كاتب الموضوع :
غموض الورد
المنتدى :
القصص المكتمله من وحي قلم الاعضاء
السلام عليكم ورحمة الله وبركاته
احبتي استميحكم عذرا على غيابي الذي قدره
الله علي .. والحمدلله على قضاء الله وقدره
واسأل الله عز وجل ان لايريكم مكروها فيمن تحبون
اللهم إني صبرت على البلاء فلم أجزع فامنحني درجة
الصابرين الذين يوفون اجورهم بغير حساب
فإنك القائل " إنما يوفي الصابرون أجرهم بغير حساب "
راح انزل لكم بارتين كتبتهم قبل وفاة عمي
واليوم اضفت تعديلاتي عليهم
اتمنى ان يرقى البارتين لذائقتكم
الجزء الرابع عشر
*
*
*
*
*
قاعدة ببيت خالتها والنار تغلي بصدرها ...مو قادرة
تصدق ان حب حياتها بيكون لغيرها . وانه بكرة راح
يبيع حب 5 سنين عشان عبير
رهف بترجي : تكفيييين سجى خلينا نروح
سجى: قلت لك مانيب رايحة ... الناس تبي تفرح
وانتي تبين تسوين مشاكل
رهف: ومن قال اني بسوي مشاكل؟ انا بروح اشوفه
سجى: ليش تبين تعذبين نفسك؟ رهف خلاص انسيه
فهد ماعاد هو لك واللي باعك بيعيه
رهف وهي تصيح: ما اقدر والله ما اقدر انتي تقولين
هالكلام لانك مو حاسة بالنار اللي في صدري
سجى : انا من زمان حذرتك منه ... قلت لك فهد مستحيل
يتزوج وحدة يكلمها وتطلع معاه.. نصحتك وحذرتك
من هالطريق .. وش لك بالحرام والله قادر يرزقك بالحلال
رهف: اللي راح راح والحب مو بيدي هذا شي غصب عني
سجى: لا تقولين مو بيدك محد طقك على يدك وقال لك
خوذي رقمه ولا كلميه ... محد جبرك تخونين ربك واهلك
وتطلعين معاه
رهف: سجى انا ماجيتك عشان تزيدين همي ترى اللي
فيني كافيني... تكفييييييين طلبتك ابي اشوفه
سجى كسرت خاطرها بنت خالتها : رهف ما اقدر اساعدك
في شي مايجوز
رهف: سجى والله مانيب مسوية شي بس ابي اشوفه
سجى : زين بروح واي شي يصير ماراح اتحمله بس
ياليت يارهف تنسين فهد وتشيلين صورته من بالك ...
والله مو ماخذه منه الا الشقى
رهف :آآآآآآهـ ما اقدر انساه الخاين الكذاب .. علقني
فيه وتركني ... 5 سنين اوهمني بحبه .. كل يوم يقول
لي انا ما اتمنى غيرك ...كنت غبية اللي صدقته
واللي قاهرني تركني بكل برود ولا حتى حاول يطيب
خاطري كذا فجأة وبدون مقدمات قال لي خطبت وانتهيتي
من حياتي... وزاد صياحها وعلا نحيبها
سجى قربت منها وحاولت تواسيها: رهف اذكري الله
والله انه مايستاهل دموعك اللي نزلت عشانه
قعدت تهون عليها بكم كلمة ... لحد ما حست ان رهف
ارتاحت شوي ....ودعتها واتفقت معاها بكرة من بعد
المغرب بيروحون لمزرعة ابو تركي مع راكان اخوها..
***************************
من الصباح والكل قايم يشوف له شغلة هاليوم غير
السعادة ترفرف بكل مكان ... بالصالة التجهيزات
قائمة على قدم وساق ... تنسيق طاولات وكوشة
والورود اللي راح توصل قبل المغرب ....
هالليلة راح تشهد اجتماع احلى حبيبين فهد وعبير
وراح تسطر اسمائهم بأحرف من ذهب...
الاتصالات كثيرة ... اللي تكلم المشغل يرسلون لهم
الكوافيرة بدري.. واللي تكلم المصورة ... واللي
تكلم محل الحلويات يجهزونها قبل المغرب....
ام تركي : ماجد واللي يسلمك روحو جيبو العصيرات
اللي حجزناهم السواقين كلهم مشغولين
ماجد: ابشري يمه الحين اروح.. بس طلعي لي جنو
تروح معاي
ام تركي : زين يمه بس لا تتأخر
راحت ام تركي تدور جنى لقتها مع خالتها اماني :جنو
تعالي يمه ابوك يبيك
جنى راحت تركض لجدتها وام تركي ناظرت الصالة
حولها وسألت اماني: خلاص طلعو؟
اماني : ايه راحو يقولون بيجي عامل بعد نص ساعة
ينسق الورود
شالت ام تركي جنى وراحت لماجد عند باب المدخل
ماجد اخذ بنته من امه : فديييتها بعد عمري اشتقت
لها ..
ركبها جنبه بالسيارة وراح يجيب العصيرات ...
جنى: بابا وين لوح؟
ماجد: بروح اجيب عصيرات عشان العروس
جنى: ابي عثير
ماجد: ابشري من عيوني وش تبين بعد
جنى حاطة اصبعها بفمها وتفكر وماجد مد يده
يشيل يدها من فمها : عيب يابابا مو حلو تحطين
يدك بفمك
جنى بكل براءة تطالعه: ابي ثبث
ماجد مافهم وش تبي : وشو؟
جنى: ابيييي ثبث
ماجد قولبها براسه وماعرف وش تبي بس
عشان مايزعلها قال لها : لا وصلنا تنزلين وتاخذين
اللي تبين ...
راحو لمحل العصيرات واخذ كل الكمية اللي حاجزينها
وعقب وقف عند بقالة بالطريق : يلا بابا تعالي
شالها نزل فيها للبقالة
جنى صارت تأشر على التشيبس : بابا ابي ثبث
ماجد يوم شافه مات ضحك هاللي محيره من اول
ومايدري وش هو
اخذ لها تشيبس وحلاو وعصير ومشى راجع للمزرعة
اول ماوصلو شالها ماجد ونزلها عند باب المطبخ :يالله
جنو روحي عند امي
راحت ركض واول مادخلت شافها محمد وجاها وهي
صارت تركض تبي تنحاش منه: مابي هذي حقي والله
ماتاحده وشافت غادة نازلة : عمتي سوفي همود ياحد
ثبثي
غادة ضحكت عليها: حمودي تعال حبيبي انا اعطيك عصير
محمد: ابي بطاطس
غادة: زين انا بعطيك تعال معاي .. راح معاها محمد
وجنى راحت لأم تركي بالصالة الداخلية
**********************
بعد المغرب صار كل شي جاهز ... والكوافيرة
تضع اللمسات الأخيرة على عبير .... البنات جهزو
والصالة تجهزت بالإضاءة والورود والدي جي
وصلت شهد مع امها ... وابوها اللي موصلهم
وبيروح معزوم عند اخوياه بمزرعة قريبة منهم
شاف خالد وسلم عليه
خالد: هلا والله يالله حيهم تفضلو ... خل اهلك
يدخلون من هنا
ابو سلطان ( اللي يصير ابو شهد ): يسلمك ربي
ياوليدي وعساها على البركة ...
