شكر لكوكو باشا على بحثها المميز ( أشهى أطباق المكرونة )

18-02-09, 01:54 AM

المشاركة رقم: 1

المعلومات
الكاتب:	amer_6630
اللقب:	عضو راقي

البيانات
التسجيل:	Nov 2006
العضوية:	17353
المشاركات:	4,673
الجنس	ذكر
معدل التقييم:
نقاط التقييم:	29

االدولة

مدونتي

الإتصالات
الحالة:
وسائل الإتصال:

المنتدى : الارشيف

شكر لكوكو باشا على بحثها المميز ( أشهى أطباق المكرونة )

شكر لكوكو باشا على بحثها المميز ( أشهى أطباق المكرونة )

النهارده هنعرف أكتر من طريقة لعمل أشهر وأشهى أطباق المكرونة...
طبق مكرونة فرن باللحمة المفرومة

المقادير:

• كيس مكرونة أقلام.
• 1/4 كيلو لحمة مفرومة.
• ملعقة صغيرة ريحان, جاف مطحون.
• كوب كبير عصير طماطم.
• نص كوب زيت ذرة.
• 1/2 كوب جبنة رومي مبشورة.
• بصلة كبيرة مقطعة قطع صغيرة.
• ملح وفلفل.

الطريقة:

1- هنسلق المكرونة ونحطها في مصفاة ونغسلها كويس بالمية الباردة علشان ما تلزقش مع بعضها وبعد كده نسيبها في المصفاة علشان تصفي أي مية فيها.

2- بعد كده هنعصج اللحمة المفرومة عن طريق تقطيع بصلة كبيرة إلى قطع صغيرة بعد كده نضيف إليها الملح والفلفل الأسود واللحمة ونحطهم على النار ونضيف إليهم ملعقة سمنة ونسيبهم على النار مع التقليب المستمر، وبعد نص ساعة نضيف إليها كوباية مية ونسيبها على النار لغاية ما اللحمة تشرب المية دي. لما نلاقي إن اللحمة شربت كل المية اللي فيها نضيف إليها عصير الطماطم والريحان ونسيبهم على النار لمدة ربع ساعة كمان مع التقليب.

3- هنجيب صينية كبيرة ونحط فيها المكرونة ونرش عليها ملعقة زيت ونقلبها كويس وبعد كده نضيف إليها اللحمة المعصجة ونقلبهم مع بعض وبعد كده نرش الجبنة الرومي المبشورة من فوق سطح المكرونة واللحمة.

4- هندخل الصينية في فرن البوتاجاز لمدة ربع ساعة أو لغاية ما نلاقي إن الجبنة ذابت نخرجها ونحطها في طبق التقديم.

وبألف هنا وشفا

طبق المكرونة بالمأكولات البحرية

المقادير:

• كوب زيت ذرة.
• 2 ملعقة صغيرة بهارات سمك.
• 2 ملعقة كبيرة عصير ليمون.
• 1/4 كيلو سبيط "كالاماري" مقطع قطع متوسطة الحجم.
• 1/4 كيلو جمبري متوسط الحجم مقشر ومتنظف.
• 1/4 كيلو سمك فيليه مقطع قطع متوسطة الحجم.
• كيس مكرونة أقلام أو "اسباجيتي".
• نص حزمة بقدونس مقطعة قطع صغيرة.
• 4 فصوص ثوم مدقوق.
• ملح وفلفل.
• 1 حبة فلفل أخضر حار مقطعة قطع صغيرة.
• كوب كبير عصير طماطم.
• بصلة مقطعة قطع صغيرة.

الطريقة:

1- أول حاجة هنعملها هي أننا هنحضر المأكولات البحرية عن طريق أننا ننظف الجمبري ونغسله كويس، ونغسل السمك والكالاماري ونقطعها كويس مكعبات متوسطة الحجم ونرش عليها عصير الليمون.

2- بعد كده هنبدأ نعمل صلصة الطماطم عن طريق إننا نسخن ربع كوب الزيت على النار، وبعد كده نضيف إليه البصلة المقطعة قطع صغيرة مع التقليب المستمر لغاية ما البصلة لونها يبقى ذهبي، وبعد كده نضيف إليها الثوم والفلفل الحار ونقلبهم كلهم مع بعض، وبعد كده نضيف عصير الطماطم والملح والفلفل ونص كوب ماء ونسيبهم على النار لمدة نص ساعة أو لغاية الصلصة ما يبقى قوامها سميك.

3- هنسخن 1/4 كوب زيت في صينية وبعد كده نضيف إليه الكالامارى والسمك والجمبري ونقلبهم كلهم مع بعض لغاية ما لون السمك والكالاماري يبقى أبيض والجمبري لونه يبقى برتقالي نضيف إليه بهارات السمك والملح والفلفل.

4- أثناء ما بنعمل الصلصة هنسلق المكرونة ونحطها في مصفاة ونغسلها كويس بالمية الباردة علشان ما تلزقش مع بعضها وبعد كده نسيبها في المصفاة علشان تصفي أي مية فيها.

5- هنبدأ بعد كده في إضافة السمك والجمبري والكالاماري والبقدونس المفروم إلى صلصة الطماطم ونسيبهم على النار لمدة 5 دقائق مع التقليب المستمر.

