الجزء الـ 13
الصبح ... عقب ما طلعت الشمس ... عفرا نزلت تحت .. ما شافت لا امها ولا ابوها ! ولا حتى هزاع .. غريبة ! ... وجنّه الا سلامة كانت بايته هني فالليل .. وين سارت ؟
مسكت سماعة التيلفون واتصلت في هزاع
عفرا : الو
هزاع: هلا عفاري
عفرا: وينك ؟
هزاع: فالمستشفى
عفرا: اكيد سلامة
هزاع: هيه ..
عفرا: اخبارها ؟
هزاع: فالولاده
عفرا: شوووووووووووه ؟! .. والله مصخرة خواتك
هزاع: وانتي من خواتي وانتي بعد وياهن مصخره والحين انا ببند عنج
عفرا: هههههه قبل ما تصك عني .. قولي امايه وياكم ؟
هزاع: هيه امايه وابويه وشمسه وحصه ..
عفرا: ما باجي غيري وغير امون
ونفس الوقت دخلت آمنة
عفرا: هذي امون يت هني
هزاع: خلاص عيل جابليها ويلسي ...
عفرا: طمنونا عليها
هزاع: ان شاء الله .. مع السلامه
عفرا: ماي هيييييرت وذ يو برو
بند هزاع عن عفرا .. وعاد عفرا بدت بالسوالف ويا آمنة ..
عفرا: انتي جيه رديتي بيتج ؟
آمنة: بس بعد شكثر اتم ؟
عفرا: بس زين سويتي لان سلامة بتربي بتيي ما عندنا حجر تشحنكن كلكن
آمنة: هاهاها .. والله لو كنت ابا كنت بتم ... وبنقل اغراضي حجرتيه فوق
عفرا: يالله يالله وريلج يصعد وينزل فوق
آمنة: كيفج عاد
عفرا: سيري سيري ... وايد مصدقه عمرج ..
ودخل احمد ..
احمد: السلام عليكم ..
عفرا: وعليكم السلام .. مرحبا النسيب
احمد: مرحبتين .. لا شغلة ولا مشغلة .. بس يالسه فالبيت
عفرا: شوه نسوي بعد ... انته مب جنّه لازم تكون فالدوام الحين
احمد: اجازة مودي حرمتيه وبنتي المستشفى
عفرا: صدق قاص عليهم اجازة عسب بس ساعه بتودي بنتك التطعيم وبترد
آمنة: احمد سر الدوام
احمد: ما بسيييير ..
عفرا: هههه بايعنها
احمد: تعالي تعالي ما عندج شغل .. تعالي تريقي .. امون تعالي
آمنة: انا ما ابا
عفرا: شوه يايب
احمد: براتا ... سيري ييبي جبن وعسل .. ومربى .. وقشطة .. والا ما عندكم ؟ اطلبي من الدكان
عفرا: ههههههه لا عندنا بس انته لا تستعيل دقايق وبييب .. الصراحه شهيتني
احمد: يالله عيل بسرعه ...
سارت عفرا بتييب ما لذ وطاب عسب ياكلونه هي واحمد ويا البراتا ...
آمنة: احمد قم سير الدوام
احمد: انتي مدوخه سيري رقدي .. قلت لج خذت اجازة يوم كامل خلاص
آمنة: انته وايد تلعب
احمد: هاها تلعبين ويايه
آمنة: افففففف صاحت ... انا فيه رقاد
احمد: ييبيها هني بأكلها براتا
آمنة: قم انته زين وايد متفيج .. بسير ارقدها داخل
احمد: ايه وين تسيرين داخل يلسي .. اختج الحين بتيي
آمنة: والله وانا ايلس مجابلتنكم
احمد: رقدي هني ... انسدحي ع الكرسي
آمنة: ما شي شغل
احمد: امون بلاج اليوم ..
آمنة: فيه رقاد والله
احمد: ثرني اقولج انسدحي هني ..
آمنة: ابا ارقد ع شبرية مريحه
احمد: ما عليج بسير كارفور اشتري لج هالفراش اللي تنخشين داخله .. عسب أي مكان ياج رقاد بطليه هالفراش وانسدحي داخله ..
آمنة: هيه وبرقد بنتك داخله ويايه
احمد: هيييييييه ... عسب تموت وتختنق
آمنة: عيل تبا تخنقني انا ؟
احمد: انا ما ابا اخنقج روحج تبين تخنقين عمرج ...
رن مبايل عفرا ..
آمنة: شوف منوه متصل ؟
احمد: لا والله حلفي !
آمنة :ييب انزين المبايل ( وعطاها احمد ) ... هذا هزاع ... الو هلا هزاع
هزاع: مبروك عليييييييييييييييييييكم ..
آمنة: بشر .. بنيه حلوة شرات بنتي الحلوة
هزاع: هههههههههههههههههههههههههه
آمنة: بلاك تظحك .. شوه يعني بنتي مب حلوة
هزاع: ههههه لا والله .. اصلا حد يقدر يقول عن بنتج مب حلوة .. اقص لسانه انا .. بس سلامة يابت ولد
آمنة ( منصدمه ): ولد !....
هزاع: هيه والله ولد
آمنة: كيف عيل قايلين لها بنيه !
