يسلموع البارت
ننتظرك بكل شوق
اتمنى لك التوفيق والنجاح

السلام عليكم ورحمه الله وبركاته ..
كيف الحال جميعاً ؟
أعذروني يالغاليين على هالغيبه ، بدايتها أختبارات وبعدها عطله وأنشغلت عنكم وعن الروايه شوي ..
أعوضكم إن شاء الله بالجايات .
وإذا فيه أي تقصير بالبارت هم أعذروني ..





تفضلوا البارت .



.

.

.

[ الفصل الخـامس وَ العشرون ]




جراءةٌ تُـغلب هدوئيّ !




:

:

:




تنهد :" شهد عندك صح ؟ "
بإهتمام أكثر وبحذر :" إيه ."
قال بعد صمت :" أبيك تقولين لها ترفضني ."
أحلام بخرعه :" نعـم ؟!!! "
غمض عيونه :" أحلام أفهميني ، أنا ما أبي أتزوج البنت ،،، البنت عفتها وأنا ما تزوجتها أجل كيف لا تزوجتها ؛ أمي بطريقتها هذي خلتني أعيف طاري الزواج بكبره ."
أحلام بحرج :" رائد حس فيني ، أحراج علي إني أكلم البنت ....."
قاطعها :" وأنا صار لي حادث بسبة هالموضوع ! "
صرخت :" حاااادث !! "
رائد بدا يستغل لحظة خوفها :" إيه ، وكله عشان هالموضوع وإللي ضايقني كثير وخلاني أطلع من البيت معصب ."
أحلام بخوف وأهتمام :" ووش صار لك .؟! "
رائد بعدم أهتمام :" أبد .. ضربه بالراس وكسر باليد ."
احلام بحزن :" يوووه ، ما تشوف شر ، وإنت ليه تطلع معصب ؟"
رائد :" قلت لك معصب بسبة الموضوع ،، بس ها ما قلتي لي ، بتكلمينها ؟"
تخيلت أحلام إنها لو كلمت شهد ، فجأه قطعت خيالها وهي تحس بحرج فضيع :" يالله يا رائد وربي إحراج ! "
رائد :" لا إحراج ولا شي ، الإحراج إني أتزوجها وأنا ما أبيها ، يعني تبيني أتزوجها وأطلقها الأسبوع الثاني ؟ "
نفثت بحيره :" افففف ، والله ماني عارفه إيش أسوي ."
رائد وهو يبين بصوته إنه زعلان بعد ما خاب ظنه بإن أحلام راح تساعده :" أحلام ؟ وربي أنا ما طلبت منك هالشي .. إلا لأنك إنتي الوحيده إللي راح تساعديني ،، يعني ترضين إني أتزوجها وأنا ما أبيها وبعد الزواج بكم شهر أطلقها ، تبين كذا ؟ "








