كاتب الموضوع :
خالد الفهد
المنتدى :
الارشيف
الشخصيات الجديدة
الدايه فاطمه واخوها صقر
1965
بدت علامات الخبث بين عيون سعد واضحة .....!!
راح سعد لداية فاطمة وكان طول هالفتره شايل بنت وسمية معاه
والداية كانت تلف الولد جا سعد واخذه منها وصار شايل البنت بيدة اليمين والولد بيدة اليسار...!! وقال لداية...
سعد: كم تاخذين فلوس وتبدلين المواليد ومحد يدري...!!
فاطمة: وش تقول أنت
سعد: اسمعي ولا ترفعين صورتج المواليد بنبدلهم ومحد راح يدري فاهمه
فاطمة: اظاهر انت جنيت
حصة داخل الغرفة
حصة: سعد ياسعد جيب لي ولدي
سعد: بصوت منخفض.. سمعي يافاطمة محدر راح يدري وبنبدلهم وبعطيج حقج
فاطمة: بصوت عالي.. أي يافاطمة ولدج عندي اغسلة واجيبه لج
طلعت حصة من الغرفة وشافتهم واقفين بالحوش مقابلين بعض وسعد ماسك بيده الأولاد الثنين
حصة: وين ولدي
سعد ضاعت علومه وجاها وعطها ولدها
حصة: وهذا من ولده الثاني
سعد: أي هذي بنت وسمية
حصة: الذيبه ماتجيب الا ذيابه كفوها
خذت حصة ولدها ودخلت داخل الغرفة والتفت سعد لدايه فاطمة وعيونه مليانه شر
سعد: والله يافطمة الفقر لا أخليج تندمين طول عمرج على اللي سويتيه
فاطمة: ماسويت شي
سعد: اخذي هالبنت وديها عند وسمية وأنا أعرف شلون أتفاهم معاج
اخذت فاطمة البنت وراحت تركض لبيت وسمية لقت البنات بالحوش
نورة: ها بشري شجابت امي
فاطمة: على البركه جا لكم ولد
نورة : اشوى الا صج شجابت وسمية
فاطمة: بنت
نورة : أي عادي شبتجيب يعني غير البنات
مريم: احترمي نفسج
نورة: انتي شفيج ماقلت الا الصج
فاطمة: نورة روحي لبيتكم خلاص الله يعطيج العالفية
قعدت الدايه فاطمة عند بنات وسمية لأن امهم تعبانه
( الدايه فاطمة )
ارمله وماعندها عيال وساكنه في بيت ابوها مع اخوها صقر25 سنة
صقر دايم يغيب بالشهور لحكم عمله على الحدود ونظام الحدود بالكويت كان وقتها جديد فا كانو العسكر يعسكرون بالشهر والشهرين على الحدود..
بعد يوم قامت وسمية من مرضها ..
