كاتب الموضوع :
غيوم الشوق
المنتدى :
القصص المكتملة (بدون ردود)
الجزء الثالث والعشرون
أكيد تبون تعرفون سر طلاقي من عامر كنت في يوم قاعدة افطر فهودي الي كل يوم يكبر عن اليوم الي قبلة سمعت دق جرس البيت والي قاعد يدقه واضح انه مستعجل او فيه شي دخلت علي الشغالة قالت فيه رجال برى يبيني ستغربت من الي يبيني واكيد مو من أخواني لان الشغالة تعرف كل أخواني المهم لبست برقعي وجلالي وتسترت وطلعت اشوف من يبيني والصدمة الي شفتها كان سالم
نوره : سالم
سالم بدون حتى ما يسلم : تكفين يا نوره ابي فزعتك
نوره : عسى ماشر
سالم : رحت للبيت ابي منيرة قالت الشغالة انها في الجامعه وخالتي وجدتي مالقيتهم وامي تعبانه وما تبي تروح للمستشفى ابي بس احد يجلس عندها نص ساعه لحد ما اروح لشغلي ووقع وستأذن واطلع واذا قدرتي بعد تقنعينها نومها الله يجزاك خير
نوره : ابشر ولا يهمك هذي عمتي
سالم : الله يسلمك يا نوره هذا العشم فيك
سالم كان خايف على امه واضح الخوف في عيونه حتى ما حاول انه يسولف معي او يناظرني بمنظار ثاني وربي الشاهد اكيد محترم انه تزوج وانه ما خذ اختي كبر في عيني خذيت فهودي معي وركبت ورى ومشينا وطول الطريق وهو ساكت رحت لعمتي لقيتها تون تألم ويالله تقدر تتنفس سبحان الله الانسان ضعيف قبل كم سنه كانت قويه تروح وتجي والحين ضعيفة لابد احد يساعدها صدق الانسان له جبروت ما يخاف الله على ضعفه وقل حيلته الا انه يبطش بالدنيا نرجع لسالفتنا ولقصتنا
نوره : عمه تسمعيني عمه ردي علي
عمتي صيته : نوره
نوره : أي انا نوره يا عمه قومي بنوديك للمستشفى
عمتي : ماله لزوم يا بنيتي
نوره : الا له لزوم قومي بيركبون عليك مغذي وبيدقونك ببره وراح تتنشطين
عمتي : يابنتي ما احب القعده بالمستشفيات
نوره : تحملي شوي
وفعلا اقنعت عمتي وديناها للمستشفى حتى سالم ما قدر يروح لشغله غلطتي الي غلطتها ما بلغت خالتي اني بروح لعمتي كنت مهتمه وشلت ولدي على طول المهم يوم جلسنا عند عمتي ساعه عشان المغذي كنت اعنز لها وكان سالم شايل فهد معه رجعنا للبيت وفرشت فراش عمتي ورتبت لها كل شي ورحت وسويت لها شوربه شفت الوقت تأخر طلبت من سالم يردني الحين بيجي عامر والي ما حسبت حسابه صار كنت مجلسه فهود قدام مع سالم وهو الي اصر كان يلاعبه ويحبه وانا ورى بس يوم وقفت السيارة رحت قدام وخذيت ولدي والي راح يشوفني بيتوقع اني نازلة من قدام شلت ولدي ورحت للبيت ودخلت شفت عامر قدامي بس مو عامر الي انا اعرفه كان بركان ثاير معقولة الغيرة تعمي معقولة العصبية تعمي معقولة الرجال ما عاد يميز وقت الضيقة و الزعل ما أتخيلت عامر يمد يده علي ما انتبه أني مأخذه فهد معي كان تفكيره منصب على أني طالعه مع سالم حسيت بالارض تدور تحتي كنت احاول اركز احاول اميز وش يقول كان يتلفظ بالفاض يقول كلام وانا اسد اذاني مابي اسمع مابي صورته تخرب في عيوني مابي اكرهه
عامر : قولي يا حماره وش تسوين معه
ضاع الكلام صعب تفقد ثقة انسان تحبه صعب انك تشرح كنت اناظره ولا دمعه طلعت من عيني مو مصدقه مو مستوعبة اقول يمكن حلم لكن صراخه ولفه ليدي بغى يكسرها فوقني من سرحاني وحديثي لنفسي
نوره : فكني
