كاتب الموضوع :
dali2000
المنتدى :
القصص المكتمله
________________________________________
حمده: يمه هذا قافل تلفونه
ام شيخه: اووهوو .. وقته احين .. يالله ما عليه بندق عليه في وقت ثاني
حمده تقول في خاطرها: يا رب ما يفتح تلفونه ابدا .. انا ما ابي اكلمه ابا
ام شيخه: حمده فيج شي؟
حمده: لا يمه .. ما فيني شي
ام شيخه: انا بنزل تحت تيين وياي؟
حمده: لا يمه ما فيني راسي يعورني وااايد
ام شيخه: خلاص ما عليه .. خذي حبه بندول وارقدي
حمده: ان شاء الله .. هيه صح يمه
ام شيخه: خير؟
حمده: محمد اخوي متى بيي؟؟
ام شيخه: باجر ان شاء الله
حمده: اووكي خلاص .. ما عليه .. الله يرده بالسلامة
ام شيخه: آآآآآميييين يا رب ... وطلعت من الحجرة
في بيت احمد.. وبالتحديد في حجره مهره..
كانت مهره يالسه بروحها في الحجرة وتفكر بالحياة اليديده إلي بتعيشها .. شو مصيرها .. كيف بتكون حياتها .. بتترك بيت ابوها وبتسير عند شخص ثاني ما يعرف يتصرف ابدا .. كيف بتتعامل وياه.. وقطع تفكيرها دق اخوها احمد ع الباب
احمد: هلاااا مهروووه
مهره: اهلييين بالغالي ابو الغالي
احمد: احم احم .. تسلمين يالغاليه .. شخبارج
مهره :تماام .. انت شحالك؟
احمد: والله ماشي الحال
مهره: شو بلاك؟؟
احمد: انا؟؟ لا ماشي .. بس طفران شوي يعني تعرفين انتي المصيبة إلي يتنا وإلي اسمها خالد
مهره: ههههههه هيه صح
احمد: الله يعينج يا اختي ويصبرج عليه
مهره: ان شاء الله
احمد: انا بطلع من البيت احينه تآمريني بشي؟
مهره: سلاااااامتك
احمد: الله يسلمج
نزل احمد ولقى راشد في الصاله
احمد: رشودي تبا شي؟؟ انا بطلع احينه؟
راشد: وين بتسير؟
احمد: مكان سري
راشد: اممم .. لا مابي شي
احمد: هههه اوووكي .. خلص واجباتك وبعدين العب
راشد: خلصت واجباتي
احمد: خلاص عيل .. سير والعب واذا انا تأخرت انت تعشى وارقد
راشد: بابا انت بتتأخر
احمد: يمكن .. يالله مع السلامة
راشد: مع السلامة
في سيارة احمد..
احمد: هلا سعيد
سعيد: اهليييين
احمد: يالله انا ياي عندك
سعيد: حيااك
احمد: يالله بنطلع انا طفران وابا احوط شوي
سعيد: خلاص عيل فاالك طيب
في بيت حمد...
ام شيخه: شو بلاك ساكت؟
حمد: لا ماشي بس انا اقول خلنا نأجل سالفة راشد شوي
ام شيخة: ليش؟
حمد: بنت يوسف بتعرس بعد شهرين
ام شيخه: لا والله؟؟ شدراك؟؟
حمد: دريت وخلاص
ام شيخه: وبعدين؟
حمد: وبعدها بنتفرغ حق راشد
ام شيخه: لا بس ها احسن وقت والكل منشغل عن راشد
حمد: اعرف انه احسن وقت.. بس راشد ما بيتقبلنا احين.. لازم نتركه شوي وبعدين بناخذه غصبا عنه وعن ابوه بعد
ام شيخه: شو بتسوي؟؟
حمد: بتعرفين في وقت ثاني.. بس انا باخذ راشد حتى لو اطريت اني اجتل احمد
ام شيخه: شو تقول؟؟؟؟
حمد: هذا إلي بسويه
وبعد شهرين ..
هذا هو اليوم إلي ما تمنته مهره ابدا.. اليوم الي تمنت انه ما ايي ابدا .. اليوم الي بتنزف فيه لجحيمها الاسود .. لمصيرها المجهول مع ولد عمتها الجاهل ..
يوسف: انا بسير اجوف مهره
ام احمد: وانا بيي وياك
يوسف: لا لاتيين انا اكون وياها بروحي
ام احمد: خلاص عيل
دش يوسف حجرة بنته إلي كانت تصيح .. وسار عندها وحضنها وتم يهديها ويخفف عنها
يوسف: مهره .. حبيبتي .. سامحيني يا بنيتي .. والله انها غلطتي .. سامحيني يا بنيتي
مهره: لا يا يبه .. عادي .. ما صار شي .. خير ان شاء الله
يوسف: الله يعينج يا بنيتي .. ويوفقج طول عمرج
مهره: ان شاء الله يبه
شوي ودشت ام احمد
ام احمد: يالله يالعروس .. لازم نزفج احينه
نزلت مهره راسه والدموع في عينها.. شوي وسمعت صوت احمد اخوها ..رفعت عينها وجافته وحست انها بتنفجر من الصياح .. نزلت راسها وطلعت من الحجرة
زفوها الحريم.. ودخلوها القاعة.. الحريم كانوا ايببون ويغنون .. اما مهره كانت تصيح وتحس بغصه تخنقها .. رفعت راسها شوي .. ودعت ربها في سرها ينهي هالكابوس بسرعه وبعكس إلي توقعته مهره كان الوقت يمر ببطء شديييييد
وأخيرا انتهى العرس وكل شخص رد لبيته .. انتهى هالعرس بالنسبة للناس كلهم اما لمهره فكان بداية لمأساه جديده ما توقعت انها تكون بهالطريقة القاسية
خالد: سمعيني
رفعت مهره راسها واستغربت من الكلام إلي قاله خالد
خالد: جوفي .. انا ما تزوجتج لسواد عيونج
مهره: عيل؟
خالد: انا تزوجتج تجربة .. انا بجوف اذا حبيتج بخليج على ذمتي طول عمري واذا ما حبيتج بطلقج وبردج بيت اهلج
مهره: لا والله؟؟؟ .. تتحراني فار تجارب؟؟
خالد: لا تعلين صوتج علي .. انا الريال هني وانت لازم تخدميني
مهره: انا ماشتغل عندك ... برد بيت ابوي احسن لي
خالد: مب ع كيفج .. انا إلي اقرر متى تسيرين هناك تفهمين
مهره: ومتى ان شاء الله بسير عندهم؟
خالد: يوم بقرر
مهره: لا والله؟؟؟
خالد: جوفي جدامج سنة كامله .. ولازم تخليني احبج
مهره: انا احبك؟؟ مينونه؟؟ .. احب ..
