الجزء الثالث والعشرين
*
*
*
*
*
*
من ياخذ الدمعة لعينه ويعطين ..
.. بسمة أمل واعطيه في الناس همي
من خط لي في داخل القلب حرفين ..
.. حرفين عز وذاك يفداه دمي
ماغيرها تاجي على حاجب العين ..
.. أمي ولا أحد في العرب غير أمي
بعد انتظار طال امده ... نجحت عملية ام فهد والحمدلله بس للحين
حالتها مو مستقرة..
ابو تركي: فهد خذ مرتك وروحو ارتاحو لكم شوي..
فهد التفت لا بو تركي والتعب مبين على وجهه :وين اروح وامي
طايحة بالمستشفى
ابو تركي: وقعدتك بالمستشفى مابتغير شي ارتاحو وتعالو بعد صلاة
العصر
فهد: انا مرتاح عند امي.. اذا عبير تبي تروح خل واحد من اخوانها
يوديها..
ابو تركي: اللي تبيه ..
فهد اسند راسه على الجدار وغمض عيونه ... وكل تفكيره بأمه الغالية
صحيح انها ولدته وهي بآواخر الاربعين وطول عمره بطفولته ومراهقته
كان يشوفها تكبر بالسن قدامه .. وكل مادعا لها بطولة العمر .. تقول له
انه مابقى من عمرها شي وتبيه بس يدعي لها بحسن الخاتمة.. بس محد
يرضى على امه .. محد يبي يفقدها ولو وصل عمرها للمية ,, يكفي
ريحتها .. ووجودها في البيت .. يكفي دعاها بالروحة والجية.. وحنانها
اللي عن الدنيا يكفي...
وبزخم هالمشاعر ... ماحس الا بلمسة يد على كتفه : قوم نشوفها بالعناية
فهد: شفتها انت؟
خالد: لا توني بروح لها ..
قام فهد بسرعة..رايح يبي يشوف امه..كانو سامحين لهم يدخلون يشوفونها
بس اثنين اثنين ولازم يلبسون لبس خاص لمثل هالزيارة ..
دخل لها لحاله .. ومن شافها والاجهزة حولها انفجر صياح.. دموعه نزلت
غصب ..من اول كان كاتمها بصدره .. بس لاجل اغلى الناس امه تهون
دموعه...ودعا لها من قلب صادق ربي يشفيها ويقومها بالسلامة ..
ماهان عليه يشوفها بهالمنظر اللي يكسر الخاطر ... قعد جنبها ومسك
يدها ... وقعد طول الوقت يناظرها ويدعي لها ربي يشفيها ويقومها بالسلامة
أنا يمه رهن طوعك ومن يسراك إلى يمناك
ولو ما طاوعت كفي أقص الكف لو تعصاك
أنا يمه إذا ضاقت بي الدنيا أجي وألقاك
أجي وأبكي على صدرك ولا أرتاح إلين ألقاك
**************************
ايام عدت وتحسنت حالة ام فهد .. ولو انهم مخلينها بالمستشفى هالفترة
للراحة لأن اي تعب ممكن يأثر عليها ..فهد مازال مهموم من اللي صار
لامه... واحساسه انه بلحظة كاد يفقدها .. راح لها هو وعبير المستشفى
وقت الزيارة العصر ..
دخلو عندها الغرفة وكانو توهم اول الواصلين..راح فهد لامه حب راسها
ويديها ... : سلامتك يالغالية.. شلونك اليوم؟
ام فهد بصوت منهك من المرض: الحمدلله على كل حال..خواتك وينهم؟
فهد: اكيد جايين بالطريق.. وش قال لك الدكتور اليوم
ام فهد: والله وانا امك يرطن فوق راسي مدري وش يقول
فهد: زين بروح اشوفه الحين .. واستأذنهم طالع
عبير قربت من ام فهد: ماشاء الله اليوم احسن..
ام فهد: الحمدلله يارب...
.............: السلام عليكم
ناظرت عبير جهة الباب شافت ام تركي جاية..هي وخواتها ..شوي وجو
البنات ومافضت الغرفة من كثر اللي يزورونها ... واكيد انسانة محبوبة
مثل ام فهد .. بيكونون كثير اللي بيجونها ...
فهد اللي راح للدكتور من وقت اللي طلع من عند امه .. انتظره بمكتبه
الين ماجاه:السلام عليكم
فهد: وعليكم السلام هلا دكتور
الدكتور: هلا بك ..شفت الوالدة اليوم؟
فهد: ايه توني جاي من عندها .. شلونها يادكتور
الدكتور: لا الحمدلله وين كنا والحين وين صرنا .. تحسنت حالتها كثير
فهد: اللهم لك الحمد .. يعني متى بتكتب لها خروج ؟
الدكتور: يومين ثلاث بالكثير ... بس اهم شي تهتم هي بتغذيتها لانها
محتاجة ترجع قوية مثل اول.. وابعدوها عن اي شي ممكن يعرضها
لارتفاع ضغط الدم ..
فهد: والله ماعمر احد زعلها .. حتى اكلها دايم ننتبه له .. بس مادري
وش منه
الدكتور: هذا مقدر من رب العالمين .. والحمدلله اللي قامت بالسلامة
وماتضررت من هالجلطة..
فهد: تسلم والله يادكتور .. وقام يبي يستأذنه : انا بروح لها الحين ...
واتمنى تكتب لها خروج هاليومين لانها تشتكي من قعدة المستشفى
الدكتور: ان شاء الله بعد مانجري لها الفحوص اللازمة .. راح تطلع
معاكم وتنور لكم البيت ان شاء الله
فهد: ماتقصر اخوي.. فمان الله
طلع من عند الدكتور رايح لامه ... لقى البنات عندها وبعد كم وحدة
من معارفهم وماحب يدخل ..
والحمدلله كلها يومين وطلعت ام فهد لبيتها بالسلامة .. مع نصايح من
الاطباء بتجنب الحركة الكثيرة .. والتغذية الصحية .. والابتعاد عن
الدهون .. والاكلات المملحة,, واي عوامل نفسية ممكن ترفع من ضغط
المريضة....
*********************
مجتمعين ببيت ام فهد ... اليوم من العصر والبيت مافضى ناس طالعين
وناس داخلين .. والزيارات وش كثر .. بعد ماراحو الناس بعد العشا
تقريبا ماكان فيه الا ام تركي وفاتن وام عبير وغادة.. ومن نامت ام فهد
طلعو بالصالة يسولفون ...وكالعادة بهالجلسات لازم يكون فيه نقاشات ..
احتد النقاش على ام فهد ومن يراعيها ومن هالسوالف...وطبعا ام تركي
ياحبها تصيد في الماء العكر ووجهت كلامها لعبير:والله من قل الاهتمام
ولا لو انك معتبرتها مثل امك ماصار اللي صار..
عبير اللي كانت دايم مسالمة .. وتسكت عن حقها .. ودايم تقدم احترامها
لاخوانها وابوها على حقها بس هالمرة تكلمت : تتهميني اني مقصرة؟
ياحبيبتي على الاقل انا طول الوقت مقابلتها .. وما اروح انام غير لما
اتطمن عليها .. واول ما اصحى لازم اروح اشوفها وما اقول لك هذا
الكلام عشان حاجة لانه اصلا مايبين في عينك .. انا سويت كل هذا لاني
احبها .. ولانها ام زوجي .. واعتبرتها مثل امي ..
ام تركي: ماشاء الله طال لسانك يابنت سارة وصرتي تردين
ام عبير: رجاء يانورة بنتي ماغلطت فلا تلبسينها الغلط
ام تركي بصراخ: ماغلطت ؟ كل هالكلام اللي قالته وماغلطت ماشاء الله
ونعم التربية
عبير: ايوا ماغلطت .. ولا لازم اسكت عن حقي عشان اكون متربية في
عينك ..
غادة: بس الله يهداكم قصرو اصواتكم ..تبون امي مضاوي تسمع حسكم
وتتعب علينا مرة ثانية..
ام تركي: تسكتيني ياغادة؟ وش عشانه .. ولا ماتبين تعترفين انها مقصرة
عبير: اذا انا مقصرة انتي فينك ماتجي تشوفي امك الا مرة في الاسبوع
وماتجين الا اذا تجمعتو انتي واخواتك ..وهي اللي دايم تشتكي وتقول
بناتي ما اشوفهم..
ام عبير: عبير خلاص ياقلبي ..
