بعد اسبوع من دخول بوفهد المستشفى .. قرروا اليوم خروجه
ام فهد : فهد بجي معاك عشان ناخذ ابوك من المستشفى
فهد : مايحتاج يمه الحين على طول بجيبه وباخذ يوسف معاي
ام فهد : على خير الله يحفظكم
فهد : يمه بس بغيت اقولج شي ولاتخاذين بخاطرج
ام فهد : قول
فهد : يمه حاولي تمسكين اعصابج شوي هاليومين عشان ابوي
ام فهد : ان شاء الله
فهد : يلا مع السلامه
--------------------
" مر الاسبوع الاول من خروج بو فهد على خير بدون مشاكل .. انشغلت ام فهد اختيار البنت الي تبيه وتشوفها مناسبه ليوسف .. وفهد ويوسف كانوا على طول في الشركة .. غنا بين فتره وفتره تروح لعمها وتساعده وقت ماتكون ام فهد مو موجوده .. اما احمد فعلى طول مع اصدقاءه رحلات وغيره "
-------------------
اليوم الاول في الاسبوع الثاني في الفجر بعد الصلاة
" كان يوسف جالس بالحديقة ومشغول في ملفات للشغل لازم يخلصها قبل لايروح الشركة "
" شافته غنا من فوق لما فتحت النافذه ولما حست نفسها شبعت نوم .. نزلت تحت وقبل لاتطلع سوت نسكافيه ليوسف "
" لما طلعت وشافته مندمج راحت عشان ماتزعجه حطت النسكافيه في طاولته وجلست بالطاولة الثانيه "
يوسف : غنا ؟!! مانمتي ؟
غنا : لما جلست اصلي حسيت نفسي مافيني نوم ولما شفتك مندمج وشكلك مانمت قلت اسوي لك نسكافيه
يوسف : بس انا ما اشرب نسكافيه بالوقت هذا
غنا مبوزه : وانا سويته الحين بترميه ؟
يوسف : اكيد لا هذا من يد غنوءه كيف ارفضه
ابتسمت غنا : أي كذا تعجبني
يوسف : غنا كيف امي معاج هاليومين ؟ ..
غنا : امي ؟!!
يوسف : أي ومن مفاجئتج اكيد بعدها تضايقج صح .. ؟
غنا : لالا بالعكس امي هاليومين ماتكلمني خير شر ..
يوسف : تحقرج يعني ؟
غنا : لا عادي لاتحاتي .. اصلا امي مشغوله تدور بنت تخطبها لفهد
يوسف : ياحليله فهد كان رافض من بعد حنان
غنا فجأه : يوسف
يوسف : خير ؟
غنا : اذا خلصت دراسه راح تتزوج ؟
ماعرف يوسف ليش هذا السؤال ربكه رغم ان مو اول مره ينسأل بس من غنا كان غير
يوسف : الله العالم انا ما افكر الحين بهذا الموضوع ابد
غنا : اذا في بنت في بالك تكلم قبل لاتروح عليك اخاف يصير لك مثل فهد .. شوف كيف صار له فتره طويله شايل الفكره من باله
يوسف نسى نفسه: ياليـــت اقدر كان ماترددت
غنا : يعني فيه ؟
يوسف : ها لالا جالس امزح معاج من جدج
غنا : علينااا لاتخبي قول قول لايكون
عبير اخت حنان ؟
يوسف : لا اصلا ما اذكرها ابد لاتنسين الحين نادرا مانشوفهم من زعلت امي على خالتي.. بعدين خلاص غيري الموضوع
غنا : خلاص .. عطلتك عن شغلك مو ؟
يوسف : لا بالعكس اصلا خلصت باقي اشيا بسيطه
سحبت غنا كوب النسكافيه من يد يوسف وهو بيشرب اول رشفه
يوسف : ليش مو توج تقولين تبيني اشربه
غنا : لحضه لاتقوم
" راحت غنا تسوي عصير ليمون بالعسل بدل النسكافيه عشان يروق اعصابه بعد شغل طويل اخذ منه مجهود "
" اما يوسف فجلس يفكر في كلامه مع غنا قبل شوي .. وقال لنفسه ( مو سهل تشيل غنا من راسك اذا جلست معاها احس نفسي ماودي تقوم من قدامي .. حتى وانا اشتغل افكر فيها يعني حتى شغلي مانفعني) .. غمض عيونه ودعا الله انه ينساها مع الوقت "
" جات غنا بالعصير وعطته ليوسف "
يوسف : أي هذا الي بينفعني مو نسكافيه
غنا : اهم شي حلو ؟
يوسف : أي حلو .. " وجلس يطالع الساعه " ما انتبهت الساعه 5ونص لازم اروح اسوي تمارين قبل لا اشتغل هملتها كثير
غنا : صح انت هملتها لازم تستمر فيها .. قوم تمرن وانا بروح اجلس على النت شوي لحد مايجيني نوم
يوسف : اوكي
-------------------------------
في بيت بو ناصر
" كانت ريم تفكر في يوسف .. وهي حاطه في بالها ان مهما صار لازم يوسف يكون لها .. كان همها الوحيد شكله ووتحدى هيفا الي قالت لها ان هذا الولد باين عليه الاحترام وماراح يلتفت عليج .. "
ريم ( كلامها صحيح الولد هذا باين عليه ولد ناس ومحترم وهذا الي يخليني اصر اكثر واكثر .. وبالنسبه لي مو صعبه علي اخليه يكون من نصيبي .. )
" كان ناصر طالب من امه تسوي كيكة القرفه ليوسف لان كان يوسف يموت فيها لما كانو صغار .. ريم راحت وحطت تحت قطع الكيك بطاقة صغيره وغلفتها بنفسها "
بو ناصر : بتروح ليوسف في الشركه ؟
ناصر : ايه
بو ناصر : سلم عليه وقوله ان شاء الله نجي نزورهم عشان نسلم على ابوه المفروض منزمان بس سفري اهو السبب
ناصر : ان شاء الله يبه
--------------------------------
" بعد مادورت ام فهد البنت الي تناسب فهد في رايها هي .. اعجبتها بنت اخو صاحبتها اسمها هبه وهي بنت جميله وذكيه وجامعيه .. واليوم بتفاتح فهد بالموضوع "
نزلت غنا من الدرج وكانت تدور على ام فهد عشان تبي تعطيها دواها لان ام فهد في هاليومين اهملت علاجها وغنا كانت تراقب علاج بوفهد وام فهد
غنا : يمه ..
