(( الجزء الخامس عشر ))
دخل الوليد على صرخة فهده وهي متمدده على الارض ولونها يتغير كل شوي من الالم ,, ما ملك نفسه وعلى طول خذها للمستشفى
وهو يسابق الريح في الوصول ,, عند بوابة طواري المستشفى ,, اسعفوها الطاقم واحضروا لها كرسي متحرك وعلى طوووول جووه غرفة الفحص ,, ظل الوليد في الممر رايح جاي ,, يطالع الساعه ,, ودقايق الا الدكتور يقبل عليه وهو يقوله: حاجه بسيطه ,, الزايده وبنشيلها لها الحين ,, لازم تدخل غرفة العمليات هالحين ,, لا تخاف ,,
الوليد : دكتور انت متأكد ,, يمكن فيها شي ثاني ,,
الدكتور : لااا طال عمرك بعدين الحاله ذي تتكرر عندنا داايم ,, لا تقلق عليها ,, ان شالله فتره بسيطه وبتشوفها ,,
*****
في فيلا الجازي ,, تحركت بثقل في الممرات وهي تراقب اللوحات في الجدار الممتد بين الجناحين ,, لوحات لرسامين عالمين مختارها
نواف بنفسه ,, دخلت جووووات كل لوحه وتخيلت نفسها فيها ,, ذووقه رااقي ,, دققت في تواقيع الرسامين وهي تحاول تلقط كل معلومه في ذاكرتها ,, سمعت خطوات في الرخام وعرفت صوتها ..ما تنكره ابد ,, التفت بهدوء وهي تشوف نواف قريب منها ,,
نواف : اشوفك تتأملين اللوحات ,, معجبتك ,,
جاازي : اكيد ,, روووعه وتحس نفسك انك في نفس المكان ,, او على شرفة مطله عليه ,,
نواف : احب الرسم ,, بس مالي بارض عليه ووالوقفه والفراشي ,, جاني فتره اهتميت به ثم اهملته واكتفيت بمتابعة الجديد ,,
جاازي : شي حلوو ان الانسان يكون عنده هوايه ويمارسها ,, او على الاقل ينميها او يحتفظ بذائقته فيها ,,
نواف : وش تحبين انتي اكثر شي ,,
جازي : اممم احب اقرأ ,, احب اشوف البرامج اللي تكلم عن حضارت الدول ,, مو شي معين ,, فيه اشياء كثيره تثيرني ,, وفي نفس الوقت افقد الاهتمام باشياء اخرى ممكن تكون مهمه عند الاخرين ,, انتبهت ان نواف مهتم يسمع كل حرف تقوله وهو يفتح عينه اكثر واكثر فيها ,,
جاهم فيصل وهو يتكلم بصوت عاالي ,, ماما وين سيارتي الريموت ماحصلتها ,,
زفر نواف بقووه وهو يشوف المحادثه اللي ممكن تمتد بينهم تنقطع فجأه ,, وعينه تتابع الجازي وهي تدور سيارة فيصل في المكان المحيط بهم ,, من رجع من سفره من المانيا وهو متغير معاها,,, فيه شي يجذبه لها ,, يبي يسمعها كيف تحكي ,, كيف تطلع الحروف من فمها ,, ذكرته باحد قريب ,, اااه تشبه طريقة امي على غير شوووي ,, هي لها رنه مميزه مع بحه حلووه ,, شافها وهي تدخل للجناح مع فصول,, دخل يدينه في جيب بنطلون الرياضه ,, وقرر يروح للنادي يتمرن شوي ,,, سمع صوت عبوره اللي صارت تاخذ اهتمامه اكثر من فيصل ,, ما قاوم انه ما يشوفها قبل يطلع ,, فدخل جناح الجازي ,, وهو عينه على عبوره في السرير ,,
شاف الشغاله تبي تشيلها وجازي مو موجوده ,, فمسكها بين يديه ولسى يبي يلعبها شوي سمع صوت الجازي ورى الباب تكلم بصوت مرتفع شوي ,, رجع عبوره في السرير وقرب للصوت شوي ويسمعها وهي تحكي : يا بنت الحلال مين قالك عني ,, اكيد غلطانين ,, شلوون ,,
ما فهمت عليك يعني وش تقصدين حددي ,, حبيبتي انا مو اخت نواف انا زوجة نواف ,, طوووووووط ,, طالعت جازي الجوال اللي انقطع الخط فجأه واستغربت من الاتصال ,, لفت وشافت نواف واقف وهو يأشر لها : مين ذي ؟؟
جازي وهي تحاول تعطي نفسها فرصه من الهدوء الصناعي : وحده تقول انك وعدتها بالزواج وعشمتها ,,
نواف وهو يفتح عيونه : وشووو ,, هذا اللي ناقص ,,
ردت عليه الجازي : وليش لااا الا بسئلك وش اسم ام فيصل ,,
نواف : ليش ؟؟
جااازي : جاوبني وبقولك كل شي ,,
نوااف : اسمها هناء ,,
جااازي : اااااه اجل طلعت اللي تكلمني صادقه ..
نواف وهو بيتجنن من طريقة جااازي : ممكن توضحين كلامك ,,
جاازي : هاذي تقول اسمها
عبير وصديقتك من زمان وانك وعدتها بالزوااج
نوااف : ما شالله وصدقتيها
جااازي : وليش ما اصدقها مو اول مره تتصل وسمعتك بنفسي تكلمها قبل نجي الفيلا ,, والا ما تتذكر ؟؟
نواف : والا فالحه تعطيني المحادثات من النص طيب وش قلت لها اذا تتذكرين ,,
جازي وهي تتهرب من نظرات نواف واسلوبه الجرئ معها : ما اذكر
نواف وهو يقرب منها اكثر وعارف انها ما تبي تحكي ,, مسك غرتها وهو يحاول يستفزها شوي : اذكرك يا عمري
قلت لها وانا احب زوجتي مووت ,, قطعت عليه الجازي وهي تقول : اصلا انا ما اعني لك شي عشان تقول لها كذا وحنا الثنين عارفين
لكن انت اللي تبي تنقذ نفسك منها ,,
نواف وهو يحاول يركز في عيونها : صدقتي ما تعنين لي اي شي ,, انتي مجرد اسم زوجه وكثر خيرك اللي تشوفين فيصل ,,
صدت منه الجازي وهي تحاول تشوف المنظر المطل في الغرفه الثانيه ,, ما بغت تستمر في المحادثه معه ,, حست انها فاشله وبرتبة امتياز في حياتها مع نواف ,, ويمكن السبب يرجع انه ولا يوم حسسها انه يبيها لذاتها والا يبي يشاركها حياتها كلها مجرد رغبات له رغبته في طفل بالاول ,, وبعدها رغبته في عاطفه لا اقل ولا اكثر ,, سمعت خطواته تبعد ثاني وهي عينها على الشجر في الحديقة لكن الضباب اللي في عيونها ما تركها تركز في فكرتها اللي في بالها وشتت ذهنها ,, مسحت دموعها اللي بدت تتساقط على خدها وهي تسمع صوت عبوره مع الشغاله ,, تنهدت بقوووه ودخلت وهي تغسل وجهها بالمويه ,, طالعت شكلها في المرااايه وهي تكلم رووحها : يعني ما قدرت تشوف رووحي يا نوواف ,, حراام عليك ,,
