.
.
صباح \ مساء ~ دهن عود كمبودي .!!
ـآااافـا ياعرب ليلاس آحبطتوني ..
انزين دخييل الله راضيه بالنقد بس حطو رد ـآفرح ..
عموما بحط الجزءالثاني وانشاء الله يعجبكم ..
.
.
( $ ) صــورة ..
أدقق في صورك الأن ... أبحث عنك بها وكأني لا أعرفها ..
أقلب الصور بكل الاتجاهات ... لم تتغير الملامح بالصور..
تغير الإحساس بها .....!
.•.* الغصــة الـثـانــيـه *.•.
( $ ) ما حكايتك أيها الموت معنا..؟! أي ثار يقتصه الحزن منا..؟! لماذا ينتقي الحزن الأعياد والأفراح ليخطفهم من بيننا..؟! ليفاجئنا برحيلهم..؟! ليسرق طعم الفرح من أيامنا..؟! ما أقسى الموت يا موت..!! وما أصعب الفراق يا
فراااااااااااااااق..!!
ثاني أيام العيد , الموقع بيتنا كانت المفاجأه أكبر من إنا نصدقها خبر شل كل اللي فـ البيت من الحركه , خبر هزنا كلنا من أمايه لين أنا , "أبوويه" الغالي غاب عنا.. آآآآآه غاااب بعد يومين بالضبط من عقب ما أنحلت المشكلة اللي بينه وبين أمايه وخواني , طبعا وبدون نقاش خواني وقفوا في صف أمايه بـ التغاضي عن منو اللي عنده الحق..أنا عن نفسي كنت محايده بس بصراحه أميل أكثر لـ باباتي, و بما إني آخر العنقود فـ من الطبيعي أكون دلووعته وغلااه.. كان الله يرحمه دوم يزقرني غلاااي..غاب الغالي عقب ماترضى هو وأمايه وخواني..غاب عقب يومين بس يومين من أنحلت المشاكل اللي بينهم.. أنا أكثر وحده متعلقه فـ باباتي ( الله يرحمه ) كنت أقرب وحده له حتى إني أقرب له من أمايه بعد ماتطالقوا.. هيه هيه لاتستغرب باباتي مطلق أمايه من سنتين تقريباً وبناء على مرضه قعد فـ الملحق اللي برا هو والممرض اللي يابوه عشان يعرف يهتم فيه, كان الله يرحمه مريض بـ السرطان ( بعيد الشر عنك ).. كانوا خواني الله يسلمهم واقفين فـ صف أمايه بكل معنى الكلمه , متحاملين ع باباتي وليش؟! أنا بقولك لانه قبل مايستوي الطلاق كانت فيه مشاااااااااااااااااااكل وااايد كبيره بين باباتي ( الله يرحمه ) وأمايه , الصراحه أنا ماعرف شيء منها ولا يدخلوني بموجب سني الصغير فـ نظرهم .. "الطلاق" مامنع المشاكل من الاستمراريه وازديادها , مع ازدياد المشاكل زاد مرض باباتي وتدهورت حالته الصحيه.. كنت كل مااقوم الصبح عقب مافرغ من كل شيء وقبل ماسير المدرسه أمر ع شمس "الخدامه" واقولها تيب لي الريوق فـ ملحق باباتي, عقب أسير صوب أغلى شخص اللي بشوفته ينشرح صدري مهما صار ومهما استوى من بين باباتي وأمايه بيتم هو الأبو والأخو والصديق والحبيب بيتم الغاااااالي.. من البدايه هم استثنوني من مشاكلهم ولا حسبوا لي حساب فـ حاولت إني ما أدخل عمري في أي موضوع يخصهم هم ع قولتهم كبار وأدرى بـ مصلحتهم لو كان هـ الشيء حارقني لكن مابيدي أي حيله.. خواني ماكانوا يسيرون ع باباتي ( الله يرحمه ) وااايد يتعذرون بأشغالهم.. أنااا كنت دوووم مطيحه عنده فـ الملحق لين ما اييء سهيل ولا نهيان يسحبوني من هناك حتى إني كنت في أغلب الأوقات أشل كتبيه ويايه عشان أدرس عنده وطبعا أروغ الممرض الغرفه الثانيه إذا ماكان لوجوده أي لزووم..أمايه كانت دووم تعصب عليه بس أنا طااااااااااااااف , علاقتيه فـ أمايه مب لذاك الزود ومازالت , أحس أنها هي السبب في بعاد باباتي ( الله يرحمه ) عني , كان دووم يوصيني عليها دوم يقولي غلاااي هالله هالله بـ أمج , أما هي تحاول بـ أي طريقه تطلع باباتي ( الله يرحمه ) غلطاااااااااان وتحاول ع ماتقدر تخفف درحة تعلقيه به مب كرهن فيه لا لا لا بس لأني بزياده متعلقه به.. هذا مش معناته إني ماحب أمااايه بالعكس أحبهااااا ( صدقك ماحد مايحب أمه) بالرغم من كثرت سوء التفاهم بيني وبينها , لكني احس انه طريقتها فـ التواصل هي الغلط بالنسبه لقلبهاااا الكبيييير..
( $ ) اللهم إنا لا نعترض على قضائك.. ونؤمن بالموت إيماننا بالحياة .. ونؤمن بالقضاء والقدر , خيره وشره
لكن للموت صدمة وللفراق ذهول .. وللقلوب أحبه يفجعها رحيلهم .. وللأعين وجوه تشتاق إليها حين
تغيب .. وفي القلب رحمة مشتقة من رحمتك .. فـ كيف لا تبكيهم عند الرحيل قلوبنا؟؟!..
آآآآآآه أصعب شيء في هالدنيا لي ضيعت الشعوور بالأمان والراحه و الأصعب من هذا كله لي فقدت أغلى إنسان اللي هو سندك في هالدنيا وظهرك في دنيا ماتسرك , فقدت باباتي آآآآه من باباتي , صحيح أن الموت حق لكني بفقدانه فقدت بسمتي , فقدت ضحكتي , فقدت الحب , فقدت الحنان , فقدت الأمان , وفقدت وفقدت وفقدت وفقدت واااايد واللي يذبحني لوووووم .. باباتي راح وبدون ماعرف إذا كان هو راضي علي ؟؟! أو راضي عن أمايه بعد كل اللي استوى من بينهم ؟؟! أو كان راضي عن خواني اللي اتبعوا أمايه في موقفها ضده ؟؟! .. اتذكرت شيء موتني سبع موتات كانوا يقولون إني نذير شؤم ( تخيل نسوا انه كل شيء له سبب والمسبب الرحمن) على هليه بسبب الحلم اللي حلمته قبل وفاة باباتي بـ 4 أيام ( قبل العيد بيومين)..
غبيشه: أبــــــــــــــــــــــــــــــــــووووووويه ( كنت ناشه من الرقاد زايغه وأصارخ وأصيح بأعلى صوتي بلا حس حسيت ساعتها بالموت قريب مني واايد )..
غبيشه: أبـــــــــــــــــووووويه آآآآآآآآآآآآآآآآآآآآآآآه يااااابــــــــــــــــــــــــووووووويه آآآآآآآه يااااااااابوويه.. ( دخلت غويه وهي فالخه من صراخي , تتحرى شيء مستويبي)..
غويه: غبوش بلاج هدي هدي وسمي بالرحمن..
