كاتب الموضوع :
غموض الورد
المنتدى :
القصص المكتمله من وحي قلم الاعضاء
الجزء العشرين
*
*
*
*
*
*
اليوم الاربعاء ببيت ابو تركي...
ابو تركي ينادي بأعلى صوته: مااااجد
ام تركي: خله على راحته الحين بيجي
ابو تركي: اي راحته الله يهداك تأخرنا على الناس
تركي: الحين بصوت له انت ارتاح طال عمرك
اتصل تركي على ماجد يستعجله يبون يطلعون الحين وهو
تأخر عليهم ...
ماجد اللي كان متردد وبداخله خوف كبير من هالتجربة الصعبة
هو عمره ماتخيل غير ملاك زوجته .. من عرف يختار ويفكر
وكلن يقول ماجد لملاك وملاك لماجد .. بس ربي ماكتب انهم
يستمرون اكثر ... هو رضى باللي كتبه ربي عليه بس محتاج
يكون اقوى ... لانه مايبي يظلم زوجته معاه..
عدل شماغة .. وبخ عطر شوي ونزل تحت :السلام عليكم
الكل: وعليكم السلام
ابو تركي : يالله يابوك تأخرنا
ماجد: يالله توكلنا على الله ...
توجهو لبيت ابو محمد يبون يخطبون لمى لماجد وان شاء الله
ربي يتمم هالخطبة على خير ..
وصلو لبيتهم واستقبلوهم احسن استقبال ... ام تركي دخلت عند
الحريم وابو تركي مع ماجد وتركي راحو لمجلس الرجال ...
بعد سوالف واخذ وعطا بدى ابو تركي بالكلام: اليوم يا ابو محمد
جايين ونبي نخطب بنتكم لولدنا ماجد ...
ابو محمد: والله والنعم يا ابو تركي انت رجال معروف وخيرك
على الجميع
ابو تركي :والنعم بحالك
ابو محمد: ان شاء الله ماحنا لاقين احسن منكم ولا من ولدكم لبنتنا
وانا لو تبي رايي بقول لك البنت بنتكم ومالي شور ابد.. بس تعرف
لازم ناخذ رايها ونشاورها ... وان شاء الله ماتلقون عندنا الا طيبة
الخاطر
ابو تركي: اكيد لازم تشاورونها وتاخذون رايها وان شاء الله منتم
مطولين علينا
ابو محمد: ابشر... والتفت لماجد: كم عمر بنتك ياماجد؟
ماجد: 3 سنين وزود..واذا تمت الموافقة بنتي اهم شي تبقى معاي
وزوجتي تعتبرها بنتها وتهتم فيها وتراعيها
ابو محمد: حقك ياولدي وبنتي ان شاء الله مو مقصرة معها
ماجد: الله يكتب اللي فيه الخير يارب
الكل: آمين
بمجلس الحريم كان الوضع مايختلف كثير .. ترحيب واستقبال حلو
لام تركي...وام تركي بتطير من فرحتها خصوصا انها حست انهم
موافقين ومبين انهم فرحانين فيهم ..
ام محمد: والله يا ام تركي اني مرتاحة لكم وعسى ربي اذا في هالزواج
خيرة يكتبه من نصيب لمى
ام تركي: ان شاء الله ,,,الله يفرح قليبي على ولدي ويطمنك على بنتك
ام محمد: اللهم آمين يارب
ام تركي من شافت لمى ارتاحت لها وتمنت من قلب ربي يكتبها من
نصيب ماجد ويسخرها له... عدى الوقت سوالف ووعد انهم مايطولون
عليهم بالرد...ودعوهم على امل انتظار اتصال منهم يحمل معاه ردهم
مرت 3 ايام قبل يجيهم الرد النهائي بالموافقة... وراح لهم ابو تركي
وماجد اللي طلب يشوفها شوفة شرعية ... وبعدها يحددون كل شي
قعد ماجد بالمجلس الداخلي ودخلت لمى مع محمد اخوها الكبير...اول
ماشافها ماجد ابتسم .. احلى من اللي توقعه واحلى من ملاك بعد ..!!
سلمت وقعدت وهي مستحية ... وهو يناظرها ...
ماجد: شلونك لمى؟
لمى: الحمدلله بخير
لاحظ فيها هدوئها وثقتها بنفسها ... وهالشي اعجبه فيها بس مايدري
ليش وهو يشوفها يحس بحزن ...دقايق جلس معاها فيها اخذ انطباع
اولي ... رجع بعدها لمجلس الرجال ... اتفقو على كل شي الزواج
والملكة بيوم واحد وراح تكون بعد 3 اشهر...
*****************************
ببيت ابو تركي الثاني جالسة عند امها يسولفون ... ويتقهوون
عبير: تطفشين لوحدك ؟
ام عبير: تقدرين تقولي اني تعودت خلاص
عبير: ياحبيبتي والله اني اشيل همك
ام عبير: لا ياقلبي لاتشيلي همي ولا حاجة ... يوم ابوك عندي
واليوم الثاني روحات وجيات ويعدي اليوم بدون ما احس
عبير: ان شاء الله ناوين الاسبوع الجاي نروح عمرة ... خالتي
نفسها تروح وبنقعد هناك يمكن اسبوع ...شرايك تروحين معانا؟
ام عبير: انا رايحة اصلا ... ملكة نوف وحاتم
عبير: متى حددو الملكة؟
ام عبير: قبل امس مكلمتني خالتك فاطمة
عبير: وانا محد يقول لي .. ولا كأني منكم
ام عبير: والله نسيت اقول لك..
عبير: اوريك فيها نوف امس اكلمها وماقالت لي
ام عبير: اكيد مرتبكة ومتوترة هذي الفترة
عبير: الله يوفقهم يارب... دقيقة بتصل اهزئها
ودقت عبير على نوف : السلام عليكم
نوف: وعليكم السلام
عبير: كذا ياخاينة تحددون الملكة وماتقولو لي ... حتى عزيمة
ماعزمتوني
نوف: والله كل حاجة صارت بسرعة بعدين مايحتاج لك عزيمة
اصلا .. انتي اختي ولازم تجين
عبير: ايوا العبي عليه بكلامك ... ماراح اجي غير لما تجيني
عزيمة رسمية ..
نوف: ههههههههههههه خلاص اخلي امي تعزمك
عبير: يلا مبروك ياقلبي وان شاء الله ابارك لك وجها لوجه
نوف: الله يبارك فيك يارب
عبير: اوكي انا بسكر الحين بجلس مع ماما
نوف: طيب .. وسلمي على عمة
عبير: اوكي يوصل باي... سكرت منها والتفتت على امها :تسلم
عليك نوف
ام عبير: الله يسلمها
عبير: طيب ماقلتي لي بابا بيروح؟
ام عبير: ايوا ان شاء الله ..
عبير: حلو.. بس متى الملكة؟
ام عبير: يوم الربوع بعد اللي جآي
عبير: كذا تمام .. نكون قعدنا اسبوع في مكة .. عشان بنرجع
الرياض الخميس
ام عبير: لا انا بجلس اسبوع بعدها كمان
عبير: ماما
ام عبير: هلا حبيبتي
عبير: تتوقعين حاتم لسى شايل في قلبه عليه؟
ام عبير: لو لسى شايل ماخطب نوف وبيملك خلاص
عبير: من زمان عنه .. مادري كيف راح اشوفه
ام عبير: لاتكبرين الامور الحياة تتغير ومو كل انسان يحصل
اللي تمناه..وياما كثير تعلقو باشخاص في حياتهم او توقعو انهم
راح يكونون لهم بس الاحلام شي والواقع شي ثاني.. انتي ربي
كتب نصيبك مع فهد... وهو اكيد راح يعيش مع نوف... انتي
تعرفينها حبوبة وتنحب بسرعة
عبير: انا مو خايفة من كذا.. بس مادري كيف راح اكلمه آخر
مرة شفته كان كلامنا رسمي مرة وما احسه حاتم اللي اعرفه
ام عبير: يمكن تتوهمين .. انتي توقعتي كذا وشفتي اللي تتوقعينه
عبير: يمكن ... فهد يتصل اكيد جا...وردت عليه: الو
فهد: هلا وغلا
عبير: هلا فيك
فهد: يالله قلبي انا دقيقتين واكون عند الباب البسي عباتك وتجهزي
عبير: تعال اجلس معانا شوية
فهد: والله تعبان ومكسل وابي ارتاح
عبير: طيب
فهد: لبى اللي تسمع الكلام ياناس
عبير: هههههههههه يلا باي... راحت تجيب عباتها تلبسها ...
