ج8
رسائل خاصة من عشاق على الانترنت

عاشق أميرتي:: أهلا حبي متوقعت أشوفج أون لاين بهالوگت...

بنت البلد:: آني افتح حسب الظروف بس زين شفتك موجود...

عاشق أميرتي:: أشتقتيلي؟

بنت البلد:: آني دايما اشتاقلك مو بس اليوم... بس تدري آني زعلانة عليك...

عاشق أميرتي:: ليييييييييش؟

بنت البلد:: شسويت اليوم شنو هالجنون مالتك؟

عاشق أميرتي:: آني؟

بنت البلد:: لا آني...

عاشق أميرتي:: قصدج لأن طلبت الرقم؟شبيها يعني؟ وإلا لأن طلبت نطلع فرة بالسيارة؟ أتصور آني لازم أزعل مو انتي لأن رفضتي الأثنين... وبصراحة هذا جرحني كلش...

بنت البلد:: ليش يجرحك مااتصور ترضاها على وحدة من خواتك تطلع بالسيارة ويا غريب...

عاشق أميرتي:: غريب؟ هسة عرفت قدري عندج... الله يسامحج...

بنت البلد:: لاتفسرها على مزاجك أحمد انت ماادري شلون صاير انت حيل متغير...

ابتسم ابتسامة جانبية وهو يقرأ كلماتها الأخيرة وأشعل سيكارة وهو يتمتم:: والله هذي انتي اللي صايرة مملة ومعقدة...

عاشق أميرتي:: لا متغير ولاشي روحي شوفي منو اللي غيره الزمن علينا وهسة تعذريني عندي شغل... مع السلامة...

بنت البلد:: مع السلامة

****

بقيت طول الليل تفكر به أحداث اليوم كانت كثيرة وكشفت لها جوانب لم تعرفها من قبل... لأول مرة تحس بالخوف منه... لأول مرة ينتابها شك في صدق مشاعره لها... لأول مرة ينهي محادثتهم هو!! سابقا كان يقوم بتعطيل جميع اشغاله لأجلها والآن ماذا؟ بالتأكيد هو من تغير وليس هي... ولكن لماذا؟ ألأنه كشف شخصيتها الحقيقة؟... ألأنها لم تعد لغزا بالنسبة له؟ أم إنه يتهرب منها لأنها لم تعجبه؟

امسكت بمرآتها الصغيرة وهي تقول:: والله حلوة ومناقصني شي لعد ليش هيجي يسوي ليش؟

****

دخلت أم ريم على صرخة خرجت من غرفة ريم فجرا...

-ريم حبيبتي شبيج؟سألت بقلق وهي تحتضن ابنتها...

كانت ريم تتنفس بسرعة وجسدها يرتجف ووجها متعرق...

عادت الأم للسؤال وهي تلمس جبهة إبنتها:: شبيج حبيبتي مريضة؟

ريم:: لا بس شفت حلم يخوف

أم ريم:: كابوس حبيبتي لاتخافين... إقري المعوذات ونامي...

****

خرجت الأم بعد أن إطمئنت أن ريم قد هدأت وعادت للنوم... ولكن أين للنوم أن يطرق جفونها بعد ما أحست أن الكابوس يكاد يكون حقيقيا... أحسته بقربها يريد أذيتها... لماذا هذه الافكار السوداء تلاحقها؟ تذكرت كيف رأته في حلمها كان هو من أحبته لكن وجهه اصبح مخيفا وقربه منها ينفرها... كان يريد اغتصابها صرخت لكن لاأحد ينجدها... إبتسامته التي تعشقها كانت ضحكة شيطانية... ونظراته الحنونة كانت غريبة عليها... واستقيظت لتجد إن كل ذلك الخوف كان مجرد كابوس... ولكن لابد أن يكون له معنى...

****
بعد شهر::

عاشق أميرتي:: الله يخليج أمورتي...

بنت البلد:: لا أحمد شنو هالحجي مااگدر...

عاشق أميرتي:: أمورتي حبي والله اريد انطيج شغلة وبعدين شكو بيها راح اشوفج داخل الحرم الجامعي وبعيد عن كليتكم محد راح يعرفج...

بنت البلد:: مااعرف احسها مغامرة... وثانيا إحنا بعطلة شون أجي للجامعة بأي حجة؟

عاشق أميرتي:: هي شغلة نص ساعة حبي ليش تبخلين علي وآني إللي عمري كله يرخصلج... وإذا علمود العطلة أكو مليون عذر تجين بيه...

بنت البلد:: مودي...

عاشق أميرتي:: عيون مودي وحمودي... تدرين مودي أحلى لها نغمة خاصة تذكرني بأمورتي...

بنت البلد:: لاتصير مغازلجي وبياع كلام...