فاطمة: حمدلله على السلامة
وسمية: الله يسلج
فاطمة: جاتج بنت مثل القمر
وسمية: الحمدلله
مريم: يمه شنو بنسميها
وسمية: والله مادري عن عمج سعد
فاطمة: ليش ماتسمونه الزينه
مريم: لا شرايكم باسم عبير
فاطمة: عبير والله خوش اسم
وسمية: جيبوها عندي .... وحضنت بنتها وصارت وسمية تبكي
فاطمة: الله يهداج شفيج
وسمية: يمه مريم قومي سوي شاي لخالتج فاطمه
مريم: ان شاء الله يمه
وسمية: والله كنت اتمناه ولد بس هذا النصيب
فاطمة: هذي عطاي ربج حمدي ربج على ما عطاج
وسمة: الحمدلله بس بناتي وانا حريم بروحنا ماعندنا رجال يضفنا
فاطمة: بنتج مريم مرة تعتمدين عليها وعلى وجه عرس
وسمية: وهالصغيرات منو بيرعاهم بعد عيني ماتغيب
فاطمة: وكلي ربج والله ماينسا عبيده
وسمية: والنعم بالله
في بيت سعد
نورة: الحمدلله يا يمه جبتي ولد
حصة: الحمدلله
نورة: وسمية جابت بنت
حصة: أي ذيبه ماتجيب الا الذيابه مثلها
نورة: يمه شبتسمون اخوي
حصة: اكيد بندر على جدي الله يرحمه
نورة: وابوي بيوافق
حصة: مدري عنه الا هو وينه ما بارك لي
دخل البيت سعد وهو متضايق
سعد: نورة يانورة وثول
نورة: سم يبه
سعد :جيبي لنا شي ناكله
نورة: ابشر الاحين ازهب لك الغداء
دخل سعد على حصة وهي تسوي نفسها زعلانه
سعد: مبروك ماجاك يابنت
حصة: اللي جاني جاك يابو فهد
سعد: وشتبين اسمه
حصة: بندر على اسم جدي
سعد: وشرايج في بدر مو ابرك
حصة: اللي تشوفه راضين فيه
طلع من الغرفة وراح للحوش وتغداء وخلص غداه وطلع برى البيت
حصة: يانورة
نورة: نعم
حصة: وين اخوج فهد
نورة: برى
حصة: ومحمد
نورة : على الباب يلعب
حصة: روحي وخليه يلحق ابوه ويشوف وين راح
نورة: زين
طلعت نورة ولقت محمد يلعب عند الباب
نورة: محمد تعال اسمع اللحق ابوي وشوفه وين بيروح
محمد: ابوي دخل بيت خالتي وسمية
نورة: لا تقول خالتي عما بعينك
محمد: شقول
نورة: قول وسمية ولا احسن قول الذيبه
دخلت نورة عند امها
نورة: تركض.... يمااااااااه
حصة: ومصمه شفيج ازعجتي اخوج
نورة: ابوي راح لوسمية وبناتها
حصة: انا حاسة بس يتعلل عندهم
نورة : أي شكله بيشوف بنتها الذيبه الجديدة
بيت وسمية
سعد قاعد بالحوش عند مريم وشيخة وكانت وسمية وفاطمة داخل الغرفة
سعد: مبروك ما جاج يا وسمية
وسمية: الله يبارك فيك
سعد: شبتسمونها
وسمية: انت ابوها وانت سمها
سعد: استانس والله على كلمتج هذي ماني مسميها
مريم: يبه سمها عبير
سعد: عشانج بسميها عبير مع انه اسم مو عاجبني
وزاد عدد افراد العايله عبير مع شيخة ومريم بنات حصه
وبندر مع محمد وفهد ونورة عيال سعد وحصة
( عبير )
مثل القمر كل من زار وسمية يتكلم عن جمالها وعن بياضها
وسمية مستانسه بجيت عبير اللي صارت الناس تعرفها من زينها وحلاوتها
بعد اسبوع من ولادة عبير...!!
بيت وسمية
وسمية لابسه عباتها واقفه بالحوش وشايله عبير
مريم: يمه زهبت لج الشاي والقهوة وحطيتهم عند الباب تبين شي بعد
وسمية: بارك الله فيج
شيخة: يمه بروح معاج
وسمية: كلها ساعة بروح اسلم على خالتج فاطمة وارد
مريم: كان خليتيها تجينا احنا بروحنا
وسمية: والله هي اللي بروحها المسكينه واخوها مسافر عنها
اخذت الاغراض وسمية وعطت عبير لختها مريم
وسمية: ماوصيج يامريم ديري بالج على خواتج ولا تفتحين الباب الا لعمج سعد..!!
