(( الجزء الثامن ))
بعد يومين المستشفى بالليل تجمعوا البنات عند نور باستثناء عاليه ,,اللي ما تقدر تطلع في الظروف ذي ,,
الجازي وفهده يحاولون يتكلمون مع نور ,, صار لها يومين ما نطقت بكلمه وحده ,,
الموضوع سبب لها صدمه نفسيه ما توقعتها انها تقع تحت ظرف مثل كذا ,, ولا قد جاء في بالها ان نفسيتها تهتز ,,
بس الحب تغلغل في ثنايا رووحها وما تقدر تغير شعورها بين يوم وليله ,, كل ما تذكرت ماجد نزلت دموعها ,, حاولوا البنات يطلعونها من الجو الكئيب ويسولفون عن الجامعه واخبار البنات ,, ما سكتت فهده لانها حاسه بنور ,,
مسحت الجازي بيدها على شعر نور ورفعت غرتها لفوق
الجازي : تبين موويه
هزت نور راسها بالرفض ,, وكملوا كلامهم وشوي جتها حاله بكاء شديده وخذت نفس وهي تصيح ضمتها فهده
فهده : نوور اذكري الله مو زين كذاااا ,,
قعدت نور تصيح على كتف فهده وهي تكتم صياحها وانينها يظهر بين فتره واخرى ,, قعدت الجازي على الكرسي وهي تصيح على نور ,, وما قدرت تقاوم دموعها ,, قامت ودخلت الحمام وغسلت وجهها ,, وجت بتظهر رجعت تصيح ثاني ,,
اللي ما اقدر احدده عمي ليه ما قال لنور ان ماجد خطب وشاف رايها ,,
رجعت وقالت لها فهده ان جوالها يرن ,, ردت المكالمه كان نواف ,,
سالها اذا مازالت عند نور بيمر عليهم ,, لما عرف انه فهده بتطلع ,, قرر انه يجيهم ,,
****
نواف كان قاعد مع سعد في المجلس ويتابعون المباراه ,,
نواف : خلاص يا سعدا انا بطلع للمستشفى اخذ الجازي واشوف نور وش صار معها ,,
سعد : الله يشفيها ,, طيب خلك شوي ,,
نواف : شوي بس لين تروح صديقتهم فهده
سعد وقلبه يفز : عندهم
نواف : بكذب عليك ,,, كمل سعد شرحه لسفرتهم للعمره واتفقوا بكره يطلعون للمطار الظهر ,,
طلع نواف للمستشفى وبعده بدقايق ,, خذ سعد سيارة المقاضي حقت البيت وطلع فيها للمستشفى ,,
قعد يدور في الباركنج يشوف السيارات حاول يدور سيارتها بس ماحصلها ,, اكيد ما راح تجيب سيارتها الفخمه هنااا يمكن سياره ثانيه
لف ثاني يبي يحصل سياره فخمه موجوده بس ما كان فيه الا بي ام ابيض فيه رجال سعودي ,, لا لا ما اظن ,,
خذ رابع لفه ,,الا يشوف مايبخ تدخل لحد ما تقرب من بوابة المستشفى ,, دق قلبه اكيد ذي سيارتها ,,
ركز عينه على مدخل المستشفى ,, شاف وحده تشبه لطولها ومعها شغاله ,, كانت حاطه طرحتها على وجهها ,, ركبت السياره ,, وتحركت ومشى وراهم ,, كان حاط شماغه بشكل لطمه عشان محد يفطن له ,, وطلع ورى سيارة فهده ,,
شعوره انه يمشي ورى سيارتها حسسه انه قريب منها ,, جاه خوف لاتكون مو هي ,, بس لاااا اكيد هي ,, بس بشوف وين بتروح ,,
اول ما دخلت سيارتها الحي اللي يجمعهم مع بعض ,, تطمن انها هي ميه في الميه ,, بس عشان يتاكد اكثر ,, وصلها لحد باب القصر وعيونها تتبع سيارتها ,,
عرف قصرهم ,,وتنهد بقوه لما استرجع شكلها مره ثانيه ,,
*****
دخل نواف غرفة نور بعد ما انتظر في الاسترااحه شوي لحد ما تطلع فهده ,, اول ما طاحت عينه على نور ,, تأثر ,, لا يكون فيه شي مسويته ومخبيه عليهم ,, مو طبيعيه نور ما قد صار لها كذا ,,ما جا على باله ابد انه عشان الخطبه ,, لان ابوه كم مره يرد ناس ,, خاف لا يكون نور مسويه شي مو زين ,, صاير شكاك وهالشي متعبه حيييل ,, يبي يكون طبيعي بس ما قدر ,,
لف شاف الجازي قاعده بهدوء وجهها احمر كنها صايحه تنرفز منهم
نواف : صاير شي وشفيكم كذاا
الجازي : ما به شي بس مرهقه شوي من الصبح هنااا,, حاولت تجيب عذر لها ,,
نواف : كيفك نواري احسن الحين ,, هزت راسها بايه وما ردت عليه ,,
ما بقى يضغط عليها ,,
نواف : يالله مشينا ,, تحرك يبي يطلع وقعد ينتظر الجازي عند باب الغرفه ,,
وصت الجازي الشغاله تدق عليها لو صار اي شي وحبت نور على خدها :
تبين شي يا قلبي اجيبه بكره ,,
نور وهي تهز راسها بلا ,,,
****
ابو نواف جالس في جناحه ويتابع الاخبار ,, جته ام نواف وهي تحاول ما تبين قلقها ,,,
ام نواف : صار لها يومين في المستشفى متى بتطلع ,,
ابو نواف : خليها ترتاح كلها يومين ,,
ام نواف : يومين كامله ,, هي ما فيها شي تلاقيه قل تغذيه من داومت في الجامعه وهي ما تتغذى زين
ابو نواف : اتمنى انه كذا مو شي ثاني ,, بوديها لندن اسوي لها فحص شامل
ام نواف : لندن وشو له من زينهم ,, بعدين الدكاتره السعوديين كفاءه لا لندن ولا غيره,, قال لندن وش فيها زود ,,,,
****
رجع ماجد للرياض بعد ما قضى يومين على البحر في الشرقيه ,, رضخ لواقعه ولازم يتاقلم عليه ,, طرت عليه طواري كثيير منها انه يكلمها ,, بس ما خلته شيمته يقويها على اهلها ,, منها بنفسها تعارض اهلها بكيفها اما اني اقويها على اهلها ما بغيت اكون نذل بصراحه,,
قعد في المجلس مع الشباب ,,وانشغل معهم ,, ما انتبه لمسج جاه من عاليه ,, (( اذا فاضي كلمني ))
ما باقي الا اثنين من ربعه شافه المسج واتصل عليها
ماجد : وش عندك ,, ما شفته الا الحين
عاليه : تأخرت كثيير ,, خلاص
ماجد : تبين شي ,,
عاليه : كنت بروح مع الجازي للمستشفى
ماجد : ليش ,, عسى ما شر !!
