[ \\.. الفصـل الســآبع عشــر ..// ]






يــَآ [ صــآحبْ ] قتّلنْــيّ منْ جَرآحهَ

وَ

ابتّسِـمْ بـ/ الـهَونْ . . .














وقفت رحيل وقـالت بصدمه :"ســعود !! "
سكر البــاب، ودخــل بهــدوء وهو ما شــال نظره عنهـا ..
حـاس بإنه من زمــاان عنها ، وإذا قـال بنفسه إنه مو مشتـاق لها يكون كذاب ..
ولـكن هو [ يكــابر ] ..
ومـاأدري متى يترك مكـابرته ..
مشى لنــاحية الشخص إللــي يناظره بصدمه ، ووقف قدآمهــا ..
انصدم منها لمّـا رمت نفسهــا لحضنــه..
رحيل:" تـأخرت كثيييير ، كثيـــــر !!"
مـايدري وش يسوي ..
لو هي ما ضمته يمكن هو يضمها ..
لكن هو صار يرجف وارتبك لمّـا ضمته ..
ومو أقـل من هاللي بحضنه ..
حاوط ايدينه من ورا ظهرها ،، وضمها بشويش ..
اما رحيــل انتبهت عــلى نفسها لما حست بإيدينه من ورا ظهرها ،، وبعدت منه وهي منزله راسهــا مفتشله ..
نـاظرها سعود وهو عارف إنهـا مفتشله من وجهها إللي انصبغ للون الأحمــر !
بلع ريقه لما فكر بإنهــا بعد مشتاقه له ..
سعود:"...............شلونك يـارحيل ؟"
رحيل رفعت راسها ونزلته:"الحمد لله ، الحمد الله على ســلامتك ."
سعود:".. احم ، الله يسلــمك ."
مشى سعود وجلس ، وجلست رحيل بالكنبه الثـانيه .
ترددت رحيل تتكلم لأن سعود شكله ما راح يتكلم ..
بس ما عرفت وش تقول ، وتحس وجها صاار حار من حرارة الموقف ..
وقالت رحيل بعد فترة صمت قصيره رحيل:"ليه ما قلت لنـا إنك بتجي اليــوم .؟"
سعود:"حبيت اسويها مفاجـأه .. وعسى إنهـا عجبتك .؟"
رحيل ابتسمت وقالت بدون ما تحس:"وآحلـى مفـاجأه بحيــاتي .."
ابتسم ..
( والله ودي أحبــك يا رحيــل ، بس مابي انصدم فيك مثــل رغد ، بس رحيل كل حركاتها معي تدل على إنهــا تحبني ..
تحبني..؟
يا ترى إذا هي تحبني أو لا ..؟
مابي اتعلق فيهــا ،، ولآ ابيهــا تتعلــق فينــي ! )
رحيل:"سلمت على اهلك ..؟"
سعود:"لا ، ما حصلت احد بالصاله ،، يمكن نــايمين .."
رحيل:"يمكن ،، ........ ( وقفت ) بروح أجيــب سحور لك وبجي .."
سعود:"لا لا بس ماأبي شي .."
رحيل:"طيـ.........."
قبل لا تكمل جملتها سمعوا صوت الأذان ، وناظرت سعود وهي عاقده حواجبها ..
ابتسم :" موب لازم ، اصـلاً انا شبعــان ( وقف ) بروح اتوضـأ عشان الحق ع الصـلاه .."
ومر من جنبها .. ودخل الحمــام إللي بـ صالة الجنــاح ..
وقامت رحيل ودخلت غرفتها ، عشـان تتوضـأ ..










¨ اليوم الثــــــاني ¨


صحت رحيل وشافت الساعه ..
الا وهي 3 العصر .. فزت من مكــانها ..
وقبل لا تنزل من السـرير ، انتبهت إن فيه شخص ثــاني موجود ..
وما صدقت يوم شافت إنه سعود نايم ع الطرف الثــاني ومعطيها ظهره ..
رحيل ( وش إللــي جابـه ، البـارح نمت لأنه طلع يصلي وبعدها رجع لمكتبه ، متى نام هنا ..؟
وليه ما حسيــت فيه ..؟! )
نزلت من السرير ..
ودخلت الحمام ( عزكم الله ) وتوضت ، وصلت الظهر إللي فاتتها وَ العصر ..
وفتحت المصحف ، وقرت لها كم صفحه من سورة { الكهف } ..
وبعد ما سفطت جلال الصــلاه ..
ناظرت بـ سعود إللي نـايم ، وترددت تروح تصحيه ولا لا ...؟
ولكن تذكرت إذا هو صلى الصلــوات إللي فاتت ، او لا ..؟
مشت لناحيته بهـدوء ، وقالت:" سعود ......... سعود ...........سعود يلا اصحى الحين الساعه 3ونص العصر .."
ولكن ما سمعت رد ..
وما عرفت وش تسوي ..
وما تدري بإن هاللي تصحيه صـاحي من يوم صحت ، بس مسوي نفسه نــايم ..
ويسمع هاللي تصحيه أول مره ..
رحيل بصوت شبه هـامس :"سعود يــلا اصحى ، حرام يبطل صيامك بدون ما تصلي .."
شافت رحيل ما فيه فايده فيه ..
وقالت بروح وبرجع اصحيه مره ثانيه..
ولفت بتروح بس وقفت لمّا سمعته يقول:"يعني لو ما صحيت لك بتروحين وتتركيني نايم ..؟"
لفت عليه وقالت وهي ترفع حواجبها:"يعني صااحي ومسوي نفسك نايم ..؟"
جلس سعود:"ابي اشوف إذا بتقدرين تصحيني وتخربين علي نومي .."
رحيل:"بس إنت صاحي ، يلا قوم صلّ .."
نزل سعود من الســـرير ..
وطلعت رحيل لـ صالة الجنـاح وجلست ع الكنب..
وتتابع مسلسل كوميدي على بال ما يطلع سعود ..
وبعد نص ساعه طلع سعود .
وهو لابس ثوب وَ غتره وشكله بيطلع ..
سعود:"رحيل شوفي جوالي عندك ع الطاوله .."
ناظرت رحيل وشافت جواله ووقفت واخذته وراحت له ..
ومدته له واخذه منها وهو مدخل إيده اليمنى بجيبه وكأنه يتفقد شي ..
وقال وهو يطلع :"مشكـورة .."
قالت:"العفو .."
وهي عارفه إنه ما سمعها ، بس اسم إنها ردت عليه ..
وراحت تمددت ع الكنب وحااسه بكسل وودها لو تنام بس ما فيها نوم ..
اللهم كسل إللي يجيها كل يوم ، خصوصا بـ رمضــان إللي معروفين الناس بالكسل فيه قبل الفطور ..
ومعروفين بـ النشاط بعد الفطــور ..
البعض طبعاً ،،
وقفت ، وهي تفكر بإنها تنزل عشان يروح منها الكسل ..
ونزلت بـ جلآبيتها النــاعمه ..




بعد الفطــور بسـاعتين ..
دخلت رحيل جناحها وجوالها بإيدها وتبي تدق على سعود ..
لأنها تبي تنزل في السوق ، وتبي تشوف رايه إذا هو بيوديها ..أو غيره ، مثل واحد من اخوانها ..
حطت الجوال عند اذنها وهي تنتظر سعود يرد ، بس مارد عليها ..
نفثت بطفــش ..
الحين ما عاد فيه وقت عشان تسوق لـ العيد ..
لو ما نزلت اليوم متى بتنزل ، بـاكر وما تدري إذا الوقت بيضايقها او لا ..
قطع عليها افكارها رنة جوالها ، وشافت بإن سعود هو المتصل وردت بـ:" هلا .."
سعود:"دقيتي علي من شوي ..؟"
رحيل:"ايه ."
سعود:"طيب .."
رحيل:"آآ ... فاضي الحين .؟"
سعود:"بغيتي شي.؟"
رحيل:"اممم انا ابي اروح للسوق ، تدري العيد ما باقي عليه شي ، وابي اشوف رايك إذا إنت بتوديني للسوق ،أو اخلي أحد من أخواني يوديني .."
سعود:"اسف والله ما أقدر اجي لأني مشغول الحين ، شوفي واحد من أخوانك ."
رحيل:"اها طيب .. "
سعود:"رحيل ، إذا ناقصك شي بحول لك .........."
قاطعته:"لا لا ماناقصني شي .."
سعود:"طيب مع السلامه ."
رحيل:"مع الســلامه .."
سكرت وهي تتمنى لو سعود مثل أي رجل وزوجته يوديها للسوق أو اي مكـان على الأقل يعطيها جزء من اهتماماته لعمله وشغله ..
تنهدت بقلة حيله ، وهي تفكر إنهـا تصبر عليه وتعطيه فرصه وتشوف أخرتها ..












» // بيت أبــو متعب ..


