المنتدى :
القصص المكتمله
يا قلبي انساها ولو كنت تتنفس هواها للكاتبة قلب دبي
يا قلبي انساها ولو كنت تتنفس هواها
للكاتبة قلب دبى
بطل القصة : محمد
-=-=-=-=-=-=-=-=--=-=-=-=-=-
الجـزء الأول
~((لا تنتظر حبيباً باعـك... وانتــظر ضــوءاً جـديـداً...يمكــن أن يتسلل إلى قلـبـك الحــزين ...فيعيد لأيامــك البهجة.. ويعيد لقلبك نبضه الجميل))~
بهاي الجملة .. عاش محمد .. الأمل كان موجود عنده ان الله بيعوضه خير عن أمل .. أمل الخاينة .. أمل اللي باعته عشان صديق عمره سالم .. ما توقع في يوم إن أمل تتركه .. عشان تتزوج سالم ... ومتى ... في ليلة الملجة ....
سند محمد ظهره على يدار سريره ... وتنهد تنهيدة كبــيــــرة كلها اسى ... أيام قليلة مرت على زواج أمل وسالم ... وغصب عنه .. نزلت دمعة من عينه ... دمعة مظلوم ... ظلمه أعز أصحابه .. وأعز خلانه ....
دخلت عليه اخته سارة .. وهي أصغر عنه بسنتين ...
سارة تطالع أخوها وقلبها يتقطع على حاله :: شو فيه القمر يالس بروحه ..
محمد يطالعها ببرود :: هه .. قمر ؟؟ قمر وودرتني .. عيل لو سبال شو كانت بتسوي ؟؟
سارة :: حبيبي انسى هالوغدة أملو .. والله ما أتحسف الا ع اليوم اللي فكرت أرابعها فيه ..
محمد :: تبيني أنساها ؟؟ آه علميني كيف انساها .. أمل مزروعة بقلبي ..
سارة راحت ويلست حذاله :: مزروعة ؟؟ ما ظن
محمد رفع راسه بذهول :: تشكين في احاسيسي
سارة :: ماقصد .. بس .. لو كنت تحبها لذيج الدرجة ما كنت بترضى تتزوج سالم
محمد يطالعها بغضب :: شو تبين يعني أروح أكفخه ولا أضربه ؟؟ دامها هي مسودة الويه ما تباني ..
سارة تقاطعه :: شفت ؟؟ .. عادي عندك تسبها .. صدقني يا محمد ... أنا متأكدة مليون بالمية انها ما تهمك .. يمكن شغلت بالك في لحظة من اللحظات .. لكنك ما حبيتها ...
محمد يصد بويهه عنها :: ما أقنعتيني ..
سارة تبتسم :: هي بااين .. المهم .. قوم ابويه يبا يشوفك من كم يوم ما يلست وياه ..
محمد :: بعدين بنزل أشوفه
سارة :: وانت شو عندك الحين .؟؟
محمد :: ولا شي .. بس أبغي أريح عقب
سارة تسحبه من يديه :: قوم وعن الحركات .. يلا عن الدلع ..
محمد انصاع لها مع انه عنيد دايماً .....
ونزلوا لأبوهم ...
بو محمد بفرحه :: هلا .. هلا بولدي محمد ...
سارة :: أفا أبوويه أنا ما ترحب فيّ مول ؟؟؟
بومحمد : انتي شبعت من مجابل ويهج .. بس محمد الغايب عني .. ما شوفه مووول
محمد سار يحب راس أبوه : اسمح لي الغالي .. وحقك علي ...
بو محمد يطالعه والدمعة بعينك :: لا تفكر فيها يا ولدي .. خلاص .. البنت تزوجت .. ولا تفتكر فيها
محمد تنهد وابتسم ابتسامة واحد مهزوم :: لا تحاتي ابويه .. أما شلتها من بالي
~((حاولت في قلبي وانا اقول ابنساك..واعيش دنيا في حياتي جديده..))~
يرن تلفون البيت ...
سارة راحت تشله ..
سارة :: ألو
مها :: هلا والله بالقاااطعة اللي تتغلى علينا
سارة بفرحة :: مهووووو يا الحمارة متى رديتي
مها تقلد صوتها :: من زمااان .. والله حتى ما تسأل عني .. طرشي مسج سوي شي عفانا الله بخيلة ..
سارة :: هههههه حرام عليج .. والله كنت مشغولة ما لحقت
مها :: شو اللي شاغلنج .. ليكون انخطبتي وانا ما دري
سارة :: هههههه لا حبيبتي بعدني ...
مها :: هي اتحسب بعد .. ولا والله كنت بقطعج .. حمارة وحدة ...
سارة :: هههههههههههههه .. الا تعالي متى رديتي البلاد ..
مها بحسرة :: اليوووووم رديت .. جي عالفير .. رقدت لي رقدة محترمة .. وجي من ساعتين ناشة ..
سارة :: أيوااا ... وليش ما اتصلتي لي اول ما نشيتي ؟
مها :: طاعوا هاي ... وين أقولج ما لحقت ... شمو وعويش يوا بيتنا ...