ام عبير: خلاص جا؟
عبير: ايوا اكيد الحين عند الباب
ام عبير: طيب ياقلبي انتبهي لنفسك ولزوجك ..
عبير: ان شاء الله.. وحبت امها على خدها : مع السلامة
ام عبير: الله يحفظك يارب
**************************
راحت لفهد ركبت السيارة : السلام عليكم
فهد: وعليكم السلام
عبير: تأخرت عليك؟
فهد: لا عادي..شلونها خالتي؟
عبير: تمام
فهد: شرايك وين تبين نتعشى؟
عبير: لا حبيبي خلها بكرة مرة مرهقة وابغى ارتاح شوية
بعدين بذاكر لي كم كلمة قبل ما انام
فهد: وانتي من بدت هالدراسة تذاكرين
عبير: احب اذاكر اول بأول عشان ترسخ المعلومات في راسي
فهد: بس انا لي عليك حق
عبير ناظرته متفاجأة: يعني انا مقصرة معاك؟
فهد: مو مقصرة بس اوقات ابيك اشوفك تذاكرين واخليك
عبير:بس انا ماقدمت حاجة عليك ولو طلبتني عارف اني ماراح
اتأخر عنك
فهد: مو مشكلة
عبير: كيف مو مشكلة؟ حبيبي اذا انا مقصرة في حاجة قولها من
الاول لاتخليها في قلبك بكرة تكبر ومايصير لها حل
فهد: قلت لك مو مشكلة
عبير: طيب براحتك.. وسكتت عبير وهي مستغربه مزاجه اليوم
متغير وكأنه فيه شي ...
وصلو البيت ونزلت وهو بعده قاعد بالسيارة : فهد
فهد: هلا
عبير: ماراح تنزل؟
فهد: الا هذاني نازل
دخلت قبله ومالقت ام فهد اكيد نامت بالعادة تصلي العشا وتنام
والحين العشا مصلينه صار لهم حول الساعة..
راحت المطبخ لقت الشغالة تنظف فيه ..: سنتيا ايش فيه عشا
اليوم؟
سنتيا: مادري انتا مافي يقول
عبير: اوكي انا بشوف ...وراحت تحوس في المطبخ تدور
اي شي تسويه على العشا
فهد دخل المطبخ وشافها مطلعة خضار وتبي تقطعهم: قلبي
التفتت له وابتسمت: هلا حبيبي
فهد: وش قاعدة تسوين؟
عبير: بسوي العشى
فهد راح لها وسحبها من يدها : خلي الشغالة تسويه روحي
خلصي مذاكرتك ابي اسهر معاك اليوم
عبير: لا عادي بسهر معاك ولا يهمك والمذاكرة اخليها بعد
الفجر.. بسوي عشى خفيف
فهد: اوكي بس ترى كنت ابي اريحك انتي اللي ماتبين
عبير: انا كذا مرتاحة
فهد: زين .. وطلع للصالة يتابع له مباراة في الدوري الاوروبي
عبير سوت ساندويتشات دجاج وسلطة .... خلصتهم وحطت
الساندويتشات في المايكرويف وتبي تروح تاخذ لها دش سريع
وتبدل ملابسها : سنتيا بعد عشر دقايق سخني الساندويشيز
سنتيا: اوكي
راحت تسبحت ولبست لها بنطلون رمادي وتوب اسود حطت
جلوس لحمي .. وماسكارا وشوي بلاشر على خدوها ... نزلت
وأشر لها فهد تجي تقعد معاه: حبيبي ثواني احط العشى
فهد: طيب
رتبت السلطة والساندويتشات في صحون تقديم وراحت حطتهم
على طاولة الطعام ..ونادت على فهد اللي جا وجلس بدون مايتكلم
عبير من اول حاسة فهد فيه شي بس ماكانت متأكدة: حبيبي
فهد: هلا
عبير: شفيك؟
فهد: مافيني شي
عبير: بس احس انك متضايق او مهموم
فهد يحاول يضيع السالفة: لا مافي شي ... انتي اللي مسوية هذا؟
عبير: ايو ... ليه مو تمام؟
فهد: لا بالعكس فيه تحسن
عبير: يعني مو عاجبك بس احسن من اول
فهد: لا مو كذا قصدي بس لا حسيت انك تطبخين شي صعب
بعرف احكم عليك وقتها
عبير: شي صعب زي ايش؟
فهد: جريش مثلا
عبير شهقت: حبيبي مرررة صعب
فهد: وبتقعدين طول عمرك ماتتعلمينه؟ تراي اموت فيه يعني
لازم تعرفين كيف تسوينه
عبير: طيب عشانك بتعلمه ... بس اسأل مين كيف طريقته
فهد: شوفي لك اي كتاب طبخ
عبير: مادري احس الاكلات الشعبية احسن طريقة ناخذها من
اللي يضبطونها جد
فهد: اجل اسألي امك
عبير: انت عارف انه الجريش اكلة نجدية ... وما اذكر اصلا
انه ماما قد سوته
فهد: اجل شوفي وحدة من خواتي..اسألي نورة تطبخ نفس امي
عبير: خالتي كانت تطبخ؟
فهد: اكيد مافي احلى من اكلها وربي .. بس كنت صغير من
كبرت ماعاد تدخل المطبخ
عبير: اجل بسألها احسن
فهد: امي تفوت يعني ممكن تنقص شي كذا ولا كذا
عبير: عادي اشوف البنات بعدين.. ومدت له ساندويتش
فهد: لا خلاص شبعت الحمدلله
عبير: حبيب ما اكلت والله
فهد: والله العظيم شبعت ماعاد له مكان
قامت شالت الصحون وودتها للمطبخ:سنتيا خلصي تنظيف
وروحي نامي
راحت غسلت يدينها وقعدت مع فهد بالصالة ..لاحظت شروده
اللي من رجعو وهي متأكدة انه في شي بس فهد مخبيه عنها
ماحبت تضغط عليه وتركته على راحته:فهودي
فهد: هلا
عبير: رايحين مكة الاسبوع الجاي؟
فهد: ان شاء الله
عبير: حلو.. يوم الربوع اللي بعد الجاي ملكة نوف وحاتم
عشان احضرها
فهد من سمع اسم حاتم تضايق اكثر : لا
عبير: ليه لا؟ لو احنا في الرياض ماطلبتك صعبة ومشوار
عليك بس في مكة وكلها ساعة واحنا في الطايف
فهد: قلت لك لا
عبير: فهد لاتاخذها عناد هذي بنت خالي وولد خالي
فهد: عبير لاتزودينها معاي لاتخليني احلف.. وقام عنها
سكتت عبير ماتبي تضغط عليه عارفة ان نفسيته مو ذاك الزود
قعدت شوي وطلعت لجناحهم ..شافته جالس على السرير
ومسترخي: تبغى تنام؟
فهد: ياليت بدون ازعاج
راحت عبير وقربت منه ماتبيه ينام وهو زعلان عليها:حبيبي
التفت لها بدون مايتكلم ...
عبير:خلاص اذا ماتبغاني اروح ماراح اروح بس انت لاتزعل
فهد: مو زعلان ياقلبي بس ابي انام
عبير باسته على خده: تصبح على الف خير
فهد: وانتي من اهله ... وغمض عيونه ونام او بالاصح حاول
انه ينام ويتجاهل وجود عبير حوله ..
اللي فضلت انها تروح تذاكر شوي وبعدها تنام ...
************************
توها راجعة من المستشفى .. عندها مراجعة ومسوية سونار
ودها تعرف جنس الاجنة اللي ببطنها ...وعطتها الدكتورة
صورة للذكرى ..دخلت بيت اهلها وهي مستانسة:السلام عليكم
الكل : وعليكم السلام
ماجد: ماشاء الله الوجه منور
فاتن: اييييه الحمدلله مستانسة
اريج: دوووم الوناسة .. ونسينا معاك
فاتن: اليوم رحت كشفت ع الاجنة وعرفت جنس واحد والثاني
يقولون مو مبين يمكن الاشهر الجاية يكون اوضح
تركي: وش طلع؟
فاتن: ولد بس الثاني مرررة مو واضح
ماجد: ان شاء الله بنت
اريج: يااااارب
فاتن: امي وابوي وينهم؟
تركي: ابوي عند عمي .. وامي من طلعت تصلي الظهر مانزلت
فاتن: ايه صح غريبة مجتمعين ؟
تركي: انا طلعت بدري من الشركة برجع العصر عندي اجتماع
وقلت اريح شوي ..