هزاع: شدراني فيهم .. هو يمكن لانهم شافوه انه وايد حليو قالوا انه بنيه
آمنة: هاها .. تنكت حضرتك
هزاع: ههههههه والله ما شاء الله عليه .. ما انكت .. ظهر حليو الهرم
آمنة: حرام عليك فديته .. ليكون احلى من بنتي ما برضى
هزاع :قلت لج محد يتحدى بنتج فالجمال خلاص صخي
آمنة: سلم عليهم كلهم .. وانا فالبيت يالله ردوا
هزاع: شوه تسوون ؟
آمنة: انا يالسه.. واحمد وعفاري اونه بيتريقون
هزاع: شوه يتريقون ؟
آمنة: براتا وجبن وخرابيط
هزاع: اللللله حلفي ... ابا
آمنة: تعال شاركهم
هزاع: قولي لهم يتريوني .. بخلص من هني وياينكم
عفرا: بشريييي
آمنة: يابت ولد
احمد: مال مصخرة والله .. مب قلتوا بنيه ؟
عفرا: ما ادري عنهم
احمد: وهاي اختج حاشرتني سلامة قالوا لها بنيه انا ابا بنيه وحرام وما ادري شوه من حنتها هي يابت بنيه وسلامة يابت ولد ..
عفرا: هههههه حليلها سلامة ..
بو هزاع: شوه بتسميه يا طارق؟
شمسه: هههههه طارق الحين ما يبا الولد .. بس يفكر في سلامة
حصه: يلس يا طارق
طارق: لا بس .. شوه خلاص
حصه: قول جملة مفيدة ههههه
طارق: عمي انته شوه تبانا نسميه ؟
بو هزاع: الراي رايك وراي حرمتك ...
حصه: سلامة كانت تبا بنيه ... وبدلعها ووو واختارت لها اسم .. اخترب كل شي ..
بو هزاع: لا تقولين جذه يا حصه ... ما اخترب شي .. وبنيه وولد ... الحمدلله بس يوصلون بخير
حصه: السموحه ابويه ...
شمسه ( بغت تغير الموضوع) : اقول يالله عاد شوه بتسمونه .. طارق قول ..
طارق: ما ادري والله ( وابتسم ) .. اظاربنا ع خوله وسارة وعليا .. والحين لا خولة ولا سارة ولا عليا
وصلت ام هزاع ..
ام هزاع: انتوا بعدكم واقفين ..
طارق: عمتيه .. شحالها سلامة ؟
ام هزاع: سلامة بخير الحمدلله ... شوه ناوين تسمونه ؟
طارق: ما ادري والله ... انا يوم شفت انه ولد .. قلت سيف
ام هزاع: لا
الكل انصدم ..
ام هزاع: سيف لا ... انا قايلة محد يسمي سيف قبل عيال سيف رواحهم .. ومحد يسمي سيف قبل عمر ...
طارق ( ابتسم ) : خلاص .. سيف لا .. اسم ثاني
شمسه: سمّوه عامر .. حلو اسم عامر
طارق: حلو ... شرايج عمتيه ؟
ام هزاع: كيفكم .. كل الاسامي حلوة .. والياهل ايي و اسمه معاه ...
طارق: شرايك عمي ؟
بو هزاع: حلو اسم عامر
طارق: حصه شرايج ؟
حصه: كيفكم ... انا لازم اسير البيت الحين .. فمان الله
ام هزاع: ما بتتريين يودون اختج حجرتها
حصه: لا ما اقدر .. علي فالبيت روحه .. بسير ..
وسارت حصه ... وتموا الباقين يتريون سلامة ...
في بيت السفير ...
هند يالسه ويا يدتها غريسه فالصاله ... وامها يالسه ع صوب وتتصفح المجلة ...
هند: انزين شرايج نسير كندا نسكن عند عمي
يدوه غريسة: كندا ! ... عند بطي .. مب سايرة
هند: ليش؟
يدوه غريسه : خبلة انا اسير عند بطّاي .. خبلة ما فيه مخ
هند: هههههه ليش انزين ؟
يدوه غريسه: بطي وين ... ونحن وين .. بطي في عالم ثاني .. ما يدري عن أي حد
هند ( وهي تطالع صوب امها ) : هيه يوم اقولهم
يدوه غريسه: تقولين حق منوه ؟
هند: ما شي ...
يدوه غريسه: خبلة انتي يا بنيه ؟
هند: ههههه لا لا .. بس ما شي
يدوه غريسه: جواهر
جواهر: هلا عمتيه
يدوه غريسه: شحال عذيجه اختج
جواهر: الحمدلله .. بخير
يدوه غريسه: ما تنشاف
جواهر: بنتها ربت وهي فالمستشفى
يدوه غريسه: أي وحده فيهن ؟
جواهر: سلامة ..
يدوه غريسه: هاي آخر وحده عرست ؟
جواهر: هيه ..
يدوه غريسه: هيه ما شاء الله ... وحصه للحين ما حملت ؟!
جواهر ( صكت المجله ): لا ... اسمحوا لي بسير حجرتيه ..
في طرف ثاني ... حصه دخلت شقتها .. شافت علي يالس فالصاله ...
حصه: السلام عليكم
علي: وعليكم السلام ..
وسارت حجرتها ..
مب من عوايد حصه انها اول ما تدخل تسلم وتسير الحجرة ع طول .. لازم تسلم وتيلس شويه .. او انها تسأل علي ع الاقل شوه سويت .. او ليش ما ظهرت اليوم ...
نش علي وسار هو الثاني وراها ...
علي: حصه شوه فيج ؟
حصه: ما فيني شي ..
علي: سلامة اختج شحالها ؟
حصه: الحمدلله
علي ( ابتسم ): شوه يابت ؟
حصه: ولد
علي: الله يحفظه لهم ان شاء الله
هني حصه ما قدرت .. ونزلت دموعها ... غصباً عنها ..