ام فهد : غنا افهمي اني ما ابي اسمع هذه الكلمه مره ثانيه ناديني خالتي
غنا : ما اقدر والله صعبه وبعدين تلقائي وهي كلمة اعتبريني قلت خالتي
ام فهد : طيب شنو تبين جالسه تنادين بأعلى صوتج من الدرج
غنا : انتي ما اخذتي دواج
ام فهد : بتسوين نفسج مهتمه
غنا : اكيد بهتم .. صحيح انتي ماتحبيني وماتعتبريني مثل بنتج .. بس مهما كان انتي الي ربيتني وانا اشوفج بمقام امي ولازم اهتم في صحتج
ام فهد : بلا فلسلفتج علي الحين
غنا : اوكي بس خذي هذا العلاج وانا بروح اكلم ساره اسألها عن احوال امها
" اتصلت غنا بساره لكنها ماردت واتصلت في بيتهم هم ماردت .. قالت بينها وبين نفسها اتصل فيها بعدين "
رجعت غنا للصاله عشان تجلس شوي مع ام فهد بس ماشافتها .. شوي الا بدخلة احمد
احمد : هلا غنا
غنا : اهلين بالي ماينشاف ابد
احمد : شسوي تعرفيني اموت برحلات .. الا انتي ليش ماتطلعين
غنا : اطلع مع منو صديقاتي كلهم مسافرين ماعدا ساره .. وماعندي احد اطلع معاه الكل مشغول
احمد : هذا الغلط منا احنا اهملناج
غنا : لا عادي احمد لاتفكر كذا اصلا انا ما احب اطلع كثير
احمد : غير كذا ابوي محتاج لراحه والمفروض ياخذ له فتره نقاهه على الاقل نروح كم يوم المزرعه منزمان عنها
غنا : الله ونااااسه وناخذ عمتي هناء
احمد : رجعت من السفر ؟
غنا : ايه اليوم كلمتها ..
احمد : وعندها خبر عن ابوي ؟
غنا : لا ولا مادري شنو راح تكون ردة فعلها .. لما اتصلت وسألتني ليش مايرد قلت لها انه سافر لرحلة عمل ونسى جواله وهو يستخدم رقم ثاني مو عندي الحين اعتقد اتصلت بفهد ومادري شنو قال لها .
احمد : اها بس عمتي صار لها فتره مقاطعه بيتنا ماتجي زعلانه على ابوي لما وقف مع امي ضدها
غنا : عمتي هناء حساسه كثير وسالفة تأخير حملها كان نقطة ضعفها .. وامي لما تكلمت معاها زعلت .. وابوي ماغلط لما دافع بس عمتي الله يهداها احنا لازم نكلمها
احمد : أي اكيد لازم نروح لها ونكلمها
-------------------------------
" كان يوسف كعادته يشتغل بهمه في مكتبه .. دخل عليه ناصر "
يوسف : ناصر !!
ناصر : مفاجئه مو ؟
يوسف : واحلـــــى مفاجئه هلا والله
ناصر : وهذه الكيكه الي يحبها قلبك تذكر
يوسف : بعد لا اليوم صاير ابو المفاجئات .. شكرا
ناصر : لو قلت لك اجل شنو جاي عشانه شبتقول
يوسف : قول قول شنو عندك بعد
ناصر : تذكر قبل اسبوع لما قلت لك اني اشتغلت .
يوسف: ايه ..
ناصر : وانا الحين هنا كموظف
يوسف : لاتقوووووووووووول
ناصر : فهد اتصل فيني بعد ماعرف منك اني صرت محامي .. وقال لي اذا في مجال اشتغل معاكم .. وطبعا وافقت .