خالد ماعرف الرجال بس رحب فيه مثل ماتفرض
عليه عاداته : يبارك بعمرك .. تفضل المكان مكانك
ابو سلطان: مشكور ياوليدي انا جاي اوصل اهلي
وماشي
خالد: لا والله ماتروح توصل الين عندنا وترجع
ابو سلطان: لا لاتحلف معزوم حولكم بوحدة من
هالمزارع ... بس جاي عشان بنتي جننتني تبي
تحضر ملكة صديقتها
خالد: ماشاء الله اجل صديقة عبير
ابو سلطان : اي والله ان شهد بنتي تعتبرها وحدة
من خواتها
خالد استوقفه اسم شهد ورغم انه شافها كذا مرة
بعباتها بس وده هالمرة يشوفها يمكن بعد كلام عبير
صار عنده فضول انه يعرفها: حياك من هنا وصار
يأشر على مدخل الحريم: من هناك مدخل الحريم
راح ابو سلطان ونزل اهله عند المدخل المخصص
للحريم وراح متوجه لمزرعة خويه .....
دخلو للمدخل المخصص لاستقبال الضيوف ,,,فصخت
عباتها وسلمت على خوات عبير وباركت لهم
شهد: اروج تعالي
اريج: سمي
شهد: وديني غرفة عبير
اريج: تعالي معاي .. وخذتها وطلعو لغرفة عبير... اول
مادخلت عليها وشافتها : واااااااااو والله قمر
عبير: هلا شهووودة
شهد: ياحياتي الف مبروووك
عبير: الله يبارك فيك وعقبالك يارب
شهد: هاااه وقعتي؟
عبير: لا لسى دوبي لابسة فستاني
شهد: ياعمري عبورة والله تاخذين العقل... احس اني
مستانسة وربي وحضنت عبير
نزلت اريج وصارت هي وخواتها وخالاتها وبناتهم
يستقبلون الضيوف مع ام فهد اللي قاعدة وكلن يجي يبارك
لها
فهد كان شعوره غير هالعالم اليوم يتوج حبه بملكته على
اللي ملكت روحه .... السعادة تشع من عيونه واللهفة اللي
بقلبه تسابقه لها ... حضر الكل وبدت مراسم الملكة بحضور
الشيخ اللي راح يملك عليهم .... اخذ خالد الدفتر واتصل
بأريج : هلا اريج تعالي خوذي الدفتر
اريج: زين وينك انت؟
خالد: هذاني جاي من عند باب المطبخ الخلفي .. اقدر اطلع لها
اريج: ايه الحريم بالصالة الكبيرة
خالد: زين الحين جاي مع السلامة
وراح لها ودخل من المطبخ طالع فوق مع الدرج الجانبي ..
اريج: لحظة بشوف من عندها... وفتحت الباب وشافت عبير
وامها وشهد قاعدين... رجعت له هات الدفتر بوديه لها
خالد: لييييش ابي اشوفها
اريج: ماينفع شهد عندها
خالد: خليها تتغطى
اريج: خلووود عن المصالة هات الدفتر
خالد: اوووووف .. وعطاها الدفتر ... دخلت وودت الدفتر
لعبير
عبير خذت الدفتر وقعدت تقرا اللي فيه وشافت اسم فهد اللي
يزين هالعقد سمت بالله ووقعت
اريج وشهد يباركون لها : الف مبروك
عبير: يبارك فيكم يارب
ام عبير حضنتها : الف مبروك ياعمري
عبير دمعت عينها: الله يبارك فيك يارب
ام عبير : لييييه الدموع حبيبتي لاتخربي مكياجك
عبير ابتسمت : طيب
ثواني تبعتها دقايق ووقت الزفة حان عبير بتوتر : ارييييييج
اريج: وشو وش فيه؟
عبير: اروج كيف امشي؟
اريج باستهبال : على راسك...
عبير: اروج
اريج: شلون يعني امشي مثل بالعادة بس ابطأ شوي
عبير: حاسة اني راح اطيح من طولي
اريج: انتي امشي بهداوة .. واذا حسيتي انك مرتبكة طالعي
فيني او في شهد واحنا ننسيك هاللحظة
عبير: طيب
******************************
على اضاءة خافتة .... وموسيقى كلاسيكية نزلت خطواتها بثبات
اول ماوصلت الدرجات الأخيرة شغلو الأنوار والكل التفت
يشوف احلى عروس .....
عبير كانت لابسة فستان فوشي ... بشك اعلى الكتف على شكل
فراشة مملوءة بالكرستالات ضيق من فوق ويتوسع من اسفل
الظهر شوي ... كان مبرز جمال لونها وجسمها ...
الميك اب كان شادو بنفس اللون والعين مرسومة بأزرق بحري
من تحت ... الروج بينك فاتح والتسريحة كيرلي ...
التفتت وشافت امها وابتسمت لها جات لها اريج ومشت معاها
قعدتها بالمكان المخصص لها ..والعيون كلها تطالع فيها وتذكر
الله .. كان جمالها ساحر واطلالتها تبهر .. والاجمل ابتسامتها
الصافية اللي تزين ثغرها ....
الوناسة والرقص حواليها . وهي تقريبا ارتاحت شوي....
ومن بعيد عيون رهف تطالعها ... كلها حقد وكره وبغض
اعلنو وقت دخول العريس .. وتغطو الكل الا خوات عبير
وام تركي وخواتها وبناتهم ... ورهف اللي رفضت تتغطى
سجى: انتي صاحية ؟
رهف: هو شايفني مليون مرة يعني عادي
سجى : رهف عن هالحركات اللي مالها داعي
رهف: هذاني لابسة عباتي والشيلة على راسي وهو بيطالع
فيها اصلا مو مطالع فيني
سجى: انتي اصلا تبينه يشوفك... يارهف اقصري الشر
ولاتخربين على البنت مسكينة
رهف: ومن قال لك اني شريرة هالحين؟ مو مسوية شي والله
سجى اسكتت وماعرفت تقول شي هي مو امها ولا ابوها
تفرض عليها شي وهي سوت عليها بس للأسف رهف عنيدة
دخل فهد وعيون البنات تطالعه وتسمي عليه ... والكل
يحسد عبير اللي خذت هالمزيون اللي كل البنات يتمنونه
وقف جنبها وبارك لها وعيونه مو قادر ينزلها عنها ,,,,,
كل مشاعره تفضحه بوجودها والشوق اللي بقلبه يحس ان
كل هالعالم تقراه .... لهفته لها واضحة بعيونه ..
