كاتب الموضوع :
NONO123
المنتدى :
الارشيف
(الفصل السابع)
قاعده تنطرها على وحده من الطاولا ت الخارجيه لستاربوكس شافتها مقبله من الجهه الثانيه اضحكت في خاطرها شكلها ما حصلت بارك لا بطلعت الزور لحظت مشيتها المعصبه و يدها الي تحركها بشكل غاضب ما اقدرت الا انها تضحك اقعدت صبا على الكرسي مجابلتها وبعصبيه ونرفزه "اي اضحكي انتي وش عليج و يا هذي الاخدود الناقزه عمى يعميه قولي امين والله مو لو الحشيمه واني مره كان صقعته في الي بيدي الحيوان ما يعرف ان النساء اول وبعدين هو ليدز فيرست
تماضر بضحكه ناعمه "حياتي نحن في ارض يسودها الرجل وهو يحكمها وقانونه هو الي يمشي عجبج ولا ما اعجبج عليج تقبلين بالحقيقه يلا امشي خلينا نخلص بسرعه
صبا وهي تهز راسها رفض "لا يا عيوني انا ابغي اشرب شي بارد يطفي حره قلبي من طقه الطريق و القهر وانا اتحلطم الناس تفكرني مينونيه
تماضر بواقعيه"انتي الله يهديج نار كم مره اقولج اضبطي نفسج وتحكمي في اعصابج لنج بعصبيتج السريعه ممكن تفقدين كل شي الركاده زينه تراهم يمدحونها
صبا بحره "خلينا الركاده لج يا ام ركاده انا معجبه بنفسي كذا وبكل عيوبي
تماضر بسخريه "زين قومي خلصينا ما عندنا وقت حق اطنازتج الكلام ضايع معاج الانسان منا لين شاف في نفسه عيوب يحاول يحسن من نفسه ويطورها عشان يتلاافا هذي العيوب و تختفي هذا لمصلحتج
صبا بضحكه "زين زين ولا يهمج يا خوفي احسنها على الاخير وتقرع وتطيح في جبدي ^_^
وهم يدخلون المحل "شوفي البسه هذي بتطلع روعه عليج ...ارفعتها عشان تماضر تشوفها كانت تنوره ضيقه من فوق وتتسع لين تصير كلوش وفيها حاشيه مطرزه من نفس القماش ,,,,وش رايج
تماضر تهز راسها برفض حازم "مستحيل يا قلبي هذي التنوره تكشف كل شي الله يهديج قصيره وايد
صبا بحزن "تماضر انتي طلعتي خلاص ما في الي يطالعج بعين مهب عدله ما يحتاج لبسج الطويل الي يخفي جمالج افرحي واستانسي بعمرج وبعدين هذا لبس حق البيت مو لزم حق برع
تماضر "هذا ما يخصه انا ما احب الشي العاري و القصير تعودت و الستر زين يا بنت
صبا بعياره "زين هذي ما عندج اعتراض عليها فضفاضه وطويله على طلبج بس استايل ها وش قلتي
تماضر بعصبيه"انتي وش فيج اليوم يا اما قصير وفاسخ يا اما الون تبط العين وتقول انا هنا صايدج عمى اقطاوه
صبا بعياره وحزن مصطنع "افا يذا العلم افا و الله ما هقيتهامنج يا بنت خالد هذا جزاي طاقه معج السوق و متعبه نفسي وكذا تحطميني افا والله على الصداقه الاخرطي
تماضر تضحك برقه على تغشمرها وروحها المرحه صبا تكملها تحسها جزء منها تعرفها مثل خطوط كفها "زين يا ام العياره انتي باخذها بس بشرط تغيرين اللون هذا اللون احلى علي من الي اخترتيه
صبا فرحه "اوكي ما عندي مانع يا سيدتي
\
\
\
\
\
\
كانت محرجه من اخوها بشكل كبير وحاسه بالذنب هي ما اقصدت انها تتصنت ولا انها تقلل من احترام ابوها و اخوها في كلامها بس وجود بنت عم لها و العم هذا ميت صار له عمر يعني يتيمه مالها غيرهم كيف يتروكونها في هذي الدنيا بلا سند وضهر يسندها
بصوت مذنب وخجول "والله يا اخوي ما قصدت اسمعكم بس صادف نزولي و انت تتكلم مع الوالد الله يحفظه وسمعت سعود انت اخوي الكبير و الي احترمه واقدره لعقله و رجولته يا ترى من الرجوله يا اخوي تنترك بنت يتيمه في هذي الدنيا بدون معين كيف يا اخوي ترضها او ابوي يرضاها على نفسه بنت اخوه تكون عند الغرب مهب بحضنه ورعايته كيف ؟؟؟
سعود غاضب وعاتب بس الي تقوله اخته صح اذا هو احساسه كان اكثر غضب و الم منها لين عرف الحقيقه من ابوه فكيف بها و هي البنت الرقيقه الي يمكن يجرحها حقيقه ان في الدنيا ناس بمثل هذا الشر و القسوه "البندري احنا مو من حقنا ننبش في الماضي لن الماضي من حق اصحابه و اصحابه بعضهم الله خذ امانته وما عادو في الدنيا المهم الحين الحاضر و هذا احنا ندور عن تماضر و ان شاء الله بنلاقيها وبنعوضها
البندري اسكتت احترمت حق اخوها في عدم الافصاح عن الاسباب و عن القصه لها مثل ما قال مو من حقهم تضل من حق تماضر وابوها و ناس ماتو و غيبهم الموت بخيرهم وشرهم "ياريت يا اخوي ياريت لنه من المحزن ان الانسان منا يترك الي يقربون له ضعاف وهو قوي محتاجين و هو عنده
ربت على كتفها بحنان وبحب كلامها صحيح "الي الله كاتبه بيصير يا الغاليه............. الي الله كاتبه بيصير .....