دخلت الصاله بعد ما سكرت منه ، وهي تنفث بحيره .
جلست وهي تناظر بشهد إللي تضحك وهي تلّعب نوف ، ورفعت نظرها بإبتسامه وذبلت بسمتها وهي تشوف أحلام تناظرها بنظرات غريبه ..
شهد :" أحلام ، وشفيك ؟"
تنهدت أحلام بصمت .
شهد ، عقدت حواجبها بتساؤل :" أحلام ؟ وش فيك ؟ ردي ؟! . "
أحلام بتردد كبير :" شهد ، آ آ أنـا بقولك وَ .... تؤ ! يالله " ونفثت بحيره .
شهد :" أحلام ! تكلمي ما أحب أحد يطول كذا بالسالفه ، تكلمي ؟ "
أحلام ناظرتها بتفحص :" رائد أخوي آآ ..." سكتت .
شهد بإستغراب :" وش فيه ؟! "
أحلام :" آآ ، من شوي كلمني وَ آآ ، يبيني أوصل لك كلام ."
بإستغراب وتساؤل وخوف بنفس الوقت :" كلام ؟! وشو الكلام ؟ "
أحلام :" شهد ، أنا بتكلم معك بصراحه ."
شهد :" هذا احسن شي تسوينه ."
أحلام تنهدت :" أمي تبي تخطب رائد لك وَ آآ رائد رافض فكرة الزواج حالياً ، وأمي الله يهداها خطبتك من أمك بدون لا يعرف رائد بهالشي ، وبدون حتى تاخذ رايه ، ولما عرف عصب وصارت مشكله بينه وبين أمي ، وآآآ أنا ماحبيت ما أقولك هالشي وأخليك على عماك وتوافقين على أخوي ، أنا قلت لك كذا بشوف وش رايك الحين ؟ "
شهد بعد ما حست بخدر بجسمها وتحس كل شي فيها متخدر ، قالت ببلاهه :" يعني إيش ؟ "
أحلام بعد ما اخذت نفس وهي تبي تخلص نفسها من هالورطه :" رائد قال لي إنك ترفضينه لا جات أمي خطبتك له ، لأن ما نفع مع امي محاولات رائد بأنه مايبي يتزوج الحين وأقناعه لها ."
هزت شهد راسها أكثر من مره ، وتحاول تفهم اللي قاعده تسمعه ، و تفكر برائد اللي عاجبها كل شي فيه وما يعيِّبه شي ، وهمست بخوف :" طيب ."
خوفها ما كانت تعرف إيش سببه ، لكن خايفه من اللي جاي ..!

.
.


بعد رُبع ساعه ..!
سكر من أخته بفرح غامرٌ بعد ما شكرها أكثر من مره ، وتنهد بعُمق .
يااالله !
واخيراً أرتحت من هالهم ، وأمي اللي تبي تسويه .. تسويه .
وبعد هالمره ما راح أعطي أحد مجال إنه يسوي اللي يبي ويختار لي شريكة حياتي بذوقه ..
آآآه ..!
لكن بعد ما ترفضني شهد ؟!
يمكن أمي تروح تدور على غيرهـا !
لكن لا .. أنا بعد هالمره ما راح أعطي أحد مجال ..
وسكاتي هذا ما راح ينفعني .



:

:



* اليوم الثاني ، 8:03 صبـاحاً

صار لها ساعه من صحت وحاسه بالكسل الفضيع وودها لو ترجع تنام .
وصار لها نص ساعه من دخلت المطبخ وهي تحوس فيه ..
عاد اليوم أول يوم بحياتها تسوي الفطور بنفسها ..
دخل وهو يشوف كيف تتنقل بأنحاء المطبخ ومو عارفه من وين تبدأ ..
ورافعه شعرها على فوق ، ورافعه أكمامها لورا ،وتنقل نظرها بين الحوسه إللي قدامها ..
وتنفث بحيره ..
أبتسم ..
حست فيه ، والتفتت ..
حمد :" ها وش سويتي ؟ "
لمى ناظرت بالطاوله إللي بجنبها ، وناظرته بعقدة حواجب :" مو عارفه أسوي شي ."
مشى إلى آن وصل مقابلها ، قال :" طيب .. أنا بساعدك دام عندي خبرة عزوبي . "
أخذ بيضه وحده وقال :" شوفي الحين بسوي بيض عَ الزيت ، وبحاول أنه يضبط ."
كان يشتغل بحذر ، وهي تناظره بترقب ..
وتحاول تحفظ كل خطوه يسويها ..



:



:


