التكـــــــــملة


الفصل الثامن
وهيه واقفة مكانها الين راح قعدت تلمس الوردة بيدها وتبتسم وتحس بشي يدغدغ مشاعرها
هتون : بووووووووووو
تهاني : تمسك بلوزتها وتغمض عيونها وتتعوذ بينها وبين نفسها وتستغفر ... آخرتها صرخت انا كم مرة اقولك لا
تسوي حركاتك المعفنه هادي .. انتي ما ترتاحي الا اذا رحت فيها
هتون : ههههههههههه فال الله ولا فالك ايش الكلام دا يا اختي انتي اللي رقيقة زي الورقة تنفجعي بسرعة
تهاني : طيب يا تونة انا اوريك يجيلك يوم .. واحد يآخد حقي منك
هتون : يؤيؤ لا تدعي عليه انتي دعواتك مستجابة تقولي سيدة
تهاني : هههههههههه احسن حلال فيكي
هتون ارتمت في حضنها وضمتها بقوة .. انا فرحانة موووووت أخيرا اتحقق حلمي .. يا ويلي ماني مصدقة ..
اقرصيني عشان اشوف انو حقيقي .. ومالقت غير قرصة زي النحلة في كتفها
هتون : آآآآآآيييييي يا كلبة حشا ياربي مو قرصة انتي ما صدقتي لقيتيها فرصة تنتقمي مني
تهاني : احسن وبعدين ايش فيكي ... ايش اللي تحلمي وواقع .. انهبلتي
هتون : وهيه تسلم على خدها بقوة : انك تصيري مرة اخوية
تهاني : وحمر وجهها لسه ماصار شي
هتون : من غير انا متأكدة انو راح يصير .. يارب متى القى واحد يموت في هوايا ويعشقني وعلى طول يخطبني
تهاني : هههههههههه وربي مشفوحة اللي يسمعك يقول انك عنستي وطقيتي الاربيعين
هتون : بوري بوري منك انتي لي لسانك كدا ادعيلي يا اختي ولا عشان ضمنتي خلاص
تهاني رفعت يدها : روحي يا هتون يابنت هيفا وعبدالله يزوجك واحد تموتي انتي في هواه قبل يموت في هواكي
خبطتها هتون على رآسها يا زفتة اقولك يعشقني تقولي انا اموت فيه اللي يطلب منك دعوة قومي ندخل بردت البيتزا وانا من اول استنى السيناريو يخلص
تهاني : لي كنتي واقفة تتجسسي عادي كان جيتي
هتون : لي مستغنية عن عمري شايفتني ... والله لو لمح ريان خيالي كان دفني في مكاني ولا احد يدري
تهاني فطست ضحك ههههههههههههههههههههه
هتون : طبعا مو اللي ايده في الموية مو زي اللي ايده في النار
تهاني : حرام عليكي والله ريان حنون
هتون : هاهاها قالو مين يشهد للعريس .. ياحبيبتي انتي غير انتي الحب
واحنا لنا الله
تهاني : يالطيف من شر حاسد اذا حسد .. اخاف يقلب عليه بس
هتون : هههههههه لا اطمني انا اول مرة اشوف ريان يتكلم بهدوء ورقة وحنية .. هوة مع امي بس .. وغصون يدلعها بس اذا زودتها والله يرميها .. وبابا يتكلم معاه برسمية .. مع انه بابا مررررة فري
بس هدا ريان
تهاني : حشا صار ابو الهول
هتون : ههههههههههه صادقة
تهاني : امشي نتعشى يا اختي الوقت أتأخر وانا ابغى ارجع البيت

