________________________________________
( عبد العزيز )
طلعت من بيت الوالد و اتجهت لبيتي بطمن على مها و العيال
دخلت لقيت مها حاطه وجهها على يد الكنبه في الصاله
و تصيح و اخوانها جنبها يصيحون ... شافوني و تراكضوا
يحضنوني ... و احضنهم كلهم بوقت واحد ...
حسيت فيهم ان قلوبهم بتطلع من صدورهم من اللي شافوه
هديتهم و جلستهم ... قالت مها : بابا صحيح بتتزوج على ماما !!!
طالعتها و قلت: من قالك !! امك !!! هزت راسها بايه
قلت بنفسي الله ياخذها حتى عيالها بتنكد عليهم ما يهمها
قالت و عيونها دموع : بابا لا تطلق امي !!!
قلت : مها حبيبي انتي شايفه امك تجلس كل يوم بالبيت !!!
هزت راسها بلا قلت : انا اشوفك اكثر من شوفتي لامك ... انا يا مها ابي وحده تهتم فيكم
و تهتم فيني و امك لاهية عنا ما تسال تاركه البيت مسداحي مرداحي
بس تجي عشان تنام و تلبس !!! ما تسأل عن اخوانك و لا عنك
كلامي صحيح و الا انا غلطان !! مها و هي تشاهق : بس هذي امنا !!!
ضميتها و حطيتها بحضني : و انا ابوكم و ما راح يهتم فيكم غيري ..
مها : بابا انت بتتزوج صح ..قلت : ايه صح ...قالت : و بتجيب زوجة جديده
و زوجات الابو ما تحب عياله و اكيد بتعذبنا .... قلت : لا ما احد يقدر يعذبكم
و انا موجود و اذا ما حبتكم ما راح احبها اهم شي انتم عندي ...
قال محمد : انا ابي اجلس ببيتنا هنا مابي اروح مكان ثاني
قلت : محمد ما راح احد بيطلعك من بيتك ... و حتى لو تزوجت
البيت لكم قبلها ...فارس : بس يا بابا ... ماما خوفتنا و قالت بتجي وحده و تعذبنا
قلت : يا حبايبي امكم الله يهديها تخوفكم بس لاني بتزوج عليها
تركي : طيب وين ماما الحين ... قلت : عند جدتكم سلمى ..
مها : و متى بترجع ..!! قلت : الله اعلم ...خلوها على راحتها
تعالوا الحين وخلونا نطلع فوق عشان تنامون و تريحون ... بكرا المدرسه
طلعوا العيال فوق و كل واحد اتجه لغرفته و سريره ...
دخلت جناحي ... وش اشوف الله يسود وجهك يا زفت !!!
قسما بالله كني متزوج لي بزره تدرون وش مسويه !!!!
مشخبطه على الجدران و التسريحه و السرير الوان تجيب الهم
و السرير مشقق المفرش اللي عليه ... كويس ما جابت بنزين و ولعت في البيت
دقيت على الشغالات و قلت لهم تعالوا رتبوا و نظفوا جناحي
و طلعت مره ثانيه من البيت و دقيت على محمد صديق الطفوله
و بعد السلام و السؤال عن الحال
قلت : ما ودك نتعشى برا ... محمد : تم وين تبي
قلت : برج الحمام
محمد :اوكييييي يا الغالي استناك
سكرت منه و شغلت سيارتي و على برج الحمام
من شافني محمد... وهو يقول : وش فيك عزيز عسى ما شر !!
و حكيت عليه بعض الشي .. و احنا نتعشى
قال محمد : يومك ناوي تتزوج ليش ما خبيت على زوجتك !!!
قلت : ما احب الخديعه !! و لا احب اخدع اللي حواليني
محمد : و الحين وش بتسوي !!!
قلت : انا جازم على الزواج ان شاء الله و الاوله طلقتها
و بكرا اروح للمحكمه بنفسي اخلص اوراقها ...
محمد : الله يوفقك و يخلف عليك و عليها ..
كملنا عشانا بهدووووء و حاسبت و طلعنا من المطعم
و كل واحد بسيارته ... شايل همي معي بس كاني ارتحت
بعد ما كلمت محمد ...
( نوره )
اليوم السبت رحت للكليه و كان فيه كم محاضره مهمه
و رجعت للبيت بدري بعد صلاة الظهر ...
اول ما دخلت البيت دق التلفون حق البيت و كنت قريبه
: الوووو ....
عبد العزيز : السلام عليكم .....
اوجعني بطني هذا عبد العزيز غريبه ليش داق على البيت !!!
: و عليكم السلام و رحمة الله ..
عبد العزيز : كيف الحال ن شاء الله بخير
: بخير الله يسلمك .. من معي ..
: انا عبد العزيز آل ****** الاخ سلمان موجود لاني دقيت على جواله و يعطي مغلق
: و الله ما ادري لحظه اشوف خلك على الخط لو سمحت
ووووووووووووووي بطني قامت تلعب فيه فراشات على قولة ( عاد انا اللي احبك )
حطيت التلفون و اشوف الجوهره سالتها : وين بابا !!
قالت : عند امه !!! قلت : وش امه !!! عيب حبيبتي قولي عند جدتي
روحي ناديه و قولي كلم التليفون يبغاك رجال ...
طلعت انا فووق و اتسمع للكلام اللي بيصير ...
سمعت سلمان : هلا ابو محمد وشلونك طال عمرك
:................................................. .........
سلمان : ابشرك كل شي زين و ما ناقصنا الا تحدد اليوم اللي يناسبك
ااااااااااااااااااااي .... هالمره موب فراشات هالمرة طحت عكرفت لي الزوليه اللي فوق
و طحت على ركبي اوووتش و الله توجع ..
(بسم الله عليك يا عروووس ارفقي ما بقى على الملكه شي هههههههههه)
هذي كانت عبارة الاخ سلمان و بصوت قوي الدددددب يا مللللغك
على باله بيستخف دمه ... ما رديت عليه دخلت غرفتي
و صفقت بالباب و قبلها سميت بالرحمن ,,, خفت على نفسي ههههههه
( منيرة )
صحيت ما ادري ويني فيه آآآآخ يا راسي صداااع شددددديد
و اطالع اللي حواليني و اشوف الا غرفة خواتي !!!!
تذكرت اني جيتهم البارح بعد كف عزيّز الكلب الحقير
و طحت عند باب بيت اهلي و جلست اصيح مثل البزران
و فتحت لي الشغاله الباب و انا طايحه
و دخلتني جوا ... و جووو خواتي يتراكضون
طلعوني فوق و انا مدري ... الدنيا تدور بي و اشاهق من الصياح
اخر علمي بهم بعد ما حطوني في السرير
و نمممممممت .... اكيد الحين بيقولون وش فيها
اقول لهم و الا اصبر !!! بس الحيوان طلقني و ضربني بعد
و اكيد بيرسل ورقتي و بيدرون اهلي ... طالعت الساعه : احدعش الضحى
سمعت الباب يدق الا هذي منال اختي : صباح الخير يالنوامه
قلت : صباح الخير ... وين أمي !! منال : امي بغرفتها ما تدري عنك
قلت : زييين انها ما شافتني البارح ... منال : وش القصة منيرة !!!
تخانقتي مع عبد العزيز !!! قلت : اللي ما يتسمى طلقني !!!
منال : ليييش !!! وش صااااير !!! قلت : خبرني انه بيتزوج علي وحده ثانيه
و تهاوشت انا و اياه ... و طلعت من بيته بعدما رمى يمين الطلاق علي
منال : منيره انتي اختي و اعرفك زززين ... عبد العزيز مو متسرع
و يدرس قرارته قبل لا يقولها ... فاكيد انتي قايله له شي كااايد
قلت : منال توقعين يعني انا اللي قلت له تزوج علي !!!
منال : لا اكيد ما قلتي له ,,, بس اكيد فيه أسباب خلته يفكر بالزواج ...
و بعدين هو قال لك انه بيتزوج و الا تزوج و خلاص !!!
قلت : لا قال بحط عندك خبر اني بتزوج جعله الماحي ...
منال : و الله اني اعرف عبد العزيز اكثر منك شفتي بيحط عندك خبر ..
لو كان غيره من هالرجال الخايسين كان تزوج و بعد ما يجي من شهر العسل يقول لك
بس هو رجال .. قلت : منووول وش قصدك !! يعني انا اللي خليته يتزوج علي !!
منال : تذكرين كلامي لك .. ياختي انا اصغر منك و اعلمك !! و المشكله حذرتك
بس ابو طبيع ما يخلي طبيعه !!! قلت : منيييل فارقي عن وجهي الساعه هذي !!
و الا ترا بابرد حرتي فيك تقلعي عن وجهيييييي !! ....
قامت منال و انا لامه راسي بايديني وش اللي صار
وش اللي خلى عبد العزيز يعافني و يفكر في غيري !!!
آآآآآه ....... صحيح انا ما اكن له أي محبه بس ليش انقهرت !!!!
ليش خربت غرفته !!! ليش صارخت بوجه امه و اخته !!!
المفروض اني تمالكت نفسي شوي ... يعني بيعرف اني ميته عليه
جعله الموت اللي يقبض روحه و يريحني منه الخسيس ..
قمت من السرير و رحت اغسل و اصلي الفجر
و لبست و نزلت تحت و لقيت منال و منى يتقهوون ...
و جلست اتقهوى و انا افكر في كلام منووول ... و ربطت كلامها بحلمي
تتذكروون الحلم هذا تفسيره بيعرس علي و بيطلقني
هذا اللي وقع بقلبي .. نزلت أمي من غرفتها و جلست معنا
و قعدنا نسولف و كنه ما صار شي .. و امي تناظرني
و تقول : وش فيه وجهتس منيره !!! فيتس شي !!!
قالت : لا و لاشي .. سلامتك ... طالعوني خواتي يعني قولي ..