علي: شوه فيج ؟
حصه: قلت لك ما فيني شي
علي: كيف ما فيج شي وانتي تصيحين ..
واكتفت حصه بالسكوت ..
علي ( تنهد ): حصه انا ادري شوه فيج
حصه: علي .. انا خلاص تعبت .. كل حد قام يسأل ... كل حد قام يقول بلاها حصه .. شوه سالفتها ؟
علي: وانتي فيج شي ؟
حصه: ما ادري
علي: نحن سرنا وسوينا فحوصات صح ؟
حصه: صح
علي: قالوا الحمدلله لا انا ولا انتي فينا شي ... فـ ليش تصيحين
حصه: الناس ما يفهمون هالشي ...
علي: لا يفهمون .. مب لازم يفهمون ..
حصه: كيف مب لازم يفهمون .. كيف ؟ المعاير في كل مكان .. كل وحده من تتصل في امايه .. اول سؤال حصه ما حملت ... آمنة اختيه عقبي معرسه .. وحملت وربت .. سلامة اصغر وحده فينا معرسه .. حملت وربت اليوم ..
علي: حصه انا شكيت لج ؟
حصه: لا
علي: عيل جيه تهتمين للناس
حصه: حتى لو الناس ما يعايرون .. انا ادري شوه نظرة اهلك لي
علي: اهلي ما يخصهم
حصه: كيف ما يخصهم ؟ كل ام تبا تشوف عيال ولدها .. صح والا
علي: صح .. لكن كل ام بعد تبا سعادة ولدها .. فـ يوم امايه تشوفني انا مرتاح في حياتي ويا حرمتيه .. هي بترتاح
حصه: علي انته مب فاهمني
علي: فاهمنج والله فاهمنج .. بس انتي مستويه حساسه زيادة عن اللزوم
حصه: كم مر ع زواجنا ؟
علي: استغفر الله .. لو ان شاء الله 10 سنوات .. وبعده ما عندنا عيال خله برايه
هني صاحت حصه زيادة ... وعلي واقف ما يدري شوه يسوي .. حاس فيها .. حاس باحساسها .. هو بعد يتمنى يكون عنده ياهل .. ويضمه لـ صدره ويلعبه .. لكن حكمة الله .. وهو ما يقدر يعترض ع قضاء الله وقدره ..
في بيت الشباب ...
عبدالعزيز: آآآآآآه بطنيييي .. بطنيييي
راشد: عبدالعزيز تأدب
عبدالعزيز: لا استطيع ان اقاوم
مروان: تقاوم شوووه
عبدالعزيز: الجوووووع
عمران نازل من فوق ..
عمران: بطونا عورتنا يالله وين الغدا ؟
مروان: بلاهم الاخوان اليوم
عمران: ليش منوه يوعان غيري؟
راشد : دايما عنتر اخو بلال ... ما تفرقون عن بعض في هالشي دايما يواعه
مروان: انته وعبدالعزيز
عبدالعزيز: هو يقلدني
عمران: لااا احلف .. اقلدك فاليوع .. سبحان الله
مروان: ههه مصدق عمره الاخ جنه مكتشف شي عظيم .. وعمران سرقه منه
راشد: الآن وعلى ضفاف الانهااااااااار
مروان: يعيس سعيد اجمل ايام عمره
عبدالعزيز: يحلم هو
مروان: شوه يحلم ؟
عبدالعزيز: يعيش احلى ايام عمره بدونا
عمران: هو عايشنها .. بدون
احلام
راشد: يعنا يا بوي
مروان: ههههههه عادوك الاخوان
راشد: فرييييييييييييييييييييد
مروان: بابا فريييييييييييييييد
عمر نازل من فوق ..
عمر : بلاكم تصرخون ؟
مروان: اخوانك يواعه ... يبون غدا
عمر: الحين بيحطه فريد
مروان: وينج يا عموه .. والله اشتقت حق طباخج
عمران: هيه والله انا بعد
راشد: ما يتنا من زمان ..
مروان: انشغلت بعرس سعيد .. وحريم وخربطان
عمر: اتصلوا بها ... خل تيي اليوم
عبدالعزيز: وجيه نحن ما نسير لها ؟
مروان: لا اليوم .. اممممم مشغولة بتكون .. سلامة بنتها ربت
عبدالعزيز: اوووونه .. المبزاااااايه
عمر: عبدالعزيز
عبدالعزيز: اوووه عمور انا متعود عليهن عادي .. مروان قول شوه يابت ؟
مروان: ولد يشبهني .. لانه يقولون حليو
عبدالعزيز: ههااااااااي بنسير يوم واحد نشوف ولدها عيل ..
وصل فريد
راشد: من العام زاقرينك
عمران: فرييييد انا يوعاااان
فريد: الحين بييب الغدا
مروان: بابا فريد ..
فريد: شوه
مروان: شخبارك
فريد: انا زعلان
عمران: ليش ان شاء الله ؟
فريد: سعيد مب موجود اليوم
راشد: اووووونه .. عداااااال
عمر: ههههه ما عليه بيرد عقب كم يوم ..
عبدالعزيز: يالله حطوا الغداااااااا
مروان مسك مبايله ودق الرقم ..