يوسف : وانا اخر من يعلم
ناصر : قلت بسوي لك مفاجئه
يوسف : احلى مفاجئه وعشان هالمفاجئه خلنا نتغدا برا بعد ماخلص الي بأيدي
ناصر : طيب انا بروح الحين مكتبي .. وانت مرني اذا خلصت عشان تشوف مكتبي
يوسف : اوكي
" مسك يوسف القالب وافتحه ولما اخذ قطعه انتبه ان في ورقه .. وضحك في البدايه ظن منه ان ناصر .. كان مكتوب ( بالعافيه اتمنى تعجبك .. ريم ) تفاجئ يوسف ومسك البطاقه ورماها بالزباله .. "
---------------------
" راح احمد ودق الباب على غنا .. عشان يستعجلها عشان بيروحون لهناء "
غنا : لحضه بس ونازله انت اسبقني
احمد : اوكي لاتتاخرين
------------------------
" قبل لاتفتح ام فهد موضوع خطبة فهد مع فهد راحت تخبر بو فهد .. وقال لها اذا البنت تناسبه لاتتردد"
-----------------------------
" طلعو غنا واحمد من بيت عمتهم هناء وهم مبسوطين من عمتهم وتفهمها وقالت لهم انها راح تجي بكرا عشان تطمن على اخوها .. وعجبها اقتراح روحتهم للمزرعه وقالوا لها بس لما نتاكد من الباقي اذا بيروحون او لا "
-------------------
في ايطاليا
طلال : مروى اتصلتي بغنا من فتره ؟
مروى : أي اتصلت توني امس كلمتها .. وعمها كان تعبان وتوه طالع من المستشفى
طلال : ليش ماقلتي لي عشان اتصل عليها .. هذا واجب
مروى : نسيت ماجا في بالي
طلال : مره ثانيه لاتنسين مثل هذه الامور
مروى :حاااااااضر ولا تزعل
طلال : بروح اتصل فيها
" اتصل طلال بغنا وغنا ماردت لانها كانت حاطته على صامت وهي تكلم عمتها وماتبي شي يشغلها ونست لاترجعه "
طلال : مروى غنا ماترد يمكن ماتبي ترد علي
مروى : لا ما اعتقد وليش ماترد عليك حاول مره ثانيه
طلال : اتصلت كثير ماترد
مروى : انتظر مو طايره يمكن مشغوله .. راح تتصل فيك
طلال : بعد نص ساعه راح اتصل فيها
مروى : اوكي .. وين خالد ؟
طلال : مادري عنه يمكن بغرفته
-----------------------------
في السياره احمد وغنا
احمد : الا كيفهم عيال خالتج ؟ كلمتيهم قريب
غنا : كلهم طيبين ويسلمون عليكم
احمد : بغيت اسألج مروى قدج ؟
غنا : لا اصغر مني بسنة السنه الجايه بتتخرج .. ليش ؟
احمد : لا ولا شي
غنا : كون صريح معاي انت مهتم بمروى
احمد : ها لا لا شنو مهتم انا قلت لج ما احب الشقر
غنا : بس مروى مو بس جميله لا مروى ذكيه وفاهمه ..
احمد : أي بنت خالتج بتمدحين فيها
غنا : لا موعشانها بنت خالتي .. بس جد مروى فيها المواصفات هذه
احمد : خلينا من مروى الحين وقولي لي وين تبين تروحين ماراح ارجع البيت الحين
غنا : أي مكان عادي ماتفرق اهم شي اغير جو
-----------------------------
" كانت ام فهد تنتظر فهد يجي من الشغل .. شوي الا بدخلة فهد ويوسف "
فهد ويوسف : مساء الخير يمه
ام فهد : مساء الانوار هلا فيكم ..
فهد : وكيف صحتج الحين
ام فهد : طيبه ..
يوسف : وابوي وينه
ام فهد : ابوك بمكتبه يقول في ملفات بيعطيكم اياها بعد ماينظمهم
فهد : ابوي المفروض الحين يرتاح .
