كاتب الموضوع :
غموض الورد
المنتدى :
القصص المكتمله من وحي قلم الاعضاء
الجزء العاشر
*
*
*
*
راحت تركض لاريج مقهورة وحاسة بالإهانة ... اول ماشافتها
اريج تفاجأت: عبورة وش صاير؟
عبير وهي تصيح: ابغى اروح البيت الحين
اريج: خالتي فيها شي؟
عبير: لا لا محد فيه حاجة انا بروح البيت اريج عشان خاطري
اريج: زين وش صاير لك؟
عبير: اريج الله يسعدك ماني ناقصة ابغى ارجع بيتنا وخلاص
كلمي السواق بسرعة
اريج تطالعها مستغربة: زين اللي يريحك بس لاتنسين اذا وصلتي
كلميني
عبير وهي تلبس عباتها ونازلة: طيب مع السلامة
طلعت وكان السواق توه يشغل السيارة توجهت للسيارة وناداها
يبيها تلتفت له: عبير
سرعت خطواتها وركبت السيارة بدون حتى ماتلتفت له: غلام
روح البيت بسرعة .... وفي خاطرها تتهدد وتتوعد فهد ماراح
تعدي حركاته على خير .. ومستعده تخربها مع الكل بس محد
يشكك باخلاقها وتربيتها...
وصلت بيتهم وراحت لأمها اللي تفاجأت من شكلها: بسم الله
حبيبتي ليه تبكين؟
عبير ركضت لامها حضنتها: الحقير ياماما يتهمني اني اغازل
والله ماسويت حاجة غلط كنت دوبي مكلمة حاتم
ام عبير مسكتها وقعدتها ونادت على الشغالة تجيب لها كاس
موية: حبيبتي اجلسي واهدي وعلميني ايش صار معاكِ
عبير خذت الكاس من الشغالة وشربت وهي تشاهق:فهد
ام عبير: مين فهد؟
عبير: خال اخواني
ام عبير: سوا لك حاجة؟
وحكت عبير امها بكل شي صار معاها ... وطرطعت وارتفع
ضغطها على هالسخيف اللي قاعد يتبلا بنتها
عبير: ماما والله ماراح اسكت له . راح اقول لخالد كل اللي
صار معايه
ام عبير: لا خالد لسى صغير ومتهور واشياء زي كذا مايعرف
يتصرف فيها ... انا عارفة من اللي راح يجيب لك حقك
ويخليه يجي يعتذر منك وبدون مشاكل كمان ...
عبير: واللي قهرني زيادة يناديني وانا طالعة .... شايفني
رخيصة عشان آخذ واعطي معاه..
ام عبير: خلاص قومي بدلي خلينا نتعشا ونامي وبكرة
كلمي تركي يجي لك بعد الجامعة وقولي له كل حاجة
وانا عارفة ومتأكدة ماراح يوقف فهد عند حده غيره
ابوك ما اقدر اقول له .. انتي عارفة قد ايش يحبك ويفضلك
عن باقي عياله ... وراح يتهور لو عرف السالفة
عبير: ان شاء الله الصباح راح اكلمه...
************************
بعد محاضرتها الأولى حكت عبير صديقتها شهد كل شي
صار معاها
شهد : ههههههههههههههههههه
عبير تضربها على كتفها : شهد شايفتني انكت؟ يغلط عليه وانتي
تضحكين؟
شهد: والله علقتي الولد يابنت .. صاير مجنون ويغار
عبير وعلامات استفهام علت راسها: نعمممم؟
شهد: الولد يحبك مايبي لها كلام.. ولا وش يفسر تصرفه
كلمتي ولا غازلتي انتي مو من اهله ....هو سمعك وانتي تكلمين
حاتم واكيد يحسب بينكم شي واشتعلت نار الغيرة بقلبه
عبير: شهودة عارفة انك رايقة؟ حتى لو صحيح اللي قلتيه
تصرفه غبي ومو من حقه يسوي اللي سواه... انا لي بابا
واخواني اذا غلطت هم يربوني بس هو ماله علاقة فيه
شهد: انا مو قاعدة ابرر له انا افسر لك تصرفه
عبير: شهودة حقدت عليه سخييييف وماراح ارتاح غير لما اخذ
حقي منه وضربت على جبهتها : يووووه نسيت اكلم تركي من
البيت جوالي طاح مني واكيد تكسر....شهودة هاتي جوالك
بكلم ماما تكلمه
عطتها شهد الجوال وكلمت امها تكلم تركي يجيهم البيت بعد
العصر ...
*************************
توها واصلة البيت على الأذان راحت لغرفتها ركض تبي
تاخذ لها دش سريع قبل جية اخوها....
تسبحت وبدلت ملابسها على جية الشغالة تبلغها ان تركي
ينتظرها تحت.. تعطرت ونزلت ... سلمت عليه وقعدت
في البداية خذتهم السوالف عن الدراسة والجامعة ... بعدها
فتحت عبير قلبها وحكت لاخوها كل شي
تركي: الواطي والله لا ربيه ... يحسب الناس على حكمه يامر
وينهي ومحد وقفه عند حده ...
ام عبير: انا كلمتك لاني عارفة ماراح يجيب حق بنتي الا انت
بدون مشاكل مع ابوك وامك ... لاني ما ابغى المشكلة تكبر
وتصير بين خالك واختك ... واخاف عبير تخسر اخوانها
تركي: والله ياخالتي ( تركي يقول لها خالتي احتراما لانها مرة
ابوه مع انها تقريبا بنفس عمره ) هذي اختي وهذا خالي
ومادامه الغلطان اختي اغلى عندي منه وقص بلسانه اللي
يجيب طاري وحدة من خواتي بالشينة... وانتي ياعبير حاتم
ماهوب اخوك عشان تدقينها سوالف معاه...الولد ماعاد هو صغير
يبي يسأل عنك يسأل عمته
عبير: بس ياتركي احنا دايم كذا وتعودت من يوم انا صغيرة
واحنا مع بعض
تركي: وانا اختي مابي احد يغلط عليها او يلقى عليها زلة..
ولا تحطينها بخاطرك ترى مانيب قاسي معك بس انا اكبر
منك واعرف بمصلحتك ... مكالماتك مع حاتم انهيها ...