اريج: انا من امس نايمة هنا .. وعاد معرسنا يتجهز لعرسه
ماجد: ياكرهك بس.. انا مستلم مارجعت الا الساعة 9
فاتن: يالله وناسة نجتمع على الغدى
اريج: فتون لو سويت سونار اعرف وش اللي ببطني؟
فاتن: صاحية انتي؟ توك ببداية الثالث شلون تعرفين
اريج: مادري والله مشتاقة له نفسي هالشهور تعدي بسرعة واولد
فاتن: وش اقول انا احس هالـ 3 اشهر اللي باقي لي طويلة حيل
ماجد: الحمدلله والشكر اركدو وش هالطيرة
اريج: ياثقل طينتك سوالف حريم وش مدخلك فيها؟
ماجد: لعنبو ابليسك انتي ماتحشمين اللي اكبر منك بعدين لو هي
سوالف حريم ليش تسولفون عندنا هنا
اريج: هههههههههههههه ماتعرفون المزح انتو
تركي: اريج احترمي اخوك وعيب تقولين له هالكلام
اريج بصوت اقرب للهمس: تكلم قراقوش
تركي سمعها وابتسم بخاطره: وشو؟
اريج: اقول على امرك طال عمرك
تركي: اشوا
ام تركي: هلا والله اليوم عيالي مجتمعين
قامت فاتن تحب راس امها: هلا بالغالية
ام تركي: ارتاحي يمه لاتتعبين عمرك
فاتن: مرتاحة يمه الحمدلله الحين الحمل ثابت وماعلي خوف
بإذن الله
ام تركي: سعود بيجي يتغدى معانا؟
فاتن: لا مو جآيني الا بكرة
اريج: يمه ابي آكل جوعـآنة
ام تركي: اصبري يجي ابوك ونحط غدانا
اريج: طيب الله يعينني
ابو تركي: يعني ما اشتقتي لابوك تبين الاكل بس
اريج تضحك وهي قايمة تسلم على ابوها : هلا والله بنور
هالبيت
ابو تركي: منور فيكم والله ... الله لايخليني من دخلتكم علي
وجمعتكم حولي
تركي: الله يطول بعمرك يالغالي ولا يحرمنا منك
اريج: يلاااا بتقعدون تسلمون وتنسون الغدى تراي بموت من
الجوع
ام تركي: قومي لايطق فيك عرق
وقامو كلهم يتغدون ...واستمرت السوالف والوناسة
**************************
تجهزو ماشين لمكة ..فهد وام فهد وعبير وخالد وشهد وام تركي
طبعا قررو يروحون بسيارة ابو تركي ( الجمس ) ...
قدام اللي يسوق فهد وخالد بجنبه ... وبالسيت اللي وراه ام فهد
وام تركي وسنتيا.. اما السيت الخلفي كان فيه عبير وشهد
ومعاهم الحلويات والبساكيت والتشيبسات والعصيرات ....
طول الطريق تقريبا ام فهد وام تركي ساحبينها نومة ,,,,
خالد وفهد سوالف طول الطريق,,وعبير وشهد سوالف وضحك
عبير: فهد تبغى عصير؟
فهد: اي هآتي
عبير: ايش تبغى معاه؟ تويكس ولا جلكسي ولا سنيكرس
فهد: هاتي تويكس
عبير خذت العصير والتويكس ومدتهم لسنتيا تعطيهم فهد..
ورجعت عطت سنتيا بعد: خلود ايش تبغى انت؟
خالد: وانا من اول ساكت ابيها تجي من شهد بس ماحولي احد
فهد: هههههههههههههههه ياخي لا تظلمها اكيد تستحي مني
عبير: والله جد تستحي.. قول ايش تبغى يلا
خالد : خلي شهد تختار لي على ذوقها
شهد: خالد تبي تشيبس؟
خالد: اي شي منك حلو
فهد: فاهم الغزل غلط
عبير: هههههههههههه ملاحظ انت
وقعدو يضحكون وسنتيا تضحك معاهم <<قاطة الاخت
ام تركي: لعنبو ابليسكم ماتخلون الواحد ينام
خالد: يمه طول الطريق مانسمع الا شخيرك وتقول ماتخلون
الواحد ينام
ام تركي: ههههههههههه يالنصاب هذا شخير امي
عبير: كم باقي لنا ونوصل؟
خالد: الطايف بقى له 320 كيلو
عبير: ياااربي لسى بعيد
ام تركي: نامو ضيعو من الطريق شوي
فهد: لا خليهم يونسونا
خالد: خلنا ننزل نريح ونتقهوى وعقب انا بسوق بدالك
فهد: مادري شرايكم انتم؟
ام تركي : اي احسن خلنا نريح ونصلي المغرب والعشا
خالد: اجل وقفنا قدام...
وقفو على جنب وفرشو فرشتهم .... وقعدو يتقهوون .. وبعدها
صلو المغرب والعشا .. وكملو طريقهم وهالمرة اللي يسوق
خالد..
وصلو الطايف وحجزو لهم بالفندق غرفة فهد وعبير والغرفة
الثانية شهد وخالد والغرفة الثالثة ام فهد وام تركي وسنتيا ...
بيمشون بعد صلاة الفجر لمكة يعتمرون ..
نامو من تعب الطريق بدون اصلا مايحسون ...وصحو لصلاة
الفجر ومشو بعدها ...وصلو لأطهر بقعة في المعمورة اعتمرو
وقعدو بالحرم لصلاة الظهر وبعدها راحو للفندق اللي حاجزينه
حاجزين هالمرة جناح للحريم بغرفتين وصالة ..وغرفة للشباب
الاجواء روحانية ومن احلى مايكون... اغلب وقتهم بالحرم
ومن يكون قريب من الحرم ويبي يفارقه << يارب تكتب لي
عمرة في رمضان يارب
عبير: شهودة يلا ننزل قبل ما يأذن المغرب
شهد: صبر بتوضا
عبير: طيب لاتتأخري عارفة وقت الاذان زحمة
شهد: زين
فتحت الباب شافت فهد توه جاي بيطق عليهم الباب ابتسمت
له: هلا والله
فهد: هلا قلبي
عبير: نازل الحرم؟
فهد: ايه يالله معاي
عبير: استنى شهد .. ماباقي الا انا وهي
فهد: ليش وين راحو؟
عبير: من بعدما نزلنا صلاة العصر قعدو في الحرم
فهد: اقول تعالي خليها تنزل مع خالد
عبير: لا حرام عليك
فهد: والله خالد جاي وراي
عبير تضحك وتنادي بأعلى صوتها: شهودة بنزل مع فهد
كلمي خالد يمرك
شهد تتوعد فيها بس متحملة وناوية تهزأها لا شافتها
عبير: ههههههههههه احسها عصبت عليه
فهد: ماعليك فيها خليها تقرب منك بس
وركبو اللفت نازلين للحرم عبير تناظر ساعتها: كم باقي
على الآذان؟
فهد: يمكن ربع ساعة
عبير: امممم مايمدينا
فهد: وش عليه؟
عبير: قلت كذا نطلع كوفي صار لنا 3 ايام ماجلسنا مع
بعض
فهد: خلاص ولا يهمك بعد صلاة المغرب على طول تعالي
نروح كوفي
عبير ابتسمت: طيب
دخلت الحرم وراحت لوين ماكل يوم يقعدون... لقت ام فهد
وام تركي وسنتيا قاعدين سلمت عليهم وصلت تحية المسجد
خذت لها مصحف وقعدت تقرأ قرآن... اقيمت الصلآة صلو
وطلعت بعد الصلآة على طول اتصلت في فهد وشافته قاعد
ينتظرها..
مشت هي وياه لاقرب كوفي في احد المراكز القريبة من الحرم
طلبو لهم كوفي وتشيز كيك وقعدو يسولفون
فهد: والله يا ان الواحد هنا يحس براحة مو طبيعية
عبير:اي والله الحمدلله على نعمة الاسلام
فهد: مرتاحة ياقلبي؟
عبير: اكيد الحمدلله
فهد: ذوقيني من التشيز كيك
عبير توكله بالشوكة : احسك رايق اليوم
فهد: مستانس والله
عبير: يارب على طول
فهد: وياك ياقلبي .. عبورة
عبير: هلا
فهد: متى ملكة بنت خالك؟
عبير ابتسمت : يوم الربوع
فهد: خلاص بعد صلاة العصر نمشي الطايف زين؟
عبير : ياعمري انت .. خلاص اوكي
فهد: وانا عشان الفرحة هذي اسوي لك اللي تبين
عبير: الله لايحرمني منك يارب
فهد: آمين ولا يخليني منك
عبير: بنقعد كذا نتغزل في بعض وبتفوتنا الصلاة
فهد يناظر ساعته: تونا بدري
عبير: باقي اقل من ثلث ساعة
فهد: تبين نروح؟
عبير: ابغى اروح الفندق اغسل واتوضى
فهد: اوكي يالله مشينا ..