\
\
\
\
\
\
"اه ...يا رجلي ما عدت قادره تنفخت ارجولي وتقطعت يدي من شيل الاكياس وهذي الي تقول ما ابغي اشياء واجد حشى قشيتي المحلات قش في شي ثاني ولا خلاص
تماضر "في ابغي اشتري هديه اصغيره حق امي وبعدها ابغي فيرجن ميجا استور ابغي لاب توب وبعد ابغي بعض الكتب و غيرها اشياء كثير
صبا"خلاص فهمت وبعدها نروح ناكل انا ميته جوع وش رايج في المطعم التركي سراي رفيجاتي يمدحونه
تماضر بضحكه "زين بس تعالي نروح كرفور وناخذ جاري نحط فيه الاكياس لن صج يدي عورتني من شيلهم
في هذي الحظه الي عطت فيها ضهرها كان عيضه مر من جنبها وقف احساس خلا ه يوقف هز راسه وش فيه اليوم موب على بعضه سالم التفت عليه وهو يطالعه بستغراب "خير وش فيك وقفت فيك شي يعورك شي قول فينا نطلع من هنا الحين
عيضه بهدوء وهو يكمل طريقه "لا ما في شي بس كني تخايلت بصوت اعرفه شكلي جنيت على اخر الوقت وقمت اهلوس من الاحبوب الي اكلها
سالم بمكر وضحكه "مره ولا رجال .؟؟؟؟؟؟؟
عيضه بنتهيده قويه "حاولت طول هذي الاسنين انساها او كذبت على نفسي وقلت اني نسيتها بس عمري كله ما نسيت صوتها همسها حزنها فرحها ما ادري اذا شوقي هو الي خيل لي اني سمعت عشقي
سالم بتنهد "الله يعطينا الي عطاك ان نحن نحب
عيضه بحزن "ما انصحك به يا رفيقي يكفي عذابه مر علقم ويذبح
سالم "والله ما عرفتلك مره تزينه في عيني ومره تشينه ارسى على بر
عيضه "لا بشينه ولا بزينه مردك مجربه بس اصبر على رزقجج...خلينا نكمل طريقنا مشينا
\
\
\
\
\
\
هزها من كتفها بقسوه تخلعها من سريرها تسمع صوته المرعوب افتحت اعيونها "قومي قام نقمج رجع ولد فيصل رجع والبيت الكبير افتحوه اكيد بنت الكلب عنده كيف اوصلت له كيف
مرعوبه نطت من افراشها كن عقرب قرصها و اختفت الالوان من وجهها رعب وخوف من القادم رجعت جاسم معناه فتح لدفاتر القديمه بس كيف اوصلت بنت الكلب له كيف الحين بتقول له كل شي وبيروحون وراء الشمس هذا اذا ما اطلعت حقيقه جريمتهم جريمه طواها الزمن والبعد و برعب "انت من صدقج كيف عرفت ومتى رودو ؟؟
وجهه مسود وعيونه فيها قهر يهزه هز لآن رجعت جاسم يعني انتقامه منهم ما انتهى هذا بس البدايه لزم يوصل لتماضر و اذا سلب الي بيبه بيوصمهم بالعار طول عمرهم و هنا بس يكون انتقامه منهم كمل ونار الاسنين ابردت بس وين الحيوانه اهربت وما يندرى عن ارضها وينها فيه وبحقارته وحقارت نفسه وبصوت بارد "يكون في علمج اذا ما وصلت للي ابيه من بنتج وتكون في يدي هذي راح يكون اخر يوم في عمرج انا ما سويت الي سويته الا عشان اخربها عليهم و ادمر حياتهم وانتي وبنته الاداه
ام تماضر بحره "خلاص فكنا من غثاك ما اظن ان البنت راحت اهناك احنا قلنا لها ان البيت عمها باعه من سنين يعني مالها مكان تروحه يعني عط عمرك العافيه انت طايلها بنت خالد طايلها بدال ما تقعد تنوح عندي شغل مخك وفكر وين ممكن تروح وهي مالها مكان ولا تعرف احد ...