مروان: هلا عذّوج شخبارج
عذيجه : اهلين المعرس
مروان: هههههه انا الحين مب معرس .. سعيد المعرس
عذيجة: شوه تبا ؟
مروان: عموه مشتهي طباااخج
عمر: مروان يالسخيف متصل في عموه وتوك تقول انها مشغولة
مروان: نلعب في اعصابها بلاك هههههه
راشد: تستهبل عليها
عمران :قولها عمران بعد يبا ياكل من طباخج
عذيجة: انا اليوم مب فالبيت .. عفرا اليوم فالبيت
مروان: اسمي عيل ام الدويس حرقت الاكل
عذيجة: جيه هي تعرف تطبخ عسب بعد يحترق الاكل
مروان: لا بس مشرفه مشرفه ع الخدم
عذيجة: شخباركم انتوا ؟ وشحال اخوانك ؟
مروان: الحمدلله كلنا بخير
عذيجه: سعيد ما اتصل بكم ؟
مروان: فينا نحن لا .. بس في عمر اكيد ( وشاف صوب عمر .. وعمر ابتسم دليل ع انه كلام مروان صح )
عذيجة: فديت روحه والله ..
مروان: تفديني انااااااا
عذيجة: الواحد يوم بيتفدى دون ما حد يقوله بيتفدى ... انته تجبرني اتفداك
مروان :افااااااا
عذيجة: هههههه
مروان: انزين شوه سميتوا ولد الخقاقه ؟
عذيجة: ما ادري يقولون هني عامر
مروان: قولي حق طارق سمّه مروااااان
عذيجة: مب من الله تباهم يسمونه مروان .. امسات تقول محد يسمي ولده ع اسمي لان اسمي غالي وما ادري شوه وخربطان .. اكيد قالوا لك حليو الله يحفظه
مروان: ههههههه هااا عذوج طلعتي مب هينه ... عيوز مطوره
عذيجة: عيز حيلك يا مروانو .. بند بند .. مب فاضيه حق سوالفك البايخه
مروان: هههههه ببند لان فريد توه حط الغدا بسير اتغدا يوعان
عذيجة: وقول حق فريدو .. عموه بتييك .. اذا شافت شي خربان ومخربط شرات كل مره يا ويلك آخر مره انا علمته كل شي ..
مروان: افا عليج ... بقوله .. عاد هو من الصبح يحط عليه انا حليلي
عذيجة: زين يسوي فيك
مروان: هههههه الله يسامحج .. يالله مع السلامه
عذيجة: الله يحفظكم .. سلم ع اخوانك كلهم
سالم: يا ابيييييييي يا ابيييييييي
صالح: نعم يا ولدي
سالم: اين امي ؟
صالح: امك فالمستشفى .. خالتك سلامة يابت ولد
سالم: يسسس والله احبها ... اموووت في خالوه سلامة
صالح: ويه ويه ويه من وين نزل هالحب كله ؟
سالم: ياخي يابت ولد ...
صالح : انزين ويعني ؟
سالم: استوى عندي ولد خااااااااله .. احم احم زين زين خل اييبون اولاد عسب ما اسير عند عيال عمي وعمتيه النحوس
صالح: سالم .. كم مره قايل لك لا ترمس جذه عن عيال عمك وعمتك
سالم: ياخي انزين ما احبهم وايد
صالح: لا تحبهم ولا ترمس عنهم جذه ... انزل انزل .. يالله
سالم: الى اللقاااااااء يا ابييييييييييي
نزل سالم وسار داخل ... شاف آمنة و عفرا يالسين بس ...
سالم: السلامُ عليكم
آمنة: وعليكم السلام ورحمة الله وبركاته
سالم: كيف حالكن يا خالاتي العزيزات
آمنة: هههههه بخير والحمدلله
عفرا: اف وصل الحشرة
سالم: خالوه عفاري بلاج تتحرطمين
عفرا: لا ما بلاني شي
سالم: شكلج مب مستانسه
عفرا: لا حشى .. انا مب مستانسه ؟ منوه قال .. .سالم ولد صالح ياي بيتنا ما تباني استانس
سالم: هيه اتحسبت بعد
عفرا: صدق عمره
آمنة: وين ابوك ؟
سالم: ابي لقد ذهب لـ يسلم على جدتيه التي انا ما احب اسير بيتهم هناك وايد
آمنة: بدا بدا الحين
سالم: لا لا خلاص بسكت ... وين بنتج ؟
آمنة: هذي بنتي
سالم: خلاص بنكنسلها الحين
آمنة: هيه قصورك انته تكنسلها اونه
سالم: خالوه سلامة غلبتج يابت ولد ولد ولد ...
آمنة: وخير يعني ؟
عفرا: ولد عسب يظهر عفريت شراتك .. ثرنا ناقصين عفاريت نحن .. انته وعزوز مب مكفينا .. سلامة تكمل السلسلة
سالم: ما شاء الله علينا
عفرا: اللهم لا حسد
آمنة: هههههههه
سالم: وين عمي احمد ؟
آمنة: سار البيت .. وبيرد عقب
سالم: خل ايي بنيلس وياه
آمنة: يا سلام!
سالم: هيه ما بجابل حريم انا
وسار سالم جابل التلفزيون و حط ام بي سي 3 ... ويلس عاد يطالع ... وآمنة وعفرا يالسات يسولفن
في بيت السفير .. بدر طبعاً توه ناش .. لانه امس طول الليل سهران ...
ظهر من حجرته ما شاف حد فالصاله اللي فوق ...
وطل تحت .. ما كان في حد غير يدته فـ ما بغى ينزل روحه ..
سار صوب حجرة هند ..
دق الباب ..
