ــــــــــــــــ .. ــــــــــــــــــــــ .. ــــــــــــــــ

كان فيصل وماجد راجعين من صلاة العصر وتوهم داخلين البيت
فيصل : ماجد تعال نجلس بالحديقه بتكلم معك بموضوع
مشى ماجد مع فيصل وهو متوتر لانه عارف ان فيصل بيفتح موضوع زواجه من منال اللي صار يحس بنفور حتى من سيرتها من بعد ماطلع من عند ندى الفجر ونفذ كلامها وصلى الاستخاره لكنه خاف ان نفوره منها هو بسبب كلام ندى ومو بسبب استخارته
فيصل بعد ماجلس على احد الكراسي اللي موجوده بالحديقه : هاا ماجد وش قررت عليه
ماجد : والله مدري يافيصل عطني مده خلني افكر
فيصل : السالفه مايبي لها كل هالتفكير ولو ما انا شايف ان منال تناسبك ولا ماكان تحمست للموضوع
ماجد : فيصل انا ماكنت حاط فكرة الزواج كلها براسي وفجاءه كل شي يصير حتى اختيار اللي بتزوجها عشان كذا محتاج افكر بالموضوع اكثر
فيصل : اللي تشوفه بس ياليت ترد لي قبل الاربعاء
ماجد : وش معني الاربعاء ترى مو من بعده مايمديني اتخذ قراري
فيصل : لاني ناوي افاتح عمي سلطان بالموضوع يوم الاربعاء ولا ناسي انه بنجتمع بالمزرعه بمنااسبة رجعتك بالسلامه
ماجد : لا مانسيت وخلاص يافيصل سو اللي تشوفه مناسب
فيصل ماصدق يسمع موافقة ماجد بس يبيه بأقتناع منه : لا تستعجل بالموضوع ومعك اليوم وبكره فكر فيها زين وبعدين قولي وش قراراك
خلص فيصل كلامه وشاف سياره داخله لساحة بيته نزلت منها بنت محتشمه ومو باين منها اي شي ومعها خدامتها
ماجد : شكلنا بننطرد دام جايهم ضيوف
فيصل : هههههههههههه عن نفسي ودي انطرد على الاقل يكون عندي سبب اروح اشوف فيه هالعله وليد
ماجد : الحين وليد صار عله
فيصل : من كثر حبي له
ماجد بمزح : اجل ياشين حبك
قرب فيصل من السياره بعد مادخلت البنت داخل البيت وهو شاك انه شاف هالسياره والسائق قبل كذا : السلام عليكم
السائق : وعليكم السلام
فيصل : تشتغل عند مين ؟
السائق : عند العم سلطان ال.... وهذي عمتي منال
فيصل وهو يناظر ماجد وبصوت واطي : شفت بعينك يعني لو مجنون لاتضيعها من يدك
ماجد بمزح : اشوفك معجب فيها وش رايك اخطبها لك
فيصل : عندي اللي اغنتني عن كل بنات حواء لكن اذا تأخذ بشوري لا تفرط بــ هالجوهره
ماجد : شورك وهداية الله يابو عبدالعزيز واللي تشوفه مناسب سوه على بركة الله
فرح فيصل بقرار اخوه وبعدها تفرقو فيصل راح يشوف ليان اذا محتاجه شي وبعدها طلع لــ وليد اللي مازال في مكتب الشركه ومايطلع منه كل يوم غير بعدا الساعه 9 اما ماجد طلع عند ربعه