عاشق أميرتي:: مقبولة منج ياحياة مودي... هسة صرت مغازلجي وبياع كلام؟

بنت البلد:: مقصدي بس فكر بيها بعقل مااگدر...

عاشق أميرتي:: وحياتي عندك لو كان ليا عندك خاطر متراكع ألبك ...

بنت البلد:: مااگدر

عاشق أميرتي:: حبي شنو هذا كلما اطلب شغلة يكون الجواب لا ليش هيجي... يعني شبيها لو إنطيتيني الرقم؟ شبيها لو شفتج نص ساعة بمكان عام؟ ليش تعذبيني وياج؟ أخاف تكونين شاكة بي او بمشاعري؟

بنت البلد:: واثقة بس خايفة...

عاشق أميرتي:: خايفة مني؟

بنت البلد:: خايفة من نفسي...

****

دخلت كافتيريا كلية الآداب وهي في قمة توترها واحتلت طاولة بعيدة عن الانظار... لاتعلم كيف طاوعته وجائت هنا... تلفتت وهي تنظر إلى العدد القليل جدا من الطلاب خصوصا إنهم في عطلة... ذاك يجلس مع خطيبته والآخر يجلس لوحده يدخن ويبدو في عالم آخر والثالث ينظر لساعته كل عدة لحظات وينتظر أحدهم... أرتجفت من فكرة أن يراها أحد تعرفه وهي بصحبة أحمد فحملت محاضراتها وانتصبت واقفة وهي تتهيأ للخروج ولكنها رأته يقف أمامها وإبتسامته أتسعت وهو يقول:: شنو حياتي تأخرت عليج؟

إرتجفت شفتاها وهي تجيب:: لا بس... لا... قصدي...

أحمد:: شبيج حبيبتي؟

ريم وهي تحاول أن تبدو متماسكة:: ماادري خايفة...

أجاب أحمد وهو يمسك بكفها:: رجعنا للخوف؟

أحست أن الدم توقف عن الجريان في جسمها و شحب لونها وهي ترى كفها اسيرة يديه القويتين أرادت سحبها ولكن قوتها خانتها هاهي تتعدى خط أحمر آخر... ياترى كم من الخطوط ستتعداها حتى تعلم مقدار خطأها... أما هو فإحس كفها باردة كالثلج في يده الدافئة فضغط عليها بقوة وهو يقول:: بردانة؟

أكتفت بهز رأسها نفيا ولاتزال يدها اسيرة عنده... بينما ابتسم وهو يطبع قبلة خاطفة على كفها الصغيرة وقال:: لعد ليش إيدج باردة ثلج؟

سحبت يدها بقوة ثم قالت وهي تجمع أوراقها بتوتر واضح استعدادا للمغادرة:: مجنون شكاعد تسوي... شلون... شلون تسمح لنفسك؟ آني الغلطانة إللي اجيت من البداية...

أحمد ببرود وهو يرفع يديه في الهواء:: تفضلي روحي مراح ألزمج... ثم أكمل قائلا:: ترا طفرتيني طلعتيني من طريقي كل شي عندج ماادري شلون...

ريم:: هسة انت ليش تصيح متعرف شي اسمه هدوء... حلو خليت الكل يباوع علينا...

أحمد:: شعلينا من الناس واحد ديتناقش ويا خطيبته...

ريم:: لما أصير خطيبتك عود إحجي اللي يعجبك استاذ أحمد... مع السلامة...

أحمد:: أوصلج؟

ريم بغضب:: ميحتاج... أندل طريقي...

تحولت ملامحه من السخرية إلى الجدية:: أمورة لاتروحين هسة خلي نتفاهم

ريم:: على شنو نتفاهم؟ إنت خليت بيها تفاهم؟

أحمد:: أمورة إحتمال اسبوع الجاي اسافر

ريم:: وين؟

أحمد:: شغل بتركيا

ريم:: وراح ترجع مو؟

أحمد:: شبيج أمورتي سفرتي لتركيا تقريبا شهر وارجع بس سفرتي للخليج رح تكون إقامة مو بس شغل...

شحب لونها وهي تستمع لكلماته التي كانت كالرصاص يخترق إذنيها...

ريم:: إقامة؟!? يعني مراح ترجع مثل مكتلي؟؟

أحمد:: إي إقامة بس رح إرجع كل فترة وانتي حبي تخرجي وآني أدبرلج أحسن شغل هناك...

أغمضت عينيها لتمنع سيلان دموعها دموع غضب وقهر وإحساسها بالخذلان من أقرب الناس لقلبها... ثم غادرت مسرعة وهي تقول:: مشكور على كل شي ماقصرت...

****

-شنوووو؟ مخبلة إنتي؟
صرخت سدرة وهي تمسك بذراع ريم...

