نشكرك اختي على البارت الرائع
واتمنى ان لا تتاخري علينا
بالتوفيق متشوقين الى البارت الجديد
الله يعطيك العافيه

السلام عليكم ورحمة الله وبركاته
كيف الحـال جميعـاً ..؟
تـأخيري هالمره وثاني مره هو لصعوبه هذا البـارت
المواقف بهالبارت صعبه جداً بالنسبه لي
والأفكـار بهالفصل يمكن هي إللي أخرتني
أسفه جداً جداً جداً ..!


قراءة ممتعه مقدمـاً
.
.
.

[ الفصـل السادس وَ العشرون ]


.. فيِّنـي ضجّيـِجْ وَ داخلـي جو سـاكِنْ ..!
.. مـا تشبهنْـي إلا الأمـاكـِنْ ..!

.

.

.

ناظرته بعيون شوي وتطلع ، وهمست :" متعب !! "
ناظر بالشخص إللي قدامه بنظرات جامده لا تحمل اي معنى من الكلام ، وقف بلا شعور لهاللي قدامه ..
ناظر بطولها الفارغ اللي يشبه طول أخته هنادي ، ولكن ما امداه يشوف وجها ويميز بملامحها الا وهي لفت جسمها وركضت لفوق ..
أخذ نفس بعد ماحس بالارتباك من هالموقف ..
سلطان يقول البيت مافيه أحد !!
من وين طلعت هذي ؟!
ومن تكون ...؟!!
جلس وهو يمسح على جبينه وارتسمت على شفايفه إبتسامه وهو يعيد الموقف ، لما سمع صوتها تكلم وتهاوش ، وملامح الصدمه لما شافته ..
سمع همستها ! نطقت أسمه ..!
مين هذي ؟!
لا يكون ....
وصلت فوق ودخلت غرفتها وهي تلهث من الركض ووجها ثار الدم فيه وبان أحمرار خجلهـا ..
يالله !!
وش هالإحراج !
وبعدين متعب وش دخله بالصاله ؟!!
لالا شكلي للحين نـايمه ..
مسحت على ذقنها تفكر مستغربه وشلون دخل وكل ما تذكرت الموقف تحس بإحراجها يزيد ..
قطع عليها رنين جوالها ، رفعت جوالها وشافته سلطان يتصل ..
أوووه سلطان ! نسيته ، أنا أتصلت عليه وسكرت .
ردت :" هلا سلطان ."
رد سلطان إللي طالع من مكتبه اللي بالبيت ومعاه أوراق :" هلا بك ، أتصلتي ؟ "
كيان :" آآ أيه ، وينك ؟ "
سلطان :" بالبيت ، تبون تجون من بيت عمي ؟ "
ضحكت كيان ضحكه صغيره :" لا آآ أنا بالبيت ما رحت مع أمي وليان ."
أنصدم سلطان وتذكر متعب تحت :" والله !! عسى بس ما نزلتي تحت ؟!! "
عرفت كيان ان قصد أخوها من سؤاله أن متعب بالصاله وخايف إنها نزلت ، لأنه عارف أن هالموقف بيسبب أحراج لكيان ، قالت :" لا أنا بغرفتي ، ليه ؟ "
ضحك :" لا بس متعب بالصاله ماكنت أدري بأن البيت فيه أحد ، ووفرنا على انفسنا المشوار للمجلس ، ودخلته بالصاله ، أبي أعطيه أوراق عندي ، ما علينا .. إنتي رجعتي من بيت عمي ولا نايمه ولا إيش ؟ "
قالت كيان بعد ماعرفت سبب دخول متعب للصاله :" لا نايمه ما كان لي خلق أروح ."
سلطان :" أها ، طيب تبين شي يوم أتصلتي ؟"
كيان :" إيه أبيك توديني لرحيل . "
سلطان :" مو تقولين ما لك خلق ..."
قاطعته :" كان مالي خلق ،، الحين لي ، ها وش قلت ؟ "
ضحك :" هههههه طيب وانا أقدر أرفض لك طلب ، إلبسي عبايتك ، و إذا أتصلت عليك أنزلي لي ."