ــــــــــــــــــــــــــــــ .. ــــــــــــــــ .. ـــــــــــــــــــــ

دخل طلال ولين للشقه واستقبلتهم الخادمه بأبتسامه ورحبت بلين
لكن لين ماردت او بالاصح مازالت عايشه بعالم ثاني ونظرتها تتفحص بتوهان كل زاويه بالشقه
رد طلال الابتسامه لسيدة العجوز اللي كانت تعتني بشقته طول الخمس سنوات اللي فاتو واعتذر منها بالنيابه عن لين وقالها انها مريضه وتعبانه شوي
كسرت خاطرها لين وعرضت على طلال دامه بيسكن بصفه مستمره بالشقه انها تجي تنظف يوميآ طول فترة تواجده
لكن طلال شكرها وقاله انه يكفي تجي يوم بعد يوم وتنظفها
استأذنت وطلعت بعد ماقالت لطلال انها حضرت له اكل وان صينية الدجاج بالفرن ولازم يطلعها بعد ربع ساعه
طلال بعد ماطلعت الشغاله : هاا حبي كيف شفتي الشقه اعجبتك او لا
لكن كانت على نفس الحاله بدون اي استجابه منها اخذها من يدها وصار يلف فيها على الشقه ويقوله هذا الصالون وهنا مكتبي وهذا المطبخ وهنا دورة مياه صغيره وهذي غرفتي انا ولما وصل لغرفتها وهذي غرفتك انتي حبيبتي وفيها حمام داخلي عشان تأخذين راحتك اكثر
وقفت تناظر بالغرفه وللحظه تغيرت ملامح وجها من حالة الجمود للحزن وتجمعت الدموع بعيونها لكنها كانت مجرد ثواني وبعدها رجعت لنفس جمودها
اما طلال كان محتار مايدري وش فيها تمنى يدفع عمره بس يعرف سر طيف الحزن اللي مر على ملامحها وسر هالدموع اللي تجمعت بعيونها لثواني
طلال : عمري حابه ترتاحين بغرفتك على مااجهز الاكل واناديك او تجين معي
لكنها ماردت عليه غير بمسكت يدها له كأنه تقوله خذني معك ماابي اجلس بروحي
فرح طلال بــ هالاستجابه البسيطه واخذها معه للمطبخ .. وجلسها على كرسي طاولة الطعام وصار يحط الاكل اللي جهزته الخادمه من سلطه وشوربة الفطر بالكريمه والبطاطا المهروسه واخر شي صينية الدجاج اللي طلعها من الفرن
طلال وهو يجلس : يله حبي سمي بسم الله وكلي
لكنها مامدت يدها ولا اكلت اي شي
اخذ طلال الملعقه وصار يشربها من الشوربه لكن بعد كم ملعقه رفضت تفتح فمها حاول يعطيها طلال اي شي ثاني غير الشوربه لكنها رفضت
قرب منها ومسك وجها بين يديه وبرجاء : لين ماراح اقول عشان خاطري كولي لاني اعرف انك تكرهيني لكن عشان خاطر اللي انتي تحبينهم ارجوك كولي
لكنها استمرت على رفضها عرض عليها عصير لكنها رفضت واخر شي حاول يشربها ماء واللي استغربه انها مسكت الكأس بيديه وشربت كل الكأس
طلعها طلال من المطبخ وجلسها بالصالون وصار يفتش في الدي في ديات اللي عنده وبما انه ماينفع لها فلم رعب ولا اكشن ولا حتى رومانسي استقر رايه على فلم كوميدي شغله وجلس بجنبها على نفس الكنبه
مرت نص ساعه من الفيلم وطلال يتمني يشوف لو طيف ابتسامه على شفايفها لكن الواضح انها ماتشوف شي ولا هي مركزه على شي

ـــــــــــــــــــ .. ـــــــــــــــــــــ .. ـــــــــــــــــــ


في الصالون في بيت فيصل

كانت جالسه منال وماعندها غير ليان لان ندى من شافتها دخلت غرفتها بدون حتى ماتسلم .. وام ماجد وام طلال راحو عند ام مشاري جارة ام ماجد من سنوات واكثر من اخت بالنسبه لها
ليان كانت حاسه بالاحراج من تصرف ندى وبنفس الوقت تبي تقوم تشوف جدها وتطمن عليه بس خجلانه لا تترك منال لوحدها
منال بطيبه مصطنعه : ليان شكلك مشغوله وانا اشغلتك اكثر
ليان : افا عليك يامنال وش هالكلام انتي بحسبة اختي ومن اهل البيت
منال : دامني بحسبة اختك ومن اهل البيت لاتربطين نفسك فيني وقومي شوفي شغلك او والله بطلع وارجع بيتنا
ليان : لا وربي ماتطلعين واعملي حسابك انك بتعشين عندنا وتسهرين معنا بعد
منال بضحكه : ههههههه طيب قومي خلصي شغلك وبعدين نفكر بسالفة العشاء
ليان : مايبيلها تفكير غير اذا بتزعليني منك
منال : ماعاش من يزعلك يالغلا وخلاص ابشري بس يله قومي شوفي شغلك ولاتربطين نفسك فيني
ليان : تسلمين حبيبتي (وهي تقوم) دقايق بس بتطمن على جدي وامر على المطبخ اقولهم وش يحضرون على العشاء وجايه
منال بأبتسامه : خذي راحتك ياعمري
وبمجرد مااختفت من قدامها ليان اختفت ابتسامتها وبانت ملامح الكره والحقد على وجها وبسرعه اخذت جوال ليان اللي تاركته على الطاوله واتصلت على سعود
سعود وهو مو عارف الرقم : الوو
منال بهمس : انا منال اسمعني هذا الرقم اللي قلت لك عليه
سعود : خلاص اعتمدي
منال : مو تسكر خل الخط مفتوح الين اسكره انا
سعود : خلاص وربي فهمت
رفعت منال المخده حقت الكنب وحطت الجوال تحتها

