ايه ما تبوني لا تنكرين كنتي أنتي ومشاعل تتهربون مني في كل شي مع أني ما أذكر أني سويت لكم شي .. خنقتها العبره ,,,,,, أنا كذا من ربي خلقني ما أعرف أتعامل مع الناس موب قصدي شي تدرين أنسي الكلام اللي سمعتيه .. رفعت راسها للسما وهي تستنشق الهواء بقووووه وكأنه أختفى فجأه !
تقدمت ندى ووقفت قدامها ومسكت كتوفها : فاااتن ... ؟؟
فاتن كانت تصيح بصمت هالدموع اللي تمشي على خدها بدون صوت تبين كبر الألم اللي داخلها !
ندى ضاق صدرها تحس أنها بتصيح وهي تشوفها كذا : تصيحييين ؟؟؟؟؟؟
فاتن شهقت وللحين وهي بدون صوت مسحت الدموع بقوه وهي تهز رأسها لا ...
ندى : فاتن لا تتخيلين للحظه إنا مانبيك أنتي بنت خالي زي ما مشاعل بنت خالتي أنتي اللي كنتي بعيده عنا من يوم كنا صغار ماكنتي حتى تحتكين فينا قلنا يمكن مانعجبها بس والله منى عيونا تكونين معنا !!!
ضحكت فاتن باستهزاء : ههه مو من قلبك !!!
ندى صرخت: فاااااااتن !
فاتن: لا تصاااااارخين علي ايه مو من قلبببببك ولا تنكرين ..
فكت يدين ندى منها بقووه وهي خلاص منفجره اليوم منفجره....
وكملت : عمرك قلتي فاتن تعالي معنا وعييت لا أجي ...؟؟؟ عمرك حتى التفتي وراك وشفتيني واقفه
استنى منكم بس كلمـه ؟؟؟ عمرك قلتي بنت خالي اسألها أكلمها أشوف حيه وإلا ميته ؟؟؟
بالله عليك تعرفين وش أحب وتعرفين وش أكره ههه لا تلعبين على نفسك يا ندى
وعلي ، عمر أحد منكم ما أهتم فيني تدرين ليه لأن عضو زايد على هالعايله
من يوم كنت بزر موب بس اللحين ..
ندى بتتكلم ..... بس سكتتها ،،،
فاتن: لا تقولين شي اللحين خلاص أنا تعودت هئ تعودت على كل شي لدرجة أنه يشك فيني ياندى تخيلي أبووك
يشك فيييك ... سكتت ماقدرت تنطق (الكلمه) تجرحها في قلبها قبل لاتنطقها على لسانها تركتها وهي ترفع جلالها
لرأسها وتغطي وجهها لا أحد يلمح شلال الدموع اللي على وجهها متجـهه للبيت ......
ندى تتنهد وهي تطــالع طيفها اللي غاب مع الشجـر .... ( كل هذااا فيك وساااكته وكاااتمه يافاتن ما توقعتك يوم بتحسين ؟! ليه وش شايفتها ياندى جمااد ! آآآه بس أبي أحد يساعدني ما أقدر أكلمها لحالي أصلاً وش
أقدر أواجهها فيه وهي كل كلمه نطقتها صح ؟؟! بس حنا ماكنا نكرهها نحسها ما تبينا ومن عزة النفس قالك
مناب منادينها مالي إلا خالتي غاده ...))
رفعت جلالها على راسها تفادياً أنها تقابل إي أحد ...
قربت لم البيت الكبير ودخلت وهي تسمع صوت خالاتها وسواليف ومن ضمنهم غاده اللي مندمجه وميته من الضحك على منيره اللي انقلب وجهها أحمر من بدت عمتها تحكي مع أمها عن تجهيزات الزواج وخرابيطه ..
وقفت عند الباب وبنوع من الأدب : خالتي غاده ؟؟؟!
غاده: غاده مستغربه : هلا ..
ندى : تعالي أبغااك شوي ...!