عامر وجه صاير احمر وعيونه لو كنت اعرف ارسم لرسمتها ضاع البريق الي فيها صار حمار يخوف عروقها صايره حمرا وفيها غضب الكون كله
عامر: قوليلي وين رايحه معه
نوره بصرخه : عامر فكني
عامر : ليش وش سويت انا يوم تخدعيني
نوره بصرخه اكبر : فكني افهم قبل بعدين احكم
عامر : وش افهم وش يا برنسيسه والي شفته بعيني
نوره : الي شفته ما سئلت نفسك ليش رحت معه
عامر : مابي اسئل نفسي اطلعي برا روحي مابيك روحي انتي طالق
انصدمت هنت عليه لحظة غضب سيطرت عليه خلته يتهور ويطلق ما سئلني كل هذا كره لسالم معقولة الفترة الي عشتها معه مابنت ثقة بيني وبينه خذيت فهد عباتي ما بعد فسختها مشيت شبه ركض لبيتنا صار على عيوني ضباب اثر الدموع الي بدت تجتمع بعيني من حسن حظي لقيت بيتنا بابه مفتوح دخلت وانا اركض وولدي على ايدي شفت خالد وراشد قدامي يضحكون حسدتهم نار تغلي بصدري كلهم عيونهم علي اسمع ترحيب بفهد وفز راشد يبي يشيل فهد مني لكني جلست على ركبي ونهرت ما عاد قدرت اصبر مابي اقول شي لخواني بس يوم رمى علي الطلاق لازم اهلي يدرون
خالد : بسم الله عليك وش فيك
راشد : نوره شبلاك عامر فيه شي
يوم طرى عامر بكيت اكثر ما قدرت ارد عليهم اختلط صوت بكاي بصوت بكى ولدي يكفي انه يبكي من يوم سمع عامر يصرخ علي .. بردت أطرافي احس برجفه كل جسمي تدرون وين صوت شهقاتي من عند صدري ابيها تطلع لبرى احسها مكتومه صرت بس اشهق اشهق اكثر ابي انفس غبت خلاص ما حسيت بنفسي لكن فيه شي مريح حسيت به صوت السديس صوت عذب يقرا عندي يلج بالغرفة فتحت عيوني شفت نفسي بمستشفى اكيد اشوف المغذي شفت منيرة جالسه عندي ناظرتها ابتسمت لي تذكرت الي مر علي دمعت عيني
منيرة : نوره لا تبكين ريحي نفسك كل شي بينحل
آهـ يا منيرة وش ينحل صعب الي ينكسر يرجع يتصلح وصعب تبنين ثقة من جديد وصعب تنسين وصعب تسامحين هذا كلامي الي ماقدرت ابوح له لمنيره كان مجرد حوار بيني وبين نفسي سكت وغمضت عيوني أبي ارتاح أبي أنسى ألي صار سمعت فتحت الباب التفت شفت راشد وساره
راشد ببتسامه : الحمدلله على السلامة
نوره : الله يسلمك
ساره : طهور ان شاءلله
جا راشد وجلس جنبي مسك ايدي وحبها وحب خشمي
راشد : مراح تنهانين وانا اشم الهوا
حسيت بغصه الحين فعلا تأكد ان عامر طلقني صاروا يتكلمون بمواضيع ويحاولون يضحكوني وأنا مو معهم أحس بنار تأكل صدري أكل
راشد نزل راسه لعند راسي : خلاص يا نوره ريحي راسك من التفكير والسرحان وابشري بعزك ومراح ينقصك شي ابوي موجود خالد موجود وعبد العزيز وانا احمدي ربك ابوك وخوانك حولك يبون أشارة منك ويلبون الي تبين لا تشيلين هم غصب عني نزلت دمعه ظلمني عامر وما اهتم يسألني طيب انا كنت معه ما سئل ليش كنت معه وش السبب حتى لو كنت غلطانه فيه الف عقوبة غير الطلاق اختار فرقاي اختار البعد كسر حبي
منيرة : نوره خلاص تكفين ارحمينا شوفي راشد طلع زعلان
مانتبهت ان راشد طلع كانت عيوني تذرف دموع يمكن راشد يتوقع بكاي عشان عامر بس وطلاقي يمكن ما درى عن سالفة ظلمة لي
ماقدرت ارد على منيرة ولا على ساره برغم من انهم يحاولون فيني يضربون امثلة شوفي فلانه تطلقت وعاشت حياتها وعندها عيالها وشوفي الثانيه ما درو بالنار ألي تشب في جوفي ولا كلمة من كلامهم راح تطفيها حطيت ايدي على اذاني يعني يكفي مابي اسمع شي مابي غمضت عيوني أبيهم يطلعون مابي احد حولي آهـ يارب حياتي مع عامر من بدايتها عذاب بعذاب كل شوي أنب نفسي وقول ليش ما دافعت عن نفسي ليش ما صرخت بوجهه وقلت له السالفة لكن ارجع وقول هذا مكتوب علي