عبير: بس ياماما انتي سامعة
ام عبير: انا سامعة وانتي لا يهمك .. والتفتت لام تركي : وانتي يانورة بنتي
لاتتدخلين في حياتها .. انا مربيتها احسن تربية ومحنا محتاجين منك شهادة
لا زوجها ولا خالتي عمرهم اشتكو منها .. لا تجي انتي وتكبري المشاكل
ام تركي وهي مازالت تصارخ: والله قلبتوها علي انتي وبنتك ومسوين فيها
المساكين واللي ظلمناكم
..................: ماشاء الله تبارك الله صراخ وهواش وامي بالغرفة طايحة
وتعبانة
عبير انحرجت من الموقف اللي انحطت فيه قدام فهد الحين بيقول انها ما
احترمت اخته..
ام تركي: شايف مرتك المتربية رافعة صوتها علي ..
فهد: ماشفت شي اصلا .. ومرتي اللي يغلط عليها يغلط علي..
ام تركي: غسلت مخك .. صاير حتى ماتحترم اختك الكبيرة
فهد: مايحتاج احد يغسل مخي .. انا اللي عايش بهالبيت وشايف .. مانشوفكم
الا من الجمعة للجمعة .. تصبحون على خير
وطلع رايح لغرفته ...
ام عبير: عبير روحي شوفي زوجك.. انا رايحة الحين
عبير راحت سلمت على امها : الله لايحرمني منك يارب
ام عبير بصوت اقرب للهمس : ياقلبي انتي طنشي عشان زوجك ولا يهمك
كلامها ..
عبير: ان شاء الله
رجعت تبي تروح تشوف فهد: دقايق وجاية بشوف فهد
فاتن تكلمت بعد صمت طال بكل النقاش:لا عادي خوذي راحتك تركي جاي
الحين بالطريق وكلنا بنروح معاه
عبير: اوكي .. اشوفكم على خير.. طلعت تشوف فهد وهي مستغربة من
حاجتين.. اولا صمت فاتن طول النقاش .. مع انها كانت دايم تظلمها وواقفة
بصف امها حتى ولو كانت غلطانة ,, بس هالمرة سكتت .. واثبتت لها انها
فعلا تغيرت .. ومثل ماوعدتها بقت على هالوعد.. والشي الثاني ام تركي
بعد الكلمتين اللي قالهم فهد سكتت وماعلقت .. حتى يوم طلع مارجعت تتكلم
عليها ..
************************
راحت له الغرفة شافته منسدح على السرير.. قربت منه : كيفك حبيبي
اليوم؟
فهد: بخير.. وش سالفة نورة؟
عبير: ولا شي بس يمكن من زعلها على امها طلع الكلام غصب عنها
فهد: ياااطيبة قلبك ياعبير.. تبررين لها.. ادري انها ماتحبك يعني عشانها
اختي ماتبين تقولين عنها شي؟
عبير: مو كذا والله بس ما احب اتكلم في احد من وراه
فهد مسك وجهها بيدينه : وانا ما احب احد يغلط على زوجتي حتى لو انها
اختي .. وانا اللي شايفك مو مقصرة بشي...
عبير ابتسمت له بحنان
فهد: اليوم امي احسن؟
عبير: ايوا الحمدلله .. فهد لا تشيل هم ولا تقعد تزعل نفسك ..والله ما احب
اشوفك زعلان
فهد: الى الحين مو قادر اشيل من راسي دخلتي على امي وهي طايحة على
السجادة .. وربي حسيته وقف قلبي
عبير: لا تخلي الموقف يأثر فيك اكثر.. وانت شايفها اليوم تسولف معاك
وتضحك.. ومع الوقت بترجع مثل اول واحسن كمان
فهد: ان شاء الله يارب
ابتسمت له .. ومدت يدها تمسك يدينه .. بادلها الابتسامة وهمس لها: احبك
عبير: وانا كمان
فهد: انتي وشو؟
عبير: اموت فيك
رفع يدها لفمه وباسها : تدرين .. كنت مسوي لك مفاجأة
عبير استانست: ايش هي؟
فهد: شلون تصير مفاجأة لو قلتها لك
عبير: انت قلت انو كنت بتسوي يعني تفركشت
فهد: لا أجلتها بس ..تعرفين هالوقت الظروف ماتساعد
عبير: فهد بلا نذاااالة كذا تخليني افكر
فهد: ليش اللقافة .. بوقتها تعرفين
عبير: انا ملقوفة ولا انت؟
فهد: هههههههههههههه وانا وش دخلني
عبير: انت اللي قلت في مفاجأة وانا ما اقدر اتحمل انه في حاجة مخبيها
عني وما اعرفها ..
هالكلمة ضربت لها وتر حساس في قلب فهد : مصيرك تعرفين بوقتها
عبير: لااااا ابغى اعرف الحين
فهد: مافي
عبير بدلع: حبيبي
فهد: مستحيل
عبير: يااااربي ايش يصبرني لوقتها ؟
فهد: هههههههههههه ياحبكم يالحريم لهالسوالف
عبير: طيب يافهد وحدة بوحدة والبادي اظلم
فهد وهو رافع حاجبه: اشوف صار فيها تحدي وتهديد
عبير: انت اللي بديت
فهد: وانا متأكد اذا عرفتيها بتنسين هالتهديد كله
طقته عبير على كتفه : بتقهرني
فهد مسكها من كتوفها وثبتها على السرير وهي تصارخ : افااا تطقيني
عبير ماتت ضحك : والله ما اقصد
فهد مسوي معصب:قولي آسفة
عبير: لا
فهد: قولي آسفة ولا عذبتك.. وقعد يدغدغها وهي تضحك
عبير: ههههههههههههه لا فهد خلاص الله يخليك
فهد: اذا تأسفتي فكيتك
عبير: آسفة والله آسفة
فهد باسها على خدها: ناس ماتجي الا بالعين الحمرا
عبير: انت عارف نقطة ضعفي فلا تفرح بنفسك
فهد بتنهيدة طلعت من القلب: يااارب لاتحرمني منها
عبير: ولا منك يارب
***************************
اياااام عدت بكل هدوء .. تماثلث فيها ام فهد للشفاء والحمدلله ..والاوضاع
استقرت في اغلب العائلات ..
*شهد في شهور الحمل الاولى علاقتها مع خالد مازال فيها نوع من السيطرة
وحب التملك من خالد .. لكن اخف من اول واهتمامه الاول حاليا على ولي
العهد من بعده..
*فاتن حياتها شبه مستقرة مايؤرقها غير غيرتها الشديدة من غلا .. وهذا شعور
فطري وطبيعي ومحد يلومها عليه ... رغم انها مكرسة كل وقتها لوليد وربى
وناسية بوجودهم كل العالم ..وحبها لسعود وصل لمرحلة النضج ..والعشرة
اللي بينهم صارت اكبر من مجرد حب..
*اريج رغم ضحكها وخبالها .. الا انها لحظات تعيش بقمة حزنها على ولدها
اللي فقدته .. ورغم ان بندر كثير يحاول يحسسها ان هالشي مو نهاية العالم
وان اللي عطاهم اول مرة قادر انه يعطيهم ..غير هالشي حياتها مع بندر
مستقرة وعلى احسن مايكون..
*عبير تعدت مرحلة جرحها من ماضي فهد .. ولو ان هالماضي فتح لها باب
للشك ماكان موجود بالاول .. وصارت تخاف من كل تأخير يتأخره فهد او
اي اتصال او مسج يجي له ..وكل خوفها انه يجي يوم وتفقده .. رغم ان فهد
قال لها اكثر من مرة بأنه ماعاش الحب ولا يفكر يعيشه الا معاها..
*ندى حياة شبه مستقرة واوضاعها مع ناصر صارت احسن بكثير خصوصا
بعد ماعرفت شلون تنتشل ناصر من بروده .. وتخليه يفصح لها عن مكنونات
قلبه حتى ولو كان بالشهر مرة .. بس يكفيها شرف المحاولة ..
*الجوهرة تعيش اسعد واحلى ايام حياتها خصوصا وهي تشوف تعلق ياسر
فيها .. واحساسها انه فعلا يبيها وسوا المستحيل عشان رضاها ..وعلاقتها
مع بشاير مستمرة مثل ماتكون علاقات الصداقة الحقيقية .. وفرحة بشاير
برجعتها لياسر يمكن مثل فرحة ياسر نفسه لانها ماتعودت انها تغيب عنها
يوم ..