سارة :: والله .... يا حظكم متيمعيييييييين ...
مها :: تعالي عندنا ميرو وسموي وحلوم بعد بيون
سارة : اللـــــه يا حظكم والله .. ما ظن أقدر ..
مها :: ليييييش قولي حق محمد اييبج .. تراني ما نسيته بالصوغة .. جني اشتريت له أكثر عنج ههههههه
سارة توترت وبان عليها في كلامها :: ها .. ما دري انا بشوفه اذا يقدر أو لا ...
مها : مممم الظاهر مستوي شي .. مالي خص تعالي ..
سارة :: مهو بطالع اخويه وبرد عليج ..
مها :: اوكي برايج عيل .. ردي علي اوكي ... يلا مع السلامة ..
سارة :: مع السلامة ...
وردت سارة يلست حذال ابوها وتطالع محمد بخبث ..
محمد :: يا رببببي انا ما تقهرني الا هالنظرة اكيد تبين شي
سارة تتدلع :: محمد فديتك طلبتك ...
بو محمد ينش :: ياك الموت يا محمد .. أنا بروح أجابل النخل ..
سارة :: أبويه أبويه .. عادي أروح بيت ربيعتي ؟؟؟
بو محمد :: ومنو بيوصلج ؟
سارة تطالع محمد :: محمد
محمد :: نعم نعم نعم ؟؟؟؟ دريولج وانا مادري ؟؟
سارة :: الله يخليك ربعي كللللهم متيمعين هنااااك ابغي أجوووفهم ..
محمد :: يلا يلا ماشي ماشي ..
سارة :: ابوووووووويه قوله يودييييييييني
بو محمد :: والله كيفكم .. اثنيناتكم تنيازون ...
وظهر برع الصالة .....
سارة :: مممممممممممممحمد ...
محمد :: وعلة ان شا الله قووومي عني بلااااااااج ؟؟
سارة :: الله يخليك ودني ..
محمد :: ماشي ذلفي يلا .. روحي مب متفيج ...
سارة حست نفسها انذلت بما فيه الكفاية اليوم :: مشكور وما تقصر ..
وقامت عشان تسير غرفتها ...
محمد يلس يطالعها ببرود ... وراح فتح التلفزيون ...
ركبت سارة الدري وهي في قلبها حاااااااقدة على محمد اللي ذلها عدل وبالأاخير ما بيوديها ... يلست في حجرتها .. وعلى طول اتذكرت مها .. سارت تتصل لها عشان تعتذر .. وعلى طول من مسكت السماعة ودقت ع الرقم ياها محمد
محمد :: عندج خمس دقايق اتلبسي بسرررررررعة قبل ما أروح عنج ..
سارة تطالعه بغضب :: أكيد تتمصخر علي ..
محمد :: كيفج .. أنا بطلع الحين بتمشى ويا ربيعي .. اذا ما حبيتي تين ... فمالت عليج ..
سارة بفرحة سكرت التلفون في ويه مها :: الحين بروح أتلبس .. ثوااااني ...
ومحمد يضحك عليها ..
ما لحق يروح حجرته الا والتلفون يرن ...
شل السماعة ..
وبدون ما يقول شي ..
مها :: انتي يالمستخفة .. انتي قد هالحركة تسكرين في ويهي ؟؟؟ يلا قومي بسرررعة تلبسي وانا بمر عليج .. ولا تحاتين بهزب اخوج .. ما يوصلج ها؟؟؟ انا براويه..
محمد يضحك :: بتراوين منو ..
مها بقفطة تطالع الرقم اللي هي متصلة عليه : اوي هذا مب رقم ساروو يا فضيحتي ..
محمد :: لا هذا رقم سارة مب ساروه ...
مها بقفطة وفي قلبها تقول أكيد هذا محمد ..:: ها .. اوه اسمح لنا .. سارة وين ...
محمد :: بتي عندج .. بس ما في داعي تمرين عليها
مها ويهها فقط ع الآخـــــــــــــر : اه ... بااي ..
وسكرت الخط .. ومحمد ميت من الضحك ....
بس انتبه لنفسه
" لا يا محمد ... امل ما صار لها كم يوم رايحة عنك .. وتضحك ؟؟ وين عهدك انك ما بتضحك لحد ...خلاص .. رد لويهك الوارم .. لا تضحك .. بعدين يقولون عنك لعّاب .. "
~((القلب يسأل وين من اللي يداري بي من اللي يداري بي))~
وبعد ربع ساعة .. نزل محمد ومن وراه سارة اللي ركبت السيارة ...
وفي السيارة ...
محمد :: وين بيت ربيعتج ؟
سارة تطالعه بخبث :: ما تعرفه ؟؟
محمد باستغراب :: اانا شدراني ..
سارة :: البيت الوردي اللي بآخر الفريج
محمد :: هييي عرفته ...
وما مضت ربع ساعة الا وهم عند باب البيت
محمد نزل سارة بيت ربيعتها وسار عند ربيعه خليفة ... اللي كان متواعد وياه في الكوفي شوب...