6- هنجيب طبق التقديم ونحط فيه المأكولات البحرية بالصلصة، وبعد كده نحط المكرونة ونقلبهم كلهم مع بعض.
وبألف هنا وشفا

طبق المكرونة النجرسكو

المقادير:

• كيس مكرونة أقلام.
• نصف دجاجة مسلوقة ومخلية من العظم ويفضل الصدور.
• 1/2 كوب جبنة موتزاريلا أو شيدر.
• 3 معالق كبيرة زبدة.
• 1/2 كوب كبير دقيق.
• 4 كوبايات لبن.
• ملح وفلفل.
• بيضة.

الطريقة:

1- هنسلق المكرونة وبعد كده نحطها في مصفاة ونغسلها كويس بالمية الباردة علشان ما تلزقش مع بعضها وبعد كده نسيبها في المصفاة علشان تصفي أي مية فيها.

2- بعد كده هنجهز البشاميل عن طريق إننا نسخن الزبدة ونضيف إليها الدقيق مع التقليب لغاية ما لون الدقيق يبقي ذهبي بعد كده نضيف إليه اللبن تدريجيا مع التقليب المستمر لغاية ما يبقى قوامه سميك، بعد كده نضيف إليه الملح والفلفل الأسود ونشيليه من على النار وبعد ما يبرد نجيب بيضة ونحطها في طبق ونضربها بالمضرب مع الملح والفلفل وبعد كده نضيفها إلى البشاميل ونقلبهم مع بعض.

3- هنجيب قطع الدجاج المخلية ونضيفها إلى المكرونة ونضيف إليهم قليل من الموتزاريلا ونقلبهم مع بعض كويس.

4- هنجيب صينية فرن وندهنها بشوية بشاميل وبعد كده نحط فيها المكرونة والفراخ والموتزاريلا وبعد كده نغطي وش الصينية بطبقة من البشاميل.

5- هندخل الصينية في فرن متوسط الحرارة لمدة ساعة إلا ربع وبعد كده نخرجها ونحط على وشها باقي الجبنة الموتزريللا أو الشيدر وندخلها الفرن تاني لمدة ربع ساعة أو لغاية ما لونها ما يبقى ذهبي نخرجها ونقطعها ونحطها في طبق التقديم.

وبألف هنا وشفا

طبق اللازانيا

المقادير:

• كيس مكرونة لازانيا.
• نص كوب كبير دقيق.
• ملح وفلفل.
• 2 كوب جبنة موتزاريلا مبشورة.
• 2 ملعقة كبيرة زيت ذرة .
• 1/2 كيلو لحمة مفرومة.
• 4 كوبايات لبن كامل الدسم.
• كوب كبير عصير طماطم.
• 1/2 كوب زبدة.
• بصلة متوسطة الحجم مقطعة قطع صغيرة.
• بيضة.

الطريقة :

1- هنعصج اللحمة المفرومة عن طريق أننا نقطع بصلة كبيرة إلى قطع صغيرة بعد كده نضيف إليها الملح والفلفل الأسود واللحمة ونحطهم على النار ونضيف إليهم ملعقة سمنة ونسيبهم على النار مع التقليب المستمر وبعد نص ساعة نضيف إليها كوباية مية ونسيبها على النار لغاية ما اللحمة تشرب المية دي لما نلاقي إن اللحمة شربت كل المية اللي فيها نضيف إليها عصير الطماطم ونسيبهم على النار لمدة ربع ساعة كمان.

2- بعد كده هنجهز البشاميل عن طريق إننا نسخن الزبدة ونضيف إليها الدقيق مع التقليب لغاية ما لون الدقيق يبقي ذهبي، بعد كده نضيف إليه اللبن تدريجيا مع التقليب المستمر لغاية ما يبقى قوامه سميك، بعد كده نضيف إليه الملح والفلفل الأسود ونشيله من على النار وبعد ما يبرد نجيب بيضة ونحطها في طبق ونضربها بالمضرب مع الملح والفلفل وبعد كده نضيفها إلى البشاميل ونقلبهم مع بعض.

3- هنسلق المكرونة وبعد كده نحطها في مصفاة علشان تصفي أي مية فيها.

4- هنجيب صينية فرن وندهنها بالجزء المتبقي من الزبدة وبعد كده ندهنها بالبشاميل ونبدأ بعد كده في توزيع طبقة من المكرونة اللازانيا ومن فوقها طبقة البشاميل وبعد كده نضيف إليها كمية مناسبة من صلصة اللحم ومن فوقها نحط الجبنة المواتزيللا، هنكرر الموضوع ده أربع مرات بحيث يكون عندنا أربع طبقات من اللازانيا و 3 طبقات من صلصة اللحم وبعد آخر طبقة من اللازانيا نضيف الجزء المتبقي من البشاميل ونرش فوقه طبقة من الجبنة المتزاريللا.

5- هنشغل الفرن على درجة حرارة متوسطة وندخل صينية اللازانيا لمدة ساعة أو لغاية ما الجبنة تسيح ووش الصينية يبقى لونه ذهبي نخرجها ونقطعها ونحطها في أطباق التقديم.

رابط الموضوع من قسم مطبخ ليلاس

أشهى أطباق المكرونة