كاتب الموضوع :
اقدار
المنتدى :
القصص المكتملة (بدون ردود)
مر علي اليوم كله وانا بين النوم والفحوصات اللي بجد طفشتني بس عشان العافية لازم اتحمل واصبر
كان خالي يجيني يجلس شويه يتطمن ويطلع ساعتين ثلاث بعدين يرجع لي .. آخر شي الحيت عليه يروح مو محتاجه احد خاصة ان فيه ممرضة فلسطينيه حبوبه ومهتمه فيني بزيادة ..
جا يوم العملية وانا قلبي مو مرتاح من ابوي اللي كل مادقيت عليه اعطاني مقفل .. سألت خالي قبل ماادخل غرفة العمليات : الله يخليك تقول لي اذا ابويه فيه شي ولا لا ..؟
: ديمه صدقيني مافيه الا العافية بس انتي لاتفكرين الا بنفسك .
: خالي تكفى بكلمه يمكن اموت وانا ماكلمته
: اش هالكلام كلها كم ساعه وتطلعين مافيك الا العافية وبتكلمينه وتجلسين معاه . ادعي ربك انه يقومك بالسلامه وابوك تراه حساس يقول لي سامي انه مايقدر يكلمك وانت بهالاحالة يخاف يتأثر بعدين يأثر عليك .
سكت مجبرة لأني اعرف خالي نقاش زي هذا معاه مايوصل لنتيجه . حاولت اصدق بس الشك مسيطر علي ان ابوي فيه شي خاصة ان عنده القلب والضغط والسكر .. وأي صدمة تأثر عليه .. :"يارب استر" .. كنت ارددها باستمرار .
دخلوني غرفة العمليات ورددت بعض الآيات اللي انا حافظتها بعد ماقريت المعوذات وآية الكرسي وتوكلت على الله حسيت ان ابرة البنج بدت تخدرني .. وفي ثواني غبت عن الدنيا .
صحيت وانا احسني احلم تذكرت الم راسي .. امريكا .. العملية .. بس لسه ماادري ويني الأكيد اني مو بغرفة العمليات ..
فتحت عيوني اكثر بشوف انا رجعت للدنيا ولا اني في القبر ولا وين ..
لا شكلي بالمستشفى في غرفة ثانية وعندي مريان الممرضة الفلسطينية اللي اول ماشافتني ابتسمت .حمدت ربي وشكرته اني موجودة .. طلعت الممرضة ورجعت لي بسرعة ومعاها واحد عرفت انه دكتور من البالطو بس مو الدكتور ويليام المسؤول عن حالتي واللي سوا لي العملية .: الحمد لله على السلامة . قالها . وانا انصدمت ...يوه يتكلم عربي ...؟! اوف استوعبت منهو لأني عرفت صوته .. "مـ هـ ن د" قلتها بنفسي وغمضت بقوة .. بعدين قلت: الله يسلمك ... بصوت احسه يطلع مع راسي مو من فمي من الوجع
: تحسين بألم .. وهو يطالع بالأوراق اللي بيده
: هزيت راسي بإيه وانا اطالع تحت
: كيف الألم زي الأول ولا يختلف
: لا .. اخف ..بس .. لسه فيه الم
: الحين تاخذين مسكن ويروح
سكت وانا مغمضة حقنت الممرضة المسكن في وريدي ونمت بعدها بخمس دقايق وهو جالس يكتب عندي ..
مر علي اسبوع وكل ماحسيت بألم آخذ مسكنات .. نسيت او تناسيت وجعي وعمليتي واحس بهموم الدنيا على راسي لأني مو مطمنه على ابوي .. خالي يتهرب مني واذا شافني ابكي عشان يعلمني قال مايقدر يكلمك وانتي تعبانه وسامي خايف يصير له شي اذا سمعك تعبانه واحنا نقوله ان مافيك شي بس مانعينها من الكلام في التلفون ..
ماصدقت خالي لين كلمتني خالتي فادية وقالت لي نفس كلام خالي حتى مو مزودة ولا منقصة أي كلمه .. وسألت خالي سامي وقالي نفس الكلام وزود عليه اعذار كثيرة ..
باقي لي اسبوع ثاني وارجع للسعودية بس المشكلة اني بجلس في بيت مهند ..
طلعت من المستشفى ورجعت مع خالي لشقة مهند ... احسني لسه ضعيفة مااقدر امشي ، خالي صار مايطلع من الشقة الا دقايق ويرجع ومهند كل شوي يجي ويجلسون بالصاله وانا بغرفتي مااطلع ..لقيت الغرفة مو زي ماتركتها يعني فيها اشياء ماكانت فيها .. طاولة قريبة من السرير عليها كتب لغازي القصيبي .. الجنية ، رجلٌ جاء وذهب ، العصفورية ، شقة الحرية ، والعودة سائحاً الى كاليفورنيا .. ودنسكو اللي تركته من يدي قبل ادخل المستشفى .. وديوان شعر اسمه مائة ورقة ورد لغازي القصيبي جابه خالي لي عشان يسليني اذا كان مع مهند ورقة ورد وثاني اسمه الخليج يتحدث شعراً ونثراً ..... ولقيت كمان بالغرفة استريو وسيديهات اكثرها لفيروز ومحمد عبده وفيه لرابح صقر وخالد عبدالرحمن ونوال والرويشد والجسمي وفيه لمطربين غربيين .. .. عرفت ان خالي يعرف ذوقي بالكتب والأغاني وأكيد هو اللي اختار لي هالكتب وجابها عندي .. تمنيت لو هدى معاي ولا خالتي فادية عشان خالي ياخذ راحته ويروح يتمشى مع مهند حرام احسني حابسته معاي ..
جلست يومين وخالي ومهند يجلسون لين الساعه 11 بعدين مهند يروح وخالي يدخل غرفته اللي هي غرفة مهند وينام ..
اما انا كنت انام على الساعه 12 او 1 بعد مااقرا قرآن واقرأ في ديوان مائة ورقة ورد لأن الباقية قد قريتها كلها ماعدا دنسكو اللي يذكرني بالمستشفى والألم فما حبيت ارجع اقراه .. وكنت اصحى الصباح اسمع فيروز وماسمعت غيرها بشقة مهند لأن اذا حضرت فيروز بطل كل فنانين الدنيا .. قاعدة عندي ومقتنعه فيها وماراح اغيرها...!
