المنتدى :
الحوار الجاد
موضوع جدي باسلوب ساخر
بسم الله الرحمن الرحيم
هذاالموضوع من ايميلي ووجدته يحكي الكثير عن واقع بعض النساء وقد حذفت منه الكثير واتمنى ان تبدوا بارائكم لنستفيد
أحد قال سماجهـ..؟
أحد قال مرض..؟
بالفعل هذا واقعن يحوم التسبد وينغص منامات الجن والانس
يااااربييه وتقولون لي خليتس مره وتقولون لي الحريم مب بثراات قسمن الواحد صار يستحي هالوقت يقول انه بنت !
بليلة الخميس وبينما انا منجطله على السرير تسني فقمتن نافقه ومالي من الشيطان طاري وقاعدين انا وجديلتي نغازل بعض من البطره~
قررنا في ساعه فراغ ندق سلف لحدا هالمنتديات النسائيه وماادراك ما المنتديات النسائيهـ!!
,’
اعلان:الحقن يبنات طريقه تخلي الزوج يقول لتس كلام حب خلال 24 ساعهـ <~ياحياه الشقى
عاجل:ابونا معيي علي نسافر للشرقيه بالقيطار
لايفوتك:الليالي الحمراء
طبعا هذا قطره من بحر مابعد خشينا بالعميق..
من تبدا تدخل المنتدى الاوتلقى هاكا "التوقيع" اللي يشوفه العمى ومكتوبن عليه العاب زوجيه !
سارعي قبل نفاذ الكميه"ممنوع دخول المراهقين" ..
همن يتراكضن هالحريم عشان يقشقشن من هالخرابيط وماتشوفون الاغبرتهن بزعم انهن بيطيحن رجالهن هالحين قسمن مادرى عنتس انتي وقراطيستس !!
لعبة العصا المضيئه
عزيزتي لما يطفى الكهرب عليكم ماعليتس الا انتس تقومين وتأشرين بها في عين رجلتس وتقولين انا هناا من باب الظرافه يعني..
**
موضي وهي تسولف مع جارته ام اثير ياكلون فشفاش ويشربون نعناع..ومطيحين سب برجالهم تهمس موضي :مالتس علي يميين يم اثير ان ابونا ماغير يوكلن من .....
واانا يحول دابتن سليمه لااهش ولا انش..
تعدل ام اثير الجلسه وتدق الصدر بحاله هستيريه فتطلق صرخه مدويه
هزهزت اركان البيت ازهلللليه ازززهلييه ازهلييه يامويضي وانا مرت فادي..
ترد موضي هها وش عندتس..
عاد ام اثير مثقفه ودايم على النت قالت شوفي
انا مره جاني زوغة عقل .. ودخلت هكا المونتدى الفوشي .. وقلت بدخل قسم الحياة الزوجيه حيث اني ابي اتثقف حالي حال الحريم قالت موضي : الله واكبر حبكت الثقافه يوم كبرتي وطقيتي الـ 39
أم اثير:اعقبي خليني اكمل كلامي انا منيب مثلتس داقمتن عمري .. اسمعي عاد .. وادخل والقاهم طايحين في شيّن اسمه العاب زوجية
- هاااااااااااو مير تشرق موضي وتهبدها ذيك مع ظهرها .. قالت تقولين صادزه قالت والله منيب اتسذب زد عمرتس شفتيني اتسذب عليتس هاه !!
موضي:لا والله التسذب خيبه بس اخبرتس جحوده وماتطلعين الهرج..
- لامنيب جاحده هالمره بثقفتس..شوفي بس هما لاجا رجلتس تافلن العافيه من العمل عاد انتي انقزي و.......
طررطاخ <~صوت بيالت الشاهي راقعتن بجبهت ام اثير
- وووجع وش جاتس لمختين
-صاحيه انتي صاحيه تقولين هالحتسي وش اللي .. وما... وين اسوي اللي قلتلي بعد عشان يخلين انا والارض واحد..
.. ردت ام اثيرايييييه وصلنا خيير .. اللعبه هذي بتفك العقده ..
قامت وفتحت اللاب توب وقالت شوفي هالالعاب هذي ..