دخلت هند الغرفه وشــافت هنـادي متمدده ع السرير وحاطه إيدها على بطنها وبـاين عليها إنهـا تعبانه ..
هند وهي تجلس ع السرير:"هنادي ، وش رايك تروحين معي السـوق ."
هنادي:"لا مابي اروح ."
هند:"مو إنتــي ناقصتك اغراض ، يـلا امشي معي ."
هنادي وهي مسكره عيونها:"الا ناقصتني ، بس تعبااااانه ."
هند:"ادري إنك تعبانه ، بس إنتـي إذا طلعتي يمكن تتنشطين عارفتك إنتي ما ينشطك إلا السوووق .."
هنادي:"اقول هند ."
هند بفرح:"لبـيييييه ..!"
هنادي:"ما ودك تضفين وجهك وتخليني في حـالي .."
هند بعد ما تلاشت فرحتها:"مالت عليك ، والله إني قاضيه يوم جيتك واطلبك تروحين معي .."
وطلعت هند بعبايتها ، ونزلــت .
شـافت اخوهـا طـلال إللي ينتظرها ..
طلال:" وين هنــادي .؟"
هند:"نايمه ماتبي تروح .."
طلال:"اها ، طيب مين اللي بينزل معك .؟"
هند:"إنت ."
طلال:"لا انا بنزلك وبروح .."
هند:"لا اماانه طلووول ، ماراح اطول انا بخلص اغراضي في نص ساعه لو تبي ."
طلال وهو يلف عشان يطلع :"طيب طيب .. يلا مشينــا .."











» //

نزل الدرج مستعجل ، وشاف بوجهه امه إللي قالت :"على ويـن ..؟"
خالد :"رحيل متصله علي من شوي وتبيني اوديها للسوق .."
ام خالد:"زوجهـا مو موجود ..؟"
خالد:"الا موجود ، بس مشغول الحين .."
ام خالد بتنهيده :"الله يعينك يا بنتي ."
خالد ناظر بأمه وثم ابتسم :"يمه لا تشغلين بالك كثيير على رحيل ، وسعود من يوم عرفته يموت ع الشغل ، و رحيل لو متضايقه أو شي راح يبين عليها واحن عارفينها كثير ، يلا تامرين شي .؟"
ام خالد:"سلامتك يمه ."
خالد:"الله يسلمك ، مع السلامه .."
وطلع ..
وبعد ساعه بالكثير قضاها بالطريق ، وصــل .
والحين واقف ينتظر رحيل ..
شاف رحيل إللــي طلعت ، وصار يتبعها بعيونه إلـى ما ركبت ..
دخلت وسكرت الباب:"السلام عليكم .."
خالد:"وعليكم السلام .. كيف حالك يا رحيل .."
رحيل:"الحمد لله تماام ، إنت اخبـارك ..؟"
خالد وهو يحرك سيارته :"بخير الحمد الله .."
وسألها بعد ما طلعوا من الحيّ :"وين تبين ..؟"
رحيل:"سوق الـ×××× ولآ عليك آمر ."
خالد:" تـامرين امر ."














» //


طلع من جناحه .. ودخل بـالجناح إللي بجنب جناحه ، وشاف غرفة اخته فاتحه .
طرق الباب مرتين وانتبهت عليه :"هلا بـ رئوود ، تو مانورت الغرفه ."
ابتسم :"منوره بوجود صاحبتها ."
ناظر بـ غرفتها إللي محيوسه فوق تحت ..
واكياس وشكلها راجعه من السـوق .
رائد:"وش هالحوسه .؟"
آسيـل وهي تناظر بـ غرفتها :"ههههههههههه توني راجعه من السوق ( ناظرته ) ولا يمديني ارتبها هالحين لأن عندنا ضيوف ."
رائد بأستغراب:"ضيوف .؟ "
آسيل:"إيه .. ام فارس وبنتها فاطمه وبنت فاطمه شهد ."
رائد وهو يتذكر شهد إللي امه تبيها له ،قال وهو عاقد حواجبه:"اها ، طيب شوفي لي طريق ابي اطلع .."
اسيل:"طيب ، مشينــا .."
نزلوا رائد وَ اسيل .
وقالت له اسيل وهم بنص الدرج :"إنت وقف هنا ، وانا بشوف فيه احد بطريقك ولا لا.."
هز راسه ، وهي نزلت ..
ورجعت له بعد عشر ثواني إللي قضاها رائد وهو يعدل غترته :"يلا ما فيه احد .."
نزلوا ،،،
هي راحت للصاله ..
وهو ما طلع من الباب الرئيسي لا ، طلع من الباب الثاني إللي يمر من عند المطابخ .
وتوه فاتح الباب بيطلع ماشاف إللي قدامه لأنه منزل راسه ..
شهقت بخرعه لأنها واثقه بإن ما فيه احد ..
رفع راسه وشاف وحده لابسه عبايه وشيلتها على اكتافها وشعرها مفتوح ويوصل لأكتافها ، ومعاها كاسه ماي ..
هو ماله مجال يُمر ، وهي مالها مجال تمر ..
رجعت هي للمطبخ ..
وهو طلع وركب سيارته بس ما شغلها ..
مين هذي الغريبه إللي طالعه من المطـابخ ولا فكرت بإن البيت فيه شباب ويمكن بأي لحظه يطلعون بوجهها ..
( تذكر الضيووف )
لايكون هذي شهد بنت فاطمه إللي امي تبيني اتزوجها ..
والله لو على جثتي ما اتزوج لاهي ولا غيرها ..!




.،.،



اما هي بعد ما راح شربت نص كاسة المويه إللي بإيدها إللي طالبتها منها ام فارس بعد ما سألت ام رائد إذا فيه احد بـالطريق .
بس ام رائد قالت إن مافيه احد ..
[ ام رائد قالت كذا تعمْد لعل وعسى رائد بالصدفه يشوف شهد ويلين راسه ]
طلعت شهد من المطبخ بعد ما حطت شيلتها على راسها ودخلت ..
دخلت للصــاله .
ام فارس:"شهد يمه وين الماي ابي آكل علاجي ..؟"
شهد إللي متلخبطه:"هــااه .. اي صح نسيته .."
اسيل كانت منصدمه لايكون رائد شافها والبنت تلخبطت ونست المـاي !
وقفت اسيل:"انا بروح اجيبه ..؟"
مرت اسيل من جنب شهد اللي مسكتها وقالت بهمس:"تعالي فيه احد من شوي بالبيت ..؟"
اسيل:"ايه اخوي رائد بس طلع اخذي راحتك .."
طلعت اسيل ..
وقالت شهد بصوت واطي ما خفى على ام رائد:"يـااافشلتي .."


















» // بيت أبو سعــود



كانوا جالسين بالصاله و لمى جالسه معاهم وتنتظر الدانه إللي ما نزلت وأول مرة يزورونهم وما تنزل ..
لمى:"خالتي ، ويـن الدانه ..؟"
ام سعود:"فوق ، روحي لها .."
وقفت لما واخذت شنطتها وطلعت .
وصلت للجناح ، ودخلت وشافت الريم إللي ما تبلعها خير شر ..
لمى:"اهلييييين بـ رموو .."
الريم ( الله يقطعك ، قال رمو قال ، يعلّك المااحي يالمايعه ! )
سلمت عليها الريم ببرود .
لمى:"كيفك ..؟"
الريم:"وش تشوفين .."
لمى:"اشوف بإن مافي احلى منك ( وهي تمد سبابتها ) بنشااطك طبعـاً .."
الريم وهي تروح:"قولي مشاء الله ، ترى عارفتك عيونك حااره .."
وطلعت الريم من الجنــاح ..
ولمى ودها لو تقتل الريم بس ما بيدها شي ، ع الأقل تتقرب منها هالحين بعدين تعرف شلون تتصرف معهـا !
دخلت على الدانه وهي تطق الباب طقه :"مفااااااااجـأه ..!"
الدانه إللي كانت جالسه قبال الاب توب ، وقفت وهي تحس إنها مو مثل أول لما تشوف لمى كيف تفرح ..
الحين تحس ببرود بكل شي :"هلا والله لمى .."
لمى سلمت عليها:"اخباارك .."
الدانه:"تمام .."
جلسوا ..
وكل وحده ساكته فيهم بعدين قالت لمى :"تصدقين انا قلبي ابيض ، لأني زعلت عليك ورضيت من نفسي ، وإنتي حتى ما رفعتي علي السمااعه .."
الدانه :"تعباانه هالأيـام ، ومالي خلق لشي .."
لمى:"حتى انا ..؟"
الدانه :"يوة يالمى ماقلت إنتي ، بس اقولك إني مالي خلق لشي وانتهت السالفه .."
قبل لا تتكلم لمى ، رن جوالها الا وهو حمد .
الدانه :"إذا هذا الززززفت إللي إنتي تكلمينه ، لا تردين عليه وإنتي في بيتنااا وبغرفتي بعد .."
لمى:"الدانه وش فيك ، يعني بياكلك هو ، بكلمه شوي وبسكر .."
اخذته الدانه بقوه وضغطت الزر [ الأحمر ] :"لا ما راح تردين عليه ، وإذا إنتي تبين تكلمينه انتظري لما تروحين لبيتكم وكلميه براحتك ."
ناظرتها لمى وهي رافعه حاجب ، وسكتت ..