طلعت وسمية من البيت وهي طالعه شافتها نورة من الدريشه
نورة: وين طاسة لاحسيب ولا رقيب
وسمية: والله انج ماتستحين نعنبوج انا مرة كبر امج تقولين هالكلام
نورة: أي انثبري بيتكم بس تطلعين بالشوارع
وسمية: الشرهه مو عليج الشرهه علي واقفه عند مجنونه
نورة: تشهق .... ها انا مجنونه
وراحت وسمية تمشي وهي بالطريق صادفت سعد يمشي وكأنه سارق شغله ومتلثم
سعد: وين على الله
وسمية: مستحية رايحه عند حريم
سعد: خلج من الحريم وضفي بناتج ابرك لج
وسمية: خايفه.. ابشر بس اودي الدلال
سعد: لا تطولين
وسمية: ان شاء الله..
راحت وسمية لبيت فاطمة تفاجأت الباب مفتوح طقت الباب ودخلت ومشت وكأن البيت فاضي وراحت فتحت الغرفه ولا تشوف فاطمه قاعة وتبكي وتطق ايدينها براسها
فاطمة: بصوت عالي ... يااااويلي ياااااويلي
وسمية: حذفت الأغراض اللي بيدها وراحت تركض... فاطمة شفيج
فاطمة : تبكي وتشد شعرها ... يااويلي ياوسميه ياويلي
وسمية: خايفه...... صقر اخوج فيه شي
فاطمة: ياليت ياليت يااويلي يايمه ياااويلي
وسمية: صارخت.. شفيج شصار علميني
فاطمة: وكأنها قضي عليها... انا انتهيت يا وسمية ياليت اموت ولا يرجع اخوي
وسمية: شفيج شصار ... وقامت تبكي وسمية ... قولي شفيج
فاطمة: ولد الحرام تهجم علي في بيتي .... وقامت تطق ايدينها بوجها
وسمية: ان لله .. وراحت حضنتها ... وقامت وسمية تبكي
وسمية: ماعرفتي منهو
فاطمة: ها .. خافت ... مدري منو
وسمية: اكيد سعد يدري لأني شفته بالطريق أكيد شافه
فاطمه: يوم سمعت اسم يعد قامت تبكي وتصيح بصوت عالي....
وسمية: مستغربه ومصدومه وخايفه...... سعد..؟
فاطمة: تبكي وبصوت حزين... أي يا وسمية سعد...
وسمية: مو معقول مو مصدقة سعد يسوي هالشي..؟
فاطمة: تهجم علي وطقني ياوسمية.... وتبكي وتحضن وسمية
وسمية: مصدومة .. زين ليش يغلط هالغلطه ومعاج انتي
فاطمة: ها...وسكتت تذكرت تهديد سعد الأخير لها ( اذا درت وسمية وحصة اني كنت ببدل أولادهم راح اسوي شي اعظم من هذا ) خافت من الأعظم
فاطمة: مدري بليس ما مات
وسمية: لا حول لله ... خافت شسوي انا الأحين شلون أأمن بناتي عليه
فاطمة: ما اتوقع بيضر بناتج هذا انسان لعبت فيه الدنيا وتربا على هوى كيفه وماعاد يميز الصح من الغلط ... لكن مرات يرحم عيال اخوه ومرات يظلم من حوله هذا شيطان بجسد ملاك....!!
وسمية: لا يمكن ما اصدق هالكلام سعد طيب ويحب الخير شلون يارب والله مدري
فاطمة: صدقي لكن والله لأفضح سعد وأخلي الكل يتكلم عن اللي سواه
وسمية: تراه شراني انتبهي
فاطمة: والله مدري شسوي وقامت تبكي
وسمية : وكلي ربج ومايضع حقج عند ربه يلقاها هالظالم
طلعت وسمية من بيت فاطمة خايفة وهي تكلم روحها
وسمية: والله من اخلي عنده بناتي هذا عمهم وطلع شيطان من أأمنهم عليه والله مافي الا ازوجهم وارتاح من همهم...