غبيشه: أبااا أبوووووويه أبااا أبووووويه غويووووه دخيييييييلج وديني عند أبووويه دخييييلج دخيييل والدينج وديني عند أبوووويه ..
غويه: ( ماهتمت واايد تتحراني الا جذي من بطره مادرت كبر اللي فيني واللي مخوفني ) ينيتي أنتي تعرفين كم الساعه أحينه ؟! الساعه 3 فليل عيني من الله خير واقري المعوذات ورقدي ومن يصبح الصبح سيري صوب أبويه..
غبيشه: ( تميييييييت أصييح بصوت أعلى وأتحرقص ع شبريتيه كني قاعده ع يمر ) آآآآآآآآآآآآآه يابووويه هــــــــــــئ هــــــــــــئ هــــــــــــئ ..
غويه: (حست أنه شي أكبر من بطره نشت ركيييض صوب غرفة أمايه ) أمايه لحقي بنتج مادري شياها تصيح وتزاعق تبى تروح عند أبوويه..
أمايه: (من سمعت رمسة غويه على طول شلت بعمرها صوب مملكتي وشافتني ع نفس الموضع , يلست عدالي) بسم الله عليج غبيشه بلااااج؟؟!
غبيشه: دخيييلج أمايه دخيييلج خليني أسير صوب أبويه قبل ما قبل ما ............ ( وتميت أصيح )..
غويه: قبل ما شوووو؟! لا بالله ينت وأستخفت هالبنيه...
أمايه: ( خزت غويه بنظره معناها اكرمينا بسكوتج) غبيشه حبيبتي شكلج حلمتي حلم شين يامايه تعوذي من إبليس واقري المعوذات ورقدي..
غبيشه: (تميت أصييييح من الخوف ومن القهر كيييف هم معيين يفهمون خوفي من اللي شفته) أماايه أنا شفت ( تميت أشاهق ) شفت خواني يحوطون حول قبر ( وأنا بعدني أشااهق ) شفتهم يحوطون حول قبره...( وما قدرت أكمل من الصياح)..
أمايه: ( خلاص وصلت حدها مني ) غناتي قبر منو؟؟!
غبيشه: حول قبر باباتي وأنا واقفه ( أشاهق ) واقفه بعيد عنهم , واضحك عليهم ماعرف ليش بس كنت أحسبهم يلعبون , وتميت اضحك بهستيريا جان يطالعني نهيان بنظره حاده وقالي ..
نهيان: غبيشه صدق أنج ماتخيلين أبويه تونا دافنينه وأنتي يالسه تتضحكين...
غبيشه: (وأنا بعدني اضحك بشكل مب طبيعي) نهيااااااااااانووووه أنته قاعد تقص على منو, أنا توني يايه من عند باباتي ههههههههههههههههههههههههههههههههههههههههههه..
نهيان: ( بصوت حاد ) غــبــيــِشـــه أنتي شوو ماتفهمين أبووويه خلاص غاااااب عنا خلاااااص أبويه أندفن تحت التراب ماااااات مااااااااااااااااااااااااااااات...
غبيشه: ( وتوني أستوعبت اللي قاعد يقوله نهيان ) لااااااا أبووووووووووووووووووووووووووووويه ونشيت من الرقاد زايغه.. أمايه دخييييلج لو صدق تحبيني وديني أشوف باباتي دخييييلج ( وتميت أصيح بصووت يقطع القلب )..
أمايه سحبتني وحطت راسي ع ثبانها ( بتصدقني لو قلتلك إني فرحت ومت من الحزن والخوف , فرحت لأنه أمايه أول مره فـ حياتها من كبرت تقربني من حضنها , وحزنت وخفت من الحلم اللي شفته ) وغويه واقفه عند باب مملكتي وتصيييح بدون صوت متأثره باللي صاير, تمت أمايه تقرا عليه المعوذات لين مارقدت ولا حسيت بالدنيا من التعب نشت أمايه وشغلت القرآن وخلت غويه تيب لها فراش عشان ترقد عندي , عدت الليله ع خير ولــكــن اليوم اللي عقبه أمايه بدون مادري خبرت خواني على اللي صار, تموا منصدمين من طاري الموت كنه حلمي فك عيونهم ع شيء غافلين عنه ومب حاطينه ع بالهم ولا حسبوا له حساب , تجاهلوا أو تقدر تقول تغافلوا عن أنه الموت أييء في أي لحظه ولا يستثني حد , الصغير قبل الكبير , ييء فجأه هااادم اللذات ويحرمك من ناس غااااااالين يحرمك منهم بدون رحمه بحالك من عقبهم , المهم أنه خواني راحوا لـ باباتي واستسمحوا وتعذروا منه على القصوور في حقه وبينوا له انهم نسوا كل شيء وصاافيه لبن ع قولت خواننا السوريين.. عقبها بـ يومين تقريبا توفى باباتي عشان جذي يقولون إني نذير شؤم ( أستغفر الله ) ما كنه هالعرب عاقلين ومتعلمين , كم وكم وكم عذبني اللي قالوه لكني متأكده أنه كل شيء مكتوب..
• مـــازال بـــداخلي دمعه .. وجــــرح .. وصـــرخة مكتووومه ..
• مـــازال الألـــــم خــــافي .. وبـكـــلمه .. يـصــحــى من نووومه ..
• هـــدوئي الظــاهر يخـدع .. شــعـــور .. إنــســانـه مصــدووومه ..
صحيح أنه الموت حق وصحيح إني متأكده أنه كل شيء له سبب ومسبب وصحيح أنه كل شيء قضاء وقدر, المشكله إني لين هذا اليوم وأنا بعدني مش مستوعبه فكرة موت باباتي ( الله يرحمه ) لا لا لا تفهم إني أعترض ع المكتوب لا لكن أنك تستوعب فكرة غياب شخص غالي عليك مب غياب يوم يومين شهر سنين لا غياب طويل بلا لقاء , وعدم تقبليه لـ هالنقطه هو السبب الأساسي لـ فشليه الذريع في كل شيء من عقب وفاة باباتي (الله يرحمه) , أول أيام العزا كنت أمثل إني قويه وأوقف عند أمايه وأنا أذكر رمسته الله يرحمه يوم يوصيني عليها , عقب أسير عند غويه وأهديها , ويوم أشوف أي واحد من خواني أحاول أخفف لو أنهم رياييل بلحاهم ماينخاف عليهم لكن يحتاجون المواساه , اكيد مستغرب من ردت فعلي هذا وأنا غلاااه إذا تبى الصراحه كل ماحاولت أصيح عصني دموعي أو بـ معنى أصح رفض عقلي تقبل الواقع من أساسه واستسلمت للهروب من الواقع المر , كل ماحاولت أعبر أو أفكر شعووور قووي داخلي يمنعني من التصديق , تملكني شعوور العجز بمشاعري , يمكن لأني مثل ماقلتلك بعدني مب مستوعبه , حسيت في أيام العزا إني المسوؤله عن كل بيتنا حتى الحريم حسسني بهالشي يوم تمن يوصني , ياغبيشه خليج قويه , غبيشه أمج وخوانج لاتخلينهم , ياغبيشه كوني شمعة البيت وبسمته , وياغبيشه ويا غبيشه ويا غبيشه , صح إني كنت مب فاهمه اللي يستوي بس حسيت من واجبيه أوقف وقفه تخلي باباتي ( الله يرحمه ) يفتخر فيني حتى ولو هو في قبره..