هند: ادخل
بدر: شوه تسوين ؟
هند: يالسه
بدر: غريبة ما يالسه تحت ويا يدتج المصون
هند: عقب بسير
بدر: شوه كان العرس الغجري
هند: أي عرس ؟
بدر: عرس ولد خالج
هند: ليش تقول عنه غجري
بدر: لانه كان بايخ
هند: بالعكس كان وايد حلو
بدر: حلو بالنسبه لج انتي ... اما بالنسبة لي انا من اتعس الاعراس اللي حضرتها ... خيمة الصراحه ما تسوى .. و اكل رخيص
هند: مب كل شي لازم يكون هاي هاي عسب يناسبك .. اهم شي انك تشوف هلك .. اللي من زمان ما شايفنهم
بدر: الله والاهل .. الصراحه يعني .. كلهم دون المستوى
هند ( فتحت عيونها ع الاخير ): انته ليش تنظر للناس من منظورك الشخصي
بدر: عيل من وين تبيني اشوفهم ؟؟ من منظورهم هم الشخصي
هند: ليش تقول عن هلك جذه ؟
بدر: لانهم جذه ...
هند: بالعكس انا وايد استانست امس .. وايد وايد .. شفت البنات ...
بدر: وخير شوفيهن .. اكيد طبعا انتي وامايه كنتن ارقى هنتين فالعرس
هند: بالعكس .. هن ما يقلن عنا فالجمال
بدر: بالسلف متكشخين
هند :انته ايه .. احترم .. ثر اللي كانوا فالعرس كلهم هلك ..
بدر: انا منقهر
هند: من ؟
بدر: من قلة ادبهم امس !
هند: ليش ؟ كانوا قليلين ادب! .. جيه انته ساير عرس والا ساير تظارب
بدر: كل ما قلت كلمة ردوا عليه بـ عشر ...
هند: بدر بدون مجاملات يعني .. اسمح لي .. بس انته تنرفز الواحد برمستك ..
بدر: انا ما اقول غير الصدق
هند: انته تقول الصدق لكن مغلف بغلاف التكبر والغرور ... و الحقد ع هلك
بدر: انا احقد عليهم ؟ ليش ان شاء الله ما شايف خير شراتهم
هند: استغفر الله العلي العظيم
بدر: والا عيالهم الصغار ... عمر اللي كل ما سرنا بيت خالي يوسف .. يقول بسير بسير بسير تأخرت اخويه الصغير ... طلع تحفه
هند: منوه عمر ؟
بدر: ولد خالي سيف .. اللي توفى
هند: الله يرحمه .. وشوه سوى بك اخوه الصغير ؟
بدر: قليل ادب هو والثاني ما ادري شوه اسمه ولد ريل بنت خالتج
هند: مستحيل يسوون بك شي مدام انته ما تعرضت لهم
بدر: انا ... جيه شوه شايفتني ؟ياهل احط راسي براس يهال
هند: ما ادري عنك
بدر: لوعوا جبدي الصراحه خصوصا ع العشا .. اونه ديدان وصراصير و ما ادري شوه يخربطون
هند: هههههههههه وانته من جيه منقهر
بدر: هيه .. جيه يالسين في ديزني ؟ هكونا متاتا وتيمون وبومبا !
نقعت هند من الظحك ...
بدر: هيه ظحكي مب انتي اللي ملوعين جبدج
هند: ههههه انته تظحك والله .. صدق صدق ظهرت ياهل ... وانا اتحسب شي الحين
بدر: وهذا مب شي بالنسبه لج ؟ ما الومج .. حبيبتيه من الادب والاتيكيت .. يصخون .. نحن كبار يالسين جدامهم
هند: وليش هالرسميات عادي ..
بدر: عادي عندج مب عندي
هند: انته وايد مكبر السالفه ... بسير ايلس ويا يدوه
بدر: سيري سيري عند يدتج غريسه ..
هند: ع الاقل احسن من كل اللي فالبيت .. لو انها تحط عليه .. بس مهتمه فيني ...
وسارت هند
بدر ( يقلد هند ): تهتم فيني .. افففف وايد فاضيه ..
في مكان ثاني .. بلد ثاني .. بعيد عن كل هالاجواء اللي نصها حلوة ونصها مرتبكة .. ونصها ولا ندري عنها ...
سعيد و بدور .. في الفندق ..
سعيد ( ياكل آيس كريم) : شوفي يايب لج هالخريطة
بدور : وشوه اسوي فيها ؟
سعيد: عسب يوم نسير الجزر ما نضيع
بدور: بعد جزر ؟
سعيد: ما كانت الرحلة حلوة ؟
بدور: هيه .. بس بعد ما ابا اسير
سعيد: لييييييش؟ فيج شي! .. مريضه ؟
بدور: لا لا .. بس عقب يومين الطيارة ... انا ما سرت اشتري أي شي حق اختيه وامايه
سعيد: اهاااا .. يعني هاليومين تبين كله اسواق .. ما نطلع
بدرو: اذا ممكن
سعيد: خلاص عيل .. نكنسل هالرحلة .. مع ان يمدحونها
بدور : جيه بس هاي أول وآخر سفرة نسافرها ؟ جدامنا وقت
سعيد: انزين .. مثل ما تبين ...
بدور: متى بتوديني السوق ؟
سعيد: متى تبين ؟
بدور: الحين بسير اتزهب وننزل السوق ..
سعيد: خلاص مثل ما تبين .. يالله سيري ..
سارت بدور تتزهب ...
وسعيد مسك مبايله ..