هيام ووله وحب وغرام هو اللي يجمعهم اليوم ... مشاعر
ولا اعذب واحاسيس ولا اروع ... لبسها الدبلة والشبكة
وعيونه تناظرها .. وتهنيها ...
كل اللي يشوفونهم يعرفون انهم ذايبين بغرام بعض
رهف : شووووفي كيف يناظرها
سجى : حلاله اكيد بيناظرها
رهف: وربي ميت فيها نظراته فاضحته
سجى : انا قلت لك لا تجين انتي اللي اصريتي
رهف: آآآهـ يالقهر الله لا يسامحك يافهد
البنات قربو من خالهم واختهم سوالف وتبريكات ... واريج
نادت على خالها تبي تصوره: فهود
فهد التفت لأريج وطاحت عينه على اللي قاعدة بالخلف وفاتشة
انصدم وارتبك وكل مشاعره تبعثرت ...
من حسن حظه عبير كانت تكلم غادة وما انتبهت لشي.. حتى
اريج كان كل همها تصورهم
وفهد اللي من شاف رهف اعتفس وحس بخوف وقلق لا
تقول شي قدام عبير....
كل الوقت اللي قعده ماعاد هو حاس بشي
شعور خوف بداخله ونظراته كل شوي تروح وتجي لرهف وكل خوفه تتهور ويصير شي يهدم عليهم سعادتهم بهالليلة
تنفس الصعداء يوم قامو للمجلس الداخلي
يقعدون فيه.... مشت معاه بكل سعادة
دخلت لقت خوالها ينتظرونها سلمت عليهم وباركو لها وطلعو
وبعد سلمت على اخوانها وابوها ....
والكل استأذنهم طالع .. قعدو هو وياها والمصورة اللي بتاخذ
لهم كذا لقطة تجمعهم . لانها صورت عبير قبل صور فردية
قعدت حول النص ساعة تصورهم ,,,,, عبير كل شوي
تعترض ع الحركات اللي تبيهم يسوونها ... وفهد مستانس
ومايعترض على اي شي .. خلصت منهم وباركت لهم
واستأذنت طالعة ,,, وقعدو لحالهم ... بهاللحظات فهد من
وناسته بعبير نسى رهف وحضورها اللي وتره
فهد: كل عام وانتي حبيبتي... اخيرا تحقق حلمي وصرتي
لي
عبير اكتفت بابتسامة وهو قعد يتأملها ,,, مسك يدينها الثنتين
وقعد يتأمل ملامحها .. جمالها ... عيونها: عبير
رفعت عيونها له والتقت نظراتهم : مستانسة؟
عبير توردت خدودها : الحمدلله
فهد: اخيرااا تكلمتي مابغى يطلع منك الكلام...شلون دراستك
عبير: ماشي حالي
فهد: يعني يرضيك زواجنا بعد 8 اشهر؟
عبير بتوسل: والله دراستي صعبة ولازم اكون متفرغة
فهد: زين كسرتي خاطري ... بس من الحين اعلمك كل
يوم وانا عندك
عبير ضحكت وماعلقت وبداخلها ( ايه كثر منها )
ماتذكر كم مر من الوقت عليهم.... كل اللحظات كانت الاجمل
والعشق والطهر يغلف علاقتهم ....
**********************************
بعد ماراحو الكل قعدت مع البنات سهرانين يسألونها عن
اللي صار بينهم وتعليقات والكل مبسوط وماودهم ينامون
ويفوتون عليهم هاللحظات الحلوة ... وصلها مسج على
جواله .... فتحته قعدت تقراه..
ياقمر بالله قل لي من تكون ووش تكون
بعدما حيرت فكري ياقمرنا من دهاك
سافرت يمك حروفي بعد ظللها الجنون
وسلمتني لرمش عينك يتلاعب بي حلاك
وتهت بين الرمش مدري تهت مابين العيون
حسبها الله ياعيونك سببت لي ارتباك
جيت باوصفهم لقيت الوصف لايمكن يكون
لانهم فوق الوصوف وسرهم فيه الهلاك
حيرت شعري وفكري كيف باوصف سحر نون
هد ياقلبي دخيلك .... بعدما ربــي ابتلاك
..... فهد .......
توردت خدودها وبان عليها الخجل واريج اكيد ماتفوت
عليها هالحركات :اعترفي وش المسج اللي وصل لك؟
عبير: اشياء خاصة
اريج: مادام خاصة اكيد من فهود
عبير ضحكت وهي مستحية
اريج: وش مرسل لك؟
عبير: ياشيخة طيري ماراح تشوفيه كلام عادي
ندى: طيب ردي له
عبير: لا مو على طول بعدين يقول اني خفيفة
اريج: بعدي اختي تعجبيني
مرام: تتوقعين انه راح يتصل؟
عبير: مادري .. انا خلاص طفشت بروح ابدل
دخلت الغرفة .... تسبحت وبدلت ملابسها ... ولبست
لها بيجاما لونها رمادي ...انسدحت على السرير وفتحت
المسج وقعدت تقراه اكثر من مرة ..
***********************
رجعت مع سجى بنت خالتها لبيتها ... وحزن الدنيا كله
تحسه بعيونها..دموعها مو راضية توقف
سجى: قلت لك لاتروحين ماراح تكسبين الا الشقى وهذاك
من رحتي للحين تصيحين
رهف: يحبها الحقييييير.. انا قلت يمكن احد جابره عليها
سجى: اصحي لعقلك يارهف البنت بهالزمن محد يغصبها
تتوقعين بيغصبون الرجال...
رهف: بس فهد يحبني ياسجى والله يحبني
سجى: وانتي للحين مصدقة هالخرابيط؟ لو يحبك ماراح
لغيرك ... انا قلت لك من الاول هالشباب يلعبون بعقول
البنات .. ياخذك تسلية بس ولا جا وقت الجد والزواج
رماك وماسأل لا فيك ولا في حبك ومشاعرك
رهف: والله لاكرهه عمره .. واكرهه فيها مو انا اللي
يرميني هالرمية
سجى: تعوذي من الشيطان واطردي هالسوالف عنك
واتركي الرجال بحاله ... حرام عليك البنت وش ذنبها
رهف: ذنبها انها خطفت مني اللي احبه
سجى: البنت لو دارية انه يعرف بنات وعنده علاقات قبل
ماقبلت فيه ...
رهف: خلاص لا عرفت ان فهد لي وانا احبه هي اللي
بتعافه وتتركه ... ووقتها يجي يحب يديني عشان ارجع له
سجى : رهف وش هالكلام؟
رهف: رجاء لا تتدخلين هالكلام بيني وبينه وماراح اسكت
عن حقي ابد
سجى: تدرين عاد؟ ماراح اقول مو هذا اللي تربيتي عليه
لانك نسيتي تربيتك من مشيتي هالطريق .. بس اذا تخافين
الله اتركي البنت بحالها وخليها تتهنى بزوجها ...