ويوم وصل ...
خليفة يسلم على محمد :: هلاااا بوالشباب ...
محمد : هلا فيك ...
خليفة يطالعه :: وينك مختفي هالايام ... (تذكر اللي استوى لمحمد) ليكون بعدك تفكر فيها
محمد وويهه وارم :: لا تخاف أنا شلتها من بالي ..
خليفة :: هي جي اباك محمد العاقل مب من كم يوم .....
محمد يغير الموضوع :: انزين انزين قول لي ما شي اخبار يديدة ؟؟
خليفة :: لا والله هاي حالتنا ما تغيرت .. الا دريت ان أمل تزوجت ؟
محمد يطالعه باستغراب :: يعني سالم ما سوى لها حفلة زفاف
خليفة :: الله يخليك هو ما صدق على طول من ملج شلها من بيت اهلها ..
محمد بصدمة :: معقولة الحقد يسوي فيه جيه؟؟؟؟؟؟
خليفة:: أنا خبرتك قبل ونصحتك لا ترابعه بس انت ما سمعت كلامي ...
محمد بألم : اذا فات الفوت ما ينفع الصوت ...
خليفة : على قولتك .. ما بنقدر نغير شي .. الا تعال قول لي (يلتفت ويلاحظ بنت متكشخة ع الآخر )اوه .. اقولك تعال شوف هاي العرس .. لا بعد تضحك في ويه اللي يالس يرقمها .. صج ماشي حيا ..
محمد يلتفت : وين ؟
خليفة يأشر على البنية : هاي ..
محمد يطالعها .. وشوي شوي انتبه لملامحها وبدى يتمتم : مستحيل .. امل .. معقولة ... لالالالا ... مستحيل
خليفة : بسم الله شو بلاك ؟
محمد يطالعه والشرار في عينه : ما تدري ان هاي أمل ؟؟
خليفة بصدمة : شوووووو ؟؟؟؟؟؟؟؟ أمل ما غيرها
محمد قام واستغل انها روحها ..راح صوبها .. يواجهها ...
أمل تلتفت لمصدر الصوت القريب منها : اوه محمد ؟؟؟
محمد طالعها بنظرة احتقار .. وظهر على طول من الكوفي شوب .. أمل خانته مرة .. وهالمرة الثانية .. متعدلة الإخت ومتكشخة وما عليها من حد ..ولا بعد تغازل ... آه يا أمل
~((من عرفتك وانت تجرح ماكتفيت دنيتي وهي دنيتي مني اكتفت اقوى صدماتي من ايدينك خذيت هذي صدمه تو جديده شرفت))~
دموع محمد كانت مثل الأمطار الغزيرة .. يصيح على نفسه .. على حبه لوحدة صايعة .. اذا هي متزوجة وجي تسوي .. عيل قبل كيف كانت ؟؟ وفجأة حس نفسه مب قادر يتحرك .. وقف السيارة ع ينب ... وسند راسه على يده ... تم يفكر ... أمل .. أمل .. زعزعت حياتي كلها .. كانت أكبر عاصفة مرت علي .. لحظات مرت حسيت اني وياها مالكين الكون بكبره ... آه يا أمل ... دمرتيني الله لا يوفقج ....
فتح سدة السيارة وظهر ورقة وقلم وكتب بكل اصرار
~(( يا قلبي إنساها .. ولو كنت تتنفس هواها))~
هي .. بنساها ... اكيد ولاااااازم أنساها ... من تكون أمل عشان تزعزع أفكاري .؟ وتهددني .. أنا ما راح أنساها وبس .. الا بنسى كل البنات .. أكرهكم يا البنات .. أكره دلع البنات .. وحلاة البنات .. وكل شي في البنات .. لان بكل بساطة .. أمل وحدة منكم ..........
وعلى طول شغل السيارة على أساس انه بيروح البيت ... بعدها تذكر سارة ... على طول حرك صوب بيت ربيعتها ... ووقف هناك يترياها تظهر ....
عند سارة الجو كان وناسة وحشرة ...
سامية : ههههههههههههههههههههههههههههههه وشو سوى فيج .. أكيد عطاج طراق حار ..
مها بدلع : يخسي الا هو .. قلت له سوري .. جان يعطيني نظرة محترمة وتم يتمتم بكلمات مب مفهومة
حليمة : ههههههههههههه أكيد يسبج
مها : مادري بس أنا كرامتي ما سمحت لي أتم في نفس المكان .. على طول .. صارووووخ للفندق ...
سارة : وبعدين ..
مها : الصدمة بكبرها .. حصلته في الفندق اللي انا فيه ... عاد أنا القفطة كلها مااالية ويهي
البنات يضحكوووون
ميرة : تستاهلين والله .. عيل في وحدة عاقلة ترش الريال بايسكريم ؟
شما : لا بعد قوم بو بسكوت
عائشة : هههههههههههههههههههه مسكين حالج والله
مها : يلا يلا لا تيلسون تتمصخرووون ... أصلاً لأني حبوبة تستوي لي كل هالمواقف
سارة : ههههههههه باااااين
ويقطع كلامهم رنة الجرس
مها توايج من دريشة غرفتها ...
