كاتب الموضوع :
غموض الورد
المنتدى :
القصص المكتمله من وحي قلم الاعضاء
الجزء السابع والعشرين
*
*
*
*
{.... صراع مؤلم مع الموت
12 حالة نقلت للمستشفى .. الضحايا كانو في عمر الزهور والمسئول غياب الضمير ..
ريم لفظت انفاسها الأخيرة بسيارة الإسعاف والباقي تتفاوت اصاباتهم ما بين المتوسطة إلى الحرجة...
وصلو المستشفى ونقلو جميع المصابات للطواريء ... اشواق اتصلت على اهلها يجون .. اختها وماتدري
وش اللي صار عليها .. تقدم منهم احد المسئولين بالمستشفى وسألهم اذا يعرفون احد كان باللعبة
اشواق : اي اختي وثنتين من صديقاتها ..
المسئول : للأسف عندنا حالتين وفاة وحدة توفت بالإسعاف والثانية تعرضت لنزيف كبير وماقدرنا نوقفه
انواع الصياح كان بالمستشفى والأمهات اللي كانو مع بناتهم بالملاهي جايين والخوف مالي قلوبهم ...
والاتصالات مستمرة لتبليغ الأهالي اللي ماجو للمستشفى ...
المسئول يكلم اشواق : لو سمحتي اختي ممكن تجين تشوفين اللي توفو يمكن تتعرفين عليهم ...
اشواق وهي تصيح : لا والله اخاف
المسئول : يا اختي الله يرضى عليك انتي بتسهلين علينا المهمة
اشواق تضم امها : مابي اروح .. يمه قولي له اخاف اشوف احد ميت قدامي وهذا يبيني ادور اختي بينهم
ام اشواق : انا بجي معاكم
اشواق تناظر امها باستغراب شلون قوت قلبها مع انها بطبعها حساسة : يمه .. !
ام اشواق : بروح اشوف وارتاح ابي اعرف بس عشان اتأمل ولا أقطع الأمل نهائي ...
المسئول : تفضلي اختي معانا
راحت معاهم ونبض قلبها بكل خطوة يتسارع ولسانها يلهث بالدعاء انها ماتشوف وجه بنتها من ضمن الوفيات ..
وصلت للغرفة ورفعو الغطا تشوف الطفلة اللي قدامها ... اغمضت عيونها بألم وتنفست بعمق ..
المسئول : ياليت تستعجلين يا اختي
ام اشواق بداخلها استنكرت القسوة اللي بقلبه .. وفتحت عيونها ببطء وهالها اللي شافته وجه كله جروح وكدمات وبعد تدقيق : ما اعرفها
المسئول : متأكدة .. ؟
ام اشواق : ايه متأكدة
المسئول : اوكي .. تعالي شوفي الثانية ..
وأول مارفعو الغطا عنها شهقت وغمضت عيونها .. ورجعو غطو جثتها من جديد ..
المسئول : عرفتيها .. ؟
هزت راسها وهي تصيح ولسانها عاجز عن الكلام ..
المسئول ظن انها بنتها : يا اختي انتي مؤمنة بالله
ام اشواق : ابي اتطمن على بنتي تكفى
المسئول ناظرها باستغراب : شلون ؟
ام اشواق : هذي صديقة بنتي
المسئول : اوكي اختي ياليت تعطينا اسمها بالكامل .. لازم نتصل على اهلها ونبلغهم ..
ام اشواق : ما اعرف الا ان اسمها ريم ال ............. بس اسأل بنتي اللي برا اكيد تعرف ...
وبالفعل عرفو اسم ريم بالكامل وبعد عدة محاولات توصلو لرقم جوال والدها ...
**************
بهالأثناء كانت غادة بقمة توترها ومو عارفة شلون تتصرف واتصلت على تركي اللي كان متأخر بالشركة يرجع البيت ضروري ...
ام تركي : يابنتي مو صاير لها الا كل خير بس انتي اركدي واذكري ربك ...
غادة : انا قلت لها كل شوي تتصل تطمني وشوفيها من قبل المغرب للحين ماكلمتني ..
ام تركي : اكيد التهت باللعب لا تشغلين بالك وتشغليني .. ولاتتعبين نفسك وانتي حامل
تركي : وش اللي صاير خوفتيني ؟
غادة التفتت على تركي اللي توه داخل عليهم : تركي ادق عليها الجوال مغلق
تركي : اي جوال ؟
غادة : جوالي ..
تركي : غادة اقعدي وفهميني وربي وقفتي قلبي ..
غادة : قبل ماتروح عطيتها جوالي عشان تكلمني على طول واتطمن عليها .. والحين من قبل المغرب
بدقايق الجهاز مغلق ..
تركي توتر وبان الخوف بملامحه : وصديقاتها ماتعرفين ارقامهم ؟ اي شي بس يطمنا عليهم
غادة وهي تصيح : لا
تركي وهو واقف ولأول مرة يصارخ على غادة : من متى ياغادة ريم تطلع كذا .. من متى تروح وانتي ماتطمنتي عليها ...!
ام تركي : يمه هد نفسك لاتزيدها على اللي فيها يكفيها الهم اللي شايلته
تركي وهو للحين يصارخ : يمه تكفين انا قاعد احاسب زوجتي
ابو تركي : خير ياعيالي وش اللي صاير .. اصواتكم واصلة للشارع
غادة : والله مدري شلون ازعجتني بحنتها وماصدقت تروح وتفكني من ازعاجها ...
تركي : والله والله ياغادة لو صار ببنتي شي .. ماراح اسامحك عمري كله
ام تركي : تعوذ من الشيطان ياتركي
تركي هالمرة عصب وبدون شعور صارخ على امه : يمه انا قلت هذا شي خاص بيني وبين زوجتي
ابو تركي بصوت اعلى : تركي ... !
تركي استوعب اللي يصير وحس بغلطته .. نزل راسه وسكت ..
ابو تركي : ترفع صوتك على امك .. ماحشمتها ولا حشمتني مابقى الا تقوم تطقها ...
تركي : السموحة يبه مادري وش صار فيني .. وراح لامه وحب راسها : السموحة يالغالية ..
ام تركي : مسموح وانا امك بس روح طمن قلب مرتك
ابو تركي : رد على جوالك ازعجنا
تركي : مالي خلقه والله .. رقم ما اعرفه
غادة : رد تكفى هذا اتصل اكثر من مرة يمكن احد يطمنا على ريم ...
تركي وكأنه ماصدق خبر .. انتظر يتصل فيه الرقم مرة ثانية ورد على طول ... : الو
..................... : السلام عليكم
تركي : وعليكم السلام
..................... : الأخ تركي بن عبدالعزيز ال .........
تركي : اي نعم .. من معاي ؟
..................... : ياليت تشرفنا اخوي في مستشفى ............ عشان تشوف بنتك
تركي بخوف : بنتي وش فيها ؟
هنا وقفت قلوب كل اللي بالصالة وغادة قامت مفزوعة : تركي بنتي وينها ..
تركي : زين زين الحين جاي .. والتفت عليهم : ريم بالمستشفى
شهقت غادة : يمه بنتي وش فيها
تركي : مادري انا رايح لها الحين
غادة : انتظرني بلبس عباتي وجاية
تركي : دقيقة اركب السيارة ماجيتي مشيت عنك
ام تركي وهي تصيح : خوذي عباتي اللي عند الباب واسبقونا ..