* اماني ومشاعل استعدادات لحفل زواجهم بعد كم يوم بس .. والفرحة
تغمر العائلة كلها خصوصا بعد حل مشكلة الجوهرة...
* نوف وحفل زواجها اللي راح يكون بعد اسبوعين .. على حاتم ..تعيش
حبها باجمل فصوله.. وكل يوم عن يوم حبها لحاتم يكبر .. ولهفتها وشوقها
لليوم اللي يجمعهم فيه بيت واحد يزداد ..
*غادة وبداية حمل في طفلها الثالث اتمت فيه سعادتها وسعادة زوجها
خصوصا بعد ماسافرت هي وتركي للبنان وقعدو فيها 10 ايام ابتعدو فيها
عن الناس وجددو فيها حياتهم وكسرو روتين الحياة الممل ..
*لمى حب كبير تحمله في قلبها لماجد قدرت تأسره لعالمها وتعلقه فيها ...
وتعيشه حب ماظن انه بيوم راح يعيشه بعد وفاة زوجته .. انسانة صادقة
طيبة حببت حتى اهل زوجها فيها ... حتى جنى تعلقت فيها .. ولمى تحاول
قد ماتقدر ترضي زوجها ... وتطمنه على بنته...
*خالد انسان هادي وبارد كعادته .. اكثر مايؤرقه شعوره ان شهد تروح مكان
وهو مو معاها ..ودايم يعاتبها انها اذا صارت مع البنات تنساه وماتسأل فيه
وانها ماعاد تهتم فيه مثل اول واذا يبي يرتاح قال لها خليك معاي وما احبك
تبعدين عني..
*سعود انسان عاقل يحاول يوزن حياته ويكيفها على معيشته بين زوجتين
كل وحدة فيهم غيرتها نار.. وكثر مايحاول يرضي ثنتينهم ومايظلم وحدة
فيهم الا انه يميل لفاتن بمشاعره وهالشي خارج عن سيطرته .. ومن رب
العالمين وماله فيه حيلة..
* بندر يحب اريج حب جنوني .. يعشق عفويتها وبرائتها .. يكره انها
تعزل نفسها اوقات بصومعة احزانها .. وكثر ماحس بالحزن بوقتها الا انه
اقوى منها وعاش حياته عادي لانه مؤمن ان الله راح يعوضهم ..
*فهد اكثر مايفكر فيه بهالفترة حاجتين.. امه وخوفه الكبير انه يفقدها خصوصا
بعد طيحتها الاخيرة .. والشي الثاني اسراره اللي مخبيها عن عبير.. ومو
عارف شلون يرتاح منها .. يخاف يصارح عبير فيها وتكبر المشكلة ..
وبنفس الوقت يخاف يخبيها .. وتنكشف قدامها واللي اظهر جزء منها بالاول قادر
بانه يظهرها كلها ...
* ناصر محاولات منه لارضاء زوجته المتطلبة احيانا .. كثر مايشوف انها
تحاول تخليه يظهر مشاعره ويعبر عن حبه لها ..ومايلومها لانه يعرف وش
كثر هي رومانسية وحالمة .. وتعيش حياتها في عالم وردي .. وهو نقيض
شخصيتها تماما .. بس من حبه لها يحاول يعيش معها بنفس جوها ولو كان
وقت قصير بس..
*ياسر يعيش بلحظات سعادة وعذاب بنفس الوقت .. سعادته برضى والدينه
عليه ورضى الجوهرة واهلها ,, وموافقتها انها ترجع له..وعذابه اللي يحسه
من بعد الجوهرة عنه بهالفترة على كثر شوقه لها.. ومن احساس انه عاش
مخدوع فترة طويلة في انسانة كان معمي بحبها...وتجرأ انه يغلط على اغلى
الناس عشانها بس للأسف طلعت ماتستاهل كل هذا ..
* حاتم .. وشعور غريب يحسه بهالفترة .. كثر مايحس انه فرحان بزواجه
وانه راح يكمل نص دينه .. الا انه يطلع له بأوقات هاجس لو كانت عبير
عروسته .. وبلحظات معاتبة للنفس يحس ان نوف مالها ذنب في اللي يحسه
خصوصا لا سمع منها وش كثر هي تحبه ..
* تركي انسان يعيش حياته بكل عقلانية .. ناضج بما فيه الكفاية انه يكون
سند لكل من يحتاجه .. اب حنون وزوج محب.. ومعطاء ,, واخ موجود
بوقت الحاجة .. وابن بار ,, ورجل قيادي وعملي ..متوازن في كل خطوة
يخطوها بحياته .. ماعمره فضل شي على شي ثاني .. لذلك هو محبوب
من الكل وعمره محد اشتكى بيوم عليه ..
*ماجد..رغبته الملحة في استمرار حياته خلته ينجح الى الآن بهالزواج ..
حبه للمى كل يوم يكبر ولو انه يفتقد جنونه ورومانسيته المفرطة اللي
كان يعيشها مع ملاك .. لكن بهالفترة حس انه ماغلط يوم اختار لمى
وهالاحساس مخليه يعيش قمة سعادته ...
** هذي نبذة مختصرة عن اهم الشخصيات ... تفاصيل عن حياتهم
مشاعرهم .. انطباعاتهم ... واهم الاحداث في حياتهم خلال هذي الفترة
ومازال للاحداث بقية ...
***********************************
اليوم الاحد وبكرة عرس اماني ومشاعل ...والبنات مجتمعين ببيت عمهم
ناوين اليوم كلهم ينامون عندهم ... الساعة 10 ونص بعد العشى ...
الجوهرة وهي ترتب اغراض مشاعل اللي بتاخذها الفندق :ميشو تعالي
شوفي وش ناقص
مشاعل وهي جاية تشوف شهقت : هيييييه صاحية انتي شيلي هذا والله
ما اخذه
الجوهرة: يابنت الناس عادي هذا رجلك
مشاعل: رجلي افصخ معاه الحيا من اول يوم؟ وربي قصير مررررة
الجوهرة: انا ماقلت بأول يوم .. عادي بأي يوم واصلا بتلبسين الروب
ولا هو شايف اصلا
مشاعل: اجل ليش البسه
اريج: حطيه ماعليك فيها .. انتي خوذيه والوقت اللي يناسبك البسيه
عبير اللي قاعدة ترتب بادوات مكياجهم وعطورهم هي وندى: مررررة
روعة الخمرية .. ريحتها جنان
اريج: تفداك عبورة ,,, حلفت عليك تاخذينها ماتغلى عليك والله
اماني تناظرهم : وشووووو؟ من حلالك هو تعطينها
عبير: ههههههههههههه ما ابغاه اصلا ..
اريج: اقول روحي نامي بس .. بكرة من الروعة ماتعرفين تنامين
اماني : والله انه ذابحني التفكير مدري شلون يطلع شكلي .. وافكر
شلون بيكون العرس.. وشلون الفستان .. وكل هالتفاصيل
عبير: بتعدي اصلا من غير ماتحسين
ندى: اي والله بتتمنين بعدها لو ينعاد العرس والزفة تبين تعيشين
نفس الشعور مرة ثانية ..
فاتن: جوجو ياسر متى جاي؟
الجوهرة: والله ما أكد لي للحين بس قال يمكن الاسبوع الجاي للحين
ماقدر يستأذن من كليته..
اريج: ياااقلبي على اللي يستحون .. لهالدرجة طاريه يخلي خدودك تورد
الجوهرة: ههههههههههههه والله احس اني توني عروس
فاتن: عادي عيشي جوك ... مادامك ماعشتيه بالاول
اريج: يلااا عاد ننزل تحت بالصالة
ندى: اي انزلو انتو انا بنوم فروس واجيكم
اريج: بتنومين فروس ولا ابو فروس
ندى: وجععععع ان شاء الله .. وش هالكلام
اريج: عادي كلنا متزوجات
ندى: لا ناصر يعرف ينام من حاله .... بروح انوم فروس وتعليقاتك
السخيفة احتفظي فيها لنفسك
اريج: ههههههههههههههههه ياحليلها استحت.. وماحست اريج الا بالمخدة
على وجهها
البنات ماتو ضحك عليهم ... وبعدها نزلو تحت كملو سهرتهم ..
الجوهرة: بنات ترى الساعة صارت 1 وربع .. خلونا نروح ننام
اريج: الصدق انه فيني نوم ..