أمها ناظرتها بنظره يعني (فيك شي؟؟)ردت عليها ندى بدون حتى لا تتكلم نوره
ندى : مافيني شي بس أبيها شوي ,,,
نوره تنهدت وطلعت غاده لندى وضحكت منى : ماشاء الله عليكم تفهمون بعض من النظرات ؟؟
نوره: ههههههه هذي أنا وشلون ما أفهمها ..
منى : الله يخليها لك يآرب ..
نوره: آآمييين ياربي وأشوفها عروس وأفرح بها بعد أخـوها ..
فوزيه بابتسامه : قريب إن شاء الله ...
//
:إلا تو من شوي دخلت وراحت غرفتكم لييه فيها شي ؟؟؟؟؟!
ندى بحزن : لا بس صدمتني ...
غاده تقعد على طاولة المطبخ وندى قبالها : صدمتك ليييه ؟؟؟ عسى سالفه العرس ؟؟!
ندى : إي عرس لا ماجابت لي طاري بس عادي كنا نسولف ومدري وشلون انقلبت الجلسه هبت فيني
أنتوا ماتبوني ما تحبوني أنتوا وأنتوا خنقتني العبره أحس أنها كاتمه في قلبها كثييير وجا شي طلع كل اللي حابسته ...
انفتح الباب بقوووه وصنم اللي داخل ومعه كرتون مووويه بيحطه ندى لما استوعبت شكلها نزلت راسها تحت الطاوله وهي تشهق وغاده تلتفت للباب وابراهيم مازال مصنم عند الباب > كبرت و تغييييييرت مرررهـ < !!!
غاده: هيييه أطلع في حريم ..!
ابراهيم أنتبه لنفسه تنحنح وهو يلف : ما أحد قالي .. وطلع من المطبخ ..
ندى معصبه : خيييير ولد أخوووك يحسب أنه في بيت أبوه يدخل على كيفه ما يعرف يتنحنح يتكحكح
غاده: ههههههههههههههه هنا صراااحه تنفع يتنحنح ويتكحكح هههه خلينا في فاتن وبعدين ..؟
ندى تتنهد شوفته وترتها ذكرتها مشعل اللي ماله أثر اليوم والله لو تدري أنه شافني أن تدفنه >>أبوووك يالثقه !!!!
ندى : ايه وين كنا ... وبس صارت تقول كلام مافهمته بس شايله علي أنا ومشاعل ..!
غاده: تبين الصراحه ؟؟ معها حق !!!
ندى : نعم ؟؟؟؟
غاده: خليك في موقفها هي تحس أن الكل ما يبيها موقعها بينهم غلط منيره ومتعلقه مع منى وميب معطيتها وجه أصلا موب من النوع الي تحتوي أحد ونوف وحرب داحس والغبراء معها وأصلا في فارق عمر بينهم مع أنه موب كبير أم ابراهيم مستحيل تاخذ منها أنا أعرف فاااتن وعقليتها وأخوي راشد موب مقصر وأنتوا اللي مفروض تكونون في عمرها عونها وصديقاتها تتهربون منها !!!
ندى : وش فيكم أنتوا علينااا والله ما تهربنا منها ..!
غاده: حتى لو كنتوا ما تقصدون اللي له عيوون ويشوف يلاحظ أنه في خلاف بينكم !!
ندى: موب خلاف بس أنا ومشاااعل وشلون أقولك من يومنا بزران وحنا مع بعض غييير
غاده: وهي من يومها بزر وهي معكم وعمركم ماعبرتوها وإلا عطيتوها وجه !!!
ندى : غووويد ترى جايبتك لي عووون صرتي فرعووون !!!
غاده : ههههه وش تبيني أسوي يعني ؟؟؟؟!
ندى كحل وسط : كلميها !
غاده : أنا اللي أكلمها كلميها أنتي وش دخلني أنا ؟؟؟!
ندى : غااااده أكلمها وش أقول ..
غاده : خذي اللي بخاطرها وهي بحاجتك اللحين وانتي بعد بحاجتها شوفي من راحت مشاعل وانتي كنك ضايعه ...
ندى بحزن : ايه والله من راحت وأنا انرحم كني يتيمه !