دخلوا اتعشوا وانبسطووا الين صارت الساعة 2 اتصلت هتون على ريان اتوقعته صاحي فرد عليها وصوته كله نوم
هتون نشفت وحطت يدها على السماعة وتوشوش تهاني : ياويلي دا نايم والله حسبته صاحي انا عارفة انه حيجيب اجلي .. يا ربي ايش اسوي
تهاني : كلمي لا يعصب عليكي
هتون : لالالا ماني مكلمته خدي .. ورمتلها الجوال كلمي انتي انا عارفة انه ما حيقولك شي .. حيقول شبيك لبيك ريان بين ايديك
تهاني : يامامي روحي عني ما استحمله يعصب عليه خدي ياحمارة وكل واحدة ترمي ع التانية الين سمعوا صراخه
هتووووووووووووون تردي والا اجي اكسر الجوال على راسك
هتون وهيه تترجا تهاني وتبوسها عشان ترد آخرتها مسكت الجوال وهيه ميتة رعب .... وقالت: أأ...لل..وو
ريان وهو الشياطين تطنطط قدامه : مين معاية
تهاني رمت الجوال على هتون وسكت فمها ما تبغى يسمع نفسها
هتون رمت الجوال وتأشرلها كملي
تهاني وهيه خلاص ماعاد عندها طاقة : أأ..نن..ااا ..تتهـــا...ني
ريان هوه بس سمع اسمها ونبرة صوتها الخايفة... اللي هوه ارتخت عضلاته .. وهديت اعصابه .. ومتخيل شكلها بخوفها وقاعد يبتسم
تهاني لما ما سمعته رد عليها حسبته نايم : ريان انت نمت ؟؟!!!
ريان : هوه اللي يسمع همسك ينام يا شيخة
تهاني : دوروها ولا تلاقوها .. ما لقتها هتون الا وهيه محمرة وكل الالوان في وجهها .. عاد هتون ماتت ضحك وتشميت على كيف كيفها وتهاني تتوعدها وتسوي انها حتخنقها بس تخلص
ريان : تهاني انتي معاية والا قفلتي ... وهوه عارف انها خجلانة ... وعارف انها حركات هتون بس يبغى يشوف ايش تبغى
تهاني : وهيه تسوي نفسها تدعي على هتون وبعدين قالت : لالا معاك بس ... اصل ... انا وهيه من الربكة ماهي مجمعة كلمتين على بعض
ريان : تهاني شوية شوية ياقلبي ... عادي اتكلمي اعتبري انك بتكلمي نفسك ... سمع همسها وهيه تقول وانت اغلى من نفسى
ريان : ههههههههه اموت انا في اللي يتغزلوا
تهاني : صارت تلطم ... ما شالله دا سمعني
ريان : آمري حبيبي اتدللي
تهاني : ما يأمر عليك عدوو ... وبعدين كملت خلاص استجمعت قوتها
بس كنت ابغى ارجع البيت فاتصلت هتون حسبتك صاحي .. وو وبس خلاص
ريان : يعني ما اتصلتي انتي ... خسارة حسبت اني وحشتك
تهاني في نفسها لا من جد زودها بس ما تنكر انها كانت فعلا تبغى تسمع صوته في التليفون
ريان لما حس انه زودها قال خلاص يا قلبي 5 دقايق وانا نازل البسي انتي وهتون عبيكم
تهاني : شكرا
ريان : العفو ولووو احنا في ديك الساعة اللي نلبي طلب الحبايب
وقفلت على طول
هتون بس قفلت تهاني السماعة وهيه تخرج ضحكتها اللي حابستها طول المكالمة ومالقيت الا تهاني ناطة فوقها تلف كفينها حولين رقبتها وماخلت سبة الا وسبتها ... هتون وهيه انكتمت من تقل تهاني فوقها...
ا خلاص والله اتوب وربي انتي متوحشة انتي وزوجك
تهاني اول ما سمعت زوجك قالت : من زوجي خابرة اني لسة في بيت بابا ما اتزوجت
هتون : هوه في غيره حبيب القلب مازولا
تهاني : مازولا في عينك طيب من قالك انو زوجي لسه ما وافقت انا
هتون : يا شيخة عيني في عينك اجل الفيلم الللي صار قبل شوية ايش
تهاني : هتون قومي نلبس لا يجيب اجلي واجلك الليلة
هتون : ايش رايك ننام ونخلي ملطوع برة
تهاني : هتون امشي وبطلي رجة ... خلي زوجك ملطوع برة
هتون : لا حرام لسة ما جا.. الطعه من دحين خلي يجي اول وبعدين اختبر معزتي عنده
تهاني : وربي ما راح يوديكي في داهية الا افكارك المجنونة امشي سامعة سيارة اشتغلت
خرجوا وركبوا واصلا هتون كانت مرة منعنسة فنامت على طول
اما تهاني كانت صاحية ومسرحة .. وريان اول ماشاف هتون نامت حب انه يتكلم .. تهاني
تهاني ردت : نعم
ريان : كنت ابغى أسألك اذا كان لك مخططات قبل ما اجي اخطبك
تهاني : بصراحة انا ما كنت مفكرة في الزواج ... كنت ابغى اكمل دراستي وانت عارف اني ابغى ادخل طب هذا حلمي من زمان ... بس ما اعرف ايش راي بابا في الموضوع
ريان : شوفي يا تهاني انا ما امنعك من انك تحققي حلمك بس ان شالله ما يأثر علينا في المستقبل ... ولك مطلق الحرية انك تحددي موعد الزواج وقت ماتشوفي نفسك مستعدة ... اهم شي راحتك
تهاني : تسلم