.

.



نزل بهدوء وهو حاط شماغه على كتفه ...
وقفت يوم شافته :" هلا .. صحيت ؟ "
مدت له فنجان قهوه ..
راكان :" آآخ يا راسي ، يعورني ."
رانيا وهي تناظره بتفحص :" ما تشوف شر ، أكيد من القهوه ."
رفع أكتافه .
قالت وهي تلتفت له :" آممم إلا راكان .. ماودك لو نخطب لك ...."
قاطعها :" لا تقولين عن الخطبه ، أنا قلت لك من الأول اللحين مو ناوي أتزوج ."
رانيا :" بس أنت كنت تبي تخطب آسيل وهي مو من نصيبك ، واللحين ما تبي تخطب ؟ لا تقول إنك تحب آسيل ؟!! "
راكان :" إيه أحبها ، ودامها مو من نصيبي ، خلاص الحين مابي أتزوج ."
رانيا :" راكان ! ترى ما يمدي تتعلق فيها ، إنت كنت تبيها زوجه والحين تقول أحبها ....."
قاطعها وهو يوقف ينهي النقاش :" أنا أقصد الحين ،، الحين ما ابي أتزوج ، بعدين نتكلم بهالموضوع ."
وطلع من البيت وهي تتنهد ..
وشايله هم أخوهـا .


يتبع

طلع معاه برى ..
التفت له :" ها منت جاي معي لبيتنا ؟ "
سلطان :" إلا بجي ، بس أبي أوصل كيان ( كمل بإبتسامه ) لبيت عمي متعب ، لأن ماعندها أحد بالبيت ، وبجيكم ."
تذكرها ،، ( إيه أنا عـارف وحـاس بقوه إن هاللي شفتها كيان ، ملامحها عارفها وأذكرها شوي ، ما تغيرت ملامحها إللي ما ميزتها عدل ، لكن صايره طويله ، وكبرت ، ماعادها بكيان الطفله إللي أعرفها . )
متعب :" أحم ، خلاص ، ننتظرك ، فمان الله ."
ضحك :" الله معك ."
وبعد ما شاف متعب يركب سيارته ، ومشى .
طلع جواله وأتصل على أخته ، قال يوم سمع الرد :" يلا إطلعي أنـا برى بالسياره ....... مع السلامه ."


.

.


* بعـد أيـام - قبل العصـر


صاير له سـاعتين نايم ع الكنب وباين على وجهه التـعب ..
ناظرته بعقدة حواجب ..
قربت منه بهدوء وهي تترقب عيونه إللي مغمّضها ..
جلست بهدوء ، وقالت بنبره هادئه :" حـمد ؟ وش فيـك ؟ تعبـان ؟ "
حست برعشة جفونه ، ولكن إلى الآن مغمض عيونه ..
مدت إيدها إللي ترجف ، ولمست جبينه إللي حست بحرارته .
شهقت !
لمى :" حمد ، حمد ، تحس بشي ؟ "
هز راسه بـ إيه بهدوء ، قال بصوت يالله يبان :" رآآسـ ـ ـي .."
لمى تكلم نفسها :" يالله وش اسوي الحين ! ما فيه أحد قريب مني ، ولاني عارفه اتصرف ، اففف ."
وقفت وركضت للمطبخ وطلعت منشفه صغيره نظيفه ، وأخذت لها صحن صغير واسع شوي ..
وحطت فيه مويه بارده وقطع ثلج ..
وطلعت للصاله ..
جلست بمكانها الأولي ..
وطلعت القطعه من المويه ، إللي بللطتها شوي ..
وحطتها على راسه بهدووء .


.

.


