كاتب الموضوع :
غموض الورد
المنتدى :
القصص المكتمله من وحي قلم الاعضاء
الجزء الثالث عشر
*
*
*
*
ماتدري كم مر عليها وهي تنتظر وماتذكر الا وجه الطبيبة
وهي جاية تبشرهم بولادة ندى
الدكتورة: الف مبروك ندى جابت ولد
ام تركي: بنتي يادكتورة شلونها
الدكتورة: الحمدلله قامت بالسلامة .. صحيح تعبت مع الولادة
بس راح ترجع مثل اول اذا ارتاحت .. اهم شي هي محتاجة
الراحة التامة وماتضغط على نفسها كثير ... ولا تشيل اشياء
ثقيلة
الوجيه تهللت من السعادة والكل صار يبارك للثاني
ام تركي: اقدر اشوفها يادكتورة؟
الدكتورة: اليوم خلوها ترتاح وتعالو من بكرة زوروها
اريج: والولد ابي اشوفه
وطلعو كلهم بعد ماملت الراحة قلوبهم ... راحو يشوفون
الولد بالحضانة ...
الجوهرة: ياقلبي عليه نتفه هذا شلون يشيلونه
اريج: وخري بس لاتحشين ولد اختي
الجوهرة: اللي يشوفك يقول مو ولد اخوي بعدين توه بيبي
بكرة لاكبر يصير نسخة ابوه واختك مالها فيه الا الشقا
اريج تطقها: وجعوه يالعوبا انا محد ينافسني بهالعايلة على
طولة اللسان الا انتي ما اعرف اسكتك
مشاعل: تجمعو ريا وسكينة .. لا تطاقو بالمستشفى احسن
يلا جوجو ناصر بيودينا ويرجع يجيب اغراض لندى
وراحو كلن لبيته .. والنفوس ارتاحت عقب ساعات من
الانتظار والخوف بس الحمدلله ربي يسرها...
من بكرة الكل جاي يزور ندى ...ويحمدون لها بالسلامة
ندى وهي تشوف ولدها اللي شايله ناصر: احد يصدق ان
هالنتفة تعبني ...
ام تركي: يمه مع التغذية والاهتمام بيزيد وزنه بس انتي
تعالي عندي وانا اللي بربيه لك
ناصر: لا وش دعوة خالتي ندى تقعد ببيتها
ام تركي: والله يمه ما ارتاح الا وهي عندي على الاقل
خل يشتد عظمها شوي
ندى: اي ناصر ابي اروح عند امي اسبوعين او 3
ناصر: ابشري .. بس تونا بأول يوم لا كتبو لك خروج
ربي يسهلها...
ام ناصر: وش نويتو تسمونه يمه؟
ناصر يطالع بندى ويضحك ( طول فترة الحمل وهي وياه
يتطاقون على الاسم هو يبي على ابوه وهي بعد تبي على
ابوها وفي الاخير اتفقو على انهم يختارون اكثر من اسم
ويسوون قرعة ) : بنسميه فارس
ام ناصر: عاشت الاسامي يابو فارس .. وعساه على البركة
ناصر: عاشت ايامك يمه
مرت الايام وطلعت ندى من المستشفى متوجهة لبيت اهلها
اللي كانو مجهزين لها غرفة تحت ...
والزيارات من اقاربهم وجيرانهم وكل معارفهم ماوقفت ..
واريج حاولت توفق بين هالضيوف ومشاويرها وروحاتها
للأسواق تبي تتقضى وتخلص خصوصا ان العد التنازلي
لزواجها بدا وكل اللي باقي شهر واسبوع ...
****************************
قاعدة بغرفتها تتصفح كذا موقع تشوف افكار لعرسها
اتصل فيها بندر وردت بلهفة: هلا والله
بندر: هلا بك حبيبتي شلونك؟
اريج: متمللة وزهقااانة
بندر: افا ليش؟
اريج: مادري كذا من الله ملل
بندر: بجي لك
اريج: وشو؟
بندر: ياربي من هالبنت مستحيل يصير لسانها حلو
قولي يالله حيه بينور البيت والله ياعمري انا مشتاقة
لك
اريج: ههههههههههههههههههههههه بسم الله شوي شوي
ترى الدعوة كلها اني تفاجأت
بندر: زين ماعلي فيك جاي جاي الله لا يعوق بشر
اريج: الله يحييك
بندر: لااااه؟ توك تقولينها
اريج: وانت تدور علي اي زلة؟
بندر: لا تقلبينها جد الحين قومي تجهزي لا اجي اشوفك
حوسة وشوشتك طايرة
اريج شهقت: مسكييييين انت بالعكس دايم شكلي حلو ومرتب
بندر: يقولون مداح نفسه يبي له رفسة
اريج: مالت عليك بس
بندر: هههههههههههههه لاتكونين زعلتي مزوح
ولا ما امون؟
اريج وهي بعدها مبرطمة : الا تمون اكيد
بندر: زين عيوني انا استأذنك الحين بخلص كم شغلة وجاي
لك
اريج: اوكي.... وسكرت منه وهي طايرة من الوناسة
واتصلت في عبير على طول: عبووور بندر بيجيني وابي
طريقة حلى سريع وكشخة
عبير: وحدة وحدة اروج عشان استوعب
اريج: ابي طريقة حلى كشخة اقدمه لبندر لانه بيجيني وبنفس
الوقت سريع لان ماعندي وقتي زين كذا؟
عبير: ايوا تمام بس ابغى اسألك عمرك شفتيني دخلت المطبخ
وسويت حاجة؟
اريج: لا والله
عبير: طيب ليش داقة عليه؟
اريج: من دلاختي .. بعدين ادخلي المطبخ لاهنتي وتعلمي السنع
ان شاء الله تبين فهود يجيب لك شغالة وانتي توك عروس
عبير اللي تموت بمكانها من تسمع طاريه: عارفة انك بايخة
اريج: ايه وادري بعد انك ثقيلة طينة والله يعين خالي عليك
عبير: هو يحصل له اصلا
اريج: اقول وخري بس مانيب فاضية لغرورك بروح ازين حلى
لزوجي العزيز
عبير: ههههههههههههههههه طيب وسلمي عليه
اريج: لا والله احلفي بعد
عبير: باي لا تطلعين لي مع السماعة تذبحيني
اريج تضحك على عبير وقامت ركض للمطبخ.. حاست شوي
بكتاب طبخ وشافت لها حلى سريع سوته وحطته بالثلاجة يبرد
وراحت غرفتها تبي تتسبح وتتكشخ قبل يوصل بندر...