يحك راسه بتفكير يمكن الحين عقله صافي و يقدر يفكر بدون الخمره وبمكر وهو يرفع عينه لها "تعالي احنا كيف ما فكرنا في رفيقتها الي دوم ملزمتها
هي بفرحه وكنها لقت كنز لكن وينها من رب العباد يوم الحساب و هي تحط بنتها ضناها في يد انسان مجرم تجرد من كل المشاعر الانسانيه وتجرد من الاخلاق كيف يكون غير مجرم اذا امها نفسها انسانه مجرمه في حق ربها ونفسها وبنتها "صدقت احنا ليش ما فكرنا فيها من قبل زين على الاقل عقلك رجع يشتغل من اول وجديد قومك الي قاعد تلتحه اربع وعشرين ساعه بس كيف نسئلهم بدون ما نثير الشك فيهم يمكن ما يعرفون عنها شي وحتى لو اعرفو يمكن تكون قالت لهم كل شي و نروح في مصيبه اكبر لا هذي فكره خطيره و ما نقدر عليها .......وصخت شوي و التفت عليه تعال احنا ليه ما فكرنا ننبش غرفتها ونعرف وش كانت تخطط له وترسم طول هذا الوقت ....امسكته ومن يده وهي تسحبه معاها على غرفه تماضر و ادخلوها وعيونهم تتطلع في كل زوايا هذي الغرفه الي احملت الم و احلام و انتقام صاحبتها عيونهم تدور في كل الزوايا الغرفه مرتبه ومنسقه وكل شي فيها يدل على انظباط و تدقيق كل شي في مكانه منسق ومرتب كل شي موضوع حيث هي اتركته قامو ينبشون الحجره يدورون بجنون وهم ينثرون كل شي في طريقهم ويحطمون كل شي يبون شي يوصلهم لها ...وبصوت مخنوق ومقهور...........شايف ولا شي يثبت انها عايشه معانا حشى هذي كيف سوت كل هذا تراها تخطط من زمان واحن ما ندري الحين قولي يا فطين وش بنشوي على المصيبه الي بتطب على راسنا
الله ياخذك ويا خذني معاك الله يلعن اليوم الي شفتك وعرفتك فيه قوالي الحين وش استفدنا من كل هذا هذا هو عمها رجع و بيخربها على روسنا و الي بنيناه في اسنين بينهج في غمضه عين و السبه الحشره هذي
سحبها من يدها بقوه وثناها وراء ضهرها وبغضب عاتي "انطمي يا حيوانه انتي وحده خايسه احمدي ربج اني تزوجتج انا عشان هذي البنت خذتج انتي كنتي وسيلتي حق الدخول في حياتهم بشكل اعمق وبنتج السلاح الي راح انحرهم به واخليهم يعيشون العمر كله كمد وحسره وعشان تربى بحضني واشوفها قدام عيني واحرق قلبهم بها بس خالد فلت من انتقامي رغم اني كنت مخطط ان عذابه يطول مع الي كنتي تدسينه له في اكله بس ربي ارحمه و عجل بموته السكته الي جاته ويمكن بعد السكته جاته من الي كنتي تحطينه له بشوري و امري لا تخافين بحصلها بنتج وبحرق قلبهم وبتربع على عرش انتقامي منهم سعيد ومستانس ساعتها بس ما راح يهمني لو اموت بس اوصل للي ابغيه
\
\
\
\
\
\
/منتد قسم من حي قلم الاعضاء
"اااااااه ....خلاص ما عاد فيني حيل كرهتيني في السوق و اليوم الي اخترعو فيه التسوق ارجولي ما عدت حاسه فيهم احسهم انفصلو عن جسمي اقولج خلنا نكمل الباقي يوم ثاني تقولين لا ما عندج وقت تضيعينه بالله عليج الدنيا بتطير كل شي لحقين عليه بس ارجولي اذا راحت من بيرجعها لي
تماضر بضحكه"و انا صادقه عند ربي في اشياء مهمه لزم اسويها وبعدين لزم اجتمع مع اعضاء مجلس الاداره عندي في الشركه عشان المشروع الجديد وبعد انا صاير لي فتره راكده ما دخلت مشاريع جديده لزم احرك الشغل عندي و احرك راس المال في السوق الركود مو من صالحي في هذي الفتره
صبا بزعاج وهي ترفع يدها "و الي يرحم والديج فكينا من محضرات الاقتصاد والمال ابغي اكل براحه وانتي انسي شويه على الاقل تجاهليهم لفتره بسيطه وعيشي حياتج وسنج حرام والله الي تسوينه في روحج هذا عذاب لج اكثر ما هو انتقام منهم
ثماضر بحزن "اذا انا في لحظه تخليت عن حذري و نسيت مثل ما انتي تقولين كان انا الحين خسرت نفسي وروحي حق احقر و اخس انواع البشر الحياه علمتني ان عدوي يكون مني وفيني عدوي هو اقرب الناس لي عشان كذا لزم اكون حريصه و مفتحه اعيوني على وسعها عشان ما يضيع العمر او بالاحرى الباقي منه
صبا بحزن اكبر عليها "ادري وربي ادري بس بعد لا تنسين انج بنت و ان من حقج تعيشين حياتج مثل اي بنت يكفي عذاب ويكفي الم على الاقل عطي نفسج مساحه تعيشين فيها عمرج وطبيعتج بدون ما تكونين حذره و متحفزه دايم للسوء
