كاتب الموضوع :
غموض الورد
المنتدى :
القصص المكتمله من وحي قلم الاعضاء
الجزء الحادي عشر
*
*
*
*
*
قاعد بالشركة وهمومه تملى صدره ... يفكر بكل شي صار معاه
حظه اللي خلاه يتصرف بغباء مع اكثر الأمور اهمية بحياته
الايام اللي فاتت كلها ذبحه التفكير فيها ... وكل اللي يعرفه انه يبيها
ويحتاج وجودها بحياته...ومادامه متأكد من مشاعره ماعاد له داعي
يتردد اكثر ... هو يحبها ويبيها وخوفه كله انها ترفضه... بس هو
ماراح يتنازل عنها بسهولة ....
قطع عليه هدوئة خالد اللي مبين عليه مستانس حيل: السلام عليكم,,,,
وش فيك كأن هموم الدنيا كلها فوق راسك؟
فهد: خلها على ربك في شغل واجد ولا نطلع نتغدا ترى مليت من الشغل
خالد: لا لا انا جاي ابي اعلمك بسالفة يالله خلنا نروح
قامو اثنينهم طالعين من الشركة وصادفهم تركي بطريقهم: وين رايحين؟
خالد: طالعين نتغدى ماتبي تروح معنا؟
تركي: لا والله الدلع لكم والكرف كله فوق راس تركي
فهد: زين اطلع لك نص ساعة وعقب ارجع
تركي: لا عليكم بالعافية بخلص كم شغلة وبروح بيتي عند غادة تغديني
احسن من اكل هالمطاعم
خالد: الله يخلي لك المدام وعقبالنا احنا المساكين..
تركي: يالله ما اعطلكم اهم شي لاتتأخرون ابوي بيروح البيت والشركة
لازم لها احد يقابلها
خالد + فهد: فمان الله
تركي: الله يحفظكم
توجهو لاحد مطاعم الرياض ... وهم قاعدين سوالف خالد حس ان فهد
فيه شي شكله وتصرفاته مو طبيعية: فهود عسى ماشر فيك شي؟
فهد: ماشر والله بس مرهق؟
خالد: وش منه؟
فهد: ابد العمل واشغال ثانية وقل نوم
خالد: والله محد كلفك بزود عنا بس انت مشقي عمرك اقول لك روح
ارتاح بالبيت تبي تقعد بالشركة ..( خالد مايدري ان فهد يبي يشغل نفسه
عن التفكير اللي تعبه وخلاه يدور اي شي ينسيه عبير وغلاها)
فهد: مو مهم هذا كله علمني وش اللي تبي تعلمني فيه؟
خالد ابتسم: بندر
فهد: وش فيه؟
خالد: خطب اريج
فهد استانس من قلب: والله والنعم ببندر ... وش قالت اريج؟ خابرها
ماتواطنه
خالد:هههههههههههههه عصبت بالبداية بس ماحسيت انها رافضة رفض
قاطع تكلمت معاها شوي وحسيت انها بدت تفكر وراح ارجع اكلمها
بس ابيها تاخذ وقتها ومابي اضغط عليها وتتسرع برفضها
فهد: زين ماسويت ... والله اريج ماراح تلقى احسن من بندر
خالد: بس هي لو تخلي خبالها شوي وتفكر بعقلها زين وتستخير وتشاور
ربي بيسهل امورها.. انا ابي انتظر كم يوم وبعدها اذا ماكلمت عبير
انا بكلمها تحاول تقنعها او يمكن اكلم ندى
فهد كان منزل راسه يحرك الملعقة بالصحن ويسمع خالد ... من سمع اسم
عبير رفع راسه لاشعوريا ... وكل حواسه تيقظت ... خالد انتبه لخاله بس
ماحب يحرجه وكمل كلامه .: وانا اتوقع اذا خذت راي خواتها بتقتنع
فهد: ماعليك فيها اريج انا اعرف شلون اقنعها
خالد: الله ييسرها يارب
كملو غداهم وطلعو راجعين للشركة....
**************************
الاختبارات النهائية قربت والكل مجتهد عبير قاعدة تشوف مناهجها
وتقسم وقتها مذاكرة ومراجعة لدروسها .. قطع هدوئها رنة جوالها
رفعت الجوال لقت اريج متصلة فيها: هلااا باروجه حبيبة اختها
بس ماسمعت رد...وكأنها سمعت صوت اريج تصيح ...اروج تبكين
اريج : عبورة تعالي ابيك تكفين
عبير: وش فيك طيب؟
اريج: لاتقلقين مافي شي بس متوترة وابيك كلمت ندى وتقول تعبانة
كان عندها مراجعة بالمستشفى اليوم وتبي ترتاح
عبير: طيب بكلم ماما واجي لك
اريج: زين عبورة لا تتأخرين تكفين
عبير: من عيوني بس جهزي لي كوفي مرة مرهقة
اريج: ابشري
وراحت لأمها تستأذنها تبي تروح بيت ابوها: ماما
ام عبير اللي توها مخلصة صلاة العصر وعلى سجادتها: هلا حبيبتي
عبير: ابغى اروح لاريج متضايقة وكلمتني اروح لها
ام عبير: اوكي روحي بس لاتتأخرين .. وخلي واحد من اخوانك يرجعك
ما ابغى احد يتعرض لك في الليل
عبير: طيب من عيوني تبغين حاجة؟
ام عبير: لا انا بروح عند ام راكان عازمتني على العشا كلمتني من شويه
وكنت شايلة هم تقعدي في البيت لوحدك بس كويس بتطلعين
عبير: ايوا والله خايفة من ضغط الاختبارات وماودي اضغط نفسي زيادة
ام عبير: الله يوفقك يارب .. يالله حبيبتي روحي لاختك ولا تتأخرين عليها
وخالتك نورة طنشيها حتى لو استفزتك
عبير: هههههههههههه ماعليك اصلا خبرة سنة عندها عرفت اتعامل معاها
طلعت عبير متوجهة لغرفتها .. بدلت ملابسها وراحت لبيت ابوها...
********************
كان طالع من الشركة وجاي ورى خالد يبون يجتمعون العيال اليوم ..
خالد داخل يبدل وبيروح معاه بسيارته .... شاف سيارتها جاية وعرفها
خفق قلبه وتسارعت نبضاته .. وتنفسه اضطرب .. وكل الجوارح مشتاقة
يحس بحنين فظيع لها ولشوفتها بس كل مايتذكر كلامها ... يحس بطعنات
في صدره... بريئة .. رقيقة .. عذبة ... بس كلامها كان مثل السم...
شافها وهي تنزل وترفع عباتها على راسها... تمشي بخطوات كلها ثقة
دعى ربه من قلبه يحنن قلبها عليه... عجبته بثقلها حتى ما التفتت تشوف احد
اما هي شافت سيارته اول ماقربت من البيت ... في شي داخلها يبيه ...