وقفت من على الكرسي ..
ومشت متجهه للشبـاك ..
وقفت أمـام الشباك تناظر بحديقتهم ..
:" يالله !! الجو اليوم يهبببل "
ناظرت بأخوها خالد إللي مشغول بجواله ، ودخل داخل البيـت وأختفى عن نظرها ..
تنهدت بإبتسـامه ..
أنتبهت على السياره اللي دخلت حوش بيتهـم ..
ذبلت بسمتها ، وأعتدلت بوقفتها بإهتمـام وهي تشوف إللي نزل من السيـاره .
قطعه زرقـاء تحوط ذُراعه ومرتفعه لنحو صدره .
نزل من السياره وهو يدخل جواله بجيبه ..
رفع راسه مثل كل مره ، وناظر شباكها ، تنهد ..
آه يارحيل ، وش مسويه الحين ، ووش أخبـارك ..؟
غمض عيونه وهو ياخذ نفس ، ونزل راسه ..
ودخل المجلس .
رجعت على ورا بخطوات قليله وهي تحس بدقات قلبها إللي بدت تخفق بقوه يوم شافته يرفع راسه ويناظر بشباكها
وكأنه حاس بوجودها ..
جلست ..
متغير رائد ..
فيه هدوء مو طبيعي ..
ومانسيت للحين كلام آسيـل عنه !
هدوءه وراه شي ..
والله أعلم وش وراه ؟!



.

.


* بعد ساعه .

لمست جبينه بخفه ..
وحست بأن الحراره نزلت شوي ..
تنهدت ..
شافته فتح عيونه ..
وجلس بتثاقل ..
وزفر بآهه ..
وقفت لمى :" ها للحين تحس بـشي ؟ "
قال بصوت مبحوح :" لا بس شوية آلم براسي ." وقف .
قالت بعقدة حواجب :" وين رايح ؟ "
حمد وهو يرفع حواجبه بهدوء وبتعب :" أبد بروح للمستشفى أحس راسي بينفجر ."
لمى :" يا حمد إنـت تعبـان مـ ......"
قاطعها وهو يمشي :" يابنت ما عليك ، تعبان مو تعبان هذا شي مالك دخل فيه ." وطلع
نزلت راسها بحزن ..
حست بأن الدنيـا ضاقت فيها بهاللحظه ..
اللحين أي كلمه قويه راح تجرحها دامها بعيده من أهلها ..
يمكن بعدها عِن أهلـها خلاها حساسه بزيـاده ..
الأيـام إللي راحت ، حست بعناد الأيـام إللي تُمر ببُطء !
آآآه متى أشوفكم بس .؟



.


.


سكرت الاب بطفش .
ناظرت بأختهـا إللي نايمه ..
أوووة ينعن الطفش بس !
سندت جسمها براحه على ظهر السرير ..
ومثل كل مره ..
طرى عليها اليوم إللي سمعت فيه كلام فهد ..
رجعت شعرها على ورا ..
تنهدت ..
صحيح إنــي أحبك يا فهـد ..
لكني أحاول بقد ما أقدر إني ما أتمادا بحبك ، ولا أتعمق فيه ..
يمكن هالشي مخفف عـلي ..
ما خلاني أنهار ولا أكره حياتي عشان حُب نهايته يا فرح ولآ حزنْ !!
ما أبي أكره حياتي عشان حُب ..
ما أبي أكره حياتي عشان واحد ما عمره فكر فيني ، ولا فكر باللي أخفيه بقلبي له !
أحاول أعيش حياتي مثل قبل ..
و أحاول إنـي أسير هنادي القويه إللي ما يهزّهـا شي .
أنـا ما ادري وش إللي ربي كاتبه لي ..
ولا أعرف وش إللي مخبيه لي ..
أنا بمشي وبمشي وأعيش حياتي ، وأحـاول أرضى فيها .
سواءً صار فهد من نصيبي ولا من نصيب غيري ؟




يتبع

.


.