بعد يومين سعد راح لبيت وسمية وطق الباب
مريم: منو
سعد: انا عمج سعد
مريم كانت تبي تفتح الباب وراحت وسمية تركض
وسمية : لا لاتفتحين الباب قولي له امي نايمه بالحوش
مريم: عمي امي نايمة بالحوش شبغيت
سعد: بغيت امج
وسمية: شهقت ... ياويلي شيبي هذا مني .. وخافت وراحت تركض حطت بناتها بالغرفة ونادت مريم وقالت لا تروحين قعدي معانا
مريم: افتحت الباب.. تفضل ياعمي
سعد: ياوسمية
وسمية: بغرفتها خايفه.. نعم يابو فهد شبغيت
سعد: تعالي بغيتج بكلمة راس
وسمية: خافت ...ياويلي ياويلي
شيخه: يمه شفيج...
وسمية: سمعي شيخه لا تفتحين الباب زين يمه.... وطلعت للحوش
سعد قاعد وقدامه مريم جت وقعدت بعيد عنهم وسمية
سعد: يا مريم روحي عند خواتج بغيت امج بكلمة راس
وسمية: متوتره وخايفة لا ماله داعي تروح خل تقعد
سعد: روحي يا مريم .....
وراحت مريم و وسمية وقفت
سعد : شفيج
وسمية: اعذرني يابو فهد ماقدر اقعد انا وياك على الدوة بروحنا وانت منت محرم لي
(الدوة: المنقل اللي يحطون فوقه غوري الشاي ودلة القهوة...!!)
سعد: مو عشان هذا انا بكلمك
وسمية: بشنو
سعد: انا ابي اتزوجج على سنة الله وابي احفظ البنات من الضياع
وسمية: الحامي رب العالمين وانا ماني موافقه
سعد: ليش فيني شي
وسمية: محشوم بس ما اقدر اتزوج
سعد: انا رايح بس هالسالفة بنحلها بأسرع وقت وأتمنى ما تعيين
وسمية: لا تعب روحك انا رافضه ولو بعد مية سنة انا رافضة
سعد: ليش ...؟
وسمية: تلخبطت ... مابي اكون شريكت حصة
سعد: ماعليج من حصة امرها سهل ان شاء الله
وسمية: ولو بس مابي المشاكل
سعد: عصب.. وانا مابي بناتي يضيعون
وسمية: لاتخاف مانهم ضايعين
سعد: اجل مريم بتتزوج فهد ولدي
وسمية: لا مانبيكم ولا تبونا
طلع سعد معصب وعند الباب
سعد: لي تفاهم معاكم .... وسكر الباب وراح
وقعدت وسمية على ركبتها تبكي مقهورة وقالت
كنت تكذب ألين شفتك بالعيون
في هواك الغدر خاين تحتفي
لاتقول أشكوك عندي أو ظنون
خافقي من كذبة أحلامك شفي
ابتعد عني يكون اللي يكون
آخر الشمعة تذوب وتنطفي
أمس غير اليوم ياهاوي الجنون
شمس ظلك عن عيوني تختفي
وفر الدمعة ترى مثلك يهون
عافك الخاطر عرفت المختفي
طلعو البنات من الغرفة
مريم: يمه شفيه عمي سعد معصب
وسمية: ما ادري عنه الله يستر يابناتي انا حيه ولا ميته لا تتزوجون عيال سعد
مريم: ليش يمه
وسمية: بس يمه مو لازم تعرفين وخلي اسرار الزمن مدفونه..!!
راحت غرفتها وسميه تبكي وتتذكر زوجها فهد وشلون محتاجه له بهالوقت الصعب..
حياتنا غطى عليها الغماما = واجد الي عشنـا مـع اللـي يعيشـون
لا وحسافه غاب فهد التماما = تحت التراب احبيــّــب الـروح مدفـون
مريم: يمه شفيج تبكين
وسمية: تذكرت المرحوم ابوج
مريم: الله يرحمه ...!!
ظلت حيات وسمية معلقة بخيط من الرحمة عند سعد يوم يجيبون لهم اكل وعشرة لا وممنوع الطلعة وحاطين فهد ونورة جواسيس عليهم ...