وفي شي بعد يرفضه ... ماتنكر انها بداخلها سامحته لان قلبها ماعمره حمل
احقاد ... بس بعد تبيه يتعلم هالدرس ويعرف ان بنات الناس مو لعبة عنده
اول مادخلت صادفها خالد : هلاااا يالله حيها القاطعة
عبير تسلم على اخوها: والله ماني قاطعة بس تعرف محاضرات للعصر
ودروس وزحمة في الإجازة اعوضها ان شاء الله
خالد: الاجازة وانتي رايحة الطايف؟
عبير: ايوا صح.. هههههههههه نسيت خلاص الويك إند الجآي كله معاك
ولا تزعل
خالد: اعوذ بالله انا قلت تعالي شوي مو تلزقين لي يومين
عبير برطمت يقال لها زعلت: وخر بس انت مو وجه اللي يجي لك
بروح لحبيبة قلبي اروجه
خالد توقع ان اريج طلبتها تجي: اريج تبيك؟
عبير: ايوا ليه؟
خالد: خليها هي تعلمك
عبير: خلوووودي صاير حاجة ؟
خالد : اطلعي لها وهي تعلمك وخري عني عطلتيني
عبير راحت ركض لاختها بدون ماتتكلم ... وخالد طلع وركب مع فهد
بسيارته : خبول هالبنات ياحبهم للسوالف .. ممكن الوحدة تطق مشوار
عشان سالفة
فهد:.............
خالد يحرك يده قدام عيون فهد: هيييه يا ابو الشباب وين وصلت؟
فهد انتبه من سرحانه: هلا خالد مشينا؟
خالد: اي يالله
وراحو متوجهين لبندر وسلمان ..
************************
طقت باب غرفة اريج بهدوء وجاها صوت من داخل: هلا عبورة
عبير: ايش عرفك انه انا؟
اريج:يعني من بيجي لي الحين ؟ امي واكيد تتجهز بتطلع
وغادة وتركي رايحين بيت خالتي ... وماجد مستلم اليوم وخالد اكيد
طالع
عبير: طيب ايش فيها الحلوة زعلانة؟
اريج: اممممم محتارة
عبير: في ايش؟
اريج: عبير بعلمك بس مو تضحكين علي
عبير: طيب
اريج: حلفي
عبير: والله ماراح اضحك يلا قولي
اريج: في شخص متقدم لي
عبير:حركات اروووج كبرتي وصار يجي لك عرسان
اريج: عبير صبري .. انا محتارة وخايفة..ومترددة كثير
عبير: شعور طبيعي اي بنت تحسه .. بس ماقلتي لي مين؟
اريج: بندر صديق خالد اخوي تعرفينه؟
عبير: اممم شكل لا بس سامعة عنه... ماقلتي لي ايش اللي يخليك
مترددة؟
اريج: عبورة واحنا صغار دايم نتطاق ونكره بعض كره العمى
عبير: ههههههههههههههههههههههه هذا وانتو صغار الناس لما تكبر
تتغير ... بعدين هو اختارك وكلم خالد قبل مايصير اي شي رسمي
اريج: تدرين عاد اللي مخليني افكر بالموضوع انه هو اللي مختارني
عبير: حلو يعني في نسبة اقتناع
اريج: ضايق صدري والله وخايفة
عبير: خايفة من ايش؟
اريج: حياة جديدة.. اترك بيت اهلي.. اخاف حياتي تصير كلها مشاكل
مثل خواتي .... مادري كل شي والله
عبير: اولا كل علاقة زوجية فيها مشاكل وهذا ملح اي علاقة في الدنيا
وثانيا ندى الحين حياتها مستقرة بعد ما اتفاهمت مع ناصر .. وفاتن هذا ربي اللي
مقدره لها وان شاء الله ترجع لسعود.. بعدين كل شخص يختلف عن الثاني
وحياتك انتي مو نفس حياة غيرك.. فلا تتوقعي الفشل من تجارب اللي
حولك.. الله اللي قسم لكل شخص نصيبه ... واصابع يدك مو سوا
اريج: بس اذكره دب
عبير: وانتي يعني يهمك شكله؟
اريج: لا مو كذا بس ما احب الرجال السمين .. وخالد يقول ماعاد هو بدب
عبير ابتسمت: اروج لاتلتفتين للشكليات ... الشخص بدينه واخلاقه
وتعامله ... والشكل اوكي يكون مقبول ... وقبل هذا كله استخيري
واي سؤال في نفسك اسأليه خالد هو صاحبه واكيد عارف عنه كل حاجة
اريج: ههههههههههههههههههه ما اتخيل اني اتزوج بندر
عبير تضحك معاها وهي مو فاهمة : ههههههههههههه ليه؟
اريج: كان معقدني .. مطفشني وربي لاصار عندنا بالبيت باب غرفتي
ما اعتبه من خوفي منه... من يشوفني يحارشني... ومايرتاح الا اذا
صيحني .. احسها قمة السعادة عنده
عبير: هههههههههههههههه يلا حلو بكرة تسولفو لعيالكم عن ذكرياتكم
اريج: انا توني ما اعرست وانتي خليتي فيها عيال؟
عبير: احسك مقتنعة بس تتدلعي
اريج حمرت خدودها واكتفت بالصمت
اما عبير اكيد لازم تعلق عليها: لا لا ما اصدق اريج تستحي؟
اريج طقتها : لعنبو ابليسك وش قايلين لك مغسول وجهي بمرق؟
عبير: هههههههههههههه لا والله بس انتي جريئة وشخصيتك قوية
............: لا هلا ولا مرحبا متى شرفتي
عبير تعوذت من الشيطان وسكتت اما اريج انحرجت من كلام امها
وحاولت ترقع السالفة: يمه عبير انا مكلمتها تجيني
ام تركي: غاسلة مخك بنت سويرة
عبير: خالتي لو سمحتي ماما عمرها ماقالت حاجة عنك رجاء
لاتجيبين سيرتها لا بخير ولا بشر
ام تركي: عشتو .. والله طلع لها لسان ...مستقوية بأمك الطماعة
اللي دفنت عمرها وشبابها ومتزوجة واحد كبر ابوها.. كله عشان
الفلوس يالله لا تبلانا
عبير ببرود عكس البركان اللي بداخلها: تصدقي ماما مربيتني ما ارد
على اللي اكبر مني .. ولانك بعمر جدتي ماراح اتكلم .. وطلعت: اروج
بروح اجيب كوفي
ام تركي بصراخ:روحي لحقيها لا تنزل المطبخ لحالها
اريج راحت تركض: زين بس تراه بيت ابوها
وشردت قبل تمسها يد امها : قلعتها هي وابوها ...