الجوهرة: اروج معاي بغرفتي .. وفاتن مع اماني .. وعبير مع مشاعل
فاتن: ماشاء الله موزعتنا بكيفك؟ شايفة نفسك بكشافة
الجوهرة: عاد شوفو اللي تبون بكيفكم اهم شي اروج عندي
اريج نطت عندها وحبت راسها: ياعمري ياجوجو ياحبي لك
عبير: انا عادي عندي اصلا احس من اول ماراح احط راسي على
المخدة بنام
مشاعل: انا اللي والله ماعاد اشوف
اماني: والله الخاينة ندو .. هي اللي نايمة مع رجلها
ندى: اصلا انتو حسبتوني من الاول ؟ مطلعيني من القائمة..
عبير وهي ترقى الدرج:ماتقدر تستغني .. وانا قعدت ساعة اترجى فهد
يرضى وبالقوة رضي..
ندى: عاد انتي صاحية رجلي معاي بنفس الدور واجي انام عندكم
اريج: والله ودي اعلق بس اخاف ما اخلص الا هالتحفة بوجهي
ندى: هههههههههههههههههه اي احسن خليك ساكتة ماتقولين الا طامات
اريج: زين تصبحون على خير..وخلي اللزاقة عنك ترى الرجال يحب
يغير جو عشان يشتاق لمرته
ندى: ماشكالك هو عاجبه
اريج تكش على وجه ندى:قلعتك انتي وياه..ودخلت الغرفة هي والجوهرة
الجوهرة: والله مرهقة ابي ارتاح
اريج: بسرعة ابي بيجاما
الجوهرة: افتحي الدولاب وتنقي اللي تعجبك
اريج قعدت تفتش بالدولاب.. وشافت الجوهرة تطقطق بجوالها: بتنامين؟
الجوهرة: ابي اكلم ياسر بالاول... سلامات لا تخبصين لي الدنيا خوذي اول
وحدة توني اليوم مرتبته
اريج: زييييين لا تدفين ..لازم يعني تكلمينه؟
الجوهرة: هو دايم يكلمني قبل ماينام
اريج: اوف للحين مانام؟
الجوهرة: الحين توها 10 ونص يعني هذا وقت نومه
اريج: زين لاتناظرين ابي ابدل
الجوهرة: اقول انقلعي بدلي هناك
اريج راحت الحمام ( تكرمون ) تبدل: اوكي انا بنام لا تزعجيني
الجوهرة: لعنبو دارك بغرفتي وتتشرطين؟
اريج: اقول لا يكثر بس
الجوهرة جت تبي ترد عليها بس من شافت الرقم اللي يتصل عليها نست
اريج .. وكل كلام اريج: الو
ياسر: هلا وغلا حبي
الجوهرة: هلا بك
ياسر: وراك مقصرة صوتك ؟ في احد عندك
الجوهرة: ايه اريج بنت عمي نايمة عندي
ياسر: بغرفتك؟
الجوهرة: ايه
ياسر: وعلى سريرك؟
الجوهرة: ايه بس بعيد عني شوي
ياسر: ليش هالعذاب يعني؟ انا اللي ابيك وميت عليك وماحصل لي
قربك .. واللي مايبونك عندك
الجوهرة استحت من كلامه: بكون عندك عمري كله ان شاء الله
ياسر: وحشتيني وربي وحشتيني .. وماعاد فيني صبر اكثر
الجوهرة:.............
ياسر: وانت اكثر ياقلبي
الجوهرة: ههههههههههههه استخفيت انت؟
ياسر: والله من الحرة اللي فيني.. حني علي يابنت الناس شوي مو
عشان ملكتي القلب صرتي تتغلين ..
الجوهرة: والله ماتغليت عليك.. بس صعبة شوي
ياسر: عشان بنت عمك؟
الجوهرة: ايه
ياسر: زين مابي احرجك .. نامي انتي وبكرة على خير اكلمك
الجوهرة: ان شاء الله
ياسر: هاتي بوسة
الجوهرة: روووح بس
ياسر: تعالي عندي انتي وربي لاخذها غصب
الجوهرة والحرارة تحسها تطلع مع اذونها : باي
ياسر: ههههههههه فمان الله
سكرت وهي تناظر جوالها ومبتسمة .. وانتبهت على اللي قاعدة
تطالعها : قاطة معانا؟
اريج: هههههههههههههه والله وناسة انكم تعيدون فترة الخطبة
الجوهرة: تحسين بشي؟
اريج: لا بس حسيت كأنكم رجعتو عرسان من اول
الجوهرة : عادي اللي ماعشته بالاول اعيشه الحين
اريج: الله يوفقكم ويجمع مابينكم على خير
الجوهرة: اللهم آمين يارب,, يلااا خلينا ننام
اريج: تصبحين على خير
الجوهرة: وانتي من اهله
وماهي الا دقايق وغط كل البيت في سبات عميق .. حتى العروستين
********************************
البنات تجهزو من بدري ..وكشخو .. وهالحين يحطون اللمسات الاخيرة
على اشكالهم قبل يروحون القاعة اللي بيكون فيها الزواج ...
فاتن: اريج تعالي لبسي ربى
اريج جاتها ركض: الحين ماتحسين انه بيكون ازعاج عليهم
فاتن: لا ياشيخة بالغرفة محد يجيهم.. انا كل شوي بروح اتطمن عليهم وايما
بتكون معاهم
اريج وهي تلبس ربى: ياااعمري عليها هالقمر والله
فاتن: اريجوه بشويش لاتكسرين رقبتها
اريج: ياقلبي... فتون احط لها شباصة ؟
فاتن: لا شوفي هناك ربطة الشعر ..
اريج بعد ماكشختها: يمه عليها ودي آكلها
فاتن: بتروحين معاي ولا بندر بيجيك؟
اريج: لا قلت له لا يجي بس بروح مع فهد كان قعدتي معانا
فاتن: ياشيخة وين زحمة انا وعيالي والشغالة يبي لنا سيارة بلحالنا
الجوهرة: هاااه خلصتو؟
اريج: ايه متى رايحين؟
الجوهرة: امي من اول تتصل تبينا نجي .. وناصر مطول شوي
فاتن: تروحين معاي؟
الجوهرة: لاصاحية انتي ..اروح مع سعود
فاتن: عادي وش فيها
الجوهرة: لا عادي ننتظر بس اذا قدرتو روحو انتو وشوفو امي مابيها
لحالها هناك
اريج: ماهيب لحالها كلهم معاها ..
عبير: يلااا اروج ماشين
فاتن: وانا بعد هذا هو سعود وصل.. ايمااا تعالي شيلي وليد
الجوهرة وهي تشوف ندى تلبس عباتها: ندى رايحة معاهم؟
ندى: ايه
الجوهرة: وانا؟
ندى: نص ساعة ويجيكم ناصر
الجوهرة: وليش ماتقعدين معانا؟
ندى: وين ماتكفي السيارة انتي قدام والعرايس ورى
الجوهرة: زين
شوي وراحو كل البنات .. ومابقى الا الجوهرة وخواتها ..
بعد ربع ساعة اتصل فيها ناصر يبيها تنزل تاخذ اغراض توديها
لخواتها ..
نزلت وهي تركض مع الدرج ..وشافت ناصر واقف قدامها : وين
الاغراض ؟
شافته واقف وهو مبتسم ويناظر وراها التفتت تشوف..وانصدمت بمكانها
ماصدقت عينها وهي تشوفه واقف قدامها ..لحظة نست معاها حتى وجود
ناصر.. كان ودها تطير بحضنه .. لولا خجلها اللي خلاها تتراجع ...