وكان هذا آخر كلام بينهم وصلت البيت ودخلت مالقيت احد مريم لسة ما رجعت وابوها كان نايم وطلعت غرفتها وصلت وترها وجلست تدعي انه ربي يختار لها الخير وخلصت وحطت راسها على المخدة وبدت تسترجع احداث اليوم وقعدت تفطس ضحك على مواقف هتون وبعدين ترجع للمواقف الحالمة والرومانسية ( ما ادري لي الواحد يهنا له التفكير وقت النوم وياريت بس اللي يصير معاه في نفس اليوم لا واحيانا يرجع للماضي كثيييييييير يا يكون حلو او مالح )
ونامت وهيه تحلم باحلى ايام عمرها

وعند ريان بعد ما وصل البيت لقي هتون آخدة راحتها في النوم قعد يهزها هتون قومي يا بنت وصلنا ... هتون
لا حياة لمن تنادي آخرتها بلل يده بالموية وفتح وجهها ورش عليها نقاط الموية بس عشانها باردة شهقت ... بسم الله ... ايش فيه
شافت ريان بغت تعصب بس لما استوعبت انه هوه انطمت وكملت بزعل ... كان صحيتني ماله داعي ترشني
ريان : انا ولا انتي ياهانم لو عليه كان خليتك في السيارة بس خايف على المقعدة لا تتفطس من تقلك
طنشته ونزلت وماصدقت وصلت غرفتها وادتها نومة
وهوة نزل راح غرفته خلع بلوزته وبقي بالبنطلون وانسدح على السرير وبدا يفكر ... طبعا كانت ملكة احلامه تهاني ... قعد يكلم نفسه ايش بي انا صاير مطفوق وخفيف ... بس ما ادري ايش يجيني اذا اعرف اني انا وهيه في مكان واحد ... وربي انسى نفسي احس اني امشي بدون عقل ... قلبي يسيرني ... يا ترى هل كل اللي يحبوا كدا ولا بس انا اللي فيني طفاقة زيادة عن اللزوم ... ومالقي نفسه الا انه يتصل على صديق عمره ... سمير

رد عليه سمير وهوه يتأفف اقوووول مانت لاقي احد تزعجه غيري ترى قطعت الحلم ...والله كان شي ... ومافي رد ... طالع في الجوال مازال على الخط ... ريان انت معاية والا بتحلم ... الله احلى حاجة لما اجيك في حلمك
ريان : وعععععععع ما اجي احلم الا بيك ناوي عليه بكوابيس
سمير : افا ... انا اجيب كوابيس ما هقيتها منك
ريان كان يتكلم وهوه عيونه مغمضة ويقول... تصدق اشوف قدامي الشمس بنورها ... الورد برقته ... الحرير بملمسه
سمير فرصع عيونه : ريان انت متأكد انك صاحي ... ما تكون تهلوس وانت نايم
ريان ولا عليه يكمل... وقت اشوفها احس الكون يوقف ... ولما اسمعها ما يطرب اذني الا هيه ... ولما اشمها كنها شذى ينشر عبيره
وشوية سمع شخييير ... سمير يا حيوان انا اكلمك وانت تنام اصلا الغلط مو عليك ... عليه انا الحمار اللي اكلمك
وقفل السماعة ... وربي جننتني ... الله يخليكي اخرجي من راسي خليني انام شوية ... قعد يستغفر الين نام