وانا ادري انك ماراح تسوين شي من وراي واذا
خالتي ماراح تقول له انا بنفسي بكلمه .. كل شي وله حدود
عبير: والله ياتركي اني طول عمري اعتبره زي اخويه وماعمري
تماديت في كلامي معاه
تركي : وانا عمري ماشكيت انه يجي منك خطا بس حاتم ولد
خالك يعني مايجوز هاللي تسوينه ...وانتي تتصرفين باللي
تعودتي عليه بس اللي مايعرفك ظن فيك الشينة ...
واسلم حل اقصري الشر ومكالمات معاه انتهينا منها.. زين؟
عبير: ان شاء الله
رفع تركي راس اخته: مو مقتنعة بكلامي؟
عبير: بالعكس انا ماعندي اعتراض انت اللي اكبر مني واكيد
عارف مصلحتي اكثر مني
تركي : والله والله ياعبير اللي سواه فهد ماراح يتكرر..وماعاش
من يغلط على بنت عبدالعزيز وانا حي
ام عبير: الله يخليك لهم يارب وانا عارفة انه ماراح يساعدني
الا انت ومن ناحية حاتم تطمن مستحيل يكسر بكلمتي .. راح
اكلمه اليوم
تركي: يالله اجل انا بروح اتفاهم مع فهد ... وانتي ياعبير انتبهي
لنفسك ,,,, وحطي في بالك كل موقف يصير لك بهالدنيا اعتبريه
درس وتعلمي منه.. وكلنا نخطي ... بس الشاطر اللي يتعلم من
خطاه
قامت عبير وحبت راس تركي: الله يخليك ليه يا اطيب اخو في
الدنيا
ابتسم تركي وطلع وعبير تحس برضى كبير انها قدرت ترتاح
يوم رمت همها على اخوها اللي اكيد ماراح يخذلها...
************************
ماشي بسيارته ومايدري كم كانت سرعته .. وبصدره يحس نار
من تصرفاته خاله .. راح له وهو يتوعد مايخليها له ... اول
مادخل مالقى احد ..راح لغرفة امه مضاوي .. لقاها فارشة سجادتها ونايمة عليها
ماحب يزعجها ورقى لغرفة فهد .. اكيد نايم هالحزة
فتح الباب وشغل الانوار ... لقاه نايم ... فهد اول ماحس
بالنور عبس راح له تركي وسحب الغطا عنه : فهيدان قوم
ابيك
فهد قام مفزوع ..شاف تركي معصب والشرر يتطاير من
عيونه:وش عندك مسوي لي ازعاج؟
تركي: قوم اقعد ابي اتفاهم معاك
فهد ارتبك اكيد علمت تركي وماعرف وش يقول بس افضل وسيلة
للدفاع الهجوم: خيرررر وش عندك ؟ جايني مقلق راحتي
تركي سحبه من فانيلته: الحين يالخايس تمد يدك على اختي وتتكلم
عليها بأي حق؟... تحسب ماوراها رجال.. ولا تظنها مثل
هالخمة اللي تعرفهم
فهد: وخر زين انا ماسويت شي بعدين يا اخي احترمني انا خالك
تركي: تخلخلت ضروسك انت اللي احترمني اكبر منك بـ 12 سنة
يوم امي مضاوي تجيبك وانا امشي مع الرجاجيل مو مثلك يالرخمة
فهد: احترم نفسك ولاتغلط
تركي: وانت تعرف الغلط؟ يوم تمد يدك على بنت الرجاجيل
وتتكلم باخلاقها ؟
فهد حس انه تركي مو مخليها تعدي هالسالفة: شوف انا ما انكر
اني غلطت بس انا سمعتها وتنرفزت ومدري شلون تصرفت
وقتها وبعدها تندمت
تركي: ومن انت عشان تتصرف؟ تراها ماهيب من بنات اختك؟
بعدين وش موديك للحديقة الخلفية؟
فهد : عادي كنت اتمشا وشفتها
تركي: اي صح عليك يالاخلاق ... تشوف بنت الناس وماتغض
البصر... ما اقول الا الله يسامحك يمه مضاوي على هالدلع اللي
مدلعتك حسافة والله ماطلعت رجال
فهد:اقول تراني ساكت لك من اول تغلط ... رجال وارجل منك
بعد
تركي: واذا انت رجال قرب من اختي بعد ..او بس المس لها
طرف وربي يافهد ياغرفتك هذي لتكون قبرك
وبيتنا اذا صارت عبير فيه لاتجيه وتراه يتعذرك
فهد: تطردني من بيت اختي؟
تركي: مادامك مااحترمت حرمة هالبيت انا امنعك منه وماعندي
في اكبر راس وربي لوقف في وجه الكل... لك تجي بأي وقت
بس لاعرفت ان عبير موجودة طريقك اللي جيت منه ارجع له
فهد مقهوووور ومطرطع هو اللي جابها لنفسه بغبائه وتهوره
خسر احترام عبير وكلام تركي صحيح وعين العقل
سكتو يوم سمعو ام فهد تنادي على فهد ( ام فهد كانت نايمة ومن
سمعت صوت الصراخ فزت مفزوعة من نومها ولانها مرة كبير
ماتقدر تطلع لهم فوق وقعدت تصوت لهم)
تركي : هذي امي مضاوي تنادي ... وعلا صوته: زين يمه الحين جايين
والتفت لفهد وكمل: اللي صار هالمرة مابيه يتكرر.... وغلطة وتعلم
منها . كلامي مفهوم وماراح اعيده.. الحين قوم بدل واطلع معاي لازم
تعتذر من خالتي على كلامك كله
فهد ما اعترض هو بداخله معترف بخطاه: زين روح لامي مابيها تقلق
ورجاء تركي مابيها تعرف ومابي هالسالفة توصل لنورة
تركي: لو بعلم احد ماجيتك قوم ولا نتأخر,,,,,,,, ونزل
راح لقى ام فهد قاعدة بالصالة ومتوترة : خير يمه وش فيكم تهاوشون؟
تركي يبي يصرف السالفة قال وهو يحب راسها ويقعد
جنبها: مافي شي بس الشغل متأخر وفهد اغلب وقته نوم
وجيت ابيه يشوف اشغاله بالشركة
ام فهد: الله يهداكم يمه روعتوني مادريت وش عليه تتذابحون
تركي ضغط على يدها: السموحة يمه وقام يوم شاف فهد نازل:توصين شي يالغالية
ام فهد: سلامتك يمه اقعد شوي وين رايح؟
تركي: ابد اشغال وابي فهد معاي.. وان شاء الله ماراح نطول
ام فهد:الله يحفظكم ياوليدي
فهد سلم على امه وطلع ورى تركي ... وهم بالسيارة الجو كان
متوتر ومحد يكلم الثاني .. قطع صمتهم تركي بحزم: الحين انت
ورا ماتعرس وتجيب مرتك تقعد عند امي مضاوي
فهد ماتكلم بس التفت لتركي وهو رافع حاجبه .. تركي بدون
مايطالعه كمل: كاسرة خاطري انت لاهي بدنيتك عنها ..