رهف سكتت وماعلقت ... وبداخلها نار تغلي وتتوعد هالفهد
اللي جرحها وكسر اللي بداخلها
***************************
ثالث ايام العيد بيكون آخر يوم لخوال عبير اللي
بيرجعون للطايف هاليوم ..ورغم ان البنات نامو
متأخرات الا انهم على الساعة 10 تقريبا كانو
صاحين ....
صحت عبير بكسل ... مسكت جوالها تبي تشوف
الساعة كم .. لقت اشارة لمسج جديد...
فتحت المسج واتسعت ابتسامتها وهي تشوف من اللي
مرسل لها ...
صباح الكلمة الحلوة
صباح بليا حدود
أحبك ياترى تسمع
أحبك وانت المقصود
حبيبي كيف ابشرح لك
وشرحي للأسف مفقود
صباح يبتدي منك
لأنك نسمته اللي تسود
صباح يحتويه الكون
لأنك فيه انت موجود
كان ودها تطير من الوناسة ,.... المسج له تقريبا
حول الثلث ساعة من ارسله .... قلبت بجوالها
واختارت مسج مناسب وارسلته له ....
صباح النور لاأكثر
صباح الورد بأنواعه
صباح الشمس لــ تظهر
ونور الفجر وشعاعه
صباح السحب لــ تمطر
كل لحظة وكل ساعة
صباح الجوري المعطر
بدهن العود وأتباعه
وفوق أكثر ماتتصور
صباح الامر والطاعة
فهد كان يتمشى بالمزرعة مانام الا شوي من وناسته
يحس نفسه طاير ومو قادر انه ينام ... سمع صوت
المسج .... طلع جواله من جيبه وفتح المسج يقراه
( ياااالبييييييه) قالها من قلب وهو يقراه... وماقدر
يخفي شوقه اكثر واتصل فيها ...
عبير بعد ما ارسلت المسج .. كانت منتظرة يجيها
منه مسج بس جوالها دق رفعته تبي تشوف مين
واول ماشافت الرقم وهي تفز من مكانها واللي
رحمها ان البنات سبقوها للصالة تحت << اصعب
شعور اول مكالمة انواع الإحراج بقوة
ردت ويديها ترتجف: الو
فهد: هلا والله هلا بهالصوت <<الأخ جريء
عبير بنعومة : هلا فيك
فهد: اليوم احلى صباح بحياتي اللي تصبحت فيه
على صوتك...
عبير:..................
فهد: يالبى اللي يستحون ياناس .. شلونك؟
عبير: الحمدلله
فهد: وحشتيني
عبير: ههههههههههههههه امداك يعني
فهد ذاب من سمع ضحكتها : اجل لو اقول لك ابي
اشوفك الحين وش يصير؟
عبير: مستحيل
فهد: عبوووورة ليش
عبير: ماينفع والله ... بعدين ابغى اجلس مع بنات
خالي قبل يمشون...
فهد: من الحين بدينا التصريفات ... بس مسموحة
يالغالية
عبير: طيب
فهد: طيب؟ وين اصرفها هذي؟..
عبير: ههههههههههههههههههه
فهد: مبسوطة قلبي؟
عبير: الحمدلله مرررة مبسوطة
فهد: زين افطرتي؟
عبير : لا لسى دوبي صاحية ومانزلت للبنات تحت
فهد: اوكي ما اعطلك روحي افطري ...
عبير: اوكي
فهد: توصيني شي؟
عبير: لا بس سلامتك
فهد: الله يسلمك ويخليك لي يارب... مع السلامة
عبير: باي ........ سكرت منه وهي ودها تصارخ
وتسمع العالم صوتها وهي تعلن حبها له
*********************************
قاعدين البنات بالمجلس الداخلي .... ورافعين المسجل
ع الآخر ورقص وخبال ..<<ماكفاهم رقص البارح
غادة دخلت عليهم وهي تضحك: وربي مو صاحين
وش فيكم استخفيتو
الجوهرة: الدنيا عيد نبي نفلها
غادة: ومجننين ريمو معاكم .. صايرة تموت بالرقص
من تسمع طق قامت تهز
البنات ضحكو وريم انحرجت : يممممممه
غادة: ههههههههههههههه وانا الصادقة كل ماجيتك
لقيتك ترقصين
فاتن: خليها تتهنى بعمرها توها صغيرة
غادة: شفتي هالبنت؟ وربي نسخة عمتها اريج
اريج: ياعمريييييييي لها الفخر والله
غادة: امحق فخر .... ليتها طالعة على ندى اللي كلها نعومة
ولا على فاتن العاقلة ... ولا مثل عبير الهادية ... ماطلعت
الا على الخبلة
اريج: لبى خبالي والله يكفيني انه عاجب رجلي
فاتن: ههههههههههههه وافق شن طبقة
غادة: عبير
عبير التفتت لها : هلا
غادة: تعالي امي مضاوي تبيك
عبير: طيب.... ( والتفتت على البنات ) تتوقعون وش
تبغى مني؟
اريج: يمكن تبي تقول لك انك ماجزتي لها
عبير بققت عيونها: جد؟
غادة: لا وش الجد خبلة انتي تصدقين تعالي بس
وراحت عبير معاها وهي ماتدري ليش تبيها ... دخلت
عند الحريم وسلمت وراحت لأم فهد وحبت راسها
سحبتها ام فهد من يدها : اقعدي يمه
قعدت عبير بدون ماتتكلم ... وام فهد قعدت تطالعها
مبتسمة وهالشي ريح عبير .. بعد ماخوفتها اريج بكلامها
ام فهد بكل حنية : شلونتس يمه عساتس مستانسة
عبير: الحمدلله يارب ان شاء الله انتي مبسوطة مني
ام فهد: والله يابنيتي اني اتمناتس اليوم قبل باتسر مير الله
يوفقتس بدراستس
عبير: آمين
وسحبت من جنبها علبة حمراء من الشامواه وقدمته لعبير
وابتسامتها مازالت مرسومة على وجهها اللي خطه الزمن
بتجاعيد تحكي عمر مضى : خوذي يمه هديتس وعساها
تعجبتس... وتراها مو قدرتس تستاهلين الزين كله
عبير استحت من ام فهد وطيبتها مدت يدها وخذت الهدية
وفتحتها ..فتحت فمها تعجب وهي تشوف الهدية اللي كانت
عبارة عن قلادة من الذهب الأبيض تزينها احجار الألماس
الأبيض الأنيق وفي النص حجر من الياقوت الأحمر ...