» // في مجمع الـ×××××


طلعت هي واخوها من المحل ومعها اكياس ..
رحيل:"اففف تعبت .."
اخذ منها خالد نص اكياسها :"تبين نجلس شوي ..؟"
رحيل:" لا لا ماباقي شي اصـلاً .."
خالد:"طيب دام ما بقى شي خلاص اصبري ( وشاف شخص مو غريب عليه ) اووه هذا طلال ولد عمي ومعه وحده من اخواته اظــن .."
خالد قال جملته وهو يتمنى بإن هذي هند إللي مع اخوها مو هنادي ..
طلال إللي ابتسم لـ خالد ومشى لناحيتة :"حي الله خـالد وش جايبك هنا ..؟"
خالد:"الله يحييك ويبقيك ، ابد جاي مع رحيل .."
طلال:"اها ( ناظر بـ رحيل اللي واقفه بعيد شوي ) كيف حالك يابنت العم .."
رحيل:"بخير الله يسلمك ، انت كيفك ..؟"
طلال:"الحمد الله بخير ( ناظر بـ خالد ) اقول خالد وش رايك نترك البنات مع بعض ، وخلنا نتمشى أو نشغل نفسنا على بال ما يخلصون ، والله إني حااس بدوخه من هـالهند .."
خالد ( يالبى قلبها بس ) :" طيب يلا ..( وناظر رحيل ) متى ما خلصتي اتصلي علي ( كمل وهو يرفع اكياسها إللي بإيده) وهذي بوديها للسياره .."
رحيل ابتسمت بحب من ورا الغطى وكـأن اخوها يشوفها :"طيب .."
راحوا الشباب ، وجات هند إللي ترجف وتتوعد بطلال ، مشت لناحية رحيل:"سلآم .. "
ابتسمت :" هلا والله ،، وعليكم "
هند :" اخبارك .."
رحيل:"تمام ، إنتي اخبارك ..؟"
هند:"تماام بشوفتك ، اشوى إني شفتك مشتااقه لك ياالقااطعه .."
قالت رحيل:"ههههههههههه حرام عليك ، بتجربين إللي جربته إذا انشاء الله تزوجتي .."
هند وهي تضربها على كتفها بشويش بأحراج واضح:"مالت عليك ، خلينا بس نخلص ترى بموت من التعب .."














» //

دخل البيت بعد ما تأكد بإن ما فيه احد ، و إن الضيوف موب فيه ..
دخل الصاله وشاف امه واخته :"السلام عليكم .."
:"وعليكم الســلام .."
جلس بتعب وسند ظهره وصدرت منه آهه تدل على تعبه ..
اسيل:"رائد وش فيك تعبان ..؟"
رائد وهو للحين مسكر عيونه:"همم ( فتحها ) لا ما فيني شي تعب خفيف وبيروح .."
ام رائد:"لو اهو متزوج الحين يمكن تريحك زوجتك وتعيشك على كفوف الراحه .."
رائد وهو يسند كوعه على ركبه ويشبك إيدينه في بعض:"ردينا .."
ام رائد:"ولا راح اسكت منك لاني واثقه بإنك راح تسمع كلامي ( ابتسمت ) الا إنت ما شفت القمر شهد . ؟"
رائد:"من شهد ..؟"
ام رائد:" لا تسوي نفسك ما تدري ، اليوم ما شفتها عند المطبخ .."
رائد عقد حواجبه وتذكرها:"لا يكون تقصدين البنت اللي اليوم عند المطبخ ولا بسه عبايه ومدري شلون صاير شكلها ..؟"
ام رائد بفرح:"إيه هي .."
رائد:"بالله هذي تستحي ولا وش..؟"
ام رائد بخرعه :"ليــــه ..؟!"
رائد:"مـاخذه راحتها في البيت مـا كأن فيه شباب والمشكله الشيله حاذفتها ، و لو تغطت كان ما قلنا شي ."
ام رائد:"وهي وش يدريها البنت انا قلت لها بإن البيت ما فيه احد ."
رائد:"وإنتي تدرين إني موجود .؟"
ام رائد:"إيه ادري .."
رائد:"طيب مو حرام عليك ......"
قاطعته:"وهالحركه تعمد مني ، لأني ابيك تشوفها ومتـأكده بإنها عجبتـك."
رائد:"وإللي يقولك إنها ما خشت مزاجي ولا راح تخش مزاجي ."
ام رائد بعصبيه:"بتخش مزاجك لا خطبتها لك ."
دخل على هالصوت إللي يمكن يعلى :"وش سالفه صوتكم واصل لأخر شارع .؟"
رائد :"اكيد بيوصل دام أمي حاطه براسها إني اتزوج من ورا خشمي .."
هيف ناظر بإمه :"يمه ،، الزواج مو بالغصب تبينه يظلم بنت الناس معه وهو مايبها ومو متقبلها ، خليه إلى ما تطق براسه فكرة الـزواج .."
ام رائد:"أنا ادري من يبي وأدري جلسته كذا متكتف عشان من ، ولـكن شيلوا من راسكم بإنكم تتزوجون من بنات اعمامكم ، واحلموا ."
وقف رائد:"اجل تحملي جلستنا ، وزواج ما راح نتزوج الا من بنات اعمامنا .. وهـ البنت إللي تبيني اتزوجها لو على جثتي ما اتزوجها ."
وطلع من الصـاله ..
ام رائد:"هين يا رائد هيــن ! "
طلع هيف من الصاله وهو يهز راسه يمين وشمال بأسف ..
وطلع على غرفة رائد وطق الباب وسمع صوت رائد :"ادخلي .."
دخل هيف راسه:"ادخلي هاا ..؟"
رائد ابتسم:"اسف والله على بالي اسيل ، اصـلاً من متى إنت دخلت غرفتي ..؟"
هيف وهو يدخل ويسكر الباب وراه :"ههههههههه سخيف ( جلس بجنب رائد ، وحط إيده على ركبة رائد ، وقال بهدوء ) رائد لا تشيل على خاطرك من الوالـده ."
رائد تنهد:"مو إنت شفت شلون تبي تزوجني بالغصـب ،، وأنا مليون مره قلت لهـا زواج مابي اتزوج .."
هيف إللي عارف ليه رائد رافض فكرة الزواج :" إنت لا تفكر كثير ،، ولا تنسى بإن احنا كلنا واقفين معك ، ونحاول نلين راسها .."
رائد:"إللي قاهرني إنها ما تبينا نتزوج من بنات اعمامنا ،، طيب ليه ..؟"
هيف تنهد:"مو إنت عارف ليش .."
رائد:"الا عارف ، بس ليش هالكره ، هم وش سوو لها .. هه والله أمي غريبه عليها طلعات ما أدري وش تبي صراحه "















طلعوا من المجمع ..
ورن جوال رحيل :"هلا خالد ........ وينك .؟ ......... اها .......... اي اي شفتك .......... هاا إيه معي ...... اها طيب ......... مع السلامه "
بعد ما سكرت رحيل قالت لـ هند :"يقول خالد إن اخوك طلال الحين مشغول ، وقال لـ خالد اخوي نوصلك بطريقنا .."
هند بخرعه:"من جدك إنتـــي .؟! حسبي الله على بليسك ياطلاااال ، يا فشلتــــي .."
رحيل:"هند ! وش فشلتك عاادي هذا أخوي خالد يعني ولد عمك مو غريب ( وهمست ) وزوج المستقبل ههههههههه.."
هند وهي تضربها بفشله:"يووة يا رحيل ترى والله مالي خلق لك ."
رحيل:"امشي تأخرنا على خالد .."
مشت معها هند مستسلمه ..
وركبوا سيارة خالد إللي ينتظرهم وهو بيطير من الفرحه وما صدق يوم طلال قال له إنه مشغول وبغى يضمه من الفرحه ..
:"السلام عليكم ."
خالد:"وعليكم السلام .. تو ما نورت السياره .."
رحيل اللي بجنبه قالت بهمس:"صدق والله .."
خالد مرتبك وزاد ارتباكه لما ركبوا :" ههههههههههه دمك خفيف يا رحول ( التفت على ورا وناظر بـ هند إللي جالسه ورا رحيل وهو حاس إن الدنيا كلها تسمع دقات قلبه ) شخبارك ياهند عساك طيبه .."
هند إللي حست إنها نست الكلام ويالله تكلمت:"....... آآ .. بخير الله يسلمك .."
خالد من قلبه:"عسى دووم .."
ناظر فيها ويحاول يشبع عيونه من شوفتها وهو يدري إن عيونه ما راح تشبع من شوفتها .
اما هي بعدت نظرها وهي تحس إنها بتموت من الرجفه ..
بعد خالد نظره وناظر قدام وصدرت منه تنهاده صغيره ما خفت على رحيل إللي رحمته ..
وصـل لبيت عمه أبو متعب ودخل السياره للحوش ووقف..
ونزلت هند:"مشكور خالد الله لا يهينك .. تعبتك"
خالد:" العفوو ، وما تعبتيني وولا شي تعبك راحه .."
هند همست:"تسلم ."
طبعـاً خالد ما سمعها ، ولكن سمع همسات منها وما يدري وش قالت ..
قالت هند وهي تهمس لـ رحيل :"يلا مع السلامه ."
رحيل:"مع السلامه يا قلبي.."
سكرت هند الباب بعد ما اخذت اكياسها ..
ومشى خالد ..
دخلت هند البيت وما حصلت احد بالصاله ..
وطلعت لفوق وهي تحس التعب اللي تحس فيه بالسوق تلاشى من يوم شافت خالد .
دخلت غرفتها وشافت هنادي اللي متمدده ع السرير وفزت يوم شافت هند .
هنادي:"هلااا والله هنوو هلااااااا والله بخيتو ، وش هالتأخير .."
هند وهي ترمي الأكياس ورمت نفسها بـ السرير :"ااااااااااه يا هنووده ما تصدقين منهو اللي وصلني للبيت ."
هنادي وهي تروح للأكياس ، وقال بلامبالاه :"مــنْ ..؟"
تنهدت:"خالـــد ."
هنادي وهي تناظرها بقوه وطلعت عيونها:"جد والله ، هاا وش قالك .؟"
هند:"ما قال شي غير شلونك شخبارك .."
هنادي:"اهاا ( رجعت نظرها لـ الأكيـاس وتفتحها ) اقوول ماجبتي الأغراض إللي ناقصتني ..؟"
هند:"لا والله ، ويوم جيتك وقلت لك تروحين معي قلتي لا تعباانه ، وانا يالله خلصت اغراضي ."
هنادي:"زين زين كليتيني .."

