وامي وخالاتي مقصرين معها واغلب وقتها قاعدة لحالها
ومالقت لها من يونسها...
فهد: ان شاء الله لا ضبطت كل اموري اعرست وخليتها تفرح فيني
تركي : وش قاصرك انت؟ كل شي عندك وظيفة ومال وبيت
وش تبي بعد؟
فهد: ابي اكون مستعد نفسيا
تركي: مايبي لها شي انت نظف راسك من هالخراب اللي فيه
وربي يسهل لك امورك
فهد: يعني ما اخلص من محاضرات خالد الا تطلع لي انت
تركي: وانت ماتحب اللي ينصحك؟ ترى مانتكلم الا لأنا نحبك
واتوقع مايحتاج اعرفك وش كثر غلاتك عندي
وصلو بيت ام عبير ونزل تركي وقال لفهد ينتظره بالسيارة
اتصل في خالته تلبس عباتها وتنزل
نزلت ووقفت عند الباب من داخل ونادى تركي فهد يجي يعتذر
منها كان يكلمها وهو منحرج ومو داري وش يقول: السلام عليكم
ام عبير: وعليكم السلام
فهد: السموحة ياخالة على اللي قلته وسويته ....ادري انه مو من
حقي بس الشيطان غلبني ... وهذاني جاي لكم اعتذر
ام عبير بصرامة: بنات الناس مو لعبة عندك ... وبنتي لا تتدخل
فيها لا بحق ولا باطل ابوها واخوانها لسى عايشين وهم اللي
بيعاقبونها لو غلطت ...هذي المرة انا حليتها بالطيب .. لو صار
لبنتي منك حاجة مرة ثانية او جاتها كلمة منك ماتلوم الا نفسك
فهد انقهررر منها بس ماله وجه يتكلم وانقذه تركي: ياخالتي هو
حس بخطاه وهاللي صار ماراح يتكرر وعبير في عيوني
فهد حب يطلع على الأقل بصورة حلوة : اعتذر مرة ثانية وكلامك
كله على راسي ووعد مني والله ماراح يجيها شي مني ابد ...
ام عبير: ان شاء الله
واستأذنوها رايحين
تركي: تبي اوصلك البيت؟
فهد: لا روح لبيتكم
تركي: زين مشينا
*************************
اريج قاعدة ترتب بغرفتها جاتها الشغالة وبيدها جوال
ميري: مس هذا في جوال انكسر تحت في الحديقة
اريج استغربت بس شافته وعرفت انه جوال عبير استغربت
وش صار؟ عبير ماكلمتها وتدق عليها من امس مغلق خذت الجوال
لقت الشاشة مكسورة... والازرار طالعة <<< يعني كل قطعة لحالها
خذتهم وحطتهم: زين روحي انتي الحين
اتصلت ببيت ابوها : السلام عليكم.. شلونك خالتي؟
ام عبير: هلا حبيبتي وعليكم السلام ... انا الحمدلله بخير انتي كيفك؟
اريج: زينة الحمدلله.. خالتي وين عبير؟
ام عبير تنادي عبير من المطبخ: عبورة تعالي كلمي اريج
عبير جاية ركض: اهلييييييييييين اروج
اريج: وخري زين الحين ابيك تعلميني وش صار امس؟
عبير: ماصار شي اذا جيت عندك اقول لك ماينفع في التليفون
اريج: الحين بجي لك وتعلميني كل شي وجوالك عندي .. الجهاز
ترحمي عليه عطاك عمره ... بس شريحتك ماصار فيها شي
عبير: ههههههههههههه لا لاتجيني اليوم بكرة عندي كويز ومرة
صعب ولسى مافتحت المنهج
اريج: طردة يالخايسة؟ ضفي وجهك بس وسكرت الخط يقال لها
زعلانة
بعد صلاة المغرب دخلو تركي وفهد وسلمو عليهم ....قامت غادة
تسلم على خالها : هلا والله فهود تو مانور البيت
فهد يبتسم وهو يطالع في تركي: يا هلا وغلا ياناس هالاخلاق
السنعة والذرابة كلها ورا ماتعطين رجلك منها اللي مانشوف
ابتسامته الا من العيد للعيد
تركي يبتسم بخاطره بس يبي يبين لفهد انه بعده
ماسامحه:الاخلاق السنعة مخليها للي يستاهلونها...