كنت بتكلم الا الباب الخارجي يدق !!!!!!!!
:
:
(عبد العزيز )
قمت الصباح و انا حاس بصداع .. لا حول و لا قوة الا بالله العلي العظيم
نزلت تحت و خذت لي فنجال قهوة و حبة تمر
سالت الشغاله عن العيال قالت راحوا للمدرسه
خذت شماغي و عقالي بيدي و طلعت للسياره
مريت الشركه و خلصت لي اوراق مهمه .. و طلعت للمحكمه
و خذت ورقة طلاق منيره .... و رجعت للشركه مرة ثانيه
في اموري الشخصيه احب انجزها بنفسي ... يمكن تفكرون
اني تسرعت بطلاقي من منيره ... لكن لو انكم كنتم مكاني راح تسوون مثلي
انا انسان ما امدح نفسي بس كنت و نعم الزوج معها ... و الله توقعتها بتقول على راحتك
او بتتضايق لها شوي ... لكن ردة فعل مثل هذي ابدا ما كانت على بالي ... و يكون
هذا مردها علي !!!! ومو كذا و بس .... و حتى اعز الناس عندي امي و اختي ما قصرت فيهم !!!!!
خذوا هالمعلومه من الرجل نفسه ... مهما كان الرجل يغلي زوجته ...
الا ما يجي يوم .. و يقلب عليها بسبب ردة فعل منها او حتى كلمه ما انتبهت عليها او ما ثمنت لها ..!!
قلب الرجل مثل الرفوف اذا امتلت ... فرّغها كلها و لا كأن كان فيها شي ...
عشان كذا انتم تحسون ان الرجال ما فيهم خير .. مع انهم لو جيتوهم بطريقه ثانيه كسبتوهم بسهوله
بس و الله من اللي نشوفه و نتحمله و نضغط على انفسنا .. تجون انتم و تحوسون مربرنا
وصلت الشركه .... و كلمت سواق البيت و قلت تعال للشركه .. الحين
قلت لحسن السكرتير : اذا جاء السواق عطه الظرف و قل له يوديه بيت سلمى جدة محمد !!!
تدرون وش في الظرف !!! ورقة طلاق منيرة و معها شيك بخمسين الف ريال !!!
يمكن بتفهموني غلط بس من جد ما احب امد يدي على حرمه
و ان كان انها استفزتني بس المفروض امسك نفسي اكثر
و بعتبر هالشيك تعويض لها عن الكف اللي جاها ...
جلست اقلب بالاوراق اللي قدامي و جا ببالي سلمان باتصل عليه
و دقيت عليه يعطي مغلق .... خلني اجرب رقم بيتهم دقيت
و ردت وحده اتوقعها نوره او اخت لها الصوت يشبه صوتها و سالت عن سلمان
و كلمني سلمان و كان الرد طبعا الرفض ههههههههه امزح قصدي الموافقة
قلت لسلمان : طيب متى تبي نملك !! سلمان : اللي يناسبك !!
قلت : وش رايك الخميس هذا ... !!! سلمان : تم باذن الله
قلت : على كذا ترا بجيب معي ابوي و اخواني و عمي معي يوم الملكه ان شاء الله
سلمان: الله يحييهم تو ما ينور البيت الله يسلمك ....
قلت : ابو عبد المحسن ....بطلب منك طلب بس لا تفهمني غلط !!!
سلمان : آمر يا بو محمد ... قلت: اذا ما فيه احراج ودي اكلم نوره اليومين هذي قبل الملكه ..
سلمان تنهد : و الله مدري يا بو محمد بشوف اذا ما عندها مانع تكلمك عطيتك الرقم
قلت : لا تضغط عليها اذا ما تبي خلها على راحتها
سلمان : ابشر و لا يهمك اذا وافقت برسل لك رقمها على المسج
قلت : مشكور و ما قصرت نخدمك بالافراح ان شاء الله هههههههههههه
سلمان : الله يسلمك نشوفك على خير ان شاء الله
سكرت منه و رجعت لاوراقي مرة ثانيه و انشغلت ...
رفعت راسي على صوت مسج ما اهتميت له و لا فتحت عليه
و طالعت الساعه .... الا وصلت ثلاث بيذن العصر بعد شوي
طلعت من المكتب و ركبت سيارتي و اتجهت على طريق البيت
نزلت و صليت العصر بالمسجد ... و رحت للبيت
شفت العيال يلعبون بالكوره .. و يصارخون على بعض
وشت عليهم كوره لافه علي و يصارخون بابا بابا ... أخر شي طارت للاستراحه
هههههههههههههههههه من زمان ما لعبت كوره ...
ودخلت الصاله و شفت مها عند الكمبيوترو منسجمه على الاخر ...
يعني حياتنا مبرمجه و ما شيه من دون امهم ....
شافتني مها قالت بابتسامه حلوة : اهلين بابا تبي نجيب لك الغدا !!!
طالعتها و انا ابتسم : شكرا حبيبتي اخذتي ساندويتش بالشركه
بطلع فوق و ارتاح ... انتبهي لاخوانك قولي لهم يحلون واجباتهم و ينامون
مها : ان شاء الله بابا ..طيب ممكن اطلب بس لا تزعل !!!
قلت : لا ما راح ازعل ... تبين تكلمين امك ... هزت راسها بايه
قلت : كلميها حبيبتي ما راح ازعل ... هذي امك مهما كان
قامت و حضنتني بقوة و قالت : شكرا يا اغلى اب ... بستها على راسها
و طلعت فوق و دخلت جناحي ...
و جيت بفصخ ثوبي الا و يطيح الجوال و رفعته الا فيه رساله
فتحتها الا من سلمان و جوال نوره ... طالعت الرساله و ابتسمت
يا لبى هالرقم حتى رقمها ناعم مثلها هههههههه
حسيت اني صغرت عشررررين سنه يا حلوووو هالاحساس هههههههه
لبست شورت و قميص قطني و تمددت على السرير ...
و برمجت الرقم باسم ( قلبي الدافيء ) ما ادري ليشش اخترت الاسم
يمكن عشان عنوان القصه ...يمكن !!! ما نبي نفشل المؤلف ههههههههههه
جلست افكر.... اقول لها اني طلقت منيره و الا اتركها ما اقول لها !!!
بيني و بينكم ما ودي اقول لها لحاجة في نفس يعقوووب ...
بشوف وش معدنها !!! وكيف تفكيرها ,,, و عيالي بتتقبلهم و الا لا
هي توها صغيره بس مو كل الصغار مهبل و لا كل الكبار عاقلين آآآه عيوني خلاص بتسكرررر
حسيت بالتليفون يطيح من يدي ... و دخلت عااااالم النوووم
( ام عبد العزيز )
جلست اتقهوى الصبح مع ابو عبد العزيز ونزل صالح علينا
و فهد رايح للكليه الله يوفقه ... و جلسنا نفطر ...
و اعلمه باللي صار البارح عندنا ... و اللي سوته منيره فينا
ابو عبد العزيز : ليش ما هديتوه اول شي !!!
قلت : هي خلت الواحد يهدى !!! من دخلت و هي ماكلتنا بقشورنا
اللهم يا كافي أجل انا تقوووول لي عجوز قريح !!!
صالح و هو يكتم الضحكه : افا من اللي يقوله ....
قلت: منيره مرت عبد العزيز اخوك و حتى حصة ما خلتها تقول لها
انتي عقرب الطين !!
صالح : ههههههههههههههههههههههههههههههههههه
قلت : صوووووويلح هذا و انت ما جت زوجتك و تضحك !!!
صالح : يمه الله يسلمك ... ترا الواحد اذ عصّب ما يدري وش يقول !!
فلا تلومين هالضعيفه !!! يعني رجلها بيتزوج عليها تبونها ترقص !!!
ابو عبد العزيز : المهم خلك من هرج الحريم وش صار عليك الحين !!
صالح : قدمت بعثة لمدة ثلاث سنوات بدرس ماجستير في أمريكا
قلت : وعروسك !!! و بنتك !!!
صالح : انتي يمه قلتي لي عن العروس ...... بس اشوفك بردتي و انشغلتي بموضوع عبد العزيز
و بنتي وش أسوي بها قعادها عند امها ابرك لها من شحططت السفر حتى لوتزوجت
ماراح اخذها معي ...
قلت : وش رايك يا محمد نجزم على نوال بنت ال ****** و اكلم امها
ابو عبد العزيز : سألت عن ابوها يقولون و نعم بس تراه مقحط
قلت : يقحط و الا يقعد مالنا دخل فيه نبي بنيته و بس ..
صالح : افاااااااااا خالي بخييييل الله يستررر اخاف يفشلنا عند الرجال
قلت : لا يفشل و لا شي و البنت تمدحها حصة بنتي و تقول بنت عاقل و مزيونه
صالح : اهم شي حلوة و جسمها حلوووو مابي قصييره ....
قلت : انت تعرف ذوق حصة جعلها تشوف في عيالها ما يسرها
ماهيب صافطتن لك شي ما يجوز لك ...
صالح : خلاص يمه كلميهم و اذا وافقوا ... يحددون لي متى اشوفها
الشوفه الشرعية ,,, و على فكره ترا السفر يمكن بعد ثلاثة اشهر
و باخذها معي مرة وحده ان جازت لي ...
قلت : الله يكتب اللي فيه الخير لك و لها و لعبد العزيز اخوك
صالح : انا بعرف وش مسوي لكم عبد العزيز .. بس تدعون له
ابو عبد العزيز : تغار من اخوووك يا صالح ... الى الان
صالح : لا ما اغار بس ما اشوف مسوي لكم شي
قلت : يكفي انه بكري و بار فينا و يسال عنا و ما يحب يغيب عن عيونا مو مثل
بعض الناس يدور البعثات و السفر كنه محتاج فلوووس !!!!