ركب نواف سيارته وطلع للنادي وهو معصب على جازي ,, صحيح اذا قالوا الحلوو ما يكمل ,, جامده والا تحاول تخفي اللي في قلبها عني ,, لوو وحده ثانيه كان قوومت الدنيا ولا قعدتها لو تعرف ان زوجها يعرف وحده ,, لكن هي مسوية تحقيق فضولي تبي تعرف وبس مو كله عشان تحبني ,,
زززفر وهو يسوق ,, اشهد حظي مو زين مع الحريم ,, متى برتاح في حياتي ,, وعبير من وين طالعه لي ثاني وكيف جابت رقم جازي ,, بس انا سمعتها تقول انا مو اخت نواف انا زوجة نواف ,,
ما عطى عمره فرصه يفكر ودق على عبير اللي ترسل له مسجات وكلمات غزليه وترجي ,,
ما انتظر كثيير الا بصوتها اللي كله دلع : هلا يا بعد طوايفي
نوواف بحده : انتي ما تستحين ,, استري على عمرك يالخبل ,, انتي وش محسبه يعني ,, بسكت لك
عبير بروووقان : نووافي لا تقول كذاا ترى للحين ما نسيت الللي بينا ,, ضااق نواف من كلامها
نواف : شوفي حالك واستري عليها ,, ترى والله ما تلومين الا نفسك ,,
عبير وهي تضحك : لااا دام مشاعل قدرت على سعد بقدر انا بعد عليك وش ناقصني اعرف انك تنبسط معي مررره
نواف وهو خلاااااص وصل حدده : اااااه طيب لا تلومين الا نفسك وسكر السماعه بوجهها ,,,
وشدخل سعد وهو يسئل نفسه لاااازم اتصل عليه واشوف ,,, لكن مو الحين ,, ونزل للنادي وهو طفشاان حييييل ,,,
******
وصلت طيارة ماجد ونور صباح اليوم وجاهم سعود في المطار اخوو ماجد الصغير ,, دخلوا للفيلا وحصلوا ام ماجد تنتظرهم في الصاله بالقهوه والفطور ,, وبعد السلام دخلوا يتريحون ,,
قامت نور وهي كسلانه من تغيير الجوو قعدت في السرير وهي تشوف ماجد مستغرق في نومه ,,
طالعت في غرفتهم ,, صحيح اصغر شويه من غرفتها اللي في قصر اهلها بس ماجد قالها انها كلها كم شهر وبيطلعون في بيت بالحالهم ,,
تذكرت الشنط اللي في بيت اهلها واغراضها ,, بس قررت ما تجيبها كلها وتاخذ قدر حاجتها فقط ,, وتترك الباقي في غرفتها الاصليه ,, لأن اغراضها كثييير ومستحيل تدخل في غرفة وحده ,, قامت من السرير عشان ما يحس بها ماجد ,, وطالعت في الصاله الملحقه بالغرفه
نمط امريكي حلوو عرفت من كلام ماجد انها غرفته الاصليه بس غير اثاثها مره ثانيه ,,
فتحت دولابها بالغرفه وحصلت جلابيات حرير مسويتها لها عاليه ,, وخذت وحده مع انها مو ستايلها ابد جلابيات بس ما تقدر تلبس مخصر قدام سعود حذرها ماجد من هالشي ,, ما تطلعين من غرفتك الا بالحجاب والغطا ,,
طلعت جلابيه وجت بتدخل تأخذ شاور ,, شافت ماجد يطالعها وهو في السرير ,, ماعرفت متى صحى والا من متى وهو يراقبها ,
نور : متى صحيت ,,
ماجد وهو يطالعها بحنان : من اول ما نزلتي من السرير ,, عجبك المكان والا صغيير
نور وهي تترك ملابسها على الكرسي وتجي يمه وتقعد على حرف السرير : انتي تدري لو انا معك متر في متر يكفيني والا لا ؟؟
ماجد وهو يضحك لها : ما يكفي متر في متر شي ,, لا ابي مترين في مترين ,, نور وهي تضرب صدره بيدها : الحق علي انا اللي ارد عليك ,, ولسى بتقووم ويرجع يمسك يديها وهو ينزلها جنبه ويهمس لها : احببببك يا عيوني يا نوري يا دنيتي .. ...
سمعوا صوت الشغاله تدق الباب وهي تقول : بابا ماجد ,, بابا ماجد ,,, لكن ماجد اللي سكر فمها عشان ما ترد همس لها وهو يقول بصوت مشتااق : خليها تنطق ما ابي اكل ,,
****
شافتها عاليه فرصه تكلم الجازي وتعطيها خبر عن فهده فدقت عليها الجوال وهي عارفه ان جزووي بتزعل انها ما عرفت في نفس الوقت ,,
دقت عليها كذا مره بس جازي ما رفعت الجوال ,, غريبه مو طبعها بس يمكن مشغووله ,, رجعت عاليه الظهر من المستشفى بعد ماكانت هناك من بدري اول ما طلعت فهده من العنايه ودخلوها غرفة خاصه ,, تمددت شوي بعد شافت الوليد ناايم ,, ولما صحت ما حصلته لكنها شافت نوته عند راسها (( ما بغيت ازعجك يا حبي انا رجعت لفهده اشوفها وبطلع للشركه ,, ارتااااحي يا حبيبتي ))
استانست على حركة الوليد ,, لما شافته بالمستشفى الصبح حست انه تعبان واصرت عليه يرجع للبيت وهي بتكمل مع فهده ,, ما ووافق لانه يشوف انها لسى ما تعدت مرحلة الوحم وخايف عليها ,, لكن ما قدر يسوي شي امام اصرار فهده ,,
اتصلت عليه وقال لها ان فهده صارت احسن وهو طالع للشركه ,, رجعت اتصلت على الشغاله اللي مع فهده ,, وناولت فهده السماعه
عاليه : بشري يا عمري احسن الحين ,,
فهده : احسن يا عمري متى بتجين زهقانه مرره تعالي ,,
عاليه شوي بجيك ,, رجعت عاليه تكلم الجازي وما ردت فطلعت للمستشفى بعد المغرب ,,
وهي بالطريق رجعت الجازي تتصل عليها : اهلين علوووي نورت الرياض متى وصلتوا ,,
عاليه : بسم الله ما امدانا نوصل الا فهده تعبانه ودخلت المستشفى ,,
الجازي وهي تصرخ : وشووو متى وشلون وليه ماعلمتيني ,,
عاليه : حبه حبه ,, شوفي جوالك وبعدين تشرهي علي حتى والله نور ما قلت لها لسى واصله اليوم ,,
جاااازي : اوكي ارسلي رقم الغرفه بمسج مسافة السكه ,,, وبسرعه دخلت تلبس ,,
*****
ما جاء على بالها تقول لنواف ,, مافيه مجال اصلا وهم بذا النفسيه فقررت تروح مع الشغاله ,, للحين وهي نازله الدرج وعبايتها بيدها ,,
شافت نواف لابس وبيطلع برى ,, ما بغت تكلمه وخصوصا هو اللي نازل تحطيم فيها وهي اللي ما تعني له شي ,,
نواف بصوت عالي شوي : وين يا مدام ,,
جازي وهي تحاول ما تشوفه : فهده في المستشفى وبروح ازورها ,, لبست عبايتها ,, وللحين تبي تلبس طرحتها ,, كمل نواف وهو يقول :
هي وكاله بدون بواب ,, ليش ما قلتي قبل تروحين ,,
جازي وهي تبي تقوله كلاام واااجد بس اختنقت فيه ,, طلعت بصعوبه : يهمك تعرف وين بروح وانا ما اعني لك شي ,,