دخل البيت بتعب ..
شاف أمه مثل كل مره جالسه وقدامها قهوتها ، أبتسم بحُب :" السلام عليكم ."
شافها تمسح دموعها بجلالها ، وقالت بصوت خافت :" وعليكم السلام ، هلا يا وليدي ."
عقد محمد حواجبه ، وجلس بجنب أمه ، وحاوط إيدينه من ورا أكتافها :" يمه وش فيك ؟ وش فيك يالغاليه .؟!! "
أم محمد :" أحم ، ما فيني شي ...."
قاطعها :" وشلون مافيك شي ! وكل هالدموع وش تفسيرها ؟ يمه أنـا أعرفك إذا تضايقتي ، قولي لي وش إللي منزل دموعك ؟ "
تنهدت وكأن هالدموع تريّحها شوي :" أختك لمى ."
هُنـا تغيرت ملامح محمد ،، نزل راسه .
أم محمد :" فاقدتها ، وفاقتها حيـل ( نزلت دموعها ) ما أتخيل بيوم تروح بنتي من إيدي ، ولواحد غريب بعد ، والحين ما نعرف أخبارها حتى ."
محمد تضايق من ضيق أمه :" وش إللي لازم أسويه يا يمه ، أختي سودت وجهي ، وهذا إللي لازم اسويه فيها ."
أم محمد :" وأنـا من حقي أعرف أخبار بنتي ، ووش حالها ؟ وش مسويه الحين ؟ وش وضعها ؟ ،، يا ولدي هذي بنتي ، قطعه مني ، مستحيل أتخلى عنها طول عمري ! "
تنهد ، وسند ذقنه على إيدينه وناظر بآخر مكان بالبيت :" يمه ، هذا بس أبيه درس لها ، وقريب إن شاء الله بتشوفينها ، هذي أختي وأغليها ، بس إنها للإسف طاحت من عيني ، بعد ما كنت أشوفها بالسماء ."
هالكلام هو إللي ضايق أم محمد ، ومهما كان هذي بنتها وما تقدر تتخلى عنهـا أبداً ..!
قال يغير الموضوع :" يمه ، منتي رايحه لبيت خالتي اليوم .؟ "
أم محمد :" ليه ؟ "
محمد أعتدل بجلسته :" عشانك ، مـا أبيك تجلسين بالبيت بروحك ، البيت بيجيب لك الملل ."
أم محمد :" أي والله يجيب الملل ( ناظرت بولدها ) على طاري ملل البيت .. إلا يا محمد ؟"
محمد أبتسم :" سمي يالغاليه ؟ "
أم محمد :" سم الله عدوك ( تنهدت ) يا ولدي منت بناوي بالزواج ؟ "
نزل راسه وأخذ نفس :" يمه أنا هالفكره مستبعدها ..."
قاطعتها :" مستبعدها ؟ وإلى متى مستبعدها ، خطبت الدانه ورفضتك ، بس ما تجلس بعدها وتستبعد فكرة الزواج ."
محمد :" يمه أنا قلت لك ، إذا بتزوج مابي غير الدانــه ."
أم محمد :" ووش رايك لو أرجع أخطبها لك مره ثانيه ؟ "
ناظرها بعيون تلمع بالفرح وأخيرا ، وقال بلهفه :" صدق !! "
أبتسمت وهي تناظر بولدها إللي دوم يخفي إللي بقلبه عنها :" أي صدق ، وش قلت ؟ "
باس إيدها بحُب :" ياليت يمه تخطبينها بأقرب وقت ، يمه أنا مابي غير الدانه ، وهي الوحيده إللي أشوفها مناسبه لي ."
أم محمد :" إن شاء الله اليوم إذا رحت لخالتك أكلمها و عسى إن شاء الله تكون من نصيبك وأشوف عيالكم قبل لا اموت ...."
قاطعها :" عسى ربي يطول بعمرك ويخليك لي يالغاليه ."

.


.


