كاتب الموضوع :
صبى الاوراق
المنتدى :
القصص المكتمله من وحي قلم الاعضاء
السلام عليكم ورحمة الله وبركاته
اسعد الله جميع اوقاتكم بكل خير وصحه وعافيه لاتزول ..
ادري تنتظرون ..وعسى الانتظار والانشغال دوم بالطاعه ومرضاة وجهه الكريم
في ردود تاكدت انها بمثل براءة تفكيراريج ..وفي ردود بصمت انها ناس ناقده وبقـــوه ..
وبخصوص السرد بالايام واللحظات ..
خلوني شوي اخذ من وقتكم ..انا لو اشوف ان اليوم اللي بيمر مافيه احداث ماراح اسرده
لانه اكيد لحظات عاديه وماراح تاثر بمجرى القصه ..
والسرد بناء على الاحداث ..
كيف انتقل لبعد اسبوع اوشهر وحنا بعمق الاحداث
راكان واريج للتو وصلو لندن ومابعد تموا الا يوم من ارتباطهم ..
نايف للتو حس انه مرتبط هو الاخر بأنثى على قولته للتو نضجتــــــــ..
ساره والنزيف ووضع حملها..
فلاح وموضوع الخطبه..
اريج وعلاجها وهو الغرض من الامرين السفر والزواج بنظرها..
عبير وخطبة اختها وصدمتها باحلامها ..
والقادم اكثر ..تتوقعون بعد هذا كله وش الغرض من السرد الدقيق باللحظات والساعات
حبيت اوضح لكم كيفية الانتقال بعبارة بعد اسبوع او شهر وناخذ الاحداث ..
يمكن لاحظتوا اسلوب الواقعيه كثير ..فالواقع هو اللحظه وهو الساعه وهو الشهر..
والراي لكم..
مابي اطيل عليكم ..
استلموا البارتين الثامن والخمسون والتاسع والخمسون
بسم الله
قراءه ممتعه ومفيده
---البارت الثامن والخمسون ---
وبالسعـــــــــــــوديه --
وعالظهر وقت خروج الناس من المدارس --
وفي بيت ال فيصل --
صحت نوره تصلي وتتغدى وحست نفسها نشيطه ..
اتصلت على ريناد وعرفت انهم مستعدين للمذاكره وبلغتها انها بتجيها بالطريق
لبست واستعدت لهم ..
تحس بشعور غريب من تملكت اذا عرفت انها بتروح بيت خالتها حصه ..
بس هالمره مهوب فيه بس والله يوترني مدري ليه
دخلت البيت وشافت بندر عند الباب نازل من سياره محمود ومعاه ملزمه مدرسيه بيضاء
وقف وعطى نفسه احتمال انها هيــــــــــــــــ النوري مرت اخوي ههههههههههه
هلا انتي نوره
نوره بحرج--اي
هلا شلونتس وشلون ابوتس وامتس
هزت راسها بالايجاب--طيبين
استعجلت بخطواتها ودخلت البيت --(احرجــــني )
بندر (صغيره على نويفان ههههههههههه )
--------------
وفي السعوديـــــــــــه--
حيث الخبــــر -- sansk damam فرع الشرقيه
نايف -- هلا ابو فهد استريح ها وش سويت طال عمرك
ابوفهد --شفت لنا طال عمرك واحد اعرفه بيستقدم لنا 34 عامل مابين مهندس ومكانيكي وان شاء تنحل الامور
نايف--وكم يبيلهم نفداك
ابوفهد --والله هذا اللي ماقدر احدد لك لانهم ماعتقد بيوصلون كلهم مع بعض تتسهل طال عمرك تتسهل
نايف وهو ينزل القلم --طيب انا بنزل المصنع انا ومشاري واذا رجعت ابيهم كلهم في اجتماع لاهنت
ابوفهد وهو يوقف --ابشرطال عمرك
طلع نايف ومر على مشاري ياله نمشي --
مشاري --ياله طال عمرك
-----------
وبالريـــــــــاض--
وفي العصر --بيت عم فلاح حيث هند عند اهلها
قررت طفله انها تقول لهند لانها من الصباح شاغلها موضوع فلاح وخصوصا بعد ماعرفت منه انه اخر هالاسبوع سفرته
<<<<السلام عليكم
عليكم السلام هلابتس
هلا يمي شلونتس شلون عيودي
والله الحمدلله ماعليه مجنني توه نايم مانام من الصبح ولاخلاني انام
يالبيه فديته الله يصلحه
منتيب جايتنا اجل
الا ان شاء الله بس لاطلع ابوي فلاح لانه توه جاي من الممشى واكيد مهوب ظاهر الا المغرب
اي وفهد تغدى ؟
اي كلهم تغدوا
زين طلع مني يقول بتغدى عند امي قلت بكيفك ههههههههه مل من غدانا هههههههههه
هههههههه نفداه اممم هند انتي علمتس امتس ببنت ال خالد الزينه
اي تقوله امي انا يمه ماعرف الا بنات ال ناصر بنات شيخه خوات العروس ولابنات ال خالد ماعرفتهم زين
وفي العرس لمحتهم ولا مانتبهت لهم يمه انا عندي ان الكبيره تهبل وموظفه بعد.. ولا انتوا تبون الصغيره توها تدرس ترى الظاهر
طفله--لا انا اللي شفتها وجازتلي هي اللي تقوم تصب وتضيف حتى مستقبلتنا مع بنات عمها ومدري عن اختها ماوكدتها
وبعدين انا ابي له صغيره وانا بكل اليومين ماشفت انا وامتس الاهي حتى ماشاء الله في عزيمتنا فاله شعرها ماشاء الله طويل
وماقعدت الله يصلحها تجيب وتحط وتضيف ماشاء الله ..ويوم جيت اطلع قلت لامتس ههههه اسالي ذا الخدامه شسمها قلت ريناد بنت ماما حصه
وانا كنت عارفه بس قلنا خل نتاكد والله انا وامتس هههههههههههه بغير نتشوف ماشاء الله ذا البنات الله يصلحهن
هند (واخيرا يافلاح هههههههههه بنزوجك ههههههههه)امين وبتخطبينها طيب اللحين
طفله--لا انا قلت له وقال مابي شي رسمي قصده مايبي يروح لهم ..ولاهو باغيها يقول كلميها واحجزيها بالحكي
هند--لا يمه مايصير حكي
طفله--وحنا ان شاء الله باغينها بس اذا عود ..وهانت قده بيخلص
هند--على خير اهم شي هو مقتنع بهم
طفله--الا مامانع بالعكس اعرفه يحب ربعه وال سعود ربع معنا من سنين لامع ابوتس ولامع عايد الله يرحمه
هند --طيب وشلون
طفله --انتي يايمي كلمي خالتها ساره تحمدي لها بالسلامه يقولون حامل وتوها معوده من الامارات
وقوليلها ان ريناد جايزه لعمتي وامي ..وان حنا نحتسي فيها ولاعود ابوي فلاح.. تقدمنا رسمي لهم بس المهم يدرون ان عينا على البنت
وهي بتوصل لحصه عرفتي..
هند وهي تستوعب --ابشري ابشري بكلم وحده من البنات تعرف رقم بيتهم انتي بس تعالي تعتمي عندنا لاراح فلاح
طفله(الحمدلله ابي احطها في باله عشان لاراح يمتنع عن الحرام ويحفظه ربي )--ان شاء الله ياله فمان الله
على طول سكرت واتصلت تبحث عن الرقم وبعد ماخذته خزنته بتيلفونها
-----------------
وبلـــــــــــــــــندن عاصمة الضباب --
وبعد مرور ساعه
اتصل راكان على اريج ولاردت ..