ركضت غادة بدون تفكير وطلعت لزوجها ..
اما ام تركي صوتت للشغالة تجيب لها عباتها الثانية من غرفتها ..
ابو تركي يكلم بالجوال : غلام بسرعة شغل السيارة بنروح المستشفى الحين ...
وفي غضون دقايق معدودة ركبو مع السواق وتوجهو للمستشفى ...
غادة كانت طول الطريق تترجا تركي يقول لها اي شي يطمنها ..
تركي : غادة ورب البيت علمي علمك
غادة : تكفى واللي يخليك بنتي وش فيها ..
تركي : مادري والله مادري كل اللي اعرفه انها بالمستشفى ..
وصلو المستشفى قسم الطواريء ونزلو ركض يبون يتطمنون على ريم ..
مابين استفسارات واسئلة واجوبة جاهم طبيب كبير شوي في السن ...
يمكن عمره بأواخر الأربعين .. أو اوائل الخمسين : الاستاز تركي ؟
تركي : اي نعم انا تركي .. طمني يادكتور بنتي شلونها ؟
الدكتور : اكيد انت مؤمن بالله وكلنا رح نموت ان كان عاجلا ام آجلا
تركي يقاطعه وكأنه ماسمع شي من اللي انقال : دكتور بنتي وينها
الدكتور : ان شاء الله .. الله بينطيكم غيرا كتير يملو عليكن البيت.. بنتك سلمت روحا للي خلئها ...
غادة على طول طاحت على الأرض مغمى عليها .. وتركي واقق مكانه مصدوم بين هالمصيبتين..
وصلو ابو تركي وام تركي بعدهم بحول الـ ربع ساعة ..
وشافو تركي قاعد على الأرض ودافن راسه بين يدينه ...
ابو تركي قعد جنبه ومسك يده : تركي
رفع تركي راسه وناظر بأبوه وعيونه مليانة دموع ... ولأول مرة من كبر تركي يشوفون ضعفه
وابوه اللي عوده من صغره يكون قوي عشان يتعلمون منه اخوانه القوة ...
تركي بصوت مبحوح : يبه ريم ماتت .. شلون ماتت ومتى ماتت ما ادري .. يبه تكفى روح اسئلهم
ام تركي قعدت على اقرب كرسي وقعدت تصيح مو قادرة تتخيل انه ريم راحت .. اول حفيدة لهم وأول
فرحة انطفت وهي توها بأول سنينها ...
اما ابو تركي اللي كانت صدمته لاتقل عن ولده وزوجته بس حاول يستجمع قوته ويكون السند لهم بمحنتهم : انا لله وانا اليه
لراجعون .. يابوك اصبر واحتسب والله يأجرك في مصيبتك ويخلفك خيرا منها .. لله ما أعطى ولله ما أخذ والحمدلله على كل حال ...
ام تركي : ياويل قلبي عليك ياريم
ابو تركي : اذكري الله يامره وقومي شوفي مرة ولدك وينها لا تزيدين اللي فيها ..
تركي : غادة اغمى عليها ودخلوها العناية ...
شهقت ام تركي وعلا صياحها ..
قرب منها ابو تركي : تعوذي من ابليس يانورة ان شاء الله مافيها الا العافية .. قومي اتصلي على اختك
خليها تجي تشوف بنتها .. وانا بتصل على العيال يجون يوقفون مع اخوهم ...
وبالفعل على طول اتصل على ماجد : السلام عليكم
ماجد : وعليكم السلام .. هلا يبه
ابو تركي : اسمع اللي بقول لك ولا تكثر حكي .. ريم بنت اخوك تركي توفت
ماجد مصدوم : شلون ؟
ابو تركي : اللي قلت لك توفت اليوم وهذانا بالمستشفى تونا عارفين ..
ماجد : لا حول ولا قوة الا بالله .. انا جايكم الحين ..
ابو تركي : اتصل على خالد وجيبه معاك وخواتك لايدرون .. باكر لا اصبحنا علمناهم ..
ماجد : ان شاء الله على امرك طال عمرك ...
ابو تركي : لا تتأخرون وانا ابوك ..
سكر ماجد من ابوه وهو مصدوم لبس ثوبه بدون شماغ وطلع مستعجل حتى قبل مايقول لزوجته اللي بالمطبخ شي ..
اتصل على خالد وما قال له شي بس قال انه بيمره الحين يبيه ضروري ...
تجمعو كلهم بالمستشفى والأجواء كلها حزن ودموع .. طمنوهم الأطباء على غادة اللي عطوها مهدئات عشان تنام و ترتاح ...
***************
من بكرة الصباح لبس بندر وقبل يطلع عد للعشرة وتنفس بعمق قبل يقول لأريج ..
بندر : اريج مو لازم تروحين المدرسة اليوم .. بوديك لأهلك ..
اريج : طيب نروح نتغدا عندهم ليش اروح من الحين ..
بندر ارتبك ومو عارف شلون يمهد لها الموضوع : لا بس مرة اخوك تركي تعبت وكلمني تركي يبيك تجين عندها ..
ارتاعت اريج وحست انه في شي : بندر اهلي فيهم شي ؟
بندر ماعرف وش يقول .. بس اكيد ماراح يكذب عليها : لا والله مافيهم الا العافية ...
اريج : اجل امي مضاوي صح ؟
بندر : لا وربي مافيها شي ... بسرعة خلصيني وراي دوام ...
اريج راحت ركض تلبس عباتها : يارب سترك يارب لا توريني مكروه في اهلي ..
بندر طلع من الشقة نازل لسيارته .. وقلبه معوره على اريج اللي توقعت الكل الا ريم وياخوفه عليها لا عرفت ...
شغل سيارته وانتظرها .. جاته مستعجلة .. ومشو على طول .. وطول الطريق وهي تحلفه اذا امها ولا ابوها او حتى امها مضاوي فيهم
شي وهو يحلف انه مافيهم الا العافية ..
اول ماوصلو نزلت ركض ودخلت البيت شافت امها وخالاتها وفاتن بالصالة يبكون ...
ركضت لأمها مثل المجنونة .. تبي تعرف وماتبي : يمه .. يمه وش فيه
ام تركي : مافي شي يمه
اريج تصارخ : من اللي مات علموني؟
ابوي وينه ؟ امي مضاوي هي صح ؟
فاتن : اريج اذكري الله واقعدي.. ومسكتها من يدها تجلسها ..
اريج ودموعها بعيونها : فتون واللي يخلي لك عيالك علميني ..
فاتن وهي تبكي وتضم اختها : ريم .. ريم اللي راحت يا أريج
اريج صرخت بأعلى صوتها : لاااااااااا ... انتي كذابة
ام تركي : اذكري الله يابنتي
فاتن : ادعي لها بالرحمة
اريج : تنصبين علي ريم امس مكلمتني .. تقول بتروح الملاهي ..
ام تركي : الله يرحمها وانا امك كلنا مصدومين بس الله يصبرنا
قعدو يهدونها وجو باقي البنات وزادت المناحة بالبيت ..
صلو على ريم بعد صلاة الظهر وعدت ايام العزا الثلاث بكآبتها..