فهد حزت بخاطره بس عداها والتفتت لأريج اللي مبوزة:وش
عندها الاخت قافلة اخلاقها؟
اريج عرفت انه يقصدها: عبيروه الخايسة طاردتني
تركي ضحك: ليش؟
اريج: كنت بروح لها وقالت لي عندها كويز وتبي تذاكر
غادة: وهي الصادقة اجل تبينها تقابل وجهك ولا تلتفت لدروسها
اريج: لا بس تقولها بطريقة حضارية اكثر
ضحكو كلهم ... وفهد اللي فز قلبه من سمع طاريها استغل
انشغال تركي مع زوجته . وتكلم: ماعاش من يزعلك اروج
قومي انا امشيك
اريج بققت عيونها : هاااااه؟
فهد: وش فيك انسبهتي؟ يالله لا اغير رايي الحين وتقعدين
بالطفش وتتحسفين على عمرك
اريج: لا لا تكفى مو مصدقة فهود من متى كرم الاخلاق هذا؟
فهد: تدرين عاد اقعدي انتي مو وجه احد يحن عليك ويبي
يونسك
نطت له اريج: لا تكفى الحين جاية البس عباتي بس
فهد: لا ياشيخة اقعدي بس تذكرت اني مو جاي بسيارتي
شلون اخذك؟
اريج تحس انها تحطمت بعد ماكانت متحمسة : خذ سيارة
خلووود تكفى فهد لا تردني
فهد: وينه خالد؟
اريج: نايم
فهد: تدرين عاد تجهزي على اقل من مهلك وانا عازمك على
العشا بروح البيت وابدل واخذ سيارتي واجي لك
اريج بفرحة قامت وحبت راس خالها: يابعد عمري فهود ابشر
فهد استأذنهم وراح مع السواق اللي وصله لبيتهم
********************
اريج الابتسامة شاقة حلقها... قاعدة هي وفهد ومتحمسة: ياحبي
لك فهود عليك اوقات طلعات توسع الصدر<< تذكرت خالي
الله يسعده اللي اكبر مني بسنتين كانت تجي عليه طلعات يدق
علي ويعزمني على اي مطعم ابيه سبحان الله لها طعم غير
فهد: اقول لا يكثر بس... ترى مو مطلعك عشان سواد عيونك
هو كلام بخاطري بقوله لك... بس هالكلام ابيه بيني وبينك
اريج فتحت فمها واشتغلت عندها اللقافة: شكل الموضوع خطير
فهد: اريجوه مو وقت خبالك .. انا جاي اتكلم معاك جد
اريج خافت: زين قول ووعد ماراح يطلع الكلام لاحد
فهد سولف لاريج كل شي صار وانه يبي يوصل لعبير اعتذاره
<<يبي يحسن الصورة الأخ
اريج: انا قايلة وربي فهود يحب عبير
فهد: اريج تكفين ترى وربي من امس ماعرفت النوم مثل الاوادم
انا غبي ... جيت بكحلها عميتها
اريج: اسمعني فهد عبير مو حقة حركات كذا ولا كذا .. اختي
واعرفها.. تبيها ابوي عندك وانت تعرف غلاتك عنده وماراح
يرفضك ابد
فهد: يابنت الناس انتي افهميني .. عبير اصلا مستحيل توافق
علي بعد اللي سويته.. متكلم عليها وماد يدي وتبينها تحبني
وتقول تعال تزوجني
اريج: والمطلوب؟؟؟؟
فهد: فهميها كل شي وقولي لها اني آآسف وندمان على اللي صار
وابيها تعرف اني احبها وان غيرتي هي اللي اعمتني وخلتني
اسوي اللي سويته
اريج: فهد سوالف الحب والخرابيط خلها بعد العرس... مو
بهالطريقة بتوصل لها
فهد: استغفر الله قالو ثور قال احلبوه ( تكرمون ) الحين انتي
شلون تفهمين انا ابيها تسامحني على اللي صار .. ابيها تشيله
من قلبها يعني هالصورة الشينة اللي خذتها عن فهد تمسحها
بس فهمتي؟؟؟
اريج: زين انا بتصرف .. بس تدري عاد حلال اللي سواه فيك
تروك بعدي اخوي رجال ومايسكت عن الحق
فهد طقها على يدها: تصدقين عاد انك قليلة حيا عازمك ومونسك
وتغلطين علي
اريج: ياشيخ طير مو لله هالعزيمة ... انا عارفة فهود من متى
يتكرم ويسوي فيني معروف بس جابت راسك بنت ابوي
فهد يطالعها ووده يذبحها: انا ما اسوي معروف ياناكرة
الجميل؟؟؟ لعنبو ابليسك كم مرة طلعت من دوامي تركت
اشغالي وجيت اخذتك من الجامعة...ولا الزينة لي
ماتذكرينها يابنت نورة
اريج ترقع السالفة: بعد عمري خالي امزح الله يهداك قلبتها جد
فهد: ايه ايه صرفيها ... بس وش اقول لازم اتحمل مصالتك
وثقالة دمك مادامني محتاج لك
شهقت اريج: وتقولها بوجهي بعد؟؟ هين يافهيدان ... عبير
مانيب مكلمتها ... ودور من يساعدك غيري
فهد ببرود: بتكلمينها غصب عنك بس خلي عنك هالبربرة الزايدة
وكولي بسرعة بروح البيت بنام
اريج : زيييييييين لا تعصب علي خلني اتهنا بلقمتي
فهد بنبرة مكسورة : اروج تكفين وربي تعباااان ابي اتطمن ويرتاح قلبي
اريج تندمت على اسلوبها مع خالها: ابشر فهود وعبير والله
اعرفها طيبة وقلبها كبير ومادام انت ندمان ماراح افكها الا
لا قالت سامحته بس احذرك تلعب معاها بذيلك عبير مو حقة
هالحركات وراح تطيح من عينها
فهد: العب ؟ وش العب الله يهديك والله ماعمري فكرت اوصل لها
بأي طريقة انا محترمها واخاف عليها وربي بس مدري ليش يوم
سمعتها تكلم ولد خالها جن جنوني
اريج:حاتم تعتبره اخوها تربو وكبرو مع بعض اما حب وخرابيط
ابد ماعندها هالسوالف
فهد: الله يقدم اللي فيه الخير
اريج: آمين يارب
كملو عشاهم ووصل فهد اريج لبيتها ... وراح لبيتهم تسبقه همومه
وخوفه من ردة فعل عبير....
*************************
اول ماوصلت البيت طلعت لغرفتها بس لفت انتباهها غرفة فاتن
شافت النور شغال .. راحت لها وطقت الباب بس ماسمعت اي رد
اريج: فتووون.... انتظرت رد بس ماسمعت الا صوت وعرفت انه
فاتن قاعدة تصيح دخلت لها
اريج: فتون عسى ماشر ليش تصيحين؟
فاتن وهي مقطعها عمرها صياح: حامل يا اريج غلا حامل
اريج بلمت وماعرفت وش تقول: شلون عرفتي؟
فاتن: امي اليوم كانت عند جيراننا بيت ابو نايف وسمعت الحريم
يقولونه
اريج: وامي الله يهداها تقط الكلام وماتحاسب... فتون انتي
مؤمنة بربك اللي صار صار وسعود تزوجها يبي العيال ومليون
مرة حلف لك انك انتي الحب بالنسبة له .. وزواجه منها
ماغير غلاك بقلبه بس انتي عنيدة ومابراسك الا فكرة انتقام
وبس
فاتن: وش تبيني اسوي يعني؟ اسكت عن حقي
اريج: فتون اصحي وعن هالخبال .. اي حق اللي تتكلمين عنه
وانتي تعرفين ان هذا اللي ربي كاتبه لك وبعدين وش
راح تستفيدين لاتطلقتي؟ تتوقعين احد يرضى ياخذ وحدة ماتحمل
فاتن زاد صياحها وكملت اريج: انتي تظنين اني قاسية بس والله
ابي مصلحتك سعود يحبك والدليل انه للحين متمسك فيك وعنادك
انتي الخسرانة الوحيدة فيه... فكري بعقلك واشتري اللي شاريك
فاتن: زين ممكن تخليني لحالي الحين؟
اريج: مالت عليكم يابنات عبدالعزيز ماتبوني .. مستقوين علي
وكل وحدة تطردني بس الله لا يحدني عليكم ومدت لسانها
وطلعت ركض قبل تضرب فيها المخدة اللي رمتها عليها فاتن
راحت اريج غرفتها تضحك وتدعي ربها يهدي سر اختها
اما فاتن اخذتها الافكار لوين مايكون سعود هي تحبه وتدري انه
يحبها بس غرورها يمنعها ترجع له
تنهدت من خاطر ونامت وهي تدعي ربها بكرة يكون لها مع
الفرح موعد
*****************************
صار لها ساعة تصحيه من النوم ومو راضي يصحي ... زهقت
وصارت تسحب الغطا عنه : نصوور قوم الله يخليك
ناصر : همممممممم
ندى: حبيبي يالله عاد ترى مليت ماصار هذا كله نوم
ناصر فتح عينه : كم الساعة؟
ندى: قوم الناس تصلي العصر ...