وعاود الاتصال ولاردت قلق وطلب من هنري يضبط الامور لانه مضطر يطلع من المستشفى ..
طلع وبعد ساعه وصل للبيت وكان الظهر دخل وقته --
طلع فوق وهو يتمنى انها بخير اعاد الاتصال ولاردت --
لا اله الا الله
<<<رن الجرس
والرنه الثانيه حست لها خذت منديل وتوجهت للباب وهي تلم شعرها المبلول
استعجلت قد ماتقدر فسبقها صوتها --طيب
راكان وهو يرفع راسه (الحمدلله شكلها نايمه)--السلام
مال عليها لا ارادي والظاهر من خوفه عليها قصد يسلم عليها--وشلونتــــــ
صدت ولكنه مال عليها
وقبل راسها من الجنب..(اوف ليش ماتبينيــــ..)
راكان-- نايمه انا اسف طلعت ولاطلبت لتس فطور اللحين نطلب غداء اوك
اريج وهي تبعد شعرها عن عيونهاxxراكان اجلسيــــــــ ارتاحي
اريج وهي متوتره--مابي بصلي
عطته ظهرها وتوجهت للغرفه وتذكر--اي حتى انا ماصليت خل اصلي قبل لا اطلب طلعت من المستشفى واقول ليش ماترد خفت ولاقدرت اصلي برى
اريج وهي تسمع صوته يقترب منها لانه يمشي خلفها متوجهه لدورة المياه للوضوء(زين اللي تذكرت صلاتك..والله بنجنـــــــ صدمتني والله لايدرون اهلي وش بيسوون فيك ..)
صلت وهي تبكي بضعف وبس سمعت صوت الباب كتمت نفسها واكملت صلاتها بصعوبه ..
راكان طلع وتابعها (ياربي على هالبنات وش يخوفوهم لهدرجه ..مهو امهاتنا والحريم كلهم على هالسنه وماله داعي هالتوتر والخوف كله ..كن الواحد بيذبحهم )
اريج وهي مزكومه --معليش ابي اكلم
راكان --ابشري
اريج(غصب (ن)عنك)
مد لها التيلفون ووقف مكان سجادتها --وتو بيكبر ..التفت عليها--من تبين ؟
اريج وايدها ترجع تلامس رقبتها من الخلف وتشوف شاشة الجوال--عبير
راكان--بس اخاف تقلق عليتس فديتس
اريج(زين انك عارف و متذكر انك مقلقني..المشكله ابي احد يحس فيني)--
راكان عرف انها ماراح ترد عليه فكبر وصلى --
اريج--(ماقدر اتحرك جنبي ذابحني لاكليت ..ولاكليت العلاج ووشلون اكلم عنده ؟؟)
<<<ماقدرت تقطع الخط
الوو
هلاوالله شخبارتس ياقلبي
اريج وهي ماسكه نفسها--الحمدلله انتو اخباركم
عبيروهي تحس انها مزكومه--والله طيبين مزكمه
اريج--اي تغيرات الجو امم ابوي وامي طيبين
عبير --اي والله كلهم طيبين ماخذيتي شي لهالزكمه
اريج بابتسامه--لاعادي بتخف ان شاء الله
انتبهت له انه سلم من صلاته --
راكان وهو يشوفها--عبير سلمي عليها
اريج وهي منزله راسها--
عبيروهي تسمعه--من راكان ؟الله يسلمه سمعته هو عندتس
اريج--اي
عبير --فديته مايقول بيكلم اخته عطيني اياه
اريج وهي ترفع عيونها لعيونه وتمد له التيليفون--تبيكـــــــ
راكان (ياربي عيونها حمر وحالتها حاله)--هلا بتس وش اخبارتس واخبارهم كلهم طيبين
عبير بابتسامه--هلابك والله الحمدلله انت شخبارك اشوف نسيتنا
راكان بضحك--هههههههه مانلام ولا ههههههههههه انتي وينتس ؟
عبير--رايحه للداوم حنا العصر
راكان وهو يتوجه للصاله--الله يحفظتس وحنا الظهر
عبير--اها بينا 3 ساعات يعني
راكان--اي
عبير--وكيفها معك
راكان وهو يقصر صوته--ابي الرد منتس اوك وبتصل فيتس اخر الليل
عبير (اممم والله مدري وش تبي بالضبط )--اوك اوك
راكان --ياله هذا هي معتس سلمي عليهم كلهم
عبير --وصل الله يسلمك
مد لها التيلفون وطلع --
هلا عبير واهلي طيبين والسوري امانه كلكم طيبين
اي والله الحمدلله لاتشيلين همنا بخير وعافيه
اريج تغير صوتها --الحمدلله
عبير(والله مدري وش قصة راكان قصده انها حبته ؟؟مدري ) --شخبار راكان معتس
اريج غصتها العبره--ماعليه
عبير-- لحظه اروج وصلت بنزل من السياره لاتسكرين ؟
اريج وهي توقف تحاول منع دمعاتها من النزول ولكـــــــــن بدون جدوى اتجهت للباب واغلقته ..
راكان(قفلت الباب الله يستر..والله مدري وش الشي اللي بتقدر تقولها عنه صراحه شي ماينذكر)
عبيروهي تدخل مكتبها وتجلس-- هلا بتس
اريج بعبرات مخنوقه--هلا
شفيتســــ اروج
سكرت باب مكتبها ووقفت خلفه --
عبير وقفت بس سمعت شهقاتها --وشفيـــــــــــــــــ؟؟؟
مافي شيـــ
ليش تبكين فديتســـ
مافي مافي
الا فيـــــــــــ اروج شفيتس(اللحين عرفت ليه يقول اساليها )
اروج اروج
هــــــــا اهــ ياعبير ليتس عندي
لبى قلبتس انا معتس اسمعتس قوليلي شفيتس فيكم شي صح قوليليــــــــ والله بيوقف قلبي
اهــ يايماا يماهــ
اروووووووووج والله بموت بس بس هو عندتس
لااا
بس طيب اوص اهدي ترا بيجي ولا هو مخلينا نكلم بعض شفيـــــــــــ شصاير
بلعت ريقها وبدات تشهق وتتنهد عبير متى بتجين ؟؟
------------------------
و بالسعوديــــــــــــــــه --
لكـــــــــن في بيت عم ال عايد --
هند قررت تحرر طلب امها طفله --
<<<<<<<<على ساره
الو السلام عليكم
هلا وعليكم السلام
كيف الحال وش اخبارتس
الحمد لله من معي
معتس هند مرت فهد بن عايد
يامرحبا بتس والله شخبارتس ووشلون الصغير
والله بخير الحمدلله ..انتي وشلونتس بشرينا عنتس
الحمدلله
الله يتم عليتس
وياتس وشلون ام فهد وعيالها
والله بخير
وامتس طيبه والمعاريس مناك
اي والله الحمدلله
وش اخبار ال سعود وال خالد
والله ماعليهم طيبين مايسالون الاعنكم
سالت عنهم العافيه اممم وشلون بنت حصه ريناد طيبه
ساره باستغراب(شمعنــــى رنو)--اي والله الحمدلله كلهم طيبين
هههه اي ذا البنت تراها محجوزه هههه عمتي وانا حاجزينها لحماي فلاح
ساره(ياماشاء الله عالتلميح ) هههههه الله يوفقنا وياكم والله يكتب اللي فيه الخير لنا ولكم