» // بيت أبــو سعود ..


كان جالس مع خالته وامه وأخته الريم .
وبعدين دخلت رحيل وحطت أكياسها على جنب ودخلت عليهم ..
رحيل:"السلام عليكم .."
:"وعليكم الســلام .."
راحت وسلمت على ام محمد:"شلونك خالتي."
ام محمد:"بخير الله يسلمك ، إنتي وشلونك .."
رحيل:"تمام الحمد لله .."
راحت وباست راس ام سعود:"وشلونك خالتي.."
ام سعود:"بخير يمه .."
راحت رحيل وجلست بجنب الريم إللي جالسه بجنب سعود ..
ووقف سعود:"يلا استأذن .."
ام سعود:"وين ..؟"
سعود:"بروح ارتاح تعبان .."
طلع سعود وراحت رحيل وراه بعد ما قالت:"عن اذنكم .."
واخذت اكياسها ومشت ورا سعود إللي يطلع الدرج وتوهم واصلين الدور الثاني ..
شافوا بوجههم لمـى إللي عفست رحيل وجهها يوم شافتها ..
لمى وهي حاطه اللثمه :" هلا والله بسعود ، شلونك ووش اخبارك "
سعود ناظرها:"بخير الله يسلمك ..إنتي وشلونك ."
لمى:"تمام بشوفتك " قالت جملتها وهي تناظر بـ رحيل .
مشى سعود ..
وقالت لمى تبي تسمع سعود:"هلاا والله برحيل والله إني اشتقت لك .."
وراحت سلمت عليها، وناظرت لمى وراها وشافت سعود دخل الجناح ، وناظرت بـ رحيل ورفعت حاجب ..
ومرت من عندها ونزلت ..
اما رحيل ما تدري ليش تكره هالمى ، ولما عرفت إنها تحب سعود كرهتها زيااده ..
وكرهتها زياده من حركتها إللي من شوي .
راحت رحيل ودخلت الجناح ، وشافت سعود اللي جالس وساند ظهره ومسكر عيونه ..
مشت ودخلت غرفتها ونزلت اكياسها ودخلت الحمام ( الله يعزكم ) وتحممت بسرعه وطلعت ..
ولبست بيجامه وااسعه ، وطلعت لـ الصاله .
شافت سعود للحين على وضيعته ..
وجلست جنبه وحست بإن فيه شي :"سعود فيك شي .؟ ( حطت إيدها إللي ترجف على جبينه ، كملت ) وش حاس فيه ..؟"
سعود اللي حس إنه نسى الدنيا من إيدها اللي على جبينه ، مسك إيدها وحطها على عيونه :"ابي انسى يا رحيل ابي انسى .."
رحيل برجفه:"وش اللي تبي تنساه ..؟"
سعود بهمس:"ابي انسى رغد الخاينه .."
رحيل عقدت حواجبها:"رغد الخاينه .؟"
سكت سعود وتذكر لما شك برغد ، ولكن حاول إنه ما يشك فيها ، وشك فيها مره ثانيه وثالثه ورابعه ، وعشان يريح ضميره ..
راقبها يوم من الأيام وشافها تنزل من سياره السايق وتركب مع واحد ، وعرف منهو هـ الواحد ..
هالواحد طلع يشتغل عنده بالشركه..
قال سعود:"رغد ، زوجتي الأوليه حبيتها حب ما أظن إن فيه احد حب زوجتة مثلي ، يمكن من كثر ما حبيتها حسيت بذا الشي .."
حست رحيل بالغيره وياليت هالحب لها مو لـ رغد ..
كمل سعود وهو يتنهد :"سنتين كامله عيشتها بجنه ولا أظن انها عاشت هالحياه من قبل ، شكيت فيها اكثر من مره ، وعشان اريح ضميري راقبتها وشفتها تركب مع واحد ، وهالواحد من افضل الموظفين عندي ."
شهقت رحيل ..
وسحب سعود إيد رحيل اللي الى الان على عيونه وظلت إيد رحيل بإيده :"وعاقبتهم اثنينهم ، هو كلفته بإشياء ما يقدر عليها وعقبها طرته من الشركه قدام الموظفين ، وهي طلقتها بعد ما رويتها نجوم الظهر .."
نزلت دموع رحيل يوم لمحت لمعه في عيون سعود وشكله سرح بالماضي ..
ناظرها سعود وعقد حواجبه ، ومسح دموعهــا بـ إبهامه ، وقربها منه وباس جبينها .
بعدها منه وناظر فيها شوي ..
وقف ومشى ودخل الغرفه بدون ولا كلمه ..
اما هي صارت ترجف ومو مصدقه إن هذا سعود إللي من شوي ..
وأول مره يفتح قلبه لها ، ويقول وش سبب طلاقه لها ..
وحست إن سعود يوم يصدها ويحاول إنه يبتعد عنها إن هالشي سببه رغد ..
هذا كان فضولها ..
وحست إنها حبت واحد عطى قلبه اغيرها وما عرفت تحافظ عليه ..
ومن عقبها ما رضى يسلم قلبه لأحد ..
بس لو سعود معطيها هالحب ما سوت إللي سوته رغد ولا نص اللي سوته حتى ..
ولو رغد حمدت ربها ع النعمه احسن لها من خيانتها له ..
تمددت ع الكنبه ، ومع افكارها نامت بدون ما تحس من التعب ..







تمدد ع السرير وهو يفكر برحيل إللي يحس ويمكن حبها ..
وما يدري ليش قالها هالكلام إللي ماقاله لأحد ..
مابي احبك يا رحيل وما ابي انصدم فيك ، انا خذيت درس عمري ما راح انساه .
لمسه من إيدك يا رحيل خلتني افضفض لك ، ودمعه من عيونك هبلت فيني ..
الله يستر منك يا رحيل صرتي اقوى مني ..
و اقوى من قلبي..!