سعيد: الوووو
راشد: سعّوووووووووووووود
سعيد: هههههه الناس يسلمون
راشد: انته اللي متصل
سعيد: خلاص .. السلام عليكم ورحمة الله وبركاته
راشد: وعليكم السلااااام .. مستوي لي عمران .. ما احيدك ساير شهر العسل العمرة
سعيد: ههههههه عن الاستهبال .. شخباركم ؟
راشد: تماما والله .. نسأل عن حالك
سعيد: انا بخير الحمدلله
راشد: وشحال المدااااام
سعيد: الحمدلله
راشد: والله ولك وحشة يا سعيد
سعيد: والله انتوا بعد .. تولهت عليكم
راشد: وجيه ما تتصل
سعيد: اتصل في عمر ..
راشد: بس عمر ..
سعيد: عيل تباني اتصل فيكم واحد واحد
راشد: يا ويهك انا رفيق الدرب
سعيد: ههههههه شوه رفيق دربه ؟
راشد: كنت ارقد وياك في حجرة وحده
سعيد: ههههههههه شوه نسوي
راشد: سعيد انا يوعان سوالف ... يالله متى بترد
سعيد: يومين وبكون عندكم
راشد: يا سلاااااام ..
سعيد: عاد اذا وصلت وانتوا محد فالبيت .. يا وييييييلكم
راشد: افا عليك .. ما بخليهم يظهرون من البيت .. بحبسهم
سعيد: ههههه جان رمست ع مروان
راشد: مب ع كيفه
سعيد: لا لا خلاص غيرت راييي .. اخاف تظاربون بسبتي
راشد: ههه ما عليك مروان مستوي بيتوتي هالايام
سعيد: غريبه .. ليش؟ وين هزاع ؟
راشد: مشغول ويا خواته عسب جذه
سعيد: اها ... حليله عيل مروان .. ملان
راشد: خله يتأدب كم يوم .. فـ انته تقول بتيي عقب يومين .. يعني زين مروان بعده بيكون بيتوتي
سعيد: ههههههه زين عيل خل نلحق عليه .. وشخبار عبدالعزيز وعمران ؟
راشد: الحمدلله .. حبيبي تعال استلم مكانتك في هالبيت
سعيد: ليش عاد ؟
راشد: والله عمر .. الشغل اللي انته كنت تسويه .. مخلني انا اسويه .. وانا اكتفي بهذا القدر من الاعمال الشاقه خلال الايام التي مضت
سعيد: ههههههههههههههههههه حلوة ... عيل ما برد
راشد: لا الله يخليك .. رد
سعيد: ان شاء الله .. جريب قلت لك
راشد: توصلون بالسلامة
وتم سعيد يرمس راشد ... صدق اشتاق حقه .. وحق سوالفه .. واشتاق حق باجي اخوانه بعد
في بيت ام احمد ...
رملة: اففففف ملل هالبيت ..
ام احمد: انتي دومج ملانه
رملة: الناس يطلعون .. اجازة يسافرووووون
ناعمه: سافري حد ماسكنج
رملة: كيف بسير ويا قوم عمي ... امايه ما خلتني
ناعمه: عسب تخبلينهم
ام احمد: هيه انا يوم بخرف بطرشج ويا عمج روحج
رملة: وشوه فيها ؟ مب بس عمي سافر ... عمي وعموه يعني عادي ... كلهم ساروا الا انا
ناعمه: نحن اذا سرنا عيسى او احمد لازم يكونون ويانا ... وعيسى واحمد مب فاظين
رملة: اوهوووووو .. انا من زمان ما سافرت
ام احمد: وجيه تسافرين ؟ خلج فالبيت .. محلاها
رملة: حرررررر
ناعمه: اقول رملو انتي وايد ترمسين .. انزين
رملة: بسير اقول حق احمد يوديني
ام احمد: احمد مب فاضي حقج .. عنده حرمه وبنيه ... بيجابلهن
رملة: والله عيل اخو عود ع الفاضي .. بسير اقوله
ناعمه: قولي له اخو عود ع الفاضي .. وبنشوف كيف بيوديج
احمد كان منسدح في حجرته .. سمع صوت دقة الباب .. طبعا معروفة الدقة ومميزة ...
احمد: دخليييييي
رملة: احمد
احمد: نعم ؟
رملة: احمد ملل
احمد: شوه تبيني اسوي ؟
رملة: الله يخليك طلعنيييييييي
احمد: وين اوديج ؟
رملة: أي مكان ..
احمد: والله امون قالت لي امر الجمعية اشتري اغراض حق البيبي ... بتين ؟
رملة: هيه احسن من ولا شي
احمد: خلاص عيل .. سيري تزهبي وتعالي خبريني
رملة: مب تسير عني
احمد: ما بسير لين ما انتي تيين تقولين لي انج خلصتي .. يالله سيري
في شقة ع قدهم ..
حصه ... منسدحه ع الشبرية في حجرتها ...
يا علي ..
علي: حصه ..
حصه: هلا
علي: وبعدين ؟
حصه: شوه
علي: يالله نشي ..
حصه: شوه تبا ؟
علي: نسير بيت ابوج ؟ من زمان ما سايرين
حصه: ما ابا اسير هناك
علي: عيل تدرين .. دامج جذه يعني ... شرايج نطلع ونغير جو
حصه: مالي نفس
علي: حصووووه عن الحركات يالله عاد نشي ..
حصه ( نشت ويلست ): وين تبا تسير ؟
علي: أي مكان
حصه: انا مووووول مزاجي مب اوكيه
علي: اوكيه والا مب اوكيه ... نشي يالله ..
حصه: ما بتمر ع امك اليوم
علي: اممم .. لا ( ابتسم ) ... اليوم ما بسير صوبها ..
حصه: بتزعل
علي: ما بتزعل .. بقول لها اني كنت مشغول .. وما قدرت اييها ..