قعدو البنات وتعشو وعبير اتصلت بخالد تبي تقعد معاه وتناقشه
بالموضوع ... وهي تعرف خالد مستحيل يرمي خواته على احد مو كفو
اتصلت فيه: خلووود متى راجع البيت؟
خالد: يمكن اتأخر ليش
عبير: اليوم اريج مكلمتني في موضوعها وانا ابغى تجي ونتناقش
خالد: والله .. تحسين انها مقتنعة؟
عبير: تقريبا .. هاه بتجي ؟
خالد: اي الحين جايكم . والتفت لفهد : فهود قوم وصلني بروح البيت
فهد يطالع ساعته مستغرب: تو الناس وين؟
خالد: انت امش وانا اعلمك
فهد اخذ جواله ومفاتيحه وقام يلحق خالد : يالله ياشباب اشوفكم على
خير
اول ماوصل سيارته لقى خالد ينتظره: وش فيك مستعجل؟
خالد: مانيب مستعجل بس احس اني مستانس
فهد: جعله دوم وش اللي صار
خالد: عبير تو مكلمتني تقول اريج تقريبا مقتنعه وتبيني اروح البيت
اتكلم معاها
فهد وهو يشغل سيارته : حلو الله يوفقها
(كل المشاعر داخله تخونه .... ماتبي تنساها ..كل ماحاول يطرد
صورتها وصوتها ووجودها من حياته تخذله نفسه.. وتظهر له بأقوى
صورة... شلون ينساها او يتناسى اللي بقلبه وهو يحس انه ماينبض الا
عشانها .. وهالهوا اللي يتنفسه بوجودها... حتى السعادة اللي بقلبة بسببها
وماينكر انها بعد سبب ضيقته وجروحه... بس ليش يلومها ؟ بنت
رجال وماترضى الزلة على نفسها وهالشي زاد تعلقه فيها .. وآآآآه
من حبك ياعبير..!!! )
*******************************
دخل عليهم متحمس وفرحان وده يطير من وناسته..: السلام عليكم
اريج+ عبير: وعليكم السلام
خالد:تعشيتو؟
اريج: اي طالبين من بيتزا هت
خالد: ياحبكم يالبنات للمطاعم
اريج: طالع من يتكلم بس؟ اللي كل وقته برا البيت
خالد: ههههههههههههههه لا نوو العيال ما اقدر اردهم
عبير: الله يعين زوجتك شكلها بتتعقد مثل ندى.. بس الله اعلم بتصبر
ولا تتركك من اول مشكلة
خالد: لا ان شاء الله ماراح اظلمها معاي ... على طاري العرس
شلونك اروج؟
اريج هنا صار وجهها كله الوان وماردت كمل خالد: شوفي هو صح
انه صديقي .. واعتبره اخوي... بس مابيك تتسرعين اتخذي قرارك
بكل ثقة وشاوري امي
اريج: خالد انت ماراح تظلمني؟
خالد: افاا اروج تقولين لي هالكلام؟ .... مايحتاج اعلمك وش كثر اغليك
اذا بظلمك بظلم بندر وانا اشوفكم اثنينكم عينين براس....هو نفس اخوك
نفس طباعي ..انسان طموح . صادق ومايعرف الكذب والنفاق طيب
وحنون ... ويكفيك لاضاقت الدنيا يكون لك عون...
اريج: عادي ارد بعد الاختبارات؟
خالد: شوفي انا ابيك تاخذين وقتك بس بعد الاختبارات كثير والحبيب
ماراح يصبر يبي يتقدم رسمي
اريج: زين كلم امي انت اليوم... وعطني هالاسبوع افكر فيه واستخير
خالد: ابشري وقرص خد اخته .... فديتها ياناس هالقمر بتصير عروس
عبير: ههههههههههههههه شوف كيف استحت
خالد: وانتي اكيد بيجي لك الدور
عبير سكتت وماعلقت مهما كان اخوها وتستحي تتكلم بكل جرأة
بهالامور
كملو سوالف وعلى الساعة 12 تقريبا عبير قامت : يلا خلود توصلني؟
خالد: انا مادري وش تعتبروني بحياتكم بس الاكيد سواق...
عبير واريج ضحكوووو
اريج: ههههههههههههههههههه محشوم يابو وليد
عبير: والله ماما قالت لي ارجع مع واحد من اخواني ومافي الا انت
خالد: زين يالله
وقامت لبست عباتها وطلعت
********************************
الكل رحب بخطبة بندر لأريج...مستانسين هذي آخر العنقود يعني
دلوعة هالبيت ... ام تركي استانست لانها تحب ام بندر وماراح
تلقى لبنتها احسن من بندر اللي الكل يمدح باخلاقه ... بعد اسبوع
اعلنت اريج موافقتها .. واتفقو مع اهل بندر يجونهم يوم الخميس
يتقدمون رسمي.....
لابسة ومتكشخة وخواتها حولها ...وحيييل متوترة: تتوقعون يطلب
يشوفني؟
فاتن: اكيد مايبي لها كلام
اريج: ياوييلي وربي لاموت بمكاني
ندى: ههههههههههه لايكون للحين تخافين منه؟
اريج: اسكتي بس انتي رايقة ... كيف شكلي؟
عبير: والله يجنن انا بروح اجلس مع ماما وانتو كمان انزلو اكيد
جايين الحين
اريج: يانذلات تخلوني لحالي؟
فاتن: مو مطولين بنستقبل اهل المعرس وبعدها بتنزلين انتي
اريج: عبورة قعدي معاي وربي اتوتر واسوي شي بنفسي
عبير حنت على اختها: طيب ولا تزعلين وهذي قعدة عشان
خاطرك
اريج: عبورة جد شلون شكلي؟
عبير: كم مرة سألتيني؟ والله قمر وبيموت وينجن على شكلك
دقيقة ارد على ماما: ايوا ماما .... خلاص اهم حاجة انتي مرتاحة
طيب انا بنزل مع اريج ما ابغى اخليها لوحدها... مع السلامة
قعدو سوالف واريج مازالت متوترة .... جاتهم فاتن : اروج تعالي
سلمي على ام بندر واخته وبعدها ادخلي على حبيب القلب
اريج انتفضت : لا فتون تكفين والله اخاف
فاتن سحبتها من يدها : قومي وربي بكرة هالسوالف تتذكرينها
وتحسين لها طعم غير
نزلو البنات ووقفت اريج تعدل نفسها للمرة المليون
فاتن: يالله عاد تراهم شايفينك وعارفينك
عبير: فاتن خليها على راحتها هي بتدخل بس مستحية
فاتن ناظرت بعبير من طرف عينها : مو شغلك انتي
عبير: تراها اختي مثل ماهي اختك
فاتن: ياثقل طينتك لا حاكيتك ردي علي
عبير: لا ياشيخة اجل تكلمي مين؟
اريج: بس انتي وياها شايفيني متوترة وتزيدون علي