نواف : يهمني اكيد ,, مو عشانك عشان نفسي ,, لكنه ما تركه لها فرصه للتفكير : وش فيها فهده ,,,
جازي : عملية زايده ,, الحين ممكن ارووح
نواف وهو يبي يطفشها اكثر : ايييي بس انا اللي بوصلك يالله ,, خذت جازي نقابها ولبسته وطلعت معاه للسياره وهم كل واحد مشحون على الثاني ,, وصلها لباب المستشفى وتحرك لقصر ابوه مشتاق يقعد معهم شوي ,, في الطريق اتصل سعد على نواف اللي صار له فتره ما سمع صوته : سعد وهو بطريقته اللي يحب يعاتب بها نواف : اللي ماخذ عقلك يتهنا به ,, وووين ذا كله عشان البيت الجديد والا علاقه جديده ,,
نواف : امااا عاد اشوفك مقطع الاتصالات ,, وينك فيه انت بعد ,, واي علاقه الله يرحم والدايك ,,,كلها طفش بطفش ,, تدري عاد عبير اليوم متصله على اهلي ومسويه فيها شي اني بتزوجها ومدري وشو بعد
سعد : يالله تعينك وش طلعها ذا الحيه عقب ما اندفنت ,,,
نوااف : انا ادري لااا وتقول مثل ما قدرت مشاعل على سعد بقدر عليك ,,
سعد وقلبه يدف شوي : وشووو
نواف : اتركنا منها ذا العله ,, الا تعال وش سالفة فهده في المستشفى وذا الزايده متى صارت لها ,,
سعد وهو يوقف وقلبه يدق اسرع : فهده تعبانه ..؟؟
نواف : ليه انت ما تدري الحين نزلت جازي عندها في المشتشفى ,,
سعد وهو يسكر الجوال : اوكي باااي ,,
***
دخلت الجازي غرفة فهده وهي مستويه من التعب والارهاق وغير ذا الضعف اللي باااين في حالها ,,
ما قدرت جازي تمسك دمعتها اللي نزلت حزن على فهده ,, طالعتها فهده بحزن اكثر وكنها تقول الحقيني يا جزوووي بموت ,,
قامت عاليه تصب الشاي لهم في اكواب ,, ورتبت في الصينيه مناديل التقديم ,, لكن جوالها اللي يرن قطع عليهم وتركت اللي في يدها وراحت ترد على نور اللي ظلت مع عاليه على الجوال نص ساعه وكل وحده تعطي الثانيه موجز عن الاخبار ,,في اثناء ذلك قدرت جاازي تطلع من فهده شويه من اللي في نفسها ,,وبدون تفصيل انها زعلانه مع سعد وصار لهم شهرين اقل او اكثر بشوي زعلانين ,,
عرفت جازي ان محد مرتاح بحياته واذا صفى لك يوم شان لك ثاني والايام عبر ,,
جااازي : حبيبتي ,, لا تتكدرين ولا شي ,, مصيركم ترضون على بعض ,, وهي تحاول تكلم نفسها بعد وتعطيها داافع انه ممكن هي ونواف تتغير حياتهم للأحسن ,,
ارسل لها نواف مسج : (( متى بغيتي تطلعين ارسلي مسج ))
احيانا احسه حنون وكله رقه واحيانا لا مبالي ولا يدري عن شي ,, متى بتتصلح احوالنا يا ربي ,, مو حااله ذي ,,
جلست ساعتين عند فهده وبعده ارسلت له يجي ,, شوي الا هو يدق علي انزلي ,, للحين موقف الصباح مأثر فيني ,,
دخلت السياره المكيفه ,, خذيت نفس وريحة الجلد مختلطه بريحة سجاير وعطر ,, ادري انه يدخن بس نادر انه يدخن في البيت ما يبي فيصل يشوفه ,, يمكن في غرفته ,, لكن ريحته داايم مختلطه مع ريحة الدخان المعروفه ,,
تنهدت وانا اقعد في الكرسي ,, وعيني على اللي قدامي بالطريق ,, حطيت يدي في حجري ,, وظليت ساكته ,, لكن صرت اشوف الطريق مو طريق البيت ,, خفت لا يكون يبي يوديني عند اهلي زعلان ولا شي ,,
ما بغيت احكي ,, خله يوديني المكان اللي يبي ,, اهلي ,, يفتك مني ,, اي مكان ,, براحته ,, انا في ذمته واللي بيصير لي عليه هووو ,,
تكلم بهدوووء : وش رايك نتمشى شوي ,,
جازي وهي تبين له هدوئها : بكيفك عاادي
نواف : بكيفي بسوي اللي ابيه بالحالي ,, انا اقولك وش رايك ,, ترى لا تكونين سلبيه اذا سئلتك ,, ردي علي ايه او لا ,,
جازي وهي تشوف انها بزر : طيب ودي ,, تنفست برااحه شوي وطالعت الطريق المظلم شوي ,, كنهم مشوا على الطريق السريع
شغل نواف اذاعة الاف ام وبرامجها الشغاله على الهواء ,, وكلهم مستمعين ويحاولون يسحبوون اللي في نفسهم ,, ظل نواف يراقبها وهو يشعر انها مو زوجته بس الا كل مشاعر الدنيا الحلوه تترجمت في قلبه هالحين ,, رق عليها فجأه وشاف انهم متضادين ما يلتقون وذا الشي لازم يتغير ,, مراات يقرب منها والاكثر يبعد منها ,, شعوره تجاهها غرريب ,, انجذااب ,, رغبه ,, الفه احيانا ,, لكن في دبي صار شي ثاني ,, صار قلبه معها يدق ,, واذا غابت من عينه يحاول يطمن نفسه انها قريبه ,, ماظنيت اني ممكن احب ثاني ,, وم متأكد اذا هو حب ,, لكن الاكيد راح يبين لي قرريب ,, حاولت اجس نبضها بعد اليوم الصبح ,, اكيد اني جرحتها ,, حطيت يدي اليمين على يدها المضمومه اللي في حضنها ,,, ولمست دفئها بس باين توترها لما سحبتها بسرعه ,, طالعتها وهي تحاول تلتفت للجهه الثانيه ,, ناديتها بصوت فيه شي من العتاب : ليه تهربين مني ,,
جاازي وهي تحاول تضبط نفسها السريع : لاا عادي ,, ركز على الطريق يا عمر,,ووسكتت بسرعه ما توقعت تطلع منها كلمة دلع له ,,
نواف : عمري ,, معقول انا عمرك وهي يطالعها ويسووق بهدوء ,,
جازي : اذا صار فيه حب بين اثنين بيكونون كل شي لبعض ,, بس حنااا لسى وهي عاجزه تطلع الكلمات الباقيه ,,
نواف : بس حنااا وشو كملي ,,
جازي وهي ملتزمه الصمت ,, وكمل نواف : بس حنا ما نحب بعض صح ,,
بغت جازي تموت ليه يفهم غلط وليه يتعمد يقول الكلام الغلط وليه هي تتركه يقول اللي يبي ,,
جازي : اذا انت فاهمها كذا براحتك ,,
نواف : ممكن اعرف انتي كيف فاهمتها ,,
جاازي : ممكن نرجع للبيت ,,, وركز نواف على الطريق وهو يقولها ابشري ,,,,
