السلام عليكم اسفة عالتاخير ورح احط الجزء السادس........قراءة ممتعة

ج6
رسائل خاصة من عشاق على الانترنت
بنت البلد:: السلام عليكم
عاشق أميرتي:: وعليكم السلام... يمعودة هاي وينج يومين مو ظل بالي؟
بنت البلد:: ليش يظل بالك انت تعرف آني مااگدر احجي وياك كل يوم...
عاشق أميرتي:: ولو لازم تطمنيني عليج تدرين بيا يوم اليمر ومااسمع أخبارج مينحسب من عمري...
بنت البلد:: صدك؟
عاشق أميرتي:: ليش متصدگين؟ أمورة الله يخليج أريد اشوفج ترا اروح أشمر روحي من السطح... مو راح اتخبل...
بنت البلد:: أذاك اليوم الرقم واليوم تشوفني باجر شتريد؟
عاشق أميرتي:: شنو هالحجي أمورة هذا إتهام مبطن؟
بنت البلد:: لا إتهام ولاشي... بس...
عاشق أميرتي:: بس شنو؟
بنت البلد:: أريد أسألك سؤال وجاوبني بصراحة...
عاشق أميرتي:: تفضلي..
بنت البلد:: صحيح تريد تخطب قريب...
تنهد طويلا قبل أن يكتب لها وهو يتمتم:: سواها الغبي اشرف...
عاشق أميرتي:: أكيد... يعني راح أظل عزابي طول عمري؟
بنت البلد:: وحدة گرايبكم؟
عاشق أميرتي:: لا... وحدة ببالي بس مو گرايبنا...
بنت البلد:: يعني أكو وحدة ببالك؟
عاشق أميرتي:: أكيد... ليش تسألين؟
بنت البلد:: مجرد فضول...
عاشق أميرتي:: وتريدين تعرفين منو؟
بنت البلد:: هذا شي راجعلك... براحتك إذا متريد تحجي...
عاشق أميرتي:: بس آني أريد أحجي... أمورة البنية اللي ببالي صعب اوصللها... هي كلش حبابة وآني أموت عليها هي كل حياتي... يمكن هي متعرف آني شگد أحبها عود أنتي گوليلها...
بنت البلد:: شلون يعني؟
عاشق أميرتي:: عود فكري بيها زين أمورة وافهميها...
بنت البلد:: زين
عاشق أميرتي:: زين لو عراقنا؟
بنت البلد:: هههههه شوگت تعقل؟
عاشق أميرتي:: ليش ظل بيا عقل أمورة مو تخبلت رسمي...
بنت البلد:: سلامتك
عاشق أميرتي:: أروحلج فدوة شوگت اشوفج؟
بنت البلد:: بعدين مو هسة
عاشق أميرتي:: كل يوم راح اجي يم قسمكم وأظل افتر حتى اشوفج...
بنت البلد:: وشلون راح تعرفني؟
عاشق أميرتي:: هذا شغل قلبي هو اللي راح يعرفج مو آني... تعرفين أغنية أنا قلبي دليلي عود سمعيها وتذكريني...
بنت البلد:: هههههه مجنون وتسويها...
عاشق أميرتي:: شفتي شلون تخبلت؟حني على الغلبان...
بنت البلد:: هذي صورتك اللي خليتها هسة؟
عاشق أميرتي:: إي شوفيني علمود إذا إجيت يم قسمكم تعرفيني...
بنت البلد:: يعني راح تسويها وتجي؟ وشراح تستفاد؟
عاشق أميرتي:: أحس نفسي قريب منج وبنفس المكان اللي انتي بيه... حتى لو ماشفتج...
بنت البلد:: إي وبعدين؟
عاشق أميرتي:: ولاشي بس اظل افتر لمن قلبي يگول هي هاي اللي تدور عليها...
بنت البلد:: وقلبك ليش يدور عليا؟
عاشق أميرتي:: يعني متعرفين ليش؟
بنت البلد:: لا مااعرف...
عاشق أميرتي:: هاي شگوللها بله... كل هالحجي شفتهمتي من عنده؟
بنت البلد:: ماادري
عاشق أميرتي:: المهم ماعلينا شنو رأيج بيا قصدي بصورتي؟
بنت البلد:: حلوة الله يحفظك لأهلك
عاشق أميرتي:: بس!
بنت البلد:: ويحفظك إلي...
عاشق أميرتي:: إي هيج الله يخليج إليا وحدي...
بنت البلد:: أگول إنت شبيك اليوم؟
عقد حاجبيه بإنزعاج وهو يقول:: أوف شصارلي اليوم زادت الجرعة شوية... بس لاتشك بكلامي او كلام اشرف...
عاشق أميرتي:: ماكو شي سلامتج إنتي أخبارج شكو ماكو؟
بنت البلد:: ماكو شي روتين ممل... أگول شصار على سالفة التهديد؟
ضرب جبينه بخفة وهو يتذكر قصة محاولة خطفه:: يوه شون نسيت؟
عاشق أميرتي:: مصار شي من ذاك اليوم... بس يحلمون يحصلون مني شي...