بهاللحظات ناصر انسحب واثنينهم مو حاسين اصلا .. قرب منها وهي
تحس بتوتر فظيع ..:وحشتيني .. وحبها على جبينها
الجوهرة ضاع منها الكلام من شافته .. شلون الحين وهو بهالقرب منها
ياسر: وش هالجمال كله؟؟ بتذبحيني ترى
الجوهرة: ليش؟
ياسر: اخاف اتهور واخطفك حتى عرس خواتك ماتحضرينه
الجوهرة شهقت وهو ضحك عليها ...: تدرين عاد انك قليلة حيا حتى
الحمدلله على السلامة ماقلتيها
الجوهرة: الحمدلله على السلامة
ياسر: شلونك؟
الجوهرة: تمام.. ليش ماقلتي لي انك جاي اليوم؟
ياسر: واخرب على نفسي اشوف هالفرحة بعيونك
الجوهرة ابتسمت له وهو كمل : مابي اطول الحين ناصر مهددني ما اعطلكم
بعد العرس.. ابيك تروحين معاي
الجوهرة: شلون ما معاي شي؟
ياسر: وش تبين يعني؟
الجوهرة: ملابسي واغراضي
ياسر: ملابسك واغراضك انا جبتهم معاي
الجوهرة: لا والله مابيهم انا ماخليتهم هناك الا لاني مابي البسهم
ياسر: مو بكيفك .. بتلبسينهم غصب
الجوهرة: مو صاحي انت
ياسر: لازم يعني كل ماتشوفيني نتهاوش؟
الجوهرة: لا بس باخذ لي شوي اغراض
ياسر: يالله بنتظرك في السيارة
الجوهرة: بنروح مع ناصر
ياسر:ناصر بياخذ خواتك انا مرتي مابي احد يوديها غيري يالله اغراضك
اللي تبينهم جيبيهم بخليها بالسيارة..بروح اقعد فيها انتظرك..وخواتك قولي
لهم يطلعون لناصر..
راحت الجوهرة لغرف خواتها وهي فرحانة قالت لهم ينزلون .. وراحت
غرفتها ... خذت اهم اغراض تحتاجهم ... ونزلت ..
رغم انها عاشت معاه كم شهر.. الا انها تحس كأنها اول مرة تشوفه ...
او تجلس معاه ... بس بنفس الوقت مستانسة انها قاعدة تحس وكأنها
توها عروس ..
تغطت وطلعت له..ومن شافها نزل واخذ الاغراض منها وحطهم بالسيارة
وركب سيارته وناظرها : غطي وجهك زين ..
الجوهرة ابتسمت بداخلها على غيرته..من عرفته وهو كذا:هذاني تغطيت
مسك يدها .. ومشى فيها .. كان ماشي على مهله .. وكأنه يعيش معاها
لحظاته الاخيرة ومايبي يفقدها .. وهي كانت مستانسة على هالوضع
ونست اهلها اللي ينتظرونها بالقاعة ...
الجوهرة: ماتحس انك مضيع الطريق؟
ياسر: لا ... بس ابي اسولف معاك.. مستانس فيك
الجوهرة استحت من كلامه بس لازم تروح الزواج: تأخرت عليهم
ياسر: طيب بوديك لهم .. بس لا اتصلت فيك تطلعين لي على طول
الجوهرة: ان شاء الله
وداها للقاعة ... وهي ماودها تفارقه ... ونزلت رايحة لهم اول من
صادفها اريج : ماشاء الله كان قعدتي بعد .. ولا من لقى احبابه نسى
عرس خواته
شهد: هههههههههههههههه لاعبة في المثل
الجوهرة: وانتو ماشاء الله وصلتكم الاخبار بسرعة
اريج: واصلتنا الاخبار من اول ودارين عن حبيب القلب من وصل
الجوهرة: يالنذالة ورا ماعلمتوني؟
ندى: هو يبيها مفاجأة بس شرايك
الجوهرة: يااااحبي له وربي يوم شفته بغيت اروح له ركض.. واقسم
بالله يوم اروح له السيارة من نظراته بغيت اتكرفس واطيح
اريج: هههههههههههههههههه من الطفاقة .. تعالي فوق وانتي جاية مثل
المعازيم...
طلعو للعرايس شوي وبعدها نزلو تحت .. رقص ووناسة ...
وقبل زفة اماني بدقايق وصل للجوهرة مسج ... احساسها قال لها انه منه
وفعلا ماكذب احساسها ...
( اعرف انك ما تصدق بس والله فوق والله
والله انه راح مني نصف عمري في غيابك
واعرف اني شلت همي تارك حبي على الله
كني ابعد من نجوم الليل واقرب من ثيابك
يا عساك ويا عساني يا عسانا يا عسا الله
يا عسى الدنيا تموت وما يعيش إلا ترابك
يا احبك واعشقك واهواك ولا يفتح الله
ما تعودت افتخر باحساسي إلا تحت بابك
ايه احبك والقضية واضحة والشاهد الله
يطرد المظلوم خصمة وانت خصمي يا هلا بك
يا هلا بك يوم تجرح خافقي ويسامح الله
يا هلا بك يوم تلحق غيمتي والحق سرابك
جابك الله في حياتي يا حياتي جابك الله
ليش ما ادري وين ما ادري كيف ما ادري بس جابك
كل ما قلت ابتدينا في المحبة قلت ياالله
ما دريت ان النهاية بين بعدك واقترابك
احسب اني كل شئ في عيونك يعلم الله
واثر عينك مستعفه ما تحب إلا حجابك
انظلمت ولا شكيت ولا تركت الامر لله
كان همي انتظر باقي عذابك في عذابك
الله الله انتبه واحذر وفكر والله الله
مثل ما احسب حسابي في هواك احسب احسابك
ما طلبت المستحيل ولا رجيتك شئ لله
ما طلبتك ارتفع من حجرتي واسكن سحابك
يصرخ القلب المعذب وكل الله وكل الله
شاب حبك في عيوني وانت توك في شبابك
رحت شئ وجيت شئ مختلف يا حسبك الله
تصدق اني ما بغيت اجلس مع حضرة جنابك
غيرك ذاك الزمان ويا زماني منك لله
ليش ما غيرت فيني شئ يوم اني اهابك
ليش ما علمتهم في قصتي وتوحد الله
يعرفون انك سؤال ويعرفوني اني جوابك
ويعرفون اني حلفت ولا اعرف اغلى من الله
والله انه راح مني نصف عمري في غيابك
ان شاء الله تكون هذي آخر الغيباتي ياقلبي .... احبك )
ماعرفت وش ترسل له ... او بالاصح ماعندها وقت تدور شي وترسل له
ففضلت تقول له كلمة تطلع من قلبها ... واكيد راح توصل له اصدق
واعمق ( احبك )
**********************************
حست نفسها مثل العروس وهي رايحة للفندق مع ياسر ... فرحة وخوف
وارتباك وخجل ... وانطباعات اكثر تعيشها بهاللحظة ..
بس السعادة كانت مبينة بعيونهم ... بحركاتهم .. وبلهفتهم المجنونة ...
قرب لها شنطة ملابسها :هذي الملابس اللي جبتهم لك..بس افصخي عباتك
اول ابي اشوفك
الجوهرة راحت للغرفة ... فصخت عباتها ورتبت شكلها..جاب لها شنطتها
للغرفة ..: بدلي ملابسك وتعالي
الجوهرة فتحت الشنطة تبي تشوف لها قميص تجهزه لنفسها عشان تلبسه
وقت النوم ... وهي تفتش بالقمصان وتتحسب على ياسر: يااااسر
جا وهو ميت ضحك وعارف وش تبي تقول له .. بس انتظرها تتكلم: وش
ذا؟
ياسر: ملابسك
الجوهرة: مابيهم كلهم مايصلحون
ياسر: والله انتي اللي شاريتهم مو انا
الجوهرة: اي بس في غيرهم كثير.. كذا قميص كانو عندي طوال
ياسر: وانا الحين اصبر كل هالوقت عشان اشوفك بقميص طويل
الجوهرة وجهها صار مية لون ولون ... ماعرفت وش ترد .. هو متعمد
اصلا يحرجها ...
ياسر: لا خلصتي صوتي لي... وطلع من عندها ..
الجوهرة بسرعة راحت تسبحت ... وطلعت ... كان هو توه بيشوف
وينها تأخرت: كل هذا تتسبحين؟ حشا لو انه لك سنة ماتسبحتي
الجوهرة: وانت على كل شي لازم تدقق؟
ياسر: باخذ لي دش سريع.. وانتي خوذي راحتك
ماصدقت اللي طلع من عندها ... بسرعة دورت استر شي ولبسته
حطت لمسات خفيفة من بلاشر وجلوس وراحت للسرير وتمددت وتغطت
اول ماطلع من الحمام شافها مغطية حتى كتوفها ابتسم .. اما هي انحرجت
يوم شافت شكله وهو طالع ولاف الفوطة على جسمه ..
ياسر: يعني حليتيها يابنت عبدالله؟
الجوهرة تحاول ماتطالع فيه ... لان شكله يربكها .. سحب الغطا عنها
شوي: يابنت الناس شوي بس ترى مانيب ماكلك
الجوهرة: ماقلت بتاكلني بس خف علي من نظراتك شوي
ضحك من قلب على شكلها المنحرج ..