غاده: هههههههه بقى 3 سنين وترجع !
ندى : وش يصبرني 3 سنين قد طق فيني عرق منكم !
غاده توقف : والله كااان إنا اللي قد طق !!! بتكلمينها ؟؟؟؟
ندى : بشوف بس كلها تهدى ماشفتيها تو شوي وتموت من الصياح ...!
غاده: على العموم ترى هي كلمه و تراهي في أكثر فتره محتاجتكم فيها لا تخذلونها !
وهم يطلعون من المطبخ : لاتقعدين تضيقين صدري بذا الكلام خلاص بكلمها ..!
التفتت لها غاده فجأه : محلوه بالتجعيد !
ندى : هههه ملااحظه والله اني قاااايلته ههههههههههههه محلووووه صح ؟؟؟؟؟
غاده: يوووه عاد صدقت !
ندى : ههههه والله غاده صح محلوووه ؟؟؟؟!
غاده بخبث: كل ذا علشانه تــرى موب جاي !!!
ندى عصبت : غاااده خيير وش دخلني فيه يجي وإلا بالطقاق ترى ما أحب ذا الحكي !!!!
غاده لو ماكانت عارفه بالخطبه والبير وغطاه كان مستحيل تحكي هالحكي لبنت أختها أو أنها تشجعها
على شي من هذا القبيل بس هي تشوف مشعل صادق بكل شي وخصوصاً بخطوته الأخيره فخلها تحرجها
على كيفها تفرح لما تشوف عيال أختها عايشين هالحب اللي ما عاشته !!!
//
\\
رأسه صدع من هالحســابات والخرابيط يحس أنه يبي شي قوي عشان يصحصح شوووي مع أنه بيالة الشاهي قدامه بس ولو ما يركد راسه إلا قهوة أمـه وبشوي مسمار آآه هههههه لاتقعد تحلم سلمانوه
وخلك بالشغل ..
: ها وأنا أبوك فهمت كل شي ؟؟؟؟!
سلمان يحك دقنه وهو رفع راسه عن الأوراق : تقريباً فهمت كل شي مبدئي بس الشغل يحتاج مني جهد
أبو زيد: هههه كل الشغل يبي له جهد وخصوصاً هالشغله سووق العقارات وأنا أبوك موب سهل خصوصاً بعد
طيحة الأسهم ارتفع ارتفاع موب بسيط لازم تستغل هالفرصه لصالحك ..
سلمان: اللحين ماعندي شي إلا الأشراف إلا أن كاني فتحت لي مكتب ..!
ابو زيد يقعد جنبه على الكنب وفي يده ملف أصفر ..
أبو زيد: تفكر تفتح مكتب ؟؟؟!
سلمان: والله ذا الاشياء موب من تخصصي ولا ميولي بس مستحيل أني بعيش على ايجار كم عـمـاره ومحل
الدنيا تبي يابو زيد ..
ابوزيد: ههههه يابوك أحمد ربك هالكم عماره ومحل على قولتك تدخل عليك ذهب وتعيشك أمير أجل فكره المكتب اللحين لين بعدين ..
سلمان كان سرحان هزته كلمه قالها ابو زيد بتلقائيه حركت فيه كل شي من كلام نجد العصر لهاللي قدام عينـه
(((ياااابووووك))) يااااه يآ كم تمنيت أسمعها منك يايبه ؟؟؟!
ابو زيد: خذ هالملف وخله عندك ...
سلمان يفتحه : وش فيه ؟؟؟؟
ابو زيد : هذا في كل الجرد اللي سويناها وكل شي لين أنتقل كل شي باسمك ..حط يده على كتف سلمان
زي ماحافظت أمك على هالحلال لين تكبر وتسلمك كل شي حافظ على حلالها وحلال أختك ترى الدنيا
هالأيام القووي فيها بس اللي يعيش الكبير يأكل الصغير وإلا تدري الغني والله هو اللي ينهش في الفقير
خلها سند لك ووز قرشك الأبيض ليومك الأسود ...
سلمان: أفاا عليك يااابو زيد لاتوصي حريص ...