ام فهد : قلت له بس قالي ان هو بخير تعرف ابوك عنيد
فهد : بروح اكلم ابوي
ام فهد : لا انا ابيك بموضوع ..يوسف يكلمه
يوسف : انت خلك مع امي انا بروح اكلمه
فهد : اوكي
ام فهد : تعال نجلس
فهد : خير يمه
ام فهد : خير يمه خير .. الحين مافي شي يخلينا نأجل خطبتك .. وانا لقيت البنت الي تناسبك
فهد : الي تشوفينه بس خذي غنا معاج
ام فهد : ليش ؟
فهد : يمه هذه رغبتي خذي غنا معاج
ام فهد : خلاص مثل ماتبي .. بس هذا لانك مو واثق في امك
فهد : الاصح انج تقولين البنات يفهمون لبعض اكثر
ام فهد : خلاص مثل ماتبي .. بس انت قول لها انا مابي
فهد : يمه ياليت ماتحملين غنا ذنب مالها فيه
ام فهد : وانت تعرف شنو سووا اهلها
فهد : بغض النظر اعرف ولا ما اعرف غنا مالها ذنب لاتنسين ماتوا اهلها الله يرحمهم وهي مالها الا 3 سنوات ماتذكر شي .. ياليت تحبينها مثل ما احنا نحبها
ام فهد : ما اقدر احبها .. غصبا عني
فهد : تعبت يمه من الموضوع هذا .. ما اقولج حبيها اقولج تحمليها شوي
ام فهد : وانت شايفني مأذيتها انا تاركتها
فهد : ريحتيني .. استأذن الحين بروح ارتاح شوي
ام فهد : اليوم بكلم ام البنت وبكرا نروح نخطبها
فهد : سوي الي يريحج
" دخلو احمد وغنا "
فهد : كنتوا طالعين ؟
احمد : أي رحنا لعمتي هناء
فهد : عمتي هناء ؟!! قبل كم يوم اتصلت تسأل عن ابوي
احمد يهمس لفهد عشان ماتسمعه امه : بكرا عمتي هنا بتزورنا احنا اليوم كلمناها بخصوص المشكل هالي صارت قبل 3 سنوات والي خلت عمتي ماتجي البيت ابد .. وطبعا بعد جهد جهيد واقناع مني ومن غنا اقنعناها تجي وتنسى الي صار ..
ام فهد : شفيكم توصوصون وبعدين عمتكم هذه حتى ابوكم ما اتصلت ولاجات تشوفه وانتوا رايحين تزورونها
احمد : يمه هذه عمتي مهما كان لازم نصلها .. وبعدين هي ماتقصر على طول تسأل
ام فهد : اكيد هذا اقتراح غنا
فهد : يمه الله يهديج توني مكلمج
ام فهد : سكتنا
فهد : يلا عن اذنكم بروح ارتاح
ام فهد : غنا بكرا بروح أخطب لفهد وراح أخذج
غنا مستغربه ا نام فهد فكرت تاخذها : ان شاء الله
ام فهد : لاتستغربين هذه رغبة فهد ..
احمد : غنا طالعيها زين اذا شفتيها قشره ولا مغروره ولارجه مانبيها
ام فهد : يعني انا بختار هالمواصفات لاخوك
احمد : لا يمه امزح معاج حاشاج بس ابي اجننج .. فديت الي بسرعه يعصبون
ام فهد : أي قص علي
مسك احمد راس امه وباسه : والحين رضيتي علي
ام فهد : وانا اقدر ازعل عليك
احمد : ادري انج تحبيني اكثر واحد
ضحكت غنا : انت احلى مافيك ثقتك
احمد : مو جديد .. المهم انا بروح اكلم ابوي ويوسف اذا هنا عشان المزرعه
غنا : أي تكفى ..
------------------------------------
" كانت غنا تحاتي ساره فمسكت الموبايل بتتصل وشافات مكالمات لم يرد عليها وكانت كلها من طلال .. وقالت اتصل فيه بعدين توها بتتصل بساره الا يرن موبايلها مره ثانيه.. واول ماردت وقالت هلا طلال كان بصدفة طالع يوسف من عند ابوه وهي كانت واقفه بالمدخل "
غنا : لا مو متعمده ما ارد .. كنت حاطته على الصامت
طلال : المهم حبيت اتطمن عليج .. واتحمد سلامة عمج
غنا : الله يسلمك
طلال : غنا ليش ماعاد تدخلين المسن .. او عاطيتني حظر ؟
غنا : لا ليش تفكر كذا ياطلال .. ليش اعطيك حظر
طلال : لاتزعلين مني غنوءه لما صار لي فتره ماشفتج كنت متضايق وخفت تكونين زعلتي مني لما جينا اخر مره وكنت صريح معاج
غنا : انت ماغلطت عشان ازعل .. لاتفكر كذا بس انا انشغلت وصارت امور كثيره في البيت اشغلتني مو زعلانه
طلال: اوكي كذا ريحتيني كنت خايف والحين تطمنت
غنا: طلال انا اسفه لازم اسكر الحين صاحبتي لها يومين مادري شفيها ماترد والحين جات منها مكالمه
طلال : اوكي يلا مع الف الف سلامة
غنا : الله يسلمك
" كان يوسف وده يدخل في التفلون ويذبح طلال .. والاكثر من هذا ان غنا جالسه تتعذر له "
انتبهت غنا ليوسف
غنا : انت منزمان هنا ؟
يوسف : من هلا طلال
غنا : كيف الشغل معاك
يوسف بدون نفس : ياليت يشغلني وافتك عن اذنج
استغربت غنا شفيه يوسف ؟؟
وراحت اتصلت بساره على طول
غنا : ساره انتي وينج
ساره بصوت مبحوح ومبين عليها انها باكيه : كنت بالمستشفى مع امي حالتها زادت
غنا : ياربي .. يااااااارب تشفيها
ساره : عذريني ياغنا اني ما اتصلت فيج وطمنتج
غنا : معذوره حبيبتي بس كنت جد احاتيج .. والحين امج كيفها
ساره وهي تبكي بحرقه : بتسوي العمليه بكرا والعمليه خطرة ومو اكيد تنجح
غنا قامت تبكي مع ساره : لا ان شاء الله تقوم بسلامة انتي ادعي لها
ساره : حتى ابوي مو هنا اتصلت فيه يقول مايقدر يترك الشغل .