بعد شهرين رجع صقر ..! وراح لبيتهم
فاطمة: كانت قاعدة وللتفتت ...صقر.. وقامت تبكي
صقر: شفيج.. راح لها .. وهي هدت حيلها وقعدت تبكي
فاطمة: ولد الحرام تهجم علي في بيتي بغيابك والناس غافله ياخوي
صقر: لاحول الا بالله ومنهو الكلب الجبان اللي جاج
فاطمة: والله ياخوي ماعرفته
صقر: انا اروح واشتكي عند الشيخ ويطلعونه الكلب الحقير
فاطمة: تبكي...لا لاتعلم الشيخ استر علي ياخوي الناس بتدري وبيفضحوني
صقر: شتبينا نسوي
فاطمة: ترجف انطر اذا ماحملت لا تبلغ عشان ما انفضح ياخوي
صقر: ان شاء الله ماتحملين
فاطمة: تبكي وبصوت عالي ياخوي سامحني
صقر: المسامح رب العالمين وانتي مالج ذنب..!!
فاطمة: مسحت دموعها .. انت نبي نزوجك ابي افرح فيك وابي زوجتك تقعد عندي اذا سافرت..
صقر: ولا يهمج انا بيجيني نقل للديرة واستقر عندكم ان شاء الله وما عاد اخليج بروحج..!!
بيت سعد
حصة: محمد يامحمد روح لبوك وجيب الاغراض منه بسرعة بيجوني حريم اليوم
نورة: يمه شنو اطبخ
حصة: اطبخي اللي تبين بس لا تزعجيني جيبي لي بدر خل ارضعه قبل لا يجون الحريم
نورة: يمه هذول ما صار لهم حس
حصة: منهم
نورة: وسمية وبناتها
حصة: وي قطيعه تقطعهم خل يولون احسن مانبي لهم حس
في بيت وسمية
وسمية: شيخه خليج عند اختج عبير بروح اسوي الغداء
مريم: يمه خل انا اسويه
وسمية: ليش تبين بناتي يحبونج اكثر مني
مريم: ههههه والله ما أوصل مواصيلج
وسمية: لا الحياة تغيرت يابنتي الأحين فيه التعليم والناس تقرا وتكتب والله زمانكم احسن من زمانا
مريم: ماضن انا بروح عند الكتاب يمكن شيخه ولاعبير
وسمية: عبير ايه يبنيتي شكثر احاتي هالبنت على الاقل انتي مابقى لج شي ونزوجج وحتى شيخة المدة مو طويله لكن عبير الايام طويلة عليها
فهد برى البيت يطق الباب
فهد: يا مريم
وسمية: خير شعندك
فهد: نبي الغاز
وسمية: ماخلصنا طباخ
فهد: والله امي قالت لج اطبخي غداج وعشاج مع بعض
وسمية: لا خلصت جبته لكم
فهد: أي عفية ترى ملينا واحنا نكد عليكم
وراح فهد من البيت
مريم: يمه بنظل طول عمرنا هذول يشحون علينا بكل شي
وسمية: لا ان شاء الله انا بشتغل واصرف عليكم لأن هالوضع مو عاجبني
راح فهد عند امه حصة
حصة: ها وين الغاز
فهد: يمه وسمية قالت ماخلصنا طبخ
حصة: خل تولي كل يوم نعطيهم الغاز بالساعات وهم ماهمهم الا بطونهم يمالها البط
نورة : يمه اروح لها اخذه منها بالقوة
حصة: لا ابوج سعد مايرضى عليهم لكن انا اعرف شلون اربيهم.