وطلعو من الكوفي بعد ماحاسب فهد ... راحو للفندق
غسلو وتوضو ورجعو نازلين للحرم.. صلو العشا وقعدو بعد
الصلاة حول الساعة ورجعو بعدها الكل للفندق..تعشو عشى
خفيف وقعدو البنات شوي وبعدها نامو ...
ومثل هاليوم استمرت ايامهم بمكة المكرمة..ايام كلها روحانية
وخشوع وراحة وطمأنينة....
*******************************
بقى لها حول الشهرين وتخلص كورس اللغة وبعده مقررة ترجع
للسعودية ولاهلها وتترك ياسر ...رغم انه في الفترة الاخيرة صار
اغلب وقته عندها اكله وقعداته معاها.. ومايروح عنها الا وقت
النوم او وقت الكلية ... وجمانة اللي حرمها من دوامها اسبوع ...
خلاها ترجع بعد ماهددها لو تأخرت بس دقيقة انه راح يكون له
تفاهم معاها .. طبعا هو سامحها بعد ماحلفت له انها كانت طالعة
تتعشى مع صديقاتها .. وانها ماقالت له لانها تدري انه بيرفض..
الجوهرة تتمشى هي وبشاير بنفس الحديقة اللي تقابلو فيها اول مرة..
بشاير: يعني الحين قرارج نهائي؟
الجوهرة: والله يابيشو تعبت من هالحياة احبه بس الغيرة تذبحني
بشاير: خيريه
الجوهرة: شلون اخيره ... وانا حتى ما ادري اذا هو يبيني او لا
بشاير: مو انتي تقولين انه قال لج يبيج
الجوهرة: اي قالها مرة وكان وقتها متضايق وماعاد سمعتها منه
وكان متهاوش مع جمانة يومها ... يعني شعوره بلحظة حس انه
بيفقدها ..
بشاير: ممكن وممكن انه فعلا يبيج
الجوهرة: اذا يبيني يتركها .. ويكون لي انا بس
بشاير: جوجو لاتعقدينها
الجوهرة: والله ما اعقدها بس زواجه منها غلطة واذا يبيني
يصحح غلطته ... وش اقول لك بس تعبت من همي والله...
اصعب شي اذا حبيتي شخص وتعلقتي فيه وهو قدامك بس
ماتقدرين توصلين له...
بشاير: تدرين عاد؟
الجوهرة: وشو؟
بشاير: محد من الهم خالي
الجوهرة تفاجأت ماتوقعت انه بشاير عندها مشاكل او هموم
مبين عليها انها سعيدة: تعالي نقعد وعلميني...
قعدو على اقرب كراسي لهم وتكلمت بشاير عن اللي بخاطرها
كله: من وانا ياهل كان دايم ولد عمي قبالي ..حبيته وقالو
لي انه هم بعد يحبني ... وزاد تعلقي فيه مع الايام..ومن صار
عمري 15 سنة انتقلنا لبريطانيا لظروف عمل ابوي وصدقيني
ياجوجو كثر ماكنت زعلانة اني بفقد هلي وديرتي ورفيجاتي
الا اني كنت بموت مجرد احساس اني راح ابتعد عن جاسم
بوقتها ماكنت اعتبره حب كنت اعتبره لعب يهال ...بس ييت
هني وماقدرت انساه ..وكل وقتي افكر فيه..ولارجعنا الكويت
كنت ادوره بين كل اللي يستقبلونا .. كنت احس بعيونه فرحة
غير بشوفتي .. كبرت وكبر معاي حبي له .. دخلت الجامعة
وبثاني سنة رحنا بالصيف كالعادة للكويت ..وماشفته استغربت
غيابه وبالعادة يكون ببيت عمي العود يستقبلنا ...واللي صدمني
انه دخل علينا بعد فترة من ييتنا وماسك بايده ايد مرته...
الجوهرة: تزوج؟؟؟
بشاير: بوقتها كان مملج .. وزواجه بعد شهر... ودمعت عينها
وهي تسترجع ذكرياتها المؤلمة: آآآهـ ياجوجو حب 7 سنوات
كله صار وهم وجذب.. ماعرفت شنو اللي صار فيني وقتها
سكت وتحملت وانا بداخلي مجروحة ..
الجوهرة: طيب يمكن ماكان يحبك يعني شعور ولد عمك عادي
بس انتي لانك حبيتيه توهمتي حبه
بشاير: اهو لمح لي .. وكل اللي حولي كانو يقولونه .. كل البنات
يقولون انه يحبني ... وقتها تمنيت اصرخ باعلى صوتي بس
ابي اعرف ليه.. والحين صار له من تزوج 4 سنوات وعنده بنت
بس مو قادرة انساه ..والله مو قادرة...
الجوهرة: ههههههههههههههه صدق لا قالو شر البلية مايضحك
بشاير: ليش تضحكين؟
الجوهرة: وحدة فينا تحب واحد وتبيه وهو مايبيها والثانية تحبه
ويبيها بس هي ماتبيه
بشاير ابتسمت :اللي يبينا عيت النفس تبغيه واللي نبي عيا البخت
لايجيبه
الجوهرة: لاتتحسفين ياقلبي على شي فات وانتهى ... بالدنيا محد
بياخذ الا نصيبه ... وانتي بنت حلوة ومتعلمة واي واحد يتمناك
بشاير: ان شاء الله ... قومي اوصلج الوقت تأخر..
الجوهرة: زين يلاااا
ومشو رايحين للسيارة وصلتها بشاير وراحت لبيتها ...
دخلت الجوهرة شقتها لقت ياسر قاعد ينتظرها : السلام عليكم
ياسر: وعليكم السلام... وينك تأخرتي؟
الجوهرة: كنت قاعدة انا وبشاير بالحديقة
ياسر: تدرين وش اللي يشفع لك؟
الجوهرة: وشو؟
ياسر: انك بحياتك ما كذبتي ..
الجوهرة: وش اللي يخليك متأكد
ياسر: اللي يكذب يبان عليه ارتباكه ... بس انتي تجاوبيني
وانتي واثقة من نفسك .. ممكن لو قلتي بطلع معاها رفضت
بس لانك ماتلفين وتدورين هالشي يخليني واثق فيك واعرف
لو رحتي لاي مكان مستحيل تخونين ثقتي فيك..
الجوهرة: انا ما ارح اخون نفسي قبل لا اخون ثقتك.. تبي
تتعشى معاي؟
ياسر: اي ياليت
الجوهرة: ابشر
ياسر: جعلك تبشرين بالجنة يارب
الجوهرة: وياك يارب.. تبي شي معين ولا اطبخ لك على
مزاجي؟
ياسر: عادي اللي يجي منك حياه
الجوهرة: زين... ودخلت بدلت ملابسها ولبست لها قميص
قطني قصير ... ولمت شعرها الطويل بشباصة ودخلت
المطبخ..كانت منغمسة في شغلها .. تطبخ وهي مستانسة
كثير ...تحس انه ياسر ماراح يستغني عنها بس لازم يثبت
لها هالشي..
خلصت كل شي وراحت تتسبح من ريحة الطبخ : دقايق
بس واحط العشى
ياسر: لاتتأخرين بموت جوع
الجوهرة: زين .. تسبحت وبدلت وراحت حطت العشى
وقعدو يتعشون..هالمرة كان اغلب وقته ساكت واستغربت سكوته
تحس ان ورى سكوته شي ..
ياسر: تسلم يدك
الجوهرة: توك ماكليت شي
ياسر: وانا قلت بقوم
الجوهرة:ههههههههههه مادري
ياسر: لا بجد بهالغربة مافي احلى من طبخ يدك احس اني قاعد
آكل شي نظيف ..
الجوهرة: ياجعله بالعافية يارب
ياسر: الله يعافيك
الجوهرة: اي نسيت اقول لك
ياسر: وشو؟
الجوهرة: خواتي انخطبو لاخوان
ياسر: هههههههههههه جد؟
الجوهرة: اي والله
ياسر: من هم؟ نعرفهم
الجوهرة: لا من معارف ابوي واحد من اخوياه .. هم جايين
يخطبون مشاعل لولدهم وشافو اماني ورجعو كلمو اهلي بعد
يبونها لولدهم الثاني
ياسر: ووافقو خواتك؟
الجوهرة: تقريبا ايه.. للحين ماردو لهم.. بس اكيد بهاليومين
ياسر: الله يوفقهم يارب
الجوهرة: آمين ...