تماضر وهي تقوم واقفه بهدوء"مو بيدي غصب عني الي عاش مثلي وسط الخوف و الرعب من ان حياته تنسلب منه في اي لحظه صعب انه يعيش بسلام لن بيضل طول عمره ملاحق بضلال الخوف الي تسكن حنايا روحه وتنزع الامان من قلبه وتخليه عرضه للخوف و الرعب و الانهزام لا تطلبين مني المستحيل والي ما اقدر عليه صعب اكون مثلج او مثل غيرج انتي عشتي في كنف الي يحبونج ويرعونج ويخفون عليج من النسمه تجرحج انتي عندج اخ يقوم الارض ومن عليها اذا حد لمس منج اشعره على عكسي ادور الامان ما لقيته لقيت اقلوب حجر كل همها كيف تأذيني وبس
صبا وهي تسحبها من يدها وتقعدها "الله يهديج بس انتي كذا دايم تحولين كلمنا لغم اقعدي بس خلينا نكمل زحيرنا و نمشي حياتي انا ما قلت لج هذا عشان تغتميين انا تهمني مصلحتج وحياتج وانا عارفه ان الي تسوينه قليل فيهم ويستاهلون ازود بعد و صادقه في كل الي قلتيه ان يكون لج السند الي يحبج ويداري عنج كل شر اهم شي في هذي الدنيا الله يخليلي امي واخوي ولا يحرمني منهم
تماضر بمزح "ويخليهم لي بعد لا تنسين انا مشاركتج فيهم هههههههه
صبا من قلب "ياريت من كل قلبي تشاركيني فيهم عن حق وحقيقي بس عاد النصيب
تماضر بضحكه "هذيج قلتيها النصيب ما تدرين وش الي الله كاتبه لكل وحده فينا يلا خلينا نخلص ونمشي تأخر الوقت
\
\
\
\
\
\
/منتد قسم من حي قلم الاعضاء
دخل مكتبه بهدوء وعينه على شخص معين اليوم طلق تروف و ما رضى يطرش ورقتها حس انها اهانه لهم وله و قرر انها يسلمها لصديق عمره و لد خالته ورفيجه حسن مشى بخطواته العسكريه و المنظبطه لين وصل عند طاولته "السلام عليكم
حسن يوم شافه فز قايم له يدري ان مبارك ما يغيب عنه الا اذا كان محرج و اكيد بعد ما عرف من امه الي صار عاذر الرجال من البدايه قاله ان تروف اخته ما تنفعه بس هو الي اختار رغم انها اخته بس الحق ينقال هذي ما تنفع للمبارك و لا مبارك ينفع لها وكان هذا الشي متوقع وناطره في اي وقت وزين انه صار قبل لا تطيح الفاس في الراس ويصير بينهم حياه وبيت واعيال لن تروف عيوبها مغطيتها من راسها لين ساسها قرب منه وتخاشمو "وعليك السلام و الرحمه وينك يا رجال من متى و انا ادق عليك و انت ما ترد عسى ما شر ؟؟
مبارك محرج منه وهو يداري حرجه بصوت واطي "السموحه يا ولد خالتي والله انا مفتشل وحرج وما اني عارف كيف اشوفك وبأي وجه اقابلك وانا مطلق اختك
حسن وهو يضربه على كتفه بمزح و محبه "من صجك احنا بينا الي يخليك تستحي مني يارجال هذا امر الله وما عليه اعتراض و لو تذكر يوم جيتنا تخطب من البدايه قايلك انا ان تروف ما تصلح لك بس انت عيت و اصريت عليها يعني لو سامع كلامي كان الحين انت مريح راسك من الصدعه ...
ابتسم مبارك بمحبه له وتقدير "والله لو تسمعك خالتي لتذبحك حد يقول كذا على اخته
حسن وهو يتكلم بجيده شديده خلت مبارك يستغرب "شوف يا اخوي انا ما راح اكذب على نفسي و اغمي اعيوني عن حقيقه خواتي و عيوبهم والحقيقه تقول تروف خربها غرورها وكلام الكل عنها و عن جملها بحيث صارت ما تشوف ابعد من طرف خشمها و غرورها بجمالها يصور لها ان الكل المفروظ تحت طوعها و شورها و الي يشذ عنها يصير عدوها على العكس منها هزيج نسخه ثانيه غير مشوه و فيها من طيبه الكون كله و رقتها وحنانها بس فيها الاعناد و الاصرار على رايها حتى لو كان غلط يعني كل وحده فيهم فيها من العيوب الي اشوفها بعيني و اتعايش معها و احول اضبطها على قدر ما اقدر عشان كذا اقولك لا تنحرج و هذا كله قسمه ونصيب و ربنا سبحانه بيعوضكم الي احسن و الحين هات الي عندك و ما انت قادر تعطيني اياه من بدري
مبارك بستغراب "وش دراك ان في شي ابغي اعطيك اياه ؟؟؟
حسن "ما اقولك اني عارفك هات الورقه ...
سلمه اورقت تروف وفي عينه اعتذار لرفيقه ولد خالته لن الزمن و ااخته و طريقتها هم الي حدوه على شي كان ما وده فيه ..........بالمره ما كان وده فيه
\
\
\
\
\
\
اوصلو البيت وهم ينزلون الاغراض ويدخلونها داخل وهي تلتفت على صبا "وش فيج يلا ادخلي بتضلين واقفه ..