ابو زيد يناظره بإعجــاب : والله مامات سعود يوم أنه خلفك وراه ..
سلمان جاز له الطاري واستقعد ابتسـم: كنت تعرف أبـــوي مرره ؟؟؟؟
ابو زيد: ومن اللي ما يعرف أبوك يالغالي ...
سلمان ابتسم بفخر : كلمني عنه ؟؟
ابو زيد: اللحين من اللي مفروض يكلمني عنه ؟؟؟!
سلمان: هههههه لا بس قصدي يعني طفولته شبابه تدري انه راح الله يرحمه وأنا صغير اكيد كان له اسرار معكم ..!
ابو زيد يضحك : وش تبي توووصل له ؟؟؟؟؟؟؟
سلمان: ههههههه لا بس يعني ...
ابو زيد : والله أنا معاهد سعود سواء حي وإلا مات سره في بير ..
سلمان باخويه لهالشخص الطيب ترتاح له من تشوف نورالأيما يشع من وجهه
: ههههههههه اللحين بتسوي يعني أني وفــي ..؟؟
ابو زيد: ههههه والله عاد عاجبك وإلا لا أنا وفي من ربي خلقني ..!
سلمان: هههههههه والنعــم فيك لو منتب وفي ما مسكت حلال غيرك وحفظته ..
ابوزيد: حلالكم حلالي ..!
سلمان: أطلب اللي تبي يابو زيد وجاااك !!!!
ابو زيد: وش ذا الكلام يابو سعود ؟؟؟!
سلمان: أنت ما قصرت معنا بيوم كنت أقرب وأوفى من القريب واللي مافيه نخوه ما يجازيك على اللي سويته
أطلب اللي تبيه وجاااك يابو زيد ...
ابو زيد: ما أبي إلا سلااااامتك أنا ماسويت شي إلا لوجهه ربي يوم أني اراعي حلال ايتام ..!
سلمان: يعني بتكسر كلمتي قلت لك أطلب اللي تبي وجاك ..!
ابو زيد: وأنا مابي إلا سلامتك !
سلمان بمزح: لو أم عبد العزيز ترى ماتغلى عليك ..!
ابو زيد باعتراض: ليه تبي المعزبه تطردنا بعد ذا العمر لا خل أمك لك ومرتي لي
سلمان يضحك : ههههههههههههههه أجل تحبها ؟؟ >>>>>يقصد مرته والله يمووون ذا الولد فلها مع الرجــال !
استحى أبو زيد: أهااا بس ..
وسلمان أنفجر ضحك : هههههه هههههههه هههههههههه >>>ههههههههه هههههه يمكن نوبه هيستيريه
تخفف هالصداع شــوي
//
\\
: هيييييييه أنتي ترى حومتي كبدي بذا الاونو والله لاروح أعطيها غنم أبوي ابراهيم وأفتك اففففف
مها وهي توزع الورق : العبي العبي بس يوم أنهزمت حامت كبدها بناااات
نوف: مها والله حامت كبدي عندك نكته ؟؟؟!
كانوا قاعدين على الارض في فرشه جنب البيت وندى على كرسي تلعب في جوالها فوقهم والجوو ماايحتاااج يجنن هووواء وبراد يفتح النفس غاده ومنى ومنيره طلعوا يمشون شوي ونوره وفوزيه وهيا عند الرجال خصوصاً أن مافيه أحد يتغطون منه والرجـال فلة حجاج وضحك ...
مها: ايه عندي يقولك في واحد راح البقاله قاله عندك بسكوت ابو نص ريال ؟؟؟
نوف : اييه ؟؟
مها: قال ايه ....
نوف: وبعدين ....
مها: ههههههههههه قال بكم ؟؟؟؟؟؟؟؟؟؟؟؟
نوف سكتت ما ضحكت
وندى ضحكت باستهزاء : هاهاهاها يااااخف دمي
مها: ههههههههههههههه والله انتوا اللي قلتوا تبون نكته !
نوف : مااالت عليك أنتي ونكتتك اللي زي وجهك أسمعي بس هالنكته يقولك في وااحد قال لأمه
يمه عندي دوره شهرين !!!