اتذكرت موقف لي مع باباتي ( الله يرحمه ) قبل مايتوفى بيوم يعني أول أيام العيد , لو طال الزمن أو قصر مستحيييييل أنسى هالموقف اللي أنحفر في قلبي وعقلي بحروف من ذهب ..
كان أول أيام العيد كنت نازله عقب صلاة العيد أشيك وللمره المليون ع الميالس ما أرتاح لين ما اتأكد أنه كل شيء تمام التمام مليووون بالميه , عقب ماخلصت تشييك الميالس والفوايل , خطر ع بالي أسير لـ باباتي , لفيت وويهت صوب الملحق وأنا في نص الطريق غيرت رايي , طرى ع بالي أحسن أسير له وأنا بأحلى حله , رديت للبيت وسرت لـ مملكتي , تسبحت وتكشخت وظهرت وأنا متغشيه هههههه خبله أدري بس قولي شو أسوي وأنا مابا حد يشوف كشختيه قبل الغالي ؟؟! ماشيء غير إني أسير متغشيه لين ماوصل عنده هههه ذكيه صح؟! فديتني والله .. المهم وأنا نازله تلاقيت ويا سهيل ونهيان , كان سهيل مقابلني ونهيان معطيني مقفاه ..
سهيل: بسم الله الرحمن الرحيم ..
غبيشه: ( طالعته بنظره شامخه من ورا الغشوه) أعوذ بالله من الشيطان الرجيم ..
نهيان: ( صد وطالعني ) هبي هبي سكنهم ف مساكنهم..
غبيشه: هـ هـ هـ مايضحك ..
سهيل: هههههههههههه إلا أنتي اللي تموتين من الضحك والزيغه ف نفس الوقت..
نهيان: أيييييييييه يا خبلة المجتمع ليش متغشيه؟؟!!
غبيشه: حرمتك خبببببببببله المجره مستر نهيانيشن ( قلتها وأنا أشدد ع الكلمه)..
نهيان: تخسييييين يالخامه ماتسوينها حرمتيه..
غبيشه: ( خزيته بنظره وخطفت عنهم لأنهم لعوزوني )..
سهيل: غبوش وين بها؟؟!
غبيشه: اولا وثانيا بسير صوب باباتي ومتغشيه لأني مابا حد يشوف كشختيه قبله..
سهيل ونهيان: ( فااااطسين من الضحك عليه ) ههههههههههههههههههههههههههههههههههههه..
سهيل: أونها تختصر الدرب اولا وثانيا ( قالها وهو يقلدني ) ماغلط نهيان يوم ينعتج بـ خبلة المجتمع ..
غبيشه: ( أنا خلااااااااص أووني عصبت ) أف أف أف أنا شو ميلسني عندكم بسير أبرد قلبي وأشرح صدري وأكحل عيوني..
نهيان: هيه دخيلج برديه بثلج وشرحيه بسكينه الذبح أنا هناك حطنها أنززين ولا تنسين تتكحلين بالعسل الطبيعي تراهم يمدحووووونه يقولون يكبر العيون ههههههه..
سهيل: ههههههههههههههههههههههههههههههههههههههههههههه..
غبيشه: أوهووووووووووووووووووووووووووووووووووه صدق أنكم سخفاااااء ( ويقولون الشرده نص المريله) ..
وركيييض صوب ملحق باباتي ولحقني سهيل وهو يزاعق عليه أنا تحريته فالبدايه بيكفخني طلع الحبيب نواياه حسنه هب شرات الشرير نهيانيشن ههههه لو يسمعني أففف رحت فيها فديييت سهيل خلى الممرض يظهر عشان أخذ راحتيه عند باباتي يدريبي أبى أهذرب وأقول لـ باباتي كل اللي استوى لي وأتشكى له من فلان وعلان , المهم ظهر الممرض فالتفت عليه سهيل وهو يقول لـ باباتي..
سهيل: أبويه تشوفها هاي بنتك أونها ماطاعت تعق الغشوه الا عقب ما أنته أول واحد تشوفها تخيلها تحووط فالبيت وهي متغشيه هههههه..
غبيشه: ( عاااد أنا خوزووو من طريقي الدلع وأبووه ييء يوم أكون عند باباتي ) باباتي شوووفه يضحك عليه..
باباتي: سهيل يوز عن أختك..
سهيل: انشالله بس قولها تعق فيني فضوول أشوفهااا..
غبيشه: ماابااا بسير صوب باباتي بخليه يشوفني خلاف أنته ( وطلعتله لساني ) .. نشيت من بقعتيه وقعدت حذال باباتي وعطيت سهيل مقفايه وعقيت غشوتيه..
غبيشه: هــــا شرايك يابو غبيشه..
باباتي: بسم الله عليج ياغلااااي عيني عليج بااارده..
سهيل: أمحق غلااااا .. أفا يا بو مهير أحين هالمفعوصه غلااك وأحنا مابقى لنا شيء..
باباتي:هههه يعلني ماخلاااا منكم كلكم من أكبركم لين أصغركم..
سهيل وغبيشه: ولا يحرمنا منك يارب..
عقبها ترخص سهيل وظهر وتمينا أنا وباباتي , تميت أهذرب وأهذرب وأهذرب إلى ما لا نهايه عاد منو بيسكتني , وباباتي يناظرني ويضحك ع سوالفيه وشوويونه يعلق..دووومه يخليني يوم أكون عنده أيــر بالصوت ( أشل له شله ) شله مخصصه هوو يحبها...
^ هـــذا اختيارك لا تندم ... ودعتني يازين برضاك ^
^ خل الحزن والبكى والهم ... عساك تسعد طول دنياك ^
باباتي: سلمتي سلمتي غلاااي..
غبيشه: ومن قااال عساه دوم سالم..أما أحين من رخصتك الغالي ..
باباتي: وين غلاي مايلستي؟؟!
غبيشه: والله ودي أيلس لكني بسير أسلم ع بقية الشلة خخخخخ..
باباتي: هههه..الله لايحرمني من حسج وسوالفج غلاااي..
غبيشه: ولا يحرمني منك والله يخليني لك ويخليك لي يا أحلى وأغلى وأعز أبووو في هالدنيا..
باباتي: أوب أوب أوب هذا كله لي ( وابتسم )...
غبيشه: يس نعم لك وفذمتي ذمه أنه شووووويه فـ حقك ..( ونشيت لويت عليه بخفيف عشان ما أعوره وبسته فرقبته وصلبت طولي عشان أوقف وأروح البيت يوم وصلت عند الباب زقرني) ..
باباتي: غـــلاي ..
غبيشه: عيوووووون غلااااااك..
باباتي: تسلم لي هي وعيونها.. (سكت شووي وزين ماسكت قلبي بسكوته) بشتاااقلج..(وابتسم)
غبيشه: ( وربي نغزني قلبي حتى ماواحالي أنسى الكابوس, تعوذت من أبليس) أنا من أحينه وبعدني ماظهرت منك اشتقتلك ويييين لو سرت ( وسويت له حركة استهبال بثميه دوووم أسويها له)..
باباتي: عاد ماوصيج غلاااي ع أمج وخوانج هالله هالله بهم وحاسبي ع عمرج..