فز ناصر مفزوع: وليش ماقومتيني للصلاة
ندى: والله صار لي ساعة اصحيك وانت ماتحركت
ناصر راح لدورة المياة يغسل ويتوضا وطلع يصلي شافها لابسة
وواضح انها تبي تطلع: على وين؟
ندى: ابيك توديني لاهلي
ناصر: واروح الاستراحة؟
ندى عصبت: اي ياحبك لهالطاري ماتصدق تلقى فرصة.. انزل
سلم على امي وابوي واخواني وعقب روح اي مكان تبي
ناصر: زين زين لاتعصبين اخاف ولدي يصير فيه شي
ندى: اي هذا اللي يهمك ولدك ولا انا بحريقة
قرب منها ناصر: افااا انتي الغالية والله
دفته ندى تبعده: نصور صل بيأذن المغرب وانت توك ماصليت
صلى ناصر وعقب راحو لبيت اهلها ...
دخلت تشوف الطريق ونادت ناصر يدخل بعد ماخلت اريج تطلع
غرفتها شوي
ندى: يمه ابوي وينه؟
ام تركي: والله بشركته للحين هالايام مشغول الله يعينه ويسهل اموره
ناصر: الا وينه ماجد ماينشاف؟
تركي: ماجد بدوامه اغلب الوقت ولا مشغل نفسه على النت يعني
تقدر تقول يفضل يكون لحاله
ناصر: وخالد وينه فيه؟
تركي: خالد مع ابوي اليوم انا تعبان ومرهق من ضغط العمل
وهو ماقصر قال لي اجي البيت وهو يغطي شغلي
ناصر : الله يعينكم
الجميع:آآآمين
على اذان المغرب استأذن ناصر بيطلع
ندى: ناصر بعد صلاة العشا تعال مرني
ام تركي: لا وين يمرك الليلة عشاكم عندنا ولا تتأخر ياناصر ترى
عشانا نحطه مبكر عشان عمك
ناصر : ابشري على امرك
ام تركي: جعلك تبشر بالجنة
طلع ناصر وراح تركي جناحه يتجدد عشان صلاة المغرب ... اما
ندى طلعت لخواتها لقت اريج وفاتن قاعدين يتناقشون
ندى: قومو صلو وعقب كملو كلامكم شكل عندكم موضوع مهم
اريج: تعالي شوفي هالخبلة ,,,, عاجبها حالها
ندى: زين روحي انتي وانا اتفاهم معاها
اريج: بصلي وراجعة لكم
ندى التفتت لفاتن: وش فيك؟
فاتن: مادري ضايق خلقي ودي ارتاح
ندى: اشتقتي له؟
فاتن: موووت
ندى: زين ارجعي له
فاتن: اخاف تغير غلاي بقلبه
ندى بواقعية: فاتن انتو صار لكم حول السنة ماشفتو بعض اكيد
المشاعر بردت وصار فتور بعلاقتكم....بس انتي تقدرين ترجعين
حبه لك مثل اول
فاتن: زين شوري علي وش اسوي؟ انا ابي ارجع له بس بدون
مايحس اني ميتة عليه
ندى: مغرورة طول عمرك شايفة نفسك.. هو اكيد بيطلب يشوفك
روحي واقعدي معاه وارجعي .....فاتن خوذيها نصيحة مني
تقربي لربك واذكريه ولاتنسين قيام الليل صليهم لو ركعتين
خالصة لوجه الله وادعي من قلبك والله ماراح يخيب رجاك..
انا تحملت ناصر وصده سنتين يشهد علي ربي كل ليلة
اصلي اللي تيسر لي وادعيه وحتى يوم رجع لي مازلت اذكر
ربي واشكره على نعمته وعساه لايغيرها من نعمة ( وهذي نصيحة مني لكم استعينو بقيام الليل على قضاء حوائجكم ... )
فاتن:الله يعين وربي تعبت
اريج: والله محد طقك على يدك وقال اتركي رجلك وبيتك قومو
بس امي تحت خلونا نتقهوى معاها
ندى: زين بنصلي وننزل تحت
صلو البنات ونزلو قعدو مع امهم وغادة وتركي
************************
قاعدين بأحد الكوفيهات سوالف ... استأذنهم سلمان رايح لبيتهم
وبقى بندر وخالد وهاللي كان مخطط له بندر مع سلمان من البداية
بندر: اقول خلود ودي اتكلم معاك بموضوع بس مدري شلون ابدا
خالد: افا عليك مابينا هالكلام اللي بخاطرك قوله لي
( بندر صداقته مع خالد من وهم بالابتدائي وعلاقتهم مستمرة
على احلى ماتكون الصداقة ... بندر تخرج مع خالد والحين
موظف في احدى الدوائر الحكومية)
بندر: بصراحة انا قررت اكمل ديني واعرس
خالد: مبروووك والله زين ماسويت بس ماقلت لي
من هي سعيدة الحظ؟
بندر: هذا اللي انا ابيك فيه
خالد: آمرني بس انت
بندر: انا ودي اتقدم لاختك وما اتوقع اني راح القى نسب احسن
من نسبكم
خالد: تقصد اريج؟
بندر: ليش انت عندك اخت غيرها ماتزوجت؟
خالد ميت ضحك: هههههههههههههه ما اتخيل ابد انك تتزوج
اريج
بندر: وليش يعني وش قاصرني عن غيري؟ ولا مو قد المقام
خالد وهو مازال يضحك:لا والله والنعم فيك بس انت واريج كنتو