نزلت تحت وشافته جالس ، وساند رجوله على الطاوله إللي قدامه ويناظر التلفزيون ، أبتسمت على شكله .
قالت وهي توقف قدامه :" سلام يا عريس . "
أبتسم يوم أنتبه عليها :" هلااا وعليكم السلام ."
جلست بجنبه :" ها شخبارك اليوم ؟ "
فواز وهو يتنهد بفرح :" أكيد تمام ، ملكتي باقي عليها ثلاثة أيـام ."
ضحكت رغد :" ربي يوفقك ويسعدك "
فواز بحب :" ومن قـال إن شاء الله ( كمل وهو يترقب ملامحها ) وتاخذين إللي ببالي ."
طلعت عيونها :" إللي في بالك !! منهو إللي ببالك ؟! "
فواز :" ههههههههههههههههههههههههه ، يالبى عيونك بس ، أمزح أمزح معك هههه "
عقدت حواجبها وناظرته بعيون منقهره وهي تشوفه يضحك وشكت في كلامه :" فواز ووجع يوجع العدو ، وش تقصد بكلامك .؟ "
فواز :" يابنت الحلال ، أمزح معك ، ما تعرفين المزح ؟ "
رغد وهي تناظره بنص عين :" أي أعرفه ."
رفع أكتافه :" خلاص دام تعرفينه إبلعي العافيه ."
صرخت :" فووواز ! أنا خالتك ! "
قال بلامُبالاه :" هاه وإذا يعني خالتي ، وش تبيني أسوي ؟ "
رغد وهي تناظره بصدمه :" فواز ! وش هالكلام ؟!! "
ضحك برواقه وهو يسحبها ويحتضنها بحب :" ههههههههههههههه أمزح معك ، هذا و إنتي تقولين إي أعرف المزح ."
ضحكت :" أشوفك اليوم مروق بزياده "
فواز :" أكيـد مو بكره ملكتي ؛ أسمعي أبيك اليوم تجهزين نفسك ، مو بكره لا بغيتك تركبين السياره تجلسين سنه على بال ما تاخذين أغراضك ."


.


.

سكرت جوالها ووجها خطف لونه الخجـل .
شربت من المويه البارده ، وتنهدت .
يالبى قلبك يا متعب ، ما أدري ليه كل شي فيك يلفت أنتباهي وأكثر ما لفت أنتباهي هو هدوءك .
حتى نبرتك هادئه .. كلامك هاديء .
وسيرتك نادره ..
وهذا أكثر مالفت نظري ، إن هدوءك هو سبب في غموضك .
اليوم هو أول أتصال بينا ..
أبتسمت ..
بس باين عليه إنه ما تجرأ علي ولا أنا تجرأت عليه ..
والدليل إن مكالمتنا ما أخذت أكثر من ثلاث دقايق !
قطع عليها دخول أختها :" ها كلمتيه ؟ "
أبتسمت :" يس "
ليان :" والله ! طيب وش قال ؟ "
كيان :" أبد يسـأل عن أخباري ( وكملت بحيـاء مصطنع ) ويقول كلام حلو وَ إنه مشتاق لي و آ...."
قاطعتها بصرخه :" كذااابه !! متعب ويقول كلام حلو هههه ما يليق ."
عقدت حواجبها بعصبيه :" لا والله !! مو كأنك غلطتي ؟ "
ليان وهي تجلس على سريرها وتتمدد :" عاشت مدافعه ( كملت وهي ترفع حواجبها وتنزلها بطريقه سريعه ) أشوفك تدافعين ؟ "
كيان :" أي أكيد بدافع مو زوجي وحبيبي وَ حيــ ... "
قاطعتها :" لا تكفين لا تكملين ( ضحكت بخبث ) إلا ما جاب طاري الموقف إللي قبل كم يوم ؟ "
ضحكت :" لا ما جابه ، بس أنا عارفه إني خذيت فكره من هالموقف "
ليان :" هههههههه احلى يا الواثقه ."




يتبع

.
/منتد قسم من حي قلم الاعضاء

.