عبير بفرحة : شكراً ياخالة ليه كلفتي على نفسك؟
ام فهد: ماهنا كلاافة وانا امتس محد اغلى عندي من فهد ... واكيد مايغلى شي
على مرته الله يجمعكم قريب ويفرح قلبي فيكم واشوف
عيالكم قبل ما اموت
عبير: ان شاء الله بعد عمر طويل يارب.. وقامت حبت
راسها .. ورجعت للبنات وهي طايرة من الفرح
ام فهد وهي تشوفها رايحة: الله يابنيتي يوفقتس وييسر
امورتس ...
دخلت على البنات اللي تسابقو لها وهم يشوفون العلبة
بيدها وكل وحدة تبي تشوفها اول...
اماني: وش هالحركات بدينا من هالحين هدايا ... والله
خطيرة يابنت عمي علقتي الولد وامه
اول مافتحت اريج العلبة وشافت اللي فيها : وااااااااااو
غش وربي غش ... الحين بعروسنا تهدينا اي كلام
واحنا بنات بنتها وعبير لها الغالي؟
عبير شهقت: اووووووووف حاسدتني اروج
غادة : هذي بتصير حرم فهد الغالي ومايحتاج اعلمكم
وش كثر غلاته عند امي مضاوي
اريج: لا مابي غش تجيب لي مثله ولا اتبرا منها
فاتن تطقها : اريجوه وجع وش قلة الحيا هذي تبين
خلي ام رجلك تجيب لك
اريج : هههههههههههههههه امزح اعوذ بالله ماتعرفون
المزح
وطلعو البنات يشوفون الغدا ويقعدون واريج باقي كلام
بقلبها لازم تقوله لجدتها ...
وهم قاعدين على الغدا اريج تمازح جدتها: الله لنا الغالي
راح لعبير ولا احنا مالنا الا الرخيص
ام فهد فهمت كلام اريج وقعدت تغمز لها بعيونها وتتوعدها
بنظراتها تبي تفهمها تأجل هالكلام بوجود اهل عمانها واهل
خوال عبير
بس اريج مكملة : هذا وتوها ما اعرست اجل وشلون لا
اعرست عز الله نستنا
ام فهد بكل برود: تستاهل اكثر ويستاهل الغالي
فاتن تأشر لأريج تسكت لانها حست ان جدتها ممكن تنفجر
فيها وتهزأها خصوصا ان الحريم الكبار عند كلمة الحق
ماعليهم في احد...
تغدو وقعدو مكملين سوالف قامت غادة وجابت الحبوب
لجدتها تآخذها اللي كانت قاعدة لحالها بزاوية الصالة
ام فهد: صوتي لاريج تجيني تعطيني دواي
غادة: زين يمه
وراحت غادة وهي ميتة ضحك لانها عارفة جدتها وش
راح تسوي لاريج...
غادة قربت من البنات اللي قاعدين: اريج روحي ودي لامي
مضاوي دواها
اريج خذت الدوا من غادة وراحت لام فهد تعطيها ..اول
ماقعدت جنبها طلعت لها حبة من دواها ومدتها لها مع كاس
موية: سمي يمه
ام فهد خذت حبوبها وشربت بعدها الموية ومسكت يد اريج
وقبصتها من فوق الكوع : الحين ياقليلة الحيا ماتستحين ؟
ولا تحشمين احد
اريج: آآآآي يمه امزح والله
ام فهد: وهذا وقت مزحتس ماتخيلين ولا تستحين
تحرجين البنت قدام هالناس كلها
اريج: يمه فكي يدي والله تعورني..توبة ما اعودها
وفكتها ام فهد: روحي الحين وياويلتس لو سمعت هالسوالف
مرة ثانية ما اكون الا ماصعتس من رقبتس
اريج راحت تركض: سمعا وطاعة يالغالية
اول ماوصلت للبنات راحت لغادة : تعااااالي
وغادة قامت تركض وهي تضحك : اروج وربي ماقالت لي
شي
اريج: هين هين والله لاوريك
ريم يوم شافت اريج تطارد امها راحت ركض ومسكت
عمتها: خلاااص وقفو
اريج اللي حست انها ماراح تقدر توصل لغادة اللي طلعت
فوق راحت لعبير المسكينة: ومسكتها مع اذنها : شوفي
شوفي اللي بيدي بسبتك
عبير: وانا وش سويت؟
اريج: احد قال لك تاخذين خالي
ندى: ههههههههههههههه اريج والله انك من تزوجتي انخبلتي
الجوهرة: والله انها خبلة من اول فكي بنت عمي احسن لك
اريج: وش دخلك انتي شي بيني وبين اختي
عبير سحبت يد اريج وقامت : يلا يابنات طلعنا نصلي العصر
لو قعدنا هنا ماراح يخلو الأمر من ضحايا
راحت لها اريج قبل تطلع وباستها على خدها: ياعمري ياناس
هالبنت ملاك ماعمرها آذت احد
ضحكو البنات على اريج اللي كل شوي لها مود غير
************************************
بعد صلاة العصر مشو خوال عبير وودعوهم على امل يلتقون
فيهم بأقرب اجازة....
وباقي العوائل راح تمشي بعد العشى وكلن بيروح بيته ....
خالد اتصل بعبير : السلام عليكم
عبير: هلا خلود وعليكم السلام
خالد: مشغولة؟
عبير: لا عادي ليه؟
خالد: تعالي ابيك
عبير: طيب بس فين؟
خالد: البسي عباتك واطلعي لي
عبير: طيب دقيقة
راحت عبير لبست عباتها ونزلت تحت ...راحت لمدخل
الفيلا لقت خالد ينتظرها : احد قدامي؟
خالد: لا عادي تغطي بنروح من هنا... وشافته يأشر جهة
اسطبل الخيول... مشو مع بعض بدون اي كلام
عبير: كيف العيد معاك
خالد: اكيد من احلى مايكون
عبير: خلود مايجينا احد هناك؟
خالد: لا ما اتوقع اغلب العيال مريحين .. تعالي نقعد هنا
وقعدو على كراسي قريبة من الاسطبل
وبعد تردد تكلم خالد: عبير
عبير: هلا
خالد: بصراحة انا فكرت بكلامك واستخرت وحسيت اني
مرتاح كثير
عبير بفرحة: والله خلود؟
خالد: بس ابي اعرف اول انتي مكلمتها؟
عبير: لا بصراحة ماحبيت اقول لها حاجة قبل اكلمك ..
هي من زمان كانو مسمينها لولد عمها بس هي ماتبغاه يعني
الولد مو اوكي ... وكانت خايفة اهلها يجبرونها عليه
خصوصا انه مافي احد كان يتقدم لها عشان عارفين بكذا
بس الحمدلله في الصيف لما فتح عمها معاهم الموضوع
رفضت وقالت انه مايناسبها ...