قرب منها وحبها على خدها : وحشتيني وربي
الجوهرة: وانت بعد
ياسر: والله اشتقتي لي ؟
الجوهرة: ايه وربي
قرب منها اكثر ... طفى الأباجورة ,,, وتغطى ,, ولمها بحضنه وهمس
لها بشوق : احبك
الجوهرة ذابت مكانها وماعرفت وش تقول اصلا .. وانفاسه الحارة على
وجهها زادت ارتباكها ...
ياسر شبك يدينها بيدينه: جوجو
الجوهرة : هممم
ياسر: تحبيني؟
الجوهرة: موت
ياسر: مسامحتني على كل شي صار؟
الجوهرة : ايه .. مافي قلبي لك الا غلاك ..
ياسر استانس على كلامها .. هو متأكد انه عمره ماراح يندم على اليوم
اللي اختارها فيه .. تكمل معاه باقي حياته ...
مشاعر حب وغرام تجمعهم .. وليلة رومانسية حالمة ..كملو فيها حلمهم
اللي ابتدو فيه..والسعادة ترفرف حولهم وترسم اجمل ابتسامة على الشفاه
اللي اضناها الغياب ...
***************************
بعد اسبوع من الاحداث.. عبير وامها في الطايف .. بعد 4 ايام بيكون زواج
حاتم ونوف ..الاوضاع شبه مستقرة الا قلق فهد من قرب عبير من حاتم ...
وهالشي خلاه طول الوقت يتصل فيها ومطفشها ماتروح بيت خالها وحاتم
موجود...
ولو انه عبير صارت تشوف الوضع طبيعي وماتحب تشغل تفكيرها بهالافكار
الغبية...كل انسان عاش حياته .. والمشاعر تتغير مع العشرة ....وهي متأكدة
انه حاتم تعدى مرحلة عبير..وكل تفكيرها هالفترة انها تبي تشارك بنت خالها
فرحتها ..
رجعت لايامها قبل انتقالها للرياض.. قابلت صديقات الدراسة...واجتمعت فيهم
ابتعدت عن اجواء الدراسة والمسئولية والزواج.. ورجعت مراهقة مثل ايام
المتوسط والثانوي... وشوفتها لصديقاتها رجعتها لايام افتقدت فيها برائتها...
وعذوبتها ...
عبير وهي طالعة من غرفتها وتلبس حلقها: ماما غريبة مانزلتي بيت خالي
ام عبير: بنزل بعد شوية فين رايحة انتي؟
عبير: بروح عند مها
ام عبير: ماتلاحظي من يوم جينا هنا وانتي كل يوم طالعة
عبير: والله مشتاقة لايامي زمان
ام عبير: استأذنتي من فهد
عبير: هو سامح لي بروحاتي لصاحباتي
ام عبير: لا ياقلبي لا تطلعين مكان غير لما تستأذنينه..مايجوز والله
عبير: اكيد نايم الحين اصحيه يعني.؟ والله هو سامح لي
ام عبير: طيب اتصلي عليه واذا مارد ارسلي له رسالة بس على الاقل
يكون عنده خبر
عبير: اوكي من عيوني... ماما كذا اوكي ولا ابس اساور؟
ام عبير: لا خليك كذا شكلك انعم
عبير: طيب بروح اتصل على فهد...
دخلت غرفتها واتصلت على فهد اللي رد من اول رنة:هلا والله
عبير:اهلين..غريبة صاحي
فهد: اي بسافر.. وراي رحلة بعد ساعة
عبير : بتسافر؟ وانا آخر من يعلم
فهد: ليش بتمنعيني مثلا؟
عبير: فهد من جدك انت .. كيف تسافر وماقلت لي
فهد: والله العظيم رحلتي بعد ساعة
عبير: وانا مسوية فيها ما اروح مكان الا وانت عارف فين .. وانت تبغى
تسافر وماقلت لي
فهد: وين كنتي بتروحين؟
عبير: عند مها صاحبتي .. ولا ليه اقول لك وانت تخبي عني
فهد: وانتي على طول تزعلين ماعندك وقت
عبير شوي وتصيح: فهد تتكلم معايه بكل برود
فهد: بالعكس مشتاق لك
عبير مبرطمة: لا ياشيخ
فهد: والله العظيم .. وهذاني جاي لك اليوم
عبير بفرحة: جدددد والله؟
فهد: اي والله جاي ان شاء الله.. رايح للمطار الحين ومتأخر بعد
عبير: ياعمري انت..اجل خلاص ماراح اروح
فهد: لا عادي روحي بس لاتطولين يعني ساعتين بالكثير وارجعي
عبير: اوكي بروح الحين...باي قلبي
فهد: الله يحفظك...
سكرت منه وركضت لبست عباتها .. ونزلت رايحة لبيت صديقتها...
بعد ساعة ونص استأذنتها راجعة للبيت..
وصلت بيتهم بدلت ملابسها وتكشخت لفهد وجهزت له القهوة... وجابت
الحلى اللي توها شاريته...
واتصلت على امها :الو ماما.. فهد بيجي بعد شوية
ام عبير: والله؟ مسويها مفاجأة
عبير: ايو تبغين تجين؟
ام عبير: لا ياقلبي خذو راحتكم..
عبير: اوكي
بعد وقت انتظار طويل وصل فهد .. واول مافتحت له الباب ركضت
لحضنه:هلا والله نورت البيت
فهد: لعنبو ابليسك وش مسوية فيني ماقدرت اتحمل بعدك اكثر من 5
ايام
عبير : تحبني ..انا ماسويت شي
فهد: والله الظاهر بنجن من حبك
عبير: هههههههههه ياليت
فهد: افاااا تبيني اصير مجنون؟
عبير: ايوا.. عشان ماتحب غيري ولا تفكر بغيري ابدا...ودخلته البيت تفضل قلبي
فهد: ذكرتيني بأيام الملكة
عبير: ياحلوها ذيك الأيام
فهد: والحين مو حلوة يعني؟
عبير: لا بالعكس كل مرحلة من حياتنا لها حلاوتها
قعدو بالصالة:ياعمري انتي.. وين خالتي؟
عبير: تحت عند بيت خالي
فهد: اهااا يعني بلحالنا
عبير: ههههههههه ليه ايش ناوي تسوي
فهد يقرب منها: مادري ..شرايك انتي؟
عبير: رايي نتقهوى
فهد: هههههههههههههه نتقهوى مو مشكلة...علميني وش مسوية؟
عبير: ماشي حالي... كيف خالتي وكيف صحتها؟
فهد: لا الحمدلله بخير وما ارتحت الا يوم قالت هيا بتقعد عندها شهر
رجلها مسافر عمل ..
عبير: يلاااا الحمدلله ... والله اني كنت خايفة تجلس لوحدها..
فهد: لا مستحيل اخليها لحالها .. خصوصا بعد طيحتها الاخيرة
عبير: يارب يخليها لك ويطول في عمرها على طاعته
فهد: اللهم آمين يارب
عبير: مستحي مني يعني.. مد يدك حلي...
فهد: لا قاعد افكر
عبير: في ايش؟
فهد: في المفاجأة
عبير: اي مفاجأة ,,, وتوها تذكرت ..: اهااا حبيبي قوووول
فهد: طيب
عبير:يلاااا قول ايش هي؟
فهد: رحلتنا على مصر بعد زواج بنت خالك على طول
عبير بفرحة: والله حبيبي
فهد: نطلع من العرس على جده ومن جده على القاهرة
عبير نطت وباسته: ياقلبي انت والله اني محتاجة اغير جو
فهد: ياعمري انتي اهم ماعلي وناستك...
كملو قهوتهم وسوالفهم ... وبعد العشا طلعو يتمشون ويتعشون برا
**********************************
بيوم زواج حاتم ونوف... الليلة فرح مثل اي عرس بالدنيا ...
وكل القلوب تحمل دعوات صادقة بالتوفيق للعرسان .. وان ربي
يكتب لهم السعادة في حياتهم...الفرح تم على احسن مايكون ...
والعروسة بأبهى طلة اطلت على المعازيم ... عبير وبنات خوالها
مستانسين بهالعرس ... وفرحانين بنوف .. تمت الزفة ..وبالوقت
اللي كانو يبون يطلعون العرسان ويتوجهون للفندق .. اتصل فهد
على عبير عشان تطلع ..