عبير تندمت بس فاتن نرفزتها وفاتن دخلت وانتظرتهم يجون
وراها... ودخلو سلمو عليهم
ام بندر تطالع بأريج ومستانسة فيها: شلونك اريج؟
اريج بتتقطع من الحيا : الحمدلله
بشاير اخت بندر : هالترم متخرجة؟
اريج: ان شاء الله
واستمرت الجلسة اللي ماتعدت العشر دقايق كأنها ساعات على
اريج... طلعت بعدها وطلعو معاها خواتها
قاعدين بالصالة جاهم تركي : السلام عليكم
الكل: وعليكم السلام
تركي: هاه اريج مستعدة؟
اريج ارتبكت: وشو؟
تركي: قومي ياحلوة المعرس يبي يشوفك
اريج: تركي مابي تكفي
تركي: شلون ماتبين؟
اريج: هونت
تركي مبتسم : حلفي بس .. قدامي اشوف
اريج: لا تركي تكفى والله استحي
تركي: قومي وانا معاك
وقومها وصارت لازقة فيه وهي مترددة .. بندر كان قاعد بالمجلس
الداخلي وشاف تركي داخل وهي وراه... من لمحها انبهر فيها
تغيرت كثير ومابقى من ملامح طفولتها الا عيونها الواسعة اللي
يذكرها... صارت اجمل .. انعم .. واكثر انوثة... سلمت وقعدت
وهو مانزل عينه عنها : وعليكم السلام . . شلونك اريج؟
اريج ولا كلمة وتركي يلطف الجو : مسوية مستحية الحين؟ وانتي
كل ماشفتيه صوتي له بنيدر الدب
اريج ولعت احراج وبندر مات ضحك .. ولاول مرة ترفع عينها
وتشوفه ماصدقت اللي قدام عينها ( الحين هذا بنيدر الدب..؟
سبحان اللي يغير ولا يتغير ) نزلت عينها على طول
...........: خيااانة الحين انا صديقك ولا تركي؟ وانت جاي وماعلمتني
التفتو كلهم على خالد وضحكو اما اريج اكتفت بابتسامة وقامت طلعت
من المجلس
بندر: انت الحين ليش جيت؟ من شافتك انحاشت ؟
خالد: اقول قوم بس خلاص شفتها هي مو حلى تقعد تمقل فيها .. عاجنها
وخابزها ,,, ولو قلت لك كم فلقة في راسها قلتهم لي
تركي: بلاه هو اللي فالقها المسيكينة
قعدو الشباب يسولفون واستأذنهم بندر بيروح وكلم على اهله يطلعون
له...
اريج طلعت ركض لغرفتها .. وندى اللي كانت رايحة المطبخ شافتها
وطلعت لها ,,,, لحقتها على غرفتها: يلا بسرعة اهم الاخبار؟
كيف شكله وش انطباعك ؟
اريج ضحكت : هههههههههههههههههههه
ندى: لا والله انخبلت اختي
اريج: ندوش مو هو اللي اعرفه... صاير وسيم
ندى: والله؟ ياحليله..يعني خلاص ماعاد في رجعة؟
اريج: ان شاء الله
عبير اول ماشافت اهل بندر طالعين قامت تبي تروح لاختها
تعرف انطباعها بس قعدت يوم حست ان ام تركي وفاتن ممكن
يستفردون في امها ...بس اللي يخليها تتطمن شوي وجود ام فهد
اللي ماترضى الغلط همست لامها: عادي اروح لاريج؟
ام عبير: روحي حبيبتي ولا يهمك ابوك الحين بيجي
وقامت عبير ركض رايحة لأريج
عبير: ماشاء الله الوجه منور يعني الانطباع كويس
ندى: هههههههههههههه خقت عنده
عبير:ههههههههههههههههه كيف اروج؟
اريج: احس اني ارتحت الحمدلله
عبير: انا عارفة من اول انك مرتاحة بس كيف شكله؟
اريج: زين الحين هم راحو؟
عبير: ايوا طالعين
ندى قامت وسحبت خواتها من يديهم: قومو نشوفه من غرفة
امي... وراحو البنات يتسابقون
واقفين عند الشباك ... ويناظرون اخوانهم وهم واقفين مع بندر
وعيونهم على بندر .. الا هي لقتها فرصة تشوفه ...
قعدت تتأمله ( يالله قد ايش تسحر يافهد...) قالتها بخاطرها
رغم انها تشوفه من بعيد الا ان عيونه تسحرها ... فيها جاذبية
عجيبة ... جسمه وحركاته ... كل شي فيه تحسه غير......
تنهدت بداخلها وكرهت شعورها الغريب ( ليه تحس انها تبيه
وماتبيه؟... ليه باوقات يكون شعورها له اشبه بالطوفان اللي ممكن
يغرق كل اللي حولها ... واوقات حتى مايطري على بالها؟.. ليه
كل الأسئلة مالقت لها اجوبة تريحها وتزيل همومها )
ليه انا مجروح ... وانا جارحك ؟!
ليه انا مشتاق... وانا تاركك ؟!
ليه انا مدري... وانا دايم اكيد ؟!
ليه انا مقبل... وانا دايم بعيد ؟!
ليه انا ندمان... لحظة مايفيد ؟!
ليه مو هذا اللي كنت ابيه ؟!
ليه بعته وليه راجع اشتريه ؟!
ليه كل شي ناقص بلاه ؟!
ليه مايكملني سواه ؟!
لاضعت من نفسي انا .. ليه لازم القاني معاه ؟!
********************
كملو البنات سوالف بغرفة اريج ....وخالد اللي جايهم مستانس:اريج
ابوي يبيك تحت
اريج: وش يبي؟
خالد: اكيد بياخذ موافقتك النهائية بعد ماشفتي صديقي الغالي
اريج: لا مابي من جدك انزل وكلهم مجتمعين
خالد: لا فهد وامي مضاوي راحو ( فهد يوم شاف الناس طلعو استأذن
.. بعد الدرس اللي تعلمه يبي يحسن صورته عند الكل وخصوصا عبير)
اريج: وخر بس مانيب نازلة
ندى: اريج ابوي يبيك وماتروحين له؟
اريج: ندووش والله استحي
ندى: خلاص خالد احراج عليها انا بنزل لابوي اكلمه
خالد: يالله
نزلت ندى وعلمت ابوها بأن اريج خلاص موافقة ..
ابو تركي طلع لغرفة اريج يبي يتكلم معاها ويناقشها لقاها جالسة هي
وعبير ابتسم لهم بحنية ....: السلام عليكم
البنات التفتو له وبادلوه الابتسامة: وعليكم السلام
عبير قامت تنزل تحت تبي ابوها ياخذ راحته مع اريج
ابو تركي: عبير اقعدي يابوك
عبير: لا بخليكم تتكلمون براحتكم وبنزل اشوف ماما
وراحت عبير .. اما ابو تركي التفت لاريج ومسكها من يدها : اريج
اريج رفعت راسها تناظر ابوها : سم يبه
ابو تركي: ابي اسمع كلمتك الأخيرة ...