دخلت ليان على جدها ولقته جالس بسريره يقراء جلست معه شوي وبعدها راحت لغرفة ندى
ندى : راحت هالعله
ليان : ندى عيب عليك تراها بنت خالك يعني استحي على وجهك وحسني الفاظك
ندى : تخلخلت اعظامها عظم عظم مايشرفني انا هالاشكال تكون بنت خالي
ليان : لا انتي الظاهر انجنيتي
ندى : تركت العقل لك واذا بتسمعين نصيحتي لاتدخلينها بيتك
ليان : ندى اتركي الهبال عنك وقومي اجلس معها وربي احسها اخذت على خاطرها من حركتك
ندى : ليان بتجلسين عندي حياك قلبي وغرفتي مفتوحين لك لكن اذا بتقنعيني اطلع للعله منالوه فــ وفري تعبك واطلعي قابليها لاني ماراح اطلع لها لو تنطبق السماء على الارض
ليان بقهر : الله يعينك على عقلك
وطلعت من عندها وراحت لــ منال
منال اول ماشافتها : ليان ولا عليك امر حبيبتي ممكن تعطيني حبة بنادول لاني حاسه بشوية صداع
ليان : سلامتك ياعيوني وابشري ماطلبتي شي
طلعت منال الجوال اول مااختفت ليان من قدامها
منال : اسمعني بقفل الحين وارسلك رساله وسو اللي تفقنا عليه
سعود : اوكي
قفلت منال وارسلت لرقم سعود (حبيبي اسفه قفلت بسرعه لان بنت عمي عندنا في البيت واخاف تشك بشي )
رد سعود عليها (مو مشكله ياعمري بس حاولي تكلميني اول ماتطلع )
ردت عليه ( مااوعدك حبيبي بس بحاول اصرف فيصل واكلمك .. احبك )
حطت الجوال على الطاوله بنفس مكانه وطلعت جوالها هي واتصلت على لمى
لمى : هاا بشري
منال وهو تشوف ليان جايه : والله الجلسه مع ليان ترد الروح ومو ناقصنا غير جيتك
ليان وهي تحط الصينيه اللي فيها البنادول وكأس الماء قدام منال : السموحه تأخرت بس مالقيت بنادول تحت وطلعت لغرفتي اجيبه
منال : لا ياعمري عادي وانا اللي اسفه تعبتك .. على فكره لمى معي على الخط وتسلم عليك
ليان استغربت ان لمى تسلم عليها : الله يسلمها من كل شر
منال : اقولها تعالي تقول محد عزمني
ليان بأحراج : ممكن اكلمها
منال وهي تمد لها الجوال : تفضلي
ليان : هلا لمى
لمى : هلا بالقاطعه اللي حتى ماتسأل
ليان : انا القاطعه يالمى والا انتم اللي ماتبوني
لمى بحزن : ليان اذا هذا كلام امي وابوي فتأكدي انه احنا عكسهم تمامآ
ليان والعبره خانقتها : الله لايحرمني منكم وربي اشتقت لكم حيل
لمى : واحنا اكثر ياقلبي
ليان : لمى عشان خاطري تعالي وجيبي معك يزيد وراما وربي اشتقت لهم حيل
لمى بكذب : يزيد طالع يلعب عند اولاد جيرانا وراما راحت مع امي لكن اذا تبيني انا اجي اوعدك كلها نص ساعه واكون عندك
ليان بفرحه : مايبيلك عزيمه ياقلبي واكيد ابي شوفتك
لمى : اجل انتظريني وهالله هالله بالحلا تعرفين حبي له
ليان : من عيوني وبأنتظارك حبيبتي
قفلت ليان والفرحه مو سايعتها بأن اختها اخيرآ حن قلبها عليها ودعت ربها انه مثل ماحنن قلب لمى يحنن قلب امها وابوها عليها
استأذنت من منال وطارت للمطبخ تجهز الحلا اللي تحبه لمى
بعدها بفتره وصلت رساله على جوال ليان وبسرعه منال كتمت الصوت وفتحت الرساله اللي كانت من فيصل وكاتب فيها
(آحبك..
........ يآبعد كل آلقصآيد وآلحكي وآلبوح
آحبك..
....... يآبعد كل آلوجيه آللي على بآلي ..)
قرت منال الرساله وهي تغلي من الحقد سيفت رقم سعود بأسم حبيب عمري
سوت مجموعات اتصال وحطت كل ارقام ليان القليله تحت مجموعة العائله ورقم سعود لوحده بمجموعه وسمتها الحب
ودخلت على الاوضاع وسوت تنبيه المكالمات للعائله فقط
رجعت الجوال مكانه وبتسمت ابتسامة شر على الانجاز اللي سوته