غادة اول يومين كانت بالمستشفى وثالث يوم رجعت البيت بس مارضت تنزل لاحد واكتفت انها تقعد بغرفتها ..
بعد العزا باسبوع كانت قاعدة بغرفة ريم تلم اغراضها اللي بيتبرعون فيها للجمعيات الخيرية .. كانت تصيح ونحيبها ينسمع بكل الغرفة ..
................ : الله بيعوضنا ان شاء الله
غادة زاد نحيبها وبدون ماتلتفت له قعدت على الأرض وهي تناظر بملابس ريم : فقدتها وربي فقدت حسها بالبيت ..
مسكها من كتفها .. ولمها بقوة : اذكري الله ياغادة .. الله اللي عطانا ريم بالأول قادر يعطينا غيرها بس
احنا لازم نصبر ونحتسب ..
غادة : مسامحني ؟
تركي : وش عليه .. !
غادة : على اللي صار لريم ..
تركي : اللي صار مقدر من رب العالمين .. لا انا لي يد فيه ولا احد بعد .. وربي كلنا فاقدينها بس وش نقول غير .. قدر الله وماشاء فعل ..
غادة وهي تشم بيجاما وردية كانت ريم تحب دايم تلبسها : يوم درت ان اللي في بطني بنت استانست حيل وكل يوم تجيني تقول باقي كذا وتجي اختي للبيت ...
تركي : الله بيعطينا ريم .. بس انتي احتسبي عند رب العالمين
غادة : وربي ياتركي للحين اسمع صوتها بإذني يوم تكلمني آخر مرة .. وغمضت عيونها وكأنها تسترجع ذكريات ذاك اليوم الكئيب ..
( غادة : هلا
ريم : الووو ماما تونا واصلين ..
غادة : زين كل شوي دقي علي انا قاعدة عند التليفون انتظرك ..
ريم تكلم صديقاتها : زين الحين جايه .. خلاص ماما بروح اقص التذاكر ولا خلصت اكلمك ..
غادة : اذا اتصلتي ومارديت ارجعي دقي يمكن اكون بعيدة عنه ..
ريم : طيب .. مع السلامة
غادة : انتبهي لنفسك ياقلبي
ريم : ماما
غادة : سمي
ريم : راضية علي ... ؟
غادة : اكيد .. وسكرت ريم بعدها )
راضية علي ... ؟
راضية علي ... ؟
راضية علي ... ؟
وكانت هذي آخر كلمة سمعتها منها
قعدت تبكي اكثر : والله راضية عليها .. اللي عمرها مازعلتني ..
التفتت وراها وشافت الدموع بعيون تركي .. وضمته : لا ياتركي الا انت مابي اشوف ضعفك ترى محد يقويني غيرك ..
تركي : انا اهم شي عندي انتي مابيك تطيحين علي مثل اول ..
غادة : ان شاء الله ..
مسكها من يدها يقومها : قومي خلينا نذكر ربنا وندعي لها .. هي محتاجة منا الدعاء ..
قامت معاه وهو يسندها .. وراحو لغرفتهم ... وعسى الله يصبرهم ..
***************
بعد هالأحداث بشهر و 4 ايام ولدت شهد وجابت لهم عبدالعزيز الصغير ...
وهالشي اللي خلا الأفراح ترجع لهم
بعد ما اكتست ايامهم بالسواد الفترة اللي فاتت .. كانو مجتمعين عند شهد ببيت اهلها .. الا غادة اللي
بأيام حملها الأخيرة وماكان لها خلق تطلع من البيت اصلا .. وعبير اللي اعتذرت لشهد ووعدتها تجيها يوم
ثاني ...
اريج : يارب اجيب لي بنت وازوجها عزوز ..
فاتن : كنه وليد مو مالي عينك
اريج : لا عزوز ولد اخوي ..
فاتن : ووليد ولد البطة السودا ؟
شهد : هههههههههه هي تقصد انه يشبه اخوها ..
اريج : اي صح هذي هي ..
ندى : على طول صرفتيها ..
لمى تصوت على جنى : جنى لاتروحين بعيد ..
شهد : خليها تلعب مع البنات ..
لمى : اخاف تغيب عن عيني ويصير لها شي ..
فاتن : لا عاد لا تصيرين موسوسة
لمى : بالعكس انا استودعها الله واتطمن بس ماجد اللي كل ماطلعنا من البيت يوصيني عليها .. وهالشي
يخليني مسئولة عنها ..
ندى : اي بس بعد انتي طول الوقت عينك عليها .. ماعرفتي طعم للقعدة مثل الأوادم ..
فاتن : يمكن لأنه ماعنده غيرها كل همه هي .. بس لا جبتو عيال غيرها بيتغير ..
لمى : والله انه بعد وفاة ريم الله يرحمها صار موسوس اكثر وانتو تشوفون شلون كنتو تجتمعون وما اجي لكم ..
اريج : الله يلوم اللي يلومه .. انا من عقبها من يطلع بندر من البيت الين يرجع وانا يدي على قلبي ...
شهد وهي ترضع ولدها : الله يحفظهم لنا .. بس عاد الواحد لا يصير كذا يستودعهم الله
الذي لا تضيع ودائعه ..
اريج تناظر في عزوز وتضحك : ياحبي له وجهه صار طماطه
شهد : مايبيني احاكي احد وانا ارضعه ...
لمى : يلا انا استئذنكم ماجد جاي بالطريق ..
شهد : وين تو الناس
لمى : ابد تعرفين دوام المدرسة .. وعندي باكر مراجعة في المستشفى
اريج : سلامات ... ؟
لمى : تحاليل روتينية
فاتن : عشان الحمل ؟
لمى : ايه
فاتن : اذا تبين ربي يعطيك اللي تبين الجأي له .. كل شي ماراح يصير الا بإرادته
لمى : ان شاء الله
ندى : ليه عندك مشاكل يعني ؟
لمى : ايه .. عندي ضعف في التبويض وصار لي فترة استخدم منشطات
ندى : يعني مثلي قبل ما اجيب فارس بأول اشهر زواجي كنت استخدم موانع حمل وهالشي أثر
علي وماحملت على طول .. واتوقع انه هالشي اللي مأخر حملي هالفترة
لمى : اكيد بس الدكتورة قالت لي انها مشكلة بسيطة ولها حلول .. يلا هذا هو ماجد يتصل ..
فاتن : الله يرزق الجميع ويفرحهم مثل مافرحني ..
اريج : قولو يارب هالمرة يصير حمل لأني شاكة من اسبوعين وشوي وخايفة انصدم ..
ندى : انا مادري ليه تحبين تكبرين السوالف .. بما انك ماعندك مشاكل وش اللي يمنع ؟
اريج : كثر التفكير صار لي سنة والحمل بالنسبة لي هاجس .. وكل ما افكر اكثر تتعب نفسيتي ..
بس من توفت ريم الله يرحمها نسيت الحمل وانشغلت بحزني عليها..
فاتن : وبندر شلون تفكيره ؟
اريج : بندر دوم مستانس ومستحيل يبين حزنه لاحد حتى انا .. وبصراحة دايم اشوفه يضحك ولا عمري عرفت اللي بخاطره..
ندى : مثل ناصر .. ناااادر اعرف اللي بخاطره ..