¨ اليــــوم الثــــــآني ¨



بعد الفطور طلعت الريم فوق لـ رحيل ..
ودخلت الجنـاح وشافت رحيل إللي سلمـت ، وركضت لها وتربعت قدآمهــا ..
قالت رحيل وهي تبتسم وترفع جلال الصـلاه :"خير وش عندك .؟"
الريم:"يعني لآزم يكون عندي شي .؟"
رحيل:"إيــه ، عـآرفتك .."
الريم:"يعني غصب يكون عندي شي ، خلاص ما عندي شي ."
وقفت رحيل :"طيب اعصابك " ونزلت لمستوى سجادتها ولفتها ورفعتها فوق الطاوله .
وقفت الريم وتناظر بـ رحيـل ، ومشت معاها لـ الكنب وجلسـوا .
الريم :"أقول رحيل .؟"
رحيل وهي تناظر بـ أظافيرها :"همم ..؟"
الريم :"وش رايك يعني لو نطلع للسـوق وَ ......"
رحيل :"أنـا حسيت إن وراك شــي ."
الريم:"رحيل أمانه إمشي معي لـ السوووق ، ناقصتني شوية اغرااض وتوي اتذكرها .."
رحيل:"صــدق .؟"
الريم:"والله ."
رحيل:"بس أنا قلـت لك قبل الفطور إنــي تعبااانه وما فيني اروح ، البارح تعبت وتبيني اروح اليوم عشان اتعب اكثر ."
قبل لا تتكلم الريم انفتح باب الجنـاح ، ودخل سعود ..
ووقفـوا ..
ناظر فيهم:"السلام عليكم ."
:"وعليكم السـلام .."
مشى لنـاحيتهم ..
الريم :"هاا رحيل وش قلتي .؟"
ناظرت رحيل في سعود ، وهو عقد حواجبه :"قالت في إيش .؟"
الريم:"آآ .. أبيها تروح معي للسوووووق .."
سعود راح ووقف بجنب رحيل وناظرها:"وهي وش قـالت .؟"
الريم:"تقوول إنهـا تعباانه وما فيها ترووح ، والله لو إنها ×××× ما تعبت كثرها .."
ناظر في الريم ورفع حاجب ، وحـاوط إيدينه من ورا أكتاف رحيل :"أسم الله على زوجتي من ×××× هـ الشينه "
الريم وهي تعقد حواجبها وتتكتف وتضرب رجلها بالأرض بخفه بشكل سريع:"لا يكون رحيل احلى منها ..؟"
سعود ناظر بـ رحيل إللي منزله راسها وحـاس برجفتها،، وقربها منه شوي :"آحـلى من إللي جابها بعد ، وش رايك .؟"
الريم:"معليه ،، (ناظرها سعود وشوي وتطلع عيونه ، وقالت وهي تناظر بـ رحيل إللي قريبه من سعود كثير ) أقول أنا بروح قبل لا تجيب العيد .."
بعد جملتها ناظرتها رحيل و بققت عيونها ، بس رحيل لمـا شافت سعود إللي يناظرها ابتسمت بفشله وهي منزله راسها ..
طلعت الريم ..
وفكها سعود وتنهد لأنه يبي يبتعد عنهــا وما يبي يتقرب منهـا ،، و جلس .
رحيل:"انا بروح معها حرام من اليوم وهي تحـاول فيني إني اروح معها .. هههههه كسرت خاطري"
سعود إللي ما يبيها تجلس اكثر وما يبي يتهور بتصرفاته ، قال:"روحي ،، ترى إن زعلت مدري وش إللي يراضيها ، لأن طلباتها نادرة الوجود ."
ضحكت ، وراحت للغرفه ولبست عبايتها ، وطلـعت .
ما شافت سعود ، وأنتبهت لـ باب المكتب إللي تسكر ..
وعرفت إن سعود دخله ..
وطلعت ..
شافت الريم لابسه عبايتها ، ومعها الدانـه ..
الريم بفرح:"بتروووحين ..؟"
رحيل:"هههههههه إيه.."
الدانه وهي تظرب كتف اختها :" وانا مو ماليه عينك .؟"
الريم:"ماليتها ونص ، بس ابي رحيل تروح معنا .."
الدانه:"اقوول مشينا ، تأخرنا على الســايق ."






















* يتبع الجزءَ ،،

.،؛


.،؛،.،؛


.،؛،.،؛،.،؛،.،؛






* تكملة الجزءَ .،؛








» //

وصـلت لبيت عمها ودقت على هند :"هلا هند .......... إيه وصلت ............ ههههههه يلا خلك عند الباب .."
سكرت ونزلت من سيارة السايق..
وتوها واصله للباب شافته انفتح ابتسمت بس تلاشت بسمتها لما شافته طـلال .
يافشلتك ياليــان ،، حسبي الله علــيك يا هند ..
عقد حواجبه ، ونـاظر بالسياره إللي واقفه وعرف السياره ، وناظر بـ هاللي واقفه قدامه وعرفها من قصرها :"إنتي ليان .؟"
ناظرته ليان ، يمه شلوون عرفني :"إيه .."
طلال:"الله حيها ،، كيف حالك وشخبارك .."
ليان:"الله يحييك ، بخير الله يسلمك ، إنت شلونك .."
طلال:"تمام ، يلا استـأذنك يا بنت خالد .."
ليان :"اذنك معك .."
بعد مامر من جنبها طلال ، طلعت هند ..
هند:"يااااحي الله ليـــونه .."
ليان:"الله لا يحييك ."
هند سلمت عليها :"ليييه ؟!!"
ليان:"يختي انحرجت من اخووك."
هند وهي تظربها على كتفها :"مالت ، على بالي صاير لك شي يالشينه .."
طلعت هنادي بلبسها الأبيض و الأسود وشعرها اللي رافعته على فوق :"هلاااا والله بـ لنو ،، تو ما اظلم البيت "
ليان وهي تسلم عليها:"مظلم بوجودك يا عمرّي ..هههههه"
ظربتها هنادي بدفاشه على راسها مما خلا ليان تتمسك بـ هند .
هنادي:"اقوول يالمزيوونه ، وين اختك الخبله .؟"
ليان:"في البيت .."
هنادي:"ادري إنها في البيت يعني وين بتكون .؟ بالشارع ، المهم ليــه ما جات .؟"
قالت ليان لـ هند:"بسم الله وش ماكله اختك .؟"
هند بفلسفه:"تدرين رمضان والواحد كل شوي يصير جوعان ، فـ هنـادي حبت تغير فقالت تاكل التلفزيون بدال الفطاير و غيرها .."
هنادي وهي تظرب ليان :"سؤال سألته وما جاوبتي عليه .."
ليان وهي تمسك مكان الضربه:"يمه إنتوا وش سالفتكم اليوم ( ناظرت هنادي ) تقول كيان ما تبي تجي لأنها تبي تنام .."
هنادي:"معليه إن كان تبي تنام .."








» // مرّ هـ اليوم ، والأوضـاع على ما هي ..!







وَ ،،
جــا اليوم إللي ينتظرونه جميع المسلمين ..
فقــير ..
وَ ،،
غنـــــيّ ..

صغير ..

وَ ،،

كبيــر ..


•°• عيد الفطر •°•
..
فيه نــاس فرحـانين خالين من الهمووم .،
وَ ناس حــاولوا يفرحون زيّ إللي حولهـم .،
وَ نـاس يبحثون عـنْ أشخــاص معينين مشتاقين لهم ،.
وَ نــاس بعيديـن عن حبايبهم واهلهم وظروفهم ما سمحت لهم .،
و مهما كـانت الظروف بيكون أول ايام العيد غير عِـنْ الأيــام إللــي قبلها ،،،!

..


دخل البيت بـ ثوبه الأبيــض السعودي وَ الغتره البيضــاء ..
وشـاف اهله كلهـم جالسين ويسولفون ويضحكوون وباين عليهم الفرح ..
ابتسم عبدالله بحب وهو يناظر بـ اسرته إللي دعا من قلبه إن الله يخليهم له:"الســلام عليكم ، وعيدكم مبــارك ."
:"وعليكم السـلام ."
وسلم على اهله وعلى إخوانه وَ خواته ،، إللي يهنونه بالعيد ..
وهنادي تتميلح قدامه لعل وعسى يعطيها عيديه ، وهو سافطها ..
هنادي إللي جالسه جنب عبدالله وقالت بصوت عالي مما خلاه يفز:"يووووووة ،، ياخي حس ، حيوان إنت ما تحس ..؟"
عبدالله بصوت يقارب لمستوى صوتها العالي :"ليييه وش سويت .؟"
هنادي:"ياشيخ اخواني كلهم عايدوني إلا إنت ."
سند ظهره:"نوووووي ، لو تحتضرين قدامي بتموتين ما عطيتك ."
هنادي:"طيب ليه ، أنا اختك ،، حسسني بالأخوه ."
عبدالله:"بالأخوه هاه ،، مناك بس ."
هنادي:"اصلا انا من يوم شفت خشتك وأنا عارفه إنك مو معطيني شي ."
عبدالله رفع طبقة صوته :"داااامك عارفه يا بقره ، وشهو له تجين ،، كـان وفرتي على نفسك ."







» //




نزلــت بـ نفنوفها الأبيــض المطرز بالذهبي القصير والمدرج من تحت ، وكـان شكلها طالع روعه بالبسها الطفولي وشعرها إللي مسويته كيرلي ..ومكياجها الخفيف ..
شافت سعود وَ اهله كلهم جالسين حست بخوف مو طبيعي ومرتبكه خصوصاً هذا أول عيد عيدته مع سعود .
وإللي اربكها أكثر نظرات سعود المندهشه وإللي حاول يبين اللامبالاه بس ما قدر ..
رحيل قدرت عليه ، وصـارت أقوى منه ..
رحيل:"السلام عليكم .."
:"عليكم السـلام .."
سلمت على ام سعود وَ ابو سعود إللي عايدوها وبجنب أبو سعود الريم سلمت عليها وبجنبها الدانه ..
ماعرفت تسلم عليها أو وش تسوي ، شافت الدانه وقفت وابتسمت لها ، وابتسمت لها رحيل ..
وسلمت عليها ..
وبـاقي سعود ..
هذا إللي رحيل ماتبي تشوفه ، لفت وشـافته يناظرها وشافته يوقف ..
مشت له ، ومد يده وصافحته وسحبها وباس خدودها إللي توردت من الأحراج لما ضحكوا اهله ..
دخل إيده بجيبه وطلع فلوس ما تدري كم ، وحطها بإيدها :"عيدك مبارك ."
رحيل:"جعلك من العايدين .."
جلسها بجنبها وهي صارت ترص على الفلوس إللي بـإيدها من الأحراج والحراره إللي تزيد ..
انتبهت على الريم إللي تناديها :"رحيل وين رحتي ..؟ "
رحيل:"هـاه ؟ ،، ما سمعتك .؟"
الريم تناظر بـ سعود إللي يناظرها مبتسم:"أكيد ما تسمعيني داامـ......"
قبل لا تكمل ، ظربتها الدانه على يدها..
الريم وهي تتحسس مكـان الظربه :"آآآآي ،، الله يقطعك .."
وقف سعود:"يـلا استـأذن .."
ابو سعود وقف:"وأنا بعد ،، أخذني معك .."