صبا بعجله "وين يا عمري ما اقدر بلحق اروح البيت وراي طريق
تماضر "وش بتتركين امج و تروحين ولا نسيتيها ؟؟
صبا بضحكه "خبرج عتيق امي في البيت من زمان مر عليها مبارك قبل ما يروح شغله تخبرين ما تقدر تطول وما تحب القعده برع لين وقت متأخر تدرين ترقد مبجر
تماضر "طيب بس تحملي على روحج ولين وصلتي البيت اضربي لي و اخذي بالج من الوالده وهوني عليها الي صار وربي ان شاء الله بيرزق مبارك الي احسن من تروف الف مره
صبا "امين يارب ولا يهمج بينا تلفون اشوفج العصر في الشركه في الاجتماع راح تكلمين جزوفين
تماضر "اي راح اكلمها وبقولها بكره ابغي اجتمع مع رئساء الاقسام كلهم عندي مشاريع جديده و ابغي اشوف الي لنا والي علينا اشوفج العصر يلا تحملي على عمرج
ادخلت وهي تحمل الاكياس الكثيره وتنقلها الى داخل البيت حطتهم على الارض وهي تتلفت تدور على ام خليفيه اكيد في غرفتها راحت لها ودقت الباب بنعومه وبخفه ما سمعت حس افتحت الباب بشويش و ادخلت لقتها نايمه ابتسمت بحنان وحزن قربت منها و اقعدت عن طرف ارجولها و هي تتئملها بحزن عميق يخالطه فرح ربي عوظها بها ام ثانيه وحانيه ام عمرها ما حست بحنانها ولا حبها قربت منها وحبتها على راسها وبصوت خفيض "الله لا يحرمني منج ويخليج لي يارب ...اطلعت بهدوء وخذت اكياسها و ادخلت غرفتها ترتب اغراضها وتستعد لبكره بتتصل بجوزفين قبل لا تنسى هذي سكرتيرتها الخاصه و مساعدتها "الوووووووووو ...مساء الخير جو كيفيج اسفه على ازعاجج في هذا الوقت المتاخر بس بغيتج في امر ضروري
جو"اهلين مدام تماضر كيفيك مدام الك وحشه صار لنا فتره ما شفناكي امريني
تماضر "مرسي يا جو ما يامر عليج عدو بغيت بكره جميع رئساء الاقسام في اجتماع و ابغي كل الملفات الخاصه بالمشاريع الي وصيتج عليها
جو "امرك مدام على فكره انا كنت راح اتصل في الانسه صبا عشان تقولك عن الفكسات الي وصلت من الشركه الفرنسيه و انهم حددو الاجتماع فينا اخر هذا الشهر
تماضر بهدوء"اها ....أخيراً راح يبعثون حد على العموم انا الي راح اجتمع فيهم وراح نشوف و ش اخراتها معاهم اخلالهم بشروط العقد و بنوده يعرضهم للمسائله الاقانونيه و الشرط الجزائي راح يقصمهم يفكروني العب معاهم انا
جو "في الحقيقه مدام في عروض اجاتهم من شركات ثانيه و بأسعار اقل من الي احنا وضعنها عشان كذا بيحاولو يتملصو
تماضر بسخريه "ههههه....دبور و زن على خراب عشه راح يشفون الوجه الثاني بس كل شي في وقته و الحين اخليج و لا تنسين الي وصيتج عليه
جو "حاضر مدام بتأمري على شي ثاني ؟؟؟
تماضر "لا شكراً اشوفج بكره ...مع السلامه
سكرت التلفون عنها و على ملامحها ابتسامه ساخره هي ادخلت مجال الرجل فيه هو الاقوى و يضن دخول المره فيه ضعف يمكن يستغلونها عن طريقه بس الي ما يعرفونه عنها انها في شغلها ما تعرف الرحمه و اكبر عدو لها هو الغباء و النضره الفوقيه الي يشوفونها بها كونها مره هزت كتفها بعدم اهتمام و رتبت اغراضها و انسدحت على سريرها وهي تفكر بشغلها حياتها انتقامها لحد ما غفت عينها و راحت في عالم الاحلام
\
\
\
\
\
\
في غرفه نومه هو يتطلع على كل الجهات البيت حلوووو ومريح و بالمواصفات الي بغاها سمع طق خفيف على باب الغرفه "ادخل يا سالم ...
سالم "صباح الخير زين انك قاعد نطلع للمسجد و لا تعبان
عيضه وهو يوقف بهدوء ويلبس غترته"لا انا جاهز من زمان
سالم "يلا مشينا ...على فكره اليوم موعدنا مع الرجال عشان تشوف المبنى
عيضه "انا ما نسيت عادني في كامل عقلي ما خرفت ولا ضاعت اعلومي من الي فيني
سالم بهدوء وعتب "اسف بس انا ما قصدت شي بكلامي و انت عارف
عيضه وهو يشوفه بعتذار حزن "السموحه يا اخوي السموحه والله اني عارف كل الي اطلبه استحملني من لي غيرك يستحملني و تقلباتي المزاجيه الله يعينك بس
سالم بأبتسامه "ان ما ستحمتلتك وانت اخوي الي ما جابته امي و صاحب عمري اجل من استحمل امش يارجال صدق الله يعيني عليك بس
كملو طريقهم للمسجد الي بمحاذات بيتهم وهم توهم بيدخلون تلاقو عند الباب برجال كبيرو عياله اعتذر عيضه "السموحه يا يوبه تفضل
ابو سعود بمحبه "زاد فضلك يا ولدي ضيقنا عليك
عيضه بهدوء و عنده احساس ان هذي المحه في وجهه هذا الرجال الكبير و عياله كنه شايفها بس وين مهب عارف "هذا بيت الله طريقه لي ولك ولكل ساعي له تفضل انت اول ...