صالح : افاااااااااااا شكلي بقوووم اروح للعمل قبل
لا اهون عن الرحله ... يالله تامرون شي حبايب ألبي
قلت: العاده يا سعاده .... سلامتك و انتبه على نفسك الله يحفظك
( نورة )
من قال لي سلمان ان عبد العزيز طلب رقمي
و انا مرتبشه .. و ما عرفت ارد الا : على راحتك
اقنعني سلمان و قال احسن قبل الملكه تسمعينه و يسمعك
و تشوفين منطوقه و تفكيره قبل لا يطيح الفاس بالراس !!!
استغربت كلام سلمان ,, العاده يمدح و يقول كلام زين عنه
و ليش الحين يقول هالكلام !!!! اوجعني قلبي !!
وش دخل قلبي !! بيكلمني و بشوف اذا اعجبني الحمد لله و اذا ما ...
ما ودي اقولها !!! تصدقون اني حبيته .... حتى صوته ما نسيته
من كلم و انا عارفه انه هو ... توقعون هو بعد يفكر مثلي
خليني اقوم بس اذاكر لي كلمتين تحت عند امي
نزلت تحت و رحت لامي بغرفتها منسدحه و تسمع نور على الدرب
اللي يذاع في اذاعة القرآن و يجي على الساعه تسع و ربع بالليل
جلست افتح الصفحات و انا ادور بعيوني ... و يرن جوالي
و اطالع الا رقم غريب !!! ما رديت و يرن ثانيه قلت اكيد
هذا الرقم يعرفني ... رديت : نعم ...... رد صوت عبد العزيز
اعرفه و الله اعرفه : مساء الخير ... كيفك يا نوره
رديت : بخير الله يسلمك ( سويت نفسي ما اعرفه ) مين معي
عبد العزيز بابتسامه : خطيبك .. قلت : احمممم ( بغيت أشرق ) يا هلا فيك
عبد العزيز : خذت رقمك من سلمان .... قلت : ايه قالي بس ما توقعت هذا رقمك
عبدالعزيز : يعني سلمان ما عطاك رقمي !!! قلت : لا و الله ما اعطانيه
عبد العزيز : انا يا نوره طلبت اكلمك حتى نتعرف على بعض اكثر قبل الملكه
انا : ..................... عبد العزيز : وراك سكتي !!! رديت : أسمعك تفضل
عبد العزيز ( يا لبى قلب اللي تسمع ) : زاد فضلك ... كلميني عن نفسك عن دراستك
عن طموحك او أمنياتك في الحياة ...
رديت و انا قلبي يرجف : ما فيه شي كثير احكي فيه انا ادرس لغة انجليزيه
في كلية التربيه و هذ اخر سنه لي و اتخرج و طموحي اني اتوظف بعد التخرج ...
عبد العزيز : بس الوظيفه الحين مو بالساهل تحصلينها !! يالله واسطات و حب خشوم
رديت :و انت اكيد ما راح تقصر بالواسطات ... ( اخ يا ليتني ما قلت هالكلمه )
عبد العزيز ( اهااا والله انك مو سهله يا نويران ) : ابشري ان شاء الله اذا علي أنا ما راح اقصر عليكي بشي
بس الوظيفه ان حصلت كان بها ان ما حصلت ما بيدنا حيله !!!
رديت : اكيييد طبعا ....طييب و انت !!!
عبد العزيز و بهمس : انا وشو !! تبين تعرفين طموحي !!! رديت : ايه
عبد العزيز : طموحي أني اشوفك عندي منورتن حياتي !!!
واااو جاني مثل المغص ببطني !!! انا ماخذه الامر بجد و هو شوي و يحط فيني شعر
يا حلو كلامك يا عزيز ...بس يا خوفي من بكرا اذا صرت منورتن ببيتك تغيره
عبد العزيز : !!! وراك سكتي !!! ما اعجبك طموحي !!!!
رديت : هااا لا قصدي ايه طبعا بس !!!! الصراحه اربكتني !!!
عبد العزيز ( يا زين المرتبكه ) : كلامي من قلبي طالع و اللي من القلب يخش القلب
و انا ما حكيت الا اللي بخاطري ...
رديت : طيب ممكن اطلب منك طلب الحين .... عبد العزيز : امري
رديت : ممكن استأذن منك الحين !!! ... عبد العزيز ( بحرجها ) : ليش وش مشغلك !!!
رديت ( شكله راعي طويله ) : عندي كويز بكرا و كنت جالسه اذاكر قبل لا تكلمني ...
عبد العزيز : تبين أجي اسمع لك ... ضحكت بقوة و ما قدرت املك نفسي : هههههههه لا شكرا
عبد العزيز : تسلم لي هالضحكة و راعيتها ... يالله راح اتصل عليك بعدين
و اتطمن على امتحانك ذاكري زين ... يالله مع السلامه
: الله يسلمك .. في امان الله
سكرت منه و انا شوي و اطير بالسما و تلفت حولي
وين رحت كنت عند أمي و انا الحين بالمجلس الكبير شلون جيت هنا !!!
( منيرة )
جابت الشغاله بعد ما فتحت الباب ... و مدت لي ظرف كبير
وقالت انه لي انا جابه سواق البيت ... خذته و فتحته الا فيه شيك
و ورقه جوا مغلف من المحكمه .. طاح قلبي
هذي اكيد ورقة طلاقي .. سويتها يا عزيز لها الدرجه كارهني
لهالدرجه متحمس للزواج ,,, هين تشوف وش بسوي
قالت امي : وش هالاوراق !!! قلت : يمه عبد العزيز طلقني ...
امي : وشووووو .. وش تقولين انتي !!!! قلت : العلم الللي جاك ,,
امي : الله يسود وجهك يالخايسه .. وش سويتي !!!
ناظرت خواتي و ناظرتها : يعني كلكم تحسبون السبب مني ..
منال : منيره انتي اختنا و نعرفك زين و عبد العزيز بعد نعرفه
و بصراحه هو ما يسوي شي الا اذا كان عنده اسبابه !!!
منى : صحيح منيره عبد العزيز من كلامك عنه يحبك و يدور رضاك
هذا كلامك انتي عنه .. وشلللون الحين قلب عليك !!!
منال : اصلن من كلامها عنه و تصرفاتها معه عرفت انه بيجيك هاليوم !!
ما قلت لك يا منيره اهتمي بزوجك لا تطلعين كثير من البيت !!! ما نافعك
الا زوجك و عيالك ... هذا هو الحين بيتزوج عليك !!
امي : كل الرجال يعرسون على حريمهم ماهو اول واحد ... البلى ليش طلقتس
وش سويتي يا مسودة الوجه !!! وش اللي خلاه يطلقتس !!! الا انتس مسويتن بلى تسايد
رديت و ببرود : ما سويت شي قلت له ان عرسك ما يهمني لانك ما تهز فيني شعره
لمت أمي يدها على راسها ...... و خواتي بققوا عيونهم !!!!
امي : عمى يعميتس لو انتس قايلتها لوحده من خواتس ما تكلمتس ابد !!!
تقولين هالكلام لرجلتس !!! و ياريتس ما خذتن أي واحد !!!
ماخذتن احسن الرجال و ارجلهم بعد و هذي تاليتها تقولين له كذا !!!!
رديت : و انا بعد احسن الحريم وش كبر راسه علي و بياخذ غيري !!!
امي : من قالتس انتس مزيونه !!! وحدتن نحيفه عظام رقبتس طالعه
من النحف لو اني رجلتس رميتس عند اهلتس يعالجونتس !!!
منال : طيب يوم قلتي هالكلام وش سوا .... قلت : طلع و راح لبيت ابوه
منال : و بعدين ..!! طالعتها انا : وش تبين يعني .. تحقيق هو !!!
منال : ابشوف متى طلقك الى ان طلع من البيت ما قال شي !!!
قلت : هو خيرني اني اجلس عنده او يعطيني ورقتي !!!
منى : و اكيد قلتي الورقه اهم من عيالك !!! قلت : اول مرة اشوفكم ضدي ..!!!
منال : انا مع الحق يا منيره ... منى : و لاننا نحبك و خايفين عليك لازم نوقف في وجهك
حتى ما تظلمين نفسك اكثر !!! .... أمي و هي تتنهد : لا حول و لا قوة الا بالله ...
و عيالتس وينهم الحين !!! قلت : في بيتهم ... بعد وش اسوي بهم !!!!
منال : كملي الفلم و بعدين !!! منيره :ما يحتاج أكمل من الحين موقفي مو معجبكم !!!
امي : منى يا أمي جيبي لي ارقام التلفونات بكلم أم عبد العزيز .....
قلت : لا لا تكفين يمه موب الحين .... كلميها بعدين !!!
امي : تشب يا مسودة الوجه و الله انتس مسويتن شي موب زين و مغبيتن علي !!!!
قمت من مكاني و خليت الظرف الكبير وشافوا الشيك و انا أطلعه و خذته معي فوق !!!
::
::
( ام منيرة = أم سعد )
جابت منى التلفون و دفتر الارقام و دقت لي على رقم ام عبد العزيز
قلت : السلام عليكم من !!! .. حصة وشلونتس يمه عساتس طيبه ... وش لون عيالتس
و ردت علي حصة : هلا و الله و عليكم السلام ... خالتي وشلونك الله يسلمك
الحمد لله كلنا بخير الله يسلمك وشلون البنات و العيال
رديت : كلنا بخير الله يسلمتس .. بس و الله من قالت لي منيره الخبر
و انا تدور بي الدنيا و ارتفع ضغطي و سكري ,,,
حصة : الله يهديه عبد العزيز و الله كلنا ضاقت صدورنا ... بس و الله يا خالتي
مو بسيط اللي سوته منيره فيه يوم علمها انه بيعرس عليها ..
قلت و انا قلبي يقرصني : وش مسويه منيره !!!!
حصة : هاااا !!! خلي منيره تقول لك احسن بنفسها ...