مها : اوووه واحد حلوووو داق الجرس
عاد البنات ما صدقن : اجوف اجوف
سارة تدقق : اوه ها محمد اخويه .. غريبة انا قلت له لا ايي الا بعد ما أتصل له ..
مها تطالعها وحاسة ان في شي : انزين روحي طالعيه يمكن يباج ..
سارة راحت تلم قشارها : يلا عن اذنكم .. والله يلستكم ما تنمل بس شو أسوي اخويه مر علي ..
ميرة : سلمي على اخوج
سامية : وانا بعد وصلي سلامي له
سارة :: هههههه صج فاضيات .. يلا مع السلامة ...
مها تذكرت صوغة محمد .. على طووول فتحت الكبت وشلت الكيسة : عن اذنكم بنات بروح أعطي سارة هالكيسة ...
وبعدها نزلت سارة بسررعة ...
مها : سارووو وويعة ان شا الله ... حشى أرنب ..
سارة : شووو ؟
مها : عطي محمد هالخريطة وقوليله هاي صوغة ربيعتي ..
سارة تطالعها باستغراب : لا والله ؟ وشو المناسبة ؟
مها : نسيتي اني قبل ما اسافر حلفت اني بييب له صوغة ..
سارة : ايوااا .. ان شا الله يقبلها
مها : لييييييش
سارة: بعدين بقولج محمد بياكلني ... انزين يلا مع السلامة
مها : اليوم بتصلج أعرف السالفة بكبرها ..
سارة : بااي ..
وركبت السيارة ....
سارة : السلام عليكم
محمد : وعليكم السلام ...
سارة استحت تفتح أي موضوع ويا محمد .. لان موضوع صوغة مها ربط لسانها ...
-----------------------
الساعة 8 المسا ..
سارة تكلم مها
مها : سارو ذليتيني حشى قولي شو السالفة ؟
سارة : صبري خليني آخذ نفس ..
مها : انزين ... يلا قولي ..
سارة : تعرفين أمل ؟
مها باستغراب : أي أمل ؟
سارة : بلااااج .. أمل راشد .. اللي كانت ويانا في الكلية ...
مها : وع .. ما اشتهيها هالصايعة ..بلاها ؟
سارة : غريبة .. الكل يقول لنا انها صايعة .. المهم .. بعد ما سافرتي انتي يعني جي من 6 شهور ..
مها : انزين
سارة : الله يسلمج أمل قامت تزورني بين فترة وفترة .. على اساس انها مرابعتني .. ومرة من المرات محمد اخويه جافها... فأعجب فيها .. ومادري شو اللي استوى من بينهم .. فرمسوا بعض ..
مها بصدمة : انزين
سارة : بعد مرور شهرين على علاقتهم .. محمد تعلق فيها وايد .. ونوى يخطبها
مها : وع من زينها يخطبها ...
سارة : ربج كاتب بعد .. المهم.. هي يلست تماطل .. ..و مرت فترة طويلة .. ومحمد بغى يحط حد لنهاية هالعلاقة ...
مها : اللي هو الزوااااج ..
سارة : علييييج لمبااااا .. المهم .. تحددت الملجة على اساس انها بتكون الأسبوع اللي طاف ...
مها : ماعلي ما عزمتيني
سارة : اللي يقول تمت الملجة .. المهم .. ونحن في الملجة .. تخيلي انا بفستاني وكل شي .. وكنت انا وأمل في الغرفة .. ومحمد واهل أمل عند الملاج في الغرفة اللي حذالنا.. يالسين يكتبون ورقة الملجة ... الا ويدخل واحد عليهم في غرفة الرياييل يصارخ .. أمل حبيبتي خلاص بتزوجج بس لا تتركيني ...
مها بصدمة : أببببي .. بعدين شو استوى ؟
سارة : ماشي .. قومي يا امل ودخلي حجرة الرياييل وقولي انج موافقة على سالم وانها مجبورة على محمد
مها : هاي شوو ؟ حيوانة ؟؟؟
سارة : أنا ما عور قلبي غير اخوية محمد .. تدرين ان هاللي اسمه سالم يكون ربيعه الروح بالروح ؟
مها : جذابة
سارة : والله العظيم ..
مها : صج حيوانة .. بس تدرين ... أحسن له ما خذها ..
سارة باستغراب : ليش ؟
مها : يا حبيبتي أمل معرووفة بحركات الصياعة اللي فيها ... وما خلت واحد الا شبكته وياها .. وشكلها استحلت محمد وسالم ربيعه .. بس سالم دش قلبها أكثر من محمد ..
سارة : ليتج قلتيلي قبل ما يتعذب اخوي
مها : معقولة يفكرر فيها ؟
سارة : هو ما يعترف .. يقول شلتها من بالي .. بس صدقيني .. هو مب محمد اللي أعرفه .. محمد اللي يتمصخر ويضحك .. محمد العنيد ... كل هذا اختفى وصار سرااااب ...
مها : آه منج يا املو .. حسبي الله عليج من بنية ...
