كاتب الموضوع :
غموض الورد
المنتدى :
القصص المكتمله من وحي قلم الاعضاء
الجزء الثامن عشر
*
*
*
*
*
*
علمتني الدنيا .. ما اندم لو ثواني
دام كل شي بحياتي لي قدر
لو ظروفي عاندتني او زماني
الله اكبر من عنا همن كبر
كم انا ضحيت باحساسي وحناني
وكنت للناس بالظلمه قمر
وينهم يوم اني بحروحي اعاني
ابعدو عني وخاويت السهر
مايفيدك بهالزمن كثر الاماني
ليه اعيش ايام عمري في قهر
نظرتي للوقت تتعدى مكاني
وارتضيت الشوك لعيون الزهر
زهقت من وضعها اغلب الوقت بالشقة ... الا في حالات
نادرة يطلعها ياسر يمشيها ... قررت تنظف الشقة منها
تضيع وقت ومنها تهتم بشقتها اللي نظافتها من نظافة ساكنها
قعدت ترتب بالصالة وتنظف ... وبعدها راحت لغرفة النوم
تمسيح وتلميع وترتيب ... سحبت كرسي التسريحة .. تبي
تنظف دولاب ملابسها من فوق ... قعدت تمسح بالدولاب
واثناء حماسها بالتنظيف تحرك الكرسي واختل توازنها ..
حاولت تتمسك بأي شي بس للأسف طاحت وصرخت من
الألم...طايحة على الارض ماقدرت تتحرك.. رفعت نفسها
شوي وشافت طرف بيجامتها صار كله دم ... رجلها انجرحت
من طرف الدولاب...حاولت تقوم ماقدرت ... قعدت مكانها
تصيح ...تحملت كل المها وهي تشوف الدم ينزف من رجلها
وفي الأخير قررت تكلم ياسر يجي يشوف رجلها ... ماتدري
وش اللي صاير فيها ... بس جوالها على الكومدينو حاولت
تسحب نفسها شوي شوي بس الألم اقوى منها وماقدرت تتحرك
قعدت تبكي مكانها ألم وعجز ووحدة ...ومن كثر ماكانت تبكي
نامت بمكانها بدون ماتحس بنفسها ...
ياسر اللي كان توه مخلص بحوثه اللي تخص دراسته ... قعد
بشقته متملل وزهقان ... طرت بباله الجوهرة وقرر يروح لها
على الأقل يحارشها شوي افضل من هالملل اللي يعيشه....
طق عليها باب الشقة ..لكن مامن مجيب ..بعد شوي دخل الشقة
صوت لها وبعد مالقى جواب ... مستحيل تكون نايمة المغرب
هذا اول شي طرى بباله ...راح لها الغرفة يبي يطق الباب بس
اول ماقرب لغرفتها شافها طايحة ... والدم على طرف بيجامتها
وقف قلبه بمكانه .. وراح لها ركض وقعد يضرب بخدودها يبيها
تصحى: الجوهرة... تسمعيني
فتحت عينها بكسل وشافته ما استوعبت شي بالأول وبعدين تذكرت
كل اللي صار معاها : ياسر لاتحركني رجلي تألمني
ياسر: وش اللي صار؟
الجوهرة ورجعت تصيح: كنت انظف الدولاب وطحت
ياسر: زين تقدرين تقومين؟
الجوهرة: لا .. مادري والله خفت اتحرك
ياسر: صبر خليني اشوف جرحك ...رفع بنطلون البيجاما وشاف
الجرح فوق الركبة بشوي ...:لا الحمدلله خفيف ..تقدرين تحركين
رجلك؟
الجوهرة: لا
ياسر : زين صبر...سحب رجلها يمدها له وصرخت بألم : سوري
ما اقصد.. خليك مكانك الحين جاي
رفع الغطا عن السرير وراح لها يبي يشيلها: لا وش تبي تسوي انت
ياسر: بحطك على السرير ...
الجوهرة: لا مابي
ياسر : مو بكيفك... وشالها بهدوء وحطها على سريرها ...
استحت من هالموقف اللي هي فيه... رح جاب عدة الاسعافات
الاولية من شقته وجاها...: بشوف لك الجرح لو محتاجة تروحين
المستشفى الحين بوديك
الجوهرة: لا مايحتاج
قعد ينظف لها الجرح ولف عليه شاش :مدي رجلك بشويش
مدت رجلها وتمددت
ياسر: تبين شي؟ اجيب لك مسكن؟
الجوهرة: ابي اصلي بس الصلاة فاتتني
ياسر استوقفه كلامها ...الصلاة.. وهي بحالتها هذي وتبي تصلي
وهو بأوقات كثير ينسى صلاته... وايام يجمعها قبل لا ينام...
هو ماعمره فرط بأمور دينه ... بس بالسنوات الأخيرة صار يفرط
فيها ... حتى زوجته من تزوجو عمره ماشافها تصلي رغم انها
مسلمة ... بس الأكيد انها مسلمة بالاسم بس...
استغفر ربه وهي تطالعه مستغربة: قلت ابي اصلي هذا شي يبي
له كل هالتفكير؟
ياسر تجاهل كلامها: تقدرين تقومين؟
الجوهرة: بحاول وانت ساعدني
ياسر: زين يالله قومي....وقومها بكل هدووووء وهي ودها تصرخ
ألم..
الجوهرة: خلاص بحاول امشي
ياسر: بوصلك لباب الحمام(تكرمون) اول
الجوهرة: باخذ لي ملابس قبل
ياسر: انتي ادخلي وانا اجيبهم لك
دخلت الحمام وسكرت على نفسها ... وهو فتح الدولاب يشوف
لها لبس تلبسه تفاجأ وهو يشوف ملابسها وقمصان نومها مثلها
مثل اي عروس بس هو سرق فرحتها... كانت تتأمل تعيش
حياتها مع الانسان اللي اختارته بس للأسف هو خذلها ... سحب
لها قميص قطني قصير ... حطه على السرير وطلع وقلبه حارقه
عليها...انتظرته يطق عليها الباب تاخذ ملابسها بس للحين ماطقه
فتحت الباب بهدوء ... وماشافته شافت القميص اللي على السرير
وشافت الدولاب مفتوح قدامها وملابسها عرفت انه اكيد شافهم
وحست باحراااج فظيع .. حاولت تمشي شوي شوي ... والألم
مو مخليها تقدر تتحرك تمام...بدلت ملابسها وصلت واستلقت
على سريرها تحاول انها تنام...
