السلام عليكم ورحمة الله وبركاته

اولا الله يعطيك الف عافية ان شاء الله و القصة كثير حلوه و مثير ننتظر جديدك بفارغ الصبر

تسلم الانامل الرقيقة اتابعك .

انتهى الفصل ال20 لما قرر فهد فجأه ان يطلب ايد ساره في موقف لاتحسد عليه



اثار فهد مفاجئة الكل .. وصاب المكان حالة من الصمت .. لثواني
ساره تبي تتكلم مو عارفه كانت مصدومة من فهد ( ليش قال كذا يبي يساعدني ؟؟.. او يتكلم من جده )
فهد : انت اخلي مسؤليتك بس اعرف إن الي فوق بحاسبك ..
ساره ( يعني يبي يساعدني )
بو ساره : يعني انت مسوي فيها تبي تفكها مني
فهد : لأ انا فعلا ابيها زوجه لي ..
بو ساره : وأنا موافق
فهد : قبل لا تسأل عني ؟!! او تعرف أي شي عني ؟
بو ساره : انت ولد بو فهد ومعروف مايحتاج اسأل عنك
فهد : حتى لو سمعت عني أي شي راح توافق وبدليل انك بترمي بنتك لرجال شايب وهي توها صغيره
بو ساره : هذه بنتي وانا حر فيها تبيها او باخذها لابو صالح
فهد : تتكلم عنها وكأنها مو إنسانة .. انا بس ابي اسمع منها اذا موافقة او لا
" راحت غنا لعند ساره "
غنا : ساره لا تردين الحين فهد مايبيج تجاوبين الحين قولي أي شي ماعدا انج تعطين اجابة
بوساره : نطقي يابنت
ساره : يبه بيضرك شي لو تركتني اسبوع بالبيت ؟؟ بعدها تصرف مثل ماتبي
بو ساره : اسبوع بس وفكري بين بوصالح وبين فهد
----------------------------
لما راحت ساره مع ابوها البيت ورجع الكل على غرفته
دخل فهد على شقته واعصابه كانت تعبانه .. رمى بنفسة على الكنبة وزفر بحدة .. وتحت تأثير التعب غفت عيونة .. ثواني الا صحته شهقات هبه ..
فهد : أكيد عرفت باللي صار .. ماراح اكلمها الحين ( سامحيني ياهبه بس انا نفسي ماعرفت ليش طلبت هذا الطلب ؟؟ هل في شي يجذبني لساره ؟؟ او شفقة .. ؟ او كثر الحاحهم علي بالزواج ؟؟ انا عن نفسي ماني عارف ) وجلس يفكر ويفكر حتى نام
-----------------------------
" كان غنا جالسة بالصالة وتفكر في صاحبتها ساره وشنو راح يكون مصيرها .. هل راح تقبل فيه عشان تتهرب من بوصالح وبدون تفكير .. او راح ترفضة وتخلي ابوها يقرر مصيرها عشان ماتجرح كبريائها قدام فهد؟؟ "
غنا : انا لازم اساعد ساره قد ما اقدر
" كان يوسف نازل من فوق عشان يشرب ماي وانتبه لوجود غنا وراح عندها "
يوسف : وين الحلوين سرحانين ؟؟ تفكرين في فهد ؟
غنا : ايه والله انا خايفة ان اتخذ هذا القرار من غير تفكير واذا فعلا هذا حصل الاثنين ماراح يكونون متفقين
يوسف : الي اعرفه عن فهد مايقول كلمته الا لما يتأكد منها
غنا : لأ هذه المره قال كلمته من غير تفكير