عاليه : نور ,, تعبانه شوي ,,شفتك ما رديت خلاص راحت جزووي ,,
سكر ماجد بعد ما خلصت عاليه جملتها ,,استاذن الشباب ورااااح جووه ,,وعلى طول فوق لغرفة عاليه
فتح الباب وعاليه ترتب ملفها للجامعه ,,
ماجد : وشفيها ,,
ما بغت عاليه تجيب اي عذر عشان ما تزيد هم ماجد ,,
عاليه : مدري ياخوي وش السالفه ,, قالوا البنات انها تعبت وفي المستشفى صار لها يومين ,,
مااجد : يومين لااا ليه ليه ما رحتي لها ,,
عاليه : من جدك مااجد ,, يعني رادينك واروح لها على طول ,, مو حلوووه
مااجد : عاليه : لا تخلطين الأمور ,, هاذي صديقتك ,, انا خليني على جنب , يهمني تروحين وتطمنين عليها ,,
بكره بوديك ان شالله ,,
*****
دخلت غرفتي,, وانا ضايق من اللي سمعته ,, وش صار عليها ,, معقوله عشاني ,, يا رب استر عليها وقومها بالسلاامه ,,
تذكرت لما شفتها بالمكتب وهي لاهيه تقرا ملفي ,, ااااه اشهد انها راااقيه ,, طريقتها ,, لبسها ,, راضي بحكم ربي وما كتب لي لكن ما اتخيل نفسي عايش مع احد غيرها ,, مستحيل انساها ,, خذ كتابه اللي يحب يقرا فيه ,, وفتحه وطلع ورده بيضاء جوريه احتفظ بها من باقة الورد اللي ارسلتها له ,, خذ نفس عميق وجاه عبيرها المتبقي فيها ,, سكر الكتاب ورجع لربعه وهو شايل حمل على ظهره ,,,
*****
دخلت الجازي ونواف الملحق ,, من دخلت نور المستشفى ,, توترت الاوضاع في القصر والكل حابس الانفاس لا يكون فيها شي ,,
نواف ,, ما تعمق في الوضع فكر انه قل تغذيه وجاها ضعف ,, بس الجازي حاسه ان نور ما راح تطلع من الحاله النفسيه اللي فيها بسهولة ,,
نواف : وش فيك كذا مو على بعضك ,,
الجازي : لااا مافي شي بس افكر في نور ,, خايفه عليها ,,
نواف : ليه وش فيها يعني ,, انت تعرفين شي ولا تبين تقولينه ,,
الجازي : لاااا لااا انا اقصد اكيد تحس بشي وحنا ما ندري يمكن ما عرفوا المستشفى وش فيها ,, حاولت اضيع في السالفه شوي لانه شكله خااايف بعد ,, بس ما يبي يبين لي ,,
نواف : اللي اشوفه انك متوتره مرره وتخبين شي علي
الجازي : من جدك وش بخبي عليك يعني ,,
نواف : طيب دامه كذاا خلاص امشي ننام الوقت تأخر ,, مشيت انا وهي وفي بالي شي ,, ودي اشوف جوالها يمكن نور ارسلت لها شي ,, دخلنا غرفتي ,, وقلت لها تتجهز لي ,,ابي اشوفها بفستان سهره ,,
دخلت غرفتها ,, بعد ما رمت عبايتها وشنطتها على الكنبه ,, اول ما تطمنت انها بعيد عني ,, خذت شنطتها وطلعت الجوال ,,
بحثت في الرسائل الوارده ,, شفت كلمتين من نور كلميني حياه او موت ,, انقبض قلبي لما شفت تاريخها ,, في نفس الليله اللي طاحت فيها نور , يا رب سترك لا يكون نور مسويه شي غلط ,, حاولت ادور ثاني بس ما لقيت شي ,, رجعت الجوال في الشنطه لفت انتباهي علبة دوا,, فاضيه ما فيها حبوب ,, قلبت في نشرتها ابي اعرف وش سالفتها ,,انصدمت بقوووه ,, حسيت نار تشب في عيوني ,, نور من هنااا وهي من هناااا ,,,
دخلت غرفتها لقيتها تحط رووج ,, من قوو اللي في نفسي ما انتبهت لشكلها وشو ,, صرخت فيها وانا ماسك العلبه
نواف : وش ذي ,,
الجازي وهي تحط عينها في يده وتشوف العلبه : ليش تفتش شنطتي ,,
نواف : اقوووولك وش ذي ؟؟؟
الجازي : مانع
نواف : يعني ما تعني لك شي الايام اللي راحت ,, ,, ما هميتك وقاعده تعبين حبوب ,, ليه ما قلتي لي ,, وش رادك تقولين ما ابي عيال منك وفكني ,, وش رادك تكلمي ,,
ما قدرت ارد عليه ,, خايفه يعرف بسالفة الحبوب بس ما ظنيت يكشفني ,, قلت شهرين ثلاثه لحد ما اتأكد انه يبيني ويحبني لنفسي مو عشان عيال ,, جيت بطلع كلمه تعبر عن كل اللي في نفسي ,, بس مثل كل مره اذا وقفت عنده تختنق الكلمات ,, حضوره يطغى علي ولا اقدر اتكلم ,, حسيت بحشرجه وانا ابي اعتذر منه
الجازي : انا كنت ابي اا
نواف : لا تقولين شي مو مهم اعرف ,,, ورمى العلبه ومشى ,,,
طالعت مكانه وطالعت نفسي ,, شعور مبهم ,, اكيد زعلان ,, ما قدرت امسك نفسي واقعد كذا مشيت وراه ,, طقيت الباب ودخلت لكنه مسكر ,,, رجعت اطق ثاني
الجازي : نواف ,, نواف ,, ممكن بس شوي
ما رد علي ,, رجعت طقيت كم مره بس ما جاوبني ,, رجعت ومسحت المكياج ,, ولبست بيجاما ,, ورفعت شعري ,, وانا مثل المكينه اسوي كل شي بدون شعور ,, ما صرخ فيني ,, ولا عصب ,, بس ليه ما سمعني وعرف موقفي ,, شغلت مخي شوي ,, وش اسوي بس عشان ارضيه ,, جوالي في غرفته ما عندي شي ادق عليه ,, بغيت ارسله مسج لكن خساره ,,
رحت لتليفون البيت ,, دقيت عليه مره ومرتين ما شال الجوال ,, تحطمت هنااا ,, ليه كذا ,,
خذت لي كرسي صغير وفتحت باب غرفتي وقعدت فيه ,, بقعد لحد ما يفتح بابه ,, مرت ساعه وساعتين وثلاث وانا في نفس الوضع
حسيت بالعجز واذان الفجر ما بقى عليه الا شوي ,,
غفيت وانا قاعده ,, وجعتني رقبتي ,, بغيت اقوم بس ماهان علي ,, بنتظر لحد ما يفتح ,,