مخلصة صار لها حول الربع ساعة وحضرته للحين ماشرف
وهي بطبعها ماتحب الانتظار ..
اما بندر طلع من البيت ومر على محل حلويات واختار لها كذا
شي يعرفها تحبهم ...وتوجه لبيتهم ..اتصل فيها يبلغها بوصوله
وهي راحت للباب ركض<<مطيورة
فتحت له الباب ودخل ...اول ماشافها وقف يناظرها وهي
انحرجت حيل من نظراته سلم عليها :شلونك عمري
اريج والحيا مقطعها : تمام ... ومد لها الصحن تاخذه : ليش
مكلف على عمرك؟
بندر مسك خشمها: وش هالرسمية الزايدة .. مافي شي يغلى
لعيونك
اريج سكتت وماعرفت ترد
بندر: بتخليني واقف على الباب يعني؟
اريج: لا حياك تفضل
قعدو بالمجلس وبعدها بشوي راحت اريج تجيب العصير وكلمت
الشغالة بعد ربع ساعة تجيب لهم القهوة...
بندر: محلوة اليوم
اريج: بندر عن هالسوالف عاد ترى بقوم الحين
بندر: اول مرة بحياتي اشوف بنت ماتحب الكلام الحلو
اريج: ادري فيك مستقصد تحرجني
بندر: لا والله ياقلبي اعبر عن اللي اشوفه.. وهي نزلت عينها
مو قادرة تطالعه
بندر مسك يدها وقعد يلعب في اصابعها .. : اروج ناظريني
اريج تطالع اي شي الا هو
بندر: عشان خاطري ولا مالي خاطر عندك
التفتت له وجات عينها في عينه ... وضاع بعيونها .. اريج حلوة
لكن مو ذاك الجمال الصارخ بس ربي وهبها عيون تسحر ..واسعة
وناعسة وكحيلة ...قرب منها وباس خدها
وهي على طول بعدت عنه وطقته بكتفه : بندر عن هالحركات
بندر: هههههههههههههههههه وربي اشك اني متزوج بنت
اريج: تبيني اخليك على راحتك عشان تقتنع اني بنت .. لا حبيبي..
بندر انسبه من قالت حبيبي وذاب فيها وهو يسمعها من صوتها
وبدون شعور: الله تجنن منك تكفين عيديها
اريج استغربت هذا وش فيه استخف: اي اجل وش رايك تبيني
اخليك تسوي اللي تبي<<مايحتاج تعرفون لسانها طويل
بندر: ادري والله الكلام الحلو مايطلع الا غلطة ومسكها من يدها
وضغط عليها بقوة وصرخت بأعلى صوتها: يممممممممه
وبهالوقت دخلت عليهم الشغالة جايبة القهوة
بندر: الله رحمك ولا كان خبرك بكرة بالجرايد
اريج: ههههههههههههههههه يقال لك مخوفني.. هذاك اول الحين
ماعاد تخوفني
بندر: احلفي عاد؟ ومن اللي تو تستفزع بأمها
اريج تفشلت: اولا مو خوف .. بس لانك آلمتني بيدي
بندر: آسف ..
اريج: زين سامحتك
بندر: ههههههههههه صبي قهوة بس<<ماعندهم رومانسية ابد
تحسونه قاعد مع واحد من اخوياه
وقعدو يسولفون لحظات ودخل عليهم خالد: السلام عليكم
بندر: وعليكم السلام خير ياطير الواحد ماياخذ راحته مع زوجته؟
خالد: الله والراحة بعد اللي يشوفكم يقول كناري تهامسون وانتو
صوت طقاقكم لآخر الشارع ولا شايفك يوم دخلت عليكم ماسك
يدها وتناظر بعيونها هذاك قاعد وهي تصب لك القهوة وسوالف
اريج هنا فقعت ضحك.. اما بندر يبرر: ياخي من اختك كل ما
صرت رومانسي تصارخ يمه يمه
خالد: بعدي اختي تبي تصير رومانسي لاصارت ببيتك
بندر: ياكرهك والله.. انا مادري ليش ما اتعظت من غثاك
مادريت ان اختك نفسك
اريج: انا غثيثة؟
بندر حاول يرقعها: من قال؟
اريج يقال لها زعلت : مالت عليكم اثنينكم اعرفكم لا اجتمعتو
تحبون تنكدون علي وجات تبي تطلع لحقها بندر: تعالي والله
نمزح
بس اريج راحت ركض وطلعت من المجلس رايحة لغرفتها
بندر انقهر من دفاشته وراح لخالد: عاجبك اللي صار يعني؟
خالد: انا ماقلت شي انا حشيتكم اثنينكم انت اللي تلقفت وغلطت
عليها
بندر: ياخي اختك مدري شلون تستانس .. اجيها كذا مايعجبها
وكذا بعد مايعجبها
خالد: والله اريج حبوبة وقلبها طيب بس دلوعة شوي وانت عاد
تحملها
بندر: وانا وش مجنني الا دلعها
خالد: اعرفها عنيدة ماراح تجيك بس حاول تكلمها وبترضى على
طول
بندر: زين توصي شي؟
خالد: اي اعزمني على كوفي ودي اطلع
بندر: لعنبو ابليسك قول انا اللي بعزمك بس ماعليه قوم قوم
خالد: انا ادري ولا وش فايدتك نسيب على الفاضي
بندر: ههههههههههههههههههه مابي اقول شي اخاف اريج تسمعني
وتزعل زود
خالد: والله خطيرة اختي صارت تخوفك
بندر: اراعي مشاعرها مو اخاف منها
خالد: اي صادق بس خلنا نمشي.......
وطلعو من البيت وعيون اريج تتبع بندر وتدعي له من قلبها ربي
يحفظه ويخليه وين مايكون.......
***************************
قبل زواج اريج بأسبوع غرفتها صايرة حوسة من الاغراض
والاشياء اللي شرتهم .. واغراضها القديمة اللي ودها تتخلص
منهم وخواتها وبنات عمها كل شوي تجيها وحدة تساعدها
اليوم طلع فستانها ... بعد ماصار كل شي تمام ...
ندى: اروج يجنن وربي طالعة تاخذين العقل
اريج: والله ندوش؟ مو دفش...