سارة : خلاص لا تطرين اسمها ما اشتهيها ..
مها : على قولتج .. تاكل خراها .. ما عندنا سالفة نرمس عنها ... تعالي ..
سارة : ها
مها : عطيتي محمد الصوغة ؟
سارة افتشلت : لا
مها : لييييييش ؟
سارة : والله مادري .. روحه محطم وحالته لله .. والحين بعد أزيده واقوله هدية .. بيذبحني
مها : انتي ما عليج منه .. ما تبينه ينسى املو ؟
سارة : أكييييد
مها : عطيه الصوغة .. وبنشوف بعدين ..
سارة : ان شا الله عمووووو
-------------------------------------
يا ترى .. هل بتنجح خطة مها ؟ أو بالأحرى هل سارة بتنفذ طلبها ؟
ومحمد ؟ هل ممكن ينسى أمل ؟ بعد كل هالحب ؟ وكرهه للبنات ؟ هل ما بيتغير ؟ ولا في امكانية انه يتغير؟؟؟؟
وأمل ؟ هل بيصطدم محمد فيها مرة ثانية ع أرض الواقع ؟؟؟؟
تابعوووووووني ^_^
الجـزء الثاني
اليوم الثاني ...
سارة يالسة ويا ابوها ...
بو محمد : شو تبغيني أقول ؟
سارة : ابووووويه قول لي منو يشبه امي الله يرحمها اكثر
بو محمد : انتي
سارة : الله .. كشخة ..
بو محمد : مينونة الله لا يبلينا
سارة : ابوووويه
بو محمد : اشوفج تدلعتي زيادة .. قومي وعي محمد بسه رقاد
سارة : ابوويه اليوم الخميس خله يرتاح
بو محمد : نشي بسرعة وقوميه
سارة تطالع ابوها بغباء : ان شا الله
وراحت حجرة محمد
ويلست تقومه .. محمد كان سهران كالعادة ..فعشان جي ما كان حاس بحشرة سارة .. اللي ما خلت شي ما سوته عشان تقومه .. يلست تدق ع الطاولة وتغني عشان ينش وما طاع ينش .. فما حصلت غير موبايلها .. وقومي يا سارة وشغلي أغنية من أغاني الموبايل الحشرة .. وينقز محمد ذيج النقزة ..
محمد بذهول : بسم الله الرحمن الرحيم سكنهم في مساكنهم ...
سارة : شو جايف لك يني وانا ما دري ؟
محمد يحاول يستوعب اللي يستوي : انتي .. انتي اللي شغلتي الاغنية ؟
سارة باستغراب : هي
محمد يطالعها بانتقام : يا حمارة ما حصلتي طريقة أرقى عن هاي ؟؟
سارة بدلع : لو سمحــــت .. تغلط على كل شي إلا برستيجي ...
محمد يطالعها بغضب : ولي عني يالفيلسوفة ..
سارة : حموووووووووووووووووود
محمد : حمود ريلج ها .. فاهمة .. اسمي محمد .. عمج محمد
سارة تطالعه باجرام : انزين عمممممييييي محمد ما قلنا شي بس لا تزعل ...
محمد : ذلفي يلا لا ترمسيني ..
سارة : حراااااااااااااام بشو تبغني أرضيك ؟
محمد يفكر ..:: مممممم .. انتي وشطارتج ...
سارة بحيرة : يعني ما في شي محدد ؟؟
محمد : لا
سارة : اوكي
راحت سارة حجرتها .. وعلى طول تذكرت صوغة مها .. هي ما فجت الخريطة لأنها كانت ملزقة ومرتبة ..
سارة: خلني أقوله ان الهدية مني عشان ما يتحسب مهوو ميتة عليه
وراحت له
محمد يلتفت لها : ها شو يبتي شي
سارة : هي .. يود مع انك ما تستاهل ..
محمد يطالع الخريطة : ماشا الله مسرع جهزتي الهدية
سارة : هي تدري بعد زقرت المارد السحري يزهب لك اياها
محمد بفخر : أدري أدري انج كنتي ناوية تعطيني اياها من زمان .. فديتني والله لهالدرجة تحبيني ؟؟
سارة ضربته ع راسه : سير لا قاص على عمرك
محمد يطالعها بلوم : يلا برررع برع ما استقبل خنافس في حجرتي
سارة طالعته بإجرااام : انزين انزين .. جان ما خبرت ابويه علييييييييييييييك
وتمت تسوي له حركات وهو ساااااااااكت .. بعدين ظهرت عنه .. بس هي في الاساس كان تتجسس عليه من ورا الباب ...
محمد ما صبر.. فج الخريطة .. اللي كانت ريحتها خبااال .. ولا بعد معطرة بالعطر اللي يحبه محمد ...
أسئلة وايدة طرت على باله يبغي يسأل سارة عنها ...