هند --من رجعت عمتي وهي تهذي فيها عنده وهو ماصدق شي من طرف راكان وفيصل خلاص منعمي فيهم ههههههههههه
ومن حياة ابوي عايد وهو مع ابو سعود الله يطول بعمره
امين الله يجزاتس خير
يالله تطمنت عليتس وكسبت صوتس فديتس سلمي على شيخه وحصه
(اثاريتس متصله تخطبين ههههه)الله يسلمتس من الشر سلمي عالوالده وعمتس
وصل فمان الله
مع السلامه
--------------
وبلنــــــــــــــدن--
عبير--بس طيب اوص اهدي ترا بيجي ولا هو مخلينا نكلم بعض شفيـــــــــــ شصاير
بلعت ريقها وبدات تشهق وتتنهد عبير متى بتجين ؟؟
قريب قريب والله بس تكلمي شفيكم متهاوشين في شي
وبعبرات مكتومه--ياليت هواش ياليت اهـــــــ يايمه
اجــــــــــل شفيتس مسوي شي هو
ايـــ عبير.. يشــ..ـرب
(وشــــــــو)هـــا .. طيب اهدي اهدي حبيبتي
عبير بنجن يشرب وريحة دخان طلع لي فوق امس الليل بعد ماطلعت البنت ..وهو ماقرب مني ابد ولافكر يلمسني
ويوم طلع مادريت الا وهو يقرب مني وهو مهوب في وعييه يشد شعريــــــــــــ ويـــ..اهـــ.. عبير بنجن انا خايفه منه والله لو اعلم ابوي ان يذبحه
عبير وهي تمسح دمعاتها(وشوو بنته ؟؟اللي طلعت ؟؟) --اسمعني طيب اسمعيني هو مابعد لمستس
ومن قلب يتالم --لا شيبي فيني وانا اصلا مابيه
عبير بهدوء (وله عين يدخلني بالموضوع يحسب اني بدافع عنه )--اريج اهديـــــــــ تكفين والله بنجن لو ينقطع الخط او يدخل عليتس اهدي
وبصوت باكي --وشلون اهدى انا مانمت ولا ارتحت من امس كل ماتذكرت اللي سواه فيني
اصلا هو خذاني عشان اهلي قالوا عالجها ليش يقرب مني مابيـــه انا اصلا مابيه
عبير مصدومه وتحاول تكتم عبراتها --اريج بس اهدي طيب اهدي ابي تهدين عشان نتكلم فديت روحتس
اريج --انتي متى بتجين
عبير --قريب والله قريب بس والله مارتحت عليتس
اريج وهي تمسح دموعها --لاتخافين انا بنت ابوي ..وهو اصلا شخصيته انا اعرف لها..
واعرف اوقفه عند حده بس خله يفكر يتجرا مره ثانيه
تدرين هو بنفسه يقول لاتصارخين لو يسمع الفندق مسكوني يعني مايقدر ياذيني
عبير انا اللي قاهرنيـــــــــــ ..ولاقدرت تكمل لا انها انفجرت باكيه مره ثانيه
عبير وهي تبكي --اريج بس تكفيـــــــــــن تكفين تذكرين ابوي وش وصاتص خلاص عليتس من ربتس بســـ ولاتعصينه بشي
اريج بصوت باكي--لا انا اللي قاهرني مابين عليه
وابوي واثق فيه
وتدرين يحاول يكلمني اللحين بس والله ماعطيه وجه
وانا صبري بس الى ان تجين والله ابي تجين عبير تكفيــــــــــــن
عبير وهي تبكي --خلاص حبيبتي خلاص تبين اتفاهم معه والله لاخليه يعرف قيمة نفسه الحقـــــــير
اريج وهي تهدا --لا مابي خليه انا اعرف شلون اخذ حقي منه..عبير
امانه امانه مابي السالفه تطلع
اكيد
امانه حتى السوري امانتس
خلاص اكيد والله ..اهم شي كلميني لو صار شي انا جوالي معي اربع وعشرين ساعه
انا جوالي تعمم
على كلام ابوي انه اليوم بيعممه جربي
طيب ياله باي اسمعي سلمي عليهم كلهم
عبير وهي تمسك نفسها --وصل انتبهي لنفستس واكلي علاجتس
طيب باي
اريج (والله ان تندم والله )--نزلت الجوال ورجعت تلف شرشف الصلاه حست انها محتاجه تصلي وتهدي نفسها بذكر الله
عبير طلعت مرايه ومسحت زوائد كحلها وهي تتنهد--(صدمتني اصلا وشلون طاوعك قلبك هذا وانت رايح للدكتور وعارف بحالتها حسبي الله عليك كانك بتجننا
والله لو يدري ابوي ناصر ان يسنعك جد ماتخاف ربك فيها)
دخلت عميله وتفاجات بشكل عبير--السلام
تفضلي اختي حياتس
-----------------
وفي بيت ال فيصل --
وقف ناجي ونزلت حصه وشيخه --
دخلوا وسلموا على ساره وصلوا المغرب عندها ..
ساره --حصه تدرين من كلمني هند مرت فهد بن عايد
حصه--يالبيه وشلون ووشلون صغيرها
ساره--ماعليهم طيبين
شيخه--غريبه زاهمه عليتس
ساره--بجيتس العلم هههه تبي تخطب ريناد
حصه--بنتي
شيخه--لمن
ساره بابتسامه--لفلاح
شيخه--وليه ماقالت عبير هي قالت ريناد
حصه نزلت بيالتها--
ساره-تقول ان من رجعت عمتي وهي تهذي فيها عنده وهو ماصدق شي من طرف راكان وفيصل خلاص منعمي فيهم
وقبل قالت وشلون ريناد ترانا حاجزينها لحماي انا وعمتي قصدها لاعود يخطبها رسمي مافي شي اللحين
حصه--مافي شي الا بشور اخوها
شيخه-وبتزوجين رنو قبل اختها الكبيره
حصه--والله مانيب معطلت نصيب بنتي وهذا نصيب لا الله كتب ولا نايف(ن) وافق مانيب راده نصيب بنتي
ساره--بعد فلاح مايرجع ..وعلى بال مايخلص تكون عبير راحت في طريقها
حصه --الله يكتب اللي فيه خير وصالح ولاحد يطري شي لها البنت تختبر وخل العلم بيننا دام انه مهوب ناوي يتقدم رسمي
حتى ابوي نايف منيب قايلتن له شي
شيخه--الله يكتب لهم الخير
ساره--امين
---------------
بيت ال خالد --
نوره وريناد خلصوا وقررو يطلعون للصاله .
ريناد--تعالي مافي احد امي عندكم وبندر عالكمبيوتربغرفته
وسعود وفصول ناموا..من زمان
نوره وهي تجلس على الكنب --اوه نسيت تيلفوني بالغرفه
ريناد--عادي اذا رن بتسمعينه .انا بنزل اجيب طلب المطعم اكيد جاء
قلبت نوره بالقنوات ولفتها برنامج الشيخ محمد العريفي
وجلست تستمع له وزادت على مستوى الصوت ..
------------------
وبالشرقيه بعد ماصلوا العشاء --
جاء من المصنع ودخل الاجتماع
وهذاهو متوجهه ياخذ تيلفوناته بيطلع للفندق يرتاح
دخل الجناح وطلب عشاء خفيف ..
جلس وقرر يتصل يطمن على اهله --
<<<<<<البيت
حست ان في صوت رنين لتيلفون ..