كملو عشاهم .. وقامو غسلو ..سوت بعدها الجوهرة شاهي
وقعد عندها ياسر الين جت جمانة من دوامها وراح لها ..
ياسر: هلا قلبي
جمانة: ليش اجيت ؟ ليش ماكملت السهرة عندا
ياسر: وانتي جاية تبين هواش بس؟
جمانة: لأ بس شايفة روحاتك وجياتك لعندا كتراني.. ومو لاني
سكتت معناتها بكون راضية
ياسر: وانا يعني بنتظر الإذن منك؟
جمانة: شو عاملة لك هيي؟
ياسر: ولا شي.. ليش؟
جمانة: كتييير تغيرت عليي..من وقت اللي تزوجتها وماعاد
انتا ياسر اللي بعرفه
ياسر: انا هو انا ماتغيرت ابد.. بس في اشياء كنت اجهلها عرفتها
للاسف متأخر
جمانة: شو قصدك؟
ياسر: ولا شي... تصبحين على خير
جمانة بصراخ: ياسر ماتتركني هيك .. قلي شو اللي عرفته
طنشها ومارد ..راح لغرفته .. رمى نفسه على سريره ونام ..
تارك جمانة في حيرتها وتفكيرها وقلقها ...
******************************
قاعدة مع بندر وخالتها ببيت ابو بندر الوحم ذابحها وبندر
ميت ضحك عليها
اريج: اي انتو يالرجاجيل مو فالحين الا بالتعليقات ولو
يوم قلت لك تعبانة قلت مافيك الا العافية
بندر: عاد جد انتو ياكثر تشكيكم الوحدة تحط بعمرها امراض
الدنيا كلها ... ماتجلس مع حريم الا تسمع آه يارجلي وراسي
وبطني وكل شوي مطلعة علة جديدة
ام بندر: وهي الصادقة بنيتي .. انتم ماتقدرون يكفينا تعب الحمل
والولادة عن الف تعب
اريج: اي والله خالتي وهم الواحد فيهم لو جاته انفلونزا بس قوم
الدنيا وقعدها
بندر : تصدقون انا الغبي اللي قاعد اناقشكم ..خسران مافيها كلام
لا اجتمعو امي واريج
ام بندر: ههههههههههههه انا اقول الحق
بندر: ان شاء الله خير
اريج: خالتي الحين لاخلص الشهر الرابع ما احس بشي ؟
ام بندر: ان شاء الله
اريج: والله كرهت كل شي حتى ريحة بندر
بندر: والله انك تموتين على الاكل..كل ماشفتها داخلة تاكل وطالعة
تاكل
اريج: ترى نص هالاكل لولدك
بندر: كل يوم تقول هالعذر
ام بندر: لعنبو ابليسك استح .. حاسد البنت وتمن عليها؟
اريج: اي خالتي شوفيه .. كل ماشافني آكل قال فقرتيني
بندر: ههههههههههه وربي انها نصابة
اريج: لا والله جد بندر عطرك الاخير ريحته خياس
بندر: خياس؟
اريج: اي والله
بندر: لاتحلفين .. يمه شرايك فيه؟
ام بندر: ماعليك منها في حريم يكرهون حتى رجاجيلهم
اريج: الحمدلله اللي جت على ريحته.. خالتي متى عشاكم؟
ام بندر: والله مدري عن الشغالة.. بقوم اشوفها
اريج تقعدها: والله ماتقومين انا بروح اشوف
ام بندر: الله يعطيك العافية يابنيتي
اريج: يعافيك ربي
وراحت تكلم الشغالة تستعجل عشاهم ... وماهي الا دقايق
والعشا حاطينه على السفرة
اريج: اشتقت لاهلي والله
ام بندر : الله يرجعهم بالسلامة يارب
اريج: اللهم آمين ,,, كل يوم يكلموني من الحرم والله ياني
مشتاقة اروح له
بندر: اولدي انتي بالسلامة وان شاء الله بنروح له كلنا
اريج: يارب ان شاء الله
كملو عشاهم ..وبعدها استأذنوهم بندر واريج رايحين لبيتهم
في الطريق للبيت كملو سوالفهم
اريج: بندر
بندر: عيونه
اريج: احس ندى فيها شي بس ماتعلمني
بندر: شي مثل وشو؟
اريج: احس في مشاكل بحياتها ولا سألتها تنكر
بندر: يمكن تتوهمين
اريج: والله احساسي عمره ماكذب علي احس حزن بعيونها
احس بداخلها اشياء ودها تقولها بس ماتتكلم
بندر: طيب حاولي تعرفين منها
اريج: قلت لك لا سألتها تنكر ...
بندر: حلفيها بالله
اريج: لا مابي اضغط عليها .. هذي خصوصيات اذا هي
تبي تتكلم انا بسمعها
بندر: ان شاء الله مافي شي وهذا كله اوهام
اريج: يارب
قعدو يسولفون الين ماوصلو البيت نزلو ... ودخلو البيت
بدلو ونامو..
*************************
يوم الاربعاء وصلو الطايف حجزو لهم فندق ونزلو
الا عبير اللي راحت لبيت خالها تبي تستعد معاهم
للملكة .. اول ماوصلت بيت خالها طارو فيها من الوناسة
من زمان عن بعض..
عبير: فين نونو؟
مرام: في المشغل .. يلا بنروح الحين عشان نطلع بدري
( طبعا المناسبات في الغربية تبدا متأخرة يعني مايكتملون
المعازيم الا على حدود الساعة 12 والعروس تنزف على
الساعة 2 ونص او حتى 3 )
راحو البنات للمشغل خلصو مكياج على اذان المغرب ..
ورجعو البيت صلو ولبسو فساتينهم واكسسواراتهم
رنا: امي راحت؟
مرام: ايوا راحو من قبل المغرب ...
عبير: من بيودينا القاعة؟
مرام: اكيد السواق
عبير: لا اخاف فهد مايرضى
رنا: طيب كلميه
عبير : اوكي..واتصلت بفهد اللي رفض تروح مع السواق
وقال انه بيجي يمرها يوديها
مرام: هاه ايش قال؟
عبير: بيجي يمرني الحين
مرام : طيب استنيه واحنا بنروح
عبير: لا بطلع شقتنا استناه هناك
رنا: اوكي
عبير: خلاص اشوفكم هناك
وراحت لشقتهم قعدت فيها تنتظر فهد يجيها ... بس
تأخر عليها
اتصلت فيه تستعجله: حبيبي فينك؟
فهد: والله خالص من ساعة بس مرة اخوك هذي يومها
بسنة
عبير: ياربي فهودي البنات كلهم راحو وانا جالسة لوحدي
فهد: طيب بروح استعجلهم
بعد نص ساعة اتصل فيها فهد وهي معصبة: الو
فهد: مع اي باب؟
عبير: الخلفي انا نازلة وصلتو؟
فهد: لا اصبري بشوفك قبل
عبير: فهد مو وقتك والله تأخرت ..
فهد: ماعلي بشوفك ولا ماتروحين
عبير: طيب انا نازلة الحوش
نزلت عبير بسرعة وفتحت له الباب ..: كذا اخرتوني
البنات يتصلون عليه وماما حرقت الجوال اتصالات
فهد: طيب الحلو ليش معصب؟
عبير: حبيبي كيف شكلي ؟
فهد: والله قمر بس ابي اشوف الفستان بعد
عبير بدلع: حبيبي
فهد: مو شغلي يالله ابي اشوف
فصخت عباتها ودارت على نفسها : هاه شفتني خلاص
فهد: متى تخلص ملكتكم؟
عبير: على الفجر
فهد: استغفر الله بس .. اي وقت يجي ببالي بمرك
عبير وهي ترجع تلبس عباتها وتتغطى: فهد انت ناويها
عناد يعني؟
فهد:لا والله امزح بس انتي اعوذ بالله على طول تعصبين
عبير: طيب يلا شوف ماما تتصل .. وردت على امها
على طول: ايوا ماما
ام عبير: فينك؟
عبير: خلاص جاية عشر دقايق ان شاء الله وانا عندكم
ركبت السيارة ورى مع شهد وقبصتها بيدها: متأخرة
ليش؟
شهد: آآآي والله غصب عني بعدين ترى انا مالي بالملكة
بس جاية معاك وموديتني قبل كل المعازيم
عبير: خلود اسرع كمان.. ماعليه كلهم اهلك..وترد على
جوالها للمرة الالف هاليوم: هلا نونو
نوف : فينك انتي في القاعة؟
عبير: لا لسى في الطريق وصلتي؟
نوف: لا باقي لي التسريحة بس .. الله يسعدك اتصلي
في البنات يشوفون المصورة دوبها اتصلت تقول وصلت
القاعة
عبير: اوكي ولا يهمك .. باي
سكرت منها واتصلت بمرام ماردت رجعت اتصلت في
هديل اللي بعد خامس رنة ردت عليها : هدولة
هديل: هلا
عبير: بسرعة روحي شوفي المصورة وصلت وديها
لغرفة العروسة
هديل: يلااا اوكي باي
فهد: الحمدلله والشكر مسوين حالة استنفار
عبير:خالد يمين بعد الاشارة..وصارت توصف له الطريق
الين وصلو للقاعة ... نزلت هي وشهد ..