» //
نزل وهو يعدل شمـاغه الأحمــر بخبره ،، وكـان البيت هـاديء ومافيه حس ..
اللهم يشم ريحة البخور إللي صـابغه البيـت ..
شـاف آسيــل إللي معها البخور ، اللي ابتسمت يوم شافته وجات لناحيته :"هلا والله ( باسته ) عيدك مبارك .."
رائد:"جعلـك من العايدين وجعله يعود عيدك قولي آميـن .."
اسيل :"اميــن وأشوفك مـ ....." سكتت !
رائد عارف وش كانت بتقول ، مسك راسها وقربها منه وباسه ..
يمووت على شي اسمه [ اسيل ]..وما يحب أحد يزعلها .. ويعتبرها بنته اكثر من اخته ..
رائد:"وين الناس ؟"
اسيل:"والله طالعين ،،؟"
قال بأستغراب:"طالعين .؟ وين إنشاء الله .؟"
اسيل:"امي راحت لـ صديقتها ام سامي ، وأبوي توه طالع .. و......."
:"وهيف هذا هوو نزل .."
التفتوا لـ هيف إللي متكشخ ولآبس الغتره البيضـاء ،،
[ طبعاً متفق هو وَ عبدالله وَ فهد ، يلبسون زيّ بعض كـ عادتهم بالعيد ]
باس رائد وَ اسيل :"عيدكم مبارك .."
اسيـل:"جعلك من العايدين .."
رائد:"طـالع .؟"
هيف:"إيه ،، ليـه .؟"
رائد:"عشان نروح أنا وَ إنت وَ اسيل لـ أحلام نعايدها .."
هيف:"خلاص اوكي ،، أأجل الطلعه "









بعدنــا شوي عِـنْ الريـاض ،، وَ عِـنْ المملكــه ،، وَ صرنْــا ..
» // بـَ دولة قطـــر ..

طلع من مجلس الرجــال ومن يوم جـا هو وأهله وهو يحــاول يشوفها بس ما قدر ..
طق باب الحريم وبعد منه شوي ،، وطلعت له الخدامه..
فواز:"نادي ماما رغد .."
هزت راسها يمين وشمال بالحركه الهنديه ،، وراحت ..
دخلت وشافت وفـاء ..
دارني:"ماما ،، هدا بابا فواز يبي ماما رقد ( رغد ) .."
طلعت عيونها وفـاء :"شنوو !! فواز ؟! "
دارني وهي ترفع حواجبها بخبث:"إيوه زوج مال إنتي ،، إنشاء الله .."
عصبت :"جب بس ،، روحي قولي له ماما رغد الحين عند حريم مشغوله .."
راحت دارني ،، وشافت فواز إللي شكله طفش من الأنتظـار ..
دارني :"بابا ..؟"
فواز انتبه لها وهو مفهيّ :" هاه وشو ..؟"
دارني:" هدا ماما رقد مشقوله الحين .."
فواز:"مشقوله هااه .؟ ههههه الله يقطعك من خدامه ،، هي قالت لك كذا .؟"
دارني:"لا ،، هدآ ماما وفـآ يقول قولي كِدآ ( كذا ) ."
طلع عيونه على طاريها وطار لها :"وش ! ماما وفاء ؟!،، يالبى قلبها بس ،، أقول هي وين الحين ؟؟"
دارني ضحكت وعرفت قصده :"في مكبخ ( مطبخ ) .."
فواز طار عقله وما صدق سمع طاريها :"يقطع هرجك يالشسمه ... المهم ،، طيب خلاص روحي .."
دارني وهي تدخل:"تيب ( طيب ) أنا في قول لماما وفاء ..؟"
وراحت ..
فواز جلس يناديها بس ماردت وصار يسب ويلعن فيها ،، والحين بتروح وتقول لها وتفضحه عندها ..
ياويلي ويلاااه ،، كله منك يا ذي الخدامه ،، تبي تطيحني من عين وفـاء ..
آآآآه يا وفـاء متى تحسين فيني ..؟ لا أنتي راضيه تريحيني ..
ولآ إنتي راضيه تشبعين عيوني من شوفتك ..
أنا خلاص ما فيني اتحمل اكثر ،، لازم اكلم أمي تخطبها لي ،، ولا جلستي كذا بتطيرها من إيدي ..



طلعت عيونهاا على كلام الخدامه المبالغ فيه ،، وإللي تحسها تكذب عليها ..
وفاء بلهجتها :"صج إنج ما تستحين على ويهج ،، لو تنتبهين لشغلج يكون احسن ."
وراحت خلتها ..
والخدامه ما همها الكـلام إللي قالته لها وفاء ،،
وصـارت تضحك على وجه وفـاء إللي قلب لونه من شوي ..!








» //

نطتْ من مكـانها ، وجلســت بجنب امها :"صــدق يممممه ؟! "
ام سلطان:"إيه ،، وَ الحين روحي لبسي وتجهزي ،، شوفي إختك راحت تتجهز .."
وقفت كيـان :"افــاا عليك إلحين اروح اتجهز .."
وركضت لفوق وهي تختصر كل درجتين بـ درجه !
ودخلت الغرفه وصـارت تحووس بـ دولابها وتحـاول تطلع أي لبس يناسب لطلعتهم ..
قـالت ليان إللي تناظر شكلها بالمرايـه :"وش تدورين عليـه .؟"
كيان:"اففف ،، أبـي لبسي الـ......."
ليان وهي تلف عليها :" ياغبييييه ، ولبسك هذا ليه تبين تبدلينه .؟"
كيان وهي تناظر لبسها القصير :"لا لبسي هذا ما يناسب المزرعه بالمره ( ناظرتها ) أبي بنطلون ، بلوزة ، يعني زيّ كذا ."
ليان وهي تلف عنها :"اها ،، طيب براحتك .. مع إني اشوف لبسك هذا احلى . "







» //
سكرت جوالها من هند إللي كلمتها من شوي ،، وماهي عارفه تروح أو لا ..
بس هي ما تبي تطوف هالجمعه .. بس محتاره تكلمه أو وش تسوي ..
اففف ما فيه إلا إني اكلمه وأشوف رايه ..
ودورت على رقمه ،، وأنتظرت رده ..
سعود:"هــلا .."
رحيل:"هلا فيـك ،، مشغول .؟"
سعود:"لا ،، وش بغيتي .؟"
رحيل:"من شوي كلمتني بنت عمي ، وتقول إنهم بيجتمعون اليوم بالمزرعه كـ العاده بالعيد وَ ......"
قاطعها:"إيه ، اخوك خالد من شوي كلمني ويقول إنه بيمرك على طريقه للمزرعه وياخذك معه ."
رحيل :"و إنت وش رايك .؟"
سعود:"أنا موافق ، لأني اليوم مشغول ، وحتى لو كنت مو مشغول وبجلس بالبيت ما راح احتاجك بأي خدمه ."
انجرحت رحيل من كلامه ونبرة اللامبالاه إللي بصوته ، وكـأنه يقصد بكـلامه إنها ما همته إذا كـانت موجوده أو لا .
رحيل بعد مـاطول سكوتها :".......... طيب مع السـلامه ."
سكر بدون لا يرد عليها .. وكأنه مو مصدق إنها بتقفل .
تنهدت رحيل بحزن وقهر من هـالسعود إللي ما عرفت له ..