قصرت على الصوت
وبعد ماتاكدت وقفت وقررت تروح تجيبه لانه اختفى الصوت
وسرعان ماجاء الصوت من خلفها رنين ثابت البيت (اكيد ماما اتصلت ولارديت واتصلت على البيت )
نوره بصوت مبحوح --الو هلا ماما
نايف(فديتـــــــه عندنا ببيتنا )-هلا والله
(لااااااااااااا نايف نايف يمه)ـــــــــــ
الو هههه نوره
هلا
هلابك شلونك
طيبه
والوالد والوالده طيبين
الحمدلله
مهوب عندك اختبار بكره ولا انا مضيع
الا عندي
يعني تذاكرون مع بعض الثلاثه
لا
وشو لا
بس انا ورنو
اهااا طيب قول لي وشلونك ؟طيب ؟ ترا انا عادني مسافر هههه
امممم
ترا بزعل
(ياربيـــــــــ)--وشلونك
نايف بثقل --الحمدلله
لحظه اناديها
تعال من تنادي ؟
رنو
لا لاتناديها ابيك انت
(دايم يكلمني كني رجال)ـــــــــــــ
نـــــــوره
ـــــــــــ ترتجف ماستوعبت نفسها الا وهي تاركه السماعه ..وتركض وقابلتها ريناد
تعالي نايف عالتيلفون
نايف(ياليـــــــــل راحت تناديها ماتعرف تقول فمان الله..فديت هالصوت المبحوح )
هههههههههههه كلمتيه هههههههه فاتني هههههه
خذت السماعه وهي تضحك --هلا نايف
وبثقل--هلابتس كيف الحال وش اخباركم
والله الحمدلله
اجل وين امي
عند خاله ساره
اممم عسى ماهي تعبانه
لا الحمدلله
امم وبندر وينه
بغرفته تبيه
لا توه مكلمني الظهر
اها
تبون شي
لا سلامتك
ذاكروا زين مهب تسولفون
هههه طيب
فمان الله
باي
وبعد نصف ساعه --
جاء السواق وقررت ترجع البيت
وبالسياره تفاجأت بمكالمه لم يرد عليها=1 والرسائل الوارده=1
مكالمات افنان
ورساله من ؟؟؟؟؟ نايفـــــــــــــ رفعت طرحتها اكثر وبدات تقرا السطر المكتوب ( كنت محتاج اسمع صوتك ليش ماسولفت معي انتظر ردك )
وبابتسامه--(اممم برد لاوصلت احس عقلي وقف )
-----------------
وبعاصمة الضباب لنـــــــدن--
دخل عليها الغرفه--
شافها لازالت بجلستها وبجوارها شرشف الصلاه ..
(ياربي بكت بعد معها يعني ..اللحين بنروح لبيتنا ..
ولا نزلت اغراضنا احاول اسولف معها
عسى ترتاح لي
وتفهم انه شي عادي ..اهــ بس لو تدرين ان اصلاكلام الدكتورهو اللي رادني عنتس وعن قربتس )
راكان بهدوء--ياله يابعدي الغداء جاهز وبعدها بنروح لشقتنا
اريج وهي ترتب الشرشف --لا مابي غداء برتب الاغراض
راكان--لامايصير مهوب علاجتس بعد الغداء
اريج وايدها ترجع تلامس رقبتها من الخلف--لا مو لازم باكله اللحين
راكان (ياليل وش هالزعل كله ياليتني ماقربت والله تندمت )وبابتسامه --لا والله ان تاكلين وبجيبه لحد عندتس
(اي بجيبه وش ماتتغدى وتاكل المسكن على جوع )--نزل الصينيه بعد ماسحب طاوله برجله امامها..
مد لها الملعقه--ياله سمي بسم الله
(عشان العلاج والله ولا يمين بربي كرهت شي منك )
تابعها وهي تاخذ من حافة الصحن (المهم تاكل لو شوي ..انا اللي ماعاد اشتهي بقوم اخليها تاكل براحتها)
راكان اكلي فيه العافيه --انا نازل اسكر حسابنا بالفندق
طلع ورمت الملعقه ومسكت راسها من القهر ..(فارقني ماعاد ابي اشوفك )
وبعد لحظات تعب --
سحبت شنطتها وكلت علاجها ..
وقامت تلم اغراضها بصعوبه ..
راكان تحت وهو ينتظر فاتوره الحساب (بسرعه لا تشيل شي ولا تسحب شي ثقيل عليها )
واخيرا حاسبهم وطلع فوق..
دخل واتجهه للغرفه وانتبه للصحن --ماكليتي الله يهديتس
اريج ــــــــــــــ
راكان (يارب تشفيتس يارب)--اي شي ثقيل اتركيه انا انجزه
اريج وهي تصد عنه --
راكان (انا منيب مصدق الى الان يعني معقول كرهتني عشاني بســــــ وليتنيــــــــ مدري )بدا يسحب الشناط
واغلق شنطته وجهز كل شي عند الباب
اريج باقي شي
اريج بهدوء وهي تلبس عبايتها --لا
راكان (لو اساعدها احس بترجع تزعل )--اوك ياله ننزل
فتح الباب وجاء الشوفير وحمل الشناط
نزلوا وركبوا السياره ..
(مابي اشوفه مابي )
(راكان عيونها تقطع قلبي كل شوي تبكي لايكون فيها شي اوجعها؟؟
بس انا ماسويت شي بس ضميتها
معقوله لالا البنت خايفه ومنحرجه
وعشان كذا قفلت البلكونه عليها )
(انتبه انه اخطا بالطريق)--اوهووولفيت من هنا
اريج(الحمدلله ان باقي فيك عقل )وهي تشوف الطريق من الشباك
واخيرا وصلوا وهم عالصامت ..
------------------
وبالسعوديه بيت عم فلاح--
وقف وقرر ينزل يشوف عايد ..
ياولـــــــــد
ام عبد العزيز --اقلط يابوي
كيف الحال وش اخباركم عسى عيودي قايم
اي حياك مابلا امك
تعشيتوا
اي زين انا قلت اجي اخذها واشوف ولدنا
هه الله يحييك
الله يبقيتس
كيف الحال يام عايد عساتس بخير
الله يسلمك
نزل لمه وقبل راسها--
وجلس وصبت له ام عبد العزيز فنجان
بس عساها ماتهجر عطونا الرجال نشوفه مبطيء منه
ناولته امه وبدا يعلق عليه
تغير بس عاده يشبهني ههههههههه
طفله--ابد يروح لابوه ويعود عليك ههههههههههه
فلاح --اهم شي يعود لي هههه
هند --اسرع ماتنسى عيودي لاعرست
فلاح --اي لاعرسنا هههه
هند --الا توني اقول لامي كلمت وعلمت خالتها مرت فيصل
ويالبيه وين بيلقون مثلك يافلاح
فلاح وهو يلعب برجيل عايد --الا ماودتس تخلينا ناخذ ذا الرجال معنا البيت هههههههههه
هند (اوخص يصرف هههههه)--كلها كم يوم الا حنا مزعجينكم بالبكاء والصياح هههههههههه
فلاح(على طول كلموهم ..اجل خير البر عاجله على مايقولون ههههه )--ماعليه راضين به
مده لامه ووقف --ياله نفداتس
طفله وهي تعطيه هند--يالا يبوي
ام عبد العزيز --اجلسوا ماتقهويت يافلاح
دايمه نفداتس فمان الله
ماتشوفون شر
---------------------
بيت ال فيصل --
وبغرفتها تحديدا --
ارتبكت وهي تفكر باللي بالشنطه ماتدري شترد عليها مرت ساعتين وهو قايل انتظر ردك (ياربي ليش يكلمني دايم كاني رجال )
لبست بجامتها وتمددت مسكت تيلفونها بربكه--رجعت تقرا المسج .. كنت محتاج اسمع صوتك ليش ماسولفت معي انتظر ردك )
لايكون يبي يكلمني ..برد مسج اكثر من كذا ماقدر بس وش اكتب ؟
اممم بسرعه (مو كنتي تبينه يراسلتس ويكلمتس ها ردي عليه )
رساله جديده الى ؟؟؟؟
كتبت --معليش انا رديت احسبك ماما --
بس اي بس وش اكتب اجل انا مستحيه عشان كذا ماسولفت معك هههههه خلاص خلاص <<<<<<ارسال
بالجناح --
طلع الصينيه عند الباب وغسل وفرش اسنانه وتمدد --
ياالله ياظهري
<<سمع صوت رساله
وين جوالي ويــــــــــــــنه عسى هيــــــــ
<<جاري فتح الرساله--معليش انا رديت احسبك ماما
وطيب ولاتصلت اللحين انا ماما بعد ههههههههههههه خيارات الرساله <<< اتصال
وهنـــــــــــاك
بعدت المفرش وبدت تتلفت على حنان ..