خالد: قوليها.. لا لا قوليها.. قولي احب واحد خبل .. تراج تعلمتي هالشي من اخوج .. انا برويه إلي اقدر اسويه
مهره: حليله اخوي خايف الحين يتنافض
خالد: بتسكتين ولا اضربج في اول يوم
مهره: بسكت احسن لي .. احين انت تسويلي فيلم
خالد وعلامات الصدمة والدهشه كلها في ويهه: شدراج؟؟
مهره: الحمدلله والشكر .. انا قلت اكيد جايف هالشي في فيلم وياي اطبقه علي
خالد: بس عاد اسكتي وارقدي .. راسي يعورني
مهره: ارقد ..
وتمت تدعي ربها يفكها من هالمصيبه
بعد اسبوع بالضبط .. وفي بيت حمد
حمد: انا اليوم بنهي هالمشكلة ما بتريا راشد متى بيقتنع انا باخذه غصبا عنه وعن ابوه
ام شيخه: شو بتسوي؟؟
حمد: بتعرفين بعدين ..
طلع حمد وهو معصب من بيته وسار مدرسة راشد وتم يتريا متى ينتهي الدوام وفجأة تذكر شي وغير رايه بسرعه وسار
خلص الدوام وطلعوا الطلاب .. كل طالب يدور على ابوه او دريوله او اي واحد من اهله طلع راشد وتم يدور على سيارة ابوه ..وبعد فترة وطول تذمر لقاها.. مشى راشد صوب السيارة ومن فرحته وشوقه لأبوه ما انتبه لسيارة ثانية كانت مسرعه ويايه صوبه.. تجمعوا الاساتذه والطلاب حول راشد إلي كان طايح ع الارض وما يتحرك من قوة الضربة
حس احمد ان راشد تأخر عليه .. نزل من السيارة وجاف الطلاب متيعين والاستاذه يركضون والوضع مب طبيعي.. نزل بسرعة.. خاف على ولده واايد.. سار عسب يجوف شو السالفة وكانت صدمته كبيره يوم جاف راشد طايح ع الارض وغرقان بدمه
احمد: راااااااااااشد.. ولدي.. راااااااااااشد شو بلاك.. شو صار فيك؟؟.. راشد راشد تحرك راشد انا ابوك .. راشد رد علي ..راشد.. رااااااااااشد
شل احمد ولده وحطاه في السيارة .. وساق سيارته مثل المينون ووداه المستشفى
دخلوا راشد غرفة العمليات ويلس احمد يدعي ربه ان راشد يكون بخيير .. وانه ما يتأذى وكان يصييح .. بعد نص ساعة وصل بواحمد
احمد يوم جاف ابوه سار عنده وحضناه وتم يصيح ويقول: يبه .. ولدي يا يبه .. يبون يذبحون ولدي
يوسف: احمد استهدي بالله .. اذا انت الريال العاقل والفاهم تقول هالكلام وتسوي جيه شو تركت للثانيين؟
احمد: يبه .. راشد ولدي .. ما عندي غيره في هالكون
يوسف: لا تخاف .. بيكون بخير ان شالله
وطلع الدكتور وسأل: منو ابو الولد؟
احمد: انا .. خير؟؟؟
الدكتور: ولدك حالته خطيييره جدا .. وهو في غيبوبه .. ما نقدر نتأكد من سلامته إلا بعد ما يقوم
احمد: يبه .. يبه سمعته .. سمعته .. ولدي بيروح عني .. راشد بيروح
يوسف مسك احمد بقوو: احمد اذكر الله ولدك بخير
احمد: ابي اجوفه .. ابي اجوف ولدي الحييين
الدكتور: بندخلك عنده بس اذا ازعجته بنطلعك على طول
احمد: لا لا خلوني عنده ما ابي اطلع ابدا
الدكتور: بنجوف .... ودخل احمد عند ولده
في بيت حمد ..
دش حمد بسرعة وتم يزقر حرمته
حمد: اخييرا .. اخيييرا .. راشد بيي عنا غصبا عن ابوه
ام شيخه: خير شو صار؟
حمد: ماشي الحين اقدر ارفع قضية على احمد واقول انه ما يقدر يعتني براشد
ام شيخه: شو صاااار فهمني
حمد: ماشي .. بس راشد في المستشفى
ام شيخه: شوووووو؟؟؟ كيف؟؟ شو صار له؟
حمد: لا تخافين حادث بسيط
ام شيخه: شووو سووويت في الولد؟؟
حمد: ما سويت شي ..
ام شيخه: لا انت سويت شي قوولي بسرعة
حمد: يا مره استهدي بالله ما سويت شي.. انا سرت عشان آخذه غصب .. وبعدين فكرت وقلت لا ما بيي عندي ابدا .. دريولنا الله يسلمج هذا خبير حوادث
ام شيخه: سووويتها .. حسبي الله عليك .. خليته يدعم الولد عشان تاخذه
حمد: هدي اعصابج الضربه مب قويه ..
ام شيخه: شو تقووول انت .. تخيل انه تعور واايد ومات . ما فكرت بهالشي
حمد: اوووووو ... لا .. شو سويت ما فكرت ابدا .. انا .. انا غلطت ..
شوي ورن تلفونه
حمد: الوو
الدريول: ارباب هزا ولد مافي .. انا ما في يجوف جيكو سغير
حمد: الحمدلله ...