على طول دخلو وراحت عبير تركض هنا وهناك يجهزون
كل شي
ام عبير: فين خالتك ام تركي؟
عبير: اعتذرت تقول بتجلس مع خالتي ام فهد
ام عبير: طيب لاتخلي شهد لوحدها
عبير: لا بجلس معاها بس رحت شفت البنات اذا يحتاجون
مساعدة..
مرام وهي معدية من عندهم : لا مانحتاج حاجة ارتاحي لو
نبغى منك شي كلمتك
عبير: طيب انا بجلس في اول طاولة...
بدو المعازيم يتوافدون .. والقاعة امتلت اقاربهم ومعارفهم
والكل مستانس بهالليلة ... انزفت العروس مع عريسها ..
وقعدو بالكوشة ..راحت مرام وقربت الدبل لاخوها ..لبسها
الدبلة وطقم الشبكة ..والكل صار يبارك لهم ..طلعت عبير
تبارك لهم بعد..: الف مبروووك نونو
حاتم التفت لمصدر الصوت وانتبه لعبير حاضنة نوف
وتبارك لها
نوف: الله يبارك فيك ياقلبي
التفتت بعدها على حاتم: مبروك حتوم
حاتم برسمية: الله يبارك فيك
انتبهت عبير لنظرات نوف عليهم وانسحبت خوفا من
انها تسبب اي مشاكل وهم ببداية هالعلاقة..
انتهت الملكة وكلهم توجهو لبيوتهم بقلوب تملاها الفرحة
ودعوات للعريسين ربي يتمم لهم على خير ويجمعهم في
اقرب وقت ...
وصلت الفندق ونامت على طول من التعب ومن ثاني
يوم بعد صلاة العصر مشو راجعين للرياض..
**********************
مرت الاشهر سريعة ... وتمت ملكة وزواج ماجد على
لمى وسافرو بعدها لدبي 10 ايام بس ..عشان دوام لمى
بمدرستها...
باول ليلة لهم مع بعض ... طلبت لمى من ماجد يصلي
فيها ركعتين الزواج .. وهالسنة يمكن كثير ينسونها بس
اول ماذكرته فيها حس انها كبرت في عينه ..هو يمكن
ماعرفها قبل ... وبداخله ماكان متقبلها بس هو معاهد ربه
مايظلمها معاه ولا يقصر بأي حق من حقوقها ..
ارتاح لها كثير ... وابهره جمالها .. بنت حلوة وملتزمة ,,
لكن ربي ماوفقها مع زوجها الاول .. وان شاء الله يكون
هو العوض لها عنه ... وتعوضه هي فقد زوجته ...
هالايام العشرة تقربو لبعض فيها ... ومع الايام ان شاء الله
ربي بيوفقهم ...
باحد الايام وهم بالفندق قاعدين يسولفون: اسمعيني لمى
يمكن كل واحد فينا عاش تجربة قبل .. انتهت كيف ماربي
قدرها ... بس ابي انا وانتي نطوي صفحة الماضي بكل
مافيها مو عشان شي... بس لاني مابي اظلمك ..واللي راح
من عمري راح وعمره مابيرجع .. وانا معاك ابتديت من
يوم زواجنا ... بيتك ابيك تحفظينه ولا يهمك القيل والقال
اي شي تسمعينه عن حياتي قبل لاتهتمين فيه ...
لمى: ان شاء الله
ماجد: وتوقعي في ناس ممكن يجون يتكلمون او يقولون
لك اشياء صارت قبل .. بس تصرفك راجع لك ... انتي
تقدرين تحافظين على بيتك ... وتسكرين اي فتحة ممكن
يدخل منها اي شي يخرب علينا حياتنا
لمى: ماجد انا مو صغيرة ولا جاهلة .. صدقني حياتي
معاك شي خاص فينا وماراح اسمح لاي احد يتدخل فيها
ماجد: حلو ... وبنتي مثل ماعرفتي قبل.. تراها روحي
اللي تمشي على هالارض .. ابيك تراعينها وتهتمين فيها
واذا ربي كتب لنا عيال عامليها مثل ماتعاملينهم ..
لمى: ان شاء الله... ربي يقدرني واسعدك ..
ماجد: ويقدرني اعيشك مثل ماتبين واحسن بعد...
*********************************
بالمستشفى .. مجتمعين العايلة صار لهم حول الساعتين
ينتظرون اي خبر عن فاتن ... خواتها وامها وسعود وامه
( سعود طبعا جاله ولد ثاني من زوجته غلا وسماه احمد)
من سمعو خبر ان فاتن جاها الطلق وراحت المستشفى وكلهم
راحو لها ... طبعا هذا الموعد منتظر من اول ماحملت فاتن..
وماخلتهم يطولون انتظار توها بأول الشهر التاسع يعني ماخذت
فيه الا 4 ايام وراحت تولد...
بعد طول انتظار جاهم الدكتور يبشرهم بولادة فاتن بتوأم ولد
وبنت .. وقال لهم ينتظرون شوي وبعدها يدخلون يشوفونها
ام تركي: الف مبرووك ياوليدي
سعود وهو طاير من الفرحة: الله يبارك بعمرك ياخالة عقبال
عيالك كلهم
ام راشد: الف مبروك ياسعود
سعود: الله يبارك فيك يمه
اريج: يمه بروح اشوفهم
ندى: انتظري اكيد يغسلونهم بالاول وبعدها يودونهم الحضانة
اريج: الحمدلله يارب صرت خالة
ندى تطقها من كتفها : وفروس مو مالي عينك لا سمح الله؟
اريج: يوووه وربي نسيته يمكن عشان فاتن الكبيرة
ام تركي: بس اركدو لاتسوون ازعاج
ندى: ابشري يمه ..
قعدو ينتظرون وبعدها سمحو لهم يدخلون على فاتن اللي
كان مبين تعب الولادة عليها ... باركو لها وهنوها ...
وهي مستانسة حيييييل بحلمها اللي حققها لها رب العالمين
بعد طول صبر ودعوات وسهر وصلوات ...
وشوي الا جابو التوأم لامهم تشوفهم
قربوهم لها وشالت الولد: سعود ساعدني المهم اثنينهم
شال سعود بنته وقربها من فاتن لمتهم على صدرها وهي
تصيح: يمه مو مصدقة ان هذول عيالي
ام تركي: احمد ربك يمه هذي نعمة من رب العالمين
فاتن: الحمدلله يارب... سعود ابي اسميهم وليد وربى مثل
ماكنت ابي من زمان
سعود: ابشري يا ام الوليد سميتي وما اقول غير ماقلتي
ام تركي: يمه اهم شي رضعيهم من صدرك مافي احسن
من الرضاعة الطبيعية
فاتن: ان شاء الله يمه بس الحين تعبانة ابي انام
ام تركي: يالله يمك الحمدلله على سلامتك وبإذن الله بكرة
نجي لك ..يالله يابنات قومو عن اختكم خلوها ترتاح..
فاتن: الله يسلمك يالغالية
البنات شالو التوأم بوسوهم وبعدها استأذنو رايحين يبون
يخلون فاتن تنام وترتاح الا عبير اللي قعدت مرافقة معاها...
سعود : تامريني بشي فتون؟
فاتن: سلامتك
سعود: اجيب لك شي معاي الصباح؟
فاتن: والله ما اعرف شي مر على امي قبل تجي وهي تعلمك
سعود: ابشري ان شاء الله ... يالله اهم شي انتي ارتاحي..
والتفت لعبير يكلمها: عبير الله يسعدك انتبهي لها
عبير: ان شاء الله فاتن في عيوني
سعود: ماتقصرين والله .. يالله يمه مشينا ..
ام راشد: الحمدلله على سلامتك يافاتن
فاتن: الله يسلمك خالتي..
سعود: يالله فمان الله
فاتن: الله يحفظك...
طلعو من عندها وبقت عبير بس: فتون تبغين حاجة؟
فاتن: لابس غطي رجليني احس ببرد
عبير غطت رجلينها : خلاص نامي انتي وانا بحاول
انام اذا احتجتي اي حاجة صحيني
فاتن: الله يخليك يارب..