ريم:: إي مخبلة ومن زمان... هسة عرفتي؟

سدرة:: إنتي متنعافين وحدج... هسة صار يعرفج ومدري كم مرة إجا للكلية... وبالأخير تكعدين وياه بالكافتيريا؟ تخبلتي؟

ريم وقد بدأت بالبكاء:: كافي كافي الله يخليج كافي ماادري شصاير بيا مااعرف شلون كاعدة أتصرف مااعرف...

سدرة:: أرجع وأكول إقطعي علاقتج بيه ترا والله بعدين تضطريني أحجي لأمج...

ريم بغضب:: هذي جزاتي لأن أثق بيج واحجيلج كل شي ها؟

سدرة:: ريم آني أدور مصلحتج...

****

((رسالة خاصة من المهندس))

شلونج أمورتي مشتاقين... أميرة قلبي لتزعلين مني الله يخليج ردي علي ترا مااكدر أعيش من غيرج... أسف مليون مرة أكولها إذا كان ضوجتج بس طمنيني على غلاي... هذا رقمي أمورتي خليه عندج*******0770
...
أسير هواج حمودي@

****

أمسكت بالورقة التي كتبت رقمه عليها وتأملتها لقد حفظت كل رقم وموقعه فيها ترددت كثيرا قبل أن تنسخه في موبايلها... بأي إسم تحفظه ياترى؟... لو كانت علاقتها به شرعية وقانونية لماترددت لحظة وحفظته بإسم حبيبي أو ربما عشقي الأول أو قد يلائمه اسم أمل حياتي... ولكنها فضلت أن تكتبه بإسم ملاكي الحارس... ولكن هل هو ملاكها الحارس أم إنه شيطان الأنس؟

جاري الأتصال... أغلقت هاتفها بسرعة قبل أن تتهور وتتصل به مرة أخرى... لقد أصيبت بالجنون جنون الحب كما قالت سدرة وتتصرف دون وعي منها...

قبل أن تتهور مرة أخرى وتتصل به قامت بمسح رقمه على الفور وتمزيق الورقة التي كتبت عليها الرقم... عندها أحست بنوع من الراحة والطمأنية تعود إليها...

****

((رسالة خاصة من أميرة في خيالي))

شلونك أحمد... آني مسافرة لسوريا هالاسبوع سياحة وأحتمال نبقى شهر أشوفك على خير إن شاءالله... راح أشتاقلك... مع السلامة...

سلام خاص من أمورة@

****

((رسالة خاصة من المهندس))

ياهلا بالغلا كله... تروحون وترجعون بالسلامة بس راح اشتاقلج كلش يعني ممعقولة تنقطعين عني شهر؟

حمودي@

****

-ليش شهر؟ اسبوعين أحسن! سألت الريم...

ريان:: شنو اسبوعين رايحين لسوريا نبقى اسبوعين بس شراح تكفي؟

الأب:: شهر يادوب تكفي ليش مو متحمسة للسفرة؟

ريم وهي تمط شفتيها بملل:: أوووف مو متحمسة وبس أكول سارة راح تجي ويانا؟

الام:: لا زوجها عنده شغل ميكدر يسافر وهي طبعا مراح تعوفه...

ريم:: يعني راح نسافر وحدنا متكولولي شنو الحلو بالموضوع؟

ريان:: ليش وحدنا راح نسافر لبيت خالتي هناك...

ريم:: إي كول هيجي من الأول طلع أكو بالموضوع حبيبة القلب بنت خالتي...

ريان:: رييييييم كافي شنو هالحجي؟

ريم:: خلاص سكتنا لاتزعل...

****

مر الشهر بسرعة لم تتوقعها ريم... ظنت أنها ستشعر بالملل بعيدا عن أحمد... ولكنها رغم ذلك استمتعت بوقتها واليوم حان يوم عودتهم...

****

فتحت مسنجرها بلهفة المشتاق لترسل سلامها وشوقها لمن شغل بالها واحتل كيانها... ولكنها صدمت عندما قرأت الاوف لاين الذي ارسله...

((هلا أمورتي شونج مشتاكلج حيل آني مسافر بعد يومين للأمارات تمنيت اشوفج كبل مااسافر))

تمنت في داخلها أن يكون تاريخ الرسالة هو اليوم ولكن أملها خاب عندما علمت أن تاريخها كان قبل اسبوع... لماذا فعل بها هذا لماذا؟ لم يخبرها عن سفره في رسالته الأخيرة كيف يصدمها بهذا الخبر؟
سمحت لدموعها أن تتخذ طريقها على وجنتيها وأقفلت جهازها بعدما ارسلت له

((حرام عليك تسافر هيجي بلا إنذار سابق... فجأة تدزلي خبر سفرك... تدري آني مسافرة ليش ماانتظرت ليش؟ كلها كم يوم... تروح كبل مااشوفك والله العالم إذا رح ترجع أو لأ))

****

نهايةج8