كاتب الموضوع :
cocubasha
المنتدى :
الارشيف
هااااااااااااااااااااى جوجووووو
ليه يا بنت عدم الثقه اللى عندك ده من الحب بعد الجواز , و الله إنتوا ظالمين الجواز معاكو
بصى يا بنت خليكى مع أختك هوبى و إنتى تسمعى ما يسرك
ههههههههههه
أولاً أنا مؤمنه جداً بإن الشىء اللى يتبنى على أساس صحيح و متين هيفضل ثايت و راسخ طول العمر و يقف أمام كل حاجه
وإن كل واحد منا حياته بأيده لو عايز ممكن بإذن الله يخليها جميله و ممكن يحولها جحيم
فلو إنتى و شريك حياتك عرفتوا ده كويس و إتفقتوا إن كل واحد فيكم زى ما ليه زى ما عليه
يبقى إن شاء الله الدنيا هتكون حلوه
و الله يا جوجو لو دورتى على أى جوازه مش موفقه هتلاقى إن الأساس فيه حاجه غلط , يعنى مثلاً هى إختارت العريس ده عشان هو غنى و هيعيشها فى مستوى حلو , او هو إختارها عشان هى شكلها حلو قوى و كل الرجاله هتحسده لأنه عرفها , او مثلاً واحد بيتجوز عشان الست الوالده نفسها تشوف عياله قبل فوات الأوان فيقول أتجوز أهى أى جوازه و السلام , او هى صغيره فى السن و نفسها بقى تخرج من بيت أبوها الخنيق و تعيش بقه دور المدام و كأن الجواز ده لعبه
و خدى عندك بقه من الأمثله دى كتييييييييييير
هتلاقى كتير من الناس بيقولك يا بنتى الخطوبه دى حاجه و الجواز حاجه تانيه و هما فعلاًعندهم حق
يعنى فترة الخطوبه التركيز فيها على إظهار المشاعر و الحب والهدايا و الحاجات دى يعنى و لو شفتى خطيبك بيبقى كام ساعه فى اليوم و الباقى ع التيليفون , بس الإحتكاك الحقيقى بيكون بعد الجواز , و اللى مش بيكون سهل فى أحيان كتير و بيختبر مدى حبكم لبعض
و هتلاقى إن فى ناس كتير أيام الخطوبه تقول كل الكلام الحلو وبعد الجواز تتكتم و لا تنطق بكلمه واحد كويسه و حلوه و كأن الكلام بفلوس
يعنى ليه متقوليش لجوزك إنك بتحبيه كل يوم و هو يقولهالك كمان و ليه متجبيش له هديه ولو حاجه صوغننه تسعده بعد يوم شغل مؤرف و صعب, أو هو يهديكى إن شاالله ورده تفرح قلبك
حاجات زى كده بتزيد الحب و تخلى كل واحد من الزوجين يدور على سعادة و راحة بال التانى
هتقولى طيب العيال و شغل البيت و الفيلم ده كله , هقولك و بصراحه شديده إنه شىء مش سهل أبداً و ساعات كتير بيبقى ضغط على الزوجه وتبقى مش عارفه تراعى مين و لا مين
و لو هى ركزت تفكيرها فى البيت و العيال بس هتلاقى إنها بتبعد عن جوزها شويه بشويه و كل كلامها معاه هيكون عن الأولاد عملوا و الأولاد عايزين كذا و البيت محتاج كذا و يحس الزوج إن إتركن على جنب و إتحول من حبيب إلى معيل للأولاد و بس
فعشان كده لازم توازنى أمورك ما بين الأولاد و متطلبات البيت و زوجك الحبيب , و تحرصى دايماً إنه يكون فى حوار بينكم بس مش عن الأولاد و البيت لأ عن الحياه عامة و شغله وأخبار الدنيا
يعنى يكون فى ما بينكم نوع من الصحوبيه و الصداقه , يعنى لو عنده أى هم أو مشكله تكونى أول واحده تسمعى له و تبقى إنتى أول واحده هو يجرى عليها و يقولها اللى فى نفسه و قلبه
مش عارفه يا جوجو إذا كنت قدرت أوصلك كلامى كويس بس الخلاصه هى إن كل واحد زى ما ليه حقوق فهو عليه واجبات وإنهم يراعوا ربنا فى بعض و يعبدوه مع بعض و يبقوا دايماً موصولين مع الله سبحانه و تعالى , لو الزوجين عرفوا ده من الأول يبقى إن شاء الله و بفضله هيبقى الزواج ناجح و ربنا هيزرع البركه فيه
|
14-06-09, 10:34 PM
جديد مواضيع قسم الارشيف
العرض العادي