دخل علي خالي الساعه 9 وجاب لي فطور وجلسنا مع بعض نسولف الين دق الباب وراح خالي يفتح بعدين رجع لي بعد عشر دقايق يمك
كنت احس خالي بيقول لي كلام بس حسيته متردد قلت له بسرعه : فيه شي ياخالي ..؟
: امممم ترى مهند عازمنا على الغدا بمناسبة نجاح عمليتك
: شو ..؟
: والله انا قلت له مايجوز ومايصير وادري ان ديمه بترفض هذا اذا مازعلت مني ... بس هو اصر علي وألح وقال لي انك كنتي بين يدينه سبع ساعات ومافيها شي لوجلستي معانا
: معقوله انت اللي تقول كذا ياخالي ..؟
: ديمه انا مااقول تعالي سولفي معاه ولا اضحكي الرجال عزمنا قال ان الغدا لديمه بمناسبة نجاح عمليتها لأنه ضيفني وانتي بالمستشفى
: مستحيل ياخالي والله يخليك بنروح نجلس بفندق خلاص زودناها ..
: اذا انتي رافضة بكيفك بس ترا مافيها شي انتي متحجبة ومتسترة ولا عدنان زوج خالتك سمر ويوسف زوج صديقتك تقابلينهم في سوريا عادي ومهند لا ..!
: اولاً عدنان زوج خالتي يعني من العايلة .. ثانياً ماقد اكلت مع عدنان بسفرة وحده .. ثالثاً يوسف قابلته مرة وحده وهو اللي ناداني عشان ريناد معاه وهي اللي قالت له .. وسلمت عليهم وجلست معاهم اقل من خمس دقايق مع خالتي سمر .. كملت ودموعي تنزل .. رابعاً هالمهند مستحيل اشوفه بعد كلامه هذا وماعادني قاعده بشقته ابداً ..
: طيب طيب هدي اعصابك .. وعلى كيفك بس كرهتيه ليه ترى الرجال خيره علينا ووقفته معانا بتظل دين في رقبتي لاتقولين هالحكي الفاضي عنه المفروض تكونين مدينه له بحياتك ..
طلع خالي من عندي واعصابي متوترة .. ماادري ليه ..؟ يمكن لأن مهند وقف معانا ولاكأني رفضته بدون سبب مقنع .. ومالي وجه منه .. !
صدقوني مافيه سبب ثاني بس ماابغى احرج نفسي معاه بعدين خالي ادري انه يسوي كذا يبغاني لمهند بس لااا مستحيل مهند يخطبني مرة ثانيه ومستحيل اوافق عليه بعد مارفضته بيقول بترد لي الجميل وانا ماابغى ابني مستقبلي على عرفان وجميل وأصادر قناعاتي بشخص اللي متقدم لي ..!
سمعت جوال خالي يرن .. وكان صوته واضح لمن تكلم .. سامي خير وش فيه ......... اش قاعد تقول انت ..؟ .............. لاحول ولاقوة الا بالله طيب طيب ............. لا لا بجي بأقرب فرصة ان شاء الله .. ..... ماعليك انت بكره بخلي الدكتور يشوفها ونجي على طول .............. الله يرحمه ويجعل مثواه الجنة ..كأن خالي تكلم بصوت هادي او قال شي بعد ماقفل بس ماسمعته ..
انا سمعت مكالمة خالي ونبرة صوته فيها حزن بس على مين ياربي ..؟ ياويلي لايكون من خوالي ولا ابوي ولا احد يقرب لنا ..؟
حسبت خالي لوحده بالشقه ماكان على بالي انه مهند هنا بس سمعته يقول : عظم الله اجرك واحسن الله عزاك
: جزاك الله خير .. قصر صوتك لاتسمعنا ديمه .
كأن صوته خفت شوي وبعد شوي سمعت باب الحمام قفل وانا صرت ارتعش اصلاً سيرة الموت خلقة ترهقني فما بالكم اذا احد يقرب لنا .. ومن هذا اللي بيرجع خالي عشانه والمفروض اليوم الثلاثاء وموعدي يوم الجمعه وبيقدمه خالي لبكرة الأربعاء ...غريبة ..! ومن اللي مايبغاني اعرف انه مات ..
تذكرت ابوي ..ياويلي
قمت وانا امشي بشويش متوقعة أي صدمة تقابلني وكأني مجهزة نفسي عشانها
شفت مهند جالس على الكنبه معطيني ظهره ومنزل راسه بين يدينه ويشد شعره كأنه بيطلع من راسه شي وحسيت انه متوتر يعني هذي مصيبه ياويلي
جيت من وراه وماهمني أي شي بالدنيا الا اهلي وأبوي .. ابوي اللي من زمان احس ان فيه شي وهم كلهم يطمنوني
قلت وانا ارتجف : مين اللي مات
فز مهند من مكانه وطالع فيني وانا عيوني كلها دموع وماابغى ابكي : ها ..؟ محد مات وناظر ناحية الحمام كأنه يبغى خالي يجي ينقذه من الموقف
قلت بصوت مخنوق ودموعي كل مرة تزيد : قول الله يخليك هو ابوي ..؟ اصلاً كنت حاسة ان فيه شي ..
: لا مو ابوك هذا واحد من اصحاب خالك .. اعتقد ماتعرفينه .. سكت وهو يناظر بكل مكان في وجهي بالحمام في الأرض فعلاً مرتبك بعدين كمل : روحي ارتاحي ابوك واهلك مافيهم الا العافية
تركته ورحت عند خالي وهو بالحمام سمعت مهند يقول : تعالي بيجي الحين
مارديت عليه ودقيت على خالي وناديته بصوت مخنوق : خالي ابوي صح ..؟
مارد علي خالي .. وحسيت انه يبكي ولا هرب من مهند ولا ايش
جا مهند وأخذني بيدي .. ماكنت احس بشي في الدنيا : ديمة مو زين عليك الزعل تعالي بتخربين كل اللي سويناه انتي تتوهمين صدقيني ابوك مافيه الا الخير اذا تبيني اكلمه الحين دقيت عليه ..
: لا جهازه مقفل ..