غبيشه: ( حاولت أرسم ع شفاتي ابتسامه وأقنع عقلي أنه اللي قاله مجرد توصيات عابره) انشالله الغالي من الفوقيات (أشرت له ع عيوني) ماطلبت مع أنه المفروض أنك توصيهم هم عليه بما إني آخر العنقود (ورمشت له بعيوني) .. ( صح يمكن تقول عني ماحس وهذا مب وقت دلع والخرابيط فـ برد عليك إني مابا أتعب عمري باشياء وهميه)..
باباتي: هههههه فديت منطوقج غلاااي عاد أنتي ماينخاف عليج حرمه عن ألف ريال..
غبيشه: ( ابتسمت له بدون ماعلق ع رمسته اللي حسيت بها حمل ع ظهريه , رديت حبيته ع راسه وظهرت عنه)
سرت سلمت على أمايه وخواني وحريم خواني, هههه صدقك صدقك مب من كثرهن؟؟! المهم مر الوقت ويىء وقت الغداء تغدينا كلللللللنا رباعه وأنا طايره من الفرحه لـ شيئين بقولك اياهم واللي هم أنه باباتي تغدى عندنا من عقب فتررررره طويله كانت القعده وااايد حلووه , وثاني شيء شفته " فز قلبي وقال هاونه" آآآآآآآآآآآآه ياويل حالي..خطف هاليوم مثل نسمه باااااارده في جو حار , خطف هاليوم ومحلاااااته من يوم, فليل قبل مارقد يلست ع شبريتيه وبندت الليت , خليت الأبجوره مولعه , ظهرت من الدرج دفتر يومياتي أو تقدر تقول دفتر مواقفيه المميزه أحب اكتب فيه المواقف المميزه اللي أمر بها , سجلت أحلى لحظه تعانقت عيوني بعيونه وسجلت التارخ واليوم آآآآآه منك " فز قلبي وقال هاونه" وتميت أتقلب بصعوبه رقدت..
نشيت ع صوت المنبه تميت فبقعتبه ماتحركت , أففففففف هالمنبه شكله مابيسكت لين أنش أعقه ع اليدار لين مايتكسر أحسن دواه أزعجني , ضحكت فخاطري ع غبائي المهم نشيت بكل كسل وسرت الحمام ( الله يعزك) وتغسلت وتمسحت وفرشت سيادتيه وركعتها , خلصت قعدت اقرا صفحتين من القرآن , يوم فرغت من العباده نشيت أبااا أرقد سيده ع الشبريه يوم ييت بغمض عيوني سمعت حشره فالصاله , كنت فالبدايه بطنش بس تعرفني الفضوووول من أهم سماتي , ظهرت من مملكتي شفت غويه منزله راسها بسم الله هذي شو مسهرنها لين أحين؟؟! خطر فبالي أسوي لها مقلب , مشيت ع اطراف صبوعي عشان ما تنتبه لي , يوم وصلت عند مقفاها كنت بصرخ عليها عشان تزيغ بس لاحظتها مب طبيعيه ف قعدتها وكأنها تهتز , تقربت منها اكثر أبااا اسمع زين ما لزقت أذني ع ظهرها حسيتها تصيح فحطيت ايدي ع كتفها...
غبيشه: غويه بلاااج؟!
غويه: ( رفعت راسها انصدمت من شكلها كانت تصيييييح من الخاطر وأول ماشافتني زاد صياحها وزاد خوفي عليها)..
غبيشه: غويه فديت عيونج شووو صابج ليش تصيحين؟؟!
غويه: ( ماردت عليه وزاد صياحها زود الزود , زادت دقات قلبي حسيت به طاح فـ بطني وانهظم)..
غبيشه: غويه الشيمه خبريني تراج خوفتيني بلاج حد زعلج؟! ولا قالج شيء؟!
غويه: ( هزت راسها بمعنى لا ) ..
غبيشه: عيل أكيد أمايه واجعتج ؟!!
غويه: ( تمت تصيح ولا ردت عليه) ..
غبيشه: ( فهمت أنه مب هاللي يصيحها) غويوه تراج عيزتيني ماعرفت بلاج؟! ها لا يكون متضايقه من رويشد؟! ماعليه الهرم أراويه أنا ليش يزعل ولية عهدنا..(وابتسمت لها عساني أخفف عنها)..
غويه: ( تمت تصييح وتقول ) آآآآآآآآآآآآآآآه ياغبيشه الغالي رااااااح الغالي رااااااح وغاب عنا..
غبيشه: ( كلماتها هزت كياني الغالي؟! وراح؟! لا يكون؟! ) غويوووه تراج حرقتي أعصابي يالله تنطقي بسررررعه شوو مستوي؟!!
غويه: ( تمت تصيييييح وتحاول تتمالك أعصابها لأنها بتنقل لي خبر بيقلب لي حياتي فوووق تحت ) ..
غبيشه: دخييييييييلج خبريني شو صاير ورفقة باباتي أنج تقولين..
غويه: ( من تنظقت أنا بكلمت باباتي البنيه ردت انفجرت بالصيااااااااح) أأأبووويه ياغبوش مااااااااات..
غبيشه: ( آآآآه ما أكبرها من كلمه تمت ترن فـ أذني باباتي مات , شليت فـ قلبي عتاب ع غويه وضحكت ع سخافتها) هبي هباج الرب فالج ماقبلناه باباتي مافيه الا العافيه أكيد أنتي شفتي حلم مثل اللي شفته أكيد أكيد..
غويه: ( قلبها تقطع من رمستيه ومن الحدث بكبره) والللللللللللللللللللللللللللللللللللللللله العزيز حتى سأليهم يوم سار مهير ييلس عند باباتي قبل صلاة الفير كان شووي مستويع بس تم يوصي مهير عقبها سار مهير يصلي فالمسيد ويوم رد سار ع طول عند الممرض عشان يعطيه مسكن , يوم حدروا عليه لقوه ساكن مايتحرك و على ويه شبه ابتسامه عرفوا أنه روحه سلمت لباريها , آآآآآآآآآآآه ياحرقت قلبي..
غبيشه: ( نشيت من بقعتيه وبدون مارمس ) ...
سرت سييييده صوب حجرة امايه , لقيت الباب مبطل فـ دقيت بخفيف محد رد عليه , طنشت التطنيش وحدرت الحجره شفت نهيان منسدح فوق الشبريه وحاط ايده ع عيونه , وسهيل يالس يهدي امايه اللي حاطه راسها ع صدره وتصيييح بدون صوت , صح كانت من بينهم مشاكل ومابينهم أي وفاق بس هذا مش معناته أنه امايه تكره باباتي أو تتمنى له الموت مهما كان من بينهم عشره والعشره ماتهون الا على عيال الحرام , تميت أنا مبهته فيهم , اول واحد انتبه لوجودي سهيل فزقرني , امايه لحظتها رفعت راسها وتمت تطالعني وأنا ساكته وحاطه عيني بعينها يمكن أقدر أشوف شيء واحد يوحي لي أنه اللي فبالي غلط ..تقدمت شوي صوب امايه..
غبيشه: اماااايه غويوووه الخبله فالصاله تصيح تقول أنه باباتي مات قومي اقري عليها يمكن شافت حلم مب زين..؟!
تموا ساااكتين ويطالعوني وامايه تمت تحاول تجاهد دموعها عشان تبين قدامي انها قويه لكن دموعها عيين.
