________________________________________
"""الجزء الخامس عشر"""
-الفصل الثالث-
يا مرتضي بالهون دورلك اقران بتكون لك بدر و شمس وظلي تمشي حسب رايك على كيف ماكان و تبادله بزيف الغلا و التسلي ولا انا عندي قناعه و ايمان بمشي بعقلي و العواطف تولي
حاسه بهزات عنيفه اتهزني و تزلزل كياني..سيناريو الخمس سنين اللي فاتن سيناريو مّر و يطعن طعن السجاجين في حنايا فواديه..يمكن هاذي المره الاولي اللي حاولت فيها استرجع هالشريط في ذاكرتيه..طول المدة اللي فاتت و انا احاول اتجنب بيت عموه..اتجنب احمد..و اتجنب كل شي له صله بالماضي الاسود..لاول مره في حياتي احس براحه نفسيه..راحه لاني فرغت اللي كنت احسبه من ذل و قهر و حسره..بس المشكله انه مخي بدا يدخل في متاهات..كيف بعيش مع احمد؟؟ كيف بعيش مع انسان اهاني..و طعني فالظهر..لا و المشكله انه احمد كأنه اللي استوا ما يهمه..معقوله ما يتذكر اي شي؟؟!!
لطيفه: و اخيرا وصلنا البيت...
سلطان: هيه و الله..حشا يالبنات من تدخلن محل ما تظهرن منه...شوه تبن تباتن فيه انتن؟؟
لطيفه: و انته بسم الله توني داشه و انتي اتقولي يالله ما خلصتي؟؟ دامنه هاذا اخر كورس فالجامعه خلني اكشخ...
سلطان: شوه تكشخين...لطفين العرس ما بقى عنه الا شهر و نص...و انتي اتحاتين الجامعه؟؟!!! شوه هالخريط هاذا...
لطيفه: اووهووو من هالعرس..اللي يسمع باخذ هزاع بن زايد!!! تراه الا احمد..شوه يعني؟؟!!!
سلطان : أشووووووو!!!! وشوه بلاه احمد مب عايبنج؟؟!!!
لطيفه: انا ما قلت جيه!!
سلطان و هو ايوقف جدام الكافتيريا: اول شي خلينا نترس بطونا..شوه تبين؟
لطيفه: انا ماكل من هالسقم..
سلطان: بتاكلين و انتي حماره..ما صدقناج تنتفخين شوي..اييج الشور انا بطلبلج..شوف رفيق هات واحد همبرجر لحم..مايونيز..كاتشاب...و بيض..و هات اثنين شاورما دياي..و ثنين فلافل..
لطيفه: حشا طلبت حق قبيله انته!!!
سلطان: هبي...ردي الشهاده..
لطيفه: لا اله الا الله...هاذا جيل الهبرجر..عمرك 22 و اللي ايشوفك ايقول بو 33..كله من هالهرمونات
سلطان: لا حووووول...بطني هو ولا بطنج..
لطيفه: بالعافيه ان شالله...شفتها هالخامه اللي تلحقنا اليوم فالسوق..
سلطان: اي وحده؟
لطيفه: يونك ما شفتها...يعل عيونها الفقس ان شالله جانها ما شلتهن عنك..
سلطان: الحمدلله انج ما فضحتينا انتي اليوم...برايها و انتي شوه تبينها؟؟
لطيفه: شوه..شوه اباها!!!! اشوفها تربع ورانا من محل لين محل تبا اترقمك..سود الله ويهها الخايسه..محد سلم من شرهن..على اخر الزمان هن اللي يلحقن الرياييل...هاي علامات القيامه الحريم فصخن الحيا..
سلطان: انزلي انزلي خلينا نيلس فالحوش..
نزلنا و يلسنا في القعده الزجاجيه المفتوحه على الحووش..بغيت ادش داخل بس سلطان ما خلاني
سلطان: وين بها؟
لطيفه: بسير فوق بعق عباتي و بتسبح
سلطان: تعالي تعالي يلسي عندي ما عرف اكل ارووحي..تعالي ماحد غيرج بياكله هالهمبرجر..
لطيفه: سلطاان حرام عليك..ما فيني انتفخ
سلطان: خلي عنج...بتخبرج كم وزنج الحين؟
لطيفه: 58...غديت دبه كبر الدرام..بينصدم الريل..
سلطان: لا لا شوه دبه...بطه بطططططططه ما شالله عليج..طولج كم؟
لطيفه:160....ما فيني اذا كلت الهمبرجر بغرز(بغوص) من المتن..
سلطان: يعلني بلاج يالبقره...الشباب ايموتون عليهن هاذيلا المدربحات...
لطيفه: هيه شرات هاي اللي لحقتنا اليوم..
سلطان : لا حوووول ردينا...
لطيفه: هيه نعم بنرد...الخايسه ليتك خليتنيه اادبها...في ذمتك لو ما شافتني وياك شوه بتسوي؟
سلطان: بصراحه؟؟
لطيفه: هيه عيل تبا اتقص عليه..
سلطان: ولا هيه بترقمني ولا انا برقمها بصراحه ما تفوّت غندوووره.
لطيفه و هي تفر سلطان بالمخده: شووو..شوووو..شوووو...اسميك لا تستحي ولا تخّيل...ووين الحب الاسطوري..ووين هالخرابيط...صدق انه البنات مقصه..
سلطان: حووووووووه...شعندج اتناقعين..هاي سنة الحياه شوه قالولج الرسول انا؟؟!!!
لطيفه: عز الله الرسول عن سواياكم...ووين ضبابه و ضبابه..
سلطان: ضبابه فالقلب..
لطيفه: هيه امبين؟؟!!!
سلطان: عيل انا ما بعيش كاهن الين ما عرس..قلتلهم يوزوني ما رمت لهم حيله..لازم ببصبص شوي..و هاذا الزمن الريال اللي ما يعرس فيه و يحفظ عمره بيضيع!!!!
لطيفه: و الله انكم يالرياييل ما فيكم امان..
سلطان: عاد انا غير و الشباب غير..يعني انا اغير الموجه كل ست شهور مره..يعني بس بنتين فالسنه
لطيفه: و تفتخر بعد!!!! عيل غيرك شوه ايسون؟؟
سلطان: اوووووف يا غيري..كل يوم بنت..بس عليه رمت امسك عمريه هالكثر..شوفي لطفين المغازل نكهة الحياه..و البنات منهن الخراب اللي حاشمه عمرها ما بنتعرض لها..شفتي بعينج..و ايخسن هاذيلا ايساون ظفر من ظفور ضبابه..ضبابه غيييييييررررررررر!!!!!
سلطان: تعالي...بتخبرج؟
لطيفه: لبيه؟
سلطان: لبيتي في منى..شموس اليوم حاشره الدنيا عليج..اتقولج لازم اتسيرين اتسوين بروفه ما دري شوه مالت الفستان..
لطيفه: لا حووووووول...
سلطان: بتخبرج...متا بتزهبين انتي؟؟؟ عنبوه اممممره ما سرتي السوق ولا شتريتي شي!! احيدهن البنات ايطيحن في دبي و بوظبي و انتي امررره ما ظهرتي من البيت من انخطبتي!!!!
لطيفه: مب متفقيه..
سلطان: عيل متفيقه لهالجامعه تشترين هالطراطير...لطيفه شي بلاج انتي؟؟؟ امره اشوفج مالج بارض(نفس) لهالعرس؟؟
لطيفه و هيه اتنزل راسها: شدراني!!!
سلطان: شي قاصرنج؟؟!! تبين فلوس؟؟!!
لطيفه: ما علّيه قصيره..و مهريه الين الحين ما صرفت الا الربع منه..
سلطان: عيل اكيد انه امايه ما تفيقت لج؟؟؟ تبيني انوديج انا مستعد اني اوديج..امره لو تبين لبنان ولا ايطاليا..
لطيفه: لا لا امايه امررره ما قصرت...و بعدين تتطنز انته!!!
سلطان: لا حشا ما طنزت...و الله ارمسج صدق..تبين لبنان تتزهبين بوديج..اسبوع وبنرد..
لطيفه: و بفزع الين لبنان عسب زهاب!!!!
سلطان: و الله مب زد عنج بنات هالايام..ربيعي مودي اخته ايطاليا تتزهب ساروا اسبوع و ردوا..شوه الراي؟
لطيفه: لا لا ...ايطاليا و باريس بكبرها اهنيه عندنا في دبي...يوم بخلص امتحانات بسير اتزهب..
سلطان: و الله مادريبج..جيه احسبج متكاسله..
عقب فتره صمت: سلطان؟؟
سلطان: هلا..
لطيفه: الحين انته صدق اتحبها ضبابه كل هالحب؟؟
سلطان و بنقمه: ليش عندج شك؟؟
لطيفه: لا لا ....بس..مادري
سلطان: اووهووو..عشان سالفت البنت اللي اليوم فالسوق؟؟!! لطيفه ضبابه ما باها يوصلها شي..
لطيفه: مب انا يا سلطان اللي بتربع و بتواشي..
سلطان: شوفي انا ريال و ما يعيبني شي ولا اني خايف من شي..بس ضبابه وايد حساسه..ما ريد اجرحها...
لطيفه: ما تحس انك مغصوب عليها...ولا مستحيل انك امررره يعني..بتموت فيها..لو ما كانت محيره لك بتحبها كل هالحب؟
سلطان و بعد تفكير عميق: شوفي لطيفه..اتصدقين عااد دوم هالسؤال ايدور في بالي.. لو ارد عليج ما بتصدقين..لو ما كانت ضبابه محيره لي..جان ما خذتها..
لطيفه: اشووووو!!!
سلطان: ههههههه...انا ما قول انه ضبابه فيها شي ينعاب..ضبابه بنت ملكه باخلاقها قبل لا تكون ملكه بجمالها..حلوه..و متعلمه..و راعيه بيت..و اتسد انها بنت سيف بن عمير..ابوها الله يرحمه راس طايفه
لطيفه: يا سلاااااااااااااااااام...
سلطان: يعني من يوم انا صغير و انا اسمعهم ايقولون ضبابه محيره لسلطان..ضبابه بياخذها سلطان..سلطان ماله بد عن ضبابه..يعني هم ربوني على حبها و غصبوني عليه..قلتلج البنت حشيم و الف واحد يتمناها..و الين يومج و هيه تنخطب..بس لو كانت لي الفرصه يمكن احب وحده غيرها..ولا اخذ وحده غيرها..
لطيفه: لهدرجه!!!
سلطان: هيه ليش لا...هاي العادات و التقاليد معقده بالدنيا تعقيد..الا بنت عمك لازم تاخذها..و هاي بنت خالك ماحد لها غيرك...شووه هاذا التخربيط..ضبابه..اممم..يعني شوه اقولج..مادري اتعودت اني احبها..ولا قولي تربيت اني احبها..يعني احسلي اني احبها..لاني باخذها باخذها طيب ولا غصب..
لطيفه: صدقك والله..شوه هالتخلف..انا هاذا اللي مضايقني..يوم خطبني سالم..مادري..و عقب اعترض احمد..مادري احس بعمري اهلنا هم اللي يحركونا..يعني الحين لو تييك الفرصه انك اتقول لا ..بتقول؟؟!!
سلطان: اكررررررررررررررررم...لطيفه حطي في بالج شي واحد..ضبابه من لحميه و دمي..و بنت عمتيه..لو مشوهه و لا مشلوله و على كرسي باخذها..هاي بنت عمتيه..و اذا ما شلنها عيونيه يشلها راسيه من فوق..
لطيفه: يعني انته مب مجبور عليها؟؟!!
سلطان و بعدم اكتراث: لا حشا...قولي انربط مصيري بمصيرها..و هاي الدنيا..
لطيفه و بعد تردد: يعني احمد مب مغصوب عليه؟؟!!!!!!
سلطان: شووووووه...شوه مغصوب..عشان جيه انتي متعايزه؟؟!!! منوه حط هالافكار في بالج؟؟ صح انه هو ملزوم بج..بس ما حد جبره عليج..و احمد يا بويه شوره في راسه..لو بغا غيرج ما حد بيروم يجبره عليج..و الريال من خاطره يباج..خلي عنج هالتوسويس يا بويه انتي بنت حمد بن سلطان..مب من الرقعه..
لطيفه: مادري...برايك انا بسير فوق..
سلطان: طرشي كشميرا تيبليه بيبسي..
لطيفه : ان شالله..
++ ركبت الدري درجه درجه..في كل درجه اسأل نفسي هالسؤال..معقوله احمد مب مغصوب عليه؟؟!!..هيه احمد مغصوب عليج و الدليل انه الين الحين ايغازل و ايكلم الخامه هندوه..و ارد اسأل نفسي السؤال نفسه..و ارد علي نفسي لا مب مغصوب عليج..احمد ريال و كبير و شوره في راسه و ما بينجبر على العرس..لو كان مجبور جان انجبر من زمان..مب الحين و هو عمره سبع و عشرين..عنبوه الشعر الابيض بدا يظهر في راسه..مادري و الله العظيم مادري..الترتيبات بدت تاخذ مجراها بصوره مب طبيعيه..اسمع حجوزات..و فرق..و عيّاله..و مالت صالون و مالت الشعر..و الحنا..يالله يالعروس كم يبالها عباله.. وانا كنت مجرد شاهد اعيان..هم يختاورن و انا اقول موافقه..هاذا اللون حلو؟؟ هيه حلو..هاذا الموديل حلو؟ هيه حلو..هاذا الديزاين عايبنج؟ هيه عايبني..سيري يالدنيا و بسيروياج..ما عندي اعتراض على فكرة العرس..لانه على قولت سلطان اخويه باخذه باخذه ما شي مجال اني اتهرب من شي خلاص صار حكمه بايد اهليه..بس المشكله انه ما عندي رغبه في هالشي..و كل اللي اسويه عشان ارضي خواطرهم و الا انا مالي نفس فيه..اوكي مثل ما يبون هاي تمثيليه و بلعب فيها دور البطوله و انا بكمل للنهايه و بشوف اذا احمد بيقدر ايكملها ولا لا ؟؟!!
دخلت الغرفه اللي مب لاقيه مكان احط فيه ريولي..الاغراض و الاكياس في كل مكان..الفساتين محطوطه على الكراسي..الجواتي مصففه فالكراتين..المغربي معلق لانه يباله تصليح لازم ايوسعونه شوي..الشي الوحيد الايجابي اني متنت..اما شخصيتيه انمحت تماما..مالي اي راي..ما اعترض على اي شي..حاليا يالسين ايأثثون غرفه شمسه اختيه الجديمه لانه بنحط فيها الزهاب..و احتمال انبات فيها ليلة العرس..حتا ديكور الغرفه ما اهتميت به..كل شي على راحتهم..شي خططوله من البدايه ايكملونه للنهايه..
بدا الكل ايلاحظ الفتور و التكاسل اللي فيني..بس ما حد تكلم غير سعيد اخويه اللي دش عليه مره و قالي بالحرف الواحد: " لطيفه..اذا ما تبين العرس قوليلي..و انا بكنسل كل شي..و ما عليج من اهليه انا بتصرف وياهم..مب لازم انشوفج اتموتين جدامنا كل يوم عسب هالعرس..ما يسوا عليج هالعذاب"..اما انا ما عندي اي استجابه ولا اي رد فعل..عرست ولا ما عرست ما عاد يهمنيه..اللي يهمني شي واحد بس..اني اعدي المهمه على خير..و ارضي اهليه..و رضاي على كل شي ايصير مجرد شكليات بتعدي مع مرور الايام..و ما حد له قرار بأي شي غير احمد..هو اللي اختارني..هوا اللي بغا العرس و اني انا اكون شريكه حياته..و هو اللي يمشي كل شي بشوره..و اعتقد انه في ليله العرس كل شي بيتوضح.. و احمد بإيده القرار..على قولتهم ولد عمتج و بيحطج في عيونه..ليش الرفض؟؟ ليش العذاب؟؟ ليش القهرو الحسره؟؟ هاي الدنيا وايد قبلي اللي عرسن مب برضاهن بس عاشن و استقرن..ليش ما اكون انا وحده منهن..و زواج بحب هاذا كل تخربيط..صح ولا انا غلطانه؟!!
قمت ادور فالغرفه و احاول استوعب انه اللي جدامي كله على قولتهم زهابج..بديت المس الفساتين واحد واحد بايديني و اشوف الالوان واحد ذهبي و احد عنابي..و الثالث فيروزي..و السادس مادري شوه لونه..موديلاتهن بصراحه اتسكت علاخير..بصراحه ما اتذكر اني اخترت هالالوان او هالموديلات اللي اتذكره بس اني كنت يالسه انا وعايشه اختيه في محل و هي اترويني الموديلات اللي رسمهن المصمم و انا اقول اوكي اوكي..
اما المغربي فكان من اختصاص شمسه اختيه اللي سارت بوظبي و لفت شارع شارع خذت القطع و الموديلات على ذوقها..اما انا ما اتذكر الا اليوم اللي سرنا فيه دبي انفصل فستان العرس..الموديل كان على شخصيه شمسه اختيه لانها هيه اللي تكلمت مع المصمم اما انا خذولي فيهن القياسات بس..و اذكر ذاك اليوم طول الدرب و نحن رادين العين و شمسه اختيه زعلانه عليه ما طاعت اتكلمني بسبب ردة فعلي السلبيه على فستاني اللي المفروض كل بنت تختاره و هي متوتره و تختاره على ذوقها مب على ذوق غيرها..بس انا ما فرقت عندي واثقه من ذوق شمسه..يا ناس لا تلوموني و الله العظيم مب بكيفي حاولت بدال المره الف اني اركز..بس ما قدرت..ماقدرت...
قعدت على الشبريه المكان الوحيد الفاضي فالغرفه..و حطيت راسي بين ايديني..و هلت دمعه من عيني حارره على خدي يوم شفت الشنط محطوطه على طرف..هالشنط اللي بينحط فيها زهابي..هالشنط اللي بتنهي عمر وردي عشته بأحلا ذكرياته و امرّها في هالبيت..هالبيت اللي عرفت فيه الحب..الفرح..الدلع..الغياض..
هالشنط..بتدخلني في عالم كله متاهات..ما عرف بدايته من نهايته..فجأه دشت عليه شمسه اختيه..جنها اعصار هايج..بسم الله شوه فيها!!!!
شمسه: لطفففففففففففففففففففين...انتي اهنيه؟؟!!!! شله ما تردين من الصبح على التيلفون؟؟
لطيفه: بسم الله الناس اتقول السلام عليكم..مسا الخير..مسا اللوعه..مسا الارف..و بعدين ما سمعته..
شمسه و هي اتدور مكان بصعوبه على شان تيلس عليه: المهم...يالله قايسي الفساتين عشان انزلهن تحت ..يالله عشان يكونهن و يحطونهن على المانيكانات...
لطيفه: الشميسي...فديت روحج..مالي نفس..
شمسه: لطفين...حبوبه..قومي الله يخليج..يكفيني هاذا اللي في بطني من اصبح و هو ايرافس..
قمت مش عشان خاطرها..بس عشان افتك من هالمهمه..قايست الفستان الذهبي..فجيت شعريه عشان ارويه شمسه اذا يباله قص ولا لا ؟؟
شمسه: يخررررررررررررررررررب بيتج...لطووووف...ولا لبنانيه واقفه جدامي..ماشالله عليج..و الله و احلويتي يوم متنتي..اسميه بيتخبل بوشهاب عليج لو بيشوفج الحين...
لطيفه: لا لا دخيلج..خباله الحين ايكفيني...
شمسه: و ماشالله الشعر طول ...
لطيفه: ما يباله قص؟؟
شمسه: لا لا واصل نص ظهرج..و انتي ما شالله شوي طويله..زين زين برايه..اتعرفين الصبغه السودا مناسبتنج وايد..مبرزه بياضج..
لطيفه: المهم..ابدل خلاص؟؟!!
شمسه و هيه اتحط ايدها على بطنها: لطفين..باجر عليج دوام؟
لطيفه: لا ليش.؟؟
شمسه: باجر بوديج دبي...بنسير انسوي بروفه على الفستان..عشان خلاص انشطب..باقلج الاغراض الداخليه..و قمصان النوم..و يالله نسينا الميك اب!!!!
لطيفه: ما فيني اسير..مب لازم..تراهم خذوا القياسات..اكيد بيطلع اوكي..اما الاغراض الداخليه انا مب مستعيله بعده باقي شهر و نص..و قمصان النوم ما في داعي بشتري بيجامات حرير..
شمسه و هي تعتدل باليلسه: شووووووو!!!! يون بيجامات حرير...اقولج قمصااااااان..خليهن عليه انا بتصرف..
لطيفه: لا يعني لا ...لو الموت ما لبستهن هاذيلا ام سيور..المفصخات..ابغغغغغغي بيجامات و بس,,,و مب شفافات لو سمحتي..
شمسه:سيري اشتري ارووحج
لطيفه: لا لا دخليج..انتي انتي..خلصيني...ما ريد اسير اشتري..
شمسه و يهها محمر: لطيفه...النحاسه ما بتفيدج..لا تتحرين انه بهالحركات بيتكنسل شي..عرس و بتعرسين..ان طرتي ولا حليتي..فأحسلج خلصي عمرج دام عندج فرصه..خلاص من الاسبوع الياي بنبدا نهتم بج..خلاص انتي عروووس متا بتستوعبين هالشي!!!!
لطيفه و بإنفعال: مااااريد استوووووعب...مب لاااااازم...مب غصب..عرس و بعرس غصب..و ريل و ما باه..كل شي طلبتوه مني سويته..بعرس و باخذ واحد لا يباني ولا اباه..بعيش وياه ليلي نهاري..و ما قلت شي..شوه تبوني اسوي يعني اكثر عن جيه...مب بس عليه مستحمله هالوضع..مب بس عليه ما نطقت بكمله..بس خلااااااااااااااااااص...خلااااااص ما روم اتحمل اذبح عمريه يعني؟؟!!!!!
شمسه و هي مستغربه من ردة فعل لطيفه اللي اول مره تبينها جدامهم: و يوم انج ما تبينه جان قلتي لا ماباه..؟؟!!
لطيفه و هي اتحط راسها بين ايديها و اتصيح: قلت و الله اني قلت مابااااه...شمسه و الله اني ماباه..ما ريد اعرس..ماريد اخذ احمد...دخليج شوه اسوي...قوليلي..؟؟!! شمسه احس بناااار في يوفي لا اروم ارقد الليل ولا اروم اتنفس فالنهار؟؟!!!!
شمسه و بعد فتره صمت هدت فيها لطيفه: يعني انتي مغصوبه على احمد!!!!!! بس لطوف من يوم يومج و انتي تبينه؟؟
لطيفه: شمسه...ادري انه كل هل البيت يتحروني احب احمد شرات قبل..بس احمد ما يحبنيه..يبغضني..شقايل بعيش وياه؟؟!! شميس انا قلت لا و الله العظيم اني قلت لا ماباه..بس شووو..عطوني الاذن الصما..يعني بويه في ذمتج...بيرد ولد سيف بن عمير!!! ولد اخته!!!
شمسه و بعد تنهيده طويله: لطيفه...لطيفه..منوه قالج انه احمد ما يباج..الريال ليل نهار و هو ايحاتي هالعرس..كل ما يشوفنيه يتخبرني عنج..شي قاصرنها؟؟ الفلوس كفنها؟؟ تبا شي محدد فالعرس؟؟ حرام عليج..شال همج اكثر عن اي شي..كل ما يختار شي ايقولي هزرج بيعيب لطوف..لطوف اتحب هاللون..
لطيفه: اووهووووو...و انتي شدراج..انا ادريبه زين..بذنيه هاي اللي يعل ياكلها الدود ان جذبت انه قال ما يباني لاسباب انتي اتعرفينها اكثر عني صح ولا لا ؟؟؟
شمسه و بطولت بال: لطيفه...شوه تبيني اقولج..انا عرف انتي شوه تقصدين..بس هالموضوع انا ما بفتحه معاج..لانه خلاص انتها من 20 سنه..انسيه..و انتي اصلا شو دراج برد فعل احمد على هالموضوع؟؟!! سمعي الشور..خلي كل شي وراج..لطيفه..و الله و الله انه يحبج و ايعزج..و هاي مب كلمه اخت لاختها.. انتي اتعرفين انا شوه بالنسبه لج..انا اكثر من اخت انا ربيتج من يوم انتي ياهل..صح ولا لا ..ريحي اعصابج..و بوشهاب بيحطج في عيونه..باجر بخطف عليج انزين؟؟ بنسير و بتتزهبين و بنرد؟؟
لطيفه: لاااااا يعني لااااا...مابااااا...شمووووس فديت رووحج..مابااه..ابغضضضضه..و الله اني ابغضه..ماباه..مابا اعيش وياه..و زهاب مب متزهبه..و قياس مب رايحه اقايس..و ما بسوي شي..و اللي فيها فيها..
شمسه و بعصبيه: مب منج!!!!! مني انا اللي عطيتج ويهه..و قلت لا هاذي لطيفه مب اي اخت!!! اتعرفين اني ماروم امشي على ريولي من الحمل؟؟!!! من اسبوعين قالتلي الدكتوره اذا ما ريحتي عمرج اللي في بطنج بينزل..خمس سنين..خمس سنين..و انا اتمناه هاذا اللي في بطني..ما خليت مكان ما تعالجت عشان احمل مره ثانيه..و فوق هاذا اربع وياج من مكان لين مكان شرق و غرب..و لا حفلته اللي في بطني..عشان شوه؟؟؟ عشانج انتي..اللي لا تحشمين ولا تسوين قدر لحد..ما قول غير الله يسامحج..
و طلعت شمسه معصبه..ليتها معصبه و بس..شفت عيونها يلمعن بدموع..عمره اللي بيني و بين شمسه ما كان علاقه اخوه و بس..كان شي اكبر..شمسه هي اللي ربتني اول ما ييت هالبيت من بيت يدتيه..كانت ام و اخت..حسيت باللوم ايقطعني..قمت و عقيت الفستان و لبست بجامه عشان انسا كل شي..ليتني ارقد و اقوم و ايقولولي كل شي انتها..
تحت...
عايشه: هاه ام سيف..شوه بلاج اشوفج مكشونه(معصبه)...شي بلاج شي ايعورج؟؟؟
شمسه: لا ما بلاني شي..تعبانه شوي..
عايشه: لا تقوليلي بتربين!!! بعدج انتي فالثامن؟؟
شمسه: هيه..بس مادري حاسه بعمريه بربي قبل
عايشه: لا لا دخليج..خلينا انتهنا بعرس لطفين عقب ربي..
شمسه:اي عرس الله يخليج..هالنحسه طاعت تتزهب؟؟
عايشه: ياختي انا لاحظت عليها..امررره ما ترمس..ما تنطق..اتخيلي الفساتين قطعهن و موديلاتهن انا مختارتهن..و امايه العربي هيه مختارتنه..ما اختارت ولا قطعه و لا لون..ولا شي شوه بلاها هالبنت؟؟
شمسه: يا ختي هامتني هم...يونها اتقول ما تباه احمد..ما تبا اتعرس..
عايشه: شووووو...شوه اتقولين انتي..ما شي العرس باقي عنه شهر..عيل ليش وافقت من البدايه؟؟
شمسه: ضغطوا عليها بويه و خوانيه..المهم انا ما عليه منها وافقت ولا لا ..انا اعرف احمد اكثر عنها..و اعرف انه يباها من خاطره..بيداري عليها و بيحطها في عيونه..بس هيه هامتني..ما طاعت اتخلص شي..
عايشه: ما سرتو انتو يوم السبت بوظبي..؟؟
شمسه:سرنا يالله يالله يبنا المغربي..و خطفنا على المارينا مول خذتلها كم لبسه و قالت ردوني البيت..قلتلها خليني اوديج بوظبي مول ما طاااعت..قلت يمكن تعبانه و بردها مره ثانيه..بس الحين اتقولي انهااا مره خلاص ما بتشتري شي!!!! و هي بعدها ما خلصت؟؟؟
عايشه: شوفي اذا على التاييرات..و القمصان..و الميك اب خليهن عليه انا..
شمسه: و الفستان مال العرس؟؟ و الشنط..و الجواتي..و قمصان النوم و الملابس الداخليه؟؟؟...يا اختي أحمد راعي كشخه و عدول..ما يباله زهاب عادي!!!!
عايشه: فاااالج طيب بنت حمد...لطيفه انا بييبها بالسياسه..عهد عليه اني باجر ما خلي سنتر في دبي ما وديها اياه..برجمان ووافي و ميركاتو..بناخذلها منهن شنط و جواتي..و الميك اب بوديها السلام و باريس قاليري ولا اريج يمدحونه بعد..اما التاييرات خليهن يوم ثاني بوديها المهيري سنتر..و قمصان النوم و ملابسها الداخليه سدينهن انتي لانج ادرى بهالامور..و ازيدج انا اليوم كلمت مدام ايميلي عشان الباقه مالتها...و تزيين الكوشه و هي بتخلص كل شي..شي في خاطرج بعد ام سيف؟؟
شمسه: لا يزاج الله خير..و الله اني لو ما حبها هالبنت جان ما حفلتها..بس و الله انها غاليه عندي..
عايشه: شميس..لطيفه غاليه في قلوبنا كلنا..و فرقاها مب هين..بس احمد ريال و نعم..ما ينرفض
شمسه: الله يعدي كل شي على خير....مادري عندي احساس قوي انه هالعرس ما بيكتمل ولا شي جايد بيستوي
عايشه: لا تخافين..انا بخلص كل شي..تعالي اشوف سياره..منوه ياي الحين؟؟
شمسه: يااااااللله...نسيت!!!
عايشه: شووو؟
شمسه: هاذا احمد..
عايشه: و شوه يايبنه المعرس اهنيه؟؟!!! دقيله دقيله خليه ينزل برا فالميلس..لا ايدش اهنيه
شمسه: في شورج هو!! ياي ايشاور العروس..
عايشه: شووووو..مينون..ماشي العروس ما بيشوفها الا ليلت العرس..وين يبا؟؟
شمسه: ما قدرت عليه الصراحه..من البارحه ايقولي يبا ايشاورها عشان لون البطايق..و مادري شوه بعد.
عايشه:شووووو!!!! لا لا العروس ما بيشوفها..اتخبل الريال..من متا المعرس ايشوف العروس قبل العرس!!
شمسه: اقولج ما رمتله من البارحه قلتله خلني انا بشاورها ما طاع..يابوي هاذيلا جيل اليوم ما عندهم هالخرابيط..الحين كيف بنقنعها تنزل؟؟!!
عايشه: ضروووري يعني؟؟!! ما شي مجال
شمسه: لا ما شي مجال..
عايشه: خلا ص بقولها فطيم تترياج تحت..
++ ما قدرت ارقد..عمري ما حبيت ازعل حد ولا ايحط في خاطره عليه..بس شوه اسوي هاذا الواقع..هاي الحقيقه المره..و شمسه اكثر وحده عارفه بلاوضاع و المفروض انها اكثر وحده تتفهمني..ما شي سمعت الباب ينفتح..و احلا صوت فالدنيا يزقرني..ادريبه هاذا ابويه يزقرني و ايدش على طول من دون لا ايدق الباب..رنه صوته و النغمه اللي يزقر بها اسمي فيها حنان الدنيا كله..
حمد: السلام عليكم.
لطيفه: و عليكم السلام ..مرحبا مرحبا الساااااااع ببوسعيد..ماشالله الكونجرس بكبره اهنيه..شمسيت بويه؟
حمد: بخير و نعمه..شحالج الغناه؟
لطيفه: يالله يالله يالتقردين استويت الغناه الحين؟؟!!! يوم شفتوني مودعه...(هالجرأه ما تيني الا جدام بويه)
حمد و هو ايحط ايده على جتف لطيفه:امبونج غناه لفواد انتي..الا مالج بد من البزا(الدلع)..لعلوم؟
لطيفه: طيبه..
حمد: ماشالله يالدنيا...الحجره متروووسه من القشار..خلصتي زهابج كله بنتيه؟؟
لطيفه: يعني...اللي يباله عباله(شغل) خلصته...باقي الا هاذا الكسكاس(الاشياء البسيطه)..
حمد: هيه يا بنتيه..عيل انا مادري احسبج امره مالج بارض..يوم ارمسج ما تردين علينا..و اشوفج دوم مويمه(حزينه)؟ شي بلاج بنتيه شي قاصرنج؟؟
لطيفه صمت ماله حدود..شوه اقوله؟؟ شوه ارد عليه.؟؟ اجذب عليه و اقوله فرحانه؟؟!!
حمد و هو ايحط كيس قماشي صغير في حضن لطيفه: بنتيه..فديت روحج هب اتحطين في خاطرج..بس هاذيلا بيزات..حول خمسين..اباج اتسيرين و اتزهبين من اللي في خاطرج..نحن يا بنتيه القصور منا ما درينا انه شي قاصرنج..ولا جان وفيناه..امررره لا تخلين شي في خاطرج..و اللي اشترن منه ربيعاتج خذيلج منه و اللي احسن عنه..ابا زهابج زهاب لا صار ولا استوا..و ان قصرن ولا ما كفنج ترانا موجودين..و حاضرين بالمطلوب..
لطيفه: بوو...بويه...شوه هاذا؟؟!!! انا مهريه الين الحين ما خلصته و هاذوه و الله انه فالتجوري ما خلص تباني ارويك اياه؟؟؟!!! انا انعطيت مهر ولا وحده من خواتي ولا من ربايعيه خذن مثله..و انا اروحي متلومه في عمتيه بخيته ليش انهم كلفوا على عمارهم...انته منوه قالك هالشي..؟؟؟؟ اتخبر امايه جان عليه قصيره؟!
حمد: يا بنتيه هاذيلا من نصيبج..كيفج من صرفتيهن ولا يودتيهن..شدرانيه يا بنتيه الحين شمسه اختج مرمستنيه اتقولي انج شرا الزعلانه ولا حاطه في خاطرج..قالتلي ارمسج و اشوف شوه بلاج يا لطيفه انتي بنتيه ( و ايأشر على قلبه) و منزلج و قدرج عالي عندنا يا بنتيه..قلت يمكن انج ما كفنج الفلوس تتزهبين عشان جيه لا انشوفج اتسيرين السوق ولا تظهرين...
لطيفه: فرقاكم يابويه مب هينه..و انفجرت في حضن ابويه و انا احط ايديني ورا راسه لدرجه ان سفرته طاحت
حمد: بس يا بنتيه بس...عنبوه يا لطيفه يونج انتي حرمه و راعيت البيت و اتصيحين!!! بس يا بنتيه انتي ما بتسيرين بيت ناس غرب..الا بيت عمتج هاذووه مب من بعده..و انا يا بنتيه مستــــــــــــــــــــــــانس(و هو ايطول الكلمه عشان ايعبر عن فرحته) انه احمد اللي بياخذج..امررره هالريال لا عليه كلام و لا عليه رمسه..فرقاج مب هين علينا يا بنتيه..بس يوم انج بتسيرين عند بو شهاب امرررره بتسيرين و انا مطمئن عليج و لو بتغمض عيني بعرف انج عند ريال بيحشمج و بيقدرج...
و طلع ابويه عقب ما قالي هالكلام اللي يقطع القلب لهدرجه بويه فرحااااان اني بعرس و باخذ احمد..آآآه شوه اسوي..هاذا نصيبي..مالي بد منه..أحمد و احمد و احمد..خلاص شوه يعني..باخذه و اللي فيها فيها..اذا على قولتهم احمد ريال و نعم..و اخلاق..فأكيد انه بيحشمني..و لازم افتح صفحه يديده معاه..امسح احزاني و هموميه..و اترك الماضي..و اشوف المستقبل..مستقبليه مع احمد..ريلي..شريكي..و المفروض نور عيوني!!
بدلت ملابسيه اتجحلت..اتعطرت..و سويت رفيريش..خلاص انا قررت اني انسا الماضي و اركز على اللي ياي..انا الحين عروس..المفروض اني اكون فرحانه..و مشغوله..و ما عندي وقت اني افكر في اشياء تافهه ممكن انها اتدمر مستقبليه..بسير اشوف شمسه و براضيها..و بنزل تحت لانه ابويه قالي انه فاطمه بنت عمتيه اهنيه..و فطيم مالها ذنب انها اخت احمد عاقبتها و قاطعتها من عقب موقف احمد الاخير ويايه..هيه شوه ذنبها؟؟ ذنبها انها تشبهه واااايد فالشكل..و كل ما اشوفها...ضحكتها..نظره عينها..كل شي كل شي ايذكرني به..ذنبها انها من ريحة الغالي!!
لطيفه و هي تيلس عدال شمسه: ام سيف؟؟؟ انزين عاد عطوونا ويه انهون عليكم؟؟!!!
شمسه: لطيفه...مالي نفس خليني في حاليه..
لطيفه: انزين عاااااااد...خلاص خلاص( بستها على راسها) يالله عااااد...فكها يا جميل يا ام حمد..
شمسه و هي تعتدل فاليلسه: شوووو!!! بعدني حمد!!! مب مكفني السيافي!!! لا لا الله ياخليج..بسني اولاد ابغي بنوووته...يارررررب ياااارب ابغي بنووته..فديت وجهك الكريم
لطيفه: هههههههه..اعرفج من انقولج هالسالفه انطحنتي...لا لا ان شاء الله ووووولد و بنسميه حمد على بويه
شمسه: لا يعني لا ...
لطيفه: ام سيف...باجر بسير ويا عويش دبي..و بخلص اللي ناقصني..و الفستان بقايسه..و برد عليج بخبر ولا تعبين عمرج ارتاحي..لاني اباج اتمشيني على الكوشه..بس الله يخلللللللللللللللللللللللليج قمصان النوم انتي اشتريهن...الله يخليج..
شمسه: قصوري اسحب كرشتيه على الكووووشه..و بعدين اكيد انتي بتخلصين كل شي؟؟
لطيفه و هي تغمز بعيونها لشمسه: افااااااا...و من متا ام عمر تجذب...
شمسه: هههههههههههههههه....ام عمر مره وحده..اسميج صدق زلمه..لا لا احمد ايقول انه اذا بجره ولد بيسميه عمير على ماي هزبند..
لطيفه: هاهاهاي...منوه ايقول يا بويه الشور شوريه انا...
شمسه: ييي هاااا جان تنرام ضبابه...اسميج ما خليتي شي عن قوات يدتيه...من شابه جدته فما ظلم..سيري سيري..بتلقين أح...ااااا...بتلقين ...أحلا فطيم اترياج فالصاله الزجاجيه...سيري
لطيفه: ما عليه...شميس لو ما عليج امر..يوم بتشوفين كشميرا..قوليلها تيبلنا عصير..
شمسه: اوكي...
++ يالله شمسه و راضيناها..و كل شي ان شالله بيمشي على الله ما يكتب..مادري احس بعمريه الحين احسن بوايد..و انفتحت نفسي من اول ويديد..و بالفعل شوي شوي بديت احس اني عروس..و اعيش شعور العروس..خاصه انه البيت متروس اغراض..كل شي يديد..و اغراض بنتحط فالقاعه..و زينه و مادري شوه..بصراااحه اتوووولهت على فططططططططيم و سوالفها..فحبيت اسوي فيها مقلب..اعرفها ديايه من ابسط شي اتخاف..لاحظت ظل مشوش لانه الزجاج المعشق ما يبين الشكل بوضوح بس شكلها عاطيتني ظهرها..فقلت بخوفها..شوه سويت؟؟ شوه اتوقعون؟؟..
فجيت الباب بسرعه و نقزت(قفزت) مترين داخل..و انا اصاااارخ و اقول " سربرااااااااااااااااااااااااااااااااايز.....العروو وووووووس وصلت...صلو على النبي"..
اول ما نزلت سطح الارض بعد الاقلاع الغير طبيعي..طاحت عيني على عمود اناره لابس كندوره بيضا..شوه هاذا؟؟ رفعت عيني شوي شوي..شفت منوه؟؟ شفته هو ما غيره الديج..اوووه سوري بعلي العزيز..شوه ايسوي اهنيه؟؟!!! اول شي سمعته..
احمد و بطنازه:الف الصلاه و السلام عليك يا حبيب الله محممممممممممماد...شوه هاذا ما شالله البَوَر فوول...اسميها صدق سربرايز..
اول ما استوعبت شوه قال...حسيت بعمري انحرق بالبطئ..يعني من بد كل الناس احمد ايشوفني بهالطريقه..لا و انا العروس العتيده..يالله ياللللللللللللللللللللللللللله...يا جماعه الخير ابا اختفي..انقرض..شوه بيقول؟؟ اكيد على باله اني اعرف انه هو اللي موجود فالصاله شوه بيقول ينّت البنت؟؟!!! احسن عشان يتعايز عن العرس...
احمد: شياج صخيتي؟؟
لطيفه و انا اترجا احمد: و الله ...و الله..و ربي في سماااااااااه...انهم قالولي فطيم اللي اترياج؟؟!!!
احمد: هههههه...انزين شوه فيها..تراني ريلج..عطيتيني فكره عشان اعرف كيف اتعامل معاج..شكلنا بنسوي مصارعه حره ليلة العرس...
لطيفه..في ذمتكم يعني شوه ارد عليه..شوه اقوله!!!اكتفيت برد ويهي عليه اللي غادي احمممممممممر
احمد و بعد تنهيده...يلس على الكرسي..: يلسي لطيفه..
سمعا و طاعه..يلست في كرسي فالطرف الثاني من القعده...
احمد: اول شي شحالج؟
لطيفه هزيت راسي...
احمد: لطيفه تعالي شوي اباج؟
لطيفه: أأأأ..شو؟؟!!!
احمد و بنرفزه: بااااااااااااكلج انا!!!!! تعالي شوي ابغي اخذ رايج...
رحت و قعدت على كرسي عدال الكرسي اللي يالس عليه احمد..بس علاطرف...شوي و بصك الدعنه(الارض)..
احمد و هو ايطلع اغراض من الكيس اللي عداله و بدا يرتبها على الطاوله اللي جدامه..
احمد: شوفي لطيفه هاذي ديزاينات لبطايق العرس..ما بغيت اسويهن من دون لا اشاورج..لانه احتمال تبين توزعين على ربايعج منهن..فقلت احسن اشاورج..شوه رايج؟؟
شوه اشوف؟؟!!! اشوف الوان قوس قزح..احوليت..و الله العظيم ايديني يرتجفن..مسكت اول بطاقه و اقرب وحده..جلبتها..لفت نظريه جمله:" و اللذي سيقام يوم الخميس الموافق....." بصراحه..عبرتيه خنقتني..يعني الموضوع جد!!! و اللي جدامي هو ريلي..الشخص اللي بياخني من بيت اهليه..و بيشاركني في كل شي..و اهم شي قلبي..اللي داس عليه و بكل برود..رفعت عيني صوب احمد..اللي كان يتريا ردت فعل مني..بصراحه..اول ما شفت عيونه..كل الحواجز اللي بنيتهن ضده انهارن..بس اتذكرت اخر موقف بينا..فكرهته كره..حبيت اطلع من الغرفه باسرع وقت قبل لا انفجر و اقول شي اندم عليه..
لطيفه: كيفك احمد...اختار اللي تباه انا موافقه..
احمد: شوه يعني كيفي..؟؟!!!! لطيفه اتخيلي انا ياي الحين من دبي سيده اهنيه..من الصبح و انا الف و الف ما خليت مطبعه..علاقل اختاري لون ..ديزاين..حددي لو مجموعه و انا بختار منهن!!!!
لطيفه و هيه تلتفت الصوب الثاني: ولا وحده حلوووووه!!!! ايلوعن بالجبد..
احمد و هو يمتص الغضب بفارغ الصبر: يعني ولا وحده حلوه!!!! كلهن شينات!!! اوووكي..مب مشكله..باجر بسير الشارجه في مطابع يمدحونهن اهناك..و بييب موديلات غير..
لطيفه: لا اتعب عمرك..الا عرس هو..بطاقه بتنقرا في لحظه و بتنعق فالزباله..
احمد: بس انا عرسي غير!!!..هدوء خمس دقايق..و يا لطيفه انا بعد عروسي غير!! مب نفس كل البنات صح ولا انا غلطان..
لطيفه: لا الشيخ غلطان..انا مب بنت عاديه..البنت العاديه..لو اتشوف...
كنت ابا اقول البنت العاديه..لو اتشوف...ريلها يغلط جدامها..بتسوي بلاوي ما بتكست عليه!!!
احمد: اتشوف شوه؟؟!! قولي ارمسي اشوفج صخيتي..؟؟
لطيفه وانا اقوم قبل لا انهار جدامه: بو شهاب ما ابغي اقفيبك..بس اسمحليه..راعيت الصالون بتسويلي الحين و انا من الصبح اتريا اتصالها...
احمد: اوكي...باجر بييب شي يديد..
لطيفه: الين باجر خير..و طلعت بسرعه..
احمد: لطيفه؟؟!!!
لطيفه: لبيه..
احمد: تعالي ويايه شوي السياره..شي بطاقه طاحت..يمكن تعيبج..
توني بقول لا..بس نظره التعب في ويه احمد..و شكل جسمه اول ما وقف..صدمني مب هو احمد الاولي..ضعف وويه مسود..و شكله صدق تعبان..ما قدرت ارفضله هالشي..!!
لطيفه: ان شالله..
طلع احمد صوب سيارته و انا امشي وراه..استهدي بالله يا لطيفه..اعقلي و ريحي اعصابج..فتح احمد باب السياره و دخل داخل وانا الهبله اتقربت من باب السياره وايد ماخذه راحتيه!!! بصراحه كنت اريد هاللحظه اتعدي باسرع وقت..
احمد: لطيفه اتشوفين شي طايح اهناك؟
لطيفه: وين؟
احمد: الصوب الثاني؟؟
لفيت الصوب الثاني..و فتحت الباب..شغل احمد الليت الداخلي..شوه بلاه ما يشوف!!؟؟ المغرب هاذا..بس لاحظت انه عيونه حمر..وبدا ويهه يتنفخ..و شكله مثل الانسان الدايخ اللي بيطيح بس ما حبيت اسأله شوه فيه..ما حبيت يعرف اني مهتمه فيه..دخلت داخل السياره طلعت بطاقتين كانن طايحات تحت جسمي فالسياره بس ريولي برا..
احمد: شوه رايج؟؟ هاذيلا الثنتين يداد..انا كنت مختارنهن و اليوم جهزن..؟؟
لطيفه: امممم..مادري
احمد: اذا ما عيبنج مش مشكله بندبرها..
لطيفه: لا لا هاذي البيج حلوه..بس الخطوط مش حلو لونهن..لو ايكون ذهبي احسن..
احمد:هههههه..اتصدقين عاد..هاي انا مختارنها..يعني ذوقي نفس ذوقج..بس هاي وايد غاليه...
لطيفه و باستغراب: مستخسرنها فيني؟؟!!!!
احمد: لا حشا...بس هاي بتاخذ وقت الين ما يطبوعنها مادري اذا بتجهز قبل العرس بفتره ولا لا ؟؟
لطيفه: و انا ما عيبني غيرها..( و الله العظيم ما حبيت اكلف عليه..بس المسأله مسأله غياض بس)
احمد و بنظره خبث: لطيفه العرس ما بقا عنه الا شهر..متا بتخلص؟
لطيفه: كيفك..
احمد و هو يتساند على الكرسي و ايحط ايده على عيونه: و الله؟؟!!! كيفي؟؟!! تدرين لو بكيفي شوه بسوي؟
لطيفه: شو؟
احمد: اركبج السياره و انسير نملج..لا عرس و لا غيره..و احجز على اول طياره و انسير...
لطيفه..الموقف محرج..و حسيت بعمريه اتآكل من الفشيله..بس ما قدرت اعديها..لهدرجه ما عندي اي قدر عنده!!!