خالد: يعني مافي اي مشاكل؟
عبير: مع بيت عمها الا صار بينهم زعل مثل ما انت عارف
بعض الاهل لو ولدهم كله عيوب شافوه ملاك..بس هي اهم
حاجة عندها اهلها راضين عنها
خالد: طيب ابيك تجسين نبضها بالأول قبل يصير شي رسمي
واذا حسيتي انها مقتنعة راح اكلم الوالد نروح نخطبها
عبير بسعادة بالغة: طيب .. بكرة ان شاء الله بروح لها وانا
متأكدة انها ماراح ترفض
خالد: ان شاء الله ... بس من الحين اعلمك حركاتك مع فهد
مابيها
عبير توردت خدودها وضحكت: اي حركات
خالد: يعني اذا وافقت ابي الملكة والعرس في شهرين ثلاث
بالكثير
عبير: هههههههههه وش عندك مستعجل؟
خالد: ابد بس خير البر عاجله
عبير: طيب ان شاء الله ماراح تعترض
كملو قعدتهم وسوالفهم وقطع هالسوالف اتصال على جوال
خالد: هلا فهود
عبير قلبها فز على طاري الحبايب وخالد التفت لها عقب ماسكر
وهو يضحك: قومي ادخلي وانا بروح لفهد قبل يدري وين
احنا فيه ويجينا
عبير قامت ورجعت هي وخالد وهي داخلة الفيلا لمحت فهد
قاعد مع تركي اخوها ...هو طبعا عرفها وابتسم من خاطر
لشوفتها واول ماقرب منهم خالد نط فيه فهد : وين رايح انت
وياها؟
خالد: وش لك دخل انت؟
فهد: لا والله؟ واكلمك اقول وينك تقول قريب
خالد: اييييه تبيني اقول لك اتمشى انا وعبير تجيني ركض
فهد: هههههههههههههه في هذي صدقت... شلونها؟
خالد: طيبة
فهد: وش عندكم رايحين تتمشون لحالكم؟
خالد: اسرار اخوية؟ ولاحظ قلت اخوية يعني لاتتدخل بين
البنت واخوها
تركي: انا مدري متى تكبرون.. كل ماشفتكم تتناقرون
فهد: انا انسان اكره الجدية مع الناس اللي احبهم ياخي الحياة
وناسة وسعة صدر
تركي: والحياة دايم مزح مافيها جد؟
فهد: جد بالعيد؟ ماتجي صح
خالد: هههههههههههههه غبي ماتعرف تفهمه ..هو يقصد
ان الجد بوقته لاصار موضوع او نقاش بس مادام الدعوة
وناسة نخليها كلها مزوح
فهد: الحمدلله اللي لحقت تقعد معانا وتونسني ولا قبل نص
ساعة قعدتهم مع تركي جاني اكتئاب
تركي: هههههههههههههههه ليته دوم......
كملو العيال سوالفهم وانقضت ايام العيد الثلاث بفرحها
وكل العوائل رجعو لبيوتهم ..... ولحياتهم الطبيعية
*********************************
قاعدة هي وعبير بغرفتها .... وماسكة يد عبير وتطالع
بدبلتها: والله حركات هالولد ذوق
عبير: عقبالك يارب
شهد: ان شاء الله يارب
عبير: يعني متحمسة للزواج
شهد: هههههههههههه بتمسكينها علي يعني
عبير: لا مو كذا بس لو انخطبتي في هذي الفترة ماراح
ترفضين؟
شهد: اذا الشخص اوكي ليش ارفض؟
عبير: يعني عشان بيت عمك وكذا ماراح يعترضون؟
شهد: مو من حقهم يعترضون ابد هذي حياتي وانا حرة
فيها وولدهم نصيبه مع غيري ... بعدين الناس بطلت
هالعادات الغبية ... البنت من تولد سموها لولد عمها
عبير: طيب لاتعصبين ترى انا مو عمك
شهد: هههههههههههه والله قهر عبورة
عبير: لاتقهرين نفسك ولا حاجة ... بكرة تتزوجين
اللي احسن منه
شهد: اللهم آمين يارب... وقعدت ترتب باغراضها
عبير: شهودة
شهد: همممممم
عبير: شرايك في خالد اخويه؟
شهد تركت اللي بيدها والتفتت لعبير: من اي ناحية؟
عبير: من كل النواحي شخصية واخلاق وشكل
شهد: من اللي اعرفه والنعم والله بس ليش هالسؤال؟
عبير: امممم يبغى يخطبك بس حاب يعرف رايك اول
شهد جات وقعدت جنب عبير: وشو؟
عبير:اللي سمعتي
شهد: عبورة فاجأتيني
عبير: لا تسوين فيها تستحين مني وحركات مالها داعي
والله ماراح تلقين مثل خالد
شهد:مو اسوي مستحية انتي ووجهك قلت تفاجأت بس
عبير: يعني ماعندك اعتراض مبدأي
شهد: لا والله اذا هو منك ياهلا به ومسهلا
عبير : هههههههههههههههه والله كذا بشوف نفسي
شهد: بس اكيد لازم افكر واستخير
عبير: طيب يعني ماعندك اعتراض يجون يتقدمون لك
رسمي
شهد: ان شاء الله
تمت الخطبة رسمية ... وشهد اعطت موافقتها النهائية
بعد اسبوع من تقدم لها خالد ....
وبعدها باسبوعين تمت الملكة اللي كانت مقتصرة على
العائلتين وبعض الاقارب ....
********************************
حست بدوخة وصداع فظيع ... تعبت وقررت تستأذن
وتروح للبيت ترتاح ...توجهت للبيت ووصلت له واول
مادخلت وهي عند الباب دارت الدنيا فيها وماعاد
صارت تشوف اللي حولها وطاحت ... صار لها اكثر
من عشر دقايق مرمية على الأرض ومحد حولها
واللي انقذها طلعة الشغالة تبي تروح تاخذ الأغراض
من السواق شافتها طايحة على الأرض مغمى عليها
وراحت لها تركض ... وصارت تضرب بخدودها تبي
تصحيها بس لا حياة لمن تنادي دخلت البيت ركض
ياني: مدام هادا عبير برا طايح
ام عبير ماتدري وش اللي سمعته بس طلعت ركض
لبنتها : عبير .. عبير حبيبتي اصحي
بس عبير لا مجيب ... التفتت للشغالة: روحي جيبي
عبايتي بسرعة .. وتعالي انتي شيليها معاية
اتصلت بالسواق يجهز لها السيارة ... لبست عباتها
وشالو عبير يمشونها ...
وبأقصى سرعة وصلو للمستشفى ونزلوها للطواريء
وماهي الا دقايق وكانو ابوها واخوانها موجودين
ام عبير راحت لابو تركي: بنتي ياعبدالعزيز مادري
وش صار لها
ابو تركي: مافيها الا العافية ان شاء الله بس اذكري الله
والتفت لتركي: روح اسأل عن اختك بسرعة
وراح تركي ... اما خالد قاعد مع ابوه ومطنش اتصال
فهد اللي راح يدوره في مكتبه ومالقاه ... وهم طبعا طلعو
من غير مايقولون له ....