فاتن وهي قايمة بتروح بيتها : عادي اغلب الرجال كذا مايشتكون لاحد .. عندي سعود اوقات احسه
متضايق من زوجته بس مستحيل يقول شي ولو سئلته قال مشاكل عمل ..
شهد : مو بس الرجال .. عبير نفس الشي احس يصير بحياتها اشياء بس محد داري عنها ..
اريج : عبير من تزوجت تغيرت واسئليني انا ..
شهد : مايحتاج اسئلك انا شايفة بنفسي وحاسة اوقات اشوفها بقمة سعادتها .. واوقات احسها تعيسة ..
ندى : عبير حساسة .. والرجال مايتحملون البنت الحساسة واللي دمعتها على طرف عينها ..
اريج : لا مو مسألة حساسة كل البنات كذا " وتأشر على نفسها " الا انا طبعا بايعتها .. بس هي رومانسية واكيد رسمت لنفسها
عالم وردي .. وانصدمت بالواقع ..
وانا احس فهد انسان ملول ومزاجي وعملي ..
ندى : الحين انتو تفاولتو على البنت انها تعيش بتعاسة .. ان شاء الله انها مستانسة ..
شهد : ان شاء الله يارب .. بالعكس والله نتمنى لها كل الخير .. " وتناظر في اريج اللي فزت على طولها " وين وين ؟
اريج : زوجي العزيز اتصل ..
ندى : طيب يمكن مابعد جا ..
اريج : الا جا رنة ونص يعني عند الباب ..
شهد : ههههههههه بينكم رموز ؟
اريج : ايه وش دراك انتي .. شفتي رجلي هذا الرومانسية شرق وهو غرب اقول له كلمني قول حبيبتي انا
جاي بالطريق .. او مسج على الأقل يقول لي لا وصلنا البيت اقول لك كلام حلو وش له الخساير ..
ندى : هذا هو يتصل ردي ..
اريج : لا هذي رنتين يعني اطلعي لا اجي واتوطا في بطنك ...
ضحكو البنات عليها وهي راحت ركض لبست عباتها وطلعت له ...
****************
وصلت البيت وراحت لغرفتها غسلت وبدلت ملابسها .. لبست قميص نوم ابيض قصير ولبست عليه الروب
وطلعت له الصالة .. كان قاعد يقلب بالقنوات .. جت وقعدت جنبه : حبيبي
رد بدون مايناظرها : هممم
اريج : يعني مرررة مشغول ؟
التفت لها وابتسم : لا .. وش بغيتي
اريج : زهقانة
بندر : توك جاية من عند مرة اخوك وخواتك ..
اريج : ادري .. بس ودي اغير الروتين ..
بندر وهو يناظر بالتلفزيون : شلون يعني ؟
اريج سحبت منه الريموت وقفلت التلفزيون : ترى من العصر ماشفتك عطني وجه شوي ..
بندر باستهبال : ما اقدر والله مرتبط
اريج : يوووووه بندر عن المصالة عاد اكلمك جد
بندر : لعنبو ابليسك عمرك سمعتي وحدة تقول لرجلها ماصل ؟
اريج : ايه .. انا لأنك ماصل وتنرفز
بندر تربع على الصوفا وحط يدينه تحت دقنه وقعد يطالعها : زين انا ماصل .. قولي وش عندك
اريج : ابي نغير بأثاث البيت
بندر : ليه هذا وش فيه ؟
اريج : صار قديم ..
بندر : تو ماله الا 3 سنوات
اريج : اي بس مليت ودي اجدد
بندر : وليه احد قايل لك بندر قاعد على بنك كل مامليتي من شي غيرته لك ؟
اريج : مو كذا بس احس اني كرهته من كثر ما اشوفه
بندر : احمدي ربك على النعمة بس غيرك حتى فراش مو محصلين ينامون عليه ..
اريج : يعني احرم نفسي عشان غيري مو محصل ..
بندر : لا تحرمين نفسك بس لا تطالعين فوق كلن وامكانياته ..
اريج : وانت كل ماطلبتك شي قلت ماعندي ..
بندر : مو عاجبك يعني ؟
اريج وبدت تعلي صوتها : لا بس ماصارت ترى مليت ..
بندر بقهر : مليتي ؟ ترى مانيب جابرك على شي .. من تزوجتيني وانتي عارفة البير وغطاه ..
اريج : وانت لازم تطلعني غلطانة وانت الصح ..
بندر عصب عليها : اريج انتي سامعة احد مغير بيته وجيتي تغثيني ؟ يابنت الناس هذا بيتك مو عاجبك يفتح الله ..
انصدمت اريج من كلامه .. لأول مرة بندر يقسى عليها .. مهما اختلفو او صارت بينهم مشاكل كان يروح عنها
عشان مايغلط عليها بس هالمرة مامسك نفسه وطلع الكلام قاسي .. تجمعت الدموع بعيونها وقامت على
طول راحت لغرفتها ..
اما هو تندم على كلامه اللي قاله لها هو بحياته ماعمره غلط على احد .. شلون هالمرة يغلط على اغلى الناس
لقلبه .. ماهانت عليه ولا هانت دموعها .. قام تعوذ من الشيطان وراح للحمام ( وانتو بكرامة ) وتوضا وراح لها الغرفة ...
ابتسم يوم شافها منسدحة بدون غطا وكأنها طفلة خذو منها العابها
قرب منها وهمس برقة : اروج
طنشته وماكانت تبي ترد عليه ابد ..
رجع قرب منها اكثر وبعدت عنه : طيب اسمعيني بس ..
قامت وقعدت بسرعة على السرير ودموعها على خدودها : مابي اسمع شي .. ولو سمحت لا تقرب مني ..
بندر : والله ماكان قصدي اللي قلته بس وربي نرفزتيني ..
اريج وهي تشاهق : وانت بعد نرفزتني بس ماغلطت عليك ..
بندر قرب منها وحب راسها : انا آسف وحقك علي بس انتي عارفة توني شاري السيارة ونص الراتب
يروح مابين اقساط للسيارة وايجار الشقة والنص الثاني مابين مصاريف البيت ومصاريفنا يعني من وين اجيب
قولي لي ؟
اريج كسر خاطرها كلامه .. ولامت نفسها على انانيتها مهما كان لازم تراعي ظروف زوجها وماتحمله
فوق طاقته .. وبعد حست انها مستانسة اول مرة بندر يقول لها آسف بالعادة حتى لو صار بينهم
مشكله يقعد يستهبل عليها ويضحكها الين تنسى الزعل : خلاص مابي شي ..
بندر : خلي اوضاعي تتحسن شوي وربي لأعوضك وما أخلي شي نفسك فيه وما اجيبه لك ..
قربت اريج منه وباست خده : الله لا يخليني منك ادري فيك مو مقصر معاي ..
بندر يبتسم لها : يعني خلاص باح الزعل ؟
ابتسمت له بدلع هزت راسها ..
اتسعت ابتسامته اكثر وقال بمكر : ومرة ثانية لاصرتي زعلانة لا تلبسين هاللبس ولا تتحركين واجد
من تحركتي شفت كل شي ..
اريج بخجل : وانت ماصدقت خبر قاعد تطالع ..
بندر : زوجتي حلالي ..
اريج : لا مابي .. لاصرنا متزاعلين لاتطالعني ..
سحب منها الروب وهو يضحك عليها : مو بكيفك اصلا ...