اما هو طلع من عندها والندم ماكل قلبه ... كان اناني بتصرفه
مافكر فيها وبمشاعرها ... كان همه نفسه وشلون يخلي اهله
يرضون بزواجه من الانسانة اللي حبها ...
كان اناني وتصرفه غلط بس مستحيل يحل الغلط بغلط اكبر
منه ويستمر معاها وهو ما يحبها ... راح يتركها عنده هالفترة
وبعدها راح يطلقها ... بس راح يحاول يعوضها عن اللي
سببه لها على الأقل يحسن معاملته ... تذكر صلاته وقام تسبح
وصلى .. ودعا ربي من قلبه يصرف عنه الشيطان ويسهل امور
دينه ودنياه....
******************************
بفينسيا اجمل مدينة رومانسية بالعالم يقضون آخر اسبوع من
شهر العسل...الساعة 1 ونص الصباح .واقفة في البلكونة تتأمل
الكون حولها النوم جافاها اليوم وماعرفت تنام .... ونسمات
الهوا الباردة تلفح وجهها ..تحمد ربها اللي جمعها مع الانسان
اللي حبته وعشقته... احلامها توها بأولها وحكايات عشقها
قاعدة تنسجها بهدوء وتتلذذ بعذوبتها ....
همس لها برقة وقطع عليها تأملاتها :ليش سهرانة ياقلبي؟
التفتت له وابتسمت : ماجاني نوم
ضمها له: تعالي ادخلي برد عليك حبيبتي
عبير: بالعكس مرة حلو.. خلينا هنا شويه
فهد يحرك اصبعه على خشمها: من عيوني الثنتين... وباسها
عل خدها : ماقلتي لي ليش مانمتي؟
عبير: مافي حاجة والله
فهد:مشتاقة لاهلك؟
عبير: كثير
فهد: يعني هاللي مسهرك؟
عبير حطت عينها بعينه : كنت افكر فيك
فهد: فيني؟
عبير: امممممم
فهد: وش تفكرين فيه؟
عبير استحت منه شوي: غمض عيونك طيب
فهد: ليش عاد عبورة؟
عبير: عشان ما ارتبك
فهد: تكلمي ولا تطالعين فيني....
عبير بحيا واضح على صوتها ..:مبسوطة واحمد ربي انه
جمعني فيك
فهد: تحبيني
عبير: مووووت
فهد:طيب تعالي ننام
عبير: خلينا شويه كمان
فهد: بقول لك كلام كثيييييير تعالي انتي بس
ومشت معاه بكل انصياع ... في ليلة من ليالي الحب العذب
جمعتهم وستجمعهم الى ان يشاء الله....
الصباح بدري ... صحى على اصوات العصافير اللي ملت
الاجواء... تأملها وهي نايمة جنبه مثل الطفلة البريئة... كان
يبي يصحيها بس كسرت خاطره ... مانامت البارح الا بعد
صلاة الفجر قام وتسبح وقعد بالصالة ....طلب له كوفي
وقعد يقلب بالقنوات .... بهالاثناء عبير صحت من نومها
وماشافته جنبها ... تسبحت وكشخت وتعطرت وطلعت له
وبكل هدوء: صباح الخير
التفت لها وابتسم من خاطر: ياصباح الورد والجوري ...
والله ماتوقعتك تصحين بدري
عبير قعدت جنبه: ابغى اصحصح بس
فهد: تبين كوفي؟
عبير: ايوا
فهد مد لها الكوفي يشربها : بس هذا حقك
فهد: فدا قليبي... اصلا شوي وبنطلع نفطر
وقعد يشرب الكوفي ويشربها ..وهم يسولفون ويضحكون
دق جواله ... بس ماعرف الرقم
عبير: مين متصل الصباح بدري؟
فهد: مادري والله بس الرقم سعودي
عبير: طيب رد اكيد احد تعرفه
فهد: الو
.................: فهد
فهد ارتبك من سمع هالصوت الانثوي اللي يعرفه زين
وماحب يبان التوتر عليه: من معاي؟
.............: انا رهف
فهد: لا اخوي غلطان ... وسكر الخط والتفت لعبير يخفي
توتره الواضح: مشينا قلبي؟
عبير: طيب 5 دقايق اتجهز وجاية
فهد: انتظرك لاتطولين علي
وقامت بسرعة تجهز نفسها للطلعة اللي وعدها فهد بتكون
احلى رحلة واحلى طلعة...
فهد بالصالة يسترخي بعد التوتر اللي حس فيه من اتصال
رهف ... ( الحمدلله ما حست بشي ) همسها بخاطره
طلعو يتمشون بفنيسيا... العشاق حولهم بكل مكان .....
الرومانسية تصرخ بالارجاء... قلوبهم تذوب عشق بكل
لحظة تجمعهم ... ركبو الجندول وراحو برحلة بعيد عن
العالم والناس... عبير بقمة سعادتها مع الانسان اللي تحبه
وفهد مو مخلي كلمة غزل بالدنيا ماقالها لعبير...اللي تتورد
خدودها خجل من غزله وحركاته....
كل لحظات الحب الحلوة عاشوها ... عشق وورود وهدايا
رومانسية لأبعد الحدود ....ودعو فنيسيا مثل مادخلوها بكل
عشق متوجهين لروما اللي راح يقعدون فيها يوم ويرجعون
بعدها لأرض السعودية بألف سلامة يارب
**************************
في بيت ابو تركي الكل فرحان بخبر حمل فاتن ...هاليوم
اللي من زمان ينتظرونه بس الله ماكتب الا هالمرة .....
مدلعينها آخر دلع ومو مخلينها تتحرك ولا تروح ولاتجي
وكل طلباتها مجابة ...
اريج:ندو وخري فروس عن فتون من اول لازق فيها
ندى: عشتو الحين صار الدلع والدلال لفتون واحنا رحنا فيها
فاتن: بعد عمري خليه والله اني مشتاقة له
اريج: فتون وش بتسمينهم؟
فاتن: مادري والله بس من زمان نفسي لا جتني بنت اسميها
ربى ولو ولد اسميه وليد
ندى: وآآآو وربي روعة ...