غنا ( هذا مو ابو ) : ساره انتي الحين وينج بالمستشفى ؟
ساره : لا انا بالبيت الحين لان امي بالعنايه المركزه ما اقدر انام معاها وقالوا لي مايحتاج انتظر هنا ورجعت للبيت
غنا : يعني انتي لحالج بالبيت ؟
ساره : معاي الخدامه
غنا : لا مايصير تجلسين هناك لحالج انا الحين اجي معاج
ساره : لا غنوءه لاتكلفين على عمرج
غنا : انتي شنو هذا الكلام اصلا منو قالج باخذ اذنج يلا مع السلامه انا جايه
" راحت غنا تستأذن من عمها عشان تروح تنام عند ساره وماتركها لحالها .. لكن بوفهد رفض لخوفه عليها وقال خليها هي تجي معاج "
"راحت غنا عشان تستأذن من ام فهد وتخلي ساره تجي عندها وطبعا ام فهد رفضت وجلست غنا تترجاها بس هي رفضت "
طلعت غنا الحديقة تبكي وما انتهت ليوسف انه جالس وجلست تتحلطم : ليش كذا ساره شنو راح تسوي ؟ ماراح تزعجها بشي .. واذا قلت لابوي لازم يسمح لي اروح بيقولي انا قلت لج خليها تجي هنا وانا مابي اقوله انها رفضت
قرب يوسف لغنا : غنا فيج شي
غنا بلعت ريقها ومسحت دموعها : انت منزمان هنا ؟
ضحك يوسف : اليوم صادفتج بكل حالاتج فرحااااانه وزعلانه .. بس ماقلتي لي ليش زعلانه ؟
" خبرت غنا يوسف "
يوسف : هذه خليها علي انا بكلم امي بس انتي لاتزعلين اوكي
غنا تمسح دموعها: مشكور يوسف
يوسف : مانبي رسميات .. والحين روحي لبسي عباتج وانا بجيب المفتاح
غنا : وامي؟
يوسف : قلت لج ضامنها يلا روحي البسي عباتج .
غنا : اوكي
" راحت غنا لساره وبالموووووووووت اقنعتها انها تجي معاها بس لهذا اليوم لحد ماتطلع امها بسلامة .. "
----------------------------
" لما دخلوا غنا وساره كانت بو فهد وام فهد وفهد جالسين بالصاله يشربون شاي "
سلموا غنا وساره على الجالسين وراحوا على طول غرفتهم
فهد ( هذه شكلها ساره )
ام فهد : ناقصنا سويره بعد
بوفهد : انتي شنو عليك منها مع ساره بغرفتها
ام فهد : بس ليش كذا بيتنا صاير ملجأ لكل من هب ودب
بوفهد : انا لله وانا اليه راجعون .. انا بروح ارتاح بغرفتي
فهد تضايق من كلمة امه لان في مثل هذه المواقف لازم يكون عند الانسان لو ذرة انسانيه لكن شاف ان الانسانيه معدومه عند امه والي ضايقه اكثر ان غنا كانت مقصوده مو بس ساره : يمه مو ضروري هذا الكلام الناس للناس تاخذين من وراها ثواب فكري فيها بالطريقه هذه .
صدت ام فهد بعصبيه بمعنى ان ماعجبها الكلام
يوسف : يمه ترا البنت لحالها في البيت امها بالمستشفى ومالها احد ابوها مسافر راعيها .. واذا ماوقفت غنا معاها منو بيوقف معاها .
ام فهد : واحنا مو مسؤلين عن القضايا الانسانيه هذه لما يصير بيتنا مؤسسة يصير خير
يوسف يهمس لفهد : امي الكلام معاها ضايع مافي فايده نسكت احسن
فهد : تشرب شاي ؟
يوسف : مافي مانع عطني كوب
" نزلت غنا بعد ساعه ولقت فهد ويوسف بعدهم جالسين "
يوسف : تركتي صاحبتج لحالها
غنا : ساره تعبانه لها يومين مانامت عطيتها مهدأ ونامت وتركتها نايمه .
فهد : ليش امها حالتها خطيره ؟
غنا : امها بين الحياة والموت بكرا عمليتها واحتمال نجاح العمليه 60% بس وهذا الي مخوف ساره ومعيشها في حالة رعب خصوصا ان ابوها تاركهم على طول في اسفار وماعندها احد من بعد امها
" تأثر فهد بالي سمعه عنها .. ولو بأيده يساعدها ماراح يتردد بس ماباليد حيله "
فهد : ان شاء الله تقوم امها بسلامة .