التفت على منيرة الي كانت تتكلم مع ساره بصوت واطي
نوره : وين فهد
منيرة : فهد عند أمي
نوره : نادي راشد ابي اطلع من هنا
منيره : لا يا نوره أعصابك تعبانه
نوره : لا أنا احس نفسي احسن بروح لولدي وفي البيت برتاح اكثر
كنت محتاجة ادري وش صار وشلون اهلي دروا بس مابي اسئل الحين اهم شي أضم ولدي مشتاقة له مشتاقة لعامر فيه لا تناظروني على الي سواه فيني مشتاقة له وبنفس الوقت ابي اعاتبه ليش ليش هنت عليه بس مستحيل أبين له
راشد : نوره نوره
انتبهت لراشد يناديني : هلا
راشد : ليش تطلعين توك تعبانه
نوره : راحتي مو هنا راحتي في بيتنا
راشد : اسمعيني زين طيب بكره مو اليوم
نوره : طيب وش فرق بكره عن اليوم
راشد : لا فيه فرق
نوره : تكفى يا راشد ابي ولدي
راشد : لاحول ولا قوة الا بالله طيب اصبري لبكره
نوره : راشد فيه شي انتو مخبين عني شي فهد فيه شي
راشد : بسم الله عليه مافيه الا العافيه بس انا ابيك تنتظرين لبكره
نوره : قلبي يقول ان فيه شي قولي مراح يصيرلي شي قولي يا راشد
راشد : طيب اسمعيني زين عامر طلقك صح
نوره بغصه : أي
راشد : خلاص ماعاد يهمك حتى لو صار
قاطعته نوره : عامر صار له شي
راشد بعصبية : ما صار له شي هذا هو حصان و ناوي يعرس
رجع الضباب الأبيض و أصوات وإزعاج فقدتهم اسمع نوره نوره لكن ما انتبهت وش يقولون افتح عيوني أشوفهم وبعدين يرجع الضباب ثاني مره اسمع أصواتهم وبكيهم وما أميز وش يقولون
منيره : نوره قومي تكلمي ما يستهال تذبحين نفسك عشانه
ساره : منيره وش هالكلام حرام عليك ارحمي نوره
راشد بصرخه : بس انتي وياها خلاص اسكتوا
فتحت عيوني شفت الخوف في عيونهم
نوره : لا تخافون مافيني شي ابي البيت بس
راشد : هنا اريح لك
نوره بدموع : لا ابي البيت ابي فهد
معقولة هنت عليك يا عامر معقولة كم جلست اجل بالمستشفى معقولة بيوم يخطب شلون يعرس يمكن يبي يقهرني يمكن خطوبه مو زواج منو اسئل الانظار علي شلون اسئل مابي راشد يسمعني ابي اسئل ساره بس كيف اختلي فيها
راشد : خلاص تجهزي وانا شوي وبجيكم بروح اضبط اوراق الخروج
نوره : كم لي هنا بالمستشفى
منيرة : لك يومين بس
معقولة يومين منو خطب ليش افكر فيه ليش اهتم وهو جرحني بس احبه احبه ما انكر مابي يتخلى عني ابي افهمه انه ظلمني وبنفس الوقت مراح ارجع له
ساره : نوره ريحي راسك من التفكير
منيرة : انا برتب الاغراض قبل ما يجي راشد
نوره : امي والباقين غريبة ما جو
ساره : كلهم البارح من عمي لحد عبد العزيز بس انتي ما حسيتي فينا وخليناهم يرتاحون وخالتي ما سكه فهد عندها ومايبي احد فينا متعلق بجدته بس
منيره : أي والله يا نوره ولدك هذا ما يبيني مدري ليش
ساره : كل البزران ما يحبونك
نوره : ههههههه
منيرة : أي اضحكي اخيرا شفنا ضحكتك
الله يسامحك يا منيرة ذكرتيني
نوره : عامر من خطب
منيره : الليلة ملكته على عبير الله لا يوفقه وياها
ساره : منيره لا تدعين