اريج: زين لو صارو ولدين؟ وش بتسمين الولد الثاني؟
ندى: وليش مايصيرون بنتين؟
اريج: هذا السؤال اللي بعده اركدي انتي بس
فاتن: والله مافكرت لاقعدت انا وسعود نتفق
اريج: مايبي لها ياقلبي اذا بنت اريج
فاتن: وععععععع تطلع لي عوبا مثلك اعوذ بالله
اريج: اقول ترى من اعرست وانا معطيتكم وجه كلن
يسب فيني وانا ساكتة... خلاص من اليوم ورايح ماعاد به
احترام ... ولساني الطويل اللي قطيته بدولاب هالبيت
باخذه معاي
ام تركي: والله لو اخذتيه معك ثاني يوم وانتي راجعة لي
اريج: هههههههههههه لا يمه الا بندر فديت قلبه ماخذ حقه
مني وزود ما اعرف اقول شي عنده
ام تركي: بعدي والله انتي مايصلح لك الا اللي يعطيك على
راسك
اريج: افااا يمه هذا وانا آخر العنقود ودلوعتك تقولين هالكلآم
ام تركي مبتسمة: كلكم غاليات على قلبي والله..ندى
ندى: سمي يمه؟
ام تركي: بكرة في مجلس امهات بمدرسة ريم ابيك تروحين
تشوفين مدرستها
ندى: ليش وين غادة؟
ام تركي: انا ابيك تروحين تشوفينها وتسولفين معها وتسألينها
عن ريم بس ابي رايك فيها
ندى: اي ليش عاد؟
فاتن: نبي نخطبها لماجد
ندى تفاجأت: صدددددق؟ ماجد رضى؟
ام تركي: اي الحمدلله الله يفرح قلبه ويرزقه اللي تنسيه همه
ندى: اللهم آمين يارب.. حمستوني اشوفها
ام تركي: اي ابيك تشوفينها اذا تناسب اخوك رحنا خطبناها
من اهلها
ندى:ابشري يمه .. الله يوفقه يارب
اريج: يمه تصدقين احس بصير مثل فاتن
ام تركي : شلون يعني؟
اريج: ما احمل
ام تركي: اعوذ بالله فالك ماقبلته... وش هالكلام يالخبلة
اريج: ليش ماحملت للحين؟
فاتن: مو شرط غادة ماحملت بريم الا بعد سنتين وفي ناس
من اول شهر هذي حكمة رب العالمين...
ندى: ماعليكم فيها هذي خبلة ... اصلا مدري شلون تبين
عيال وانتي وبندر واحدكم اخبل من الثاني
اريج طقتها: هييييييه انتي الا بندر ما اسمح لك تغلطين
عليه
فاتن: يعني تغلط عليك عادي؟
اريج: اي انا عادي اما بندر لا والف لا
خالد: لازم يعني تتطاقون للحين بزران
اريج: هلاااا والله خلووود
خالد+شهد: السلام عليكم
الكل: وعليكم السلام
خالد راح يحب راس امه: شلونك يمه؟
ام تركي: بخير من الله انت شلونك؟
خالد: بخير بشوفتكم
وسلمت شهد على الكل...
خالد: شهد تعالي جنبي... وراحت قعدت جنبه
شهد: شلونك فتون؟
فاتن: الحمدلله بس زهقت من الطيحة على هالسرير
خالد: يابنت الحلال فترة وتعدي بسرعة ...
فاتن: الله يعديها على خير
خالد: اليوم فهد وعبير جايين ان شاء الله
ام تركي: ماشاء الله متى واصلين
خالد: بيوصلون متأخر شوي
اريج: غريبة ماعلمو احد
شهد: مخلينها مفاجأة
اريج: والله لها وحشة عبورة ..ومن اعرست تكبرت علينا
خالد: هههههههههههه خليها تستانس هالشهر تعيشه بالعمر
مرة
ندى: الله يوفقهم ويهنيهم يارب
اريج: غريبة محد طرا عزيمة او حفلة بمناسبة جيتهم
خالد: الا امي مضاوي تبي تسوي لهم حفلة ببيتها
ام تركي: هاااو ورى محد قال لي؟
خالد: والله تو فهد معلمني.. يمكن تو قالو لها وعلمته
ام تركي: بروح اكلمها اشوف... وراحت تكلم امها
خالد: هااا وش آخر اخباركم؟
اريج: لقينا عروس لماجد
خالد: صدق؟
ندى: ملقوفة ماتقعد السالفة بحلقها
اريج: عادي اخوه ماقلت عند اغراب
ندى: الا وكالة انباء وانتي الصادقة
خالد: اقول اجلو هواشكم بعدين وعلموني وافق يعرس؟
ندى: تو امي تعلمني اليوم
فاتن: من فترة بس انشغلنا شوي وماصار فرصة الا
اليوم
ندى: من فترة تدرون وماعلمتونا؟
اريج: ترى ادري من وقتها بس ماتكلمت
ندى: وربي خيانة انا آخر من يعلم
خالد: انا اللي احس بالخيانة... اشوفه كل يوم ولاعلمني
اوريك فيه بس خله يجي
شهد: خلوه يفرح لاتقلبونها مشاكل عليه
خالد: احلفي والله؟ تدافعين عنه
شهد: ههههههههههه ما ادافع عنه اقول الحق
خالد: طيب يالحقانية انتي.. بس ماقلتو لي من هي؟
فاتن: معلمة ريم
خالد: وش قال هو عليها؟
فاتن: ماقال شي احس انه ماهمه يعني بيتزوج تأدية
واجب وارضاء لامي وابوي بس
خالد: بس بنات الناس مو لعبة عنده
ندى: خالد صدقني هو كذا بالاول ... مادام ملاك للحين
بقلبه مستحيل يفكر بغيرها بس اكيد مع العشرة كل شي
بيتغير واذا هي ذكية راح تقدر تدخل لقلبه
خالد: الله يوفقه يارب... بشوفه وينه
اريج: بدوامه مو جاي الا بعد العشا
ام تركي: اريج قومي جيبي قهوة قاعدين كذا لاقهوة ولا
شي
اريج: ابشري يمه
ام تركي: امي بكرة مسوية عشى لفهد ومرته وعازمتكم
كلكم... واعتذرت لها عنك يافاتن
فاتن: عرفت؟
ام تركي: اي علمتها وفرحت لك وتبارك لك.. عاد قالت
لي تبي تكلمك انتظري منها اتصال
فاتن: يابعد عمري والله... الله يطول بعمرها يارب
ام تركي: آمين يارب... شهد قولي لامك اخاف انسى
ما اتصل فيها ترى امي موصيتني اعزمها
شهد: ابشري ان شاء الله
اريج: وخري اريج السنعة جاتكم
خالد: وخري انتي عن مرتي
اريج:ياكرهك بس
ندى: هههههههههههه اريج اذا ماتطاقت مع احد ماتحس
انها سولفت
خالد: صبي قهوة بس
شهد: وينها غادة اليوم؟
ام تركي: راحت لاهلها بيتعشون عندهم اليوم
شهد: الله يحفظهم يارب
قضو وقتهم سوالف ووناسة ... وعسى الله يتممها عليهم
دوم....
