كاتب الموضوع :
صاحبي يا حبني لك
المنتدى :
الارشيف
› العصر ..
نزلت تحت بطفش ..
"أوف وش هالطفش "
رن جوالها ، ورفعته وهي تناظر الجوال وعاقده حواجبها ، قرت الأسم " الريـم " يوة حاسه إني من زمان عنهـا ..
أخذت نفس :" هلا والله بريومه "
الريم :" هلاااا بك يابعد قليبي ، أخبـارك يالدبه "
رحيل :" هههههه بخير يالبى قلبك ، إنتي وش أخبـارك ووشلون خالي وخالتي و الدانه ؟"
الريم :" والله كلهم بخير ، ومشتـاقين لك ، وربي لك وحشه "
رحيل :" وأنا أكثر والله ( سكتت شوي وقالت ) أيوة وعلومك بعد "
الريم بحزن بان بصوتها :" علومي من بعدك ماهيب زينه ( كملت تبي تغير الموضوع بسرعه ) و اليوم يمكن نزورك أنـا والدانه "
على جملة الريم الأولى حزنت رحيل لكن ماتبي تبين لـ الريم حزنها على فقدانها لها ، وقالت بفرح :" والله !! أمـانه قولي الصدق ؟"
الريم :" هههههههه ليه وش شايفتني رحيل ههههههه "
رحيل :" وجع "
الريم :" المهم كلها ساعه ونص وجاينك "
رحيل :" يـا مرحبـا والله ، الله يحييكم "
الريم :" الله يبقيك ، يلا مع السلامه "
رحيل :" هلا والله "
وسكرت
وراحت للمطبخ ..
صرخت بكل صوتها :" الدااااانه !"
طلعت وهي معها شنطتها وتشيك على أغراضها :" نعم ، خير ، وش تبين ؟ صوتك وصل للجيران "
الريم وهي تناظرها بطرف عينها :" هه ، أقول أمشي بس صار لك ساعتين تجهزين "
الدانه وهي تغير السالفه :" المهم ، الخدامه نزلت الأغراض ؟"
الريم :" إيه وصارت الأغراض عند رحيل "
الدانه :" أمـا !"
الريم :" ههههه لا تصدقين ( ومشت ) يلا يلا بلا هذره "
ونزلت تحت ، ونزلت بعدها الدانه ..
نزلت رحيل بنفنوفها النـاعم و العادي جداً اللي يوصل لنص سـاقها ولونه وردي داكن ، ورافعه شعرها الأسود على فوق ..
وشافت أمها إللي تناظرها بأبتسـامه :" مشـاء الله تبـارك الرحمن ، قمر قمر "
ضحكت رحيل وباستها ..
أم خالد :" وش عندك لابسه ؟ أحد بيجي ؟"
رحيل :" إيه الريم وَ الدانه "
أم خالد :" الله يحييهم ، والله وجاوا بوقتهم ، أنـا أبحضر ملكة متعب وما أبي اتركك بروحك ، وتو أم طلال متصله تسألني إذا بحضر ، والله أنحرجت منها "
رحيل أبتسمت لأمها :" يمه عادي روحي ولا تشغلين بالك ، البنات أللحين صـاروا قريب ، وأنـا كل شوي أبتصل وأطمنك "
أم خالد :" الله يخليك يابنيتي ،،، يلا أنـا طالعه أجهز ، عشان أكون جاهزة بعد المغرب ."
مشت رحيل للمطبخ تشيّك ع القهوه و العصـاير و الحلى :" أخذي راحتـك يـالغاليه "
واقفه أمـام المرآيه وتناظر بشكلها ، وتمشط شعرها اللي يوصل لتحت أكتـافها ..
وشوي سمعت طق البـاب :" تفضـل "
دخل راسه ، وقال بمرحه المعتـاد :" سلاااام "
أبتسمت له :" هلا والله ، أدخل "
ضحك فواز :" بدون ما تقولين "
دخل وهو يسمعها تضحك ، وراح ورمى روحه على سريرها :" أيوه أخبـارك "
رغد ترفع أكتـافها :" الحمد الله عايشـه "
فواز :" عايشه ولا خديجه هههاي "
رغد بطفش :" يوووة عَ السمـاجه "
ضحك :" تعالي تعالي ، أجلسي "
جلست رغد مقابله ع الكرسي ..