عبير تزوج عبير تملكها ليه مو يقول ما يحبها ليه ليه خلاص انتهيت من حاتي ورب البيت يا عامر والي خلقني وخلقك ما راح اسمح ان نجتمع في يوم في بيت واحد من باعني بعته لو كان بالحيل غالي هانت عليك نوره ولا تبي تحرق قلبي بس قبل راح اعلمك راح اقولك انك ظلمتني وبعدها بقطع الحبل الي بينا
راشد : يالله مشينا
الكل : مشينا
الطريق طووووووووووويل او انا يتهيئا لي أخيرا وصلت على طول وبطريقة غير إرادية مني التفت على بيتي أي بيتي قديما الأنوار مطفيه وهدوء أكيد بالقصيم هم الحين يلبسها عبير حلوه و أكيد اليوم زايد حلاها آهـ حرمتيني من عامر للأبد هنت عليك وين الحب وين راح
نزلت دخلت بيتنا لقيت اهلي كلهم بالحوش فارشين فرشه وجالسين عليها جدتي وابوي وامي وخالد ونجلا وتركي ورند وفهد ولدي وعبد العزيز الكل يرحب ويهلي ويتحمد لي بالسلامه لكن انا وجه بدون معالم بدون ابتسامة وجه خالي من التعبير دقيقة بس شفت ضحكة فهود لي حسيت بالدم يجري في وجهي بحراره بعدها ابتسامة تحولت لضحكة اجبرني فهود اني اضحك ضحكته لي فرحته بشوفتي خلتني اضحك الله لا يخليني منك لا زوج ولا احد يهمني مدام انت معي الله يخليك لي يارب لا تعصبون ما سلمت على ابوي ولا جدتي ولا امي ولا اخواني مسكت ولدي وضميته لي وقعدت ابوسه بجبهته بخشمه بفمه بلحيه برقبته وضمه لي اكثر اختلطت دموعي بضحكتي الكل دمعت عينه
ابوي : نوره احمدي ربك انا جنبك اخوانك ولدك
نوره ببتسامة : الحمد لله يبه وحبيت خشمة يبه انا ابكي مشتاقة لولدي وانتم الخير والبركه الله لا يحرمني منكم سلمت على جدتي والباقين وخذيت ولدي ودخلت داخل رحت لغرفتي وفهود معي يضحك ويلعب وكل شوي يصجني يبيني اطالعه
فهود : امه ما يقول ماما أمه
اذا ناظرته ضحك : ههههههههههههههههه بسم الله عليه يارب وانا اشوفه عامر مصغر شلون بنسى وانت قدامي
كان يشيل العابه ويمشي بالغرفة ويحوس ويصارخ اذا ما انتبهت له يبيني اشوفه وهو يلعب فهود عمره سنتين الحين وانا الحين متخرجة وخلصة وجالسه بالبيت سنة كاملة بدون وظيفة سمعت صوت طق على الباب
دخل خالد
خالد : تعال تعال
كان يلاعب فهد ويضحكة كنت عارفه ان خالد يبي يتكلم معي وما يبي يقول على طول اعرف اسلوب اخواني حب خالد وجا وجلس جنبي
خالد : نوره انا عندي اقتراح
نوره : وشو
خالد : وش رايك تروحين معنا للجنوب انا الحين بخميس مشيط وتقدمين هناك والبنود هناك كثيرة
نوره : طيب واذا جاك نقل وش اسوي
خالد : هههههههههههه خايفه اخليك بروحك
نوره ببتسامة : لا والله بس احاتيك
خالد : تركي الحين رجال وراح يجلس عندك لو يجيني نقل وهو الحين مل منا ومن نقلنا كل يوم
نوره : هههههههه الله يعينكم يارب
خالد : خلاص افهم انك موافقة
نوره : اكيد ابي اغير جو
خالد : خلاص ولا تحطين أمل على الوظيفة يمكن ما تحصل
نوره : الله يقدم الي فيه الخير
خالد : خلاص تجهزي ترا بكره ماشين بعد صلاة الفجر
نوره : يوه أغراض فهد
مابي اقول ملابسي بعد اغراضي كلها في بيت عامر
خالد : عندك مفتاح لبيت عامر
نوره : أي عندي
خالد : خلاص الحين هم مهوب فيه خلينا بعد صلاة المغرب نروح لبيتهم وخذي الي تبين
نوره : ان شاءلله
طلع خالد فرصه خذيت دفتر وكتبت رسالة لعامر راح احطها بغرفتي الي هناك ابيه يقراها
تنص الرسالة على
السلام عليكم ورحمة الله وبركاته ....