في الصباح في بيت هتون الساعة 7 صباح كان هيفا وعبدالله بيفطروا لأنه بيخرج يروح الشركة ... والحلو في هيفا مهما كانت سهرانه او تعبانة ما تقصر في واجباتها مع زوجها وهذا اللي مخلي عبد الله يموت في هواها ويعيشوا حياتهم ما كن اولادهم عرايس ... نزل ريان
السلام عليكم
عبد الله وهيفا : وعليكم السلام
هيفا : هلا حبيبي غريبة صاحي بدري مو من عوايدك
ريان : انا اصلا نمت عشان اصحى
هيفا : ضربت على صدرها وي وي يا ولدي حبيبي انت تعبان وقامت حست جبهته لقته عادي .. ما فيك شي ايش بك
ريان : يا امي لا تقلقي ارق عادي ... كيفك يا ابوية
عبد الله : الحمد لله يا ولدي بخير ... بس لا تنسى ابغاك ضروري تمر عليه في المؤسسة عندي معاملات مهمة
ريان : ابشر يا بوية ... سكت شوية وقال ابوية امي
هيفا : نعم يا حبيبي
عبد الله : أأمر يا ولدي
ريان : ما يأمر عليك ظالم يا بوية ... بس انا ابغى اكمل نص ديني
مالقي غير امه تزغرط هوه انفجع وقامت ضمته ... وصارت تبكي
عبد الله : هههههههههه هيفا انتي ما صدقتي كتمتي الولد سيبي خلي يكمل
هيفا : وهيه تمسح دمعتها من فرحتي يا ابو ريان ... من اول انتظره يفاتحنا بالموضوع ... لاني ماني حابه اجبره ... خليني افرح ... ها يا حبيبي من سعيدة الحظ
ريان بكل هدوووء : تهاني صاحبة هتون
هيفا قامت زغرطت الله يفرحك يا ولدي والله اني اتمنيتها ليك من يوم عرفتها ... واني ادعي كل يوم ربي يجعلها من نصيبك ... البنت متربية احسن تربية وكفاية اني اعتبرها زي هتون
عبد الله : هيفا ايش بك انفرطتي ... بس على العموم الله يتمم لك على خير يا ولدي ويجمع بينكم ان شالله وحدد متى تبغانا نروح نخطبها
ريان : اليوم اللي تحددوه يا بوية
عبد الله : على خير ان شالله ... يالله انا ماشي توصي شي يا حبيبة قلبي
هيفا : سلامتك حبيبي انتبي على نفسك
سلم عبد الله على يدها وجبينها ... وهمس في اذنها ... حتوحشيني
هيفا : وانت كمان ... وراح
ريان كان دايما يشوف العلاقة بين امه وابوه ويتمناها مع مرته كدا بس لما يكونوا لوحدهم
هيفا : اقول ريان مو هذا الموضوع اللي مسبب لك ارق طول الليل مخليك مانت عارف تنام ... وابتسمت
طالع فيها ريان وقال والله يا ام ريان انتي عارفتني يعني لو كذبت
كاشفتني فإنتي ادرى بولدك
مسكته هيفا من كتفه ربي يسعدك ويهنيك وكمان تهاني بنت حلال وتستاهل
مسك ريان يدها وباسها ربي لا يحرمني منك يا اغلى شي في الدنيا
ضحكت هيفا راح تجي اللي تنافسني في غلاتي
ريان : ماعاش اللي ينافس ام ريان في غلاتها انتي الاولى والأخيرة
هيفا : ربي يرضى عليك دنيا وآخرة
ريان بس يا أمي طلب صغير
هيفا: أأمر حبيبي
ريان : كنت اتمنى الملكة قبل سفرنا لأني نفسي آخذ تهاني في سفرتنا
هيفا : هههههههه أتاري البنت أخذت عقلك من زمان قولي متى صار وهيه تغمز بعينها
ريان وهو اتوتر صار يلعب في كاسة العصير بيحاول يهرب من السؤال وغير الموضوع ... الا اقول كيف سهرتكم امس يا امي
هيفا : ريان انا خابزتك وعاجنتك لكن اهم شي انها عجبتك وما ادري
يا ولدي راح يوافق ابوها الملكة بعد ثلاثة اسابيع والا لأ وانت عارف الترتيبات كيف ... لانو الملكة عليهم فلازم ابوها يظبط وضعه
ريان : لي نخليها عليهم احنا نتكفل بالملكة
هيفا : ما يصير يا حبيبي عشان ابوها لا يحس انو احنا بنستقل بيهم ويوم زواجك نسوي اللي ما حصل واستوى
ريان : على العموم انا ما اعرف في هرج الحريم دا اتفقوا واعطوني خبر
هيفا : يصير خير ... روح حبيبي ارتاح ساعتين قبل تروح عند ابوك
ريان : ان شالله عن اذنك يا امي
هيفا : مع السلامة