تسحبت وطلعت من الغرفه --
الو
وبهدوء--هلا والله
----------------------
---البارت التاسع والخمسون ---
وبلنـــــــــــــــدن --
فتح الباب ودخلت بعصاتها --
ورجع جاب باقي الشناط ودخل --شافها جالسه بعبايتها
وش رايتس تبين نطلع؟
وقفت ونزلت عبايتها وبهدوء--لا
راكان (مستحيل وش هالاسلوب )--اي ماعليه على راحتس
سمعته يكح --(هذا من اللي تشربه )
راكان بابتسامه--شوفي البيت ابي رايتس فيه ؟
اريج --وين المطبخ
راكان باستغراب -هذا هو تبين مويه
سبقها ودخل ومد لها المويه --خذتها وتابعها وهي تاكل بندول
(انا ماعاد اقدر بكلم عبير بشوف وش قالت لها احس انها زادت بعد ماكلمتها )
راكان وهو يشوفها تجلس عالاريكه--انا طالع شوي وراجع تبين شي
اريج هزت راسها بالرفض--
طلع (لو تتكلم وتقولي هذا مو خوف هذا عقد فيها وش كذا مهيب حاله <<<<<<<<عبير
لم يتم الرد
ليش تو الساعه مابعد ناموا
<<<<<<<<<<<<لم يتم الرد
والمره الثالثه بياس<<<<<<<<<الو
هلا عسى منتي نايمه
(مصدومه منك )--لا عادي
وش اخباركم عندتس احد
لا
بغرفتس
اي
كلمتس صح
اي
عبير وشفيتس
مدري لاتعليق عاللي صار مصدومه والله
(يعني قالتلها ؟؟)والله حتى انا ماعاد تكلمني هي قالت لتس السالفه كلها
اجل وش تبيها تسوي تضحك في وجهك
وشهـــــــــو ههههه عبير اتوقع انتس كبيره وعاقل وتفهمين ان هالشي من حقي
عبير وهي ترتجف --من حقك اوك بس مهوب
راكان وهو يسكر على نفسه باب السياره--عبير انا عارف عارف ومحد خايف عليها اكثر مني والله حتى هي ماظن تخاف على نفسها كثر خوفي عليها
عبيرولازالت ترجف (اي بس مهوب سكران )--ـــــــــــــ
راكان حس انه احرجها --عبير انا ادرى بوضعها بس هي فيها خوف لدرجة انها جافيتني وماتكلمني
عبير-- هي مافيها شي بس وضعك يخوف اي وحده بمكانها..
وش وضعه انت عن وش تتكلمين ؟؟؟
هي قالت لي كل شي ياراكان وقالت لاتدخلين بيننا بس لانها جد محتاجه احد تتكلم معه ولو انها ماكلمتني كان ـــــــــــ وانفجرت تبكي
راكان باستغراب يرفع شعره باصابعه --عبير الظاهر في شي انا ماعرفه لحظه
وبصراخ --وش يبيكيــــــــتس انتي بعد عبــــــــــــــــير وش السالفه ؟؟
عبير بتوتر وخوف وهي تشاهق--قالتلي كل شي
ايـــــــــــــ قولي وش قالت
وبوسط بكاء خوف وقلق--علمتنيـــــــــ
تكلمــــــــــــــــي وش قالت
انك شارب وهذا هو الليـــ
وشهووووووووووووو لا انتو منتب صاحينـــــــ تقولتس اني شارب ؟؟؟عبير عبير قوليلي وش قالت من اول الى الاخر
وش اقول قالت كل شي وان حتى ريحتك دخان وسحبت شعرها انا اترجاك لاتجننها يكفي اللي جاها
لحظه لحظه هههههههههههههه لاشككوني بعمري ازين ..انا اقولتس تكلمي.. وش قالت لتس من اول ماكلمتس .
عبير بحزم وهي تبكي--كل شي من طلعت لها فوق ..انا ترجيتها الى ان تكلمت
راكان وهو يضرب مقود السياره -- ايوه وقالت انه ماكان بوعييه سكران
عبيروبعصبيه وهي ترتجف -- اي وتقول حتى شد شعري ولا ماتتذكر
عبير عبير ههههههههههه صدقتي انتو صاحين خبركم فيني اشرب انا اخاف من الله قبل لاخاف من عباده
لاااااااااه ههههه عز الله استخفيتوا
عبير بحزم ومن بين اسنانها --شلون يعني تنكر
راكان بهدوء --عبير اذكري الله اذكريه
عبير --لا اله الا هو
انا بسالتس سؤال بس بامانه تجاوبين --هي قالت لتس اني اوجعتها بشي
عبير وهي تمسك عبراتها--لا بس شعرها
راكان بحزم --انتي اختي وعشانتس تكلمتي وادري انتي خايفه عليها.. مابي اقلقتس وترا هالسالفه كلها جهل من اريج ومابي شي يطلع
انا طلعت لها وقبل يمكن قالت لتس ان عندنا نسيب فلاح رفيقي اللي توه متزوج وجاي مع مرته وسكن بشقتي وعزمته وجا
وتنهد --لا اله الا الله
واكمل بعد مارفع راسه--وجا وتعتم عندنا وبعد العشاء حقن عمره بالزقاير وكل مره زقاره .. ونشع ثيابي
وطلعت وانا عارف وخابر وضعها وجالس مع دكتورها ومانبي نتكلم زود
وكل الي سويته بوعيي وادري به ولا انا مالي بهالسوالف ان شاء الله ..
بس وشدة الشعر الله يصلحها كان في شعرها شباصه مدري شتسمونها
وسحبتها
وانا عارف وش اني اسوي
ويمكن اللي وترها اني قربت منها وريحة ملابسي ماشغلتني كثر ماشغلتها ..
اللحين اذكري الله
ونامي
وانسي اللي صار
ولاهوب اخوتس اللي يشرب
ولاله بهالامور ولله الحمد
وهي بعيوني ولاتقلقين عليها ..
سمعها تبكي
هاااااا وش قلت انا..اذكري الله يالغاليه وماصار الا الزين
وانا باجلس معها وافهمها لاتحاتين ..ياله فمان الله
مع السلامه
------
اغلق منها الخط --
والله اني كنت حاس في شي بســـــــــ اما اني سكران ؟؟؟ليه هي ماتعرف مشاعر الرجال لزوجته وبين السكران
ولا لهدرجه انا كنت فاقد لاني اول مره اقرب منها
وماتذكر اني شديت شعرها هي اللي في راسها شدت.. مهوب انا
رفع راسه لبلكونه بيته --
ماقدر اطلع مانيب مستوعب والله ..