» // المزرعــــه ؛؛ العصــــر


هنادي وهي تعلي على صوت المسجـل وما خلت اغنيه لـ موضي الشمراني الا وحطتها:"يلااااا بنات ارقصـوا ."
كيان وهي تحط إيدينها على إذونها الثنتين دليل على انزعاجها :"يوووه يا هناادي قصري فضيتي اذنــي !"
هنادي:" اول شي ارقصي ، بعدين اسكره مره وحده ."
قامت كيان وهي ترقص بعصبيه وهناادي تضحك على شكل كيان وشلون ترقص بقهر وعصبيه .
هنادي:"هههههههههههههههه كيوون ما تحسين انك خبله برقصك ذا ؟! هههههههههههه"
وقفت كيان رقص ، وراحت وطفت المسجل :" صدق إنك باااااااايخه .. جننتيني "
هنادي وهي تحط إيدها على بطنها :"امانه إذا تزوجتي اخوي ، ابـيك ترقصين رقصتك هذي قدامه ههههههههههههاااي .."
ليان:"هههههههههه عاد تخيلي شكل كيان وهي ترقص هالرقص قدام متيّـعب ..ههههههههههه"
كيان :"متيـعب بعينك !"
هند:"آووه تدافع الأخت .."
رحيل:"ههههههههههه حرام عليكم ، شوفوا وجهها شلون صـاير ؟"
كيان ناظرت فيهم بقهر ، وثم قامت وراحت منهم وهي تسمعهم ينادونها ، سفهتهم .
وطلعت فووق ،، ودخلت الجنـاح ..
اففف صدق ما عندهم ساالفه ،، الحين ما يفتحون موضوع الا ويجيبون طاري متعب .
مشت ووقفت قدام الشباك ، وبانت لها المزرعه كلها إللي كانت كبيـــــره .
وناظرت بقسم الرجـال إللي بان لها ..
فجـأه !
اعتدلت بوقفتها ، لما لمحت قفـى رجـال إللي كـان متكتف وكـأنه ينتظر احد ..
وثم طلع واحد من مجلس الرجـال وعرفته على طول لما بان وجه سلطان اخوها إللي كان يضحك مع هالشخص إللي ما شافت وجهه ..
وثم لف ، ومشى مع سلطان ، وعرفت إنه متعب ..
إللي هي منحاشه من البنات إللي يحرجونها بطاريه ، راحت للجناح عشان تختلي مع نفسها ..
ولكـن شافته ، وكل ماله يقرب اكثر ويبان وجهه أكثر ويبان ملامح وجهه الحـاده إللي يوصف شخصية صاحب الملامح هذي ..
لمّـا قربوا ، حست بقلبها إللي صارت تسمع صوته ، وبعدين انتبهت عليهم إنهم غيروا مسار طريقهم ..
ولفوا على جهه ثانيه ..
واختفـوا عن عيونها ..
واكتفت بتنهيده طــــويله ..








» //
كـانوا جالسين ويسلفون ويضحكون على أي موقف صار لهم بالماضي إللي كـان ابو متعب جالس يقول لهم عنهــا ..
عبدالله وهو ينـاظر بـ رائد بضحكه:"طيب ليه ما تقول لنا عـنْ رائد ( ناظر ابوه ) وش معنى تكلمت عنـا كلنـا إلا هو ؟"
ابو متعب ناظر بـ رائد وابتسم :" لأنه من يوم كـان صغير هو الوحيـد إللي ما كـان له حس ، هاديء ومسالم ، ولا يحب المشـاكل ، مو مثل بعض النـاس ."
عبدالله:"وش قصدك .؟"
ابو رائد :" ما قصده شي ."
عبدالله:"طيب ليه يقول بعض الناس ..؟ يعني يقصدني"
ابو متعب:"يعني إنت بعض الناس ..؟"
عبدالله وهو يعتدل بجلسته :" لا .. بس إنت قصدك إن رائد ما يحب المشاكل و مادري إيش ،، ومو مثل بعض الناس ، فـَ اكيد قصدتني من بعض الناس .."
ابو خالد :"و إنت راعي مشـاكل .؟"
عبدالله:"إنتـوا وش تشوفون .؟"
فهد:"نشوف إنك أكبر راعي مشـاكل "
:"ههههههههههههههههه "
خزه عبدالله ، وسكت .
رائد إللي جالس بجنب عبدالله ، بهمس:"شكلك حقدت علي ..؟"
عبدالله:"وبقووة .."
ضحك رائد ،، ووقف ..
عبدالله:"وين .؟"
رائد:"رايح اتشمى ،، تخاويني ؟"
عبدالله وهو يفز من مكـانه :"افـا عليك ."
رائد:"هههههههههه مو قبل شوي حاقد علي ، وش فيك قلبت ..؟"
عبدالله وهو يسحبه ويطلع معه :"هذاك قبل شوي ، مو الحين .."
صـاروا يمشون ويسلفون على بعض ..
عبدالله :"أقـول رائـد .؟"
رائد :"وش .؟"
عبدالله :"ليـه مــاتتزوج .؟"
نـاظره رائد [ حتى إنت يـا عبدالله تبيني أتزوج ]
كمل عبدالله :"يعني اشوف إن سلطان إللي اكبر منك بسنه تزوج ، وَ متعب بيتملك قريب ، وَ خالد وَ طلال بعد اشك إنهم ناوين ، وباقي إنت .."
رائد:" و إنت وش عليك مني ..؟"
عبدالله ضحك :" لأني بتزوج قريب وانا مابي اتزوج إلا لين تتزوج إنت .."
قبل يتكلم رائد ، رن جواله .
لصــق فيه عبدالله ولمح أسم آسيـل ..
رائد وهو يدزه وهو يضحك :" يـنعن اللقافه إللي فيك ( وراح بعيد شوي ، وحط السماعه عند اذنه ) هلا اسيل ."
تنهد عبدالله .. ونـاظر بـ رائد إللي يشوفه يتكلم بس ما يسمعه ..
[ أنا ما أحبك يـا اسيل ، بس آحس إني اميل لك ،، بس أنـا مـابي اميل لك ولآ ابي احبك ! ]








طلعت فــوق وهي قاطه الشيله ومـاخذه راحتها وكـأن البيت بيتها ..
وبتطير مـن الفرحه يوم عرفت إن رحيل موب فيه ..
وهي طلعت فوق لمـا شافت امها وخالتها يسولفون عن رحيل ..
وصلت وشـافت الريم إللي باين عليها طفشانه ..
لمى:" اووه الريم .."
ناظرتها الريم بطفش :" لا خيالها .."
لمى:"هههههههههه دمك خفيف .."
الريم:"اكيد ،، طالعه على بنت خالتي الـسـ.... آآ الـحلوة ."
لمى جلست جنبها :"طيب ليش مكشره كذا ، وش فيك .؟"
الريم:"رحيل راحت لـمزرعة اهلها ( كملت يوم شافت ملامح لمى إللي تغيرت ) وأنا طفشاانه لأنها مو موجوده ،، والله ما أتخيل البيت من دونهــا ."
لمى ( افف من هـ الرحيل إللي يسولفون عنها بكل مكـان ، فوق وَ تحت ) :" وإنتي وش عليك منهـا ،، يعني هي ما همها إلا ونـاستها ، يعني لو إنتي هميتيها كـان جلست عشـانك ."
خزتها الريم :" لمى ،، لاتحـاولين إنك تغيريني على رحيل إللي ماراح الاقي مثلها ولا حتى سعود بيلاقي مثلها ."
ووقفت الريم وراحت ..
لمى وقفت بقهر وهي تتوعد بـ رحيل ..
و جـات الدانه ..
وقالت لمى:"وين رحتي .؟"
الدانه:" هذاني قدامك ، ليه .؟"
لمى:" اففف من أختك هذي ، مدري وش شايفه بـ رحيل .."
الدانه ببرود:"ليه .؟"
لمى بقهر :" من شوي جيتها وشفتها طفشانه ، وسألتها وقالت لي إنها طفشانه عشان رحيل مو موجوده ."
الدانه:"وهي صادقه ."
لمى :"إيــش ؟!"
الدانه:"إللي سمعتيه ،، مـا ألوم الريم يوم تعلقت فيهـا ، لأن إللي بيجلس معها من اسلوبها بتتعلقين فيها .."
ناظرتها لمى بقهر وهي ودها لو تقتل الدانه :" أنا حسيت إنك بتتغيرين علي بيوم من الأيـام .. وجـا اليوم إللي تغيرتي فيـه .."
وراحت ..
وبعدهـا راحت الدانه غرفتها ،، ووقفت عند الشبـاك وتنـاظر بـ المساحه إللي قدام مجالس الرجـال ..
وإللي ما كان فيها احد ..
وشوي دخلت سياره وشهقت بصوت مسموع لأنها عرفتها ..
وقفت السيارة و نزل محمد منها ، وطلع جواله ، وشوي وحطه عند اذنه وصـار يتكلم بس ما سمعت وش يقول .
فتحت الشباك بسرعه وهي ما تدري ليش سوت كذا ، وسمتعه يقول:"....اكيد يمه ما فيه احد ........ طيب الحين بدخل ........ هلا "
رجع الجوال بجيبه ، وهي نست نفسها ..
وانصدمت يوم رفع راسه لها لأنه حس فيها ..
هي من الصدمه ما عرفت شلون تتصرف هو خلاص شافها وعرف إنها تناظره ، يعني حتى لو سكرت الشباك هو شافها وانتهت السالفه ..
ما رضى ينزل راسه ، وهي كل شي بجسمها مــات ..
نزل راسه ،، ومشى وأختفى عـن عيونهــا ..
وهي إلـى الآن تنـاظر بـالفضى إللي تركه محمد ..
سكرت الشبــاك بهــــــــدوء ،، وسندت ظهرها عليه ..
ونزلت دموعها ، وكـل دمعه وراها دمعه ..
مـاتدري ليه سوت هالتصرف ،، وليه تبي تسمع وش يقـول ..؟
مـاتدري ليه ما تصرفت لمـا شافها ، وليه من البدايه حطت نفسهـا بـهالموقف ..
ومـاتدري ليه دموعها نزلت ..
هل لأنها من الفشله إللي سببتها لنفسها ..؟
أمْ لسبب تجهلـه ..؟!