كنت اقوله وانا احس بخوف عمري ماحسيته .. اذا ابوي راح من يبقا لي .. اذا ابوي راح كيف اعيش لاام ولا اب ولا جدتي عايشه ..! ياربي انا ولا ابوي .
نزلت دموعي وانا متجمده ومحد راضي يقول لي شي يقنع .. سمعت الحمام انفتح وخرج خالي عيونه كانت زي الدم اخذني وحط راسي على صدره قال ليه الدلع الحين يموت ابوسعيد جارنا تبكين ، تموت مزنه جدة لمى تبكين ، حتى رايد صديقي يموت تجلسين تبكين عليه ..
ناظرت فيه وانا مابين فرح وزعل .. رايد صاحب خالي اقرب الناس له .. بس اهم شي ابوي مايموت .. صحيح صرت انانية بس ابوي الا ابوي ..اصير انانية وحسودة وجشعه وكل الصفات السيئة تجي فيني اهم شي ربي يخلي لي الحنون الطيب القلب الكبير .. قلت وانا اناظر بعيون خالي : اذا مو ابوي ماراح ابكي .
ماادري ليه حسيتني ديمه هذيك الصغيرة اللي عمرها ست سنين واذا تبغى شي تلح عليه وتترجا خالها عشان يجيبه الحين اترجاه يقول ان اللي مات مو ابوي .
مسح على راسي قال انا بروح احجز على رحلة بكرة او بعد بكرة بالكثير لازم اروح تعرفين عزا رايد عاد .. وانتي خلي تلفونك عندك اذا بغيتي شي اتصلي .
مهند اللي ماكنت ادري هو موجود ولا لا طلع صوته من المطبخ شكله شافنا وراح للمطبخ مستحي يجلس معانا .. قال لخالي : انت ارتاح بروح انا احجز واجيب التذاكر لاتشيل هم .
: لا لا بطلع .. رفع يده بكاس المويه اللي فيها وأشر على خالي قال : خلني اروح معاك .
حسيت ان خالي يبغى يطلع من الجو هذا .. انا اسبب الحزن مريضة وخايفه على ابوي وابكي وماراح اخفف عن خالي قلت بصوت مخنوق : خالي اخرج انت انا مافيني شي احسني احسن .
كل شوي خالي يتصل علي واطمنه بالرغم اني كنت ابكي فيني خوف وابوي مااتصل ولا فتح جهازه ..
على الساعه تسعه دخل خالي وهمه احسه قد الجبل معقوله رايد لهالدرجة غالي عليه .. اتذكر خالي حزن على جدتي كثير بالرغم انه متعلق فيها اكثر من اخوانه كلهم الا ان حزنه هالمرة اقوى .. ماكلمته لأنه مايقدر يتكلم ولا له نفس كنت ابكي على صاحب خالي وعلى حالة خالي .. وكنت خايفة على ابوي كثييير ...
ومقهورة من مرضي يمكن حالتي النفسية لها دور في حزني ودموعي ..!
اليوم الثاني رحنا للمركز وكشف علي الدكتور وسووا لي كل الفحوصات والحمد لله طمنونا وقال لنا الدكتور تقدرون تسافرون بس تراجعون مستشفى عندكم وطبيب متخصص عشان تتطمنون اكثر ولا ارجعوا لي بعد شهر عند أي ملاحظة او اذا طرأ أي عرض عليها ..
سافرنا بالليل كنت لابسه بنطلون اسود واسع شوية وتي شيرت اسود فيها رسوم باللون الفضي والأبيض لبست حجاب اسود حرير مكمش ولبست نظارتي الطبيه واحنا خارجين ركبنا مع مهند اللي ماتكلم من يوم ركبنا الا لمن قال بتوصلون هناك يكون الصباح في جده .. رد خالي : احسن يمديني اروح للطايف ونريح هناك
لمن قال الطايف شهقت ياربي رجع لي الشك ان ابوي فيه شي ..طالعت بخالي اللي حس فيني وسمع شهقتي بس مابين لي .. ومهند التفت علي وطالعني بنظرة ماقدرت افسرها .. كنت اتوسلها تبين لي شو فيه بالضبط .. ابوي ولا لا .. احد من اخوالي ..؟ خالتي ساميه .. عمتي ولا احد من اخواني ..؟ أي شيء تفسره لي نظرته بس المهم تطمني ..
مرت علي ساعات كأنها دهر بالطيارة .. صحيح مر على عميليتي ثلاث اسابيع واني الحمد لله احس اني بخير بس ابوي ابغى اشوفه عشان افرح صدق ..
وانا مغمضة عيوني رحت افكر : ياربي بشوف ابوي اذا شفته بسوي نفسي زعلانه لأنه ماكلمني بس بحضنه بطيح في حضنه زي كل مرة .. بحط راسي على صدره وهو يمسح عليه ويشمه بعمق زي كل مرة لمن يقول هذي عافيتي ..
بسلم على يده وراسه وخدوده .. ياربي متى اوصل مشتاقه كثير لابوي .. اول مرة اطول عنه
لمن اروح عند جدتي بسوريا كان يكلمني كل يومين بس الحين احسني من زمان عنه آخر مرة شفته وكلمته ليلة يتعشى عند خالي ..
في الطيارة كانت الأفكار تتضارب في راسي .. حزن خالي على صاحبه بهذا الشكل .. دموعه اللي تنزل من عيونه وهو يحاول يداريها عشان مااشوفها
ياناس بحياتي ماشفت خالي يبكي ..الا من يوم توفى رايد ..
صمته ولا نظراته فيني احياناً احسها تكسرني من داخل .. خالي فيه شي اكبر من وفاة رايد .. لايكون هو السبب بموت رايد .. لااااااا اش هالأفكار الغبية
بس الأفكار اللي مو غبية ان خالي فيه شي اكبر من مصيبة موت رايد ..
وصلنا بعد جهد وارهاق نفسي وجسدي .. وماتصدقون لو اقولكم انها اطول رحلة بحياتي وكأنها شهر ..