خل اروح شوي ابي افكر
واجيب عشاء على دربي
شغل سيارته وهو يبتسم --اما سكران
---------------------
وبالرياض مكالمه من الشرقيه --
تسحبت وطلعت من الغرفه --
الو
وبهدوء--هلا والله
ــــــــــ
ابي اعرف انت ليش ماتحب تودعني يوم جيت البيت طلعت وماودعتني
واليوم اكلمك ولا ودعتني تركت السماعه وبس هههه
(يمه ماعنده وقت )اممم
فديتك
(ياربيــ)
ايوه ذاكرت زين
اي
الله يوفقك
سولف طيب ابي اسمع صوتك
ـــــــــــ
طيب انا بسولف تدرين اني مانسيت شكلك من طلعت منك وانا افكر حتى سافرت لاني زعلان انك ماودعتني
حس بصوت ابتسامتها
(ليش يكلمني كاني رجال هههه)
نوره
هلا
مشتاق لك احس اني ماشفتك كثير
(يمـــــه تغير صوته شكله متمدد..)
نايف عرف انه احرجها --نوره
امم اوك انا بقفل
ليشـــــــــــ توني طالبك
امي تنادي
نايف وهو يشوف الساعه(فديت اللي استحوا هههههههه )خلاص اخليك اجل تصبح على خير
وانت من اهله
وعلى طول الزر الاحمر ورجعت للملحف وهي ترتجف وتبتسم وترجع تغمض بقوه
(يمه منه صوته يخوفني ههههه )
نايف ( فديتك وفديت هالبحه ..هلا امي تنادي ..وافديتــــــها اي كذا الواحد يقدر ينام هههههههه )
----------------
وبلنــــــــــــــــــــــــدن --
جلس يدور بالسياره --
سكران هههههه
عسى بس عبير ماقالت لاحد لالا فديتها اعرفها اصلا شكلها تبكي من قالت لها استغفر الله
يعني ربكتها وخوفها حسسها اني مانيب في وعيي
هذا جهل اي جهــــــــــــل
السكران بيخليها تفلت من ايده ولا كلامه ثابت ولا
انا بروح لها ياخوفي تبكي هي بعد من طلعت
باخذ عشاء--
وقف عند صب واي ..
وخذاله سندوتشين بوجبات
واتجهه لها --
نزل وخذا الكيس اللي بجواره وطلع لها --
فتح الباب بمفتاحه ودخل --
ماشافها بالصاله
دخل شافها تحت الملحف وكانها نايمه(يعني نامت انا لازم اتكلم معها وافهمها )
وبهدوء--اريج
اريج(يعني مارديت نايمه افهمها ماتشوف النور مطفا)
راكان --(ياليل ومطفيه النور بعد)
ابتعد وجلس بالصاله --وثواني ورجع يوقف
دخل واغلق الباب بهدوء--
(يمه دخل .. ولاسكر علي الباب ؟؟؟)
جلس عالسرير واستوعب انه من دخل تو ينتبه ان السريرين صارو سرير
وعرف ان عبد العزيز ومرته خلوه بجنب بعض عشان يصير كانه نفرين --
(وشتبي وراي وراي )
ريح ظهره بجوارها وهو لازال فوق الملحف--
لحظات واخيرا مرت دقيقه--
حس انها تمثل بالنومه على انها ماتحركت --اريـج
رفع الملحف وشافه مغطيه وجهه بيدها اليمنى مسك يدها وبعدها --اريج
اريج وهي تصد--مابي اكل ابي انام
راكان --طيب انا ابي اكلمتس شوي
اريج وهي تدفن وجهها في المخده --مابي
راكان بهدوء--اريج لا لازم نتكلم اجلسي ياله ابيتس
اريج وهي تمسك عبراتها (وشيبي مابي اتكلم )--
راكان وهو يقرب منها وبابتسامه--امي تشكين فيني ههه
اريج وهي تمسك عبرتها(زين انك عارف بغلطتك )--
راكان وهو يتابع حركة يدينها --الله يهديتس يعني انا لو شارب بتشوفيني واعي ولا تصرفاتي طبيعيه
اريج (وش قصده ينكر بعد ان ريحته دخان )--
راكان بهدوء يستطرد--ولا احس بعمري يابعدي الله يبعد عن الحرام ولاودي اقولتس وش فرق الصاحي عن المتعاطي
اريج ماقدرت تمنع دموعها تنزل --
راكان--لايابعد هالدنيا لا فديتس لاتبكين انا افدى هالوجه بســـ بس ادري انتس توترتي لاني اول مره اقرب منتس
وريحة الدخان ولد العايد تسبب علي ونشعت ثيابي
مسك شفته السفليه --ولا هذي شفة واحد يدخن هههههه
قرب لها وضمها --بس بس لاتزعليني فديتس
اريج(لا ظلمته يعني ..بنجن شلون سويت كذا جد اني بزر )--
راكان وهو يمسح على شعرها --وانا ودي اكون دايم اكبر من هالنظره عندتس يعني باستثناء اني ولد عمتس ..
بس ارفعي وجهتســــــ
شوفينيــــــ
يالا
بس والله مابخاطري شي عليتس والله ..وهمني رضاتس والله
مسح دموعها بيدينه وهو مبتسم --
ياله عشاني تعالي نتعشى
اريج بصوت مبحوح وايدها ترجع تلامس رقبتها من الخلف--مابي والله ابي انام
راكان وهو يحن لصوتها--عشاني لو لقمه
مابي تكفى
خلاص حتى انا مابي
شافها ترجع بظهرها للسرير وتتمدد
بعد عن الملحف وغطاها (ياليل بتنام ماكلت شي ياربيــــــ)
نزل من السرير..وطلع له بجامه ولبسها ..
طلع وشيك عالشقه لاول مره من رجع ..
وبالمطبخ شرب مويه وصب كاس وخذاه لها --
اريج --قومي اشربي هالمويه --
رفعت نفسها بصعوبه وهالشي خلاه ينزل الكاس ويرفعها شوي --
تابعها وهي ترفع الكاس تشرب(بسم الله عليتس والله قلبي مابعد تطمن عليتس)
رجع تسحب للصاله--وبدا بغلق الاضاءه والابواب
ترك الوجبتين بالماكرويف --
(والله مالي نفس مانيب مستوعب شي بروح عندها مارتحت انا )
دخل وتمدد بجوارها
اريج بس حست فيه كتمت وناتها من الم راسها (يارب انام يارب تعبانه راسي راسيـــــــــــــ)
راكان (والله مدري ماظن نامت ودي اتاكد)
وبعد لحظات --اريج اريج
(بتاكد مو معقوله لونايمه حتى بترد علي ماتسمعني )
سحب الملحف وشافها مغمضه (والله ابي انام )
حس انها نامت وبنفس الوقت ماقتنع--قرب منها وباس خدها (ارتفعت نبضات قلبها..ياربيـــــــــ مع اني ظلمته وشكيت فيه الا انه ياربي ارحمنيـــــ وش سويت انا ؟؟)
رجع راكان ودخل بالملحف
واكمل لحظات مضت
وتعليقات على اللي سمعه من عبير
ومن ردة فعلها بعد مابرر لها..
يارب امتعني بلذة قربها عاجل غير اجل ..
تعبان حاس اني بزكم وراسي بينفجر
وافكار تروح وتجي وعينه عليها بين كل لحظه ولحظه (شكلها نامت ) واخيرا استسلم للنوم
اريج تركت دمعاتها تنزل براحه لانها ماتقدر ترفع ايدها تمسحها لانه بيلاحظ بحركتها تحت الملحف (مدري شكله نام ماعاد تحرك )
بدات تقرا ايات على نفسها الى ان هدت ونامت ..
-------------------
وعالصباح بالسعوديه بعد صلاة الفجر --
اشتغلت مجففات الشعر عند الثلاث بيوت ..
وكل منهم يستعد للدوام ..