كانت الهدية عبارة عن طقم بلوزة رجالية سودة وفيها ربطة حمرا ومن شكلها يبين انها غالية .. وفي نفس الخريطة كان موجود قوطي أنيق ملفوف بشريطة حمرا .. فتحه .. لقاه نظارة شمسية ماركة أرماني .. حسها منقادة شوي للموضة الدارجة هالأيام ... بس كانت حلوة .. وحصل قوطي ثاني شوي حجمه أكبر فيه 5 عطور رجالية .. منها العطر اللي يموت عليه محمد .. وسط ابتسامته .. انتبهت سارة عليه .. وعلى حيرته واستغرابه لشي .. كان ماسك شي شبه دائري وفيه اسمه .. وفيه صورة مب واضحة وايد .. وهي اللي حيرت محمد ..
دشت سارة حجرته : ها شو رايك في الهدية ؟
محمد بسعادة : من متى وانتي مجهزة الهدية ؟
سارة ارتبكت : ها .. من زمااااااان .. بس انت ما تعطيني فرصة ...
محمد يطالعها بدون اقتناع : اونج عاد
سارة تدزه : احمد ربك عطيتك هدية .. صج انك ويه فقر ..
محمد يطالعها بغباء : أنا ؟
سارة: هي ..
محمد شل كل الأغراض في الخريطة وفر الخريطة عليها : يلا برررع برع ..
سارة طالعته بغضب : اوفففففففففففففففف
وطلعت ..
محمد عرف ان هالهدية أصلاً مب من سارة .. هو عارف جنه قدر سارة خخخخ ... ما توصل للعطور الغالية والماركات .. عاد هني تم يفكر .. يا ترى .. منو صاحبة الهدية ؟؟؟أكيد معجبة فيّ >> واثق الأخ خخخخخ
---------------------------
في نفس الوقت في غرفة سارة ..
سارة كانت تكلم مها
سارة : مهو ما قدرت أقوله ..
مها : أحسن ما قلتي له بعدين يقول عني صايعة ؟؟؟؟؟
سارة : تصدقين انا حاسة انه يعرف ان الهدية مب مني ..
مها : ليييش ؟
سارة : مادري ..
مها : لا ان شا الله يصدق .. مب من زين الهدايا ...
سارة : هي مول .. والله حلوين يا مهو .. اقولج انتي شدراج ان محمد يحب هالنوع من العطور ..
مها : تبين الصج .. خخخخ عيبتني ريحتهم واخترتهم ..
سارة : خطيرة والله ..بس حليله والله اتخبل ع الهدايا ..
مها : اح اح .. لازم انا اخترتهم ..
سارة : ههههههههههههههههههههه مالت ..
------------------------------
~((لٌيُتٍ عِيًوَنْيً عُيًوَنٌكُ وٍقٍلِبٌيُ يُسٍكِنً بُحُشًاَكٌ كٌنُُتْ تٍدُرًيَ كًيٍفً اُحٍبًكً وًقٌتُهًاً تُعًرٍفٍ غٍلاٌكُ))~
سامية : اوب اووووب ما نرووووووم ... شاعرة الاخت ...
ميرة : طبعاً حياتي .. لاااازم اكون شاعرة ..
سامية : وينكم يا شمو وعويش تسمعون هالرمسة ..
ميرة : اوص جب .. يا ويلج ان خبرتيهم ...
سامية : وليش يا عمري .. الحب لا عيب ولا حرام ..
ميرة : والله حالة .. على كيفج تفتين.. حبيبتي هو عيييييب وبعد حراااااام .. بس متى يكون عادي يوم يتخلله الحلاااااال يا حلوة ..
سامية : يت تتفلسف الاخت .. عورتي راسنا ..
ميرة : اف يا سموي .. خبلني هالولد .. حشى مب جمال عليه ..
سامية : جمال ولا فرج ؟؟
ميرة : ههههههههاي ما يضحك يالسخيفة أنا أرمس جد ..
سامية : وشو المطلوب مني ..
ميرة تتنهد : قوليله اني احبه ..
سامية : شو ؟؟ ينيتي ؟؟؟
ميرة : يا عمري الحــــــــــــــــــــب جنون ..
سامية تنرفزت : ميرو اصطلبي احسن لج وعيب عن هالحركات (والله مب لايق سموي تنصح)
ميرة : مالت عليج وانا اللي استنجد فيج ..
سامية : اقول جلبي ويهج احسن .. ماصخة وحدة ..
ميرة : اووووووووووووف
----------------------
في بيت بو محمد ....
بو محمد ريال يعاني من وايد أمراض .. بس أكثر وحدة مأزمتنه هي القرحة في المعدة .. وكان دايماً يتعب ويطيح عليهم اذا استوى له هبوط بالدم .. بس هالمرة كان حاس بتعب فظيع .. بس ماكان يبغي يحسس عياله ..
سارة: ابويه شي بلاك ؟
بو محمد : لا ما بلايه شي .. سيري حطي العشا ..
سارة : ان شا الله ..
وسارت خبرت الخدامة تحط العشا ..
بو محمد يحاول يتناسى الألم : ها وين محمد ؟
سارة تطالعه بخوف : ابويه فيك شي ؟؟
بو محمد يعصر نفسه : لا عادي ألم متعود عليه ..سيري زقريه خل يتعشى ويانا ..