ورن مبايل حصه ..
حصه: هاي امايه تتصل
علي: ردي عليها
حصه: ما ابا ارد ..
علي: ليش عاد ... حصه لا تسوين بروحج جذه .. والله ما يسوى عليج
حصه: انا نفسيتي تعبانه
علي: ولا شي يسوى ويستاهل ..
حصه: ومب متفيجه اطلع بعد
علي: لا اله الا الله ... اقولج نشي بسرعه تزهبي .. عندج ربع ساعه وتكونين مخلصه .. بيلس فالصاله اترياج ...
في بيت بو زايد ...
مدام انه ما نزل تغدا يوم الكل موجود .. فلازم يتريون وما يشلون الغدا .. لان حضرته توه نازل ويبتغدا
ثاني توه نازل ..
ثاني: ويه خلصتوا !
ام زايد: تو الناس
ثاني: شوه السالفه ؟ بلاكم ؟
زايد: ما فينا شي
ثاني: محد يبا ياكل ويايه ؟
ام زايد: سر تغدا غاليه يالسه تتغدا بعدها ...
وسار ثاني ...
غاليه: الحمدلله
ثاني: غاليه لا تنشين
غاليه: ليش ؟
ثاني: تمي يالسه الله يخليج ... اخاف ابويه ايي ويشوفني يالس روحي ويحط عليه
غاليه: تستاهل
ثاني: عاد لا تستوين نحسه ..
وبالفعل عقب ما بو زايد غسل ايده ورجع ... ويلس فالصاله ... مسك الجريدة ...
بو زايد: مرحبا استاذ ثاني
ثاني: مرحبتين .. شحالك ابويه ؟
بو زايد: انا بخييير .. يوم اني اشوفك تحت
ثاني ( بصوت واطي ): احم احم بدينا
ام زايد: سعيد ما اطمنتوا عليه ؟
بو زايد: ما ادري .. زايد يسير ويرد عليهم ويرمس عمر
زايد: هو بخير .. وبيرد جريب ان شاء الله
ام زايد: الله يحفظه يا رب ..
بو زايد: ان شاء الله بس .. يتمون مثل ما هم ...
ام زايد: كيف يعني ؟
بو زايد: هالحرمه تتقبل بس تعيش في هالحجرة بصالتها الصغيرة .. لين اقنع يوسف ... اما يفتح للولد شقة .. او يبني له ملحق .. لين يقدر ع البيت
زايد: عمي يوسف مستحيل يقتنع
بو زايد: انا بحاول وياه .. لان مستحيل أي وحده ترضى تعيش جذه في بيت كله شباب
زايد: عمر قدها .. وبيقدر يوازي الامور ..
بو زايد: عمر .. عمر هذا والله ما اقدر شوه اقول والا شوه اقول عنه .. ريال صدق ...
ام زايد: ما شاء الله عليهم ... عيال سيف كلهم الله يحفظهم .. ادب واخلاق
ثاني: بدينا نمدح
بو زايد: هيه .. بدينا نمدح احسن عن بعض الناس
غاليه :ههههههه يبتها حق عمرك
زايد: ههههه ملقووووووف
ثاني: عادي .. شوه يعني ..
بو زايد: جان ما نيوزك يا ثاني يمكن تعقل شويه
ثاني يوم خلص ابوه رمسته هاي .. غص ..
ام زايد: عطيه ماي يا غاليه ...
وغاليه ناقعه من الظحك ما تروم تنش .. وزايد بعد يظحك .. ونشت ام زايد بسرعه وسارت شربت ثاني الماي ..
ام زايد: الله ينطب ابليسج يا غاليه .. اقولج اسقيييه
غاليه: ههههههههه ما اقدر .. والله
بو زايد: محد قاله ...
ام زايد: بغا يموت
ثاني: يبون يذبحوني شفتي امايه
زايد: هههههه عاد انته تباها من الله .. امايه تحط علينا بسبتك
ثاني: شوفيهم حتى ما يقولون لي سلامات وما تشوف شر
بو زايد: لا والله ؟
غاليه: ليش الاخ مسوي حااادث ؟
ام زايد: ودريها الرمسة الماصخه هاي يا غاليه ... لا تقولين جذه عن اخوج
غاليه: ما قلت شي ... والله هو يبانا اونه نقول الحمدلله ع السلامة .. ما تشووووووف شر يا حبيبي يا اخويه
ثاني: هيه اطنزي مب انتي اللي بغيتي تموتين
ام زايد: بسم الله عليك
زايد: هيه ادلع زيادة الحين ادلع
طبعا تم ثاني يدلع ع امه ... وحمد ربه تغيرت السالفه .... والا الرمسة اللي قالها ابوه قوية في حقه ! ...
في حجرة عمر وعبدالعزيز ...
عبدالعزيز منسدح ع الشبرية ..
عبدالعزيز: آآآآآآآآي بطني
عمر: لا حول ولا قوة الا بالله .. لا يوم كنت يوعان ولا يوم كلت وشبعت ؟
عبدالعزيز: كلت وايد
عمر: محد قالك
عبدالعزيز: انته قلت لي عبدالعزيز كل وعبدالعزيز كل
عمر: بس مب جذه تاكل
عبدالعزيز: انزين بسألك
عمر: تفضل ..
عبدالعزيز: يوم سعيييييد وحرمته بيردون وبييون البيت .. بييلسون ويانا ياكلون ؟
عمر: لا طبعا
عبدالعزيز: صدق ؟!