شوي سمعت صوت حركه فأستعدلت في قعدتي ,, شويه الا هو طالع من الغرفه وقفت وهو يقول
نواف : ليش قاعده هناا
الجازي : نواف شوف والله مو قصدي اناا
نواف : كل اللي بتقولينه ما ابي اعرفه كلش فاهمه ,, ما قصرتي من عرفتك وانتي تاخذين بس ,, ومشى للمسجد ونظرات ااحتقار واضحه من عيونه
لحقته في الممر وانا اكمل : طيب انت استنى اسمع وش ابي اقول نواف اصبر شوي
رجع راسه لورى وطالعني : انا الغلطان اللي فكرت فيك كزوجه ,, ومو ااول مره تسوين الحركه ذي ,,
مشى للمسجد وخيبة الامل فيني واااضحه ,, كان ودي يصرخ ويطلع زعله اللي داخل والا انه كذا حتى ما عبرني وما يبي يسمع مني ,,
ليه طيب ما يفهم وش اللي في نفسي ,, ومو اول مره تسوينها ,, لخبط الدنيا ,,
دخلت وتوضيت ,, وخذيت شرشف الصلاة وفرشت سجادتي ,, وقفت بين يدي ربي وطلبته ,, انه يسعدني مع نواف ويألف ما بيننا ,,
استغربت اني الصياحه ما نزلت مني دموع هل هو عشان عارفه اني اخطيت في حقه ,,
رحت انتظره في المجلس لحد ما جاء من المسجد , مدري ليه جاني احساس انه مانام مثلي قاعد يفكر في اللي صار
اول مادخل ,, رحت جنبه وقفت مقابله ,, بغى يكمل طريقه سكرت عليه ومديت يدي لرقبته ابي اضمه,, ابي اراضيه ,, ابي يعرف وش اللي في نفسي ,, تعلقت في رقبته وجيت بحكي الا هو يقول
نواف : النفس طابت مرره ,, ونزل يدي وعيوني مفتوحه على الاخر
الجازي: انت ليه مو راضي تسمع لي ,, حرام كذا عطني فرصه ,, لكن خطواته في الرخام بثقل هي اللي بقى صداها في سمعي ,,
انهارت مقاومتي هنا ومادريت اني بنفسي جنيت عليها ,, عطاني فرصه وبغبائي ضيعتها ,, مشيت بهدوء لغرفتي وانا متحطمه من اسلوبه معي ,, رميت نفسي وبكيت لحد ما جفت دموعي ,, وعرفت انه مستحيل يرضى علي الا بمعجزه ,,
حسيت اني تايهه في وسط صحراء ومالي احد يساعدني ولا يدلني طريقي ,, حسيت بالوحده كني مقطوعه من شجره,,
اكتشفت اني حبيته ,, ومستعده اني اسوي اللي يبي بس يرضى والله مو قصدي ,,لكن كلامه معي بين لي انه ,, طابت نفسه مني ,,,
*****
دخلت المستشفى وانا ودي عندي طاقية الاخفاء واشوفها ,, ودي اتطمن انها بخير ,, دخلت عاليه عندها وانا جلست في الانتظار ,, رحت بعد فتره ,, لمحل الورد وخذت لها ورود نفس اللي ارسلتها لي ,, كلها باللون الابيض ,, وحصلت كرت فيه قلبين تعمدت اني اختاره وكتبت عليه الحمدلله على السلامه ,, ارسلته داخل دام عاليه فيه ,,
جلست انتظر في الاستراحه ,, وانا بالي وقلبي عندها ,,,
اول ما وصلت عاليه للغرفه وشافت نور ,, انصدمت من اللي شافته ,, معقوله كم يوم تسوي فيها كذا ,, كنه ميت لها احد ,,
عيونها باين عليها الحزن ,, سلمت على نور اللي اول ما شافت عاليه جتها نوبة بكاء جديده ,, ضمتها عاليه بقووه ,,
ونور ماسكه يد عاليه وهي تبي تحكي بس ما قدرت تنطق ,, كل ماجت تظهر الكلمه تشهق فيها ,, وعاليه تهديها قدرت تقول في الاخير
نور : والله ما اعرف انه خطبني ,, ما قالوا لي يا عاليه ما قالوا لي والله ورجعت تبكي ثاني ,, حمدت عاليه ربها ان مافيه احد عندها هالوقت ,, ظلت تهديها وتصبرها : اذا له نصيب ياخذك محد يقدر يرده ,, بس هاذي الدنيا مالنا الا الصبر
رجعت تبكي بكاء يقطع القلب وهي تشوف امالها تنهار قدامها بدون سبب ,,
وصل الورد ودخلته الشغاله وحطته على الطاوله ,, واول ما شافته نور كن حد ضاربها كف ومصحيها ,, طالعت فيه وهي تدقق في تشكيلته وتطالع عاليه ,,
جابت لها الشغاله الكرت ,, اول ما قرت الحمدلله على السلامه ,, درت انه من عنده ورجعت تبكي اكثر من قبل ,,
عاليه : يا قلبي لا تسوين في عمرك كذاا ,, نور انا بسئلك وجاوبيني ,, انتي تحبين ماجد
صاحت نور بصمت وهي تصد للجهه الثانيه ما قدرت تشوف عاليه ,, محرجه منها وصياحها صار غير طبيعي بالمره ,,
عاليه : نور انا اختك وما راح حد يعرف ,, قولي لي يمكن ترتاحين ,,
نور : مين جابك هنا ,,
عاليه : هااا ماجد ,,,
مسكت نور يد عاليه وهي تضغط عليها ,, وطاحت عين عاليه على السلسال اللي في يدها ,, اول ما شافت الحرفين والقلب تأكدت انها تحب ماجد ولو ماحكت ,, بس من متى هذا يمكن تعرفه بعدين لان نور ماعندها استعداد نفسي انها تحكي ,,,
*****
ماظنت اني غبي كذا تلعب بي الجازي بسهوله ,, وانا مرره واثق فيها انها وافقت برضاها تحمل ,, اثاريها تلعب ,, ماااانع ,, ليه كذا ,, حظي مايل مع الحريم ,, كلهم كذابات وخاينات ,, وش اسوي بها هالحين ,, لا تفكر اني بسهوله برضى عليها وتجيب راسي ,,
ما اكون نواف اذا ما ربيتك يا ......,,, خذ نواف شنطته وحط فيها كم لبسه ,, وطلع عشان يوافي سعد في المطار ,,
اول ما طلع للمجلس لقى الجازي قاعده تنتظره ,, قربت عنده لحد ما بقى بينهم مسافه بسيطه ,,
الجازي : مساء الخير يا عمري
نواف : انا طالع للعمره ,, يومين وراجع ,, وعقبها يصير خير ,,,
الجازي : نواف ,, والله مو قصدي شي انت لازم تعرف .....