ندى: لا والله بالعكس يجنن
اريج: ادعي لي ندى وربي خايفة
ندى: لاتخافين ولا شي استمتعي بليلتك وعيشيها بكل تفاصيلها
وربي بعدين تتمنين تعيشينها من جديد
اريج بدلت ولبست بيجامتها ...: هاتي فروس ياحبي له
ندى: اريج بالله شوي شوي عليه
اريج: زين تراك ذبحتينا فيه ماكأن وحدة ولدت غيرك
ندى: ههههههههههه ياويلي خبلة مدري متى تعقلين
................./ بووووووه
ندى واريج اخترعو: يممممممه
فاتن: ياربي مرة رقيقات
اريج: وجع تبين توقفين قلبي؟ ترى وراي عرس ابي افرح
بعمري زهقت مليت من العزوبية
فاتن: وش تبين بالعرس ماوراه الا الهم
اريج: هذا انتو يالمتزوجات كل وحدة تقول هم ولا جا حبيب
القلب طرتي معاه
فاتن: قاهرتني والله
ندى: من هي؟
اريج: من بعد اكيد غلا
فاتن: اي هي عسى ربي يشيلها وارتاح
ندى: استغفري ربك الله يحفظها لولدها( غلا مرة سعود الثانية
جابت ولد سموه بدر )
اريج: ليش وش مسوية؟
فاتن: طالعة هي وياه مدري وين راحو
ندى: زين هذا يومها وهو حر يسوي اللي يبي
اريج: الحمدلله والشكر استخفت وقعدت
فاتن: اللي رجله بالنار مو مثل اللي رجله بالماء
ندى: فتون انتي تبين تنكدين على عمرك انا ما انكر انه شي
يقهر بس خلاص صار وانتهى ومابيدك تغيرينه حاولي تتقبلين
او لا صار عندها اشغلي نفسك بأي شي
فاتن: آآآآآهـ وش اشغل نفسي فيه ... لا ولد ولا زوج الله
يعوضني بس
ندى تحسفت على كلامها: فتون ياعمري ربك مايترك عباده
وان شاء الله ربي يعوضك
فاتن: خلاص قفلو على الموضوع مابي انكد على اروج
اريج راحت لاختها وحضنتها: بعد عمري فتون الله لا يحرمني
منك
ندى نطت لهم : وانا؟
اريج: ههههههههههههه وانتي بعد
****************************
دخلت عليها بالغرفة المخصصة لها لقتها متوترة ومررفوع
ضغطها مليون : خير خير ليه معصبة ؟
اريج: نرفزوني وربي كل واحد يقول كلمي الثاني
عبير: ليه ايش ناقصك؟
اريج: المسكة محد جابها وانا اعصابي خلاص تلفت
عبير:كلمتي مين طيب
اريج: كلهم كل واحد يقول مو مخلي ابوي وخالد يقول
اخوياي بستقبلهم وبعدين بروح
عبير وهي مستحية : طيب كلمي خالك
اريج بدون ماتنتبه << اللي شاغلها اكبر ولا ماتفوت عليها
ابد: اييييييييه فهود وين راح من بالي... ودقت رقم خالها
اللي جاها صوته فرحان: هلا بالعروس هلا والله
اريج: فهود طلبتك تكفى
فهد: عيوني لك آمري بس
اريج: المسكة ابي احد يجيبها وكلهم مشغولين
فهد: يووووه اروج مشوار
اريج: مو انت واعدني لا صار اللي ببالك اي شي اطلبه
تلبيه؟
فهد: ما اقدر اقول شي مسكتيني مع اليد اللي تعورني
ابشري يابنت عبدالعزيز غالية والطلب رخيص
اريج: ياااااارب يسعدك فهود ويحنن قلب عبورة عليك
وتخلي العرس بعد شهر
فهد من قلب :آآآآآآآمين.. زين باخذ عنوان المحل من خالد
ورايح
اريج: فهود تكفى لا تتأخر
فهد: ابشري .. الا اروج
اريج: هلا
فهد: وينها فيه؟
اريج: عندي
فهد: شلون طالعة ؟ اكيد قمر
اريج: فهد ترى بتتأخر .. روح بعدين اعلمك
فهد: ايه انصبي علي بعدين لا جاك بندر تنسين ابوك مو
عاد خالك .. فمان الله بس
اريج التفتت على عبير: يسأل عنك
عبير توردت خدودها : تسأل عنه العافية
اريج: عبير تعالي شوفي لي الطرحة من ورا احسها مو
ثابتة
عبير: اروج ما اتذكرك موسوسة كذا والله شكلك حلو
مر الوقت بين توتر اريج .. ودخلات البنات عليها ...
عبير اللي رجعت لها وجلست جنبها شافت جوالها يدق
وشافت المتصل اللي خفق له قلبها : اروج تعالي ردي
اريج اللي كانت تتصور ومو فاضية. ردي انتي
عبير: لا ما اقدر هذا فهد
اريج: اكيد جاب المسكة .. ياربي من يجيبها هاتيه بس
خليني اكلمه: هلا فهد
فهد: هذاني واصل شلون اجيبها لك
اريج: ماينفع تجيني البنات معاي بشوف وحدة من البنات
تاخذهم منك
فهد: ارسلي لي عبير
اريج: هذا اللي ناقص بعد.. والتفتت لغادة: غدو حبيبتي فهد
جايب المسكة تكفين جيبيها
غادة : زين بس انتي اركدي خلي المصورة تعرف تصورك
وراحت تجيب المسكة فهد اول ماشاف غادة حب يستهبل
عليها شوي: الحين انا طالب الورد يجي ياخذ الورد يجيني
الشوك؟
غادة: ماجيت عشان سواد عيونك جيت عشان اروج حبيبتي
ولا الورد حامض على بوزك تشوفه
فهد: هههههههههههه متعمدين كلكم تقهروني يعني
غادة وهي تاخذ المسكة منه : انت اصبر وهي بنفسها بتجي لك
فهد: ياااارب متى هاليوم بس
********************
وش هالنهار اللي طلع
والليل توه يالحضور
وش هالصباح اللي بدى
بالشمس والدنيا ظلام
لا لا ابد ما هو نهار
ولا صباح شق نور
هذي عروستنا (اريج)
مقبلة والليل شاب..
جت بالصباح العذب
وأهدت ليلها أبهى حضور
وجت بالنهار وكنها
تمشي على هام الغمام
خطوة خجل خطوة دلع
خطوة ترف خطوة غرور
خطوة تزيد الصمت صمت
وتجعل النظرة كلام
نزلت كأجمل عروس بأجمل ليلة والعيون كلها تناظرها
كانت السعادة تشع من عيونها ... وصلت لمكانها المخصص
لها والتفتت شافت كل اللي تحبهم حولها ... خنقتها العبرة
وهي تشوفهم وتشوف فرحتهم فيها ... كل شوي تجيها وحدة
تسلم عليها...والبنات انهبلو على شكلها الحلو ...