غيشه: ( استغربت هدؤئهم ) بلااااكم تطالعوني بهالنظرات؟؟! ( مع إني شفت امايه زاد صياحها من بديت أرمس , وسهيل ونهيان شفت في عيونهم خيال دمعه لكن بعدني مب مستوعبه عشان جذي طنشت اللي شفته) ..
امايه خلااااص ماعادت تتحمل تمت تصيح ولا قدرت ترد عليه ولا بكلمه نش سهيل ولوى عليه وأشر لـ نهيان عشان يتم عند امايه..
سهيل: فديييتج يالغاليه تعالي ويايه بفهمج ( سحبني ووداني الصاله يلسني ع الكرسي طبعا مشيت معاه مسيره مب مخيره) غبيشه أنتي مب ياهل وماشالله عليج عقلج كبير ( سكت شوي عقب كمل كلامه) غبيشه الموت حق وكلنا بنموت محد بيدوم في هالدنيا غير رب العالمين وهم السابقون ونحن اللاحقون كلنا نمشي ع هالدرب غبيشه ابويه قبل نص ساعه عطاج عمره ( خنقته العبره وهو يقولها كنها جرحته فالصميم ) " أما أنا كنت فدنيا ثانيه روحي ضاعت مني , بكل برود شليت عمري من عندهم وتوجهت صوب مملكتي وهم منصدمين من ردت فعلي ظهرت بدون مانزل دمعه وحده من الخبر اللي شل كل حواسي , سكرت الباب ع عمري وقفلته بالمفتاح عشان محد يزعجني , يلست وأفكار تروح وأفكار تيء , سمعت دق عالباب مارديت , كانت غويه محتشره برى خايفه عليه تباني أفتح الباب , وأنا أكبر طااااااااف , زاد الدق رحمت حالهم نشيت فتحت لهم الباب , لقيت غويه ونهيان , أول ماطاحت عين غويه عليه سيييده لوت عليه وتمت تصيح صياح يقطع القلب وأنا لو جماد
كان تحرك أو تكلم من فاجعة فقدان أغلى الناس بس المشكله أنا كنت بلا وعي مب حاسه بالمصيبه , مرت أيام العزا ثقييييله ع الكل , وأنا بعدني على حالي ولا تنطقت بكلمه , أسير أعاونهم واطمن على امايه وغويه عقبها أرد للحريم , يمكن تستغرب كيف أنا عرفت أتصرف بمثل هالموقف برغم صغر سني بخبرك إني تعاملت مع الموقف كإني أأدي واجب لدرجة يوم يعزني مارد على أي حد ياغير إني أقرب الحريم وأخليهن يتفاولن وأشرف ع المطبخ و على الغداء أو العشاء أمر الخدامات يرتبنه طبعا مب بروحي البنات ماقصرن , خلص العزا وخطف كم يوم وأنا بعدني ع حالي , امايه وخواني كانوا واايد خايفين من ردت فعلي اللي لين أحينه مابانت , طبعا طول هالمده أنا ماسرت المدرسه , ع بداية الأسبوع ظهرت من مملكتي الصبح وأنا متلبسه بسير المدرسه سرت للخدامه قلتلها تزهب الريوق وتوديه صوب ملحق باباتي وظهرت سيده صوب الملحق , نهيان كان توه نازل من فوق سار صوب المطبخ شاف الخدامه تزهب الريوق وهي تمش دموعها استغرب منها...
نهيان: شمس شو فيج؟! وبعدين حق منو هالريوق؟!
شمس: هذي كبيشه يقول سوي ريوق وودي عند ملحق بابا كبير سيم سيم كبل أنا مايعرف شنو قول حق هي بعدين أنا خبر هي بابا كبير خلاص موت هي قول ودي الريوق وبس..
نهيان: ( من سمع رمستها أنصدم وسيييييده طيران لحقني ) هاااللي كنت خايف منه الله..
دخلت الملحق وقفت شوي شميت ريحة باباتي خذت نفس طويل عقب كملت طريقي سرت للغرفه اللي دوووم ييلس فيها باباتي دقيت عالباب الدقه اللي تميزني عنده و تريت اسمع صوته يسمحلي بالدخول وطول انتظاري رديت دقيت الباب ثاني مره وانا اتريا ...
غبيشه: يارب ترد يارب ترد يااااالله قولي دشي غلاااااي قووول دخيييلك قووووول ( رديت دقيت مره ثانيه, نهيان كان ورايه تم مصدوم ومتقطع ع حالي)..
نهيان: ( بخوف) غبووش شو تسوين هني؟!
غبيشه: بسم الله فلختبي ..ماشيء نهيان ييئت أتريق عند باباتي..
نهيان: ( فتح عيونه ) غبيشه أبويه الله يرحمه..
غبيشه: لا لا باباتي دووم يقولي مابيتريق إلا إذا أنا تريقت وياه وأنا بالمثل ماتريق إلا عنده , ولو هو ماطاع يتريق بهدده أنه تحرم عليه العيشه..
نهيان: ( دمعت عينه) غبيشه ياغلااااا أبويه أبووويه خلاااص ماعاد من بيننا أبويه مدفون تحت التراب..
غبيشه: ( هزيت راسي عشان أطرد هالأفكار ) لااااا هو قالي مابيخليني ولابيخلي حد يقرب صوبي ولا بيخلي مهير يهزبني ولا بيخليك أنت وسهيل وطحنون تتطنزون عليه وبيخلي امايه توديني عند هيوه وقال بعد مابيخلي راكان يطفربي ويعاندني , لااااا باباتي هني داخل ( أشرت ع غرقته ) أعرفه أعرفه تلاقيه هني منسدح يترياني أنا أدريبه.. ( توجهت لباب الحجره وفتحته وأنا مغمضه عيوني أول مافتحته يتني نسمه باااارده وحسيت برجفه فتحت عيوني بشوي شوي وأنا أدعي فخاطريه إني أشوفه منسدح هناك فبقعته اللي دوم متعوده أشوفه فيها بس أنصدمت............ ماشفت حد ) ...
غبيشه: ( ارتجفت) نهياااان وين باباتي؟؟؟! وييييين راااح وخلاااني؟؟! وييينه دووومه يقولي غلاي أنا موجود في هالدنيا عشانج وأنتي موجوده عشان تردين لي روحي..كيييييف أحينه هو محد يعني أنا أحينه ماالي لزوم فهالدنيا ( سيده صديت صوب نهيان شفت دموعه طنشتهن ومسكته بسرعه كني خايفه أنه بيشرد مني) نهيان ودني عند باباتي أحيييييييييييييينه نهيان ودني و ....
نهيان: ( قاطعني فالرمسه وهو خلاص طفح الكيل عنده مني ) يا غبــــيـــــــــشــــــــــه أبوووويه مااااات وأندفن تحت الترااااااب مااااااااات وين أوديج عنده أنتي ماتفهمين أبوووويه مااااااات خلااااص رااح غاب عن هالدنيا ( كان نهيان يصارخ فويهي ويهزني بقوووه عشان أستوعب اللي يصير , أما أنا من وعى عقلي ع الحقيقه المره غيبت عن هالدنيا )..