*********************
قررت اليوم تكلم ياسر تدرس لغة مادامها بلندن على
الاقل تستفيد شي من هالزواج ...اتصلت فيه وقال لها
اول مايفضى بيجي لها وصار لها ساعة تنتظره...
جاها وهو مبين عليه التعب والارهاق...:السلام عليكم
الجوهرة: وعليكم السلام
ياسر: آمريني وش الشي الضروري اللي تبيني فيه؟
الجوهرة: مستعجل؟
ياسر: شي مايخصك قولي اللي عندك وخلصيني
الجوهرة: زين اقعد على الاقل
قعد ياسر ولاحظت عليه انه متضايق وخافت اذا طلبته
الحين يرفض: خلاص لاصرت رايق نتناقش
ياسر: انا رايق الحين آمريني
الجوهرة:زهقت من مقابل الجدران بهالشقة
ياسر: والمطلوب؟
الجوهرة: ابي ادخل اكاديمية او معهد اتعلم لغة
ياسر يناظرها بنص عين: وش بعد؟
الجوهرة: بس هذا
ياسر : بس انتي ماتعرفين شي هنا
الجوهرة: وانت بعد اول ماجيت ماتعرف شي
ياسر: بس انا رجال
الجوهرة: دور اي معهد قريب... وانت توديني وتجيبني
ياسر: شايفتني فاضي؟
الجوهرة: دبرها لي انت قعدة مانيب قاعدة طول الوقت
هنا اختنقت مليت
ياسر: يعني موافقتي ماتفرق عندك
الجوهرة: ما اتوقع انك راح تظلمني اكثر من ظلمك قبل
ياسر هزته كلمتها ....وقام بدون حتى مايرد عليها ...
اما هي انقهرت منه ...مصرة تنفذ اللي ببالها رضى ولا
عمره مارضى ...
قضت ليلها بوحدتها القاتلة ... صلت ركعتين ودعت ربها
يوفقها ويسهل امورها ونامت ...
الصباح بدري جاها ...لقاها نايمة مثل ماتوقع... طق باب
غرفتها .. وانتظر لدقايق الين ماصحت وردت عليه
الجوهرة بصوت كله نوم: مين؟
ياسر: اكيد انا يعني من بيجي لك هالحزة
الجوهرة: خير؟
ياسر: قومي تجهزي بوديك تقدمين قبل ماتبدا محاضراتي
فزت من نومها مستانسة: زين اصبر علي دقايق
ياسر: انا بروح شقتي لاخلصتي دقي علي
الجوهرة: اوكي
وراح لشقته...واستقبلته زوجته طالعة لدوامها : شايفة
وشك منور؟ شو اللي مخليك مبسوط هالقد؟
ياسر: عادي مو حاس بشي اصلا وقرب منها ضمها
بس هي بعدته عنها: شو قالت لك ست الحسن والجمال؟
ياسر: مو قايلة شي.. جمانة وش السالفة تبين مشاكل
انتي على هالصباح
جمانة: انا مابدي شي .. بس شايفتك كترانة روحاتك
لعندها
ياسر: جمانة انتي تعرفين انها بنت خالتي ومالها احد
هنا الا انا ..وبعدين ياعمري وياقلبي تظنين هالقلب
بيروح لغيرك؟ وانتي تدرين وش كثر مسوي عشانك
جمانة معصبة: وفر حكيك لوقته .. انا رايحة لشغلي
هلاٌ ... وطلعت من عنده وهو يطالعها مستغرب
اتصلت فيه الجوهرة وراح لها ... طلعو لاقرب معهد
تعليم لغة انجليزية... سجلت فيه الجوهرة ...ورجعو
للشقة
ياسر: انا لاصرت فاضي بوديك واجيبك ... واذا
ماقدرت اجي لك برسل لك صبحي ... سواق مصري
اعرفه هنا بكرة بجيبه تشوفينه ... ومن المعهد للشقة
لاتروحين مكان ماتعرفينه هالديرة مو مثل السعودية
خصوصا بنت محجبة مثلك ممكن تصير لك مشاكل
الجوهرة : ان شاء الله
ياسر: يالله انا استأذنك واذا احتجتي شي كلميني
الجوهرة: مشكور
وطلع من عندها ... وبقلبها تدعي ربي يحفظه من
كل شر ... بالفترة الأخيرة تعلقت فيه كثيييييييير
ماتدري هل شعورها هذا حب... او تعلق فيه لمجرد
انه مصدر امان لها بهالغربة... هي صار لها معاه
حول الشهرين ... كل شي منه حلو الا طريقة زواجهم
تعامله معاها راقي وماتدري ليش اوقات تحس انه ندم
على فعلته.. يمكن هي تتوهم .. ويمكن لانها بدت تميل
له صارت حتى غلطاته تبررها له ..ماتدري وش اللي
بداخلها له... بس الايام كفيلة انها تعطيها اجابة على
هالسؤال ...
****************************
المعازيم كثير .. والعروس ملفتة الانظار بهالحفلة
والبنات كلهم متجمعين حول عبير ياخذون اخبارها
وسوالفها ... عبير استغربت من استقبال ام تركي لها
لاول مرة بحياتها تبتسم لها وترحب فيها ....وهالشي
خلا وناستها وسعادتها تكمل... هي تبي تبدا حياتها
بدون مشاكل ... وام تركي كانت الهاجس الأكبر بالنسبة
لها ...خوات فهد شيخة وهيا حبوبات كثير وطيوبات
وهالشي بعد مريحها... ام فهد شايلتها على راسها من كثر
حبها لها ...