نزلو البنات بيدخلون الرجال ولبسو عباياتهم وقعدو تحت الا
خوات اريج كانو معاها بالكوشة بس مبعدين شوي عنها
دخل بندر وابوه وابو تركي وخالد وفهد ...
عبير ماصدقت نفسها وهي تشوف فهد مانزلت عينها عنه
فهد اللي يوم قرب منهم دورها بعيونه وشافها تناظره
وابتسم لها اما هي على طول نزلت عينها ..وارتبكت
ويهيأ لها من ارتباكها ان كل العيون كانت تراقبها وماكانت
تدري عن العين اللي من دخل فهد وهي تراقبها ولاحظت
نظراته لها......
قرب بندر وسلم على اريج: الف مبروك يالغالية
اريج: يبارك بحياتك
مسك يدها ووقف جنبها وجاها ابو بندر يسلم عليها وهنا
كانت بقمة احراجها من كبرت ماشافته وهذي اول مرة تشوفه
وتجمعو الكل حولها يسلمون ويباركون ...
كانت ليلة من احلى الليالي ... مايعكر صفوها الا وجود
رهف اللي كانت تحترق بداخلها قهر من شافت فهد يناظر
عبير .. هو قال لها انه خطب بس اليوم توها شافت اللي
خطبها...( رهف تصير بنت خالة سجى صديقة اريج )
طلعو كلهم وبقى بندر مع اريج ... وبعدها بشوي قام بندر
وقامت معاه اريج ... لبسوها عباتها وسلمو عليها خواتها
وامها وودعوها وبقلوبهم دعو ربي يوفقها في حياتها....
عند السيارة واقف خالد وفهد مع بندر يسلمون عليه ..
خالد: الله الله بإختي .. وانتبه لايجيني كلام بيوم انك مزعلها
تراها الغالية
بندر : اريج بعيوني والله
ودعوهم وركبو السيارة متوجهين للفندق يسوق فيهم فهد
فهد: وين ناوين تسافرون ان شاء الله؟
بندر: نقول تركيا بإرادة الله
فهد: حلو ماشاء الله .. اهم شي وناسة اروج
اريج كانت مكتفية بالصمت بحكم توترها ...وصلو الفندق
ونزل بندر . وجا لأريج يساعدها تنزل... مسك ايدها ونزلها
وطلعو جناحهم ...
بندر كان طاير من الفرحة : تفضلي
اريج دخلت الجناح وهي مستحية ووقفت مكانها وهي تتأمل
الجناح بندر حس بارتباكها الواضح وماحب يحرجها اكثر
يبيها تاخذ راحتها : هذي الغرفة والحمام(وانتو بكرامة)داخلها
انا بنزل اجيب باقي الأغراض من فهد.
اريج: طيب
طلع بندر وراحت لغرفة النوم وتذكرت الشنطة اللي فيها ملابسها
وراحت تاخذها من الصالة ... فتشت بقمصان النوم اللي حطوها
لها خواتها وهي تتحيسب عليهم ... دورت ولقت استر قميص
وخذت الروب وراحت للحمام ...تسبحت وطلعت وقفت عند
التسريحة تجفف شعرها ... حطت ميك اب ناعم ابرز ملامحها
وكحلت عيونها الواسعة ... وابرزت جمال شفايفها بقلوس فوشي
لماع.... بخت من عطرها على كامل جسمها ... راحت للباب
وهي مستحية تطلع .. طلت من الباب ماشافته بس شافت شنطته
يعني اكيد حط الاغراض ونزل ... انسدحت بالسرير تنتظره
يناديها للعشا .. ولانها مرهقة ماهي الا دقايق وغطت بنوم عميق
بندر رجع بعد ما نزل يعطي فهد اوراق عشان يأكد موعد رحلتهم
بعد ماكلمه يرجع له للفندق مرة ثانية وطلع ينتظرها تطلع له
بالصالة ... ويوم تباطاها قرر يروح لها طق باب الغرفة على
خفيف بس ماسمع رد.... فتح الباب وشافها نايمة على السرير
بدون غطا ... انقهر من قلب وكان وده يكفخها ويصحيها بس
ماهانت عليه خصوصا وهو يشوف شكلها البريء...قرب منها
حبها على خدها وغطاها .. وراح يتسبح ..طلع من الحمام وبدل
ونام جنبها ....
الساعة 9 الصباح تقريبا ... تقلبت على السرير وفتحت عيونها
بالبداية استغربت المكان اللي هي فيه ومجرد ما التفتت يمين
وشافته وهي تفز قاعدة... ( ياربي وش صار؟ انا شلون نمت)
حاولت تتذكر وعصرت مخها وآخر شي توصلت له انها كانت
تنتظره ونامت قبل يجي... التفتت له شافته مبتسم وحاط يدينه
تحت راسه ويطالعها: نايمة جنب جني؟
اريج ارتبكت وحاولت تغطي نفسها بأي شي مع انها لابسة
قميص طويل بس حست انها مو لابسة شي من نظراته لها
سحبها له وضمها على صدره :صباح الورد
اريج ابتسمت تخفي توترها: صباح الفل
بندر: الحين فيه زوجة بالدنيا تنام بليلة زواجها قبل يجي
زوجها؟
اريج: كنت مرهقة وتعبانة (وقالت بإحراج) وانتظرتك وما
حسيت بنفسي الا الحين
بندر: بس انا زعلان
اريج: من جدك عاد؟
بندر: اي من جدي ولا راح ارضى الا بشرط
اريج وهي تضحك وكأنها عارفة وش ناوي عليه : وشو
بندر يأشر على فمه: ابي بوسة
اريج شهقت : لا لا لا مابي وحاولت تقوم بس كان ماسكها
بقوة ومو معطيها اي مجال للهرب
ضحك بندر على شكلها : زين بوسيني على خدي واسامحك
شوفيني تنازلت لازم انتي بعد تتنازلين
اريج وخدودها حمر من الاحراج : طيب غمض عيونك
بندر غمض عيونه شوي وهو يسترق النظر لها واريج
انتبهت له : لا غشاش غمض زين
بندر: هههههههههههههه يالله
قربت منه وباسته على خده بسرعة وحاولت تبتعد عنه
بس هو سحبها له وضمها اكثر وماترك لها اي مجال
للمقاومة ......
****************************
بعد زواج اريج بأسبوع .. اجتمع ابو تركي بعياله وفهد
بعد ما اتخذ قراره انه يسلم لهم كل اشغال الشركة
ويكتفي هو بالإشراف عليهم... خصوصا بعد ماكبرو
وصار يقدر يعتمد كليا عليهم ...