ونامت فاتن ونامت بعدها عبير بصعوبة ... ومر يومين
على فاتن بالمستشفى ... والحمدلله طلعت بعدها بالسلامة
وراحت بيت اهلها... والكل طاير وفرحان بالتوأم وبقومة
فاتن بالسلامة..
************************
اليوم مسوين عشا عائلي ومجتمعين ...
ندى وهي تصب القهوة للبنات اللي مجتمعين حول فاتن: مابقى
الا شهد وعبير يفرحونا
عبير: ليه هي بالدور يعني؟
اريج: اي لازم مامليتو خلاص؟ انا احس الزواج سنة وخلاص
لازم اطفال وتجديد في الحياة
عبير: والله زوجي مايبغى الحين خلينا نتمتع قبل الاطفال وتعبهم
فاتن: تقولينه انتي بس لاذقتي الحرمان اللي ذقته تتمنين لو انك
من اول شهر حملتي
عبير: انا عارفة والله بس نفسي اكمل سنة احسن
فاتن: اهم شي لاتستخدمين موانع لانها ممكن تضرك خصوصا
انك توك ماحملتي ..
عبير: لا مرة ما استخدم حاجة
فاتن: وانتي بعد ياشهد
شهد: لاتوصين حريص من هذي الناحية انا مرررة خوافة
اريج: فتون تصدقين من امس البيبي ماتحرك .. احس بشي
غريب..
فاتن: جد ؟
اريج: اي والله
فاتن: وليش ساكتة ليش مارحتي للمستشفى
اريج: والله مادري قلت يمكن شي طبيعي
ندى: لا ياقلبي اذا يومين ماتحرك نهائي مو طبيعي
اريج: يمه لاتخوفوني تكفون..
عبير: لا ان شاء الله مو صاير حاجة
ومن وسوستها قامت لامها وخالاتها تسألهم تعرفون الكبار
اعرف بهالامور لتجاربهم الكثيرة ماشاء الله...
فاتن: بسم الله عليه لو يصير فيه شي الظاهر تستخف
شهد: اي ياقلبي عليها متشريه للبيبي من الحين
عبير: ياربي انتو ليه كبرتوها وتفاولتو على البنت
ان شاء الله كل شي تمام
ندى: ان شاء الله يارب.. عبورة قومي صبي عني والله
تكسرت يديني.. مايشبعون قهوة
عبير قامت تصب القهوة ... وشهد قامت معاها توزع
الحلى ...
ندى: ميشو مبرووك الخطبة.. وين امونة ابي ابارك لها؟
مشاعل: الله يبارك فيك ياقلبي.. مادري والله امونة وينها
كانت قاعدة مع غادة
فاتن: الحين بتملكون بيوم واحد؟
مشاعل: اي وعرسنا بعد بيوم واحد
فاتن: ماشاء الله مبرووووك
ندى: تدرون اني اشتقت لجوجو وربي انها كانت ملح قعداتنا
مشاعل: اي وربي بالذات لاجتمعت هي واريج يونسون من
قلب
اريج: وش فيها اريج؟
ندى: مافيها الا العافية
اريج: زين وش كنتو تقولون عني؟
مشاعل: ذكرنا جوجو وجيتي انتي ببالنا معاها
اريج: يالبى قليبها جوجو وحشتني الخايسة ...ابي اشوفها
مشاعل: هانت ان شاء الله كلها شهر وهي عندنا
اماني: هـآآآي
ندى:وجع وش هاي هذي ..سلمي مثل المسلمين
اماني: استغفر الله انا مسوية بريستيج بس
اريج: امحق بريستيج
مشاعل: يقال لها بتصير ذوق قبل العرس
اريج: ايييييييييه صدق مبرووووك الخطبة
مشاعل+ اماني: الله يبارك فيك
عبير: امونة هاتي فنجانك
اماني تمد لها الفنجان : لا خلاص تسلمين
عبير: وانتي ميشو؟
مشاعل تمد لها : صبي
ندى: لا خلاص قومو بنحط العشى
مشاعل :بخلص فنجاني واقوم
راحو البنات يجهزون عشى الحريم ويساعدون الشباب
يحطون عشى الرجال ...
تعشو الكل وكملو سهرتهم وبعدها استأذنو كلن رايح لبيته..
***************************
وصلت لجناحها ... بدلت لفارس ونومته ... وراحت تسبحت
وبدلت ملابسها تبي تنام..
ناصر: حبيبتي
ندى: هلا
ناصر: تبين تنامين؟
ندى: شرايك انت
ناصر: مافيني نوم تعالي اقعدي معاي شوي
ندى: وانا فيني نوم
ناصر: ندى ترى زهقت .. مليت .. الى متى تظنين اني
راح استحمل؟
ندى: وش تبي تسوي يعني؟ تتزوج علي؟ صدقني مايهمني
ناصر: انا عارف انه مو من قلبك هالكلام
ندى: وانت تدري عن اللي بقلبي اصلا
ناصر: انتي اللي مو معطيتني مجال اني اعرفه صادتني
ومبعدتني عن حياتك ... حتى ابسط التفاصيل حارمتني
اشاركك فيها...
ندى: كانت حياتي كلها لك ياناصر وما اهتميت ... كنت
ابديك على نفسي .. كل شي يصير بحياتي اعلمك واشاورك
بس اكتشفت انه مايهمك .. ليش اشقي نفسي واحط لها اهمية
عند شخص انا آخر اهتماماته..
ناصر: لهالدرجة انا سيء ؟
ندى: لا ... انت مو سيء بس انت ماتعرف بأوقات تحدد
اولوياتك .. حياتك عايشها بفوضوية .. مو عارف ترتب
امورك وتتحمل مسئولية بيت وزوجة وولد
ناصر: وانا مستعد اصلح غلطاتي .. بس ساعديني
ندى: ناصر لا تكذب علي كل ما اختلفنا وشفتني زعلت عليك
قلت لي هالكلام ... تتعدل معاي يوم يومين وعشان ما اظلمك
يمكن اسبوع وبعدها ترجع حليمة لعادتها القديمة..
ناصر: هالمرة غير ورب البيت غير
ندى: وش اللي يضمن لي انها فعلا غير
ناصر: انا اضمن لك .. احلف لك بربي
ندى: لا لا ما ابيك تحلف .. لاني عارفة ومتأكدة انك ماراح
توفي بوعدك لي ...
ناصر: ندى ليش تسكرين كل الابواب بوجهي
ندى: والله ماسكرت شي ...انا انحرق قلبي على ولدي وكل
اللي شفته منك برود .. مابيك تهتم فيني او تراعيني بس
ولدك .. هذا من لحمك ودمك شلون يهون عليك؟
ناصر: والله ماعمره هان ... ولا عمرك هنتي علي..
ندى: ناصر واللي يسلمك لا تقول لي هالكلام ... انت وش
تبي مني بالضبط؟
ناصر: ابي نرجع مثل اول؟
ندى: نرجع لوشو؟ لناصر المستهتر اللي كل همه وناسته
وانا الزوجة المغلوب على امرها اللي المفروض الوقت كله
تنتظره ولا عاتبته يقول لها كلامك كله هم ..ولا اذا احتاجته
اتصلت في ابوها ولا اخوها ولا اي احد يلبي لها حاجتها
ناصر حز بخاطره كلام ندى هي فعلا تحملته كثير وبكل
مرة تسامحه ... بس للاسف عمره ما تعلم من غلطاته..
ندى: تبي شي قبل انام؟
ناصر: ندى والله احبك
ندى: ناصر انا اللي وربي اعشقك بس تعبت من برودك
تعبت من جفاك تعبت من اهمالك ..
ناصر: ندى سامحيني هالمرة عشان خاطري
ندى سكتت وماعلقت ..
ناصر: اذا مو عشاني عشان فارس...شوفي صار لنا كم
شهر وكل علاقتنا رسمية
ندى: هالمرة بسامحك عشان الغلا اللي لك بقلبي ولانك
ماتهون علي..ولاني والله العظيم اشتقت لك
ضمها ناصر على صدره ... وتركت المجال لدموعها اللي
حبستها من بدو نقاشهم انها تنزل ...
وتصافت القلوب بعد ما اختلفت لاشهر..ومهما قست هالقلوب
يبقى الحب الكامن فيها .. هو دوا كل الجروح ...
**************************
من الصباح بدري راحت للمستشفى طول ليلها ماعرفت
تنام ذبحها التفكير وكل خوفها يصير للطفل شي ...