عبير: صحيح خبر خطبة ماجد؟
اريج: لا بعد تونا ماخطبنا له بس ندى اليوم راحت شافتها
عبير: والله .. كيف شكلها ندو؟
ندى: قمر ماتوقعتها بهالجمال
مشاعل واماني بان عليهم الحزن من هالسالفة ..خصوصا
انهم يشوفون خوات ماجد مستانسين باللي راح تاخذ مكان
اختهم..قامت مشاعل وقامت وراها اماني
عبير: زعلو؟
ندى: شكلهم ... بس هذا من حق ماجد .. الى متى بيدفن
عمره على ذكرى ملاك
عبير: طيب ماقلتي لي كيف ... وش انطباعك عنها؟
ندى: شوفي انا ماقعدت معاها كثير بس كلمة حق تدخل
القلب بسرعة..اخلاقها واسلوبها بالكلام مرة عسل
عبير: وماجد كيف؟
اريج: ماجد مو هامه شي اصلا
عبير: الله يعين ... اخاف يظلمها معاه
ندى: انتو الحين خليتو كل شي تم ... تونا محد خطبها
ولاتعرف شي اصلا حتى تلميح محد لمح لها
عبير: طيب متى بيروحون يخطبونها ؟
ندى: مادري هذا على امي وابوي وماجد
عبير: الله يوفقهم يارب
ندى: اللهم آمين .. الا قولي لي انتي شلونه فهود معاك
عبير توردت خدودها : تمام
اريج: ياعمري على اللي يستحون... تراك صرتي مرة
يعني خلاص افصخي الحيا
ندى: ههههههههههههه انتي فاصخته من عرفتك... حلاة
البنت بحياها
اريج: انا اقصد تسولف عن فهود عادي بس انتي اللي
تفكيرك وسخ
ندى: ايه ياقلبي اموت انا على البراءة
عبير: بس بس والله وحشتوني خلونا نسولف احسن
من المشاكل
اريج: طيب بروح اشوف البنات مو حلوة كذا يحسون
انا ما اهتمينا فيهم
ندى: اي ناديهم
عبير تشوف المسج اللي جاها .. ابتسمت وقامت
ندى: وين؟
عبير: دقيقة وجاية
ندى: انا حاسة انه فهود
عبير: ههههههههههههه ايوا
ندى: انتبهي اروج لاتشوفك وربي لتلزق لكم
عبير: انتي بس لاتقولي لها انا ماراح اطول
ندى: ههههههههههههههه طيب روحي بسرعة...
راحت عبير مستعجلة تشوف فهد اللي قال لها يبيها
بمجلس الرجال الداخلي... دخلت وشافته ينتظرها
فهد وابتسامته تعلو وجهه: هلا والله يالله حي هالزول
عبير مبتسمة ورايحة له
فهد قرب منها وضمها: وحشتيني
عبير تبعده: فهد من جدك انت وخر لاحد يجي يشوفنا
فهد:ياخي عادي مرتي ومشتاق لها
عبير: ماتقدر تستنى الين يروحون الناس
فهد يـأشر على قلبه: هذا جنني يبي يشوفك
عبير: قول له اني ساكنة فيه
فهد: اي وربي انك ساكنة ومتربعة بعد ... تصدقين؟
عبير: ايش؟
فهد:قمر وربي طالعة قمر
عبير:فهــد لاتحرجني
فهد: وربي احلى قمر بعد...
عبير: عيونك الحلوة حبيبي
فهد: آآهـ ياقلبي بتذبحيني انتي ترى ما اتحمل هالحب كله
عبير: سلامة قلبك ..ممكن اروح؟
فهد: لبى الادب ياناس... روحي ياقلبي بس تكفين سوي
نفسك فيك نوم تثاوبي اي شي خليهم يستعجلون بالروحة
عبير: هههههههههههههه من جدك انت
فهد: والله ودي بس اعرف مافي امل.. بوسيني بس قبل
تروحين
عبير: ماينفع ..
فهد: محد جاي يالله
عبير: لا عشان الروج
فهد: تعرفين تصرفين مايصعب عليك شي.. وقرب منها
باس خدها وطلع..
رجعت لهم عبير وهي منحرجة .. ندى كانت ميتة ضحك
عليها.. اما اريج حست انها كانت تكلم فهد او شايفته من
تورد خدودها وارتباكها باين السالفة فيها فهد: وش مسوي
حبيب القلب
عبير تطالع في ندى اللي تأشر لها انها ماقالت شي: ماسوا
حاجة
اريج: علينا ياشيخة اقص يدي اذا مو لاعبن فيك بس خلي
النصب عنك
عبير:ههههههههههههه ما اقدر اخبي كاشفتني
اريج: ياليتني دارية عنكم وربي لاقلق راحتكم
ندى تكلم عبير: شفتي ؟ وربي قايلة لك سوسة ماترتاح
اريج: افاااا متفقين من وراي؟
ندى: لعنبو ابليسك وحدة ورجلها حاشرة عمرك بينهم ليش؟
اريج: احب الاكشن والحركات تحسين بوناسة
عبير: اكشن عند بندر ياقلبي انا بعدي عني
اريج: لا خلاص كبرنا على سواليفكم غزل ورومانسية
وخبال خلصنا منه من زمان
ندى: هههههههههههههههه اجل وش بينكم الحين؟
اريج: نتطاق كل يوم ... ونتهاوش وكذا
ندى: انتو الاثنين وربي ما استغربها منكم تصير ليش
لا
اريج: لا اعوذ بالله حياتنا سمن على عسل والله لايغير
علينا
ندى+عبير: آآآمين يارب...
وعدت ليلة مثل لياليهم الاخرى حب يجمعهم وقلوب التقت
على المودة والألفة ...تمضي في مسيرة الحياة ...
********************
بدت دراستها بالمعهد كل يوم تروح وتجي مع ياسر
الا اذا ماقدر يمرها ترجع مع السواق ... مرت عليها
الايام وحست بالراحة شوي انها قدرت تغير جو ...
تعرفت على بنات عربيات يدرسون معاها بنفس
المعهد وهالشي خلاها تحس انها عايشة من جديد خصوصا
بعد الوحدة القاتلة اللي عاشتهم الشهرين اللي فاتو ... وخلال
هالفترة زاد الشعور اللي بداخلها لياسر ..كان هادي وماصار
منه اي شي يزعلها ... وكل يوم عن يوم تتعلق فيه ... الا
بأوقات تتذكر ليلتها الأولى معاه وتحس وقتها بكره شديد
له ... ومابين هالمشاعر المتناقضة .. تعيش بدوامة ماتدري
شلون راح تطلع منها ...