ابو تركي: مثل ماتعرفون انا كبرت وماعاد فيني شدة على
الشغل مثل اول .. وانتو ماشاء الله اقدر اعتمد عليكم
تركي: انت الخير والبركة يبه
ابو تركي: بس يابوك مابقى بالعمر كثر اللي راح وانا ابي
ارتاح بهاللي بقالي من عمري
تركي: لك طولة العمر يبه
ابو تركي: يابوك انا مجمعكم ابي اقسم عليكم الشغل وانتو
ان شاء الله ما انتم مخالفين معاي... انت ياتركي راح تكون
المدير العام للشركة واي قرار يصدر او مناقصة انت المسئول
الاول عنه.. وانت ياخالد بتكون المدير الاداري اللي راح تكون
مسئول عن جميع الأقسام وتساهم في القرارات الإدارية
اما انت يافهد راح تكون المدير المالي وكل المعاملات المالية
بتكون تحت تصرفك ... كذا راضين؟
فهد: مابعد كلامك كلام يا ابو تركي
ابو تركي: اي شي تختلفون حوله يرجع امره لي وانا انهي
هالخلاف بإذن الله
تركي: ان شاء الله ماهنا خلاف يالغالي
ابو تركي : الله يخليكم ويحفظكم ... باقي الموظفين راح يبقون
بوظايفهم ... ومراكزكم انتو غطوها بأي موظف تشوفونه
يستحق هالمراكز..
تركي: ان شاء الله
ابو تركي: وصل كلامي كله؟
تركي: اكيد ومثل ماتبي
ابو تركي التفت لماجد اللي قاعد معاهم بدون مايتكلم:ماجد
ماجد: سم يبه
ابو تركي: متى تبي تريحني وانا ابوك؟
ماجد: افا يالغالي وش انا متعبك فيه؟
ابو تركي : حالك هذا متعبني
ماجد اللي فهم قصد ابوه: يبه واللي يخليك انا مرتاح
ابو تركي: ولمتى وانت ماتفكر الا بنفسك؟ مافكرت بأمك
اللي شايلة همك؟ وانا اللي كل ماشفتك ضاق صدري ..
خلنا انا وامك مافكرت ببنتك اللي تبي من يربيها .. امك
وكبرت وخواتك كل وحدة ببيت رجلها وهي تبي من يقابلها
ماجد: يبه تكفى
قاطعه ابو تركي: انا خليتك من اول على راحتك بس وضعك
ماهوب عاجبني انت بشغلك وبنت كاسرتن خاطري تبي من
يشوفها ويداريها
ماجد: زين انا اوعدك بفكر بس انت لا تضغط علي
ابو تركي: والله ياوليدي مابي الا مصلحتك
ماجد: ان شاء الله يبه بس عطني وقت افكر
كملو جلستهم سوالف وضحك ووناسة ......
*********************************
طالع من الدوام ورايح للبيت ... ازعجه جواله اللي
صاير يدق باستمرار وقرر يرد هالمرة : يانعم
...............: فهد؟
فهد: اي فهد وش عندك؟
رهف: فهد ليش تسوي فيني كذا؟
فهد: رهف رجاءً ماني ناقص قلق... قلت لك اني خاطب
وكلها شهرين بالكثير واملك
رهف: شلون يعني؟
فهد: يعني انسي فهد
هنا رهف بدت تصيح : فهد والله ما اقدر انساك شلون
تبيني اعيش حياتي من دونك
فهد: رهف وبعدين؟
رهف: ليش كذبت علي؟ ليش قلت لي انك تحبني وماراح
تتزوج الا انا؟ ... كل اللي رفضتهم عشانك وعمري اللي
راح وانا انتظرك مايسوى عندك شي؟
فهد: اوووف ترى محد طقك على يدك وقال صدقيني
وبعدين انتي ماتناسبيني ... اللي تناسبني لقيتها
رهف هنا عصبت من تذكرت نظراتهم لبعض بعرس
اريج:وش فيها زود عني؟
فهد ببرود يقهر: كلها زود عن كل البنات مو بس انتي
جمال ودلال وعزة نفس... يعني ماترمي نفسها على احد
وافهم يافهيم
رهف انقهرت منه: وش تقصد؟
فهد: ما اقصد شي ورجاءً لا عاد تتصلين فيني
رهف زاد صياحها : فهد والل يسلمك بس اسمعني
فهد: مابي اسمع شي انا وصلت البيت وابي انام يعني
لاتزعجيني ورقمك لا اشوفه فهمتي؟
رهف : بس فهد
فهد: يالله مع السلامة ... وسكر بوجهها بدون مايسمع
باقي كلامها ...
نزل من سيارته ودخل البيت وهو ضايق صدره حيييييل
لقى امه قاعدة بغرفتها دخل عندها ودنق حب راسها
وقعد جنبها : شلون الغالية؟
ام فهد: والله يمه احس راسي يدور فيني ...
فهد: تبين اقيس لك الضغط؟
ام فهد: ياليت يمك
قام فهد يجيب جهاز قياس الضغط وقاس ضغط امه لقاه
مرتفع شوي : يمه وش صاير؟
ام فهد: ولا شي يمه والله من قمت من النوم وهذا حالي
فهد: هذا من عشاك البارح انا قايل لك ملحه زايد بس
انتي ماطاوعتيني
ام فهد: الله اللي كتب وانا امك
فهد: اي يمه بس انتي بعد احرصي على نفسك تراك غالية
ام فهد: ابشر وانا امك هات لي دواي ابي ارقد شوي
راح فهد جاب لها حبوب الضغط وكاس موية : سمي يمه
ام فهد: الله يوفقك يمه ويفرح قليبي فيك
فهد: ادعي لي يمه تكفين
ام فهد: والله اني كل ماقمت وقعدت دعيت لك
فهد: الله لا يحرمني منك
حب راس امه وطلع غرفته ومايدري ليش يحس بضيق
في صدره ......
**********************************
توهم رجعو من برا وداخلين الفندق .... اريج سبقت
بندر تتسبح بس بندر لحقها ومسكها : اقعدي انتي
اعرفك لا سبقتيني بتنامين
اريج: هههههههههههههه لا والله جوعانة ابي آكل
بندر: زين بتسبح وعقب بطلب لنا شي ناكله
اريج رضت بكلامه وطلعت بالصالة ... فتحت التلفزيون
وقعدت تقلب بالقنوات ومو عاجبها شي ...