بنت البلد:: أحمد بغلاتي عندك لاتخاطر بحياتك...
عاشق أميرتي:: أمورة تدرين بغلاتج بس آني كرامتي فوق كل شي ومااتنازل عن حقوقي لأحد...
بنت البلد:: وحياتك؟
عاشق أميرتي:: مو خايف من أحد...
بنت البلد:: بس آني تهمني سلامتك وخايفة عليك...
عاشق أميرتي:: أمورة لاتخافين مراح يصير إلا كل خير...
بنت البلد:: لازم أقفل هسة يلا اشوفك على خير
عاشق أميرتي:: مع السلامة ياغالية...
****
-سدرة الله يخليج تعالي اليوم عدنا؟ قالتها وهي تلعب بإحدى خصل شعرها الحريري وتكلم سدرة من جوالها الجديد...
سدرة:: حياتي راح احاول بس مااضمن موافقة وزارة الداخلية...
ريم:: عمتي الله يخليها ماترفضلج طلب ابد... لأن اريدج بسالفة مهمة...
سدرة:: خير إن شاءالله...
ريم:: ماكو شي بس مشتاقتلج... وأريدج تشوفين موبايلي الجديد...
سدرة:: شنو سالفة مهمة وتعالي بعدين لاماكو شي؟ريم شبيج؟أكو شي؟
ريم:: ماادري ... انتي تعالي عود نحجي بالسالفة
سدرة:: أوكي


يتبع.

****
عاشق أميرتي:: شبيه القمر زعلان علينا اليوم؟
بنت البلد:: ماادري بس من الصبح وآني ضايجة...
عاشق أميرتي:: ماعاش اللي يزعل امورة الأمورة
عاشق أميرتي:: ألووووو...انتي مشغولة؟
بنت البلد:: لا بس شتريدني أگول؟
عاشق أميرتي:: أمورة أريد أگلج شغلة...
بنت البلد:: إي
عاشق أميرتي:: هسة گاعد أحجي ويا ابن عمي بالامارات... وگال راح يدبرلي شغل هناك...
بنت البلد:: شنو؟
عاشق أميرتي:: بس الفيزا راح تطلع وره شهر او أكثر حسب الظروف...
بنت البلد:: إي والمعنى؟
عاشق أميرتي:: يعني راح اسافر وره فترة... بس راح تظل حسرة بگلبي اشوفج...
بنت البلد:: لحظة لحظة... تسافر بكل هالبساطة؟ وآني؟
عاشق أميرتي:: مكانج بالقلب أمورة... شتريديني اسوي يعني؟ گتلج حياتي بخطر ولازم اسافر اشوف مستقبلي بره لأن الظاهر ماعندي مستقبل هنا...
بنت البلد:: وآني؟ مافكرت بي؟
عاشق أميرتي:: لو بس أعرف خيط يوصلني إلج ماترددت لحظة أخذج وياي...
بنت البلد:: انت لو تريد تعرف كان عرفت من زمان... بس انت فكرت بنفسك بس... روح مع السلامة إذا تريد تروح ومسامحتك على كل شي...
عاشق أميرتي:: أمورة لحظة لاتطلعين زعلانة...
عاشق أميرتي:: أمورة... ألوووو
****
أغلقت لابتوبها وهي تحس بنوع من الانزعاج... تحس بإن أحمد عاجلا أم اجلا سيبتعد عنها رغما عن كل الظروف...
لن يكون لها لماذا لاتفهم هذا؟ هي تحبه لكن هو بالتأكيد لن يحب فتاة لاتشكل سوى خيال لم يكتشفه بعد... هي تعرف شكله من صورته التي أرسلها قبل أيام أما هو فلا... تعرف اسمه أما هو فيجهله... ماالذي يدفعه ليحبها... هي تعشقه ولكنها ستبقى خيال بالنسبة له...
-شونج ياحلوة؟ دخلت سدرة وهي تضحك على شكل ريم المفزوع من هجومها المباغت بينما حاولت الاخيرة إخفاء شي داخل أحد الادراج...
ريم بغضب مصطنع:: ماتعرفين تستأذنين قبل من تدخلين أي مكان؟
سدرة:: لامااعرف... وهسة ممكن افهم شبيج؟
ابعدت ريم عينيها بإضطراب وهي تقول:: آني بخير والحمدلله...
امسكت سدرة بها قبل أن تلتفت واجبرتها على النظر إليها:: عيني بيعينج... تخبين على كل الناس إلا سدرة؟ إحنا متربين سوا وافهمج أكثر من نفسي... منو هذا سعيد الحظ اللي قلب حالج؟
تفاجأت ريم من دقة ملاحظة سدرة ونباهتها وقالت:: منو؟
سدرة:: هههههه شبيج ريماني آني أسألج؟
تنهدت ريم بصوت تملأه المرارة وإمتلأت عينيها بالدموع وهي تقول:: أحمد...