الدريول: سنو؟
حمد: ماشي ماشي .. خلاص رد بيتكم
وقفل التلفون
حمد: ما صار شي
ام شيخه: انت مينون .. وما عندك عقل
حمد: سكتي عاد .. راسي يعورني
ورن تلفون حمد مرة ثانية
حمد: منو هذا بعد؟؟ .... هذا يوسف .. بواحمد .. شعنده .. خله يولي ما برد عليه
ام شيخه: رد وجوف شو يبي
حمد: اففف .. الوو السلام عليكم
يوسف: وعليكم السلام
حمد: شحالك؟
يوسف: الحمدلله .. حمد .. بغيت اقولك ان راشد في المستشفى
حمد: شووووووووووووووووو؟؟؟؟؟؟؟
يوسف: هيه .. استوى له حادث اليوم وهو راد
حمد: كيف؟؟ ومنو؟
يوسف: الي دعماه في مركز الشرطة .. وراشد في المستشفى
حمد: هيه .. اانا بيي .. مع السلامة
ام شيخه: خيير شو صار؟
حمد: راشد في المستشفى
ام شيخه: كيف؟ وشو صار؟ ..
حمد: واحد دعماه وهو راد من المدرسه
ام شيخه: منو هذا
حمد: ماعرف بس مسكوه
ام شيخه: ها كله بسبب افكارك
حمد: وانا شخصني
ام شيخه: كله منك .. كله منك .. حسبي الله عليك
حمد: بس عاد .. يعني انتي ما تبين راشد .. لا تسوين عمرج مسكينه .. قومي يالله بنسير المستشفى
في المستشفى..
دخل احمد الحجرة عند ولده بس ما تحمل منظره.. سار عنده ... يلس عداله .. ومسك يده وقال: راشد.. رشودي تسمعني؟؟ .. راشد انا ابوك .. حبيبي رد علي .. قول اي شي بس رد علي .. رد على ابوك .. لا اتم ساكت.. سكوتك يعذبني.. رد علي.. راشد.. راشد حبيبي .. راشد انت روحي .. لا تسير عني وتترك ابوك بدون روح .. لا تتركني بروحي في الكون .. راشد.. امك تركتني وياك.. انت لا تسير وتتركني بروحي . يا راشد ارحم حالي ياولدي .. ماعندي غيرك في هالكون يا رشود.. بعطيك روحي وقلبي وعمري كله بس ترد علي وترمسني يا راشد
وتم يصيييح ..
الجزء الثالث عشر
===============
في سيارة حمد ...
كان حمد يسوق .. وهو يفكر ويقول: يا سلااااام انا ما سويت شي وكل شي استوى بروحه .. انا خططت وكل شي تنفذ.. اقدر ارفع قضية على احمد واسحب الولد منه بحجه انه ما يقدر يربي ولده والحادث إلي استوى هو اكبر دليل.. كل شي يا من عند الله انا خططت وبس وما نفذت شي .. آآآه يا يوسف .. احينه بريح قلبي منك ...احينه بدمرك.. بخليك تجوف ولدك ينهار جدامك .. وباخذ حفيدك منك .. انت بتتحطم بشكل نهائي .. وتم يفكر بكل شي بس قطع تفكيره صوت حرمته ..
ام شيخه: بو محمد .. انتبه ع الطريج انته وانت تسوق
حمد: ها .. هيه زين انج نبهتيني .. انا بسير عند المحامي شوي
ام شيخه: اي محامي يا ريال
حمد: ما يخصج انتي .. احينه اقدر آخذ راشد من احمد .. بحجه ان احمد ما يعرف يربي ولا يقدر يهتم بولده
ام شيخه: صج؟؟؟ يعني خلاص
حمد: طبعا باخذه وبنسافر على طول
ام شيخه: فرحت قلبي يا ريال .. خلني ابشر حمدووه فديتها والله
حمد: بشريها
اتصلت ام شيخه على بنتها حمده بسرعة وبشرتها ان راشد بيكون عندها وهي بتربي ولد اختها .. طبعا حمده استانست واااااااايد .. لأن امنيتها تحققت اخييرا
في المستشفى ..
وصل سعيد.. ودش حجرة راشد.. وجاف احمد في حاله يرثى لها .. سار عنده وحضناه بقووو وتم يهديه ويقوله..
سعيد: يا احمد لا تسوي في عمرك جييه .. راشد ما عليه شي ان شاء الله
احمد: سعيد .. انت ما تحس بإلي احس فيه .. والكلام سهل .. يا سعيد راشد ولدي ولدي افهمني
سعيد: فاهمك والله اني فاهمك
احمد: لا محد يفهمني .. تبوني اهدى وتقولون لي انكم تفهموني
سعيد: احمد استهدي بالله .. حرام إلي تسويه في نفسك
احمد: شو تباني اسوي .. اضحك وارقص؟
سعيد: ما قلت لك اضحك ولا ارقص .. ادعي حق ولدك ترى هذا إلي بيساعده
احمد: اذا صار فيه شي .. انا بموت على طول
سعيد: ان شاء الله ما بيصير فيه اي شي .. انت ادعي الله وتوكل عليه و ولدك بيكون بخيير
احمد: ان شاء الله
وفي نفس الوقت.. كان حمد عند المحامي ويقول له انه لازم ياخذ راشد لأن ابوه ما يعرف يربيه وما يهتم فيه وكان يالس يقنع المحامي بكلامه ..
في المستشفى
احمد يصلي ويدعي ربه انه يحفظ ولده ويقومه بالسلامه .. عقب ما سلم احمد سمع صوت ولده .. قام من مكانه بسرعة وسار عند راشد ومسك يده
احمد: راشد؟؟ حبيبي انت قمت؟
راشد: ابا ماي
احمد: ان شاء الله عمري .. لو تبا روحي بعطيك اياه احينه ...
وياب الماي وسقى ولده بسرعه
وقف احمد وتم يطالع ولده ودموعه تنزل من عينه.. ما قدر يمسك عمره ابدا سار وحضن ولده وباسه وقال: رشوودي .. حبيبي لا تسوي فيني جيه مرة ثانية .. انا بموت اذا جفتك جيه .. رشودي انا احبك وااايد .. وماقدر استغني عنك لحظة .. حبيبي انت إلي بقيت لي في هالدنيا وانا ماعندي غيرك
سكت راشد وما قال شي.. بالاصح ما عرف شو يقول لأبوه .. هذي اول مرة يجوف ابوه بهالحاله حس انه ما يقدر يستغني عنه لحظة .. مسك ابوه وتم يصيح وياه
شوي ودش حمد الحجرة وقال..