--------------------------
اليوم الثاني على الساعه 7 الصبح
جلست ساره من النوم وراحت غسلت واتصلت على طول بالسواق عشان ياخذها للمستشفى
" انتبهت غنا لساره وهي تكلم السواق "
غنا : ساره تو الناس تروحين من الحين شنو بتستفيدين
ساره : ابي اروح اتطمن
غنا : على الاقل الساعه 9 روحي الحين تو الناس العمليه باقي عليها 4 ساعات
ساره : ماراح ارتاح الا لما اروح
غنا : بجي معاج
ساره : لا غنا مايحتاج كذا بتتعبين انتي نايمه متاخر
غنا : عادي بس اتصلي بالسواق خليه لايجي بنروح مع يوسف وفهد اهم يطلعون لشغلهم على الساعه 7 ونص
ساره : لا غنا بتحرجيني معاهم
غنا : هما الي قالوا لي لو احتجتي أي شي اقول لهم وبعدين المستشفى على طريقهم
ساره : ماتصدقين شكثر منحرجه لوقفتكم معاي
غنا : مابي اسمع هذا الكلام .. خلاص انتي البسي الحين وانا بعطيهم خبر
--------------------------------------
الساعه 11 وقت دخوا ا م ساره غرفة العمليات
" كانت ساره ميته خوف وصايره في عالم ثاني .. "
غنا : ساره لاتسوين كذا ادعي لها
ساره : لاتلوميني
غنا : ما الومج .. " ورفعت يدها تدعي لها " ..
" وبعد ساعتين طلع الدكتور "
ساره : طمني دكتور
الدكتور : العمليه نجحت الحمدلله .. بس الحاله مو مستقره لازم ننتظر 48 ساعه .. راح تبقى بالعنايه المركزه الحين
" راحت ساره تركض لغنا وحضنتها ولو ان فرحتها كانت ناقصه لان بعدها الحاله مو مستقره "
غنا : الف الحمدلله على سلامتها وان شاء الله تقوم بسلامة
ساره : بروح اصلي ركعتين شكر لالله ..
ابتسمت غنا : اوكي انا بروح اتصل بفهد يجي ياخذني هم وصاني اطمنه
ساره : ماقصروا اخوانج .. جد منحرجه منهم .. شكريهم نيابه عني
غنا : يوصل
" اتصلت غنا بفهد عشان يجي ياخذها من المستشفى .. وبعد نص ساع هجا وراحت معاه "
فهد : كيفها امها الحين
غنا : الحمدلله العمليه ناجحه .. بس لازم تبقى تحت الملاحضه ليومين عشان تستقر حالتها .
فهد : الحمدلله .. وبتجلس صاحبتج هنا ولا ؟
غنا : راح تجلس عند امها ..
فهد : طيب خليني اوديك البيت الحين وارجع للشركة
------------------------
العصر الساعه 5 ونص
" استعدت غنا عشان تروح مع ام فهد ويخطبون هبه .. ووصاها فهد تشوف اذا البنت تناسبه او لا .. بس ام فهد مافاتها هذا وقالت لغنا انع جبتها او لا لازم تقول انع جبتها او راح تسوي شي ماعمرها سوته .. "
ام فهد : غنااااا لاتأخريني بسرعه
جات غنا تركض : اسفه يمه عطلتج بس كنت اخذ لي شور والبس
ام فهد : ماعلينا يلا نروح
----------------------
في بيت اهل هبه
" في البدايه استقبلتهم ام هبه احلى استقبال .. وكانت حرمه طيبه واخلاقها عاليه وباين عليها انها بنت ناس وكانت الابتسامة ماتفارقها ابد.. ام فهد وغنا ارتاحوا لها كثير .. بعد نص ساعه .. طلبت ام هبه من هبه انها تجي وتقدم العصير "
" دخلت هبه بأبتسامتها الخجولة وكانت منزله راسها "
طبعا ام فهد انبهرت بجمال هبه رغم ان شافتها بس بسرعه : ماشاء الله تبارك الرحمن ..
" جلست تناظرها شوي "
ام فهد : بدخل في الموضوع على طول .. انا كلمتج قبل في الموضوع واحنا جايين عشانه .. جايين نطلب يد هبه لولدي الكبير فهد
ام هبه : هذه الساعه المباركه والنعم فيكم يا ام فهد ..
" كانت غنا تراقب حركات هبه وانتبهت هبه لها وتضايقت من نظرات غنا .. ولما حست غنا فيها حبت تغير الجو "
غنا : هبه انتي تدرسين ؟
هبه : خلصت دراسه قبل سنتين والحين جالسه بالبيت ابوي رافض اني اشتغل
غنا : اهم شي الشهاده مو مهم تتوظفين
هبه : صح كلامج
" وجلسوا يسولفون ويتعرفون اكثر على هبه .. واتفقوا معاهم على فتره اسبوع عشان يسألون عنهم ويردون لهم خبر.. وام فهد عطتهم صورة فهد "
-------------------------
" خبرت ام فهد بو فهد وفهد عن الي دار بينهم وطبعا قال بوق هد هذا حقكم وان شاء الله على خير .. واذا وافقوا نروح احنا الرجاجيل ونخطبها بشكل رسمي .. "
-------------------
في الليل بعد العشا كانوا يوسف واحمد وغنا جالسين برا في الحديقه يسولفون
فهد يكلم غنا بينه وبين نفسه : غنا بغيت اسألج .. انتي شفتي البنت مو ؟
غنا : ايه .. بس ماقدرت اعرف شي بس الي حسيته انها حبوبه وكانت خجوله ومن ناحية الجمال حلوه كثير
فهد : الله يتمم على خير اهم شي تكون واعيه وذكيه .