ـــــــــــــــــ .. ــــــــــــــــــــــ .. ــــــــــــــــــــ

فيصل : الحين بعرف لامتى بتم قالب خشتك والله لو انك مرتي ماقعدت اراضي فيك كل هالوقت
وليد : كل تراب وامسك
فيصل وهو يناظر بالكرت اللي ماده له وليد : وش ذا
وليد : اقرا وانت تعرف
اخذ فيصل الكرت وقرا اللي فيه وانفجر من الضحك
كان كرت دعوه للزواج ومكتوب فيه (يسرنا دعوتكم لتشريفنا زواج ابننا الشاب وليد بن محمد ال ... على نونهار بنت ابوها وبين قوسين مكتوب (ان عرفنا ننطق اسم ابوها حطيناه لكم )
وذالك يوم الاربعاء الموافق .... في قاعة مكتب السيد فيصل بن عبدالعزيز
وبحضوركم يتم لنا الفرح والسرور ... الداعي وليد بن محمد ال .... & سفير دولة سيريلنكا في السعوديه)
فيصل بضحكه : اخص والله مأنت هين الحين السفير بيحضر زواجك
وليد : لا بس قلت احسس العروس ان وراها اهل وعزوه
وفيصل وهو خلاص بيموت من الضحك : مالقيت عاد غير السيريلنكيه ليه ماتزوجت شغالتكم الفلبينيه والا الاندونوسيه
وليد : امي تقول خلك من هالسحارات وبعدين انت وش لك بهالسوالف كل اللي مطلوب منك توقع على اجازتي
فيصل : دام الزواج بيقام بمكتبي لي كل الحق اسأل وعزم اللي ابي بعد
وليد : وماودك بالمره تدخل عليها
فيصل بقرف : لا وع وش ابي فيها
واستمرو بطقاقهم حتى قلبو المكتب لحلبة مصارعه حره