حمد: مشهد مؤثر .. نزلتوا دموعي غصبا عني
احمد مسح دموعه بسرعة ولف وقال: هلا عمي
حمد: اهلين
احمد: تفضل ايلس وارتاح
حمد: انا مب ياي عشان ارتاح انا ياي عشان انهي سالفة جدييييمه من بينا
احمد: اي سالفه؟؟
حمد: سالفه راشد
لف احمد على ولده وجافه .. وبعدين طالع حمد وقال: شو بلاه راشد؟؟
حمد: الظاهر ان نسيت كلامنا عقب ما توفت امه
احمد: اي كلام؟؟؟
حمد: مب قلنا انك اذا اهملت راشد .. بتفقد حقك في رعايته
احمد: شووو؟؟ لا .. لا ما تقدر انا ابوه ما تقدر
حمد: انا اقدر .. وبسوي كل شي .. وهاي هي الاوراق إلي تثبت كل شي وانت ما تقدر تنكر كلامك
احمد: بس انا ..
حمد: انت شو؟؟ انت اب فاشل وما تقدر تعتني بولدك ولا شي .. وانت ما تستحق انك تربيه .. انا باخذ راشد وبربيه احسن تربيه .. وانت سير وسوي إلي تباه .. تبا تعرس عرس .. وسوي إلي تباه
احمد: انا ابوه .. ومحد يقدر يسوي شي
حمد: لا خلاص كل شي انتهى .. وهذي هي الاوراق جدامك ناقصه توقيعك
احمد: ما بوقع على شي
حمد: مب ع كيفك.. السالفة انتهت.. واذا انت وقعت بتنتهي السالفة بكل بساطه واذا ما وقعت بناخذ الولد من عندك بالقووه ومحد بينفعك
راشد: انا ماباك .. انا ابا ابوي .. انت جذاب
حمد: جوف تربيتك يا احمد .. اسمع ولدك .. هذا دليل ثاني
حس احمد ان ريوله ما تشله .. حس انه فقد كل شي .. فقد كل شي في لحظة وحده وقال
احمد: بتاخذون ولدي مني؟؟ شو بيكون شعورك اذا احد يا واخذ ولدك بالغصب
حمد: لا تغير السالفه .. اليوم تم عنده وودعه .. لأنه من باجر بيي عندي خلاص
احمد: شوو؟؟ .. باجر ؟؟ بس هذا ولدي انا ..ولدي انت ما تفهم
حمد: ما يخصني .. انا رحمتك شوي وعطيتك يوم تقضيه مع ولدك .. وطلع من الحجرة
سكت احمد وما قدر يرد .. لأن هالسالفة استوت وهو تعباان ومنهار وما يقدر يتحمل اي شي.. هذا ولده .. ولده إلي يموت فيه .. بيروح عنه وهو ما يقدر يسوي شي .. وقف احمد وتم يتأمل كل شي من حوله .. تم يطالع ولده وقرب منه وحضنااه بكل قوته .. وبعدين تركاه وطلع .. طلع من غرفته وحس بصداع شديد .. ما قدر يتوازن .. وطاح واغمى عليه .. ركضوا عنه الدكاتره وشلوه وتموا يحاولون انهم يقومونه .. فتح احمد عينه وقال
احمد: راشد .. لا تتركني بروحي يا ولدي .. وقال للدكاتره .. طلعوا برع وخلوني بروحي وغمض عينه
في بيت مهره
خالد راقد .. ومهره عيزت من كثر ما توعيه
مهره: خلوووود يالله قووم .. تراك طفرتني والله
خالد: يا مره خليني رااقد .. تراج اذا وعيتني وقطعتي حلمي ما بحبج وبطلقج بسرعه
مهره: إلي يسمعك احينه يقول اني ميته اباك تحبني .. يالله قووم
خالد: شو هالكلام .. عطيتج ويه ركبتي فوق راسي
مهره: انت شو بلاك؟؟ .. قوم يالله فكني ... تراك طفرتني والله لين متى بتم راقد
خالد: لا والله ... وانتي يايه تتحكمين فيني وفي وقت رقادي .. يكون في علمج اني لين احينه متحملج
مهره: صج؟؟؟؟؟؟؟
خالد: هيه .. انا ما اباج ولا كنت ابي آخذج ولا شي .. انا كنت ابي بنت خالتي بس امي اصرت عليج انتي .. وانا اطريت وخذيتج
مهره: ها كلام يديد .. اول مرة اسمعه
خالد: طبعا .. تتحريني ميت عليج .. انا ماخذج تجربه وبس
مهره: شو انا سيارة .. ولا كندوره .. تجربني وبعدين تفرني
خالد: طبعا .. اجرب بالحلال احسن مما اجرب بالحرام
مهره: انت بعقلك؟؟
خالد: شو تتحريني مينون
مهره: خالد .. انت ليش تسوي فيني جيه؟؟
خالد: كيفي .. الكل يقول اني خبل .. بس انا بثبت لهم اني اقدر اسوي الي اباه
مهره: .......... (وتمت اتصيح(
خالد: بس عاد مابي اجوف دموع التماسيح .. امسحيهم بسرعه .. تصيح بدون سبب .. امسحيهم احسن مما ايي واصكج بكف .. واخلي لدموعج سبب
مهره: لا والله .. ابوي ما سواها وانت ياي و ........
بعدها مهره ما كملت كلامها .. ولقت لها كف قووي من خالد
خالد: يوم الريال يرمس .. المرة تسكت وما تقول شي .. اطلعي برع احينه وما ابي اجوف ويهج ابدا
طلعت مهره وهي تصيييح وما عرفت شو تسوي .. تكلم امها إلي ما بتسوي لها شي .. ولا ابوها إلي بتزيد من عذابه ولا احمد إلا مب متحمل شي عقب إلي استوى لولده .. نزلت راسها وتمت اتصييح .. وقالت محد بيساعدني ومحد بيتحملني .. كل واحد لازم يتحمل مشكلته
يوم عصييب مر على احمد ومهره .. احمد بيفقد ولده وما بيجوفه .. ومهره حست انها فقدت كل شي .. فقدت حياتها وضيعت عمرها
وفي مكان ثاني .. في بيت سعيد
يلس سعيد بروحه في الصاله وتم يفكر بحال احمد وفكر بمهره.. وسرح شوي.. قطع سرحانه صوت امه وهي تناديه ..