بالمطار تفاجأت لمن شفت خالي ماجد هو اللي جا يستقبلنا .. اجل وين خالي سامي اللي هذا شغله اصلاً .. ياويلي لايكون خالي سامي هو اللي مات
والله صارت افكاري تجيبني وتوديني .. بس خالي سامي كلمني بعد مكالمة خالي اللي قلبت كيانه .. اجل مو هو بس اش فيه لايكون صاير عليه شي
سألت خالي ماجد بلهفة : فين خالي سامي لايكون فيه شي ..؟
: الله اكبر ياديمه كل هذا ماتبيني استقبلكم هذا وانا اللي فرحان فيك ومشتاق لك بس اخ لو دريت خليت سامي يجي وانا ريحت عمري ..
: لاوالله خالي مااقصد حتى انا مشتاقة لك بس مو من عوايد خالي سامي يترك مثل هالمناسبة
سكت خالي ماجد لمن التفت لخالي ناصر اللي مسح وجهه بمنديل وحسيته يبكي
انخرست انا ومتى اوصل للبيت اشوف هدى هي اللي بتقول لي خالي اش فيه .
وصلنا البيت بس اخذني خالي ماجد للمجلس خلاص عرفت لمن خلاني اجلس على الكنب وطالع بالأرض
قلت له وانا احسني اختنق ومااقدر اتنفس
: ابوي صح
: الله يرحمه تعب وجلس اسبوعين في العنااية و ............ صرت احس صوته يضيع واسمع صراخ واصوات في راسي واذاني كأن عليها جبل وتهاويت على الأرض
ديمه حبيبة خالها اصحي عشان خالك .. عشان بسام وأسامه اللي يسألوني عنك كل ماشافوني .. اصحي عشان ياسمين يصير لها اخت كبيرة .. وعشان ديمة الصغيرة ماتكبر ماعندها اخت .. حتى هدى تبيك ..
ديمه اصحي عشان فادية وسامي وماجد كلهم ميتين من الحزن عشانك
كنت اسمع الصوت من بعيد احاول استوعب اللي انا فيه ولا انا ويني .. حية ولا ميته ..؟
فتحت عيوني كانت الدنيا زي الضباب قدامي .. مااقدر ادقق بشي ..؟
"ديمة .. اللهم لك الحمد . اللهم لك الحمد" .. سمعت هالجملة وانا مو مركزة زين كنت اعرف الصوت زين بس مااقدر ادقق من صاحبه .. كل هذا بأقل من دقيقة وانا كل شوي الدنيا توضح قدامي .. غرفة بيضاء وأجهزة .. فيه اكسجين على خشمي وفمي .. وفيه انبوب مغذي مشبوك بكفي وجهاز لتخطيط القلب بجنبي .. طالعت خالي اللي دخل علي بسرعه بعد ماطلع لثواني ورجع : ديوم الحمد لله على السلامة .. ليه تسوين فينا وبنفسك كذا .. اسبوعين ياديمه في غيبوبه حرام عليك قد يئسنا من رجعتك لنا ؟
تذكرت انا وش سويت وليه وضعي كذا وخالي يتكلم عن ايش آآآآآآآآآه ليتني ماتذكرت .. اجل مر علي اسبوعين وانا .. ياربي كأن اللي يصير لي قصة فلم سينمائي .وانا من ضمن ابطاله ...!
دمعت عيوني وغمضت بقووووة وبصدري زي النار .. ليت كل اللي تذكرته حلم ولا كابوس وراح اصحى الحين منه .. بس للأسف انه واقع .. قلت بتأكد ان موت ابوي حقيقي بصوت يادوب اسمعه: ابوي خلاااص راح وتركني .
: استهدي بالله يابنت الحلال واذكري ربك . خلي ايمانك بالله قوي .
دخل علي الدكتور وقال الحمد لله على السلامه وطلب من الممرضة تقيس لي الحرارة والضغط .. وسألني اذا انا اتذكر شي وأعرف ويني ..قلت له : ايوه اتذكر و انا بقلبي كنت اقول ليتني فقدت ذاكرتي ..ليتني ماصحيت .. ليتني انا اللي رحت بدال ابوي .. آآآآآآآآآه ياربي ارحمني ابوي راح وخلاني وشلون بعيش بدون صوته وبدون كلامه لي ديمة ابوها .. عيون ابوها .. قلب ابوها .. من بيدللني زي ابوي .. صحيح خالي بمكان ابوي وامي بعد وعوضني ربي بوجوده وحنانه واهتمامه وحبه لي .. بس ابوي مافيه زي حنانه .. ابوي كان يجيني وانا بمووت على امي واذا قابلت ابوي وكلمته احسني اكتفي بحنانه وكلامه وأبوته ياناس محد بيعوضني اياها .. ياربي لطفك ورحمتك ..
كانت دموعي تعبر عني وهمي ماخلاني ارد على اغلب كلام خالي .. صدمتي بوفاة ابوي كانت اكبر من أي تعابير ،، من أي حزن ووجع ومرارة وهم .. سمعت خالي يكلم خالتي فادية وهو يضحك ومبسوط .. بعدها خالي سامي ثم خالي ماجد .. آخر شي كلم هدى وقالها وهو يضحك : رتبوا غرفة ديمة ونظفوها لأنها بتجي .. .وسمعته يحلف لها وهو يضحك .. بعدها قفل ورجع لي .
قال وهو يحط يده على راسي
: ديوم انتي من حقك تحزنين على ابوك وكلنا مقدرين هالشي .. بس لازم تكونين ديمة القوية اللي صبرت على فراق امها وجدتها ومرضها وهذي محنه وابتلاء من الله لازم تتجاوزينه والأيام قدامك ان شاء الله هذا آخر الأحزان . سكت شوي بعدين كمل .. انتي ماتدرين ابوك وش يعني لي ... ابوك ياديمه هو اخوي اللي امي ماجابته ,, وأقسم بالله ياديمة ان حبي لعبدالله ومعزتي له اكثر من حبي لمحمد وماجد وسامي .. يشهد الله ان فراقه كان اقوى من فراق امي . وسكت وحسيت ان صوته تغير .. بعدين كمل .. احنا ياديمه لازم نكون مؤمنين ولازم نكون اقوى من كذا ربي ريحه من امراضه اللي عنده رجال مايتحمل التعب ولا الصدمات .. تدرين ان سامي يقول الدكتور آخر مرة قال له قلبك تعبان ولازم عملية بس هو رافض يقول اعرف اني لوسويتها ماقمت منها .. يعني حاس انه مو مطول .. حزنا ياديمه مو مرجعه ولا مسوي له شي وانتي تدرين ان ابوك مايكدر عليه الا دمعتك وحزنك .. المفروض بدل مانبكيه ندعي له ونتصدق عنه ونكمل حياتنا لأن هذا هو اللي يبغاه .. الدنيا ماانتهت ياديمه وانتي بنتي وانا ابوك وامك واهلك وماراح تحسين باليتم ولابموت ابوك طالما اني عايش وراسي يشم الهوى ..