يوسف : انا اعرف فهد .. فكر كثير كثير قبل لايتخذ هذا القرار .. فهد داخله كان مقرر انه يتزوج واعتقد ان هو عارف ساره زين لانج كنتي واصفتها له قبل لايتزوج هبه وكان مقتنع فيها فلقى الفرصة قدامة
غنا : تعتقد كذا يعني ؟
يوسف : اسأليه بنفسج حتى تقدرين تساعدينهم اهما الاثنين
غنا : انا خايفه هبه تزعل مني
يوسف: كلامج صحيح لو عرفت هبه راح تزعل .. انا راح اكلم فهد وانتي كلمي ساره اوكي كذا هبه ماراح تزعل واساسا ماراح تعرف عن الموضوع
غنا : انت كلم فهد وبعدها قولي شنو قال لك وانا راح اتصرف مع ساره
زفر يوسف بحده
غنا : شنو وراها هذه الزفره ؟
يوسف : عشان الي صار اليوم اخاف يأثر على ملكتنا
ابتسمت غنا عشان تهديه : لا تخاف يايوسف ماراح يتغير شي بس راح نأجلها بعد 3 ايام
يوسف : ابتسامتك هذه تكفيني لحالها تريحني .. بس شنو الفرق ؟
غنا : لان 3 ايام تكفيني حتى اقنع ساره
يوسف : شكلك واثقة
غنا : ان شاء الله
يوسف : الله يقدم الي فيه الخير .. شكلي بنام وبصحى بعد 3 ايام عشان ما انتظر اكثر
حمر وجه غنا : طيب عن اذنك بروح انام
يوسف : نووووم العافيه
------------------------------------
بعد 3 ايام
" تأكدت غنا ان فهد كان منجذب لساره ولقى الفرصة قدامه وان هو ماتسرع وصحيح انه هو نفسه تفاجئ بس كان القرار نابع من داخله .. فأوصلت غنا هذا لساره بطريقتها وساره ماكان لها وقت طويل تفكر وحست ان فهد هو المناسب لها وتكفي وقفته قدام ابوها وكان ممكن يكون في موقف محرج.. هذا كان يكفيها انها تفكر فيه كزوج يحميها ويراعها .. وفعلا مثل ما قالت غنا ليوسف 3 ايام كانت تكفيها عشان تقنع ساره .. واليوم هو يوم ملكة يوسف وغنا "
" كانت هبه في غرفتها تبكي وميته من القهر والحسرة على الي صار فيها وتمنت انها ماتزوجت ولا يجي هذا اليوم الي تشوف وحده ثانيه تاخذ منها فهد خصوصا ان هبه تعلقت في فهد بشكل كبير .. "
" كان فهد في الحمام ياخذ شور وبعد دقايق طلع ولبس وتهندم عشان ملكة يوسف .. ولما التفت على هبه بيسألها يلبس شماغ أو غتره انتبه عليها وهي تبكي .. ( فهد وهبه من لما تكلم فهد في هذاك اليوم وهما مايتكلمون مع بعض وهذا الشي بسبب هبه لان فهد حاول اكثر من مره يكلمها لكن بدون فايده ) "
" قرب فهد من هبه وجلس جنبها ومسح دموعها "
فهد : سامحيني ياهبه ماكنت ناوي وانتي تعرفين هذا الشي بس انتي لازم تعذريني .. وصديقيني حقوقج كلها راح تجيج ماراح اتخلى عنج او انقص شي من حقوقج ..انتي لازم تثقين فيني كان لازم في يوم من الايام اقوم بالخطوة هذه لازم يكون لي ولد يرفع اسمي ويرفع اسم ابوي ..
هبه : انا مو زعلانه عليك هذا حقك بس مو قادره اتصور يوم من الايام تجي وحده وتاخذك مني
فهد : هبه ياحياتي صدقيني مثل ماوعدتج ماراح اقصر عنج ابد ..