ام سعيد: سعيد .. من متى وانا اناديك ليش ما ترد علي؟؟ شو بلاك؟
سعيد: لا ماشي .. بس كنت افكر في احمد
ام سعيد: احمد وبس؟؟؟ متأكد؟
سعيد: هيه
ام سعيد: يعني ما فكرت في اي شخص ثاني
سعيد: شخص ثاني؟؟ مثل منو؟
ام سعيد: وحده حلوه
خاف سعيد وقال في خاطره لا يكون انا قلت شي بالغلط وبعدين سأل امه : وحده حلوه مثل منو؟
ام سعيد: مالت عليك وعلى ويهك .. انا اقصد خطيبتك يا ريال .. خطيبتك إلي ما تتصل عندها ابدا .. ولا تهتم فيها ولا جنها خطيبتك .. يا ريال حرام عليك
ارتاح سعيد شوي وقل: ان شاء الله يا يمه بتصل عندها اليوم
ام سعيد: اتصل عندها احينه
سعيد: احينه؟؟ .. بس يمه
ام سعيد: لا بس ولا شي
سعيد: ان شاء الله
ام سعيد: مب تقول لها شحالج وشخبارج .. وتقفل .. ارمس عدل .. وراوني شطارتك
سعيد: ان شاء الله يمه
ام سعيد: انا بسير حجرتي وانت خذ راحتك
سعيد: لا افا عليج يمه شو انا بقول لها سر
ام سعيد: هيه ... انا بسير حجرتي
سعيد: خلاص براحتج
طلعت ام سعيد .. واتصل سعيد عند خطيبته
سعيد: الوو السلام عليكم
نورة (خطيبة سعيد) : وعليكم السلام
سعيد: شحالج؟؟
نوره: الحمدلله بخير .. انت شحالك؟
سعيد: يسرج الحال
وسكتوا اثنيناتهم فترة
سعيد: وشعلومج بعد؟
نورة: الحمدلله
سعيد: شو الدراسة؟
نورة: انا خلصت الجامعة واشتغل احينه
سعيد: صج؟؟ ما شاء الله عليييج
نوره: هيه .. سعيد .. الظاهر انك ما تعرف عني اي شي
سعيد: لا افا عليج .. بالعكس انا اعرفج عدل .. بس انا هالايام مشغووووول واايد .. ربيعي متلعوز واايد ومشغوول واايد .. انا اعزج يا مهره واايد
نوره: لا يا سعيد .. الظاهر انك ما تعرف عني اي شي .. حتى اسمي .. انا اسمي نورة
سعيد: والله اني آسف ما قصدت شي .. بس صدقيني انا
نورة: ما عليه .. ولا جني سمعت شي
سعيد: سامحيني يالغالية .. انا كنت ياي اقولج سالفه والسالفه فيها اسم مهره وقلتلج انا اعزج يا مهره
نوره: هههههه صج؟؟ .. وشو هي السالفة؟
سعيد: كله منج نسيتها .. خليتيني انساها
نوره: ههههههه لا والله
سعيد: هيه انا يوم احط في بالي شي وبعدين اي شخص ثاني يغير السالفة وجيه انسى إلي كنت بقوله
نوره: هههههههه الله يعيني دامك جيه
سعيد: ههههههه هيه والله
وتموا يتسولفون فترة طويله .. وسعيد يقول في خاطره الحمدلله عدت السالفه على خير ..
في اليوم الثاني
في بيت حمد
وقف حمد جدام المرايا وحس انه انتصر وحقق كل شي .. وانه حطم يوسف واحمد وانه كسب كل شي .. حس براحه عقب إلي سواه عقب ما حطم قلب اب حنون يموت في ولده ..
ما فكر بلحظة انه مثل ما حطم يوسف وولده ممكن اييه اليوم إلي يتحطم فيه هو ولده .. حتى اذا كان ولده ما سوى شي وماله ذنب .. الدنيا دواره .. ويوم لك ويوم عليك ..