غنا : ان شاء الله
احمد : هي انت واهي شنو توصوصون ..
فهد : ابي اعرف انت شنو دخلك خلك بالمجله الي في ايدك
احمد : من زينها .. مسوين اختبار للشخصيه كلها كذب في كذب هذه لغنا واشكالها يلعبون بعقولهم
غنا : ياسلام عليك دامك ماتصدق ليش تسويه ؟
احمد : ها لا بس تسليه
غنا : الا مصدق ونـــــــــص
"ضحكوا يوسف وفهد على احمد وغنا ونجرتهم الي ماتخلى منها أي جلسة "
يوسف : بغيت اسألك فهد اذا وافقوا اهل البنت بتملك على طول ؟
فهد : والله ماعرف لحد مايوافقون يصير خير ..
سكت فهد شوي الا فجأه : يوسف
يوسف : هلا
فهد : شرايك نسوي زواجنا مع بعض
نطت غنا : فكره حلوه واذا تبون انا اختار البنت الي تناسب شخصيتك
احمد : والله خوش شي
يوسف تنرفز لان غنا ايدت الفكره اول وحده : تبون تتزوجون انتوا تزوجوا انا ما افكر في الموضوع هذا ابد .. وبعدين توني صغير على الزواج
ضحك فهد على شكل يوسف وهو معصب : طيب قول مافكر .. وبعدين كنا نمزح ليش اخذتها بجديه
غنا : أي كنا نمزح مو جد
احمد : ماقلت لكم كلمت ابوي عشان روحة المزرعه
فهد : أي مزرعه ؟
غنا : اتفقنا انا واحمد نروح المزرعه منزمان مارحنا وكلمنا عمتي هناء ووافقت
فهد : ياسلام واانتوا على طول رحتوا وقلتوا لعمتي يمكن مانروح
احمد : مو هذه هي الخطه عشان نروح عيب فشله نعزمها ومانروح .
يوسف: انا اشهد انكم داهيه
غنا : احم احم هذه افكاري
احمد : احلفي بس ..
فهد : قلت كلمت ابوي
احمد : أي كلمته وهو ووافق ..
غنا : ونااااااسه .. عمتي راح تجيب بنات اخو زوجها معاها ..
فهد : زين عشان ماتكونين لحالج ..والجمعه في هذه الاماكن تكون احلى .. بس متى ؟
احمد : بكرا
فهد : بسرعه خططت وحددت بعد
احمد : لاتخاف تراني مجهز الدوا قبل الفلعه جهزت كل شي تعرفني خبره في الرحلات والتنظيم
غنا : والله انك اكبرررررررر داهيه .. بس احلى داهيه
احمد : أي للمصالح
فهد : يوسف قول لناصر يجي المزرعه يتعشى لاني راح اقول لفيصل يجي بعد وتصير جلسة شباب حلوه مو بس البنات
غنا : لا لا غار فهد غار
فهد : اكيد اجل تنبسطين واحنا لا
احمد : اما انا مابي ربعي مليت منهم
يوسف: غريبه ..
احمد : والله جد مليت شوي خلوهم يشتاقون لي شوي
يوسف : بنجلس كم يوم ؟
احمد : يومين ..
يوسف : حلو بتصل بناصر يجيب اهله يتعشون المزرعه .. لانهم قالوا راح يزورون ابوي بس بما انان بنروح المزرعه راح ادعيهم للعشا
احمد : بس احنا ماخططنا لكذا
يوسف : ماعليك هذا اتركه علي
احمد : بكيفك
فهد : يلا انا بقوم انام ..
احمد : اما انت يافهد دجاجه بصراحه تو الناس .. اجلس بس
فهد : راسي يعورني اليوم الشغل كثير
احمد : روح اجل مرخوص
فهد : يعني في بالك باخذ اذنك
احمد بصوت خفيف : فشلني النذل
سمعته غنا وماتت من الضحك وجلست تتشمت
يوسف : عشان مره الثانيه ماتغتر علينا
احمد : انا زعلت مع السلامه
ضحكوا يوسف وغنا على احمد
احمد: أي ضحكوا تشمتوا .. المهم انا بروح اسوي نسكافيه .
غنا : تكفى احمدو احسبني معاك .
احمد : اذا كذا انتي قومي فزي سويه واحسبيني معاج هذا شغل الحريم
يوسف : وشفيها يعني اذا انت سويته روح واحسبني انا معاك
غنا : يوسف مو كأنك قلت انك ماتش... " قبل لاتكمل سكتها يوسف " وقال لها بصوت صغير انا متعمد ابي اجننه
احمد : قلبتوا كلكم ضدي ها .. بس انا بصير احسن منكم وبروح اسوي نسكافيه
" وجلسوا يوسف وغنا يسولفون .. وهما مندمجين بالسوالف دق موبايل غنا وكان الاتصال من مروى "
غنا : هلا مروى ..