دخلت المجلس بصينية القهوه وَ الشاي ، وقالت بإبتسامه :" صباح الخير يبه ."
قال وهو ما شال نظره عِن الجريده :" صباح النور يا بنيتي ."
نزلت الصينيه ، وجلست مقابل أبوها ، وصبت له فنجان قهوه ، ومدته :" سمْ ."
أخذ منها الفنجان :" سم الله عدوك ؛ ها يا بنتي وش أخبارك ؟ "
هزت راسها :" تمام ، لا شغله ولا مشغله . "
ضحك أبو عواطف شوي ثم قال :" إن شاء الله بتتزوجين حمد قريب وتلهين بحياتك ."
قالت بإستنكار وهي تعقد حواجبها :" أتزوجه ؟ "
هز راسه بإستغراب :" إيه ، وش الجديد عليك . "
عواطف :" يبه ماله داعي تخبي علي شي "
أرتبك :" وش اللي خبيته عنك ؟ "
عواطف وهي تناظر بأخر المجلس تبعد نظرها عِن والدها :" يبه ، أنا سمعت كل شي ( ناظرته بعيون مليانه دموع ) يعني كنت ناوي تخبي عني لو أنا ما سمعت ؟ "
أبو عواطف بعد ما تلخبط عنده الكلام .. بعد ما عرف إنها سمعت كل شي :" يا عواطف يا قلب أبوك ، مهوب قصدي أخبي عنك شي ،، بس أنا حبيت أساير عمتك بالموضوع بإن أحنا نخبي عنك زواج حمد ، بس أنا كنت بقولك ما كنت ابي اسكت ."
تنهدت :" أنا بمّشَي هالسالفه ، لكن إذا هو للحين يبي يتزوجني .. يطلقها بالأول ثم نتملك ."
وقفت ، وطلعت من المجلس ..
ومع طلعتها دخلت عمتها أم حمد :" السلام عليكم ."
أبو عواطف :" هلا ، وعليكم السلام ."
أم حمد بإستغراب :" وش فيها عواطف ؟ "
تنهد :" طلعت عارفه بزواج ولدك ."
شهقت بصدمه :" شلون عرفت ؟!! "
ابو عواطف :" أكيد سمعت كلامنا ذاك اليوم اللي جا فيه ولدك وخبرك بزواجه ."
تام حمد بحزن و قهر :" ياليت قال لي وش سبب زواجه من هاللي حتى ما اعرف اسمها ( تنهدت ) الله لنا ( ناظرت أخوها ) وش ردة فعلها ، للحين تبي ولدي ؟"
ابو عواطف :" شرطها إنه يطلق زوجته قبل لا نملكهم ."
ام حمد اللي متضايقه من زواج ولدها من دون ما تعرف ومن دون حتى ياخذ رايها ولا حتى عرفت سبب زواجه فجأه ، قالت :" بدون ما تطلب يطلقها ، أنا بطلب منه ."



:

:



بعد ماخلص من كل شي وعلمها عَ طريقه الفطور السهله جداً ، وَ الصعبه عند لمى .
حمد وهو يغسل إيدينه ، والتفت لها :" ها فيه شي صعب ؟ "
أبتسمت وهي تهز راسها بـ لا .
سحب له كرسي وجلس مقابل الطاوله ، وقال :" جيبي لي كاسة عصير من الثلاجه ."
قالت بإستغراب :" سلامات ؟ خبري يشربون الحليب مع الفطور مو عصير ."
أبتسم :" بس أنا ما أحب الحليب ، الله يعزّ النعمه ." قال جملته وهو ياخذ له قطعة من الخُبز ويغمسها بالجبن وَ العسل .
راحت أخذت لها كاس وفتحت الثلاجه وصبت له عصير بُرتقال ، وراحت له ، ومدته له ..
ناظرها ، وأخذ منها الكاس ..
لفت ..
حمد :" وين ؟ ما تبين تفطرين ؟ "
ناظرته :" لا بس مو مشتهيه ."
حمد :" أقول تعالي بس ، الحين بعد هالحوسه تقولين ماتبين ، لا بتجين غصبا عليك ، أبي أشوف رايك بفطوري ."
أبتسمت ، وجلست بالكرسي إللي بجنبه ..
ناظرها وهو يشوفها وهي صافه إيدينها :" وش فيك ما تاكلين ؟ "
رفعت كتوفها :" مافيني شي ."
حمد :" طيب سمي بالله ، وأكلي ."
بعد دقائق ..
وقف حمد بعد ما قال :" الحمد الله ."
وقفت لمى :" اممم ، الحين دوامك ؟ "
حمد :" إيه "
لمى :" طيب متى تطلع من الدوام ؟ "
حمد :" إن شاء الله العصر ، ليه ؟ "
رفعت كتوفها :" لا بس أسأل ."
هز راسه وطلع من المطبخ ..
أما هي ناظرت بحوسة المطبخ ..
الحين كيف أنظف كل هذي ،، أففف !
تذكرت خدامتهم كيف كانت تنظف الصحون ، وتغسل أرضية المطبخ ..
كانت تذكر عدل كيف تنظف ..
مافيه إلا إني أسوي مثلها .