اريج ساكتة ومو عارفة تتكلم كمل ابوها: اليوم كلموني يبون الملكة
بالصيف والعرس بعد 4 اشهر وانا ماحبيت اقرر شي قبل اعرف
موافقتك النهائية
اريج: اللي تشوفه يبه
ابو تركي: انا شايف وخالص انتي مرتاحة؟
اريج: الحمدلله
ابو تركي: يعني موافقة؟
هزت اريج راسها علامة الموافقة
ابو تركي: مبروووك يابنتي والله يوفقك ويسخره لك ...انتي اهتمي
بدروسك وتخرجي والملكة بالصيف زين؟
اريج ماقالت شي بس هزت راسها .. وابوها ماحب يضغط عليها
اكثر : يلا انزلي معاي تحت ....انا بنزل اصلي العشا وبعد الصلاة
ابيكم كلكم مجتمعين
اريج: ان شالله يبه
ابو تركي توضا ونزل وصوت على عياله يقومون معاه المسجد
اكتملت هالليلة على احلى مايكون... وتحددت ملكة اريج اول اسبوع
بعد الاختبارات والفرحة ملت هالبيت وكل من يحب اريج ...
****************************
الاختبارات انتهت .. والاجازة بأول ايامها... والبنات مو مخلين ولا
سوق الا رايحين له ..وكل وحدة تدور احلى فستان عشان تلبسه.....
ومو قاعد بالبيت الا فاتن .... اللي تقريبا خلصت كانت قاعدة تلعب
ريم اللي فرحانة انها نجحت بأول ابتدائي وعماتها وخالاتها واعدينها
بحفة يعزمون فيها صديقاتها ...
ريم: عمتي ماما شرت لي فستان مرة حلو
فاتن: ياعيوني انتي اي شي تلبسينه تحلينه
ريم ضحكت: بس انا ابي فستان ثاني لحفلتي وامي تقول بعدين
فاتن: اي ياعمري لا تضغطين على امك الحين كلنا نبي نخلص
من ملكة اريج وعقب نسوي حفلتك
ريم: وابي ريوف وافنان ومنار يجون
فاتن: كل اللي يخطرون ببالك عزميهم ... ورن التليفون وقامت له
ريم:الو... مافي الا عمتي فاتن.. زين لحظة.. والتفتت لعمتها : عمتي
واحد يبي يكلمك
قامت فاتن تبي ترد وشافت رقمه طالع عندها خفق قلبها مليون مرة
وارتبكت ومو عارفة وش تقول ردت بكل هدوء: هلا
سعود: هلا وغلا بفتون قلبي..
فاتن: هلا بك شلونك؟
سعود: بخير من سمعت صوتك ياقلب سعود انتي؟ فتون
فاتن: سم
سعود : ماحن قلبك علي؟ مافي شي بقلبك يشفع لي
فاتن: سعود انا ماراح اناقشك واتكلم معاك بالتليفون كل شي بقوله
لك لاشفتك
سعود مو مصدق : تبين تشوفيني؟
فاتن بغرور : ابي اقعد اناقشك بأمورنا
سعود: الحين اجي لك انتي فاضية؟
فاتن: لا الحين مشغولة تعال بعد ساعة <<تبي تكشخ له الاخت
سعود: ابشري من عيوني ساعة واكون عندك. تامريني بشي؟
فاتن : سلامتك
سعود: يالله فمان الله
فاتن : مع السلامة ... سكرت السماعة والفرحة مو سايعتها ..تحس
انها ودها تقوم تنطط .. ترقص ماتدري وش تبي بالضبط
ركضت لغرفتها ... تسبحت وجففت شعرها ... فتحت الدولاب
تدور لها شي تلبسه ... شافت طقم تدري ان سعود يحبه عليها
سحبته وحطته على السرير... وهي ترتجف من الارتباك... تذكرت
شعورها يوم كانت متملكة على سعود ... ويجيها كانت تتوتر وترتبك
وكل ملابسها اللي بدولابها تطلعها عشان تختار اللي تبي تلبسه
لبست تنورة كحلي للركبة ,,وتوب احمر ماسك على جسمها .....
حطت شادو وردي خفيف.. وشوي بلاشر ... زينت رموشها
بالماسكارا... وقلوس وردي على شفايفها .... القت نظرة أخيرة
على شكلها ...ناظرت ساعتها .... اكيد سعود على وصول
اتصل فيها يبلغها انه وصل ونزلت له ....
كان ودها تركض له بس غرورها يمنعها تبين له شوقها ...
طلعت وشافت الخدامة فاتحة له الباب ... راحت تمشي بخطوات
ثابتة ... وقلبها مشى مليون خطوة سابقها ... اما هو كانت اللهفة
بعيونه ومشيته وحتى سلامه .... كان ودها تضمه .. وترتاح من
ليالي البعد اللي انهكتها .. بس ماتبي تضعف الحين.. تبي تضمن
حقوقها بالاول ...دخلو المجلس الداخلي ..وجلس وجلست جنبه
سعود: اشتقت لك
تلألأت دمعة بعينها بس تمالكت نفسها ... ماتدري وش تقول له
بداخلها مشتاقة له بجنون... حبه تعدى حدود الوصف والجرح منه
اعظم واقسى ... احساس ان اقرب الناس لك ممكن يكون لغيرك
صعب وقاتل ...
سعود: فتون واللي خلق هالكون كله احبك وعمره ماتغير حبك
بقلبي بس انتي اللي بعتيني وانتي تعرفين وش كثر كنت متمسك
فيك .. ومو مستعد اتنازل عن لحظة معك عشان اعيشها مع غيرك
بس هذا اللي ربي كتبه لي وانا رضيت بحكمة رب العالمين بس
يشهد علي ربي ماسكن هالقلب غيرك
فاتن: وغلا؟
سعود: غلا زوجتي وبنت عمي ومادام ماجا منها قصور لها كل معزة
وتقدير..
فاتن: يعني تحبها ؟
سعود: لاتسألوا عن أشياء إن تبدَ لكم تسؤكم
فاتن دنقت راسها وماعلقت اما سعود رفع راسها : فتون وربي
انتي الكل بالكل بحياتي بس بعد ماترضين الظلم ولا رب العباد يرضاه
انا ابي اعيش حياة مستقرة ومابي مشاكل .. انتي راح تكون لك حياتك
مثل اول واحسن بعد اذا يرضيك . وهي بعد لها حياتها.. بس مابي
ولا وحدة فيكم.. تتدخل بحياة الثانية
فاتن: يعني بتصير تخبي علي؟ وعلاقتنا يصير فيها اسرار؟
سعود: لا مو هذا قصدي ... انا اقصد مشاعري او تعاملي مع وحدة
فيكم يبقى بيني وبينها ..