*****
نزل سعد للرسيبشن وهو يحاول يشوف اقرب طريقه توصله للرياض بسرعه ولو من الليله ,, صار يدعي على مشاعل اللي قدرت بكيدها تخرب عليه فتره كان ممكن تكون احلى فتره في حياته ,, لكن هو وفهده ارتكبوا نفس الخطا وخذتهم العزة بالاثم ,, ولا حاولوا يفهمون بعض ,, اتصل على نواف بس ما رد عليه ,, وهو يهوجس ومو مع موظفة الاستقبال ,, دقت له يدها على طاولة الرسبيشن عشان ينتبه
: مستر سعد : مستر سعد ,, سعد وهو يرد عليها : هاااا ان شالله حصلتي ,, وتفاهمت معه انه فيه رحله راح تطلع بعد ساعتين وتصل على الفجر ,, وبدون تردد قرر انه يطلع للرياض كم يوم ,, يشوف فهده وبعدها يرجع لاهله ,,,
رجع ثاني وخذ شنطة يده بعد ما غير ملابسه ,, لبس له بنطلون جينز مع قميص قطن وجاكيت من الشمواه البني ,, قال لامه وطلع للمطار وهو يعد الثواني عشان يوصل ,, مافارق خيالها عيونه ,, وكل ما تذكر وش راح يقول لها حس بتوتر رهيب وخفق قلبه لها ,,
طول وقت الرحله وهو يراقب ساعته ,, كل ما مسك مجله رماها ,, حاول ينشغل بفيلم ما امداه يشوف ربع ساعه منه الا يقفله ويحاول يتحرك بالطايره شوي ,, قلبه عندها وخايف عليها ,, حس بشووق رهيب لها وين كان متخبي مادرى ,, اللي يعرفه انهم مقصرين في حق بعض ,, مرت الرحله بسلاام ونزل في المطار ومنه على المستشفى على طول ,, اتصل على السواق اللي كان ينتظره في المطار
وطلع معه ,, حاول يرتب له جمله يدخل عليها بها لانه خايف من ردة فعلها ,, خاف تكون زعلانه وما تبيه ومصره على الطلاق ,, اللي يعرفه هالحين انه متحسف على الوقت اللي ضاع من يديهم ,,
وصل للمستشفى بدري وبعد ما استفسر من رقم الغرفه ,, طلع بدون ما يكلمها ,, اكيد راح تكون نايمه ذا الوقت ,, بنتظرها لين تصحى ,, اهم شي اشوفها ,, كل ما مر على احد يشوف في عيونهم كلمات الاعجاب بشكله ,, لدرجة انه في الرسيبشن سئلته الموظفه هل المريضه زوجتك ولما رد عليها بنعم شاف نظرات الخيبه في عيونها ,,,
اول ما قربت رجله للباب ,, تردد انه يطقه وتكون نايمه ويزعجها ,, فدخل بهدوووء وشاف جسم ممد على السرير ,, لكنه جسم نحييييل ,, كانت لافه جنبها للجهه الثانيه ,, وشعرها على مخدتها وراها ,,شاف الشغاله نايمه على الكنبه ,, ومتلحفه ,, سحب الستاره اللي حول المريضه بهدووء ومشى للجهه الثانيه يبي يشوف وجهها ,, ارتاع من ضعفها ,, شاف ملامحها النايمه والتعب والمرض باين في شكلها رموشها الطويله فيها دمعه واقفه ,, لاتكون تصيح قبل تنام ولا تشوف حلم مب زين ,, ضغط على رمشها بحنان وهو يمشي بصبعه على رمشها وابتلت بدمعتها خذت نفس ,,, وصارت تشهق وهي مغمضه عينها مدت يدها تمسك يديه اللي لسى باقي عند خدها وهي تحطها عند شفايفها وهي تبوسها ,, ضمها سعد وهو يحاول يحتوي كل مشاعرها المخنوقه ويمسح على شعرها وهو يحاول يهمس لها بكلمات في داخله ,, سعد : بس ياحبيبتي انا معك ,, لا تصيحين ,, قلبي ,, لكن صياحها ,, حسسه انها صحيح مالها احد الا هوو ,, رفع وجهه المدفون في شعرها وهو يحاول يشوف عيونها لكنها مسكرته بقووه ,,
سعد : حبيبتي ممكن تشوفيني ,, فتحت عيونها المليانه دمووع وهي تتكلم : شكلي يروع ارجوك لا تطالعني ,, ليه ما قلت لي انك بتجي ,,
سعد : ااااه وش اقولك انا سمعت انك هنااا من كم ساعه وعلى طول للمطار ,, وش صار عليك يا قلبي ,, ليه نحفتي كذا ما تاكلين ,,,
مارفعت فهده عيونها ,,بس تكلمت وهي تمسك الشرشف بيديها : يعني لو ما سمعت اني تعبت ماكان نويت تجي او تكلم ,,
سعد : بليييز فهده سكري الموضوع ,, حنا فيه شي اهم الحين صحتك يا قلبي ,, متى صارت العمليه وشلون تعبتي ابي اعرف كل شي ,,
شرحت له فهده وش صار بالتفصيل وكيف بدى الالم ,, وانتهت عند شعورها بالضعف بعد العمليه ,,
ظل سعد يمسح شعرها ويحرك غرتها على فوق ,, ويحاول يتقرب لها بطريقه حنونه ,, وهو من دااخل عارف انه ما كان يحلم يقرب منها كذا لو في ظروف ثانيه ,, لان فهده ما تحب ذا الشي ,, وودها كل ذا المشاعر بعد زواجهم احسن ,,
قطعت عليهم الممرضه كل شوي تسوي لها قياس الحراره والضغط ,, ووصلت الجازي اللي ما توقعت تحصل سعد موجود مررره ,,
استأذن سعد منها وهمس لها انه بيزورها بالليل اذا هي موافقه ,, لكن فهده ما ترددت انها تعطيه موافقتها اذا مشوا البنات من عندها ,,
استانست جازي وهي تشوف اشراقة فهده ولو شي بسيط ,, وحاولت تساعدها في طريقه كويسه تتفاهم مع سعد عشانها بالنسبه لموضوعهم المتأزم بينهم ,,,
****
وصلت عاليه لبيت اهلها تسلم على نور وماجد ,, بعد مادخلت للفيلا لقت امها وابوها جالسين في الصالة يتقهووون ,, قعدت بعد ما سكرت عبايتها وهي تسئل امها عن العرسان ,, بس اجابة امها ما ريحتها ,, (( واحنا شفنااهم من خذت ماجد وهو ما صار زي اول ,, لا اتصال ولا جلسه زينه بس عاليه قطعت عليها بسرعه : يمه الله يهديك وش ذا الكلام ,, نور توها واصله امس من شهر العسل ,, بعدين وش تنتظرين اصلا انتي عارفه ماجد وروتينه ,, خليه على راحته معاها ,, كلها كم يوم وتشوفين بنفسك انه ما راح يقعد معها اصلا ,, هو شغل والا شركه والا مجلس ,, الله يسامحك يمه لا تخلين الشيطان يشتغل عليك ,,,
للحين توها تسكر فمها شافت ماجد ينزل من الدرج وهو يضحك لها اول ما شافها : هلا والله بأختي الغاليه ,,وش اخبارك يالغلااا ,,
كرت عليه عاليه اخبار العايله كلها وفي اثناء ذلك وصل مشاري وزوجته نوف ,, ارسل ماجد مسج لنور (( اخوي مشاري واهله هنااا ,, البسي نقابك وتعالي )),,,نور اللي كانت في الرتوش الاخيره ,, خلصت غرفتها وترتيبها ’’وتعطرت بعد ما خذت لها شاور بارد ,,
لبست شرشف الصلاة وخذت نقابها ونزلت تحت وهي تحس بالتقيد ,,