عبير بعد ماصلت الفجر ..
جلست على سجادتها (ياربي والله مالي وجهه اكلمه عقب اللي قلته له ..
اروج وش صار لتس ووشلون تراضيتوا ..
احس راسي بينفجر من زود التفكير
راكان كل يوم يكبر بعينيـــــــ ..
انسان متفهم ويعرف يتعامل مع الجنس الاخر
انا جد حسيت انه يحبها ..
وتاكدت اكثر بعد اللي صار امس .
طيب ليش اريج ماتفهم انه يحبها مو غرضه علاج بس..هو باغيها ..
امس تقول ماقرب مني ولا لمسني
اهــــ ياراسي شلون تجرات وقلت له اصلا ليتني مارديت
بس يمكن لو اني مارديت ماكان عرفت الحقيقه منه
يعني هو يوم قرب منها اريج توترت وحست تصرفاته لاول مره لها انه مهوب في وعييه
مو معقول يااريج .. ماتفرق بين الصاحي والسكران اقلها ريحة فمه
مدري صدق يبين عليه ولا بس مسلسلات لعبت بروسنا ..
استرجعت كلامه --
(انتي اختي وعشانتس تكلمتي وادري انتي خايفه عليها مابي اقلقتس وترا هالسالفه كلها جهل من اريج ومابي شي يطلع
انا طلعت لها وقبل يمكن قالتلتس ان عندنا نسيب فلاح رفيقي اللي توه متزوج وجاي مع مرته وسكن بشقتي وعزمته وجا
وتنهد --لا اله الا الله
واكمل بعد مارفع راسه--وجا وتعتم عندنا وبعد العشاء طلع زقارته ودخن ونشع ثيابي
وطلعت وانا عارف وخابر وضعها وجالس مع دكتورها ومانبي نتكلم زود
وكل الي سويته بوعيي وادري به ولا انا من هالسوالف ان شاء الله بس وشدة الشعر الله يصلحها كان في شعرها شباصه مدري شتسمونها
وسحبتها وانا عارف وش اني اسوي ويمكن اللي وترها اني قربت منها وريحة ملابسي ماشغلتني كثر ماشغلتها
اللحين اذكري الله ونامي وانسي اللي صار ولاهوب اخوتس اللي يشرب ولاله بهالامور ولله الحمد
وهي بعيوني ولاتقلقين عليها ) لاااااااااااااا وين عقلي انا ..ليتني ماتدخلت وكان هي تكلمت معه وتفاهموا بينهم
بكت وسجدت عالسجاده --يارب توفقهم وتسعدهم وتشفيها وتعافيها ياربـــــــــــ..
وبعد لحظات من البكاء والدعاء --رن منبه تيلفونها
لا اله الا الله الدوام ..
دخلت تتحمم وتستعد بنفسيه مطمئنه مستبعده اهم احداث امس..
---------------
وفي بيت ال فيصل الساعه 8 الا عشر دقائق --
نوره ابتسامتها خارجيه وداخليه
بس جربوا سولفوا معها ..
استعدت ولبست وهذا هي تنتظر محمود وافنان وريناد
مسكت المرجع قصد المراجعه للاختبار --
طلعت قلم كعادة مذاكرتها لازم القلم ..
وبدات تخطط بابتسامه --وتمتمه غريبه غير مفهومه--
واخيرا رسمت مربع وبداخله naefوبسرعه خططت تحت اسمه خطوط متتاليه اسفل بعض
وبابتسامه --فديته ههه
حست بخطوات بالصاله المجاوره --
ساره --مابعد جاو ؟
نوره وهي تسكر القلم --لا تاخروا حتى انا مستغربه
رن تيلفونها بداخل حقيبتها--جاووو
اي اي رنو جاو
ياله باي
باي حبيبتي الله يوفقتس
---------------
وبلنــــــــــــدن --
رن منبه راكان معلن دخول وقت صلاة الفجر --
سمع صوت المنبه وقبل لايقفله التفت عليها وشافها بنفس الوضعيه ومغطيه نفسهها بالملحف ..
راكان اغلق المنبه وجلســـ..
رجع التفت عليها ..
(جعله نوم العافيه مدري والله متى نمتي ولا بعد على جوع )
اريج (مدري وشلون بقوم اصلي احس مالي وجه اشوفه)
راكان بيته هذا بجوار الريجنت بارك حيث اكبر مساجد بريطانيا ..
ومتعود يصلي الفروض فيه --
تناول منشفته من الشنطه ودخل يتوضا
وبعد ماطلع..
(شيسوي اكيد يصلي بس ماقومني غريبه )
لبس راكان وهو يحاول مايصدرا صوات ..
(بصحيها تصلي واطمن عليها قبل لاطلع ..)
(ريحة عطر شلون يعني اصبح ماعاد هو بنايم )
راكان بعد ماتعطر ..
جلس على حافة السرير من جهتها --اريج اريج
رفع الملحف ..
اريج (ياربيـــ)بعدت ايدها عن وجهها وماقدرت تفتح عيونها على طول --اممم
راكان--ياله يابعدي تصلين عشان نفطر ماكلتي شي من امس
اريج وهي تحاول ترفع نفسهاxxxراكان وقف عن السرير وحاول يساعدها --انا بطلع المسجد هنا قريب بصلي وبرجع
اريج(اشوا بيطلع )--خلاص
راكان--ياله فمان الله
اريج (باي )
شافته وهو يطلع بعدت الملحف ووببطء حست انها ماقدرت توقف (وشفينيـــــــ فيني دوخه ..
لالا اجلسي ..
هذا لانتس ماكليتي..
ومن له نفس ياكل عقب اللي صار امس
طيب قومي تحممي والبسي وتزيني لاكحل ولاروج
اي اي بقوم قبل لايرجع ..
-----------------
وفي السعوديــــــــــــه--
بيت ال فيصل--
وبعد ماطلعوا ساره حست بالملل وخصوصا ان مافيها نوم ..
تذكرت اريج وصوتها ومدري وش اخبارها ؟
اكيد عبور تكلمها ..بتصل عليها اشوف
<<<<هلا عبير شخبارتس
هلا بتس الحمدلله
صباح الخير
صباح النور وشلونكم
والله تمام
اجل راحوا
اي تو النوري طالعه
وفيصل طالع قبلهم
اهااا
وينتس
بالسياره توني راكبه
اها ماكلمتي اروج اشتقت لها هالاجنبيه
عبير ماتبي تتذكر --الا كلمتهم امس وطيبين الحمدلله
مبسوطه
اي الحمدلله
اجل بنخليــــــ رنو تكمل دراستها برى مع خطيبها ومحرمها ركون هههههههههههههه
وش رنو هههههه اختي
اي ههههه
ليه شسالفه من خاطبها هههههه
ماقالت لتس حصه خطبها ولد ال عايد صديق راكان فـــــــــــــــــــــــــــــــــــلاح
-------------------
وبمكان اخر في الرياض--
وتحديدا بسيارته متوجه لفيصل بن سعود في مكتبه
فلاح--(عسى مهوب الحريم يشيعون السالفه وتوصل للرجال وهمن افتضح اني ماتقدمت رسمي
بس انا اكدت على امي
عسى بس تزين الامور واسافر واعود على خير
واخيرا ياعبير لالا كان نكها بالايميل عبير الورد ههههههههه
تذكر ضحكتها
وهيئتها يوم شافها عند باب بيت ال فيصل
اممم يرزق من يشاء سبحانه
الحمدلله الحمدلله
بس ودي اعرف وش تشتغل ؟؟
ولا ابي ابين لامي وهمن تروح تتحمس ويطلع الخبر وانا مانيب مستعد حاليا
خل انزل هذي سيارة فيصل ..)
