هبوبي المايك كان منور معاكي يا جميل
الاغاني اللي حطتيهم تحفة خصوصا اغنية محمد منير انا كتير بحب اغانيه
الله يخليلك اولادك يارب ويخليكي فوق راسهم... وهيك يكبروا ويفرحوا قلبك

تحيااااتي

ههههههههههههه شكرا عالتقديم الرائع يا احلى هبوش.... وانا فعلا بيشرفني ترشيحك الي
وفي انتظار سارونة تقولي متى ابدأ... بس بتمنى ما تملو لانو انا لما بكتب بسترسل

سلااااااااااام

ما بعرف ازا بصير ابدأ هلأ بس راح ابدأ

السلام عليكم
اصحابي في المنتدى وبرا المنتدى كمان بينادوني فيري

عمري 21 سنة، خريجة أدب انجليزي،كنت بحب اللغة الانجليزية من زمان كجزء من عشقي للغات بشكل عام بس ما كنت مخططة ادرسها كنت بدي شي اعمق من مجرد تعلم لغة... لانو اللغة ممكن الانسان يتعلمها في أي معهد او ياخد دورة فيها.. طبعا هاد كان قبل ما ادرس الادب الانجليزي في الجامعة... كان طموحي ادرس علم نفس او صحافة...
الصحافة لانو منذ طفولتي وانا بكتب، ويمكن قراءاتي كمان اثرت علي بمعنى انو في كتير من الكتب والروايات كان في دور للصحافة... وكان هالدور مرسوم بطريقة اظهار الصحفي كمدافع عن الحق والعدالة.. او كباحث دائم عن الحقيقة خصوصا في الروايات والكتب اللي عالجت بدايات القرن العشرين في الغرب وفترة الستينات والسبعينات بالوطن العربي وكطفلة هاد الشي مس وتر حساس في داخلي... وبتصور انو لحد الان هي الصورة عالقة بعقلي مع انو هلأ بس كبرت عرفت انو هاد الشي مو صحيح مئة بالمئة
بالنسبة لعلم النفس: اول كتاب متخصص في علم النفس قراءته كان عمري 11 سنة طبعا ما فهمت كل شي فيه من اول مرة بس جذبني كتير وتوالت الكتب بعد هيك... كل كتاب من هالكتب كان يعني الابحار في عالم غريب... عالم صعب التصديق بوجوده مع انو موجود داخل كل انسان فينا...
ليش ما درست شي من هالتخصصين؟ بتصور انو القدر لعب لعبتو وقدملي خيار افضل بكتير وهو دراسة الادب " شغفي منذ الطفولة "... طبعا متل ما حكيت بالبداية كان تصوري عن دراسة الانجلزي هو دراسة اللغة وهاد الاعتقاد ضلوا موجود عندي لحد السنة التانية بالجامعة لما بدأت دراسة مواد الادب... واكتشفت انو الادب اطاره اوسع لانو بيتضمن كل انواع الفنون والصحافة وعلم النفس ودراسة الاساطير " انا عندي ولع بالاساطير الاغريقية" بكفي كلام عن الدراسة والتخصصات