حرب داحس والغبراء ما اذكر تلاقيتو الا طق ومطقوق
بندر ابتسم: هذيك طفولة غير ...هاااه وش قلت؟
خالد: بالنسبة لي تعرف رايي وين بلقى لاختي احسن من اخو
قلبي بس لازم اشوف رايها واشاور الاهل وعقب ارد لك
بندر: على خير يارب
كملو عقبها سوالف واستأذن خالد انه بيروح البيت اهله
مجتمعين على العشا
***************************
دخل على اهله والابتسامة شاقة وجهه .... سلم عليهم وقعد
وعيونه طول الوقت تروح لاريج وهو يتخيلها زوجة لبندر
صديقه وهالشي خلاه يضحك بصوت عالي خلا الكل يلتفت له
تفشل خالد: مو مجنون ولا شي بس تذكرت موقف وضحكت
سكتوو الكل وماعلقو واكتفو بالضحك بس
قامو الرجال للمجلس الخارجي عشان الحريم ياخذون راحتهم
اريج: خلود براسه شي نظراته لي مو طبيعية
ندى: انتي لاحظتي؟ هههههههههه وانا بعد حاسة بنظراته
مسوية شي انتي؟
اريج: لا والله اصلا من قمت من نومي ماشفته توه يجي البيت
فاتن قطعت سوالفهم: يمه اذا جا سعود يبي يشوفني علميني
ام تركي تفاجأت : وش تبين فيه ولد امه؟
ندى: يمه الله يهداك هذا زوجها وفاتن مالها الا بيت رجلها
ام تركي: انتي اسكتي ولا حاكيتك ردي علي....ماقلتي لي وش
تبين فيه؟
فاتن: يمه خلاص زهقت من حالي كل يوم اصبح على هم وامسي
على غم وانا وش اللي حادني على شقى عمري.. هذا اللي ربي
كتبه لي وانا الحمدلله خلاص راضية .. وهذاك انتي عايشة مع
ابوي ومستانسة اهم شي عندي ما اشوفها ولا اجلس معاها
وخلاص
غادة: فاتن لاتتراجعين عن قرارك اللي نصحتك مليون مرة
تتخذينه زوجك تزوج معذور..وانتي اصبري واحتسبي ماتدرين
يمكن الله يجازيك باللي يفرح قلبك فيه خصوصا ان الاطباء
ماقطعو الامل نهائيا وقالو لك مع العلاج يمكن ربي يعوضك
سنين صبرك
الجميع: آآمين يارب
**************************
بعد ماراحو ناصر وندى .... وتركي راح مع زوجته وعياله
جناحهم ومابقى الا اريج وفاتن بالصالة دخلو خالد وماجد عليهم
اريج: ابشركم فتون رجعت لعقلها وبترجع لسعود
طقتها فاتن على راسها: ليش قالو لك كنت مجنونة؟
ماجد: ايه مجنونة يوم تبين تخربين بيتك والحمدلله ربي هداك
وفكرتي زين ترى المرة مالها الا بيت رجلها مادامه عازها
ومقدرها
فاتن: بس اخاف ارجع له والقاه غير ... اخاف غيرته علي النسرة مرته
ماجد: سعود اصيل ومايتغير الله يستر منك انتي لاتغيرينه على مرته
فاتن: الحين هي اختك ولا انا؟ مخليني عندها شيطان رجيم؟
ماجد: محشومة والله.. بس اعرف حركاتك.... فتون انتبهي
لاترجعين له بمشاكل .... بكرة ينفر منك ويكره قربك
فاتن: ومن قال اني ابي المشاكل .... انا زهقت من همومي
خالد: خلاص تبين نكلم سعود يعني؟
فاتن : لا لا وش تكلمه صاحي انت... خله هو لا جا وسأل عني
وقتها نادني اجي له
ماجد: مغرورة
فاتن عصبت: اوووووف وش فيكم ماسكينها علي كل من قال
مغرورة ومغرورة
خالد: لانك جد شايفة نفسك ومستحيل تتنازلين عن غرورك لاحد
حتى اغلى الناس لك
تنرفزت وقامت: انتو الكلام معكم ضايع
اريج: ههههههههههههه ياحليلها فتون تشب نار على طول الله
يعينك ياسعود على ما ابتلاك
خالد: ويعين اللي بياخذك على طول لسانك
اريج: وعععععععع من قال اني بعرس .. يقعد ببيت ابوي معززة
مكرمة تبيني اروح لواحد يعرس علي ولا وقته كله مع اخوياه ...
من شفت هموم العرس عفته
ماجد:مصيرك تتزوجين ويصير لك بيت وتستقرين بحياتك
اريج: انا مستقرة الحين
خالد يقاطعها: من جدك انت الحين تجادلها؟ هذي ام لسانين
تغلبك وماتخلي عندك حجة تناقشها فيها
اريج وهي طالعة الدرج رايحة لغرفتها: اي يعني لاتكثرون كلام
تصبحون على خير
خالد+ ماجد: وانتي من اهله
قعدو شوي وبعدها استأذن ماجد يبي ينام وخالد لحقه وبداخله
مأجل يفتح الموضوع مع اخته اليوم بعد ماشاف ردة فعلها
**************************
مخلصة محاضرتها وقاعدة مع صديقاتها ... اليوم اربعاء وودها
تروح تكلم اختها .. فهد مطفشها كل يوم اتصالات وهي ماقدرت
تكلم عبير ....