فواز :" أمممم "
رغد أبتسمت وهي عارفه وش يبي يقول لها :" أيوة ، وشو تكلم ؟"
فواز :" وفـاء ، أحم أخبـارها "
أتسعت أبتسامتها :" بخير الحمد ، اليوم كلمتها "
شهق وعدل جلسه :" قولي والله ؟!! "
رغد :" والله ، وتقول أمها مرتفع السكـر عندها اليوم وتعبـانه ."
فواز بخوف :" قولي والله "
رغد ضحكت على فواز اللي يكرر جملته :" أي والله "
فواز :" وطيب وهي وش مسويه ؟"
رغد :" الحمد الله زينه ، وتقول أمها أحسن بكثير من البـارح "
نزل راسه :" أهـا ( وقف ) خلاص إنتي لا تتركينها ، بين فتره وفتره إتصلي عليها وطمنيني عليهـا ، طيب ؟"
رغد :" طيب مـا طلبت شي "
سكت شوي وقال وهو يمسح ذقنه :" و آآآ ، وَ وصلي سـلامي لها "
أبتسمت :" طـيب "
مشى :" إيه وقولي ( كمل بهيـام ) إني مشتـااااااق لها "
ظربته بخفه على ظهره :" روح زين ، ترا عطيتك وجه "
ضحك بصوت عالي وطلع من عندها ..
› 5:00
أخذت خطواتها إلى آن وصلت قريب من بـاب البيت ، عشان تكون بإستقبـال الدانه وَ الريم ..
شافتهم وهم يدخلون ، وقالت الريم اللي تقدمت قبل أختها :" السـلام عليكم "
الدانه وهي تدخل بعد أختها ، قالت :" السلام عليكم "
رحيل بإبتسـامتها المعتاده :" هلا والله ، وعليكم السلام وَ الرحمه ، يالله حيهم ، نورتوا البيت "
الريم وهي تقرب منها تسلم :" الله يحييك " وباستها وضمتها بقوة تدل على شوقهم ولهفتهم على بعض ..
الدانه بطفش :" يالله شكلكم مطولين ، يعني أجلس ولا ؟ "
ضحكت رحيل وهي تفك الريم ، وناظرت بـالدانه بإبتسـامه ( وأخيراً رجعت الدانه إللي أعرفهـا )
قربوا من بعض ، وسلموا على بعض ، وضمت الدانه رحيل ، قالت الدانه :" والله ولك وحشه "
تركتها رحيل :" وإنتوا أكثر والله ، أشتقت لكم ( ناظرت في الريم وثم بالدانه ) أيوة وشلونكم وشلون خالتي وَ خالي ؟"
الدانه :" والله كلهم بخير والحمد لله ، إنتوا أخبـاركم وَ أخبـار الأهل "
رحيل وهي تتقدم :" كلنا بخير الحمد الله ( ناظرت بالصاله ، وقالت وهي تمد إيدها ) تفضـلوا تفضلوا "
وراحوا البنات للصـاله إللي على يسـارهم ، وكل وحده جلست بناحيه متقـاربه ...
جلست على الكنبه الصغيره ، وتوها مخلصه من الميك آب الخفيف وطلب منها هالشي :" أوف وأخيراً "
ضحكت ليان بصوت عالي ..
كيان وهي تناظر أختها بنص عين :" سلامات ! أشوفك من اليوم و إنتي تضحكـين ، وش سالفتك ؟"
ليان :" ولا شي ، بس كذا يعني مو لايق عليـك إنك تتملكين وتتزوجين قبلي "
كيان وتناظرها بقهر :" والله ؟ "
قبل لا تتكلم ليـان إللي تبي تضحك على أختها اليوم ، دخلت بهبالها المعتاد :" ســلام "
:" وعليكم السـلام "
ليـان بفرح :" أهلين ، حيـاك "
قالت :" الله يحييك ( سلمت هنادي على ليان ) أخبـارك "
ليان :" تـمام الحمد الله "
ناظرت هنادي بـكيان الهادايه وضحكت ، وراحت سلمت عليها :" أخبـارك يا عروستنا ؟"
كيان أبتسمت شوي ورجع وجهها العادي :" بخير ، و إنتي ؟"
هنادي :" تمام التمام ، مو اليوم ملكتك إنتي وخيو "
ناظرتها بقهر تخفي وراها خجلها حتى لا تبين لهم :" عقبـالك "
هنادي وتسوي نفسها مستحيه :" الله يسمع منك " قالت جملتها وهي تسمعهم يضحكون ..