ـــــــــــــــ .. ـــــــــــــــــــ .. ـــــــــــــــ

طفى طلال الفيلم بعد ميأس انه يلفت انتباها وناظر فيها وهو بالموت يفتح عيونه لانه صار له اكثر من 24 ساعه مواصل بدون نوم
طلال : قومي ياعمري ارتاحي بالغرفه
قامت معه ودخلها لغرفتها جلسها على السرير وتذكر انه دخل وقت العصر وهو ماصلى
طلال : لين ماراح تقومين تصلين ترى دخل وقت صلاة العصر
ولما ماشاف منها اي استجابه ضاقت الدنيا فيه قام ودخل دورة المياه اللي ملحقه بالغرفه عشان يتوضى للصلاه واول ماخلص وفتح الباب شافها واقفه عند الباب وشاده على يديها ونظرات الخوف بعيونها
ضمها لصدره وسمى عليها واخذها لسريره جلسها عليه من جديد وفرش سجادته وصلى عندها
خلص صلاته وسكر الستاير والنور وعم الظلام الغرفه اتجه للابجوره وشغلها كانت لين جالسه وضامه ركبها على صدرها وترجف بقوه من الخوف كان خوفها غريب واول مره طلال يشوفه حتى لما لقاها بالقبو ماكانت خايفه مثل خوفها هذا
ركض للنور وشغله وراح لها كانت مغمضه عيونها بقوه وترجف وتتنفس بسرعه
طلال وهو يرفع وجها له : لين ناظريني انا طلال وخلاص شغلت النور (وبحنيه اكثر) عمري افتحي عيونك وشوفيني
لكنها تمت على حالها ضمها على صدره وصار يقراء عليها قرآن بصوت مسموع حتى حس انها هدت
بعدها عنه وناظر بعيونها ناظرت فيه لفتره وبعدها ركزت نظرها على الباب
عدل طلال من وضعها على السرير عشان تنام لكن فجاءه وقف مصدوم مكانه من اللي شافه (كانت لين متبوله لا ايرادي على نفسها) تدارك طلال نفسه لما حس انه ممكن اي تصرف مو محسوب منه يأثر على حالة لين
قومها معاه بكل حنيه واخذ لها روب الاستحمام ودخلها لدورة المياه
وبعد ماخلص لها الشور ولبسها بجامة النوم ومشط لها شعرها جلسها على الكرسي وبدل اغطية ومفارش السرير
عطاها الدواء اللي صرفها لها الدكتور عشان تنام وضمها على صدره وصار يمسح على شعرها ويقراء عليها حتى نامت
لما حس انها نامت انسحب بهدوء من الغرفه وترك الباب مفتوح وراح للصالون
طلع جواله واتصل على الدكتور وشرح له الحاله اللي مرت فيها لما طفى النور وتبولها الا ايرادي
الدكتور : انا قلت لك انها في حالة شرود ذهني وانسحاب تام وبتكون معتمده على اللي حواليها اعتماد كلي بكل امورها فــ اذا كان هالشي صعب عليكم مافيه مشكله من انه ندخلها المصحه حتى تتحسن حالتها
طلال بأندفاع : لا دكتور الا المصحه حتى لو تمت العمر كله لاسمح الله وهي كذا
الدكتور : ماراح نستبق الاحداث وبلغني اول بأول بأي شي يطرى على حالتها وتجنب انها تكون في مكان مظلم او تترك لوحدها
طلال : ان شاء الله يادكتور
قفل منه وراح لغرفة لين ضمها لصدره وهو يدعي ربه يسامحه على سواه فيها

ـــــــــــــــــــــ .. ـــــــــــــــــــــ .. ـــــــــــــــــــــ

وربي تعبت سهرانه الليل كله عشان اوفي بوعدي وانزل لكم البارت

ولو مو مضطره اطلع للشغل الحين والا كان كملته لكم عشان يكون اطول من كذا


- هل من الممكن تتحسن حالة لين او بتستمر على حالها او بتسوء حالتها اكثر
- منال الى الان ماكملت خطتها وتنتظر وصول لمى عشان تكملها هل بتنجح او ليان بتنتبه للمسجات اللي بجوالها
- لو نجحت خطتها وش بيكون تصرف فيصل مع ليان
- ماجد وافق على منال لكن هل بيكون للجد الكلمه الاخيره او بتكون لفيصل وماجد

انتظروني في البارت القادم ان شاء الله

مودتي

’,

يالين البارت هذ1 وقفت الكاتبه...

قراه ممتعه.....

مشكووره جوودي على النقل..
اتمنى اشووف نهايتهاا قريباا.. لاني قررت اني مااا عااااد اقرأ قصص الا مكتمله.. طبعاا بعد مايخلصون اللي اتابعهم..

لااااااااااااااااااااا وربي تفاجات هيك يصير فيها شو هالبارت يقطع القلب يعني لما عرف الحقيقه يصير فيها هيك بس والله انه حنون مرررررره يا عيني عليه والي غاظني العله منالوه الله يستر من عملتها وازا فيصل صدفها يعني غبي غبي غبي وشكرا يا عسل بستنا عنار يا حبي لا تتاخري علينا