لعبة الشوكلاتة
عندتس لعبت الكوكاو تجي معه هديه ومصاقيل ..ترد ذي اقول هها بس ابونا به سكر قسمن ان ماتعدي نص الليله ولاه طايحن علي (صح يالرومنسيه)
الاكواب المضيئة
اما ذي مدري وش سنعهـ بس لوتبون تسوون لكم فمتو ولا شي وخلص ثلجكم حطيه وسكري اللمبات بس انتبهي لاينفض براطمتس
و لابغيتو تسوون حفله بالظلام وتشربون الاالكيسان مولعه <~تسمع بالرومنسيه
المفرش المضئ
وهذا اذا بغيتي سريركم يولع .. تسنكم في عرس عقودهم فسفوريه شغليها
لعبة الحب بالكريستال
وذي عاااد ازيين لعبه تخليتس انتي و رجلتس تسنكم معاريس..
ركزو لي على همسه ولمسه بالله
موضي شاقه الحيا:هههيهيهي
ام اثير:يحليلتس تستحين
موضي:هها بس اعقلي وعلميني عن هاللعبه
وراحت ذيك تعلمها وتفهمها وكلش .. وخلص الحتسي وكلن راح لبيته .. يطبق هالالعاب لين انكرشن من رجالهن وعرفن ان الله حق..
سااده يعني وشوله الحوسه والقروشه ..؟
ترى البساطه زينه ياحريم البلا لو انها تسوي ليلة رومانسيه على حق وحقيق كان محد نقد عليها لكن العاااب اضائه . وشروخ وصواريخ ونوافير وقمر وشمس
ليه طيب ؟
ماظنتي فيه رجال ينبسط على هالخرابيط من وجهه نظري يجاملها اول مره اذا كان فيه خيير واذا بايعها كرشها وكسر مجاديفها
يعني نصيحة يابنات لا تطاوعون هالنوعيه وقسماً حركات ولامبزرت المتوسطه ..يعني بدال هالقروش اللي تضيعينهن بهالمطاريس سنعي دارتس ابرك
اثاث راقي ونظافهـ ووجه سفر وريحة زينهـ افضل لتس من هالخرااااااابيط الغبنه انهم يلعبون على هالحريم وذولي يصدقن..
اعتقد ان هالحريم الله يصلحهن من زود الفضاوة انبرش على المخ شي من الهبال وصار يسوي
التماس من الفشخرة الكذابة
والا وش حليلة الادمي يسولف بصدق بعيد عن التكلف
خلاص حبيبتي رجلتس ماقصر عليتس خير وبركه بس ليه تنشرين غسيلتس ؟الا بالغصب عطوني عين وتهاوشو مع رجالكم
يعني الواحد يكبر ويعقل والحريم يدحدرن إلى أسفل
أنا ما أشره على الحريم الكبار بحكم إن تعليمهم على قدهم
لكن شرهتي على اللي معهن أعلى الشهادات وما يتعاملن إلا بهالخرابيط اللي مالها لزمه ..
أخيرآ وليس اخرا عزيزتي الحرمه اعيد واكرر البساطه ثم البساطه ثم البساطه كلنا عارفين ان المنتديات فيها الزين وفيها الشين!!
لكن لاتخلين الشين يحوق مختس ..ومب اي وحده تأثر عليتس وحركات حصص الفنيه ونظام ثالث جيم ياليت نبعد عنها..
وش زين الوحده لامن دخل عليه رجله ولاه كاشختن له ومتنظفتن له ومتعطره وطابختن له هاكا الاكل اللي يشق الخشه من زينه يالله من فضلك..
صدقوني مب شايفن غيره الا تسانه هيسن اربد عاد ذي الله يعظم اجره اللي بتاخذه..
والله يرزقنا وياكم الصالح من عباده
************************************************************ *****
وانا من رايي انا هذا الشي خاص بين الزوجين لاتشاركين به احد والمصيبه ان بعضهم تصور غرفة النوم وهي مسوية جو رومانسي وغرفة النوم خاصة لايدخلها حتى الاطفال والا وش رايكم ؟
|
24-06-09, 02:00 AM
جديد مواضيع قسم الحوار الجاد
العرض العادي