عمر: هيه يعني اتمصخر وياك .. تخيل تيلس ويانا نحن .. حرمه وحده بس بين 6 شباب
عبدالعزيز: هاي عيل ما بنشوفها خير شر ..
عمر: وشوه تبا فيها ؟
عبدالعزيز: ما ابا منها شي طبعا ..
عمر: عيل خلاص ..
عبدالعزيز: انزييييييين ليكون يوم انته بتعرس بعد جيه بتسوي ؟
عمر: هيه .. انا ما ايلس حرمتيه بين شباب
عبدالعزيز: يالللله انا باكل وياكم لو جيه سويتوا
عمر: ههههه وين تاكل ويانا ؟ استح ع ويهك
عبدالعزيز: مب ع كيييفك .. عيل لو سعيد جيه بيسوي وانته بعد جذه .. انا اجابل راشد ومروان وعمران !
عمر: اخوانك
عبدالعزيز: يالللللللله .. ما ابا
عمر: كيفك .. سو اللي يريحك
عبدالعزيز: اللي يريحني اني آكل وياكم .. وبعد تعال .. سعيد خذ الحجرة اللي تحت .. ليكون تبا تفرني انا ويا راشد فالحجرة .. هااااااااااا وانته تاخذ هالحجرة
عمر: عبدالعزيز ... بس سندرت راسييييي
عبدالعزيز: ثرك انته جيه
عمر: ما بعرس لين انته تعرس جيه اوكيه ؟
عبدالعزيز: هيه وايد اوكيه
عمر: والحين ممكن يعني تسكت برقد شويه
عبدالعزيز: انا ما فيني رقاد
عمر: والمطلوب ؟
عبدالعزيز: تيلس ويايه
عمر: هيه .. ثره ما شي شغل ... بس انته تقولي ارقد ارقد .. تقولي يلس ايلس .. اطلع اطلع ...
عبدالعزيز: العطف على الصغيييييير
عمر: ما يخصه .. وجان بترمس ع العطف .. انته اعطف عليه وخلني ارقد
عبدالعزيز: هههه خلاص عيل برقد وياك الحين
عمر: احسن بعد ... عسب عقب يوم انا انش ما تيي ترقد
في بيت بو هزاع ..
احمد توه نازل من السيارة ..
احمد: يالله انا ياي سوي لي درب
آمنة: تعال ما في حد غيري انا وعفرا وشمسه وسالم
احمد: لا والله ابد ما في حد ... انزين سوي لي درب
آمنة: يالله تعال ..
رملة: ايييه وين يايبنيييي
احمد: نزلي نزلي ... عيل ليكون تبيني اردج البيت .. وعقب ايي هني
رملة: هيه طبعا
احمد: لا حبيبته ... ما اقدر .. مشتاق انا حق بنتي
رملة: لا والله !
احمد: ههههه نزلي يالله ما في حد ..
ومشى احمد لين الصاله .. ومشت وراه رملة ... وصل
احمد: هود هود
آمنة: هدا
احمد: كيفكوووون اخوات زوجتي العزيزة
عفرا: بخير .. ونسلم عليك
شمسه: وانا اشوف بيتنا منور .. اثاري الحلوة وياك
عفرا: اوه انا هاي ما شايفتنها من زمااااان
احمد: رملة بلاج عادي عادي ..
وسار احمد يلس ورملة لاصقه فيه مستحيه اونها ...
آمنة: هههههه ط اونه رملة تستحي ...
احمد: اول مره ما يليق صح
شمسه: ههههههه حرام عليكم
سالم ( ياي من الصاله الثانية ) : امااااااااااااااااايه
احمد: وصل ...
سالم: اوه انته هني
احمد: لا هناك
سالم: اوكييييييييه
احمد: هههههه امون قلتي لهم عن سالفة هذا وعبدالعزيز فالعرس
آمنة: ههه لا
احمد: شمسه والله زين ان صالح ما ذبحنا فالعرس
شمسه: ليش ؟
احمد: صالح ما قالج عن اللي سواه ولدج ؟
سالم: ما سويييييت شي
احمد: ابد ما سويت شي
شمسه: ما ياب لي طاري .. قول شوه مسوي ؟ اكيد فشلكم
سالم: انا ما افشل حددددد
عفرا: انته ابد ما تفشل حد ..
سالم: عموه عفاري بلاج عليه
احمد: والله بهدلوا بدر
عفرا: بدر ولد السفييييير .. قول والله
احمد: بلاج تحمستي
عفرا: يا خي ما ادانيييييييييه والله ولا احبه
شمسه: هو ميت فيج
عفرا: مالت عليه
آمنة: بس اخته وايد كانت غير صح
احمد: امون صبي لي شاي
عفرا: هيه انصدمت منها ... كانت كول شراتنا .. اما هو من كلام هزاع عنه احسه به خقاق
سالم: وااايد والله مب شويه ... كان خاطريه اعطيه كففف
شمسه: ايه ايه انته .. بس خلاص
سالم: اونه شوه ع العشا كنا ناكل ... قلنا ديدان .. وصراصير مقرمشة ... وفيران حق السويت اونه لاعت جبده ... ونش ....الحين ريال تلوع جبده !
احمد كان توه حاط الاستكانه عند ثمه وبيشرب ... رد نزل الاستكانه وتم يظحك .. وعفرا بعد ما قصرت لا هي ولا آمنة .. ورملة تشوف الوضع ! ... هذيل مب احسن منا ... هذيل اخس منا فالخبال ! .. وشمسه ما تدري تظحك والا تهزب ولدها ..
*******
28-06-09, 01:08 PM
جديد مواضيع قسم القصص المكتمله
العرض العادي