ادخلو جميع في مكان تتساو فيه الروس الغني و الفقير و الاصغير و الكبير و العاصي و التايب الجاهل و العالم في حضره الخالق سبحانه في مكان تصفو فيه النفوس و القلوب وتسمى في ملكوت الرحمان سبحانه اسمعو كلمه استووووووووو و اعتدلو
\
\
\
\
\
\
"صباح الخير يا الغاليه ........وهي تحب ام خليفه على راسها بحب وحنان طاغي ...وش مسوي الحلووووووووو لنا ليه يومه تعبتي نفسج الله يخليج لي
ام خليقه وهي تحضنها برقه وحب "صبحج الله بنوره يا الغلا عساج يومه استانستي ويا رفيجيتج ما شاء الله عليها هي و امها والله خيره الناس و لدهم يعد عيني عليه بارده رجال و النعم فيه
ابتسمت تماضر برقه "اي يومه صدقتي صبا مو بس رفيقتي هذي اختي يومه اختي و مبارك رجال و قف معاي وقفه وما قصر اعتبرني مثل اخته صبا و اكثر ربي عوضني بهم خير و انتي الاعوض الاكبرو انتي الحنان الاكبر الله لا يخليني منج يارب و يخليج لي
ام خليفه وهي تقعدها و تقص لها الخبز "ولا يخليني منج يارب تعالي اكلي يومه انيت ما راح تطلعين ولا و انتي متريقه ما تروحين شغلج على خلاه
ابتسمت تماضر بحب هذا الحنان ما شافتها عمرها كله من امها والله عوضها بأم قلبها يحمل حنان الكون كله هذي الرعايه والاهتمام شي جديد وحلووووووووووو عليها
\
\
\
\
\
\
توه داخل جاي من دوامه تعبان مره و حاس بثقل الدنيا على راسه مسؤليه امه وخواته شي ثقيل حمل مره ثقيل و الحين طلاق الست تروف دخل عليهم بهدوء شافهم مجتمعين على طاوله يتريقون اخ ما يذبحه الا برودها و قله عقلها ولا كنها مسويه شي "السلام عليكم ....قرب من امه وحبها على راسها وعينه على تروف وبصوت يحاول فيه يضبط نفسه و يتحكم في اعصابه ...زين اني حصلت حضرت جنابج قبل ما يبتدي دوام اهياتيج يا ست تروف ..
امه بخوف من ملامحه الغاضبه "حسن وش فيك على اختك وانا امك
حسن بغضب عاتي "ما تعرفين يومه وش فيني انا اقولج ...و هو يطلع اورقت الطلاق ويحذفها في وجهه تروف المذهوله منه ومن تصرفه على الصبح .... تفضلي يا مدام هذي اورقتج و صلتج برسم الخدمه
تروف وهي تاخذ الاورقه وهي ساكته الحين بس حست بفداحه الي هي فيه لقب مطلقه شي ما خطر في بالها بس الدنيا غرتها هزت راسها بصمت وفارت مشاعر الغضب فيها وهي توقف وتشوف اخوها بغضب "الحين حضرت جنابك ليه معصب لا انا اول وحده تطلق ولا اخرها وبعدين هذا احسن انا وهو مومناسبين بعض تفكيره رجعي ومتخلف يغي يحبسني في قمقم ويسكر علي ليه وش صاير رجعنا عصر الاستعباد و انا ما ادري
كان يسمعها وهو ساكت شافها بنظره محتقره خلتها تحس انها ولا شي "انتي وحده الكلام ضايع معاها و الخسران هو انتي مو هو مبارك الف وحده تتمنى الارض الي هو يوطاها و تفكيره الي مو عاجب حضرت جنابج كان من باب الحرص و الحب عليج لنج عرضه وشرفه و ما يكون رجال حر يمشي في دمه النخوه و الرجوله اذا ما شاف العوج فيج وما يصلحه انا ليه اتعب نفسي على الفاضي قلتله من البدايه انتي وحده ما منج فود الكلام ضايع معاج بس هو الي صمم صج لين قالو ان الحب اعمى والحين الغشاوه الي على اعيونه انزاحت و شافج على حقيقيج وحده سطحيه و انانيه ما تحبين الا نفسج وشايفه الدنيا على هواج ما تحترمين حد ومغتره بجمالج ونسيتي انا الانسان منا مرده للتراب وجمالج الي تفاخرين به مرده بيروح وماراح يبقى منه شي غير ذيك الساعه من رجل يحبج ويحترمج وعيال يكونون سندج وفخرج في هذي الدنيا بس وش الفايده انتي تسمعين الكلم من هذا الصوب ويطلع من الصوب الثاني انا رايح غرفتي ابرك لي لن لساني كل معاج وانتي مثل ما انتي من رخصتكم .....