لطيفه: ليش؟؟ مستخسر فيه اكون عروس شرات بنات العالم و الناس..انته على شوه متواكل؟؟!!
و طلعت بسرعه و لفيت من جدام السياره اول ما مريت عداله..زقرني احمد بأسمي بس بونه ألم..و الله انه هالريال مب طبيعي شي فيه..قلبي عورني عليه..لفيت عليه بس براسي..
لطيفه: نسيت شي من الاهانات ما قلتهن بو شهاب؟!!
احمد: متواكل على العرس..اذا انتي فيج صبر انا ما فيني صبر الين الليله اللي بيزفونج فيها ليه..
ما عرف شوه نوع الجمله اللي قالها احمد..قنبله..حقيقه..وهم..خيال.أو اني انااهاذي..ولا كالمعتاد طنازه و مسخره..بس اللي فهمته اني ركضت لحجرتيه بسرعه الصاروخ..و خليت احمد برا بالحاله اللي هو فيها..وايجت من الدريشه..شفت سياره احمد البي ام تخفتي ورا الدروازه..يا ناس ضايعه ولا اعرف شوه الدرب..ضايعه ولا اعرف شوه المصير..احبك يا احمد..رغم كل شي!!!
بس لكل فعل رد فعل وكل اللي ايصيرلي نتيجه كلمات قالهن احمد في يوم من الايام..وانا اليوم يا احمد اذا جذبتك مش لاني ماريدك..اجذبك و اجذب اي رد فعل ايجابي منك صوبي لاني متأكده مليون بالميه انك ما تباني..ليتني اعرف شوه اللي جبرك عليه!! ليتني اعرف شوه قصدك من الزواج بي؟؟ ليتني ادخل حنايا يوفك..و اعرف لشوه اتخطط يا احمد..كل هالشكوك فيك لانه من خمس سنين..جملتين قلتهن في حقي..كانن طعنتين في كرامتيه..اذا انته ناسي يا احمد انا مستعده اذكرك..قبل لا نندم انا و انته...
(( لطيفه: تعالي هاذي نظاره احمد..
فاطمه: هيه نساها اهنيه البارحه..يالله شوه هاذا خلصت الاجازه بسرعه..و بتبدا المدارس الله ياخذهن..لازم ندرس يعني..
لطيفه: هههههههههه...يالله شوه انسوي..انا يمكن اسير باجر البيت..
فاطمه: شوووو؟؟!!! بعدهن المدااارس اسبووووع!!! عشوه مستعيله انتي؟؟!!!
لطيفه: و اللي سواه فيني اخوج البارجه هيّن؟؟!!!
فاطمه: امممم...لطيفه يمزح احمد...
لطيفه: يمزح!!!!! زلغلي شعر راسي و ما خلا فيني شعره و اتقولين يمزح؟؟!! عيل هاذا لو كان جد شوه بيسوي بيحلقني عالصفر!!!!
فاطمه: الحين شوه؟؟!! بعدج زعلانه؟؟!!!
لطيفه: هيه زعلاااانه..ولو ايحب ريوليه ما برضا عليه!!!
فاطمه: مادري...لطيفه..و الله و الله انه احمد انسان طيب و خلوق...و الله ما كد في حياته مد ايده علينا..بس انتي الله يهديج تقهرينه!!
لطيفه: الحين انا اللي قهرته!!! ولا هو اللي يدور سبب ...
فاطمه: و الله مادري...و انتي هاي دووم حالتكم حريقه و ديزل..من ايشب الاول شب الثاني..انا بسير اتسبح
لطيفه: و انا بسير اسويلي عصير..
++ عدّت اربع و عشرين ساعه بس عالموقف اللي صار بيني و بين احمد..حبيت اتجاهل كل شي..بما فيهم احمد..ما بيني و بينه كلام..الين ما يعتذرلي...هو الغلطان و هو اللي بدا..كنت ماشيه و انزل على الدري سايره تحت المطبخ عشان اسوي عصير..بس سمعت صوت احمد فالصاله اللي تحت فقلت برجع الغرفه يوم يطلع أحمد من البيت بسير المطبخ..بس لاحظت انه احمد يتكلم مع عمتيه بخيته..و اخته فاخره..و اسم لطيفه فالسالفه..معقوله عرفوا باللي صار البارحه؟؟!!! لا لا يا ربي..ماريدهم يفهمون الموقف غلط..ما حبيت اتجسس بس دام الموضوع ايخصنيه..حبيت اعرف شوه السالفه..يلست على الدري بحيث اني اقدر اسمع شوه ايقولون من دون لا يشوفوني...
بخيته: انزين يا بويه انته شوه بلاك على البنت؟؟!!!
احمد: امــــــــــــــــــــــايه...كم بعيدها الرمسه...حرااااااام عليكن...طفرتبي!!!! لطـــــــــــــــــيفه ماباها لا تحاولن..
فاخره: انزين عطنا سبب...بنت خالك هاذي شوه بلاك انته عليها؟؟!!!
احمد: ما بلاني شي..و البنت ما بيني و بينها شي..بس لو ما تم بنت فالدار لو مره ينقرضن انا لطيفه ما باخذها...
بخيته: لا اله الا الله...يالله بالستر عنك يا بويه..ليش عاد هالرمسه هاذي؟؟
فاخره: احمد...لطيفه ما تفرط..و من اسبوعين يوا عند خالي عرب خطاطيب..حرام بتفرط البنت بين ايديك..
احمد: شوفن..البنت لا تحيرنها..ولا تخطبنها من دون شوريه..وقولي حق خالي حمد..اني مالي رغبه فيها..ولا يرد نصيب البنت عنها..انا ما باخذها..
فاخره: انزين احمد انته لا تستعيل بالقرار...نحن ما نقولك امررره يالله بنخطب و بتعرس فالصيف..انته بعدك تدرس و هي تدرس..خير الين ما تخلص لطيفه الثانويه يبالها اربع سنين..
اكتفا احمد بهز راسه بالنفي..
بخيته: انزين تبانا نخطبلك عويش؟؟ ولو اني مابالك غير لطيفه..
فاخره: امايه شوه عويش؟؟!! نحن انقوله لطيفه و انتي اتقولين عويش؟؟!!! صح انه اذا على الحلاه عايشه احلا عن لطيفه...بس شخصيه لطيفه وين و عايشه وين؟؟!!!
احمد: خلن عنكن...قلتلكن بنات خالي مالي رغبه فيهن..قصوري بعدني ماخذ عويش..
بخيته: و شوه بلاهن بنات خويه ماتباهن؟؟!!!
احمد: عويش... مطر ولد خالي مبارك حاط العين عليها...يصبح و يمسي يهاذيبها...
بخيته: لا حوووووول...قلتلك يا بووويه مالك بد من لطيفه..تعوذ من بليس و انا برمس خالك بنحيرها بس..
احمد: طااااااااااااااااااااااالعوا....شوه اقول انا من الصبح...فاخره ارمسي..
فاخره: شوه تباني اقول؟؟ و الله يانه لطيفه لو بتدور فهالدار كلها شراتها ما تحصل..بوشهاب و الله انه البنت ما تفرط..اتسدك تراحيبها و مواييبها..البنت حشيم..و بصراحه ما تخلا...
احمد: اوهوووووووو...بنت الباكستانيه ما بااخذها...لو بعدها بنت عفرا مب مشكله..شوه تبن باجر يوم بييب عيال بيقولون ولد سيف بن عمير عياله شعورهم صفر و عيونهم خضر!!!!!
بخيته و بشهقه غضب: شوووووه؟؟!!! احمد لا تعيدها هالرمسه مره ثانيه جان تباني ما اغضب عليك لين يوم الدين!!!
احمد: حراااااااااااااااااااااااام عليكن حراااام...اميه هاذي الحقيقه رضيتن ولا لا ..ولا تبن تبلنّي انا بها؟؟!!
بخيته: شوه يعني خالك يايبنها بالحرام؟؟!!!
احمد: استغفر الله العظيم!!!!! عوذ بالله من بليس..انا ما قلت جيه انا قلت بنت الباكستانيه ماباها..بس
بختيه: وشوه بلاها الباكستانيه عبدة ابوك؟؟؟!!! حرمه بنت راس قبيله في باكستان..ابوها يامر و ينهي شيخ مب اي باكستانيه!!!!! و ماخذنها بالحلال..والله لو شفت صورتها انته يا تعذر من زين و حسن فيها!!!!
احمد: اميه فيدت روحج..لاتجبرني على شي قلبي مايباه!! و البنت ماباها من خاطريه..و عقولتج البنت بنت حمد بن سلطان..يعني انا ما بقطع نصيبها اكيد انه الله كاتبلها حد غيري..
فاخره: احمد...الحين انته تحاسب عن سالفه استوت من اربعتش سنه!!! ريال سار القنص و عيّب بالحرمه..خذها على سنه الله ورسوله..نحن ما بنيلس انحاسبه..و هاي بنت خالك وين بتحصل احسن عنها!!
بخيته: و البنت متربيه اهنيه فالامارات مب في باكستان..من توفت امها و هيه ام سنتين يابها خالك عند يدك و يدتك ضبابه ربتها..الين ما رضت عفرا و شلها خالك البيت عندهم..يا بويه عيّن من الله خير و توكل على الله..
احمد و بعصبيه: اميه,,,,ان عدتنها هالرمسه مره ثانيه..تراه و الله ما طيحه هالبيت مره ثانيه..ولا بتشوفنيه دامنكن حيات...حشا اطفرووون بالواحد الين ما يعاف حياته...
++ و طلع احمد..عقب ما كشف سر حياتي الصغير اللي ما كنت اعرف عنه شي..طلع عقب ما حط النقاط على الحروف..الحين عرفت ليش درست الروضه في سويحان عند يدتيه مب اهنيه فالعين!! و الحين عرفت ليش التوتر كل ما سألتهم عن شهادة الاحصاء اذا طلبوها فالمدرسه!! و الحين عرفت كيف انه فارق السن بيني و بين سلطان اخويه ثمان شهور بس!! و اخيرا عرفت ليش انا ما اشبه معظم الويوه اللي فالعايله!! حزني اليوم عظيم..و جرحي اليوم كبير..ماظني يبرا لو ايصير ما يصير!!....)))
هاذا هو اصعب امر اكتشفته في حياتي من خمس سنين..امر حاولت اتناساه..مش لاني مب راضيه به..ولكن انسا الفوضا اللي كنت عايشتنها..يعني اميه توفت من يوم انا صغيره..و امايه عفرا ام بالاسم بس..و هاذا السبب اللي خلا أحمد من خمس سنين يرفضني..كلماته لا تزال ترن في دهاليز روحي من خمس سنين..!! و هاذا السبب اللي من بعدها رفضت اشوف احمد او اني اسير بيت عمتيه بخيته طول المده اللي فاتت!!
________________________________________
"""الجزء السادس عشر"""
بكـــــــــــــــــــــــــل هدوء و بكل محبه...اسمع الكلمه الاخيره...ما أبيك...ما أبــــــــــــــــــــــــــــيك
الايام اللي فاتت عدت في لمح البصر..هالكورس خلاص خلص على خير..سلطان اخويه عايش في كابوس اسمه امتحانات الثانويه العامه..و خلاص العرس ما بقا عنه غير اسابيع معدوده..البيت عايش حالة طوارئ مب طبيعيه..الاستعدادات ما خلت لي مجال اني اشك انه هالعرس ما بيستوي..
لطيفه: مسا الخير سلطان..
سلطان: مرحبا السااااع بالعروس...متا سارت عنج ام كشه..
لطيفه: منوه هاي ام كشه بعد؟
سلطان: مالت الصالون؟؟
لطيفه: من ساعتين...شوه سويت انته؟؟
سلطان: ماااااااااااادري...بقطع شعريه انا...اكرررررره شي اسمه عربي..بسألج كيف بنجح في هالماده..حشا هاذا مب كتاب هاذا دستور الدوله..
لطيفه: هههههههههه..الله بيوفقك ان اشالله...المهم انته اشرب هالنسكافيه..و بتصحصح..خلصت انته؟؟
سلطان: من متا هالاشكال اتخلص...انا في حياتي كلها ما دشيت امتحان و انا مخلص المنهج..
لطيفه: ما عليه انزين شي وقت طويل الين الامتحان..الحين الساعه وحده فليل..و انته ما شالله خلصت الرقاد اللي فالعالم كله...
سلطان: ما شي حل الا اني اواصل...
لطيفه: ما عليه انا بخليك الحين عشان اتذاكر..شد حيلك ما بقا شي و بتفتك من كابوس الثانويه..الساعه اربع بيي اشوفك اذا رقدت ولا لا ؟؟ ما تبا شي..
سلطان: لطيفه سيري امتحني بدالي..
لطيفه: جان زين
سلطان: انزين خلاااص شوه رايج انا بركب سماعه و انتي غششيني..
لطيفه: شوووووو!!!! سلطان اشوفك قمت اتهلوس...يالله ذاااكر...تصبح على خير...
سلطان: اي خير...الله كريم..تتوقعين ضبابه خلصت؟؟
لطيفه: و انته شوه لك خص في ضبابه؟؟ ركز في دراستك..
سلطان: اييج الشور بسويلها تيلفون..
لطيفه: كيفك...بس لا تقرقر وايد وراك امتحاااااان
سلطان: ان اشالله عموه...بس لو سمحتي اطلعي خليلي الجو رومنسي...
طلعت عن سلطان و انا احيده ايطرش مسجات لضبابه..اللي عندها تيلفون فطيم فهالفتره عشان اتخلص امورها مع المدرسات..و غيره..الله ينجحه و يفتك ان شالله ولو انه شكله ماله خص فالدراسه ابد..
سلطان و هو ايطرش مسج لضبابه:"خبروه اني على وصله حييت و ان تفارقنا ترا موتي دنا.."
ضبابه و هي منسدحه على الشبريه و حاطه الكتاب جدامها: اووووه هاذا سلطان مطرش مسج...شوه ايسوي واعي الين الحين؟؟ بطرشله مسج :" مساء الخير و الاحساس و الطيبه..مساء ما يليق الا باحبابي"
سلطان:" فديت روح اللي ذبحني وداده..أفديه انا بعمري و حالي و الأقراب..حبه سكن قلبي و عمه و ساده..و أصبح وسط القلب و تحلل و ذاب..كل ما نبض قلبي أحبه زياده..حتى عرفت ان عشرته طب الاحباب"
ضبابه: يالله يعلني افدا بو مييد..."الروح روحي و انته الروح و الشوق..ما أحد غيرك دش قلبي و طبه..باخذ من عيونك غلا كل مخلوق..و اسكن انا بين الهدب و التحف به..مدام قلبي مبتلي فيك محروق..وش عاد لو نار الغلا تشتعل به".
سلطان:" أحبـــــــــــــــــــــــــــــــــــــــــــــــ ـــــــــج....عفوا جزء من النص مفقود.. قصدي احبج يا اماراتي"
ضبابه: " لا و الله...حتا انا....أحبـــــــــــــــــــــــــــــــك.. بس بابا زايد"
سلطان: " يالسباله..بوخليفه غالي و نحبه كلنا...قولي احبك سلطان"
ضبابه:" ما بقول..."
سلطان:"بتقولينها و انتي حماره"
ضبابه:" خلصت دراسه انته؟"
سلطان: " طالعوا السباله اقولها قوليلي احبك و هيه اتقولي دراسه...لا ما خلصت ارتحتي؟؟"
ضبابه:"كيفك...انا خلصت و يالسه اراجع"
سلطان:" شعليج غاديه منهن هاذيلا الزلمات اللي ياكلن الكتب اللي يسمع بتييب فالتسعين"
ضبابه": و الله ياييب..و انا بنت سيف"
سلطان:"كاكاكا...بتبطين..اقول درستي الكتاب كله؟"
ضبابه:"يالسه اراجع من المذكره"
سلطان:"هيه شعليج...جان قلتيلي..بسير اشتري انا بعد"
ضبابه:"خلاص راحت عليك..المكتبات مسكرات الحين..و بعدين يالله فمان الله بيخلص رصيدي"
سلطان:"وووووووه....ووووه....قوم بو رنه انتي؟"
ضبابه:" تتطنز؟...مب منك..:*_*
سلطان:"يالله انزين الحين بدقلج؟"
ضبابه:"شووووو...تحلم..مينون انته...خلنا على المسجات احسن؟"
سلطان:"صابني ما صاب لعقيلي في هوا ميا و غدا تالي...يالله الحين بسويلج؟"
ضبابه:"مينون انته...احمد واعي فالصاله تباه يجتلني؟؟"
سلطان:"لا حوووول وبعدين يعني؟؟ لي متا هالحال؟"
ضبابه:"الله يصبرك ان شالله.."
سلطان: تتطنزين السباااااااااااااااااله"
ضبابه:"انا سباله؟؟!!! اوكي..."
سلطان:" يالله يانتي عاد...امره ما تقهرين المزح...؟"
ضبابه:"خل السباله تنفعك...باي"
سلطان:" ايه ضبوب...بس عاد عن الزعل؟"
ما شي رد
سلطان:" اذا ما رديتي و الله تراني ياييج الين البيت؟؟"
ما شي رد..
سلطان: " طال ليلي من تعليلي من تجافي خلي الغالي"
ما شي رد
سلطان: " اوكي هالاشكال ما تنفع معاهم الا القوه..."
عشر دقايق و انه سلطان موقف سيارته تحت فالبيت...هالريال عنيد اذا حط شي في باله لازم ايسويه..
ضبابه: يالللللله بيفضحني جدام احمد الحين ياااااوووووووووويلي...لازم انزل بسرعه..
بس احمد طلع برا البيت ايشوف منوه ياي فهالساعه...
سلطان: السلام عليكم....
احمد: و عليكم السلااااااااااااااام...شحالك بو مييد؟
سلطان: ايسرك الحال و من صوبك.؟
احمد: تمام و الله...خير ان شالله اشوفك ياي البيت هالوقت شي مستوي؟؟ حد صابه شي؟؟
سلطان و بإرتباك: لا لا كلهم بخير و سهاله محد يشكي باس...بس...بس...امبوني ابغي..ابغي..المذكره..هيه المذكره من عند ضبابه..لاني ما خلصت..
احمد: هيه..قرب انزين داخل بسير اييبها لك؟
سلطان: لا لا جريب..بس مستعيل ابغي ارد عشان الحق اذاكر..
احمد: ما عليه بسير اييبها و بيي...
ضبابه و هي اتطلع راسها من الدريشه: سلطاااان غربلات عدوووك...شوه يابك انته الحين؟
سلطان: مسوده الويه ياي ارااااضيج...سيري سيري داخل لا يشوفج احمد..اعطيه المذكره..
ضبابه و بصوت منخفض: فديت اللي يبا يراضيني..
سلطان: اقطعي....سيري داخل فيها قص رقااااااااااااااااااب هاي...دوااااج عندي ...
دش احمد فجأه: هاه ضبابه اشوفج واعيه؟
ضبابه:أأأأأ,.....أأأأ...تراه عندي امتحان وما خلصته...
احمد و هو ايحط ايده على خصره: و اللي عليه امتحان و ما خلص ايوايج من الدريشه؟؟!!!!
ضبابه: لا لا بس حر....قلت بفج الدريشه..لو...لو..لو شغلت المكيف برقد..
احمد: انزين ما عليه...سلطان اهنيه..يبا مذكره مادري شوه ؟؟
ضبابه: هيه حليله موصني عليها بس نسيت اطرشها له...
احمد: و شدراه انج واعيه؟؟!!!
ضبابه: مادري...ششش...شدراني هاي..هاي امتحانات ثااانويه عاااااامه...يعني يا حياه يا موت..منوه يرقد؟
احمد: شي عندج ماي؟
ضبابه: هيه فالثلاجه داخل انا بطلع المذكره..
اول ما اختفى احمد..قامت ضبابه بسرعه و كتب بيت شعر على المذكره من داخل: حـــــــد مثلي بات مشجنه حلم طيف مر خطافي و اغتنم من وجدي الونه يوم كل بالكرا غافي...اهداء لاحلا عاشق فالعالم..بومييد
احمد: ايه ضبوب...ولا ارقدي ولا ذاكري..و الموبايل للحايه بس..مب للعب..
ضبابه: انزين ليش ما طلعولي موبايل؟
احمد: اشوووووووه؟؟!!!! و شوه لزوم الموبايل الا ثانويه عامه انتي؟؟!!! يالله يالله ما شي لعب ذاكري.
ضبابه: ان شالله...
سلطان بالمسج:" شوه طاح الحطب؟؟؟"
ضبابه:"مب بس الحطب الا السمر(نوع من انواع الشجر) كله طاح"
سلطان:" يالله عيل تصبحين على خير"
ضبابه:"و انته من اهل الخير و الحب و السعاده"
~~~~~~~
بعد مرور فتره و تحديدا يوم الجمعه....اسبوعين قبل العرس..
سلطان: السلاااااااااااااااام عليكم..
البنات: و عليكم السلاااام..
اليده ضبابه: مرحبا مرحبا ببومييد...
سلطان: لمرحب باجي...شحالج يدتيه؟؟
اليده: بخير ما نشكي باس..
سلطان: متا ييتي يدتيه؟
اليده: مساعه...من قالولي انه نتايج المدرسه بتظهر باجر ما رمت ايلس في سويحان..شوه بيلسني اهناك رويحتيه..
سلطان: لا اله الا الله...متا بيعدي باجر على خير...اسميني حفزان(متوتر) على الاخير...
عايشه: ليش متوتر؟؟؟ دامنك واثق من عمرك لا تخاف توكل على الله...انته عطنا رقم جلوسك و بنطرش sms احسن تطلع اسرع...
سلطان: و نعم بالله....لا اله الا الله لو بعدها حرب...الا شهادة ثانويه عامه...و اذا على sms يمكن الف رساله طرشت بس ما شي رد الين الحين
عفرا: لا تيلس اتقول جيه سلطان....انا اروووحي احس بعمريه بمووووت...لا اله الا الله..درسن البنات و ظهرن من الثانويه ولا حاتيناهن...
ضبابه: و بومييد بيي من معاليهن بعد؟؟!!! اصبرن انتي و بيبيض الويه..
سلطان: وين يايدتيه؟؟!!! الله يعديها على خير بس..
ضبابه: انزين كم بتييب انته طماطه وحده؟؟!!! مب مشكله بتخطف..
سلطان: ههههههه...يدتيه لا طماطه ولا تسويق...ماشي ولاّ تنجح ولا مره ما تنجح
ضبابه: حسبي الله عليهم..انزين رمسهم انته يعطونك درجات..
لطيفه: يدتيه هاذيلا امتحانات مب الشونه ايوزعون فلوس
ضبابه: اوووه انتن ما تعرفن..
سلطان: برايكن انا بروح...
عفرا: وين بتسير بويه؟؟؟
سلطان: انا بسير ابات فالعزبه ماروم اتحمل الين باجر...
عفرا: بتسير وبتخلي الضو في فواديه!!! لا لا ايلس ايلس اهنيه
سلطان: اميه...الحين المغرب و النتايج بااااااااااااااااااااجر الصبح...بسير عند الربع بشوفهم شوه حالتهم؟
عايشه: الله يوفقكم..ما استوت ثانويه عامه..حشا الحرب العالميه..
ضبابه: هزركم سالمين ولد غبيشه شوه سوا؟؟؟
سلطان: يدتيه سالمين نجح...ياب 61....
لطيفه: في ذمتك؟؟!!!! و شدراكم؟؟؟
سلطان: ولد عمته ايعرف ناس فالكنترول..يابوله النتيجه...
اليده ضبابه و باستهزااااء: ووووووووووووووووووايه....جان سالمين ولد غبيشه الثور نجح!!! عيل انته بتنجح
سلطان: يدتيه جان سالمين ثور انا عيل(عجل)....امررررررره ما حليت زين...شكلي بجابلهم المدرسين السنه اليايه بعدني...
عفرا و هيه اتفر سلطان بكرتون الكلينكس: بعدك قول جيه؟؟!!!! تباني اموووووت
سلطان: هههههههه.....افا بنت راشد ما يطيع زينج...ان شالله ان شالله بعون الله ناااااجح...و بتسمعوني اغني..جايين منين من السانويه راحين فين للكليه...الناجح يرفع ايده...
عفرا: سر سر عند ربعك يوم هاي رمستك...خلنا نهيّد شوي...
سلطان: ما عرفتلكن...قلتلكن الحقيقه ما عيبتكن...قلتلكن بنجح ما عيبكن...الله يعيني عليكن
~~~~~~~~
لطيفه: هاه ضبابه بشري؟؟؟؟
ضبابه: بموووووووووووووووووت لطفين بموووت...شوه هاذا السايت مال التربيه و التعليم داااون..شوه اسوي؟؟!!!!
لطيفه: عنبوه انتي ما حد من خوانج ايعرف حد من الكنترول اييبلنا النتايج؟؟؟ و ما طرشتي SMS ؟؟
ضبابه: شدراني...رمس عمير واحد من المدرسين اللي يعرفهم و عطاهم رقم جلوسي و رقم جلوس سلطان بس ما حد رد علينا؟؟؟ و المسجات الف مره طرشنا بس ما شي رد الين الحين...
لطيفه: لا حوووووووول....سلطان فالكوفي يالس هو و ربعه على النت...و عويش بعد على النت بس ما شي فايده...اسمع صرّه( اصوات) عدالج؟
ضبابه: لا تتخبرين العايله الكريمه كلها اهنيه...حتا السيافي يالس ايآزرني...
لطيفه: حراااااام عليكم الساعه 2 فليل ليش واعي؟؟؟
ضبابه: اقووووولج محد رااااااقد كلهم يتريون النتيجه....
لطيفه: و فطيم وين؟
ضبابه: فطيم البدله يالسه على الراديو اتقول اذا تم السايت داون الين باجر يمكن يعلنون النتايج على الراديو
لطيفه: الله كريم ان شالله...انتي بتنجحين مضمونه لكن سلطان الله يستر منه...
ضبابه: مادري...اخاف و الله بثنينتنا ضعنا...
لطيفه: فال الله ولا فالج لا تقولين جيه
ضبابه: عيل ليش مريم بنت ييرانا عطوهم النتيجه؟؟؟
لطيفه: شدراج؟
ضبابه: و الله عطوها النتيجه...ما شالله طلعت التاسعه على الدوله...ياربي بموووت انا بمووووت
لطيفه: حوووه الاوائل ايقولولهم قبل بكم يوووم...ما شالله عليها هالبنت التاااااااسعه على الدوله!!!! ما فيها حيله.....برايج ضبابه انا بخليج بسير اصلي ركعتين و بدعي حق هالولد الله ينجحه..و انتي اذا ياج خبر دقيلي انا ما بغلقه تيلفوني...
ضبابه: ايصير خير ولا تنسيني من دعاؤج...فمان الله
لطيفه: الله يحفظج...
++ لا اله الا الله كلنا دشينا ثانويه و طلعنا منها...بس هالسنه غير..كلنا متوترين على الاخير..ضبابه ميه بالميه بتنجح...بس سلطان..مصيبه..و المشكله انه ايقول انه ما بيعيدها مره ثانيه اذا ما نجح..و ابويه حالف عليه انه ما يّوزه ضبابه اذا ما تخرج من الثانويه و دخل الكليه..سرت الحجره فوق صليت ركعتين ويلست ادعي و ادعي في حياتي كلها ما دعيت لعمري لهدرجه..ابا الفرحه فرحتين فرحت العرس و فرحت النجاح..على طاري العرس..فستان العرس معلق على المانيكان..و كل ما دش الغرفه و كل ما اطلع اتذكر اللي بيصير عقب ايام معدوده..معقوله انا بعرس؟؟ معقوله انا بفارج هالبيت؟؟ هالحجره اللي بدت تفضا شوي شوي..هالحجره اللي في كل ركن و كل زاويه..ذكرى حلوه و مره..بترك كل شي و بسير عند احمد..عالم مجهول..الحل الوحيد اني اتناسا هالكابوس..بالتفكير في نتيجه سلطان..نزلت تحت سويتلي عصير..شكلهم كلهم رقدوا و يئسوا من النتيجه...بدق حق سلطان يمكن ياه خبر..ولا موقع التربيه فتح؟؟!!!
لطيفه: مرحبا سلطان؟
سلطان: مرحبتين لحظه...بطلع من الخيمه ما سمعج..
لطيفه: بشرّ...ما شي خبر عن النتايج؟
سلطان: ماشي ....الكوفي بنّد يينا اهنيه في خيمه واحد من الربع ولو اتشوفينا اتقولين ذباب متكاوشين ( متجمعين) على اللابتوب...معظم الشباب ما عندهم خبر و الكنترول ما يردون على الاتصالات..و الموقع ما فتح...و الملحق ما بينزل الين باجر العصر
لطيفه: الله كريم ان شالله...عندي احساس قوي انك بتنجح..
سلطان: وين؟؟!!! اذا ولد عبيد ال....، اللي اشطر واحد فينا و كل سنه نسبته فالثمانين ياب دور ثاني فالعربي؟؟!!!!
لطيفه: في ذمتك؟؟!!! هاذا عيسي اللي كل سنه ايكرمونه؟؟!!!
سلطان: و الله في ذمتيه...عيل انا شوه بسوي..
لطيفه: خل املك فالله..و اذا ياك خبر قولي...
++ لا حووول...صوت سلطان و اخباره ابد ما تبشر بخير..الله يستر بس من نتيجة باجر..و يسهل عليهم..شغلت التلفزين عشان اتسلا شوي و اضيع الوقت..بس ما حسيت بالدنيا و رقدت فالصاله على الكرسي ما قدر اسير داخل ما فيني صبر الين ما عرف النتيجه الله يعين سلطان شوه شعوره؟؟!!..عالساعه خمس و نص الصبح ما حسيت الا بإيد اتهزني بقو!!!!
سلطان و بهمس: لطيفه لطيفه..قومي قومي سيري رقدي داخل...
لطيفه: لا لا ...بتريا النتيجه مالت سلطان اليوم...اليوم بتطلع
سلطان: لاحوووول...لطيفه اقولللللللج سيري رقدي داااخل..ما شي نتايج...غير نتايج العثره
لطيفه اول ما قال سلطان جيه فزيت على طول...
لطيفه: بشر بشر....شوه سويت...طلعتو النتايج
سلطان: سواد ويه...قومي سيري دخلي داخل...
لطيفه: سلطان حرام عليك...قولي شوه..؟؟؟ عرفتو شي.؟؟؟؟
سلطان: و الله و الله و ربي في سماااااه...اني لا بعيدها هالثانويه ولاشي...الله يلعنهم..و الله المدرسه ما بطيحها...و تلتعن الدراسه...طزززززز فيها..و الله ما عيدها...ولا بمتحن دور ثاني
لطيفه: شووووووووو....دور ثاني حلف؟؟؟؟ في ذمتك؟
سلطان: شوي شوي ما ريد امايه تعرف...برايها راقده..الصبح بتدري...
لطيفه: في شوه دور ثاني؟؟
سلطان: علم النفس...
لطيفه: لا اله الا الله...ما عليه هّينه..ماده وحده بتمتحن دور ثاني و بتعديها...
سلطان: و الله ما امتحن...تلتعن من دراسه..شوه بيستوي يعني اذا ما درست...الله ياخذهم ان شالله
لطيفه: و انته اشدراك؟؟!!! يمكن حد غلط فالنتايج...
سلطان: لا لا...بعيني هاي شفته اسمي...سرنا مقر الجريده..و كلمنا واحد انعرفه اهناك..روانا الاسامي اللي بتنزل فالملحق باجر...شفت اسميه و رقم جلووووسيه....آآآآآآه يا لطيفه...بموووت بموووت من الغصه
لطيفه: لا تقول جيه الله بيعوضك...
سلطان: مابا تعويض...يالله شوه شعوريه و ربعي كل واحد ايهني الثاني...بغيت امووت(و هو يمسك راسه بين ايديه)...يالله يوم هم ايسون تيلفونات ايبشرون اهلهم...حسيت بعمريه ضاااايع... دور ثاني؟؟!! من بد كل الناس انا دور ثاني...برايج انا بسير فوق...ولا ريد حد ايدق عليه ولا ايوعيني..خلوني في حالي..
لطيفه: برايك...و الله بيعوضك ان شالله..
++ طلع سلطان حجرته بيرقد و انا احس بقلبي يتقطع عليه و هو ايقولي ان ربعه نجحو وهو لا..دور ثاني؟؟!! حرام اتمنيته ينجح..حاسه بغصه..شكله و هو يشكيلي..شكله و هو منكسر..تعبان و ويهه مسوّد..و الله و الله انه كسر خاطريه..ما حسيت بعمري الا اخش راسي فالكرسي و احط المخده على ويههي و انفجرت اصيح..ماروم و الله انها غصصصصصه..فديته اخويه من بد كل الناس ما يفرح يوم فرحوا ربعه!!!...عالساعه ثمان الصبح...سمعت ازعاج فالصاله..و حشره..و اصوات و الله انهم فايقين ليتني سرت الغرفه عشان اتجنبهم شوه بقولهم الحين؟؟؟؟ اقولهم الحقيقه؟؟!!
ضبابه: قومي لطيفه قومي بنتيه..النتايج بيظهرن الحين؟؟؟ قومي...
لطيفه: صباح الخير يدتيه...
ضبابه: مرحبا بنتيه...قومي شوفي النتايج؟؟
لطيفه: امايه وين؟
ضبابه: امج سارت تمشي فالحوووش بتمووت من الحفووووز...يا بنتيه قومي شوفي النتايج وضحه سارت ويا الدريول تشتري جرايد اتقول الاسامي بينزلن فيها...
عايشه: لا لا يدتيه ما شي ما ينزلن الاسامي الا فالملحق..و الملحق ما ينزل الا الساعه خمس العصر..
ضبابه: و انتي شوه يالسه اتسوين من الصبح على هالتلفزيون ...تربيعبه شرقينا غربينا...
عايشه: يدتيه هاذا مب تلفزيون...هاذا كمبيتور يطلع النتايج
ضبابه: عيل شله ما تظهرينهن سودا الويه...
لطيفه: فتح الموقع؟؟
عايشه: فتح بس الله يغربللللللللللللللللهم الاتصالات قطعوا النت..مالقوا يقطعونها الا اليوم..اتشوفين النحاسه
++قلت في خاطريه احسن عشان ما يعرفون النتيجه..شكهلم وايد متفائلين و مستاااانسين..ما روم اخرب عليهم فرحتهم...
حمد و هو ايدش الصاله: بشروووونيه عن سلطان شوه سوا؟؟؟ ما طلعن النتايج؟
عايشه: لا بويه الين الحين ما شي خبر؟؟؟
حمد: لا اله الا الله...جانا البارحه ما بتنا على طول الليل انفكر بهن...وينه سلطان؟ سيروا وعوه خلوه ايروح المدرسه اييب النتايج
لطيفه: لا لا لا لا .بويه سلطان البارحه مواصل ما فيه ايسير المدرسه برايه بنفتح الموقع الحين و بنشوف النتايج..
و الله العظيم الصاله اتقولون قاعه مؤتمرات...كل واحد يفتي في هالموضوع..اللي ايقول النتايج طلعت..و اللي ايقول لا..و اللي مشغل الراديو يالس يتسمع..يدتيه الله يهديها مشغله الراديو و مطوله عليه..يعني نحن ناقصين توتر!!!و عايشه كل شوي اتجرب وسيله و انا متسانده عالكرسي ببؤس اقولهم و اريحهم؟؟!! ماقدر و الله ماقدر...الين الحين و انا حاسه بغصه..الله يعينك يا سلطان..و اصوات التيلفونات شاله الدنيا...
حمد: حد يرد على التيلفون...وين ايصيح هاذا التيلفون...شلوه ازعجنا؟؟؟
عايشه: ماشي بويه تيلفون البيت انا شابكه عليه...بيكون واحد من الموبايلات...
++ من رنت الموبايل عرفت انه موبايل سلطان..يمكن نساه الصبح اهنيه يوم كان ايكلمني..قمت بسرعه اركض ادوره عشان اشله قبل لا ايرد عليه بويه و يوصله الخبر..و الله ما خليت مكان و انا ادور هالتيلفون الين ما لقيته بسرعه تحت الكرسي..بس الحمدلله وقف..فكه..بس رد يتصل مره ثانيه..شوه هاذا شوه هالغلاسه...خلاص بس ماردينا عليك ليش تتصل مره ثانيه...
حمد: لطيفه بنتيه ردي على التيلفون يمكن حد يايب النتيجه..
رفعت عيني على الشاشه لقيت مكتوب " سيـــــــــــد ساداتي" لا لا ما فيني ارد عليه...يمكن واحد من ربعه و ما فيني احرج نفسي وياه..ولا اريد ابويه ايرد عليه عشان ما يعرف النتيجه ادري مصيرهم ايعرفون بس مب الحين و هم متحمسين خلهم يوم بيملون بنخبرهم...بس التيلفون ابد ما وقف يالله منوه يعني؟؟؟ جيكت على الرقم اكتشفت انه رقم فاطمه؟؟!!!!! و انا الغبيه كيف ما فهمت انه يقصد بسيد ساداتي--> ضبابه؟؟!!! هاذي شوه عندها الحين!!!! اذا عرفت النتايج مستحيل تتصل اهنيه لانها بتعرف انه سلطان ما نجح..شليت الموبايل و طلعت فالصاله اللي براا..
لطيفه: الو...مرحبا ضبابه...
ضبابه: نجحناااااااااااااااااااااااااااااااااااااا.....لطو ووووف...و الله..و الله ما صدق نجحنا..افتكينا خلاص ما شي ثانويه عااامه...خلاص ...خلاص...و انفجرت ضبابه اتصيح...
لطيفه و بكل فتور: و الله.؟؟!!!! مبروووك...
ضبابه: وي...ووووينكم انتو ما تردون من الصبح عل...على التتت..التيلفونات( و شهقات ضبابه ما وقفت)سسس...سس...سلطان وين بباركله؟؟؟
لطيفه: انتي ما دريتي...ضبابه لا تخبرينهم الحين..سلطان ياب دور ثاني...بشري انتي كم يبتي؟؟
ضبابه: شوو؟؟!!!! دور ثاني؟؟؟ و عقب فترة صمت...شوووووو دور ثاني؟؟!!! منوه؟؟؟ سلطان نجح..
لطيفه: لا و الله هو اليوم قالي انه دور ثاني علم نفس
ضبابه: خلي عنج..اتسوين فيه مقلب ادريبج...توني شايفه النتايج فالنت...انا 92,3 و سلطان 72،3 شفتي شفتي القلوب عند بعضها النسب تتشابه
لطيفه و بغيض: ضبابه!!!!! تتطنزين انتي؟؟!!! اقولج هو قاييلي الصبح!!!
ضبابه: و انا اقولج انه فالنت مكتوب تبيني اقرالج...سمعي سمعي...سلطان حمد سلطان سعيد ال....مدرسه خليفه بن زايد الثانويه بنين..منطقه العين التعليميه... رقم الجلوس 2127.. ناجح..النسبه..72،3..تبني اعطيج الدرجات بالتفصيل بعد؟
لطيفه و بصرررريخ:في ذمـــــــــــــــــــــــــــــــــــــــــــتج؟
ضبابه: و راس اهليه و طوايفيه...انه نجح...
ما عرف شوه سويت في هاللحظه...حسيت بعمري اطير اططططير...دخلت عليهم وقفت على الباب بصمت..و اطالع في ويوهم واحد واحد....
عفرا: لا تقولين لا تقولين........امررره من بغيمج(صراخج) عرفناها النتيجه...انا الله و انا ليه راجعون..
اليده ضبابه: اسمعو هاي انتو خلو البنت ترمس...لطوووووف...فالراس ولا فالركـــــــــب؟؟...النتيجه فالراس ولا فالركب؟؟؟؟!!!!
لطيفه و بصياح على دموع على ضحك: يدتيه فالراااااااااااااااااااااااااااااس..فالراس رفع روووسنا...بووويه اثنين و سبعين!!!! نجح نجججججججججججججججح سلطان....و ركضت صوب ابويه الوي عليه و اصيح و ابويه ايقول طول الوقت اللهم لك الحمد اللهم لك الحمد...و امايه و عويش كل وحده ماسكه الثانيه و اتصيح..و يدتيه شفناها تركض صوب الباب من الفرح...وين بتسير العيوز شكلها خرفت!!!! بس لاحظت انه سعيد اخويه واقف على الباب وانه يدتيه راكضه صوبه....
سعيد: مبرووووك نجاح بومييد عليكم...
حمد: الله يبارج فيك يا بويه و عقبال حمد و خالد...منوه بشرك انته؟
سعيد و هو ايحرك ايديه بعدم اكتراث: ادري من يومين انه نجح...كلمت الكنترول..و عطوني النتيجه...و الله يا سلطان ظهر شي منك
عفرا و هيه اتصيح: يااااابويه ليش ما تقولنا يوم عندك خبر من يومين؟؟؟ خليتنا لا نعرف كوعنا من بوعنا
سعيد و بكل برود: اتحرا عندكم خبر...عنبوه انا اشتريت هدية النجاح...وينه سلطان؟؟
اليده ضبابه: شوه خذلته؟؟؟
سعيد: سياره رنج...وينه هوووو؟؟؟
عفرا: خيبه نسينا الولد راااقد ولا حد بشره فدددددددددديت رووووحه....يعلني افدا بوميد لا خليت منه...
عايشه: انا انا انا بسير ابشره..
وضحه: و الله انابسبقج باخذ البشاره...
و ركضن عايشه و وضحه فوق اللي تبشر سلطان بالنتيجه قبل...في حجره سلطان...
عايشه: سسسلطان...قوم قوم يالله قوووووم...قوووم نجحت نجحت...قوووم...
سلطان وايصارخ: سيرن براااااااااااااااااااااا
وضحه: سمعوا انتوووو...خلاص ما شي ثانويه عااامه قوووم يالله..و نقزت وضحا على الشبريه تسحب اللحاف عن سلطان...
سلطان: الله يللللللللللللللللللللللللللللللللللللللعنكن.....اط لعن اطلعن...اطلعن قبل لا تشوفن شي ما شفتنه...
عايشه: سلطان حرام عليك...قوم طلعنا نتيجتك...يبت 72 قوووم قوووم حد ينجح فالثانويه وايتم رااااقد؟؟!!!
وضحه: يالغبي قوم كل الناس تحت فرحااانه..
قام سلطان و مسك كرتون الكلينكس وفرّه على وضحه: براااااا..تقصن عليه انتن؟؟!!!!
عايشه: و الله و ربي في سماه..جانك مب مصدق وايج من الدريشه و بتشوف سياره رنج عسسليه رهههههيبه هديت نجاحك من عند سعيد...
فز سلطان بلا حاسيه صوب الدريشه و اول ما اتأكد من صدق الكلام...
سلطان: منوه قالكن اني نجحت؟
عايشه: ضبابه...شافت اسمك فالنت...
سلطان: قولي والله
عايشه: و الله و الله الف مب مره
سلطان و بصوت عالي: يعلللللللللللللللللللللني افدااها ان شالله..
و طلع سلطان يركض بالوزار و الفانيله تحت و عايشه و وضحا وراه...و شوه استوا تحت؟؟!!! عرس عرس..من شده الفرح..ابويه اول مره تنزل دمعته..وهو ايضم سلطان لصدره...و سعيد ضم سلطان لصدره بعد و باركله...سعيد و هو ايدق على جتف سلطان بايده...
سعيد: مبروووووك بو مييد....رفعت الراس و الله
يدتيه ضبابه و هي ماسكه خصر سلطان و اتصيح و تتلكم في نفس الوقت: يووم قلتلكم بينجح..هاذا بومييد..يعلني افداه و افدا ثره....يوم تحقّ من عينها...بومييد ما يطيع زينه
سلطان و هو ايبوس راس يدتيه: الله يبارك فيكم...و الله العظيم اني مممممممميت من الفرررح..
حمد: الله يسعدك يا بويه....الله يوفجك...رفعت راسنا يعل رايتك دووم بيضا..
سلطان: كله من فضلكم يا بويه...
سعيد: تستاهل تستاااااهل...صبرت و نلت...و هاااااااااااااااااااااذا مفتاح السياره انا وعدتك بالهديه..ويوم ياني الخبر سيده ظهرت الوكاله و سحبتها لك...
سلطان: ما تقصر بو حمد
سعيد: الله يعطيك خيرها و يكفيك شرها..يعلك تبطي حي يا بومييد على هاليوم...
سلطان: امين يا رب...
و طلع سلطان من شدة الفرح برا ايشوف السياره..و طلع و هو ما يتحكم بالكلام اللي يقوله لدرجه انه ما انتبه انه مب لابس الا وزار و فانيله بس..طلع و نحن مشي وراه.,,وين ما ندري بس اللي انعرفه انه درب الفرحه هو اللي يجمعنا...ركب سلطان السياره و زقر علينا...ركّبنا يدتيه ضبابه من جدام..و ركبنا انا و عويش و ووضحا من ورا...اما امايه فخلينها سنترال اترد على التيلفونات و التهاني اللي ما وقفت ساعه..نعرف انه سلطان مب اول واحد ينجح..ولا انه نسبته عاليه..بس كفايه انه قرر انه يدرس مره ثانيه من بعد ما كان معزم انه يتركها..كفايه انه نجح من اول محاوله و هو الله يهديه معروف انه رسيب...دايما طعم نجاح الولد في مجتمعنا ايي بصعوبه وله طعم ثااااااااني!!!!!
عايشه: سلطان وين بنسير؟؟؟
سلطان: و الله مادري وين تبون اتسيرون انتوا؟
ضبابه: ودووونا صوب بيت عمتك بخيته...انسير انسير بنبارك لضبابه...
سلطان: هيه و الله .....ضبابه كم يابت؟
لطيفه: يابت مادري شي و تسعين...اثنين و تسعين يمكن..
سلطان: لا و الله؟؟؟ ماشالله عليها...قالتلي حليلها باييب فالتسعين ما صدقتها...دحيحه البنت
ضبابه: صل على النبي لا تنضل البنت...
سلطان: الله صلي على محمد...بس اريد احسدها..عشان ما تدش الجامعه بس عاد يوزوونا يدتيه رمسي اهليه...شوه بعد نجاح و نجحنا...
ضبابه: امررره فالك طيب بومييد خلاص الريال من ايكمل 16 ايوزوونه لوّل
عايشه: يدتيه شوه 16 سلطان 22 سنه الحين
ضبابه: اسمعو انتو...اسميج الا ما تعرفين...الا عام لوّل طايح سلطان...
سلطان و هو ايبوس ايد يدتيه اللي حاطتنها على مقدمه السياره عشان تتساند: يعلج تبطين حيه يا ام حمد...
ضبابه: الله ايخليكم لاهلكم..و اشوف عيالكم..و عيال بو شهاب و لطيفه
لطيفه: حووووووه وضيح شوه بلاج شي ايعورج ( وضحا كانت حاطه راسها على كرسي السياره يعني طايحه على جدام و ما تتحرك)
وضحا: لا لا ما شي بس احب ريحة السياره اليديده...
سلطان: و العثره جان ما سكرت البنت...
الكل: هههههههههههه
لطيفه: افتكيت سلطان من الاكس فايف...ما تقول الا راكب فوق مصري (حمار) يربعبك...
عايشه: ليش سلطان لفيت على شيشه الجيمي؟؟؟
سلطان: و الله اني ماعرف راسي من كرياسي...راسي دار...
لطيفه: عاش بومييد اخترشت؟؟!!!! دوّر دوّر انسير بيت عموه بنببارك لهم...