ثم فتحت أحد ادراجها واخرجت صورته وناولتها لسدرة...
سدرة وهي لاتزال عاقدة حاجبيها من الحيرة:: منو أحمد؟ وشجاب صورته عندج؟
ريم:: أحمد هذا اللي قلب حالي... وخلاني أحبه قبل مااعرفه... گوليلي شسوي لو راح شسوي لو سافر... آني أموت من غيره...
سدرة:: ممكن تفهميني شوية شوية... بس قبل كل شي تدرين... حلو...
سحبت ريم الصورة بسرعة:: تتغزلين بيه وگدامي...

****
((رسالة خاصة من المهندس))
أمورة وينج مو ظل بالي هاي كم يوم... طمنيني ياغالية... آني كل يوم جاي وراح أوگف گدام قسمكم لحد مااشوفج... راح أگلج شغلة أمورتي ترا القلب ماعرف غيرج لاتقسين عليه...
المعذب أحمد@
****
بعد عدة أيام...
-شوفي سدرة شگاتبلي؟قالت ريم وهي تتطلع إلى رسالة أحمد الخاصة..
سدرة:: آني ليهسة مااستوعبت السالفة زين...
ريم:: شنو اللي مفتهمتيه؟ آني حجيتلج كلشي...
سدرة:: اسمحيلي ريم انتي تصرفج غلط من البداية آني ماارتحت لهذا اللي اسمه أحمد مااعرف شلون تنجرفين خلف مشاعرج بهذي الطريقة... حبيبتي ريوم الناس تفكر بعقلها مو بقلبها...
ريم:: إي اعرف هالشي
سدرة:: تعرفين وبعدين؟ مو آني السالفة كلها مادخلت راسي... مراح الومج لأن إحنا بعدنا عالبر... عوفيه...
تسابقت دموع ريم بالنزول على خديها وهي تشهق بالبكاء...
ريم:: افهميني سدرة مااگدر اعوفه ولاأگدر أظلمه... يعني هو شگو بيده يسويه
أغلقت سدرة اللابتوب وقالت بحدة:: راح يجي اليوم اللي تبجين على كل لحظة من عمرج راحت وانتي تفكرين بيه... ريم راح تندمين على عمرج اللي يروح بكذبة من واحد منعرف عنه شي...
ريم:: لاتحجين عليه... سدرة الله يخليج لاتخليني أندم إني حجيتلج قصتي...
سدرة:: يمكن الشي الوحيد الصح اللي سويتيه إنج گلتيلي السالفة...
****
مر اسبوع وهو يقف كل يوم أمام قسم الهندسة المعمارية بغية رؤيتها والتعرف عليها... ولكن أي واحدة قد تكون هي؟ هو واثق إن نظراتها له ستفضحها فهي تعرفه وتعرف جيدا إنه يقف كل يوم هنا من أجلها...
سيف:: أريد افهم شعندك بقسمنا كل يوم؟
أحمد:: شعندي يعني غير جاي اشوفك؟
سيف:: تشوفني كل يوم؟شنو هالحب؟قول غيرها... لايكون بس نويت تتأهل؟
أحمد:: أتأهل؟ شنو جاي ألعب طوبة وياك؟
سيف:: هههههههههههههههههه قصدي تودع حياة العزوبية وتخطب... مثلا حاط عينك على وحدة؟ او جاي تدور ومعندك أحد معين ببالك؟
لمعت فكرة ذهبية في ذهن أحمد واجاب...
أحمد:: تدري هذي أول مرة أكتشف أنك ذكي؟ آني فعلا ناوي أخطب وحدة من قسمكم وأريدك تساعدني...
سيف:: منو هي؟
أحمد:: بعد ماقررت بس أريدها صغيرة يعني بصف اول...
سيف:: صف أول؟ ليش متريدها قربت تتخرج؟مو أحسن؟
أحمد:: هسة إنت شعليك آني أريدها صف أول...
سيف:: زين... شنو رايك بهذي اللابسة أخضر مو حلوة وتناسبك طويلة وهذي اعرفها من عائلة... وبصف أول...
تأمل أحمد بالفتاة ولكن لاتبدو كأنها هي... لم تنظر بإتجاههم على الاقل...
أحمد:: شسمها؟
سيف:: أمل
أحمد:: وابوها شنو؟
سيف:: تاجر كبير...
أحمد:: لا مو هي...
سيف:: شنو مو هي؟
أحمد:: يعني دورلي غيرها...
سيف بتعجب:: ليش؟ شوفها والله حلوة...
تمتم أحمد بينه وبين نفسه:: هذا شراح يفهمه؟ ثم أردف معللا:: آني أريد وحدة من عائلة مثقفة فهمت علي؟ يعني ابوها استاذ دكتور مهندس هيج مو تاجر...
سيف:: أگول إنت راح تتزوجها لو تتزوج ابوها؟
أحمد:: أوف إذا عاجبتك روح تزوجها إنت... آني أريد غير وحدة...
****
نهايةج6