كانت واقفه مثل الصخر ما تحركت وفي يدها اورقتها حاسه بسخونه غريبه اول مره في حياتها كلها تشعر بهذا الاحساس ارفعت يدها على خدها مو مصدقه الي لمسته اصابعها معقول هذي دموع معقول الحجر حس معقول ارجعت فيها الاحساس و الروح حست انها بتختنق كلامه كان جرح في الصميم عراها من غطاها ومن زيفها و خلاها تشوف نفسها على حقيقيتها صدت عنهم وهي تركظ رايحه على غرفتها
هزيج بذهول وهي تطالع امها الي اكثر منها ذهول و استعجاب " يومه شفتي الي انا شفته ولا اعيوني مغبره وما عدت اشوف عدل معقول تروف تبكي وش الي صاير في الدنيا عز الله اكيد في شي بروح اشوفها
امها ضلت ساكته صج اول مره في حياتها تشوف تروف تصيح من يوم وهي صغيره لحد اليوم وطلباتها مجابه من كل الجهات لنها الاجمل في و الدلوعه بس اليوم تشوف غلطتها الكبيره اليوم تشوف بنتها صوره مشوهه انانيه و فارغه وهذي هي تنصدم بالحقيقه من اخوها اسمعتها من اقرب الناس لها يارب ارحمني برحمتك.....
رقت فوق لغرفه اختها وقفت عند الباب متردده خايفه تدخل وخايف تواجهها بس بعد ما تهون عليها هذي في الاول و الاخير اختها طقت على بابها بخفه ومحد رد عليها اضربت مره ثانيه وبعد محد رد عليها خافت تكون فيها شي ذي المره اضربت بطريق قويه
وبصوت عالي "تروف ارجوج افتحي الباب الله يخليج ردي علي والي يرحم ولديج فيجي الباب ...ومافي اي رد قامت تظرب على الباب بقوه اكبر مرعوبه وخايفه بشكل كبير فجئه انفتح الباب علىوجه عمرها ما شافت اختها عليه مليان دموع وعيونها فيها انكسار غريب عليها اول مره تشوفه تروف بصوت مخنوق "ليش جايه تبغين تكملين الي ابتداه اخوج و لا جايه تشمتين فيني ؟؟؟؟
هزيج وبحنان ورقه "انا اتشمت فيج تروف لو العالم كله تشمت فيج انا لا انا اختج و غلاتج عندي ما مثلها غلاه تروف يا عمري ليه البكي الحين الي صار صار و الي قاله حسن عشانه يحبج و تهمه مصلحتج تروف احنا ما يهمنا في هذي الدنيا غير سعادتج وراحتج واذا في فراقج عن مبارك سعادتج خلاص هذج تطلقتي منه وش تبغين بعد
تروف ادخلت غرفتهاوهي تصيح كلام اختها صحاها على حقيقيه وحقيقه مئولمه وهي انها بغرورها و رفعت نفسها ضيعت منها اهم الاشياء اخوانها امها وضيعت دينها وربها لما شافت الدنيا و اركظت ورا ملذاتها و نست ان يوم الاحساب جاي تصيح بقوه وضيعت مبارك الي كان همه مصلحتها و انها تكون في نظره احسن الناس حست بيد تمسح على راسها بحنان قفلت على قلبها ومشاعرها ارتمت في حظن اختها وبصوت مليان ندم وحسره "انا انسانه كريهه بشعه اليوم بس شفت نفسي على حقيقيتها ان ضيعت كل شي من يدي الرجال الوحيد الي حبني بصدق و كان همه اني اكون احسن الخلق وضيعت اخواني الي صرت في نظرهم ابشع البشر ونسيت ربي واشتريت دنيتي قوليلي وش اسوي كيف ارد الي يحبوني كيف اطلب منهم الغفران و السماح علميني كلكم تكرهوني كلكم
هزيج بحنان وهي تضمها لحظنها "انتي من صجج مافي احد منا يكرهج احنا هلج و احن الناس عليج و كل الي بغيناه انج تفتحين اعيونج على حقيقيه الدنيا ما هي لعبه ووناسه وبس تراها دينه احساب وعقاب فكري في اخرتج فكري في ان الموت يخطفنا في لمح البصر و لزم نكون مستعدين له بعملنا و بحرصنا على دينا و تمسكنا به تروف تقدرين تقولين لي ليه شفتي مبارك بنظره قللتي فيها من احترامه ومن رجولته ليه شفتيه متخلف و متعصب هل حرصه عليج و على شوفاته تشوفينه تخلف لو ما سوى الي سواه كان ما راح يستحق ان يطلق عليه رجال
تروف وهي تمسح دموعها بكف يدها وبصوت مليان ندم "انا غلطانه و انتو بعد غلطانين معاي كان لزم تمنعوني الكلام بس ما يفيد اليحن خلاص كل شي ضاع و مبارك كان صح و انا كنت غلط كيف اصلح الي سويته كيف ؟؟؟
هزيج برقه ارفعت راسها وبصوت حنون "تقدرين تصلحين كل شي واهم شي تروحين الحين و تكلمين اخوج الي ما خذ على خاطره و بعدين تنسين كل صديقاتج الي بدال ما يكونون عون لج صارو عليج هم السبب الرئيسي اختيارج لهم غلط رسولنا عليه افضل الصلاه حذرنا من صديق السوء و انتي كل الي مصادقتهم عليهم علامه حمره هههههه وكل الالوان اذا تبين ....
تروف وبسمه ضعيفه تشق شفايفها "انتي صح ...و هي تقوم وتمسح ادموعها ...و اول شي بسويه استرد فيه احترام اخوي و محبته ...و امسكت يد اختها هزيج ...و انتي سامحتيني ...
وهي تضغط على يد اختها بحب "انتي اختي وما في الي اسامحج عليه يلا امشي معاي نروح لخونا
\
\
\
\
\
\
وقفو في الموقف الخاص بهم والتفت صبا على تماضر "متى امر عليج الضهر ...