عدل حمد غترته .. وتم يطالع تذاكر السفر .. وبعدين زقر حرمته
حمد: يالله زهبي عمرج .. بنسافر اليوم
ام شيخه: اليوم؟؟
حمد: هيه اليوم انا بيب راشد وبنسير المطار
ام شيخه: على امرك
وسارت ام شيخه وكلمت بنتها وولدها وقالت لهم انهم بيسافرون اليوم عقب ما خلصوا كل شي وحققوا امنيتهم
وصل حمد المستشفى .. وسار عند الدكتور ووقع على اوراق راشد وسار وشلاه (لأن راشد انكسرت ريله وما يقدر يمشي) .. وبعدين تذكر احمد.. سأل الدكاتره عنه وقالوا له انه مريض وانه مرقد في المسشتفى
سار حمد عند احمد ودش حجرته وهو شايل راشد
حمد: يالله انا بسير احينه .. من طيبتي يبت لك راشد .. عشان تجوفه لآخر مرة في حياتك
سكت احمد وما قال شي
ضحك حمد بصوت عالي .. وحس انه انتصر خلاص ومحد قده كسب كل شي وانه حطم احمد خلاص وشل راشد إلي كان يصيييح وهو يجوف ابوه وهو مريض
راشد: يدي حمد .. ارجوك خلني اتم عند ابوي .. يدي حمد نزلني ارجوك .. مابي ابعد عن ابوي يدي حمد .. انا احب ابوي .. يدي حمد لا تبعدوني عنه .. انا انا ماروم اعيش بعيد عنه
حمد: اسكت يا راشد انت ما تعرف شي بعدين بتشكرني لأني بعدتك عن ابوك
راشد: يدي حمد .. ارجوك خلني احضن ابوي
حمد: اففف .. خلاص بوديك عنده
وقرب حمد راشد من عند ابوه .. لصق راشد في ابوه وحط راسه ع صدره وتم يصيييييح بصووت عالي وكان يشهق ويصييح .. ما تمنى انه يبعد عند ابوه لحظة .. بس الدنيا فرقتهم
مسح احمد راس ولده وقاله: راشد.. انت ريال .. ولازم ما تصيح .. وتتحمل كل شي .. صج انهم فرقونا عن بعض .. لكن قلوبنا وارواحنا بتم مع بعض دووم.. رشودي.. كل ما تحس بضيج ولا شي .. غمض عينك وتخيلنا انا وامك .. وتذكر اننا بنكون وياك للأبد وما بنتخلى عنك ابدا.. الله فوقهم .. والله بيجازيهم كلهم .. ومثل ماهم فرقونا .. الله سبحانه وتعالى بيجمعنا ... تذكر كلامي عدل.. يمكن ما بتفهمه احينه .. لكن بيي اليوم إلي بتفهم فيه كل كلمه .. امسح دموعك .. وكن ريااال اعتمد على نفسك.. وسامح ابوك لأنه ما بيده حيله .. استغلوا ضعفي واضرابي .. وسلبوا مني اغلى ما املك .. سامحني يا رشود ما قدرت اسوي لك شي.. سامحني يا ولدي الغالي قصرت في حقك وماهتميت فيك .. وسامحيني يا شيخه .. ضيعت الامانه وما رعيتها
وطاحت دموعه على راس ولده .. رفع راشد راسه ومسح دموع ابوه وقال: يا يبه .. اقسم لك اني برجع لك .. اقسم لك اني برجع لك .. وبعيش وياك .. اترياني
ابتسم احمد .. وتم يطالع ولده وما شل عينه عنه .. قرب حمد وشل راشد وطلع من حجرة احمد.. حاول راشد انه يمسك دموعه بس ما قدر ترك دموعه تنزل ع جتف يده حمد
وحمد ماهتم بإلي صار وكمل طريجه ولا جنه جاف شي ولا حس بشي .. وهو طالع جاف يوسف في ويهه ضحك حمد ضحكت النصر بس رد عليه يوسف وقاله: لا تفرح وايد .. ترى الدنيا دواره .. يوم لك ويوم عليك .. راشد ولدنا.. وما بيعيش إلا في حضن ابوه
حمد: كلامكم هذا ما يأثر فيني انا شفيت غليلي وطفيت ناري وارتحت خلاص وما عاد يهمني شي
وطلع حمد من المستشفى .. وركب سيارته .. وسار المطار .. وسافر هو حرمته وعياله وراشد
الجزء الرابع عشر
===============
بعد يومين طلع احمد من المستشفى وكانت حالته النفسية سيئة جداً وما كان يرمس مع اي احد ولا ياكل ولا شي .. ما تحمل يوسف انه يجوف ولده بهالحاله وما يسوي شي .. سار عند ولده عسب يرمسه ويهديه شوي
يوسف: احمد .. انت مشغول؟؟
هز أحمد راسه بالنفي
يوسف: احمد .. انت ولدي الوحيد وما احب اجوفك بهالحاله ابدا .. يا ولدي خل كل شي على الله سبحانه وتعالى .. وراشد بيرد لك انت وبس
احمد: يبه .. مب انت قلت اني ولدك الوحيد ؟؟ .. تخيل اني كنت صغير ويا واحد وشلاني منك غصبا عنك شو بتسوي؟؟ .. يبه راشد ولدي الوحيد .. يبه افهمني انا ما عندي غيره ابدا
يوسف: احمد هدي اعصابك .. ولدك بيرد لك انت وبس
احمد: يبه .. انا تعبت شوي وراشد راح عني .. يا يبه حرام عليكم ما سويتوا شي .. انا طحت والكل طاح وراي.. يا يبه حرام عليكم.. كل شي على راسي انا .. راشد حفيدك وانت تحبه ولازم تدافع عنه بعد مب تستلم لحمد وخلاص
يوسف: احمد انا تفاجأت و....
احمد: يبه خلاص كل شي راح .. وانا ماقدر اتحمل بعد .. بتم بروحي ما ابي احد يرمسني ولا شي
يوسف: وانا بعد؟؟ ما تبا ترمسني؟
احمد: يا يبه ما قصدت جيه
يوسف: ما عليك انا مقدر حالتك .. اليوم مهره بتيي وتبا ترمس وياك
احمد: يبه ما ابي اجوف احد
يوسف: عاد انت تفاهم وياها
احمد: يصير خير
يوسف: انا بسير عند امك احينه .... وطلع من الحجرة
وفي الصالة كانت ام احمد يالسه بروحها وتفكر في ولدها وحفيدها وحياتها وكانت تسترجع ذكرياتها يوم كان عمرها 18 سنة.. وتقدم لها حمد (بوشيخه) لأول مرة وهي رفضته لأنه ما كان يشتغل وكان حاد الطباع.. وتقدم لها يوسف ووافقت عليه على طول لأنها كانت تبا تفك من حمد وتثبت له انها رافضته وبشكل نهائي.. تمت ام احمد تفكر بكل شي وتقول في خاطرها: معقوله .. معقوله حمد بعده يتذكر ذيج السالفة؟؟ ..بعده يتذكر اني رفضته وياي ينتقم وياي يدمر حياتنا كلنا؟؟ بعده حاقد علينا .. ماصدق ..هالشي مستحيييل .. ماقدر اصدق ولا استوعب هالشي ابدا ... وتمت تفكر اكثر وقطع تفكيرها صوت يوسف
يوسف: عاشه
ام احمد: هلا بواحمد .. شحاله حمود احينه؟
يوسف: على حاله .. يلومنا لأننا ما سوينا شي
ام احمد: هييه .. آآآآه يا ولدي .. ها كله بسببي
يوسف: ها؟ بسببج انتي؟ .. ليش شو صار؟ .. شو مسويه؟
تذكرت عاشه ان يوسف ما يعرف شي عن سالفه حمد وبعدين قالت: لا لا ماشي انا قصرت في حقه وحق راشد
يوسف: هييه
ام احمد: انا بسير حجرتي
يوسف: شو بلاج؟؟ في شي مضايجج؟
ام احمد: لا ماشي
يوسف: بس ويهج يدل على انج تعبانه .. اوديج المستشفى؟؟
ام احمد: لا ما عليه بسير وبرقد وبرتاح
يوسف: هيه مهره بتيي اليوم
ام احمد: صج؟؟ .. خير ان شاء الله
يوسف: عاشه قبل لا تسيرين بسألج
ام احمد: خير؟
يوسف: ليش ما تحبين مهره شرات ما تحبين مريم؟
ام احمد: انا احب كل بناتي
يوسف: بس انتي تحبين مريم وميره اكثر .. مهره حليلها ما سوت شي
ام احمد: لا سوت وايد
يوسف: صج؟؟ .. يعني ما تحبين مهره
ام احمد: ها .. لا لا احبها
يوسف: شو مسويه مهره؟
ام احمد: ماشي
يوسف: قولي
ام احمد: كل السالفه انها محتله قلب بواحمد
يوسف: ههههههههههههههههههههه .. احلفي انتي بس .. تغارين من بنتج؟
ام احمد: ماعرف
يوسف: صج والله تغارين منها؟؟
ام احمد: هيه
يوسف: افا عليج انتي الاصل.. انتي ام عيالي ورفيجة دربي .. وإلي ما تخش عني شي ولا اخش عنها شي .. وإلي تحملتني واايد
ما عرفت شو تقول وكيف ترد على يوسف خاصه بعد ما قال انها ما تخش عنه شي..