ندى تجاوبت معهآ : اييه ؟؟
نوف: ههههههههههه قالت أمه هههه لا وأنا أمك ذا نزيف ههههههههههه
ندى ضحكت : هههههههههههههههههههههههههههههههههههههههه ياووويلي رهيييبه
مها بقرف: أنا اللي حامت كبدي ..
نوف: اووه نسينا عندك حساسيه
مها: أقوول أنطمي بس ..
نوف: خلينا بس نمشي شوي نطلق رجولنا ..
مها ترمي الاونو : يالله والتفتت لندى : تقومين معنا ؟؟
ندى : لا وسألت نوف.. نوف وين فاتن ؟؟؟؟؟
نوف: مدري ماشفتها من المغرب يمكن نايمه وإلا داخل ..
وتركوها وهي محتاره ومشاعرها متضاربه أقوم لها أكلمها وإلا أخليها وش علي منها وشلون وش عليك منها
وأنتي شايفتها بهالشكل أكيد ماخذه على خاطرها منا يالله بتعوذ من الشيطان وبروح لها ....
توجهت لجناح البنات ودقات قلبها تزيد ما تدري ليييه يمكن خايفه من مواجهتها لأن البركان اللي شافته اليوم
العصر أبعد شي عن فاتن البارده اللي ما يهمها شي وكل شي عندها تيكت ايزي ..
طقت الباب وسمعت صوتها ضعيف : مفتووح ..!!!
فتحت الباب والغرفه ظلام تلمست الجدار لين لقت ازرة الأنوار وفتحتها ...
ندى تكسر هالصمت لأن فاتن مندسه في السرير ومغطيه وجهها ..
ندى :نااايمــه ؟؟؟؟
ردت عليها بصوت مبحوح : لاااا ...
قربت ندى وقعدت على السرير الثاني اللي مقابلها : ممكن أكلمك ؟؟؟!
فاتن باقتضاب: قلت لك أنسي السااالفه ...!
ندى : موب على كيفك أنسى السالفه أنتي قاعده تتهميني !!!!!!!
فاتن تقعد على السرير وهي تشيل الكنبل وبان وجهها الاحمر من الصياح وعيونها المتنفخه ..
فاتن: ههه اتهمك لين اللحين تنكرين وأن كل اللي قلته خطأ !!!
ندى : أنا ما أنكر بس ..........
فاتن بصوت عالي شوي: بسسسس وشوووو ؟؟
وسكتت وهي تريح جسمها على السرير من جديد
فاتن: عشان ما أغلط عليك سكري السالفه وأنسيها أنا لو بتكلم مارح اسكت ..
ندى : عادي تكلمي شوفي فاتن أنا موب غبيه أدري أنك متأثره من هالشي أوكي بس حنا كبرنا واللي
فاات مااات أنتي فيك شي أكبر من تفاهات بزران بس للأسف أنك تعلقينه على هالشي ...
فاتن: صدقيني أكبر شي جارحني هاللي تسمينها ((تفاهات بزران)) انتوا ماكنتوا تحسون وش
كنت أحس به ؟!
ندى تتربع : بس لاتنكرين أن فيه شي ثااني مخليك تنفجرين كذا ...
فاتن بعبره من جديد: كل شي يخليني أنفجر ضغط ضغط ضغط والله لو تعيشينه ياندى أن تنجنين والمشكله
أني موب كذا بس هم حدوني أصير كذا ؟؟!
ندى بمباشره: وش اللي كذا وموب كذا ليش ما تتكلمين مثل الناس وتخلين عنك الألغاز ...
فاتن تناظر لبعيد قالت بألم : يشكون فيني ؟؟؟؟
ندى : من اللي يشك فيك ووش سويتي أصلاً عشان يشكون فيك ؟؟؟؟؟؟؟..
فاتن: والله ما سويت شي مدري في أحد يشك في تربيته ندى أبوي يشك فيني وخانتها دمعه مسحتها
هههه يشك في تربيته ما أدري هو اللي رباني وإلا الشارع عشان يشك !