ضحكت من قلب وضحك معاها .. وتصافت قلوب عمرها ماعرفت الكره والحقد ...
****************
قاعدة المغرب في جناحها .. مزاجها مقفل .. وفهد طالع من البيت وماتدري وينه فيه .. فكرت تتصل في بنات خالها منها تسلم عليهم ومنها تضيع وقت ..
وفعلا كلمت هديل ومرام .. بعد ماسكرت منهم اتصلت على نوف اللي صار لها فترة ماكلمتها ... : مساء الخير ..
نوف : اهلين مساء النور
عبير : اخبارك ياقاطعة مرة وحشتيني ؟
نوف : تمام
عبير استغربت نبرة نوف الجافة شوي : ماقلتي لي آخر اخبارك
نوف : مافي حاجة جديدة والله
عبير : انا متصلة في وقت مو مناسب ؟
نوف : عادي
عبير حست انه في شي بخاطر نوف وحبت تعرفه وترتاح : نوف ايش اللي صاير ؟
نوف : مافي حاجة بس ليه متصلة على تليفون البيت
عبير : عادي اكلمك
نوف : كنتي تقدري تتصلي على جوالي
عبير وكأنها فهمت السالفة : ليه يعني وش يفرق !
نوف : كنتي متوقعة حاتم اللي بيرد صح .. ؟
عبير بكل برود : لو كنت ابغى حاتم اتصلت على جواله بس انا اتصلت اسئل عنك وياليتني ما اتصلت ..
يلا باااي
قفلت منها وهي مقهورة .. يمكن مو كله زعل بس ليش بعض الناس تفكيرها سقيم ..
كان ودها تقول كلام اكثر لنوف بس ماتدري ليش اوقات تكون سلبية ويضيع حقها ..
اخذها التفكير وماحست بنفسها الا على صوت أذان العشا .. قامت تجددت وصلت .. ونزلت تبي تشوف اليوم وش طابخين عشا .. وهي بالمطبخ سمعت التليفون الثابت يرن
راحت ترد .. : هلا
............... : هلا بك عبير شلونك ؟
عبير : مين جود ؟
جود : ايه ( جود بنت ام نايف جيران ام فهد من 8 سنوات .. عمرها 24 سنة مخطوبة لولد خالتها اللي
متخرج من الجامعة والحين يكمل سنتين في الكلية الأمنية وبعدها يتم زواجهم ... )
عبير : اهلييين .. انا تمام انتي كيفك ؟
جود : بخير الحمدلله وين الناس ماعاد نشوفك
عبير : والله عارفة اني مقصرة بس انتي عارفة التدريب وما افضى الا خميس وجمعة يادوب الاقي وقت اشوف اهلي ..
جود : معذورة ياقلبي .. بس عاد باكر مانيب عاذرتك مسوين حفلة بمناسبة رجعة اخوي وزوجته من كندا ..
عبير : ماشاء الله تخرج ؟
جود : اي الحمدلله .. الله وفقه وتوه واصل من يومين
عبير : مبروك والحمدلله على السلامة
جود : الله يسلمك .. خلاص لازم تجين ..
عبير : ان شاء الله اكلم زوجي وارد لك خبر
جود : على خير ان شاء الله .. واكيد ماراح يعارض احنا جيران وخالتي ام فهد بعد جاية ..
عبير ابتسمت لفهد اللي توه داخل : خلاص من عيوني
جود : زين سلمي على خالتي ونشوفك على خير .. مع السلامة
عبير : مع السلامة " والتفتت على فهد " ماتبغى تبدل ؟
فهد : شوي مو الحين
عبير : ليه بتطلع كمان
فهد : لا مانيب طالع .. في قهوة جاهزة
عبير : مادري بروح اشوف
فهد : لا والله ونعم الزوجة
عبير انقهرت من كلامه بس طنشت هو دايم يحب يستفزها من هالناحية
حصلت القهوة جاهزة .. خذتها وطلعت له بالصالة وشافته يكلم بالجوال ..
فهد : يالله اكلمك وقت ثاني .. مع السلامة .. وسكر
عبير : مين هذا ؟
فهد : وانا سئلتك من تكلمين عشان تسئليني
" لا هذا شكله اليوم ناويها مشاكل " قالتها عبير في خاطرها : لا
فهد : خلاص لا تسئلين
عبير : طيب مو مشكلة بس ليه مارحت سلمت على امك اول ما دخلت
فهد : عبير واللي يسلمك ترى راسي مصدع لا تكثرين اسئلة ..
عبير : من جد منت طايقني اقوم اشوف العشا احسن
فهد مسكها من يدها قبل تروح : من هاللي ماعنده ذوق مو طايقك
عبير مبوزة : اسئل نفسك تكلمني من راس خشمك ..
فهد : يعني توك تعرفيني .. والله اني مصدع وزهقان بس صبي قهوة خليني اروق ..
صبت له القهوة وقعدت معاه يسولفون ونفسيتها مو ذاك الزود من مكالمة نوف واسلوب فهد معاها ..
****************
راجعة من المدرسة هي ومجموعة مدرسات .. وصلو 4 لبيوتهم ومابقى الا هي ووحدة معاها : مستعجلة ؟
البندري : لا عادي ليش
اريج : بس ابي امر الصيدلية باخذ غرض .. والله مو مطولة ..
البندري : اي مو مشكلة خليني انا بعد انزل اخذ لي كم غرض ..
اريج تكلم السواق : يا ابو محمد وقفنا عند اول صيدلية
ابو محمد : ابشري
البندري تقصر صوتها وتهمس لأريج : تست حمل ؟
اريج : ايه
البندري : الله يكتب لك حمل يارب
اريج : وياك يارب
البندري : لا تكفين عندي 3 ومشيبين راسي خليهم يكبرون شوي
وصلو الصيدلية وخذو اغراضهم وبعدها رجعو كل وحدة لبيتها ...
دخلت اريج البيت ومن قلبها تدعي ربها هالمرة يكتب لها حمل .. ومع انه كل الدلائل تشير لحملها بس تبي تتأكد احسن ...
سوت تست الحمل وقعدت تنتظر واول ماشافت النتيجة ايجابية طارت من وناستها وانتظرت بندر يجي وتفرح قلبه ..
راحت المطبخ وفكرت تسوي شي سهل وماياخذ وقت .. سوت لها مكرونة بالجبن في الفرن وسلطة خضار ..
قعدت تغسل مواعين الطبخ وتأكدت ان المكرونة جاهزة .. خلتها بالفرن وراحت غرفتها تتسبح ..
خذت لها دش سريع في اقل من 10 دقايق ولبست لها جلابية مغربية لونها زيتي لمت شعرها ورفعته
وتركت خصلات نازلة على وجهها حطت روج لحمي خفيف ورشت شوي عطر وطلعت للصالة ..
استغربت شلون بندر تأخر عليها مو بالعادة .. اتصلت عليه ومارد رجعت اتصلت مرة ثانية وبعد مارد ..
وقبل تتصل ثالث مرة الا تسمع صوت تحريك المفتاح في الباب ابتسمت له وهو داخل ..
بندر : السلام عليكم
راحت له وخذت منه اللبن والجريدة : وعليكم السلام .. وينك تأخرت روعتني والله
باس خدها وهو مبتسم : تأخرت بالعمل شوي .. ومايحتاج اوصف لك زحمة الرياض .. ويوم تدقين علي
كنت ابركن السيارة ..