ودخلت على ضحكهم هند :" السلام عليكم "
:" وعليكم السلام "
سلمت عليهم :" أخبـاركم "
ليان :" بخير ، و إنتي وشلونك ؟"
هند ناظرت بكـيان وأبتسمت :" تمام الحمد الله ،، ها وشلونك يا كيون ؟"
كيان :" زينه الحمد الله "
وفسخوا هند وَ هنادي عباياتهم يعدلون أشكـالهم النـاعمه ..
قالت بتردد :" رحيـل "
رحيل :" سمْـي "
أخذت نفس الريم :" منتي راجعه لـسعود ؟ " قالت جملتها وهي تترقب ملامح رحيل اللي أرتخت ..
نزلت راسها رحيل وهي تحاول تـاخذ نفس ، وصار تنفسها صعب ..
( هذي وش تقول ، أرجع لواحد ظـالم ، وش أبي فيه ، ليش طلقني واللحين يبي أرجع له ؟ لعبه هي ! )
طـال سكوت رحـيل إللي سرحت ونست الريم إللي سألتها ..
الريم :" رحيل "
رفعت راسها وناظرت بـالدانه وثم الريم ..
الريم :" وش فيـك ؟"
رحيل تنهدت :" تبيني أرجع لواحد ظـالمني بشي أنـا ما أدري هو لمن أصـلاً ، وَ اللحين هو معترف بهالشي إنه ظلمني وحـاس بالذنب ويبي يرجعني ، ولا كأنه جرحني بإتهامه لي "
الدانه تكلمت :" رحيـل ، سعود ماله ذنب باللي صـار ، السـبب لمى ( كملت وهي تشوف رحيل تهمس بإسم " لمى " بإستغراب وَ بتساؤل ) هي سبب إللي صـار لكم "
عقدت حواجبها :" كيف ؟ "
نزل وهو يشوف البيت هـاديء والنور خـافت ..
تنهد ..
يكره الهدوء ..
من البـارح ما طلع من غرفته ..
أنـا اللحين ليش قالب الدنيـا ..
يعني عشـان آسيل ..
و إذا خطبها هالكريه ، وش دخلني ؟
افففف ..
جلس ع الكنب ، وسند ذقنه على إيدينه ..
و اللحين وش السواه ، أروح أخطبها قبل لا يجي يخطب ..
ما فيه الا كذا ..
آسيل ما راح تكون لـراكان لو على جثتي ..
وقف ، وطلع مايبي يتـأخر على ملكة أخوه ..
قالت لرحيل كل شي :" وهذي كل السـالفه ."
رحيل أكبر علامة تعجب فوق راسها ، ومنصدمه من اللي قاعده تسمعه :" تتكلمين جد ؟"
هزت الدانه راسها بـ ( إيه ) ..
نزلت راسها وتنهد وهي تتعوذ من إبليس ، قالت :" وليه تسوي كذا ، أنـا وش سويت لها ؟ "
الدانه :" قلت لك ، تحب سعود من قبل لا تتزوجينه ، ومن زمان ، ومثل ما قلت لك زوجّها أخوها بالغصب حمد اللي تكلمه "
رحيل :" الله لا يبلانا ، الله جازاها بفعايلها "
الريم :" وعقب كل اللي قِلناه ، وش قلتي ؟ "
رحيل بتردد :" و سعود طلب منكم تكلموني ؟ "
الدانه بصراحتها :" تبين الصراحه لا ، ماله وجه يطلب منا نكلمك ، بس انا والريم بغينا نوضح لك كل شي ، ونشوف رايك "
رحيل ( هو ما طلب ، ولو يبيني صدق كان اصّر على خالد ، واخواته ، ما تكتف كذا ويسكت ، ولا تكلم عليهم يوم جابوا أغراضي كلها ، ليش يسكت ما يتكلم ليه ؟ ،، عمري ما راح أفهمك يـا سعود )
رحيل بهالموقف تفكيرها مشتت ، خايفه ترجع له ، ويرجع الموال القديم وتعيشه من جديد ، وخايفه لاتجلس كذا ، وماتدري وش مخبي لها مستقبلها ..