:


:



بعد ما لبس ثوبه ..
راح لتسريحه وأخذ رشتين من عطره المُفضل ..
ناظر بشكله إللي باين عليه التعب بسبب إنه ما نام عدل وهو المفروض ينام ..
لكنه هو ما أعطى لنفسه مجال لراحه ..
طلع من غرفته بعد ما أخذ جواله من الطاوله ..
ونزل تحت ..
دخل على أهله إللي جالسين يفطرون ..
رائد :" السـلام عليكم ."
:" وعليكم السلام ."
شاف نظرات أبوه المستغربه وَ المنصدمه من شكل رائد .
ونظرات أمه الغريبه ، إللي تناظره بتفحص .
ونظرات آسيل إللي خايفه من ردة فعل أبوها .
وقف أبو رائد وهو يتجه لناحية رائد :" رائد يا ولدي وش فيك ؟! وش اللي صاير لك ؟!"
قال يطمنه :" يا يبه والله ما فيني شي مُجرد كسر بسيط ، لا تخاف ."
أبو رائد وهو يناظر بوجه ولده التعبان :" إنت ما شفت وجهك وشلون تعبان ، لا تطمني بهالكلام ...."
قاطعه رائد :" يا يبه ووالله مو صاير لي شي ، حادث بسيط بس ، والحمد الله إنها ما جات الا كسر بسيط ."
أبو رائد :" وش إللي صار بالضبط حتى صار لك الحادث ؟"
نزل راسه ورفعه :" ما أنتبهت للسياره إللي قطعت الطريق وصدمتها ."
نفث أبوه :" لاحول الله ، يا ولدي السرعه ما هيب زينه ، شفت وش صار لك ، أكيد كنت مسرع .. ولا قدرت تدارك نفسك وتوقف قبل لا تصدمها ، المهم السرعه ذي لا عاد أشوفها .. سمعت ؟ "
أبتسم رائد بحب :" سمعت ." وباس راس أبوه .
تنهد أبوه :" يلا تعال أفطر ، وأرجع ريح ." ولف أبوه ورجع لمكانه .
رائد :" بس أنا بداوم ."
ناظره أبوه :" نعم ؟! لالا وش تداوم ، صاحي إنت ؟ "
أم رائد كانت متوتره وهي تمسع الكلام اللي دار بين ولدها و زوجها ، البارح كله كانت تفكر بالي سوته بولدها ، وزين إن ما صار لولدها شي بسبّة هالخطبه ..!
رائد :" يا يبه أنا ما فيني شـي ، يعني عادي أداوم ."
أبو رائد :" يعني شلون بتشتغل عدل و إيدك مكسوره ؟ "
أم رائد :" يا رائد أسمع كلام أبوك ولا تداوم ."
ناظرها رائد بنظرات منصدمه بارده ..
أول مره يسمع هالنبره من أمه ..
وأول مره يشوفها تتكلم وتدّخل بالكلام إللي بينه وبين أبوه بدون ما تنافخ .
أكتفى رائد بسكوته ، وجلس بجنب آسيل اللي بعد مستغربه من أمها مثل رائد .




يتبع الجُزء .

:



:


* العصـر


دخلت الغرفه وهي تشوف أختها للحين نايمه ..
نفثت :" أففف هذي بس نوم ، الله يعين رجالها عليها ."
قربت من أختها وقالت :" كيان ، كيان ."
كيان وهي تلف وجها لناحيه الثانيه وتغطي وجها :" هممم "
ليان :" اممم تروحين معاي أنا و أمي لبيت عمي خالد ؟ "
رفعت اللحاف عِن وجهها :" هاه ،، لالا روحي ."
أبتسمت ليان :" أي عشان متيعب ."
كيان وهي تغطي راسها :" أقول ضّفي خشتك بس خليني أنام ."
ضحكت ليان ، وراحت لدولابها تطلع لها لبس .