اول ما نزلت لقت خالتها والبنات ,, وماجد دخل مع اخوه وابوه في المجلس ,, حاولت نوف تبين لهم انها اهليه وراعية المكان بما انها خالتها ,, وانها اقرب لها من نور ,, نور بأحساسها الذكي عارفه انهم ما راح يسوون شي ,,بس يتميلحوون لبعض,, وخصوصا انهم ما عندهم الا انفسهم //,,,ظلت نور تسولف معهم لحد ما اتصل فيها : قلبي سوي لي شااي مضبووط ,,
قامت تبي المطبخ لكن صوت خالتها كان اسرع وبحده : وين يا حبيبتي بأستهزاء شوي ,,
نور : بصلح لماجد شاهي ,,
ام ماجد : استريحي حنا بنصلحه وبنرسل عليه ,,,, قاطعتها نور : ما عليك يمه خليك قاعده ,,وقامت متجهه للمطبخ التحضيري
ماقاومت نور رغبتها انها تصلح الشاي لزوجها ,, لكن خالتها ام ماجد بينت لها انها الكل في الكل هنا ,, وعندها شغالات بيصلحون كل شي ,, نور بدبلوماسيتها ,, قدرت انها تفرض نفسها برقي فكلمت خالتها برقه : خلي عنك ياخالتي ما تقومين وانا موجوده ,, مشت نور للمطبخ وهي تحس برجفتها ,, مع انه شي مسلم به وعادي انها تخدم زوجها ,, لكن ام ماجد فيها نزعة تملك لعيالها ,,,
دخلت المطبخ وهي تحاول تحفظ كل شي فيه ,, اماكن الكاسات والشاي ,, حاولت تخزن كل شي عينها تمر عليه ,, لقت الشغاله العجوز اللي من زمان عندهم ,, جودي بسهوله علمت نور عن نظامهم اليومي ,, ورنت في بالها ,, الجمله الماثوره عندهم بابا ماجد في مجلس كل يوم ,, يزيدون ويعيدون فيها ,, تذكرت انه خبرها عن مجلسه اليومي وربعه ,, بس شكلهم طفشانين من سالفة المجلس ,, ما ينلامون اذا يومي ,,
جات ام ماجد وهي تلقي اوامر عليهم ,, صلحتوا عشاء حق المجلس بالليل ,, كبسه وخفايف ,, ارسلتوا السواق يجيب مقاضي ,, وانتي ياجودي وين كيكة التمر ماخلصت ,, نور اللي واقفه تشوف المشهد بالكامل ,, ماعرفت متى تبتدي تمسك بزمام الامور اللي تخص زوجها ,,صبت الشاي في الابريق ورتبت الكاسات ,, وعطته الشغاله وام ماجد تشوفها ,,
نور : خالتي اسوي شي ,, تبين مساعده ,,
ام ماجد : لا تعبين حالك ,, مجلس ماجد مفتوح يومي واذا بتقعدين تصلحين كل يوم شي بتتعبين ,, بعدين هما عارفين الشغل ,,
نور : انا ماعندي شغل يا خالتي على الاقل بصلح لهم حلووو ,,
ام ماجد : براحتك يا حبيبتي ,, طلعت ام ماجد من المطبخ وراحت للصاله عند البنات ,, وهي مستغربه من تصرف نور بنت العز اللي ماعندها اي مشكله تدخل المطبخ ,, ولا سوت نفس بنات ذا الزمان على قولتها اللي دلوعات وشايفين حالهم على الفاضي وهالشي كبرها في عينها ,, قارنت بينها وبين نوف زوجة مشاري بنت اخوها ولحمها ودمها ومع ذلك ماقد حاولت تتودد لام ماجد وتساعدها بشي ,,
شافت نور المطبخ وفتحت الثلاجه وحاولت من الموجود تسوي لهم كيكة البسكويت ,, مع الكريما ,, وفي بالها اشياء كثيره تبي تسويها لماجد مستقبلا ,,,
بعد انتهاء الزيارة في المستشفى قدر سعد انه يدخل بطريقته الخاصه ,, يبي يعرف وش ردة فعل فهده تجاه بوكيه الورد اللي ارسله بعد المغرب ,,
حاول يختار الوان بنفسجيه وورديه تناسب البنات ,, وكتب لها كرت كله كلمات حب وحطه في مظروف واكتفى بكلمة خاااص فهده عشان محد يتجرأ ويفتحه ,, وصل لغرفتها بعد ما ارسل لها مسج (( عندك احد ,, ولما ردت عليه بالنفي ,, اتجه للغرفه ,, ماسك بيده هديه صغيره مغلفه لها ,, وطق الباب ودخل ,,
سعد وعينه على فهده اللي شاف الفرق عن اليوم الصباح : لاااااااا وش ذا الزين يا قلبي ,, ايييييه الحين عجبتيني ,,
حاولت فهده تحط بلاشر وجلوس وتغير بشعرها شوي قبل يجي على الاقل يعطيها حيويه شوي ,,,
فهده : واللي يسلمك عاااد لاتحرجني ,,
سعد : ااااخ منك انتي يتمنعن وهن الراغبات ,,, لا تقولين ما تحبون المدح ما اصدق ,,,
فهده بدلع : سععععد ,,,,
سعد : قلب سعد وعيونه آمري تدللي وش بغيتي ,,,
ماقدرت فهده على ذا كله ,,, هي تشوف من اول ان سعد احسن منها وقادر يطلع مشاعره لها لكن هي تستحي ,, على انها بتموت تبين له ,,
فهده : الله لا يحرمني منك يا عمري ,,
قرب سعد وباس جبينها ,, وهو يطالع في المكان : وين شغالتك ,,
فهده : ارسلتها تتعشى بتجي بعد شوي ,,
سعد : يعني اخذ راحتي معك ,,
فهده وهي تطالعه بحذر : لا لا سعد لو سمحت حنا بمستشفى ,, ضحك سعد بقووووه لدرجة ان صوته ممكن يطلع برى ,,
سعد وهو يكمل : يا حبي لك انتي ,, تدرين وش يعجبني فيك قلتها لك وبقولها للمره المليون ,, حياااااك يعجبني ,,
ضحكت فهده بحياء وغمازاتها على جنب مضفيه عليها شكل حلووو ودخلوووا في جوو سوالف راااايق عن حياتهم المستقبليه ,,,
بعد مرور اسبوع وجازي قاعده في جلستها اليوميه واشعة الشمس منوره المكان ,, دخل عليها نواف وهو دوووبه صاحي من النوم ,
مو عوايده ابد بس يمكن فيه شي ,, شافت جازي اختلاف في وجهه ولونه احمر ,, تكلم بصوت تعباان : عندك اي شي للحراره ,,
فزيت من مكاني ,, وقربت جنبه وانا المس جبينه ,, يطبخ ,, يووووو وشفيك نواف صابر ليه ما قلت من بدري ,,
نواف وهو مكسل ,, حسيت بها الفجر بس عجزت اجي لك ,, لكن صحتني الحمى من شوي ما قدرت عليها ,,
طلبت منه جازي يقعد على الكنبه وراحت تجيب الدواء ,, وطلبت من الشغاله تجيب لها كمادة مويه بااارده ,,