راحت للثلاجة وخذت لها سنيكرس وقعدت تتسلى فيه
وتفشلت يوم قال لها بندر: ماقدرتي تصبرين الين اطلع؟
اريج: والله جوعانة
بندر حس انه احرجها: عليك بالعافية يارب انا بعد ميت
جوع روحي تسبحي وبدلي تلقين العشا جاهز
اريج قامت بسرعة: زين
بندر: حبيبتي
اريج: هلا
بندر: وش تبين اطلب
اريج: اللي تبي تاكله جيب لي نفسه
بندر: زين لا تطولين اخاف تجين ماتلقين شي
تريج: ههههههههه ياويلك كان اخليك تنزل تجيب لي
بنفسك
ضحك عليها بندر ...
بعد نص ساعة طلعت له اريج وهي لابسة فستان سماوي
شيفون ...ولامة شعرها على فوق ومنزله خصل على وجهها
حاطة قلوس وردي وماسكار على رموشها
قعدت جنبه : يمممممي ريحة الأكل تجنن
بندر: سمي بالله
اريج: بسم الله وبدت تاكل ... للحين اريج تستحي من بندر
وماتقدر تتصرف بحرية كثير خصوصا وهي تشوف نظراته لها
اللي تحس انها مقيدتها ومو مخليتها تاكل وتتصرف باريحية
بندر يقرب لها الشوكة يبي يأكلها وهي تضحك
اريج: هههههههههه بندر
بندر : عيونه... ذوقي هاللقمة من يدي بس
فتحت فمها وكلت من يده ... قرب منها وباس خدها وهمس
بكل شوق ووله: احبك
اريج استحت ونزلت راسها ..
بندر: تكفين قوليها
اريج: بعدين
بندر: كل يوم تقولين بعدين ... عشان خاطري ابي اسمعها
اريج: اممممم بقولها لك لا صرنا بالغرفة
بندر: وش معنى ؟
اريج: بتكون الغرفة ظلام اقولها لك بدون ماتشوفني
بندر: الظاهر اني متزوج جنية ماتبوس الا بالظلام ولا تقول
كلام حلو الا بالظلام بعد..
اريج: انت وش سالفتك مع الجن ... ترى اخاف
بندر: هههههههههههه امزح ياقلب بندر انتي
كملو عشاهم وبندر كان مستعجل يبيها تخلص بسرعة عشان
يسمع الكلمة اللي صار له فترة يطلبها تقولها له وهي تتغلى
عليه ... اما اريج اللي شبعت وقعدت تتغصب بالأكل تبي تولع
بندر وتخليه ينتظرها اكثر
بندر وهو يطالعها : احس الدعوة صارت عناد
اريج فطست ضحك: هههههههههههههههههههههه
بندر شالها وهو يضحك : بتقولينها غصب عنك
اريج تصارخ: بندر نزلني تكفى اخاف اطيح
بندر: مانيب منزلك الين اسمعها
اريج: والله لاقولها بالغرفة ..
بندر: لا تقولينها الحين ولا تحملي اللي يجيك
اريج خافت من بندر تعرفه عنيد مثلها : بندر تكفى نزلني
بندر: قلت مانيب منزلك يالله بسرعة .. وصار يدور فيها
يبي يخوفها وهنا بدت تصارخ وخافت تزيد عناد ويزيد
هو تهور غمضت عيونها : احبك بندر والله احبك
بندر طار من وناسته : وشو ؟
اريج: قلتها
بندر: وش قلتي ماسمعت؟
اريج بهدوء ونعومة : احــبــك
بندر ذاب فيها راح فيها الغرفة وهو شايلها ومازل تحت
تأثير كلمتها اللي ذوبته على الآخر
***************************
اليوم اول ايام شهر رمضان المبارك .... وباقي شهر ويوم
على ملكة عبير وفهد اللي تحددت بثاني ايام عيد الفطر...
ابو تركي اقترح على زوجته سارة يخلي الملكة ببيته الثاني
لانه اوسع واكبر وهالبيت ماراح يكفي معازيمهم بس ام عبير
اعترضت ماتبي احد يعكر عليها فرحتها ببنتها ...
واتفقو بالآخر تكون الملكة بمزرعتهم لانها واسعة حيل وراح
تكفي كل معازيمهم خصوصا ان اخوان سارة جايين
وكلمو عبير اللي عجبها الاقتراح ورضت فيه خصوصا ان
مزرعتهم مو ذاك البعد عن الرياض .....
وفهد اللي رضى باقتراحهم واكيد اللي يريح عبير يريحه
وصار يعد الأيام والليالي ينتظر اللحظة اللي راح تجمعه
مع حب حياته ووقته كله يتخيلها وهي جنبه ...
ببيت ابو تركي مجتمعين كلهم على فطور مسويه للكل
جامع عياله وبناته وام فهد وفهد...
عبير اللي من شافت ام فهد داخلة عليهم فز قلبها وتمنت
من الله انها تلمحه لو طيف بس..
نفس الشعور كان يراود فهد اللي جاي هالمرة وهو واثق
انها له وكلها ايام وتكتب زوجته .... والشوق يسبق خطواته
للي يفصل بينه وبينها بضع خطوات ...
ومبين عليه هالشوق بسرحانه وشروده . اما خالد وبندر
استلموه تعليقات وضحك...
خالد: كلها كم يوم وتشوفها ترفق بعمرك بس
فهد عرف انهم يقصدونه والتفت عليهم : احد قال شي
الحين؟
خالد: مسوي مو هامه وهو بغى بتجنن علينا يوم قلنا
له مافي عرس الا بالصيف
فهد: ها ها تصدق انك ظريف.. وقام من عندهم
تركي وهو يضحك: ههههههههههههه اول مرة اشوف
فهد ينحرج بس تراكم زودتوها شوي
بندر: لا زودناها ولا شي احنا دايم كذا بس هو صاير
حساس
ابو تركي قطع عليهم سوالفهم : خلو عنكم هالكلام الفاضي
وروحو جيبو الفطور الأذان مابقى له شي
قامو العيال يجيبون الفطور من المطبخ وقامو البنات
يجهزون الفطور .. وقامت عبير بس استوقفها صوت ام
تركي: على وين؟
عبير: بروح اجهز الفطور مع البنات
ام تركي: اقعدي انتي اكيد فهد جاي معاهم
عبير قعدت بدون اي اعتراض مع انها بداخلها ملايين
الاحتجاجات ... ودها تشوفه وتكحل عينها بشوفته
وفهد كان يمني النفس انه يلمحها ولو بالغلط بس للأسف
ماشاف بالمطبخ الا بنات خواته ....
افطرو وصلو وقعدو يكملون فطورهم وكل سوالفهم عن
ملكة فهد وعبير وتخطيطاتهم ومن يبون يعزمون ...