هيفا اتصلت على بيت تهاني على الساعة 11 وردت عليها تهاني وقالتلها انهم جايين اليوم بعد المغرب وطلبت ابوها يحاول يتواجد وما يطلع ... قالتلها تهاني ان شالله وقفلت
عند تهاني اول ما كلمتها خالتها هيفا وهيه اتوترت مووووت قامت دخلت المطبخ تجهز للغدا خللصت شغلها على الساعة واحدة طلعت صلت الظهر ونزلت تستنى ابوها ... لقت مريم جالسة تتكلم بالتليفون جلست تتفرج تليفزيون على فيلم اجنبي اول ما قفلت مريم
مريم : ايش طبختي ؟
تهاني : ملوخية ومعرق
قامت مريم انا فيه نوم اذا جا ابوكي صحيني
تهاني : طيب ... في نفسها عساها نومة بلا قومة يارب ... ما ادري ايش وظيفتها في البيت لكن ما تتلحح الا لما اكون ماني موجودة على الساعة 2:30 جا محمد من برة واستقبلته تهاني بكل حب وحنان وكان ميت جوع فحطت الاكل بسرعة وقومت مريم عشان الغدا ... وهم على السفرة ...
تهاني : اقول بابا
محمد : ياعيون بابا ... ايش تبغي
تهاني : لا بس اليوم جايين بيت تهاني عندنا بعد المغرب فياريت تكون موجود يابابا لأنه عمي عبد الله جي كمان
محمد : خير اللهم اجعله خير
تهاني : كل خير بس يمكن حابب يجلس معاك
محمد : طيب ولا يهمك يا بنتي انا راح اخرج في العصر اخلص اللي عندي وقبل المغرب اكون عندك ... طيب تبغي شي من برة
تهاني : لا يابابا الخير واجد الحمد لله
محمد : الحمد لله ... وقام من السفرة وغسل يده وطلع غرفته
مريم لما راح محمد قالت ايش عندهم مو ناقصنا بنتهم كمان هم يجونا
تهاني : يا خالة احنا مانطرد ضيوفنا احنا اهل كرم ووجود ... وصاحب البيت رحب بيهم واظن ما عندك مانع
مريم : والله ما اخدنا من بنت هيفا غير طولة اللسان والله لو مو ابوكي كان ما استقبلتهم لكن نشوف ايش عندهم ... وقامت لحقت محمد
تهاني : الله يستر منها دي الحرمة لا تروح توز على راس بابا ... لكن ما اقول غير استدفعت شرها بلاحول ولا قوة الا بالله ... قامت ورفعت السفرة ونظفت المطبخ ...