قلت : و الله يا بنيتي مدري وش السالفه منيره ما تكلمت و انتي تقولين الخبر تحت ضلوعها
مير هين بعرف الهرجه كلها ... وين الوالده يا امي ابي اكلمها
حصة : لحظه شوي ...
كلمت ام عبد العزيز و بعد السلام و السؤال قلت لها ورا عبد العزيز
يطلق منيره ... ما فكر في عياله .. ما فكر في حياتهم ,,
و ام عبد العزيز ضايق صدرها تقول اني ما ودي وصلت الامور كذا
بس منيره الله يهديها فضحت بنا حتى عيالها مسحبتهم معها
و تصارخ بوجهي و بوجه بنتي حصة و تسبنا ....و اخرتها شققت مفرش غرفتها
و حاست غرفة عبد العزيز حووووس ..خذت العلوم كلها من ام عبد العزيز
و جلست افكر في منيّر و سواياها ... زاد انا اقول عبد العزيز ثقيل موب يحركه أي شي
و بنتي و اعرفها زين تسكت و اذا انفجرت حاست الدنيا حوووس
قلت لام عبد العزيز : امسحيها بوجهي ياخيتي و بتشوفين اللي يرضيتس ان شاء الله
ام عبد العزيز : و الله يام سعد ان الدنيا ضاقت بي يوم دريت
بس انتي عارفه الرجال ما يهزب و لا يستهزأ بكلامه و بنتك الله يهديها
ما خلت له فرصه و الله انه جاينا و ما علمنا عنه شي الا بدخلة منيره
و هي مسحبتن عيالها ... بغا يطير عقل عبد العزيز ..
و كلامها علينا انا واخته و ما صبر .. يقول لو ما اعرست ... ما عاد ابيها عقب كلامها
قلت : وشلون يعني !!! ما يبي يرجعها لعيالها !!!!
ام عبد العزيز : ما ظنيته .. هو يقول لحد يتدخل بحياتي و عيالي !!!
قلت : و عياله مايبون يشوفون امهم !!! ام عبد العزيز : و الله يا اختي مدري عنه
هو ما قال شي و لا يبينا نتدخل ... كان تبين تكلمينه و تسالينه كلميه و شوفي !!!
قلت : طيب يا ام عبد العزيز كانك تعرفين رقمه عطينيه الحين ...
( منى جيبي القلم اكتبي رقم عبد العزيز .... أشرت لي الرقم عند منيره
أشرت لها ما بي منها شي... قومي جيبي لي قلم )
عطتني ام عبد العزيز الرقم و سكرت منها و وعدتها اني أسيّر عليها قريب
قعدت اقرا في الرقم ... و اقول بنفسي هيّن مانيب مكلمه الحين بكلم لين يهدى الوضع شوي
الحين بقوم لمنيره وبشوف وش اللي عندها ... !!!!
( حصة )
سكرت امي التليفون من ام سعد ... و سالتها :
ليش طلبت رقم عبد العزيز ... تبيه يرجع منيره !!!
امي : ايه تقول بحاكيه ماهو معقول يحرم العيال من امهم !!!
حصة : يا قلبي يا عزيز و الله ما يستاهل هالمشاكل ... شوي و يدخل ابوي
قمت و سلمت عليه و حبيت راسه .. قال لي : حصة غريبه وش جايبك هالحزة
قلت و انا اضحك : ليش يا بو عبد العزيز ما تبيني اجي !!! قال : الله يحييك في كل وقت
بس ماهو طبع لك و لا هيب عادة .. تتركين بيتك وقت الغدا !!!
قلت : عبد الرحمن مسافر من البارح و جبت عيالي هنا نتغدى و ينبسطون مع عيال عبد العزيز
قال: اييييه ... الله يحييكم ... قالت امي : خلي عيال عبد العزيز يتغدون ببيتهم و بعد العصر يجووون هنا
اذا خلصوا واجبهم ... قلت : خلاص يمه بكيفهم انا اصلا بروح بعد العصر
يالله اشوف للبيت قبل لا يجي عبد الرحمن بكرا ...
قال ابوي : ما اتصل عبد العزيز !!! أمي: لا و الله بسم الله عليه ما شفناه من بعد اللي حصل البارح !!!
ابوي : كلمتي اللي تبونها لصالح !!!! .... أمي : بعد المغرب ان شاء الله بكلمهم
حصه : يعني جزمتم على نوال ال ****** !!!! امي : ايه يا بنيتي .. اقعدي عندي لين اكلمهم ....
قلت : المشكله بكرا دراسه و بيجي ابوهم ... خلاص اجل باستنى اذا صليت العشاء بامشي ...
قالت امي : ودي تروحين تشوفين عبد العزيز ... كانه جا من الشركه و الا لا !!!
قلت :. نرسل احد لبيته ....يشوف سيارته فيه و الا لا ....
مدري يمه مابي احرج عبد العزيز .. يعني اخاف يفكرنا نبي نغير رايه او شي
ابوي : لا تتدخلون في عبد العزيز .. خلوه على راحته هو رجّال و يعرف يتصرف ..
امي : تو ام منيره مكلمتن علي تقول ما يصير هالكلام تفرقون العيال عن امهم ...
ابوي و هو شايط : قولي لها ,,لو بنتك فيها عقل ما سوت اللي سوته و لا فرقت عيالها عنها بيدها
سبحان الله العظيم من دخلت علينا هالادميه و انا ما ارتحت لها ابد ...
استغربت كلام ابوي ... اول مرة اسمعه يتكلم بها اللهجه ,, ويبين موقفه من منيره !!!!
رحت للشغاله و قلت لها روحي لبيت عبد العزيز وشوفي السيارة اذا موجوده و الا لا
رجعت لمكاني و لا لقيت ابوي .. و امي جالسه و تكلم بالتلفون ...
شوي و تجي الشغاله و تقول موجود مستر عبد العزيز بيبي يقول موجود فوك و نايييم
هزيت راسي طيب شكرا .. و امي لا زالت تكلم بالتلفون ...
و صلينا المغرب و كلمت أمي اهل نوال تخطبهم و وعدوها انهم يردون لنا بعد اسبوع
قعدت اسولف اناو امي شوي و قلت للشغالات نادوا عيالي بمشي
ما عاد الخير ... تأخرنا على البيت ... الساعه الحين ثمان و نصف !!!
قلت لامي وين ابوي قالت : يمكن عنده رجال في الديوان .. قلت : اجل سلميني عليه
يالله يا عياااااااااااااااااااااالي ......
________________________________________
( عبد العزيز )
سكرت من نوره و اطالع بالتليفون ... شكلها متقبلتني البنت
و انا بعد ارتحت بعد مكالمتي لها .. لكن وش سالفة الوظيفه بعد !!!
على طول تكلمت عنها ... شكل احد قايل لها اني مابي موظفه !!!
الوظيفه بالنسبه لي للمرأة شي ايجابي منها تقضي على فراغ كبير عندها
و منها تكون اكثر استقلاليه مع اني ما راح اقصر عليها ..
ما بقى على الخميس شي .. شكلي ما راح اكلمها الا بعد الملكه
انا كان هدفي من المكالمه جس نبضها و اعرف موقفها ...
لكن الحين على انها مكالمة قصيره لكن ارتحت شوي ...
قمت و لبست ثوب البيت ... و طلعت من جناحي و رحت لغرفة العيال
شفت مها تذاكر بغرفتها ...و رحت اشوف محمد لقيته نايم بغرفته و فارس و تركي برضه نايمين بغرفتهم
رجعت لمها و قلت لها : وش اخباركم ... تعيشتوا !!!
مها : ايه بابا و خليتهم يذاكرون بعد !!!!
قلت : بعدي بنتي .. و انتي اذا خلصتي الحين نامي يا بابا الساعه عشر ما يمديك تنامين زين
مها : ان شاء الله بس بقى درس و اخلصه ..
طلعت منها و نزلت بروح اشوف الوالد و الوالده قبل لا ينامون ...
دخلت البيت لقيت الوالده بتقوم من مكانها و شافتني و قالت بلهفه :
هلا با ابوي وينك يا حبيبي ما شفناك من امس ضاق صدري عليك
جيت لمّها و حبيت راسها و قلت : و ليش يضيق صدرك !!! ما فيني الا العافية
الوالده : الله يوسع صدرك بالعافيه و يوفقك ,, متى ان شاء الله الملكه !!!
قلت : انا جاي الحين و بقول للوالد انه يوم الخميس لا يرتبط مع احد على الغدا
و ابي صالح و فهد و بكلم عمي ناصر يجي معنا ....
الوالده : ابوك توه طالع لغرفته رح له فوق و كلمه ...
قلت : لا بكرا اذا جيت من الشركه مريتكم اتغدى عندكم و اقوله
رحت و حبيت راسها ....: تصبحين على خير
الوالده : لاقي خيررر يا ولدي الله يسمح امرك و يوفقك
طلعت و رحت لبيتي و دخلت جناحي و جلست على النت شوي
اشوف بعض الاسواق العالمية .... سجلت بعض المعلومات اللي تهمني
و دقيت على الشغالات و قلت لهم : سووا لي كاس حليب دافي
جابت لي الحليب و حطته في الاوفيس الصغير اللي بجنب غرفتي و طقت الباب علي
اخذت الحليب و جلست اشربه ابي اعصابي تريح شوي و دخلت الحمام
الله يكرمكم اخذ لي شور دااااافي تذكرت القلب الدافي ... !!! يا ترا هي تفكر بمكالمتي
و الا ما عندها وقت للافكار !!!! طلعت من الحمام ... و صليت لي ركعتين
اطلب من ربي التوفيق و السعاده ..... بعدما خلصت جلست افكر في البيت
اجيب نوره هنا و الا اخذ لها بيت لحالها !!! بفتح معها هالموضوع و اشوف رايها
لكن ........................... بعد الملكه ان شاء الله
( نورة )
اليوم الخميس ... من قمت و قلبي يرجف رجفاااان
طول البارح ما نمت ما غير اصلي و ادعي ربي يا رب تكتب لي ما فيه الخير
يا رب توفقني مع عبد العزيز .... ما نمت زين البارح مع اني طلعت للسوق
مع فوزيه و درنا لحد ما اوجعتني رجووولي ادور فستان للشبكه يناسب
و كلمت اللي يسوون كوشه ما عطيتهم موعد معين بس قالوا أي وقت بتلقينا جاهزين
و طلبت صينيتين شوكلاته واحد من جووي و حده من باتشي و فطاير من روزا و ملك الحلويات ..