إلى من جرح أجمل أحساس أحسست به إلى من هدم حب قد بنيته ..
أليك ابعث حروفي لا يهم تصدق ما بها لكن ما يهمني انا أن أبرء ساحتي
أحببتك بعمق لم أحب إنسان ولن أحب إنسان كما أحببتك
ومقدار حبي لك لا استطيع حصره لم استطع أن أكرهك لكنك جرحتني جرح لن أشفى أبدن منه
ثم شرحت له بالتفصيل الممل أسباب تواجدي في سيارة سالم و يسئل المستشفى ليتأكد وعمتي والكل...
ذهبت مع خالد للبيت غرفتي مثل ماهي ما تغير فيها شي معقولة ما نام فيها أغراضي وملابسي ما فيه شي متغير خالد جالس بالصالة خذيت الشنطه الكبيرة وكتفيت بجمع اغراض الشتا بس لان الحين صيفي وبنجلس هناك للشتا جمعت اغراضي قبل اغراض فهد يووه اخذ اغراضي كلها ولا اتركها ما همتني اخذت الي احتاجه بس ومكياجي وكسسواراتي وحاجاتي الشخصيه يمكن جت بشنطتين كبار رحت لاغراض فهد ياحبي له اغراضه كلها جت بشنطه وحده أي الرساله وين احطها اخاف ما يشوفها حطيتها على الكوميدينه وكتبت بالروج الأحمر على المرايه رسالة من أم فهد ما قدرت اقول زوجتك حسيت بغصة شلت أغراضي وساعدني خالد بشيلها وطلعت معه وصلت للبيت لقيتهم يرتبون الأغراض واخذ خالد اغراضي وحطهم مع اغراضهم ودخلت داخل للبيت وشفت منيرة منقهره وراشد وساره يطفرون بها شكلها تبي تروح معنا
راشد : اقول انتي ما تستحين على وجهك مره معرسه وعرسها قريب تبين تروحين معهم
منيرة : لاحول ولا قوة الا بالله وش دخلك انت
راشد : دخلني الباب تعالي طقيني
نوره : هههههههههههههه راشد لا تكلم منيرة معصبه
راشد : تصبر كلها كم شهر وتروح مع سالم شهر عسل
ساره : اقول منور نسيتي الجامعه انتي اخر سنة يعني التخرج يكفي مخليه سالم ينتظرك
منيرة : اوف الله يعيني
نوره : وين نجلا
ساره : تعشي رنوده
نوره : ياعمري يا تركي مع ابوه يساعده في ترتيب الأغراض
منيرة : بسم الله عليه كبر
ساره : الا صدق منيرة وش بتسوين نوره بتروح وشلون راح تجهزين زواجك
منيره : الله لا يخليني منك من عندي غيرك انتي الي راح تتعبين معي
ساره : ابشري من عيوني
نوره : تعبينها وهي في بداية حملها
ساره : يا الله عليك يا نوره منيرة مثل أختي وإذا ما تعبت معها من اتعب معه
منيرة : الله لا يحرمني منك
8
8
8
8
8
£ عــــامــر £
ام عامر : تعال يمه وين رايح
عامر : تعبان يمه بروح أريح شوي
ام عامر : الله يهديك يارب لو سامع كلامي
عامر : تكفين يمه ارحموني انا تعبان مابي اتكلم