ندى : ليه طيب مافيه شك من دون سبب ..؟؟
فاتن باندفاعيه: هم اللي يختلقون اسباب من عندهم خلهم يصدقون هههه يحسبوني برضخ لا والله ..
ندى : فاتن منتيب صاحيه وش هالحكي كنك بحرب والله ما فهمت ولاشي ..
فاتن: ومارح تفهمين شي تخيلي رايح يطلب منيره أختي توافق أتزوج قبلها يبي يفتك مني والله أني ماسويت لهم شي وعمري مافكرت أسوي شي يضرني وإلا يضر سمعتهم ندى أنتي عارفه تربيتي وعارفه اخلاقي ..
ندى : أكييد أصلاً مستحيل وش صار وافقت منيره ؟؟!
فاتن: منيره ماتقدر تقول لأبوي لا هه وافقت وجاب لي واحد بس أنا رفضت والحمد الله أمي هيا وقفت معي
ندى : ياحبي لها يوم تتعب ..
فاتن: ايه والله أني خفت لا يجيها شي تدرين هههه اففف ما أدري ليش أضحك ههههههه الموقف ما يستدعي
ندى تبتسم لها : عااادي وأنا أختك ..
فاتن: أول مره أحس أني قوويه يوم رفضت ووقفت بوجه أبوي اللي ما أحد فكر يتجرأ ويسويها حتى عمتي غاده ههههه تخيلي سمعته بأذني جلعها الصمم قبل لا اسمع كلمته ..
ندى : بسم الله عليك وش ذا الدعاء استغفري ..
فاتن: هههه وشو مارح أخسر شي يقول لأمي "مستقويه شوفي وش وراها لازم أزوجها عشان أرتاااح !!!!"
في أبــو يفكـر في بناااته كذا يمكن لأنــ ..........
ندى : لا تقولين شي يمكن غموضك يخليهم يشكون خليك واضحه معهم لا تسوين نفسك قويه وانتي ضعيفه لاتسكتين على حقك صيحي عندهم صاارخي أرفضي وش فيها مافيها شي ترى !!
فاتن: مستحيييل أبين لهم ضعفي مستحيييل خلهم يومهم بيشكون يشكون الحمد الله أنا واثقه من نفسي
وأخاف من ربي قبل لا أخاف منهم ..
ندى : بتعيشين نفسك في جحيم بتخدعين نفسك بالأول وتخدعينهم لا تصيرين بهالسطحيه !
فاتن: إي سطحيه ههه أنتي ما تدرين عن شي !!!
ندى : إلى متى .؟؟؟؟
فاتن: إلين يفرجها ربـي ..!
ندى بزلة لسان : ليت فهد خاطبك بدال منيره !!!!!
طالعتها فاتن وضحكت : لاعااد منيره تستاهل فهد والله ..
ندى : أدري لو ما تستاهل ما خطبناها لأخـوي ..
فاتن: استغربت أنكم ماخطبتوا له مشاااعل ؟؟!
ندى : مشاعل ما تصلح له ....إلا تعالي وش سالفة مشاعل ومانبيك ترى جرحتيني >>>كانت تستهبل عليها ..
فاتن: ههههه جرحتك مره وحده لا تأخذين ببالك كنت مضغوطه وأنفجرت ..
ندى : لا بأخذ تتوقعين أنا مانحبك والله إنا نحبك يافاتن بسس
فاتن بعبره: ههه حتى أنا أحبكم بس هالـ (( بسس)) ؟؟؟!!
ندى تقوم وتقعد جنبها وتحط يدها على كتفها : موب قصدي بسس أنتي الي كنتي بعيده عنا حتى لو
حاولنا نقرب منك ما أدري كنتي تتهربين ..
فاتن: عشاني حاسه أنكم ما تبوني فاروح بكرامتي أحسن !!!!