دخلت الصاله وشافت أختها تناظر بالإرض وسرحانه .
جلست :" وش فيك ؟ "
رفعت راسها :" وش فيني ؟ "
الريم بطفش :" يووة خلاص سحبت سؤالي ، أكره أسألك و إنتي متنْحه ."
ضحكت :" أتصلت خالتي أم محمد ، تقول جايه اليوم ."
أبتسمت بخبث :" أووة أثاريك تفكرين بـشسمه .."
عقدت حواجبها :" بـ وشو ؟ "
الريم :" لا ولا شي ، إيوة تقولين خالتي بتجي اليوم ( وقفت ) الله الله بالشغل العدل ."
الدانه وأخيراً وفهمت :" إنـتي هيه وش تقصدين ؟ "
ضحكت :" ما أقصـد شي ، بس يعني أحس أحساسي اليوم قوي ."
الدانه وهي تلوي بوزها :" الله والإحساس اللحين ."
قاطعهم دخول والدتهم :" ها يالدانه ما أتصلتي على أخوك ؟ "
الدانه :" هاه .. لا خالتي أتصلت وقالت بتجي ، وهذي ( كملت وهي تناظر بالريم ) نستني أتصل عليه ."
الريم بإبتسامه خفيف :" أنا نسيتك ؟ ولا إنتي إللي اليوم متنحه مدري خالتي وش قالت لك ؟ "
أم سعود :" وش قالت خالتك ؟ متى بتجي ؟ "
الدانه وهي تناظر أختها الريم بقهر ، وناظرت أمها :" قالت بعد العشاء ."
أم سعود وهي تجلس :" اها .. يا هلا فيهـا ،،، طـيب إتصلي في أخوك ."
رفعت جوالها :" طيب " وأتصلت عليه ..
أنتظرت الرد ..
لكن ماسمعت رد .
الدانه وهي تنزل الجوال :" ما رد ."
أم سعود بقلق :" ياويلي عليك يا ولدي ، إتصلي مره ثانيه ."
هزت راسها و أتصلت مره ثانيه ، لكن نفس الشي ، رفعت أكتافها :" نفس الشي "
قالت الريم تطمن أمها :" يمه ، يمكن يكون جواله صامت أو يكون مشغول ، أهم شي جواله يرن .. مو مقفول ."

.


.


أمواج ثـائره ..
تصطدم بقوة مرعبه بـالإحجار الكبيرة الأحجـام ، وترجع خلفها ، وتصطدم مره أخرى ..
وعلى هالموال تحت نظره ومتابعته لتلك الأمواج ، وكأنه بمتابعته ينتظر هدوء ثورتها ..!
ناظر بغروب الشمس ومنظر الغروب مع البحر وأمواجه ..
تنهد سعود ..
صار له ساعه وهو واقف ويناظر بالبحر ..
يناظر بالرايح والجاي ..
حسّ بالطفش من كثرة الوقوف والترّقب ..
غريبه ما أحد أتصل ، غريبه ما أتصل مساعد ، ولا أتصلـت أمي ؟
آآه يا يمه ياني مشتـاق لك ..
أبتسم على طاريها ..
وتلمس جيوبه ..
وعقد حواجبه وهو يدور على جواله بجيبه ..
أووة !! لايكون بس بالسياره .
خلني بس الحق على أمي ...
أكيد اللحين أتصلت وما لقت رد مني .
راح للسياره ، وركب ..
شاف جواله فوق غترته ، ورفعه وشاف خمس مُكالامات ..
إتصالين من أخته الدانه .
وثلاثه من مساعد .
أكيد يحاتي الرجال ..
أبتصل على الدانه قبل ..
أتصل على أخته ، وأنتظر الرد ..
سمع صوت أمه ترد بلهفه :" هلااا سعود ! "
أبتسم :" هلا بك يالغاليه ، وشلونك عساك طيبه ؟ "
أم سعود :" بخير يا يمه ، وينك ما ترد خذيت قلبي ؟ "
سعود :" أسم الله عليك ، الجوال ماهوب معي كان بالسياره ، وتوني أشوف أتصالك ."


.
/منتد قسم من حي قلم الاعضاء

.