عبير كانت مع نوف تلبسها عباتها : نونو ارمي الطرحة الحين
نوف: اخاف تطلع خفيفة
عبير: لا بعلمك طريقة اغطيك تمام لا تخافين
تغطت نوف ...: امي كذا مو باين حاجة؟
ام نوف: لا ياقلبي .. الله يوفقك وانتبهي لنفسك
نوف: ان شاء الله
طلعو البنات مع نوف لسيارة حاتم ... اللي كان واقف هو وعيال
عمه واخوه ... وعيال خواله ...
مشت عبير الين وصلت عند سيارة حاتم: مبروك حاتم ..
هو من شافها مع نوف مايدري ليش ماقدر يشيل عينه عنها : الله
يبارك فيك
عبير: منك المال ومنها العيال ..
حاتم: الله يكتب اللي فيه الخير يارب
عبير: يلااا انا بروح .. نونو باي ياقلبي.. وراحت تمشي لفهد..
وعيون حاتم كانت تتابعها ..ومايدري ليش من شافها ماشال عينه
عنها ... لدرجة انه نسى وجود نوف تماما وماكأنها واقفة جنبه..
عبير حست بالاحراج لانها حست نظرات حاتم لها مو طبيعية
بس اللي ماتعرفه ان عيون فهد ونوف شافت نظرات حاتم ..
بس ياترى شلون بيفكر اثنينهم باللي شافوه ...
نوف ركبت مع حاتم وماعلقت ... يكفي احراجها انها عروس ولاول
مرة تصير معاه لحالهم..
اما عبير من اول ماركبت وشافت نظرات فهد عرفت انه ماراح يعديها
على خير .. هو من اول مو طايقه شلون الحين..
عبير: تـأخرت عليك؟
فهد: لا كان قعدتي تتبادلين النظرات الغرامية احسن
عبير سوت نفسها مو فاهمة:اي نظرات؟
فهد: عبير لا تستغبين على راسي ... انتي تعرفين وش اقصد
عبير: لا ماني عارفة .. تكلم انت وفهمني
فهد: حاتم
عبير: ايش فيه؟
فهد: انتي شفتي شلون يطالعك
عبير: وانت زعلان عشان كذا؟
فهد: لا ... جماد ما اغار على مرتي ولا شي
عبير: طيب ياقلبي انت لا تعصب احنا ورانا طريق .. ولسى بنسافر
فهد: عبير والله العظيم مانيب رايق..
عبير: ياحياتي انت انا مايهمني في الدنيا غيرك..
فهد: عبير اسألك بالله فيه شي؟
عبير: شي زي ايش؟
فهد: مدري... قولي اي شي بس طمنيني
عبير: ياعمري والله مافي شي.. ولا عمري التفت لاحد غيرك.. مو انا
من الاول اخترتك من بين الناس كلها .. ومقتنعة باختياري
فهد: بس نظراته قهرتني
عبير: والله ما اعتبرته اكثر من اخو .. واصلا نوف حبوبة وراح
يحبها ويتعلق فيها ..
فهد: زين ...
عبير: حبيبي
فهد: هممم
عبير: خلاص لاتخرب عليه فرحتي .. والله والله محد يعنيني في الدنيا غيرك
فهد: ان شاء الله ..بس انقهرت شوي .. ومشو رايحين لجدة ... بعد ما استأجر له
سيارة ومن جدة بيتوجهون للقاهرة ,,,
********************************
في الفندق .. عند حاتم ونوف.. الوضع مكهرب على الآخر,,,
واللي صار اليوم نوف ماراح تعديه بالساهل .. اصعب شي على
المرأة انها تنطعن في انوثتها ... وهذا قاعد يطالع غيرها وبليلة
عرسها ... بالليلة اللي الكل يشوفها احلى من في الحضور ... اهم
شخص تبيه يشوف هالحلا عيونه راحت تناظر غيرها ... رغم ان
عبير كانت متغطية .. حتى عيونها غطتها عشان المكياج .. بس
حست ان حاتم يناظرها يروي بهالنظرة شوقه...
تسبحت وبدلت ملابسها وجلست على السرير .. بعد دقايق جاها
حاتم مبتسم .. ومن شافته حست جرح بداخلها .. هي تحبه من زمان
وتوقعت انه يوم خطبها يبيها .. ومع الوقت حبها .. هو كان يقول انه
يحبها ... بس نظراته اليوم لعبير اثبتت لها انه باقي في قلبه حب
لها ...
حاتم: ماراح تجين نتعشى؟
نوف: لا مالي نفس .. بس ابغى اتكلم معاك
حاتم جلس جنبها : قولي
نوف: انت لسى تحب عبير صح؟
تفاجأ من كلمتها .. واستغرب سؤالها وهي بعد استغربت جرأتها وكيف
قالتها صريحة ومامهدت لسؤالها
حاتم: نوف ايش هذا الكلام؟
نوف: انا ماسئلتك عشان تسئلني
حاتم: لا انا احبك انتي
نوف: لا تكذب عليه .. انا شفت حبها في عيونك ..
حاتم: والله مو كذا لاتفهميني غلط
نوف: مافهمتك غلط والله..بس انصدمت لاني توقعتك تعديت هذي
المرحلة بس للأسف لسى غرقان في حبها
حاتم: انتي اعطيني مجال افهمك
نوف: ايش راح تفهمني قول..
حاتم: مع الايام راح اثبت لك اني احبك
نوف: شفت انك ما انكرت؟ انا ما ابغى تكذب عليه وتقول ليه كم
كلمة وتظن اني غبية واصدقها ..
حاتم: يعني؟
نوف: اذا تأكدت من مشاعرك ليه وانه مافي قلبك غيري وقتها انا
راح اكون لك
حاتم يطالعها مستغرب: مافهمتك
نوف: يعني خلينا كذا احسن ...
حاتم: نوف انتي مقتنعة باللي تقولينه؟
نوف: ايوا.. انا ماعندي استعداد اكون مع انسان معاي بجسمه بس
وروحه وقلبه مع غيري
حاتم: بس انتي فاهمتني غلط
نوف: طيب احلف لي بالله انه نظرتك لعبير عادية وانها مثل
اي وحدة من اخواتك ...
حاتم:..................
نوف: ماتقدر تحلف صح؟ خلاص كلامي اللي قلته ماراح اغيره
انا انسانة يهمني ارضي مشاعري في الاول قبل اي حاجة ثانية
حاتم بعد تفكير عميق:نوف والله راح تعرفين مع الايام اني احبك
بس انا ماراح اجبرك على حاجة ..انتي نامي الحين ... وربي
يسهل امورنا ..وبكرة الصباح نتفاهم ..
من طلع وسكر الباب سمحت لدموعها تنزل قهر,,, من كثر قهرها
حست انها حقدت حتى على عبير رغم انها مالها ذنب باللي يصير ابد
ماتدري هل هي تسرعت بقرارها او لا ... بس هي مقتنعة انها
بعد ماشافت نظراته واللهفة اللي بعيونه لعبير ..مستحيل تكون له
جسد ... بدون روح..
*****************************
بعد هالاحداث بـ3 ايام الجوهرة وياسر شادين رحالهم للندن .. ياسر
راح تبدا اختباراته بعد اسبوع .. ولازم يروح قبل ..
هالمرة الجوهرة .. ودعت اهلها غير عن اول مرة .. بالاول كانت
تحس انها رايحة لشي مجهول مو عارفة وش راح يصير معاها...
متوقعة بحياتها نجاح او فشل.. كانت خايفة من الغربة .. وانها ماتعرف
احد بهالبلد الغريب .. بس هالمرة غير.. رايحة وهي شايفة حياتها
وردية شفافة كلها حب قدامها ... رغبتها في المضي بحياتها .. ومساعدة
زوجها اهم شي يدور براسها بهاللحظة ... شوقها للمكان اللي انولد فيه
حبها لياسر ...وشوقها لبشاير .. اللي صار لها اكثر من 4 اشهر مو
شايفتها ...كلها زرعت فيها رغبة ملحة انها توصل بالسلامة للندن ..
بالطيارة جالسين ... سوالف تقطع عليهم ساعات الانتظار <<عكس
المرة الاولى كان صمت قاتل
وصلو لندن ... وكان الجو فيها رااائع . مطر خفيف .. والجو مغيم
ونفحات الهواء اللطيفة ... تدغدغ مشاعرهم همس لها: الحمدلله على
السلامة ياقلبي
ابتسمت له برقة: مو مصدقة اني رجعت لها .. وانا يوم سافرت ظنيت
اني اودع هالمدينة لآخر مرة ..