( افتقدك
ولاأدري كم بقي من عمري كي أحبك به..
وكم تبقى من ليلي كي احلم بك به..
وكم تبقى من شموخي.. كي أكابر أمامك به..
وكم تبقى من عنادي كي أتناسك به..
أفتقدك..
وكم يرعبني ان يأتي الشتاء وانت بعيد..
وان يتفتح ورد الربيع وانت بعيد..
وان تنتهي سنوات عمري وانت لست معي..
أفتقدك..
ويقتلني ان يأتي العيد وانت لست قربي..
يقتلني أن تمطر السماء وانت لست بصحبتي..
وان يشتد الشتاء ولا أحلم انك تراقصني..
وان يهاجمني الليل وانا وحدي.
وانت بعيد.. بعيد.. بعيد..
أفقتدك..
يأخذني الحنين الى صوتك فابكيك..
يأخذني الحنين الى حنانك فأبكيك..
والى ايامك فأبكيك..!!)
نزلت دموعها اللي حبستها من شافته .. وفاض فيها شوقها ,,, وطغى
الحنين على كل مشاعرها ,,,,ورمت نفسها بحضنه...ولاول مرة
بحياتها ترمي غرورها ورا ظهرها وتتكلم بكل انطلاق...
حكت له عن شوقها .. عن لهفتها .. وسعادتها اللي فقدتها من فقدته
عن عذابها اللي عاشته من يوم صار بعيد عنها
سعود: زين قومي معاي الحين؟
فاتن تمسح دموعها : لا خلني هالكم يوم
سعود:فتون ليش تحبين تعانديني؟
فاتن: الدعوة مو عناد.. ملكة اريج بعد 3 ايام وابي اساعد اهلي
بالتجهيزات
سعود: واذا قلت لك عشان خاطري..؟
فاتن استحت على عمرها : اللي تبيه
سعود استانس: زين قومي عازمك على العشا
فاتن: روح صل العشا وتعال تلقاني جاهزة
سعود قرب وباسها من خدها ... وفاتن ذابت بمكانها: قومي
عني قبل اتهور
فاتن قامت وهي تضحك ووجهها مولع حيا
****************************
الاربعاء العصر ببيت ابو تركي ... الجو غير .. خلية نحل صاير
هالبيت .. اليوم ملكة اريج آخر العنقود ( عند ام تركي طبعا لان عبير
اصغر منها )...الصالة مرتبينها ومزينيها بالورود الليلكية ... والشموع
الفواحة ... وبطرف الصالة الواسعة حاطين كوشة صغيرة تنزف عليها
اريج.... تجهيزات تتسم بالبساطة والاناقة بنفس الوقت ... ماعزمو ناس
كثير بس عمامهم وخالاتهم وجيرانهم .. وبيت ابو بندر جايين مع عمانهم
اريج عزمت صديقاتها ... وخواتها بعد عزمو صديقاتهم...
ندى الحين بالشهر السابع ... والكل مايبي يتعبها ويبيها ترتاح... اما
فاتن كان وجهها متغير ومبين عليها الراحة والسعادة ...
عبير كأنها فراشة ... من مكان لمكان تملا البيت ضحك وفرفشة بحركتها
خالد من تحت : يمه ... فتون ...تعالو شوفو الحلويات وصلت
ام تركي طلت من فوق : خلهم يدخلونها المطبخ الحين بجي ...
اريج قاعدة بغرفتها ... والكوافيرة تناقشها شلون تبي طلتها ... الميك اب
والتسريحة ... وهي تختار وخواتها يساعدونها ... بدت بالاول سشوار
لشعرها ,.... وعبير نزلت تشوف بنات عمها ...
عبير: هلا والله ... وسلمت على بنات عمها وامهم وخذت جنى من
اماني :يااحياتي ايش الحلاوة هذي
جنى : حالتي سرت لي فستان
ام تركي: جنو حبيبتي تعالي
جنى راحت تركض لأم تركي اللي تموت عليها...
عبير: بتطلعو عند اريج؟
الجوهرة: ايه خلصت؟
عبير: لا لسى ... وراحت للمطبخ : خالتي هاتي انا ابخر البيت
ام تركي بدون اي اعتراض: زين وكلمي خالد يبخر مجلس الرجال
الخارجي بعد صلاة المغرب كلهم بيجون
عبير: ان شاء الله خالتي .. وراحت لمجلس الحريم ومجلس الرجال
الداخلي وتذكرت خالد واتصلت عليه : خلود تعال خذ المبخرة
خالد: انا مانيب في البيت رايح اجيب خالتي كلمي ماجد ولا تركي
عبير: طيب .... وسكرت منه واتصلت بماجد : مجود فينك؟
ماجد: مع العيال ليش؟
عبير: تعال خذ المبخرة
ماجد: ابشري ...
جا ماجد للمطبخ من الباب اللي يطل على الحديقة .. لقى امه
ماسكة جنى وتشربها عصير: ياعمري عليها حبيبة ابوها
جنى نطت فرحانة : بابا وحستني .. ليس تقول لي امس بزي
ومازيت
ماجد يبوسها بخدودها : انشغلت ياعيون بابا .... بعدين خلاص
من هاليوم مالك قعدة الا بهالبيت مو كل شوي تقولين بروح اقعد
عند خالتي ماعندي بنات يطلعون من بيت ابوهم
جنى تحسبه يهاوشها وبرطمت وماجد مات عليها : ياابعد عمري
على الزعلانين وقعد يحبحب بخدودها
جنى: بابا بعدين يحرب فستاني
ماجد: بسم الله عليها بنتي العروس اليوم قمر ماشاء الله
ام تركي: اخاف تصيح لاشافت خالاتها راحو
ماجد: يمه خلاص انا دلعتها بنتي ابيها عندي مو ماتنام عندي
الا يومين والباقي ببيت عمي.. ومردها تتعود... ويقرص خد
جنى : صح جنو؟
جنى تهز راسها : صح
ماجد يأشر على خده: زين وين بوسة بابا؟
باسته جنى ... ونزلها واخذ المبخرة طالع : يمه انتبهو لها
ام تركي : ابشر من عيوني
*************************
البنات جهزو كلهم .... ندى طالع شكلها جنان ببدلة الحمل
اللي لابستها ... لونها كان فستقي... ويزينها شك كريستال
بلون اغمق من تحت الصدر... وميك اب ناعم بنفس اللون
فاتن كانت لابسة فستان طويل لونه بحري ... تزينه طباعة
خفيفة بالذهبي على الصدر.... اما عبير .. فكانت كاشخة
بفستان بنفسجي لنص الساق .... ناعم يزينة بروش بوسط
الصدر ....اشكالهم كانت حلوة وكلها نعومة ...
اما اريج فكانت متألقة بفستان بنك ... مشكوك بخيوط حريرية
ومنثور عليه كريستالات خفيفة .... الميك اب كان سموكي
مبين جمال عيون اريج الواسعة .... وروج وردي فاتح ...