تماضر وهي تزل من السياره "لا اليوم حولي تتسئذنين بدري اليوم خلينا نروح ناخذ لي سياره ما يصير كل يوم توصليني انتي هذا تعب عليج
صبا "اوكي بحاول بس ما اظمن لج بيكون بينا تلفون
تماضر "زين بس اذا ما عطوج علميني عشان اخذ وحده من سيارت الشركه
صبا "يلا اخليج في امان الله ...
اركبت المصعد وفي يدها شنطت الاوراق وطلعت على اللوبي و هي تمر على جميع الاقسام الكل كان يصبح عليها و عارفين ان الراس المدب في نجاح و شهرت هذي الشركه هي في هذا الكيان الاصغير و الناعم عقل داهيه و متمرس وله ذكاء يفوق الحد وكونهامره و في مجتمع شرقي ما منعها من النجاح و لا من السلطه الي تتمتع بها وكل هذا مغلف بغلاف ناعم من الانوثه و الرقه ادخلت مكتبها و هي تشوف سكرتيرتها جو الي وقفت لها "السلام عليكم ...
جو و هي تاخذ منها الشنطه و بحترام "و عليك السلام مدام صباحك خير اجتماعنا راح يكون في الوقت الي حددتيه اجيب الك الكوفي
وهي تقعد على كرسيها "اول شي ابغيه البريد و معاه الكوفي ....
جو "تأمري امر مدام .....
تصفحت اوراقها المهمه و الي خذتها معاها و هي طالعه من البيت كل الي يربط الخسيس لزم ترفع هذي النسخ في مكان ما تطولها يد حد و لا تخطر في بال حد الخزنه الي اهني تفي بالغرض محد يعرف مكانها غيرها اليوم راح يكون موعد المحامي مع الخسيس نفسها تشوف وجهه بس عشان يبرد قلبها بس ليه الاستعجل ما يقولون ان الانتقام طبق يفضل اكله وهو بارد ههههههههههههه شي مضحك ومبكي لنهم مو عارفين الي راح يجيهم منها هذي اول الضربات و الاجاي اكثر قامت وهي تتطلع من دريشه على البحر شركتها في ارقى و افضل الاماكن الحيويه في الدوحه وهي تضم اكبر و اضخم الشركات العالميه و الي هم ممثلين عنها نجاحها ما منع عنها احساس ضل بداخلها احساس بكسره النفس و بكسره الروح احساس ابعدته في مكان بعيد وقاصي محد يقدر يوصله غير شخص واحد هدم كل هذي الحواجز و كسرها عشان يعيشها قهر و حرمان عاشته كل هذي الاسنين الي هرب فيها و ابتعد ضغطها على كفوفها وهروب الدم منها من قوه الضغط و ضياعها في عالم ثاني عالم الذكريات هذا الانسان كان ولا زال بالنسبه لها لغز صعب حله او حاولت تحله وما اقدرت اسبوع من الحياه معاه اسبوع كانو جحيم لها وله كان الاتصال بيهم كزواج يصير تحت الجبر و الغصب تحت الغضب لكن ليه تكذب صح كان فيه الغضب و الغصب بس في لحظات ينقلب و يصير شي ثاني عمرها ما عاشته الا معاه اخ يا القهر اكره و لا وش معقول احب عدوي معقول طول هذي الاسنين ما نسيت همس غضب يتحول لعشق همس الم يتحول لحب و غرام يارب انا محتاره وبموت بحيرتي عرافه عدوي بس فيه الي منعيني عنه وينه مني وين
\
\
\
\
\
\
دخل عليه سكرتيره مرعوب وخايف و شكله متروع من قلب حمدان بغضب وصوت عالي "عمى بعينك وش مدخلك بدون اذن ...
سكرتيره بخوف "طال عمرك في محامي برع ومعاه الشرطه يبغون جنابك
حمدان برعب واستغراب "يبغوني وش يبغون ما عرفت ليه ما سألتهم ..........و قبل لا يكمل كلمته انفتح الباب على الشرطي الي داخل عليه ومعاه شخص ثاني و بصوت جهوري وعالي "انت حمدان ال.....
وبروعه وخوف "اي انا هو وش بغيتو وليه جاين هنا
الشرطي "الشرطي انت مطلوب في القسم عندنا في بلاغ ضدك من السيده تماضر خالد و عليك تجي معانا الحين
مذهول ومو مصدق "نعم من قلت تماضر
تكلم الشخص الثاني "اي نعم من السيده تماضر و انا محاميها و الموكل عنها ضدك
الشرطي وهو يأشر على زميله "قوم بشغلك تفضل معانا بدون اي مشاكل و في القسم راح تعرف و ش الي منسوب لك تفضل
مشى بخوف و رعب وغضب هذي و ش سوت ومتى صار كل هذا يا ويلها مني بنت الكلب يا ويلها مني موتهاعلى يدي مثل ما كان موت ابوها موتج على يدي يا بنت خالد
\
\
\
\
\
\
التعديل الأخير تم بواسطة العامريه ; 04-04-09 الساعة 08:02 AM
سبب آخر: تكبير الخط
|
04-04-09, 07:28 AM
جديد مواضيع قسم الارشيف
العرض العادي