ياسر: عشان تعرفين مافي شي يصعب على الله
الجوهرة: ونعم بالله .. مشو لصالة الاستقبال رايحين لبيتهم وشافتها
تأشر لها من بعيد وراحت لها ركض: ياااعمري يابيشو وربي اشتقت
لك
بشاير تضمها: انا والله اللي ولهت عليج .. ماصار هذا كله زعل نشفتي
ريج الريال
الجوهرة: ههههههههههههههه بس جبت راسه
بشاير: بعد عمري والله ولهانة عليج وعلى قعدتج وسوالفج
الجوهرة: الايام قدامنا ان شاء الله...
بشاير: مو حاسة انج ناسية ريلج؟
الجوهرة: الا والله بس من فرحتي فيك
بشاير: انزين روحي له اخاف ييني يذبحني ..ماتشوفينه شلون قاعد
يطالعني
الجوهرة: اوكي ياقلبي .. بينا الو
بشاير: الحمدلله على السلامة يارب
الجوهرة: تو تقولينها؟
بشاير: والله نسييييييت
الجوهرة: زين لاتعصبين ... مع السلامة الحين
بشاير: الله يحفظج ... ودعتها ورجعت لزوجها ...وطلعو من المطار
لشقتهم الجديدة .. اللي اختارها ياسر قريب من الجامعة ... بيكون
اسهل له ...
ومن هالشقة راح يبدون ايامهم بفرح وحب وسرور والله يبعد عنهم
كل شر .. ويكفيهم شر جمانة ..
******************************
بمصر ايامهم وناسة ... روحات وطلعات ومايرجعون للفندق الا
وقت النوم بس ... مو مخلين مطاعم ولا كوفيهات ,, ولا اسواق
الا رايحين لها .. وخصوصا على النيل .. وياحلو اجواء السهر على
النيل ...
كانو قاعدين يبون يتعشون باحد المطاعم المطلة على النيل ... الجو
مايخلو من الوناسة .. في هذا البلد اللي تحس بالحركة فيه طول الوقت
وكثرة السياح الخليجين والسعوديين بالذات .. تخلي الواحد يحس انه
ماطلع بعيد.. ويحس بانتماء كبير..
جالسين على احدى الطاولات ويسولفون ... طبعا عبير بحجابها مثل
ماهي بالسعودية .. طالبين لهم عشا وقاعدين ينتظرون متى يجهز طلبهم
فهد: يااحلو الجو اليوم
عبير: ايوا مرة وناسة
فهد: والله ياقلبي اهم ماعلي بهالدنيا اشوفك مستانسة ومبسوطة ..
عبير:الله لايحرمني منك يارب
فهد:اليوم امي مكلمتك؟
عبير: ايوا ايش دراك؟
فهد: يوم اتصل عليها قالت لي
عبير: توصيني عليك .. وعلى نفسي
فهد: ياااارب تخليها لي.. حتى وانا بعيد عنها لازم تسأل عني
عبير: انت اللي مفروض تسأل عنها
فهد: والله اني كل يوم مرتين ولا ثلاث اكلمها واتطمن عليها
... وقبل يكملون كلامهم جا العشى ... وابتدو عشاهم وكملو سواليفهم
الضحك والحب يجمعهم مثل العادة ... مشاعرهم تتأجج عشق ....
وكلماتهم يذوب لها الصخر من رقتها ..والاحساس اللي يجمعهم فاض
على الكون كله ...
بهالاثناء كانت جالسة بطاولة قريبة منهم ..شافت فهد وماتت قهر لانه
معاها ...وبكل قهر: طيووف شوفيه قاعد معاها
طيف ( صديقتها ): من هو؟
رهف: فهد
طيف شهقت: اي والله هو .. مستانس مع حبيبة القلب
رهف: يااااربي والله احس بنار في صدري.. شكلهم مستانسين
طيف: روحي خربي عليهم
رهف: شلون؟ اخاف يسوي لي شي
طيف: لا عادي سوي نفسك مو عارفة .. او غلطتي
رهف: شلون طيب؟
طيف: انا بعلمك الخطة شلون ... بس انتي نفذيها مثل ما اقول لك
وصدقيني مو جاي لك شي..
رهف : زين قولي
قعدو يخططون وينسقون شلون رهف تخرب على عبير وفهد ليلتهم
وبعد ماخلصو طلعت رهف مرايتها وقعدت تناظر بشكلها: حلو شكلي
كذا ( كانت لابسة برمودا جينز وتي شيرت ابيض بالنص مطبوع
قلب احمر وفل ميك اب وكأن الله مايشوفها الا بالسعودية بس ..ومثل
هالعينات اعتبرت الحجاب للأسف عادة مو عبادة,,, وربطت هالعادة
بوجودهم في السعودية .. ومجرد خروجهم من ارض الوطن ... يرمون
عباتهم وحجابهم وحشمتهم ... وينزعون معاها الخوف من ربهم اسأل
الله العلي القدير ان يجملنا ويحفظنا بحجابنا )
طيف: قمر ... والله بيشوفك انتي الكاشخة وبيقارنك باللي عنده مو باين
منها الا عيونها ويدينها.. يعني اكيد بينفتن فيك
رهف فرحت بعمرها .. وقامت مبتسمة ابتسامة شيطانية خبيثة متوجه
للطاولة اللي فيها اجمل حبيبين ...
قربت من الطاولة وعبير تناظرها مستغربة وبكل وقاحة وجرأة: فهد؟
معقولة وش هالمفاجأة الحلوة.. ماتوقعت اشوفك هنا
فهد تلعثم وضاع كل الكلام منه .. وعيونه تناظر عبير اللي مبين عليها
الصدمة .... وبداخلها ترتجي اي شي اي كلمة يقولها فهد بس يريحها
رهف تكمل بوقاحتها: اووووهـ سوري شكلي طبيت في المحظور ..
مادريت ان المدام معاك
وراحت تمشي بكل غرور .. وهي مستانسة من اللي سوته.. وبداخلها
تتمنى يكبر الخلاف بينهم .. وتعرف عبير حقيقة زوجها اللي مخدوعة
فيه ومتصورته ملاك ...
عبير تجمعت الدموع في عيونها وقامت بدون تفكير ...فهد يبي يتكلم يبي
يبرر موقفه ويفهمها ان الموضوع مو اكثر من صدفة بسرعة قام
وراها ,,, ومسكوه يبونه يسدد الفاتورة ... شاف المبلغ وعطاه من اللي
معاه : خل الباقي معاك
راح ركض من وين ماشاف عبير رايحة ... يبي يعرف وين راحت بس
مو شايفها ... تلفت حوله بكل مكان ومو شايفها ... اتصل فيها ماترد...
رجع يتصل اكثر من مرة .. وبقلبه خوف كبير عليها .. ومو عارف وين
راحت مايدري شلون اختفت بهالدقيقة اللي دفع الحساب فيهم ...
ضاقت الدنيا فيه وهو قاعد يلفلف بالاماكن القريبة من المطعم يدورها
وبنفس الوقت قاعد يتصل وماترد عليه ....والله يستر
*
*
*
*
*
*
انتهى الجزء الثالث والعشرين
لاتبخلون علي بأي تعليقات على الاحداث والشخصيات
انتظر تفاعلكم
همسة :
كل عام وانتم بخير .. ومبارك عليكم شهر الرحمة والمغفرة ..
اعانني الله واياكم على صيامه وقيامه ...ووفقنا لما فيه صلاحنا..
اخواتي وحبيباتي .. بكل صدق وصراحة ...انا تلقيت نصائح
من اخوات عزيزات علي..بإني اتوقف في شهر رمضان المبارك ..
لذلك حبيت ابلغكم بإني راح انقطع فترة رمضان.. وراح ارجع بما
تبقى من اجزاء روايتي بعد العيد ..واتمنى محد يزعل او يتضايق ..
هي كلها شهر بالسنة .. ياليت نتفرغ فيه للعبادة ..راح يعز علي
فراقكم .. لكن ان شاء الله ماتطول الغيبة ,,الى لقاء قريب بإذن الله ..
تقبلووو مني اعذب الود ...
•غٌـمـوضٌ ـآٍْاْلٍْــورد•
16-08-09, 09:33 AM
جديد مواضيع قسم القصص المكتمله من وحي قلم الاعضاء
العرض العادي