هوايتي: القراءة والكتابة وان كنت بعتبر الكتابة هدف من اهدافي وشي اساسي بحياتي ما بقدر اعيش بدونه... ما بذكر متى بدأ ولعي بالقراءة... بس كنت اقرأ أي شي بيجي تحت ايدي ما كتير بيهمني نوع الكتاب... والرواية اللي كانت تعجبني كنت اقرأها اكتر من مرة...اكتر رواية كنت احبها هي رواية اوليفر تويست كان عمري 12 سنة لما قرأتها اول مرة وطبعا قرأت النسخة المترجمة ترجمة حرفية وكانت 900 صفحة او اكتر مع هيك قرأتها اربع مرات... افضل رواية قرأتها وهي روايتي المفضلة على الاطلاق هي رواية da vinci code من اروع ما قرأت فعلا بالانجليزي طبعا... ما حضرت الفيلم تبعها ولا حابة احضروا لانو المشاهدة في بعض الاحيان بتقتل الرواية والخيال الموجود فيها...
وبالنسبة للخيال رفيق حياتي... انا كنت طفلة غريبة الاطوار "او على رأي صاحبيتي طول عمرك غريبة الاطوار ما في شي جديد" طبعا انا ما كنت اعرف اني غريبة الاطوار بس لما هلأ بتزكر كيف كنت اوقف ساعات عالبلكون " الفرندا"واتفرج عالحمام اللي كان ينزل عسطح الجيران وكنت احكي معهم ... وكنت اعشق اسراب الطيور المهاجرة لما بتمر في السماء، طبعا ماكنت اعرف انها مهاجرة كنت بفكرها بتلعب في السماء هههههه يالله شو كنت اتمنى اطير معها في يوم من الايام بس الحمدلله ما حاولت اطبق هالامنية ابدا خصوصا بعد ما عرفت شو صار لعباس بن فرناس.. وكان عندي دائما اصحاب متخيلين ودائما كنت افتح حوارات معهم... وكان عندي قدرة غريبة على تحويل أي شي حولي الي كان حي وناطق قابل للمحاورة والمناقشة والاحساس.... يمكن لانو كنت افتقد هالشي بالناس اللي عايشين معي... ولحد الان بفتقد هالشي... بس بطلت احكي مع الاشياء الجامدة اللي حوالي صرت اخلق شخصيات وحوارات عالورق... وهالشي خلاني اكتر انعزالا ووحدة، احيانا ايام بتمر بدون ما احكي كلمة ، او اطلع من غرفتي...الي صومعتي ومقر القيادة لكل العمليات الخيالية اللي بعيشها...

مش كتير بتخلط مع الناس لانو ما بقدر اتفاهم معهم واتوافق مع رؤاهم ومبادئهم... ولا هم كمان قادرين يفهموا طريقة تفكيري او يتوافقوا مع مبادئي ومواقفي... يعني على سبيل المثال لا الحصر البعض بيعتبر قراءة الروايات الرومانسية وخصوصا باللغة الانجليزية نوع من " قلة الادب " وهاد الشي بيتعارض تماما مع الحقيقة والواقع.. انا انسانة كتير محافظة بتصرفاتي لكن اؤمن ايمان تام وكامل ولا يقبل النقاش بحرية الفكر... والكتب جزء من حرية الفكر... جزء من حرية التخيل... وجزء من الحرية الشخصية كمان... اسوأ شي ممكن يمر علي هو محاولة احدهم تقيد فكري وكأنو القيود الاخرى غير كافية... الا يكفي انو الجسد هو احد هذه القيود... الجسد بطريقة او بأخرى بقيد الانسان.. كم شخص يعشق المشي تحت المطر لكن يخاف ان يمرض... كم شخص يتمنى الذوبان في اعماق البحر لكن جسده غير مهيئ لهذا الشيء... او يحلق مع الطيور او.. او.. او... وفي قيود اخرى كتير لكن الفكر والخيال لازم ينطلقوا خارج هذه القيود... في اغلب الاحيان اطفال مبدعين بيتم تدمير تفكيرهم وقدراتهم من خلال وضع القيود حولهم... واحيانا بوصفهم باشياء بعيدة عن الحقيقة متل الغباء، وانعدام الواقعية، وعدم القدرة على التفكير السليم والمنطقي... الخ، انا شخصيا عانيت من هالموضوع ولا زلت اعاني... من انو اهلي فخورين انو بنتهم عندها القدرة عالكتابة لكن مش قادرين يتأقلموا مع طبعي المختلف يعني بدهم اكون نسخة عنهم في الافكار والمبادئ... لكن الحمدلله انو انا شخصيتي قوية بما فيه الكفاية لمقاومة أي نوع من انواع التسلط الفكري، يمكن فقدت التواصل مع اسرتي ومع الاشخاص من حولي بسبب هالشي وحاولت اقاوم هالشي فترة كتير طويلة لدرجة اني في فترة من الفترات احسست ان نفسي وشخصيتي تنزلق من بين اصابعي وتنسل من بينها كما الرمال الناعمة فكان علي الاختيار واخترت اني اكون انا لانو ما بقدر اتحمل اني افقدني... وهاد الشي علمني انو الانسان ما بيقدر يحصل عكل شي وانو ازا بدك تربح شي لازم تخسر شي...