:


:


نزل تحت بعد ما ريِّح وسمع كلام أبوه ، و حس براحه فضيعه .
دخل الصاله و شاف أمه جالسه ..
وتمنى لو ما دخل الصاله ..
ما يدري وش بتقول له ..
أخاف تصدمه بشي ثاني بعد ..
وخايف أنها للحين ما تغيرت حتى بعد الحادث اللي صار له ..
قال وهو يناظرها :" السلام عليكم ."
ناظرته :" وعليكم السلام ."
جلس .
تنهدت أمه ..
وغلب على جوهم الهدوء دقايق ..
ووقف رائد لما حس بتوتر الجو ..
وطلع من البيت بهدوء ..
يبي يبعد عن البيت ويغير جو ..
أخذ نفس عميق وغمض عيونه ..
طلع جواله وهو يتجه لسيارته ..
وأتصل على خالد ..
ركب سيارته ، وشغلها ، وجلس دقايق ينتظر الرد من خالد ..
رد :" هلاااا والله برائد "
ابتسم :" هلا بك ،، وشلونك ؟ "
خالد :" بخير ربي يسـلمك ، كيف حالك إنت عساك طيب ؟"
رائد وهو يحرك سيارته ويطلع من البيت :" الحمد الله عايش ."
خالد :" أووه شكلك ضايق خلقك ، ولا ؟ "
رائد :" ههههه تقدر تقول ، وينك ؟ "
خالد :" والله بالبيت ، بتجي ؟ "
رائد :" أجل جايك ،، دقايق ."
خالد :" يا مرحبا ومسهلا ، بإنتظارك ."
رائد :" الله يرحب بك ، يلا مسافة الطريق وجاي ، مع السلامه ."
خالد :" هلا والله ."



:


:



نزلت بتكاسل وشعرها القصير متبهذل على وجهها .
دخلت الصاله ، شافت أمها جالسه وجدّتها .
وقالت :" السلام عليكم."
:" وعليكم السلام ."
باست راس جدتها ، وباست أمها :" وشلونكم ؟ "
أم فارس :" بخير يابنتي ، وانتي وشلونك من البارح ما شفتك ؟ "
جلست شهد بجنب جدتها :" إيه ، كنت عند أحلام ، ورجعت الساعه وحده مع خالي فارس ."
التفتت أم فارس على بنتها فاطمه ( أم شهد ) :" إلا وش صار على خطبة أم رائد ؟ "
هُنـا شهد أرتعبت من هالطاري ومن هالموقف .
ام شهد ناظرت بشهد إللي نزلت راسها ، وثم ناظرت أمها :" أبد للحين ما قلت شي لشهد ، هذي هي بجنبك أسأليها عن رآيها ." وأبتسمت .
شهد حست بإن الأوكسجين من حواليها ما صارت تتنفسه وما تحس بوجوده !
أم فارس ناظرت بشهد :" يمه شهد ؟ "
رفعت راسها :" سمْي ؟ "
أم فارس :" سم الله عدوك ، إلا بقولك شي .. ورايك هو الأهم عاد إنتي تدرين إنك وحيدتنا وما يهمنا غير راحتك يالغاليه ."
أبتسمت بحب وخوف تخفيه عنهم .
كملت أم فارس :" قبل يومين أم رائد خطبتك لأكبر واحد من عيالها .. رائد ، و رائد ما شاء الله عليه رجال وعن مية رجال ، ومهما كان اللي خطبك ما يهمنا الحين غير رايك ."
بلعت ريقها وهي تقول بقلبها ( أدري إنه رجال ، وهذا هو اللي أتمناه ، لكنه رافضني ، رافضني ! )
اخذت نفس :" بس أنا للحين أدرس بالجامعه ."
أم شهد :" ما قلنا شي عن الدراسه ، الدراسه موضوع ثاني ، إحنا نسألك عن رايك برائد كـَ زوج ؟"
شهد :" آآآ ، لا ما أبي أتزوج الحين ."
أم شهد :" ليش يمه ؟ "
شهد أرتبكت زياده ، وتحاول تدور اي عيب برائد :" بس أنا الحين ما أبي أتزوج ولا أفكر بالزواج حالياً ، ولا مجهزه نفسي أتحمل مسئوليه الزواج ." وتنهدت لما حست أنها راح تقنعهم بهالكلام تقريباً .
أم فارس وهي تناظر ببنتها فاطمه إللي ماتبي تضيع رائد من إيدينهم ، وغمضت أم فارس عيونها بمعنى خليها على راحتها .