راح عامر لغرفته وقف عند باب قسمة تردد شوي يفتحه أو لا بس اشتاق لها اشتاق لريحتها لصوتها لسمع خطوات ممشاها لضحكها مع ولدها صوتها يرن في اذنه ضحكتها مايبي يفتح الباب وينصدم بالغبار والفراغ والحر والضيقة متعود يجي يلقى كل شي قدامه جاهز القسم ريحته حلوه براد المكيف شغال بوقت قبل ما يجي اشياء كثيرة فقدها وراح يفقدها آهـ الله يسامحك يا نورة أخيراً فتح الباب كان ظلام مو مثل العادة راح يدور على زرار النور يبي ينور القسم اخيرا لقاه نورت وليتها ما نورت فاضيه غبار حر فوضى مكان خالي مافيه صوت هدوء مشى لحد غرفة النوم شاف الغرفة مفتوح بابها والدولاب مفتوح مشى او شبة ركض فتح الدولاب شاف كثير من الملابس مو فيه وبعضها متناثر خمها وقربها منه صار يشمها ويلف يدينه ويطوقها كأنها نوره قدامه كأنه يطوق نوره مو مجرد ملابس نزلت دمعه رفع عينه يداريها ما يبيها تنزل يعاندها لكن هي اقوى منه نزلت وبللت ملابسها طاح بكل قوته على السرير تنهد تنهيده يمكن تشق الصخر غمض عيونه ورجع يفتحها من جديد مو قادر يفتح عيونه أكثر تعبان ومو قادر حتى يمد يده على ريموت السب لينت خلاص منهد حيلة يكفي ثوبها بين يديه يهدي عواصف البركان الثايرة في فؤادة الله يسامحك يا نورة الله يسامحك خسرتك وخسرت جمعتنا كانت تمتمت الكلمات ألي طلعت منه قبل يغرق في نوم غميق
\
/
\
/
\
/
\
£ عائلة خالد £
في طريق الجنوب وفي سيارة خالد بالتحديد بعد صلاة الفجر
خالد : يالله من يقول قصيدة
نجلا : لا حول شكلك مروق
خالد : أي وش وراك ترقدين طول الطريق وانا اقعد بالحالي
نوره : هههههههههههههههههه افا وانا وين رحت
خالد ببتسامة : انتي الخير والبركة انا اتكلم عن رحلاتنا تصدقين يا نوره اني اجلس طول الطريق ساكت والأخت يا راقدة يا مزعجتني تسكت عيالها
نوره : هههههههههههههههه
نجلا : اسمعي وبقي أخوك الظاهر بدى يضيع هذا اثر الكبر
خالد : اسمعي يا نوره الظاهر نجلا تبيني اعرس عشان اثبت لها اني توي شباب
ذكرني خالد بطريقة غير مباشرة بزواج عامر يا ترى وش صار في ملكته مبسوط فرحان
نجلا : لا مو معنا
نوره : هاه
خالد : هههههه نكلمك من الصبح وأنتي سرحانة لا وتركي الي ابيه معاون كأنه أمه راقد من مشينا
نوره : ههههههههههههههههههههه
نجلا : الله يعين امه
\
/
\
/
\
/
£ عــــامــر £
يووه فاتتني صلاة الفجر معقولة أمي ما قومتني آهـ يا ظهري
كانت عيونه مركزة على المرآية وعلى ألون الأحمر فز واقف بسرعة اخذ الرسالة بيد مرتعشة فرح على غضب مشاعر مختلطة قرى أول كلمة ما تحمل يوقف جلس على طول قراها رجع يوقف ويقراها مره ثانية ورجع يجلس مسك راسه وفز واقف
اتمنى البارت يجمعكم
|
05-04-08, 12:45 PM
جديد مواضيع قسم القصص المكتملة (بدون ردود)
العرض العادي