وشنيون نازل ... واكسسوار ناعم على الشعر...
الناس تجمعو ومراسم الفرح بدت والشيخ يكتب العقد ...واريج
كانت قاعدة مع سجى صديقتها...
اما البنات تحت يستقبلون الضيوف ... خالد نادى فاتن وراحت له
فاتن: هلا خلود
خالد: شوفي لي الطريق بطلع لأريج
فاتن: زين .... وشافت له الطريق وطلعت هي وياه ... دخلت فاتن
وخذت الدفتر عشان توقع اريج..
اريج خذت الدفتر بايدين ترتجف ومو عارفة توقع : وين فتون
فاتن تأشر لها : هنا
وقعت اريج .. وخذت فاتن الدفتر وحبتها على خدها: الف مبروك
اريج: يبارك بعمرك
وراحت لخالد اللي ينتظرهم برا اخذ الدفتر وتكلم بصوت عالي: مبروك
اروج تستاهلين وربي كل خير
اريج باحراج: يبارك بعمرك
الزفة خلاص هذا وقتها واريج تضبط شكلها
فاتن: يالله قولي بسم الله
اريج: بسم الله... ونزلت ... العيون كلها تطالعها ... ويذكرون الله عليها
خواتها وبنات عمانها انواع التصفيق والتشجيع
وصلت للمكان المخصص لها وقعدت والكل يبارك لها وهي توزع
ابتسامات على الكل ...رقصو البنات عندها وسلمو عليها ....
جات بشاير تقول للبنات يتغطون اخوها بيدخل ....
فاتن: ابوي واخواني بعد بيدخلون
بشاير: اي هذاني بلبس عباتي ...وراحو البنات يتغطون ....
عند الرجال بيدخل ابو تركي وعياله واكيد بندر ...
ماجد: فهد قوم ماتبي تدخل؟
فهد: لا راحت للمجلس ادخل اسلم عليها
ماجد استغرب اول مرة فهد يفرط بدخلة على حريم بس تركي
ابتسم بخاطره .. فعلا فهد احترم كلامه واحترم اخته وهو يدري
فهد اصيل ولو انه يعيبه تهوره...
دخلو الشباب ووقف قلب اريج من شافت بندر نزلت راسها ..
قرب منها وهمس: الف مبروك
بلعت ريقها وماتكلمت ...سلمو عليها ابوها واخوانها ....
ابو تركي: الف مبروك يابنيتي
اريج: يبارك بعمرك..
من شافت اخوانها فكت شوي من احراجها وقعدت تضحك معاهم
وبندر يتأمل برائتها اللي يتذكرها من طفولتها .. للحين ماتغيرت
بريئة .. عذبة.. وجذابة ...طلعو ابوها واخوانها ... وجو ام بندر
واخته يسلمون عليه ...قربو له الشبكة والدبل ....
لبسها وعيونه تتأملها ... قربت فاتن من اريج: يلا قومي المجلس
فهد بيسلم عليك وعشان تاخذون راحتكم بعد
ارتبكت اريج ... وبان على ملامحها .. قام بندر وقامت معاه
مشت بخطوات ثقيلة ... ودخلت لقت فهد وخالد ينتظرونها ...
سلم عليها فهد وحضنها .: ياعمري يا اروج الف مبروك
بندر سحبه من يده: وخر عن المدام لو سمحت خلاص صارت لي
دفه فهد: اقول انت اللي وخر لاصارت ببيتك امنعني عنها
ويحضن اريج زود عشان يقهر بندر ... واريج المسكينة ساحت
بهدومها ... وخر عنها فهد وهو يضحك .. قعد بندر وقعدها جنبه
وقعدو فهد وخالد معاهم
بندر: سلامات انت وياه؟.. وش عندكم قاعدين؟
خالد: والله بيتنا وانا حر اقعد بالمكان اللي ابي
فهد: اي وانا بعد بيت اختي
خالد: اقول انت تقلع خل بيت اختك عنك
فهد: اوف جحدني النذل
بندر: اقول اطلع انت وياه كملو هواشكم برا بقعد مع زوجتي
اريج ولأول مرة نطقت: لا خلهم يقعدون
هنا خالد فقع ضحك : هههههههههههههههههههه للحين تخاف منك
يامجرم وش مسوي بأختي
اريج شوي وتصيح وفهد اللي كان ميت ضحك : خالد قوم نطلع
المسكينة بتصيح وربي
وطلعو الاثنين وهم يضحكون ... التفت بندر لأريج: شلونك اريج
اريج: الحمدلله
مسك يدها وحاولت تسحبها بس ضغط عليها بيده : جد تخافين مني؟
اريج ماعرفت وش تقول هي بطبعها قوية وماتسكت عن حقها
وماتخاف الا من اللي خلقها
بندر يبي يتأكد: هاه اروج؟
اريج بتردد: لا
بندر قعد يتأمل شكلها: احلويتي كثير .... واليوم طالعة قمر
استحت اريج وتوردت خدودها ..وكمل: انا مابي اتكلم عن نفسي
واصير كذاب بس ان شاء الله ربي يقدرني واسعدك واعيشك مثل
ماتتمنين ...وباسها على جبينها... قعدو حول النص ساعة يسولفون
واريج ارتاحت شوي وصارت تسولف بكلمات قليلة
قطع انسجامهم خالد: يالله يا ابو الشباب ماودك تقوم؟
بندر: استغفر الله وانت ماتستأذن؟ كذا تطب على الناس فجأة
خالد: لا والله بيتنا واستأذن فيه؟
بندر: اقول تراك غثيتنا من اليوم بيتنا وبيتنا
خالد: ياخي ودي اهزأك بس احبك ما اقدر
ضحك بندر وضحكت اريج .. واستأذن بندر بيطلع: زين اريج
اشوفك على خير وراح اكلمك الليلة
خالد وهو طالع معاه: لا ماشاء الله مرقم اختي ..
بندر: زوجتي يامفهي اكلمها وقت ما ابي
خالد: لا ماعندنا بنات يكلمون
اريج شافتهم وهم يستهبلون وطلعت وهي تضحك عليهم
( يالله يجنن هالبندر .. روحه مثل روح اخوها خالد ...)
طلعت وقعدت مع البنات .. وكملو البنات رقص وضحك واستأذنو
الكل رايحين ....