و خليتهم على الطلب أي وقت أطلبهم يرسلون الصياني للبيت
طبعا فوزيه تقول لي ماله داعي وشو له هالاستعدادات ما هي اول فرحتك !!!
قلت : فوزيه يا عمري انا احب اعيش الفرح داااايم ... و ابي يعرف عبد العزيز
اني اهتم له و استعد له عشان ما يناظر برا !!!!!
فوزيه : نشوف ... اللي يعرس مرة يعرس اربع مرات !!!
قلت : فالك ما قبلناه يا مرت اخوي ان شاء الله للي يكرهوني !!!!
و ناداني سلمان علشان اوقع و وقعت على العقد ... باس راسي سلمان و قال مبروووك
طالعته باستغراااب : الله يبارك فيك ... عقبال ما تزوج عيالك ان شاء الله
رحت عند امي و حبيت راسها و دعت لي بالتوفيق و دمعت عيونها
يا حبيبتي يا يمه الله يخليك لي يا بعد هالدنيا كلها .....
راحوا الرجال و انفض المولد مثل ما يقولون .... و طلعت ارتاح
بغرفتي ... و اسمع صوت مسج على جوالي ... فتحته
( حبيبتي بكلمك الليله ان شاء الله على الساعه 11 )
حبيبتي !!! على طوووول شكله ما عنده وقت عزوزي !!!
كلمت صديقتي نوف لاني شفتها داقه على جوالي و دقيت عليها ..
نوف معي بالكليه و هي متزوجه و عندها خلللودي ... ردت علي و بصوت كله فرح :
مبرووووووووووووووووووووووووووووووك ناني الف مبروك حبيبتي
قلت : الله يبارك بعمرك و قعدت احكي لها من اول اليوم الى اخره ما عدا سالفة المسج
و قعدنا نسولف و نتكلم بمواضيع ثانيه ... لحد ما جا وقت صلاة المغرب
خذتي لي شور قبل و صليت و نعست و ما حسيت الا الساعه احدعش
و الجوال يرررررررن و اطالع الرقم الا ............
:
:
:
:
:
:
:
:
(عبد العزيز )
اليوم الاربعاء ... طلعت من الشركة العصر ودخلت بيتي
و شفت مها جالسة .. سلمت و قلت لها
اذا تبين تروحين مع أخوانك لأمك يا بابا روحي اليوم ......
وافقت حبيبتي و قالت : معليش يا بابا ... باخذ معاي الشغاله تساعدني على اخواني
قلت : خلاص اللي تبين ... مها : بابا ...!!! ما راح تزعل اذا نمنا عند ماما سلمى !!
قلت : لا حبيبتي و ليش أزعل أنا أبي اللي يريحكم و يبسطكم
مها : طيب و ماما !!! قلت : وش فيها !!!
مها : ماراح تجي تاخذها !!! قلت : مها حبيبتي .....أنتي كبيره ....و بقول لك
آخر كلام عندي ... أمك يا بابا ما تبيني و قالت هالكلام بوجهي
يعني حتى لو رجعتها كلامها ما راح انساه و لا يمكن اعيش معها و انا اذكر كلامها ....
مها : بس يا بابا انت بتتزوج على ماما !!! و اكيد هي زعلت من هالشي !!!
قلت : يا حبيبتي انا كنت دايم أزعل منها بس ما أضايقها بالكلام !!!
اطلع من البيت و ينتهي الموضوع عندي !! مها امك كانت كااانت غالية عندي
لكن سوء تصرفها معي و مع ماما هيا و عمة حصة خلاني اطلقها
مها : لكن ماما تقول انت طلقتها عشان تقعد لحالك مع العروسه الجديده !!!
قلت : شوفي يا مها انتم عندي اغلى ما أملك ..... و حتى لو ما خطبت وحده ثانيه
و امك سووّت اللي سووته كنت راح اطلقها اليوم او بكرا
مها : لكن بابا .... قاطعتها : ريحي راسك من هالموضوع حبيبتي
انتي شفتي حياتكم استمرت و لا تغير عليكم شي !!!
و اذا على زوجتي الجديده فهي بتحبكم اكيد لانها تحبني
و اللي يحب احد ما يضايقه..... كلامي صح و الا لا !!!!
مها : حتى احنا نحبك بابا و ما نبي نضيّق صدرك !!!
بستها على راسها : هذي بنتي اللي احبها ... يالله حبيبتي نادي اخوانك يروحون معك
و طلعت مني و انا اشوف دموعها بعيونها ... أوجعني قلبي عليها
هالبنت ما تصورت انها حساسه .... سلموا علي العيال و ركبوا مع السواق
الحين جا الخميس و صارت الملكه الحمد لله و كل شي تمام
و أكيد نوره قالت لكم عن الرساله اللي ارسلت لها ....
وصّلت الوالد مع اخوي صالح للبيت و فهد أخوي وصّل عمي ناصر لبيتهم
نزلنا و القى وجه الخير الوالده تبارك لي و عيونها غاصة بالدموع !!! هي و حصة
و اضمها لصدري و قلت لها : طيب ليه الدموع !!! الوالده : فرحانة لك و خايفتن عليك
قلت : وش تخافين منه !!! موب اول واحد يعرس انا و لا اخر واحد !!!
حصة : الله يكفيك ياخوي شر من فيه شر ... و الف مبروك ان شاء الله تكون ام عيالك و انت ابو عيالها
الوالده : آمين و ييسر امرك و يزيل همك و يخليك لعيالك و يسخرلك من أقوى منك ...
صالح : لحظه لحظه بسجل هالدعاوي ...علشان اقارن اذا جا دوري بشوف وش تدعين لي !!!
ضحكت و قلت : الغيره على كبر مشكله الصراحه هههههههههههههههههههه
الوالد : الله يوفقكم ان شاء الله ...
جلسنا نسولف شوي و باين على الوالد انه مرتاح للنسب الجديد ..
حتى صالح باين انه اندمج مع نهار اخو نوره ...قمت منهم و قلت استأذن
بروح ارتاح شوي ... صليت المغرب و انسدحت شوي
ونمت على كنبة الصالة ... قمت على صوت اذان العشاء و رحت و توضيت
و طلعت للمسجد ... بعد الصلاة دق علي محمد صديقي يطمن علي
بشرته بالملكة ... و بارك لي و قال هذي يبي لها عزيمه
و تواعدنا بالقهوة اللي متعودين نجتمع فيها بعد كل وين و وين
المهم رحت للقهوة و شفت محمد و خالد و عبد المجيد
و كلهم من اصدقاء الثانوي و الجامعه و كلهم رجال أعمال و ناجحين
قاموا لي اول ما شافوني و باركوااا لي و قعدوا يعلقووون علي و انا اسكّت بهذا يرد الثاني
و محمد فاطس من الضحك ... التفت عليه و قلت : عازمني عشان تباركون لي و الا تمتحنوني !!!!
ضحكنا كلنا مع بعض و بصوت عالي لدرجة ان اللي حوالينا التفتوا علينا و يبتسمون
المهم انبسطت معاهم و لزموا على العشاء و رحنا و تعشينا و طالعت الساعه الا 11 و نصف
افففففففف و الله نسيت البنت ما كلمتها ... تعذرت منهم و قلت بروح للبيت ورانا بكره صلاة جمعه
قال محمد : احلى جمعه لأحلى عريس هههههههههههههههههههه الله يرجهم فضحوني عند المطعم
تواعدنا نشوف بعض قريب ... و كل واحد شغل سيارته و طلع
وصلت البيت قبل 12بعشر دقايق ... دخلت و طلعت فوق على طول
و غيرت ثيابي و لبست لي شورت و بدون قميص و غسلت وجهي و يديني يبي لي اصحصح شوي
و رحت للاوفيس سويت لي كابتشينو و خذت الجوال و دقيت
على القلب الدافيء ......ردت علي و قالت بصوت واطي : نعم
قلت : ..... و الا اقول اخلي نوره تكمل عني وشوفو ردت فعلها احسن
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!
( نوره )
طالعت الساعه لقيتها 11 بس الساعه اللي على الكومدينه
و اطالع بالجوال الا رقم عبد العزيز ... و ساعة الجوال 12 شلون !!!
المهم كلمته و انا مستحيه : نعم ... قال : مساء الخير نوره ... كيف الحال .....
مغصني بطني يوم قال اسمي ......قلت : مساء النور... بخير الله يسلمك
قال : مبروك حبيبتي ,,, قلت بحياء : الله يبارك فيك ,,
قال : كملي !!! قلت : وش اكمل !!! قال : قولي حبيبي !!!
انا هنا دخنت عيوني بغيت أصيح و ارتفعت حرارتي بصراحه ما تعودت احد
يقول لي مثل هالكلمات !!! حتى اللي كنت متزوجته قبل ما يعرف يقول كلمتين على بعضها
أصلا هذاك ما عشت معاه كثير .. و الله يستر علينا و عليه
المهم قال عبد العزيز : نوره .... قلت : هلا
قال : ما تبين تقولين حبيبي !!! قلت و بتسرررع : لالالالا !! مو قصدي
قال: مستحيه مني !! قلت بهمس مدري وشلون طلع صوتي كنه صوت دجاجه مزنوطه ( لا تضحكون ) :ايييييه
قال: طيب ممكن اطلب منك طلب ... قلت : سم
قال : قولي يا حبيبي .. قلت : ما اقدر ....!!! قال: و اذا قلت عشاني .. يعني مالي خاطر عندك
و الله احراج يا ربي بجلس على هالحال أي كلمه بيستقعد لي فيها بقول و اخلص ...