اريج : زين غسل وبدل بسرعة بحط الغدا
بندر وهو مازال مبتسم : حاضر على امرك يالشيخة .. وراح الغرفة ..
اما هي فرشت سفرتها في الصالة وحطت صحون الأكل واللبن وصوتت له يجي الغدا ..
اول ماجلس كان للحين مبتسم : ماشاء وش هالذرابة والسنع اليوم كاشخة مع اني متعود اشوفك بحوستك
اريج : ياويلك من الله لا تظلم بختي معاك .. اوقات ارجع من المدرسة كارهة نفسي بس بالعادة اكشخ لك
بندر يحارشها : ايه صادقة صادقة .. قولي بعد انك كل يوم تطبخين الغدا
اريج : لا والله الكذب خيبة بس عاد مانيب مقصرة ..
بندر : لا اشوا هاللي شفته خلاني اهون هالفترة عن فكرة الزواج
شهقت اريج وناظرته : وشو .. وشو بعد سمعني ..
بندر مات عليها ضحك : تو كنتي ناعمة وش زينك مسرع قلبتي
اريج : مادري .. بس علمني انت تقول بتعرس ؟
بندر : صاحية انتي .. انا يالله اقدر اصرف على بيت تبيني افتح بيت ثاني الا كانك رضيتي اسكنها هنا
اريج : احلف بس ؟ تبيني اذبحها واذبحك وراها
بندر : ياعمري عليها تغار .. والحين يوم انك تغارين تنصبين علي وتقولين ماتغارين ليش
اريج : ما أغار بس ما احب احد ياخذ مكاني ..
بندر : هي نفسها لا تكابرين
اريج : ياحبك للمحارش بس
بندر : اي بس احبك اكثر
اريج وهي تاكل بالسلطة : حبيبي
بندر : كم تبين ؟
اريج : وانا ما ادلعك الا ابي فلوس
بندر : مادري قلت اختصرها وافكك من الاحراج
ابتسمت له برقة : لا ابي اقول لك شي بس بعد الغدا
بندر : وشو
اريج : لا خلصت غداك قعدنا وعلمتك ..
كملو غداهم وقامت اريج شالت الصحون وغطت صحن المكرونة ببلاستيك وحطته بالثلاجة .. ورجعت
قعدت معاه بالصالة ..
بندر : هاتي موضوعك
اريج : انا حامل
بندر وهو يطالعها بفرح : قولي والله
اريج : والله العظيم انا شاكة من اسبوعين ونص يمكن بس كنت مترددة واليوم تأكدت
بندر : رحتي المستشفى يعني ؟
اريج : لا بالبيت
بندر : طيب قومي نروح المستوصف الحين نتأكد
اريج : الحين ؟
بندر : ايه نروح لأقرب مستوصف خاص
اريج : خله بعد المغرب
بندر : ابد مافيني صبر تكفين ابي افرح وافرح اهلي
اريج قامت على طول ولبست عباتها
وراحو لأقرب مستوصف .. سوو كل التحاليل وطلعت النتيجة مثل ماتمنوها .. وكعادة الأخبار الحلوة لازم يعرفونها كل الحبايب والكل بارك لهم ...
****************
تجهزت بعد المغرب ولبست عباتها ونزلت تحت تشوف خالتها تروح معاها ..
راحت لها غرفتها لقتها جاهزة وقاعدة على كرسي صلاتها تسبح وتذكر ربها .. : هاه يا أمي خلصتي ؟
رفعت راسها وشافتها لابسة عباتها وخالصة : ايه يمه مشينا
عبير : كلمت السواق يوصلنا
ام فهد : وراتس كلمتيه البيت ماهوب بعيد
عبير : بس تعب عليك المشوار ..
ام فهد : الله مير يوفقتس يابنيتي ..
وسندتها عبير عشان تقوم ومسكتها من يدها وظهرها تمشيها : والله مافيني حيل اروح بس ام نايف غالية علي ومبطية مارحت لها ..
عبير : ماعليه اذا حسيتي بتعب نرجع البيت ..
راحو لهم ودخلو عندهم واستقبلوهم بروحهم الحلوة والترحيب الحار ..
قعدت عبير جنب خالتها واستانست معاهم بالقعدة بالرغم انها ماتعرف الا جود وخواتها وقريباتهم اللي شافتهم عندهم كذا مرة ..
بس اللي كان اغلب الوقت شاغل تفكيرها غياب فهد المتكرر عن البيت .. اللي حسته هروب منها ..
وبدون تفكير دورت له مسج حلو وارسلته له ..
( ممكن أسأل؟؟
ليه أحبك؟؟!
ليه قلبي راحته في حضن قلبك..
ممكن أعرف؟؟
ليه أيامي بلا وجودك تموووت؟؟
وليه أحلامي بلا نورك تموووت؟؟
وليه من دونك يغطيني الحزن؟؟
ويسجن شعوري السكون؟؟
ليه أضيع إن كنت غايب؟؟
وليه أشوفك كل أهلي.. وكل ناسي..والحبايب؟؟
ليه أشوف الدنيا ورديه معاك.؟.
ليه أحب إني أكون نجمة تضوي في سماك؟؟
وليه أشوف الوقت وردة ذااابلة لوغبت يوم؟؟
وليه أحسك جنتي؟؟
والهنا بقربك يدووم..
ليه أشوف الناس من بعدك سراااب..
وليه أشوف الحب من بعدك سراااب..
ليه يحييني حضورك..
ويقتل أيامي الغياااب..
ممكن أعرف ليه أحسك كل كلي؟؟
شمسي إنت..وإنت ظلي..
ممكن أسأل..
وممكن أعرف..
ليه كل هذا ياخلي؟؟
ليه أحبك وبكل حالاتك أبيك.؟.
بهدؤك .. بإنفعالك
وبجنونك .. مهتويك
ليه أحبك خفقة الروح اليتيمة؟؟
وكل أحلامي القديمة؟؟
وأسرار تخفيها عيوني..
بس ماتخفى عليك..
إيه أحبك
بغروري ،، وبشموخي ،،
وبعنادي اللي طوعته بيديك،،
وبكثر جورك ،، وبحنانك ،، ودافي إحساسك وأمانك ،،
لانثرته من أجيك..
إيه أحبك
وتوي دريت إن الهوى حده خطير
يقدر يغير في ملامحنا الكثير
إيه أحبك
ووحدك حبيبي يامواني كلها حب ودفا..
إيه أحبك وأفقدك لما تغيب...
أحبك ... )
انتظرته وماجاها رد .. قامت للعشا تعشت وغسلت وقعدت تسولف مع البنات وتضحك ..
رجعت للمجلس بعد ماراحت خالتها للبيت مع الشغالة وهي حلفو عليها البنات تقعد معاهم ..
شافت جوالها وحصلت مسج ابتسمت لأنها توقعته من فهد وبالفعل كان منه ..
( وانا بعد احبك موت ) ...
يمكن كان مسج بسيط وكلماته قليلة بس يكفي انه شي بخاطر اغلى ناسها ..