:

:



نزل من سيارته ، ومشى متجه لناحية المجلس ، وشاف خالد طالع من المجلس .
وتفحص رائد بنظره ملامح خالد إللي تغيرت إلى ملامح مندهشه وهو يناظر إيده ، وشهق :" وش فيييك ؟!! "
ضحك رائد وسلم عليه :" ما فيني إلا الخير ، لا تخاف ."
خالد :" لا والله ، وهالكسر من إيش ، خبري فيك في كل شي هادي ، من وين جاي هالكسر ."
على هالجمله سمعوا صوت فهد جاي من ورا خالد :" هلااااا برائد ، أشوف البيت منور ."
أبتسم :" منور بأهله ."
خالد وهو يغمز لرائد :" شوف شوف وش بيقول لا شافك ."
سمعوا صرخة فهد بشهقه .. إللي غمض خالد عيونه بقوه من صراخه !
ضحك رائد :" يا رجال ما فيني شي ، لا تكبرون السالفه ، من شافني فتح لي محضر ماله نهايه ."
ضحكوا ..
وسلم عليه فهد :" سلامات سلامات وش فيك ؟"
رائد :" ما فيني الا الخير ، تبوني أقولكم برى ؟"
ضحك خالد بفشله :" تفضل نفضل يابو عبدالله ، يامرحبا ."
دخل رائد وهو يرد عليه :" دام فضلك يالغالي ."
خالد :" فهد ، وين القهوه والشاي ؟!! "
فهد وهو يضرب راسه بمعنى إنه نسى :" أووه أسف أسف نسيت أقولهم ." ولف وراح لداخل وهو يسمع خالد يقول:" الله يعيني عليك لو إنك ولدي ."
دخل فهد الصاله ، وشاف رحيل جالسه ، وقال :" رحول ، رحول "
رفعت راسها وهي تبتسم :" آمر ؟ "
فهد :" ما يامر عليك عدو ، بس ياليت تكلمين الخدامه تسوي القهوه والشاي بسرعه ."
رحيل :" إن شاء الله ."
فهد وهو يلف :" ياليت تستعجلين عندنا رائد و إيده مكسوره بعد .. أظن أظـن صاير له حادث . " قال جملته وهو يعرف رحيل إنها تخاف وفضوليه بقوه ، وفتح الباب .
رحيل بخرعه :"إيييش ؟!! "
طلع وهو يقول :" إيده مكسوره ." وطلع ، وهو يضحك إنه ترك أخته بخوفها وفضولها .
رحيل وهي عاقده حواجبها ومعصبه على حركة فهد :" حسبي الله على بليسك يافهد ما تترك حركاتك ."
وقفت ، وراحت للمطبخ .




:

:




قالت بعد ما أخذت نفس :" ربي يوفقها إن شاء الله مع واحدٍ يستاهلها ...... ربي يخليك ، تسلمين ......... مع السلامه "
دخلت آسيل على جملة أمها الاخيره ، وجلست :" مين المتصل ؟"
أم رائد :" أم شهد ."
قالت بتساؤل وخوف :" ها وش ردهم ؟ "
أم رائد :" يقولون البنت ما تفكر بالزواج حالياً وتفكر بدراستها ."
فرحت آسيل وأخفت فرحتها عن أمها وتظاهرت باللامُبالاه :" أها ، طيب مهوب شرط يتزوج من برى ، أخطبي له من العايله ."
سكتت أم رائد لأول مره ما تعارض ولا علقت .
ناظرت أسيل بأمها وهي مستغربه من هدوء أمها من بعد حادث رائد .
وقفت وطلعت من اصاله ، وطلعت جوالها .
وأتصلت على رائد تبشره .
أنتظرت رده ، و رد عليها :" هلا ؟ "
اسيل :" هلا رائد ، وينك ؟ "
رائد :" في بيت عمي أبو خالد ، ليه ؟"
اسيل :" أها ، أجل أخليها بعدين ."
رائد شك بإنها تبي تكلمه عن رد شهد :" قولي ، وش فيك ؟"
اسيل :" اممم ، أمي من شوي كلمتها أم شهد ."
رائد بحذر :" أيوه .."
اسيل أبتسمت لأنها عارفه إن هالرد بيفرح رائد :" رافضه ."
قال بفرح وهو يشوف خالد طلع من المجلس لأن جاه أتصال :" والله ؟!! "
اسيل :" والله ."
رائد :" يالبى قلبك على هالبشاره ."
ضحكت :" يلا ما أبي أطول عليك حبيت أبشرك وأسكر ، يلا مع السلامه ."
رائد :" طيب .. مع السلامه ."




:



:




رفع رائد راسه على دخول فهد إللي يضحك .
رائد وهو يبتسم من ضحك فهد إللي بدا يهدا :" وشفيك ؟ "
فهد وهو يجلس وياخذ نفس :" رحيل خرعتها من شوي ."
أبتسم رائد بزياده حتى بانت أسنانه على طاري رحيل .
كمل فهد :" قلت لها سوي قهوه بسرعه لأن رائد عندنا و إيده مكسوره وشكل صاير له حادث ، وماتت خوف وهي تسألني ، وطلعت حتى ما قلت لها وش إللي صاير لك ( وضحك وهو يتذكر وجه أخته ) يا قلبي عليها خوف مهوب طبيعي ، يلا بخليها شوي تموت بفضولها ."
ضحك رائد على حركات فهد ويتمنى لو يشوف ردة فعل رحيل لما عرفت بإن صاير له حادث ، فرح لما عرف إنها خافت عليه ، حتى لو كان هالخوف .. خوف على ولد عمها فقط .
فهد :" إلا عالطاري ، إنت صاير لك حادث ولا إيش ؟ "
رائد :" إيه حادث ، صدمت بسياره بدون ما أشوفها ."
فهد :" أوف ، مهو من طبعك تسرع ."
رائد :" والله كنت ميت نوم ، ولا أنتبهت ، وكل اللي صار لي كسر بسيط ، و الحمد الله ما صار شي لا لي ولا اللي صدمته ."
هز راسه :" الحمد الله ، المهم لا عاد تتعودها ."
ضحك :" يارجال هذا شي مكتوب ، ما بإيدنا شي ع المكتوب ."
تنهد فهد :" أي والله ، الله يعين ( وقف ) يلا بروح أشوف القهوه واشوف أختي هههههههه ."
وطلع تارك وراه رائد إللي مبتسم وفرحان ع الأخير واخيراً بعد ما سمع رفض شهد له ، وخوف رحيل عليه .
دخل فهد المطبخ ، وشاف أخته معطيته ظهره وهي ترتب صحون كيك القهوه ع الصينيه .
فهد :" ها رحيل وش سويتي ؟ "
لفت وهي عاقده حواجبه :" هذا إنت ، وش هالحركات ؟ "
ضحك ببرائه :" وش سويت ؟ "
رحيل :" لا والله ، ما قلت لي وش اللي صاير ؟ "
فهد :" أبد ، رائد صاير له حادث والحمد الله ما صار له شي كسر بسيط بإيده ."
رحيل :" أوف ! وشلون صار هالحادث ؟ "



:

:



* بعد المغرب


بعد مُصارعات بفُراشها وتحاول تدور على النوم من ساعه ونص ، لكن خلاص هي شبعت نوم .
رفعت اللحاف عنها ، ودخلت الحمام ( عزكم الله ) وتحممت .
وطلعت ..
ولبست جلال الصلاه ، وصلت صلاة المغرب ..
بعد ما خلصت صلاتها ، وأستغفرت ربها ، وسبحنت ، ودعت لها ولأمها ولأبوها ينور عليه قبره .
لفت سُجادتها ..
وفتحت الثلاجه الصغيره اللي عندها ، وطلعت لها عصير مانجو بارد يروقها ، و حاسه بالطفش وهدوء البيت إللي مطفشها ..
الله عليك ياليان رحتي إنتي وأمي وتركتوني ، هين أرويك !
راحت لتسريحه ، وهي تنشف شعرها بالمُنشفه الصغيره ، واستشورت شعرها بسرعه كونه قصير ..
ورفعته على فوق ..
ولبست بنطلون جينز سكيني ، وبلوزه حمراء توصل أكمامها لنص إيدها ، وطبع كيان يكون لبسها بالبيت كذا على طول عكس ليان إللي تحب تلبس بجامات البيت .
أخذت جوالها ..
وطلعت من غرفتها وهي تتصل على ليان ، وسمعت رد ليان :" هههه هلا كيون ؟ "
كيان بزعل :" لا والله ، يعني زين كذا تتركيني بروحي بالبيت ."
ضحكت ليان :" والله أنا صحيتك وقلت تروحين معاي ، قلتي لا بنام ، عاد تحملي طفش البيت ."
سمعت كيان صوت هنادي :" والحين رايحين لرحيل هههههههه ."
كيان عصبت وهي تنزل تحت :" لا والله !! الحين الحين الحين تجوني وتاخذوني معاكم ، مافيني أتحمل الطفش ، ما أتحمل أشوفكم مستانين وانا طفشانه ، الحيين تجوني بالبيت وتاخذوني ."
ضحكت ليان :" يا بنت الحين قربنا من بيت عمي ، مانقدر نرجع ."
كيان :" وأمي وينها ؟ "
ليان :" في بيت عمي خالد ."
كيان :" طيب ، أنا جايتكم . " وسكرت الجوال .
ووصلت تحت وهي تنفث :" مو على كيفهم يستانسون وأنا لا ."
دخلت الصاله وهي تدور على رقم أخوها سلطان ، ورفعت راسها وهي تحط الجوال عند أذنها ، وفجأه شهقت وهي تشوف الشخص إللي جالس وبإيده ملف ويناظرها ..
ناظرته بعيون شوي وتطلع ، وهمست :" متعب !! "









*؛*؛*؛*؛*؛؛*؛*؛*؛*؛*؛*؛*؛*؛*؛*؛*

انتهى الفصــل الخامس وَ العشرون ..!
أنتظر توقعاتكم على شوق .
قراءه ممتعه ..





تحيتي
&.. اهــواك ..&
أو
&.. صـاحبي يـا حبني لـك ..&







* أعذروني من يوم الأثنين كنت أبي أنزل لكم البارت لكن مو راضي يضبط معاي ، هل المشكله من الموقع أو من عندي .

الحمد لله عالسلامة

رائد

لا لا لا لازم بتتبسم.. رحيل متروعه عليك.. والله وطلعت هب هين.. وحليلها شهوده ما تستاهل.. حطيتها في موقف.. بس ما عليه اهم شي تاخذ رحيل<< بيكفخونها الاعضاء.. زين متى بتخطبها تتريا العدة تخلص

رحيل

وانتي على طووول.. اتزيغين.. يعني ما تعرفين فهود.. عاد لو تدرين اللي سويتيه شقايل جلب كيان هالرائد..

ام رائد

تعرفين عورتي قلبي.. قلبج على ولدج بس محد طايع يحس فيج.. عاد لا تزعلين اهم شي اني حسيت فيج<< فيس متاثر

كيان

شو هالزين خخخخخ.. لا البنت كاشخة ونازلة تحت.. يعني ما تدرين منو تحتح<< فيس نذل يحقق وياها.. عاد الحينه شو بتسوين

نترياج حبيبتي<< فيس شال ورده ويالس يتريا البارت اليديد