نواف : ترى كلامك ذا يعتبر مقزز فا وفريه لنفسك فاهمه ,,
طلع من البيت وركب سيارته ومشى ولا التفت فيها مرره ,,,
****
اول ما ركبت عاليه السياره ,, سألها ماجد بحياء
ماجد : وشلونها عسى احسن هالحين ,,
نور : بصراحه يعني حالتها تقطع القلب ,, خفف السواقه شوي وهو يسأل
ماجد : قالت لك شي ,, قالوا عنها شي ,,
عاليه : تقول انها ما تدري انك خطبتها ,, البنت منصدمه مرره ,, اللي انا ودي اعرفه ,, انت كيف عرفت نور ,,
ماجد : كيف يعني وشقصدك
عاليه : ماااجد انا مو بزر انتوا بينكم شي مليون في الميه ,, والا ليه ترسل لها ورد
ماجد : اي ورد
عاليه : ماااجد لا تلف وتدور ,, ترى انا مو غريبه انا اختك عاليه ,, انت تحب نور وهي تحبك ,, بس من متى وانا مدري ,, وشلون مدري وانا معك ومعها ,,
ماجد : لا تكبرين الموضوع شفتها في السفر مع ابوها مره وعجبتني ,, وحبيت اناسبه ,, ما بيننا اي شي ,,
ماجد وهو يكمل بغباء : وش سالفة الورد ذا
عاليه : وانا عندها جانا ورد ومكتوب عليه الحمدلله على السلامه واول ما شافته ماتت صياح ,, وشفنا الكرت ,, حسيت انه من عندك
لا وفي يدها سلسال بحرفك ,, لا يكون من وراي عطيتاه ,,,
ماجد : لا تخيلين اشياء يا عمري ,, اللي صار هو اللي قلته لا اعرف عن ورد ولا غيره ,,
مدري كيف وصلت البيت وانا ماسك نفسي ,,ما ابي عاليه تشوفني نزلتها عند الباب ,, ومشيت وانا في راسي فكره ,, ماهانت علي دموعها وانا ادري انها عشاني واللي خلق بسمتها ذاك اليوم ,, وقفت على جنب ودقيت رقم المستشفى وطلبت غرفتها
ردت علي الشغاله وسالت عنها
نور بصوت هادي : الوو
مااجد : الووو
نور : مين ,,
ماجد : ماجد ,, ما سمعت الا صياحها ,, تقطع قلبي عليها : ابيك تسمحين لي اني دقيت ,, بس ابي اقولك شي وااحد
انا مستعد انتظرك عمري كله ,, لا تتكدرين واهتمي في نفسك ,,
سكرت السماعه ما سمعت ردها وما بغيت ازودها ,, ابيها تعرف اني مستعد انتظرها ,, ابيها تطمن اني راح ابقى عند وعدي لها بخطبها ثاني وثالث ,, المهم تكون لي ,,,
******
حسيت ان في شي احيا قلبي ,, عطاني امل ,, معقوله فيه رجال كذا ,, لو غيره كان ما رجع ثاني ,, وش كثر ادبه ذا الانسان ,,
ما انتظر يسمعني ,, اكيد خايف علي ,, هذا حتى ما قال بكلمك ,, ياناس غييير ,, ليه ما يبون اتزوجه ,, ماجد رجااال ,,
الله لا يحرمني منه ,, مسكت حرفه وبسته ,, وانا في قلبي كلام كثيييير بس من يسمعني ,,
دخل علي ابوي ,, وهو يشد على يدي
ابو نواف : هااا للحين بنتي حبيبتي تدلع علي ,,
نور وهي تهز راسها بلا ,,,
ابو نواف : نور انتي صار لك كم يوم ما تكلمتي ,, حيبيتي ترى حالتك اقلقتني ,, فيك شي ,, حاسه بشي ,, بوديك برى نكشف ,,
نور وهي تشوف ابوها ودموعها تنزل على خدودها بصمت
ابو نواف : انتي فهميني فيه شي قاصر عليك ,,
ما سمع اي كلمه ,, تبين نسافر شوي ,, تبين تغيرين جووو ,, ما يصير عاد قولي وش ناقصك
نور : مافيني شي بس حاسه بتعب في نفسي وضغط دراستي ,,,
ابو نواف : اكييييييييد ,, قلبي يقول انك تصرفيني ,, ابي نور بنتي تقول لي وش في قلبها
قعدت نور تتعبر وما قدرت تحكي ,, لاول مره في حياتها تحس بالضعف ,, كله بسبب القلب ذاا ,, تمنت ان عندها القدره تقول لأبوها اللي في قلبها ,, لكن مستحيل ,, ممكن تقوله كل شي الا هذا ,,
******
طلعت نور من المستشفى ,, واعتذرت عن الجامعه هالترم بعد مازعلت منها امها ,, اما الجازي فصارت مثل الورقه اللي في مهب الريح
تركها نواف بدون ما يحدد موقفه منها ,, وشكله متحلف فيها ,, فهده الجندي المجهول ,, والداعم النفسي لصديقاتها ,, حست بالظروف
تعيسه للجميع وخصوصا بعد ما صارحتها الجازي واستنجدت بها تشور عليها ,, فتريثت تخطب عاليه لابوها ,,
ماجد طلع البر مع ربعه ,, وقت المقانيص والطيور ,, هروبا من امه والحاحها انها تخطب اخت نوف زوجة اخوه مشاري ,,
*****
صار لي شهر من عرف بالسالفه ما كلمني ,, هنت عليه لابعد درجه ماكنت اتخيلها انها بتوصل كذا ,, ما اتذكر متى اخر مره تكلمنا مع بعض كلمه وحده ,, صاير يشوفني انا والجدار وواحد ,, ما قصرت في اي شي ,, كاشخه طول الوقت مهتمه في نفسي في مكاني ,, في فصولي ,, من قومته للمدرسه لحد نومته بالليل ,, واشوف نظرات امي عتيقه تلاحقني من مكان الى مكان ,, حتى اذا ارسلت السواق ابي شغله معينه ,, اشوفها تسئل وراي ,, عرفت وسكت ,, ما بغيت افتح مواضيع ثانيه ,, كفايه موضوع وما تسكر للحين ,, استغربت تأخير الدوره ,, مستحيل اكون حامل ,, ما حسيت بدوخه ولا شي ,, وصيت فهده تجيب لي فحص ,, وما صدقت عيوني وانا اشوف النتيجه