رجعت تبي تعطيه الدواء ماحصلته طلعت تشوفه في جناحه ,, نادر ونادر جدا انها تدخله ,, يمكن اول مره نزلوا البيت شافت اثاثه مرره ,, بالعاده ماما عتيقه هي المسئوله عن جناحه وترتيبه ,, دخلت وبرودة المكيف في المكان ,, دارت عيونها في جناحه ,, رااقي بس حست ان لمسة الانثى هي اللي ناقصه وذا الشي ارضى غرورها ,, شافته متلحف وحزنت عليه ,, قربت جنبه وهي تكلمه بحنان : نواف قم خذ الدواء ,, استعدل لها بجلسته وخذ الدواء ,, وبعدها صارت تكمد جبينه بالفوطه البارده ,, بعد شوي ما توقعته يسوي الحركه ذي قدامها وفصخ فانيلته يبي يتبرد ,, كانت تبي تحط الفوطه على جبينه بس صدت بسرعه وهي تحاول ما تشوفه ,, لكن يد نواف على الفوطه البارده خلتها تكمل اللي بدت فيها ,, ظلت ساعه ثانيه وهي تكمده لحد ماناام ولا صار يحس بشي ,, على الظهر راحت الحراره واستغربت جازي سببها ,, لكن نواف اكد انها من بركة السباحه بالنادي ,, لأنها مكيفه وشكله خذ برد ,,
مرت يومين كامله وجازي ما تقعد في جناحها ابد ,, وعلى طول عند راسه بالدواء والشوربه الدافيه ,, على الكمادات ,, والحوامض اللي تقوي مناعته يعني مااااقصرت بالدقيقه عنده ,, ولاول مرره يحس نواف ان فيه احد مهتم له ,, وبدون شعور همس لها : ياليتني مرضت من زمااان ,,
جااازي : اسم الله عليك وش ذا الكلام ,,,
نواف وهو ينظر لها بأعجاب : ايييييه عشان تطلعين الاهتمام ذا من اول ,, قامت جاازي وهي تشيل المويه والفوط ,,, بدون ما تطالع فيه ,,
طيب المفروض وقت نومتك الحين ,, يالله تصبح على خير ,, قعد نواف يراقب الباب بعد ما سكرته وهو يفكر فيها ,, وش كثر حنونه وش كثر اهتمام ,, وش كثر ذووق بتعاملها البنت ذي بتاكل عقلي ,, شكلي خلاص بخربها معها ,, انا مستحيل اخليها تهملني مره ثانيه ,,
قامت الجازي كعادتها الصبح بدري ,, ولبست بنطلون لينن ابيض ,, ومعاه توب اخضر فاتح علاق ,, وفوقه قميص لينن ابيض كت قصير للخصر ومخصر على الجسم ,, رفعت شعرها فوق ونزلت الباقي على كتفها وخصرها ,, تعطرت ,, وجهزت فطور نواف وجابته له ,, نزلت الصينيه على الطاوله في مجلسه الخاص ,, ودخلت بهدووء غرفته المظلمه ,, اليومين اللي راحوا كانت تدخل بهدوء وتفتح الستاره شوي وتعطيه الدواء ,, بس هو من البارح مافيه شي ,, فقررت انه يصحى ويتحرك بدل جلسة السرير ,,
للحين يدها على الستاره سمعته ينادي بصراخ شوي : جاازي الحقي علي ,, خافت لايكون فيه شي وبسرعه جت جنبه وهي تفتح نور الاباجوره ,, نواف قلبي وشفيك ,, ما ترك لها فرصه حتى تكمل جملتها وسحبها جنبه ,,
الظاهر ان المرض كشف لهم مشاعرهم المخزونه تجاه بعض ,, لان الكلمه اللي ترن في اذن الجازي كل شوي ياحبيبتي ,,
بعد فتره من الوقت ما تدري كم الساعه شافت نفسها في سريره قامت من المخده وهي تصرخ لان ماله اثر ابد ,, تذكرت بنتها وولدها وينهم الحين واكيد يدورون عليها ,, واااااااي حست بنداء الامومه وانها مقصره معهم ,, تبي تعرف الوقت وفي الاخير شافت ساعة نواف عند التسريحه ,, كانت تأشر على 2 الظهر ,, صحيح مو صاحيه ذا كله نووم ,,, وين حضرته راح وتركني ما صحاني ,, تفشلت من عمرها ,, هذا شعورها اذا اختلت به مالها وجه تشوفه اللي يقول مسويه منكر ,, المشكله ما تدري هو في الجناح هو برى البيت ,, شلون بتمر قدامه ,, حاولت تلبس لبسها بسرعه وترتب شعرها ,,طالعت نفسها في المرايه ,, يا حيه شوي الشكل صحيح متخربط بس يالله مشي يا جازي ,,
اول ما طلعت من الغرفه ,, لقته يطالع بالتلفزيون وقدامه صينية شاي ,, لمحها وهي جاايه وبدون شعور قام لها ومسكها من يدينها وهو يقربها له اكثر : مسح خدها وهو يطلب منها تجي تشرب شاي معه ,,
جاازي بخجل اكثر : نواف انا ما شفت عيالي من الصبح اعذرني ,, ماتركها تكمل ,, ورفع وجهها وركز على عيونها : امي وصت عليهم وراحوا مع امي عتيقه يتغدون هنااك ,,,
جااازي بعجز : لاااا وش تقول خالتي الحين ,,
نواف وهو يهمس لها : بتقول ما قصرت اتركوها ترتاح شوووي ,,
قعدت على الكنبه وهي تتحاشى تشوفه ,, وهو بياكلها بعيونه كنه اول مره يشوفها ,, قرب لها كاسة الشاي ومسكتها بيدين ترتجف شوي وخذت شوي من شعرها ورجعته ورى اذنها عشان تحاول تكون ريلاكس شوي وعنده ثقه بنفسها ,,
هي عارفه نواف يحب يحرجها بالكلام ,, والمشكله انه قدر يطلع منها كلااام كثييير ,, لكن الحين وين بتروح منه ,, اكيد بيمسك عليها كل شوي ,,
نواف وهو يطالعها : مادريت اني قلبك الا من شوي ,,, رجعت جازي الكاس وهي تحط يدينها على وجهها تخفي احراجها : نواف ارجووك ممكن ما تذكرني ,,
نواف وهو يبتسم : تدرين اننا نكابر ومن زماان بعد ,, انا كنت حاس اني اعني لك شي بس مو متأكد مرره وقلت بيجي اليوم اللي بعرف فيها ,, لكن طيحتي ذي بينت لي وش كثر اعني لك ,,
جازي بدون مقدمات : طيب وانا وش اعني لك ,,,
قام نواف من الكرسي وقعد معها في كرسيها على جنب وهو يحط يديه على كتف الكرسي ويحرك شعرها كل شوي : اكيد عرفتي وش تعنين لي لف وجهها عشان تواجهه وهو ينظر لها بحب : انتي تعنين لي كثيييير حتى لو انكرت ,, تدرين انك ما تفارقين تفكيري الفتره اللي رااحت ,, من طلعنا للفيلا واحتكاكي بك كل يوم يزيد من قناعتي باهميتك عندي ,, بس انتي الله يهديك تصديني وما تبين تدخلين معي في اي مجااال ,,
جاازي : لا تلومني معاملتك معي اجبرتني اتصرف كذاا ,, نواف وهو يسكر فمها بيده برقه زاايده ,,
حبيبتي تكفين سكري الموضوع ترااه يجيب الهم ,, ضحكت شوي من كلمته لكن نواف اللي ما خلى طريقته معاها شالها بخفه بين يديه وهو يقول لها : بتجننيني يا بنت ,,,