هبه : قوم وروح مع اخوانك اكيد ينتظرونك
فهد : ماراح تروحين مع غنا ؟
هبه : بغسل وبروح عندها
----------------------------------
" كانت غنا بغرفتها تلبس وتجهز وكانت خايفة وتحاتي .. لبست فستان تركواز ناعم من فوق ورفعت شعرها بشكل بسيط كيرلي وزينته بتاج ناعم كرستال ذهبي .. ولبست اكسسوارات ذهبيه وصندل كعب بنفس لون الفستان وتزينه شريطة ذهبية وطلعت فلقة قمر مثل مايقولون لان اللون التركواز يناسب لون بشرتها "
ساره : طاااااالعه قمر يوسف اذا شافج بيغمى عليه .. تهبلين .. بس ناققصتج الابتسامة وينها ؟؟
غنا : ساره مادري ليش احس بخوف
ساره : شي طبيعي .. بس اكيد داخلك فرحانة
غنا : والله ماني عارفه مشاعري مختلطة
ساره : ترا شوي وينادونج
غنا تبلع ريقها : لالا
ساره : حركات دلع
غنا : اصبري يوم ملكتك اذا ماصار فيك نفس الي صار فيني
ساره ( مادري ياغنا اذا استعجلت او لا بس ماكانت قدامي غير هذه الفرصة حتى اتخلص من ضلم ابوي .. رغم اني كنت احلم في فهد الا اني خايفه )
------------------------------
في بيت بوعبد العزيز
" كانت ريم بغرفتها تبكي وتحس انها لاول مره تخسر شي كانت حاطته هدف قدامها وشنو ؟؟ خسرت حبها الي كان من طرف واحد وجلست تلوم نفسها لو ماتحدت بنات خالتها كان يمكن ماصا رالي صار لها الحين .. لكن ريم عنيده ومستعدة تسوي أي شي حتى لو في مضره لاحد عشان تظفر باللي تبيه "
ريم : ماراح اخليك تتهنين ياغنا .. والمفتاح الحين بأيدي انا وراج الأهانة الي اهنتيني فيها قبل قريب اردها لج بس مو بأهانه بشي أعظم .. " اخذت جوالها واتصلت بهبه "
هبه : هلا ريم ماراح تجين ؟
ريم : لا انتي تدرين ليش وبعدين غنا بكل وقاحه قالت بعدي عن طريقي واتركي يوسف لحاله وهي عارفه انه يحبني
هبه : خلاص انسيه ياريم انسيه هو نساج
ريم : هبه انتي تصدقينه انه نساني؟ <<< تكذب كذبتها وتصدقها
هبه : ريم بصراحة انا مااحس انه مره حبج من كثر مايحب غنا ..
ريم : انتي مصدقه غنا ؟؟
هبه ساكته "
ريم : لو عرفتي انها هي الي ورا زواج فهد شنو راح تقولين
هبه : لا ياريم مو هي فهد بنفسه هو الي خطبها
ريم : الحين ماينفع نتكلم نتكلم بعدين ..
هبه : طيب ريم انا لازم اروح اشوف غنا
ريم : لحضه انا ماقلت لج ليش اتصلت
هبه : ليش ؟
ريم : ابيج تقولين لغنا اني ابارك لها ملكتها واني اعتذر على الي صار مني
هبه : من جدج ؟
ريم : انتي سوي الي قلته ..
--------------------------------------
" دخلت أم فهد غرفة غنا بعد ماطلبت ساره منها انها تجي ( طبعا ام فهد فرحت لما فهد خطب ساره مو حبا فيها لا عشان الولد لان ام فهد عمرها ماتمنتها لولدها بس هذا اختياره ولازم تقتنع فيها ) .. لما شافت ام فهد غنا بالشكل هذا انبهرت فيها صحيح ان غنا بدون المكياج حلوه لكنها كانت ماتهتم بشكلها كثير وماتلبس اللبس الي يبرز انوثتها قدام عيال عمها وهذا الي علمها عليه عمها لكنها اليوم وبالفستان هذا بين جمالها الأنوثي اكثر "
ام فهد : عيني عليج بارده طالعة مثل القمر
" اول ماشافتها غنا راحت تركض وعلى طول لحضنها .. تفاجئت أم فهد وعلى طول تذكرت الموقف الي لما كانت غنا صغيره "
غنا والدمعة بتنزل من عيونها: يمه ادعي الي ..
تأثرت أم فهد وكانت دموعها في طرف عينها .. لكنها مسحتها قبل لاتبين لغنا : لاتبكين بعدين يخرب مكياجج
مسحت ساره دموع غنا : مانبي ولا دمعه لاتبكين
أم فهد : الا صحيح ليش مانملك بيوسف وفهد مع بعض
غنا : والله فكرت فيها وقلت لساره بس هي توها اعطتنا رايها لازم نعطيها على الاقل كم اسبوع عشان تستعد ..
ام فهد : الاسبوع الجاي نملك على فهد ليش التأخير .. خير البر عاجله
غنا : هذا نتركه على سارونه
أم فهد : ساره فكري في الموضوع زين
ساره نزلت راسها : انشاء الله خالتي
------------------------------------