في بيت هتون

اول ما عرفت هتون بالموضوع قومت الدنيا ما قعدتها
هتون : لييييي يا ماما ما قلتولي انا كمان صاحبة الشأن مو هيه صاحبتي لازم اشوف طيب يمكن يكونوا مشغولين يمكن مريم العقربة تسوي لها حكاية يمكنن... ما كملت الا وهيفا قاطعتها اووووووه هتون انتي ليش كدا غلباوية خلاص كم مررة قلتلك انهم ماعندهم أي مشكلة ماحنا رايحين نسوي شي الا بس نتقدم رسمي وخلاص ... اعيد تاني
هتون : فهمت ياماما بس برضه كان ما استعجلنا الين نشوف ظروفهم و... وماسمعت الا واحد يقولها بكل عصبية
هتتتتتتون ... دوشتي أمي خلاص لازم تبربري على راسها استحي على وجهك احد يكلم امه كدا
انطمت هتون واخذت بعضها وخرجت
هيفا : يا الله كان جيت من اول صدعتلي راسي ما حد يقدرلها غيرك
ريان : مو يا امي الله يهديكم انتي وابوية دلعتووها زيادة الين صارت ما تحشم احد
هيفا : والله اختك طيبة بس الله يهديها لما تزن فظيعة
ريان : هههههههه اصلا غصون من فين اتعلمت الزن ... البركة فيها
هيفا : جهز نفسك يا ولدي بعد المغرب ان شالله نحرك
ريان : ان شالله يا امي انا خارج تآمريني على شي
هيفا : سلامتك حبيبي

راح ريان كان مواعد سمير يقضوا كم مشوار ... ريان مر على سمير بسيارته ... اول ما دخل سمير سلم
ريان : وعليكم السلام
سمير : كيفك يا ابو الشباب
ريان : بخير يا ابو سمرة
سمير : شوف قبل ما نرو ح أي مكان تقولي ايش بك امس وربي حسبت نفسي في مسلسل مكسيكي
ريان : سلامتك انا اصلا امس كلمتك
سمير : يا شيخ انا شايف اتصالك امس والا دقيقة خليني افتكر شي من كلامك ... وهوه يفكر اممممم ايوة ويقلد ريان بنبرته الحالمة اشوفها زي الشمس بنورها ... وشفايفها ... ونعموتها ... والله ماني فاكر بس هذا اللي سمعته لا تكون كنت مشغلي تسجيل شعر
ريان : سمير خلاص اقفل على السيرة انا ما دقيت
سمير : كذااااااب من جد من هاذي اللي حرمتك النوم امس
ريان : وهوه بيسوق يتخيلها ... راح اخطبها ان شالله
سمير : أوه أوه أوه لالالا من جد ريان كدا ما يلعب ... ياهوووووو ماهي هينه اللي جابت راس ريان
ريان : لي يا اخي شايفني جماد ما احس
سمير : لا ابد الله يسلمك ... بس اللي يشوفك ما تعطي البنات وجه يقول هاذا كيف يتزوج ... الله يعين اللي تآخده
ريان : موفرها لحبيبة قلبي
سمير : يا خاين تحب من وراية وانا صديق عمرك وما ادري ... لا هاذي خيانه لا اقبل بها
ريان : اللي يسمعك يقول قاعد العب عليها ... تبغى ما اكثر الحلال روح اخطب ايش ناقصك
سمير : انا اخطب واحدة ما اعرفها لالالا لا يمكن ... انا راح اسوي زيك استنى اللي تطيحني زي ما طحت عشان اتجنن واخطبها
ريان : مجنون اللي يسمعك ما كنك مصاحب نص بنات البلد
سمير : انا ما امشي مع أي بنت انت عارف انهم بنات عوايل
ريان : لا يكون بنات العوايل على راسهم ريشة اللي خربانة خربانة لكن انت الله يهديك
سمير : آمييييييييين

عند تهاني

سوت حلى مع القهوة ... وخرجت معجنات من الفريزر ... وهيه مرتبة نفسها لطواريء زي كدا ... وطلعت غرفتها ونامت شوية ... واتجهزت وبخرت البيت ... وسوت القهوة ... كانت لا بسة تنورة تركية مشجرة باوراق شجر اورنجي وزيتي وبني قصيرة تحت الركبة ... ولبست عليها بلوزة لونها اورنج كم قصير طبعا ماسكة بزمات من تحت الصدر ... ولبست جزمة من غير كعب لونها بني كانت مررررة نعومة وتجنن عاد واللون الاورنجي يخليها نجفة ... دق الجرس واستقبلتهم تهاني وبعدين نزلت مريم وهيه نفسها عند خشمها

نشوف احداث الجلسة البارت الجاي ان شالله