بكيت من قلب على كلام خالي اللي جلس يهديني وهو يقول لاتنفعلين مو زين عشانك خلاص اسكتي ،
تكلمت بكلل وتعب : الله يخليك لي ياخالي انت اهلي من صغري بس ابوي آآآآآآآآآه
: ديمه ابوك ندري بغلاه بس هدي نفسك وقومي صلي اذا تقدرين وادعي له .. تدخلت الممرضة يوم شافتني بقوم قالت استني لاتتحركين عشان فيه ابرة وأدوية راح تاخذينها ...
بعد المغرب كنت في بيتنا الكبير وتحت بالصاله سلمت على هدى اللي حضنتني لدرجة انها تعبتني بس تحملت لأنها انسانه صادقه وتحبني من قلب .. سلمت على عيال خالي كنت حزينه بشكل مااقدر اوصفه لكم احس الدنيا وقفت هنا .. خلاص وش باقي حلو بعد اليوم وابوي مو بالدنيا ..
جابت لي هدى قهوة وشاهي وأكل بس مااكلت ولا اقدر ادخل شي بفمي قلت بطلع لغرفتي .. وانا احسني تعبانه ميته تعب جسمي ضعيف ووزني نزل لين و
صل 46 بعد ماكان 57 كيلو .. قمت ابغى اطلع بعدين جا خالي ساندني لين وصلت غرفتي وطلع وأرسل لي هدى تجي عندي لأنه بصراحه ينخاف علي من قوة الضعف اللي فيني .. جات هدى عندي وبعد شوي الا دخلت علي حرمه بعبايتها ومتغطيه لأن خالي بالبيت وأول ماشافتني رمت الغطا وهي تحضني كانت لمى وهي تبكي بصوت عالي : الحمد على السلامه انا مااقدر اعيش بدونك .. ليه تسوين فينا كذا .. توني دريت انك صحيتي وجيت على طول مع فهد اخوي .. ليه ياديمه تضعفين .. ليه تقهريني وتخليني طول هالفترة لوحدي .... جلست لمى تبكي منهارة وانا بكيت معاها بس ماتكلمت ..
مارضت لمى تروح مع اخوها واستاذنت زوجها انها تنام عندي وزين انها جلست عندي لأني مااقدر اجلس لوحدي كانت لمى جالسة بجنبي وهي تمسح على راسي وأحيانا تجيب المصحف تقرا عندي عشان ارتاح واقتنع ان ابوي خلاص مات الله يرحمه ...
كانت الساعه 10 بنفس الليلة ماقد نمنا بالرغم اني كنت تعبانه وكنت خلاص بنام ولمى عندي سمعنا اصوات برا دخلت لمى الحمام على تحسبه خالي ناصر بيشوفني .. بس اللي دخل كان اخوالي محمد وسامي وماجد .. وخالتي فادية اللي سلمت علي بصياح ودموع واخوالي كلهم جايين من الطايف عشاني .. ياالله كل هذا فرحانين .. سلموا علي وتحمدوا لي بالسلامه وجلسوا عندي على السرير وكل واحد منهم عزاني وعاتبني بطريقته .. وكلهم حاولوا يخرجوني من الحزن بسوالفهم معاي وانا احسني بديت اطلع من جو الحزن اللي كنت فيه لي كم ساعه .
يوووه نسيت لمى بالحمام .. لها اكثر من ساعه ياالله .. قربت من خالتي قلت لها ان لمى في الحمام ياليت تشوفها لايكون صار لها شي .. فزت خالتي قالت لاخوالي : اطلعوا صاحبة ديمه لها ساعه بالحمام حرام عليكم .. وبكرة ان شاء الله تشوفون ديمه احسن واكثر .
قاموا اكثر وهم يلوموني ليه ماقلت لهم تفشلوا في البنت .
طلعت لمى وهي مسوية زعلانه .. واعتذرت خالتي منها بعد ماسلمت عليها .... التفتت علي لمى قالت : يابختك ياديمه كل هالغلا حولك بجد انتي وحده محظوظه ..
تبسمت لها قلت احمد ربك على النعمه بس .. والله لايحرمني اخوالي ولا ودهم ..
دق تلفوني اللي توني فتحته كان رقم غريب مارديت بس دق مرة ثانيه واعطيته خالتي لمن ردت كان رامي ولد خالي محمد اللي اكبر مني بحوالي ثلاث سنوات واعطتني خالتي التلفون قالت رامي بيكلمك .. انا رفضت بصراحه لأني اول مرة اكلمه .. بس خالتي اشرت لي انه مصر يكلمني .. اخذت التلفون حطيته عند اذني وسمعته : هلا ديمه .. الحمد لله على سلامتك
: ............
: عظم الله اجرك واحسن الله عزاك
قلت بصوت واطي : "جزاك الله خير والله يسلمك "
اضطر رامي انه ينهي المكالمة لأني محرجه ومااقدر اصلا اتكلم
رامي دايما يحسسني باهتمامه اذا جا عندنا او تجمعنا في بيت جدتي .. دايما طالباتي مجابة واي شي تحبه ديمه لازم يلبيه لها حتى لو ماطلبت منه شي .. دايما اعتبره اخوي .. واذا شفت اخته منار اللي تقريبا في سني وهي تكلمني عنه وعن حركاته احسني احبه بجد بس زي ماتحبه منار وزي ماتحبه اماني اختها بنات خالي محمد ..
جلسوا اخوالي عندنا وخالي سامي وخالي ماجد جابوا اهلهم في بيت خالي ناصر وماكنت اجلس لوحدي ابداً ..