مشانا شوي سلطان فالسياره اليديده الين حديقه الطويه و بعدين لفينا صوب بيت عموه..الفرحه اليوم عمت قلوبنا كلنا..ما عرف اذا نحن مب قادرين نمسك عمارنا من الفرح شوه شعور سلطان؟؟!! هم و انزاح..
اول ما نزلنا من السياره...
سلطان: خيبه الا وزار و فانيله يالفضايح...
ضبابه: واابووووووويه....اشعليك الا بيت عمتك هاذا...و بيت حرمتك ان شالله...
سلطان: آآآآآآآآآآآآآآآآآآآآآآآآآآآآآآآمين...
لطيفه: عاجل غير اجل
سلطان: آآآآآآآآآآآآآمين
الكل: ههههههههههه
سلطان: الحقن اشوف سياره الامارت الاعلام اهنيه...شوه ايسووون؟؟!! لا يكون بيصورونها الهاانم ضبابه؟
عايشه: شوه صوووره؟؟!!!! الا اثنين و تسعين هيه؟؟!!!
سلطان: انسير انسير داخل...
دخلنا داخل فوووج..اما بيت عموه فكان فوضا..عمتيه يالسه على التيلفون و كل شوي اتبارك و اتسكر..و ضبابه يالسه اتكلم فالموبايل..و شمسه و عمير يالسين على طرف شمسه منسدحه...و عمير ايرد على الاتصالات حتا عمير ايباركوله!!! اما احمد..فكان شالّ سيف على جتفه و كل شوي ايلاعبه..و حمديه جارتهم يالسه في طرف الصاله..بعد السلامات و التهاني..
سلطان: مبرووووووك ضبابه...شوه هالنسبه الحلوه لو ادريبج بتيبين فالتسعين بوقف هالسنه الين السنه اليايه عشان ما ييلسون ايقارنون!!!!
ضبابه: هههههه...الله يبارك فيك...و مبروك عليك انته...
عمير: خل عنك ياللوتي...الين السنه اليايه بتصبر عن العرس؟؟!!! انته امبونك تدرس و اتصيح دوم يوزوني اختكم يوزوني اياها...
سلطان: هههههههه...يا بوي بنتكم دحيحه انا ماروم عليها...بسير اخذلي وحده غبيه..هاي خلوها عندكم بتقولي عقب اريد ادرس ماجستير و دكتوراه وما دري شو!!!!
احمد: افااااا يا بومييد...امررره لو تبا الحين بنملج...
سلطان: في ذمتك؟؟؟
احمد: هههههههه...خلاص الاسبوع الياي المليج عندنا...زهب اوراقك..و بنخلص في يوم واحد..
سلطان: شوه الراي العروس؟؟
ضبابه و ويهها طماطه: الشور شور خوانيه..
عمير: مشتهيات مستحيات...
شمسه و هي تضرب عمير ريلها على جتفه: ااااااايه...حرام عليك...احرجت البنت...
سلطان: هاي هاي هاي..انتي...انتي خليج في صوب...ويا هالكرشه..بتخبرج انتي حامل بتوم؟؟
عمير و هو ايرش ماي على سلطان: صل عالنبي...اااااايه خل حرمتيه مالك خص فيها...
سلطان: الا شميس تراها لا تنسا اختيه..متا ما بغيت بشلها..
عمير: و منوه بيشاورك انته...يابوي الحرمه في جيبي الحين...
سلطان: لا لا يا بوي هاي شمسه ما تبيعنا برخيص..صح ام سيف ولا؟؟؟
شمسه: الصراحه؟؟؟ ولا....ابا ريلي...
سلطان: افااااااااااااااااا,,,,,,قالوها من تعرس البنت اتأشر على بيت ريلها و اتقول هاذا بيتي و هاذاك بيت ابويه...
شمسه: حرااام عليك جاني البارحه بغيت اربي من الخوف و الهم عليك!!!؟؟؟
سلطان: هههههههه...جان ربيتي و فكيتينا...هههههه....تعالوا اشوف سيارة الامارات للاعلام اهنيه شوه تسوي؟
ضبابه: يايين ايصورون مريم بنت يييرانا تراها طلعت التاسعه على الدوله
سلطان: لا و الله؟؟!!!!! ما شاللله التاسعه!!!! هاي اكيد كانت تتعشا و تتغدا على الكتب...ماشااااااالله..عليها..عليّه انها ما فيها حيله....ما توقعت انه حد من هالحاره بيطلع من الاوائل..
ضبابه: شفتوا عاااااد البنات....ما حد قدناااااااا...
++ بما انه القعده اغلبها شباب..وانا عروس سحبتني عايشه على طرف عشان يونه المفروض المعرس ما يشوفج..وانه بالاساس مفروض ما ايي اهنيه..بس انا ما همنيه..شوه يعني شافني احمد؟؟!! بيغير رايه يعني؟؟!! امبونه هالعرس مب عرس طبيعي..و ما همنيه اذا شافني المعرس قبل العرس ولا لا..يصطفل..و انا بالاساس كلمتين على بعض ما تكلمت معاه..عادي..ليش انضخم الموضوع..هاذاك لو كان المعرس بيموت فيني و بياخذني من خاطره هاذيج الساعه لهم كل الحق انهم يمنعوني من اني اشوفه عشان ايزيد الوله و الترقب منه صوبي...بس عمره هالشي ما كان ولا بيكون!!!!
قمنا انا و عايشه ووضحا و فاطمه و ضبابه و قعدنا على طرف بعيد شوي عشان انسولف و عشان تاخذ ضبابه راحتها فالرد على المكالمات..اما سلطان و احمد فطلعوا وشلوا سيف وياهم..يتحوطون بالسياره..اما عصافير الحب عمير و شمسه مسوين لنا فلم مكسيكي بس مب محذف..يعني كل شوي نلتفت صوبهم نستحي و انلف الصوب الثاني ما شالله وايد ماخذين راحتهم!!! شكلهم من كثر الحب ناسين الدنيا و ما فيها...الله يهنيهم..اما انا فاستلمتني فاطمه...سين جيم تحقيق عن العرس..شوه سويت؟؟شوه خلصت؟؟ وين حجزت.؟؟ الاغراض زاهبه...لدرجه انه الشباب رجعوا و قعدوا فالصاله ونحن ما حسينا..اما عايشه و ضبابه سارن المطبخ عشان ايسون عصير و سندويجات للشبيبه لانه الوقت بعده الضحا..و هم هلكانين يوع..
سلطان: لطوووووووف...
لطيفه: لبيه بومييد
سلطان: لبيتي في منى...تسمعنيه ريلج المتخلف شوه ايقول؟؟
ريلج!!! يالله ما صعبها هالكلمه...كنت لا اراديا بقول منوه ريلي؟؟!! بس الله ستر و مسكت نفسي..قبل لا اعق قنبله...يا جماعه الخير و الله العظيم ما احس بصوبه بأي شي..عالاقل اول كنت احس بصوبه بكره و بغض,,,اما الحين ولا شي ولا شي..حاله حال الكرسي اللي يالس عليه...
لطيفه و بإبتسامه مصطنعه: شوه ايقول؟؟
سلطان: ايقول بيوديج شهر العسل عند قوم سعادة البيه؟؟!!!!
فاطمه: شوووووووو!!!!! احمد الله يهديك ترانا اقنعناك بالنمسا شوه ياك غيرت رايك؟؟؟
شمسه: طالعوا انتو!!!!!! حرقتوا المفاجأه على العروووووس....اووووووه منكم!!!
احمد: و الله اخوج وكالة انباء من انقوله شي احتشر!!!!
سلطان: ياخي اختيه العروس...و دامنك بتدفع دم ألبك على قولتهم فالعرس ودها مكان محترم مودنها مصر..وعععع كلها دخان و سياير!!!!
احمد: وانا ما بوديها وين الزحمه...بنسير شرم الشيخ اسبوع و عقب الغردئه على قولتهم و الاسكندريه و بنرد...
سلطان: طالعو انتو هاذا!!!! يوّن الاسكندريه و شرم الشيخ!!!! يتحرا عمره عبدالحليم!!! اختيه ما تسير الا سويسرا.!!!
احمد: و انته شوه يخصك صدق ناس رزه...شوه رايج انتي لطيفه...
لطيفه وويهي محروق...اووووف منهم..شوخ هالجرأه هاذي ايشاورني وين بسير مع ريلي شهر عسل!!!! صح انا و احمد ماخذين على بعض..و متربين مع بعض بس مب لهدرجه اوكي سلطان اوكي على هالحركات ادري يبا يحرجني بس!!!!
لطيفه: أأأ....مادري انا مالي راي...
سلطان: سمعو انتو !!! صدق عنز من الحين بتخلينه يتحكم بج!!!
اليده ضبابه: يييي هاااا يا سلطان...وش تبا بالريال وحرمته...بترتكز في نصهم انته..خلهم لو يبون ايسيرون الهور برايهم انته شوه ايخصك..و الحرمه تتبع ريلها وين ما يسير...
سلطان: اوف اوف اوف...البوس اتكلم و عااااد شوه بتدافع عن غناة الفواد احمد...يا بوي انا انسحب لا ايحكمون عليه مؤبد..
الكل: ههههههههههههههههههههه...
عايشه: تعال سلطان شوه سالفة الجريده؟؟؟ لطوف اتقول نزلوا اساميكم في الدور الثاني؟؟؟
سلطان: لا لا لا ...نزلن بالغلط..و باجر بينزلون لنا اعتذار فالجريده..بس خمسه شباب..الله يلعنهم مالقوا الا انا ايحطوني فيهم...
احمد: ما تنلام..النحاسه راكبتنك من ساسك لراسك..
سلطان: لا حشا انا مب نحس...مادري منوه النحس فينا...هههههههه
بــــــــــــــــــــــــــــــااااااك
بعد اسبوع من الاحداث السابقه....
بدا العد التنازلي للعرس..كل بعد يوم ايزيد شعوري بالخوف و الارتباك..هل انا بالفعل بقدر اعرس؟؟ باخذ احمد على سنة الله و رسوله؟؟!! بكون حرمته في كل الاحوال فالافراح و الاتراح..ام عياله..شريكة حياتي..نصه الثاني؟؟!!! لا لا مب معقول هاذا مجرد كابوس و بقوم منه في اي لحظه..مادري احس بضيقه في صدري..و كل ما يطرولي اسم احمد يخطر على بالي اصيح و اصارخ باعلا صوت اني ماباه..بدت دفاعاتي و خططيه تنهار تدريجيا..من الاسبوع اللي فات خلاص خلصنا كل الترتيبات اللي تخص العنايه بي انا..و بدينا انجيك على الزهاب و ترتيبه..البطايق..القاعه..الكوشه..الاضاءه و الي ما هنالك...
كشميرا: لتتتتتتتتتتتتتتتتتتتتتتتيفا....اروووووووسا....هابي بتي اروووس يالله سولتان يريد انتي تحت
لطيفه: وين ؟
كشميرا: في مناك تحاااااات...
لطيفه: خلاص ما عليه طلعي...انا بلف شعريه و بينزل تحت..
كنت مسويه حمام زيت لشعريه و ما عندي فرصه اني اغسله لاني اعرف سلطان اذا قال شي لازم يتنفذ فالحال، بس اللي لاحظته انه كشميرا ما طلعت بالعكس قعدت فالغرفه و بدت تمشي صوبي..شوه بلاها؟؟
لطيفه: كشميرا شوه فيه؟؟؟ يريد شي انتي؟
كشميرا:أجججججججججججججججججيه...لتيفا انا هبّي انتي فااااااااااااااااااااااجد...( و ضمتني فجأه و هي اتصيح و اتصيح بصراحه ما عرفت شوه اسوي) انتي بنت تمام...انتي روووح بعدين بيت ما في حلو..انتي كل يوم زنجال..كلش سوي ترتيب..ايجي عيد انتي سوي ترتيب سوي اكل..ازا ماماه مافي داكل بيت انتي سيم سيم ماماه...
لطيفه و الله العظيم خنقتني العبره ما عرفت شوه اقول: خلاص خلاص كشميرا...انتي قول ان شالله انا يجي فرحان..قولي يا رب
كشميرا: يااااارب...انتي روح بيت ماماه بكيته...شيل انا سيم سيم انتي...انا مايريد نوم منيه ازا انتي ما في موجود...انا اسبوع ما يقدر نوم ما يقدر اكل كللللش فكر فكر كيف انتي بيروح...
لطيفه: هههههههه...لازم بنت سوي عروس صح ولا لا ؟؟
كشميرا: مألوم....بس انا يجي مني امارات انتي صغير فاااجد...اول انتي صغير انتي فاااجد مشكله بس انتي تمام...انتي يجي عرووووس حلووووو( و هي تمسح على شعريه) انتي تمام ارباب احمد تمام...
لطيفه و انا مب قادره اقول اي كلمه زياده و بنفجر: خلاص خلاص..روحي روحي قولي حق سلطان انا بغسل شعر بعدين يجي..
اول ما طلعت نزلت دمعتيه..الم..و حزن على فراق هالبيت..عمري ما تصورت صعوبه هاللحظه..ما اعتقد انه البنت حتا لو كانت فرحانه بالعرس اتكون فرحانه بفراق ابسط الناس و اقربهم في حياتها..الله يعدي هالاسبوع على خير...
نزلت تحت لقيت سلطان...تحت و محتشر و قابض عباس الهندي من حلجه..لا اله الا الله شوه مستوي بعد؟؟
لطيفه: هاه..هاه سلطان عيّن خير شياك على عباااااس...
سلطان: الهههههههههههرم من متا اقووووله السياره غسلها غسلها...السبال دووم ايغايض..
عباس و هو اينازع: انا كل ثنين يوم انا سوي غسل بس انا ما يقدر سوي غسل زياده
سلطان: جب يالهررررررم...تعلي حسّك عليه بعد...يا مال الشوزن بين عيونك...
لطيفه: الله يهديك يا سلطان خلاص فجه فجه ما تعرف انته عباس و نحاسته..
سلطان: هيه اترووووم اتغسل سيارة خليفه كل يوم؟؟!!!!
عباس: كليفا ولد مال انا...انا يجي امارات كليفا جيكو..انا هبي كليفا انتي زيااااده جنجال..
سلطان و هو رافع ايده بين عيون عباس يبا يعطيه بكس: حبتك القراااااده...
لطيفه: و رفجه و رفجه انك اتفجه خلااااص بس..خله...بس سللللطان...شوه تباني انته...
سلطان: عووووذ بالله من بليس...انته بليس في معلوم بليس ولا لا ؟؟؟
عباس:مألووووم بليز...بليز انجلش..يعني تمام...
لطيفه: ههههههههههههههههه....روح روح...شوف ماماه عفرا شوه ايريد...
سلطان: الله يغربله السبال مادري ليش بويه متعلق بهالاشكال قلناله خلنا نيبب واحد غيره ما طاع
لطيفه: يا سلطان هاذا عندنا من قبل لا ايطيح خليفه خويه..خلّه في حاله من يوم انته ياهل و انته اتلاسن وياه...
سلطان: فقدته..
لطيفه: يالله انزين شوه تباني؟
سلطان: تعالي ويايه شوي...
سرنا الين سياره سلطان و فتح لي الدبه عشان ايرويني شي..
سلطان: شوه رايج؟
لطيفه: ياااااااااااااااااااااااااااااااي....لمنوه هاذا البوكس؟
سلطان: للشيخه ضبابه بمناسبه النجاح...
كان بوكس بنفسجي تقريبا متر في متر..كله شرايط زهريه فيه هدايا بعضها مغلف و الثاني مرتب بشكل رهيب..
لطيفه: غربلات عدوووووووك....محلااااااااااااااااااتهن...شوه هاذا شنط و قمصان احلا عن زهابي..
سلطان: ههههههههه...تعرفين ما عرفت شوه اخذلها قلت اكيد لانها بنت كل الهدايا بيكونن ذهب وجيه قلت باخذلها شي غريب تعرفين عشان الجامعه و جيه؟؟؟ الا بتخبرج في شوه سجلت هيه؟
لطيفه: مادري قدمت اوراقها في جامعه بوظبي بس من درت انك بتسجل فالتقنيه يمكن تسحب اوراقها و تسجل هيه بعد فالتقنيه...
سلطان: لاه..اوكي اوكي قوليلي شوه راااايج؟ صراحه صراحه؟
لطيفه: صراااااااحه..توب توب توب...و شدراك انته بالماركات...حسبي الله على بليسك كلهن مااااركات..
سلطان: سرت عند عويش و خليتها تكتبلي اسماء الماركات و رحت برجمان اليوم...و خذتلها..
لطيفه: و شمعنا عووووويش؟؟؟ ليش ما تقولي انا..
سلطان: عاااد انتي الله يهديج...الا قوم زارا...و مانجو..كان كان..يا بوي شوفي ذووق عويش انتي كريستيان ديور..و فندي..و بوجاتي
لطيفه و هي تضرب سلطان على جتفه: اتطنز اتنطنز انته!!! عنبوه زهاب هاذا مب هديه نجاح..طالعوا انتو شنطه كرستيان ديور هاتها هاتها هاي انا باخذها حقي ما تباها ضبابه..
سلطان: روحي لاه...دافع فيها دم ألبي...ست الاف..حشا لو بعدها بكره ولا قعود!!!!
لطيفه: هههههههههه....في ذمتك بكم كلفك هالبوكس و اللي فيه؟؟؟
سلطان: بيني وبينج؟؟؟ 12 الف و اربعميه و ثلاثين كااااااااااااااش دااااااااااون...رصيدي الحين مفضي..عالحديده!!!!
لطيفه: لا حوووووووووووووووووووول...و من الحب ماقتل
سلطان: شوه نسوي بعد...تعالي تعالي وين بتسيرين؟
لطيفه: شوه بعد؟؟!!! لا تقولي خذتلها جواتي !!!
سلطان: هههههه...لا لا تعالي...حتا العروس خذنالها هديه...
لطيفه: لا لا لا تكلف على عمرك..
سلطان: خلاص الحين عاد كلفت شوه اسوي...شوفي عاد انتي عروس يعني اكيد ما خليتي شي ما شتريتيه..فقلت شوه باخذلج...خذتلج عطوووور عربيه اعرفج اتمووتين على دهن العوود و المعتق..(وطلع سلطان بوكس هالمره اصغر بس كله عطوور عربيه رهيبه) شوفي عشان كل ما تعطرين حق ريلج اتقوليله هاذيلا من عندي...ذليه ذل!!!!
لطيفه: هههههههههه ( بصراحه شوه اليوم الكل متفق عليه عشان ايصيحني!!!! ما قدرت اذا حطيت عيني في عينه يمكن اسوي مناحه..كل اللي قدرت عليه...ضميته عالسريع..و حبيته على طرف رقبته و ركضت داخل)...
عدا هاليوم بشكل روتيني المشكله اني ما شوف حد ما اقدر ألمح حد عشان اسولف وياه...امايه و عمتيه بختيه ماخذات زام فالسوق كل يوم من يصبحن الين يمسن ما نشوفهن..شمسه اختيه خلاص عطيناها تايم اوت لانها خلاص شكلها موّصله و ما تطلع من الغرفه..خليفه اخويه و سعيد فالدوامات اللي في بوظبي و اللي في دبي..اما سلطان اخويه و ابويه...فهم اربع و عشرين ساعه سايرين رادين القاعه ايجيكون على ترتيبات العرس.. عويش مشغوله عالاخير لانه الحرمات سايرات رادت لبيتنا..ما عندي حد ايونسني غير ووضحا..اللي كانت تساعدني في ترتيب الشنط قبل اللحظات الاخيره..
اما يوم الاحد..فكان اصعب ايام حياتي كلها..في هاليوم اتجمعوا كل خواني سعيد و خليفه سلطان..عايشه و ووضحا و امايه عفرا وحتا ابويه في غرفتيه...قعدوا ايسولفون و يتكلمون معايه في كل المواضيع الا موضوع العرس..هاذا اليوم حسيت بالفعل اني مفارقه...خلاص..بروووح...برووح ولابرجع مره ثانيه لهالبيت مره ثانيه..و اذا رجعت له برد له ضيفه مب بنت..بنتهم..اللي حضنوني في يوم من الايام يوم كنت يتيمه...مب يتيمه ام...يتيمه حنان و عايله..حياتي كلها ما حسيت انهم اخواني من الابو بس..و حياتي كلها ما حسيت انه امايه عفرا امايه بالاسم بس..و حياتي كلها ما بنسا قربهم مني..حبهم لي..ضمتهم لي في حضنهم يوم ما كان عندي حضن الجأله غير ابويه..!!!
++أذن المغرب و بدت حالت الهستيريا و الطوارئ اتعم البيت...باجر الملجه..باجر بكون رسميا حرم احمد بن سيف بن عمير ال....، باجر رسميا بنزف للشخص اللي ما عرف شوه يعنيلي..هل اني اكرهه؟؟!! ابغضه؟؟!! او انه هالشي الصغير اللي يفز في شرايين قلبي كل ما شفته شعله من اللي ايسمونه الحب؟؟!!! معقوله اني لا زلت احبه عقب كل اللي سواه فيني!!! مستحيل..بس انا متأكده من ربي اللي خلقني و ما نساني..من ربي اللي عطاني هالعايله اللي لو بلف الكون كله ما بلقا مثل سعيد اخويه اللي كان دوم سند لي...شمسه اختيه اللي حضنتني جنها اميه..و اهتمت فيني..مثل خليفه اخويه..اللي ما كان يهون عليه ايشوف دمعه من دموعي..سلطان اخويه اللي عمري ما حسيت انه خويه..لكن توأميه..اللي عاش ويايه الحلوه و المره..عايشه اختيه..اللي كانت بعيده الجسم...و قريبه بالروح..بعايشه اللي كانت اتحسسني اني شي وايد كبير في حياتها...ولا وضحا اختيه اللي تشاركنا حتا الشبريه معاها..وضحا اللي كانت فالليل كل يوم قبل لا نرقد..اتقولي...لطيفه..صح انتي وايد تتحكمين فيني و ما تخيلني اسوي شي...بس انتي اكثر وحده احبها من خواتي!!!! الله يعيني على فرقاهم....
دعيت الله عقب صلاة المغرب انه ايصبرني على فراقهم..ايصبرني على مصيري المجهول..و انه يفتح ابواب رحمته لي..و ايرغبني في هالاحمد..لانه خلاص وصلت لنقطة اللاعوده!!!! تعتقدون اني اقدر اتراجع عن القرار الحين؟؟!!!!
دشت عليه يدتيه ضبابه في هاللحظه و هي شاله معاها كيس صغير...
اليده ضبابه: مررررررحبا....شمسيتي العروووووس؟
لطيفه...ركضت صوبها و مسكت لها كرسي عشان تيلس و بستها على راسها: بنعمه...ليش يدتيه ركبتي لين فوق جان قلتيلي و انا بنزلج الين تحت...
اليده ضبابه و هي تقرص لطيفه في اذنها: واااااابووووويه....عنبوه يا لطيفه...انتي عروس..يابنتيه انا ربيتج..من يوووووم انتي ام سنتين...ربيناج انا و يدج الله يرحمه..عرفتج و عرفت طباعج من يوم انتي ياهل...يا بنتيه انتي مب بنت ولديه انتي بنتي انا...و الله و الله يشهد انه غلاج انتي ما حد يساويه من بنات حمد ولا مبارك ولا بخيته...وواجب عليه اني اشوفج و اشوف جان تبين شي؟؟؟
لطيفه: الله يطول بعمرج...يعلنننني هب بلااااااااااااااااااج يا ام حمد...و الحمدلله طوّل عمار بويه و خوانيه ماقصروا عليه بشي...
ضبابه: ادري يا بنتيه انهم ما بيقصرون بشي...بس تراه باجر بيملجون..و قلت سبحان الله اشوفهم ساهين عنج...
لطيفه: ادري يا يدتيه...
ضبابه: ما شوفج مستانسه....و انا شفتج اتصيحين يا بنتيه...و يوم رمست سعيد خوج قالي انج متهّوبه(خايفه) من العرس...لكن انا اقول انج امرررره مب طبيعيه...يا بنتيه شي بلاج..شي في خاطرج؟؟!! ارمسي و تراه و الله اللي بتقولين انه ما يعدي باب هالحجره...
لطيفه: و الله يا يدتيه انه مابلاني شي...
قامت ضبابه و يلست عدالي على الكرسي و ضمتني خمس دقايق..اطول خمس دقايق في حياتي..ما كنت اسمع فيهن شي خير نصخها(صوت تنفسها) اللي كان عالي شوي بحكم انها انسانه كبيره..و صوت عقارب الساعه اللي كانت تفصلني عن اليوم اللي بنكتب رسميا زوجه احمد...بصراحه انا اعرف شوه تعنيلي يدتيه و هي اكثر وحده ممكن انها تكتم سري...مسكت ايدينها و بستهن وحده و را الثانيه و انا دموعي سكايب..انهار من حسره..و حزن..و ضياع..كنت بالفعل ضاااااااااااااااايعه....و ما عرف متا بشوف النور...
ضبابه: هـــــــــــــــــــــــــــــــــــــــــيه....و الله اني انكرت انه شي فيج يا بنتيه...يا بنتيه كل بنت في هاليوم تبا امها عندها..و انتي الله ما كتب لامج اتكون اليوم عندج بس انا انا..و هي اتأشر على قلبها...انا امج..و يدتج..و طوايفج كلهم...يا بنتيه لا تصيحين...بس يا بنتيه..تراني ما قهر..
لطيفه: يددد...يدتيه...يدتيه...مااااباااااا.....مااابااااا عرّس....مابا فديت رووووحج...شليني سويحان...ماريد اعيش اهنيه....شليني اهناك..و خليني اعيش وياج...مابا...الله يخليج..يدتيه..لا تخليني اعرس مابا..
سكتت اليده ضبابه عشر دقايق..خلتني احتار بشوه اتفكر..كانت موخيه راسها..بس فالاخير استسلمت و اتكلمت: ليش يا بنتيه...هاذا ولد عمتج من لحمج و دمج..و عقب ما تاخذينه بيساوي ناظر عيونج..ولا بتساويبه حد في هالدنيا...يا بنتيه احمد رياااااااااااااااااااااااااااااااااال...و الله في سماه و يشهد اني اتمنيت انج اتكونين انتي من نصيبه...لاني ماباه ياخذ اي وحده...ماحد يستاهله غيرج يا لطيفه...
++اهنيه عرفت انه كل للي فهالكون ما بيفهمون انا حقران احمد لي ايعذبني و الكل مقتنع انه راضي انه امايه بكستانيه ويوم اقولهم السبب ايقولون لا مستحيل لو احمد حاط في باله انج امج باكستانيه فهو بالاساس بيعترض..!!!!...و نظره الخوف اللي في عين يدتيه ازمتني اكثر فاستسلمت و دورت اي سبب ثاني عشان ازيل الشك من بالها...
لطيفه: يدتيه يدتيه احمد مغازلجي و راعي بنات...شقايل باخذ واحد ما خلا بنت ما رمسها!!!! ماباه يدتيه..
ضبابه: ههههههههههههههه...مستحرصه ( تغارين) عليه ثرج انتي؟؟!!!!ههههههههه....يا بنتيه برايه خليه يعيّب و يغازل...لكن من ياخذج خلاف انتي بتسدينه عنهن كلهن..يابنتيه انتي مب رخيصه..انتي بنت ما شالله فيج من كل شي من الزين و الخلق و المذهب..بيخليج و بيسير يربع صوبهن هاذيلا مسودات الويه.؟؟!! و انتي شوه دراج انه يغازل؟؟!!!
لطيفه: يدتيه...شله ما عرس الين الحين...ريال عمره سبع و عشرين سنه!!!!!
ضبابه: ههههههههههههههههههههه...يا بنتيه ايقولولج من تعووووزب دوووم خذ خيار القووووووم...و انتي من خيار القوم..خلي عنج هالرمسات اللي مالها معني..و فتحت يدتيه الكيس اللي عندها..و طلعت غرشه عطر صغيره...يا بنتيه اندوج هاذي مخمريه..اروووووحي مسويتنها...اليوم فزعت الين دبي وسرت عند فولاذ و اشتريت لج هالدهن العوووود...يالله يا ريحته..يوم ايعديج يا بنتيه الصبح كل يوم حطي شويه تحت ذنج...بتغدي ريحتج اتهدن(تفوح)...و هاذيلا الكواشي (حلق) ماليلي انا يوم انا عروس يابهن يدج الله يرحمه ليه....و ما عطيتهن حد...ميودتنهن لج انتي...يوم اليمعه لبسي هاذاك الثوب الميزع..ولا عقولتهم مغربي..و حطيهن...تراهن هاذيلا مب رخاص..هاذيلا ذهب البحرين...
لطيفه و انا فيني الضحكه على الصياح: ان شالله...
ضبابه:برايج يا بنتيه انا بخليج..بس بغيت اوصيج..لا تحطين و تلويصين من هالصبغ على ويهج..اووووووصيج وصيه...هب تحطين شراتهن هاذيلا العرّس اللي تقولين حد لاطمنهن على عيونهن..غاديات سود ما تعرفين يفونها(جفونها) من عيونها...
لطيفه: هههههههههههههه...انا شالله يا يدتيه...
++ طلعت يدتيه..طلعت و خلتني في حاله احسن من قبل..ريحتني..هدتني..و خلتني اقتنع و ارضا بالامر الواقع...بعد شوي يتني مالت الصالون...و اشتغلت فيني بعض الترتيبات للعرس..و ما خلصت الين قبل نص الليل...اول ما طلعت و خلصت اتسبحت و رقدت كنت حاسه اني اذا يلست بنهار من التفكير فكان النوم هو الخيار الوحيد..قمت عالساعه عشر الصبح..صباح الملجه..يوم الاثنين..قمت عالحشره و الاصوات و الازعاج و الهرنات...سحبت الكرسي و يلست عدال الدريشه..اليوم الملجه بس و بنغدي ييرانا..و احتمال يتجمعن اليوم البنات عندي من العصر الين صلاه العشا..عزمت فاطمه ربيعاتنا و ربعنا اللي فالجامعه..بنات ييرانا و اصدقاء الطفوله..عشان يغيرون جو عليه اليوم...اشوف امايه عفرا تركض يمين شمال..و ابويه قابض الموبايل و محتشر...و يدتيه فارشه فالحوش و ميلسه خالد و حمد عيال سعيد اخويه عندها..و يالسه تامر و تنهي..و سلطان اخويه يالس ايأمر على الهنود..اما خليفه اخويه فكان ايجيك على الميالس..
دخلت عليه عايشه اختيه...
عايشه: صباح الخير صبااح النور..يا احلا عروس..و احلا اخت...
لطيفه: ههههههههه...صباح الخير...
عايشه: شوه المعنويات...اليوم انتي رسميا حرم احمد ال....
لطيفه: ماشي الحال...
عايشه : يالله زهبي عمرج..المليج بيي عقب نص ساعه...و البيت متروس من الحريم..انزلي من صاله خليفه و سلطان سيده على الصاله الزجاجيه لانه الميالس مب فاضيه..
لطيفه: تيكي...
عايشه: يالله بخليج لاني خليت الحرمات رواحهن..انا ابا اعرف شوه يايبنهن..مب عرس الا ملجه..و انا اتدبست بهن..
لطيفه: ما عليه...
طلعت عايشه..قمت سشورت شعريه..بدلت لبسي..و لبست بعد تردد طويل مغربيه بسيطه وايد..لبست شيله سودا..اتجحلت..وانا ايدي ترتجف..اتعطرت و يلست..خلاص عرفت انه خلاص..كل شي بدا يدخل في دوامه سريعه..و ماشي مجال انه يتوقف..بعد نص ساعه دخلت وضحا اختيه...
وضحا: الف الصلاة ة السلااااااااااام عليك يا حبيب الله محماااااااااااااااااااااد..كلككككللووولوووولووووش. ..يا معيريس عين الله...اووووه نسيت الاغنيه و انا من البارحه يالسه اتحفظها...
لطيفه: ههههههههه...ايسدنيه اني صبحت على صوتج...
وضحا: يالله بويه ايقولج نزلي تحت يبووونج....لطفين
لطيفه: هلا الوضيحي
وضحا: يوم تعرسين...تعالي باتي عندنا اهنيه...لاني لاني...ماروم ارقد على هالشبريه العوده برووحي..اتعودت عليج..
لطيفه: اممممم..أأأأ...ان شالله..
وضحا: لطفين...انا..تراني والله اني احبج...لا تزعلين يوم كنت اعصبج...مادري
لطيفه..ضميت وضحا و بستها على كل خد: الوضيحي...انا ازعل عليج انتي؟؟!!! مستحيل..حتا انا احبج
وضحا: يالله عيل..انسير تحت
لطيفه: يالله
++ طلعت من الغرفه...و اشوف عمري امشي في نفق اسود..اترقب الضوء في نهايته بفارغ الصبر..كنت احس بنفسي مادري؟؟!!! هل انا بالاساس كنت احس؟؟!! كنت ماسكه ايد وضحا و هي اللي مسكتني وودتني الين الصاله..ولا انا مستحيل اوصل..شكلي حتا بيتنا نسيته!!! هل هو الخوف؟؟!!! ولا الاثاره..ولا الغصه؟؟!!
دشيت الصاله..لفت عيوني في اطرافها..اول ماشفت سعيد اخويه يالس على طرف..بدن ريولي يرتجفن..و احس انه جمسي تلفه البروده..جني محمومه..دايخه..و خفت اطيح..فقمت و يلست على اقرب كرسي..ياني سعيد اخويه..
سعيد: شحالج العروس؟
لطيفه: هاه؟؟!! مادري بخير بخير..
سعيد: ههههههه...لطيفه...من خاطرج موافقه على هالشي؟؟!!!
لطيفه: مادري..
سعيد: شوه ماتدرين..؟؟!!! اذا تبين انا بزقر المليج..اذا ما تبين من الحين قوليلنا و ما في داعي للفضايح
لطيفه: ازقر المليج..
سعيد: من خاطرج...
لطيفه: سعيد ارجووك...ازقر المليج..
طلع سعيد مدة زمنيه ما عرفت احددها فقدت الاحساس بالمكان...بالزمن..باللي حواليه..فجأه شفت سعيد اخويه ايدش..و معاه دفتر عريض..و القلم في ايده الثانيه..يا و قعد عدالي تماما..بعد فتره..دش ابويه..و اللي ما تقرب مني ولا كلمني..ولا اي شي..كأنه صنم..بس عيونه كانن مركزات عليه انا..عيونه يطلع منها كلااام وايد..كلام ايعذب..فرح..فخر..على حزن بسيط لفراقي..كان واااقف بعيد..و حاط طرف السفره في ثمه..
سعيد: لطيفه المليج برا..واقف ورا الباب..اتقربي من الباب..بيسألج..و بعدين ردّي وقعي..اوكي؟
لطيفه: ان شالله...
++ قمت اتقربت من الباب الزجاجي لمحت طيف ريال شيبه مطوع..لحيته طويله..شكله اليف..و حبوب..زال الخوف عني شوي..انا اقدر اشوف بحكم انه الزجاج عاكس في حين هو ما يقدر يلمح الا طيفي..
لطيفه: السلام عليكم..
الميلج: و عليكم السلام و رحمة الله و بركاته...احم..كح...يا بنتي ما اسمك الكامل؟
لطيفه: أأأأأ....أنا؟؟؟
طاحت عيني على عيني ابويه في هاللحظه اللي عطول نزل راسه كأنه مذنب..ألتفت صوب سعيد..اللي ضحك و قالي : هيه انتي عيل منوه؟؟
لطيفه: انا انا ...اسمي لطيفه حمد سلطان سعيد ال.....
المليج: بارك الله فيكي يا بنتي...يا بنتي..انا اليوم بكتب عقد شرعي يزوجكي من السيد احمد سيف عمير ال...تقبلين بهاذا لشخص زوج لكي؟؟
لطيفه...حسيت بضغط يلفني من كل الجوانب..شعر جسمي وقف..روحي شارفت على الطلوع..ما حبيت اثير الشك فالمليج..فقلت على طول: نعم...اقبل..
المليج: الله يوفقكم يا بنتي..وقعي فالمكان المطلوب..و الله يتتم على خير..
++ رجعت..رجعت بعد ما نطقت بهالكلمه...اشرلي سعيد وين لازم اوقع..طاحت عيني على العقد و بالتحديد على اسم احمد..و قعت و انا اتمنى في هاذيج اللحظه اني اصااارخ بأعلا صوتي..رفعت عيني صوب سعيد..الي مسكني و باسني على يبهتيه..و باركلي..رفعت عيني صوب بويه..اللي مازال حاط طرف السفره في ثمه و نزلت دمعه من عينه..قمت من الكرسي بتحرك..فطلع ابويه بسرعه من الغرفه..اتفهم مشاعره..فراقه لبنته اكيد مب هيّن..وانا متأكده من منزلتيه في قلب ابويه..و اعرف غلاتي زين!!!!ّ طلعت رحت الصاله الداخليه عشان اطلع سيده فوق غرفتيه..لمحت ويوه مألوفه.شمسه..عايشه..وضحا..امايه..و مادري منوه سلمّن عليه و باركلي...وانا ما عرف شوه رديت عليهن..ركضت الغرفه سكرت على عمري الباب..رحت الحمام و شغلت الماي فالشَََوَر على اخر درجه و يلست على ارضيه الحمام و صحت صياح من الخاطر..!!!
مرت فتره بعد الظهر و ما حسيتبها لاني رقدت..سمعت دق على الباب..قمت و فتحته..لقيت عايشه اختيه شاله صينيه..عليها اكل منوع..دخلت و سكرت الباب...
عايشه: هلا لطفين شوه حالج الحين؟؟
لطيفه: شوه حالها العروس بعد..اكيد فرحانه..
عايشه: الله يعلم..
لطيفه: ليش اتقولين هالكلام..
عايشه: ماشي ماشي..يالله لطوف عاد ما خليت لج شي ما يبته..عصيد..هريس..جباب..لقيمات..بلاليط..و كيك و عصير..
لطيفه: مالي نفس..
عايشه: لطيفه فديت روحج عشان خاطريه..بعدين البنات كلهن اهنيه..شوه ما بتنزلين؟
لطيفه: لاه..؟؟ منوه يا؟؟
عايشه: لا تتخبرين...ما تم حد من معارفنا ما يا...حتا ربايعج اللي فالجامعه..يمنوه و سلامه..و شلة شما مبارك..و كلهن...و احيد ضبابه و فاطمه يستقبلن يزاهن الله خير قايمات بالواجب..
لطيفه: يالله ما عليه...الحين بنزل..
عايشه: لا تنسين تلبسين البنجابي..
لطيفه: لازم يعني؟..
عايشه: بصراحه مب لازم اذا ما تبين...بس تراه كلنا لبسنا..
++ ما شالله عليهن الشله..كانن متفقات انهن عايشه و فاطمه و ضبابه ووضحا..يلبسن بنجابي ( لبس الهنود و الباكستانيين)..من قطعين قميص شوي طويل يوصل للركب وتحته بنطلون من نفس الخامه..كلهن بيلبسن نفس اللون احمرمطرز بشغل ذهبي..اما العروس انا..فنفس اللبس تقريبا بس فيه زياده شغل و لونه ذهبي..فجيت شعريه..بس رفعت شوي منه فوق الاذن مع القصه ( الغره) و نزلت خصلتين بس..حطيت اي شادو بني..عاد العيون خضر..طالعه صدق باكستانيه..حطيت جلوس وردي..اتعطرت...و لبست شغاب(حلق) طويل..لبست شيله خفيفه..و صندل بس كعب..و قبل لا انزل تحت..سمعت حد ايصارخ باسمي من الدريشه..منوه؟؟؟
وايجت من الدريشه شفت سلطان اخوويه و معاه كمن عامل...
سلطان: لطوووووووووف...excuse me SeniorEtta put your scarf on ur face plz
لطيفه: هههههه...تيكيتا...
سلطان: لطفين...الحين في واحد هندي فوق راسج تقريبا بيركب الليتات..كيف تبين شكلهن مربعات ولا دوائر...
لطيفه: شوه الفرق يعني...
سلطان: تراه حطينا على الحوش كامل..و عالبيت عالقرميد..بس بغينا حجرة العروس ايكون عليها واااايد..و مميزه...فهمتي؟
لطيفه: هيه...
سلطان: كيف تبين الحين؟
لطيفه: مابا على حجرتيه
سلطان: ليش؟؟؟؟
لطيفه: عشان شنطة الذهب و زهابي اهنيه فالحجره و ان دروا ان هاي حجرتيه بيسرقونها...
سلطان: هههههههههههههههههههههه
لطيفه: ههههههه....عكيفك واثقه من ذوقك سينيور..
سلطان: خلاص يالله انزلي اباج اتشوفين شكل البيت..
البيت بصراحه كان شي ايخبل..فيه باقات ورود موزعات على المداخل..سمعت انه عويش متعبله بالورود بس ما توقعت لهدرجه..توقعت فالقاعه بس..سلال الحلاوه موزعه في كل مكان اول ما شفت الباتشي..حسيت بغصه..احمد ايموت فالباتشي..اول ما نزلت لمحت خليفه اخويه محبوس..و يبا يطلع..
لطيفه: مرحبا خليفه
خليفه: مرحبااااااااااااا العروووس...اوش اوش اوش..شوه هالحلاه..
لطيفه: عيونك الحلوه...
خليفه:تعالي البيت ممزور حريم و انا محبوس ابا اطلع..
لطيفه: هههههه..انزين ليش ما طلعت من صالتكم؟
خليفه: اووووه...هناك الحريم ينزلن...سويلي درب؟
لطيفه: ان شالله..
خليفه: لطيفه لطيفه...تعالي شوي..
خليفه و هو يدخل ايده في مخباه و ايطلع باكيت صغير: شوفي عاااااد...احم احم..تراه المعاش على قد الحال و محسوبج خلفلف ( ضحكت و خليفه يلفظ هالاسم بهالطريقه لاني يوم كنت صغيره اذا عصبت على خليفه ازقره جذيه)...ما لحق ايجمع شي..و كنت الحين بطلع اسير اغلفلج الهديه...بس دامج مب لابسه شي في حلجج..اعتقد انه الحين وقتها...و طلع سلسله صغيره فيها حرفين L , A
لطيفه: الله...ايجنن..ليش كلفت على عمرك..
خليفه: تراه صح صغير بس تراه و الله اني ماخذنه من الفردان يعني مش بو عبود..
لطيفه: ههههههه...لو بتيبليه تيل وبتقولي لبسيهن و الله يلبسهن..
خليفه: يالله انا بخليج بسير اشوف كيف ركبوا لليتات..و يمكن انسير انا و سلطان فالبيك اب انوزع العشا..
لطيفه: ليش ما غدوا الرياييل اليوم..
خليفه: هيه بس الكونتسيه عفرا...حد من الحريم ما بيي اليوم على قولتهن العزيمه عزيمة بنات فبطرشلهن العشا لين بيوتهن
لطيفه: يالله الله يعينكم
خيلفه: يالله و مبروك...و باسني على خدي..
لطيفه:اوووه لحيتك تقرص....هههه... الله يبارك فيك...
++ بصراحه شلكهم اخواني صدق متأثرين بهالعرس و فرحانين بعد..يالله اذا على فرحهم فأنا اكيد فرحانه..و الله يعدي كل شي على خير..دخلت الميلس..اول ما دشيت بصراحه دوخت من عدد الحريم اللي موجودات..و سمعت صوت حمديه و هي اتزغرط..و اول شي طاحت عليه عيني..يمنى ربيعتيه..و هي اتوزعلي بووووسه بطريقه كوميديه فالهوا بصراحه صدق صدق من الخاااطر ضحكت...
لفيت على الحريم..بس بعدين مسكتني يدتيه ضبابه اللي كانت يالسه على كرسي شوي مميز و قالتلي وقفي و البنات و الحريم هن بيسلمن عليج..اتوقعتها عزيمة بنات بس..بس الحريم ماشالله مازرات الميلس..عدا الوقت بسرعه..و راحن الحريم الكبار يتعشن في غرفه ثانيه..اما البنات فكان مسوين بوفيه..هاي حركات عايشه اختيه..اتموت في شي اسمهه اتيكيت..بعد العشا الحريم سارن و اتجمعن البنات فالميلس و شغلن حسين الجسمي و بدا الرقص...بصراحه انا ما حب الغنا و طلبت فالعرس انهم ما يحطون اي غنيه الا اذا كان كلاسيك و يحطون لي زفت راشد الماجد اللي من دون موسيقا..بس عشان فرحت البنات فما كان عندي اي خيار ثاني..وصلتني مسج من سلطان يطلب مني اني اطلع..و طلعت برا الميلس فشفت سلطان
لطيفه: هلا سلطان...
سلطان: لو سمحتن قصرن على المسجل صوووته شال الدنيا شوه فاتحين ديسكو نحن..الساعه 11 و نص الحين
لطيفه: هههههه...ان شالله..
سلطان: لولووو...تعالي تعالي شوي..اقولج ضبوب اهنيه؟
لطيفه: هيه داخل..
سلطان: حلوه؟
لطيفه: علينا!!!! قول تبا اتشوفها..
سلطان: بصراحه هيه...
في هاللحظه بالصدفه كانت ضبابه طالعه اتدورني...ضبابه كانت لابسه نفسنا بنجابي ولافه شعرها كله ورا..و فارقه قذلتها من النص و منزله مثل السلسله الصغيره من الفرق..ماشي اي ميكب عدا جحال من داخل و جلوس خفيف..بس بصراحه....جميله...
سلطان و هو مبحلق عيونه: سبحاااااااااااااااااااااااااااان اللي خلق و كمل...من يقول الزين ما يكمل حلاه كل شي في حبيب قد كمل...
اتحجبت ضبابه زين: مرحبا بومييد...لطفين تعالي بالله عليج يمنوه حاشره الدنيا عليج..
سلطان: طالعوا الخامه...ايه ضبوب تعالي ارمسج انا..
ضبابه و هي حاااطه عينها في عين سلطان: هلا بالطيب الغالي عزيز و شوفته منوه..تراه ما جا على بالي..اشوف عيونك الحلووووه...شوه تبا بعد؟؟
سلطان: حسبي الله على بليسج..جانج دللتي بقلبي تدليلي..مدعي اني مغرم حالي..
جارحني في مجاتيلي..جرح لا يبرى ولا يشالي..اقول لطفين برايج اذا بتسيرين...
ضبابه: يالله انا بعد بسير..
سلطان: اي اي انتي قرّي اباج في كلمة راس...
ضبابه: اذا لطيفه بتسير انا بسير و اذا لطيفه بتقعد انا بقعد
سلطان: اي انتي..شوه هالعدول؟؟؟!!! تبين تنخطبين حضرتج؟؟!!!!
ضبابه و بدلع: و شوه فيها اذا انخطبت؟؟!!
سلطان و هو ايمط ايد ضبابه بطرف العصا اللي ماسكنها: ايييييه...لا تعصبيبي..عنلااااتج زااااد
ضبابه: لطفين انتي شااهده يالس ايسبنيه و انا سااااكته..
سلطان: لو سمحتي لا تدخلين حد بين الحرمه و ريلها
لطيفه: هههههههه....انا بروح
++ بصراحه..ما قدرت اخرب الجو الرومانسي..عتاب العشاق..وانا اعرف انهم يبون يقولون اشياء بس يتضاربون جدامي انا..اول ما تحركت حطت ضبابه ايدها في ايدي..
ضبابه: الحقني جان فيك خير...