في الاسبوع اللي مر كله عرفت نور نظام ماجد ,, وحبها اللي كل يوم يكبر في قليبها عطاها اندفاع كبير انها تتخطى كل صعوبه مع اي شي يواجهها ,, بسهوله كبيره صارت ام ماجد في صفها ,, والسبب بسيط ,, صارت كل يوم اول ما تقوم ويطلع ماجد للشغل ,, تنزل عندها الضحى لما يجونها الحريم وتساعدها في تضيفهم وتجاريهم بالسوالف وحركات الحريم المعتاده ,, من اكتساب خبراات وخدمة ام ماجد برووح مخلصه سببها حب ماجد ,, وكذا مرره ساعدتها في افكار لصديقاتها عندهم واجب وطلعت لها كذا فكره تخدم ام ماجد ,, يعني نقدر نقول صارت قريبه منها وهي اللي كانت ممكن تجعل بينهم حاجز طبيعي بسبب مكانتها ,,
الشي اللي ممكن انه صار يضيق على نور جلسة المجلس ,, ماا يدخل ماجد الا الساعه 12 الى 1 وهو داايخ واذا عبرت له عن احتجاجها قال لها ذولا ربعي اطردهم يعني ,, صار عندها وقت طويل في المساء وهي بالحالها لان ام ماجد وابوه ينامون بدري ,, وما يبقى في البيت الا سعود اللي ما تدري عنه ,, ومشاري وزوجته وعاليه يجون كل اربعاء ,,
مشكلة ماجد انه حكر وكذا مره بغت تطلع للسوق تقضي اغراض ورفض الا يوديها هو ,, مااجد حس بذا الشي ,, لكن هذا روتينه وما يقدر يغيره حاليا ,,
اليوم حست بزهق كبير صار لهم فتره من وصلوا من السفر ما زارت اهلها الا مره ,, وغيره ما طلعت من البيت ,, وصار المطبخ هو اهتمامها ,, طبعا ماجد رافض انها تشتغل نهائي ,, فما عندها اي شي تسويه ,, الا انها تبدع له اطباق للمجلس ,, ما توقعت نور ابدا انها راح تكون كذاا وكانت تشوف في يوم من الايام انها مستحيل تطبخ وتدخل المطبخ من الخدم والحشم الموجودين ,, لكن سبحان مغير الاحوال ,, اتصلت على ماجد في الشغل وطلبته انهم يطلعون اذا جاء يتغدون براا ,, وبعدها يطلعون للمملكه يتسوقون ,, اول ما قال لها ماجد ابشري ,, نطت من مكانها وقعدت تتعدل وتغير لبسها ,, تكشخت بالشكل اللي تشوفه مناسب لماجد ,, وجهزت نقابها وشنطتها ,, وخذت شرشفها وطلعت لام ماجد تعطيها خبر ,, اول ماعرفت انهم بيطلعون رفعت يدينها وطلبت لهم ان الله يحفظهم ويستر عليهم ,,
وصل ماجد من الشغل وقعد مع اهله شوي وبعدها طلع مع نور ,, وهو وده انه يخفف عنها الضغط شوي ,, عارف ان جلسة البيت ممله شوي ,, والبنات الفتره ذي مشغولين عنها ,, فحب انه ما يردها في طلبها ,,
دخلوا تغدوا في مطعم ايطالي في التحليه وقعدوا يسولفون في اشياء كثييره ومنها اهتمام نور بأمه
ماجد : انتي ما تدرين وش كثر يفرحني ذا الشي ,, نور انتي عارفه اننا مصيرنا نطلع لبيت بالحالنا ,, انتي قادره وبجداره تتركين عند امي فكره راااقيه عنك لا خلا منك يا قلبي ,,
انبسطت نور على كلام ماجد واللي عطاها دفعه اكبر تبذل جهدها معه اكثر واكثر ,,,
بعد ما خلصوا الغداء طلعوا للملكة يتمشون فدخلت نور محل ملابس جاهزه ,, دارت فيه شوي وعجبها فستان لما شافه مااجد ابدى اعجابه به ,, تمشت شوي ثاني وقررت تشتريه ,, فلما وصلت للكاشير طلعت محفظتها وهي تطلع الكرت منها ,, مد ماجد كرته للموظف وهو يقوله حاسب بسرعه لو سمحت ,, نور عرفت انه صار فيه شي ,, هل عشان الكرت حقها ويعني ,, هو لازم يعرف انا عندي حساب مفتوح من ابوي وما راح احرم نفسي ما اتمتع بفلوسي ,, رجعت محفظتها للشنطه ولف الموظف الفستان ,, ومسك ماجد الكيس وطلعوا من المحل وهما ساكتين ,, حست بأنكسار شوي في قلبها وخصوصا انه ما حكى معها لكنه بين لها انه طفشاان : تبين شي ثاني والا نروح ,,
نور : سلامتك ,, طول الطريق وهما ساكتين ,, ووكل شوي يتنهد ماجد بقوووه ,, خافت تحكي والا تقول شي ويطلع غيظه فيها ,, هي للحين ما شافت الوجه ذا فيه بس عاليه قد هددتها عن شخصيته القويه ,,
اول ما وصلوا للبيت وطلعوا لغرفتهم فتح ازرار ثوبه ورمى شماغه على الكنبه ,, وقعد وهو ناوي يطلع اللي في قلبه ,, شافها تشيل النقاب والطرحه ,, وللحين ما نزلت عبايتها سمعته يشدد على كل حرف يقوله : اذا مره ثانيه استخدمتي الكرت اللي عندك ما راح يحصل خير فاهمه ,,
نور : ممكن اعرف وش السبب ,, الظاهر ان الجمله ذي قصمت ظهر البعير ,, كان متوقع انه تقول ان شالله حاضر ولا يهمك ,,
مااجد : اللي اقوله تنفذينه وبس وبدون مناقشه فاهمه ,,,
نور ما تعودت على الكبت كذا وكل شي بتفااهم : وقفت وفصخت عباتها وهي تعلقها قالت : والله انا لي مصروف من ابوي وما راح احرم نفسي منه ,,
ماجد وهو يقرب منها ويتوعدها : اذا عرفت انك استخدمتيه لا تلومين الا نفسك ,,
نور وهي ماسكه نفسها : ماجد لا تكبر الموضوع وهو ما يسوى ,, ليش ماخذ الموضوع بحساسيه ,,
ماجد : اوووووووووه ,, وش رايك تجين تصرفين علي انا بعد خلاص اذا قلت شي اسمعيه من اول مره عاجبك زين مو عاجبك الباب يوسع جمل ,,,
كانت ماسكه عبايتها بين يديها تبي تعلقها طاحت بدون شعور : وهي تطالعه منصدمه فيه ومن تفكيره ,, وش ذا الكلام وحنا متعاهدين على كل شي ,, هنت عليه يقولي الباب يوسع جمل واحنا مصار لنا شهرين ,, صدت وهي تنزل تاخذ عبياتها وتعلقها ,, ما ردت عليه ,, وتركت لدموعها حرية الكلام بالنيابه عنها ,, وظل هو في مكانه واقف ويراقبها ويحس بتانيب الضمير من الكلمه اللي طلعت في وقت غضب بدون قصد ,, بس شلون اطلعها من فمي ونور ما تستاهل اللي يزعلها ,,
ماجد وهو يحرك يدينه بعجز في الهواء : نور انا ماقصدي اسمحي لي انا كنت ابي .. قطع عليه صوتها وهي تقول : حصل خير عن اذنك ابي اصلي ,, تركته في مكانه ودخلت تتوضا ,, واول ما سكرت الباب قعدت تشاهق وهي تسكر فمها عشان ما يسمعها ,, مستحيل تبين له ضعفها ,,