طلعت اليوم بدري... وياسر راح يتأخر شوي وبيجي على
موعده... شافت محلات قريبة من المعهد وراحت لهم مشي
قعدت تتفرج على الاشياء المعروضة..واختارت كم غرض
لامها وخواتها .. لارجعت لهم تبي تهديهم ..محل وراه محل
وماحست بالوقت اللي راح وهي تتقضى ... التفتت حولها
وماعرفت وينها فيه...حست بخوف فظيع ... حاول تتذكر
من وين بالضبط جات بس ماعرفت ... بسرعة الدموع
تجمعت بعيونها... طلعت جوالها من شنطتها تبي تتصل
بياسر بس الجوال بطاريته فضت وماعاد فيه اي وسيلة
اتصال ابد وصارت تدعي ربها انه يرجعها بالسلامة
دارت بكل مكان بس ماعرفت شلون تروح .. حاولت
تستجمع اللي تعرفه من لغتها وسألت عن المعهد بس مالقت
جواب محد فهم عليها ..... لغتها مو ذاك الزود ودراستها
توها بأولها ... شافت لها حديقة قريبة .. راحت لها وقعدت
على احد الكراسي الموجودة ودموعها ماوقفت من خوفها
الشمس قربت تغيب وخوفها زاد ... من بعيد جاتها وحدة
مبين على ملامحها انها خليجية من قلب ارتاحت الجوهرة
من شافتها
البنت: السلام عليكم
الجوهرة: وعليكم السلام
البنت: توقعت من شكلج انج عربية..عسى ماشر اختي
ليش تبجين؟
الجوهرة: ماعرف هنا شي وضعت بهالمدينة.. تكفين اذا
تعرفين شي ساعديني
البنت : سعودية صح؟
الجوهرة: ايه
البنت: لاتخافين تعالي معاي وان شاء الله ترجعين لاهلج
بالسلامه
الجوهرة: وين اروح له؟
البنت: بيتنا هني بآخر الشارع..
قامت الجوهرة معاها وبداخلها مازال الخوف ساكنها
البنت: معاج بشاير ... من الكويت ... اعتبريني اختج
ولا احتجتي شي لايردج الا لسانج
الجوهرة اللي بدت ترتاح شوي : والنعم والله تدرسين هنا؟
بشاير: اي الحمدلله ..اغلب حياتي عشتها بلندن وادل فيها
شارع شارع يعني لاتحاتين ولايضيق خلقج مشكلتج بحلها
لج.. بس ماعرفت اسمج بالاول
الجوهرة: انا الجوهرة
بشاير: عاشت الاسامي
الجوهرة : عاشت ايامك ... وصلو لبيت بشاير ودخلت
بشاير: حياج اختي.. تفضلي
الجوهرة: ابي شاحن تكفين اكيد زوجي بيتصل فيني
بشاير: انزين ارتاحي بييب لج قلاص ماي
راحت جابت لها كاس موية ... وشربت الجوهرة
وناظرتها بامتنان:مشكورة ياقلبي والله مادري لو ماجيتيني
وش كان صار فيني..
بشاير:هذا كله مقدر من رب العالمين .. صبر بروح اييب
لج الشاحن
الجوهرة قاعدة بتوتر وكل خوفها من ردة فعل ياسر ..
بشاير جابت لها الشاحن ... اول مافتحت جوالها اتصل
ياسر وردت بخوف: الو
ياسر بصراخ سمعته حتى بشاير: وينك فيه؟
الجوهرة: ياسر هدي شوي وانا افهمك كل شي
ياسر: مابي اهدا علميني الحين وينك؟
الجوهرة: ما اعرف بس بخلي بشاير توصف لك المكان
كلمته بشاير ووصفت له بيتهم وقال لها دقايق وجاي لها
الجوهرة: وربي ليذبحني
بشاير: ان شاء الله مو صاير لج شي.. ابي اعطيج رقمي
كلميني اذا لقيتي فرصة وطمنيني عليج انطرج
الجوهرة: ان شاء الله ربي يعدي هالليلة على خير
بشاير: ورب البيت ارتحت لج ولاعرفتج اكثر بصير اشوفج
وايد.. اذا ودج طبعا؟
الجوهرة: ياليت والله ذبحتني الوحدة بهالبلد الكئيب
بشاير: لاتشيلين هم شي باجر نصير مثل الخوات
ومانفترق
الجوهرة تناظر جوالها اللي يدق: ياويلي هذا هو جا ...
ودعت بشاير وراحت والخوف مالي قلبها ..اكيد ماراح
يعديها لها ياسر على خير...
(نرجع شوي قبل ساعات ..اول ماجا ياسر لها اتصل فيها
كان جوالها مغلق .. انتظرها تطلع له بس ماطلعت ..دخل
سأل عنها بس محد شافها جن جنونه..توقع انها انخطفت
ماعرف شلون يتصرف.. ماخلى مكان الا دورها فيه
ومالقاها ..وقته كله يلوم نفسه ..انه هو اللي جابها لهالمكان
واهملها ... خاف عليها ..وهالاحساس عمره ماحسه بحياته
اول مادق وفتحت جوالها ... كان بيطير من فرحته بمكانه
بس الموقف اللي حطته فيه كان حارق دمه ومعصب عليها)
نزلت وشافته ينتظرها تحت عند باب العمارة ... مسكها من
يدها وحست باصابعه غارزها بيدينها ... صرخت بأعلى
صوتها من الألم بس حط يده على فمها : تبين تجيبين لنا
مشاكل اكثر من اللي جبتيهم
الجوهرة: ياسر والله غصب عني
ياسر: ولا كلمة لا وصلنا الشقة نتفاهم
ركبت السيارة ومشى فيها بدون ماينطق بحرف... وهي
الخوف مالي قلبها ... حاسة ان هدوئه هذا هو اللي يسبق
العاصفة.. وصلو للعمارة اللي ساكنين فيها ...سحبها من
يدها وطلعها دخلو الشقة ورماها على الأرض وصرخت
من ألمها : ممكن تفهميني وين رحتي اليوم؟
الجوهرة: رحت اشتري اغراض وضيعت الطريق ووو..