جلست حوالي اسبوع واخوالي عندي يحاولون يطلعوني من جو الحزن وينسوني همي بس كانت الاتصالات اللي تجيني ترجعني للواقع اللي انا فيه
عزوني صاحباتي .. وريم وامها ام مهند اللي بكت لمن كلمتها .. وحاولت تخفف عني بكم كلمة .. وسميرة اخت مهند كلمتني بهدوء وعزتني
وكلموني استاذاتي بالجامعه .. وفيه ناس اول مرة يكلموني دقوا علي وعزوني وبعضهم كانت واصلتهم اشاعة وفاتي ولمن دروا ان ديمه ماماتت حبوا يتأكدون مثل مرام وفاتن من الجامعه ..!
قاعده ابي اكلم اخواني وكان خالي ناصر جالس معاي بس سمعت كم كلمة وسيل من الاهانات من امهم اللي دعت علي وقالت اني سبب وفاة ابوهم واني يتمت عيالها ورملتها وتحسبت الله علي ودعت ,, اضطريت اقفل بعدين اتصل خالي وردت وبسب وشتم وقال خالي بلهجة حادة :عطيني عناد ياام عناد وبسرعه لوسمحتي ويشد على اسنانه ...احس خالي حاقد عليها بس مايبغى يتكلم عليها احتراماً لابوي الله يرحمه ..!
جاني صوت عناد آه ياقلبي ذكرت ابوي .. عناد كان ابوي مصغر حركاته كلامه وهو يقلد ابوي .. قال : ديمه الحمد لله انك مامتي ولحقتي ابوي انتي وابوي اكثر شي احبهم في حياتي ..
: عناد حبيبي كيفك انت مرتاح ..؟
: لا ديمه تجين تعيشين عندنا اخواني يحبونك ومحتاجينك وووو سكت بعدين كمل ..انا محتاج لك .. امي .... وسكت
: حبيبي انا عارفه كل شي بس لاتشيل هم ... بجيك بعد كم يوم
: لالاتجين امي بتذبحك ..تراها تهدد وتقول انك انتي اللي موتي ابوي
: عناد عمري لاتصدق الكلام هذا ..هي بس عشان زعلانه عليه وو
قاطعني : لاوالله مابكت عليه ولا همها .. كل شوي تقول فكة منه
: طيب اش رايك تجي عند عمتي صالحة وانا اقابلك هناك
: لا امي محرمه علي اني اروح لعمتي ..
: ماعليك بكرة العصر بجي عند بيتكم خلك بس عند التفلون وانا ادق عليك آخذك لبيت عمتي ونجلس مع بعض بعدين ارجعك
: طيب لاتتأخرين ولاتنسين .. واذا منتي جايه ردي لي خبر
: ياعمر ديمه ابشر وولايهمك ماراح اتأخر ولا راح انسى
رحت مع خالي للطايف وأنا كل مكان امر فيه احس بعذاب وحزن .. كل شي بالطايف يذكرني بابوي .. وقفنا عند بيت ابوي ودقيت على عناد وبسرعه رد علي قلت له اطلع انا استناك .. نزلت لمن شفته ونزل خالي اللي سلم عليه قبلي بعدين سلمت عليه بعناق طويل ابوي عناد .. ريحة ابوي والولد اللي ابوي باني عليه آماله .. خليته يركب قدام وانا ركبت ورا وشفته متأثر من طريقة سلامي عليه بس مابكا .. عناد عمره 15 سنه بس من تصرفاته كأن عمره 20 او 25 .. حبيب اخته رجال وتصرفاته رجوليه بس خايفه ان امه تدمره ..
رحنا لبيت عمتي اللي استقبلتنا بالدموع وجلست عندنا وعناد معاي ترك الرجال بعد ماسلم على زوج عمتي صالحه .. سولفت معاها شوي وقلت لها عن رغبة ابوي اللي قال لي عليها وانه خايف على عناد من امه .. وحسيت عمتي تأثرت عشان عناد وبنفس الوقت انقهرت من ابوي ليه يستحي من زوجها اللي يعتبره اخوه وليه ماقال لهم وهم يدورون العيال لهم سنين ..
التفت انا بدوري لعناد وقلت له : عناد انا ادري انك تعاني عند امك وانها تتكلم عليك واحياناً تضربك .. ومنت مرتاح عندها بالبيت .. بس امك واخوانك محتاجين لك .. انت الحين رجال البيت اذا بتجلس عند عمتي وتمر عليهم باستمرار عشان هنا مصلحتك .. وهنا بترتاح .. هذا شي راح يسعدنا ويطمنا .. اما اذا بتقطعهم وتنساهم فأنت بتخيب ظن ابوي الله يرحمه فيك .. وانت شوف اذا تقدر تصبر على امك وتتحملها عادي ارجع واجلس عندها محد بيجبرك
فز عناد بسرعه قال : ياديمه انتي ماتدرين امي وش تسوي .. يوم ابوي الله يرحمه موجود كان هو اللي يمنعها لاتضربنا والحين تضربني بس انا كبير اقدر اهرب منها بس روحي شوفي جسم عادل .. وروحي شوفي سديم الصغيرة .. ياديمه امي مريضة لازم تتعالج ..
لمن سمعته يقول كذا حسيتني بنهبل ..بتجنن على اخواني ياويلي هذولا من بينقذهم .. انا مجربة ضربها وقسوتها ورميها لي مع الدرج .. طالعت في عمتي وانا مفجوعة ..
عمتي معروف عنها انها حرمه حكيمه هي اصغر من ابوي على طول يعني عمرها في الاربعين .. قالت بعد صمت دقيقه يمكن : خلك هنا ياعناد وانا بروح اليوم لجدك واتفاهم معاه عشان محد يلومنا اذا اخذت اخوانك .
: "تدرين ان امي تقول بتزوج" .قالها عناد وراسه بالأرض وأحسه مهموم ومتفشل من امه
ماردينا ولا علقنا .. يعني ابوي توه كمل شهر بموته وهي تفكر بالزواج ... لاوتقوله لعيالها الله يهديها
قام عناد بعد ماقال : عمة اش رايك اجيب اغراضي كلها عندك انا احيانا افكر اهرب من البيت بس ماادري فين اروح
: الا يمه هات اغراضك وانت واخوانك عيالي وحبي لكم من حب ابوكم الله يجعل مثواه الجنه . اليوم جيب اغراضك انت ومن بكره اتفاهم مع جدك واجيب اخوانك عندي
: عمة ترى سديم صغيرة وماتتحمل ضرب امي
انقهرت على حظ ابوي وحظ اخواني اثريني بنعمه .. الحمد لله على كل حال .