........... : وفرو غزلكم لارجعتي البيت
شالت عينها وشافت جود تطالعها وتضحك : يعني مجلستني عشان تعلقي عليه ؟
جود : هههههههههههه لا والله ابيك تجين الصالة مع البنات .. طلعت معاهم بالصالة وقعدت للساعة 12
وخمس وبعدها استئذنتهم بعد ما كلمها فهد وقال لها ترجع البيت ..
رجعت لبيتها وقعدت سهرانة مع فهد للساعة 2 وعقبها نامو ..
**************
من صحت من بدري وهي كارفة عمرها بتنظيف البيت .. وهي تنظف جنى وراها وين ماتروح : جنو اركدي
لاتطيحين وتعورين
جنى : لا ما اطيح ابي اسوي مثلك
لمى : زين بس لا تركضين الأرضية كلها صابون ..
جنى كل ماشافت لمى تسوي شي سوت مثلها وقاعدة تسولف عليها ..
لمى : جنو لا تغسلين من هناك انا مخلصته لا تحوسين الدنيا علي ابي اخلص قبل يجي ابوك
جنى : طيب علميني وين اغسل
لمى : انتي اقعدي انا بغسل خلاص باقي لي شوي بس ..
جنى بعناد : لااااا مااابي
لمى طنشتها وكملت تنظيف .. وبعد ماخلصت شافت جنى تحوس بالصالة : جنو انا وش قلت لك
جنى : انظف التلفزيون
لمى ودها تطقها : يااااربي انا منظفته وملمعته وانتي وسختيه روحي الغرفة الحين بجي لك اسبحك
طبعا الأخت تبي تسوي كل شي من
نفسها .. وراحت ركض للغرفة ..
لمى وهي رايحة غرفتها : جنو لا تسوين شي الين اجي لك ..
راحت وتسبحت وطلعت بروبها تبي تسبح جنى .. سمعتها تصيح بالحمام ( وانتو بكرامة ) وركضت تروح لها
بس حصلت الباب مقفول .. : جنى
جنى من الداخل تصيح : ماما ما اقدر افتح الباب
لمى تطمنت يوم سمعت صوتها وعرفت انه مافيها شي : طيب ياقلبي لا تصيحين مو زين تصيحين بالحمام ...
جنى بعد ماخف صياحها : ابي اطلع والله اخاف
لمى : ياقلبي حركي المفتاح ويفتح الباب
جنى حاولت تحرك المفتاح .. بس الباب مو راضي يفتح معاها وبدت تصيح مرة ثانية : مايبي
لمى توترت : مثل ما قفلتيه سوي نفس الشي بس بالجهة الثانية ..
حاولت بعد بس حست انها مو فاهمة
لمى : هاه عرفتي شلون ؟
جنى : لاااا
لمى راحت تدور مفتاح سبير وكل شوي يزيد قلقها على جنى ..
اتصلت على ماجد وقالت له يجي ضروري .. وراحت عند باب الحمام تسولف لجنى ..
جا ماجد ومن وصل وعرف السالفة ما ارتبك ولا توتر : جنو
جنى : بابا طلعني من هنا
ماجد : طيب ياعيون بابا .. جنو اسحبي المفتاح طلعيه " وجنى معاه بكل خطوة " الحين وينه فيه؟
جنى : معاي بيدي
ماجد يبيها تشوف يده من تحت الباب : زين تشوفين يد بابا ؟ تحت
جنى : ايه
ماجد : حطي المفتاح بيدي ... حاولت بصعوبة توصل المفتاح لأبوها اللي قدر يسحبه ويفتح لها الباب ... وعلى
طول من طلعت راحت ضمت ماجد وهي مستانسة .. ولمى تطالع فيهم مبتسمة ...
التفت لها : وش فيك ؟
لمى : الحين قاعدة ساعة احاول وقلبي وقف خوف عليها وانت بدقيقة فتحت الباب
ماجد : هههههههههه غيرانة يعني
لمى : لا بالعكس معجبة
ماجد : اجل تعلمي مني ..
رفعت حاجب تطالعه .. : قول والله
ماجد : والله جد .. في المواقف الصعبة لا تتوترين ولا تستعجلين عشان تقدرين تتخذين القرار الصح
لمى : ومنك نستفيد " وتطالع بجنى " يلا جنو اسبحك
جنى شوي وتصيح : لاااا اخاف
ماجد : شوفي المفتاح معاي .. لاتخافين ياعمري ..
مسكتها لمى من يدها وسبحتها وعقب لبستها .. وراحت هي تلبس بعد ..
ماجد : لا تتعطرين بنطلع نتعشا برا
لمى ابتسمت له : مو تعبان ؟
ماجد : لا عادي .. خلينا نطلع نغير من جو البيت
لمى : زين .. اسبقني وانا الحين جاية
ماجد : لمو
لمى : عيونها
ماجد : على طاري عيونك .. امسحي الكحل قبل نطلع ..
لمى : ههههههههه طيب
ماجد : الاسبوع هذا او الجاي بناخذ اجازة لانفسنا .. بطلع انا وياك اي مكان تبين ..
لمى استانست بهالخبر كثير : والله ؟ كم يوم
ماجد : 5 ايام
لمى : حلو اجل نروح عمرة ..
ماجد : ماتبين نخليها برمضان ؟ ماباقي عنه الا شهر و 9 ايام
لمى : نروح الحين انا وانت ونروح برمضان كلنا ...
ماجد : ماراح اقول طماعة .. وربي ان الروحة لمكة ترد الروح .. خلاص تم .. يالله باخذ جنى والحقينا
لا تطولين .. ولا تنسين امسحي الكحل ..
ضحكت عليه .. وهو سبقها للسيارة وبدقايق الانتظار رجعت له ذكرى زوجته ملاك .. مثل هالموقف
جمعهم .. خططو ياخذون اجازة لانفسهم ويبعدون عن العالم .. بس ملاك بعدت وراحت لعالم آخر عالم
الأموات ..
لمى : مطولين ؟
استوعب وضعه ابتسم لها وانطلق هو وزوجته وبنته .. تعشو واستانسو ورجعو بعدها للبيت بدلو
ونامو ...
**************
بالفترة الأخيرة كثر تشكيها على اللي يسوى واللي مايسوى .. وكل شوي تقول له انت ماتحبني وانت
مقصر معاي وماتسمعني كلام حلو وعلى هالموال كل يوم .. لدرجة انه صار يزهق من قعدة البيت ويفضل
يقضي الوقت مع اخوياه وبالاستراحة اريح له ولراسه بعد ..
اليوم متأخر جات الساعة 1 الا عشر وللحين ماجا واذا اتصلت عليه مايرد مع انه محذرها اذا في شي ضروري
ترسل له مسج بس هي صارت ترسل له مسجات تعاتبه فيها ..
وبقمة تنرفزها منه .. شافته توه داخل : بدري كان تأخرت اكثر .. ماتحس انت ؟ زهقت وانا انتظرك
رد عليها بكل برود : وانا ما قلت لك انتظريني .. نامي ريحي نفسك وريحيني من ازعاجك ..
ندى : الحين انا صرت مزعجة
ناصر : اي مزعجة وغثيثة وكرهتيني بحياتي ..