لاحظوا البنات إن رحيل سكتت وما تكلمت ..
ناظرت الدانه بالريم بمعنى خليها براحتها ..
نزلت الريم راسها بزعل ..
بهاللحظه دخلت أم خالد ، لأنها بتطلع اللحين لبيت أبو سلطان :" السلام عليكم ، يا مرحبا والله ومسهلا ، نورتوا البيت "
:" وعليكم السلام "
الدانه بإبتسامه خجوله :" الله يرحب بك يا خالتي ، منور بأهله "
سلموا البنات على أم خالد .
الدانه :" وشلونك يا خاله "
أم خالد :" بخير ربي يسلمك ويخليك ، إنتي وشلونك وشلون الأهل "
الدانه :" كلهم بخير الحمد لله "
أم خالد تناظر بالريم :" وإنتي وشلونك يمه "
الريم :" تمام الحمد الله ، إنتي أخبـارك "
أم خالد :" الحمد الله ( قالت بأحراج ) والله ماودي أسلم عليكم وأنا مستعجله ، تأخرت على خالد تدرون اليوم ملكة متعب "
الريم :" عادي ، أهم شي شفناك وسلمنا عليك ."
أم خالد :" ربي يخليكم ، يلا وصلوا سلامي لأم سعود ، مع السلامه "
الريم :" يوصل إن شاء الله ."
وبعدها طلعت أم خالد ..
الريم وهي تضحك :" يالبى قلب أمك هههههه "
ضحكت رحيل على هبال الريم اللي تعودت عليه وفاقدته هالأيـام ..
الدانه وهي واقفه :" يلا يا رحول ، ترى احنا ماشين ، تـأخرنـا ، صـار لنـا سـاعتين ، و أمي أكيد تنتظرنا "
عقدت رحيل حواجبه :" والله ما شبعت منكم ، أجلسوا ."
الدانه :" مره ثـانيه إن شاء الله ، بس والله تأخرنا ع الوالده "
قالت وهي ماتبي تضغط عليهم :" خلاص ، بس أمانه لا تقطعون ، ووصلوا سلامي لخالتي "
الريم :" يوصل سلامك إن شاء الله "
الدانه وهي تمشي لناحية الباب :" يلا مع السـلامه "
رحيل :" مع السلامه "
الريم وهي توقف وترفع شيلتها :" أقول ،، ودي أجلس ، مابي أروح ، هناك طفش فضيع "
رحيل :" هههههههه عادي أجلسي "
الريم :" ترا ماله داعي أروح ، خلاص أبجلس ، وربي بيتنا من عقب ماطلعتي طفش طفش طفش ( رفعت نظرها فوق ) حاسه اللحين الدانه عصبت ، خليني الحق عليها " قبل لا تتحرك
سمعت صوت الدانه اللي تفتح الباب :" لا والله !! ، كان جلستي أحسن "
الريم وهي تستخف دمها :" والله كنت بجلس بس شسمه ....."
الدانه تقاطعها :" يابنت أخصلي ، ترا تأخرنا "
الريم وهي تلبس شيلتها :" طيب ، طيب "
طلعت الدانه وبعدها الريم اللي قالت :" يلا مع السلامه يارحوول "
رحيل وهي تضحك :" الله معـك "
الريم لما طلعت ، شافت شخص يشبه رحيل شوي يبي يدخل البيت لكنه وقف أنفشل لما شافهم ( يالله من هذا ، يافشلتي شاف هبالي مع رحيل ، وش بيقول عني اللحين )
وقفت ، وهو وقف ..
ناظرت الريم بـالدانه اللي وصلت للسيـاره والتفتت لها ..
حس في نفسه قال " احم " وصد عنها ومشى بعيد ..