راحت سارة وقلبها مب متطمن على حال أبوها .. وهي كانت عارفة ان هالحالة زادت عليه بعد الملجة الزايفة اللي استوت .. لأن بو محمد كان المتأثر الأول بهالحادثة ..
سارة تدق الباب على محمد ..
محمد : منوووو
سارة: محمد فج الباب ..
محمد : شو تبين ؟
سارة : محمد فج الباب دخيلك بسرعة ..
محمد زاغ وفج الباب : شوو ؟
سارة : ابويه شكله ما يطمن الله يخليك شوفه يمكن يخبرك ..
محمد : يمكن انتي تبالغين ..
سارة : انت تدري ان ابويه يكابر وايد .. الله يخليك طالعه ..
ويسمعون صوت صرخة عالية ..
على طول ركضوا صوب مصدر الصريخ ... اللي هو عند أبوهم ..
سارة صرخت يوم شافت المنظر الفظيع اللي أبوها عليه ....... كان يرجع دم ... ومن هول المنظر محمد ما رام يحرك نفسه عشان يشوف ابوه ... بعد ما خف الدم من بو محمد .. توه محمد استوعب السالفة .. على طول قام وشل أبوه ..
محمد باستعجال : سارة روحي ييبي السويج بسررعة ..
سارة بخوف وتصيح : ان شا الله ..
ومنو يقول .. سارة استوت صاروخ .. وشلت السويج ولبست عباتها ونزلت ..
محمد يطالعها : انا بسير ويا ابوي ما في داعي اتين ..
سارة طالعته بتحدي : مب على كيفك .. مثل ما هو أبوك تراه ابوي ..
محمد ما قدر يجادل أكثر .. قام وسحب عنها السويج بعصبية وظهر .. سارة ما اهتمت له .. ركبت ورى وراس ابوها في حظنها .. محمد كان يسوق بسرعة ... عشان يلحق على ابوه ...
-------------------
في المستشفى ...
بو محمد مرقد في حجرة خااصة .. ومحمد وسارة عند الدكتور ..
الدكتور : والله مادري شو أقولكم .. بس ابوكم حالته ما تطمن ..
سارة : خير يا دكتور ؟
محمد طالعها بنظرة عشان تسكت (هي والله ما عندنا بنات رازين الويه شراتج يا سوييير)
الدكتور : بصراحة نحن للحين ما نروم نرجح المرض ..
محمد : يعني شو؟
الدكتور : والله نحن شاكين .. يا هو التهاب شديد في المعدة وهذا اللي ممكن نعالجه .. او لا قدر الله سرطان في المعدة ...
محمد بصدمة : سرطاااااااااان ؟؟؟؟؟؟
سارة حطت يدها في حلجها : لالالالالالا مستحيل ..
محمد شوي و كان يبغي يكفخها *صج والله وايد تطالع مسلسلات خخخخ*
محمد : وما نروم نطلعه اليوم ..
الدكتور بلوم : أكيد يا خي ما راح تروم .. نحن لازم نشخص الحالة .. عشان اذا لا سمح الله اذا كان في ورم نستأصله قبل لا يوصل لباقي الجسم ..
محمد تنهد : عيل ما يحتاي حد يطالعه ولا يرعاه ؟؟
الدكتور : لا لا تحاتي راح يكون تحت العناية وكل شي تمام ...
محمد : على خير ان شا الله ...
وظهر محمد من المستشفى وفي السيارة هزىء سارة ع الموقف اللي سوته ..
محمد بغضب : مرة ثانية لا تعيدين حركات المسلسلات هااي فاهمة ؟
سارة : يعني تباني ارقص مثلاًً ؟؟
محمد : ماقلت ارقصي بس حشمي اني أنا ريال يالس ... ماله داعي تكلمين ريال وفي ريال جلب مثلي حذالج ..
سارة تعرف ان اذا محمد سب عمره فهذا يعني انه مفووول من الغضب ... ففضلت تسكت ولا بييها طراق حار من محمد .. * عاش حمود والله *
----------------------------
اليوم الثاني ..
محمد نش من وقت تريق وسار دوامه .. تم له جي لين الساعة 11ونص و عقب خذ له إجازة لين آخر الدوام عشان يلحق يجهز أغراض أبوه ..
رد البيت هلكان لأنه سهر بارحة من زود التفكير في ابوه .. واليوم ناش من وقت .. فما حس بنفسه وهو منسدح ونايم ....
العصر .....
مها كانت متصلة ترمس سارة ..
ردت عليها سارة بصوت كئيب : هلا مها ..
مها بخوف : ساروو بلاااااج زيغتييييني ؟؟؟
سارة بحزن : مافيني شي..
مها : أي ما فيج شي .. أقولج حد مات عندكم ..
سارة : فال الله ولا فالج ..
مها تنهدت : اشووووووه الحمدلله .. عيل قولي بلااااج ..
سارة يلست تصيح : ما رووووم أقووولج ..
مها بخوف : سارووو خوفتيني شو استوى ؟؟؟
تمت سارة تصيح ومها خافت عليها ..