نهيان: غبييييييييييييييييييييييييييييشه ( شلني وحطني ع الكرسي وركض برا ع أساس أنه بيشغل سيارته بس شاف غريب توه بيبند السياره) غريب شغل شغل السياره شوي وبييك..(رد نهيان وشلني لسيارة غريب) حرك حرك بسررررعه ع المستشفى..
غريب: ( حرك السياره ومستغرب شو صابني) أنزين خبرني شوو مستوي؟!
نهيان خبره كل شيء من بداية السالفه لين اليوم ( يعني من توفى باباتي) كنه غريب مب عايش عندنا في نفس البيت..
غريب: حليلها الله يكون فالعون..
نهيان: ( معصب ع لامبالاة غريب فالبيت) وااايد عليك هاللي قدرت عليه لاهي فدنياك ولا تدري بحد فالبيت وشو حالتهم همك عمرك وبس , مافكرت بامايه ولا بـ هاليتيمه ولا بختها ولا فكرت حتى تحسسنا بوجودك معنا من قبل وبعد ماتوفى ابويه..
غريب: بلاك هد هد يوم خذتني بمشراااااع وميدااااف..
نهيان: ماقول غير الله يهديك خلك بعمرك وخلني أنا بغبوش , والله هذا اللي كنت خايف منه أنته تعرف شكثر هي متعلقه فـ ابويه , أنصدمت يوم شفت ردت فعلها أيام العزا توقعت أنها بتسوي أي شيء لكن طلعت أكبر من توقعاتي..( صد وراء يطالعني وهو متلوم ..آسف غبوش آسف)..
دق نهيان لامايه وخبرها اللي مستوي , أنا تميت فالمستشفى اسبوع وعقبها حشرتهم الا تظهروووني من المستشفى ومن كثر حنتيه رخصوني , كنت منهااااااااااره بشكل فظييييع أكيد بنهار أنته مب متصور شو اللي فقدت , أكيد بنهااار وأنا اللي فقدته أكبر من إني أستوعبه حتى إني ماطعت أكمل دوام هالسنه وبلا شك , تقريبا كل شيء تغير فيني ماكنت غبيشه القبليه وفي ظني عمري مابرد , بصراحه ماقد تجرأت أدخل الملحق من بعد وفاته مع أنه كان فخاطري , أول ماحس إني مشتاقه أو محتايه لـ باباتي على طول أسير لمملكتي وأقفل الباب ع عمري وأشغل القرآن وأطول ع صوته وأتم أصيح , كل اللي فالبيت تعودوا ع هالشيء ويعرفون إني إذا قفلت الباب وطولت ع القرآن خلااااص يعني إني أصيح فقدانه.. مرت الأيام وتعودت ع حقيقة غياب روحي عني لابد من هالشيء ...
غويه: حووووووووووووه ..غبووووش قسم بالله تكسرت إيدي وأنا أدق عليج الباب وأنتي لا حياة لمن تنادي.. لا يكون متي؟؟! ( وتمت تتحرطم وهي تدق الباب بقوووووووووووووووووووو )..
غبيشه: ( توني ناشه من الرقاد وبعده فيني بقايا حمى) أنززززززززززززززززززززين ناشه ناشه يعلج الحشره..
غويه: هذا وأنا موصتنج ماتقفلين الباب...؟؟!
غبيشه: ( ياهي نشبه منج ياغووويه ) غووويووه طيري طيووورج أديتي مهمتج ع أكمل وجه..
غويه: ماااااالت..
نشيت من الشبريه بكل كسل وقعدت طالعت الساعه كان المغرب خيييبه اسميني عفنت من الرقاد تحسست راسي عشان أقيس الحراره هههه خبله أدري قالوها قبلك واايدين بس لا لا الحمدلله أحسن بووايد أقووولهم الدوا الشراب ينفعني أكثر من الحبوب والنافع الله لكن محد يصدقني فالحين بس يتطنزون عليه , خلني أسير أتسبح وأصلي الصلاه اللي طافتني عقبها بنزل تحت أحس بيووووووع فظيع.. تسبحت وصليت وتلبست ونزلت تحت ..
وصلت تحت شفت عمري ع المنظره اللي عدال الدري وربي بتموت من الضحك والزيغه لو شفت شكلي , المهم وايقت ع الصاله أبى أشوف من فيها شفت أمايه يالسه تطالع الأخبار أحم أحم امايه من قدها مثقفه , قربت صوبها وحطيت ايديني ع عيونها حاولت أضيف مؤثرات صوتيه ع صوتي عشان ماتعرفني..
غبيشه: منووو أنااااا؟؟!
امايه: من غيرج.. نظر عيني..
غبيشه: أنزين من نظر عينج؟؟! ( توقعت الأجابه )..
امايه: غووويه..
غبيشه: هههههه..للأسف لا ( خوزت ايديني من عيونها وحبيتها ع راسها ويلست)..
امايه: غــبــيــشـه حي هالشوف وينج محد يشوفج..( عطتني نظره ع شكلي وكانت بترمس بس عيزت مني) ..
غبيشه: موجوده هني ( وابتسمت وأنا فاهمه نظرتها )..
امايه: ادريبج هني .. شوو هباتج من الحمى؟؟!
غبيشه: الحمدلله..عيل وينهم هل البيت؟؟!
امايه: الشباب كل واحد فيهم عند ربعه وغويه فالمطبخ تعابل الفوايل..
غبيشه: ليش حد بيينا؟؟!
امايه: راكان ولد عمج بيي من السفر..
غبيشه: ( ضربت ايدي ع راسي بخفيف وأنا توني متذكره) أووووووه صح..
امايه: كنج مب عندنا في نفس البيت ماتدرين باللي صاير..
غبيشه: امايه الله يهديج هو الا يوم ماظهرت فيه خليتيني امررره عازله عمري وبعدين عندي عذر كنت تعبانه..
امايه: الله يعينا عليج قلنالج كلمه رديتي بعشر..المهم فزي سيري لبي ع ختج فالمطبخ..
غبيشه: ( صدق تنرفزت يعني بعدني مريضه شوي ومايرحموني ماقول غير الله يرحمك ياعزوتي) انشالله..
سرت وأنا كلي ملل , وأسحب ريولي سحب أوهوووا أضرب خط للمطبخ الخارجي بس عشان غويوه أففف الله يهديها امايه بعد لازم تحط المطابخ برى تعرف لييش؟؟! أوونه عشان ريحت الطبخ , فالبيت الرئيسي مطبخ تحضيري يجهزون الأكل فالمطبخ الخارجي ويوم يجهز ييبونه المطبخ التحضيري.. وصلت عند غويه..
غبيشه: اللللللللللللله يعينه اللي بياكل من ايدج اسميه سيييييييده ع الطواري..
غويه: ( ماعجبها كلامي ) وأنتي اللللللللللله يعينه اللي بيشوفج جي اسميه امه داعيييييييييييه عليه..
غبيشه: يعني أنتي امايه داعيه عليج..؟!( يتني الضحكه )..
غويه: صخي صخي..وبعدين الشيخه غبيشه كنج ماقد كلتي من خدمتيه ماشفتج رحتي الطواري؟؟! وإذا خدمتيه ماعجبتج تعالي أنتي عابلي المطبخ..!