حاااااااامل ,, مو معقول ,, ناديت فهده تشوف معي يمكن عيوني تكذب ,, صرخت فيني
فهده : واااااااااااو جزووووي حامل ما اصدق ,, دايما اتذكر فرحتها لأنها الوحيده اللي عرفت ,, ومستحيل اقول حق حد لحد ما اتأكد مره ثانيه ,, معقوله المانع ماجاب فايده ,, انا فوته كم مره بس خصوصا اول الايام ,,
جاني من يومين وانا وفصولي ندرس للامتحانات ,, من دخلت ذي الفتره وانا احس بضغط واعصابي تلفانه ,, ابي فيصل يجيب من الاوائل ,, صرت ما اشوف احد وخليت البيت ورشة عمليات ,, اوراق محذفه واقلام وكل مكان فيه دفاتر نكتب فيها ,,
تعلق فيني فيصل لدرجة ما يبي يقعد في القصر ,, وحطيت له سرير فردي في غرفتي على جنب ,, حاولت عتيقه تثنيني بس رفضت ,, فصارت تجي من الصباح ولا تروح الا المساء ,, ومو عشان فيصل بس حسيت انه طلب منها تراقبني في الطلعه والدخله مع انها نادره ,,,
اول ما دخل علينا ,, سال فيصل : وش سويت في الامتحان يا بطل ,,
فصولي : كويس بجيب الاول لان امي تدرسني كل يوم ,,
طالعني بنظره جامده ,, صرت نادر اني اشوفه لانه صار يهرب من البيت ,, وكم مره تقول الشغاله انه ينام في القصر ,, بعد رما رجع من العمره كنت لابسه وكاشخه ,, فشلني وقال ما ابيك تكونين في غرفتي ,, عيني عينك كذا ما استحى يجرحني ,, هنااا بس سحبت نفسي بالمره ,, ما قصرت وانا اعتذر لكنه قلبه قاسي علي مرره ,,
حسيت بنظرته تدمرني ,, فيها شي ماعرفته كلام جااامد ,,
نواف : ابيك تسمع الكلام زين يا فصول ,, اي شي تطلبه امك عتيقه تنفذه طيب ,, انا بسافر بكره ومدري متى برجع ,, يمكن اطول ,,
طاح مني الدفتر ,, يسافر,, وين وليه ,, وانا ليه يتجاهلني كذاا ,, مو انسانه احس ,, حتى لو زعلان ما يبي يحكي معي ,, على الاقل يقول انا بسافر كذا وكذا ,, يكلم له بزر ويعلمه وانا ولا كني موجوده ليه ,,
مسكتت نفسي ,, بكيفه ,, دامه ما عطاني خبر ما راح اتلقف ,, خلني ساكته ابرك لي ,, االتهيت في دفتر فيصل احاول اطلع جمل الاملاء عشان ينسخها ,, ماخلتني الضبابه اللي في عيوني اشوف ,, بس ما رفعت راسي ما ابي انكشف ,, سمعت صوته وهو ينادي امي عتيقه والشغالات يجونه في الغرفه ,,
حاولت امسح دموعي ,, وانا اكمل الاملاء لفيصل ,, واشوف حركة الشغالات ,, يجيبون شنط مو قليل خمس شنط ,, واشوفهم يجيبون البدل ,, شكله بيسافر برى ,, بس ليه خمس ,, شكله مطول ,,
من صدمتي في الحركه اللي سواها ,, انطفت رغبتي بمعرفة وين بيروح ,, الله يسامحك يانواف ليه تسوي كذاااا ,,,
****
بعد ما رجع ماجد من المقناص ,, حاولت امي فيه ياخذ رغد بنت خالتي واخت نوف ,, توها مخلصه الثانويه ,, في سنه اولى للحين ,, شكلها مو راعية مدرسه ,, بس حلوووه ومن البنات اللي اكبر من عمرهم شكلا ,, طول وقتها في نفسها مكياج وموضه وطلعات مع صديقاتها ,, قلت لأمي انها ما تنفع له ,, ماجد يبي مرره تقوم بكل شي مو بس زين وخلاص ,,
تفاجأت بالموضوع اللي كلمتني فيه فهده ,, معقوووول تبيني لابوها ,, صدقت اني باخذه كنت امزح ,, لا وشدعوا اخذه ,, صحيح مو مبين عليه الكبر ,, بس انا وين وهو ين كم سنه بيشيب وانا في عز شبابي ,,
عطتني فرصه اني افكر ,, عشان يخطبون رسمي ,, شاورت امي اللي ما قصرت اقنعتني اخذه ,, انتي مطلقه وماتدرين يمكن احسن لك من الف شاب غيره ,, بعدين لسى شباب ,, مو شيبه ,, والمستقبل بيد الله سبحانه ,, حنت علي لين وافقت ,, والجازي بعد ما قصرت ,, قالت لي احمدي ربك ,, رجال سنع وكل المواصفات فيه وشتبين بعد ,, كل يوم تزين الفكره اكثر واكثر ,, لحد ماوافقت ,,
ما ظنيت ان فهده راح تكون فرحانه كذااا ,, الا طايره فيني ,, رفضت انه يكون زواج كبير واصريت انه يكون عائلي وفي البيت ,,
واتفقوا انه يكون بعد اسبوعين ,,,
******
بالرغم كل اللي صار ,, خيالها مافارقني ,, اشتقت اسمع صوتها ,, اشتقت اشيلها بين يدي ,, اشتقت امسك شعرها اللي يطيح بين يديني ,,
لكن اللي سوته فيني ,, جرحني في الصميم ,,لو صارحتني انها ماتبي ,, افضل من انها تستغبيني ,, لا وقدمت لها مشاعري على طبق من ذهب ,, وفي الاخير تلعب بي ,, حلفت اني اربيها ,, بخليها لا معلقه ولا مطلقه ,, لين تدري بخطاها ,,