اريج: انا مو عازمة من صديقاتي الا سجى هي اقرب وحدة
لي
عبير: لا عادي اعزمي اللي تبغين
اريج: المعازيم كثير ومايحتاج اصلا علاقتي بباقي البنات
مو ذاك الزود
فاتن ولأول مرة تكلم عبير بأسلوب حلو: هالحين انتي وش
ناقصك؟
عبير استغربت ان فاتن تكلمها بدون هواش وردت عليها
وهي مبتسمة : ولا حاجة انا مخلصة من بدري اشياء كثير
بس انتظر فستاني يطلع .. قلت ابغى اخلص قبل رمضان
احسن ماودي رمضان كله يروح في الاسواق
فاتن: زين ماسويتي والله هذا شهر عبادة
ندى اللي مزهقها فارس بصياحه : اووووف طفشني
ام فهد: هذا انتم يابنات الحين كل شي تتشكون منه
ندى: يمه والله زهقني ماعرفت افطر ولا اصلي
ام فهد: ولدتس بعد من له غيرتس؟ مادامكم ماتتحملون
ليش تجيبونهم
فاتن: ياليته يجي يمه راضية بهمه وصراخه والله لو
يحرمني نومي راضية بعد ... ودمعت عينها
الكل تضايق من كلام فاتن... والبنات نزلت دموعهم من
كلامها...
ام فهد: وش هالكلام يمه .... ادعي ربتس احسن لتس
من هالكلام اللي لا يودي ولا يجيب
ام عبير: فاتن لا تبكين هذي حكمة ربي وماتدرين وين
الخيرة فيها ... وامر المؤمن كله خير,,, شوفيني انا
ماجبت الا عبير وقد ماحاولت وتعالجت اجيب غيرها بس
ربي ماكتب لي رغم انه مافيني حاجة
فاتن: بس على الأقل عندك عبير .. والله اني ابي لو واحد
بس نفسي اسمع كلمة ماما نفسي احس باحساس الأمومة
اللي انحرمت منه..
ام تركي: الله كريم وانا امك وعساه يعطيك ولا يحرمك بحق
هالشهر الفضيل
الجميع : آآآآآمـــين
********************************
على الساعة وحدة كلن راح لبيته .. عبير وامها استأذنو
الكل طالعين ولأول مرة يكون الجو هادي وماصار تنغيز
بالكلام مثل بالعادة ...يمكن لأن ام تركي تحاول تتقبل عبير
بحكم انها بتصير مرة اخوها ..
مشت طالعة من باب البيت تبي تروح لسيارة خالد اللي راح
يوصلهم لبيتهم ...واللي تمنته صار او بالأصح اكيد هو
ينتظرها شافته واقف مع خالد اخوها اللي معطيها ظهره
... انحرجت وماعرفت شلون تكمل طريقها ..
مشت بخطوات مستحية وامها لاحظت نظرات فهد لعبير
اللي يسترقها كل ما انشغل خالد عنه ....
ام عبير يوم قربت منهم: السلام عليكم
خالد+ فهد: وعليكم السلام
فهد: شلونك خالتي؟
خالد : ههههههههههه من الحين مسوي فيها احترام
وتقول خالتي
عبير ماتت ضحك على اخوها وفهد حس انها قاعدة
تضحك .. اما ام عبير عرفت انه انحرج وقالت وهي تناظر
خالد بنظرات عتاب : الحمدلله بخير انت كيفك
فهد: بخير بشوفتكم
خالد: طيب ممكن توخر عن السيارة لو سمحت؟
فهد مشى مبتعد عن السيارة رايح لسيارته ... بعد ماترك
امه ببيت اخته لانها نامت مبكر
عبير كانت مبسوطة ومستانسة .... صحيح انها لمحته
بس ارتاحت بشوفته وسماع صوته .. والحب اللي بداخلها
تحسه اكبر واعظم .....
وهم بالسيارة سوالف حبت عبير تنفذ اللي ببالها واللي
فكرت فيه من فترة والباقي على خالد: خالد بعد ماتوصلنا
فين بتروح؟
خالد استغرب سؤالها بس رد بتلقائية :اكيد البيت
عبير: طيب انا ابغاك في سالفة مهمة
خالد: خير ان شاء الله؟
عبير: لا تخاف مافي حاجة اذا وصلنا البيت نجلس بهداوة
ونسولف
ام عبير: يعني بيضايقكم وجودي؟
عبير باندفاع: لا ياماما من جدك انتي ؟ اصلا انتي عارفة
الكلام اللي بقوله
ام عبير تذكرت موضوع عبير اللي تبي تفاتح خالد فيه
وابتسمت : اهااا ان شاء الله ربي يوفق الجميع
وصلو للبيت ودخلو .... قعد خالد بالصالة وراحت عبير
للمطبخ : خلود تبغى قهوة؟
خالد: من بيسويها؟
عبير: انا
خالد: لا فكيني من شرك تبيني اتسمم
عبير: ياويلك من ربي ليه كذا تحطم طموحي انا قاعدة
اتعلم الطبخ
خالد: وماشاء الله تعلمتي تطبخين قهوة
عبير: يالله مرررررة بايخ
ام عبير: ههههههههههه انا بسويها بس روحي بدلي
وتعالي اجلسي مع اخوكِ
خالد: لا وش تبدل تعالي اقعدي الحين علميني وش عندك
عبير: كل خير ان شاء الله ... اممممم تبغى جلكسي؟
خالد: اووووف عبور ليش هالبرود؟
عبير: وانت ليه معصب.. على العموم ماراح انرفزك اكثر
ماقلت لي متى تبغى تتزوج؟
خالد يناظر عبير باستغراب: وشو؟
عبير: يعني متى مخطط انك تتزوج وتستقر بحياتك
خالد: تبين الجد؟
عبير: اكيد
خالد : بصراحة بالفترة الأخيرة صرت افكر بهالموضوع
كثير...
عبير: في بالك وحدة معينة؟
خالد: لا والله ماحطيت وحدة ببالي...
عبير: طيب شرايك انت انوي بس وعروستك عندي
خالد: ومن هي هذي؟
عبير: شهد صديقتي
خالد: اي شهد؟
عبير: وانا كم عندي صاحبة اسمها شهد هي وحدة
وانت اكثر من مرة وصلتها معايه
خالد: اييييه عرفتها ..بس وش الطاري
عبير: بقول لك بصراحة مو عشانها صاحبتي بس
والله الكل يشهد بأخلاقها العالية ... انسانة مثل العسل
قلبها مايعرف الكره والحقد ابدا ...