قلت : ياااا حب يب ييي قال : امممممممممم ما عجبتني مقطعتها عيديها ثانيه ..!!!!
قلت بانفعال : لا أرجوووووووووووووك و الله ما أقدر !!
سمعت ضحكته ضحكة جناااااان و احسها طالعه من قلبه و ابتسمت ... قال : طيب خلاص و لا يهمك
يكفيني اني سمعتها منك و ما رديتي طلبي ... تستاهلين هدية
وش اقول!!!! قلت : شكرا ...قال : عفوا هههههههههه طيب نوره انا بقول لك خبر جديد
و اتوقع انه بيغير من اللي خططته لي و لك ... قلت و قلبي اوجعني الله يستر : تفضل .. أسمعك
قال: انتي الحين زوجتي الوحيده ..... و أم محمد طلقتها ...
بصراحه انصدمت و مدري حسيت بفرحه مؤقته بس خفت من عواقب هالفرحه !!!
قلت بخوووف : لييييش .... عسى مهو بسببي !!! قال : لا يا حبيبتي انتي مالك دخل بالموضوع
لانه حتى لو ما كنت خاطبك كنت راح أطلقها .. قلت : بس هذي أم عيالك !!!
قال : هي لو انها عارفه قدر عيالها كان ما وصلتها معي للطلاق ...!!
قلت : يعني ماراح تغير رايك !!! قال : لا ما أظن اللي صار أقوى من اني أرجعها !!!
قلت : طيب و ش اللي بيتغير من اللي خططت له ....!!!
قال : ما عندك مانع اننا نعيش مع عيالي في بيتنا ...
قلت : لا ما عندي مانع اكيد بس عيالك اخاف صعبه عليهم يشوفوني مكان امهم !!!
قال : عيالي الاولاد صغار ... مها اكبرهم في ثالث متوسط و فهمتها الموضوع و اتوقع انها بتفهم اخوانها
قلت : ما ادري الصراحه وش اقول لك يعني ما توقعت مثل هالخبر !!!
قال : و لاني عزوبي الان ودي نتزوج بدري يعني لو الاسبوع الجاي يكون احسن !!!
يا ربيه كلما قلت راح الحيا مني ... بكلمه يرجعه ... سكت و ما قلت شي وش اقووول !!!
قال : نوره ... وش قلتي ..!! قلت : احمم ( غصيت بريقي) مدري صراحه بس مو كنه بدري
يعني ما تجهزت و لا شي ... و حتى الشبكة ما استعديت لها ...
قال : الشبكه أي يوم تبينه ... حددي اللي يناسبك و با اسرع وقت !!
حتى نقدر نحدد الزواج بدري ...
قلت : عبد العزيز ........ سكت سكته طويله خفت انه نقطع الخط قلت :
الوووو قال : يا حلووو اسمي ليش ما قلتي حبيبي !!!!
بصراحه ضحكت بصوت واطي و قلت : ممكن اطلب منك طلب !!!
قال : تبين اقول حبيبتي !!!! قلت و انا ابتسم : لالالالا ...ضحك : يعني ما تبني اقول
قلت : اسمعني الله يسلمك ....انا ودي يكون الزواج بعد ما اتخرج انا ما بقا لي غير شهر و نص
و باذن الله راح اتخرج و اخلص من هم الدراسة ...!!!!
قال : وش بيصبرني شهر و نص !!! قلت بسرعه : صدقني من صالحك تاخر الزواج حتى العيال
يكونوا خلصوا من الدراسه و تبدا الاجازة و ممكن ناخذهم معنا بشهر العسل .....
سكت شوي وقال : من ناحية الدراسه معك حق .. بس شهر العسل ما ظنيت يروحون معنا !!!
قلت : و ليش ما يروحون صدقني راح يتعودون علي بسرعه أكثر و أنا بعد ..
قال : يتعودون بعدين .. و انا ما راح أتركهم الوالد و الوالده بيسافرون على جنيف مثل كل سنه
و بيروحون العيال معهم و ينبسطون و يمكن نمرّهم هناك اذا جينا راجعين من شهر العسل
قلت: اللي تشوفه ... قال : أول مرة أطول في مكالمة و ما حسيت بالوقت ...
قلت : اووو الساعه 1و نصف .... قال : ماراح اسكر خليني اشبع من صوتك !!!
يا ربيييه هالانسان ما يشبع من الاحراجات .... سكت و ما رديت ..
كمل : نوره ممكن اطلع انا و انتي نتعشى برا في أي يوم !!!!
وشوووووووووووووووووووووووووووووو!!!!!!!!!!!!!!!!
قلت : هاااااا قصدي مدري بصراحه بشاور اخواني........
ضحك قال : طيب شاوريهم و ردي لي خبر مع ان مالهم علاقة فينا بس لاجل عين تكرم مدينه
قلت : ان شاء الله راح اخبرك ... قال: اوكي حبيبتي مضطر اقفل الان ما بقى شي على الفجر
قلت : تصبح على خير ... قال: تصبحين على خير حبي .....
سكرت منه وانا انواع المشاعر تحوس بقلبي و مخي واااااااااو من جد هالانسان مو طبيعي متجدد ماشاء الله عليه
شكله رزه و جنتل و كلامه كله عذوبه و خفة دم و جريييء حبتين ههههههههه
يعني كامل و الكامل الله بس لو ما كان متزوج و عنده عيال .... كان الحين انا مبسوطه ...
و يا ترا ليش طلق زوجته .... وش راح يكون موقف اهله مني !!
اووووووه يا ربيه نسيت اصلي العشاء ... الله يتوب علي ..صليت و تسننت و اوترت بعد و استغفرت ربي
كل شي يهون الا الصلاة ما تأخر عن وقتها .....
سمعت الجوال يدق لاستقبال رساله فتحتها طبعا من حبيبي هههههههه و غيرت اسمه في الجوال الى( حبيبي )
( أشتقت لك حبيبتي .... الاثنين بازوركم بعد صلاة العشاء ان شاء الله )
:
:
:
:
:
:
:
:
:
:
( منيره )
جوني العيال يوم الاربعاء .. و اول ما شفتهم ما اهتزيت سلموا علي عادي
بس شفت الدموع بعيون مها .. قلت لها : وش فيك مهاوي
قالت : ليش تركتي بابا ... قلت و بتعصيبه : هو البادي بيتزوج علي و تبيني اجلس عنده !!!!
مها : بس ماما المفروض تفاهمتي معه ... لو عشاني انا و أخواني !!!
رديت : و هو يوم بغا يتزوج ما فكر فيكم !!!! نزلت مها راسها و حطت يديها على وجهها وبكت
جت منال و حضنتها و طلعت بها برا عند الحديقه ....
أمي : حسبي الله عليتس من بنت حتى بنيتس ما رحمتيها !!!
قلت : طيب وش تبيني أقول لها !!! خلاص برجع و قولي لبوك يرجعني !!!
امي : لو فيتس خير ........ قلتي لبنتس انا احبكم و ابيكم و قولي لبوتس يجيبني عندكم
قلت : ما بييييييييييييييييييه اصلن ما احبه قطع و الله اذا شفته كنه شايفه جني !!!
امي : اجل ليش قعدت تصارخين عليهم و شققتي مفرش الغرفه و انهبلتي ... لو ما يهمك كان طلعتي بسكات !!!
قلت : لا و الله ...... اخليها يتهنى و انا كل السنين اللي فاتت ضاغطه على نفسي !!!
منى : منطقك غريب يا منيره !!! انا اتوقع انك تكرهينه مو ما تحبينه !!!
ومدام انك تكرهينه ليش رضيتي تجيبين العيال منه .. و الا بس شاطرين تجيبون عيال و تصفونهم و بعدين تعذبونهم !!!
قلت : منى رجاء لا تتدخلين !!! انتي بالذات لا تتكلمين !!!
منى : الله يرحم حالك و الله مومتحسف الا انتي و خلي عنجهيتك تنفعك ...
امي : اسمعي يا منيره انا بكلم عبد العزيز و .... قاطعت امي : لا يمه تكفين انا ما صدقت اطلع منه !!!
منى : حشا و الله مو صاحيه انتي !!! قلت : اذا طلعت كذا بيفكرون الناس انه ظالمني و ان الحق عليه
و احسن اكون عند الناس مظلومه و لا اكون ظالمه !!!
منى : وش هالحسبة الخايسه !!! مهتمه للناس و عيااالك !!! شفتي مها شلون وجهها صاير و الدموع ما وقفت !!!
قلت : تكبر و تنسى ... و خليها تنكد على ابوها في الطالعه و النازله ...
امي : انا كنت بكلم ابو محمد بس الحين عقب كلامتس ما اقول الا يا فشيليتي من الرجّال و بس !!!
منى : وش قصة الشيك اللي طلعتيه من الظرف اللي فيه صك الطلاق !!!!
تفاجئت من سؤالها : أي شيك !!! ما فيه شيك !!! منى : انا يا منيره اصدق عيوني و اكذب الكل وشو هالشيك !!
تذكرت اني لازم اطلع مع وحده من خواتي عشان تروح بي للبنك فبيعرفون بيعرفون ..
قلت : ايه تذكرت هذا شيك بخمسين الف من اللي ما يتسمى !!!
لمت أمي راسها بيديها و تنهدت : آآآآآآآآآآآآآه سودتي وجهي الله يسود وجهتس !!!!
قلت : ليش !!! تدرين انه صافقني على وجهي و كاتب على الشيك بدل ضرر الكف اللي جاني !!!