حتى سدومه الصغيرونة تعذبها ..
لو عمتي مو محتاجه ان يكون عندها عيال وشفتها فرحت فيهم والله لآخذ لاخواني بيت واعيش انا وياهم واسوي فيهم زي ماسوى خالي ناصر فيني و اكثر.. بس عمتي موجوده الله يعطيها العافيه وبتحطهم في عيونها وبتربيهم احسن تربيه وربي ماحرمها من العيال الا من حظ اخواني بالرغم اني واثقة من عمتي حتى لو عندها عيال كان اغلت عيال ابوي وحطتهم بعيونها لأنه اكريمه وحنونه وطيبه ...
رجعت لجده بعد ماتأكدت ان عناد اخذ اغراضه لبيت عمتي طبعا وامه ماتدري ..تذكرت امه .صدق مافيه ام تسوي بعيالها كذا الا وهي مريضة الله يهديها ويشفيها .. !
مرت الأيام وانا بديت اطلع من الحزن ورحت كذا مرة كشفت وسويت فحوصات كاملة عشان راسي والحمد لله كل شي تمام .. بس فيه شي لاحظته بعد فترة وماقلت لاحد عليه لأني اشوفه عادي ومو مستاهل اقول لاحد عليه بعدين ماابغى اقلق خالي علي اكثر يكفي اللي يسويه عشاني .. كنت اذا صحيت من النوم مااقدر افتح عيوني بسرعه لازم اغمضها حوالي دقيقتين وأفتحها شوي شوي لين تفتح لأني مااشوف شي .. وأحس بألم فيها بس دقيقتين وتصير عادي مافيها شي .. يمكن عشان الغيبوبه اللي كنت فيها ,,
بعدها رحت لجدتي اميرة بسوريا اللي كانت تعبانه بعد وفاة ابوي .. اول ماشافتني انا وخالي ناصر قعدت تبكي قال : مات ابني ياناصر ..
فعلاً ابوي سيرته عطره عساها تشفع له عند ربي .. جلست عندها انا وخالي اسبوعين وتمنيت ان هدى جات بس بسام عنده مدرسه وماتقدر تخليه .. اما خالي كان ماخذ اجازة والمدير صاحبه وميسر له اجازاته حتى علاقته بزملاءه اللي يعرفون ظروفه ممتازه .. وخالي يجيب تقارير واعذار عن غيابه كل ماطلب منه المدير
عدت الأيام وانا علاقتي بالدكتورة نجوى ممتازة دايما تكلمني وتطمن علي ولمن جا موعد التقديم على الماستر قالت لاتشيلين هم اذا بدا الترم داومي خلي كل شي علي .. شكرتها من كل قلبي ..
بدا الترم الثاني وبديت دراسه ومذاكرة واجتهاد كالعادة وطبعا الماجستير تبي لها جهد اكثر ..
ولا وحده من صاحباتي معاي اول اسبوع مر علي كأني غريب بالجامعه .. امشي لوحدي وأفطر لوحدي لحد ماتعرفت على صاحبات جدد كانت زينه ودانه وعفاف كلهن متزوجات وعندهن عيال .. انا الوحيده اللي لسه ماتزوجت وأصغرهن .. طبعا فرق كبير بينهن وبين صاحباتي بمرحلة البكالريوس .. صحيح طيوبات واخلاقهن كويسه س مشاكلهن مع ازواجهن وعيالهن يااااكثرها .. احسني وانا معاهن كبرت عشر سنين
عدا الترم والحمد لله درجاتي كلها عاليه .. بدينا الاجازة الصيفيه من جديد يارب تكون هالإجازة عكس الإجازة الماضيه .. ماابغى اتعب ولاابغى شي ينغص علينا ..
جالسة مع خالي عبدالرحمن في الصالة ونتقهوى.. مديت عليه فنجال القهوة قال بعد مارشف من فنجاله ونزله على الطاولة : محمد اخوي كلمني عنك يبيك لرامي ولده وش رايك ..
بصراحة ضحكت ونزلت صحن الحلى اللي بيدي وقلت لخالي وانا أأشر على صدري : انا اتزوج رامي ..؟
حسيت خالي معصب من ضحكتي وطريقة سؤالي يحسبني اتريق او اتمسخر في رامي قال : ليه رامي وش فيه مو مالي عينك ..؟
انتبهت ان خالي فهمني غلط قلت : بالعكس رامي كل بنت تتمناه بس عمرك سمعت بنت تتزوج اخوها ..؟
ناظر فيني خالي وتبسم قال : لا .... سكت شوية .. بعدين غمز لي بعينه وكمل : اصلاً فيه ناس مكلميني عشانك بس قلت اشوف رايك برامي اول ..
: مين الناس ..؟
: هذا زميلي بالعمل اخوه خريج قسم اداره واقتصاد .ويشتغل في بنك الراجحي .. راتبه ممتاز ... وهم اساساً ناس ماشاء الله عليهم تجار .. بعدين سكت خالي كأنه يتذكر شي وحك راسه وكمل : المشكله انه في الرياض .
جيت بتكلم قال : انا سألت عنه وهو ماعليه كلام بصراحه .. وانتي لاتتكلمين الحين بس لاتنسين ان نفسي افرح وابي افرح فيك ياديمه ...
سكت وماعلقت بكلمه .. قعدت افكر بكلام خالي .. اتزوج واحد مااعرفه ومن الرياض .. بس كل البنات كذا يتزوجون وهم مايعرفونهم ولا قد سمعوا عنهم ومع كذا يصيرون سعداء ومرتاحين بحياتهم .. اهم شي ان خالي سأل عنه ..
فكرت زين بعدين قررت ..!