هذا من اولها يقول لي كذا معقوله ما يقدر يتحكم في ملافظه ,, اجل لو بكره يصير شي اكبر من كذا وش بيقول لي ,,
قعد ماجد على الكنبه ينتظرها لحد ما تتطلع لكنها تجاوزت نص ساعه ما طلعت فما بغى يسكر عليها بوجوده وخذ حاله ومشى ,,
لما حست انه صار مو في الغرفه ,, طلعت وخذت لها ملابس ,, تبي تريح جسمها من الهموم اللي فيه ,, اتصلت على جودي ووصتها ترتب للمجلس كل شي هي ما راح تقدر تنزل ,,
طلعت لها قميص قطن بنص كم وردي باهت ,, دخلت وخذت شاور ,, اول ما خلصت صلت وبعدها دخلت في فراشها تبي تريح مخها شوي من التفكير ,, للحين الساعه 9 ومستحيل يدخل قبل 12 ,, يميدها ترتاح شوي ,, غمضت عينها وهي مسترخيه على مخدتها ,,
عجزت تقوم تسكر النور فتحت عينها في السقف وخذت نفس رفعت يديها اليسار على مخدتها وهي ترفع غرتها من جبهتها وتحاول تغمض ,, شافت الباب ينفتح وماجد يدخل بهدوء ,, ما بغت ترفع جسمها وتقوم طالعته بعيونها ,, ورجعت تراقب السقف عشان ما تشوفه ,, قرب جنبها على السرير وقعد على حرفه وهو يمسح يدها اليمين من بطن اليد ويرتفع شوي بحركات دائريه لحد نهاية الذراع وهو يكتب على يدينها احبك ويرجع يكتبها احبك وكل مره يوقف عند حرف الكاف يرجع يكتب احبك وهو عينه عليها ,, شاف دموعها تنزل على خدها فمسحها بيدينه ورجع يكتب على يديها وهو يتكلم بصوت مرتفع احبك وكتبها ثاني وحكى بها احبك احبك احبك ,,, فتحت نور يدينها له وضمها بقوووه لصدرها وهو يهمس لها احبك يا حبيبتي ,,, ساااامحيني وربي ما قصدت اي كلمه ,, ارجوووك والله ما قصدت شي طلبتك تسامحيني ,,, انتي تاج رااسي يا اميرة قلبي ,, يا دنيتي ,,,
حس ماجد بتانيب الضمير عدل لانها ولا مره توانت عن اخلاصها له سواء بالكلام والا بالفعل معه ومع اهله ,,
مسح دموعها بيديه وحب خشمها بحركه مؤثره وهو يقول لها يا رووح ماجد ,, قام بيسكر النور وهي تقول وربعك في المجلس ,,
ماجد وهو يلوح بغترته على الكنبه : اليوم قلت لهم اعذروني بيكون لنور قلبي فقط ,, ضحكت له وهي تمسح دمعتها وهي تقول له فديتك ,,,,
طلعت فهده من كم يوم وهي جالسه في المجلس مع ابوها وعاليه ,, سالها ابوها ,,
الوليد : متى سافر سعد يا عمري
فهده : البارح يبا ,, بيجيب اهله وبيرجع ما راح يتاخر كلها كم يوم ,,
عاليه : طيب متى اتفقتوا على الزواج ترى مصختوها انتي واياه نبي نفرح بكم قبل يكبر بطني ,,
الوليد وهو يضحك : لهم الشرف انك تحضرين بطنك صغير والا كبير يأم خالد ,,
عاليه وهي محرجه من الوليد : خلاص بتسميه خالد ,,
فهده : يا سلاااااااااام لو تجبين ولد ونسميه خالد بن الوليد ,, شي شي ,,
الوليد : الله يتمم عليك يا ربي اهم شي تقومين بالسلامه ,,
شافت فهده الجوال ,, وحصلت مسج من سعد (( اذا صرتي بالحالك ابي اسمع صوتك ))
استئذنت منهم فهده تبي تروح غرفتها ,, ولما خلى الجوو لوليد ,, جاء يم عاليه وهو يمسح على بطنها وهو يقول : تدرين يا حبي لو تحسين بالسعاده اللي في قلبي انك تفرحين ,, ماهقيت اني في يوم بتزوج والا بيجيني عيال ,, وطالع على صورة زوجته اللي في المجلس الخاص ,,, صحيح انها حبي الاول وام فهده ,, لكنك رفيقة دربي وحبي اللي انولد من جديد ,, عاليه انا ابيك تكونين اكبر من كل الامور ,, ابيك تكونين امنا كلنا ,, ادري ان تجربة زواجك الاول خلتك اكبر من عمرك ,, لكنك بتظلين قلبي الصغير ,, عاليه انا محتاجك معي على طوول ,,
حست عاليه بكل حرف طلع من الوليد ,, من تزوجته وهو يشيلها على كفوف الراااحه ,, وش تبي اكثر من كذااا ,, وعدت الوليد انها بتكون الوفيه ,, وربي يقدرها على سعادته ,,
دخلت فهده غرفته وهي متشوقه تسمع صوت سعد ,, مرضها قربها من سعد الفتره اللي راحت فزارها في المستشفى مرتين ,, واتصل عليها كل يوم لحد ما رجع يجيب امه وخواته ,,بس للحين مضايقها انهم ما فتحوا الموضوع اللي سبب المشكله ,,
ما تدري ليه ياجلون الحكي فيه ,,
اتصلت عليه وصلها صوته وهو يرحب فيها بشووق ,,
سعد : شكلي اول ما ارجع بحجز للزواج وش رايك ,,
فهده : يبي لي شهر على الاقل اتجهز ,,
سعد : شهر كااامل ربي يصبرني بس ,, طيب لازم حفله وش رايك نحجز ونسافر ,,
فهده : من جدك وش تبي العالم يقولون ,,
سعد : خليهم يحكون ,, اهم شي انك معي وبس ,, جاء سعد خط في الجوال ,, ولما شاف المتصل ندى ,, ما رد عليها , ,
وكمل كلامه مع فهده ,, لكن اخته العنود اللي دخلت عليه فجأه وهو يكلم حكت بصوت تبيه يسمعها : ندى تقول كلمها ضروري ,,
سكتت فهده وهي تبي تفسير للي صار ,,
سعد : اجل شهر شهر وهو ناوي يمشي الموضوع ,, عشان ما يصير بينهم تتش جديد ,,
فهده : ومين تطلع ندى ,, حبيبه رقم كم 4 والا 5 بس صوت سعد كان اقوى من اي شي ,,
سعد : انتي لازم تفهمين ,, اني مالي الا حبيبه وحده ,, اذا انتي مصدقه ذا الشي الحمدلله ,, واذا انتي مو مصدقه رااجع لك ,,
فهده وهي تدخل دوامة الشك ثاني : يعني تبي تفهمني ان لك صديقات عادي تكلمهم بس ما تحبهم والا شلوون ,,
سعد : فهده انا لي مااااضي ونسيته ,, وهما ما تركوني لحالي ,, اذا انتي بتتخلين عني وانا شاريك وبايعهم ,, فبراحتك ,, لكن اللي ااكد لك
انهم على الرخص اللي شافوا مني مازالوا يلاحقوني فاااهمه وش يعني ,,
ما جاوبته فهده لانه شكله يساومني ,, فأعتذرت منه انها تعبانه ودها تنام ,, سكرت الجووال وهي الشك يلعب في قلبها ,, وشافت محد راح يساعدها الا الجازي ,,,,
*******
15-05-09, 08:41 AM
جديد مواضيع قسم القصص المكتمله
العرض العادي