بعد 6 شهور طلعت فاطمة حامل من سعد وكل الديرة درت عنها وعن فضيحتها
لكن محد يعرف بسالفة سعد الا فاطمة و وسمية
في محل سعد وكان موجود النشمي عنده
النشمي: ها يسعد ماصارت صبرت عليك وانت مارديت علي
سعد: بشنو
النشمي: شكلك نسيت عن وسمية
سعد: أي الله ياخذ بليسك ذكرتني أي وسمية تقول ماتبي العرس
النشمي : شلون ماتبي العرس
سعد : والله هذا كلام المرة نغصبها يعني
طلع النشمي من المحل معصب وراح بيت وسمية وطق الباب
وسمية: خير منهو
النشمي: انا النشمي
وسمية: شعندك
النشمي: تراني شاريج ليش تعيين علي عند سعد
وسمية: سعد ماكلمني عندك وانا ماني موافقه حتى لو كلمني
من البيت الثاني نورة تطالع راحت نورة داخل تعلم فهد
نورة: فهد اللحق في واحد عن وسمية يسولف معاها
طلع فهد يركض رايح لنشمي
فهد: انت خير شتبي بالمرة
النشمي : ابوك سعد موصيني
فهد: ابوي موصيك وش موصيك عليه
النشمي: مو شغلك وفارق عني
وراح النشمي لمحل سعد وهو معصب
النشمي: يطق على طاولة سعد...هذا مو كلام ياسعد
سعد: خير يا النشمي شفيك معصب
النشمي: ليش ما كلمت وسمية عني
سعد: ضيع السلفة... ها الا كلمتها بس هي رافضه الزواج
النشمي: ماقلت لك اني بسكت عن عمايلك بشرط تزوجني وسمية
سعد: وانا عند وعدي بس وسمية صار راسها يابس
النشمي: يعني شلون ولا عشان انك على استقبال ولد جديد ياعشيق فاطمة
سعد: وش تقول انت شالخرابيط هذي
النشمي: ربك فاضحك ياسعد انا شفتك لما طلعت من بيت فاطمة تقدر تقولي شتسوي عن مرة وفي بيتها وماعندها احد لا تحاول تبري نفسك من الموضوع
سعد: انا.. توهق ... وانت شعليك بهالسالفه هذا جزا من يعصيني
النشمي : وقف من الكرسي... اسمع ياسعد ماني مطولها وهي قصيرة الخميس الجاي عرسي على وسمية ولا بتزعل وأنا صراحة داريت على زعلك واجد لكن انتهت المدة..
وطلع النشمي من المحل ....!!
راح سعد برى المحل متوجه لبيت وسمية ويفكر...
سعد: يكلم نفسة شقولها يمكن ماتوافق .. تخسي انا اعرف شلون اخليها ترضى
طق الباب علي بيت وسمية
فتحت الباب وسمية ودخل على طول لا أحم ولا دستور
سعد: شنو الي صاير من وراي
وسمية: بسم الله شصاير
سعد: مريم بنتي اخذي خواتج وروحو الغرفه....!!
وسمية: شفيك نطيت علينا شصاير
سعد: الناس يا وسمية كلوني الكلام عليكم واجد حريم وعايشين بروحكم
وسمية: استغفر الله ماسوينا شي يغضب الله
سعد: أي تبين يصير فيج مثل ماصار في فاطمة المسكينه
وسمية: سكتت وخلتها بقلبها
سعد: ماني ناطر للفضايح يكفي خذيتي حقج وزيادة
وسمية: من الأخر زواج ماني متزوجة
سعد: سمعي يابنت الحلال انا طول عمري رأف في حالج وعشان بناتج لكن هاا انا سعد وماتنقالي كلمة لا ..!!
وسمية: خافت شنو المطلوب مني الأحين
سعد: عرسج الخميس الجاي أختاري
وسمية: وقفت وهي خايفة وتبكي... شتبي مني ياسعد
سعد: يا تتزوجيني ولا تتزوجين النشمي
وسمية: طاحت على رجلين سعد وهي تبكي ... الله يرحم والديك ياسعد بناتي وشذنبهم
سعد: عرسج رضيتي ولا إنرضيتي الخميس الجاي اتوقع حددنا العروس باقي عليج المعرس يا أنا أو النشمي.
انتها الجزء الخامس
اشوفكم بالجزء السادس
متمني قرأة ممتعه للجميع
|
13-02-09, 01:20 PM
جديد مواضيع قسم الارشيف
العرض العادي