* 9:10 مسـاءً


وقف سيارته بالمواقف السيارات إللي ورا بيتهم .
وتنهد بإبتسامه وهو يتذكر كيـان إللي ملكت فكره من بعد الموقف ..
وكأنها بكلمتها صدقت إنها ملكت فكره ..!
هي على باله على طول ، لكن مايبي يتمعق بالتفكير فيهـا .
فتح باب السيـاره ونزل وهو يكح ، وقفلها .
أوووه هالكحه صار لها كم يوم ، وربي تعبتني .
مشى متوجه للباب الخلفي للبيت ..
لكن سمع صوت مصدره من حديقة بيتهم إللي من الجهه الثانيه .
هذي خالتي وأبوي ، بروح أجلس عندهم شوي قبل لا أدخل .
مشى متوجه لهم ..
قرب يوصل ..
قال بإبتسامه وهو يناظرهم :" السلام عليكم "
:" وعليكم السلام ."
كح بتعب وهو يجلس ويحط جواله ع الطاوله :" وشلونكم يالغالين ؟ "
أبو متعب :" بخير ياولدي ، سلامات .. وش فيك تكِح صار لك كم يوم ؟ "
قال وهو يسند جسمه على ظهر الكرسي :" والله تعبتني هالحكه "
أم طلال :" ما رحت للمستشفى ولا الصيدليه ع الإقل ؟ "
متعب بتعـب :" لا ما رحت ، إن شاء الله بكره على خير ، اليوم مافيني تعبـان حيل ( وقف ) حبيت أشوفكم قبل لا أدخل أريح ما نمت عدل ، يلا أنا طالع أنام .. تصبحون على خير ."
أبو متعب :" تلاقي الخير ."
ولف متعب ، ورجع من الطريق الأولي ، يبي يدخل من الباب الخلفي ..
لكنه تذكر جواله إنه تركه ع الطاوله .
أوووف أنا وش فيني اليوم متنح حدي .؟
يالله ،، نرجع وش ورانا ..
رجع من طريقه الأولي ..
لكن وقفه الكلام إللي سمعه ، وشد إنتباهه بالقوه .
أم طلال :" ...... مو أم متعب متوفيه بمرض الدرن ؟"
أبو متعب :" و إذا متوفيه يعني بهالمرض ، تجلسون يالحريم تتفـاولون على ولدي ."
أم طلال :" أنا ما تفاولت على متعب أسم الله عليه .. بس حالة متعب من شوي ذكرتني بموتة أمه و شككتني بحالته ."



.

/منتد قسم من حي قلم الاعضاء

.


نـاظرت بالدانه وثم نـاظرت بإختها :" إلا يـا أم سعود ."
أم سعود :" سمي ."
أم محمد :" سم الله عدوك ، بغيت أكلمك بموضوع ، وقدام الدانه وأبي أسمع رايها ، وهالموضوع ثاني مره أتكلم فيه ."
حست الدانه إن الموضوع يتعلق بمحمد ، و إنه رجع خطبها مثل ما وعدها قبل .
أم سعود :" وشو الموضوع ؟ "
ناظرت أم محمد بالدانه :" جـايه أطلبك يا أم سعود بنتك الدانه لولدي على سنة الله ورسوله ."
ناظرت أم سعود ببنتها الدانه إللي منزله راسها من أول ما قالت خالتها أنها تبي تكلمهم بموضوع .
أم سعود بإبتسامه وَ حُب :" هذي والله الساعه المباركه ، ومحمد رجـال ونعم فيه ، وهذي هي بنتك الدانه أسمعي رايها منها ، و الراي الأول والإخير لهـا ."
أم محمد :" إسمعي يا الدانه ، أنـا بنفسي أبي أسمع رايك ، سواءً رفضتي ولدي ولا وافقتي عليه ، إنتي بحسبة بنتي ، وأنا بحسبة أمك ، ورايك هو الأهم ، لا تجامليني ولا تستحين عشاني أنا إللي كلمتك ، أنا ما أبي غير ردك بصـراحه ."
سكتت الدانه وهي تتنفس بسرعه من إحراج هالموقف .!
أم محمد :" وش قلتي يا يمه ؟ "
رفعت الدانه راسها وناظرت بإمها ، وثم خالتها وقالت ...








*؛*؛*؛*؛*؛؛*؛*؛*؛*؛*؛*؛*؛*؛*؛*؛*

انتهى الفصــل السادس وَ العشرون ..!
أنتظر توقعاتكم على شوق .
* لِنـا لقاء بإذنهِ تعالى يوم الاربعـاء القادم بفصلٌ جديـد .




تحيتي
&.. اهــواك ..&
أو
&.. صـاحبي يـا حبني لـك ..&