غبيشه: كنت أسير الطواري بالدس عشان ماجرح مشاعرج المطبخيه..ولااااا شكرا عرضج مالفتني متنازله لج.. وبعدين أنتي ع ويه عرس لااازم تتدربين..( ضحكت بخفيف)
غويه: ( أونها تبى تغير الموضوع ) غبوووووش تراج آذتيني بتظهرين ولا بخبر امايه عليج..
غبيشه: ( هههههه , ضحكت ف خاطري مافيني أتكفخ ) بنات مايين الا بالعين الحمرااااا.. خوزي خليني أدور ع عيشه أبــــى أكل ..( سويت لي سندويش جبن وسويت لي نسكافيه 3 في 1 )
غويه: ( تمت مطنشتني تعابل الفوايل وعقب فتره ) غبوش امايه ماقالتلج..؟؟!
غبيشه: ( كنت يالسه ع كرسي ويالسه آكل بذمه وضمير واطالع غوويوه , أول مارمست فتحت عيوني ورمست وأنا بعدني مابلعت اللي فـ حلقي ) لاااا شو مستوي؟! متى؟؟! ليش محد خبرني؟؟! أفاااا وأنا كنت أتحراكم تحطون لي اعتبار أفاااا
ماهقيت ماهقيت أنه البراقع يفتنني ..
غويه: ( ماقدرت تمنع عمرها من الضحك ع شكلي ) هههههههههههههههههههههههههههههههههههه..غربلات عدوج ياغبوش ..
غبيشه: خلي غبوش فحالها وخبريني شو اللي ماخبرتني اياه امايه؟؟؟!
غويه: ما عطتج مفاتيح بيت عمي عشان ترتبين غرفة راكان..( وابتسمت ) ..
غبيشه: ( لا إرادي غصيت بالقمه اللي فـ حلقي) كح كح كح ..
غويه: ( ع طول راحت تيب لي كوب ماي وناولتني اياه ) شربي ماي..
غبيشه: ( خذت الكوب شربت وخذت نفس ) احم .. أمم ليش وينهم قوم عمي مب فالبيت..؟؟!
غويه: تراهم راحوا رماح .. شووه نسيتي؟؟!
غبيشه: أووووه صح..
غويه: اقول اكيد امايه حطت المفاتيح هناك ع الطاوله اللي فالممر تراها بتروح مادري وين قالت وحده تعابل الفوايل ووحده تروح ترتب الغرفه قبل مايشرف راكان..( غويه كان فخاطرها تموت من الضحك ع شكلي ) ..
غبيشه: ( كنت اتحرقص فداخليه ) أهاااااا..( سكت)
غويه: يالله قومي بدلي وسيري بيت عمي بسرعه تراه الريال ع وصول وانتي بعدج مارتبتي الغرفه..
غبيشه: ( اووني استويت مره وحده مأدبه ولا علقت بكلمه) أوكيك..
غويه: ( ابتسمت وماحبت تلعوزني أكثر اووني كسرت خاطرها ) بطرشلج شمس تعاونج..
ظهرت من المطبخ بدون مارمس وأنا أفكر وأفكر وصلت لـ مملكتي , بدلت لبست عربيه وشيله بنفس اللون " أصفر" لوني المفضل قلت للخدامه تحط لي يمر, وشخطت عيني بالكحل وحطيت قلوس خفيف , أندق الباب وكانت الخدامه يايبه لي المدخن دخنت شعريه يعني إذا ماتعرف أنا من عشاااق الدخون , رشيت رشت عطر طالعت عمري وابتسمت ( فديييتج يا غبيشه اسميج ماتخربين) لا لا تضحك على خبالي أنا بـ هالطريقه أشجع عمري المهم ظهرت من مملكتي متوجهه صوب بيت عمي وأنا بالي مب عندي و .......
غبيشه: أخخخخخخخخ ..
نهيان: أيييه ماتشوفين أنتي؟؟
غبيشه: ( اسميني أتنرفز من خاطريه يوم حد يزقرني بـ أيه ) أولااااا اسمي غبيشه مب ايييه وثانيا اسمحلي الشيخ نهيان ماشفت الكتله المتحركه اللي قدامي..
نهيان: ( فتح عيونه ألقى نظره ع جسمه "ترى نهيان واايد يحافظ ع وزنه ويروح دوم الصاله الرياضيه" ف قبض ع أذني) منو الكتله؟؟!
غبيشه: أيييييييييييييي وربي تعورني ..
نهيان: أنا قلت منو الكتله ؟؟!
غبيشه: محد محد أصالن منو ياب طاري الكتل جيه نحن فـ حصة فيزياء؟؟!
نهيان: مادريبج..بس قولي أنا الكتله المتحركه...
غبيشه: لاااا أنت زودتها ماااابااا أقووول..
نهيان: ( زاد قوة قبضته ع أذني ) قوووولي..
غبيشه: ( خلاااص أذني اقرأ عليها الفاتحه) أناااااااااااااااااااااااا الكتله يالله بطل أذني...
نهيان: قوووليها بصوت أعلى..
غبيشه: أناااااااااااااااااااااااااااااااااااااااااااااااااااااااااا ااااااااااا ( تعمدت أصاارخ لأنه صوتي نشاز بالصريخ )
نهيان: ( فهمني وطنشني ) قولي توبه وأنا حماره ..
غبيشه: ( ماشي حل غير ) أييييييييييييييييييييييييييييييييييييييييييييه بخبر عليك مهير ( طبعا تعمدت الصرييخ مثل ماقلتلك ليش)..
نهيان: ( طفر مني وفك أيده عن اذني ورحمها ) يعلج خبقتي أذني بـ هالصوت اللي يلوع بالكبد..
غبيشه: ( دزيته وخطفت عنه ) خوووز خلني أسير لأشغالي..
نهيان: هههههههه الله والأشغال عاد..
كملت طريقي , لقيت المفاتيح ع الطاوله شليتهن وظهرت وصلت بيت عمي , البيت كان مظلم , تنهدت , أول شيء سويته شغلت ليتات الدكه ( مكان مرتفع يكون مجهز ومخصص للقعده ) أدريبك تعرف معناها لكني أشرحها للي ما يعرف , عقب فتحت الباب الرئيسي للبيت , دخلت خفت شوي من الظلام لكني توكلت ع اللي عينه ماتنام شغلت ليتات الصاله , أخيييك البيت بدون عمي والبنات مايتقارب مب حلوو الله يحفظهم انشالله من كل شر, المهم يت شمس ورتبنا الصاله , الغرف كانن مرتبات الا غرفة راكان بحكم أنه من شهرين ما حدرها , المهم أنا كان عليه الغرفه وشمس الحمام عزك الله , خلصت شمس وردت بيتنا عشان تسوي يمر وتشوف غويه لانها دقتلها مادري شو تباها , المهم يابت لي شمس المدخن..
شمس: هزووه المدخن , نهيان ما آجااء هون يشووف أنتي؟
غبيشه: لاااا ليش نهيان رد؟!
شمس: هيه , هو يسأل كبيشه وين أنا خبر هوني وبعدين هو يقول أنا بيشوف..
غبيشه: لا بعده مايي ( الله يغربل عدوج منج اكررره اسمي ) خلاص مدام نهيان بيي سيري أنتي عند غويه , أصالن خلاص مخلصه بس بدخن البيت وبرد بيتنا..
شمس: أنزين , إذا أنتي تأخرتي وأنا خلاص من غويه بيجي شوف أنتي..
غبيشه: أوكيك..