مروى : هلا والله غنا .. غنا اكيد استغربتي اني اتصلت بالوقت هذا
غنا : لا عادي حياج بأي وقت ..
مروى : الحين انتي جنبج احد ؟
غنا : أي ليش ؟
مروى : طلال يبي يكلمج وقالي اتصل فيج واشوف اذا تقدرين تكلمينه او لا
غنا : ضروري ؟
مروى : والله مادري بس طلال اذا براسه شي ماعنده صبر
غنا : جالسه مع اخواني الحين ما اقدر اكلمه بعدين اوكي وقولي له لايزعل ولا يحط بخاطره
مروى : خلاص انتي ولايهمج .
يوسف : اذا وجودي بيمنعج اقوم .. واتركج على راحتج .
غنا : ياربي يوسف انت ليش كذا ..
يوسف : لاتتهربين ياغنا انا عارفه شنو بينج وبين طلال
عصبت غنا : يوسف تراك زودتها انت وتفكيرك هذا ..
يوسف : انتي تقولين مو عيب ليش ماتعترفين انج تحبينه
غنا : وانت ليش معصب حتى لو صحيح الي قلته
يوسف : ما ارضاها على اختي .. احنا عادتنا غير
غنا : يوسف انت تدري ان انا مو من هالنوع بس هذا ولد خالتي الوحيده انا اشوف فيهم كلهم امي الي ما اذكر اي يوم في حياتي معاهم .. مابي ازعلهم
يوسف : يعني الي افهمه ان جد تحبينه
غنا : لا يايوسف لا لأ ارتحت الحين .. وحتى لو طلال يفكر كذا انا لاااااااا ..
" حس يوسف الدنيا مو سايعته من الفرحه ويوسف نسى الوعد الي بينه وبين نفسه "
غنا : بس انت ليش تكرهه وماتبيني اكلمه ؟ صار بينكم شي ؟؟
يوسف متوتر : ها لا منو قال اكرهه .. انا قلت لج قبل ان هذا مو من عاداتنا .. وهو جرئ وماعجبتني جرائته
غنا : بس انت لاتنسى انهم غيرنا هم عايشين برا وطلال مايقصد شي بالعكس هو محترمني كثير
" قطع كلامهم احمد وهو جاي ومعاه النسكافيه "
احمد : هذا احلى نسكافيه من الشيف احمد
غنا وتمثل ان الامور كانت طبيعيه : مسوي نسكافيه شايف نفسه شيف
" لما شربوا النسكافيه اكتشفوا انه حاط ملح بدل السكر وطبعا مو غباء منه كان متعمد عشان يردها لهم وينتقم "
يوسف وهو يكحكح : مالت عليك حاط ملح بدل السكر
احمد : طبعا عشان ماتتشمتون فيني
غنا : بس انا ماشربت
احمد : كذابه
غنا : مامشت علي انا عارفتك زين انت ماتنسى بالسهوله هذه فقلت مليون بالاف بينتقم .. واذا مو مصدق شوف الكوب
ضحك يوسف على فشل احمد للمره الثانيه ضد غنا
احمد مسك لحيته وملامحها تدل على التوعد: اردها لج وعد ..
غنا : نشوف
يوسف : اما انتوا عليكم حركات اروح انام ااحسن لي
احمد : وانا بسبقك " وماشافوا منه الا غبرته "
يوسف : ههههه ياحليلك يا احمدو
يوسف لغنا : غنا لاتزعلين مني بس ...
غنا : لاتكمل انا مو زعلانه منك كل اخ يخاف على اخته .. بس الي ابيه انك تثق فيني ..
يوسف ( انا واثق فيج ياغنا بس قلبي هو الي مو مخليني في حالي ويمنعني اني اقدر اشوفج مع غيري او تحبين غيري صبري علي شوي وبتركج لحالج تختارين طريقج بس تحمليني لحد ما انسى مشاعري الي تسيطر علي غصبا عني .. )
" يوسف كان خايف انه يجي اليوم الي تتغلب عليه مشاعره مهما كان ويشوف الرفض من غنا والاحتقار "
يوسف : اوعدك ان هذه اخر مره
غنا : لاتفكر كثير في الموضوع .. لاتحسسني انك للحين تشوف في حاجز بيني وبينك انا كنت قبل اشوفك تكرهني ومو متقبلني .. الحين اشوفك اخوي الي تعزني وتخاف على مصلحتي .. وانسى ايام قبل وخلنا في اليوم .
يوسف : طيب خلينا ندخل ..
" يوسف ماقدر ينام وهو يفكر في غنا وحاس ان كل يوم تزيد مشاعره اتجاهه عن الي قبله وتقريبا حاس نفسه انب يترك كل شي للقدر وماراح يضغط على نفسه "
09-09-09, 02:42 PM
جديد مواضيع قسم القصص المكتمله من وحي قلم الاعضاء
العرض العادي