منى : ههههههههههههههههههههههههههههههههههههه بدل ضرر !!! لو اني منك خليته يعطيك كفين
بشوف كم يعطيك!!! ههههههههههههههههههههههههه
امي : شوفي يا منيره انتي ضيعتي حياتس بيدتس و ما اقول الا الله يعوضتس خير و يعوضه خير بعد هو
و الله الرجال ما شفنا منه الا اللي يسر و لا انسى وقفاته معنا و في بيتنا و مساعدته لاخوانتس
والله لو تطيرين ما تلقين مثله ... الشكوى لله ... و دمعت عيونها
دخلت منال و معها مها و جلسوا عندنا .....قالت منى : شلون الدراسه مها ...
مها : الحمد لله ... بابا يجي بدري و يساعدني بعض الاحيان ....
قلت : ما قال لك ابوك متى بيتزوج !! ناظرتني و دنقت راسها : ما قال لي شي !!
قلت : عاد ما اوصيك اذا تزوج ابوك و جاب مرته عندكم نكدي عليها و خليه يطلقها عشان ارجع لكم
منى و منال : منيرة ... امي : مهبولتن انتي !!! مها يا حبيبتي لا تسمعين كلام امتس .. و لا تضيقين صدر ابوتس
ترا ابوتس يحبكم و الطلاق امر مكتوب يا بنيتي ... و زوجة ابوتس اكرميها و احشميها عشان ابوتس
منال : مها لا تهتمين الا بمصلحتك انتي و اخوانك ... اذا عاملتي زوجة ابوك زين هي بتعاملكم زين ...
منى و هي تناظرني : امك يا مها ما تبي ابوك و لا هي زعلانه عشانها طلعت من بيتكم ..فخليك كويسه مع زوجة ابوك ..
انقهرت منهم و من ردهم .. قلت : خليها تنفعك زوجة بابا و قلتها باستهتار و طالعتهم و قمت رحت لغرفتي
حتى اهلي امي و خواتي ضدي !!! المفروض انهم اول من يوقف معي هم !!!!...
الله يجيب اللي في بالي ... اذا درا اني تطلقت .. اكيد بيخطبني و الا وش اللي مخليه ما يتزوج الى الان !!!
بعد مرور شهر و نصف و تم تحديد زواج عبدالعزيز و نورة
( عبد العزيز )
ضبطت الامور كلها قبل الزواج... طلبت مهندس
ديكور من وردة الصالحية
يصمم لي أثاث جديد للبيت كله .... الفتره اللي راحت كنت ببيت الوالد انا و العيال
لحد ما خلص البيت و اثاث جديد و ااكسسوارات جديده لكل جزء في البيت حتى الحمامات جددتها
بصراحه البيت طلع شي بعد التجديدات حتى العيال انبسطوا كل واحد صار بغرفة مستقله و حمامها معها
جناحي انا و نوره كبرته و خليت فيه غرفة جلوس كبيره و فيها تي في بلازما و استريو و غرفة ملابس
و غرفة فاضيه فيما لو تحتاجها نوره تكون عندها و طبعا غرفة النوم الرئيسية و حمام كبير الله يجلكم
اما الدور اللي تحت فتغير 180 درجه الوان فاتحه و هادية و مجالس ذوووق الصراحه
اما المطبخ فللامانه اشرفت اختي حصة عليه و سفرة الطعم من و الى الله يسلمها طبعا عطيتها شيك مفتوووح
مابي يكون قاصر نورة شي و لا حتى عيالي مابي يقصر عليهم شي ....
حتى المظهر الخارجي للبيت و الحديقة اللي برا و المسبح عملت لها
عقد صيانه شهريا يتفقدون الزراعه و المسبح لمدة 3 سنوات
لاني عارف شغلهم ودقتهم وهم قد اشتغلوا عندي بمقر الشركه و الى الان مستمر معاهم ....
و امور السفر رتبناها انا عندي شقه في باريس و ماربيا و الوالد عنده فيلا بفيان ( قريبه من جنيف)
فقررت اني اسفر العيال مع الاهل و خاصة ان حصة بتروح مع زوجها و عيالها هناك و فهد بيلحقهم
اما الشيخ صالح فهو تزوج الله يسلمه قبلي و سافر على طووول بسبب تقديمهم لموعد البعثة
الله يوفقه ..( و الله ماله داعي هالبعثه بس هو عنيد و ما يسمع الا نفسه )
و قررت ان يكون شهر العسل بماربيا و بعدين نطلع على باريس و روما و نمر جنيف
و نرجع كلنا مع بعض .... يمكن تستغربون من دقتي في التخطيط .. لكن انا كذا ما احب اترك شي للصدف
احب أأمن كل شي حتى ما يجي في وقت ضيق و احتاج شي معين او ما خططت له و يظهر لي فجأة
ما احب المفاجآت الا السارة طبعا ... خلاص ضبطنا كل شي و جت ليلة الزواج
حلقت و ضبطت السكسوكه و حددتها المهم طلع الشكل النهائي بيرفكت
لبست و طلعت مع الوالد و محمد ولدي معنا و فهد و عبد الرحمن زوج حصة
والاقارب المقربين من الاعمام و الخوال ..
و مها راحت مع الوالده و اختي حصة ..
وصلنا لبيت العروسه و ضيفونا و بعد فترة قلطوا الرجال على العشاء
ناداني نهار يبي يدخلني جوا البيت على اساس نصور مع العروس
دخلني نهار على غرفه شكلها مجلس للحريم فيها المصوره و خلفيات حلوة و فخمه
وشفت العروسه !!! مو مصدق عيوني هذي نوره !!! ترا لعلمكم ما شفتها الا مرتين
بعد الملكه و كانت تستحي مني مره حتى لما سلمت عليها و بستها شفت دموع بعيونها !!
بعدها خفت اضغط عليها و تكرهني مرة وحده و انا كل مرة اذوب فيها اذا شفتها ..
المهم اني شفت احلى بنت في العالم و لله الحمد و الشكر انها من نصيبي
سلمت عليها و بست خدها ... بصراحه ما قدرت اقاوم ...
صورنا الصور و معنا نهار و جا سلمان ... و الباقي لي و لها ...
جلسنا شوي مع بعض و طلعت المصوره و التفت على نوره و عيوني بتاكلها :
مبروك حبيبتي .... لحظه ترا لازم تقولين حبيبي !!!
دنقت راسها : الله يبارك فيك ... حبيبي ......... يا سعدي و يا هناي
يا ناس اول مرة احس بهالشعور !!! قلبي يرفرف .. يعني كل العرسان يحسون مثلي
انا بزواجي الاول ما حسيت بشي .. كاني مبرمج ان هذي مرتي و بس !!!
طالعتها : وقلت : ترا ازعل لو ناديتيني عبد العزيز حاف قولي حبيبي حياتي عمري
يعني اسمي الجديد حبيبي ... ابتسمت و فيها الضحكة و طالعتني و قالت : ابشر يا .... حبيبي
قلت و انا اضحك :ايه هذي نورتي اللي أحبها .... جلسنا شوي و دخلت علينا أم سلمان و معها الوالده و اختي حصة
و بنتي مها .... سلموا علينا و عيني على مها اللي صايره حلللوه .. و مستحيه من نوره
و اعجبتني نوره مسكت يدها و قربتها عندنا و قالت : صوري معانا نوره عشان تشوفين فستانك
كيف كان حلوووعليك .... راحت حصة و نادت المصورة و صورت مها معنا
و حتى حصة صورت اما الامهات ما يبون كالعادة ...
طلعوا من عندنا بعد ما وصوني عليها و وصوها علي يا حبي لهم هالامهات ....
و طبعا خبرتهم اننا بنطلع الحين بنروح للبيت ( بيتي الجديد)
و اصريت اننا نروح البيت مو فندق لحاجة في نفسي ...
طلعنا منهم و ركبنا السيارة حتى سيارتي غيرتها .. و شغلتها و مسكت يدها و رفعتها و بستها
يدها صغيره بيضا و بارده وضغطت عليها عشان تفهم اني احبها و اغليها و لا يمكن افرط فيها ..
دخلت السيارة جوا بيتي تقدرون تقولون عنه انه قصر مصغر تدخل السيارة على شكل قوس
وقفتها و نزلنا انا و نوره ... قلت : نورتي بيتك حبيبتي ...
قالت : منور باهله .... اشرت لها بعيني هاااااااااا قالت : حبيبي و هي مستحيه و مدنقه ..
يا زين الحيا يا ناس ودي اضمها اذا شفتها مستحية ...
طلعنا فوق و دخلنا قسمنا ... فكت عبايتها و قلت لها خذي راحتك و على بال ما يجي العشا
انا انتظرك في الجلسة ......
( نورة )
اول ما شفت البيت بغيت أشهق وش هالفخامه و ش هالذوووق !!!
طبعا ما بينت شي عييييب بيقول ذي ما شافت خير ابد ....طلعنا فوووق
ودخلنا قسمنا ... و قال لي انا انتظرك في الجلسة ...
طبعا ذيك الساعه مدري وش البس !!! يعني البس قميص نوم و الا فستان !!
جلست اتذكر وش قالت لي صديقتي كل المعلومات تبخرررت
سميت بالله و قلت بلبس طقم النوم حرير و عليه روب حريري لونه اوف وايت
نااااعم مرة و دخلت الحمام بغسل و طالعت نفسي بالمرايه واضح اني مجهده
و متوترة .. خليني اخذ لي شور و اضبط نفسي بنفسي ..
تروشت و نشفت شعري طويل صاير يبي له قص و حطيت مكياج خفيف ... و لبست طقم النوم
تاخرت في الحمام ... طق علي عبدالعزيز و قال : حبيبتي ليش تاخرتي ..