راحت شمس قعدت أدخن غرفة راكان , ظهرت من غرفته وبندت الباب وتميت أدخن الطابق اللي فووق وأنا أدندن *مهما يقولون مهما صار مهما تم أنت البدايات وآخر ساحل ومينا حنا اجتمعنا وشمل العاشيقين ألتم خضنا حروب الهوى فزنا وردينا خضنــا حروب الهوى فزنا وردينا ومهما يقولون مهما صار ومهما تم* هباب ما قلت هالكلمه وأنه....
غبيشه: أمــــي شووه هذا تبندت الكهرباء , مالقت تتبند الا أحينه..أمــي أنا شوو بينزلني تحت..؟!
تميت أتحسس بيدي أدور ع طاوله عشان أحط المدخن عليها أحيدها هني أوهوووا وين راحت , تميت أدور وأدور لين ما حصلتها , حطيت المدخن بشويش , وأنا خلااااااص بموووت من الزيغه عاد تعرف الشيطان كيف يخليك تتخيل أموور أنا أستاهل من قالي أغني, من كثر ماتخيلت أمور ماقدرت أتحرك من بقعتيه , خطر فبالي أنه شمس قالت نهيان تخبر عني وبييء صوبي خلني أقعد هني ومن اسمع صوت بتم أزقره لين مايوصل قعدت اقرا المعوذات وأنا خلااااص منتهيه من الخوف , أفففف منك يا نهيان وينك كنت بتيني شوو اللي أخرك؟؟! تميت مغمضه عيوني بقوه عشان ماشوف شيء يخوفني أدري البقعه ظلام مابشوف شيء بس عنبوو الخوف شو يسوي , خطفت خمس دقايق وأنا بعدني ع حالي , أفففف هذا متى بيوصل, لحظه لحظه أسمع صوت خطوات , فرحت هذا اكييييد نهيان, لاااااااا يمكن حرامي ولا سكني أميييييييييي ياويل حالج يا غبيشه , اسمع الصوت بدى يقرب وأنا دمعتيه قدها بتطيح , لا لا خلني أتعوذ من أبليس هذا أكيد نهيان , ناديته..
غبيشه: نهياااان..
سمعت صوت الخطوات يقرب لين ماوصل عندي وأنا يالسه ع الأرض متكوره ع عمري , حسيت أنه واقف ع راسي وشيء ضرب ع راسي ف نفس الوقت..
غبيشه: بسم الله الرحمن الرحيم , أعوذ بكلمات الله التامه من شر ماخلق.(تميت أعيدها كم مره مادري ليش طرى ع بالي أنه سكني واقف ع راسي , سمعت صوت ضحكه بخفيف عررفته نهيان السبال محد غيره )..
غبيشه: نهيان تراها مزحه سخيفه ( رفعت راسي أوني بحاول أشوفه , أنتبهت أنه خوز التلفون ثره الحبيب ضارب بليت التلفون ع ويهي وأنا خبر خييير مغمضه عيوني من الخوف وشكلي عافانا الله )
غبيشه: والله لو أنك صورتني يا إني أخبر عليك مهير.. تشوفني من الصبح ميته من الخوف وأنته تضحك ( ع طول فزيت , واستغربت هدوووء أخووويه ) ..
غبيشه: نهياااااااان ( حطيت ايدي ع ويهه لمسته حسيت من ملامح ويهه اللي ماشوفهن بالحنان محد غيره) نهيان فديييتك بتغاضى من حركتك اللي قبل شووي بس انت لو تسمح ردني بيتنا ( تقبضت بذراعه بقوو كنه بيشرد مني حسيت به رجف لكن من يقوول أفكه ) تصدق أول مره أفرح انك موجود كنت بموت من الزيغه هالكهرباء الغبيه مالقت تتبند الا احينه ( ضربته ع كتفه بقووه) وأنت ليييش تأخرت عليه قالت شمس أنك تخبرت عليه و بتيء صوبي شو أخرك؟؟!
نهيان: ( تم سااااااكت ماسمع شيء غير صوت نصخه )
غبيشه: ( مشى وسايرته , فهززيته بقوووه وأنا بعدني لازقه فيه وهو أحسه يباني أخوز عنه لكن أنا لا محال ) أوووه أخويه لا يكون خاايف مثل خويتك وبعدين أيييه لا تدزني هب مبطلتك لين ماتوصلني بر الأمان ( سرعت من مشيتيه أباه يستعيل بالظهره من الظلام) يالله ظهرني من هني بسررعه ماحب الظلام..
نهيان: ( سايرني بدوون مايعلق بس بعض المرات يتهيأ لي إني اسمع صوت ضحكه خفيفه )..
غبيشه: أقولك بلاك ماترمس لايكون القطوه كلت لسانك..
نهيان: ( لاااااااااااااا تعليق , وأصالن وصلنا عند باب الصاله الرئسيه وقف نهيان ماتحرك)..
غبيشه: شفيك بسم الله ليش وقفت؟؟! يعني عاجبتك القعده فالظلام؟؟! لاتكون دراكوله ياخووي وأنا مادري ( تعمدت أستفزه أبغيه يرمس) ..
نهيان: ( لا تعليييييق ) ..
غبيشه: ( أطلقت سراح ايدينه وقابلته المشكله البقعه ظلام أحس كني قاعده أرمس عمري) أنته مريض ولا فيك حمى أشوف أشوف (يوم قربت منه حسيته فز بس أنا طاف فحطيت ايدي ع يبهته وخده )..
نهيان: ( لا تعليييييق , مجرد أنه رجع لورا خطوه )
غبيشه: لا لا أكيد أنته مب صاحي دامني وصلتك لبر الأمان خلااااص اطمنت عليك رجاءا روح عند الماما ولا تأذيني وأنا عن أذنك برووح بيتنا ( أوني أوني ماكنت خايفه وسيده عطيته مقفايه ورديت بيتنا)..
دخلت بيتنا ع طول توجهت صوب المطبخ بشوف علوم غويه , أول مادخلت تيبست كنه حد صب عليه ماااااي باااااااارد يوم شفت غويه تسوي عصير و..........
غويه: ( أنتبهت لي ) غبووووش وأخيرا يتي تعالي سدي نهيان عني من الصبح يلعوزني ...
غبيشه: أذا نهيان هني من اللي .....................!!!!!!( حسيت الدم تيبس ف عروقي )...
~
~
~
~
~
~
( $ ) من كتابات شهرزاد..
• قصيدة "مازال بداخلي".. ماعرف منو كاتبها.. المشكله إني أحفظ أي شي يعجبني وأجهل من اللي كاتبه.. يمكن هذا إهمال مني.. السموووحه ع القصووور..
^ قصيدة هذا اختيارك لشاعر الكندي...
* مهما يقولون* طبعا غنيه عن التعريف لشاعر الآمير نواف بن فيصل ..
~
~
~
~
نلتقي فالجزء الثالث ..
~$~ لــا حـاصـلــنـ قــربــكـ ولــا مــنــكـ فــكــهـ ~$~
نشع قلبيے من آعظآمـہ
07-07-09, 08:20 PM
.•. ـيّـقَـؤدّ ـآلـرُؤحَ ـقَـدْآمُـهـ .•.
.•. ـآلِـغَـصُـه ـآلِـثَـآنِـيّـه .•.
جديد مواضيع قسم الارشيف
العرض العادي