----------------
وبلنـــــــــــــــدن--
طلع راكان لمسجد الريجنت بارك --
وهناك عرف من اعلان لوحه ان اليوم موعد تغير حرس قصر بيكنغهام وكالعاده الساعه 11ونص ظهرا ..وهذا معلم لاي سائح لبريطانيا
والريجنت بارك تقع خلف مدام توسو المتحف المشهور بالشمع
وبداخل الريجنت توجد اشهر حديقه حيوانات بلندن --
(اجل بنطلع لها اليوم عشان مابيها تفكر باللي صار
خلاص فديت عمرها.. سبحان الله لاتشوف عمرالانثى شوف برائتها وتفكيرها
الحمدلله لا ابوي يشرب ولايدخن من وين بتعرف الصاحي من الشارب
بس اقلها هههه تعرف اني اتكلم زين واترجاها تفتح
مهوب اعصب واضحك شوي
ياله الحمدلله اللي عدت الليله على خير ولا احد درى فينا غير عبير .. )
مر على مخبزه المعتاد وبعد مااخذ نصيبه وصل لبيته --
فتح الباب ودخل --
دخل غرفة النوم ماشافها وبالغرفه المقابله قدر يعرف ان الباب مقفل وصوت مجفف كهربائي
ترك الاغراض ودخل لدورة المياه اللي امتلئت برائحه الفاكهه الجميله ..
(فديت ريحتس وحستس الله لايخليني )
طلع (خل اضبط فطورنا على بال ماتخلص )--
دخل المطبخ اللي يرتاح فيه وتعود عليه من سنين
ويستمتع بالقيام بشيء بداخله لانه هو بنفسه رتبه..ويدري عن كل شي فيه
اريج وهي بالداخل --(يكفي استشوار خلاص كذا حلو ماشفتي مقبض الباب تحرك قبل شوي الا شكله جاء ..
ياله بتزين
وزعت كريم الاساس وبدات توحد لون وجهها واخفت هالاتها المتعبه ..
اممم لبست بنطلون جينز وبلوزه فضفاض من تحت الصدر .. وكانت بللون الاصفر
واخيرا بعد الكحل والاحمر الشفاه الوردي انتبهت لشكلها بمرائاتها الصغيره --ياربي مابي بنطلــــــون ..مستحيه
مسكت عصاتها ووقفت ..
رتبت اغراضها بجهه مرتبه بالغرفه الثانيه ..
عرفت انها ماخذت معها عطر ومعناها بتطلع لغرفة النوم المقابله ..
فتحت الباب (عسى مايجي ..هو وينه..)
ولفت وجهها ماشفت احد بالصاله وصوت التيلفزيون عالي ..
(عسى مو بالغرفه ؟؟؟ لا تو ماتعطرت .. اشوى تعطرت وشافت شكلها ..وابتسمت داخليا.. هو وينه لايكون ماجاء ..الا ووشلون التلفزيون يشتغل )
طلعت للصاله تعرج كعادتها (بطني يمغصني الظاهر من الجوع ..وش هذا ريح خبز )--
انتبهت لصوت في المطبخ (شكله يزين الفطور)
وبســـــ وقفت عند الباب xxابتســـــــــــــــم (يالبيـــــــــــــه صدق اللي سماتس الجنيـــــــــه )
راكان وهو يقرب يميل عليها --هلا والله صباح الخير
اريج وهي تميل تسلم عليه وبابتسامه وصوت منحرج وايدها ترجع تلامس رقبتها من احراجها كعادتها(والله مالي وجهه) --صباح النور
اريج بهدوء-- خل اساعدك
راكان وهو ياخذ الصينيه--وشهو فيه انا خلصت ياله تعالي
وبطريقه للطاوله --تدرين اني ماتركت شي بالثلاجه يوم سافرت وشكل هاللي متقضي عبد العزيز الله يهديه
اريج(لاتطريه قسم كرهت طاريه) وهي تترك عصاتها وتجلس ببطء
راكان وهو يمد لها الخبز --سمي
اريج وهي تاخذها وتنزلها --معليش طلبتك انا اللي بزين الشاهي
راكان بابتسامه وهو يوقف--لا هههههههههههه انا ناسيه بروح اجيبه
ارتاحي اجل انا وش احوس من يوم...ازينه بس نسيته (يوم شفتســـــ والله ماصدقت ارجع اشوف ابتسامتس)
وبالمطبخ تسمعه يكمل --وش الفطور بس افتح وحط بالصحن
وهو يطلع بطريقه لها--تراني متعود واحب المطبخ ههه
اريج بابتسامه وهي تشوفه يصب لها--تسلم
راكان--ومن قال سالم ..افطري يابعدي ماكلتي شي من امس
اريج (والله حتى بطني يوجعني بس كل ماتذكرت تنسد نفسي )
وبعد لحظات كل واحد يتجنب يشوف الثاني..
راكان --خل نشوف اخبار العربيه اللحين عندهم الساعه 6 ونص صباح
اريج--اكيد توهم يروحون المدرسه
راكان--من اللي تروح الجامعه من خواتس
-----------------------
وبالســـــــــعوديه --الرياض ..
ماقلتلتس حصه خطبها ولد ال عايد صديق راكان فـــــــــــــــــــــــــــــــــــلاح
عبيـــــــــــــــر وقف قلبها ..بلعت ريقها بصعوبه ..
حاولت تضبط نفسها--ماقالت لي
ساره --السالفه توها صايره امس كلمتني مرت اخوه هند وقالت ترا ابيها لحمــــــــــــــــــــــاي
عبير (خـــــــــــــــــلاص تكفــــــــــــــــين ..امس صدمت اخوي واليــــــــــــوم..؟؟)--بس
اي ومافي شي اللحين وحنا مانبي نقول لرنو عشان اختبارات ومافي شي الا بعد مايرجع يعني ماله داعي نشغلها من اللحين ..
عبير ماعــــــــــــــــــاد تستوعب شي ء--انتبهت لمحمود اللي له دقيقه واقف ينتظرها تنزل ..
اممم السوري انا وصلت باي
باي
(والله استوعبت نفسي ها ها وش بتبكيـــــــــــن ؟؟ ليه انتي اصلا وش مأملتس فيه خاطبتس ؟ملمحلتس ؟
مادرى عنتس .؟.)
مرت من عند مكتب سميره --ودخلت ماشافتها
مرت موظفه --صباح الخير ابشرك سميره ولدت
عبير وهي تضحك--ماشاء الله الحمدلله الله يبشرتس بالجنه
دخلت المكتب وانفجــــــــــرت عيونها بدموع ساخنه--(لا احد يجيـــــــــ اللحين ويشوفنيــــــــ ابي ابكيـــــــ
تجمعت والله تجمعت بس خلوني استوعب انه بياخذ اختي ..
هـــــو وش عرفه مرت اخوه اللي خاطبه وامه مدري عنها بعد يعنيـــــــــ
مدري ليش ابكي بس والله ابي لها الخير
بس تفاجات هـــــو ؟؟
بســ بســ صوت احد جاء ..
طلت عميله في المكتب وسلمت وراحت --
عبير طلعت مرايتها --
والله تجمعت علي امس اخوي واليوم اختي وهــــــو
يعني لا اله الا الله ..الله يوفقهم
رتبت نفسها --
وقررت تتصل تبارك لسميره
لم يجف قلمي غدا يكمل ويكشف لنا اسرارهم
كل الود لكم
صبى الاوراق
|
28-10-09, 04:18 PM
جديد مواضيع قسم القصص المكتمله من وحي قلم الاعضاء
العرض العادي