نزلت راسها وقالت: يوسف بسير حجرتي احينه
ابتسم يوسف وقال: خلاص ما عليه سيري وارتاحي
وقفت عاشه في مكانها وما قدرت تتحرك .. وبدت دموعها تنهمر رفعت عاشه راسها وجافت يوسف.. استغرب يوسف من إلي يجوفه عاشه تصيح .. قرب منها وقال
يوسف: عاشه فيج شي؟؟ شي يعورج؟؟ عاشه قولي بوديج المستشفى احينه
ام احمد: لا يا يوسف .. لا انا السبب فإلي صار لأحمد .. انا السبب
يوسف: منو قال .. انا اهملت احمد واهملت هالسالفة وانا إلي لازم يتحمل هالشي
ام احمد: لا يا يوسف.. انا السبب انت ما تعرف ان حمد خطبني قبلك وانا رفضته.. وانت تقدمت لي ووافقت عليك .. وبعدها قالي انه بيدمر حياتنا .. يوسف انا السبب انا السبب
يوسف: هييه احينه فهمت .. فهمت كل شي .. فهمت سبب كره حمد .. سيري الحجرة وارتاحي.. مب وقت اللوم احينه إلي صار صار
ام احمد: وشو بتسوي
يوسف: بتعرفين كل شي في وقته.. بس لا تنسين ان مهره يايه اليوم
ام احمد: ان شاء الله .. وطلعت حجرتها
وفي نفس اليوم عقب صلاة المغرب يت مهره وكان التعب ظاهر عليها .. استقبلها ابوها عند الباب وابتسم اول ما جافها وبعدين قال
يوسف: مهرووه .. شو بلاج يمه؟؟ تعبانه؟
مهره: لا ماشي
يوسف: مهره .. مهره شو هذا؟؟؟
ارتكبت مهره وبعدين قالت: شو ؟؟
يوسف: شو هالعلامه؟؟ منو ضرباج؟
مهره: اي .. هالعلامه؟؟ لا يبه انا تعورت
يوسف: تقصين علي؟؟ .. مهره منو ضرباج؟
مهره: محد .. يبه قلتلك اني تعورت
يوسف: خالد؟؟
مهره: شو بلاه؟
يوسف: مهره .. ردي علي خالد ضرباج
سكتت مهره وقالت: لا يبه .. قلتلك تعورت ... احمد وينه؟؟
يوسف: احمد في حجرته
مهره: بسير عنده
يوسف: مهروه حبيبتي .. اذا كان خالد هو إلي ضرباج تراني ما بسامحه ابدا .. ولا بسامح عمري
مهره: لا يبه ما صار شي .. وبعدين لا تقول جيه
يوسف: خير ان شاء الله .. سيري عند اخوج .. تراه محتاج لج واايد
مهره: وانا بعد
يوسف: هيه اعرف .. وابتسم
طلعت مهره بسرعه وسارت عند اخوها ودقت الباب
مهره: بدخل ها .. ودخلت
احمد: الناس يقولون ممكن ادخل .. مب بدخل ها
مهره: ههههه ... لأني اعرف اذا قلتلك ممكن ادخل بتقفطني وبتقول لأ
احمد: هههههه .. زين تعرفيني عدل
مهره: اخيييييييرا ضحكت .. من متى اتريا هالضحكه
احمد: البركه فيج
مهره: احمد .. لا تخاف على راشد .. ترانا بنيبه لك .. حمود لا تخاف ترا ابوي ما بيسكت وانت ارتاح شوي وانت بعد بتقدر تاخذه غصبا عن الكل هذا ولدك انت ومحد يقدر يتدخل
احمد: ان شاء الله
مهره: يالله انت ارتاح ولا تفكر وايد ترانا كلنا وياك
شوي ورن تلفون احمد
احمد: هذا سعيد ..
مهره: رد عليه
احمد: اوكي ... السلام عليكم
سعيد: هلااااااااا وعليكم السلام اخيرا رديت علي
احمد: اهلين
سعيد: شحااااااااااالك؟؟
احمد: الحمدلله انت شحالك ..