وجوالها مغلق لان شريحتها عندها .... اتصلت بشهد اللي ردت
عليها بفرحة: هلا وغلا اريج وش هاليوم الحلو اللي خلا اروج
تتصل فيني
اريج: هلا بك شهودة ... ابد تعرفين ذابحني الشوق والوله
وماقدرت اعيش بدون ما اسمع صوتك
شهد: ياويلي ياناس من هالبنت نصابة .. الكذبة جاهزة على
طرف لسانها مايحتاج تتعب نفسها وتدورها
اريج : هههههههههههههه اشوى اللي عرفتي اني نصابة ماعرفت اكمل
شهد:وججججع زين جاملي قولي والله لك وحشة اي شي
اريج: اي اي صح بس عطيني اختي ابيها ضروري
شهد: قلعتك انتي واختي خوذيها وفكوني منكم
عبير خذت الجوال وهي تضحك:هلا اروج الله يستر منك
انتي حتى صاحبتي تهاوشتي معاها
اريج: انتي شلون عايشة ... جوالك عندي ومداومة عادي شلون
تروحين وتجين؟
عبير: عادي اهلنا قبل عاشو بدون جوالات.. بعدين السواق
عارف متى انا طالعة ولو صار حاجة لاقدر الله عندي شهودة
مو مقصرة
اريج تسمع صوت شهد تصارخ عليهم : اي فاتورتي مو دافعها
غيرك
عبير تكلم شهد: نعمممم؟ انقلعي بس يابخيلة
اريج: اقول تطاقو عقب ما اسكر خلصتي محاضراتك؟
عبير: لا لسى باقي لي محاضرة الحين رايحين لها
اريج: زين بمرك بعدها تروحين معاي البيت
عبير: لا ماني رايحة ولا تمريني رجاء اذا انتي مع خالك
اريج: مو بكيفك بمرك مع غلام ونروح بيتكم ابيك بموضوع
عبير : اي موضوع؟
اريج: لاجيتك تعرفينه روحي محاضرتك وانا بجي لك لا خلصتي
عبير: اوكي يلا باي
اريج: باي
***********************
اريج بالسيارة: غلام روح لكلية عبير
غلام: جين
وصلو لعبير اللي طلعت لهم واول ماركبت: السلام عليكم
اريج: وعليكم السلام ... شلونك؟
عبير: تمام .. وحشتيني يادوبا
اريج: بالحيل وحشتك مقطعتني اتصالات ويوم قلت بجي لك طردتيني
عبير: وانتي ماسكتها عليه يعني؟ اروج والله ضغط دراسة
ومذاكرة وقرف احمدي ربك انتي هذا الترم ومتخرجة خلاص
انا لسى باقي لي 3 سنوات وكل سنة اصعب من اللي قبلها
اريج: انتي اللي جبتيه لعمرك
عبير: طموحي وحلمي وان شاء الله احققه
اريج: زين خلينا نروح نتغدا بأي مكان
عبير: لا اروج فكيني الله يخليك اولا تعبانة وثانيا مو ناقصة
معاكسات وقلة حيا اول مايشوفون بنات لوحدهم انواع المطاردات والازعاج
اريج: زين لا تعصبين
عبير: مو معصبة والله .. انتي خلينا نرتاح والليلة نطلع مع ماما
اي مكان تبغينه
اريج: والله؟؟ نروح الملاهي طيب؟
عبير: لسى طفلة ... مادري نكلم ماما واكيد ماراح ترفض..
ماقلتي لي ايش هو الموضوع اللي جايتني عشانه؟
اريج: لا وصلنا البيت تعرفينه
عبير: ارووووج تكلمي ترى من اول افكر وابغى اعرف
اريج: الكلام يبي له قعدة مثل الاوادم واخذ وعطا
وصلو البنات للبيت سلمو على ام عبير وبدلو ملابسهم ونزلو يتغدون
بعد الغدا استأذنو بيطلعون يرتاحون بعد ما اخذو وعد من ام
عبير تطلعهم بالليل تمشيهم
عبير وهي تفتح باب غرفتها : تعبانة وفيني نووووم
اريج تسحبها من يدها وتقعدها معها: تعالي بتكلم معك
عبير: يلا قولي انا اسمعك
اريج: وش اللي صار بينك وبين فهود؟
عبير: وانتي ايش عرفك؟
اريج: هو قال لي
عبير: يعني فرحان بنفسه وقاعد ينشر غسيله وانا اللي سكت
وماكبرت الموضوع؟
اريج: لاتظلمين خالي صحيح انه متهور احيانا بس طيب وحبوب
عبير: حبوب عندك انتي
اريج: زين بلا كثرة حكي واسمعيني للآخر..
عبير: قولي
اريج: بصراحة هو ندمان على اللي صار ويبي يعتذر منك
عبير: اعتذاره وصل وانا ماعندي كلام زيادة على كلام تركي وماما
اريج: عبيروووه وجع خليني اكمل كلامي ادري هو قال لي كل شي
عبير: طيب كملي ( عبير كانت تصطنع عدم المبالاة وماتدري
ليش بداخلها كان يدفعها فضول كبير انها تعرف وش
بالضبط تفكيره)
اريج: من الآخر فهود يحبك
عبير شهقت .. واريج حطت يدها على فمها تسكتها: قلت خليني اكمل
ادري خالي غبي وماعرف يوصل الفكرة صح .. بس وربي
ميت فيك من اول يوم شافك فيه متى طبعا مادري هو ما قال لي
( عبير كانت تحسبه يقصد يوم اصدمت فيه وهي طالعة للحديقة
ماتدري انه شافها قبل هالمرة )... ومايدري شلون سوا اللي
سواه يوم شافك تكلمين
عبير: بس هذا مو مبرر
اريج: عبير هو ندمان ... ويعتذر منك وقال لي ما اخليك الا اذا
قلتي انك مسامحته
عبير: ما اقدر اسامحه بسهولة... احد يشكك في اخلاقي ويغلط عليه
اريج: واذا هو متندم على كلامه؟
عبير: بس برضو ما اقدر اسامحه بسهولة
اريج: عبير فكري زين اعرفك قلبك طيب وفهود وربي من يومها
وهو كل يوم يتصل علي ومو عارف ينام من اللي بقلبه... انا
مابيه يتمادى وماخليته الين حلف لي انه مو متعرض لك ابد
ولا راح يقرب منك
عبير استانست بداخلها يوم حست بحبه واهتمامه بس بعد مستحيل
تسامحه وتخليه يحس انها رخيصة وتقبل الغلط على
نفسها: ارووج نقاش في هذا الموضوع انتهى ماراح اسامحه
على اللي صار ابدا
واذا قلبي طيب بس مايرضى الاهانة مهما يصير وخالك ماله
علاقة فيه لا من قريب ولا من بعيد.. يعني ماراح يفرق عنده اذا
سامحته او لا
اريج: عبورة شلون مايفرق وانا قلت لك يحبك... وهالكلام تاعبه
وربي والله انه كاسر خاطري عمري ماشفت فهد مكسور مثل
يوم يكلمني عنك
عبير حنت شوي بس قوت قلبها: اريج نقاشك معايه ماراح يغير
شي خالك اذا سألك قولي له انه ولا شي بالنسبة لي فلا يتعب نفسه معايه
اريج حز بخاطرها كلام اختها بس بعد عبير هذا طبعها وهذي
تربيتها مستحيل تلين لاحد
اريج: لا تحسبيني ابيك تحبينه او شي انا اكثر وحدة تعارض
هالسوالف وقلت له لا بغيتها اطلبها من ابوي بس هو يقول مستحيل ترضى علي اذا ماسامحتني
عبير: طيب ممكن انام؟ عشان نطلع الليلة
اريج تنهدت : زين نوم العوافي..... ونامت هي بعد جنب اختها
قبل صلاة المغرب صحتهم ام عبير: يلا قومو صحصحو وصلو
المغرب عشان نطلع بعد الصلاة
فزو البنات مستانسين وتسابقو على الحمام ( وانتو بكرامه )
لبسو وتجهزو وصلو المغرب ونزلو ينتظرون ام عبير تجيهم
راحت عبير راحت المطبخ تجيب لهم شي يشربونه
واريج اتصلت بخالها:السلام عليكم
فهد : وعليكم السلام.. هاه صار شي جديد؟
اريج: اي هذاني عندها..