و دشينا الميلس..حاول سلطان يقبض شيلة ضبابه بس ما لحق..و نتيجة اندفاعه..دخل بالغلط فالميلس..شهقت ضبابه..من جرأة سلطان..اللي مثل ما اعرف صح شخصيه قويه بس جدام تجمعات البنات يتحول الي كااااااائن خجووووول...احمر ويه سلطان..الكلمه الوحيده اللي قالها: السموووحه منكن يا حرمات..امبوني ادور سيلانيتنا السودا و دشيت بالغلط...و طلع سلطان بسرعه...
ضبابه: الحين انا سيلانيه!!!!!!!....و الله و الله اني ما عديها له على خير!!!! بتشوووووف سليطين بتشوووف...
لطيفه: تستاهلين حد يغايض سلطان الله يهديج...
يمنى و هيه توخي على لطيفه: في ذمتش انه هالررررررحيم اخوش؟؟؟
لطيفه: هيه هاذا اخويه....
يمنى: يالله....يعلها تتهنابه اللي بتضويه...لطيفه يالنذله...اسميها مخوتش مخوت بوش..انا ربيعتج من سبع سنين...و مخليتني عاااانس و انتي عندج هالرحــــــــــــــــــــــــــيم....ياويلي ويلاه على ذيش الشيفه...
فاطمه: اسمعوا انتو يون عاااانس!!!! غربلات عدوج انتي واااااااااااااحد و عشرين شوه عايلنج عالعرس..
ضبابه و بنقمه: و بعدين لو سمـــــــــــــــــــــــــــــحتن هالريال خاطب فاحترمن حالكن ولا تبصبصن...
يمنى: و من ذي اللي خاطبنها هالويه الصبوحي...
لطيفه و هي اتأشر على ضبابه: محسوبتج الاخت ضبابه...
يمني: لا اله الا الله,.....كان هاذا الرحيم بياخذ هاذي اللي تغرّم...شوه عيالهم؟؟؟ ملووك جمال...
فاطمه: هههههههه...تشاهدي يمنوه لا تعطينهم بعين...
يمني: لا لا العوامر ما يعطون بعين...
سلامه: ما عليج منها...عينها اتطيح الطير من السما...
يمنى: ياويلي ويلاه عالعرس...لطفين...في ذمتش بتعرسين وبتخلينا!؟؟!! انهون عليش؟؟!!!
لطيفه: عاد هاذا النصيب...وانتي يوم مسلم بيحب الارض اللي تمشين عليها شله ما توافقين عليه؟؟!!
يمنى:خيبن ويش.... انقولها تيس اتقول حلبوه...ذا مسلم انا ما اجهله!!!!
فاطمه: سمعوا انتو يون ما جهله!!!
يمنى: وش بيتيني سوي؟؟!!!
فاطمه: اتوكلي على الله و لا تردينه...يا بوي خذي اللي يحبج ولا تاخذين اللي تحبينه...
يمنى: ماجهله اقولش!!! ني بغي واحد ايفز له قلبي..
لطيفه: الله يرزززقكن ان شالله بالازواج الصالحين قولن امين..
الكل: آآآآآآآآآآآآآآآآآآآآآآآآآآآمين....
++ عدا هاليوم و انقضى..باجر الثلاثا..بعدها الاربعا..و بعدين خلاص الخميس..ايام العزوبيه بدت تنسحب عالسريع...يالله لو اعرف شوه مخبي القدر..شوه اللي بيصير..و شوه نية احمد من صوبي؟؟!! صباح الثلاثا يالله يالله قمت على الساعه 12 الظهر ولو ما دقت عليه شمسه اختيه..جان من نشيت ابد..قمت و صليت و قريت شوي قرأن عل و عسى نبض قلبي يهدى شوي..و تستريح روحي..
شمسه: السلاااااااااام عليكم...شحالها عروسنا؟
لطيفه:و عليكم السلام...طيبة طاب حالج؟؟ علومج ام حمد...
شمسه: لو سمحتي انا ام سيف...و البيبي يا شما يا مها...
لطيفه:لو سمحتي لا تكسرين القاعده...نبا ولد..
شمسه: و الله انا و ريلي نبا بنت!!! المهم..( شمسه و هي تنسدح على الشبريه) ما يت راعيت الصالون..؟
لطيفه: لا..انا بروحي مستغربه..
شمسه: خليها انا بسويلها..
و خلال مكالمة شمسه...دخلوا علينا سيف ولد شمسه و حمد و خالد عيال سعيد...محتشرين علاخير..
سيف: مااااااااااااامااااااااااااااااااااه....البلي ستيشن ما تشتغل....
شمسه: روح خل عمتك ضبوب اتشغلها...
حمد: هاي ضبابه ...و عموه عايشه...قافلين الباب...يوم اندق عليهن ما يفجن...
سيف: هيه هيه....عندهن حرمه اتحط لهن لباااااان على ايدهن...و ايعووووورهن..و يقولن أي أي..يستاهلن
خالد: هيه هاي اسمها ام الحنـــــــــــــــــــــــا...
شمسه: غربلات عدوووووكم..يون ام الحنا...
لطيفه: فديت دربوووح...ياختي ما ينلامن ما يدخلنهم داخل...ايه لا تسيرون اتقولون حق حد..شمسه قوليلهم لا يسيرون يفضحونهن عند الشبيبه...تراهم متجمعين تحت...
شمسه: ايه عيب انتو مالكم خص فالبنات....سيروا يالله العبوا بلي استيشن...
حمد: اوهووووووووووو.....عموووه شمسه انقولج البلي استشن خربااانه ما تشتغل..
في هاللحظه رن تيلفون شمسه...
شمسه: اووووو....هاذا المعرس...خيبه موصني على شي و نسيته..
++ المعرس!!!...الحين هاذا ريلي..الله يعيني..ان شالله كل شي بيعدي على خير..ما حبيت اسمع شوه يالس ايقول لشمسه...
لطيفه: سيفوووووه...تعال شوي؟
سيف: شوه تبين انتي بعد؟؟!!
حمد: ايييييييييييه عيب عليك هاي العروووووسه؟؟
سيف: انزين انزين شوه تبين العروووسه؟؟
لطيفه: وين البلي ستيشن مالتكم؟
سيف: اوووووف...شوه اقول انا من الصبح؟؟!!! تراها تحت فالصاله...ترا و الله ابيعج في سوق الصبيخه انا و عمي احمد..
لطيفه:سوق الصبيخه يون؟!!! روح روح هاتها بنشغلها اهنيه...
سيف: اوووهووو...هاذي شاريتنها هندوووووه اللي تكلم عمي احماااد فالتيلفون حقي ماباكم اتخربووونها..
++ هند!!!! هاي الانسانه الين الحين عايشه..حشا اكيد احمد يعبدها عباده..انا خلاص ما عندي امل فيه هالانسان يصطلح...حسيت بقلبي ينعصر..لين متا يعني؟؟!! و اذا انته متعلق بها..شوه تباني انا؟؟!! خلني في حالي و فكني..الله يخليك مب كفايه جتلت حبي لك بكل اعصاب بارده؟؟!!!
شمسه: المعرس ايسلم عليج...
ما شي رد..
شمسه: شياج انجلب حالج مره وحده؟؟!!!
لطيفه: ماشي...ماااااااااااااااااااااااااشي....الله ياخذني انزين؟؟!!! متا بفتك من هالكابوووووس..
شمسه: بسم الله...لطفين...خلاص هالموضوع نحن انتهينا منه!!!! و اعتقد انج مقتنعه و محد جبربج!!!!
ما انتبهنا انه سيف شل تيلفون شمسه و قعد يلعبه...
لطيفه: اكرررررررررررررررررررررررررررررهه....مادانيه هالاحمد...ابغضه اتعرفين شوه يعني ابغضه!!! يعلني اموووت ولا اني انزف لهالانسان...هاذا انسان بليد ما عنده احساااااااس...
شمسه: استهدي الله لطفين..و هالرمسه ما تفيد..خلاص انتي الحين عروس..و ما ترومين اتردين في قرارج..ورا باجر بيزفونج لاحمد..و طبي كل شي وراج..و حطي في بالج شي واحد بس..احمد ريلج..
لطيفه: يعل ما من احمد فالدنيا...اكرررررررررررهه..ماباااااااااااااااااه.. .هالزفت اكرهه اكرهه..يبا ايعذبني بس!!! ليته لو يعرف كم اكرهههههههه!!!! و انفجرت اصيح...
منوه انا في هالدنيا؟؟!! وشوه امثل لهالاحمد؟؟!!! ليش يا احمد تربط مصيرك بمصير انسانه..حبتك ولا قد رضت بغيرك خليل في قلبها...ليش يا احمد تربط مصيرك بانسانه..تنوي اتذلها و تلعب عليها؟؟!!! لهدرجه حاقرني!!!!
شمسه و هي اتمط التيلفون من ايد سيف بسرعه: الله يغربل بليسسسسسسسسسسسسسسك...لطوف الحقي الحقي...لطفين يالله يالله سترك..احمد كان على الخط...سيفووووووه...ليش؟؟؟!!!! حسبي الله على بليسك...الحقي لطوف دق ارسال على اخر مكالمه مستلمه..شوه بنسوي الحين اكيد احمد سمع كل شي؟؟!!!
لطيفه: احسن احسن خليه ايعرف اني اكره كره العما...ممم..ماا..مابااااه...ماابااااه...ايسير حق هندووه الخامه خليها هيه تنفعه...و جانه ما سمع دقيله و انا بقوله بلس...بلساني...
شمسه و هي تمسك راسها بين ايدينها: كيف ما سمعج؟؟!!! وانا اول ما حطيت السماعه في اذنيه سمعت صوته..و هو يتكلم و ايصك؟؟!!!! يا ربي سترك...شوه هالمصيبه...الله يهديكم من يهال شياااااطين؟؟!!!
++ طز سمع ولا ما سمع..اهم شي ايعرف شعوري تجاهه...خلاص ينتهي كل شي بينا دامنا على البر..ولا انه ايدمرني بالبطئ...خلاص يا احمد ماباك و النفس طابت منك..ابعد و خليني...
________________________________________
"""الجزء السابع عشر"""
ما ينجبر قلب على قلب مادام قلبك ما هواني..لا حبك اول و اخر الحب..ولا انته الوحيد اللي بزماني
وقفت فتره من الوقت و انا حاط عيني على التيلفون..مب قادر اصدق..مب قادر استوعب انه اللي سمعته من شوي كان صوت لطيفه..صريخها..صياحها..و هي اتردد اكرهه و ابغضه..ما عرف حاس براسي ايعورّني و كل ما ييله الالم ايزيد..رفعت راسي..حاس بضيقه في صدري..و بخص في قلبي..رفعت عيوني استوعب الوضع..لهدرجه!!!..لهدرجه!!! وصلت للكرهه و البغض..رديت براسي ورا على الكرسي..و سحبت نفس طويل..بدا الصوت مره ثانيه ايرن في مخي..(ماباه..كابوس)!!!..حطيت ايديني على ويههي و ضغطت بقو عل و عسا اكتشف انه اللي سمعته مجرد مقلب ولا وهم..بس مستحيل رنت صوتها..اسلوبها..هيه لطيفه ما غيرها..لهدرجه اللي بينا ماله امل ايعيش؟؟!! و شوه اللي بينك و بينها يا احمد؟؟..سراب ولا وهم..ولا بقايا حب مراهقه بغيت ابني عليه حياتي من اول ويديد!!!
بديت احس اني اغرق في دوامه من الاصوات...الافكار..الاوهام..حطيت راسي على السّكان(عجلة القياده)..و عديت الين الثلاثه و بديت احلّل كل شي..اول شي..اعترف انه لطيفه اتحب غيري..و ليتني اعرف منوه هالغير اللي سلب مني شخص ما عرف شوه يعنيلي بس متأكد انه يعنيلي شي كبير..ليتني اعرفه و احط ايديني على رقبته الين ما تطلع الروح منه..أباها لي انا بس..ثاني شي..ليش وافقت؟؟!! كان عندي امل ولو صغير انها بموافقتها عليه..انه شي من اللي كانت تحسبه صوبي لا يزال موجود و لو كان شعله..بس اتكفيني انا مستعد اشبها نار من اول ويديد..بس شكلها لا نار ولا شعله...اللي اعرفه انها تكرهنني و انها اتفضل الموت على انها تاخذني مثل ما سمعتها اتقول...آآآآآآآخ يا لطيفه...ما توقعتها منج..ولا توقعت انها بتجرحني لهدرجه..شغلت السياره و طلعت من الحوش..مادري وين..اهم شي روحي تهدا..عشان اعرف شوه الحل؟؟ ولا شوه النهايه؟؟!! ما حسيت بعمري الا عدرب المطار..ساير راد...ساير راد..و الغصه تاكلني..بس فجأه فز في روحي الكبرياء..منوه لطيفه يعني عشان ترفضني؟؟!!! اتخسي الا هيه...و الله اذا ما تباني مره تراني ماباها الف..و عل العين ما تشوفها..يونها تكرهني!! و منوه طلب ذره من حبها..لازم احط النقاط عالحروف..و انهي كل شي مثل ما تبا..و ماشي حل الا الطلاق و الانفصال..و دام هاي حالها..ماحد غيرها بيتضرر..
لفيت لشيشه البترول..نزلت خليت العامل ايعبي بترول..و نزلت سوبرماركت واحة ادنوك..لفيت على قسم الاكل و العصاير بس مادري حاس بجبديه لايعه..مالي نفس..حسبي الله عليها سدت نفسي..خذتليه غرشت ماي..مريت على الكاشير حاسبت..و على الكاشير لفت نظري الزقارا مصفوف..خذتلي باكيت رغم اني من زمان مخلي الدواخه و مالي خص فيها..بس مزاجي منهار عالاخير...ركبت السياره و طلعت صوب المنطقه اللي فيها قاعه العرس و الاحتفالات..و انا كل شوي أولع صلب زقارا و اطفي الثاني..اول ما وصلت اتصلت بوكالة السفريات و ألغيت الحجز..نزلت..على اساس يمكن ألقا سعيد ولا خليفه..و اتفاهم وياهم و اقولهم اني كنسلت كل شي..و ورقه طلاق اختكم بتوصل الين باب حجرتها..و أسالوا اختكم ليش..نزلت و انا مصمم اني انتقم منها...مشيت اول ما وصلت جدام المساحه اللي جدام خيمه الرياييل المفتوحه..لمحت خالي حمد..يالله هاذا شوه ايسوي اهنيه..وقفت وانا احس بغصه تعصر قلبي..
خالي كان طاوي السفره..شكله صدق تعبان على هالعرس..وواقف في نص المساحه..و يالس ايأمر على العمال كيف ايرتبون شكل الكراسي..و كل شوي يتصل للمسؤول عن الخيمه..و يطلب منه اشياء..كان منهد حيله..يا ترا اخبره؟؟؟ ولا اخبر خوانها احسن...فجأه ألتفت خالي و انتبه اني كنت واااقف وراه...
حمد: مرررررررررررررررحبا السااااع....ببوشهاب...الله حيّه
اتقربت منه وانا نبض قلبي بينفجر..توايهنا
احمد: وبك حي....شحالك خاليه؟
حمد: بخير بخير...الا هالخيمه لعوزتنا...يابويه اتصل بالمسؤوول من الصبح و انا اسويله و مايرد عليه..
احمد: ليش خالي؟
حمد: يا بويه...حطينا كراسي حول هالمساحه عشان الشباب و اليويله ييلسون عليهن..و ايكونن قراب على الفرقه...و طلبنا الكراسي الرئيسيات عشان ايحطونهن للرياييل عشان ايجابولن الفرقه..و الرزفه..و الهروم الين الحين ما حد يابهن!!!!
احمد: يا خالي لا تكلف على عمرك انا بتكفل بكل شي...(مادري ليش قلت جيه)
حمد: و الله يهديه سلطان...سار عند راعي الخضره ( الفروت) بيشوفهم كيف بيوزعون الخضره على الطاولات الرئيسيه و من الصبح اسويله مايرد...و خليفه من سار الكهربا ما سمعت صووته..شوه هاذا ما لقوا ايلعوزونا على الكيبل الا اليوم؟؟!!! عنابوهم زااااد...
احمد: يا خالي لا تعب عمرك..خل كل شي علينا نحن بنتصرف..
حمد: يا بويه شوه اتصرفون؟؟؟ أنته المعرس هبابك اتخلص اشغالك...
احمد: يا خاليه لا تم اتهويس...انا رمست واحد من الربع في دايرة الماي و الكهربا اليوم و هو قالي انه بيخلص سالفت الكيبل...الحين بسوي حق خليفه و بوصيه عليه....
حمد: و هالكراسي.؟؟؟ شوه الراي وياهن...يا بويه هاذيلا لا تعتمد عليهم..باجر العرس و الهروم ماحد منهم اهنيه...
احمد: لا تراه الله يهديهن البنات ما عيبهن لون الكراسي و طلبن لون ثاني..و انا كلمت سمير و قالي انهم بيحملون الكراسي و ان شالله عالساعه سبع المغرب كل شي بيكون جاهز...
حمد: هزرك؟
احمد: كل شي بنسده نحن...انته الحين سر البيت و عين خير و قيّل...
حمد: وين أقيّل يا بويه؟؟!!! ماروم ماروووووم...امررره حفزااااان...
+++ يالله الحين هاذا انا شوه اقوله؟؟!! لفيت بعيوني فالساحه..ألحين هاذي هيه ترتيبات عرسي انا؟؟!! لازم انهي كل شي بسرعه قبل لا تتأزم الامور أكثر..بتريا خالي ايسير البيت و بتصل بخليفه و بتفاهم وياه..و يتافهم ويا اخته هو بكيفه..أما خالي أذا عرف بالحقيقه بيعذرني و بيعرف أني ما سويت هالحركه من فراغ سويتها لانه عندي اسبابي...
آآآآخ ليتني ما سمعت شي..ليتني ما دريت بشوه اتحس صوبي...انا ادري انها مشاعرها مب ملكي ملك غيري..بس كنت ناوي اني اخليها ملكي أنا و بس..حطيت في بالي اني ببدا حياة يديده مع لطيفه..و نويت اني اغير حياتي كلها لجل عينها..و الله العظيم مادري بشوه احس صوبها؟؟؟ يوم كنا صغار لطيفه كانت مجرد اخت في حياتي رغم اني كنت اعرف انها تعبدني عباده..بس ما كنت احس بشي صوبها الا الغرور..ألين ما سرنا العمره و سمعتها انا اتحب...حسيت بالقهر..بالغضب..لطيفه كانت مجرد شي مادي من ممتلكاتي ويوم عرفت انها اتحب غيري...هاذيج الساعه عرفت انها كائن له احساس..مشاعر..و روح صافيه..لا إراديا بديت احس صوبها شوي شوي بالانجذاب....انجذاب لا غير..ألين اليوم اللي انخطبت فيه..و حسيت صدق انها بتفرط بين ايديني..يوم خذت القرار اني اعترض و اتكون لطيفه زوجه لي انا..كان قرار تعسفي اكثر منه قرار راجع لمشاعريه..ما بغيتها تفرح من دوني..ما بغيتها تعرف الحب مع غيري!!!!
ألين ذاك اليوم..اللي قمت فيه متوووووووووووووووووووولّه عليها...لانها هيه اصلا ما خازت عن بالي عقب منظرها و هي اتصيح على فارها...حطيت في بالي شي واحد...لطيفه خطيبتيه..ولازم ابدا معاها من نقطه الصفر..و اعلمها اتحبنيه مره ثانيه..اتحبنيه مش لانها مراهقه...اتحبنيه لاني أحمد..اتحبنيه لاسباب معينه شافتهن فيني انا...ذاك اليوم خفت لا ازل بالكلام و اقولها اني تولهت عليج..خاصه انها ذاك اليوم كانت فرحانه..و حسيت اني لو بطلب عيونها بتعطيني اياهن...الين ما دق الموبايل و صدف انها لمحت اسم هند على الشااشه...هاذيج الساعه لعنت هند في خاطريه الف مره...و حسيت انها هدمت كل اللي نويت اسويه في لحظه؟؟!!!!
من هاذاك اليوم كل ماحاول ابدا وياها صفحه يديده ينجلب كل شي علينا...و اليوم يوم سمعت انها ما تباني..بصراحه عرفت انها تعنيلي شي كبير..شي لو بوصفه ما بقدرعلى وصفه..هاذا اللي اقدر اقوله بس..
حمد: احمد...بويه....وينك انته من الصبح ارمسك ولا ترد؟؟!!! شي بلاك؟
احمد: هاه؟؟!! شوه قلت خاليه ما سمعتك؟؟؟
حمد: اقولك سوالي خليفه و ايقولي الكيبل حلوها مشكلته..ويبانا انجرب انشغل الكشافات والليتات الحين..و سلطان سوالي حاشر الدنيا ايقولك حجز بوصلاح..عشان الشباب..و ايسويلك بيشاورك ما ترد عليه؟؟
احمد: اوووووه...نسيت التيلفون فالسياره..خله انا بتفاهم وياه...بسويله الحين..شي في خاطرك خالي؟
تم خالي ايطالعني خمس دقايق..عينه في عيني..بس ما نطق..مادري حسيت بكلام وايد يطلع من عينه..شفته يسرط ريجه..وفالاخير اتكلم وصوته تقريبا مخنوق..حط ايده على جتفي و ايده الثاني مسك بها ايدي...
حمد: أحمد .....بويه...
احمد: لبيه خالي...
حمد: لبيت حاي انته و لطيفه في مكه ان شالله...بويه..تراها لطيفه امانه عندك يا بويه...انا ادري انك ريال و نعم و ما يحتاي اوصيك عليها..بس يا بويه تراها لطيفه غير...غير يا بويه...
انربط لساني و ما عرفت ارد عليه....شوه اقوله؟؟؟ شوه ارد عليه؟؟؟ و هو ما يدري شوه اللي اخطط له؟؟!!
حمد: تراها البنت يتيمه و مالها غير الله ثم غيري في هالدنيا...و يوم بتسير عندك اباك اتحطها في عيونك الثنتين...(حمد و هو ايوخي براسه) يا احمد...هاي...هاي...نظر عيوني..و شعرة فوادي..و الله يعلم اني ما بغيت ارخصها لحد غيرك...ادري اني ما بحصل حد يحشمها و يصونها غيرك...
احمد: الله يخيلك لها ان شالله...و انته يا خالي مب خال بس انته ابو...و لطيفه مب في عيني في عيوني الثنتين...
حمد: بارك الله فيك يا بويه...انا بسير الحين البيت..بتسبح و باكلي لقمت عيش..و انته يا بويه سر البيت و ارتاح..اشوفك مسوّد و حالك امررره مايسر..سر يا بويه ارتاح..و خوانك امررره ما بيقصرون..
أحمد: ان شالله ....
+++ سار عني خالي..و خلاني في دوامه..ماعرف كيف اظهر منها..شوه الحل الحين..كيف اتصرف؟؟ كلامه ليه ايعذبني..كيف انهي كل شي عقب ما سمعني هالكلام؟؟!!! كيف بواجهه و بقوله انا خلاص ماباها بنتك؟؟!! يا ربي من هالحااااااااااااااااااااله...ركبت السياره...و طلعت صوب البر...و قفت السياره على واحد من العراقيب...و يلست افكر كيف بحل هالمشكله...متوتر علاخير...و كل شوي اولع زقارا و اطفي الثاني..البنت ما تباني...و انا ماروم اجبر بنت اتعيش معايه و هيه عايفتني..اصلا كرامتيه ما ترضا اني اعيش ويا وحده ما تباني...اتخسي الا هيه...ترفضني..انا الف وحده تباني..و كل ما تدور في مخي احتماليه اني اكنسل العرس..اتذكر كلام خالي لي...لا حووول و الحل يعني..هاذا خالي..اللي تكفل بنا عقب ماتوفا بويه بهالطريقه برد له الجميل؟؟؟ افشل بنته و افشله جدام خلق الله ما خلق؟؟؟ ماروم اسويها و الله ماروم..خطف الوقت..و ما حسيت الا بالشمس بدت تغيب..قمت طلعت كم غرشه ماي من السياره و توضيت..و صليت..و رفعت ايديني لربي..استخيره و اترجاه انه يلهمني شوه اسوي؟؟..
~~~~~~~~~~~~~~~~~~~~~~~~
صباح العرس...
عايشه: صباح الخير العروس...
لطيفه: مرحبااا..
عايشه: هاه من متا واعيه؟
لطيفه: قولي اصلا انا رقدت؟؟
عايشه: ليش عاد ما حد بيتعب غيرج...يالله يالله قومي ارقدي شوي الين الساعه ثنتين الظهر..قومي ارتاحي
لطيفه: مارووووم..
عايشه: ههههههههه...بدينا انخاف؟؟!!! تعالي تعالي شوفي من بلكونتيه شوفي العااااااااالم و الناااااااس..
لطيفه: عادي؟
عايشه: اتغشي منوه بيعرف انج انتي العروس..
لطيفه: يالله....
++ اليوم اليوم المشهود..العرس..بصراحه مارمت ارقد البارحه رقادي كان متقطع..كوابيس..و البطوله المطلقه لاحمد..مادري ليش كل ما شوفه فالحلم..اشوفه هادي..ما يتكلم..و كل ما كلمه ايصد الصوب الثاني..شي طبيعي اني اهلوس..لازم العروس..و الكل اليوم بيركز الانظار عليه انا...رحنا حجرة عويش اختيه ويلسنا فالبلكونه انشوف الناس كيف تدخل و تظهر من بيتنا اللي كان اشبه بخلية نحل..يابتلنا كشميرا ريوق و بعد غياض و يا عايشه استسلمت و كلت شوي..اتصلت بي في هاللحظه فطيم..
فاطمه: سلااااااااااااام...شحالج حرمة اخويه...؟؟
لطيفه: و عليكم السلام و الرحمه...تمام و الله...فطيم..بموووت من الخوف...
فاطمه: سمعوا انتو يون بموووت من الخوف...و هالخساير كلها بلاش؟؟!!! لا حبوبه خلينا انزفج عقب موتي..
لطيفه: هههههههه...أهون عليج؟
فاطمه: هيه و الله اتهونين عليه بس ما ظني اتهونين على احمد...بيعقرني لو سمعني اقول جيه...
لطيفه: أها....شوه اتسوين انتي الحين؟
فاطمه: الله يسلمج...محسوبتج فطيم...حطوني مسؤوله عن الزهاب...الحين بنحمّله و بيسرحون المعاريس صوبكم...
لطيفه: لا والله..
فاطمه: هيه...جذيه نص ساعه و بنكون عندكم...عاد انا مابيي بيلس للاسف فالبيت..
لطيفه: وااابويه عليج انتي وين تبين اتيين اهنيه؟؟!!! قرّي محلج...و اشوفج ان شا الله العصر عندنا لا تخليني اروحي..
فاطمه: لا لا ان شالله عالساعه 3 العصر بنييكم لانه مالت الصالون بتكون عندكم فالبيت..لطووووووووف
لطيفه: هلا
فاطمه: ريحااااااااااااااااااااااااااااانه فوادي اهنيه عندنا فالبيت...وااااااااااااي...بموت عليه يعلني افدا ذاك الويه
لطيفه: لا و الله؟؟ ولا تقوليلي حضرتج سلمتي عليه؟؟!!!
فاطمه: لا لا...بس شفته...و الله و الله اني اموووت فيه يا نااااااس احبه..
لطيفه: يييي هاااااا....يالمقوي...شوي شوي على عمرج..
فاطمه: شعليج اليوم بيزفونج لحبيب الألب...الا انا مالت عليه...مادري الين شوه بصبر..
لطيفه: هههههههه...
فاطمه: اقول لطوف انا بخليج الحين اسمع فاخره اختيه اتقولي يالله بيحملون الزهاب..فمان الله
لطيفه: الله يحفظج باي...
~~~~~~~~~~~~~
شوه هاذا الحين مكلمه لطووووف...و شكلها يعني ؟؟؟ مادري كيف...هل هو خوف اللي يصيب اي عروس قبل العرس...من شوي بعد كلمت اخويه احمد....سؤال ايرد عليه و عشره لا..لايكون المعرس بعد اييه هالتوتر!!! مادري والله مادري...اهم شي انه الله ايتتم على كل شي..
فاخره: فطيم بالله عليج اظهري عند الستوت(شاحنه) ووقفي عليهم الين ما يحملون الزهاب و خاصه شنط العطور شوي شوي لا يكسرونهن...
فاطمه: لازم انا يعني؟؟!!! تراهم بيحملونهن و خلاص..
فاخره: يالعيااااااااااااااااااااازه يالله سيري و الله والله انج ما بتندمين
فاطمه: امري لله...الشيخه ضبابه يالسه فالميلس اترحب و تستقبل.وانا حليلي بنت البطه السودا اوقف على العمال و هم ايحملون الزهاب...
فاخره: ما تبين اتسيرين برايج بس بعدين لا تقولين ليش ما قلتيلي..
فاطمه: خلاص خاااالاااااص بسير...
طلعت و انا اتأفف..شمعنا انا اللي اوقف على العمال و ضبابه يالسه فالميلس تستقبل الحريم و تشرف على الفواله..وقفت عند الباب اللي موجود عنده الشنط اللي يبالهن تحميل..و اتريت ابراهيم اييب الستوت عشان نحملهن..توه داش الستوت..بس شوه سرعه يسرع..ما عليه ما عليه يا براهيموه ثره يلعب بالسيارات لعبه من ورانا...زقرت على البشكارات عشان ايشلن الشنط و يحملنهن فالستوت..بس لمحت شبح ابيض ينزل من الستوت..اول ما التفتت و جيكيت زين على اللي نزل حسيت بقلبي يوصل حلجي..مت مت مت من الفرح..ريحانه فواديه...يالله يعلني ما اخلا منه...نزل من الشاحنه و هو يتكلم فالموبايل و محسوبتكم فطيم ما شلت عينها عنه...شعليه...مب خطيبي..هاي اول مره اشوفه من عقب الخطوبه..يالله يعلني افدا هالمشيه..فديته طويل وااايد على الحقيقه لابس كندوره بيضا و طاوي السفره اي كلام ولابس نظارات شمسيه..بس فديته ظاااهر قمر...و الله و الله اني اعشقه عشق لو ينوزن مايلقوله قياس..نزل علي و الابتسامه شاقه الحلج..شوه دعايه معجون اسنان..الحين عرفت ليش فخور اتقولي سيري سيري ما بتندمين..الخامه ما قالتلي عشان اتكشخ...
علي: السلام عليكم..
فاطمه وهي منزله راسها: و عليكم اسلام و رحمه الله...
علي: شحالج فاطمه..
فاطمه: بخير يعلك الخير..و من صوبك...
علي: ما نشكي باس إلا فراقكم..
شت شت شت ....قوووووووويه...هاذا يوم الوحده تبتلي بواحد شوي كبير فالسن ايكون مجرب و يعطي كاش فالويه...ما عرفت شوه ارد شوه اقول؟؟
علي: شوه الدراسه؟؟
فاطمه: الحمدلله كل شي تمام..
علي: يالله شدي حيلج..الصيف الياي ترانا بنلحقهم هالمعاريس...
فاطمه: أأأأأ....ان ...ان شالله...
علي: وين الاغراض و الشنط اللي يبالهن التحميل؟
فاطمه: هاذن اهنيه..بس خلهن عنك بيين الخدامات و الدريوليه و بيشلوووونهن..لا اتعب عمرك..
علي: والله تعبكم راحه..حشا خوانج مستوين جلاب بوليسيه امررره ما يبونا انشوفكن..يالله يالله ما حصلنا وسيله غير الزهاب عشان ايي اشوفج..
فاطمه:أأأأأ...و الل...و الله؟
علي: هيه والله...قلتلهم خلونا نملج..و اشوفج على راحتيه... انتي شوه رايج؟
فاطمه: شوووه نملج؟؟!!! لا خالي ما بيطيع..(حجه عشان ما يعرف اني مدلوئه عليه..^_^)
علي: اذا انتي موافقه خلي الباجي عليه...يا فاطمه انا ريال عود..و مب دوم فالبلاد..ابغي ارمسج و اخذ علومج..عنبوه من خطبتج لا رمت اسمع صوتج ولا اشوفج..
فاطمه: انزين انا شوه اسوي ما بيدي شي؟
علي: الين الصيف الياي بعده سنه...وانا بصراحه ابا اكلمج فالتيلفون..فاطمه انا يوم خطبتج خطبتج لاني اباج من خاطريه...و حكمت عقلي قبل قلبي...و انا بصراحه ابغي اكلمج خلال السنه اليايه الين مارد و انعرس...ابغي اتعرف عليج..اعرفج زين..
فاطمه: انته كلم خواني..
علي: انتي موافقه؟
و فاطمه و عقب تردد: كيفك
علي: فاطمه...كيفك ما تمشي عندي...ابغي رايج..
فاطمه: موافقه
علي: الله ايتمم اللي فيه الخير...
و طلعت ارررررررررررررركض...من الفرح حسيت بعمري اطير..يعني الريال يبا ايعمق معرفته بي..يالله يعلني افدااااه ثره...دشيت المطبخ الداخلي و لقيت فخوور اختيه و ضبابه...يالسات ايعابلن الاكل..اللي بيطرشوونه للريايل...
فاطمه: فخوووورووووووه
فاخره: ببببببببببببببببببسم الله الرحمن الرحيم..و سكنهن في مساكنهم...شو بلاج؟
فاطمه و هي اتحط ايدها على خصرها: ليش ما قلتيلي انه علي هو اللي بيحمل الزهاب؟
ضبابه: منوه علي البيدار؟
فاطمه: جب انتي...خليتيني اظهرله جلحا ملحا؟؟!!!!
فاخره: جلحا ملحا و انتي شاخطه الجحال من ذنيج الين خشمج ما تقول الا زينب العسكري...
فاطمه: هيه بس مادري...
فاخره: لا تبسبسيلي...هو بصراحه بغا ايشوفج و ايرمسج...مالقا غيري انا رتبتلكم هالموعد الغرامي..
فاطمه:آآآآآآآآآآآآآآآآآآآآآه....يا ألبي....بمووووووت فيه...
فاخره: ايه فطيم اشوفج قمتي اتخورينها...
فاطمه: ياختي شوه اسوي...اححححححححححححححبه...انا ربي بلاني فيك بلوه عشقتك و العشق اكبر مصيبه...
ضبابه: هيه و الله...قلتيلها الله يعينه هالعلي..ما يدريبج انج اكبر مصيبه..
الكل: ههههههههههه
طلعت فخور عن البنات...و تمن فاطمه و ضبابه بس فالمطبخ..
ضبابه: و اخيرا...خلصنا...
فاطمه: باقي العصير...ضبووووب ضبوووب الحقي الحقي..تعالي لا يفوتج...
ضبابه: شووووو
فاطمه: الحقي تعالي شوفي الرياييل و هم طالعين من الميلس..ماشالله يالشبيبه..كل واحد احلا عن الثاني..
ضبابه: سلطان فيهم؟؟
فاطمه: شوه سلطان انتي بعد؟؟!!! سلطان اكيد اهناك في بيتهم الحين الرياييل بيسيرون صوبهم..تعالي تعالي طالعي ريحانه فوادي...فددددديته...شوفي شوفي انتي من الحين ايقردن لاصق في احمد اخويه...
ضبابه: هههههههه...ايسايسه...
فاطمه: تعالي طالعي منوه هاذا اللي واقف عدال عمير اخويه؟؟ هاذا بو نظاره سموك؟؟
ضبابه: ووووايه...هاذا الا شبيب...ياختي هالريال يقهرررررررني...
فاطمه: مب اخو شرينه ربيعتج..؟؟
ضبابه: الا هووووو...خقاق...و فشخره عالفاضي..مااادانيه..دوم زام خشمه
فاطمه: شوه سوابج الريال؟؟ حليله شكله محترم بالعكس...
ضبابه: مادانيه من سوالفه اللي اتقولي ياهن شرينه عنه كرهته...طالعي انتي طالعي شقايل ايرز بالفيس ما تقولين الا شاهد ملجه..
فاطمه: انزين هو شاهد الملجه...
ضبابه: فقدته...دقي على براهيم خليه ايشل العصير للرياييل قبل لا يطلعون..
فاطمه: يالله سويتله..انا بسير اتسبح..
طلعت فطيم و تمت ضبابه فالمطبخ..دش عليها براهيم..و عطته الصينيه الاولي..بس ماشالله من كثر الرياييل ما كفت...
سيف: عموووه ضبابه ايقول عمي شبيب يبون عصير وايد لانه واااايد رياييل توكي؟
ضبابه: اسمعو انتو يون عمي شبيب...من وين يا عمك؟؟؟ هالخقاق مب عمك...هاذا اسمه: زام خشمه
سيف: هو قالي انا عمممممممك شبيب...
ضبابه: واااايد فرحان بعمره هاذا اسمه شااااهد مللللللجه...مش عمك...يونه بعد عمك!!! روح خل براهيم ايي ايشل الصينيه الثانيه...
سيف: لا عمي شبيب بيشلها لانه براهيم راح مكان ثاني...عمي شبيب اهنيه واقف عدال الباب..
ضبابه: ليش وينه مستر زام خشمه؟
شبيب و هو واقف على باب المطبخ الخارجي و يتحنحن: طال عمرج شاهد الملجه موجود..بس وين العصير..بسرعه اختيه لانه الرياييل مستعيلين!!!!!!!
حليلها...ضبوب انجلب لون ويهها اصفر على احمر على اخضر كل اشارات المرور..ما توقعت انه هالريال بيكون موجود..طبعا مالحق ايشوفها لانها اتغشت بسرعه...بس شووووه عقب ما سمع كل شي؟؟!!!!
ضبابه: اسمحليه الشيخ لا تحط في خاطرك...بس امبوني اسولف ويا الصبي...
شبيب: بالحل الشيخه...شاهد ملجه بنعديها..بس خقاق و زام خشمه قويه وايد تراها..!!!
ضبابه:هاه؟؟!!!! ما..ما...مادري...هاذيه الصينيه..اسمحليه بقفيبك...بسير داخل يطلبوني...
شبيب و الابتسامه شاقه الحلج: مسموووحه...
++ كل ما شوف الساعه..انصدم..ليش اليوم بالذات عقارب الساعه تركض اسرع عن الايام اللي فاتت..كنت يالسه على كرسي و راعيت الصالون اتعابل فيني..شمسه اختيه يالسه على طرف..اما عايشه و ضبابه و فاطمه فهن في قسم عايشه عشان يتمكيجن..الساعه الحين أربع و نص العصر..يالله يالوقت كيف ايمر..كل ما تسألني الماكييره عن شي ارد عليها بهز راسي بس..ماروم لساني اتشلل..و شمسه اختيه يزاها الله خير كفت ووفت..اتعبلت و اتكفلت بكل شي..
شمسه: لطيفه..حبوبه انا بسير القاعه يطلبوني اهناك...شي تبين قبل لا اسير...
لطيفه: يلسي عندي شمسه ما..ما..مابا ايلس ارووحي..
شمسه: لا تخافين انا خبرتها عن كل شي..و اهنيه عندج عويش و فاطمه اول ما يخلصن بيينج..انا و ضبابه بنسير القاعه لانه امايه و عمتيه ارواحهن اهناك..خلاص؟؟
لطيفه: خلاص..بس قولي حق فاطمه اول ما تخلص تيي اهنيه..
شمسه: ان شالله..
طلعت شمسه و خلتني انا بروحي مع الماكييره و مساعدتها..كل مارفع عيني اتطيح على فستان العرس انزلها بسرعه..مب متخيله نفسي ألبس هالفستان..و امشي عالكوشه..و انزف لأحمد...يا ترى احمد الحين وين؟؟ و شوه ايسوي؟؟ شوه شعوره؟؟ مادري...الله يعدي كل شي على خير..مع مرور الوقت بديت اتنرفز..و العبرة خنقتني..وين راحن و خلني برووووحي..انقهرت..فجأه..بدت ايام حياتي..و عمري الوردي..اتدور في مخي بسرعه مثل الشريط السريع..اتذكرت كل شي..احلا ايامي..فرحيه..ضحكتيه..حتا دمعتيه...لا ارديا...بدت دموعي تنزل..و الماكييره عصبت عليه..لانها كل ما تحط شي ايسيل من الدموع..دموعي من الخوف..من المجهول..من أحمد بالتحديد!!!!!
الماكييره: ما بيصير هيك!!!!! يا لتيفا يا حبيبي...ريلاااااكس...هايدي تالت مره عم بمسح الاي شااادو..
دشت عليه عايشه في هاللحظه..و كانت ما شالله عليها خلاص خلصت ميك اب ولبس كانت لابسه فستان اخضر على سماوي وبما انها صابغه شعرها كستنائي فااااتح.. ماشالله عليها..طالعه كيوت واااايد...
عايشه: خير شوه صاير؟؟؟ لطوووف حبوبه ليش اتصيحين...
الماكييره: يا حبيبي ما عم بعرف اشتغل...حاكيها...صارلي ساعه عمال بمسح..هيك الميك اب ما راح يضاين للنهايه..
عايشه: لطفين؟؟؟ شوه بلاج؟؟؟ شوه في خاطرج؟؟؟
في هاللحظه ماقدرت اتحمل...انفجرت و حطيت ايديني على ويههي...
عايشه: لو سمحتي..ممكن تخليني معاها عشر دقايق...
الماكييره: اوكي..بس بليز هديها..لانه الوئت ماعاد يكفي..
عايشه: اوكي...
طلعت الماكييره و مساعدتها...سكرت عايشه الباب..و راحت يابتلي كوب ماي..و شربتني بالغصب...قعدت عايشه عند ركبي..و حط ايدينها في ايديني...
عايشه: لطوووف...انا اختج..قوليلي شوه بلاج و بترتاحين ان شالله...خايفه من العرس نفسه؟؟؟ كل بنيه اتخاف انا مالومج...بس احمد مب وحش..بالعكس احمد انسان متفاهم و رزين..و بعدين هاذا ولد عمتج علاقل فيه قبول بينكم...لا تحطين في بالج كل شي بيسير على طبيعته لا تفكرين..
اتنهدت...تنهيده طوووووووووويله....و هزيت راسي بالنفي...نزلت عايشه راسها دقيقتين و رفعته و هيه تبتسملي احلا ابتسامه...
عايشه: شوفي لطيفه...الحين انا عرفت شوه فيج...و صدقيني كان ودي اني ما افتح هالموضوع وياج..بس دام انه ضروري نتكلم فيه عشان ترتاحين ليش لا؟؟؟ لطيفه..انتي اختيه..يمكن بالابو بس..بس انتي كنتي اختنا و عمرنا ما حسينا ان امج غير عن امنا..عشنا..و كلنا...و نمنا..و لعبنا مع بعض..يا لطيفه من يوم انتي ياهل...من يوم يابج ابويه اهنيه عندنا..عمرنا ما حسينا انج غريبه..بالعكس اتعلقناج بصوره مب طبيعيه..لا تتخيلين انه في يوم من الايام حد هدّدنا و قالنا لا تخبرون لطيفه بالحقيقه!!! بالعكس..نحن ما حسينا انج اختنا بالابو بس..كنتي اختنا و اختنا و اختنا..فهميني..مادري كيف اعبرلج؟؟!! ربي في سماه يعلم بغلاتج في قلوبنا..شوفي خواني كيف قاموا بعرسج قومه؟؟ليش..لانج انتي لطيفه!!! كم تسوا فرحتهم؟؟
++اتنهدت مره ثانيه...ارتحت..و اخيرا حد حس فيني؟؟!!!!
عايشه: لطيفه انا ادري انتي من شوه خايفه؟؟؟ انه احمد ما يباج؟؟ او انه كيف تقبل انه ام حرمته باكستانيه..صح ولا لا ؟؟؟ لا تحطين هالشي في بالج ابد..و احمد اكبر من هالاشياء التافهه..و صدقيني احمد بالذااات من دون شباب العايله كلهم لو ما بغاج..ما حد بيغصبه عليج انتي..خلاص؟؟؟ مسحي دموعج..و بزقر الماكييره اتعدل اللي اخترب..اوكي؟؟؟ يالله حبوبه..بخليج بسير اسوي حق سلطان عشان اييب السياره..تعرفينه مب بالساهل ينلقا
لطيفه: عايشه...(التفتت عايشه صوب لطيفه) وقفتج ويايه اليوم ما بنساها ابد...
++ طلعت عايشه عني..و دشت الماكييره..و خلصت الميك اب..و جيكت عليه..كان كل شي اوكي..الميك اب ابسط ما يكون..أذن المغرب..قمت و صليت بما اني كنت بالاساس على وضوء..يتني الماكييره مره ثانيه بعد الصلاه عشان تحطلي مانكير..و خلصنا...طلعت ادور اي حد ايساعدني مالقيت..وين اختفن هاذيلا؟؟ دقيت تيلفون لعايشه ما ترد..وينهم يا ربي..ماصدقت نفسي تهدا..وين سارن؟؟؟ بدا الخوف يسيطر عليه من يديد...فجأه دشت عليه فاطمه!
فاطمه: ماااااااااااااااااااااااااااااااشاااااااالله...علي ج يا لطووووووف...شوه هالزين؟؟ شوه هالحلاه؟؟؟ وينك يا احمدووووووه ما تيي اتشوووفها الحين...الله صلي على محمد..
لطيفه: ههههههه..يالله عاد بدا التقردين..
فاطمه: لا و الله؟؟؟ في ذمتيه انج ما خربتي...جنننننان...اتخبلين اللي ما يتخبل..
الماكييره: بتسدئي...اول عروس بحطلها ميك اب خفيف..ولا شي..ولك الاي شادو..يا دوب حطيت وردي..وشويت سموك..ما رضيت تخليني اعمل شي...بعدين هي اسم الله عليها..بشرتها كتير حلوه..و ما أأدرت كتر من الاسود تحتا يبرز لون عيونها...كتير حلوووو..
فاطمه: انزين احلا جيه..
لطيفه: تعالن ابا حد ايساعدني..عشان الفستان..
فاطمه: تراه عويش تحت عند المصوره..تعابل وياها..و ييت انا بلبسج..لا تقوليلي تستحين تراج حرمه اخويه!!
لطيفه: استحي ولا غيره...هالخيمه هاذي شوه بيدخلني فيها؟؟
++ لبست الفستان..بمساعده فاطمه..و نادينا الماكييره للمره الاخيره عشان اتركب الطرحه..عقب ما خلصنا نزلت تحت فالميلس عشان اتصور كم صوره قبل لا اسير القاعه..في هاللحظه دش علينا سلطان اخويه..اللي كان كاااشخ علاخير..و السفره و العقال ما شالله خلته ايبين بصوره احلا..اول ما دش سلطان وقف على باب الميلس خمس دقايق حاط عينه في عيني..حسيتبه ايفكر..و في نفس الوقت في نظره حزن في عينه..على طووول يا مسرع صوبي و كفخني ببوسه طوووووووويله على يبهتيه...
سلطان: مبروك لطيفه...
رديت عليه و انا صوتي مختفي: الله يبارك فيك...
سلطان: ماشااااالله عليج...بصرااااحه مسسسسسسسسسسسسسسكته...
++و ارتبش سلطان ويانا فالصور..كل شوي يتصور معايه..مره واقف و مره يالس جنه المعرس..و في صور صوّر بروحه..و فاطمه و عايشه ما قصرن كل شوي يساعدني فالتصوير..ألين ما حسيت اني خلاص تعبت من التصوير..و خاصه انه ورايه مشي عالكوشه..و مشوار طويل..و نحن تونا في بدايه الاحداث..يلست..
لطيفه: بس خلاص ماروم...
سلطان: ايه ايه....بس بس...خلاص شلي قشج و سيري القاعه بس عليها العروس ما تروم...
المصوره: لا لا ...اخر صوره..