ماقصرت امي عتيقه ,, تكلمني كل يوم من جيت المانيا ,, تشرح لي وش صار على فيصل ,, وتحاول تحنن قلبي عليها , لكن قلبي حسيته قاسي ,, حسيته حجر ,, مشاعري غريبه ,, ودي أدبها بس اشتاق لها ,, وفي نفس الوقت ما ابي اسمع صوتها ولا اكلمها تناقض في قلبي ,, بغيت اهرب منه وانهمكت في شغلي ,, ماصدقت يعرضون علينا الشركه الالمانيه شراكتهم ,, فحبيت اني اشتغل معهم كم شهر لحد ما ادرس الشغله زين وابتعد عنها ,, احتكاكي كل يوم بها يمكن يخليني اتصرف معها تصرف اندم عليه ,,
*******
اليوم زواج عاليه ,, اول ماقلت لامي اني بروح زواجها ,, ما شجعتني ,, لكن ما تركتها على كيفها اصريت وقالت خذي موافقة ابوك ,, بعد ما صار اللي صار معد رحت لعاليه في بيتهم ,, ماشفت انها حلوه في حقي وحقهم مع بعض ,, كلمت ابوي ابي اروح ,, لقيته في مكتبه الظهر دخلت عليه ما حس فيني ,,
نور : يبا ممكن اكلمك في موضوع ,,
ابو نواف : من اغلى عندي منك تكلمي يا عمري
نور : اليوم زواج عاليه ابي اروح لها ,,
ابو نواف : آآآهآآآ ,, ترك كتابه وقام لي ,, ومسكني من يدي ,, وخذ وجهي بين يديه وباس جبهتي ,,
ابونواف : طيب روحي باركي لها بعدين في بيت زوجها ,,
نور : يبا عاليه صديقتي وموحلووه ما احضر فرحها ,, اذا فيه سبب اني ما اروح علمني ,,
ابو نواف : اممم وش اقولك اخوها ماجد تذكرينه اللي شفناه في المانيا خطبك وما صار نصيب ,, ما اشوف انها حلوه تروحين لهم
نور : يبا ممكن اعرف ليه ما خذت رايي ,, قالت لي عاليه انك رديته ,, وما بغيت افتح معك الموضوع وانت ماكلمتني فيه ,,
بس وش السبب اللي خليك تخبي علي ,, انت مخلي خطك معي مفتوح اياب وذهاب ,, تسكره هالحين ليه يبا ,,
ابو نواف : الولد عاجبني بس مالقيت من امك تشجيع ,, بعدين كثيير اللي يخطبونك ومااقول لك لأني ما اشوف كفووو لك ,,
نور : يبا انا ابي احضر زواج عاليه ممكن ؟؟
ابو نواف : اللي تبينه يصير يا قلبي ,,
******
ارتحت اني تصارحت مع ابوي ,, ماظنيت اني يقول لي بكل بساطه الموضوع ,, لكن شكرت ربي ان ابوي متفهم ,, جاني بصيص امل ان ماجد يرجع يخطب ثاني ,, بس متى وكيف كلها في علم الغيب ,, حاولت اطلع لي فستان ناعم ,, خذيت لي فستان شيفون وله حزام دقيق ,, جبت لي مزينه تسوي شعري بتموجات كبيره ,, حطيت مكياجي بنفسي ,,
وطلعت لفهده والجازي اللي كانوا بالملحق يتجهزون ,, احس بعد التعب اللي جاني صرت بعيده عن البنات ,, وهم نفس الشي مشغولين
الجازي لاهيه مع فصول وماعندها وقت ,, تخيلتها عنده اثنين ثلاث راح تختفي في بيتها وما ندري عنها ,, استغربت ممن كم يوم لما جيتها ابي اتطمن عليها ,, سألتني عن سفر نواف وين ,, انصدمت الا ,, معقول ما قال لها ,, لكنها قالت انه صاير سوء تفاهم بسيط وبينحل ,,
اما فهده ياناس الله يسعدها هالبنت ,, ما تفتر تسأل عن الكل ,, يمكن تجي للجازي داايم ,, بس تحب الجميع ,, فرحتها بابوها اليوم غير طبيعيه ,, الناس يتنكدون ابهاتهم يتزوجون ,, وهي مبسوطه ,, مساعدها ان امها متوفيه ,,
اول ما دخلت الملحق وشفت اشكال البنات ,, صفرت لهم ,, ما توقعوا الحركه ذي مني وخصوصا اني كئيبه الفتره اللي راحت بس مصارحتي مع ابوي انعشتني ,, جازي كانت لابسه فستان ميسوني مموج باللون المشمشي له قصه عند الصدر ويجي واسع شوي
وفهده قمه قمه ,, لابسه فستان اسود من شانيل ,, مع سلاسل لولو طويله ,, راقيه ,, بشعرها بمكياجها كلها صايره تحفه ,,
ما قدرنا نكون مع عاليه في التجهيز لانها قالت لنا بيت خالتها عندهم من العصر ,, فحبينا نجي اذا خلصت على طول ,,
مشينا بسيارتي وانا اكلم ابوي ,, كان في المجلس ,, يستقبل الضيوف ,, البارح ملك على عاليه ,,, اتذكر كلامنا بعد ماعقد عليها ,,
مدري يافهده انا سويت الشي الصح والا لا ,, متردد بس اناعارفه عاليه قلبها طيوب وبتهتم في ابوي ,,
دخلنا لللفيلا ,, وفيه سيارات بسيطه متجمعه برى ,,
اول مادخلنا , لقينا حريم في المجلس وام عاليه تستقبلنا ,, اول ما شافت نور ,,اسود وجهها ,, وضاقت ,, المشكله ان نور حست بكل شي وشفت توترها عقب ,, دخلنا عند عاليه ,, وبنات خالتها عندها ,, طالعه قمر في الفستان والمكياج الراااقي اللي سوووه لها ,,
فصخنا عبايتنا ,, وقعدنا نرتب اشكالنا ,,,