انتظرت دورها ودخلت لغرفة الكشف ...وبعد كشف استمر
وقت مو قصير .. نادتها الدكتورة تجيها عند المكتب
اريج: هلا دكتورة
الدكتورة: انتي مؤمنة بالله اكيد؟
اريج: لا اله الا الله . وش صاير يادكتورة؟
الدكتورة بعد تردد: الجنين متوفي اكيد من يومين ولازم
نعمل لك ولادة سريعة اي تأخير ممكن يضرك..
اريج ماتذكر انها سمعت شي غير متوفي ... حست كل
آمالها تهاوت .. واحلامها الصغيرة تحطمت ...
طاحت من طولها بدون شعور..وشالوها ودوها للطواريء
سوو لها عملية طلعو الجنين وبعدها سوو لها تنظيف للرحم
ونقلوها لغرفة ترتاح فيها ...
كانت وقتها كله تصيح ...بندر اللي كان ينتظرها من عرف
انصدم بس صدمته اقل منها ... او بالاصح يبي يكون اقوى
منها عشان يقويها ... اتصل في امها تجيها...
ام تركي جاية مع غادة وتركي: بندر اريج وينها فيه؟
بندر: تعالو من هنا..
توجهو كلهم لغرفة اريج ...اللي من شافتهم زاد صياحها
وصارت تهذري بكلام ماتدري وش تقول: يمه ولدي
راح ... بندر ولدنا راح
بندر مسك يدها : اذكري الله يا اريج الله بيعوضنا ان شاء
الله
اريج: بس انا ابيه.. ابيه هو ليش راح علي
ام تركي: اريج استغفري ربك لاتقولين كلام مايجوز يمه
اللي رزقك فيه بيعوضك ان شاء الله ويرزقك بواحد واثنين
وثلاث الين يملون عليكم البيت ... بس انتي اذكري الله
اريج ومازالت تصيح وتردد نفس الكلام والكل متأثر لحالها
اللي ماتعودو يشوفونها فيه خصوصا اريج اللي دايم تملى
حياتهم فرح وسعادة بضحكتها اللي تشرح الخاطر...
تركي قرب منها : اريج تعوذي من ابليس.. انتي بعدك
صغيرة والعمر قدامك ان شاء الله لا تيأسين من رحمة رب
العالمين...
اريج وكأنها بدت تصحى من صدمتها:اعوذ بالله من الشيطان
الرجيم ورجعت تصيح كل ماتذكرت..
بندر: اريج احمدي ربك ربي توفاه في هالعمر قبل لايكبر
ونتعلق فيه وننحرم منه ...وانتي شفتي قالو لنا انه كان مشوه
وحتى لو ولدتيه ماراح يعيش كثير
ام تركي: اي والله يمك الحمدلله وتراه يشفع لك يوم القيامة
بإذن الله ..
تركي: وتأكدي ان الله يحبك ... لان الله اذا احب عبد ابتلاه
يا اما يشكر او يكفر.. وانتي احمدي الله على ما ابتلاك ...
غيرك يموتون عيالهم قدام عيونهم وهم اللي تعبو عليهم وربوهم
وغيرك بعد يطلعون عياله معاقين .. انتي الله ريحك من همه قبل يولد
وتشوفينه معاق ..
اريج: الحمدلله يارب
استمرو يريحونها ويذكرونها بفضل الصبر وانها اذا صبرت
واحتسبت بإذن الله راح يعوضها ربي اجر صبرها خير ...
ويرزقها ان شاء الله بالذرية الصالحة...
الخبر انتشر بسرعة البرق ومابقى احد الا جاها ... اخوانها
وخواتها واهل بندر...
مع جمعتهم والسوالف حست انها ارتاحت شوي ولو انه
مازال للجرح بقية بداخلها ... بس الايام كفيلة انها تنسيها ..
والحمدلله على ما اعطى ... والحمدلله على ما اخذ...
والحمدلله في كل الاحوال ....
بندر اللي من طلع من عندها وهو غارق بهمه ... حاول كثر مايقدر
يكون طبيعي قدام اريج ومايبين حزنه لانه مايبيها تنهار
اكثر ... واليوم فقد طفله اللي قعدو 7 اشهر ينتظرون يوم
ولادته بفارغ الصبر ... ياما قعدو يسولفون عنه ويخططون
شلون يعيشونه وشلون يربونه ... وكل التفاصيل ..بس
في لحظة كل شي راح وانتهى ...والله اللي كتبه بالاول
اخذ روحه قبل مايولد ...نزلت دمعة من عينه على فقد ولده
اللي ماشافه الا وهو ميت...
ما أراني فاعلاً في الليل إن أرخـى سدولـه؟
ما أراني فاعلاً والصبح قـد حـان احتضـاره
طفلي اللي مات في اول يوم مـا ذاق الطفولـه
عاجله سهم القدر واختـاره الله فـي جـواره
طفلي اللي مات في غمضة طرف ما حال حوله
يوم عمر الآدمي مـا كـان يومـاً باختيـاره
يا وجودي يوم لفّوا شاحـب الأكفـان حولـه
مـا تقـول إلا شظيّـة لؤلـؤٍ داخـل محـاره
يا وجودي يوم أطالع فيه,في عرضـه وطولـه
تنتحر في العين منـي دمعـةٍ كنْهـا شـراره
نفس عين آبوي عينه بل ونفس الـزول زولـه
وبالأماره, فيه من عمه(........) كـم أمـاره
جابه الله مثل هتّـان المطـر ساعـة هطولـه
ديمٍ احيـا بهجـة امـه تـارةٍ وآبـوه تـاره
ويوم شاف الشرّ من صوب آهلهْ يشعب ذلولـه
حطّ دون صدورهم صدره من الرحمه ستـاره
ومات توّي مـا بعـد بإيـديّ لبّستـه نعولـه
مات توّي ما بعد ساويـت فـي ثوبـه زراره
كنّ عينه يوم مات تقول:بابا, ويش هـو لـه؟
يوم تبكي وانت تدري مين انا ذلحيـن جـاره!
كلنا راحل وخيـر النـاس مـن زوّد رحولـه
باغتنام الصالحات وكـلّ كسـرٍ لـه جبـاره
طفلي اللي صوّبت كبده قبـل ساعـة وصولـه
بندقٍ من عين حاسد واودعت قلبـي طشـاره
يا وجودي ما لقيت أنسـب لمولـودي مقولـه
من مقولة: يا وجه صبحٍ تحرّر مـن خمـاره
أو ثغـر بـرقٍ تهامـيٍّ تبسّـم فـي ثعـولـه
ضوح مصباحه عليه يـورّد النجـدي بكـاره
يوم اشيله ما تقول اشيـل شـيٍّ مـن نحولـه
آتشمّم ريحته -من فجعـة القلـب- بحـراره
يوم جيت العب معاه وغاب قلبي مـن ذهولـه
يوم ما شفته تبسّم لي وانـا فـي اول زيـاره
قمت أحدث عنه نفسي- والعرب حولي وحوله
ليت ما هو ميْتٍ؟إلا ميت! ما تبغـى استشـاره
اتْخنقنـي عبرتـي يـوم آتذكّـر مـا تقولـه
عنه أمّه يـوم أنـا فـي ديـرةٍ ماهيـب داره
[آتذكّر يوم هو فـي بطنهـا يحـرّك رجولـه
وانتعيرّ:ليت ما هـو أقشـرٍ؟ لبّـى القشـاره
كم سهرنا معه ليله كاملـه مـن كبـر هولـه
لين صرنا نعَرْف موعد قومته داخـل قـراره
وان تأخّر ما صحى في موعده قمنـا نصولـه
ننغزه يا من يميـن البطـن وإلا مـن يسـاره
ما نبي شيْ بسْ نبي نضحك على ردّة فعولـه
ننغزه ويفز خايـف مـا درى ويـش العبـاره
من يدي غيمة على أيـدي الملائكـة محمولـه
غيمةٍ من نور مـا تشبـه نضارتهـا نضـاره
يا إلاهٍ كل ما في الأرض طـراً سبّحـوا لـه
شفّعـه فينـا غـداً واجعلـه لابوانـه بشـاره
فـي نهـارٍ فيـه أعنـاق الشياطيـن مغلولـه
يتلقّفنـا مثـل مـا يلقـف الحـاوي صـراره
*
*
*
*
*
*
انتهى الجزء العشرين
انتظر انطباعاتكم حبايبي
وتعليقاتكم وتفاعلكم اللي عودتوني عليه
•غٌـمـوضٌ ـآٍْاْلٍْــورد•
|
01-08-09, 11:36 PM
جديد مواضيع قسم القصص المكتمله من وحي قلم الاعضاء
العرض العادي