وهي يوم شافته راح ، كملت طريقها بسرعه ، وركبت سيارتهم ..
سمعت الدانه تضحك:" هههههههههه من هذا ؟ ووش فيه واقف يناظرك ؟"
الريم وهي ترفع أكتافها :" مدري "
الدانه :" شكله أنصدم من طولك هههههه وشك انك بنت "
الريم بعصبيه :" ليه وش فيه طولي ، مشـاء الله علي تبـارك الرحمن "
سكتت الدانه منها وهي كاتمه ضحكتها على شكل الريم .. تعصب إذا أحد قالها يالطويله .
دخل البيت وهو يشوف السيـاره تطلع مع البوابه إللي ركبتها هالبنت الطويله وعرف طولها وتذكرها ، ولكن مو متأكد إنها هي إللي بباله ..
شاف رحيل جالسه تناظر التلفزيون :" السلام عليكم "
ناظرته :" وعليكم السلام "
جلس فهد بجنبها :" أخبـارك "
أبتسمت له :" بخير ، إلا مارحت لـملكة متعب ؟ "
فهد أخذ نفس :" بروح بعد شوي ، أممم إلا من هالبنات إللي طلعوا من شوي ؟ "
رحيل :" خوات سعود " نزلت راسها
فهد :" اها ، وش يبون ؟"
رحيل عرفت قصده :" زياره عاديه "
هز راسه ، قال يحاول يعرف أسم ( الطويله ) :" وش أساميهم ؟ "
أسغربت رحيل من أخوها ، أول مره يسـأل :" الدانه وَ الريم "
فهد :" مشاء الله " وقف مايبي أخته تشك
رحيل :" ها رايح ؟"
فهد :" تبين الصدق ، ما أبي أروح وأخليك "
ضحكت رحيل ماتبي تبين له ضيقتها :" لا عادي روح ، أنا بجلس عَ النت ، لا تحاتي "
هز راسه :" اوكي براحتك ، يلا تامريني بشي "
رحيل :" أبي سـلامتك "
قال وهو يطلع :" الله يسلمك ،، يلا مع السلامه "
سكر الباب ..
وهي وقفت ، وطلعت من البـاب الخلفي ، وطلعت للحديقه ..
الهواء هاديء ، وكل شي حولها هاديء ..
جلست ع الكرسي وغمضت عيونها وسندت راسها على ورا ..
تنهدت ..
يالشين الوحده
ويالشين الهدوء
ويالشين هالثنتين عالمجروح ..
تذكرت أيـامها مع سعود ..
وش كثر هي ممله ..
وياكثر ما عاشت بتوتر ..
ووش كثر التفكير تعبها ...
صحيح جرحها ، وطعنها بقلبها ..
بس بإمكان الجرح يجبر ..
بإمكانها تسـامحه ، لكـن ماتبيه ..
خلاص .. عافه الخـاطر ..
ماتدري ليه هي ماتبيه ..
هل لأنها كانت تشـوف كل نظراته لها تدل على عدم أهتمامه بهالأنسـانه إللي تمنت قربه ، وفجـأه عافته وعافت حبه ..
اللحين حس فيني ، وليش ما حس من الأول ، ليـه ؟
أنـا خلاص بحـاول بقد ما أقدر أنـساه ،، بحـاول
وبعيش حيـاتي مثل أول ، بلا هم وبلا وجع قلب ..
رجعت لهم وجلست على الكرسي وهي تنفث وصدرها اللي يرتفع وينزل يدل على أنفاسها المتسابقه ..
ضحكت هنادي :" ها وش صـار ، وقعتي ؟ "
كيان نفثت :" لا "
هنادي بخرعه وقالت وهي تصرخ :" ليه ؟!! "
كيان :" أجل وش رايك ، ناداني أخوي عشان إيش ؟"
هنادي ببراءه :" عشان توقعين "
كيان وهي شوي وتبكي على غبـاء هنادي اللي متعمده تسوي كذا :" يالله "
ضحكت هنادي ، وجلست بجنب كيان وضمتها بفرح :" مبروك ياخيه ، عقبالي وعقبال الباقين ههههههههه "
ضحكوا البنات ، وعقبها جلسوا يسولفون مع بعض ..