قلت : يالله طالعه ... طلعت و اشوفه يبتسم و يطالعني قرب مني و باسني على راسي
استحييت منه مرررة ... قال لي : نسيت اصلي ركعتين و حط يده على راسي
و قال : اللهم اني أسألك خيرها و خير ما جبلت عليه و اعوذ بك من شرها و من شر ما جبلت عليه ( ثلاث مرات )
بعدين قال : هذي وصاني عليها واحد مطوع يقول اذا قلتها بتتوفق مع زوجتك باذن الله ...
دخل للحمام و توضأ و صلى الركعتين قعدت اطالعه ....و انا بقلبي اقول اللهم لك الحمد الله لا يغير علينا
مسك يدي و رحنا للجلسه و شفت العشا من كل شي .. انسدت نفسي مع اني ما كلت شي طول اليوم الا ساندويتش الصبح
حاولت اكل ما قدرت شربت عصير ... حتى هو أكل شوي .. قام و غسل
و جلس يسولف عن حفلة الزواج و عن اخواني و انا ارد عليه لحد ما حسيت نفسي ارتحت شوي
وقف و قام قال : ما ودك تنامين !!! قلت: هااا لا خلنا شوي ....
قال : انا دايخ من صلاة الفجر و انا صاحي ....عطيني يدك
عطيته يدي و انا اتنافض ....
( حصة )
ليلة الزواج ...
يا زينها ما شاء الله نورة بصراحه اعجبتني مرررة و حركتها مع مها تدل انها انسانه طيبه
وحتى مها قالت : شكل زوجة بابا طيبه ...
قلت لها : مها حبيبتي لا تقولين زوجة بابا قولي خالة نورة
قالت : بس توها صغيره ... قلت : معليش هي الحين زوجة بابا يعني
احتراما لبابا تقولين لها خالتي
قالت : ان شاء الله عمتي ... طالعتها : مها حبيبتي انا عارفه الموضوع
صعب عليك في البدايه لكن ان شاء الله شوي شوي تتعودين على الوضع
و تحبين نوره و اذا أي شي ضايقك تعالي قولي لي انا بساعدك حبيبتي ..
انا ما عندي أخت و انا ابيك تصيرين اختي ,, وش رايك !!!
ابتسمت مها ورقصت حواجبها قالت : طيب يا اختي عطيني جوالك بكلم ماما!!!!!
طالعتها بدهشه : ليش ماما !!!!!!
قالت : انتي اختي الحين و بختبرك هههههههههههههههههههه
قلت لها : الله يقطع شياطينك يا حمارة طيحتي قلبي ...
قالت : عمتي انتي تفكريني غبيه او طفله ,, انا عارفه ليش بابا ترك ماما
و عارفه ان يحب زوجته الجديده ... و ماما ما تحب بابا ابدن !!! انا من زمان كنت اقول ليش ماما
ما تعامل بابا زين !!!!! ... و كنت خايفه اقول هالكلام اخاف احد يفهمني غلط ...
طارت عيوني من كلامها !!!!!..... و ما حسيت بنفسي الا اني اضمها و احطها بقلبي
يا حبيبتي يا مها !!!!!!!! كل هذا شايلته بقلبك و ساكته ....قلت لها : يا عمري انتي
يعني داريه و حاسه باللي يصير ... مها : و فيه اشياء كثيره عمتي اعرفها بس ما ابي اقولها
قلت : لا تقولينها ... و اذا حسيتي انك ودك تتكلمين قولي لي او اتصلي
على جوالي و كلميني احنا خوات الحين حبيبتي ما بينا أسرار ....
هزت راسها و قالت : ان شاء الله عمتي ...قلت لها : قومي نرقص انا و اياك على هالاغنية
و صرنا نرقص لحد ما تعبنا ...بعدين دخلنا نتعشى و جلسنا شوي و طلعنا
و امي تلزم على ام نوره انها تسير علينا و من هالكلام ,,, اخر شي ركبنا السيارة
و وصلوني لبيتي و بعدين راحوا لبيتهم ,,,,,
(عبد العزيز)
فتحت عيوني لقيت بجنبي ملاك .... نايمه و شعرها جاي على عيونها يا حلو شعرها طويل و كثيف !!!
بطريقه تلقائيه .. رفعت يدي و لمست شعرها و حطيته ورا اذنها
انا بحلم و الا علم ... يا ربي لك الحمد و لك الشكر ....
و كاني رجعت عشر سنين ورا من كان يتوقع انه الشعور يصحى فجأة فيني !!!
بستها على خدها وجلست اطالع فيها ما قامت ... تسحبت شوي شوي
ورحت للحمام ما صليت الفجر الساعه 6 الصباح وتروشت
و طلعت لاف الفوطه على خصري و اغني اغنية فيرووووز
حبيتك بالصيف .. حبيتك بالشتي و ادندها بعد .... رحت للدولاب طلعت لي ترنق رياضي خفيف ولبسته
وصليت .. سمعت همس : صباح الخير .........حب ي بي
التفت عليها و اشوفها لافه روبها على جسمها و شعرها تحت خصرها
و انا ابتسم : صباح الورد يا احلى ورده . .. قربت لها و مسكت يدها و رفعتها و بستها
حمرت خدودها .. وقالت : تبي اسوي لك قهوة ...
قلت : اذا من يدك ما تنعاف بس انتي عروس ..الحين اطلب من الخدم يجيبون
القهوة و الفطور ....قالت و وجهها كله ابتسامه :
يا ريت تقولي الرقم عشان اقول لهم انا بنفسي .... ما ودي تقول لهم انت !!!!
علمتها الرقم و انا مبسووط حسيت انها تهتم لي و ما تبيني اكلم الخدم من اول يوم !!!!
رحت للجلسة و هي راحت و دخلت الحمام و تروشت و لبست فستان بسيط
الوانه حلوة ...متداخله مع بعض اصفر و ابيض و وردي و اورانج و اخضر
يعني ككل الوانه هاديه ومريحه و مكياجها الهادي و دخلت علي و هي تبتسم ...
قالت : كويس ما افطرت !! يالله خلينا نفطر مع بعض ... و قعدت اتمقل فيها ههههههههه
صبت لي القهوة و قدمت لي تمر و قعدنا نسولف و نفطر ...قلت لها : ترا الطيارة الساعه 12
الظهر ... قالت : طيب !!! ... يعني!!! ... قلت : قولي حبيبتي تبين شي
قالت : لا بس ودي اشوف امي و اسلم عليها قبل لا نسافر.....
قلت : تامرين امر اذا افطرنا نطلع نتمشى شوي و نروح لبيت الوالد....
و ترجعين تسوين الشنطه و نروح لبيت الوالده نسلم عليها ...
قالت بفرح : يا عمري عبد العزيز ما قصرت .. قربت جنبها و مديت خدي
و اشرت لها عليه ... ضحكت بعذوبه و حمّر وجهها ...و باستني!!!!ههههههههه يا زينها يا ناس
قلت : نوره ممكن اسالك سؤال ... قالت : تفضل ..
قلت : انتي .... اقصد زوجك الاول ...قاطعتني : لا ماصار شي بيني و بينه
و شفتها عقدت حواجبها ... ضاق صدري .. قلت لها : اعذريني
مابي اذكرك بشي ما تحبينه ... قالت : هو راح بطريقه و انا بطريقي الله يستر علينا و عليه
طالعتها باحترام بصراحه و قلت لها : امين لك مني ماجيب طاريه ابد ...رفعت عيونها و هي تبتسم
: تسلم يا عمري ... ضحكت و قلت : عيديها ...قالت : عمري ... !!!
قمت و رحت للخزانه ( التجوري) اللي مثبتها في الجدار و تغطيها لوحه
مثل السفتي بوكس اللي بالفنادق بس اكبر شوي
و فتحتها و طلعت منها علبه سوداء ... و مديتها لها
طالعتني بذهووول و قالت : وش هذي !!!! .. قلت : تتذكرين لما قلت لك قولي حبيبي
ايام خطوبتنا و ما كسفتيني و قلت لك تستاهلين هديه ,,, هذي هديتك
خذتها من يدي و بشويش قامت تفتحها و طلعت ساعه ذهبيه و مرصعه بالالماس
شافت اسمها و شهقت ...روووولكس مرة وحده !!!! طالعتها و انا ابتسم : تستاهلينها يا بنت عبد المحسن ....
انا قلت بنت عبد المحسن ..... ما دريت الا نطت علي و حضنتني بقوووة !!!!!!!!!!!!!
(شكل اسم ابوها كلمة السر ... هههههههههههههههه بستغل هالنقطه ههههههههه)
و قامت تبكي .. و تشاهق تقول : يا ريتني شفت ابوي و شافني عندك!!!
مسحت على راسها و رفعت وجهها و قلت لها : ليش الدموووع !!! انا ابوك و زوجك و حبيبك
قالت : و الله كثيرعلي يا عبدال اقصد يا عمري يكفيني شي بسيط عشان اعرف انك تهتم لكلامي ...
قلت: انا مثلك احب اللي يهتم فيني واقدر هالكلام قول و فعل واذا لي خاطر عندك ما ابيك تطلعينها من يدك ابدددن !!!!
قالت : ابشر حبيبي .. ماراح اتركها ابدددن ,,, قلت : يالله حبيبتي البسي عشان بنتمشى شوي
و نروح لبيت الوالد ونسلم عليهم و بعدها نروح نسلم على الوالده و اخوانك ...قالت : ان شاء الله
طلعنا شغلت السيارة ( بانوراما اسود للتحديد ) و طلعنا تنمشى على معالم الرياض الحبيبه
ومريت شركتي و بيوتنا القديمه و مدارس درست فيها و قعدت اسولف لها عن ذكرياتي ...
شفت الساعه قربت على العشره ونصف و رجعنا لبيتنا و دخلنا بيت الوالد ...
15-02-09, 04:52 PM
قلوب دافئة للكاتب سعود التميمي
جديد مواضيع قسم القصص المكتمله
العرض العادي