فهد وهو رايح للبيت وامه معاه : هاه يمه عساك استانستي
ام فهد: الحمدلله ياوليدي .. الله يوفقها يارب... والتفتت على فهد
وكملت: الا يمه متى تبي تفرح قليبي؟
فهد: متى مابغيتي .. بس انتي شاوري على اللي تبين
ام فهد تهلل وجهها واستغلت الفرصة مادام فهد ما اعترض:والله
هذي الساعة المباركة ياوليدي ... والله اني خاطري في بنت
عبدالعزيز ...جمال واخلاق وذوق وكلن يحبها
فهد : من هي بنت عبدالعزيز<<يستهبل الأخ
ام فهد: عبير ماغيرها
فهد استانس ان امه حابتها وهي بعد تبيها ولقاها فرصة يتمم
اللي بقلبه : خلاص يمه شورك وهداية الله
ام فهد: ابشر يمك لا من رجعو من الطايف اكلم امها لك
فهد انقهر يعني قدامه هالإجازة كلها شلون بيصبر : يمه
كلميهم بكرة.. ومتى ماردو بكيفهم
ام فهد: الحين انت مخليني انتظر كل هالسنين ويوم قلت لك
اصبر اعتفست .. باتسر ماشين ولا قعدو هناك يصير خير
فهد استسلم : زين على رايك.. الله يقدم لي اللي فيه الخير
**************************
مجتمعين على العشا ببيت خالها طلال ...عبير وناستها ماتوصف
مع بنات خوالها .....فالينها ومستانسين آخر وناسة ... قعدو تعشو
وسهرانين من ناحية عبير علاقتها جدا صارت سطحية مع حاتم احتراما
لكلام اخوها تركي اللي اكيد اعرف منها بمصلحتها ... والحلو ان
حاتم تقبل قرارهم وما اعترض ... وهالشي خلاه يفكر جديا يكلم
اهله انه يبي عبير .. واهله اللي استانسو ورحبو بالفكرة ووين
يلقون لولدهم احسن من عبير .... بعد ماطلعو بيت خالها محمد ...
راحو البنات لغرفة هديل وكملو سهرتهم ... اما ام عبير اللي استأذنت
بتطلع شقتها قعدتها ام حاتم شوي تبي تفتح معاها الموضوع
ام عبير: هلا فاطمة؟
ام حاتم: احنا اهل ومايحتاج اسوي مقدمات وغيره .. انتي عارفة
ان حاتم يبغى عبير ... ومافي احسن من هذي الفرصة اكلمك فيها
ام عبير فهمتها بس ماعلقت : لاتقولين بدري والبنت صغيرة ...
احنا نخطبها وانتو حددو كل شي براحتكم
ام عبير: طيب انا راح اخلي عبير ترتاح كذا يومين وبعدها راح
افاتحها في الموضوع وماراح يصير خاطرك الا طيب
ام حاتم: نخلي الملكة في العيد والزواج في الصيف .. ويصير
باقي لها سنتين وتتخرج
ام عبير: يافاطمة لا تقررين حاجة وانا لسى ماكلمت البنت
ام حاتم : طيب اللي يريحك... واكيد عبير ماراح ترفض حاتم
وهي تعرفه
ام عبير: ان شاء الله
طلعت ام عبير شقتها تبي تريح شوي ... نامت حول النص ساعة
وقامت تصلي الفجر...شافت عبير توها جاية من بيت خالها
ام عبير: هلا عبورة لسى سهرانة؟
عبير: اي والله مرة مشتاقة للبنات
ام عبير: طيب ياقلبي روحي صلي وتعالي ابغاكِ في موضوع
عبير هزت راسها بالموافقة
بعد ماصلت دخلت على امها لقتها فارشة سجادتها .. وقاعدة تسبح
احترمت خشوع امها وماحبت تقاطعها .....
بعد دقايق التفتت ام عبير وشافتها قاعدة على طرف السرير: هلا
قلبي
عبير:اهلين هاه ايش هو الموضوع؟
ام عبير: اليوم خالتك فاطمة مكلمتني تبغاكِ لحاتم
عبير استغربت : حاتم خطبني؟
ام عبير: بصراحة هو من زمان مكلمني بس انا أجلت الموضوع
عشان تنتبهي لكليتك ودراستك ...
عبير: وانا فعلا ما ابغى اتزوج الا بعد ما اتخرج
ام عبير: شوفي حبيبتي انا ما ابغى منك رد الحين ... الزواج نصيب
والانسان مايعرف متى يجي له نصيبه... انتي فكري واستخيري
واذا وافقتي ماراح يصير حاجة الا بموافقتك .. يعني ملكة وزواج
واي شي ثاني .. انتي بتختارين الوقت اللي يناسبك
عبير: ان شاء الله
ام عبير: خلاص حبيبتي روحي نامي الحين ولا تفكرين الا بعد
ماترتاحين وخذي الوقت اللي يريحك محد راح يستعجلك
عبير هزت راسها واستأذنت امها: يلا ماما تصبحين على خير
وحبت راسها
ام عبير: وانتي من اهل الخير حبيبتي....
*******************************
قاعد مع اخته وامه بصالة بيتهم يسولفون ...واستغل الفرصة يعلمها
فهد: باركي لي نويت اعرس
ام تركي استانست: يااجعله مبارك واخيرا انفكت العقدة
فهد: وش عقدته انتي الثانية .. انا انتظرت اتخرج واتوظف واستعد
ويوم شفت نفسي مستعد قررت اعرس
ام تركي: يعني ادور لك
ام فهد: لا عروسه مختارتها من زمان وهو اقتنع بكلامي ( ماتدرين
والله يا ام فهد ان ولدك ميت عليها ويبيها )
ام تركي: من هي؟
فهد: عبير بنت رجلك
ام تركي: وعععع قلو بنات خلق الله ومالقيت الا بنت سويرة؟
فهد: الحين بس ودي اعرف وش مسوية لك كارهتها
ام تركي: والله عاد كرهي لها من الله
ام فهد: والحين بتهاوشون قدامي؟
ام تركي: لا يمه ما انتهاوش قاعدين نسولف
ام فهد: وانتي ماريحتي المرة حتى وهي بعيدة عنتس .. بعدين
وش فيها بنت سارة ... حلا وزين واخلاق وكلن يتمناها .. ولو
دورت لفهد مانيب لاقية له احسن منها .. وانا تسذا من الله هالبنية
خاشتن قلبي واحبها
ام تركي: بس عبير مخطوبة لولد خالها
فهد انصدم وعجز لسانه عن الكلام وكملت ام تركي : ابوها معلمني
ان ولد خالها خاطبها من زمان ويوم راحو لهم هالمرة اكدو الخطبة
فهد قام مصدوووم حس انها خانته وان كل اللي حوله خدعوه كلهم
قالو له انها تعتبره مثل اخوها .... ليش يوم تعلق فيها ويبيها تروح
لغيره ... اخذ مفاتيحه وطلع راكب سيارته... والهم اللي بقلبه اكبر
من انه يتحمله
*
*
*
*
*
انتهى الجزء الحادي عشر
بانتظار تفاعلكم
•غٌـمـوضٌ ـآٍْاْلٍْــورد•
|
03-07-09, 07:11 PM
جديد مواضيع قسم القصص المكتمله من وحي قلم الاعضاء
العرض العادي