لكن فقدانهم لـرحيل منقص عليهم فرحتهم ..
قالت الريم وهي تجلس وتفسخ عبايتها :" إيه تسلم عليـك أم خالد ورحيل "
ام سعود أبتسمت بحزن عَ الطـاري :" الله يسلمهم ويخليهم "
الدانه جلست بجنب أمها :" متى راحت خالتي ؟"
أم سعود :" بعد ما رحتوا بنص ساعه "
الدانه بحزن :" وربي كسرت خاطري خالتي ، كيف كانت دموعها تنزل وهي تتكلم عن لمى "
أم سعود :" صدمتها ببنتها قويه ، إنتوا ماتدرون قد إيش هي تغلي لمى "
وقفت الدانه :" الله يعينها ، يلا انا بطلع أتحمم وارجع لكم ."
كان في شخص بيدخل لكنه وقف وهو يسمع ( "... تسلم عليـك أم خالد ورحيل " ) ، غمض عيونه على هالجمله ..
آه يـارحيل ، وش حالك ، ووش أخبـارك ؟
بكل مكان أشوف طيفك ، ليه يصير لي كذا ..
ليه ؟
آه ودي أموت ولا أجلس كذا ..
أولها رغد إللي عشقتها وأنصدمت فيها ..
وبعدها رحيل إللي عمري ما راح الآقي مثلها ، لكن راحت من إيدي ..
تعوذ من الشيطـان ، ودخل :" السلام عليكم "
:" وعليكم السلام "
باس راس امه :" أخبـارك يالغاليه ؟ "
أم سعود :" أنـا بخير إذا شفتك "
الريم وهي تتخصر :" لا والله !! وانا وين رحت ولا طاح سوقي "
ضحك سعود :" الله يعين ، مادرينا إن عندنا ناس غيورين "
الريم :" إيه ، أنتبهوا مره ثـانيه "
سعود :" حـاضر عمتي "
ناظر أمه وقال :" يمه "
أم سعود :" لبيك "
سعود :" بغيت أقول لك ، أنـا ماشي اللحين لـلشرقيه "
أم سعود :" يا يمه ماصار لك كم يوم من رحت ، و إلى متى على هالحـال "
سعود :" يمه شوية أشغـال ، كم مره وانا أأجل أشغـالي ، ومسـاعد أتصل علي وضروري أرجع لهم ، ويمكن تكون زياراتي للرياض أربعة أيـام أو خمس و أرجع للشرقيه "
كان جالس بين الرجال ويباركون له ويرد عليهم بكلمة " الله يبارك فيكم " ويبتسم ويرجع يسكت ..
وهادي لأبعد درجه مثل ما تعودوا عليه ، وهداوة متعب تحسسهم بغموضه إللي كلهم ماعرفوا وش ورا هالغموض ..
وقف عبدالله ونـاظر براكان بتحدي إللي يناظره وماعرف نظراته ، وناظر بـأبو رائد اللي جالس بجنب أبوه :" عمي عبدالله "
ناظره على طول أبو رائد وكل اللي بالمجلس ..
أبو رائد :" سم يابوي "
عبدالله :" سم الله عدوك ( ناظر بالكل ، وأخذ نفس ، وسمْ بالله ، وقال ) أنـا طالبك يا عم "
أبو رائد بشهامته :" تم ، أطلب "
بلع راكان ريقه ..
عبد الله وحـاس قلبه بيوقف من هالموقف :" أنـا طالب يد بنتك قدام هالوجيه الطيبه على سنة الله ورسوله ...."
*؛*؛*؛*؛*؛؛*؛*؛؛*؛*؛*؛*؛؛*؛*؛*؛*؛؛*؛*؛*؛*
انتهى الفصــل الثـاني وَ العشـــرون ..~
انتظر ردودكم بكل شوق ،،
دمتم لي بخير ..
لنا لقـآء بإذنه تعالى الأسبوع القادم يوم الثلاثاء..
مع تحياتي
&.. اهــواك ..&
أو
&.. صـاحبي يـا حبني لـك ..&
|
11-01-10, 12:00 PM
جديد مواضيع قسم الارشيف
العرض العادي