انفعلت هدى لمن قلت لها اني موافقه .. وانا بقلبي متخوفه احسني اغامر بحياتي ودراستي .وكيف ابعد عن خالي واروح الرياض هذا اللي احسه مرة صعب
قالت لي وهي معصبة : ديمه من جدك تتزوجين واحد بهذي الطريقه . وترفضين شباب كل واحد احسن من الثاني وتوافقين على واحد ماتعرفينه ولاعمرنا سمعنا فيه
وقفت بروح للمطبخ قلت ببرود : عادي القسمه ياهدى بعدين هذا سأل خالي عنه ويقول رجال وهذا خالي سامي راح للرياض يسأل عنه
مسكتني بيدي قالت : اتركي اخوالك وسؤالهم .. من سألوا بالله ..؟ ولا من بيسألون ..؟ يعني اصحابه وأهله وزملاؤه وجيرانه اكيد بيقولون كويس وطيب ورجال عشان مايقطعون نصيبه
سحبت يدي منها وقلت بحيرة وانا امشي : هدى لاتخوفيني
لحقتني هدى للمطبخ وهي تتكلم بجدية وخوف وحرص باينه في لهجتها وعيونها : الله يوفقك ياديمه بس حبيت اذكرك انك رفضتي سلمان ثم مهند وبتتزوجين هذا اللي مايزيد عن مهند او سلمان بشي ..
كأن هدى خبطتني على راسي ... اوووه تذكرت مهند ياناس .تجاهلي لكل تصرفاته و بدون سبب .. اهتمامه فيني اللي مااستاهله .. شكله ..! ياربي على شكله ..! العيون الواسعه ، الشعر الاسود الطويل ، الطول والاكتاف العريضه واليدين القويه .. اتذكر لمن مسكني يوم سألته اللي مات ابوي وقال لا ..! نظراته اللي كلها اهتمام وانا اصد عنه واتجاهلها .. كلامي عنه يوم جا يعزمني .. يووه اكيد سمعني ... بس والله ماكان من قلبي كنت متنرفزة من خالي وقلقانه على ابوي ..!
يالله يمكن مهند رجع لأنه كان بآخر ترم لمن سويت العمليه وراح يرجع للسعودية ..ماسمعت عنه شي الا مرة سمعت خالي ناصر يكلمه بس مااهتميت وش يقولون .... يمكن الرجال الحين متزوج ولا خاطب ...... سنه كامله يمدي تغير فيها اشياء كثيرة .. يالله الله يهنيه ويسعده .
تركت هدى ورحت عند خالي اللي كان جالس عند التلفزيون وجلست بجنبه بناء على امر منه ....!
طبعاً كبداية أي حديث مع خالي عن وزني وليه مااسمن وانا كالعادة اقول له زاد وزني عن اول .. واحلف له اني آكل .. الحين وصل وزني 54 الحمد لله تحسن كبير
سألني خالي عن رأيي بالعريس قلت اللي تشوفه وانا متردده من داخلي خاصة بعد كلام هدى .. بس سويت نفسي عادي قدام خالي .. ابغى افرح خالي بأي شي وادري اني لو انخطبت راح يفرح من قلبه وكمان ابغى اشيل مسئوليتي من خالي احسني تعبته معاي كثير ..
يوم الخطبة في بيتنا ناداني خالي بعصبيه .. وطلعت له
حسبته معصب مني .. ياربي شو عملت حتى يعصب بس عرفت من كلامه انه معصب عشاني .. قال لي وهو معقد حواجبه : والله ياديمه ماادري ايش اقولك .. الرجال مو على قد كلام الناس عنه ...قلبي مو مطمن .. تذكرت كلام هدى سبحان الله كأنها عارفة النتيجه ..!
قلت : خيرة من ربي انك عرفته الحين ياخالي ...
مسك يدي وضرب عليها بيده الثانيه بخفيف قال : ماعجبني ابد ولا ابيه يكون زوجك ..! لأن ديمه تستاهل واحد احسن من هذا واقل شي اطمن له وارتاح .. بس هذا ماقدرت ومايصلح لك ابد ..
: اوكي خالي انا لايمكن اتزوج واحد مااقتنعت فيه من اول لقاء بينك وبينه .. والحمد لله ان ماصار شي رسمي .
دخل علينا خالي سامي ووجهه متغير .. قال بنرفزة .. هالتافه والله ماياخذك ... وبروح اطرده الحين .. اجل هذا يخطبك بعد مهند وسلمان ..
انا كنت ساكته وتذكرت هدى وكلامها ..سبحان الله كأنها عارفة الحقيقه ..
راح لهم خالي قال اعطوني فرصة ثلاثة ايام ونرد عليكم ..طبعا عشان مايحرجهم ويرفض على طول .. وبعد ثلاثه ايام قال لهم اني رافضة ..
عدا على الموضوع حوالي اسبوع .. كنت اكلم عنااد اخوي حوالي الساعه ثلاث قبل العصر .. وكان مبسوط ومستانس عند عمتي واخواني معاهم
: ها عمري كيف الاجازة
قال بحماس : ماناقصني الا انتي وابوي الله يرحمه
حسيت بعناد يقتلني بكلمته : الله يرحمه اهم شي كيف زوج عمتي معاكم ..؟
تنهد وقال : صرت اقول له ابوي الصراحه ياديمه كأنه ابوي في تعامله معي وانا احاول ارضيه واخدمه واحسسه اني ولده
: الله يرضى عليك هذا ظني فيك . طيب وعمتي مستانسه ..؟ كيف عادل وسديم لايكونون يضايقونها ..؟
ضحك وقال : لا تحبهم اكثر مني ابشرك .. ومدلعتهم حتى سديم اقول لها اوديك امي تقول لا ابغى عمه صالحه .
: الحمد لله ان ربي سخر لكم عمتي وزوجها .. يالله ياعمري بخليك انا الحين وانتبه على نفسك وابغاك عناد اللي ابوي كان يكلمني عنه الله يرحمه
: وش كان يقولك عني ..؟
: كان يقول انك رجال واكبر من سنك وانه يعتمد عليك في اغلب الأمور .. وكان يقول ابيه ولد صالح ومايصاحب رفقة السوء تكفى عناد لاتخيب ظن ابوي الله يرحمه فيك .
: لاتخافين ياديمه مو عناد اللي يفسد ويصاحب الشلل الفاسده انا من البيت للمسجد واذا بغيت العب كورة مااتعدى ملعب الحارة اللي بجنب بيت عمتي ..
: الله يحفظك حبيبي .. يالله انتبه على نفسك ومع السلامه
: مع السلامه
|
03-06-07, 07:47 AM
المشاركة رقم: 1
مهلاُياقدر
جديد مواضيع قسم القصص المكتملة (بدون ردود)
العرض العادي