******
احس قلبي للحين يرجف من شفت ام ماجد ,, شايله في قلبها علي واضح من نظرتها لي ,, ياليت سمعت كلامك يمه ولا جيت ,, تمنيت اني ما حضرت ,, عاليه فرحانه بي وبدوني ,, دخلنا ولقينا بنات خالتها ,, صايرين هم هل المكان ,,
ماقد شفنا زوجة اخوها ذي ,, يمكن مره في عرس الجازي ,, لكن اشوف ذي اللي معها ماخذه راحتها في الطلعه والدخله ,, حلوووه ,, خفت لايكون ماجد لسى هنا وتطلع بوجهه ,, اشتغلت الغيره ,,
قعدنا نعلق على شكل عاليه وحنا نضحك الا هي تقول يالله الدور عليك يانور
والجازي تقول الا عليك يانور انتي وفهده مره وحده اتذكر كذا بس
بس صدمني كلمة زوجة اخوها ,, وان شالله زواج ماجد وغاده ,, اتذكر اني شفت عيون عاليه ,, تضحك للجازي وما انتبهت لي ,,
معقوله ,, بيتزوج ,, بس هو وعدني ,, ما بغيت افرح اليوم ان ابوي صارحني اجي اغتم هالحين ,, صدق اللي قالوا يافرحة ما تمت ,,
قعدت على الكرسي وانا جسم بلا روح ,, بغيت الوقت يمر عشان اطلع ابي اطلع من هنااا ,, خلاص اختنقت ,, لاحظت الجازي ذا الشي ,, جتني وهي تقول : اضحكي مو زين كذا حد يشك ,, كلها ساعه ولا شوي ونرجع ,, حاولت ابتسم ,, بس قلبي انذبح من جووه ,,
لاول مره احس ان الزواج مثل التمثيليه ,, يجون الناس وهم لابسين ويأكلون ويرقصون وتنتهي القصه ,, بغيت اوصل للنهايه بسرعه
نزلنا للمجلس وهم يزفون عاليه ,, ماكان فيه الا عدد بسيط ,, وتوسطت عاليه المجلس وابتدوا البنات يرقصون ,,
قعدت فهده ترقص وحنت علي ,, ما بغيت اكسفها وقعدت ارقص وانا ما اشوف الوجوه احسهم تماثيل ,,
مر الوقت وقالوا ان المعرس بيدخل ,, تغطوا الحريم وخذيت غطاي ,,,دخل ابو فهده ومعه ماااجد اللي اول ما شفته تنقضت الجروح ثاني ,,
ظل يصور مع اخته ,, وبعدها بشوي طلع ,, وجت فهده ترتب عاليه وتصور معها ,, ظل التصوير شويه ,, وبعدها طلع الوليد مع عاليه للقصر طيارتهم لفرنسا بعد ساعتين ,,,
طلعت فهده معهم عشان تجهز لهم , وطلعنا انا والجازي للسياره ,, ماودي اقعد ثانيه وحده حسيت المكان موبوء بخالتهم وبناتها ,,
شفته واقف عند مجلسهم بيدخل بغيت اصرخ واناديه بغيت اقوله وين نسيت وش قلت لي ,, لكن كلها صرخات نفس مكبوته ,,
*****
دخلت القصر لثاني مره بس هالمره زوجه ,, احاول اسرق نظراتي له من فتره للثانيه ,, ابي اتأكد انه مو كبيير ,, حمدت ربي ,, شكله شاب ,, اول ماوصلنا لجناحنا وفهده تزين كل شي ,, تكلمت
فهده : يبا عندك ساعه عشان تطلع للمطار تاكلون شي
الوليد : والله نشوف العروسه وش رايها ؟؟؟
طبعا انا سكت ودعيت في نفسي على فهده تعرس ويصير لها اللي تسوي لي هالحين لا وربي يكتب لي اشوف بعد ,,
فهده : وش رايك ياعروسه وهي تضحك .. ماحكيت بس سمعت فهده ,, خلاص يبا بروح اجهز ااغراضكم ,, وطلعت فهده وظليت جامده في مكاني ما تحركت ,,
حسيت به يجي صوبي ويمسك يدي : حيا الله عاليه اللي اسمع بها من شهور ,, سكت ما رديت عليه
الوليد : وش رايك تبدلين عشان نطلع للمطار ,, اشرت له بايه وقمت الا هو يلتفت لي
الوليد : منتي بحابتني قبل تروحين ,, استحيت بالمرره شكله بايعها ابو فهده ماعنده وقت ,, ما رديت وجيت بمشي لكنه ووقف في وجهي
وقال : خلاص دامك بخيله انا كررريم مرررره وحبني بخدي ,, سحبت نفسي ومشيت من عنده ,,, مو مصدقه ,, والله هذا احسن من اللي خذيته ,, حركات وسوالف عنده استبشرت خير ,, ودخلت ابدل ملابسي ,,
*****
مادري كيف وصلت غرفتي ماتكلمت مع الجازي بحرف من طلعنا من الزواج لحد ما وصلنا بيتنا راحت الجازي للملحق ,, ووصلت لغرفتي اللي حسيت بيني وبينها اميال طويله ,,, بعد مادخلت سكرت الباب وقعدت وانا اقاوم دموعي طلعت صورته تاملتها الا حفظتها محفوره وسط جفوني ,, تخيلته مع بنت خالته ,, لاااااا انهرت ,, مادريت ان الحب بلوى ,, تمنيت اني ماعرفت الحب ,, معقوله يسوي كذا ,, اتذكر اني كنت طبيعيه لما كنت افكر اشتغل في المستشفى ماخذه الدنيا طول بعرض ووناسه مافيه شي ماخذ عقلي ,, ومن عرفته ,, وهو شاغل حياتي ,, ماصارت زي الناس ,,,دخلت الصوره ثاني ,, للجظه فكرت اقطعها ,, وانهيه من حياتي ,, انساه واتعلم اني انساه ,, لكن ضعفت وماقدرت اسويها ,,,
******
دخلت وشفت فصولي نايم ,, لحفته زين وحبيته على جبهته ,, غيرت ملابسي وطالعت بطني في المرايه ,, بدى يكبر ,, صحيح صغير وما يبين ,, بس حسبت يمكن اخلص ثلاثة شهور ,, اسمع عن الوحام اللي يجي الحريم ,, الحمدلله ماجاني الا صداع في الراس وحب نووم ,,