مر وقت غير قصير وجاهم الدكتور : السلام عليكم
الكل: وعليكم السلام
الدكتور يكلم ابو تركي: انت والد المريضة؟
ابو تركي: ايه انا يادكتور بشر؟
الدكتور: الحمدلله هي طيبة بس تعاني من ارهاق وانيميا
حادة
ام عبير تنفست الصعداء: يعني بنتي مافيها حاجة يادكتور؟
الدكتور: لا الحمدلله مافيها شي بس حطينا لها مغذي لمدة
ساعتين وبعدها تطلع معاكم للبيت عادي
ام عبير: الحمدلله يارب .. يعني اقدر اشوفها؟
الدكتور: ايه اكيد تفضلو
دخلو على عبير اللي تغطت يوم دخل الدكتور ...
قربت منها امها : الحمدلله على السلامة ياقلبي وقفتي قلبي
والله
عبير: والله مادري وش صار فيه كنت تمام الصباح
وبعدين بديت احس بالتعب
ابو تركي: الحمدلله على السلامة يابنيتي .. ولا عاد تخوفينا
عليك
عبير: الله يسلمك يارب
كانت شاحبة ... ومبين عليها التعب والارهاق وتكلم الدكتور
عن حالتها لاهلها: اولا المريضة تعاني من سوء تغذية وقلة
نوم .. وارهاق جسدي وهذا اللي سبب لها فقر الدم الحاد
ام عبير: والله يادكتور انها تطفشني كل ماحطينا الاكل قالت
مالي نفس واذا اكلت من البساكيت والتشيبسات اما الاكل
اللي ينفع ماتقربه
الدكتور يطالع في عبير: ياعبير انتي مو صغيرة عشان
تهملين صحتك او ماتنتبهين لأكلك ,,, انا راح اكتب لك
فيتامينات .. تعوض نقص الحديد بس لازم تهتمين بالوجبات
الرئيسية .... وحاولي الاكثار من الاشياء اللي تكون غنية
بالحديد مثل اللحوم الحمراء والاسماك والخضار والورقية
مثل الخس والجرجير ... واشربي عصيرات مثل التوت
وكثري من اكل الزبيب ... وان شاء الله ماقدامك الا العافية
ام عبير: سمعتي؟ لا تقولي بعدين مالي نفس
خالد: اي بعدين من يرقص بعرسي؟
عبير: ههههههههههههههه وهذا اللي يهمك؟
خالد: لا والله ماتشوفين شر يالغالية
عبير: الشر مايجيك يارب
كتبو لعبير خروج ... وطلعت البيت ترتاح ... وراح
معاهم ابو تركي ... اما تركي رجع للشركة
*********************************
وصلت للبيت تسندها امها .... وطلعت غرفتها ترتاح
سلم عليها خالد ووصاها تنتبه لنفسها وطلع ....
انسدحت على سريرها .... : ماما الله يسعدك اعطيني
جوالي شوفيه في الشنطة .... عطتها امها جوالها
ام عبير: ارتاحي انتي الحين واذا صحيتي لازم تتغدين
عبير: ان شاء الله من عيوني... خذت جوالها لقت 22
مسد كول ... و3 مسجات .. شافت المكالمات اول لقت
5 من فهد و17 من شهد اللي شافتها وهي تعبانة وقالت
لها تطمنها اول ماتوصل البيت
فتحت المسجات ... اول مسج من فهد ( يسعد لي مساء
الورد... مادري اذا انتي في محاضرتك او لا ..بس اول
ماتشوفين المسج كلميني ... مشتااااااق لك )
شافت ثاني مسج من شهد ( عبورة تكفين طمنيني عليك
اول ماتوصلين )
والثالث بعد من شهد ( وينك فيه اشغلتيني والله )
اتصلت في شهد اللي من اول رنة ردت عليها : هلا
عبورة طيحتي قلبي وينك؟
عبير والتعب مبين في صوتها : الحمدلله انا تمام بس رحت
المستشفى ودوبي جاية
شهد: سلامتك ؟ وش قالو لك
عبير: الله يسلمك بس انيميا والحمدلله ماكانت حاجة ثانية
شهد: والانيميا بسيطة؟ عبورة تكفين انتبهي لنفسك
عبير: ان شاء الله ياماما
شهد: فاضية للطنازة وربي ... بس ليش مارديتي على
اتصالاتي والمسجات؟
عبير: والله نسيته على السايلنت بعد آخر محاضرة
شهد: طيب ماتشوفين شر وارتاحي الحين وبجي لك
بعد المغرب ...
عبير: اوكي ....... سكرت منها وقعدت تقلب بجوالها
ماودها تكلم فهد وصوتها تعبان ... وقررت تكتفي بمسج
وبعدها تنام .....كتبت المسج وارسلته ... وغطت في نوم
عميق ...
*******************************
قاعد بمكتبه ... يوقع اوراق عدد من المناقصات وصله
مسج وتوقعه من عبير .. فتحه وقراه ( مساء الخير ...
سوري انا تعبانة شويه وبنام الحين ان شاء الله اول
ما اصحى اكلمك )
انقهر منها .. ورمى جواله على المكتب بقهر ... هو
يتصل فيها ومشتاق لها وهي ماكلفت نفسها حتى تكلمه
ولا تعتذر له لانها ماردت على اتصالاته ...
طلع من مكتبه بيشوف خالد ....دخل وهو متنرفز
خالد: ماتعرف تطق الباب؟
فهد: لا ... وين كنت من اول ادورك؟
خالد: وانت ماتعرف تعيش من دوني
فهد: اخلص علي بس وين كنت
خالد: بالمستشفى
فهد استغرب: افاااا عسى ماشر؟
خالد: ابد ماشر بس عبير تعبت علينا والحمدلله الحين
هي بخير
فهد اللي كان واقف من سمع كلام خالد قعد: وشو؟ وش
صار فيها؟
خالد: مافيها الا العافية ارهاق بس
فهد: هالبنت ذابحها الدلع ... وذبحتني معاها ... بالله
عليك خالد شلونها؟
خالد: والله مافيها الا العافية ... حطو لها مغذي وعطوها
فيتامينات تقويها ...والحين اكيد نايمة بالبيت
فهد: انا رايح لها اليوم بوريها شغل الدلع شلون تخليه
خالد: ارفق بإختي بس تراها حساسة
فهد: لاتوصيني عليها وربي اخاف عليها اكثر من نفسي
وطلع راجع لمكتبه رتب الاوراق .. وخذا جواله ومفاتيحه
وطلع من الشركة .... قلبه شاغله عليها ووده يروح لها
الحين .. بس يبي يصبر نفسه للمغرب ويروح لها ...حب
انه يرسل لها مسج ( سلامتك ياعمري وماتشوفين شر ...