وماعرفت ارجع
نزل لها وشدها من شعرها : وانا قايل لك من الشقة
للمعهد ومن المعهد للشقة ... روحات وجيات مابي بس
الظاهر انتي ماينفع معك الا احبسك وما اخليك تعتبين
هالباب
الجوهرة: ياسر فك شعري حرام عليك
ياسر فكها من يده وناظرها والشرر يتطاير من عيونه
وبنبرة تهديد: طلعة من هالشقة مافي..انتي ماتستاهلين
من يعطيك ثقة ويخليك تروحين وتجين
الجوهرة: مو بكيفك.. كفاية اني من تزوجتك وانا ذايقة
الضيم تبي تحبسني بعد؟ وديني لاهلي ولديرتي بدل
هالعيشة اللي تقصر العمر...
ياسر: ماراح تروحين ولا مكان الا متى مابغيت انا
الجوهرة وقفت وقابلته: وانت مو مسئول عني تتحكم
فيني ... انا سكت من اول ورضيت بس خلاص فاض
فيني الصبر
ياسر: لا تتحديني ولا تعانديني ... تراك انتي الخسرانة
وربي لو نويت اعذبك لاعذبك مثل ما ابي بس انا
محترمك ومقدرك لانك بنت خالتي
الجوهرة: اي احترام واي خرابيط اللي تتكلم عنها وانت
راميني بهالشقة ...
ياسر: انا مو مقصر معاك بشي ... كل شي وفرته لك
اكل وشرب وسكن ودراسة .. وحتى طلعات وروحات
ولا تبين تحسين اني احترمك لاعطيتك باقي حقوقك
الجوهرة حست بمعنى كلامه بس تبي تتأكد منه: اي
حقوق اللي تتكلم عنها؟
ياسر: مثلك عارف مايحتاج اتكلم
الجوهرة: لو انت آخر رجال بالعالم ماخليتك تلمس
مني شعرة...
ياسر طرطع وانقهر من كلامها ... سحبها من يدها
ووداها للغرفة رماها على السرير وقرب منها مسك
يدينها يثبتها على السرير لاتتحرك وقرب منها يبوسها
وماقدرت تقاومه .... طوله وضخامته سيطرت عليها
كليا ... بكت وشاف دموعها... قام عنها وهو يناظرها
باحتقار: قلت لك لاتتحديني منتيب قدي لو كنت ابي منك
شي خذيته من زمان وخلصت بس قلت لك من قبل مالي
فيك حاجة ...
طعنة بالصدر .... وكلام مثل السهام جرحها واصابها
في مقتل ... كلامه كان اقوى من انها تتحمله ...:اطلع
برا ياحقير
ياسر: طالع من غير ماتقولين ... وطلع وهو تارك وراه
حطام امرأة ضيعها بقسوته وغروره ... بكت انوثتها
المجروحة .. وكبريائها المسلوب ... بكت غربتها ...
وضياعها ... بكت همومها اللي سكنت هالقلب ودمرته
يـاوقت..يكفي مابقى للعمر كثر اللي مضـا
تعبت أجـامل غربتي وأشكي همومي للوطن
لمحتني (ساكت) ترى ماكل من يسكت رضا
مجبـور أصارع بلوتـي مدامها ( لعبــة زمـن )
:
’،
ماعاد فيني .." أبتسم " مدام هالدمعة .. [ سلاح ]
ماعاد
فيني
أبتسم
وأخفي
! همومي والحزن !
ومادام فكري أقتنع يرفض مبادئ..هالكفاح
بأقتل شعوري وأدفنه وأخلي أحساسي كفن
( ياليل )
تكفى ضمني .. ماعــاد فيني للجـراح .!!
( تعبت )
أجامل وأنتظر .. زود المصايب والمحن .!!
الله أكبر × يازمن × وشلون قلبي [ما أستراح ]
( العيب فيني ) ياترى ولا ( العيوب من الزمن )
اللي بغيته
( مالفى )
وأقفـا على دربه وراح .!
واللي رفضته
( مارحل )
يضحك وانا عيوني بكن .!
لاصار " حظي مركبة " تبقى المصيبة .. ! بالرياح !
تجري " الرياح العاصفة " في عكس ..ماتمشي السفن
الـهـم أصبح لي ..( وطن )
والجرح أصبح لي .. ( وشاح )
وياجرح
.. ماعاد
... أحتمل
.... مادام
...... لأهمومي وطن
...... أحس
..... بظلوعي
.... قفص
... والطير
مكسور الجناح
وأحس .. بعيوني .. دمع مسجون .. في داخل جفن
والليل قرب ينتهي ويزول في وقت الصباح
وانا وليلي نكتفي بس المواجــع ما اكتفن
ماعاد
لأسراري بلد
والحزن
دمرها وباح
،’،’
ولاعاد فيني
أبتسم
وأخفي
همومي والحزن
:
:
*************************
الساعة صارت 1 بالليل وناصر للحين ماجا,, وفارس
حرارته مرتفعة ...وطول الليل وهي كمادات تبي
تخفض حرارته بس مو راضية تنزل ... اتصلت بناصر
اللي من شاف اتصالاتها المتكررة حط جواله على السايلنت
وكمل سوالف مع اخوياه بالاستراحة ...صحيح انه ماصار
يروح مثل اول كل يوم ..بس لا راح للاستراحة ينسى نفسه
فيها شافت حرارته لقتها وصلت الـ 39 وفارس شبه متشنج
قامت ركض لغرفة مشاعل لقتها ترتب بغرفتها: الحقي علي
فارس حرارته مرتفعة وناصر اتصل فيه مايرد
مشاعل قامت معاها ركض ... وشالت فارس: تعالي بسبحه
بموية باردة... وجهزي نفسك ناخذه للمستشفى...كلمي اماني
تصحي ابوي
راحت ندى ركض لاماني ... اللي من عرفت راحت لم غرفة
امها وابوها تصحيهم وعلمتهم باللي صاير..قامو مفزوعين
ياخذون فارس للمستشفى..كل هذا صار وناصر بدنيا ثانية
( بمكان ثاني كان ناصر قاعد مع اخوياه يلعبون ورق وناسي
كل شي حوله
ناصر: وزع الورق يامحمد
محمد: رد ياخي على جوالك وفكنا
ناصر: ياشيخ ازعاج بس.. وحطه على السايلنت: العب العب)
على الساعة 2 ونص ناظر ساعته شاف الوقت متأخر :اوف
شلون عدى هالوقت كله ماحسينا ... يالله ورانا دوامات بكرة
وقام يبي يطلع ... سحب جواله وتفاجـأ من عدد الاتصالات
اللي اذهله قرصه قلبه وحس انه صاير شي...