سلطان: شوووو اخر صووووره...ايه البدله ما تسمعينها اتقولج تعبانه يالله يالله الخلااااا...ايه فطيم شله متغشيه حضرتج؟؟
فاطمه: شوه تبا اتشوووفني و انا متمكيجه؟؟!!! حرام...
سلطان: سوّد الله ويههج...اسمعوا انتو يون حرام!!!! انتي بكبرج مب فتنه...يالله يالله فجي الغشوه..بشوفج
فاطمه: و الله ما فجيتها..غياااااض
سلطان: بسم يالله يالسباله...اللي ايقول عاااااد ملكه جمال لبنان..
يوم قال سلطان جذيه استفز فاطمه اللي فجت الغشوه و اتحجبت.....
فاطمه: هاه هاه و الله اني احلا عنهن...
سلطان: اوب...اوووووووب....اوب....حسبي الله على المكياج شوه ايسوي...يجلب السباله غزاله..
فاطمه: عنلاااااااتك انا سباله...
سلطان: أأأأفااااا.....لا لا امزح...امبونج حليوه مقبوله...بس الحين...عليّه لو انه ايشوووفج بوحسن..انه ايسريج الليله المحكمه و يملج...
فاطمه و هي مستحيه: في ذمتك؟؟ سلطان سلطان لا تجامل قووول الصدق...
سلطان:في ذمتيه..انج ما خربتي..ابصراحه اتعيبني يوم ما تحطن من هالصبغ على ويوهكن..شوفي عمرج و شوفي العرووووس..و الله انكن احلا يوم مكياجكن خفيف...مب عويش..صابغه براطمها بأحمر...اهبي اهبي
عايشه: حراااااام عليك.....شوه احمر....عنابي غامج...
سلطان: العروس ما حطت عنابي..انتي وين تبين؟؟؟ شوفي لطووف و فاطمه مكياجهن احلا عن مالج؟؟؟
عايشه: سلطان لا تقول جيه؟؟
سلطان: سيري امسحي هالصبغ الاحمر اللي مصبغتبه براطمج....و حطي من هاللميعي الخفيف..شرات لطيفه ولا فاطمه...شوفيهن و الله انهن غراشيب..ولا انتي اتقولين عيوز متصابيه...
حليلها ركضت عويش و مسحت الروووج العنابي و حطت غلوس وردي...
سلطان: هيه تووووج...هب مسااااعه...سمالله ما تقول الا ام دويس...
في هاللحظه مارمت امسك عمري...ضحكت من الخاااااطر....
سلطان: كولوولووووليش...العروس ضحكت؟؟؟ ما بغيتي..ايه لطوف يوم ايدخلون احمد اضحكي هب اتبرطمين...النظره الاولي..تلعب دور تراها...
الكل: هههههههههههه...
سلطان: ايه وين ضبوب؟
فاطمه: ضبوب اتسلم عليك...من الساعه خمس فالقاعه؟؟
سلطان: في ذمتج؟؟؟
فاطمه: و الله...لابستلك هاذاك الفستان الفيروزي..هايه نيك..و التراحيب امررره ما وقفت...
سلطان: في ذمتج فالّه شعرها؟؟
فاطمه: هيه...ليش شي فيها؟؟!!! القاعه كلها حريم..
سلطان: عنلاااااااااااااااااااااااااااتها...سودا الويه...قلتلها الف مره و محذرنها لا تفج شعرها..اوكي اوكي ضبوب دواج عندي..اما سويتلها الحين و لعنت خيرها...
فاطمه: لا تعب عمرك..ما عندها الموبايل الموبايل عندي انا...و بعدين شوه فيها لو فجته..ما شالله عليها اتربيه من يوم هيه ياهل..خلها تتخقق به...من اصبحت و هم يسشورونه لها..والبنت ما بتنخطب..العالم كلها تعرف انها محيره لك...
سلطان: شوه تبينهن ايحسدووونها...غربلات بليسها انا اعرف أأدبها..هاي من الحين ما تسمعه كلامي؟؟
فاطمه: يا بوي فكنا من الحشره...يالله يالله جرب السياره...
في هاللحظه دشت علينا امايه عفرا...
عفرا: السلااااااام عليكم...
الكل : و عليكم السلاااااام...
عفرا: اللهم صلي على محمد...ماشالله ماشالله...تف من عين..تف من فرحه...(يتني و باستني على راسي)..اقول عيالي..اظهروا شوي ابغي ألبس لطيفه الذهب..و انته سلطان بويه جرب السياره..ما فينا نتأخر الحريم محتشرات علينا...
++ طلعوا الكل..و سكروا الباب..اتقربت مني امايه عفرا...امايه؟؟!!..آه يهالكلمه...وينج يا أمي..انا اليوم عروس..وينج ما تشوفين بنتج و تنصحينها؟؟!!!...لبستني امايه عفرا العقد..و الساعه..و الدبله..و الشغاب عطتني اياهن انا البسهن عشان ما تعورني..سحبت عفرا كرسي و يلست عدالي...
عفرا: ماشالله يا بنتيه....امررره ما عليج كلام...ماشالله..شوه اقول؟؟ و الله يا بنتيه انه غلاتج عندي من غلات شمسه و خواتها...
لطيفه: معلوم يا أميه...و انتي اميه..و سنديه...و مالي غيرج في هالدنيا...
عفرا و هي تمسك ايد لطيفه: يا بنتيه..ما عرف شوه اقولج..بس بغيت اقول انه فرقاج مب هين علينا..و الله انه ظهرتج من هالبيت مب سهله..ولا تتحرين انا يوم قربنا احمد نبا الفكه منج..بغينالج الستر..يا لطيفه..(سكتت عفرا لحظه تمسح فيها دموعها) ابغي اشوووف عيالج..و الله في سماه..اني بغيت ارمسج من زمان..و اكلمج..و اطمنج..بس ما قدرت..يوم اشوفج تتزهبين..قلبي ينعصر عليج..و على فراقج..بس ابغليج السعاده..و الاستقرار..و البنت مالها غير بيت ريلها..ووين بحصل احسن عن احمد لج انتي..يا لطيفه انتي جوهره..و ما حد بيقدر ثمنج غير احمد..
++ بصراحه..شوه اقول؟؟ شوه اسوي؟؟ حسيت بنفسي انسانه صغيره جدا..جدام عطف وحنان هالانسانه..كلامها..طريقه لفظها للكلام..هدوءها..و حنيتها..ما ترك لي مجال للشك انه هالانسانه اللي جدامي انسانه عظيمه..ولين ماموت ما بنسا عطفها عليه و ضمتها لي و انا مالي حضن في هالدنيا كله غيرها!!! حضنتني لصدرها...عقب ما قالتلي كم نصيحه محرجه عن كيف اتعامل البنت ريلها..و وصتني بوايد اشياء..كنت صدق غبيه و ما افهم فيها..صح انحرجت..بس اتم هاي اميه..و محد غيرها بينورني..
دشوا عايشه و سلطان و فاطمه في هاللحظه محتشرين...
سلطان: يالله يالله...بسرعه اتأخرنا الساعه 10 و نص الحين يالله الين ما نوصل يبالنا نص ساعه..
فاطمه: و في شوه بنسير؟
سلطان: في الرنج بعد شوه؟؟؟ ضاربنه مخفي شامل لعيون لطفين..
فاطمه: اسمعوا انتو يون الرنج؟؟!! وين تباها تركب فالرنج بهالفستان؟؟!!! ما تروم ترتكز(ترتفع) الين فوق
سلطان: سمعو انتو؟؟!!!شويراتج (آرائج) انتي بعد غير؟؟؟ ما تنلامن ملبساتنها طربال(غطاء الخيمه) مب فستان...شوه الحل الحين؟؟ اسوي حق سعيد اخليه اييب البورش ماله؟؟!! بعد البورش ما عليه مخفي!!!!
فاطمه: اووهووووووو...تراها الا هيه...انقولك تيس اتقول حلبوه..ما نبا سياره مرتفعه..نبا صالون عشان نروووم اندخل الفستان بسهوووله..البورش مرتفع بعد!!!!
سلطان: يييييي هاااا...شوه تبيني اسوي عيل؟؟؟؟ اخترع سياره؟؟؟ شرايكم نطلب الاسعاف تراها واسعه..
فاطمه: هب هب هب...فال الله ولا فالك...كيف ما يت في بالنا هالمشكله من قبل!!!
++في هاللحظه بصراحه نقعت من الضحك على راي سلطان..
سلطان: يالله يعلني ما خلا من هالضحكه..اسمينا ما بنترقع عقبج يا لطفين...الحل شوه الحين؟
عايشه: انا عندي فكره...سلطان دق حق المعرس و خذ سيارته البي ام..تراها مخفي شامل..و صالون..ووسيعه من ورا..و خله هو ايسوق الاستيشن ولا عطه الرنج مالك مؤقتا...
سلطان: هيه و الله ما يت في بالي هالفكره...بس عااد الحين المعرس ارووووحه مرتبش..كيف بوصّـله..خلوني انا بتصرف عطوني نص ساعه بالكثير..
فاطمه: سلطان لا تبطي..ما نبغي انطلعها نص الليل نحن ..
سلطان: ان شالله عموه...
++طلع سلطان وما رد علينا بخبر..بصراحه بديت اخاف..لانه شمسه اختيه بدت اتدقلنا تيلفونات محتشره و اتقولنا انه المعازيم ملووا من الصبر..وكل شوي يسألون وين العروس..و فاطمه محتشره ما خلت حد ما دقتله..و عويش اتدق لسلطان و سلطان مايرد عليها...فجأه دش علينا سلطان...
سلطان: يالله يالله...يبنا سيارة المعرس..لا حول ولا قوة
++ طلعنا و ركبنا السياره عقب صعووووووبه..و سلطان مشغل لنا سيدي مال محمد عبده..و كل ما تطلع اغنيه..يطالعني من المنظره مالت السايق و ايأشر عليه..(لا لا تضايقونه ترفي لا تضايقونه..لا لا خلوه يجني من حياتي ثمرها)..وصلنا القاعه عقب موووووت من زحمة السيارات..وقفنا من الباب اللي ورا..ولبستني عايشه اختيه عباه ساااتره..و دشينا الغرفه..سوينا ريفريش للميكب..و بدينا نتحرك صوب الكوشه من ورا..
شمسه: وينكم انتو واااااايد بطيتو...
سلطان: شميس فكينا من الحشره...ارووحا العروووس تنتفض من فوق الين تحت..يالله يالله..خبروا الدي جي ايحط الزفه..
عايشه: انا بسير اقولهم..و بكلم العامله مالت الاضاءه تستعد..
++ ركبت اول ثلاث درجات من ورا فالكوشه..سلطان ماسك ايدي من اليمين..و فطيم من اليسار..و شمسه اختيه بكرشتها فوق تترياني عشان ترفع الستاره...انطفت الليتات..و تركز ليت واحد بس على المكان اللي بطلع منه..قلبي وصل حلجي..والباقه اللي فإيدي طاحت..بس الله ستر شافها سلطان و عطاني اياها مره ثانيه..ايديني يرتجفن..غمضت عيوني..عديت الين الثلاثه..و خذت نفس طووووويل..بدت الزفه..بس المشكله اني مارمت اتحرك..لاني دست على طرف الطرحه..و اريد اقولهم..بس مب قادره انطق..و اصلا لو رمست ما بيسمعوني من الصووت العالي..شوه اسوي..و فطيم تسحبني..تتحراني خايفه و متردده..و انا ماروم لاني لو ركبت درجه وحده خلاص بتطيح الطرحه...شوه اسوي..قلبي وقف..و توترت..و كنت بصيح..
شمسه: يالله لطفين!!!!!! يالله..بدت الزززززززفه!!!!! شوه هاذا؟؟!!! بسرعه لا تفشلينا...
و انا اقوووولهم و اقووولهم بس ما حد يسمع...
سلطان: الله يلعننننننننننننننننننننننننننننننننكن!!!!!!! وترتنها!!!! شوي شوي عليها كلتنها..لطيفن شوه بلاج؟؟ توكلي على الله..و دشي و كل شي بيمشي على خير..
هزيت راسي بالنفي..ياناس الحقوا عليه..بغيت انزل عشان اعدل الطرحه ما قدرت من كبر الفستان..في اللحظه لمحني سلطان اللي قرب اذنه من راسي..
سلطان: لطفين شي عالق؟؟
لطيفه: هيه هيه سلطان الطرحه الطرحه دست عليها و شكلها لصقت ما طا..ما..مادري
سلطان: اوكي اوكي..
قام سلطان المنقذ في هاللحظه و فج الطرحه و عدلها..
سلطان: الحين اوكي؟
لطيفه:اوكي..
ركبتني شمسه و فاطمه و سلطان..اللي وصلني الين نص الكوشه و انسحب..عدلتلي فاطمه الفستان و نزلت..اما شمسه اختيه..مشتني فالبدايه بس بعدين خلتني..وين وين بتسيرين شمسه لا تخليني..التفتت صوبها اترجاها..بس هيه هزت راسها بالنفي..فاستسلمت..و مشيت شوي شوي..كل الضغط اللي احسبه فجيته فالباقه..شوي شوي اندمجت فالزفه..و بدت مشيتيه تتوازن..رفعت راسي..و بديت ادّور على اي ويه مألوف..اول ويه لمحته..كان امايه عفرا..ردت فعلها اثرت فيني وااايد..صااااحت..شفت دمووعها يلمعن..و حطت الشيله على ويهها..و اختفت فالزحمه..كنت حاسه انها ما قدرت تتحمل المشهد..حسيت بالحزن..بس في لحظه..طاحت عيني على البوس العود..يدتيه ضبابه..و هيه ترفعلي عجويتها(عصاها) و اتصفقلي..و عدالها ضبابه و فاطمه و عايشه و كلهن ايسولي باي باي..بصراحه ابتسمت ابتساااااامه من الخاااااطر..بدا الخوف و الرهبه اتزول عني..و خذت راحتيه..مشيت كذا مره سايره راده..و كنت كل شوي اوقف و التفت صوب الحريم مثل ما وصتني شمسه اختيه..لمحت عمتيه بخيته و هي اتهزلي راسها بالرضا..خطف الوقت بسرعه في لمحت بصر..و سارن الحريم يتعشن..و بدوا المعازيم ايخفون..الين ما وصلت الساعه 12 فليل..تقريبا القاعه كانت فاااضيه..ما فيها حد غيرنا..وصت عايشه اختيه الدي جي ايحطون اغنيه رباشيه..و قامن عويش و فطيم و ضبابه ووضحا..كلهن قامن يرقصن..الين اللحظه اللي دش فيها ابويه..باسني و باركلي..و في لحظه حسيت بشوشره..و فوضا..حسيت انه ساعه الصفر حانت..سمعت التثوير بالكلاشن برا القاعه..و في لحظه..طاحت عيني عليه..!!
صحيح لي شرواك ينحب.. حسن و اخلاق و معاني..لكن ما قدرلي الرب.. ألقا على بحرك مواني
هو ما غيره..أحمــــــــــــــــــد...انتبهت انه ما لمحني..فقامت عايشه اختيه اللي لبست عباتها و شيلتها..و غطت ويهي بالطرحه..وقفت..و نزلت راسي..بس رفعته مره ثانيه..ابا اشوف نظرة عينه اول ما يشوفنيه ..دش احمد..و كان عداله سلطان اخويه..و خليفه..و عمير اللي كان ماسك الكلاشن في ايده..باركلي عمير عالسريع و هو حتا ما رفع عينه..و طلع..مسك ابويه ايدي و جربني من احمد..اللي كان ياي صوبي بسرعه الصاروخ..رفع الطرحه..و باسني عالسريع علي يبهتيه..ما دري اذا باسني اصلا شكله حتا مالمس جلدي..بس حسيت بنفسه على راسي..اتقرب من اذني..و قالي: مبروك...
بس!!! ولا شي زياده...ولا كلمه..ولا حتا نظره فرح!!! وقف شعر جسمي في هاللحظه..و بدت شكوكي تتحول لحقايق..رفعت عيني بنظره خطافيه على أحمد..حسيت خلالها بالنفس يوصل حلجي..ماشالله عليه..كان بأحلا صورة شفته فيها في حياتي كلها..بإستثناء تعب بسيط و دواير سودا تحت عيونه..فجأه ألتفت أحمد صوبي بنظره حاااده..ولا ابتسامه..ولا فرحه..ولا شي..الصدمه بس كانت مرسومه على ويهه..أدري اني كنت طالعه حلوه..بس ما تستاهل العروس بسمه؟؟!!!
يا لطيفه ارحميه..الله يعلم بحاله و الضغط اللي مر عليه..و يمكن مرتبش ولا متوتر..شوي شوي عليه..حاولت ارفع عيني صوبه مره ثانيه بس ما قدرت لاني كنت حاسه انه مركز نظرته عليه انا..فتميت موخيه..ألين ما حسيت بأيده تمسك ايدي..و تسحبني..عشان ايلس على الكرسي..آآآآآآه جنه حد يسحبني لحبل المشنقه...الشي الايجابي الوحيد في هالحركه..اني كنت اترجف وبردانه..و ايده كانت دافيه..يلسنا على الكرسي..حسيت الكل يالس ايطالعنا..حاولت ابتسم ولو كانت مصطنعه..بس ما قدرت..لانه و ببساطه المخلوق اللي يالس عدالي..احسبه ناااااافرني..
مشاعريه متضاربه..دقات قلبي تنذرني انه القادم أسوأ..بس ما حبيت اشغل اللي حواليه بشكوكي..فرفعت راسي..وانا اشوف الربشه عالاخير..كل واحد سحبله كرسي على الكوشه و يلس..و سلطان مفطسنهم من النكت علينا..كل شوي ايعلق..و اذا رفع احمد عينه و طاحت عينه عليه..ايعلق سلطان" طالعوا طالعوا المعرس ايقووول متا بنروووح...يبا ايشوووف العروووس و مستحي" و الكل يضحك..و بعد لحظات شفنا يدتيه ضبابه و هي تركب الكوشه بمساعده خليفه خويه..و مالقولها كرسي..و اصرت انها تيلس بينا..احسن احس انا متكهربين عدال بعض..يمكن اذا ابتعدنا ايخف التوتر..و شوي شوي بديت انسا احمد..و ادخل فالجو..و بدوا ايحطون اغاني محليه..و نشوا الشبيبه ايولون..سلطان من دون لا حد يعزمه..و بويه..و خليفه عقب مووووت نش..ووضحا في نصهم..ترقص..و يدتيه تمت اتمط احمد عشان ايول..الين مانش و يال و دار لفتين و رد...و يلس عدالي..بس هالمره صدق لصق..بس ايدينه مارفعهن عليه..حاطنهن عداله جنه تلميذ ابتدائي مهذب..احسن...بصراحه الجووو كان رهيب..الفرح ينعكس في عيون الكل..الا هالشخص اللي عدالي..اللي كان ساكت على غير العاده..و حتا ضحكته على السايلنت من دون صوت..تم سلطان ايووول وايووول..و ابويه وياه..جان يتجدم سلطان جدامنا و يلس تحت و تم ايبس عشان ايخفف التوتر..
سلطان: لطفين..شوفي ريلج الحاذق..ماطاع ايووول عشان ما يعرق..نش نش يا بويه روّ حرمتك قدراتك الفنيه و ريحتك اتهدددددن من دهن العوود من بعد ميل..نش
بس احمد رفض..اكتفا بالضحك و هز راسه..و من الربشه قام ابويه و تم ايمط امايه عفرا عشان تقوم و تيول وياه...فاستسلمت و قامت..و قامت يدتيه ضبابه..و سلطان الحبيب مشغل فلم صامت مع حبيبة القلب ضبابه..ايكلمها من بعيد..بالحركات..
سلطان و هو ايأشر لضبابه بحركه على رقبته مثل السيف و ايأشر على شعرها..و كأنه ايقولها " بذذذذذذذذذبحج ليش اتفجين شعرج"
و ضبابه حليلها..اتأشر له من بعيد..و اتهز راسها..و اهو ايقولها بذبحج...
حمد: اييييه ضبوب نشي نشي ارقصي...نشي..
ضبابه: هاه؟؟!!!! لا لا خالي لا ....ما روووم
اليده: اسمعو انتو مارووووم؟؟!!! عرس اخووج هاذااااا...يالله نشي..و الله و الله و هاي حلفتيه يا تنشين
ضبابه: ماروووم اطلع شعريه...استحي...
في هاللحظه قام خليفه اخويه و ظهر من الخيمه عشان ضبابه...
احمد: و انته ايه؟؟!!!! ( وهو ايكلم سلطان) يالله يالله براااا...
سلطان: و الله و الله ما ظهرت...و ما بشبر شبر برا الخيمه..
احمد وهو ايكلم ضبابه: عيل ما شي...قري قري..
حمد: لا اله الا الله..الحين تستحين من سلطان؟؟!!!! هاذا الا ريلج...(سلطان اتشقق من الفرح)
احمد: بعده بعده ما استوا ريلها..و حرام تكشف شعرها جدامه..
حمد: اسمعوووا المعرس انتو!!!!! تراها محيره له...بتطير عنه هيه؟؟!!! يالله يالله بنتيه نشي..ماحد غيرج فاج شعره الا انتي و ووضحا...ثنتيناكن نشن...هب هيلاك...(و ايأشر على فاطمه و عايشه) مسوياتلهن..هالصمبي(التسريحه) هالكبر...انجليزيات يتحرن عمراهن..شوووفووو محلا الشعر الطويل على ضبابه نشي نشي بنتيه و انا بزفن وياج...
ضبابه وهي اتطالع احمد بنظره خووف و رجا...هز احمد راسه بالموافقه بس مب من الخاطر..في هاللحظه نقز سلطان..
احمد و هو يمازح سلطان: و الله ما تنش ايلس...جانك ما بتظهر من الخيمه ايلس على الكرسي..
سلطان: انزين بسم الله برمس الدي جي اتحط طال ليلي...
و حطوا طال ليلي..و اشتعلت القاعه رقص و يواله..كلللللللهم..ما تم حد عالكرسي غيري انا و احمد و فديته السيافي ما خليته ايقوم لانه املي الوحيد ومونسني..و انا ميته من الضحك عليهم...لا اراديا لفيت صوب احمد..و همست له: طالع طالع سلطان..
في هاللحظه..ألتفت صوبي احمد..و ما شلّ عينه عني..مادري ليش نظرته كانت مركزه على ضحكتيه..و عقب شوي لفّت عيونه على كل ويهي..جنه ايشوفني اول مره..صديت عنه..بصراحه احرجني..يعني يا مره ما يعطيني ويه..وما ايكلمني..يا ايصنخ و يبحلق فيني!!!!
في هاللحظه سلطان يالس ايبس تحت جدام ضبابه..اللي فاله شعرها الطويل اللي يوصل الين ركبها و تنعش شوي شوي..و ابويه ماسك ضبابه من ايدها و ايصفقلها..
" بو يديلن المياديلي... سيدي مايا مثله أمثالي..
نـــــــــــور وجها في دجـــــــــى الليلي..نور برق الـــــــــــــــلـــظ شعـــــالي.." و سلطان ايأشر على ضبابه...
في هاللحظه..مال احمد صوبي و قرب ثمه من اذني عشان اسمعه لان الصوت كان وايد عالي..
احمد: اترحمي عليه خوووج...امره داااقنه الهوا...
ألتفت صوب احمد: ايحقله...بنت عمته و ايحبها...
سيف: اااااااايه عمي احمااااااد....يالماااااصخ...تمسك خالووووه لطيفه...تراني بخبر باباتي عليكم!!!
الكل:ههههههههههههه
عطاني احمد نظره قووووويه..طنشته..مب كفايه قلبي واصل حلجي..و ميته من الخووف..فجأه وقفت الغنيه..و صفقوا...وقف احمد و مسكني من ايدي شوي شوي..و التفت صوبي:" يالله لطيفه...يالله خلاص"
من الخوف...تجمدن ريولي..ماقدرت اوقف..راحت عايشه اختيه ويابت العباه..طلعنا و ركب كل واحد في سيارته...يدتيه و البنات مع سلطان...شمسه سارت ويا ريلها عمير و عمتيه بخيته..خليفه اخويه ركب معاه بويه و امايه..ركبت السياره مع أحمد عقب جهد جهيد..بمساعده فطيم..و لصقت فيها..ما خليتها..
لطيفه: الله يخليج فطيم لا تخليني...
فاطمه: يالله بالستر يا لطووووف...وين تبيني اسير؟؟ وياكم؟؟ لا لا استحي استحي...
احمد: اقولج فاطمه اركبي اركبي من ورا..عشان لطيفه و الفستان ثقيل عليها..
سلطان و هو ايصارخ من بعيد: ايه فطططططططططططططططططططططيم...يالله نحن بنروح...بسرعه
فاطمه: يالله يالله يايه يايه..
لطيفه و بنظره حزينه: فطيم...طالبتنج...لا تخليني...
احمد: برايك برايك سلطان اذا بتروح...فطيم بتيي ويانا...خلها اهنيه عشان اتساعد لطيفه...
سلطان: يالله ما عليه تجدمونا انتو و نحن وراكم..
++ و مشينا في هاذاك الموكب..و الشيخ سلطان كل شوي ايسابقنا و ايدقلنا هرنات..و ارتبش احمد وياه..و حسيت بالراحه لانه احمد ألتها عني شوي..و فطيم حلّت الجو علينا..كلها سوالف و نكت..و اتكلم سلطان على السبيكر..و سلطان حاط سبيكر..و شوه سواااااالف و ضحك الين ما وصلنا البيت...نزلنا كلنا..ساعدتني فطيم فالنزول..ولا جان اتخرطفت و طحت على ويهي من ثقل الفستان..دخلنا فالقسم الداخلي اللي كان حجره شمسه اختيه و صالتها قبل العرس..و أشتغلت فينا المصوره..اتصورت مع اهليه..و خواني و خواتي..و مره مع عموه بخيته..و يدتيه ضبابه..و امايه عفرا..و معاهم كلهم..الين اللحظات الحاسمه..يوم بدينا نتصور أنا و احمد...بصراحه مب صور..هاي غلاسه..طول الوقت و انا احاول امسك عمري..لا و اللي وترّنـي زياده انه احمد يرتجف..اذا هو المعرس يرتجف..انا شوه؟؟!!!!
المصوره: يالله يالله اخر صوره..يالله اعموول هيك..ايوه ايوه...
سيف: ماماه...ماماه...تشوووفين عمي احمد...طفس...ايبوووس العرووووسه..ماماه قوليلهم عيب..
اليده ضبابه: يا بويه خلهم..هاذي ضواياهم..الا المعرس يكرف..و العروس طايحه..امرره هالتصوير هب زين..
سلطان: وين يا يدتيه؟؟!!! حتا المحبه حليله ما حبها..يوم اتقوله حبها..ما يطيع..عنبوه هاذي حرمتك..
++ و انتهي الوضع على خير..عقب ما كانت اعصابي على صفيح ساخن..الغريب اني انا مثلت واحمد ما قدر ايمثل جدام الكيمره..و مثل ما قال سلطان اخويه..اذا قالت له المصوره بوسها..ما يطيع..و اذا باسني ما يلمسني بس جيه تمويه!!!!! في لحظات ما لقيت نفسي الا فالغرفه ومعايه شمسه اختيه..بدلت الفستان و لبستني فستان شيفون مكسي خفيف..و قالتلي لا تمسحين مكياجج ولا تفجين تسريحتج..ساعدتني و لبست عباه و شيله..غيرت الجوتي..وعطتني شنطه هاند باج متوسطه..قالتلي انه فيها الذهب و المكياج..أول ما طلعت كان احمد يالس بروحه فالصاله..
احمد: يالله زاهبه؟؟
لطيفه هزيت راسي بس...
طلعنا عقب ما شل احمد الشنطه عني..لقيناهم كلهم متجمعين برا..
حمد: هاه بوووويه...امررره بتسرووون...الليل هاذا..باتوا اهنيه و باجر اسرحوا...
سلطان: لا لا بويه..يمكن حاجزين على طياره ولا شي ملتزمين...
اليده ضبابه: عنبوه...سيلانيه مكنسله ويزتها ما تبات فالبلاد...
احمد: هههههههه...لا لا يدتيه..يمكن انتحوط الا اهنيه فالبلاد...
اليده ضبابه: عيل باااتوا باااتوا اهنيه عندنا...
خليفه: لا اله الا الله يدتيه...شوه تبين المعاريس انتي؟؟!!!...يبون ياخذون راحتهم...
اليده ضبابه: ثرني ببات عندهم فالحجره؟؟!!!!
سلطان: ههههههههههههههه...يدتيه وراهم سريه..
احمد: يالله عيل شي في خاطركم؟؟؟
حمد: لا بويه حافظنكم الله...و رمسونا باجر طمنونا عليكم...و لطيفه تراني ما وصيك عليها..
في هاللحظه طاحت عين احمد عليه: لا توصي يا خاليه...لطيفه في عيوني...
++ عشره على عشره..ممثل..اتقن الدور بحذافيره..لشوه اتخطط يا احمد؟؟!! ليتني اعرف..سلمت على البنات وحده وحده..امايه و عمتيه و يدتيه..ابويه اللي ضمنيه لصدره و باسني على راسي..و اخيرا خواني..ركبنا السياره..بس كانت فطيم يالسه في السياره من ورا اتحط بعض الاغراض الناقصه في شنطتيه الهاند باج..
سلطان و هو يفتح الباب على فاطمه: ايه ايه ايه...يالله يالله حولي..صدقتي عمرج انتي؟؟!!! وين تبين..معاريس هاذيلا...لا تستعيلين على رزقج بتعرسين..
احمد: ههههههههههههههه...حد ايطيح في ثمه هاذا
فاطمه: انزين بسم الله...يالله احط ذهب لطوووف...بظهر عنبوه وين برتكز في نص المعاريس؟؟!!
سلطان: اشوا اتحراج تبين اتسوين فيلم وثائقي عن العرس...
فاطمه: عن الغلااااسه...و طلعت فاطمه..باستني..ووصتني ادقلها متا ما حصلت فرصه...سكرت الباب و اتحركنا...
عدّت أول ربع ساعه بصمت..هدوء..إلاّ صوت الانفاس بس..وشوي شوي الين ما طلعنا من حدود العين..بعدها حط احمد الضو على السياره..طيّرها..و بما اني اخاف من السرعه..غمضت عيوني..و انا متأكده انه ما بيلاحظ هالشي..لانه السياره وايد مظلمه من داخل..و بديت شوي شوي اهدا..و تستريح روحي.شِوه بيسوي يعني..فجيت عيوني شوي شوي..و سرقت نظره لاحمد..اللي كان متوووووتر علاخير..كل شوي يلتفت يسار عشان ايجيك من منظره السياره..و ايده ماسكه السكّان بقو..حسيت جنه في معركه..و بحركه مفاجئه..شل السفره و العقال من راسه..و تنهد تنهيده طويله..و مرر ايده في شعره..و الله العظيم ايده كانت ترتجف..يا ترا شوه فيه؟؟ بشوه ايفكر؟؟ و ليش كل هالتوتر؟؟!! تراني الا لطيفه لا أهش ولا أنش..الوضع ما كان طبيعي ابدا..و احمد بدا العرق ينزل من يبهته..لا اردايا..
لطيفه: أحمد؟؟!!
التفتت احمد صوبي بسرعه..و كأنه كان ينتظر هاللحظه من الصبح..ولا انكر انه نظره خوف مرتسمه على ملامحه..
لطيفه: شي ايعورك؟؟
أحمد:لا ابدا..
و رد احمد ايركز على السواقه..شغل المكيف و طوّل عليه عالاخير..و انا ثلجت..بس ما حبيت اعترض..قام احمد و شغل السي دي..و كان سيدي سلطان اخويه..و كانت اغنيه محمد عبده " ليلة خميس طرز بها نور القمر شط البحر نصف الشهر..و الليل من فرحه عريس ليلة خميس..." قام احمد و بسرعه و صك السيدي؟؟!!! حط الاف ام و كانت اغنيه اليسا " اجمل احساس فالكون"..الجو فالسياره مثلج..و أحمد هادي..و ظلام..غمضت عيوني لا اراديا و غفيت..اول ما فجيت عيوني طاحت عيني على ساعة السياره..نمت نص ساعه تقريبا..ألتفتت ادور احمد..لقيته نازل عند كافتيريا صغير..و ياي و شال في ايده كيس..
احمد: هاه؟؟ يوعانه؟
لطيفه: لا...بس عطشانه..
احمد: انا بصرااااحه ميت من اليوع ما تعشيت...خذت سندويجات..و عصير..عصير شوه تبين؟
لطيفه: اي شي؟؟
احمد: شي عصير مانجا و برتقال..انا باخذ البرتقال..( و مشا احمد بالسياره شوي..ووقفها على طرف الطريق..فج بابه..و بدا ياكل)
احمد و بطنازه: الجووو رومانسي...
لطيفه...اكتفيت بإبتسامه مصطنعه...
خلص احمد اكل..و كملنا الطريق..ماشي نص ساعه ووصلنا دبي..و بما أنه الساعه تقريبا اربع الفير..كانت الزحمه شوي..ووصلنا بسرعه فندق جراند حياه..أحسن يعني ما شي سفر..علاقل في بلادي يمكن ارتاح..لو كنت مع احمد و في بلاد برا..يمكن أيّن..بروحي معاه؟؟!! مستحيل..
احمد: يالله لطيفه..وصلنا..
لطيفه: يالله..
نزلنا..نزل احمد شنطته و شنطتيه..و عطاها العامل اللي كان واقف..شاف احمد شنطتيه الهاند باج فشلها هو عني..شليت شنطتيه الصغيره..و مشيت وراه..بس هو وقف يترياني..و مسك ايدي بتملك..جنه ايقول للعالم هاذي حرمتيه!!!!..دخلنا فاللوبي يلسنا خمس دقايق..سأل احمد واحد من العاملين عن واحد اسمه توني...و خمس دقايق انه هالتوني الاحمر واقف جدامي..قام احمد و سلم عليه..و تراطنوا بالانجليزي..اللي فهمت بس انه احمد قاله انه هاي العروس..سلم عليه هالتوني و باركلي و رديت عليه ثانكس..و فجأه ودانا هالتوني جناح..بصراااحه ايخبل..و طلع احمد وياه و كلمه خمس دقايق و راح..دخلوا الشنط..و بعدها سكروا الباب..
ما عرفت شوه اسوي..واقفه في اخر الصاله و احمد فالطرف الثاني..لا و قاعدين كل واحد يطالع الثاني..كل واحد يتريا الثاني ينطق..احمد و بعد تردد..
احمد: سمحيلي لطيفه..ما قدرت ارتب الامور عشان انسافر..
لطيفه: لا عادي..بالعكس..دبي فالصيف وااايد حلوه..و مافيها زحمة الشتا و المهرجان..
قام احمد و يلس على الكنبه..رجع على ورا و غمض عيونه..شوه اسوي؟؟!! كيف اتصرف؟؟ شوه اقول..مرت عشر دقايق على هالحال..قلت يمكن احمد غفا ما ينلام من التعب..لا اردايا دشيت الغرفه اللي على يميني..كانت وااايد حلوه.. دشيت الحمام..جيكت على الميك اب..اتعطرت و فجيت العباه و الشيله و علقتهن..مثل توصيات شمسه بالضبط..يعني الحين انا بطلع جدام احمد بهالفستان..و انا مب لابسه عباه و شيله؟؟!! مستحيل..قعدت فالغرفه..لقيت مجله و يلست اتصفحها..دام احمد غفا ما بزعجه..سمعت صوت الاذان من بعيد..قمت قلت خلاص بتسبح و ببدل ملابسيه و بصلي..طلعت الصاله..عشان اييب اغراضي اللي فالشنطه..لمحت احمد بنفس اليلسه..وقفت في نص الصاله متردده بين اني اوعيه..ولا اني اخليه راقد..ماهان عليه يرقد جذيه اكيد بيتعب..و ما تجرأت اوعيه لا يفهمها غلط..اول ما بديت اسحب الشنطه..سمعت صوته..بأسمي..بس بعذاب..اصطلبت بالوقفه..جنه برق سرا على طول ظهريه..
لطيفه: لبيه احمد..
احمد: تعالي شوي...
وين؟؟؟ ايلس عداله؟؟!!! لاااا الحبيب شكله دهمان..بس مااقدر اقوله لا؟؟مشيت و أنا اسحب ريولي و قعدت عداله على الكنبه بس على طرف..بعد تردد قام احمد و يلس عدالي..و مسك لحيتيه(ذقني) بأيده..و لف ويهي صوبه..عاد انا اعرف عمري في هالمواقف ما يحمر ويهي بس...الا يسوّد..
احمد: ههههههه....مستحيه؟؟!! مني انا !!!
++ شوه هالسؤال السخيف؟!!! يون مستحيه...الا انتحرت من المستحا...
احمد: أممممم...شفتي خالي اليوم شقايل فرحان...ماتوقعت انه بيفرح لهدرجه..اعرف انج غاليه على قلبه و قلت يمكن يحزن على فرقاج...
لطيفه: ممم...مادري..كل...ابو..لازم.........لازم يفرح..
++ وشوي شوي..بدا احمد يندمج فالكلام..و ايقولي السوالف اللي استوتلهم فالعرس..و المواقف اللي تضحك..ما توقعت انه احمد عنده القدره على انه ايسولف بهالطريقه و بهالسلاسه..بصراحه ما قدرت اوقف عن الضحك..و كل شوي يوصفلي موقف ايضحك..و ردة فعله..لدرجه اني ما حسيت أنه اللي جدامي أحمد..جنه سلطان خويه؟!!!
احمد: تعالي شوه سالفت السياره.؟؟؟؟ ياني سلطان محتشر..و مادري شووه..خليتوني بلا سياره..تخيلي معرس بلا سياره..؟؟
قعدت اقوله السالفه..و الله مب سالفه قصه الف ليله و ليله...بين كل كلمه و كلمه فاصل اعلاني..فالبدايه ما قدرت اتكلم..بس بعدين..شوي شوي..بديت احاول..خبرته عن سالفة الطرحه...نقععععع من الضحك..يلست اتأمل ملامحه و هو يضحك..يتحول شخص طفولي..لدرجه اني حسيت اني اشوف سيف..مب أحمد...أحمد..اللي فالبيت ينعمل الف حساب..جنه هو العود مب عمير..فجأه انتبه احمد اني ساكته..و ادقق فيه..و ما كملت السالفه...هدا..و قعد ايطالعني..اول شي استغراب..بس بعدين نظرته بدت تتحول لشي ثاني..شوه هالشي ما عرف اوصفه..بس اللي عرفته ولا كنت متأكده منه انه الهدوء ما قبل العاصفه...
مرر احمد ايد ه في شعره...بعدين قام اينقع صبوعه..متوتر؟؟!!! معقوله؟؟!! عيل انا شوه؟؟!! بركان هايج..احس بقلبي يطبل في ذنيه..و مغص...يالله يالمغص كيف ايعذب..كله من الخوف..فجأه..مسك احمد ايدي..بأيديه الثنتين..بعدين سحب وحده من ايديه جنه مرتكب اثم..بس تم ماسكني بأيده اليمين..
لك درب فالدنيا ولي درب..رّوح عساك اتعيش هاني..و أنا على ذكراك برقب..ربي يعوضني بثاني
أحمد: لطيفه...(و هو يلعب بالدبله اللي فصعبي و ايدورها و ايحركها...وترّني و بهدلني علاخير..حلفت انه اذا استمر اني افج الدبله و اعطيه اياها..!!!!)
أحمد و هو عينه على صبعي: سمعيني لطيفه...اللي اوله شرط اخره نور..صح ولا لا ؟؟؟
++هزيت راسي..و انا اتوقع انه احمد بيفجر قنبله في اي لحظه..شوة شرط؟؟ شوه نور؟؟ في شركه نحن؟؟..رفع أحمد راسه..طاحت عينه في عيني اللي فضحت مشاعريه صوبه..و لف براسه صوب الاباجوره اللي ورا راسي مباشره..
أحمد: تمام...أنا ما عرف انتي شوه شعورج صوبي..بس أنا متأكد انه الفتره الاخيره ما كانت طبيعيه..و أنا فكرت..و خذت قراري...أتمنى أنج تحترمينه..لأنه اللي بينا بيكون مجرد....
++في هاللحظه سكت أحمد..ليش؟؟؟ لانه جرس الغرفه رن..نزل أحمد راسه بغيظ..و نفخ بقهر..بصراحه..ما كنت فالدنيا ابد..كنت أحس اني في قوقعه..الجو ضبابي..و الصوت بعيد..و مخي ايدور و ايدور..احترام؟؟ و قرار؟؟؟و اللي بينا بيكون؟؟!! شوه بيكون؟؟ شوه السالفه.؟؟ أحمد بدا يظهر على حقيقته..و بدا قلبي ينعصر..و العبره تخنقني..طلع كل اللي توقعته صح؟؟ شوه بتسويبي يا أحمد..سمعت صوته من بعيد..
أحمد: لطيفه....سيري داخل شوي..
نفذت أوامره..دشيت الغرفه..حاولت استوعب الوضع..شربت ماي عل و عسا افهم شوه اللي قاعد ايصير..حسيتبه موجود فالغرفه..ريحته..وجوده..وين ما يكون أحمد موجود..في شي ايدل على وجوده..ألتفتت..صوبه..و كلي ذهول..و أسئله..
أحمد: تعالي...يا بولنا عشا..ريوق..مادري شوووه؟؟ تعالي مب يوعانه؟؟
لطيفه: ان شالله..
طلعت لقيت طاوله و كراسي مزهبات..قعدت و قام احمد ايفج عن الصحون..ردله المرح..و اتغير رجع أحمد المرح اللي ينكت..ارتحت...قمنا ناكل..و احطله و ايحطلي..لا كله كوم و هو ايحطله كاتشب..نزل الكاتشب كله دفعه وحده...نقعنا من الضحك..و كل شوي يوقف و ايأكلني بالشووكه والله اكل ما عرفه و الحبيب يالس ايجرب الطعم فيني..و هو ميت من الضحك عليه..خاصه اذا كان الاكل فلفل..فجأه هدينا..شفته يلعب بالشوكه في صحنه رغم انه كان فاضي..قام فجأه..و قالي انه بيتغسل..اما انا رحت الغرفه الثانيه و اتغسلت..بس بغيت كلينكس فرحت الغرفه الرئيسيه..أول ما حطيت ايدي على كرتون الكلينكس وبديت امسح ايديني..انتبهت انه احمد كان واقف جدام التواليت..و ألتفت صوبي أول ما دشيت..حسيت انه يطالعني..و انا امشي..و انا ايلس..و انا انظف ايديني..بصراحه حسيت انه فيني شي غلط..
لطيفه: في كاتشب على ويههي؟؟؟
أحمد: لا..بس...أأأأأ
في هاللحظه بس حسيت انه الجو اتكهرب..و انتبهت انه و اخيرا نحن فالغرفه..اممم..و المشكله انه ايطالعني ولا يتكلم شوه اقول؟؟ ما عرفت اتصرف..فجيت الدبله لاني احسبها شوي وسيعه و في اي لحظه ممكن اتطيح..و حاولت افج العقد..بس شكله راص علاخير..لا و المشكله شي من الشعر دخل فالمكان اللي ايفجون فيه العقد...حاولت حاولت بس مارمت..انتبهت انه احمد ايطالعني و فيه الضحكه..
احمد و ابتسامه: يالخقه؟؟!! شوه بيستوي عليج لو قلتيلي فج العقد؟؟!!! نص شعرج لاصق فيه..
لطيفه: لا لا عادي..
احمد: عادي؟؟!!! بترقدين و هالعقد اللي هالكبر في حلجج!!!! الله يعينج..نحن كندوره و يالله يالله نتحملها على حلوجنا..وين انتي هالذهب كله على حلجج!!!
لطيفه: هههههههه...لا هو سهل فتحه بس جنه الشعر داخل فالفتحه مالته عشان جيه مب طايع ايفج..
احمد: تعالي تعالي بفج لج اياه...ما يرزا..زلغتي شعرج..
++ اسمعوا انتو يون تعالي؟؟!!! مينون اتقرب منه!!! عشان يسمع نبض قلبي..عشان ايشوف الحب في عيوني..
احمد: ههههههههههههه....شياج فجيتي عيونج..مب وحش انا؟؟؟ ولا اكيد اتقولين هاذا من اللحين يالس يتأمر,,
++ سكت عنه..و ما حبيت ابين له اني خايفه منه؟؟!! و خايفه من مشاعريه!! فاتقربت منه و تقرب هو الين ما تلاقينا في نص الحجره..عطيته ظهريه..و تم هو ايعابل فالعقد..بصراحه مرات ايمط شعريه..و انا ساكته الين مره حاول ايفجه شوي بالقو فعورني..لا اراديا مطيت ايده..
احمد: سووووري..سوري..و الله ما قصدت...بس حشا...لاصق...لطفين ما شي حل الا انقصه..
لطيفه: شوووو؟؟!!!
احمد: هههههه....لا لا ...يعني انقص شعرج من الطرف اللي لاصق فالعقد...
لطيفه: ما شي حل غير؟؟
احمد: ماشي حل..تراني من الصبح اعابل فيه ولا رمتله..
لطيفه: لا مابا اتقص شعريه...
أحمد: عيل خليه هالعقد لاصق في شعرج الين مانرد العين...
لطيفه: لااا...
أحمد: ما عليج ما عليج انا بتصرف...
شفت احمد ايحوس فالغرفه ايدور و ايدور...الين ما حصل مقص..و ياي صوبي و هو ايسويلي حركات..تخويف..
لطيفه: تيّمل فيني احمد...هالله هالله في شعريه...
احمد: عادي بقصه بخليه شرات شعريه...
لطيفه: شووو!!!! مشكور ما حد يبا منك خدمات..
احمد: تعالي تعالي والله ما خربه تعالي..
++ و بدا احمد يقص الشعر..و انا ميته من الخوف..واتريا النتيجه..بس احمد ما تحرك..استغربت..مرر ايده على شعريه..و حط ايدينه الثنتين على جتوفي..في هاللحظه..حسيت بالموت..ايدينه كانن باردات و يرتجفن..و تم ساكت..و انا ساكته..ما اسمع الا صوت تنفس احمد..اللي كان حار و هو يلفح رقبتيه..فجأه..خلاني احمد..و سار صوب التواليت..المهم سار الي ابعد نقطه فالغرفه..
احمد: شفتي شفتي..ما..ما...ما قصيت الا شوي..( قام احمد و لف الشعر و حطه في كلينكس و خشه في وحده من السدات...بعدين قام ايحك عيونه بصوره مب طبيعيه..دش الحمام..و طلع ايدور شي في شنطته..رد و ياب سائل تنظيف العدسات..و نظف عدساته..بس كل ما يركبها..اتطيح..الين ما توتر احمد و تنرفز..)
أحمد: الله يلعنها من حاله؟؟ ( اهنيه انا فزيت من الخوف..انجلب احمد انسان ثاني..و اتعقدن حياته..شكله ايخوف)..
يلست عالكرسي بهدوء...و انا اشوف احمد كل ما يحط العدسه في عينه..اتطيح..و كل شوي يتأفف..اعرف انه احمد تقريبا مايشوف وتنعدم الرؤيه عنده مندون عدسات او نظاره)
لطيفه: انته ما يبت غيرهن؟؟
احمد: لا نسيتهن فالثلاجه فالبيت...
لطيفه: انزين مب مشكله..فجهن..و لبس النظارات..و اليوم الصبح ان شالله خذ غيرهن من الصيدليه..
احمد و هو ايحرك ايدينه بعصبيه: اقووووولج ما شووووف مندووونهن!!!!!