وفي نفس الوقت .. اشرت مهره لأحمد على اساس انها بتظهر
احمد: لحظة شوي سعيد .. مهره اتريي لا تسيرين
سكت سعيد وما قال شي
احمد: اسمح لي كنت ارمس اختي
سعيد: لا عادي بس اذا مشغول ولا شي بدق لك عقب
احمد: لا عادي مب مشغول .. شحالك وشخبارك؟؟
سعيد: والله تماام
وتموا يتسولفون ومهره كانت اطالع صورة شيخه.. وتتذكر الايام الماضية .. وايام شيخه واحمد .. وتذكرت شكثر كان احمد مرتااح ومستانس وياها.. ابتسمت مهره ابتسامه خفيفة وقالت في خاطرها: آآآه يا شيخه احمد محتاج لشورج احينه .. محتاج لج واايد في هالفترة
خلص احمد مكالمته وقفل
احمد: مهرووه ... مهره وين وصلتي؟
مهره: ها؟؟ لا وياك
احمد: هيه مبين .. شو تسوين هناك؟
مهره: ههههه لا ماشي كنت اترياك تخلص
احمد: هييه
مهره: شو بلاه سعيد؟
احمد: لا ماشي يسولف وبس
مهره: هييه
احمد: مهره؟؟
مهره: هلا
احمد: انتي مرتاحه مع خالد؟؟
مهره: هيه .. ليش تسألني هالسؤال احينه؟؟
احمد: لا بس شكلك تعبانه وايد
مهره: لا بس مب متعوده ع الجو
احمد: هيييه .. الله يعينج ويصبرج
مهره: آميين
مرت الايام والاسابيع ومروا خمس اشهر واحمد ما ترك مكتب محاماه إلا وسار له بس لأنه يبي يرد ولده بأسرع وقت ممكن .. تعب احمد ورد بيته عسب يرتاح وتفاجأ يوم لقى مهره في البيت
احمد: مهره.. خير شو بلاج؟ تعبانه من شي؟
مهره: ههههه الناس يسلمون
احمد: السلام عليكم .. شو بلاج؟
مهره: وعليكم السلام والرحمة .. ماشي اشتقت لكم وييت
احمد: لا بس شكلج تعبانه مهروه قولي شو بلاج؟
مهره: لا والله ماشي بس حسيت بتعب وييت وبسير المستشفى انا وامي بعد شوي بس كنا نترياك
احمد: هييه .. يالله عيل قومي شو تتريين .. ازقري امي
مهره: لا حمود مب احينه انت تعبان وايد
احمد: لا مب تعبان ولا شي يالله قومي
وسارت مهره وزقرت امها وساروا المستشفى.. وبعد الفحوصات عرفوا ان مهره حامل بالشهر الثاني وطلعوا من المستشفى ..
في السيارة
احمد: يمه شو قالوا لمهره؟؟
ام احمد: لا ماشي
احمد: شو لا ماشي جوفي ويهها
ام احمد: قلتلك ماشي
احمد: طالع اونه تخبون عني .. مهره شو قالوا لج
ام احمد: ياللقافه
احمد: اختي وابا اتطمن عليها
ام احمد: ماشي اختك حامل
احمد: والله؟؟ صج؟؟؟ مهره صج
مهره: ههه هيه صج
احمد: اخيييرا .. بيون يهال وبيزقروني خالي احمد
ام احمد: وعيال اختك مريم؟
احمد: لا هيول انا ما اعترف فيهم
ام احمد: لا والله؟؟ وليش ان شاء الله؟؟
احمد: عيال مهره غيير
مهره: سويتهم عياااال بعد .. هو واحد وبس
احمد: هههههه من الفرحه والله
سكتت مهره وما ردت عليه ابدا.. كانت حاسه بضيج.. وما بغت هالشي يصير بهالسرعه .. بس الله سبحانه قدر لها هالشي
احمد: مهروه .. اوصلج بيتج؟
مهره: هيه
احمد: خلاص عيل
وصلت مهره بيتها ونزلت من السيارة عقب ما سلمت على امها واخوها.. دشت بيتها وكانت تعباانه وتفكر برده فعل خالد.. تعرف انه ما يحبها وهي بعد ما تحبه ابدا .. فجت مهره باب حجرتها ولقت خالد في ويهها
خالد: وين كنتي؟
مهره: كنت عند امي .. قلتلك اليوم الصبح
خالد: هيه صح .. بس ليش تأخرتي
مهره: سرت المستشفى
خالد: ليش ان شاء الله .. شو فيج؟
مهره: كنت تعبانه واايد
خالد: صج؟؟ من متى؟
مهره: من زمان بس انت مب حاس بشي
خالد: افففف وشو قالوا لج؟
مهره: قالوا اني حامل
سكت خالد وما عرف شو يقول .. تم يطالع مهره وهو مصدوم وبعدين قال: صج؟
مهره: هيه
خالد: وليش جيه متضايجه؟
مهره: مب متضايجه تعبانه وبس
خالد: امبلا متضايجه .. لأنج تكرهيني .. وما تبين هالياهل صح؟
مهره: انت شو تقول؟
خالد: اقول الصج .. انتي تكرهيني وما تبينه صح .. انا بخلصج منه وللأبد
مهره: انت مينون؟؟
خالد: هيه قوليها .. انتي من زمان تبين تقولين هالشي .. تبين تقولين اني مينون انا اراويج يا مهره
مهره: بس خلاص تراك ذبحتني والله .. لوعت بجبدي ييت افرحك وانت قلبت السالفه هواش
خالد: انتي إلي تبين هالشي .. وبعدين انا شو ظمني انه ولدي؟
مهره: نعم؟؟؟؟
خالد: شو إلي يثبت لي انه ولدي
مهره: خالد انت فيك شي اليوم؟؟
خالد: مهرووه .. تأدبي
مهره: وانت بعد شو هالكلام.. يعني تتخيل انه مب ولدك؟.. تظن اني ....... خالد لهالدرجة يعني.. ما هقيتها منك والله.. ما هقيتها منك يا ولد عمتي.. خالد انا وانت متزوجين من خمس اشهر تعرف شو معنى هالكلام؟؟
سكت خالد وما عرف شو يرد.. بس قال في خاطره انه اذا سكت احينه مهره بتتمرد اكثر واكثر وقام وصفعها وقال: انتي في اي شهر احينه؟
مهره: الثاني
خالد: جدامج خمس اشهر وبس .. وبعدين بنتأكد اذا كان ولدي صج ولا شي ثاني
وطلع من الحجرة
يلست مهره ع الكرسي وتمت اتصيح وتقول: ياااارب .. يا رب شو هالمصيبة يارب انت اعلم بكل شي يا رب .. يارب انا زوجته من خمس اشهر يارب ساعدني.
|
20-02-09, 01:16 PM
جديد مواضيع قسم القصص المكتمله
العرض العادي