مها : سارو عادي ايي بيتكم الحين ولا بتظهرين ؟
سارة بصوت حزين : لا ما بظهر مكان ..
مها : عيل يايتنج الحين .. بااي ..
وسكرت عنها ..
بعد نص ساعة مها دقت جرس البيت .. ومحمد نش من صوت الجرس .. دش الحمام عشان يتوضى ويصلي الظهر والعصر لأنه راحت عليه نومة *اخ عليك ما تصلي الصلاة في وقتها*
بعد ما دشت عل طول صاروخ صوب حجرة سارة ..
دشت عليها ..
مها بخوف : سارو .. سارو بلاج ردي علي ؟
سارة تمسح دموعها وخشمها احمممممر : هلا مها ..
مها : اهلين .. ها شو بلاج .. زيغتيني والله قلبي وقف ..
سارة تمت تطالعها والحيرة بعينها وردت تصيح ..
مها يلست حذالها وخذتها بحضنها ويلست تهديها ...
بعد ما هدت شوي ..
مها : سارة اخوج فيه شي ؟ * ها اشمعنى بديتي بالاخو مب بالأبو صج مستخفة *
سارة : لا
مها : أبوج ؟
سارة هزت راسها ايجاب ..
مها حطت ايدها على قلبها : بسم الله شو بلاه ؟؟
سارة ودموعها تعلن الهطووول : شاكين فيه سرطان المعدة ..
مها بصدمة : شووووووو ؟؟؟
سارة تصيح : هيييييي .. والله انك ما تستاهل يا بويه ..
هني محمد وقف عند الباب بعد ما سمع الحشرة ...
مها : يا سارة يا حبيبتي .. لازم تكونين انسانة مؤمنة بقضاء الله وقدره .. واللي الله مقدرنه بيستوي .. انتي قولي ان شا الله وكل شي بيكون اوكي ...
سارة بعد ما حست بالراحة شوي : ان شا الله ...
ابتسم محمد لكلام مها .. وسار الصالة عشان يتريى ربيعة سارة تظهر عشان يقولها تجهز اغراض ابوها ..
ما مرت نص ساعة الا ومها ظاهرة من عند سارة .. قفطت يوم شافت محمد .. سلمت وظهرت ..
>>>> اكيد قالت يا رببببي فديت روحه هالعسل والله خخخخ اتخيل بس ههههههههههههه
------------------------
مر أسبوع على هالحادثة ..
وجربت نتايج تحاليل بو محمد ..
والحمدلله ظهر بو محمد ما فيه سرطان .. بس الالتهاب مب شويه .. فنصحه الدكتور يبتعد عن البهارات والاكل الحار وما يخلون بشكارتهم الهندية تطبخ >>> خخخخ هاي من عندي ..
بو محمد رد البيت ويا محمد .. وسط فرحة سارة بعدم مرض ابوها .. ارتاحوا وايد .. صح ان ابوهم كان ما زال تعبان .. بس هذا احسن من انه يظهر عنده سرطان
في نفس اليوم ..
ميرة وسامية كانوا يايين يزورون سارة ..
جي ع العصر ..
وطبعاً تعرفون نية ميروو شو ..
بس سامية سايرتها بس مستحيل تسويها . ..
سارة بفرحة : يا حيا الله ميرو وسموي .. هلا بالثنائي الحلو والله ...
سامية : هلا فيج الغالية .. عاد تدرين بعد قلنا ربيعتنا قاطعة لازم ما نقطعها ..
سارة : هههههههههه والله اسمحولي بس ابويه كان تعبان هذيج الفترة والحمدلله ويهكم ويه خير علي ... ابويه معافى وسليم ..
ميرة : هي لأني انا ييت بيتكم
سارة : يا هلا والله بالغالية .. عن اذنكم بييب لكم العصير ...
وبعد ما راحت سارة ..
ميرو تدز سموي ..
سامية : اووهوووو بلاااااج ..
ميرة : روحي رمسيه يلا هو هني ..
سامية تطالعها بقفطة : ميرو عيب عليج انا استحي ..
ميرة بعصبية : روحي أحسن لج لا أفضحج جدام سارو ..
سامية تطالعها بغباء : انزين انزين .. مب مشكلة .. سايرة الحين اففففف ...
يا ترى .. هل بتروح سامية وبترمس محمد عن سالفة حب ميرة له ؟
ومها ؟ بتوافق ع هالعلاقة ولا ما بتدري بشي ؟
هل بتكون علاقة عابرة ؟؟؟؟؟
معقولة محمد بيحب ميرة وهو بعده مصدوم من أمل ؟؟؟ ؟
تابعووووني ^-^
التعديل الأخير تم بواسطة بياض الصبح ; 23-02-12 الساعة 12:18 AM
سبب آخر: اضافه اسم الكاتبه
|
24-03-09, 06:36 AM
تستاهل المصرية والله .. خخخخخخخ 
* يالله تحسبت بتقول جملة مفيدة خخخخ مالت عليك *
جديد مواضيع قسم القصص المكتمله
العرض العادي