خالد اللي صار عنده نوع من الفضول يعرف عنها
اكثر: حلوة؟
عبير: قمرررر والله.. يعني انا راح اختار لك وحدة اقل
منك...خلود والله ماراح تندم وانا لو ماحسيت انك بتكون
مبسوط معاها مافاتحتك في الموضوع وتركت لك انت
الخيار .. بس والله من زمان اتمناها لك
خالد: بصراحة فاجأتيني بهالموضوع ومادري وش
اقول اصلا
عبير: لا تقول ولا حاجة انت خذ راحتك وفكر في
الموضوع من كل النواحي واي قرار تتخذه اكيد راح
اكون معاك فيه
ام عبير وهي داخلة عليهم بالقهوة : هاه كلمتيه؟
خالد: ماشاء الله مخططين وخالصين
ام عبير: ههههههههههه والله هي من زمان كل
ماراحت وجات تقول لي ادعي ياماما شهد تكون من
نصيب خالد
خالد التفت لعبير: لهالدرجة تتمنينها تصير لي؟
عبير: اكيد ...
خالد: الله يقدم اللي فيه الخير .. وقعدو يتقهوون
ويسولفون وبعدها استأذن منهم خالد رايح لبيتهم
وطول الطريق يفكر بكلام اخته عبير . من فترة
وهالموضوع شاغل باله ... بس كلام اخته اليوم
خلاه يفكر بشهد ..( اذا مثل عبير بكون انسان
محظوظ اكيد ) رددها خالد بداخله ...
*****************************
اقبل العيد بفرحته ... والفرح انتشر بكل مكان
الجميع تعمر قلوبهم السعادة ... ابو تركي واخوانه
وخوات ام تركي وامها ... واخوان ام عبير معيدين
بالمزرعة اللي راح تتم فيها بكرة ملكة فهد وعبير
اللي راحو لها بعد صلاة العيد على طول ...
بداخل الفيلا الكبيرة اللي تتوسط هالمزرعة ,,
اجتمعو كل البنات ( خوال عبير طلال ومحمد
جو لهم بالرياض وبيمشون للطايف ثالث ايام
العيد ... طبعا حاتم اعتذر عن الجية ومحد حب يضغط
عليه وتركوه براحته )
عبير كانت مستانسة حييييل ببنات خوالها وقاعدة
معاهم ...
اماني تمازح عبير: يقولون من لقى احبابه نسى اصحابه
عبير التفتت لها : حرام عليك من زمان عنهم والله
اماني: اللي يشوفك يقول كل يوم والثاني شايفينك
ترى بالقوة نشوفك لو ماتجيبك اريج ولا ندى كان
مانشوفك
نوف : هي كلها يومين وبنروح خلينا ننبسط معاها
مرام : احسبي اليوم بس ولا بكرة ماراح تدري عنك اصلا
عبير: يعني لازم تنكدون عليه خلونا ننبسط اليوم ولا
تذكروني انكم بتروحون
اريج جات ركض لعبير: قووومي بسرعة
عبير قامت معاها : فيييين؟
وراحو ركض للمجلس وعبير ماتدري وش السالفة
وقفتها اريج عند شباك المجلس اللي يطل على مسبح
الرجال وشافت فهد لابس شورت وتي شيرت وناوي
ينزل للمسبح
عبير ولعت خدودها وانحرجت من منظر فهد : بايخة
وراحت ركض ... البنات شافو وجه عبير صاير طماطة
وعرفو ان السالفة فيها فهد
ندى اللي ميتة ضحك: وش قايلة لك الخبلة
اريج طالعة لهم وهي بتموت ضحك: هههههههههههههه
فاتكم منظر صراحة ليتني مصورته قبل
عبير: سخيفة
اريج وهي مو قادرة تسيطر على نفسها من الضحك:تخيلو
عبير استحت يوم شافت فهد بالشورت
فاتن: وانتي يالعايبة مسحبتها عشان تشوفه كذا؟
اريج: عادي بيصير رجلها
عبير زاد احراجها .. لانها بطبعها خجولة وطاري فهد
يخليها ترتبك ... خجل وحب وعشق
فاتن: اي بس للحين ماصار ولا انتي اعرستي وفصختي
الحيا مرة...
اريج: اعوذ بالله معقدة ترى الدعوة وناسة وسعة صدر
الجوهرة : خلاص عاد لا تقلبونها هواش اليوم عيد...
قبل الغدا بشوي راحت اريج تشوف بندر اللي ناداها تجيه
وقفت تسولف معاه وهو كل شوي يعلق على شكلها ...
جاهم فهد من بعيد: ماشاء الله مسوين غراميات من ورانا
بندر: اعوذ بالله انا نفسي افهم انت وخالد من مسلطكم
علي؟
فهد: ياخي افقدك ما اقدر اقعد من دونك؟
بندر: وعععععع ياشينها منك بس ...والتفت لاريج: انا
بروح الحين وانتي لا تبخلين علي بشوفتك
اريج استحت وماعلقت وراح بندر وعيونه تناظر زوجته
واريج جت تبي تدخل بس فهد استوقفها: اروج؟
اريج: سم
فهد: سم الله عدوك .. شلونها؟
اريج تذكرت موقفها الصباح وضحكت
فهد: قايل نكتة؟
اريج: لا ابد .. ماعليها بخير
فهد: سألت عني؟
اريج: وييييه ماعرفت الا عبير مستحيل تسأل
فهد: وليش ان شاء الله
اريج: خجولة مرة ومن يجي طاريك تولع حيا
فهد استانس على هالكلام: ياحبي لها والله
اريج: هالكلام قوله لا ملكتو الحين عيب
فهد: يااثقل طينتك بس مدري شلون بندر متحملك
لا وش قال بعد لا تحرميني من شوفتك << قالها
بلهجة تهكمية
اريج: فدييييته يموت علي
فهد: اقول لايكثر بس .. سلمي على عبير وقولي
لها فهد يقول لك كل عام وانتي بخير وبكرة ان شاء
الله يقولها لك بوجهك
اريج تكش على وجهه : روووح زين يسبني ويبيني
اخدمه ... مانيب قايلة لها
فهد: يابغضك والله روحي الله لا يشكر فضلك
راحت اريج وهي تضحك انها قهرت فهد اللي من اول
يحارشها ... بس بنفس الوقت تحب تحرج عبير وحبت
تشوف انطباعها...
*
*
*
*
*
انتهى الجزء الثالث عشر
لاتحرموني ردودكم الحلوة
•غٌـمـوضٌ ـآٍْاْلٍْــورد•
|
11-07-09, 10:11 PM
جديد مواضيع قسم القصص المكتمله من وحي قلم الاعضاء
العرض العادي