بصراحه حسيت جنه جب ماي بارد على ويهي..انزين انا شوه ذنبي؟؟!!! مادري شوه استوابه..من قص شعريه و هو منجلب..انا مالي خص...انته اللي عرضت خدماتك!!!
أحمد و هو متلوم: مادري..مادري شوه ياني..(و قام احمد ايدور سويج السياره)..انا بسير ادور اي صيدليه مناوبه و بسير ادورلي عدسات..و طلع بكل هدوووء!!!!
++ مسكت راسي بين يديني..وانا افكر باللي استوا...متأكده اني ما سويت شي غلط..وانا ماقلتله مسكني..كنت متأكده انه كان متوتر بسبت لمسته لي انا..بس انا حرمته؟؟ ولا انا غلطانه..بيأدبني عشان هو ارتبك يوم لمسني؟؟!!!و الله غريبه...طلعت اغراضي من الشنطه..يالله شوه هالقمصان النوم هاذي؟؟؟ مستحيل البس واحد منهن..استحي!!! المشكله انه كل واحد اخس عن الثاني..و الحل يعني..من القهر سحبت اي واحد...دشيت الحمام..تسبحت..و تعمدت اتأخر..خله ينلطع برا..هاذا اذا كان رجع..نشفت شعريه بالسيشوار..حطيت جحال من داخل بس..و جلوس طبيعي..لبست الروب و حلفت اني ما عقه..
مايا..احسن..طلعت السياده اللي كانت وضحا اختيه تصر اني احطها و انا اقولها لا..ما شالله طلعت الياهل افهم عني..صليت..
بصراحه ما عرفت شوه اسوي؟؟؟ احمد وايد اتأخر..و انا خايفه عليه لانه حالته ما كانت طبيعيه يوم طلع..طلعت الصاله..لقيت سله فروت..خذت لي عنب و يلست آكل..شغلت التلفزيون..ويلست على الكنبه اللي فالصاله..اللي اعرفه انه الصبح طلع..وانا مليت من الانتظار..و كنت متأكده اني طلوع احمد و عدم رجعته..مجرد انذار للي بتكون عليه حياتنا اليايه..غفيت و انا الخوف يقطع قلبي..و الوساس تزدحم في مخي..معقوله بهالحركه ايبينلي انه ما يباني؟؟؟!!! ما عندي شك في هالشي..كل مخاوفيه طلعت للأسف في محلها!!!!...آآآآآآه يا أحمد....آآآآآآه....
مسموح مالك فالهوا ذم.. لو شفتني عقبك أعاني..ما ينجبر قلب على قلب ولا يستوي العاشق أناني
________________________________________
"""الجزء الثامن عشر"""
يا خسارة حبنا فيكم حرام..و اتضحلي معدنك على العموم..ما على شوقك و لا حبك ملام..و الملامه على قلبي ألوم
فجيت عيوني..وين أنا؟؟..شوه هالمكان..و شوي شوي ردت لي الذاكره..هيه صح انا لطيفه..العروس..في دبي..في شهر العسل مع ريلي..ريلي؟؟..يالله حاسّه براسي بينفجر..قمت شوي شوي..انتبهت اني في لحاف مغطني..من وين؟؟ انا رقدت عالكنبه بس..أه اتذكرت..أكيد أحمد اللي لحفني..أتذكرت أنه أحمد طلع زعلان..و أنا كنت أترياه فالصاله..قمت بسرعه بشوف احمد اذا رجع بسلامه ولا لا ؟؟ لاني كنت متخبله من الخوف عليه..دخلت الغرفه فاضيه؟؟!!! الحمام..ماحد..وينه؟؟ طلعت الصاله و انا ريولي تسحبني..سحاب..مت من الخوف..اعصابي تشنجن..قطعت الصاله في خطوتين..وقفت على باب الغرفه الثانيه..و شفته..راقد..
في هاذيج اللحظه..حسيت بقلبي وصل حلجي..الحمدلله انه ردّ و بخير..ساندت راسي على باب الغرفه و تنهدت..و رفعت راسي أدقق فيه من بعيد..راقد في سابع نووومه..و مب سيده بعد بشكل عرضي ريوله في طرف و راسه في طرف..و ماسك المخده ولاوي عليها..ضحكت..في هاللحظه دق تيلفون احمد..بصراحه فزيت..تميت اطالع احمد الراقد و الموبايل اللي يرّن..ترددت..ما عرفت شوه اسوي..بس دافع من الغيره خلاني اسير و اتقرب من الكوميدينه..و اشوف منوه اللي متصل..ارتحت يوم شفت الاسم " الوالده الغاليه"..الحمدلله..كل شي يبدا صح ينتهي صح..ما حبيت ارد عليها..لانه احمد راقد..يوم بيقوم بنكلمهم..بس فجأه..
قام أحمد من النوم و اصطلب في يلسته..عيونه حمر!! و الشعر غادي كشه!! بصراحه شكله ايضحك..بس رغم جيه..كنت بموت من الخوف..اتركزت نظره احمد عليه خمس دقايق..و انا حاطه ايديني على صدري..متهوّبه منه..بعدين اكتشفت انه دهمان و مب في وعيه..
لطيفه و عشان اطمنه: ماحد متصل..هاذي عمتيه..برايك احمد اذا بترقد..
و طلعت اركض..ألتفت مره اخيره صوبه و انا عند الباب..لقيته راقد..و اتنفست..رجعت الغرفه..غرفتيه..ولا غرفتنا؟؟ ماريد اكون متشائمه..و ابرر لاحمد انه كان يبا يهدي الوضع..و دامنا معاريس..الوقت طويل جدامنا..
دخلت الغرفه شفت الساعه انها 11 الا ربع الضحا..يالله يادوب اتسبح عشان ألحق على صلاة اليمعه..طلعت اتعدلت عدول بسيط..و لبست تايير و قميص فيروزي و وردي..و قمت و شغلت التلفزيون على خطبة الجمعه و تعمدت اطول على الصلاه..عشان ايقوم احمد..لاني بصراحه استحي اوعيه..اول ما خلصت الخطبه قمت و صليت..طلعت و كلت تفاحه..بصراحه ماعرف شوه اسوي؟؟ اوعيه؟؟ولا اخليه راقد لانه اكيد تعبان بما انه ما رجع الفندق الا بعد الساعه ثمان الصبح..خذتلي تفاحه و يلست آكلها و شغلت التلفزيون على مسلسل مصري..خطف الوقت..طلعت لقطه من المسلسل..الحماة اتدق على العروس واتقولها " صباحيه مباركه يا عروسه"..اما انا فدار في بالي هالسؤال..اي صباحيه؟؟و اي مباركه؟؟ مادري ليش احساسي ايقولي انه في شي بيصير...متأكده..تعوذت من بليس..و رحت الغرفه..يلست عالشبريه و يلست افكر..مادري ليش الشكوك بتاكلي فوادي..حطيت المخده على طرف و انسدحت..شغلت التلفزيون اللي فالغرفه..حطيت على فيروز و هي اتغني اغنيتها..
" صباح و مسا..شي ما بينتسا..تركت الحب و اخذت الاسى..شو بدي دور لشو عم دور على غيروه..في ناس كتير لكن بيصير مافي غيرو..حبيبي منيح لشو التجريح تعب مني..انا اللي كنت ما بفهم بنت حمل عني"
ما حسيت بعمري ولا انا في سابع نوومه..بعد فتره حسيت بثقل على الشبريه..و اسم لطيفه يتردد في أذني..فجيت عيوني شوي شوي..شفت أحمد يالس على طرف الشبريه..و ماسك خصله من شعريه و ايمطها و في نفس الوقت يزقرني بأسمي..بس بصراحه كنت في قمة التعب..و مالي نفس اقوم..طاحت عيني على الساعه كانت الساعه اربع العصر..قمت..شوه تتوقعون سويت؟؟ لفيت الصوب الثاني من الشبريه و اتلحفت و غطيت راسي و كملت رقادي...
أحمد: لطوف شوه هاذا بسج من الرقاد...
لا جواب...
أحمد: لطفين...همباه..بس عاااد...أذن صلاة العصر الحين..
ما شي جواب..
أحمد: اوكي اوكي..ارقدي الين ما يقيم الصلاه.. بس عقب بتنشين غصب عن خشمج..
+++ بصراحه..الدفاع خير وسيله للهجوم..ألحين هيه راقده..برايها يا أحمد كل ما كانت راقده كل ما خطف الوقت و كل ما سهلت المهمه..مادري بشوه حسيت البارحه؟؟ اول مره احس بأعصابي اتخوني..خفت لا أغلط غلطه أندم عليها طول حياتي..لازم ارسم الحدود من البدايه..عشان اقدر اسيطر على اعصابي..لطيفه مالي نصيب فيها..و البعد الحل الافضل لي انا قبل لا يكون لها هيه..الحين المفروض اكسب ثقتها فيني..عشان ترتاح اعصابها..وبعدين انهي كل شي..يا ترا بقدر انهي كل شي؟؟!!! ولا برتبك و بطيح في في فخ ما عملت حسابه من الاساس..مادري بشوه حسيت البارحه..نسيت نفسي..و نسيت اللي صار..و ما عرفت حد في هالدنيا غيرها هيه..ل..ط..ي..ف..ه..آخ يا لطيفه..كنتي بتوديني في داهيه..و الحمدلله اني قدرت ابتعد عنج فالوقت المناسب..مادري اذا سالفت العدسات عدّت عليها..و صدقتني ولا لا ؟؟ العدسات كانن اصلا فالسياره..و ما في داعي اني أكبر الموضوع..بس كان لازم اسوي اللي سويته..لانها بمجرد ما خافت مني..قدرت أبتعد..و قدرت تبتعد..طلعت ما عرف وين اسير..سرت الكورنيش..اللي عدال جبرة السمج اللي في دبي..معرس وواقف ايراقب مراكب الصيد..و الله حاله؟؟!! تعمدت أبتعد..أتأخر..عشان إذا رديت اتكون راقده..و أهدي اللعب..كل شي في وقته حلو..
أحسن شي..يوم أكون انا راقد اتكون هيه واعيه..و يوم اتكون هيه راقده أنا واعي..طلبت سندويجات و كرواسون من تحت..و طلعت الأكل و يلست فالبلكونه..أفكر بأحسن حل للنهايه من دون لا أجرح لطيفه..لانها والله العظيم غاليه على قلبي..حسيت بنوع من الحركه..لفيت صوب الصاله..شفتها طالعه..لافه شعرها على فوق..ولابسه بدي أحمر نص كم..و تنوره سودا مورّشه..ولابسه مثل الاسكارف البسيط من نفس لون التنوره مغطيتبه شعرها..سكت ما زقرتها بشوفها شوه أتسوي..أول شي سارت غرفتيه..بس طلعت بسرعه..لمحت انها سارت الين الكونسول اللي عدال الباب..و مسكت السويج..شكلها تتأكد اذا انا موجود ولا لا..ههه..معقولة تولهت..بس عقب و هيه لافه صوب حجرتها لمحتني..تمت واقفه خمس دقايق و عينها في عيني..ابتسمت لها..بس ما ردت الابتسامه بالعكس سارت الحجره..شوه ياها؟؟؟!!!
أحمد: لطفـــــــــــــــــــــــــــــــــين...
طلعت لطيفه من الغرفه و اتساندت على الباب..و بكل بروده: لبيه..
أحمد: لبيتي حايّه..تعالي وين بتسيرين؟
لطيفه: ليش شي في خاطرك؟
أحمد: هيه...تعالي يلسي اهنيه عندي..
+++شفتها و بعد تردد تمشي صوبي..و الله العظيم حسيت انه قلبي طاح بين ريولي..وين بتصّبر و هي اهنيه عندي في نفس الحجره..في نفس القلب..و تجري شرا الحما في مجرا شراييني..ابتسمت..عن لا تشوفني متصنم و مبهت فيها..ماريدها اتعرف بشوه احس صوبها..ما باها اتحس انه قلبي يرقص و هي تمشي بكل هدوء صوبي..ما باها تشوف شوقي لها و هو يغالب عيني وانا اناظرها..
لطيفه و هيه اتحط ايدينها على خصرها: ادريبك تتطنز...
أحمد: اطنز؟؟!!! على شووه؟
لطيفه: على مشيتيه...لا تلومنيه من زمان ما لبست كعب عشره سانتي..
أحمد: هههههههه...و الله شكلج ايضحك..اتقولين عصفور ضاربنه القريفص..
لطيفه: بدينا؟؟!!! خلني ساكته لا اقول الفضااايح...
أحمد: أي فضايح..؟؟!!!
لطيفه: ماشي..
أحمد: و الله يا تقولين؟؟؟
لطيفه: مااااااااابقووووووووول...
+++ لا اراديا..مديت ايدي و مسكتها من زندها..و بما انها لابسه نص كم حسيتبها مستحيه..ويهها محمر..ناقص انا توتر..سحبت ايدي..ولفيت الصوب الثاني بسرعه..اتحركت الين الحاجز مال البلكونه..و خذت صلب زقارا وولعته بعصبيه..
لطيفه: بسير اييب قميص ألبسه..أخاف حد ايشوفنيه..
أحمد: تعالي تعالي ماحد ساكن عدالنا..اذا تبين عصير بتلقين فالثلاجه...
لطيفه: و انته شوه تشرب؟
أحمد: انا طلبت تركش..بس شكلها بردت..بتلقين كرواسون بعد فالصاله..
+++ سارت و هيه مستحيه..بس ردت مره ثانيه و في ايدها صحن الكرواسون..يلست بس لفت السكارف على ايديها اتغطينهن عني..حركاتها..توترها..مستحاها..يالله كم يسوا..تميت اراقبها و هي اتقطع الكرواسون و هي تاكله..و كل ما طيح عيني في عينها اتوخي تحت..
لطيفه: رديت على الدواخه؟
أحمد: مادري..من يومين بس..
لطيفه: أها..
أحمد: اتريح الاعصاب..اتساندت على الحاجز و لفيت صوبها..ما تبينا نطلع؟
لطيفه: على راحتك..أشوفك معقد حياتك..لايكون زعلت..
أحمد: مايرزا زعل..ما تبين اتقولين كيفج..
لطيفه: ماشي...بس..بس شفتك و انته دهمان..
أحمد: في ذمتج؟!!!
لطيفه: هيه...و شوه قلت كلاااااااااااااااااااااااااام...تخرفيت على أصوول..هههههههه
أحمد: و الله يا تقولين شوه قلت؟؟!!!
لطيفه: أسرار أسرار...بس فطست من الضحك على شكلك...بسم الله عيونك حمر..و كشتك..ما تقول الا هاذا لاعب العين الغزال الاسمر أحمد عبدالله ايام السبعينيات...ههههه..ههههههههههههههه...و الله انه بطني عورني من الضحك...
أحمد: خلي عنج..أدري بعمري اني حليو...يونها يونها خافت..بوسي ايديج ايد و ظهر اني انا انا(و أيأشر على صدره) ريلج..
لطيفه: أحمد ربي ألف و اشكره انك أنته أنته ريلي..ههههههههههههه
أحمد: لا و الله علموج التنكيت انتي بعد..ما شفتي عمرج مصورنج فالموبايل و انتي راقده..خليته التخرفيت حقج انتي طويلة العمر...ألفتي قصص...
لطيفه: لاه...خل عنك...
أحمد: اسميج اتناخرين...عووووذ بالله...الحمدلله اني ما رقدت عدالج البارحه..
لطيفه: عاااااد أنا اناخر؟؟!!! هاي أكبر جذبه..قول أهاذي هيه..بس اناخر no way.
أحمد: شفتج ولا لا؟؟!!!!
لطيفه: انزين روني يالله ؟؟
أحمد: تحلمين...يالله يالله سيري لبسي عباتج...بسرعه بنسير انتحوط في ربوع دبي..
لطيفه: ان شالله ...بس بليز..يوم ترقد حط جل على راسك..عن لا تخوفني مره ثانيه...هههههههههه
أحمد: هاهاهاي...ضحكتيني...اصلا انا شعريه حلو..خلي عنج..
لطيفه: ههههههههههههههههههههههههههههه...ماروم ماروم اتخيلك اخاف ما ييني الرقاد اليوم من الخوف..هههههههههههههههه...
أحمد: بس عاد ما يرزا كل هالضحك.....
لطيفه: ههههههههههه....أي أي ...ههههههه...بطني يعورني..من ...ههههه...الضحك...
+++ بصراحه قهرتني..يونها تضحك على شكليه..لا و المشكله انها ميته من الضحك..قمت و حطيت ايديني على رقبتها تهديد على مزح...
أحمد: بتسكتين ولا؟؟؟؟؟
لطيفه: ههه...هههههههههه....
أحمد: همباه!!!!!!! بس عاااد...شوه شاربه انتي..ياخوفيه حاطيلج شي فالعصير...
++ أول ما سمعته ينطق بهالكلمه...همباه..حسيته طعني فقلبي..همباة باكستان؟؟!!! فجيت عيوني..و شليت ايديه عن حلجي..وانا حاسه بغصه تخنقني..." ماباها بنت الباكستانيه" اوووف..كلماته اترن في قلبي..
لطيفه و بضيق: فجني احمد...
أحمد: ليش لطفين...زعلتي؟؟
لطيفه وويها متعفس: لا....فجني ابا اسير الحجره..
أحمد: لطوف شياج؟؟!!
لطيفه: ما شي ما تباني اسير البس عباتي؟؟؟
أحمد: اوكي بس لا تتأخرين...
++ سرت الغرفه الثانيه..و مسكت راسي بين ايديني..و يلست ادقق فالمنظره..ليش ألحين بالذات أتذكرت الماضي الاسود..مب لازم انسا كل شي..لطوف الكل ايقول انه احمد لو ما يباج لانه امج باكستانيه ما بياخذج..صح ولا لا ؟؟ عوذ بالله من الشيطان..غسلت ويهي..حطيت اي شادو..و جلوس..و طلعت..لقيت أحمد يالس يلبس العقال جدام الكونسول..
أحمد: زاهبه؟
لطيفه: هيه..
++ نزلنا و طلعنا نتحوط..ما خلينا مكان ما سرناله..بس لانه زحمه ما نزلنا..عالساعه9..بصراحه كنت بنتحر من اليوع بس مستحيه اقوله..
أحمد: شوه الراي لطيفه...انرد الفندق..عشان الصلاه و بعدين نطلع نتعشا..
لطيفه: مادري..انا بصراحه يوعانه..و اذا سرنا نتعشا..ما بنرد الين نص الليل من الزحمه و اخاف تفوتنا الصلاه..
أحمد: انزين وين بنلقا مسيد الحين..
لطيفه: انا شفت مسيد ورا متحف دبي..جنه من الشمال..
++ اول ما وصلنا المسيد..قالي احمد ادخل قسم الحريم و يوم بيخلص بيخطف عليه..دشيت..و بالفعل بديت الصلاه و كانن عدالي كمن حرمه..فالبدايه كان كل شي عادي..بس بعدين بدوا ايقولون كلام ما فهمته..و شوي صلاتهم غير..ألتفتت اشوف الحرمه اللي عدالي شفتها عادي..أما انا بصراحه اتوترت..سلمت على طول و طلعت..يلست اتريا أحمد..بس اصلا الصلاه ما خلصت..و عقب شوي انه احمد طالع..
أحمد: تقبل الله..
لطيفه: أي تقبل أصلا قول صليتي؟؟
أحمد: ليش ما صليتي...
لطيفه: مادري صلاتهم غير..و عندهم حصا و مادري شوووه؟؟ ما رمت اصلي..
أحمد: ههههههههههههه....يالديايه..مسيد شيعه هاذا..
لطيفه: في ذمتك!!! ياويلنا
أحمد: من شوه ياويلج...الشيعه ما ياكلون..ناس مسلمين حالهم حالنا..
لطيفه: لا تقولي صليت وياهم؟؟!!! ياويلي جان ريلي و استوا شيعي..
أحمد: هههههههههه...هيه صليت وياهم..ههههههه..لطافي...تراهم مسلمين مب هندوس..و دبي متروسه شيعه..مستحيل نلقى مسيد سني بالسهوله..سيري سيري الله يهديج سيري داخل صلي و بترياج..
لطيفه: هزرك؟؟!!!
أحمد: سيري...يالله بترياج..ما ياكلون تراهم..
لطيفه: اوكي..
++ أول ما وصلت باب المسيد..
أحمد: اذا كلوج..انا مالي خص...
في هاللحظه ركضت صوووبه من الخوف...
أحمد و هو فطسان من الضحك: اسميج لعبه...خوااافه..هههههه...سيري..
لطيفه: خيبتيه اسير...يوم اوصل اهناك اتخوفني..مب سايرة..ردني الفندق...هيه هيه اضحك شعليك..
أحمد: هههه..وو...وووالل...هههه..و الله انج مقصه..ههههههههه...
لطيفه: طالعوا!!!!!! أقوله ماصليت و يضحك عليه....أحماااااد...شوه اسوي الحين؟؟؟
أحمد: ههههه...انسير يالله..انسير بندورلج مكان ثاني اتصلين فيه..
++ طلعنا و تمشينا الين ما وصلنا واحد من المسايد..دشيت و صليت و طلعت..رحنا اتعشينا في مطعم صيني و جيه تقريبا الساعه 12 و نص ردينا الفندق..لا إردايا دش كل واحد غرفته..اتسبحت و طلعت..لقيت أحمد يالس فالصاله و ايجلب فالتلفزيون..
أحمد: نعيما..
لطيفه: الله ينعم عليك..شوه اتشوف؟
أحمد: تعالي بنتابع هالفلم وايد حلو...ايسلمن عليج ضبوب و فطيم..و امايه..
لطيفه: الله يسلمهن من الشر..مارمسناهم..!!!
أحمد: كل ما يسون يا تكونين راقده يا تتسبحين...ايقوللج ابوج حاشر الدنيا يباج اتكلمينه..
لطيفه: ما عليه..
أحمد: تبين اتكلمينهم الحين قبل لا يبدا الفلم...بتلقين الموبايل فالجرج داخل حجرتيه..
لطيفه: بكلم البنات لانه ابويه اكيد بيكون راقد الحين..
++ رحت غرفة احمد..غرفته!!!..لا تعليق..كلمت البنات و سولفت وياهن..و رديت مره ثانيه الصاله..لقيت احمد حاط كل الكوشنات على الارض و منسدح..استحيت اخليه بروحه يالس تحت..رحت و يلست عداله..عالساعه ثلاث الفير..
أحمد: لطفين...انا بصراحه يوعان..انتي؟
لطيفه: مادري,,
أحمد: انا بطلب سندويجات و عصير..شي عصير معيّن في خاطرج؟
لطيفه: ابا هوت شوكليت..
أحمد: اوكي...
++ كلنا عالساعه اربع و نص الفير خلص الفلم و اذن الفير..قمت و صليت..و رحت سيده الشبريه..ما شفت أحمد اذا يبا شي قبل لا يرقد..برايه احسن يوم هو حتا الصلاه ما يصليها في حجرتيه ولا يرقد عندي ليش اكلف على عمري و اشوف متا بينام؟؟!!..شوه فيه؟؟!! ليش جيه يعاملني..؟؟!! عالساعه ثلاث الظهر بالباجر قمت..تسبحت و لبست فستان وردي فاتح له ربطه على العنق..و فجيت شعريه و حطيت له طوق قماشي من نفس لون القطعه..قعدت جدام التواليت و يلست احط ميكب اب..ما حسيت الا أحمد داش فجأه و هو متسبح و مب لابس الا فوطه على جسمه..اول شي شهقت من الخوف..
أحمد و هو رافع ايديه جدام جسمه: سووووري لطووف سوري..بس نسيت شنطتيه اهنيه..ووو...اتحريتج راقده..!!!
لطيفه:أأأأ...عااادي..برايك خذ راحتك انا بسير الحمام لان..لان الاضاءه اقوا..
++ بصراحه...الوضع اكثر من عادي..بس لانه هو مرتبك ربكني وياه..اوكي نسا شنطته في حجرتيه شوه فيها؟؟!!! ليش سوري؟؟!! و اعتذارات ما اعتذارات..دخلت الحمام و خليت نفسيه يهدا..عطيته ربع ساعه..
أحمد: بس لطفين..هالكثر بتحبسين عمرج فالحمام؟؟!!!
لطيفه: لا بس اعدل الميكب اب...
أحمد: يالله تلبسي بنطلع اوكي؟
لطيفه: اوكي..
++ طلعنا..ولا حد تكلم فينا..ما قدرت احط عيني في عينه..فالسياره مشغل المسجل و هدوء..احسه مرتبك..و اذا كلمته ياخذ دقايق قبل لا يرد..و الله العظيم كل دقيقه اتمر ما عرف كيف اتعامل معاه..وقفنا جدام فندق ميناء السلام..
أحمد: جنه اليوم الجو مغيم؟؟
لطيفه: هيه..شلكه بيصب مطر..
أحمد: دووم جونا غريب فالصيف!! يالله انحول..بنتغدا اهنيه..
لطيفه: تمام..
++ نزلنا و مشيت عدال احمد..اللي لا اراديا مسك ايدي..مشينا وهو كل شوي ايرويني المباني اللي فالفندق اللي كان مبناي على بحيره صغيره و عشان نوصل المطعم لازم نركب فالبجي(المركب الصغير)..بس انا عندي خووف غير طبيعي من الماي..و مستحيل اركب البجي..
لطيفه:أأأ..أحمد..انسير من طريق ثاني..
أحمد: ليش؟
لطيفه: بس...ماحب الماي واايد
أحمد: تعالي تعالي انا بمسكج ما بتطيحين...
لطيفه: لا لا ..مادري..ما شي...
أحمد: شوه ايخوف الماي..تعالي لا تفويتنها..الجو حلو..تعالي بناخذ لفه و بعدين بنسير المطعم..
لطيفه:أخاف اطيح..
أحمد: اوكي يعني اشلج عادي؟؟!
لطيفه: لا لا لا ..خلاص خلاص بركب..
++ بس و الله العظيم عندي عقده من الماي..كل ما شوف البجي و اريد اركب فيه اتخيله ايروح و اطيح انا..
أحمد: لطفين...ما يرزا هالكثر...اذا ما تبين خلاص بنسير..
لطيفه: لا ..خلاص..انزين انته تعال لا تسير بعيد عشان اذا طحت تمسكني..
أحمد: أييج الشور..تعالي تعالي..
++ قام أحمد و مسكني من خصريه بإيديه الثنتين..و ما حسيت بعمري الا فالقارب..
أحمد: هاه شي استوا عليج؟؟
لطيفه..هي استوت وايد اشياء بس أنته لا حاس ولا داري بشي..آآآه يا أحمد..البعد عنك عذاب..و القرب أشد تعذيب..لمسته..بسمته..رنة صوته..يا ربي..شوه اسوي..مب لازم العذاب ينتهي..خذنا لفة على الفندق اللي كان روعه بتصميمه التراثي..تغدينا و طلعنا..تمينا انلف..خطفنا على الباسكن روبنز خذنا ايس كريم و ردينا انكمل حواطه..عالساعه خمس العصر...
أحمد: وين الحين؟
لطيفه: اي مكان..بس ابغي انزل..
أحمد: المشكله انه كل ما نوقف ناكل..ناكل..انتفخنا..
لطيفه: هههههههه...خلاص انزين انسير اي مكان انشم هوا فيه..
أحمد: بوديج مقها جيه فهالهواء الطلق..فالبالم ستريب..
لطيفه: هيه بس اخافه زحمه...
أحمد: اذا على الزحمه فهو زحمه..بس ما عليج كله اجااااانب ولا عربي واحد..
لطيفه: تمام..
أحمد: فخاطريه جيه اتسبح..
++ رحنا البالم ستريب فجميرا..و رحنا الكوفي شربنا كابوتشينو..و نزلنا البحر..يا ربي ما حب البحر..عقده نفسيه بس استحي اقوله لا ماريد..رحنا محل فالبالم ستريب و خذ له احمد لبس..سار احمد يتسبح شوي اما انا فيلست على كرسي ويلست اشوفه..كله اجانب..عطاني احمد النظاره الشمسيه مالته قمت و لبستها..بس جيه..ما عرف ليش..أريد احس اني اعيش هالواقع..مب خيال..انا و احمد..و هالدنيا تجمعنا في لحظاتها..شفت أحمد ياي يركض صوبي و هو يقطر من الماي..ما حبيت احط عيني على جسمه..خليت عمري يوني اعدل الجوتي مالي..
أحمد: لطفين...طالبنج..
لطيفه: عيوني..لك(مادري كيف طلعت..المهم انها طلعت)
أحمد: حجزت جت سكي و اباج تركبين...
لطيفه و هي فاجه حلجها: أأ...جت...سكي..شوه يعني؟؟
أحمد و هو يمسك لطيفه من ايدها: يالله يالله قبل لا ايي المغرب..قومي انا بركب و انتي ورايه..
لطيفه: وين؟
أحمد: وين يعني فالشارع؟؟!!! فالبحر يعني وين..
لطيفه: لا لا ..برايك انته سر و انا بيلس اشوفك..
أحمد: أفا و هاذا و انا طالبنج..
لطيفه: أحمد انا ماداني البحر وايد..و تلوع جبدي منه..
أحمد: اوكي قومي عقي عباتج محد اهنيه كلهم انجليز..و جربي اذا ما عيبج بنردها..
++ قمت و بعد تردد..ركب احمد على الجت سكي..و انا حاطه ايدي على قلبي..ركبت وراه..اتحجبت زين..و رفعت فستاني شوي لا يتوصخ..ما طلع الا ريولي بس..
أحمد: لطوف..تمسكي زين..
لطيفه: يالله..
++ مشينا اول شي شوي شوي..و انا طول الوقت مغمضه عيوني..بس بعدين قام يسرع..الجو بصراحه كان رهيب..و أهم شي انه ما دش فالبحر داخل عالشاطي بس...
لطيفه: حمااااااااااااااااادي...الله يخليك لا لا ..لا تسرع..و الله...وااااااي...أحمد بتيني سكته قلبيه...
أحمد و هو فطسان من الضحك: تمسكي تمسكي زين لا انطيح...
لطيفه: حماااااااادي...خااااف ربك..حح..احمدوووووه...فديت رووووحك..و رررفجه..ردد..ردني..
أحمد: اوكي اوكي...
++ رجعنا وقفنا على الشاطي..و نزلت و انا امشي شوي يمين شوي يسار..و جبدي لايعه على الاخير..ما صدقت اوصل الكرسي و ايلس عليه..و اخذ نفس..لا و اللي قاهرني انه احمد ما وقف من الضحك..
أحمد: لطفين طريتيلي ذنيه من الصريخ..بس شووه روعه لاه؟؟ جان ما خذلي بيت اهنيه في جميرا...
لطيفه: مستانس..شعليك..الا انا..أخ يا قلبي..صدق يوم قالوا الروح غاليه..لو حد شافنا من الاهل بيفضحنا بيقول ينّوا المعاريس..
صخ أحمد و تم ايطالعني بنظره: من حقنا معاريس..ولا بيتمون ايحاسبونا بعد! و الحمدلله ما سوينا شي منكر انتي مستوره بلبسج..و ما حد اهنيه عربي ينقدنا..بس بصراحه اكتشفت انج خوافه..
++و رد احمد يضحك ضحك..شوه اللي مستوي الا ناكل و نضحك..ناكل و نضحك..اوكي اوكي مخلني مطنزه..رديت راسي على ورا و غمضت عيوني..و خذت نفس عميق..و ما تكلمت..بصراحه حاسه بعظامي ايعورني..و ايديني يرتجفن..
أحمد: لطافي...لطافي...؟؟
++ ما بغيت ارد عليه بشوف شوه ايسوي..!!؟؟
أحمد و هو حاط ايده على ايدي: لطفين..شوه بلاج؟؟؟ شي ايعورج؟؟!!
++ حسيتبه يتقرب مني..و وويه متقرب من ويهي لدرجه اني احس بنفسه على خدودي..و هو كل يشوف يمسك ويهي و ايهزه..و من نبرة صوته بصراحه حسيت انه صدّق المقلب و صدق خاااااااف..
أحمد: غربلات العدوووو...شوه سويت بها..الله يعلنها حاله..لطوف..بشوه اتحسين الحين..تبين اتزوعين؟؟!! دايخه؟؟!!! ردي عليه!!!! لطوف..لو كلمه انزين..ولا هزي راسج..كله مني انا وين ابا رابعبج البحر!!!!
++ بصراحه كسر خاطريه و هو ميت من الخوف و ايرمسني..فجأه فجيت عيوني..و نقعت من الضحك..
لطيفه:بوووو..صدقت انته؟؟!!! ما بلاني شي..هههههههههههه...ههههههههه...امزح وياك..ههههههههه
أحمد: شوه؟؟!!! اتقصين عليه؟؟!!!!
لطيفه و انا ما روم اقول حرفين من الضحك: واااااي..بطني...ههههههه...مم..منو...منوه المقصه الحين؟؟!!
أحمد و برد فعل سريع..قرصني في غزي: و الله و الله يان عدتيها مره ثانيه...لا تلومين الا نفسج..
ما قدرت ارد عليه لاني خلاص مت مت مت من الضحك..و هو يالس يقرص عادي عنده..
لطيفه: ههههه...أأأأأأأي...ههههههاي...بس ايعور..اي
أحمد: دواج...ايعوّر؟؟!!! بتعيدينها؟؟!!! قولي تووووووبه؟؟ قولي؟؟
لطيفه: أي أي...ههههههههههههههه...هههههههههه
أحمد: طالعوا؟؟!!! أص أص لا تضحكين...لطافي..يالسباله...تراني بزيد
لطيفه: توووووووووووووووووووبه...أخ..هههههههههه...بس بصراحه الجت سكي روووعه..
أحمد: هيه روعه..عقب ما شليتي الدنيا بصريخج...الحمدلله انهم اجانب بس..يالله قومي بنسير ميركاتو
لطيفه: بعدني؟؟!!! لا لا بس اريد ارد الفندق التايير كله خايس ماي..
أحمد: لا لا ما شي بنسير السينما انا من الظهر حاجز..لانا باجر بنروح..
لطيفه و بدهشه: وين بنسير..بنرد العين؟؟!!!
أحمد: هيه بنرد العين مليت منج؟؟!!!
لطيفه: هاه؟؟!! سوري أحمد بس كنت امزح وياك...
أحمد: ريال بو سبع و عشرين تلعب عليه هالاشكال؟؟!!! هاذا اللي ياخذ يهال...
لطيفه: أحمد...ما..ما...و الله اني ما كنت اقصد و الله اني كنت امزح..
أحمد: يالله يالله..انسير..
++ لبست عباتي وانا التايير مالي كله ماي..ركبت السياره بهدوء..مليت منج؟؟!! بصراحه حسيتبها طعنه في قلبي..ليش؟؟!! انته اصلا متقبلني بالاساس؟؟!!! و بعدين كلمة ياهل وايد قوية الصراحه..لهدرجه انا صغيره في عينه..ما قدرت استوعب الصدمه..ما حسيت الا احمد واقف جدام البالم ستريب مره ثانيه..
أحمد: يالله لطوف انزلي بناخذلج لبس..
++ ما عارضته..ما قدرت اتكلم اصلا..نزلنا بوتيك اسكادا و خذتلي لبسه بسرعه و بدلت فالفتنج روم مالت البوتيك و طلعت..ما اقدر اتكلم..لاني لو تكلمت بصيح..رحنا ميركاتو و دشينا السينما..فلم محمود سعد عوكل..رغم انه الفلم كان يجتل من الضحك..و هاذا اللي باين على احمد..الا اني كنت اعد الدقايق اللي برد فيهن للفندق..لاني و ببساطه..بموت من الحزن..ردينا الفندق عالساعه 11 و نص تسبحت و قعدت فالغرفه ما حبيت اطلع..و في لحظه يلست على الشبريه و انفجرت بالصياح..ألين ما فرغت اللي بصدري..شوه هالحاله هاذي؟؟ ألحين هو زعل من الموقف اللي سويته؟؟!! ولا هو بالاساس ايدور سبب عشان يزعل!! نحن معرسين..ولا سايرين في رحله على اساس نتعرف على بعض..ضايعه..و تايهه..و متلخبطه..اريد ارد البيت..اريد اهليه و ناسي..ما ريد اعيش ويا واحد ماعرف نحن معاريس ولا خوان..و أحمد كل ما ييله ايأزم الوضع بينا..اريد اعرف نحن شوه؟؟!! عشان اعرف اتعامل معاه؟؟!!! ألتفت صوب الباب..لاني اعرفه انه موجود..حبي يعلن عن وجوده حتا لو ما تلكم..لانه ببساطه قلبي يدق..و مخي يدور..و شراييني تتفجر من مجرد وجوده..
أحمد: لطيفه..ما تبين عشا؟؟
مسحت دموعي بسرعه: لا....كلت وايد اليوم..تعشيت انته؟
أحمد: لا ....لا...كنت اترياج..ما...ماعرف اتعشا بدونج..!!!
++ شفته يمشي صوبي..نظرته؟؟!! مرتبك؟؟!! يمكن...يلس عدالي على الشبريه..عرفت انه هاللحظه صعبه عليه..
أحمد و هو يمسك ايدي: لطيفه..
لطيفه: لبيه الغالي..( مادري كيف طلعت..بس لازم تطلع..اذا صدق ظني و انه اللي الشخص اللي جدامي هو ريلي..فلازم اكسبه..و ابيع الدنيا كلها لاجل عينه..و مالي غالي غيره)..
أحمد: زعلانه؟؟!!
لطيفه: حد يزعل على الغالي؟؟!!!
أحمد: عيل ليش كنتي اتصيحين؟؟
لطيفه: ماشي..بس تعبانه و راسي ايعورني..
أحمد: لطيفه...مادري قهرتيني..ماعرف..لطافي..أنا...أنا..
حبيت اسهل عليه الكلام:..أنته شوه؟؟
أحمد: ماشي ماشي..و قام بسرعه..و سكر الليت..لطافي ارقدي أحسلج..و اذا بغيتي شي تراني انا اهنيه عدالج فالصاله..تصبحين على خير..
++ و سكر الليت..خلاني في ظلااااااام..شوه اللي يالس ايصير يا جماعه الخير..هل انا اعاني من انفصام شخصيه؟؟!!! ولا تهيألي انه احمد كان بيقولي شي بيغير حياتي كلها..اذا تخبلت من هالريال لا تلوموني..قولولي كيف اتعامل معاه؟؟!!!
عالساعه عشر الصبح..قمت لميت اغراضي..و تلبست..طلبت ريوق من تحت..و أنا حالفه اني لخلي هالاحمد يلين..ما بيأس منه..لاني و ببساطه و من دون تعقيد..هاذا ناظر عيوني..و حب حياتي..و اذا الله كتب انه ايكون من نصيبي..فأنا مب مستعده اخليه بعيد عني..رحت أوعيه..لقيته متسبح و يالس على الشبريه و يتكلم فالتيلفون..
لطيفه: صباح الخير..
احمد و هو ايأشرلي على المكان الفاضي من الشبريه اللي عداله..: هاذي هاذي لطيفه..ان شالله ان شالله..يالله خاليه شي في خاطرك من صوبنا..الله يسلمك..فمان الله..و عطاني أحمد السماعه,,أول ما تكلمت..حسيت بعمريه اموووووت...
حمد: يعلني هب بلا هالحس يا بنتيه...لطفين شحالج بنتيه؟؟؟
لطيفه و هي خانقتنها العبره: بخير يعل ربي يسلمك يا بويه...انا بخير شحالك انته؟؟ ربك إلا بخير؟؟
حمد: الحمدلله رب العالمين..ما نشجي باس الا فرقاج يا غناة لفواد...بنتيه..ربج مستانسه؟
لطيفه: الحمدلله يا بويه..الحمدلله..شحالها امايه عفرا و يدتيه؟؟ تولهت عليكم...
حمد: يعل اتوله عليج العوافي يا رب..بنتيه كلهم اهنيه بخير و يتخبرون عليج..الا انا حاط في خاطريه عليج..ثلاث ايام يا بنتيه ولا ترمسينيه...أفا...
لطيفه: يعلني افدا روحك يا بويه لا تقول جيه..بس..بس..مادري..ما لقيت فرصه..ما..
حمد: مسمووحه مسموحه يا بنتيه..ما تنلامين عرووووس..متا بتردون بنتيه..؟؟
++ قفطت فهمها بويه غلط!!! حسيت بويهي ينحرق جدام ابويه..و أحمد...خيبه يالفشله!!! انا قصدت اني بعدني ما تفاهمت ويا احمد ولا خذت عليه عشان ادق من تيلفونه..يا هو راقد..يا انا راقده..
لطيفه: مادري بويه ...يمكن اليو...
شفت احمد و هو ايأشرلي بحركات و ايقولي لا لا لا ...
لطيفه: مادري مادري
حمد: انزين غناتيه..شي في خاطرج؟؟؟
لطيفه: ما شي غير سلامتك يا بوسعيد...و رد السلام على هليه كلهم واحد واحد..و بالاخص يدتيه ضبابه و سلطان..تراني تولهت عليهم..
حمد: سلامن يبلغ..يالله بنتيه فمان الله..
لطيفه: الله يحفظك مع السلامه..
أحمد: اشوا ما قلتيله اليوم...
لطيفه: ليش؟
أحمد: صدقتي انتي؟؟!! اسولف وياج..بنسير الفجيره اليوم...
++ فجيت عيوني...لاه!!!! الريال ناوي ايخبلبي...ما عرفت ارد عليه...
لطيفه: الريوق...برا...ما تبا ريوق
أحمد: إذا بتريقين انتي اوكي..ولا غير لا ما شتهيه من دونج!!!!
++ لا تعليق...طلعنا و تريقنا..اذا صح انا انسميه ريوق..لانا اصلا ما كلنا كل واحد ايعلق عالثاني و هلكنا من الضحك..مادري شوه ايسمونه هاذا شهر عسل ولا شهر ضحك..
لطيفه: ألحين صدق بنسير الفجيره...
أحمد: هيه..حجزت فالهيلتون...تبينا نطلع ألحين؟؟
لطيفه: اللي يريحك...انا اغراضي كلهن حطيتهن..تباني ارتبلك شنطتك..
أحمد: لا لا ...بس بييب ثيابي من الدوبي من تحت..يالله تلبسي عباتج و انا بسير انهي الحجز و بنزل الشنط
لطيفه: ان شالله...
++ خلصنا كل شي و طلعنا من دبي سايرين صوب الفجيره..ثلاث ايام..عدن ما عرف كيف..المهم عدّن و خلاص..و الباجي على الله..بس نقطه وحده لا غير..هل هالأنسجام بيني و بين أحمد هدوء ما قبل العاصفه..ولا انا بس انسانه وسواسه..و اللي بينا علاقه طبيعيه بتاخذ مجراها مع الايام؟؟!! الجواب عند شيخ قلبي اللي يالس عدالي..قبل لا نوصل الفجيره بشوي..دق تيلفون أحمد..و رد عليه..
أحمد: مرحبا الساع..هلاأأأأأأ...بخير يعلك الخير..علوم فريجك؟..لاه؟؟ السيافي وين عيل؟؟ هيه...هيه..و الله ايسرك حالنا..ترد لطيفه عليك السلام..رب ما شر بو سيف؟؟..من شوه؟..شي مستوي؟؟ و رفجه يا عمير انك ما تغبي عني شي؟؟ حد صابه باس؟؟ عيل شوه بلاك؟؟ اوكي اوكي..يوم بوصل برمسك..رد السلام..فمان الله..
لطيفه: عمير؟
أحمد: هيه ايسلم عليج..
لطيفه: الله يسلمه من الشر..شي بلاه؟
أحمد: لاه...ما بلاه شي..بس مسوي يسلم يونه..( خفف أحمد السرعه ووقف على طرف الشارع و ألتفت صوبي)..لطيفه..
لطيفه: هلا..
أحمد: مادري,..استهميت الصراحه من هالمكالمه..ايقول ما بلاه شي ..و حلف انه ماحد صابه باس..بس مادري مب مطمئن..
لطيفه: هوه ما قالك شي؟؟
أحمد: لا
لطيفه: عيل يمكن بس مسوي ايسلم
أحمد: لا لا..أعرفه انا عمير زين..يوم فيه شي..ما يعرف يرمس..و يخرفت فالكلام..جملتين صح ما عطاني اياهن..
لطيفه: شوه قالك؟؟
أحمد: قالي يوم بتوصلون بيرد ايكلمنيه..
لطيفه: يالله ما بقا شي الحين بنوصل ان شالله...و بتتصل به و بيخوز هالخوف كله..ان شالله ان شالله انه ماحد صابه باس..
أحمد: ان شالله...
++ تحركنا شوي..و نحن داشين الفجيره..في اسواق شعبيه على طرف الشارع..اتبيع اواني فخاريه و مشغولات بالطين..وبما انه الجو بصراحه ايخبل من الغيم..وقف احمد..
أحمد: حولي لطيفه بنشوف شوه عندهم..
لطيفه: ان شالله..
++ نزلنا و تمينا نتمشا و انشوف..بصراحه الاشياء وايد حلووووه..
أحمد: شوه رايج لطيفه بهالجره؟
لطيفه: حلوه بس هاذيج البنيه احلا...
أحمد: هزرج؟؟ ان شالله و نحن رادين باخذ كميه..
لطيفه: ليش؟
أحمد: في شركه اتسوي تشجير فالبيت وايد حلو..و ايحطون جرات و شلالات فالحوش..مب احلا نزرع المساحه اللي جدام بيتنا من الغرب؟
لطيفه: هيه حلوه..لانه المساحه وايد حلوه و حرام الا متروسه كنكري
أحمد: تمام...بس انسير انشوف اللي معروضات في هاذاك الدكان شكلن احلا..
لطيفه: يالله..
++ لحقت أحمد..بس بما انه الجو فيه ريح شوي..ضربت عباتي في وحده من الجرات و طاحت و طيحت اللي عدالها كلهن و تكسرن!! وقف قلبي..و مت من الخوف..شوه سويت؟؟!! اول ما التفتت شفت الهندي يتحرطم عليه..و ايسب..و يواجعني بكل لغات العالم و انا يالسه اهديه و افهمه اني ما كنت قاصده..
لطيفه: و الله انا ما يشوف..ما في مشكله رفيق..مافي مشكله..
الهندي: كيف مافي مشكله..شوه بيع انا اليوم؟؟!! شوه هاذا..يريد فلوووس كل انتي كسر انا يريد فلوس
لطيفه: انزين بسم الله...بينعطيك فلوس فضحتنيه..صبر صبر انا بسير جيب فلوس..
الهندي: لا ما في سير...انتي يريد يشرد..ما في سير انتي دفع اول بعدين سير..
لطيفه: انزين بسم الله ...هاذاك ريال..سيم سيم انا بسير جيب فلوس حق انته
الهندي: نهي نهي نهي...انا الحين بسوي حق بوليس...يريد فلوس انتي كلش كسر..
لطيفه: حسبي الله على بليسك..قلنالك بنعطيك..شوف انته هاذاك ريال..انا ما عندي فلوس هو عنده انا بيسير بيجيب فلوس حق نته...
الهندي: نهي نهي..ما يمشي هازا كلام..خليه ريال يجي منيه انتي مافي سير..
لطيفه: فضحتنيه يعلك الفضايح..
الهندي و بصوت عالي يزقر على أحمد: ررررررررررررررفيق...أرباب..أرباب..تعال تعال منيه...
++ يا احمد و هو يمشي صوبي..و انا ألعن الهندي في خاطريه ألف مره..حرقلي ويهي جدام أحمد ألحين انا شوه بقوله..قام الهندي و خبر أحمد بالسالفه كلها..
لطيفه: أحمد الله يخليك فكنا من هالحشره..فضحني فضايح..