هو .. قبل لا يدخل على امه وخالته وقف شوي ..
وهو يفكر بـالي من شوي ،، عارف إنهــا الدانه ..
هو كل يوم ينـاظر بـ شباكهـا ..
[ بس ] مـا توقع إنه بيوم من الأيـام إنه بيشوفها تناظرها ، بس ليه تناظر فيه كذا ..
ليه نظراتها له مافهمها ..؟
هل كـانت تناظره بحزن .. أو خوف منه ، أو لشي ثـاني .؟!
دخل وهو يحـاول يطرد افكـاره ،، وولآ يفكر بـ الدانه إلحين .. بيفكر فيها لا صـار لوحده .







» // مثـل ما ابتعدنـا ، أقتربنــا مرةٍ آخـرى ،،!

دخلت عليه المجــلس ، وابتسمت يوم شافته وقف :"هلا والله بـ رغود ( باس خدها ، قال بمرح ) شحالج ."
رغد:"ههههههههههه بخير الله يسلمك "
سحبها وجلسها بجنبه :"وينك من اليوم وأنـا أحـاول في هـ الخدامه الله يقطعها تناديك .؟"
رغد:"والله كانوا هنا من شوي حريم وراحوا ، وقالت لي ( كملت وهي تبتسم ) وفـاء إنك تبيني "
شهق:"وفاااء !"
رغد:"اشش قصر صوتك لا تفضحنا ."
قال وهو يقصر صوته :" وش قالت لك .؟"
رغد:"ابد قالت إن الخدامه تقول لها إنك إنت تبيني .."
فواز بتنهيده:"يااالبى قلبها بس .."
ضربته رغد :"فواز ،، وش هالحركـات ؟!"
سحب فواز إيد رغد وباسها :"رغد طلبتك ،، كلمي أمي إني أبي اخطبهــا قبل لا تطير من إيدي ،، اماااااانه كلميها .."
رغد:"ههههههههه طيب طيب ، لا تشغل بالك ، أنا بكلم أمك ولا راح نرجع لـ السعوديه إنشاء الله الا و إحنا خاطبينهـا ."
فواز:"الله لا يحرمني منك يالغاليــه ."



كـان فيه طرف آخر يسمع الكـلام إللي دار بينهم ، حست بحراره مو طبيعيه ثارت بجسمها ..
لمـا سمعت فواز كيف يتكلم عنهـا وباين عليه إنه يحبهاا ..
ركضت لـ غرفتها ودخلتها ، ودخلت عَ الحمـام ( الله يعزكم ) وغسلت وجهها واخذت نفس وتحـاول تهدي نفسها ..
طلعت وجلست على سريرها ، وغطت وجهها بين كفوفها ..
مـاتدري وش صار فيها لمـا سمعت الكـلام إللي من شوي ..
وهي كـانت ماره وسمعته ، و وقفت بس تبي تسمع فواز وش يتكلم عنه ..
بس فرحت لمـا قال هالكـلام .. وعرفت إنه يحبها ،، ويبي يتزوجها بـأقرب وقت ..
هـ الكلام إللي سمعته ريحها كثير ، وعرفت إن اعجابها إللي تحول إلى حب مـا راح لـشخص ما يبيها وما يفكر فيها ..
لأنها ظنت هالظن ، إنه أكيد ما يفكر في وحده ما تقرب له إلا من بعيــد ..
تمددت وهي تغمض عيونها وَ ارتسمت على شفايفها ابتسامه اظهرت من تلقـاء نفسها ..






بعد مـا الدانه دخلـت جنـاحها هي للحين واقفه عند الدرج كـانت بتنزل تحت لكـن ..
هي إلى الآن بـراسهـا فكره بس للحيـن مـاخشت مزاجهـا ،، بس هي دارستها عدل ..
ومـاعرفت تنفذهــا أو لا ..
ناظرت في جنـاح سعود ورفعت حاجبها بخبــث !
ومـشت بهـدوء وحـذر وهي تترقب المكـان ..
الدور الثـاني مـافيه أحد ..
فكرت ..
يـالمى ليه ماتسوين بـاللي في راسك وتروين رحيل إللي إنتي واعده نفسك عليه ..
جـا الوقت إللي تنفذين إللي براسك ، وتـاخذين سعود منهـا مثـل مـا أخذته منك ..
شيكـت ع البـاب وغمضت عيونهــا وفتحتهـا بهدوء لمـا شـافت البـاب انفتح لهــا .
نفثت ،،، ودخـلت بهدوء وهي تنـاظر بالجنـاح إللي ماليها ريحـة عطر نسـائيه ..
افف من هـ الرحيل اللي مـا أدري متى ارتـاح منهـا ..
سكرت البـاب بهـدوء ..
وطلعت الجـوال من جيبهــا ، ونـاظرت فيه وابتسمت بخبث ..
[ جـوال جديد خـالي من كـل شي ، بس مـا يخلى من صور وغيرهـا من الفيديوات ! ]
نـاظرت بالجنــاح ومـاعرفت وين تحطه ..
نـاظرت بالغرفه المسكـره ومشت لها بسرعه وفتحته .. بس مسكره ..
نـاظرت بالصـاله ، ومشت لنـاحية الكنـب ..
ونـاظرت بالجـوال ، وحطه بين الخداديـات السفليه ، بس يبـان [ جزء ] من الجوال ..
ومشت للبـاب ، وفتحته بهـدوء وهي خـايفه ..
ومـا شـافت أحد ، طلعت وسكرت الباب وصدر صوت منه وغمضت عيونها ..
فتحتها ما شافت أحد .
نفثت بــراحه ..
ومشت ، بس وقفت بخرعه يوم شافت الدانه إللي طلعت من جنـاحه ومنزله راسها ..
حست في لمـى ورفعت راسهـا ، نـاظرتها بشك وَ استغراب .
ونـاظرت بـ جناح سعود إللي كانت لمى قريبه شوي من الباب .
والدانه من شوي سمعت صوت بـاب يتسكر .
عقدت حواجبهـا ..
وقالت لمى بسرعه :"يلا مع السلامه .."
ونزلت بدون ما تسمع رد الدانه إللي إلى الآن وهي ودهـا تعرف وش ورا لمـى ..
نـاظرت بالجنـاح المسكر ..
وسمعت الأصوات إللي تصدر من تحت ..
وسمعت صوت محمد إللي كـان يضحك وقـال :" ........ يلا خالتي فمـان الله "
بعدهـا رجعت على غرفتها وقفلت الباب عليها ..






» //
:"يــاا فهد .."
فهد وهو يناظر أبوه :" سمْ ."
ابو خالد:"سم الله عدوك ، روح جيب القهوه .."
فهد وهو يفز :"ابـشر "
طلع فهد من المجلس ،، وصـار يمشي متجه لـ الفله وهو يدندن ..
وصل لـ المطبخ إللي كـان بابه برى الفله ..
دخل وهو للحين يغني ..
وسمع وحده شهقت ..
وَ التفت لها ..





*؛*؛*؛*؛*؛؛*؛*؛؛*؛*؛*؛*؛؛*؛*؛*؛*؛؛*؛*؛*؛*
انتهى الفصـل السابع عشـر..~
انتظر ردودكم بكل شوق ،،


مع تحياتي ،،
&...آهــــوآگ...&
أو
&... صــاح’ـبي يــا ح’ــبني لـگ ....&
*؛*؛*؛*؛*؛؛*؛*؛؛*؛*؛*؛*؛؛*؛*؛*؛*؛؛*؛*؛*؛*

مشكوووووووووووره يالغالية
أحلا باااااااااااارت تسلم أيدج
أن شاء سعود يكشف مخطط لمى وماتخرب حياة رحيل
وياليت تعدلي أسلوب سعود مع رحيل
وننتظرج لا تتأخري علبنا
بلييييز

تسلمين حبيبتي عالبارت

سعود ورحيل

زين بد قالب الثلج يذوب خخخخ .. بس الدبة لمووو بتخرب عليهم .. اتوقع يلين قلب سعود اكثر لرحيل بس لما يشوف الموبايل يقسى عليها .. عادي توصل للطلاق .. وخلاف دانه تذكر سالفة لمى وتقول ويردون حق بعض


هند وخالد .. كيان و متعب

يلا متى بتعرسون تعبت وانا اتريا

ليان و طلال

اتوقع طلال يخطبها .. هومب معرس صح ولا جان مب هو هيف بياخذها

الدانة و محمد

بس يلا وافقي عليه لين مت يعني بتمين جي تراقبينه واونج ما تبينه



عبدالله واسيل

يلا يا ريال اخطبها وريح عمرك بدال الابتسامات اللي توزعها

فهد و ..........


اتوقع اللي في المطبخ ........... هنادي


رائد

تصدق انته امعور لي قلبي شرايك سعود يطلق رحيل وانته تاخذها وخلاف يكتشف سعود انه غلطان وياخذ رغد مرة ثانية عقابا له


لا تطولين علينا

نتريا يديدج