فهد بلهفة: كلمتيها ؟
اريج: وراسها يابس رافضة اي نقاش في الموضوع وتقول كل
الكلام جاه من تركي وخالتي
فهد: ادري عن هذا كله بس سامحتني؟؟
اريج كاسر خاطرها خالها بس قالت له الصراحة ماتبيه يعلق
نفسه بوهم : تقول مستحيل تسامحك وانت بالنسبة لها
ولا شي فلا تتعب نفسك وتفكر فيها
فهد انصدم والكلام الجمة انه يرد واريج عرفت سبب
سكوته: زين اكلمك بعدين الحين طالعة وسكرت
وقعدو البنات يشربون عصير برتقال لحد مانزلت لهم ام عبير وطلعو
اما عند فهد فالهموم ملت قلبه وكلامه كان مثل الخناجر اللي
طعنت صدره فيها ماتوقع ردة فعلها عرفت انه ميت فيها وماهمها.... اي بنت هذي اللي تدري ان فهد يدور رضاها
وماتجي له.... كل البنات ينتظرون منه كلمة وحدة بس
ترضيهم وهو متغلي عليهم .. بس هي اللي طلع لها اللي بقلبه
كله ماهز فيها شعرة؟ هو ولا شي بالنسبة لها؟ يعني عمرها
ماحركت مشاعره
ابد ما اختارها ولا اختار انه يحبها هو .. حبها تسلل لقلبه بدون
استئذان ولو خير عمره ما اختار انه يحب ...حاول يتناسى اللي
بقلبه وراح مايدري وين هو رايح بس يبي يختلي بهمه
عن كل الناس
ابعتذر ... عن كل شيء ...
إلا الهوى .. ما للهوى عندي عذر ..
ابعتذر .. عن أي شي ..
إلا الجراح .. ما للجراح إلا الصبر ..
إن ضايقك اني على بابك أمرّ ...
ليلة ألم ... واني على دربك مشيت عمري وأنا
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
اتصدقي ... ما اخترت أنا أحبك ...
ما احدٍ يحب اللي يبي ...
سكنتي جروحي غصب ...
ياحبي المرّ ... العذب ...
ليت الهوى وانتي ... كذب ...
كان اعتذر لك عن هواي ...
ما أقول أنا ... كوني معاي ...
ان ضايقك اني على بابك أمرّ ...
ليلة ألم ...
واني على دربك مشيت عمري وأنا ...
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
الله كريم .. حبك ... يكون ...
همي القديم ...
وجرحي القديم ...
والله عليم ... يا أحلى العيون ...
ان الفراق ... جزا الفراق ...
ابوعدك ... كان الطريق بيبعدك ...
بامشي الطريق ...
وكان الجحود بيسعدك ...
مالي رفيق ...
ابجمع أوراق السنين ... وأودعك ...
كان الفراق اللي تبين ... الله معك ...
**********************
اليوم الخميس على الساعة 11 اريج توها راجعة من عند عبير
بعد مانامت عندها امس .... وهي بالسيارة : اريج ابي اكلمك بموضوع
اريج: وشو؟
خالد: في شخص متقدم لك وانا حبيت اكلمك قبل ما اكلم اهلي
اريج: وانا قلت مابي اعرس
خالد: اقول عن الخنبقة والخبال .... الولد مافيه شي ينرد رجال
والنعم فيه.. وانتي تعرفينه زين
اريج بفضول: من هو؟
خالد: بندر
اريج بانفعال: وععععععع بنيدر الدب مابيه لو هو آخر رجال بالعالم ما اخذته
خالد: اولا ماعاد هو بدب .... ثانيا ليش ماتاخذينه؟ وش قاصره عن غيره؟
اريج: ما اواطنه يحب يحارشني ... كل ماشافني مستانسة عكر مزاجي
خالد: هذاك اول حتى انا يوم كنت صغير كان يزهقني .. بس
الدنيا تغيرت من كبرنا .. حتى انا وانتي ماعاد احنا اللي صغار..
والدليل ان بندر خطبك مع انه مايتذكر الا البنت العوبا اللي
لسانها يلوط اذانها هو صح للحين لسانك طويل بس تغيرتي كثير وصرتي احلى
اريج: بس بعد مابيه
خالد: وانا ماجيت اخذ رايك الحين انتي فكري واستخيري واللي
ربي كاتب لك فيه الخير بييسره لك
اريج: مابي افكر بشي الحين ابي اتخرج وارتاح
خالد: وانا قلت بزوجك قلت فكري
اريج سكتت وماعلقت وخالد ارتاح لسكوتها حس ان طوفان
الرفض القاطع انحسر واكيد الفكرة دارت براسها وهو راح يحاول
يقنعها خصوصا ان بندر شاب اي بنت تتمناه
دخلو البيت ورقت لغرفتها غسلت وبدلت ملابسها وانسدحت على
سريرها وهي غارقة ببحر افكارها....( الله يالدنيا بعد هالسنين
بندر يخطبني... شلون طريت على باله؟ ... معقولة كان حاطني
بباله من زمان؟....ياترى شلون شكله الحين؟ خلود يقول
ماعاد هو دب )
نفضت الافكار من راسها وهي تدعي ربها يقدم لها اللي فيه الخير....
*
*
*
*
*
انتهى الجزء التاسع
بانتظار تفاعلكم
•غٌـمـوضٌ ـآٍْاْلٍْــورد•
|
30-06-09, 09:09 PM
جديد مواضيع قسم القصص المكتمله من وحي قلم الاعضاء
العرض العادي