جعلها بعدوينك يارب .... اليوم جاي لك بعد المغرب وماراح
اسمح لك تعترضين .. احبك )
*******************************
صلى المغرب وتوجه لمحل ورود .. اختار لها باقة من
الجوري الاحمر ... واتصل فيها وهو رايح لها : هلا
عمري
عبير: اهلين
فهد: للحين صوتك تعبان
عبير: لا والله مافيه حاجة ...
فهد: طيب مصدقك ... شلونك الحين؟
عبير: هههههههههههههههه من يوم صحيت هذي سادس
مرة تتصل وتسأل نفس السؤال
فهد: افااا تضحكين علي لاني خايف عليك؟
عبير: لا مو قصدي بس كل مرة اقول لك نفس الجواب
فهد باستهبال : زين شلونك الحين؟
عبير: ههههههههههههه تمام
فهد: خمس دقايق وانا عندك
عبير: الله يحييك
فهد: يااااابعد عمري انتي... (وهو واقف عند الإشارة لفت
نظره دبدوب كبير لونه ابيض وخشمه واصابعه حمراء
وبين يدينه قلب كبير احمر مكتوب عليه I LOVE YOU )
امممم عبورة لا وصلت اكلمك
عبير: طيب باي
راح للمحل وشرى الدبدوب وطلع متوجه لبيت عبير
فتحت له الشغالة ودخل للمجلس الداخلي ....واتصل على
عبير يستعجلها تنزل له
عبير: شهودة شكلي تمام؟
شهد: وربي قمر بس انزلي تأخرتي
عبير: بس وجهي مصفر صح؟
شهد تناظرها : امممم كثري بلاشر ..
عبير فردت البلاشر على وجهها .. تعطيه لمسة وردية
شوي: كذا؟
شهد: ايه تمام يلا انزلي
عبير: اوكي انتي رايحة خلاص؟
شهد: ايه بروح واول مايطلع حبيب القلب كلميني
عبير : اوكي .... ونزلو ثنتينهم ... عبير راحت متوجهة
للمجلس وشهد راجعة لبيتهم .... تغطت وطلعت اول
ماعتبت باب البيت رايحة للحديقة صادفها خالد اللي
استانس من شافها : هلا والله .. هلا بريحة اهلي كلهم
شهد تسمرت مكانها وهي بقمة احراجها
خالد: وش هاليوم الحلو اللي اشوف بعد عمري فيه
امي داعية لي اليوم
شهد: خاااالد ابي اروح البيت
خالد: يالبى من قالت خالد .... يالبى هالحس اللي يرد
الروح<< متعمد يحرجها
شهد: طيب ممكن توخر شوي؟
خالد: زين .. بس قولي احبك ياخالد
شهد شهقت وخالد ضحك عليها وسحب الغطا عن
وجهها ....: انا زوجك ومتغطية عني... طيب افصخي
عباتك بشوف وش لابسة؟
شهد ميتة ضحك بداخلها على حركات خالد بس ماتبي
تبين له حطت يدها على جبهته: سلامات؟ وش تحس فيه
عساك مانتب مريض؟
خالد: هههههههههههههههه مريض بحبك ... ليش رايحة
بدري؟
شهد: عبير راحت تقعد مع فهد ومافي احد اقعد معاه قلت
اروح البيت احسن
خالد: وخالد وين راح؟ ولا ديكور قدامك
شهد: ههههههههه محشوم بس قصدي قبل
خالد: يعني الحين ماعندك شي صح؟
شهد: لا ماعندي
مسكها من يدها : تعالي معاي نقعد انا وانتي نسولف شوي
شهد: ويييين؟
خالد: تراي ما اعض ... لا تخافين
شهد: طيب ... ومشت معاه بانصياع وقعدت معاه بالمجلس
الخارجي ...
*********************************
اما عند عبير وفهد ... اول مانزلت راحت له فتحت
الباب وسلمت ودخلت وبيدها كاستين العصير وكان
مبين على مشيتها التعب ..
فز لها وقام واخذ منها العصير: ارتاحي انتي بس
عبير: السلام عليكم
فهد حط العصير على الطاولة قدامهم وقرب منها
وباسها على جبينها : وعليكم السلام .. سلامتك ياقلبي
عبير منزلة راسها : الله يسلمك
فهد: خوفتيني عليك
عبير بدلع: آخر مرة
فهد مسكها من يدها وقعدو وشال باقة الورد والدبدوب
وقربهم لها : هذي لحياتي وعمري وقلبي.. وماراح
اسمح لك تهملين نفسك بعد هالمرة
عبير: ان شاء الله
عبير شالت الدبدوب : وااااو يجنن وحضنته بقوة ...
سحبه فهد منها : بعديه عنك ترى اغار
عبير: ههههههههههه تغار من دبدوب؟
فهد: ايه اغار ...!!!! هذاك تلمينه وانا محروم من
حضنك...
خذت منه عبير الورد وقعدت تشمه : شكرا
فهد: تحبين الورد
عبير: واعشق الجوري
فهد: وانا؟
عبير : انت ايش؟
فهد: تعشقيني....؟
عبير ابتسمت وانحرجت منه واكتفت انها تهز راسها
بالموافقة بس
فهد بفرحة تغمر قلبه : انا وربي اللي اعشقك ياعيون
فهد انتي... مسك يدها وقعد يتأملها ....
تفاجأ من لونها المصفر والشاحب : عبورة
عبير: هلا
فهد: ليش مسوية في نفسك كذا؟ عاجبك يعني؟
عبير: ماسويت شي
فهد يأشر على يدها : شوفي شلون مصفرة مافيها دم
عبير: والله مادري كيف يعدي الوقت وما آكل اصلا
اذا انشغلت انسى نفسي وما احس بجوع
فهد: عبورة ياعمري انتي انتبهي لنفسك ولاتهملين
اكلك ... وياويلك لو جاني خبر انك ماتاكلين ... بجي
لك كل يوم انا بأكلك بنفسي
عبير: طيب .. كذا كلكم حسستوني اني طفلة وما افهم
فهد: انتي طفلتي انا...
بمكان واحد اجتمعت اربع قلوب على الحب ..
عبير وفهد ..... وخالد وشهد ...... ضحك وحب ودلع
كان عنوان جلستهم ... ويارب تديم هالحب بقلوبهم
*
*
*
*
*
انتهى الجزء الرابع عشر
لقلوبكم اعذب واصدق الود
•غٌـمـوضٌ ـآٍْاْلٍْــورد•
|
14-07-09, 03:50 AM
جديد مواضيع قسم القصص المكتمله من وحي قلم الاعضاء
العرض العادي