أحمد و هو ايكلم الهندي: أنا ما في معلوم...انا ما يعرف هاذي حرمه..اذا في مشكله كلم بوليس..
++ لطيفه و انا فاجه ثميه بكبره..شوه السالفه يتطنز احمد و الا يسوي فيني مقلب!!!!!!
لطيفه: أحمد حرام عليك؟؟
أحمد و هو ايكلم الهندي: ياخي انا ما في معلوم هاذي حرمه..انا مالي خص..ما في مسؤول انا..
الهندي: منو مسؤول؟؟
أحمد و هو ايأشر على لطيفه: هاذي مسؤول...هاذا حرمه زياده مشكله..خبر شرطه عشان يحل مشكله..انا مالي خص..انا ما في معلوم منوه هاذي ؟؟
الهندي: هي يقول هي معلوم انته؟؟
أحمد: جذاااااااااااااااااااااااابه...شوف شوف كيف زياده مشكله..انا ما في معلوم..انا ما في مسؤول..
لطيفه: أحمممممممممممممممممممماااااد..حرام عليك مب وقت مقلب هاذا...لا تفضضحني...
الهندي: الهين انا سوي حق بوليس...الهين...
لطيفه: لا لا لا لا رفيق...و الله و الله العظيم هاذا زوج مال انا؟؟؟
الهندي: قرقر..زياده بس...
لطيفه و هيه خانقتنها العبره: احمد...و راس السيافي...احمممممد...
أحمد و هو ناقع من الضحك :هههههههههههههههه...خلاص خلاص رفيق..خلاص لا تسوي حق الشرطه..خلاص كم فلوس مال هاذا؟؟؟
الهندي: بيدفع انته؟
أحمد: ههههههههههههههههههههههه..هيه هيه بيدفع
++ حاسب أحمد..و طلعنا..اول ما وصلنا الفندق..رحنا الشاليه اللي على البحر..طلبنا سندويجات..كلناهن..و صلينا المغرب..عقب الصلاه..طلعنا البلكونه و يلسنا..
أحمد: بسوي حق عمير..
لطيفه: هيه سولّه الحين..شوف شوه بلاه؟
أحمد:اووه..هاي اميّه مسويه تيلفون اللهم جعله خير..(حط احمد على السبيكر)..ألوه
بخيته: مرحبا مرحبا بويه...
أحمد: هلا امايه...شحالج؟
بخيته: بخير ربي يسلمك..شحالكم انتو؟
أحمد: ايسرج الحال..تونا واصلين الفجيره...
بخيته: هيه يا بويه..الله يحفظكم..شحالها لطيفه؟
لطيفه: بخير عمتيه الله يسلمج...شحالج انتي و شحال عربانج؟
بخيته: بخير و نعمه..ابشركم ابشركم...تراه شمسه ربت و يابت توم بنات...
أحمد: الحمدلله...حمدلله على سلامتها..
لطيفه: متا ربت عمتيه؟
بخيته: من نص ساعه..تراها تعبت من البارحه فالعنايه..و حالت البنات ضعيفه قالولنا..و سولها اليوم عميله و الحمدلله هيه بخيرو البنات بخير و نعمه..
أحمد: جادنه من ساعه مسولي عمير و هو مستهم..وينه هو ؟
بخيته: هاذوه عدالي..اندوك جان بتباركله..
عمير: مرحبا أحمد..
أحمد: هلا بو سيف..مبروك الحاسر...
عمير: الله يبارك فيك..و عقبالك ان شالله ..
أحمد: عنبوه يا ريال..الحرمه فالعنايه..و انتو مستهمين و ما تقول؟؟
عمير: يا ريال شوه نسوي..من البارحه و نحن مب في حاله..قبل قالولنا البنات يمكن ما يعيشن..و خلاف قالولنا يا الام يا البنات..و خلونا مب في حاله...و ضاق بالي ما عرفت منوه ارمس...
أحمد: انزين جان قلت..بنييكم..
عمير: يا ريال...الحمدلله على كل حال..ما بغيت اهمكم..
أحمد: المهم طمني الحين شوه حال الصغيرونات؟
عمير: ألحمدلله..في الحضانه..لكنهم بخير..و ما فيهن شي..بس بيحطونهن تحت الملاحظه..ايراقبونهن
لطيفه: السلام عليكم عمير؟
عمير: مرحبا لطيفه..و عليكم السلام؟؟
لطيفه: عمير..و راس السيافي انك اتقول...شوه حالها شمسه؟
عمير: و راس السيافي.. شمسه بخير من شوي رمسناها.. بس تعبانه من البنج شوي اطمنا عليها و طلعنا عنها..
لطيفه: الحمدلله...مبروك مبروك..
عمير: الله يبارك فيج..يالله شي فالخاطر..بسير اشوف البنيات؟ و الدكتور طالبني..
أحمد: ماشي غير سلامتكم..و طمنا..و رد السلام عليهم كلهم و بارك لشمسه
عمير: سلامن يبلغ في مان الله
أحمد: الله يحفظك مع السلامه...
لطيفه: هزرك بخير؟؟ ولا بس ايقول جيه ايطمنا ما يبانا انرد؟؟!!!
أحمد: لا لا عمير ما عنده كاني ماني..لو شي بيستوي بيقول..أهم شي يا بوج انه الام بخير..
لطيفه: فديتها شمسه..الله يعينها..يا رب تخليلهم بنياتهم
أحمد: ماشالله توم!!!! غريبه اول مره توم في عايلتنا
لطيفه: تراه اللي بالعلاج اغلبهم توم...
أحمد: هيه صح..انسير انتمشا على السيف شوي..
لطيفه: يالله...
++ بما انه الشاليه امره مفتوح من البلكونه سيده مباشره على الشاطي طلعنا تمشينا شوي..و الجو بصراحه كان مثلج..شمينا هوا..و نحن كل شوي انخمن شوه بيسمون البنات..الين ما صب علينا نفاف و ردينا داخل..اتسبح احمد قبل و بعدين أنا عقبه..و يلسنا انشوف فلم انسدح احمد كالمعتاد تحت اما انا انسدحت على الشبريه الين ما ياني الرقاد و رقدت..و بما اني رقدت من بدري نشيت من بدري جيه عالفير..قمت و توضيت و صليتي ركعتين الين ما يا وقت صلاه الصبح..وعيت أحمد صلينا جماعه..لاول مره احس انه اللي كان واقف جدامي هو شريكي..خلاص الشاليه ما فيه الا غرفه وحده..و استخدامنا لنفس الغرفه..الحمام..الاغراض..بديت احس انا شخص واحد..
لطيفه: تقبل الله...
أحمد: منا و منج..
++ بس الغريب انه احمد مضايج وايد و معقد حياته..و طلع البلكونه ايدوخ..من ايدوخ احمد..بديت اعرف انه الوضع ما يبشر بخير..طلعت البلكونه..و يلست عداله و ما تكلمت..رفعت ريولي على الكرسي..و يلست اتأمل الشروق..خطف الوقت بلمح البصر..
أحمد: بطلب ريوق..
لطيفه: يمكن المطعم ما فتح ...
أحمد: لا تراهم ايقولن تونتي فور سيرفس...
لطيفه: خلاص..اللي يريحيك..
++ يا بولنا الريوق تريقنا..او بالاحرى انا اللي تريقت لانه احمد ما ذاق شي..بدا نبض قلبي ايزيد..و الخوف بدا يسيطر عليه..بغيت اسأله شوه فيه..بس الاجابه اخافها تطعني..بس لازم اتجرأ ألين البارحه فليل ما كان فيه شي مب طبيعي..بالعكس حتا البارحه من وصلنا ما تكلمنا وايد..
لطيفه: أحمد...رفع أحمد عيونه صوبي لاول مره...شي ايعورك؟
أحمد:لا..
لطيفه: متضايق من شي؟
أحمد: هيه..
لطيفه: انا سويت بك شي؟؟!!! اذا سويت شي خبرني؟؟!! ما قدر اشوفك جيه مويّم..
أحمد: تبين اتعرفين يعني..
لطيفه: هيه...اذا ممكن...
أحمد: ممكن ليش لا...اصلا انا من زمان اترياها هاللحظه...
لطيفه: خير أن شالله؟؟
أحمد: تعالي داخل..عشان نتفاهم..
++ دخلنا داخل يلست على الكنبه..و ياب احمد الكرسي الصغير و يلس مجابلني..
أحمد: شوفي لطيفه...
++ هزيت له راسي بكل براءه..
أحمد: كل شي يبتدي صح ينتهي صح...
لطيفه: صح...
أحمد: شوفي لطيفه..اللي بينا لازم ايكون له حد..لا تمين اطالعيني بهالنظره..انتي اتعرفين عن شوه انا اتكلم..
لطيفه: والله مــــ....
أحمد: لطيفه...بس الله يخليج..كلام فاضي ما بغي اسمعه..
لطيفه: انزين..
أحمد: لا انزين ولا غيره..خلاص.ما بينا شي..و أعتقد انه هالشي واضح لج من خذتج..
لطيفه: لا أحمد مب واضح..صح..صح..اااا...مادري..
أحمد: هيه صح ..شوه اللي صح..اللي بينا مب علاقة ريال و حرمته..هاذا اللي تبين اتقولينه؟؟!! انزين و هاذا اللي انا اباه..
لطيفه: بس أحمد..لحظه..لحظه..اللي قلته صح..بس مادري معاملتك..ضحكنا..مادري..و طلعنا..كل هاذا شوه معناه؟
أحمد و هو يوقف بسرعه: تبين تعرفين شوه معناه..معناه اللي بقولج اياه الحين..فالبدايه بغيتج ترتاحين..من العرس و الربشه و جيه..و عقب اللي هو ألحين بخبرج اني مابااااااااج...تعرفين شوه مااااااااباج...و إذا انتي تكرهيني مره شرات ما سمعتج فأنا أكرهج ألف...
لطيفه و هي تهز راسها مب مستوعبه: لا لا ...شوه هاي جذبه ولا مقلب..ادري مقلب..مثل ما انا سويت فيك مقلب بتسوي فيني انته..خلاص احمد..وحده بوحده..انا خوفتك يوم الجت سكي..و انته خوفتنيه اليوم عند السوق مال الفخار صح؟
أحمد: لطفين لا تستهبلين...كلمه وحده..انا..ماباج..و اريد احط حد للي بينا...
لطيفه و هي توقف بسرعه: شوه يعني حد؟؟!!! أحمد رمسني رمسه مفهومه...تراه و الله انه راسي دار..
أحمد: الطلاق!!! خلاص انتفارق بالزين احسلي و احسلج...
لطيفه و بشهقه: طلاق!!!!! ليش انا اشوه سويت؟؟
أحمد و بنرفزه: لطيفه شوه انتي ما تفهمين..واحد ايوقولج ما يباج...عايفنج...خلي عندج كرامه.!!!
لطيفه و هيه خانقتنها العبره: لا لا لا...أحمد...لا...لا خاف ربك..انا ما سويت شي..اصلا شوه لحقت اسوي..اليوم رابع يوم من عرسنا..و نحن ما صار بينا شي...!!!!! لا تحكم عليه جيه!!!
أحمد: اللي وصلني عنج ايسدنيه..لطيفه..انتي بالاساس اتعرفين اني ما باج..و مالي رغبه فيج..يعني واحد ما يبا حرمته شوه ايسويبها؟؟!!! ايطلقها صح ولا لا ؟؟!!!!
لطيفه و بصريخ على صياح: شووووووو؟؟!!!!!! شووووه طلاااااااق؟؟!!!! انا بعدني بنت!!! اتعرف..اتعرف شوه يعني بنت؟؟!!!! و تباني اطلق؟؟!!! شوه بيقولون عني الناااااس...!!!
أحمد: لا تعلين صوتج عليه!!!! و يوم ارمسج اسمعينيه...
لطيفه و هي اتهز راسها و وشابكه ايدينها على صدرها: اوكي اوكي..ممكن أعرف ليش؟؟!!
أحمد: طالعوا....م..ا.......ب..اااااااااااااااا...ج...ما تفهمين ولا تبين مترجم؟؟!!!!
لطيفه و هي تتصنع الهدوء: اوكي..خخ..خلني اسألك سؤال..ما تباني من سبب فيني انا..ولا..ولا..( و غمضت عيونها)..تحب وحده ث..ثانيه..و جبروك عليه...
أحمد: أسبابي مالج خص فيهن...
لطيفه و بشهقه:لالا...لي خص...لاني ...انا اللي بتضرر..أحمد...الغالي..كل شي بالتفاهم يمشي..اشرحلي ظروفك..خلنا نتفاهم..ما يصير جيه..عيل...عيل ليش عاملتني زين؟؟!! ليش حسستنيه بشي ثاني؟؟!!! ليش خذتنيه بالاساس؟؟!!!!
أحمد: لاحوووووووول...اوكي..كنت بقولج من اول ما خذتج..بس ما يتني فرصه...انتي ما سهلتي عليه اني اقولج!!!
لطيفه: لا و الله؟؟!!! اتعرف شوه يعني مطلقه و انا ما كملت أسبوع؟؟!!! اتعرف شوه بتقول الناس عني؟؟!! عن بويه؟؟ عن سمعتيه و سمعت خواني؟؟!!!! و بالاخير عن سمعتك..لا تنسا انا انا بنت خالك...
أحمد: ما يهمنيه...يا لطيفه مب انا اللي بتلعبين عليه لعبتج؟؟!!! تفهمينها الرمسه لو لا؟؟!!!!
لطيفه: شوه لعبه؟؟ و شوه رمسه؟!! خاف ربك فيه انته جيه بتظلمني؟؟؟ بتشوه سمعتيه؟؟!! لا لا احمد انته ريال عاقل وفاهم و ما تطلع منك هالحركات..فكر بالموضوع..فكر ببويه..فيني انا..بحياتي..خاف ربك بعدني انا بنت؟؟!! بعده لو اللي بينا طبيعي مثل اي ريال و حرمته مب مشلكه..بس انك تشوه سمعت بنيه؟؟!! ليش بالاساس خذتنيه عيل؟؟!!!
أحمد: لطيفه...لطيفه..سمعيني..ماريد كلام وايد في هالموضوع..ما يخصج ليش انا رافضنج..اللي بينا انتهى..انتي في درب و انا في درب..انتي بعدج بنت و صغيره...و..وو...حلوه..و عقولتج بعدج بنت..بتعرسين..و اللي امبونج حاطتنه في بالج..خليه اييج الحين جان فيه خير..!!!! اوكي..انا لا ضربتج..و لا سبيتج..و انتي قلتيها بعدج بنت خالي..و انا ما بسوي فضايح..ردي بيت اهلج..وورقه طلاقج بتوصلج..و انا مستعد اتكفل بكل مصاريفج..و لج مني كلمة ريال..ما حد يعرف عن اللي صار بينا..
قامت لطيفه في هاللحظه و هي منفجره من الصياح و الصريخ..: لالالا...مب .......مب..كيفك....ب..بنات ال..النا...الناس مب لعبه..لالا..أحمد فديتك....لا...لا تخليني....حرام علي...حرام عليك..شوه بيقولون عني الناس...نقد عليها شي جايد و طلقها..الناس ما ترحم..ما بيقول الا ما بغاهاو انتهى الموضوع..بيقولون البنت خايسه!!!!( و انهارت لطيفه على الكنبه و هي حاطه ايديها على عيونها و صياحها ايقطع القلب..ألم..و حسره)...
+++ سويت اللي سويته..و ريحت بالي...ريحته ولا جتلته...حرام عليك يا أحمد اللي تسويه بالبنت..خاف ربك..أأأأأأخ...ما عرفت شوه اسوي و انا ا اشوووفها طايحه على الكرسي و اتصيح صياح ايقطع لفواد..أأه يا لطيفه ...ماتدرين اني مت الف مره قبل لا اقرر اني اقولج اللي قلته..بس كان لا بد من هالشي..لابد..رحت لا اراديا صوبها..و مسكت ايدينها..و مسحت دموعها..
أحمد: لطيفه....لطيفه...
لطيفه و هي تضرب أحمد على صدره: فجني...فجج...فجني اقووولج...ماباك...أكرهك يالخايس...أكرررررررهك....ليت عيني ما طاحت عليك ....
+++ أول ما قالت جيه..فريت ايدينها جني ماسك شي نجس..قطعت كل حبال الامل بيني و بينج يا لطيفه..كان عندي امل انها بتقول انها تحبنيه و انا مستعده تنسا كل شي..تطلع بريئه..اي شي اي شي..بس من قالت " أكرهك"...عرفت انه ما عندي امل و انه هالبنت قلبها مب لي انا..لواحد غيري..أكرهك...أأأأخ مقواها من كلمه...ليتج يا لطيفه ما نطقتيبها...ليتج..ليتح..شليت سويج السياره و طلعت من الشاليه..و خليت لطيفه تغرق في بحر أحزانها..وانا اصارع موي طامي من غصه تقطع لفواد تقطيع...
~~~~~~~~~~~~~~~~~~~~~~~~~~~~~~~~~~~~~~~~~~~~~~~
++ قمت..فجيت عيوني..و انا عظاميه اتعورني..عيوني متورمات..و نفسيه ضعيف..جنه حد يسرق الروح منيه..جلبت راسي فالحجره..و اتذكرت اللحظات الاخيره من حياتي..أخ يا حياتي..و أخ من هم ضواني..و أخ منك ياللي طعنت قلبي بلا رحمه..يلست على الكنبه..كم مر من الوقت ما عرف..شفت الساعه انها الساعه تسع الصبح..التفتت صوب الشبريه لقيت أحمد راقد..معناها رد..لانه البارحه الين الساعه ثنتين فليل ما شفته..ما قدرت احط عيني عليه..لاني حاسه بجبدي لايعه..و مخي داير..و قلبي ميت..كيف اوصفلكم شعوريه..وانا بلا شعور..كيف اوصفلكم نبضي..وانا ميته لفواد..كيف اوصلفكم ألميه والألم استعصا عليه ألميه..!!!!..دشيت الحمام تسبحت..اتلسبت و لميت اغراضي كلهن فالشنط..لميت اغراض احمد..و زهبت أغراضي على اساس اول ما يقوم احمد..انحط النقاط على الحروف و انرد العين و كل واحد في دربه..ما قدرت اوعيه لانني و ببساطه نفسي لايعه من ويهه..من نظرت الحقران في عيونه..اترييته الين الساعه 12 الظهر بس ما نش..ما قدرت اتحمل الوضع أكثر..ياأني اوعيه..يا أدق لواحد من خوانيه ايشلنيه البيت..المشكله انه ما عندي القدره على التركيز..ما روم افكر..شوه اسوي..لانني و ببساطه كل شوي يتراوالي ويه ابويه جدامي..شوه بقوله؟؟!! شوه بشرحله..كيف بجابل خواني؟؟!! بيقطوني الناس بلسانهم قطعه قطعه..لا اردايا رحت الشبريه اشوف احمد ابغي اوعيه..انا عندي اقتراح و ليته اينفذه..اول ما طاحت عيني على ويهه..بصراحه اتيبست..ويهه متورم...عيونه متنفخات..يلست شوي شوي عداله على الشبريه..لاني بصراحه مت من الخوف ما عرفت شوه اسوي..ألين ما فتح أحمد عيونه شوي شوي..في هاللحظه قمت بسرعه..صوب الدريشه و فجيت الستاره...
أحمد: لا لا ...لطيفه لا تفجين الستاره..
لطيفه: أنا زهبت الاغراض..خلاص انرد العين..
أحمد: لطيفه..ماروم...بندي بندي الستاره..ما قهر نور الشمس..بنديها الله يخليج..
لطيفه: ابغي ارد البيت...
أحمد: ماروم...مب اليوم..ما تشوفين حالتيه..فيني صداع نصفي..حتا الشوف ما شوفج الحين..
لطيفه: شوه يعني؟؟
أحمد: لطيفه...الصداع النصفي ما يخوز بحبة بنادول..اصبري الين باجر..
لطيفه: ماريد...ردني البيت...
اتنهد احمد و حط ايديه على عيونه...في هاللحظه أتأكدت انه أحمد مب طبيعي و بالفعل فيه صداع نصفي..سكت عنه طلعت و يلست فالبلكونه..و أنا اصيح و اصيح..الين ما أذن المغرب..دشيت داخل..لقيت أحمد ايصلي..توضيت..و صليت..دش أحمد الحمام يتسبح..اما انا..فتلبست..و رحت الشاطي..بما انه فليل و ماحد عليه..ما ابتعدت وايد عن الشاليه..يلست و انا ادعي ربيه انه يعدي كل شي على خير..ما حسيت الا بأحمد واقف ورايه..
أحمد: لطيفه مب برد عليج؟؟؟
ما شي رد...
أحمد: انزين تعالي كليلكج شي...من البارحه ما كلتي شي...
ما شي رد...
أحمد: شوفي لطيفه..هاذا قراري و انا حر فيه...
لطيفه و بكل هدوء: لا مب حر فيه..انته يوم عرست..و خذت القرار..لازم اتكون حاط في بالك انك مب شخص واحد..نحن شخصين..و اي قرار لازم ناخذه نحن مب انته؟؟!!!
أحمد: شوه المطلوب...
لطيفه: أحمد طالبتنك طلبه..ابغيك تعطيني مهله بس..شهرين ثلاثه..اربعه..بس علاقل خلني اكمل شهرين..عندك..و واوعدك...اوعدك..اني ما اتعرض لك..ولا اكلف عليك..و راس السيافي..اني لا أخرب عليك..ولا شي..بس خلني عندك..شهرين بس..رحمة ببويه لا غير..ماريد العالم تتكلم عليه..وانا بنته..مابا اي شي منك..و اعاهدك اني اعيش وياك عيشه..ما بتحس اني عايشتنها وياك..ادري اني اذل عمريه ذل الحين..و أتأكد..اني الحين و انا ارمسك..راسي مدفون فالتراب..ولا همنيه شي..غير هاذاك الريال..اللي رباني و رباك...رباك يا أحمد..ولا ظني في يوم من الايام..قصر بشي عليك..فالشيمه..لا تنزل راسه فالارض..ولك عهد مني,..شهرين و من دون لا تقولي انا بسير بيت اهليه..شوه الراي..
عدت عشر دقايق..مرن..جنهن عشر سنين..دهر..وقفت و حطيت عيني في عينه..عشان ايشوف لاي درجه ذلنيه..و ايشوف لاي درجه وصلت المهانه..اريد ياخذ قراره الحين..
أحمد و هو يمسك ايد لطيفه: انسير داخل..برد اهنيه..
لطيفه: لا تمسكنيه...قولي مب موافق؟
أحمد: اللي تبينه...بيصير
________________________________________
""" الجزء التاسع عشر"""
ما دامني باقي لك الحب باقي ما بين روحي و الجسد حس و اشواق..و ان غبت عنك الحب بيتم ساقي لون المغيب و كل لحظات الاشراق
لطيفه: شميس...سيري البنات ايصيحن...
شمسه: برايهن احيد عمير عندهن..
لطيفه: و انتي الله ايهديج حد أيأجل (يعتمد) على عمير!!!!
شمسه: و الله مثل ما هن بناتي تراهن بناته..و خليهم شوي ايحسون باللي انحسبه..
لطيفه: ههههههه...عاد هو حليله بنت بيروم عليها..وين ما شالله بنتين..
شمسه: عداله ضبابه من تسمعهن ايصيحن ما تقصر تيني تربع...
لطيفه: حليلها وااااايد متعلقه بهن...
شمسه: اتساعدني و الله..مره دقيت عليها الساعه ثلاث و الله انها ما قالت شي..يلست عندي الين ما رقدانهن
لطيفه: فديتهن..متا الطلوع؟
شمسه: الخميس الياي..شوه يالسه اتسوين انتي؟
لطيفه: يالسه اتبل السلطه...تعرفين احمد ما يطيع ياكل اذا البشكاره مقطعه السلطه..
شمسه: هيه و الله...تعالي ليش ما تريقتي ؟؟
لطيفه: مالي نفس..ياختي يوم اليمعه تنسد نفسي عن الاكل...
شمسه و هي اتسخن الحليب: هاه..هاه..هاه...شوه..؟؟!!! بشرينا على الاقل..شي بيبي ولا؟؟
لطيفه: شوه؟؟!!! اسمعوا انتو يون بيبي؟؟!!! بتبطين!!!
شمسه: و ليش ابطي..الثلاثا اللي طاف مكملين شهر انتو ولا انا غلطانه؟؟!!!
لطيفه: انزين شوه يعني؟؟!!!
شمسه: و الله اني احسبج انج حامل مادري ليش؟؟!! لو شفتي يدتيه ضبابه يوم ما طعتي تاكلين اتشققت من الفرح..
لطيفه: اشوووووووه؟؟!!! لا يكون؟؟!!!
شمسه: حليلها العيوز..اول ما نشيتي..قالت البنت ما تشتهيها العيشه جان ما توحم..
لطيفه و بعصبيه: شمسه بليز لا تفتحين هالموضوع ويايه!!!
شمسه: يالله يالله يالمستحا...حرمه معرسه شوه يعني اكيد بتحمل!!!
لطيفه: اوهوووووو...تعالي انيسه وين اللومي؟؟!!!
انيسه: في تحت منيه..
شمسه: لطفين...شوه بلاج؟؟!! أشوفج مكشونه؟؟!!
لطيفه: ما بلاني شي..بس طاري الحمل لا تفتحينه!!! خلاص ...سكري الموضوع...
شمسه و هي تمسك جتف لطيفه: لطوووف...شي مستوي بينج و بين احمد؟؟!!!
++ أول ما قالت شمسه هالجمله..حسيت انها مست وتر حساس..ما قدرت اتحمل..طول عمرها شمسه اختيه اتعرف اذا كان فيه شي مب طبيعي في حياتي..لا اراديا يلست على الطاوله اللي فالمطبخ و انفجرت اصيح..
شمسه: لطوووف..بسم الله عليج شوه ياج..؟؟!!! سمحيلي و الله اني ما قصدت اني اعق عليج رمسه؟؟!!..بس حبوبه بس..الله يهديني..بس لطفين...تعالي تعالي...أنيسه هاتي كوب ماي..
++ مسكتني شمسه من ايدي و وودتني الميلس الصغير...
شمسه: هاه لطيفه شربي ماي..
++شربت ماي و انا اشاهق من الصياح..ما قدرت اتحمل..انا من زمان حاسه روحي بنفجر من الوضع اللي اعيشه..جني عايشه على حافه بركان ممكن ينفجر في أي لحظه..عايشه في كابوس..في كل لحظه اتخيل احمد يدش من الباب و ايقولي يالله لطيفه سيري بيت اهلج انا بطلقج..عايشه في ليل اسود لا له اول ولاله تالي..
شمسه وهي تيلس عدالي و اتحط ايدها عليه و تحضني: يعلني افداج يا لطوووف..بس فديتج لا تصيحين..ما تهونين عليه اشوفج جيه...شوه قلت انا و زعلج؟؟!!
هزيت راسي بالنفي...
شمسه: في ذمتج يا لطيفه انج ترمسين بالصدق...انا اختج العوده..لمنوه غيري بتشكين؟؟!!..لطيفه انتي و احمد شي مستوي بينكم؟؟!!
لطيفه: لا...ماشي بس طاري الحمل ضايقني شوي..
شمسه: و ليش ايضايقج؟؟!!! يعني انتي مضايقه لانج ما حملتي؟؟!!! وين بعده بدري؟؟!!!!
لطيفه ما قدرت امسك عمري..و انفجرت بالصياح مره ثانيه..حطيت ايديني على ويهي: ككك..كيف..كيف احمل يوم نحن عايشين عيشه اخ...اخوان!!!!!
في هاللحظه طاح كوب الماي من ايد شمسه على الارض و انكسر: اشووووووووووه!!!!!! لطفين شوه اتقولين؟؟!!! ما فهمت؟؟!!!
لطيفه: مم..م...ماشي بينا!!! انا و احمد..ما..شي بينا..
شمسه: ماشي بينكم؟؟!!! شوه يعني...لطيفه..انتي بعدج بنت؟؟!!
هزت لطيفه راسها..في هاللحظه مسكت شمسه راسها بين ايديها و هي اتهزه بعجب: ليش؟؟!!! شوه اللي استوا؟؟!!
لطيفه: و انا شدراني؟؟!!!
شمسه: لطيفه...احمد شي انكرعليج؟؟!! غلطتي في حقه؟؟!!
لطيفه: ليش ...ليش لحقت انا اسوي شي؟؟!!!
شمسه: لطيفه الله يخليج..قلبي وقف..فديت روحج ارمسي؟؟!! قوليلي شوه اللي استوا؟؟!!
لطيفه: مادري و الله العظيم مادري..من البدايه قلتلكم ما يباني الريال ما يباني ليش غصبوه عليه؟؟!!!
شمسه: شوه غصبوه عليج؟؟!! منوه غصب احمد عليج؟؟!!! يوم انخطبتي احمد ارووحه قال لطيفه انا ما برخصها ابا ليه انا؟؟!! منوه بيغصبه عليج؟؟!!!
لطيفه: هو اللي قالي...قالي انا ماباج!!! و الريال اللي مايبا حرمته شوه ايسويبها ؟؟ ايطلقها..
شمسه و بشهقه: اشووووو....طلاق؟؟!!!! وصلت للطلاق..لطيفه حبوبه..قوليلي شوه اللي استوا..فهميني..
لطيفه: ماشي..سرنا دبي..ليله العرس ما بات فالفندق..طلع عني لانه نسا العدسات..اتريته الين الصبح..بالباجر لقيته راقد في غرفه ثانيه..فدبي كان كل شي اوكي..طلعنا..رحنا مطاعم..و سينمات..اتحوطنا ما خلينا مكان ماسرناله..كان كل شي طبيعي..عدا انه ما كان اينام في غرفتيه..
شمسه: ليش؟؟!!
لطيفه: و انا شدراني؟؟!!! قلت دامنه عادي و كل شي بينا طبيعي..قلت يمكن ما يبا يضغط عليه فما حبيت اسأله..
شمسه: و بعدين؟؟
لطيفه: ماشي سرنا الفجيره..بالباجر..لقيته معصب وويه مسود..سأله قلتله احمد شوه بلاك؟؟ قالي انا مضايق..و انفجر مره وحده..انا ماباج..مغصوب عليج..و عايفنج..و كل شي له حد..و مادري شوه..
++ كل اللحظات مره جدامي في هاللحظه..كل الالم اتجمع في قلبي مره ثانيه..كل القهر ينبض في شراييني..ما كان شي جدامي الا اني اصيح..عل و عسا دموعي أتخفف من صدمتيه!!!..قامت شمسه و ضمتني لصدرها و هيه اتهديني..
شمسه: يعني لطيفه ما صار بينكم شي؟؟
هزيت راسي بالنفي..
شمسه: ما سألتيه ليش؟؟!!
لطيفه:وو..ال..الله سألته..حاولت وياه..بك..بكل الطرق..قلتله..ليش؟؟ انته نقدت عليه شي؟؟ انا انا غلطت في حقك؟؟و الله العظيم شمسه ...و الله اني حاولت..بس هو امرره ما طاع يتفاهم..قالي قالي..انتي مالج خص في اسبابي..و اللي بيني وبينه لازم ينتهي..ب..بالط..بالطلاق..
شمسه: لا حول ولا قوة الا بالله..شوه هالمصيبه هاي؟؟ انا اللي اعرفه انه احمد يباج..و أنا متأكده من هالشي..بس ليش سوا جيه؟؟!!
لطيفه: ما مادري..و الله العظيم مادري...
شمسه: و على شوه اتفقتوا؟؟!!!
لطيفه: قلتله انا بنت خالك..و اذا اطلقت و انا بعدني عروس..هالشي بيضره هو قبل لا ايضرنيه انا ..و ماحد بيستفيد شي..لا انا ..ولا هو...بالعكس..
شمسه:صح..شوفي لطيفه..حبوبه..انتي بنت عاقل..و انا متأكده انا ما يظهر منج الغلط..و محشومه عن الزلات..ولا توقعين بسؤالي هاذا اني نيتيه خبيثه..بس لطيفه..انتي متأكده انج ما سويتي شي ايخلي احمد ينقمج..اي شي..اي شي..اتذكرني..
لطيفه: و الله انا اروحي سألت عمريه هالسؤال مليون مره...و تعبت مالقيت له اجابه..ما حيد عمريه اغلط غلطه اندم عليها جدام ربيه و جدام اهليه...سألته قلتله انته ناقد عليه شي..قالي انتي بعدج بنت..و بتعرسين و مادري شوه..
شمسه: لطيفه حطي في بالج شي واحد..انتي بنت خاله..و ما بيطلقج و انتي عروس..اصلا هاي ما تدش العقل..و احمد ريال عاقل..مب من هالمفرخه اللي ايطلقون و يلعبون ببنات الناس لعبه..
لطيفه: و الله و الله انه قالي ما شي بينا غير الطلاق..و انا ترشيته انه ايخليني فتره عنده و بعدين كل واحد في حال سبيله..
شمسه: لا لا لطيفه..لا لا ..مستحيل احمد ايطلقج و انتي عروس..انتي بنت خاله من لحمه و دمه..و افضال بويه وايد عليه..و احمد ريال حشيم..محترم..نفرض انه ما يباج..و صدق يبا ايطلقج..بس مب بهالسرعه..يمكن هو حط في باله انج بتمين على ذمته فتره و بعدين بيطلقج..
لطيفه: يمكن..
شمسه: لطيفه..اسمعيها الرمسه زين..وأنا اختج العوده..أحمد ريلج و انتي بعدج على ذمته..حتا لو ما يباج..حتا لو عايفنج..لا تخلينه..لا تخلينه..تفهمين ولا لا ؟؟؟ رديله هاذا ريلج..حطيه في عيونج..ولا تخلينه امره يحتاي لشي..اخدميه..ولا تخلينه يحتاي شي..تراه والله تندمين طول حياتج ان فرطتيه
لطيفه: لا لا ..شمسه لا..انا وعدته اني ما اتعرضله..و خليه في حاله...الين ما تعدي فتره,,و ننفصل
شمسه: لاااااااااااااااااا....بعمرج...لا تغلطين هالغلطه..لطيفه انا متأكده مليون بالميه انا يباج..و الله و الله انه يباج..و مب الا يباج و بس...هاذا اذا ما كان ايحبج...
لطيفه: على منوه اتقصين انتي؟؟؟ انتي لو شفتيه شقايل ايرمسنيه ذاك اليوم و الله ما نطقتيها هالرمسه
شمسه: اوكي اوكي..قلتلج..لطيفه انتي انسانه عاقل و تفهمين..بعده احمد ريلج..تفهمين شوه ريلج..لا تفرطيبه..حتا لو ما يباج..خليه تاج على راسج..ولا تتحسينه انه ما يباج..حسسيه انه نظر عيونج..و انه كل شي في دنياج..عطي نفسج فرصه..لا تضيعين كل شي..و عطيه فرصه..هاذيج الساعه اذا اصر انه ما يباج..صدقيني ما بتندمين انج حاولتي..حاولي يا لطيفه حاولي..
لطيفه: مادري..
شمسه: شوه ما تدرين؟؟!!!! الحين انتو شقايل عايشين؟؟ امرره ما بينكم تفاهم او تواصل..
لطيفه: جدامكم عادي..فالقسم هو في حجره و انا في حجره..من نركب فوق خلاص ينعدم الكلام بينا..بس هاذا ما يمنع اني اشوف شوه محتاي..ادخنله حجرته قبل لا ايي..ما يطلع من البيت الا مدخنته و معطرتنه..كل يوم الساعه ست اقوم قبل لا ايداوم اسويله الريوق و الجاهي لانه ما يشرب من ايد البشكاره..اتعرفينه..ثيابه و اغراضه انا المسؤوله عنهن..حتا العصر ما اخليه اينش و الا جدامه العصير و الكيك..شوه اسويبه اكثر عن جيه..؟؟!!!!
شمسه: زين ما سويتي...بس ما يسد..اهتمي به اكثر..حسسيه انج اتحبينه..حسسيه انه غالي عندج..
لطيفه: اشوووووه؟؟!!! عقب كل هالحقران و المذله..تبيني اربع وراه؟؟!!! لو مرررره تنحط السجين على رقبتيه ما ذليت عمريه اكثر عن جيه..بس يا شمسه لكل شي حدود..و انا كرامتيه ما تسمحلي اني اذل نفسي كل هالمذله..
شمسه: لا لا ...لطفين..بعمرج ان عديتها هالرمسه..و رفجه..و رفجه ابوج الغالي..لطفين حاولي..عن خاطريه..لا تفرطيبه احمد..ما يتفرط..حاولي يا لطيفه عشان خاطريه..
++ مادري ليش حسيت اني اعيش في صراع..بين كرامتيه..و مستقبليه..كرامتيه اللي ترفض انها تندك فالتراب اكثر عن جيه..و مستقبليه اللي اتقولي شمسه انه مرتبط بالريال اللي ملك قلبي في يوم..لاني متأكده اني اذا انفصلت عن احمد ما أقدر اخذ غيره..ولا اقدر اعيش مع غيره..ولا قلبي بينبض باسم غيره..شوه اسوي..انا اعرف انه شمسه اختيه تبا مصلحتيه..و قرارها احكم عن قراري..بحكم انها مب عايشه المشكله و تفكيرها اصح عن تفكيري..رفعت عيوني صوبها..
لطيفه: ماعرف..
شمسه و هي تمسك ايديني: علاقل حاولي..فديت روحج لطفين حاولي..
لطيفه: لا ماقدر..ماقدر فهميني..الريال قالي ماباج..عايفنج..ماروم..و الله ماروم..احس بعمري ابغضه..كله كوم و الحقران كوم يا شمسه..كله ولا حد ايذلج و يحقرج
شمسه: لا تضغطين على عمرج..بس تذكري..انه احمد هو مستقبلج..و انا ماباج تندمين اذا انفصلتي عنه
لطيفه: يعني شوه؟؟
شمسه: انتي ما بتخسرين شي..لطيفه انتي تحبينه..الا تعشقينه عشق..و الحين هو ريلج..ما تبينه..كيفج..اذا تبينه بس مب حاقه..عطيه فرصه يتعلقبج..و تستوين شي اساسي و مهم في حياته هاذيج الساعه هو بيربع وراج..
لطيفه: ان شالله..بحاول..بحاول..اذا قدرت..
شمسه: توج حرمه..جيه اباج..يالله الحين انسير احيدهم يتريونا على الغدا..
++ طلعنا نتغدا..و لو انه ما كان لي نفس..بس ما فيني ايشكون اني حامل..مثل ما ظنت شمسه..الكل كان متجمع فالصاله..عمير و شمسه..عمتيه بخيته و يدتيه ضبابه..فاطمه و ضبابه..و أحمد اللي كان يالس يقرا جرايد على طرف..عقب الغدا الكل اتجمع فالصاله على التلفزيون..و بما انه الكل يلس الا انا ما لقيت مكان الا عدال احمد..كنت بسير الغرفه لانه مالي نفس ايلس عداله..خلاص احس انه الوضع بينا بدا يتأزم و اني انا اللي ما بقدر اكمل المهله اللي بينا..بس طاحت عيني في عين شمسه اختيه و كأنها اتقولي يالله سوي اللي اتفقنا عليه..فقمت و يلست عدال أحمد..و انا اتصنع انا بعدنا معاريس..يلست وما فجيت حلجي بكلمه رغم انه الجو كان ربشه و الكل ايسولف..فجأه ألتفت أحمد صوبي و قالي بهمس:
أحمد: شي ايعورج؟
هزيت راسي..
أحمد: ليش عيونج حمر؟؟!!!
لطيفه: ما شي..
أحمد: كنتي اتصيحين؟؟!!
لطيفه و بهمس: خلاص احمد..قلتلك ماشي..
++ شفت أحمد في هاللحظه عصب و لف الصوب الثاني..شوه يبا بعد؟؟!! خلاص..ايخليني في حالي..تراه عدا علينا شهر كامل كل واحد ما يعرف عن الثاني اي شي..ليش الحين يعني يسأل..ولا بس عشان الكل متجمع يبا ايحسسهم انه خايف عليه؟؟!! ابعد عني..وما لك خص فيني..انا بروحي مب قادره اتحملك بكبرك!!!! في هاللحظه دشت علينا ضبابه الصغيره و هي تلهث..
ضبابه: ألحقوا ألحقوا!!!!
عمير: شوه بلاج؟؟
ضبابه: ألحقوا حمودي ولد سعيد..و السيافي ناقع البكس بينهم..
اليده ضبابه: وااااااايه..يالطفسه انتي..اتشوفينهم يتذابحووون و انتي مخليتنهم..
ضبابه: و الله انا مارمتلهم حشا هاليهال بكوساتهم اتعور..زلغوني و انا افجج بينهم..
شمسه: يالفضايح..سعيد مطرش عياله يونهم عشان ايقصرون الدوب و الشيخ سيف صطـــّعم..عمير نش الحق شوف ولدك..فضحنا...
عمير: انا مالي خص..انا من اشوف هالقمرين مالي خص في حد..يعلني افداهن هاتي هاتي مهايه..
شمسه: اوهووو عمير..
عمير: خلي بوشهاب ايسير أيفجج بينهم مب هو مربنه على الدفاشه..
أحمد: لا و الله؟؟!!!! ألحين انا مربنه على الدفاشه!!!
عمير: يابويه الولد ولدك انته اللي مربنه..سر فجج بينهم..
ضبابه: اووهوووو...اليهال بيتذابحون و انتو اتعازمون..
لطيفه: يا بوي بسير اشوفهم فضايح في سعيد..
++ و طلعنا نركض انشوفهم..لقيناهم فالحوش و الحبايب..كل واحد قضا على الثاني من الضرب..حاولت افجج بينهم بس ما شي مجال...
لطيفه: سيفوووووه...حمووودي...حسبي الله على بليسكم..بس...بس...ايه سيفوووه فج الولد...أأأأأأأي..
أحمد: وينهم وينهم؟؟؟
لطيفه: هاذووم..
أحمد و بصرخه أنا اترجفت منها: بااااااااااااااااااااااااااااااااس...بس يالله قوموووا..و الله اللي ما بيخوز عن ربيعه بالعصا المحنايه على ظهره..
سيف: عمي..عمي أحماااااد..كله..كله..منه هووو!!!!
أحمد: أص أص أص أقطع....قطعت الولد من الضرب و ياي اتقول كله منه هوه..
سيف:عممممممي...أحمااااد
أحمد: ولا كلـــــــــــــــــــــــــــــــمه...أص أص يالله يالله جدامي..لطوف شوفي حمد جان شي ايعوره..
سيف و هو يركض صوب لطيفه: لا لا لا ....مالتنا...خالوه لطيفه مالتنا...لا تسيرين عنده..
حمد: مالتنا... العرووووسه...خلها...مالتنا
سيف: يالحماااار....مالتنا نحن العرووووسه...
و اتضاربوا مره ثانيه..بس احمد بإيد وحده فجج بينهم...
أحمد: ييي هاااااا....اتدورون سبب انتو عشان تتضاربون...
سيف: كله منه هو...قوله عمي العروسه مالتنا..
حمد: لا مالتنا..
أحمد: لا مالتك...ولا مالتك...العروسه مالتيه..ارتحتووا!!!! يالله يالله جدامي...
++ دخلنا داخل و انا فيني الضحكه على الطريقه اللي سكتهم بها أحمد..دشينا داخل و رحت أودي حمد ولد سعيد عشان اغسله بديتول لانه سيفوه مشمخنه تشميخ..
حمد: عموه لطيفه...ليش انتي اتباتين اهنيه..تعالي بيتنا..
لطيفه: ماقدر حبيبي..لازم انام اهنيه..
حمد: لا لا..تعالي مثل اول..
لطيفه: ماقدر لاني انا خلاص الحين عروسه لازم انام اهنيه..يمكن بعدين اييكم البيت
حمد: ليش اتعرسين؟؟!!!
في هاللحظه دش علينا أحمد...
أحمد: لاني انا شليتها عنكم...خلاص الحين عموه لطيفه مالتيه انا..
لطيفه: مافي داعي لهالكلام...هاذا الا ياهل..
أحمد: لا تنسين بعدج على ذمتيه..
لطيفه: و منوه قالك اني نسيت..تعال حمد بحطلك لزق..
أحمد: وايد متعور؟؟!!
لطيفه: يعني..
أحمد: انوديه المستشفا؟؟!!
لطيفه: لا ما يحتاي..
++ طلعنا من الحجره و ردينا الصاله..لقينا عمير..يالس يعطي سيف محاضره..و سيف و شوي و بيصيح
سيف: انتو ما تحبووووني....انا ما حبكم...كله من هااااي ماماه..انا ما حبها ماماه..ليش تيب مها و شما انا ما حبهن..
عمير: تعال تعال..منوه قال ما نحبك...انته ولدنا..و شما و مها خواتك..و ايحبنك..و بعدين انته بتودينهن المدرسه و السوق..و الفروسيه..
سيف و بصريخ و هو ايحط ايديه على اذنيه: لااااااااااااااااااا...لاااااا..لا تقول..مااااحبهن...ماااحبهن...
شمسه: الولد من ربيت مب طبيعي..يا باباه هاذيلا خواتك و ايحبنك...و كلنا انحبك
سيف: ما تحبووني..انتو كله اتحبوونهن..باباه كل يوم ايقول وين شما وين مها...ما يقول وين سيف؟؟!!
عمير: لا حوووول ولا قوة إلا بالله...خلاص خلاص انا ما حبهن..هاذيلا البنات مش حلوات انته حلو الشيخ سيف يا بعدي بعداه من سيف...تعال تعال..
سيف و بصريخ: انا مش سييييييييييييييييييييييييييييييييييييييف!!!! انا سيفوووش..
أحمد: شوه؟؟!!! شوه هاي بعد سيفوش؟؟!!
فاطمه: على وزن علووش!!!
أحمد: و الله انه الولد هب بخير من عرست سرت ورديت لقيته مررره مب هو الأولي..
بخيته: يابويه نحن مره ما نروومه..غدا الا نحس و ما يجارب..و كل شي بيضارب عليه..
أحمد: تعال تعال سيفوش تعال عندي انا انا باباتك..طبهم هاذيلا..قولهم خل شماني ومهايه ينفعكم..
سيف و هو يركض صوب أحمد و يلوي عليه: هيه هيه انته باباتي..ما حبهم هاذيلا هم و بناتهم المش حلوات..انته باباتي و خالوه لطيفه ماماتي..
عمير: ييي هااااا...الولد بايعنا برخيص..
أحمد: فديت سيف الشيخ..البطل اشوف اشوف عضلاتك...ايوا ايوا يا بطل..نفس عمك احمد عضلاتك
فاطمه: هاتي شما شوي شمسه..
عمير: منوه تشوفونهم ايشابهن؟؟
اليده ضبابه: مها..شوي غير..اترد على ضبابه عمتها..ولا هاذيج شميم...امررره احمد بكبره خلوه اينحلها..
أحمد: لا لا مب لهدرجه...معقوله اتشابهني..
شمسه: امررره لو بعدك ابوها...نسخه مصغره..حتا الحيات مقارين شراتك..
أحمد: لاه؟؟؟ اشوف اشوف..قام أحمد و شل شما و حطها جدامه..
أحمد: ياربي مصغرها...اتقول قوطي بيبسي...
عمير: هههههههههههه...هاي عطايا الرب...
أحمد: اتصدق عاد اتشابهني عشان جيه حليوه..
ضبابه الصغيره: لا لا مهايه احلا لانها تشابهني..
أحمد وهو ايفر ضبابه بكرتون الكلينكس: يتكم عاااااااد الخقاقه...
ضبابه الصغيره: من حقي اتخقق..جماااال و حلااااااه...شوه بعد؟؟!!!