دخلت في سريري وطالعت شاشة الجوال ,, اشتقت له ,, كل ليله تهفني نفسي ارسل له مسج ,, واتراجع اذا تذكرت طريقته معي ,, خذلني ,, صحيح غلطت لكنه جزاني بجفاا ,, حتى السفر ماهان عليه يقول لي ,, حطيت راسي على مخدتي ,, وتسربت دمعة حزن على حالي ,,
جفاني النوم ,, ماقدرت شوقي غلبني ,, موحاله ,, طالعت صورته اللي عند راسي ,, خذت الجوال
وفتحت الرسائل احترت وش اكتب ,, في الاخير
(( طمني عنك ,, اخبارك ,, متى بتجي )) حسيتها جامده مسحتها ,, رجعت اكتبها ثاني (( طمني عنك ,, اخبارك متى بتجي ,, اشتقنا لك ))
على الاقل تعبر عن اهتمامنا فيه ,,
ارسلتا وانا انتفض من فوق لين تحت ,, حسيت ببروده تدخل جسمي ,, حتى صوتي تغير ,, شعور الخوف والبروده مع بعض ,, مزعج ,, انتظرت حسيته بيرد بسرعه ,, صار له شهرين ,, انتظرت لحد ماغلتني عيني ,,
توعيت بعد الفجر بشوي واول ما تذكرت وين انا على طول شفت الجوال اللي طايح عند مخدتي ,, شفته ما ارسل شي ,, احبطت بقووه ,, يمديه يشوف الجوال ,, لكن شكله ما يبي يرد علي ,,
******
اخلص العصر من الشركه ومن بعدها طول اليوم فاااضي ,, ارجع للبيت ,, فيه جميع انواع التسليه ,, اجهزة رياضيه مع قناة افلام ,,
مع القنوات العربية الرياضيه ,,
ما اطلع اقعد في البيت ,, جاني سعد مره الشهر اللي راح ,, ووعدني يمكن يجي ثلاثة ايام الشهر ذاا ,, مرووق على وضعي ,, وحسيت اني بعدت عن اجواء البيت ,, اللي كلها شك وبهدله ,, تابعت فيلم ,, وخلصته ,, تابعت الثاني ,, ,, جاني مسج توقعته من سعد كل يوم يرسل لي نكته ,, والا وسائط بمقطع يوسع الصدر ,, اول ما شفت رقمها استعدلت وقعدت اقراه ثاني ,,
ماتوقعت انها ترسل لي ,, سفهتها وخليتها كذا بدون رد احسن ,,
*****
فهده صارت اغلب الايام عند الجازي في الملحق ,, بعد ماوصلوا العرسان لفرنسا ,, اتفقت مع جازي ونور يسون لهم جدول لحد ماتجي عاليه ,, صاروا يطلعون يقضون لهم حاجاتهم ,, ومره يتجمعون هنا ,, والا هنا ,, كل وحده حاسه بفرااغ وتحاول ما تبين للثانيه
الجازي ونور حالتهم متشابهه ,, لكن فهده غياب ابوها اثر عليها ,, وحست بالوحده اكثر في البيت ,, مع طاقم شغالات وحرس لكن وجوده في البيت غييير ,, كانوا متجمعين عند الجازي وكانت لابسه بنطلون بيت ومعاه تي شيرت طويل يخفي البطن ,,
وقعدوا يشوفون التلفزيون ,, دخلت عليهم ام نواف ,, وقعدت تسولف معهم ,, قامت الجازي تبي توصي الشغاله تجيب قهوه ,, حست بشد عضلي في ساقها ,, صرخت بقووه وقعدت على الكنبه ,, جتها ام نواف وهي تشوف وش فيها ,,
اول ما شافت بطنها الصغير ,,
ام نواف : جاازي ,, انتي متأخره عليك الدوره ,, ارتبكت شوي بس ماقدرت تنفي
الجازي : اي صار لها فتره ,,
ام نواف : مافحصتي ,,
هزت الجازي راسها وهي تطالع فهده ,, لكن ام نواف اصرت من بكره تروح المستشفى هي ونور وتسوي التحاليل ,,
*****
طال عليها الليل وهي عارفه ان الخبر بيوصل لنواف ,, حاولت تعاقبه انه مايعرف بتجازيه على صده لها وجفاه ,, لكن لكل شي نهايه ,,
جاها فضول وش راح تكون ردة فعله اذا عرف ,,
,, طلعت الصباح مع نور للمستشفى اللي خذوا كل الفحوصات من تلفزيون ودم وغيره ,,
واكدت لها الدكتوره انها خلصت الشهر الرابع ,, قالت لها عن المانع ,, واكدت لها اذا صار بدون انتظام مايكون له فايده ,,
رجعوا للقصر ونور تبي تاخذ البشاره من ابوها وامها ,,
اول مادخلت الجازي ومعاها نور كانت الجوري وفيصل قاعدين تحت مع ام نواف ,, وابو نواف في المكتب لكن صووت نور جمعهم
نور : كللوووووووش باركوا بصير عمه يا نااااس ,, قولوا امين عساها بنت حلووه مثلي ,,,
ام نواف وهي طايره من الفرح : والله مبروووك يا جازي والتموا العيله على اصوات الفرح ,,
لكن نور ماقاومت انها تبشر اخوها وسط فرحة ابوها وامها
نور : الووو يا المانيا وهي تضحك
نواف : لااااا شكلك فالتها ونسينا ,,
نور : مبرووووووك بصير عمه جزوووي حامل
معقووول انها حامل ,, متى وشلون وكيف ,, اسئله ماراح يجاوب عليها الا هي ,, لكن ما راح اعرفها الا اذا شفتها وجه لوجه
وذا الشي مو في بالي الحين ,,,,,,
*******
11-05-09, 12:41 PM
جديد مواضيع قسم القصص المكتمله
العرض العادي