ندى : طيب إذا قلت لك إنا نبيك ونتمنى أنك تصيرين عضو ثالث في شلة الأنس وش تقولين ؟؟؟؟
فاتن: هئ هئ أقول اتشرف هههه
ندى تصقعها: هههه يالله أجل خلاااص ترى دلعناااك اليوم ليمن قلنا بس قوم غسلي وجهك وغيري
ومشت عنها للشباك لأنها تحس بـ شي أو شعور يناديها بــرى ..: خليني مير أدور لي أحد يدلعني ههههههه
وشهقت يوم صارت قدام الشبــاك وهي تطالع اللي برى ومنصدمه !!!
مرت من وارها فاتن وهي تلمح سيارة مشعل ولد عمتها توها موقفه ..
ضحكت على صدمة ندى : تحبينـه صح ؟؟؟!
ندى بقوه: لاااااااا والله !!!!
فاتن: هههه طيب عادي لا تعصبين أحس أنه يميل لك !!!
ندى تلف للشباك وتشوفه نازل برزه و يحووس بشعره ويرتب جاكيته ومتجه لقسم الرجـال لأن سيارات العيـال
يوقفونها من جهة البيت الكبير ..
ندى :وشلون يميل لي ؟؟؟؟
فاتن تهز كتوفها : مدري بس تصدقين تناسبون بعض ...!
ندى كشرت : مابعد عرفتينا أجل بالعكس أحس إنا عكس بعض في كل شي !!
فاتن: وهذا أحلى شي التناقض ..
ندى : لا ولو أنتي مأثره عليك الخطبه أقووول أمشي بس ..
فاتن: هههههههههههه تصدقين حتى أنا شاكه أنها مأثره علي ؟!
ندى :هههههههههههههههههههه بقووووه
وذااااب الثلج والرسميات المتبادله بين ندى وفاتن لأول مره يمكن بعد مشاعل بعد ساعد في حدوث هالشي
بس الحمد الله أنها جت لهالحد ولاطالت شي أكبر وقبلي أنصح في فاتن أن هالغموض موب نافعك أنتي
تخلينهم يشكون فيك أكثر ترد أنها ماسوت شي غلط عشان يشكون فيها فخلهم يشكون أنا قاعده أحاول اقنعها لأن هالشي موب في مصلحتها والله بتهدم كل جسور الثقه بينها وبين أعز الناس لها أهلها ..
//
\\
أنتهى يومنـا على خيـــر والكل مستانس ومبسوط في المزرعه .. مشاعل ماطلت عليكم لأنهاطالعه من فادي وعايلته رحلة ريفيه بما أن عطلة الكريسميس بدت ومافي أمل تنزل السعوديه فيوسعون صدورهم هنــاك ^^
سلمان وصل البيت تعشى وعلى غرفته بدون لا يأخذ ويعطي مع أحد لأنه تعباان وعنده شغل بعد بيخلصه ..
مشعل جا متأخر وفاته نص الطلعه تقريباً لكنه لحق على الشوي وساعة الصدر والفله عند الرجـال حتى
أبراهيم كان منظم لهم برغم أنه في تحفظ كبييير بينه وبين مشعل ولا ظنتي يذوووب هالثلج أبد محمد برغم أن هبهبات الوجع تعصر راسه كل شوووي إلا أنه يضحك ويسولف ويجامل الكل وهو مبسووط من جوا ومستانس
يمكن تكون أخر جمعه له معهم ...بيفقدهم ...!!
فهد مثل ماتوقع خلاه خاله يشوف منيره الرؤيه الشرعيه كذا خبط لزق ناداه للبيت الكبير وحتى هي ماعندها خبر مسبق كانت عاادي بتنورتها وبلوزه ربيعيه حلووه برغم أنها منزله راسها ومستحيه منه مووت إلا أنه ارتـاح لها نفسياً وهيا اللي شوي وترقص من الفرحه والبنات ماسكين منيره تعليقاااات خصوصاً فاتن وندى اللي صارت تمون عليها من صارت مرت أخوها ^^ وأختها
وش مخبيـــه لهم الأيـــام ...
ما القااادم ياااترى ؟؟!
|
20-04-11, 07:42 PM
جديد مواضيع قسم القصص المكتمله
العرض العادي