ندى جرحها كلامه وبدت الدموع تتجمع بعيونها : قول انك كارهني بعد
ناصر : انا كرهت القعدة بالبيت بسبتك من ادخل البيت الين اطلع وانتي يومك كله تتشرهين وتطلبين
ترى مليت من هالعيشة
ندى : هذا انت ترمي الغلط علي
ناصر : مارميت الغلط عليك بالعكس اكثر من مرة حاولت ابين لك اخطائك ابيك تتعلمين بس للأسف
انتي انتي ماتغيرتي .. انسانة متطلبة وكله تتشكين .. " شاف
دموعها بدت تنزل بس كمل كلامه "
دايم تبيني اتغير عشانك .. وانتي عمرك كلفتي نفسك تتغيرين عشاني ؟
ندى : بس انت عمرك ما اشتكيت
ناصر : لاني احبك مثل ما انتي .. حتى عيوبك اتقبلها واتغاضى عنها .. واذا انتي زعلانة لاني ما اعبر لك
عن حبي .. متى آخر مرة سمعتيني كلمة حلوة .. انا مو جاي اعاتبك بس حبيت ابين لك اللي تجهلينه ..
لا تظلمين بختك ولا تظلميني معاك
ندى : بس
قاطعها بحزم : لا بس ولا شي انا مابي اقول كلام متكلف ومكرر اذا قلت احبك بيوم قلتها من قلب وانا
متأكد انها توصل لقلبك .. ندى افهميني انا مابي تصرفاتك تكرهني حتى فيك انتي ..
ندى : يعني وش تبيني اسوي ؟
ناصر : خلي حياتنا تمشي مثل ماكتبها ربي .. لا تدققين بتتعبين وتتعبيني معاك ..
ندى : انا مو قصدي ازعلك واول مرة ادري ان كل هذا بقلبك ..
ناصر : مانيب زعلان بس ابيك تعرفين انتي بس اللي تقدرين تخليني احب قعدة البيت .. والله اني
اوقات اروح مالي خلق بس عشان ارتاح من حنتك
ندى اللي هدت كثير وحست ان كلامه غير اشياء كثير بداخلها : ماتحس انك ماخذ راحتك وتحش فيني
ابتسم لها : مو قصدي احشك انا قاعد اوجهك .. وانتبهي لاتكونين من النساء اللي يكثرن
الشكاة ويكفرن العشير ..
ندى لأول مرة على كثر مشاكلها مع ناصر تحس انها فعلا غلطانة .. وانها لازم تتعلم من اخطائها وتكون
اكثر مرونة عشان تتقبل ناصر مثل ماهو مادام ماقدرت كل هالمدة تغيره لازم تعود نفسها على تقبله بكل
عيوبه لأنها تحبه ...
**************
اريج مسوية حفلة بسيطة مجمعة فيها كل صديقاتها .. اللي جمعتها فيهم الدراسة او اللي الحين معاها
بالمدرسة .. وعازمة قريباتها وخواتها ... وكلهم كانو عندها من بدري عشان صديقاتها بيجون بعد
المغرب ولازم يكونون باستقبالهم ..
غادة من توفت ريم ولأنها بآخر حملها ماصارت تطلع ابد من البيت .. حتى بجمعاتهم ببيت ابو تركي كانت تقعد بجناحها ..
وشهد لأنها بالأربعين ماتقدر تجي للحفلة غير كذا كل البنات جو من العصر الا عبير اللي قالت انها راح تتأخر شوي لأنها ماتطلع بدري من المستشفى واليوم اربعاء ...
اريج : فتون هذا الحلق ماشي مع لبسي ؟
فاتن : لا مو كثير .. بعدين هذا مكلف دوري شي انعم
اريج : دوري لي انتي بروح اشوف القهوة ..
فاتن : مانيب فاضية بوزع صحون الحلى ..
اريج : يااااربي بتخلص الصلاة ويجون وانا توني ماخلصت ..
مشاعل وهي تفصخ الجلال اللي صلت فيه : انا ادور لك بس وين حاطة اكسسواراتك ..
اريج : بالسلة اللي على التسريحة .. وفي بثاني درج على اليمين .. الظاهر عندي حلق تركواز ..
البنات كملو كل الترتيبات اللازمة .. وصارو بس ينتظرون ضيوف اريج يجون ..
وبالفعل كل البنات اللي عزمتهم جو ولبو دعوتها ..
بمكان ثاني كانت عبير تقريبا جاهزة بس تنتظر فهد يطلع من صلاة العشا عشان يوديها .. شافت
نفسها بالمراية وتأكدت من جاهزيتها .. لبست عباتها ورمت الطرحة على كتوفها وناظرت بنفسها
بعين الرضى ..
قفلت جناحها ونزلت تحت .. على طول توجهت لغرفة خالتها اللي كانت تصلي العشا وقعدت عندها
ام فهد : للحين مارحتي ؟
عبير : جالسة استنا فهد .. لسى ما جا
فهد : من قال اني ماجيت ..
عبير ناظرته وابتسمت : دوبك جاي ؟
فهد : ايه يالله اوصلك لا تتأخرين عليهم ...
عبير : اوكي .. يلا مع السلامة يا أمي .. انتي نامي الحين واذا احتجتي حاجة سنتيا هنا .. انا وصيتها
تنتبه لك ..
ام فهد : ماعليتس يابنيتي انا لا حطيت راسي مايقومني الا صوت المذن ...
فهد : ياجعله نوم العافية يمه
ام فهد : الله يعافيك ياوليدي ..
راح لها حب راسها واستئذنها وطلع هو وعبير يوصلها ...
عبير اليوم كان جوها رايق وفهد نفس الشي .. والطريق من بيتهم لبيت اريج كان كله وناسة وسعة
صدر ..
وصلت اخيرا وقبل تنزل حب انه يغازلها شوي .. : عبورة
عبير : هلا حياتي ..
فهد : تدرين عاد انك طالعة قمر اليوم ..
عبير استانست من قلب : عيونك الحلوة حبيبي ..
فهد : عاد شوفي بعد ماترجعين بنكمل السهرة بالبيت وانتي بنفس هالكشخة ..
عبير : ان شاء الله
فهد : يالله انزلي لا تتأخرين عليهم
عبير : اوكي .. انتبه لنفسك حبيبي
فهد : وانتي بعد ..
ونزلت من السيارة .. ودخلت العمارة متوجهة لشقة اريج بالدور الثالث ..
دخلت وسلمت على خواتها وبنات عمها
فصخت عباتها .. وتأكدت من كشختها وتعطرت ودخلت المجلس تسلم على الضيوف وهي مبتسمة
وغمازاتها اللي بخدودها زادت جمالها جمال .. كانت تسلم على كل وحدة
وتسئل عن احوالها ... الى ان وصلت لوحدة تعرف ملامحها زين .. هالملامح
اللي اخفت ابتسامتها وحولتها لعبوس .. تسارعت نبضاتها .. وماعاد حست بالكون حولها .. وماتدري شلون كملت سلام على الكل وقعدت
وهي تحس نفسها مخنوقة .. والمجلس ماعاد فيه اكسجين تتنفسه ...
*
*
*
*
انتهى الجزء السابع والعشرين
لا تحرموني تفاعلكم اللي عودتوني عليه
امنياتي القلبية لكم بالسعادة والسرور ..
•غٌـمـوضٌ ـآٍْاْلٍْــورد•
|
11-10-09, 04:27 AM
.gif)
جديد مواضيع قسم القصص المكتمله من وحي قلم الاعضاء
العرض العادي