شاف الاتصالات من ندى ومشاعل وابوه...!!!!!
(يارب تستر) رددها بخاطره .. دق على ندى كذا مرة بس
ماردت ... وزاد خوفه ركب سيارته وهو متوتر وخايف ...
اتصل بمشاعل اللي ردت وهي متنرفزة: ليش متصل الحين
ان شاء الله؟؟؟ خلك بدنياك احسن لك
ناصر: مشاعل وش صاير ندى فيها شي؟ ولا فارس؟
مشاعل: وانت يهمك اصلا ؟ وربي انك مو كفو ندى ولا كفو
بيت وعيال .. وسكرت السماعة بوجهه ولأول مرة تسويها
وتسكر بوجه اخوها الكبير بس النار اللي بقلبها على ولد
اخوها حارقتها ... رجع اتصل فيها كذا مرة وردت:نعم
ناصر بصراخ: مشاعل وش اللي صاير ترى واصل حدي
لاتخليني اطلع حرتي فيك
مشاعل: ولا شي فارس تعب علينا والحمدلله الحين احسن
بس بيخلونه 24 ساعة يتطمنون ان حرارته انخفضت
وماعاد راح ترتفع ...
ناصر: ندى عندك؟
مشاعل: ما انصحك تكلمها الحين لاني مادري وش ممكن
تكون ردة فعلها
ناصر: مشاعل تكفين ابيها
مشاعل تكلم ندى: خوذي ناصر يبيك
ندى وهي مازالت تصيح من الموقف اللي هزها : مابيه
ولايجيني هنا ولا ابي اشوفه
مشاعل: سمعت؟
ناصر: وينكم فيه بأي مستشفى؟
قالت له مشاعل اسم المستشفى وراح لهم ...استأذنوها
ابو ناصر وام ناصر ومشاعل راجعين البيت بعد ماتطمنو
على فارس
ابو ناصر: لا احتجتي شي وانا عمك كلمينا
ندى: ماتقصر ياعمي عسى عمرك طويل...
ام ناصر: يالله ياندى بكرة ان شاء الله بجي لك من بدري
انتبهي لفارس ولو ارتفعت حرارته لو شوي نادي
الممرضات
ندى: لاتوصيني على ولدي ... الله يخليه لي
ام ناصر: اللهم آمين يارب
مشاعل قربت وسلمت على ندى: اذا احتجتي اي شي
او حتي زهقتي من القعدة لحالك كلميني
ندى: الله لايحرمني منكم يارب
واستأذنوها طالعين .... بعدها بدقايق ناصر وصل
للمستشفى وسأل عن فارس وقالو له .. بس الزيارة
ممنوعة كلم الكل وسوا ازعاج وقلق بالمستشفى انه
بس يبي يتطمن عليهم ويروح ... وبالاخير حن عليه
الدكتور وسمح له بس بدون مايطول...
راح مستعجل للغرفة ..ودخل شافها قاعدة تحط كمادات
على فارس..رفعت عينها ومن شافته شالت عينها عنه
ناصر: شلونه؟
ندى ماردت عليه وطنشته
ناصر: ندى انا آسف
ندى: آسف؟ وش يفيد الأسف وانا بأصعب المواقف
بحياتي لا احتجتك مالقيتك ..
ناصر: ندى وربي ماكنت ادري
ندى: يعني انا اللي كنت ادري باللي يصير؟ ولا كل
شي يصير بحياتنا ندري عنه..
ناصر: ندى اسمعيني بس
ندى: مابي اسمع شي منك ... لاتقعد تقول لي اخوياي
وخذتنا السوالف ..انا مامنعتك لاتروح بس لا احتجتك
ليش تتركني؟ ليش حاقر اتصالاتي وماترد علي
ناصر: والله
اشرت له ندى يسكت : خلاص ناصر انا اللي فيني
كافيني... مابي اسمع منك شي ... لان كل اعذارك
ماتقنعني ولا راح تغير شي باللي صار..انا تعودت
على انانيتك وسلبيتك معاي ...راح اسامحك على كل
شي الا ولدي ياناصر لو راح مني ماراح اسامحك
عليه العمر كله
ناصر: بسم الله عليه ... ندى وش هالكلام تراه ولدي
انا بعد ولا نسيتي؟
ندى: ولدك بالاسم بس.. ناصر ابي ارتاح الحين خل
هالنار بقلبي مابي منك شي الحين ... ولا رجعت
البيت وطلع فارس بالسلامة لي تفاهم معاك
ناصر: تهدديني يعني؟
ندى: وانا كل ماقلت لك شي قلت تهدديني؟ لا ما اهددك
بس لازم احط حدود ترى تعبت اعدي لك غلطاتك
وانت للأسف تتمادى بكل مرة
ناصر ناظرها بحزن وهي أشرت له يطلع ... تبي
ترتاح وبنفس الوقت ماتبي تقول شي تندم عليه بعدين
ناصر: اوكي ارتاحي انتي الحين ... راح اتصل فيك
الصباح اي شي تحتاجينه علميني بجي لك من بدري
ان شاء الله
طنشته هالمرة بعد وماردت عليه ... وهالشي قهره
وحز بخاطره...طلع وقلبه ماكلته الحسرة على زوجته
وولده اللي اوقات يهلمهم بغبائه
رجعت ندى قعدت تقرا على ولدها وتحط له الكمادات
وطول الليل ماغفت عينها ..سهرانة على راحة ولدها
*
*
*
ومثل كل ليلة تمر على ابطال هالقصة ..مشاكل وهموم
تحاصر البعض ... وحب وعشق يغلف البعض الآخر
وهذي هي دوامة الحياة ...
وهذا ماقسمه رب العالمين بين البشر ... احزان وافراح
وهموم وانشراح ...والحمدلله على كل الاحوال....
*
*
*
*
*
*
انتهى الجزء الثامن عشر
انطباعاتكم عن هذا الجزء؟
تحليلكم للشخصيات والاحداث
اي انتقادات او تعليقات لا تبخلون علي فيها
انتظركم
•غٌـمـوضٌ ـآٍْاْلٍْــورد•
|
25-07-09, 07:08 PM
جديد مواضيع قسم القصص المكتمله من وحي قلم الاعضاء
العرض العادي