فاطمه: يالعنطزه!!!! شوي شوي على عمرج..
اليده ضبابه: يالله بويه أحمد شد حيلك خلنا انشوف بذرك كيف...
أحمد: لا لا لا ...عاد انا عيالي بيووون غير..
بخيته: وابويه...شقايل غير بعد..من السما بينزلون؟؟!!!
اليده ضبابه: اسميج انتي ما تعرفين..عيال بو شهاب هاذيلا..غير بيوون..
عمير: يالله هاتولنا بنووته خطيبه حق سيف...
أحمد: بتبطوووون....اسميني بيوز بنتي ولدكم؟؟!!! لا يابويه بنتي ما تاخذ من عامه الشعب..
عمير: أخافها شهرزاد و نحن ما نعرف..
بخيته: خلوووا عنكم...عاد انتوا شرات سيف ما بتيبوون...يعلني افدا السيافي تعال بويه تعال عند امك العوده..بس عليكم يوم بنتكم بتضوي السيافي..
أحمد: لا و الله بس عليه هو يوم بيضويها..
بخيته: ما عليه بيكبر سيف بن عمير و بتعذرون عنه...و بيركب هاذاك الرنج..و بدريسه و النجوم على جتفه و يوم بيي البيت...بتم بنتكم اتوايج من الدريشه و اتفداه..
أحمد: بيبطووون...
شمسه: لا اله الله...اللي يسمع عاد الحرمه على الولاده..شوي شوي عليها..حتا الحمال بعدها ما حملت
الكل : ههههههههههههههه
++ قبل لا أيأذن العصر بشوي كل واحد سار غرفته..دشيت الغرفه و انا حاسه بروحي تظهر..ألحين هم ايخططون اني بييب عيال..و هم ما يدرون على شوه نحن ناوين..يا ربي كيف بنجابلهم..شوه بنقولهم؟؟!!! لا و المشكله انه احمد كان ايجاريهم بالكلام عادي ولا كأنه شي صاير..مادري شوه اسوي..كيف افكر,,ولا كيف اتصرف..معقوله احمد ايخطط انه ايعرس مباشره عقب ما يطلقني!! ولا عامل حسابه من زمان لهشي؟؟!!كالمعتاد كل واحد دش غرفته..هالوضع اريحلي و انسبلي..لانه بهالطريقه الفراق بينا بيكون اسهل..رقدت و ما حسيت بالوقت اول ما قمت لقيت الساعه خمس العصر..وانا متعوده في هالوقت انه وجبة العصر اكون مجهزتنها لأحمد..قمت بسرعه و انا طالعه بسير المطبخ لقيت احمد فالصاله و يالس يتسفر جدام المنظره..
لطيفه: مسا الخير..
أحمد: مرحبا..وين بتسيرين لطيفه؟
لطيفه: بسير اسويلك سندويجات؟
أحمد: لا بس ما بغي أنا بطلع ألحين بسير السوق..شي في خاطرج؟
لطيفه: لا...( و بتردد)أحمد...أباك في موضوع..
أحمد: شوه؟؟
لطيفه: أحمد انا ماريد اسحب اوراقي من الجامعه...اريد اكمل دراستيه..
أحمد: و منوه قالج سحبي أوراقج من الجامعه؟؟!!!
لطيفه: هاه!!!! مادري..بس..بس..كنت اتحراك ..مادري..
أحمد: لا بالعكس انا اباج اتكملين دراستج و انا ما بمنعج..سجلي مثل ما تبين..شي بعد؟
لطيفه: لا سلامتك..
++ و طلع أحمد..ما عارض الفكره..لهدرجه؟؟!! ما هميته..ولا كلف عمره انه ايقول رايه فالموضوع..ما دام الريال مخطط على الفراق ليش بيمعني من اللي اريد اسويه؟؟!! خلاص يا لطيفه..النهايه قربت ولا تعبين عمرج بهالهموم اللي ما بتزيدج الا عذاب و شوق..المشكله اني اكرهه و احبه في نفس الوقت..كل ما شوفه احس بعمري امووت اموووت بالبطئ من التعذيب و المهانه و النكران..أتمنا في ساعتها اني اموت ولا اني اعيش لحظه كرهه تجاهه..و اول ما يغيب..تبدا روحي اتغيب معاه..و اشتقاله و هو بعده ما طلع من البيت..تعبت يا ناس و الله اني تعبانه و كل يوم اتسوء حالتيه اكثرعن اللي قبل..كيف بعيش من دونه؟؟!! كيف بتعدي عليه الايام و انا ما بتناظر عيني عينه..كيف بتنفس و بعيش في هالدينا و انا بسمع انه عرس و خذ غيري و ياب عيال و استقر..ساعتها بموت ولا بكون بالاساس روحي ماتت بسيف غدره...
بعد المغرب اتجمعنا كلنا فالحوش..
فاطمه: وين سار ريلج لطيفه؟
لطيفه: ساير السوق..اقولج فطيم انتي سجلتي تسجيل مبكر؟؟!!
فاطمه: هيه..جدوليه من الساعه 12 الين اربع و يومين من 2 الظهر الين ست العصر..
لطيفه: اتصدقين..و الله هالجدول وايد حلو و مريح..
فاطمه: انا بصراحه مافيني على نشة الصبح...اريد اشبع رقاد..
اليده ضبابه...شو تتطارن انتن؟؟!!! الجامعه..؟؟!!
لطيفه: هيه يدتيه..
اليده ضبابه: و انتي شوه تبينها الجامعه..ان شالله تبين تربيعلها سودا الويه..
لطيفه: هيه يدتيه الجامعه مستقبل..
اليده ضبابه: يعلكن تستقبلن السكن يا رب...بس بس ما شي جامعه..قري في بيتج و جابلي ريلج..و بذرج
لطيفه: اي بذر يدتيه؟؟!!
اليده ضبابه: يلسي في بيتج..و اسمعيها الرمسه..وش تبيبها الجامعه رابعتلها بيطيح هاذا اللي في بطنج..بتضربج دوره و بيغما عليج شرات بنت روّيه طاحت البدله فالجامعه ولا حد درابها الين ما خاست..
لطيفه: لا اله الله يا يدتيه وين بتخيس في هالجامعه يوم انها ما تلقين شبر واحد فيها ما فيه غز بنات؟؟!! و بعدين انا مب حامل
اليده ضبابه: جذبتي سودا الويه...بتغبين علي يدتج؟!!! شله ما تشتهينها العيشه عيل؟؟!! اتوحمين؟؟!!
لطيفه: لا يدتيه..و ربي في سماه اني مب حامل..
اليده ضبابه: و الله يا بنات هالزمن انهن ما يقولن؟!؟!!
لطيفه: و الله و الله يا يدتيه اني مب حامل..ولو حملت لج من وعد انج اول وحده تعرفين شوه تبين بعد
اليده ضبابه: وشله ما حملتي الين الحين؟؟!!! ادريبج ما تبين تحملين تبين الجامعه..
شمسه: وابويه يا يدتيه واحلها بعدها ما كملت شهر..بنات هالزمن خايسات ما يحملن بسرعه..
اليده ضبابه: انزين مب لازم اتداومين العصر انتي اتشوفين على فطيم هاي ما وراها ريل..يا بويه جان بغيتي الجامعه أنشريلها الفير و ردي قبل لا ايرد ريلج..ولا تراه و الله ياحلف انج ما تدبرين شبر صوبها هاي اللي مينن تبكم...
لطيفه: خلاص..خلاااااااااااااااااااااااص...كله ولا حلايفج...خلاص بسجل من الصبح..امرره من ايعديني الساعه ست بتفيزر فالمحاظره جني مداومه في تسويق بو سمره..
فاطمه: ههههههههههههههههههه....الله يعينج...شميس وين سيف؟
شمسه: سيف ساير ويا عمه أحمد السوق..الحين بييون احيدهم عند البيتزا..
فاطمه: أقولج لطفين عندج من الصبغه الكستانئيه؟؟
لطيفه: هي في شي باقي عندي..تبين؟؟
فاطمه: هيه ابغي اصبغ شوي وين القصه..
شمسه: ليش.؟؟!!! حرام عليج و الله لون شعرج وايد حلو..
فاطمه: و الشعر الابيض اللي في قصتيه شوه اسويبه؟؟!!! و الله ام 21 سنه و شعريه ابيض!!!
اليده ضبابه: و يونج يوم بتصبغينه من هالكيماوي السماد بيستوي اسود؟؟!!!
فاطمه: يدتيه هاذا مب سماد..و بعدين انا دوم احنيه ما شوفه الا يبيض زياده عن لول..
اليده ضبابه: و الله انه غشوكن به هالكيماوي..مال المزراع و قالولكن حطنه في شعركم و بيربا شرات الرودس وايه غشكن الله..
لطيفه: ههههههه...يدتيه كستنااااااااااااااااائي...مب كيماوي...
اليده ضبابه: و الخيبتين
فاطمه: يدتيه عيل شوه تبيني اسويبه شعريه ابيض جني عيوز..
اليده ضبابه: وانتي بشوه تفكيرين لين ما بيض شعرج...بشوقج؟؟!!! عنبوه انتي بعدج صغيره و قصتج غاديه شرات لحية بدران المطوع..
فاطمه: عاد شوه انسوي ابتيلنا انا و احمد..عنبوه لطوف انتي ما شفتي شعر ريلج من القمه شقايل مبيض..
لطيفه: هااه؟؟!!! لا لا...هيه هيه..من النص فيه شوي..
اليده ضبابه: و انتي شوه تبين الحرمه اتخبرينها عن ريلها...امررره دوووومج متحرقصه..بنتيه شمسه سيري بنتيه هاتي بنياتج بنحبهن..
شمسه: يدتيه راقدات احيدهن...
اليده ضبابه: ما عليه انا باجر بطرشلج ورس ونيل و حطيلهن شوي وين يبهتهن..
شمسه: ان شالله يدتيه..
فاطمه: شوه لطيفه بتصبغيلي شعريه ولا لا ؟؟
لطيفه: هيه هيه بصلبغ..عقب صلاه العشا..
فاطمه: ما عليه..
++ و شوي انه أحمد داش بالسياره فالحوش..بصراحه مادري بشوه حسيت..بالحفوز..بالتوتر..بالشوق..مادري بشوه..إحساس خاين زارني من غير استئذان..شفته و هو ينزل و ينزل سيف وياه..أراقب مشيته..وقفته..طريقة تعامله مع سيف..كنت أعرف انه أحمد متعلق وايد بسيف بس ما توقعت لهدرجه..نظره عينه و هو يمشي صوبي..كانت وااايد تحمل كلاااام..اول ما يلس و سلم..كل شي انجلب..حسيت بعمري اريد ازووع..و جبدي لايعه..صوته...بمجرد ما سمعت صوته..انجلب كل شي..كل شي..حاسه بضيقه تخنقني..و قلبي مخنوق بصرخه لو تطلع بتملا العالم..بإختصار..اكرهك يا من ملكت روحي!!
ارتبشنا مع سيفوه اللي قام كل شوي ايطلع الالعاب اللي اشتراهن احمد له..و حشرته..و قام احمد و فاطمه ايركبون القطار اللعبه..اما انا..فكنت حاسه بنفسي بنفجر..ليش هو جيه؟؟ ليش مع كل الناس غير و معايه انا لا..ليش كل الناس اتحبه من الصغير للكبير..وانا ما قدرت احوز على قطعه من حبه..ليش كل ما يدش يملا المكان هيبه..و يملا قلبي بهيبه غرامه..ليش يا ربي..ليش؟؟ ليش انا بالذات انكتبت اكون من نصيبه عشان ايعذبني بذنب كبير ما توقعت اكون ضحيته!!! كل التساؤلات خلت العبره تخنقني..وانا افكر و افكر..لا اراديا قمت بسير داخل..لاني و بإختصار هالشخص بيقضي عليه بشوق محكوم عليه بالاعدام..
فاطمه: لطيفه وين بتسيرين؟؟
لطيفه: بسير داخل مصدعه شوي..
أحمد: ما كلتي بيتزا...شي مارجريتا فالكرتون اللي تحت..
++ كل البراءه اللي عيونه..قهرتني..ولا كأنه شي مستوي..ولا كأنه بهالنظره يجتلني و روحي تظهر بمووت من جسديه اللي كل شبر منه ينبض..أحبـــــــــــــــــ رغم كل الظروف ـــــــك !!!! هزيت راسي بالنفي..و قمت..دشيت الصاله يلست شوي على الكرسي و انا احاول القط انفاسي..و أاكد لقلبي و اذكره بكل اللي سواه فيني..كيف يا لطيفه كيف بعدج اتحيبنه عقب اللي سواه فيج؟؟!!! لا لا اصلا انا ما حبه..ما حبه..و المسأله مسأله وقت الين ما انفصل عنه..و كل واحد ايعيش على ذكرى مره..في هاللحظه دش سيف يركض داخل البيت..
لطيفه: سيف...السيافي حبيبي تعال شوي اباك؟؟
سيف: شوه..يالله بسرعه بسير الحمام..
لطيفه: ما عليه..سيفوووه...حبيبي..وين رحتو؟؟
سيف: رحنا الجيمي مول..اشترا عمي احمد ملااااابس واااايد حلوه حقي و حقه..نفس الشي..
لطيفه: و بعد؟
سيف: رحنا محل early learning...
لطيفه: بس؟؟
سيف: لا ...اووهوووو اريد اسير الحمام..رحنا البيتزا هت..و مادري وين..شفنا هناك رياييل وايد اصدقاء عمي احمد..
لطيفه: كلهم رياييل؟؟
سيف: لا لا ما بقولج سر سر..
لطيفه: فديتك سيفوووش..فديتك..ما شفتو هاذيج البنت..صد...أأأأ...صديقتكم؟؟
سيفو ببراءه: منوه؟؟!!
لطيفه: هاذيج البنت الحلوه..هيا..هبه..مادري..( اعرفها منوه بس ماريد انطق بسمها الله يلعنها)
سيف: هيـــــــــــــــــــــــــــــــــــــــــــــه.. .هند!!!! هيه هند..ما شفناها..من زماااااان...حليلها..احبها انا هند
لطيفه: اليوم شفتوها؟؟!!
سيف: لا لا ..عمي احماااااد...قالي ما يحبها...قلتله خلنا انروووح انشوووفها قالي لالالالا..
لطيفه: ليش؟؟!! حليلها..
سيف: قالي خلاص هو ما يحبها تعالي تعالي بصاصرج شوه قالي..سيف و بهمس: لانه هو ايحبج خالوه لطيفه..قالي خلاص نحن ما نحب هند انحب خالوه لطيفه واااااااايد..يالله يالله انا بسير..
++ في هاللحظه دش علينا أحمد..مادري بشوه حسيت..كان فيه بصيص أمل...بس من شفت الضحكه على ويه أحمد..مات كل امل لي ويا هالانسان..كنت متأكده انه سمع اللي دار بيني و بين سيف..برايه خله يسمع..اشعليه..مادري..فيني فرح..بس يموت بسرعه..مشا احمد من جدامي..حسيته بيقول شي..بس الحمدلله انه كمل طريقه..ما يخصه فيني..وماله حق انه يتجسس عليه..كيف ماله حق و انتي يالسه تستجوبين سيف عنه هو؟؟!! ماااادري يا جماعه الخير..حاسه بعمريه على حافه الينان..!!!
عطيت أحمد فرصه انه يطلع فوق الحجره..بعد شوي طلعت فوق..الحمدلله انه مب موجود دش حجرته..ماقدر احط عيني في عينه..دشيت الحجره..اتسبحت..و سشورت شعريه..املي وقتي الفارغ..شغلت الاف ام..و رديت اجهز الصبغه لفطيم..و انا فالحمام سمعت صوت فالحجره..معناها انه فطيم يت على الموعد..وانا فالحمام كنت يالسه اغسل ايديني..بس فجأه سمعته..هو ما غيره..معذب قلبي..يزقرني بأسمي..بأحلا رنه سمعتها في حياتي..من الربشه قمت بسكر فوز الماي فجيته على الماي الحار و حرقت ايدي..مت مت..من الم ايدي و الم قلبي..الحين هاذا شوه يايبنه اهنيه.,.اول مره من عرسنا تجرأ أحمد و دش غرفتيه..شوه السالفه..من الخوف..من الوساوس..من الرهبه..لفيت ايدي بسرعه بفوطه صغيره..و طلعت اركض..لقيته..واقف في نص الحجره..ما أجذب عليكم اذا قلتلكم اول ما طاحت عيني في عينه..حسيته..انه شهق..صنّخ..و اهتز شوي..ليش؟؟ يا ربي سترك..ياي ايطلقني؟؟!! ياي ينهي كل شي..الحين؟؟!! مب جنه بدري..حسيت بالموت...صخيت و حبست النفس,..اترياه ايقول اي شي..بغيته ينطق..اي شي اي شي..بس هو واقف متصنم..وانا اعد انفاسي الاخيره..
لطيفه و بتردد: أأأ..أأحمد...شي مستوي؟؟!! شي بلاك؟؟!!
أحمد و بعد فترة صمت و تردد..: لا..لا.....بس..بس..شوه بلاها ايدج؟
لطيفه و انا خانقتني العبره على الاخير: أحمد...دخيل والدينك؟؟!!! قولي شوه بلاك؟؟!!
أحمد: ما بلاني شي..انتي شوه بلاها ايدج؟
لطيفه: ما شي..ماشي..فجيت الماي الحار عليها و انحرقت..بس ما شي..
++ شفته و هو ياي صوبي..بصمت..بهيبه..بوقار..حاط السفره على جتفه..ولابس الطاقيه بس على راسه و حاط العقال عليها..في كل خطوه يتقربها صوبي..أفقد نبضه من قلبي..شفته وهو يمسك ايدي و يرفعها عشان ايشوفها..سحبني و يلسنا على الشبريه..وانا مثل المسحوره..
أحمد: وايد محمره..ما عندج فازلين؟؟!!!
لطيفه: هيه هيه عندي..
أحمد: وينه؟
لطيفه:هاه؟؟!!...شوفه اهنيه..خله خله انا بييبه..
أحمد و هو يفقد الصبر: لطيفه وين الفازلين؟
لطيفه: بتلقاه فالسده الاولي اللي عدالك..
قام أحمد و طلع الفازلين من السده..طلع شوي بإيده و حطه على ايدي..بس فجأه سحب ايده..
أحمد: لطيفه فركيه على الحرق..
نفذت اللي طلبه مني..أول ما رفعت عيني..شفته مركز عينه على ايدي..مرتبك..ولا شوه..؟؟!!
لطيفه: شي بلاك أحمد.؟؟ تبا ثيابك ولا شي..؟؟
أحمد: هاه...لا...( قام أحمد و طلع كرتون من الكيس اللي كان يايبنه معاه)..لطيفه هاذا موبايل..
لطيفه: لشوه؟؟!!
أحمد: حقج؟؟؟ أكيد بتحتاجينه..حطيتلج بطاقه..الرقم مب متسلسل عشان تفتكين من الحشره..
لطيفه و انا اصد الصوب الثاني: ماباه..
أحمد: ليش انتي ما بتداومين فالجامعه عقب اقل من شهر؟؟!!
لطيفه: هيه..
أحمد: عيل اكيد بتحتاجينه..
لطيفه: ما با شي من عندك!!! امبونها الا هالفتره و بتعدي..و بروح بيت أهليه
++ شفته و هو معصب..لف براسه الصوب الثاني و قالها: اوووووووف..بقهر,,,بحسره..و بغصه..كنت اتوقعه بيفرح..بيستانس..او اي شي عدا ردت الفعل هاذي..
أحمد: دامنج على ذمتيه..اللي اقولج اياه سويه..و حتا لو ...لو..ما كنتي على ذمتيه..ما حد بيصرف عليج غيري..و بس خلاص..
لطيفه: انزين انته ليش عصبت!!!! مب هاذا اللي تباه انته؟؟!!!
أحمد: بس خلاص,,,
++ قالها بهدوء...بس بتهديد..وانا من اشوف حياته اتعقدن..قلت احسلي اشل الموبايل..و اسكر على الموضوع..خله الهدوء اللي بينا احسن الين ما ننفصل,,ننفصل بهدوء..من دون شوشره..بيكون اسهل..!!
رد أحمد و مسك أيدي المحروقه..
أحمد: ما تبيني اوديج المستشفا...
لطيفه: ما يرزا هاذا حرق عادي بحطله معجون و بيخوز..
في هاللحظه انفتح الباب..و دشت فطيم و هي محتشره..و حاطه ايدينها على خصرها..
فاطمه: لطفيننننننن!!!! وينج انتي...من الصبح انا اترياج....
++ أول ما طاحت عين فطيم علينا و نحن يالسين فوق الشبريه و احمد لاصق فيه و ماسك ايدي..شفت لون فطيم يتلون بألف لون...أزرق و احمر و أخضر..
فاطمه: أأأأأأأأأ....سوووووري...سوري..و لل..و الله ...و الله اني ما كنت اعرف انك اهنيه؟!! باي باي..
في هاللحظه..حسيت بعمريه امووووت من الفشله..وين فطيم...احمرررر ويهي...و قمت من على الشبريه..من الاحراج ما عرفت وين اسير..وقفت في نص الحجره..لفيت صوب احمد..حطيت عيني في عينه..فجأه انفجر أحمد من الضحك..شوي شوي..ما حسيت بعمري والا انا فطساااانه من الضحك..ضحكنا ضحك..ألين ما وقف أحمد فجأه..يبا يطلع مر من عدالي..وانا بعدني اهتز من الضحك..مسكني أحمد من لحيتيه...
أحمد: سلامات لطيفه..و ثاني مره اتحذري..ما تهونين عليه اشوفج محرقه ولا صايبنج باس...
++و طلع عقب ما خلاني في ذهول..مثل الخبله في نص الحجره..حايره بين اني اضحك..ولا اصيح..عشنا شهر يا أحمد..شهر كامل كل واحد ما يعرف عن الثاني اي شي..و كل شي كان بخير..ليش الحين..!!! ليش مصّر انك تحيي حبك في قلبي..ليش..ليش...هونها عليه يا احمد..هون فراقك عليه..ارجوك؟؟!!!
++ عدن كم يوم على خير..رد فيها أحمد لطبيعته..كل واحد يتجاهل الثاني..اما الباقي فما شالله علينا كل واحد ايمثل احسن عن الثاني جدام الاهل..ومع قرب الموسم الدراسي اليديد..بدينا نطلع و انسير دبي و الشارجه..عشان يشترن البنات ملابس للسمستر اليديد..خاصه انه ضبابه اول سنه لها فالكليه..أما أنا مب محتايه اسير اشتري شي يديد خاصه انه معظم ثايبي يديده ما لبستهن..بس حبيت اغير جو و اطلع مع البنات..التواصل بيني و بين احمد كان عن طريق الموبايل..فإذا كنت اريد اسير مكان مع البنات اطرشله مسج استأذن منه و هو ايرد عليه بالموافقه..في مره من المرات كنا رادين من دبي..اول ما وصلت لقيت احمد و سيف محتشرين فالصاله..دخلت و سملت و دشيت على طول الغرفه اخذ شور..و انا طالعه بتعشا..سمعت أحمد و هو ايكلم سيف..
أحمد: سيفووووه...شوه تباني اسوي؟؟!! خلاص هالتلفزيون مايشتغل..باجر ان شالله بنشوفه فالصاله..تحت..
سيف: لا لا لا ....مااااااريد...أريد اشوفه اليوم..عمي أحمد,,,
أحمد: سيف تراك ما تنعطا ويه...من نشيت و انته مستلمني...بويه سر عند امك خلها اتشغلك اياه
سيف: ماماه ما عندها دي في دي..
أحمد: انزين يالله شل الدي في دي عندكم يالله طلع ابا ارقد أنا قدها الساعه 11 و نص و انا من البارحه ما رقدت
سيف: اووهووووووو....
أحمد: اوووهووو ولا غيره...يالله يالله فارج...فارج..و سكر الباب و الليت..
سيف: كلكم ما تحبوووووني....ما حبكم..( و بدا سيف ايصيح)..ماماه ما تحبنيه باباه ما يحبنيه..و انته اليوم ما تحبنيه...ماباكم...اريد امووت..مابااااكم..
أحمد: يا من شراله من حلاله عللللله!!!!!!!! رووح باباه رووح خلني اوطي راسي..
سيف: انزين انروح انشوفه داخل تلفزيون خالوه لطيفه..
أحمد: شوووه؟؟!!! لا لا عيب...روح سيف..يالله روح..قلنالك باجر بنشوفه..
سيف: يالله يالله انروح...تلفزيون مالها كبيررررررررررررررررررر مثل السينما,..يالله عمي أحماد..
أحمد: يا هاذي ما سنت...انتي ما تيبك الا القوه...
++و فجأه انه أحمد طالع بالوزار و الفانيله..و شال سيف على جتفه و منزل راسه من ورا يعني نص الجسم من ورا و الريول من جدام..و سيف فطسان من الضحك..
لطيفه: شوه بلاكم؟؟!!
أحمد: قطو متشرد...بنرده عند اهله...خل امك اتسدك عندها بنات ولا غيره...
سيف: خالووووه لطيفه....ساااعديني...ساعدينييي...ابطاااال الديجيتال...اصدقائي انهووو الوحش...اريد المساعده..هههههههه...خالوه نبا انشوف الدي في دي عندج..و عمي احماد يستحي ايدش حجرتج!!! يبا بس اينام اينام اينام..كله يناااام..
لطيفه: ليش التلفزيون اللي في حجرتك ما يشتغل..
أحمد: لا ناقع الساكت..
لطيفه: انزين تعالوا طالعوه فالحجره عندي..انا بسير اتعشا..
سيف: ههههههه....هيه خالووووه لطيفه شوووووكررررراااان
أحمد: يا بويه انته ما يخف نشاطك...من اصبحت و انته تراقص سر بويه ارقد انا ورايه دوام باجر..
لطيفه: تعال عن خاطره شغله الدي في دي في حجرتيه و برايه ايطالع..وانته برايك اذا بترقد المهم شغله له.
أحمد: لا لا ما عليج منه...وديه وديه عند امه..ما ينعطا ويه وااايد..اعرفه زين..
سييف: تستحــــــــــــــــــــــــــــــــــــي,,هيه هيه هيه...عمي احماد يستحي من العروسه مالته..
لطيفه: ما بيفججك شي من لسانه..الحجره مفتوحه..اذا بتشغلونه فيها على راحتكم..
++ و طلعت عنهم..رحت البلكونه اللي مفتوحه فالصاله اللي فوق,,و اتجمعنا كلنا انا و شمسه و فاطمه و ضبابه..و عمتيه بخيته..يلسنا نتعشا..و انسولف..رغم انه حر بس كان شوي مهب بارده..الين ما وصلت الساعه 12 و نص...
شمسه: يا بويه برايكن انا بسير اشوف البنيات..لطيفه وين سيف؟
لطيفه: سيف ايشوف الدي في دي في حجرتيه...
شمسه: يالفضايح..
لطيفه: لا لا ...أحيد احمد عنده..
شمسه: يا حافظ على ولديه صدق انه احمد ابوه.. وايد ماخذ راحته الشيخ..
بخيته: وايه بالستر...شوه بيستوي انزين..هاذا عمه..
فاطمه: امايه عاد سيف ما ينعطا ويه وااايد..لزقه..
شمسه: كله من احمد..وين ما يسير شله وياه..ألحين الصبي..ما يفارج..
ضبابه: عاد الريال عرس الحين..شلي ولدج اكيد يبا ييلس ويا حرمته..
لطيفه: لا لا عادي...برايج شمسه سيري عند بناتج..يوم بيخلص الفلم انا بييبه عندج..
++ سرت الغرفه..اول ما دشيت شفتهم..حاطين كل الكوشنات مال الصاله في حجرتيه..و منسدحين على الارض..و مبندين الليتات و مشغلين الاباجوره بس..و مندمجين على الاخير سيف و احمد..
دشيت شوي شوي..أتفاجئت أنه أحمد يالس ايتابع الفلم مع سيف..ما بغيت احرجهم..دخلت سيده الحمام..اتغسلت و طلعت..ماتكلمت..يلست على الشبريه اقرا مجله..والله العظيم اشوف الحروف كله ايدشن في بعض من الربكه..لاحظ أحمد وجودي..
أحمد: يالله يالله سيف يمكن خالوه لطيفه تبا ترقد..يالله باجر بنكمله..
سيف: لا لا عمي خلاص ما بقى شي...برايها خالوه لطيفه...
لطيفه: برايه برايه عادي اذا بتشوفونه...انا بسير عند البنات..أحيدها فطيم تباني شوي..
سيف: خالوه لطيفه تعالي شوفي معانا شريك تو وايد حلو..
لطيفه: و الله..
أحمد: عجيت هالفلم...وااايد حلو..
سيف: تعالي تعالي خالوه لطووف تعالي شوفيه معانا..تعالي عدالنا..
++ في هاللحظه طاحت عيني في عين أحمد..ارتبكت..قمت و يلست عدالهم على الارض..و اندمجنا فالفلم بسرعه..خليت سيف بيني و بين أحمد اللي كان منسدح على الكوشنات..ما حسيت بالوقت..ايخطف..و من شده التعب..لاني من الصبح اليوم وايعه و بعدين خط دبي..غفيت شوي..عدال سيف..ما حسيت عقب فتره الا بدق خفيف على الباب..فزيت بسرعه..لاني بالاساس ما كنت مرتاحه فالنوم..انتبهت انه سيف راقد و احمد بعد راقد..و الفلم مخلص..جيكت على الساعه شفتها الساعه وحده و نص..رحت و فجيت الباب..
شمسه: لطفين..فديت لا ترمسين...تراني قااااااااااافطه على الاخير...
لطيفه: ليش شميس..شي بلاج؟؟!!
شمسه: لا لا ...بس الشيخ اللي مفضحني وين؟؟!!!
لطيفه: سيف...؟؟؟ فديته رقد داخل...
شمسه و هي اتغكض عيونها: لا تقوليلي أحمد راقد بعد؟؟
لطيفه ألتفتت داخل بسرعه: هيه احمد راقد..
شمسه: ياااااا فضضضضضضضضضضضضضضضضيحتيه...فضايح فيكم...هالولد يباله هزبه محترمه
لطيفه: هههههه...بالعكس عادي..الصبي متعلق عمه..ما فيها شي..
شمسه: متعلق شي..و انه يلصق في عمه المعرس شي ثاني؟؟!! هاتيه هاتيه لطيفه بالله عليج بشله
لطيفه: هههههه...شمسه انتي اتعرفين بالاوضاع بيني و بين احمد يعني ما فيها شي لو بات سيف عندنا بالعكس ايخف التوتر بينا..
شمسه: لا حبوبه..هاذا ريلج..و انتي بعدكم معاريس..و الفرصه جدامكم..و هاذا ولديه انا بتصرف وياه..هاتيه لطيفه استحي ادش داخل
++ قمت و شليت سيف اللي كان حاط راسه على جتف أحمد..شوي شوي..بصراحه حبيت اتعمد الدفاشه..عشان ايقوم أحمد و ايسير يرقد في غرفته..بس أحمد في ساااابع نومه..شليت سيف و طلعت به برا
شمسه: هاتيه هاتيه عنج..انتي سيري عند ريلج..
لطيفه: و الله ما تشلينه انتي بعدج توج مربي..خليني انا بوديه..
رحت قسم شمسه و حطيت سيف على الشبريه..و يلست عند شمسه..شوي..
لطيفه: يمكن غثيتج و انتي تبين ترقدين؟
شمسه: انا ارقد هالوقت؟؟!!! لا حبوبه كل يوم سهاري الين الساعه ثلاث الصبح..
لطيفه: الله يعينج...ياختي احمد الحين راقد فالحجره شوه اسوي؟؟
شمسه: شوه اتسوين بعد؟؟!! سيري ارقدي عند ريلج..
لطيفه: شمسووووه..هاذا و انتي ادرى بالاوضاع اتقولين جيه..برايني و لو ابات عندج ولا اني ابات وياه في نفس الحجره..
شمسه: و الله انا ما عندي مانع..بدال الحجره عندي حجرتين..بس يا لطيفه..استغلي الفرصه..يمكن الله يبا يجمعكم..
لطيفه: ما باه..ماباه..ماباه...ابا الفكه منه..ما تحمل شيفته..
شمسه: لانج تحبينه...مب متحمله منه هالشي..
لطيفه: يا ربي شوه اسويه...لا لا انا متأكده انه سار يرقد في غرفته..ما بيرتاح فالرقده على الارض..و هو رواه باجر دوام..
شمسه: توكلي على الله...لطيفه..
لطيفه: لا لا عندي احساس انه سار يرقد في غرفته..يالله برايج تصبحين على خير
شمسه: و انتي من اهل الخير..
++ رحت صوب غرفتيه و انا نبضي واصل حلجي..ميته من الخوف..دشيت الصاله..وانا في كل خطوه اقول لا لازم اسير انام عند شمسه..يالله كيف بنام عندها لو حد شافني؟؟!! ما جازف..دشيت الحجره وانا مغمضه عيوني..ال ما فجيتهن..لقيته احمد بعده نايم على الارض..اتقربت منه شوي شوي..خلاص بوعيه و بخليه ايسير يرقد في حجرته ليش انا مكبره السالفه؟؟!!..اتقربت منه..وخيت عليه..وانا ميته..ميته..طاحت عيني على ويهه..شكله رااااقد..و تعبان على الاخير..اتأملت ملامحه..لاول مره قدرت عيني اتدور في ويهه..من دون لا أخاف انه ايصيدني..شفت حواجبه المقارين..من اكثر الاشياء اللي كنت احبها في أحمد..حواجبه..و الحاجب الايسر اللي كان مقسوم نصين..كنت دوم اقووول و امني نفسي..انه اذا كان أحمد من نصيبي..اول شي بسويه..أني ألمس حاجبه الايسر..و بالذات المكان المنشق فيه نصين..لانه ايذكرني..بحبي البرئ له..من دون احساس..لا شعور...مديت صعبي و لمست الحاجب..و حركت صبعي اتلمسه من بدايته لنهايه..بس فجأه
تحرك أحمد..و فج عيونه شوي شوي..في هاللحظه مت!!! تيبست..و لعنت نفسي الف مره لاني ما قدرت اتحكم في أعصابي.,.في لحظات حبست أنفاسي..و حسيت بعمريه خلاص اتجمدت من الخوف..بس الله ستر انه احمد ما انتبه..و رد ايكمل رقاده..حبيت اصصح الوضع..و انه لو كان بالفعل شافني و حسبيه..فأنا اريد اوهمه اني كنت اريد اوعيه...
لطيفه و بهمس: أحمد....أحمد..
ما شي رد...
يالله شوه اسوي الحين..شوه الحل...رديت ازقره في محاولات يائسه انه ايقوم..بس ما شي فايده..حطيت ايدي على جتفه و هزيته بخفه..ألين ما انتبه..
لطيفه: أحمد...احسلك اتنام في حجرتك..لان لان..يمكن ظهرك بعدين ايعورك من الرقاد على الارض..
++ كنت أعد الثواني..اللي مرت عليه جنها دهور..انتظر اي رد فعل من أحمد..لانه ما كان في وعيه..و كان دهمان..أول ما رفع عينه في عيني..سمعت ايقول كم كلمه بس ما فهمتها..بس استانست لانه قام الحمد لله..وقفت في اللحظه اللي وقف فيها..و انا اترياه يطلع من الحجره..بس..بس..ما طلع بالعكس..صوّب سيده صوب الشبريه اتحلف و رقد..يا سلاااااام...شوه الشيخ لا يكون الين الحين يتحرا هاذي حجرته!!! يالله الحين شوه اسوي..اسير اوعيه مره ثانيه؟؟!! اتقربت منه..برايه خله اوعيه و ايسير غرفته..بس شوه الفايده احمد تلحف و غطا جسمه كامل..لا حووووول..زادني قهر..اووووف..شوه هالوضع هاذا..دشيت الحمام و بدلت و لبست بجامتيه و انا عندي امل اني لو طلعت بلقاه طلع و راح غرفته..بس لا امل ولا غيره..خلاص الريال في سابع نوومه..و شكله بالفعل تعبان لانه امررره ما يحس بالازعاج اللي اسويه فالغرفه!!!
شليت مجله و طلعت برا فالصاله..لاني صدق صدق ما عرف شوه اسوي..يلست اجلبها و انا فيني رقاااااد..مسطله على الاخير..غفيت شوي على الكنبه..بس ما ارتحت..لا حول ولا قوه..بسير ارقد شوه اسوي يعني..اذا هو راقد فأكيد ما بيحس اني رقدت عداله..رحت الغرفه و أنا عيوني متلاصقات من النووم..طلعتلي لحاف من الكبت..و رقدت من الطرف اللي متعوده ارقد عليه..بعد الحمدلله انه مب راقد من صوبي..ثواني و ولا حسيت بللي حواليه..قمت علاساعه ست الصبح اريد ألحق على الصاله..اول ما فجيت عيوني..اوي شي اتبست لانه احداث 12 ساعه الاخيره طفت جدام عيوني..لا اراديا التفتت صوب الطرف اللي راقد فيه أحمد ما حصلته..لا و رتب الفراش من بعده..قعدت ربع ساعه فالفراش و انا اتأمل المكان اللي رقد فيه..معقوله حس بالذنب..فرتب الفراش عشان ما احس انه رقد عدالي..ولا ندمان..ولا شوه؟!! مكانه..ريحته..المخده اللي رقد عليها..شواهد كلها على الالم اللي فقلبي..غمضت عيوني و نزلت دمعه حاره ليش مادري؟؟!!
~~~~~~~~~~~~~~~~~~~~~~~~~~~~~~`
فاطمه: شوفي شوفي عبدالله الرميثي؟؟؟
شمسه: ألحين هاذا اللي حاشرات البنات الدنيا عليه؟؟!!
فاطمه: ماشالله عليه جمال..و صوت..
ضبابه: وع ما يعيبنيه وااايد فيه نعومه...
لطيفه : بدلن على نجوم...ابا اشوف غنيت حربي اليديده...
شمسه: منوه هاذا حربي بعد؟؟؟
فاطمه: اسمعوا انتو؟؟؟ ما تعرفينه؟؟؟
شمسه: و أنا شدراني..تراه هالقنوات ما يدانيهن عمير حاذفنهن من عنديه...
فاطمه: حليلح...
ضبابه: خيبه عيل لو ايي و ايشوفهن هنيه عندنا عادي يلعن خيرنا...
لطيفه: لا لا عاد مب لهدرجه عمير...
ضبابه: هاي هاي هاي..بعدج ما عرفتيه...لعن سابع خيري يوم عرف اني نعشت جدام سلطان فالعرس
لطيفه: لا و الله؟؟؟
ضبابه: هيه...و حلف عليه اني ما ظهر جدام سلطان...الا اذا بالصدفه و اخذ السلام و اسير..
لطيفه: خيبه؟؟!!! وايد عصبي عمير..
شمسه: حرام عليكن..عصبي هيه بس قلبه وااايد طيب
لطيفه: حليله و سلطان حااط في خاطره عليج يا ضبوب..ايقول ليش يوم ييت بوادعها ما ظهرتليه
ضبابه: ياووووويليييي عليه...شوه تبيني اسوي؟؟!!!
شمسه: ما بيرد سلطان من صلاله؟؟؟
لطيفه: ما دريبه احيده ايقول اليوم...و امايه متضيقه عليه..
شمسه: الله يهديها دووم حارقه اعصابها عليه..شوه سوت من الضغط؟
لطيفه: مساعه يايه من عندها..لا تخبرين..طايحه و من لحفه راسها...
ضبابه: سلامتها عمتيه من شوووه ارتفع الضغط عندها..؟؟
لطيفه: شدراني..و الله انها مره ما تروم اتفج عيونها..معصبه على حبيب القلب سلطان..
فاطمه: و شوه مسوي سلطان؟
لطيفه: تراه عليهم امتحانات تحديد مستوا فالكليه و الشيخ مسوي اكبر طااااااف..و كل يوم اترشاه ايي ما ايطيع
ضبابه: هيه و الله ورا باجر الامتحانات..
شمسه: و هيه الله يهديها ليش تحرق اعصابها بلاش على سلطان..من يرتفع الضغط عندها حتا العيشه ما تذوقها
لطيفه: الله يهديه..و الله انها قوة خذت الحبوب..و هو الله يهديه ايزيدها ايقولها امرره بحط الضو على السياره و بيي قبل الامتحانات..و هو من يقولها جيه احتشرت..
ضبابه: الله يهديه
و في هاللحظه حطوا اغنيه فاظل المزروعي لي ما يبانا من نباه في نجوم..
شمسه: لا اله الا الله يالفسق...شوه هالرقص هاذا؟؟!!!...الحمدلله انه ريلي حاذفنهن هالقنوات
فاطمه: عيل ما شفتي شي؟؟!!! هاذا هين!!!
ضبابه: لطفين...اتشوفين هاذي اللي عنده فالفيديو كليب اتشابهج؟؟!!
لطفين: اتهبي...الله يسقمها..
ضبابه: و الله و الله تاخذ شوي من ملامحج..مب صح شموس؟؟
شمسه: اي وحده؟؟
ضبابه: هاي هاي اللي لابسه تنوره كاروهات...
شمسه: هيه و الله تاخذ فرّه منج..
لطيفه: اتهبي هابها الله ..ما لقيتن الا هاي الشبهانه اتشبهني بها..و الله اني انا احلا عنها..
الكل: هههههههههههههه
لطيفه: ضبوب قومي قومي رقصي...
ضبابه: مافيني...
شمسه: قومي قومي خليني انغير جو..
ضبابه: عاد الله يسقمها هالغنيه ما ترقص..
فاطمه: قومي يالله بحطلج المسجل..
++ و شغلن المسجل و ارتبشنا وياه..و قامت ضبابه ترقص ما شالله عليها لابسه بس بجامه قطعتين و فاله شعرها لانه متسبحه و تباه ايجف..الله صلي على محمد صدق سبحان اللي خلق و كمل..يوم خلصت الاغنيه يت اغنيه سعيد السام.." أهواك انا"
ضبابه: أمووووووت عليها هالاغنيه...
فاطمه: و الله انا فيني هزه
شمسه: و الخيبه هزه ارضيه..
فاطمه: هههههههه...شلنيه الهوا
لطيفه: يالله عيل...
قامن فاطمه و ضبابه يرقصن..فلت فاطمه شعرها..و تمن ينعشن و ايبسن..
لطيفه: داون..داون...الله عللللللللللللللللللليكم....ورا ورا ورا...
شمسه: ياااااااااااااااااااااااابس...روووح...رووح..ضبوب.. .
و كانت الاغنيه : " أهواك يا قايد اريوم يا بو شعر ضافي و نشال..أنته القمر ما بين الننجوم..ياالغر يا مجمول لخصال.." و ضبابه أتأشر علي نفسها كأنها هيه المقصوده بالغنيه..
" و له رموش كنها سهوم..دعج اللواحظ موووت قتّال..ريجه عسل صافي يشفي المرض من كل الاعلال"
لطيفه: عاااشووووووو....يالله ضبوب و فطيم...رقصه يا مودي...يالله عن خاطريه رقصه يا مودي
شمسه: شوه هاي بعد؟
لطيفه: هاي رقصه عراقيه في أغنيه يا مودي..
++و يت ضبابه جدام لطيفه و تمت أتأشر على لطيفه وهي اتغني.." بو ثنايا حص منظوم..و من الجواهر نوع و اشكال..أذا تبسم عطر مشموم..شوفته تخوز ضيقه البال..بو خصر متميز و مقسوم..و خد وره كالبدر شعال..أموت في حبه و مغروم..و أشفق عليه و دايم أسال" و هي اتأشر على قلبه..
لطيفه: منو؟؟؟ منو.؟؟؟ منوه اللي تشفقين عليه؟ و دايم تسألين؟؟
ضبابه و هي أتأشرعلى قلبهاو تهمس: س-ل-ط-ان...
لطيفه: عااااااااااااااااشت بنت سيف...ألحين بنسويله سلطان..بشوفه وين وصل...
شمسه: شوه مايرد عليج؟؟
لطيفه: لا مغلق...بس المفروض انهم وصلوا ....
شمسه: يمكن الشبكه مشغوله..
لطيفه : يمكن..
++ و ارتبشنا مع البنات و السوالف..و سارت شمسه تييب بناتها التوم..و ما خلينا اغنيه ما علقنا عليها ألين ما متنا من الضحك..عقب شوي سمعنا دق على الباب..
شمسه: منوه اللي يدق؟؟
ضبابه: مادري بس جني سمعت صوت عمير؟؟
شمسه: لا شوه عمير..اليوم الثلاثا ما بينزل..
فاطمه: قومي قومي غيري القناه لا يكون عمير و يعقرنا بعد..وانا بسير اشوف منوه اللي يدق..
++ و بالفعل كان عمير اللي يدق..
فاطمه: لطيفه...عمير بيدش اهنيه
لطيفه: لا لا الله يخليج انا لابسه تنوره و قميص و متزرزره ماروم اطلع جدامه..
فاطمه: هيه بس ما رمت اقوله شكله الدخان بيظهر من ذنيه..أخاف ايقول شوه كنتن اتسون قافلات..سيري لبستي عباتي
لطيفه: ما عليه..
++ رحت و لبست عباه فطيم و يلست على طرف..دخل عمير و هو بالفعل كان شكله دااق العداد عنده..ما تكلمنا..
عمير: شوه كنتن اتسون؟؟
ضبابه: ماشي..
عمير: عيل ليش فاله شعرج؟
ضبابه: ماشي كنت متسبحه و اباه ايجف
عمير: و التجفيف ما يستوي الا بالرقص؟؟!!!
فاطمه: ما رقصنا منوه ايقولك؟
عمير: سيف ايقولي..انكن اتراقصن..في خاطريه اعرف ليش يوم يجمعن البنات لاااااازم يرقصن..بتموتن لو ما رقصتن؟؟!!!
شمسه: برايهن انخطف الوقت مليله..
عمير: وين شماني عيل؟
شمسه: شماني راقده وعندها البشكاره..و مهايه اتعرفها من طاحت وهيه اتصيح لازم حد ايتم ايهزبها يبتها هنيه عندنا..
++ في هاللحظه قام عمير ويلس عدال حرمته على الشبريه..و شل مهايه و حطها في حضنه..و حط ايده الثانيه على جتف شمسه...
عمير: رمستي امج اليوم؟
شمسه: لا..بس الضحى لطيفه يايه من عندها..
عمير : شوه ريتيها لطيفه؟
لطيفه: الحمدلله بس شوي مرتفع الضغط عندها و تعبانه...
عمير: هيه...شمسه ...ما رمستنه سلطان اليوم؟
شمسه: لا بس لطيفه من الصبح اتسويله و تلقاه مغلق..ليش؟
عمير: لا ماشي بس اتخبر...
شمسه: عمير...و رفجه..اتقولي شي مستوي..؟؟؟؟؟؟ عمير...عمير....قولي قولي حد صابه باس..ابويه شي بلاه؟
عمير: لا لا ماشي..كلهم بخيرو سهاله..بس...
شمسه: بس شوه؟؟!!!
عمير: ماشي...شمسه مسكي اعصابج..انتي انسانه مومنه..بس سلطان سوا حادث...
شمسه: شوووووووووووو
لطيفه: عمير...عمير,,,,منوووووه...منوووووه؟؟؟
عمير: هدن اعصابكن يا بنات الحلال...قولن لا اله الا الله...ما شي مستوي..سلطان سوا حادث على درب بهلا..ووو....
23-03-09, 04:56 PM
جديد مواضيع قسم الارشيف
العرض العادي
